පුවත්

ආණ්ඩුවේ බැසිල් විරෝධී සහ බැසිල් පාර්ශ්වය අතර යළිත් අභ්‍යන්තර ගැටුම ඉස්මතුව ඇති බව වාර්තා වෙයි.

ආණ්ඩුවේ අභ්‍යන්තර ආරංචි මාර්ග සඳහන් කරන ආකාරයට කෙරවලපිටිය යුගදනවී බලාගාරය ඇමරිකානු නිව් ෆෝට්‍රස් සමාගමට පැවරීම ඊට හේතුව වී තිබේ.

මේ සම්බන්ධයෙන් කැබිනට් මණ්ඩලය වෙත මුදල් අමාත්‍ය බැසිල් රාජපක්ෂ විසින් අමාත්‍ය මණ්ඩල පත්‍රිකාවක් ඉදිරිපත් කළ නමුත් එය යළි විමසීමකට සහ සංශෝධනය කිරීමට නියමිතව තිබී ඇත.

නමුත් ගිවිසුම අත්සන් කර ඇත්තේ නිසි නිර්දේශ ලබානොගෙන බව බැසිල් විරෝධී පාර්ශ්වයෙ අදහස වී තිබේ.

මේ අනුව යුගදනවි බලාගාරයේ 40%ක කොටස් අමෙරිකාවට පැවරීමට ගත් තීන්දුව සම්බන්ධයෙන් ආණ්ඩුවේ හවුල්කාර පක්ෂ 10ක නියෝජිතයන් කොළඹ කොමියුනිස්ට් පක්ෂ කාර්යාලයේ හමුවී සාකච්ජාවක නිරත වී ඇති බව වාර්තා වෙයි.

මෙම සාකච්ජාවට විමල් වීරවංශ, වාසුදේව නානායක්කාර, දයාසිරි ජයසේකර, තිස්ස විතාරණ, වීරසුමන වීරසිංහ ඇතුලු පිරිසක් සහභාගී වී ඇති බවත් වාර්තා වෙයි.

මෙහිදී ජනාධිපතිවරයා ලංකාවට පැමිණි විගස මේ සම්බන්ධයෙන් සාකච්ජා කිරීමටත්, අගමැතිවරයා සමග සාකච්ජාවක් පැවැත්වීමටත් තීන්දු වී ඇත.

මෙහිදී දේශපාලන තීන්දුවක් ගැනීමට සූදානම් විය යුතු බවට යෝජනා වු බවක් සමාජ මාධ්‍ය ඔස්සේ පැතිරෙමින් පවතී.

කෙසේ වුවත් ආණ්ඩුවේ අභ්‍යන්තර ආරංචි මාර්ග සඳහන් කරන්නේ මේ මොහොතේ අදාළ පාර්ශ්ව ආණ්ඩුවෙන් ඉවත්වීමක් කිසිසේත් අපේක්ෂා කළ නොහැකි බවයි.

කෙසේ වුවත් ඉදිරි ප්‍රධාන මැතිවරණයක් අවස්ථාවේ ආණ්ඩුවේ බරපතළ බෙදීමක් සිදුවීමේ වැඩි ඉඩක් ඇති බවත් එම ආරංචි මාර්ග පවසයි.

තවත් කොරෝනා මරණ 93 ක් ඊයේ (19) දිනට අදාළව සෞඛ්‍ය සේවා අධ්‍යක්ෂ ජනරාල් විසින් තහවුරු කර ඇති අතර ඊට අදාළ නිවේදනය රජයේ ප්‍රවෘත්ති අධ්‍යක්ෂ ජනරාල් විසින් අද (20) නිකුත්කර ඇත.

ඒ අනුව මෙරට සමස්ථ කොරෝනා මරණ සංඛ්‍යාව 12218ක් දක්වා ඉහළ ගොස් තිබේ.

මරණ 93 අතර කාන්තාවන් 48 ක් සහ පිරිමි පුද්ගලයින් 45 කි.

එසේම මේ මරණ අතර අවුරුදු 60 සහ ඊට වැඩි පිරිස 60කි.

රජයේ ප්‍රවෘත්ති අධ්‍යක්ෂ ජනරාල් විසින් නිකුත්කර ඇති නිවේදනය පහත දැක්වෙයි.

විනය පරීක්ෂණ මුලින්ම පැවැත්විය යුත්තේ තමන්ට නොව සරත් වීරසේකර ගාමිණී ලොකුගේ, සාගර කාරියවසම් යන අයට බව ශ්‍රී ලංකා පොදුජන පෙරමුණේ පාර්ලිමේන්තු මන්ත්‍රී ජගත් කුමාර පවසයි.

තමන් විනය පරීක්ෂණවලට බිය නැති බවද පැවසූ ඔහු වත්මන් ආණ්ඩුව ප්‍රශ්න රැසක් ඇති වූයේ මෙම මැති ඇමැතිවරුන් විසින් බවද පැවසීය.

ජගත් කුමාර මන්ත්‍රීවරයා මෙසේ අදහස් දක්වා සිටියේ අද (20) කොළඹ පැවති මාධ්‍ය හමුවකදී ය.

විරෝධතා වල යෙදෙන මිනිසුන් ත්‍රස්තවාදීන් යයි කියමින් හරි දේ කියන මිනිස්සුන්ට විනය පරීක්ෂණ තබන්නැයි කියන සරත් වීරසේකර හිට්ලර් කෙනෙකු වීමට උත්සාහ කරන බවට ද ඔහු චෝදනා කළේය.

ගුරු උද්ඝෝෂණ මෙතරම් දුර පැමිණියේ සරත් වීරසේකරගේ කටයුතු නිසා බවද පැවසූ මන්ත්‍රීවරයා , දැන් කෑ ගසන සමහරුන් තමන්ගේ වැරදි හෙලිවෙතැයි බියෙන් පසුගිය යහපාලන සමයේ සැඟව සිටි බවද කියා සිටියේය.

පළාත් සභා සම්බන්ධයෙන් පක්ෂයේ මතයට විරුද්ධව ප්‍රකාශ නිකුත් කළේ සරත් වීරසේකර බවත් මුලින්ම විනය පරීක්ෂණය කළ යුත්තේ පක්ෂ මහ ලේකම් සාගර කාරියවසම්ට බවත් ඔහු පැවසීය.

පපළාත් සභා පැවැත්වුවා නම් ජනප්‍රසාදයෙන් ජය ජය ගැනීමට තිබුණද දැන් එම මැතිවරණය ජයග්‍රහණය කිරීම ප්‍රශ්නයක් බවත් ඔහු තවදුරටත් කියා සිටියේය.

රටබීම හල් විවෘත කිරීම සඳහා ගෙනඇති තීන්දුව පිළිබඳව තමන් කිසිවක් නොදන්නා බව තරුණ හා ක්‍රීඩා අමාත්‍ය නාමල් රාජපක්ෂ  පවසයි.

කොවිඩ් මර්දන කමිටුව හෝ ආණ්ඩුව හෝ එවැනි තීරණයක් නොගත් බවයි ඇමතිවරයා පවසා ඇත.

තංගල්ලේදී මාධ්‍යවේදීන් සිදුකළ විමසීමකට ප්‍රතිචාර දක්වමින් අමාත්‍යවරයා  මේ බව සඳහන් කර ඇත.

ඇඳිරි නීතිය ක්‍රියාත්මක කිරීම හරහා වසංගතය යම් ප්‍රමාණයකට හෝ මර්දනය කර නැවත රට විවෘත කිරීමට සූදානම් වෙද්දී සෙනඟ පිරෙන්නේ බාර් ඉදිරිපිට නම් ඉන් එහාට රට ගමන් කරන්නේ කොතැනකටද යන්න පිළිබඳව දෙතුන් වරක් කල්පනා කළයුතු බවයි නාමල් රාජපක්ෂ  එහිදී සඳහන් ඇත.

අත්‍යවශ්‍ය අවශ්‍යතා පවා සම්පූර්ණ කරගත නොහැකි ආකාරයට ආර්ථික අපහසුතා තිබෙන බවට ජනතාව ප්‍රකාශ කළද සුරාසැල් විවෘත වූ පසුව එවැනි තත්ත්වයක් දක්නට නොලැබුණු බවත්, ඇඳිරි නීතිය තිබියදී පවා සුරාසැල් අසල ජනතාව රැස්කමින් සිටි බවත් ඇමතිවරයා සඳහන් කර ඇත.

ජනතාව සහ ආණ්ඩුව මීට වඩා අනාගතවාදී වැඩපිළිවෙලක් සමග කටයුතු නොකළහොත් ඉදිරියේදී තත්වය දරුණු විය හැකි බවද ඔහු ප්‍රකාශ කර ඇත.

LNW

කිලිනොච්චි මූලික රෝහලේ කොරෝනා මර්ධන අංශයට අවශ්‍ය මෙට්ට ඇඳ ඇතිරිලි සහ වෛද්‍ය ආම්පන්න පසුගිය 19 වන දින ජනතා විමුක්ති පෙරමුණ විසින් ලබා දෙන ලදී.

