පුවත්

කොවිඩ් මර්දන විශේෂඥ තාක්ෂණ කමිටුවේ සාමාජිකයෙක් ලෙස ක්‍රියා කළ නිර්වින්දන විශේෂඥ වෛද්‍ය අශෝක ගුණරත්නද එම කමිටුවෙන් ඉල්ලා අස්වී තිබේ.

එම කමිටුවෙන් ඊයේ (07) විශේෂඥ වෛද්‍ය ආනන්ද විජේවික්‍රම ද ඉල්ලා අස්වී තිබිණි.

මේ වන විට එහි දෙවැන්නා වශයෙන් විශේෂඥ වෛද්‍ය අශෝක ගුණරත්න ඉවත්වී තිබේ.

එන්නත්කරණ ක්‍රියාවලිය සම්බන්ධයෙන් විශේෂඥ නිර්දේශ නොතකා ආණ්ඩුව ගෙන යන අත්තනෝමතික ක්‍රියාකාරීත්වය සම්බන්ධයෙන් වගකිය නොහැකි බව දක්වමින් එම ඉල්ලා අස්වීම් සිදුකර තිබේ.

lankatruth

තවත් කොරෝනා මරණ 184ක් සෞඛ්‍ය සේවා අධ්‍යක්ෂ ජනරාල්වරයා විසින් තහවුරු කරනු ලැබ තිබේ.

සෞඛ්‍ය සේවා අධ්‍යක්ෂ ජනරාල්වරයා විසින් එම මරණ ඊයේ (06) තහවුරු කරනු ලැබූ ඒවා බව රජයේ ප්‍රවෘත්ති දෙපාර්තමේන්තුව පවසයි.

මියගිය පිරිස අතරින් 97 දෙනෙකු පිරිමි පුද්ගලයින් වන අතර ඉතිරි 87 දෙනා කාන්තාවන් ය.

වාර්තා වූ කොරෝනා මරණ අතර වයස අවුරුදු 30ට අඩු ආසාදිතයින් 4 දෙනෙක් සිටී.

මියගිය පිරිස අතර අවුරුදු 30 – 59 ත් අතර වයසේ පසුවන 46 දෙනෙකු සිටින අතර ඉතිරි මරණකරුවන් 134 දෙනා ම වයස අවුරුදු 60 සහ එම වයස් සීමාව ඉක්ම වූ පුද්ගලයින් වේ.

යුද හමුදාපතිවරයා තමන්ට අවශ්‍ය පරිදි සෞඛ්‍ය ලේකම්වරයා හරහා වසංගත රෝග විද්‍යා අංශයෙන් එන්නත් ලබා ගනිමින් සිටින බවට රජයේ වෛද්‍ය නිලධාරීන්ගේ සංගමය සඳහන් කරයි.

එසේ ලබා ගන්නා එන්නත් හමුදාව මගින් එන්නත්කරණයට යොදා ගන්නා බවද පැවසූ ඔහු වසංගත රෝග විද්‍යා ඒකකය සෞඛ්‍ය සේවා අධ්‍යක්ෂ ජනරාල්වරයාගේ පාලනයෙන් ගිලිහී ගොස් ඇතැයිද ඔවුන් කියා සිටී.

එම සංගමයේ මධ්‍යම කමිටු සාමාජික වෛද්‍ය නලින් ද හේරත් මේ බව කියා සිටියේ කොළඹ පැවති මාධ්‍ය හමුවකදීය.

වයස අවුරුදු 60 ට වැඩි පුද්ගලයන් එන්නත්කරණය අවසන් නොකළ ඇති පසුබිමක 20-30ත් අතර අයට එන්නත්කරනය ආරම්භ කිරීම තාක්ෂණික ක්‍රමවේදයෙන් බැහැර යාමක් බවද ඔහු පැවසීය.

එමෙන්ම ප්‍රමුඛතා දිස්ත්‍රික්ක තෝරාගැනීමේදී ද විශාල ගැටලුවක් ඇති වී තිබෙන බවත් හම්බන්තොට යනු ප්‍රමුඛතාව දිස්ත්‍රික්කයක් නොවන බවද ඔහු තවදුරටත් කියා සිටියේය.