මෙම අවස්ථාවට කිලිනොච්චි මූලික රෝහලේ ප්‍රධාන වෛද්‍ය අධ්‍යක්ෂක සෙල්වරාජා සුගන්ධයන් සහ කාර්ය මණ්ඩලය, සහභාගි වූහ.

එසේම කිලිනොච්චි දිස්ත්‍රික්කයේ ජනතා විමුක්ති පෙරමුණේ සංවිධායක ඉලයතම්බි ගණේෂපිල්ලේ, පිරන්සිස් ජොසප් ඇතුළු සහෝදරවරු සහභාගි වූහ.

"ත්‍රස්තවාදී ක්‍රියාවන්ට සම්බන්ධ සැකකරුවන් ලෙස අත්අඩංගුවට ගෙන සිටි බොහෝ තරුණයින් තමා බලයට පැමිණි පසු නිදහස් කළ බවත්, නිදහස් කළ නොහැකි සෙසු පිරිස සම්බන්ධයෙන් නීතිමය කටයුතු කඩිනම් කරන බවත් දිගුකලක් අත්අඩංගුවේ පසුවන ද්‍රවිඩ තරුණයන් පිළිබඳව නීති කෘත්‍ය අවසන් වූ පසු දීර්ඝ කාලයක් ඔවුන් අත්අඩංගුවේ සිටීම පිළිබඳ සැලකිල්ලට ගෙන එම පිරිසට ජනාධිපති සමාව ලබාදීමට තමා නොපැකිළෙන බවත්" ජනාධිපති ගෝඨාභය රාජපක්ෂ ජගත් මණ්ඩල මහ ලේකම් අන්ටෝනියෝ ගුටරේස් හමුවේ පවසා ඇත.

ඊයේ (19) සිදුව ඇති විශේෂ හමුවකදී මේ බව සඳහන් කර ඇති අතර ඒ බව ජනාධිපති ගෝඨාභය ගේ නිල ෆේස්බුක් පිටුවේ ද නිවේදනය කර ඇත.

ජනාධිපති ගෝඨාභය ගේ නිල ෆේස්බුක් පිටුවේ සඳහන් නිවේදනය පහත දැක්වෙයි.

ජාතීන් අතර සමගිය වර්ධනය කර ගනිමින් ඉදිරියට ගමන් කිරීමට එක්සත් ජාතීන්ගේ සංවිධානයේ උපරිම සහාය ඉතා ධනාත්මකව ශ්‍රී ලංකාවට ලබාදෙන බව එහි මහලේකම් ඇන්ටෝනියෝ ගුටරේස් (Antonio Guterres) මහතා ජනාධිපති ගෝඨාභය රාජපක්ෂ මැතිතුමා සමග පවසයි.

ඊයේ (19) පස්වරුවේ නිව්යෝර්ක්හි එක්සත් ජාතීන්ගේ මූලස්ථානයේ දී ජනාධිපතිතුමා සහ එක්සත් ජාතීන්ගේ සංවිධානයේ මහලේකම්වරයා අතර පැවති විශේෂ හමුවේදී ඔහු මේ බව සඳහන් කළේය.

එක්සත් ජාතීන්ගේ මූලස්ථානයට පැමිණි ජනාධිපතිතුමා උණුසුම් අයුරින් පිළිගත් ගුටරේස් මහතා, 1978 වසරේදී අන්තර් පාර්ලිමේන්තු සංගමය නියෝජනය කරමින් ශ්‍රී ලංකාවට පැමිණි තමන් මහනුවර, අනුරාධපුරය, පොළොන්නරුව සහ ත්‍රිකුණාමලය ප්‍රදේශවල කළ සංචාරයන් හා ශ්‍රී ලංකාව පිළිබඳව සුන්දර මතකය අවධි කළේය. එක්සත් ජාතීන්ගේ සරණාගතයින් පිළිබඳ මහකොමසාරිස් ලෙස ශ්‍රී ලංකාව සම්බන්ධයෙන් වැඩ කිරීම හා 2006 වසරේදී එවකට ජනාධිපති මහින්ද රාජපක්ෂ මැතිතුමා හමුවූ අවස්ථාව පිළිබඳවත් ගුටරේස් මහතා විසින් මෙහිදී සිහිපත් කරනු ලැබිණ. වසර 30කට ආසන්න කාලයක් පැවති ගැටුම්කාරී බව නිසා ඉතා සංකීර්ණ තත්ත්වයකට වැටීමට සිදුවුවත් ඉන්දියන් සාගර කලාපයේ විශාල සමාජ හා ආර්ථික කර්තව්‍යයක් ඉටුකරන ශ්‍රී ලංකාව තුළින් ඉදිරියටත් එය අපේක්ෂා කරන බව මහලේකම්වරයා සඳහන් කරනු ලැබිණ. එක්සත් ජාතීන්ගේ සංවිධානයේ මහලේකම්වරයා සමග සාකච්ඡා කිරීමට අවස්ථාව ලැබීම සතුටට කරුණක් බව පැවසූ ජනාධිපතිතුමා, ලෝකය මුහුණ දී සිටින ඉතා අසීරු කාල පරිච්ඡේදයක එක්සත් ජාතීන්ගේ සංවිධානය මෙහෙයවීම පිළිබඳව සහ දෙවන වරටත් මහලේකම් ධූරයට පත්වීම පිළිබඳව සිය සුභාශීංසන ඔහු වෙත පිරිනැමීය. කුඩා ආර්ථිකයක් ඇති ශ්‍රී ලංකාව වැනි රටක් කොවිඩ් වසංගතය හමුවේ මුහුණ දෙන අභියෝග පිළිබඳව රාජපක්ෂ මැතිතුමා එක්සත් ජාතීන්ගේ මහලේකම්වරයා දැනුවත් කළේය. කොවිඩ් වසංගතය හමුවේ ශ්‍රී ලංකාවේ අධ්‍යාපනයට සහ ආර්ථිකයට එල්ල වී ඇති දැඩි බලපෑම පිළිබඳව දීර්ඝ වශයෙන් කරුණු ගෙනහැර දැක්වූ ජනාධිපතිතුමා ලෝක සෞඛ්‍ය සංවිධානය වසංගතයට සාර්ථකව මුහුණදීමට දෙන සහාය ඇගැයීමට ලක් කළේය.

මේ වන විට සමස්ත ජනගහණයෙන් අඩකට වැඩි පිරිස පූර්ණ එන්නත්කරණයට ලක් කර ඇති බව පෙන්වා දුන් ජනාධිපතිතුමා නොවැම්බර් මස අවසන්වීමට පෙර වයස අවුරුදු 15ට වැඩි සියලු දෙනා පූර්ණ එන්නත්කරණයට භාජනය කිරිමට සියලු කටයුතු සැලසුම් කර ඇතැයි සංඛ්‍යාලේඛන සහිතව පෙන්වා දුන්නේය. එන්නත්කරණයේදී ශ්‍රී ලංකාව අත්කරගෙන ඇති ප්‍රගතිය මෙහිදී මහලේකම්වරයාගේ ප්‍රශංසාවට ලක් විය. 2019 වසරේ දී ජනාධිපති ධූරයට පත්වූ තමන් ජනතාවට දුන් පොරොන්දු ඒ අයුරින්ම ඉටු කිරීමට කොවිඩ් වසංගතය විශාල බාධාවක් වූ බව ජනාධිපතිතුමා පෙන්වා දුන්නේය. එම තත්ත්වය හමුවේ වුවද වසර 30කට අධික කාලයක් පැවති ත්‍රස්තවාදය පරාජය කිරීමෙන් පසු ඇති වූ අතුරු ප්‍රතිඵල විසඳා ගැනීමට ගත් පියවර ජනාධිපතිතුමා සවිස්තරාත්මකව පැහැදිළි කළේය. වින්දිතයින්ට වන්දි ගෙවීම, ඉඩම් නැවත පවරාදීම හා 2009 වසරේදී මහින්ද රාජපක්ෂ මැතිතුමාගේ මගපෙන්වීම යටතේ උතුරු නැගෙනහිර පළාතේ කළ විශාල සංවර්ධනය හා උතුරු පළාත් සභාව සඳහා ප්‍රජාතන්ත්‍රවාදීව නියෝජිතයන් තෝරා ගැනීමට අවස්ථාව හිමිකරදීම පිළිබඳව ජනාධිපතිතුමා කරුණු පැහැදිළි කළේය. අතුරුදන් වූ පුද්ගලයන් පිළිබඳව රජය විසින් ගතයුතු පියවරයන් හැකි ඉක්මණින් ගන්නා බව හා මරණ සහතික නිකුත් කිරීම වැනි කටයුතු කඩිනම් කරන බව ජනාධිපතිතුමා මහලේකම්වරයා සමග පැවසීය.

ත්‍රස්තවාදී ක්‍රියාවන්ට සම්බන්ධ සැකකරුවන් ලෙස අත්අඩංගුවට ගෙන සිටි බොහෝ තරුණයින් තමා බලයට පැමිණි පසු නිදහස් කළ බව පෙන්වා දුන් ජනාධිපතිතුමා, නිදහස් කළ නොහැකි සෙසු පිරිස සම්බන්ධයෙන් නීතිමය කටයුතු කඩිනම් කරන බවත් දිගුකලක් අත්අඩංගුවේ පසුවන ද්‍රවිඩ තරුණයන් පිළිබඳව නීති කෘත්‍ය අවසන් වූ පසු දීර්ඝ කාලයක් ඔවුන් අත්අඩංගුවේ සිටීම පිළිබඳ සැලකිල්ලට ගෙන එම පිරිසට ජනාධිපති සමාව ලබාදීමට තමා නොපැකිළෙන බවත් මහලේකම්වරයා සමග පැවසීය.

ශ්‍රී ලංකාවේ ප්‍රජාතන්ත්‍රවාදය ශක්තිමත්ව ස්ථාපනය කිරීම තම අරමුණ බවත්, ඒ අනුව උද්ඝෝෂණ ආදියට පෙරදී කළ මෙන් බැටන් ප්‍රහාර, ජල ප්‍රහාර එල්ල කිරීම වැනි දේ තම රජය යටතේ සිදු නොවන බවත්, උද්ඝෝෂකයන් සඳහාම තම කාර්යාලය අසළ වෙනම ස්ථානයක් වෙන් කර දුන් බවත් ජනාධිපතිතුමා පැවසීය.

රටේ දියුණුව හා සංහිඳියාව ඇති කිරීමට සිවිල් සංවිධාන සමග එක්ව කටයුතු කරන ආකාරය ද රාජපක්ෂ මැතිතුමා විසින් පැහැදිළි කරනු ලැබීය. ශ්‍රී ලංකාවේ අභ්‍යන්තර ගැටලු රටේ අභ්‍යන්තර යාන්ත්‍රණයක් ඔස්සේ විසඳාගත යුතු බවත්, ඒ සඳහා ද්‍රවිඩ ඩයස්පෝරාවට සාකච්ඡා සඳහා ඇරයුම් කරන බවත් ජනාධිපතිතුමා පැවසීය.

එක්සත් ජාතීන්ගේ සංවිධානය සමග සැමවිටම ඉතා සමීපව කටයුතු කිරීමට සූදානම් බව සඳහන් කළ ජනාධිපතිතුමා නැවත වරක් බෙදුම්වාදයක් ශ්‍රි ලංකාවේ ඇති නොවන බවට තමාට සහතික විය හැකි වුවත්, ආගමික අන්තවාදය පිළිබඳව රජයක් ලෙස ශ්‍රී ලංකාව සේම සෙසු රාජ්‍යයන්ද සුපරීක්ෂාකාරී විය යුතු බව සඳහන් කළේය.

මෙරට විශාලතම ජාතික සම්පතක් වන කෙරවලපිටිය විදුලි බලාගාරය විකුණා දැමීමේ ගිවිසුමකට ආණ්ඩුව විසින් අත්සන් තබා ඇතැයි ජනතා විමුක්ති පෙරමුණේ නායක අනුර දිසානායක සඳහන් කරයි.

ඔහු මේ බව පැවසූවේ බත්තරමුල්ල පැලවත්ත හි පිහිටි ජනතා විමුක්ති පෙරමුණේ ප්‍රධාන කාර්යාලයේදී අද (19) පැවති මාධ්‍ය හමුවක් අමතමිණි.

එහිදී ඔහු වැඩිදුරටත් දැක්වූ අදහස් මෙසේය .

“අපේ රටේ විශාලතම ජාතික සම්පතක් වූ කෙරවලපිටිය විදුලි බලාගාරය විකුණා දැමීමේ ගිවිසුමකට ආණ්ඩුව විසින් අත්සන් තබා තිබෙනවා. අප විශාල බලශක්ති පරිභෝජනයක් ඇති රටක් නෙවෙයි. ජාතික ආරක්‍ෂාවේදී බලශක්ති ක්‍ෂේත්‍රය අතිශය වැදගත් වෙනවා. ඒ නිසා එය රජය සතුවීම අතිශය වැදගත් කරුණක්. බැසිල් රාජපක්‍ෂ නම් ඇමරිකානු ද්විත්ව පුරවැසියා අපේ රටේ මේ වැගත්ම සම්පත ඇමරිකානු සමාගමකට පැවරීම සඳහා ගිවිසුම් අත්සන් කර තිබෙනවා.

කෙරවලපිටිය ඉදිරියට මෙරට විශාලතම බලාගාරය වෙනවා !

කෙරවලපිටිය විදුලි බලාගාරය දැනට මෙගාවොට් 300ක් නිපදවනවා. එය තවත් මෙගාවොට් 300ක් එකතු කිරීමට නියමිතයි. 2025 දී එය මෙගාවොට් 1,000ක් කිරීමේ සැලසුමක් තිබෙනවා. එය විශාලතම බලශක්ති බලාගාරය වීමට නියමිතයි. එය රාජ්‍ය සමාගම් වෙත අයිතිය තිබෙන බලාගාරයක්. දැනට එය ඩීසල්වලින් විදුලිය උත්පාදනය කළත් එයට ඩීසල්වල සිට ගෑස් දක්වා හැරවිය හැකි තාක්‍ෂණයක් තිබෙනවා. නමුත් අපට තවමත් ගෑස් ගබඩාවක්, නළ පද්ධතියක්, ද්‍රව ගෑස් වායු බවට හරවන යාන්ත්‍රණයක් නොමැති නිසා ඩීසල්වලින් විදුලිය නිපදවනවා. එම නිසා ගෑස්වලින් විදුලිය නිපදවීමට අවශ්‍යවන යටිතල පහසුකම් සඳහා අප ජාත්‍යන්තර ලංසු කැඳවීමක් කළා ඛණිජ තෙල් සංස්ථාව භාර අමාත්‍යාංශය විසින්. පසුගිය පෙබරවාරි 18වැනිදා මේ පිළිබඳව ජනමාධ්‍යවල දැන්වීම් පළකළා. මේ අනුව පාවෙන ගෑස් ගබඩා පද්ධතිය සහ නළ පද්ධතිය වෙන්වෙන්ව ටෙන්ඩර් කැඳවලා තිබුණා. එහි ඉල්ලුම්පත්‍ර ලබාගැනීමට රුපියල් ලක්‍ෂ 02ක තැන්පතුවක් ලබාගත්තා. ජූලි 18 වැනි දිනට පෙර ලංසු ඉදිරිපත් කළ යුතුව තිබුණා. එහෙත් බැසිල් රාජපක්‍ෂ මුදල් ඇමතිවරයා මෙම ටෙන්ඩරයට ලංසු ඉදිරිපත් නොකළ නිව් පෝට්‍රට් එනර්ජි නම් ඇමරිකානු සමාගමට කෙරවලපිටිය බලාගාරයෙන් 40%ක්, ගෑස් ගබඩා පද්ධතිය සහ නළ පද්ධතිය ලබාදීම සඳහා කැබිනට් පත්‍රිකාවක් අනුමත කර ගත්තා.

ගනුදෙනුව පිරිසිදු නෑ !

මෙය කිසිසේත්ම පිරිසිදු ගනුදෙනුවක් නෙවෙයි. එම ඇමරිකානු සමාගමට අවශ්‍ය නම් ටෙන්ඩරයට ඉදිරිපත් විය හැකිව තිබුණා. නමුත් එයට ඉල්ලුම් නොකළ සමාගමකට ඇමරිකානු පුරවැසි බැසිල් රාජපක්‍ෂ විසින් ලබාදී තිබෙනවා. බැසිල්ට තිබෙන්නේ කළු ඉතිහාසයක්. ඔහු මුදල් ඇමති වෙන විටම සමාජය තුළ මේ සාකච්ඡාව මතුවුණා. එම සමාගමටම වසර 05ක් යන තෙක් ගෑස් මිලදී ගැනීමද ටෙන්ඩරයකින් තොරවම ලබාදී තිබෙනවා. එසේම කෙරවලපිටිය ප්‍රදේශයේ ඉදිකරන වෙනත් ඕනෑම බලාගාරයකට ගෑස් ලබාදීමේ බලයත් මෙම සමාගමට ලබාදී තිබෙනවා. ජනතාව ජීවන බරින් මිරිකී සිටිනවා. ඊට රට මත පැටවී ඇති දැවැන්ත ණය බරත් වගකිව යුතු වෙනවා.

ණය අපරාධයක් නොවුණත් ලංකාව ලබාගත් ණයවලින් රට තුළ අවශ්‍ය වත්කම් ගොඩනැගුණේ නැහැ. එහි තේරුම වංචා-දූෂණ ලෙස විශාල පංගුවක් දේශපාලකයින් අතට පත්වූ නිසයි. සැබවින්ම ආණ්ඩුව ටෙන්ඩර් කැඳවීමකින් තොරව මෙම සමාගමට කෙරවලපිටිය පවා දෙන්නේ ඇයිද යන්න රටට පැහැදිලි කළ යුතුව තිබෙනවා.