කළු සල්ලි සුදුකරන්නට අවස්ථාව සැලසීමක් ලෙස බොහෝ දෙනෙකුගේ දැඩි විවේචනයට තුඩුදුන් , හෙළි නොකළ වත්කම් නීත්‍යානුකූල තත්ත්වයට පත් කිරීමට ඉඩකඩ සැලසෙන මුදල් පනත් කෙටුම්පත අද (07) පාර්ලිමේන්තුවේදී සම්මත විය .

මේ සම්බන්ධව පැවති ජන්ද විමසීමේදී ඊට පක්ෂව ජන්ද 134ක් ලැබුණු අතර විපක්ෂව ලැබුණු ජන්ද ප්‍රමාණය 44කි .

ඒ අනුව වැඩි ඡන්ද 90 කින් පනත සම්මත විය.

මුදල් පනත් කෙටුම්පත පාර්ලිමේන්තුවට ඉදිරිපත් කළේ, හෙළිදරව් නොකළ බදු – වත්කම් හා ආදායම් ස්වේච්ඡාවෙන් හෙළි කිරීම ඇතුළු කරුණු කිහිපයක් මූලික කර ගනිමින් ය.

කෙසේවෙතත් ඒ සම්බන්ධයෙන් පාර්ශ්ව කිහිපයක් ශ්‍රේෂ්ඨාධිකරණය හමුවට ගියේ ය.

එහිදී නීතිපතිවරයා ශ්‍රේෂ්ඨාධිකරණයට දැනුම් දුන්නේ , වගන්ති කිහිපයක් සංශෝධනයට ආණ්ඩුව පියවර ගන්නා බවයි.

ජාතිය ගොඩනැගීමේ බදු පනතේ හෝ ආර්ථික සේවා ගාස්තු පනතේ විධිවිධාන මත වන තක්සේරුවක් මේ වසරේ ජනවාරි 01 වැනිදා හෝ ඉන් පසු නිකුත් කරනු නොලැබිය යුතුය යන්න පනත් කෙටුම්පතෙන් මුළුමනින්ම ඉවත් කළ යුතු 17 වැනි වගන්තියේ සඳහන් විය.

වැලිකඩ බන්ධනාගාර සංකීර්ණය හොරණ මිල්ලෑවේ ප්‍රතිස්ථාපනය කිරීමේ දී මැගසින් බන්ධනාගාරය පළමුවත් සෙසු බන්ධනාගාර ඉන් අනතුරුවත් මිල්ලෑවේ ප්‍රතිස්ථාපනය කෙරෙන අතර වැලිකඩ එල්ලුම්ගහ ද මේ යටතේ හොරණට රැගෙන යන බව බන්ධනාගාර කොමසාරිස් ජනරාල් තුෂාර උපුල්දෙණිය  පවසයි.

එමෙන්ම කාන්තා රැඳවියන් සමඟ සිටිනා දරුවන් සම්බන්ධයෙන් විශේෂ අවධානයක් යොමුකරන්නැයි අග්‍රාමාත්‍ය මහින්ද රාජපක්ෂ  බන්ධනාගාර දෙපාර්තමේන්තුවට සහ නාගරික සංවර්ධන අධිකාරියට ඊයේ(06) උපදෙස් ලබා දී තිබේ.

අග්‍රාමාත්‍යවරයා මෙම උපදෙස් ලබා දුන්නේ වැලිකඩ බන්ධනාගාර සංකීර්ණය හොරණ මිල්ලෑවේ අක්කර 200ක භූමි භාගයක ප්‍රතිස්ථාපනය කිරීමේ ව්‍යාපෘතියට අදාළ ප්‍රගතිය සොයා බැලීමට සූම් තාක්ෂණය ඔස්සේ පැවති සාකච්ඡාවට අරලියගහ මන්දිරයේ සිට එක්වෙමිනි.

රටේ පවතින ආර්ථික තත්ත්වය හමුවේ මහා භාණ්ඩාගාරයෙන් ව්‍යාපෘති සඳහා මුදල් වෙන්කිරීමක් මේ මොහො‌තේ සිදු නොවන බැවින් රජයට බරක් නොවී විකල්ප මාර්ග ඔස්සේ මෙම ව්‍යාපෘතිය අවසන් කිරීමට බලාපොරොත්තුවන බව ද නාගරික සංවර්ධන, අපද්‍රව්‍ය බැහැරලීම හා ප්‍රජා පවිත්‍රතා කටයුතු රාජ්‍ය අමාත්‍ය නාලක ගොඩහේවා මෙහි දී අග්‍රාමාත්‍යතුමා දැනුවත් කරමින් පැවසිය.

බොරැල්ල පිහිටි වැලිකඩ බන්ධනාගාර භූමිය අක්කර 40 ක් .

එහි ඇති චැපල් වාට්ටුවත් බන්ධනාගාර මූලස්ථාන ගොඩනැගිල්ලත් හෝටල් ව්‍යාපෘතියක් සඳහා වෙන් කිරීමට නාගරික සංවර්ධන අධිකාරිය දැනටමත් සැළසුම්කර තිබේ.

ඒ හැරුණු කොට වෙනත් ආයෝජන සඳහා එම භූමියෙන් අක්කර 35ක් වෙන් කෙරෙන අතර ආයෝජකයන් කිහිප දෙනෙකු මේ වනවිටත් එහි ව්‍යාපෘති සඳහා එකඟතාව පළකර තිබෙන බවද බන්ධනාගාර කළමනාකරණ හා සිරකරුවන් පුනරුත්ථාපන කටයුතු රාජ්‍ය අමාත්‍ය ලොහාන් රත්වත්තේ  මෙහි දී සඳහන් කර සිටියේය.

දැනට එසේ කැමැත්ත පළ කර සිටින ආයෝජකයන්ට අමතරව තවත් ආයෝජකයන් සිටී නම් ඔවුන්ට ද මෙහි ආයෝජන සඳහා ආරාධනා කරන්නැයි අග්‍රාමාත්‍ය මහින්ද රාජපක්ෂ  නාගරික සංවර්ධන අධිකාරියේ නිලධාරීන්ට මෙම හමුවේ දී උපදෙස් ලබා දී තිබෙන බවය.

(aruna )

සීනි තොග සැගවූ වියත්මග ගජමිතුරන්ගේ ලාබය දෙගුණ බවට ආණ්ඩුවේ පාර්ශව වෙතින්ම චෝදනා එල්ලවෙමින් තිබේ.

පහත දැක්වෙන්නේ ඒ සම්බන්ධව ලංකා ලීඩ් නිව්ස් වෙබ් අඩවියේ පළවූ පුවතකි.

රුපියල් මිලියන 29,000ක බදු සහන හෙවත් බදු වංචාවට පසුව සීනි තොග සැඟවීම මගින් කරණ ලද කූට උපක්‍රමය හරහා පාලන මිලට වඩා සීනි කිලෝ ග්‍රෑම් 1කට රුපියල් 31ක් වැඩිපුර මුදලක් ලබා ගැනීමට සීනි ආනයන ජාවාරම්කරුවන් සමත් වී ඇත.

ලංකා ලීඩ් වෙබ් අඩවිය වෙළෙඳ පොලේ පවතින සීනි මිල සම්බන්ධයෙන් ජාතික සංවිධානවල මතය විමසූ විට ජාතිකි සංවිධාන එකමුතුවේ මාධ්‍යය ප්‍රකාශක වෛද්‍යය වසන්ත බංඩාර ඉහත අදහස දැක්වීය.

වෛද්‍යය වසන්ත බංඩාර මහතාට අනුව ආණ්ඩුව විසින් ලබා දුන් බදු සහනය බදු වංචාවක් වන්නේ එම සහනයට අනුව සීනි මිල රුපියල් 49.75කින් අඩු කළ යුතු වුවත් ජාවාරම්කරුවන් විසින් ඒ වන විට රුපියල් 135ට තිබූ සීනි කිලෝවක මිල රුපියල් 205 දක්වා ඉහළ දැමීම හේතුවෙනි.එහිදී වෛද්‍යයවරයා වැඩිදුරටත් පෙන්වා දෙන්නේ බදු සහනය අනුව රජය සීනි කිලෝ ග්‍රෑම් 1කට නියම කළ මිල රුපියල් 85ක් වන බැවින් එම මිල තුළ සීනි ආනයනයකරුවන්ගේ සියලු වියදම් සහ සාමාන්‍යය ලාභයද ඇතුලත් වන බැවින් අත් අඩංගුවට ගනු ලැබූ සීනි වලට ගෙවිය යුත්තේ රුපියල් 85ක් හෝ ඊට වඩා අඩු මිලක් බවයි.