නිසි කැබිනට් අනුමැතියත් නෑ !

කෙරවලපිටිය බලාගාරයට අදාළ කැබිනට් පත්‍රිකාව 2021.09.06වැනිදා කැබිනට් මණ්ඩලයට ඉදිරිපත් කළා. සාමාන්‍යයෙන් කැබිනට් පත්‍රිකාවක් රැස්වීමට දවස් තුනකට පෙර ඇමතිවරයා අතට පත් වුණත් මෙම කැබිනට් පත්‍රිකාව එලෙස ඉදිරිපත් කළේ නැහැ. අතිරේක පත්‍රිකාවක් ලෙස රැස්වීම අවස්ථාවේම ඉදිරිපත් වුණා. ඒ මොහොතේම ඊට අනුමැතියත් ලබාගත්තා, ඇතැම් ඇමතිවරුන්ගේ විරෝධතා මධ්‍යයේ. ගිවිසුම අත්සන් කිරීමෙන් පසුව අනුමත කිරීම සඳහා කැබිනට් මණ්ඩලයට ඉදිරිපත් කරන බව එහිදී ප්‍රකාශ කර තිබෙනවා. එහෙත් එහි කිසිම තේරුමක් නැහැ.

මධ්‍යම රාත්‍රියේ 12.06 ට ගිවිසුම අත්සන් කරලා !

සාමාන්‍යයෙන් සිදුවන්නේ ගිවිසුම සකස් කර එය කැබිනට් මණ්ඩලයට ඉදිරිපත් කර අනුමැතිය ලබාගැනීමෙන් පසු අත්සන් තැබීමයි. නමුත් මෙහිදී සිදුවුණේ එහි අනෙක් පැත්තයි. ඒ අනුව පසුගිය 17වැනිදා මධ්‍යම රාත්‍රී 12.06ට මෙම ගිවිසුම අත්සන් තබා තිබෙනවා. ඒ සඳහා සමාගමෙන් සහභාගී වූ විදේශිකයා පාන්දර 2 පමණ තිබූ ගුවන් යානයෙන් ඇමරිකාවට ආපසු ගියා.

ගෝඨාභය රාජපක්‍ෂ ජනාධිපතිවරයා ඇමරිකාවට ගියේ ඉන් පසුවයි. මේ පාලකයන් බලයට ආවේ විකිණූ හම්බන්තොට වරාය ආපසු ගන්නා බව කියමිනුයි. ඔවුන් එවැනි පිරිසක් නොවන බව අපිනම් දැන සිටියා. හම්බන්තොට වරායට බදු සහන ලබාදෙන පනතට විරුද්ධව ඡන්දය දෙන්න රාජපක්‍ෂවරුන් සහ ඔවුන්ගේ හිතවතුන් පාර්ලිමේන්තුවට ආවේ නැහැ. ඔවුන් ඡන්දයට පෙර ජනතාවට කී කිසිවක් කළේ නැහැ. ඔවුන් හක්කේ බුදුරැස්- බොක්කේ දඩමස් තිබෙන අය.

පවුලේ කැබිනට්ටුව බලශක්ති ක්ෂේත්‍රය ඇමරිකාවට පවරලා !

අද අපේ රටේ බලශක්ති ක්‍ෂේත්‍රයේ අයිතිය ඇත්තේ කාටද යන්න මත රටේ අනාගතය තීරණය වෙනවා. ගෝඨාභය, මහින්ද, බැසිල් චමල්, නාමල් පවුල් කැබිනෙට්ටුව විසින් බලශක්ති ක්‍ෂේත්‍රය ඇමරිකාවට පවරා තිබෙනවා. වැදගත්ම කරුණ වන්නේ කොවිඞ් තත්වය තුළ ජනතාවට ඊට විරෝධය පළකළ නොහැකි වාතාවරණයක් තුළ මෙම ගනුදෙනුව සිදුවීමයි.

කෘෂිකර්මය රටේ ආර්ථිකයේ වැදගත් අංශයක් මෙන්ම උරුමයක්ද වෙනවා. ලංකාවේ ශිෂ්ඨාචාරයේ මුල් බිම් පදනම් වන්නේ කෘෂිකර්මය ආශ්‍රිතවයි. එහි ප්‍රතිඵලයක් ලෙස අපිට දියුණු වාරි ශිෂ්ඨාචාරයක් උරුම වුණා. ශ්‍රම බලකායෙන් 27%ක් කෘෂිකර්මයේ නියැලී සිටිනවා. ජාතික නිෂ්පාදනයෙන් 7%ක් කෘෂිකර්මය නියෝජනය කරනවා.අපනයනයන්ගෙන් 25%ක් කෘෂිකර්මය මත පදනම් වූ කර්මාන්තයි. මේ තත්වය තුළ කෘෂිකර්මය සම්බන්ධයෙන් තීරණ ගත යුත්තේ ගැඹුරින් සිතා බැලීමෙන් අනතුරුවයි.

ආණ්ඩුව වැඩ කරන්නේ මොළෙන් නෙවෙයි ඇඟෙන

නමුත් ආණ්ඩුව සහ ඇමතිවරුන් මොළයෙන් කල්පනා කිරීමෙන් නොව ඇඟේ හයියෙන් තීරණ ගන්නේ. ඔවුන් වරෙක වී මෝල් මාෆියාව බිඳින බව කීවා. නමුත් වැටලීමකින් පසු ඔවුන් රැගෙන ආවේ හාල් කිලෝ ලක්‍ෂ 08ක් පමණයි. රටේ දෛනික සහල් පරිභෝජනය හාල් කිලෝ ලක්‍ෂ 60ක් පමණ වන තත්වයකදී මෙය විහිළුවක්.

එසේම ඔවුන් වී මිලදී ගැනීමේදී සහතික මිලක් වෙනුවට පාලන මිලක් දැම්මා. සහතික මිලක් දැම්මා නම් එය අවම මිල ලෙස පවත්වා ගනිමින් ගොවින්ට වැඩි මිලකට වී විකිණිය හැකිව තිබුණා. නමුත් මෙයින් කියන්නේ රු. 50ට වැඩියෙන් මිලදී ගැනීමට නොහැකි වීමයි. දැන් ගොවීන්ගේ වී වෙළෙඳුන්ට විකුණා අවසන් වූවාට පසුව වී මිල කිලෝවකට රු. 55ක් කර තිබෙනවා. ගොවියාට ලැබිය යුතු මිල අහිමි වෙනවා.

වී වගාවේදී බීජ සමග වල් පැලෑටිවලට අදාල බීජත් ඇතුල් වෙනවා. ඒවා මර්දනය කිරීම සඳහා වල් නාශක භාවිතා කෙරුණා. සාම්ප්‍රදායික වගාවේදී කුඹුරට මාසයක් පමණ වතුර ලබා දෙනවා. වතුර බැඳ තැබුවාම වල් කුණු වෙනවා. නමුත් මහවැලියේ වතුර දෙන්නේ සති දෙකයි. ඒ නිසා සාම්ප්‍රදායික වල් නාශක ක්‍රම ඔවුන්ට භාවිත කරන්න බැහැ. ඔවුනට මෙවර වල් ගැලවීම සඳහා අමතර වියදම් දරන්න සිදුවුණා. බොහෝ දෙනෙකුට වගාව සඳහා යටකළ මුදලවත් අස්වැන්නෙන් ලබාගත නොහැකි වුණා.

කෘෂිකර්මය බිඳ වැටිලා !

රසායනික යෙදවුම් නොමැතිවීම තුළ තේ කර්මාන්තයද බිඳ වට්ටලා තිබෙනවා. කුඩා තේ වතු හිමියන් බොහෝ දෙනෙකුගේ ප්‍රධාන ජීවනෝපාය වන්නේ තේ වගාවයි. රසායනික පොහොර භාවිතය නතර කර කාබනික පොහොරවලට යොමුවිය යුතු බව කීවේ තේ වගාව වැනි බෑවුම් පොළොවක කාබනික පොහොර යෙදවීම පිළිබඳව සොයා බැලීමකින් තොරවයි. එසේම බඩඉරිඟු වගාව අභියෝගයකට මුහුණපා තිබෙනවා. එම බීජවලට රසායනික යෙදවුම් අවශ්‍යයි. සාමාන්‍යයෙන් වසරකට බඩඉරිඟු මෙ.ටොන්. 1500ක් ආනයනය කරනවා. නමුත් වගාව සම්බන්ධ අවිනිශ්චිතකම නිසා මෙවර ගෙන්වා ඇත්තේ බීජ මෙ.ටොන් 600යි. දැන ගන්නට තිබෙන අන්දමට එයිනුත් විකිණී තිබෙන්නේ මෙ.ටො. 150ක් පමණයි. මෙයින් පෙනී යන්නේ බඩඉරිඟු වගාව සම්බන්ධව ගොවීන් තුළ ඇති අවිනිශ්චිතතාවයි. මෙය ආහාර නිෂ්පාදනයට සෘජු ලෙසම බලපානවා. රට තුළ බඩඉරිඟු නිෂ්පාදනය නතර වුවහොත් ගෙන්වීමට රටට ඩොලර් පවා නැති තත්වයක මෙය අතිශය බරපතළයි. මේ අනුව කෘෂිකර්මාන්තය දැවැන්ත අනතුරක තිබෙනවා.