ඒ වෙනුවට එම සීනි තොග වලට කිලෝ ග්‍රෑම් 1කට රුපියල් 116ක් ගෙවීම මගින් ජාවාරම්කරුවන්ට රුපියල් 31ක අමතර ලාභයක් ලැබෙන බවද වෛද්‍යය වසන්ත බණ්ඩාර මහතා අවධාරණය කළේය. එහිදී වැඩිදුරටත් කරුණු දක්වමින් වෛද්‍යය වසන්ත බණ්ඩාර මහතා පවසා සිටියේ,අත්අඩංගුවට ගත් සීනි තොග සහ රටතුල තිබෙන අනෙකුත් සීනි තොග එම මිලට විකුණන්නේ නම් ජාවාරම්කරුවන්ට අමතරව රුපියල් මිලියන 20,000ක ලාභයක් ලැබෙන බවයි.

බැඳුම්කර වංචාවෙන් කළ හානියට වඩා සීනි බදු වංචාවෙන් කළ හානිය බරපතල බව පවසන වෛද්‍යය වසන්ත බණ්ඩාර මහතා මෙවැනි ගොං වැඩ හෝ මෙවැනි අමුම අමු වංචා සිදුවන රටක් ලෝකයේ කොතැනක හෝ ඇත්තේනම් පෙන්වා දෙන ලෙස ඕනෑම කෙනෙකුට අභියෝග කරණ බවද අවධාරණය කළේය.

මෙම සීනි ජාවාරම්කරුවන් ගෝඨාභය රාජපක්ෂ මහතා ජනාධිපතිවරයා බවට පත්වීමට පෙර සිටම වියත් මගේ කිට්ටුවන්තයන් ලෙස පෙනී සිටියේ මෙම වංචාවන් සඳහා වට පිටාව සකසා ගැනීමට බවද වෛද්‍යය වසන්ත බණ්ඩාර මහතා පවසා සිටියේය. අයුතු ලාභ ලැබීම වෙනුවෙන් මෙම පිරිස් ජනාධිපතිවරයාගේ ගෞරවයටද විශාල හානියක් කරණ බවද පෙන්වා දෙන වසන්ත බණ්ඩාර මහතා, ජාතික සංවිධාන දිගින් දිගටම ගෝඨාභය රාජපක්ෂ මහතාගේ ජයග්‍රහනය තහවුරු කිරීමට පෙනී සිටි බලපෑම් කණ්ඩායමක් ලෙස ජනාධිපතිවරයාගේ කීර්තියට මෙවැනි ජාවාරම්කරුවන් කරණු ලබන හානිය සුළු කොට නොතකන බවද අවධාරණය කළේය.

''අපරාධයක් පිලිබඳව පරීක්ෂණ පැවැත්වීමේ මුවාවෙන්, පුරවැසියන් බිය ගැන්වීමට සැලැස්වීම හා කරදරයට පත් කිරීම සඳහා, අපරාධ නඩු විධිවිධාන සංග්‍රහය තුළ අන්තර්ගත ප්‍රතිපාදන අවභාවිතා කිරීමට'' එරෙහිව, හිටපු අමාත්‍ය පාඨලී චම්පික රණවක විසින් පොලිස්පතිවරයා වෙත පැමිණිල්ලක් සිදුකර ඇත.

අද (07) විශේෂ පාර්ලිමේන්තු දිනයක් බැවින් එම පැමිණිල්ල භාරදීම සඳහා හිටපු අමාත්‍යවරයා පැමිණි නොසිටි අතර ඒ වෙනුවෙන් එම අවස්ථාව සඳහා සහභාගී වූ හිටපු පළාත් සභා මන්ත්‍රී නිශාන්ත ශ්‍රී වර්ණසිංහ මෙසේ වැඩිදුර අදහස් දැක්වීය.

‘’ අද අපි පොලිස් මූලස්ථානයට පැමිණියේ පොලිස්පතිතුමාට පැමිණිල්ලක් භාර දෙන්න. මේ පැමිණිල්ල භාරදෙන්නේ සමගි ජන බලවේගයේ පාර්ලිමේන්තු මන්ත්‍රී ගරු පාඨලී චම්පික රණවක මැතිතුමා. එතුමා අද මෙම ස්ථානයට පැමිණිලා පොලිස්පතිතුමාට මේ පැමිණිල්ල භාර දෙන්නයි නියමිතව තිබුණේ. නමුත් අද දවසේ පාර්ලිමේන්තු සැසිවාරය පැවැත්වෙන නිසා, එතුමා එම පාර්ලිමේන්තු සැසිවාරයට සහභාගි වෙනවා. ඒ නිසා අද මේ පැමිණිල්ල භාරදීම සඳහා නීතිඥ රජික කොඩිතුවක්කු මහතාත්, ඒ වගේම,හිටපු පළාත් සභා මන්ත්‍රී නිශාන්ත වර්ණසිංහ වන මමත්, චම්පික ඇමතිතුමා වෙනුවෙන් අද අපි මේ පැමිණිල්ල, පොලිස්පතිතුමාට භාරදෙන්න කටයුතු කරනවා.

මොකක්ද මේ පැමිණිල්ලෙන් අපි බලාපොරොත්තු වෙන්නේ? අපි දැක්කා පසුගිය දින කිහිපය තුළ, විශේෂයෙන්ම පොලිස් දෙපාර්තමේන්තුවත්, අපරාධ පරීක්ෂණ දෙපාර්තමේන්තුවත්, මේ රටේ පුරවැසියන් බියවැද්දීම සඳහා, ඔවුන් කරදරයට පත් කිරීම සඳහා, ඔවුන් පොලිස් මූලස්ථානයට ඒ වගේම පොලිස් අපරාධ පරීක්ෂණ දෙපාර්තමේන්තුවට සහ ඊට අදාලව තියෙන විවිධ අපරාධමය පරීක්ෂණ සඳහා කැඳවීම් කරනවා.

මාධ්‍යවේදීන්, ඒ වගේම වෘත්තීයවේදීන්, දේශපාලන ක්‍රියාකාරිකයින්, සමාජ මාධ්‍ය ක්‍රියාකාරිකයින් සහ මේ රටේ සිවිල් පුරවැසියන් අද පොලිස් දෙපාර්තමේන්තුව විසින් කැඳවලා, ඔවුන්ව කිසියම් ආකාරයකට කරදරයකට පත් කිරීම, එහෙම නැත්නම් බියවැද්දීමක් සිදුකරනවා. මේක පැහැදිලිවම, පොලිස් දෙපාර්තුමේන්තුව සතුව තියෙන බලතල වල වපසරිය ඉක්මවා කටයුතු කිරීමක් විදියටයි අපි දකින්නේ. මේ රටේ ජනතාවට තියෙන භාෂණයේ නිදහස, ඒ වගේම දේශපාලන ක්‍රියාකාරකම් වල නිරත වීමේ තියෙන අයිතිය සහ අනිත් පැත්තෙන් ගත්තම යම්කිසි මතයක් දැරීමට තියෙන අයිතිය, මේ අයිතිය තමයි අද මේ අභියෝගයට ලක් කරන්නේ.

එහෙම නැත්නම් එවැනි මත ප්‍රකාශ කරන, විශේෂයෙන්ම වෛද්‍යවරු ගණනාවක්, පසුගිය දිනවල අපි දැක්කා මේ අපරාධ පරීක්ෂණ දෙපාර්තමේන්තුවට කැඳවනවා. ඒකට හේතු වුනේ ඔවුන් යම්කිසි සෞඛ්‍ය ක්ෂේත්‍රය සම්බන්ධයෙන් පළ කරන අදහසක්, මතයක්. ඒ මත තමයි ඔවුන්ව අපරාධ පරීක්ෂණ දෙපාර්තමේන්තුවට කැඳෙව්වේ.

ඒ වගේම අපි දැක්කා වෘත්තීය සමිති නායකයෙක්, විශේෂයෙන්ම මේ රටේ ඉන්ධන හිඟය පිළිබඳව මතයක් පළ කළා කියලා, ඔහුව අපරාධ පරීක්ෂණ දෙපාර්තමේන්තුවට කැඳෙව්වා. ඒ වගේම වෛද්‍යවරයෙක් තමන්ගේ හැඟීම් සහ තමන්ගේ අදහස්, ඒ කියන්නේ තමන්ගේ රෝහල තුළ රෝගීන්ගේ තත්වය සම්බන්ධයෙන් ඔහුට තිබුණු සංවේදීමය හැඟීම් ප්‍රකාශ කරා කියලා, ඔහු පිටුපස මේ අපරාධ පරීක්ෂණ දෙපාර්තමේන්තුව හඹා ගියපු හැටි අපි දැක්කා. දැන් සමාජ මාධ්‍යවේදීන්ටත් මේ විදිහටම, මේ තර්ජනය, බලපෑම කරන්න පටන් අරගෙන තියෙනවා.