අවසානයේ ආණ්ඩුව කාබනික පොහොර නිෂ්පාදනය ගොවීන් ලක්‍ෂ 2ක් ගොඩනගන බව කීවා. ගොවියෙකුට රු. 210,000ක් ලබාදෙන බව කීවා. ජනමාධ්‍යවල දැන්වීම් පළ කළා. ඉන් පසුව ගොවීන් සංඛ්‍යාව ලක්‍ෂයකට අඩු කරන බව කීවා. ඔවුන්ට රු. 150,000 බැගින් ලබාදෙන බව කීවා. පසුව ගෝවීන් ලක්‍ෂය 10,000ට අඩුවුණා. එම ගොවින්ට රු. 110,000 ගානේ ලබා දෙන බව කීවා. අවසානයේ ගොවිජන සේවා මධ්‍යස්ථානයට එක ගොවියෙකුට දෙන බව කීවා. රටේ ගොවිජන සේවා මධ්‍යස්ථාන තියෙන්නේ 560ක් විතර. ගොවීන් ලක්‍ෂ දෙකෙන් පටන් ගෙන 560 දක්වා අඩුවුණේ මෙහෙමයි.

දැන් කාබනික පොහොර ආනයනය කරන්න යනවා !

දැන් කාබනික පොහොර නිෂ්පාදනය කර ගන්න බැරි නිසා ආනයනය කරන්නට සිද්ධ වෙන බව කීවා. අපේ රටේ ශාක නිරෝධායන පනත අනුව කාබනික පොහොර ආනයනය කරන්න බැහැ. ඒ සඳහා පර්යේෂණවලට වසර දෙකක පමණ කාලයක් ගතවෙනවා. ඒ නිසා ආණ්ඩුව ආනයනය කිරීම සඳහා වෙනම ප්‍රතිපත්තියක් හදන්න කීවා. ඇත්තටම ආණ්ඩුව ඡන්ද කාලෙදි කීවේ රසායනික පොහොර නොමිලේ දෙන බවයි. පසුගිය අප්‍රේල් මුල රසායනික පොහොර ආනයනය නතර කළා. ඒ, මේ බලපෑම පිළිබඳව කිසිදු ගණන් බැලීමක් කළේ නැහැ. එය පසුගිය යළ කන්නයට බලෑවේ නැත්තේ ඒ වනවිටත් බොහෝ වගා කටයුතු ආරම්භ වී තිබුණු නිසයි. නමුත් දැන් මහ කන්නය ආරම්භ වෙමින් තිබෙනවා. තමන්ගේ ගොවිතැන් පිළිබඳව ගොවීන් අසරණ වී තිබෙනවා. ඔවුන්ගේ අස්වැන්න සම්බන්ධයෙන් ඔවුන්ට තිබෙන්නේ අවිනිශ්චිතතාවයක්.

ගොවීන්ට ගොවිතැන එපා කරවා එම ගොවි බිම් ආණ්ඩුවේ හිතවතුන්ට ලබාගැනීමේ අදහසකුත් මේ පිටුපස තිබිය හැකියි. 2021.08.05වැනි දින මහින්දානන්ද කෘෂිකර්ම ඇමතිවරයා කාබනික පොහොර ආනයනය සඳහා කැබිනට් පත්‍රිකාවක් ඉදිරිපත් කළා. කාබනික පොහොර ආනයනය මගින් වෙනත් රටවල ක්‍ෂුද්‍ර ජීවීන් මෙරටට ඇතුල්විය හැකි බව පර්යේෂකයන් අනතුරු ඇඟවූවා. නමුත් ආණ්ඩුව චීනයෙන් කාබනික පොහොර ආනයනය කිරීමට අනුමැතිය ලබාගත්තා.

කාබනික පොහොර ටෙන්ඩරය චීනයට දෙන්න යන්නේ !

ආනයනික කාබනික පොහොර වල ආක්‍රමණික ශාඛ, ක්‍ෂුද්‍ර ජීවීන් ඇතුල්වීම වැළැක්වීමට ශාක නිරෝධානයන පනත ක්‍රියා කරනවා. ආණ්ඩුව විසින් ආනයනය කිරීමට නියමිත පොහොර සාම්පල්වල ක්‍ෂුද්‍ර ජීවීන් සිටින බව වාර්තා කර තිබෙනවා. මේ සාම්පලය ජීවානුහරණය කර නොමැති බව එම වාර්තාවේ සඳහන් වෙනවා. දැන් ඇමතිවරයා එම සාම්පලය අවිධිමත් යැයි සී.අයි.ඩී.යට යන බවට තර්ජනය කරනවා. හානිකර ක්‍ෂුද්‍ර ජීවීන් සිටින බව සොයාගත් ආයතනය වංචා කළ බවට චෝදනා කරනවා. ආණ්ඩුව උත්සාහ කරන්නේ කෙසේ හෝ චීන සමාගමට මෙම ටෙන්ඩරය ලබාදීමටයි. ජනාධිපතිවරයා මෙම තීන්දුව ගනිද්දී බරපතළ ලෙස සලකා බැලිය යුතුව තිබුණා. නමුත් ආණ්ඩුව තීන්දුව අරන් තිබෙන්නේ මොළෙන් නොව ඇඟෙනුයි. මුළු කෘෂි කර්මාන්තය අනතුරට පත්වී තිබෙන්නේ මේ තත්වය තුළයි.”

නැව් තෙල් සැපයීමෙන් විශාල ආදායමක් ලැබුවා. නමුත් ඒවා පෞද්ගලීකරණය කිරීමෙන් රාජ්‍ය ආදායම අහිමිකර ගත්තා. තෙල් සංස්ථාව සිදුවූ දේ රටට අත්වූ ඉරණම පිළිබඳ හොඳ සාම්පලයක්.

ආණ්ඩුවේ කණ්ඩායම් සහ පුද්ගලයින් තම තමන්ගේ ප්‍රශ්න වෙනුවෙන් ගැටුම් ඇතිකර ගත්තාට රටට හානිකර දේවලට එරෙහිව ඔවුන් අතර ගැටුමක් නැහැ. ඔවුන් රණ්ඩු කරන්නේ තමන්ගේ ඕ.අයි.සී. මාරුකර වෙනත් ඇමතිවරයෙකුගේ ඕ.අයි.සී. කෙනෙක් පත්කිරීම වගේ දේකටයි. කෙරවලපිටිය විකිණීම වගේ කරුණකදී ඔවුන් සියලු දෙනා සිටින්නේ එකට.”

සිය පක්ෂයේම කැබිනට් අමාත්‍යවරුන් දෙදෙනෙකු විවේචනය කිරීම සම්බන්ධයෙන් පාර්ලිමේන්තු මන්ත්‍රී ජගත් කුමාරට එරෙහිව ශ්‍රී ලංකා පොදුජන පෙරමුණ විසින් විනය පරීක්ෂණයක් සිදු කිරන බව එම පක්ෂයේ ලේකම් පාර්ලිමේන්තු මන්ත්‍රී නීතිඥ සාගර කාරියවසම් සඳහන් කරයි.

ජගත් කුමාර මන්ත්‍රීවරයා මාධ්‍ය හමුවක් කැඳවමින් සිදු කළ ප්‍රකාශය කිසිසේත් අනුමත නොකරන බවත් මන්ත්‍රීවරයා පක්ෂයේ විනය කඩකරමින් කටයුතු කර ඇති බවත් පොදුජන පෙරමුණේ ලේකම් සාගර කාරියවසම් පවසයි.

ඉතාලි සංචාරය අවසන් කර අගමැති පැමිණි පසු පක්ෂයේ විනය කමිටුව රැස් වී ඒ සම්බන්ධයෙන් තීරණයක් ගන්නා බවද ඔහු වැඩිදුරටත් පවසයි.

මේ පවසන්නේ "සරත් වීරසේකර, ගාමිණී ලොකුගේ කුපාඩි වැඩ කරනවා…” යැයි මාධ්‍ය හමුවක් කැඳවමින් ජගත් කුමාර මන්ත්‍රීවරයා සිදුකළ ප්‍රකාශය ගැන විය යුතුය.

කෙසේ වුවත් පොදුජන පෙරමුණේ ලේකම් සාගර කාරියවසම් ගේ ප්‍රකාශයෙන් පෙන්නුම් කරන්නේ , පක්ෂයේ අමාත්‍යවරුන් දෙදෙනකුව ප්‍රසිද්ධියේ විවේචනය කිරීම වරදක් බවට මේ වන විටත් තීන්දුකර ඇති බවකි.

පරාක්‍රම සමුද්‍රයේ රළපනාවේ ඇවිදින මංතීරුවක් සෑදීමට ආණ්ඩුව ගනු ලබන උත්සාහයට හිටපු ජනාධිපති, පොලොන්නරු දිස්ත්‍රික් පොදුජන පෙරමුණු පාර්ලිමේන්තු මන්ත්‍රී මෛත්‍රීපාල සිරිසේන දැඩි විරෝධයක් දක්වයි.

මාධ්‍ය සිදුකළ විමසීමකට ප්‍රතිචාර දක්වමින් ඔහු පවසා සිටියේ සීගිරිය ගල උඩ හෙලිකොප්ටර් අංගනයත් සාදා හෙලිකොප්ටර් බැස්සවිය හැකි වුවත් එසේ නොකරන බවත්, ඒ එම ස්ථානවල ඓතිහාසික වටිනාකමට හානිවන නිසා බවය.

ඒ ආකාරයකම පරාක්‍රමබාහු රජතුමා පරාක්‍රම සමුද්‍රය නිර්මාණය කළේ වැව් එකතු කොට බවත් ඒ ඓතිහාසික වටිනාකමට හානි වන කටයුතු අනුමත කළ නොහැකි බවත් ඔහු පැවසීය.

පරණ දෑ අලුත් කරනවා නම් අටමස්ථානය, සොලොස්මස්ථානය පවා නව තාක්ෂණයෙන් දියුණු කළ හැති වුවත් එසේ නොකරන්නේ ඒවායේ ඇති පෞරාණික වටිනාකම් නිසා බවත් හිටපු ජනාධිපති මෛත්‍රීපාල සිරිසේන පැවසීය.

මේ අතර පසුගියදා මාධ්‍ය හමුවේ රාජ්‍ය අමාත්‍ය රොෂාන් රණසිංහ ප්‍රසිද්ධියේ පවසා සිටියේ රළපනාව ඉදිකිරීමේ විරෝධය පිටුපස හිටපු ජනාධිපති මෛත්‍රීපාල සිරිසේන ට හිතවත් පාර්ශ්ව සිටින බවය.

තවත් කොරෝනා මරණ 103ක් සෞඛ්‍ය අධ්‍යක්ෂක ජනරාල්වරයා විසින් ඊයේ (18) දිනට අදාළව තහවුරු කර ඇති අතර ඊට අදාළ නිවේදනය රජයේ ප්‍රවෘත්ති අධ්‍යක්ෂ ජනරාල් විසින් අද (19) නිකුත්කර ඇත.

ඒ සමග මෙරට කොරෝනා මරණ ගණන 12125 දක්වා ඉහල ගොස් තිබේ.

රජයේ ප්‍රවෘත්ති දෙපාර්තමේන්තුව නිකුත් කළ නිවේදනයට අනුව, මියගිය පිරිස අතර අවුරුදු 30ට අඩු දෙදෙනෙකි.

මියගිය පිරිස අතර අවුරුදු 30 – 59 ත් අතර වයසේ පසුවන ආසාදිතයින් 24 දෙනෙකු සිටින අතර ඉතිරි ආසාදිතයින් 77 දෙනා ම වයස අවුරුදු 60 සහ එම වයස් සීමාව ඉක්ම වූ වැඩිහිටියන් ය.

කැබිනට් අනුමැතිය පවා නිසිලෙස නොගෙන, පසුගිය සැප්තැම්බර් 17 වනදා රාත්‍රියේ ගිවිසුම් අත්සන් කරනු ලැබූ, කෙරවලපිටිය යුගදනවි LNG විදුලි බලාගාරයේ, මෙහෙයුම් සහ එහි සැපයුම් හා ගබඩා පහසුකම්, එක්සත් ජනපදයේ නිව් ෆෝට්‍රස් එනර්ජි සමාගමට පවරා ඇති බව වාර්තා වෙයි.

ඒ ඇමරිකානු ඩොලර් මිලියන 250ක මුදලකටය.

ආණ්ඩුවේ අභ්‍යන්තර ආරංචි මාර්ග සඳහන් කරන ආකාරයට , ගිවිසුම අත්සන් කිරීමට පැමිණි ඇමරිකානු නියෝජිතයන් 17 වනදා රාත්‍රියේ ගිවිසුම අත්සන් කර, 18 වෙනිදා මෙරටින් පිටත්වගොස් ඇත.

, පසුගිය සඳුදා සුම් තාක්ෂනය ඔස්සේ පැවති කැබිනට් මණ්ඩල රැස්වීමේදී ද මෙම ගිවිසුම සම්බන්ධයෙන් දිර්ගවශයෙන් සාකච්ජා කර ඇති අතර ඒ මෙම ගිවිසුමේ වගන්ති කිහිපයක් සම්බන්ධයෙන් කැබිනට් අමාත්‍යවරුන් කිහිපදෙනෙකු විරෝධතා දක්වා තිබූ නිසයි.

එහිදී විමල් විරවංශ, වාසුදේව නානායක්කාර හා උදය ගම්මන්පිල යන අමාත්‍යවරුන් විශේෂයි.

ඒ, ඊට පෙර ඔවුන් තිදෙනා කැබිනට් සාමාජිකයින් වෙත වෙන් වෙන් වශයෙන් ලිඛිතව මේ ගිවිසුම සම්බන්ධයෙන් කරුණු ඉදිරිපත්කර තිබු නිසයි.

ඒ අනුව කැබිනට් නිර්දේශය වී ඇත්තේ මුදල් අමාත්‍යවරයා ඉදිරිපත් කළ කැබිනට් පත්‍රීකාව තවදුරටත් හැදෑරීමටයි.

එසේම යෝජිත ගිවිසුම සම්බන්ධයෙන් ඇමතිවරුන් තිදෙනා ඉදිරිපත් කළ විවේචන පිළිබඳව, ඔවුන්ව වෙනම කැඳවා දැනුවත් කිරීමටද, මුදල් අමාත්‍යවරයා විසින් ජනාධිපතිවරයාට එකඟත්වය පළකර ඇති බවත්, වාර්තා වෙයි.

සැප්තැම්බර් 17 වනදා , දහවල් විමල් විරවංශ, වාසුදේව නානායක්කාර හා උදය ගම්මන්පිල යන අමාත්‍යවරුන්, මුදල් අමාත්‍යංශයට කැඳවා යෝජිත ගිවිසුම සම්බන්ධයෙන් කරුණු පැහැදිලි කිරීමක් සිදුකර ඇත්තේ ඒ අනුවයි.

මෙහිදී මුදල් අමාත්‍යවරයා සහ, රජයේ නිලධාරීන් විසින් සිදුකල පැහැදිලි කිරීම් හමුවේ, අමාත්‍යවරුන් තිදෙනාද තමන්ගේ ස්ථාවරය සඳහන් කර ඇති බවත් වාර්තා වෙයි.

දෙපාර්ශවයේ කරුණු දැක්වීම් හමුවේ, මුදල් අමාත්‍යවරයා සඳහන් කර ඇත්තේ, ඇමතිවරුන්ගේ අදහස් ද සැලකිල්ලට ගනිමින් අදාල ගිවිසුම යලි සංශෝධනය කරන බවයි.

නමුත් ඇමතිවරුන් තිදෙනා ඉදිරිපත් කළ යෝජනාවලට ඇමරිකානු නියෝජිතයින් එකහෙලා විරෝධය පපලකළ බවත් එනිසා කිසිඳු සංශෝධනයකින් තොරව අදාල ගිවිසුම සැප්තැම්බර් 17 වනදා , රාත්‍රී 12.06 ට අත්සන කළ බවත් ආණ්ඩුවේ අභ්‍යන්තර ආරංචි මාර්ග වැඩිදුරටත් සඳහන් කළේය.

ආනයනික කිරිපිටි මිල ඉහළ දැමීම සඳහා පාරිභෝගික ආරක්ෂණ රාජ්‍ය අමාත්‍යංශය එකඟ වී ඇති බව වාර්තා වේ.

රාජ්‍ය අමාත්‍ය ලසන්ත අලගියවන්න  සහ කිරිපිටි ආනයනකරුවන් අතර සාකච්ඡාවක් ඊයේ පවත්වා ඇති අතර එහිදී මිල ඉහළ දැමීමේ එකඟතාවයකට පැමිණ ඇති බවයි වාර්තා වෙයි.

මෙම සාකච්ඡාවේදී කිරිපිටි කිලෝ එකක් සඳහා රුපියල් 350 ක මිල වැඩි කිරීමක් ආනයනකරුවන් විසින් ඉල්ලා තිබෙන අතර, කෙසේ නමුත් අමාත්‍යවරයා පවසා තිබෙන්නේ රුපියල් 200 ක මිල ඉහළ දැමීමක් පමණක් ලබාදිය හැකි බවයි.

ඒ සඳහා ආනයනකරුවන්ගේ එකඟතාවයද හිමිව ඇත.

ඒ අනුව දැනට වෙළඳපොලේ රුපියල් 945 කට අලෙවි වන කිලෝග්‍රෑම් 01 කිරිපිටි පැකට්ටුවක මිල 1145 ක් දක්වා ඉහළ යනු ඇත. ග්‍රෑම් 400 පැකට්ටුවක මිල රුපියල් 380 සිට 458 දක්වා ඉහළ යනු ඇත.

කිරිපිටි ආනයනකරුවන් පවසන්නේ ඩොලරයේ අගය සීග්‍රයෙන් ඉහළ යාම හේතුවෙන් මෙම ගැටලුව උද්ගත වී ඇති බවයි.

ඇමරිකානු ඩොලරයක විකුණුම් මිල රුපියල් 203 ක් ලෙස නියම කර ඇති නමුත් ඩොලරයක් සඳහා රුපියල් 238 ක් ගෙවීමට ආනයකරුවන්ට සිදුව ඇති බවයි.

ඒ අනුව රුපියල් 200 ක මි වැඩිවීමක් ලබාදීමෙන් පසුවද සැලකිය යුතු පාඩුවක් විඳිමින් කිරිපිටි ආනයනය කිරීමට සිදුවන බව වැඩිදුරටත් ඔවුනු පවසා සිටී.

ඉඩමකට අයුතු ලෙස ඇතුළු වී එහි සිටි ආරක්ෂකයින් දෙදෙනෙකුට පහරදී තුවාල කළැයි කියන සිද්ධියකට අදාළව ට හම්බන්තොට නගරාධිපති එරාජ් ප්‍රනාන්දු  අද (19) පොලිස් ඇප මත මුදා හැරි බව බම්බලපිටිය පොලීසිය පවසයි.

මෙම සිද්ධියට අදාළව අද (19) පෙරවරුවේදී බම්බලපිටිය පොලිසියට බාර වූ එරාජ් ප්‍රනාන්දුට සමත මණ්ඩලයේ පෙනී සිටින ලෙස දන්වමින් පොලිස් ඇප මත මුදා හළ බව බම්බලපිටිය පොලීසියේ උසස් නිලධාරියෙකු සඳහන් කළේය.

මෙම වරද සමථ මණ්ඩලයක විසදිය විය යුතු එකක් බැවින් සමථමණ්ඩලයේ පෙනී සිටින ලෙසට දෙපාර්ශවය දැනුම් දුන් බවද එම නිලධාරියා පැවැසීය.

බම්බලපිටිය කොතලාවල ඇවනිව් හි පිහිටි ඉඩමකට කඩා වැදුණු හම්බන්තොට නගරාධිපතිවරයා එහි සිටි ආරක්ෂක නිලධාරීන් දෙදෙනකුට පහර දී තිබුණේ ඉකුත් 15 වැනිදා ය.

එරාජ් ප්‍රනාන්දු පහර දී තුවාල ලද බව කියන ආරක්ෂක නිලධාරීයකු කොළඹ ජාතික රෝහලටට ඇතුළත් කිරීමෙන් පසු ප්‍රතිකාර ලබා ගෙන ඉන් පිටව තිබිණ.

මෙම සිද්ධියට අදාළ ඉඩමට දෙපාර්ශවයක් අයිතිවාසිකම් කියන අතර මෙම ආරවුල සම්බන්ධයෙන් බම්බලපිටිය පොලිසිය මින් ඉහතදී කොළඹ ප්‍රධාන මහේස්ත්‍රාත් අධිකරණයේ 66 වගන්තිය ප්‍රකාරව නඩු පැවරීමක් ද සිදු කර ඇත.

මෙම තත්ත්වය හේතුවෙන් අදාළ පාර්ශ්වයන් දෙකම එම ඉඩමට වෙන් වෙන් වශයෙන් ආරක්ෂකයින් යොදවා ආරක්ෂාව ලබා දෙමින් තිබූ බවද පැවසේ .

එරාජ් ප්‍රනාන්දු  මින් ඉහත දී ද මෙම ඉඩමට අයුතු ලෙසින් අයුතු ලෙසින් ඇතුළුවීමේ සිද්ධියක් සම්බන්ධයෙන් බම්බලපිටිය පොලිසියට කරුණු වාර්තා වී තිබූ බවද බම්බලපිටිය පොලීසිය පවසයි.

බම්බලපිටිය ප්‍රදේශයේදී පෞද්ගලික ආරක්ෂක අංශයක නිලධාරීන් දෙදෙනකුට පහරදීමේ සිද්ධිය සම්බන්ධයෙන් හම්බන්තොට නගරාධිපති එරාජ් ප්‍රනාන්දු  බම්බලපිටිය පොලිසිය අත්අඩංගුවට ගෙන තිබේ..

පහරදීමෙන් එක් ආරක්ෂක අංශ සාමාජිකයෙකු තුවාල ලබා රෝහල් ගත කළ බව පහරකෑමට ලක් වූ අදාළ ඉඩමේ ආරක්ෂක නිලධාරියෙකු පැවසුවේය.

හම්බන්තොට නගරාධිපති එරාජ් රවීන්ද්‍ර ප්‍රනාන්දු නමැත්තා වසර පහක සිරදඬුවම් නියම කර සිටි පුද්ගලයෙකු ද වේ.

 2014.04.17 වැනි දා හම්බන්තොට වරාය නිරීක්ෂණ චාරිකාවකට එක්ව සිටි එක්සත් ජාතික පක්ෂ මන්ත්‍රීවරුන් පිරිසකට පිස්තෝලයක් පෙන්වා තර්ජනය කිරීම ඇතුළු චෝදනා කිහිපයක් යටතේ සිරදඩුවම් ලැබීය.

සබැදි පුවත්

පිස්තෝල නගරාධිපතිට : හිර ගෙදර විශේෂ සැළකිලි !

ලංකා පොදුජන පෙරමුණේ පාර්ලිමේන්තු මන්ත්‍රී ජගත් කුමාර පිළිබඳ තමා කණගාටුව පළකරන බව අමාත්‍ය ගාමිණි ලොකුගේ පවසයි.

සරත් වීරසේකර අමාත්‍යවරයා විසින් පොලිස් ස්ථානාධිපතිවරයෙකුගේ ස්ථාන මාරුවක් සිදුකිරීම සම්බන්ධයෙන් ඇතිවු ගැටලුවක් මත තමන් පාදුක්ක සම්බන්ධීකරණ කමිටු සභාපති ධුරයෙන් ඉල්ලා අස්වන බව ජගත් කුමාර මන්ත්‍රීවරයා ඊයේ (17) ප්‍රකාශ කළේය.

වැඩිදුරටත් අදහස් දැක්වු අමාත්‍යවරයා මෙසේද සඳහන් කර ඇත.

“ජගත් කුමාර මහතා ගැන බොහෝම කණගාටු වෙනවා. මොකද අපේ සමහර උදවිය ඉන්නවා ඉස්සර කටුස්සන්ට රත්‍රං බැන්ඳහම අං එනවා නේ. අන්න එහෙම අං ආව කෙනෙක් විදියට මං දකින්නේ. එහෙම නැතුව එතුමයි මායි අතර කිසිම ගැටුමක් තිබුණේ නෑ. එතුමායි මායි අතර ප්‍රශ්නයක් තිබුණේ නෑ. නමුත් එතුමාට මාත් එක්ක බොහෝම කේන්ති ගිහින් තියෙනවා. මං එතුමාට කියන්න කැමතියි මම කොළඹ දිස්ත්‍රික්කයේ, මන්ත්‍රීවරයෙක් හැටියට එක දවසක් නෙමෙයි 1983 සිට අද වෙනකල් සෑම මැතිවරණයකින් ම ජයග්‍රහණය කරලා ඇවිල්ලා තියෙන්නේ. එතුමා සරත් වීරසේකර මහතාට දොස් කියලා තිබුණා. එතුමාට පුළුවන් පොලිස් නිලධාරීන්ව මාරු කරන්න කවුද ඉල්ලලා තියෙන්නේ නැත්තේ කියලා ලිපිගොනු එක්ක කතා කරන්න.

පා:මංත්‍රී ජගත් කුමාර ආණ්ඬුවේ මැර ඩීල් හෙළි කරයි….?

කෙසේ වුවත් පාර්ලිමේන්තු මංත්‍රී ජගත් කුමාර මාධ්‍ය සාකච්ඡාවක් පවත්වමින් වත්මන් ආන්ඬුවේ දෙබිඩි පක්ෂාග්‍රාහී පිළිවෙත හෙළිකරමින් කියා සිටිනේ වත්මන් පොලිස් අමාත්‍ය සරත් වීරසේකර තමාට හිතැති ලෙස නීතිය ක්‍රියාත්මක කරන බවය.

මේ කුපාඩි වැඩේ කරන්න එපා !

වත්මන් ජනපති ගෝඨාභය රාජපක්ෂ යටතේ, දිස්ත්‍රික් සම්බන්ධීකාරක ලෙස කටයුතු කළ පොදුජන පෙරමුණේ මංත්‍රී ජගත් කුමාර ආණ්ඩුවේ කුණු බිත්තර ප්‍රහාර පවා උපේක්ෂාවෙන් දරාගත් බවත්, ඒ වනවිට කෙසේ හෝ පාදුක්ක පොලීසිය ආණ්ඩුක්‍රම ව්‍යවස්ථාව අනුව කටයුතු කළහෙයින් පොලිසීය පිලිබඳ බලාපොරොත්තුවක් ඇතිව තිබුබවද මේවන විට එසේ නොමැති බව ප්‍රකාශ කරයි.

ගාමිණී ලොකුගෙ කීමට වියත් සරත් පොලිස් ලොක්කා මාරු කරලා…?

ගාමිණී ලොකුගේගේ බලපැම මත පාදුක්ක කොට්ඨාශ පොලිස් නිලධාරීන් මාරුකළ බවත්, පෙර කාළයේ පොලීසිය ගැන විශ්වාසය තැබීමට හැකි උනත් ගාමිණී ලොකුගේලා හා වියත් සරත්ලාගේ ක්‍රියා කළාපය නිසා තම ජීවිතය පවා අවධානමේ බව පාර්ලිමේන්තු මංත්‍රී ජගත් කුමාර පවසයි. මට තවදුරටත් විෂ්වාසයක් නෑ !

වැඩිදුරටත් අදහස් දැක්වු පාර්ලිමේන්තු මන්ත්‍රී ජගත් පවසන්නේ, තමා පාදුක්ක සම්බන්ධීකාරක ලෙස පත්කළ බවත්, ගාමිණී ලොකුගේගේ අණ පරිදි කොකොට්ඨාශ පොලිස් නිලධාරියා මාරුකළ බවත්, මින් ඉදිරියට පොලීසිය එසේ ආණ්ඬකරනයට ලක් වන්නේ නම් පාර්ලිමේන්තු මන්ත්‍රී වුවත් තම ජීවිතයට පවා ආරක්ෂාවක් නැති බවයි.

සුමුදු මද්දුමආරච්චි.

මිලානෝ.

ඉතාලිය.

තවත් කොරෝනා මරණ 84ක් සෞඛ්‍ය අධ්‍යක්ෂක ජනරාල්වරයා විසින් ඊයේ (16) දිනට අදාළව තහවුරු කර ඇති අතර ඊට අදාළ මාධ්‍ය නිවේදනය රජයේ ප්‍රවෘත්ති අධ්‍යක්ෂ ජනරාල් විසින් අද (17) නිකුත්කර ඇත.

ඒ සමගම මෙරට කොරෝනා මරණ ගණන 12022 දක්වා ඉහල ගොස් ඇත.

රජයේ ප්‍රවෘත්ති අධ්‍යක්ෂ ජනරාල් විසින් නිකුත්කර ඇති නිවේදනය අනුව මරණ 84න් 51 ක් කාන්තාවන් වන අතර සෙසු 33දෙනා පිරිමි පුද්ගලයින් වන බව සෞඛ්‍ය සේවා අධ්‍යක්ෂ ජනරාල්වරයා සඳහන් කරයි.

මියගොස් ඇති පිරිස අතර වයස අවුරුදු 60 හෝ ඊට වැඩි 58 දෙනෙකු සිටින අතර වයස අවුරුදු 30ට අඩු පිරිමි පුද්ගලයින් දෙදෙනෙකු සහ කාන්තාවක් ද සිටින බව නිකුත්කළ නිවේදනයේ සඳහන් ය.

ෂාන් ගුණවර්ධන පාරිභෝගික අධිකාරියේ විධායක අධ්‍යක්ෂ ධුරයෙන් ඉල්ලා අස් වීමට සූදානම් වන බව වාර්තා වෙයි.

ඔහුට එහි කටයුතු කරද්දී දිගින් දිගටම එල්ල වන බලපෑම් නිසා මෙම තීරණය ගනු ඇතැයිද සදහන් බව පවසමින් ආණ්ඩු හිතවාදී සී නිව්ස් ඇතුළු වෙබ් අඩවි මේ බව වාර්තා කර ඇත.

සහල් පාලන මිලත් ඉහළට !

මේ අතර අදාළ ආණ්ඩු හිතවාදී වෙබ් අඩවි වාර්තා කර ඇති තවත් පුවතක සඳහන් වන්නේ , දැනට සහල් සඳහා පනවා ඇති පාලන මිල නැවත සංශෝධනය කිරීමට පාරිභෝගික ආරක්ෂණ සමුපකාර අමාත්‍යාංශයේ අවධානය යොමුවී ඇති බවය.

නමුත් එහිදී කැකුලු සහ නාඩු සහල් පාලන මිල සංශෝධනය නොකිරීමටත් සම්බා හා කීරි සම්බා මිල සංශෝධනය කිරීමටත් සලකා බලමින් සිටින බවත් එහි සඳහන් වෙයි.

ඒ අනුව සම්බා කිලෝවක් රුපියල් 103 සිට 120 දක්වා වැඩි කිරීමට යෝජනා වී ඇති අතර කීරි සම්බා කිලෝවක් 125 සිට 145 දක්වා ද වැඩි කිරීමට යෝජනා වී ඇති බවත් අදාළ වෙබ් පුවත් වාර්තා වල සඳහන් වෙයි.

සමගි ජන බලවේගයේ මාධ්‍ය ප‍්‍රකාශක, පාර්ලිමේන්තු මන්ත‍්‍රී මනුෂ නානායක්කාර අපරාධ පරීක්ෂණ දෙපාර්තමේන්තුවට කැදවා තිබේ.

අපරාධ පරීක්ෂණ දෙපාර්තමේන්තුව විසින් ක‍්‍රියාත්මක කරනු ලබන පරීක්ෂණයකට සහාගීවීම සදහා මෙසේ පෙනී සිටින ලෙසට දැනුම්දී ඇත.

අපරාධ පරීක්ෂණ දෙපාර්තමේන්තුවේ පරිඝනක වෝහාරික විගණන අංශය මගින් සිදුකරනු ලබන තොරතුරු ලබාගැනීම සදහා එහි ස්ථානාධිපතිවරයා මෙසේ ලබන 20 වැනිදා පැමිණෙන ලෙස දැනුම්දී ඇත.

කෙසේ වෙතත් තමන් කැදවා ඇත්තේ කුමන විමර්ශනයකටද යන්න අනාවරණය නොකිරීම නිසා නීතීඥ උපදෙස් මත ඉදිරි පියවර ගන්නා බව මනුෂ නානායක්කාර මන්ත‍්‍රීවරයා සිය ෆේස් බුක් ගිණුමේ සටහනක් තබමින් ප‍්‍රකාශ කර තිබේ.

එම සටහන සම්පූර්ණයෙන් මෙසේය

අපරාධ පරීක්ෂණ දෙපාර්තමේන්තුවේ පරිඝනක ව්‍යෝහාරික අංශය විසින් සිදුකරනු ලබන විමර්ෂණයකට අදාලව තොරතුරු ලබාගැනීම සදහා අපරාධ පරීක්ෂණ දෙපාර්තමේන්තුව හමුවේ පෙනී සිටින ලෙසට මා වෙත දැනුම්දීමක් කර ඇත. එහෙත් කුමන පැමිණිල්ලක් සම්බන්ධයෙන්, කවරාකාරයේ විමර්ෂණයක් සම්බන්ධයෙන් මා කැදවන්නේද යන්න සදහන් කර නැත.

විමර්ෂණ අධිකාරියක් විසින් සිදුකරනු ලබන ඔ්නෑම නීත්‍යානුකූල විමර්ෂණයකට අදාලව සාක්ෂි ලබාදීමටත්, එකී පරීක්ෂණ ඉදිරියට ගෙන යාමටත් මාගේ උපරිම සහාය ලබාදීමට සෑම විටම බැදී සිටින බව සිහිපත් කරමි. එහෙත් සිදුවන විමර්ෂණය පිළිබද නිසි කරුණු දැක්වීමකින් තොරව කරනු ලබන කැදවීමක් සම්බන්ධයෙන් වැඩිදුර නීතිමය උපදෙස් පැතිය යුතුව ඇත.

සමගි ජන බලවේගයේ නායක සජිත් පේ‍්‍රමදාස මැතිතුමන් සමග සාකච්ඡුා කර තිසත් විජයගුණවර්ධන සහ ෆර්මාන් කාසිම් යන ජනාධිපති නීතීඥවරුන්ගේ නීති උපදෙස් පරිදි ඉදිරි ක‍්‍රියාමාර්ග ගැනීමට කටයුතු කරමි.