ඉතින් ඒක නිසා අපි කියන්නේ පැහැදිලිවම, අපරාධ නඩු විධි විධාන සංග්‍රහයේ 109(6) යටතේ මෙවැනි පරීක්ෂණයක් කරන්න. ඒ කියන්නේ, යම්කිසි අපරාධමය පරීක්ෂණයක් කරන්න පොලිස් දෙපාර්තමේන්තුවට, ඒ කියන්නේ පුරවැසියන්ගෙන් සහය ලබාගැනීමේදී අනුගමනය කළ යුතු යම්කිසි බලතලමය වපසරියක් තියෙනවා. ඒ වපසරිය ඉක්මවා ගිහිල්ලා තමයි කටයුතු කරන්නේ.

යම් පුරවැසියෙක්ගේ ප්‍රකාශයක් සටහන් කරගන්න අවශ්‍ය නම් දැන් ඒ ප්‍රදේශයේ අදාළ මහේස්ත්‍රාත්වරයාගෙන් මේකට යම්කිසි බලයක් ලබාගත යුතුයි. නමුත් ඒ සියල්ල ඉක්මවා ගිහිල්ලා තමයි අද මේ පොලිස් දෙපාර්තමේන්තුව කටයුතු කරමින් තියෙන්නේ. අපරාධ පරීක්ෂණ දෙපාර්තමේන්තුව කටයුතු කරමින් සිටින්නේ.

ඒ නිසා අපි පැහැදිලිව කියනවා, මේ රටේ ජනතාවගේ මූලික අයිතිවාසිකම්, ඒ වගේම අනිත් පැත්තෙන් භාෂණයේ නිදහස, අදහස් ප්‍රකාශ කිරීමේ නිදහස, දේශපාලන ක්‍රියාකාරකම් වල නිරත වීමේ නිදහස අද අභියෝගයට ලක් කරමින් තියෙනවා. මේ පොලිස් දෙපාර්තමේන්තුව අනීතික ආකාරයට.

ඉතින් ඒක නිසා, මෙන්න මේ පිළිබඳව පැහැදිලිව අපේ විරුද්ධත්වය ප්‍රකාශ කරන්නත්, මෙමගින් රටේ මූලික මිනිස් අයිතිවාසිකම් සහ නීතිමය වශයෙන් පුරවැසියන්ට තියෙන රැකවරණය අහිමි කිරීමක්, බියවැද්දීමක්, ඔවුන් හිරිහැරයට, කරදරයට පත් මෙමගින් සිදු කරන්නේ. ඒක නිසා මේ පිළිබඳව පොලිස්පතිවරයාට තමන්ගේ දෙපාර්තමේන්තුවේ, අදාළ ආයතන වල තියෙන සීමාව ඉක්මවා කටයුතු කිරීම පිළිබඳව කරුණු පැහැදිලි කිරීම සඳහා තමයි අද මේ පැමිණිල්ල පොලිස්පතිතුමාට භාරදෙන්නේ. ‘’

මේ ආකාරයට පොලිස්පතිට යොමුකල පැමිණිල්ල පහත දැක්වෙයි.

ජාතික බෝවන රෝග විද්‍යායතනයේ කායික රෝග විශේෂඥ වෛද්‍ය ආනන්ද විජේවික්‍රම කොවිඩ් රෝග මර්දනය පිළිබඳ සායනික කමිටුවේ සාමාජිකත්වයෙන් ඉවත්වී ඇත.

කමිටුව විසින් ගනු ලබන ඇතැම් තීරණවලට තමන්ට එකඟ විය නොහැකි හෙයින් තමා ඉන් ඉවත්වන බව විජේවික්‍රම, සෞඛ්‍ය සේවා අධ්‍යක්ෂ ජනරාල්වරයාට සහ සෞඛ්‍ය අමාත්‍යාංශ ලේකම්වරයාට ඊ-මේල් පණිවුඩයක් මගින් දැනුම්දී තිබේ.

විශේෂඥයින්ගේ උපදෙස් නොතකමින් මෙරට කොවිඩ් එන්නත්කරණ වැඩසටහන ඉකුත් කාල සීමාවේදී ක්‍රියාත්මක වූ බවට චෝදනා එල්ල විය.

වයස අවුරුදු 60 ට වැඩි පුද්ගලයන්ට පළමුව කොවිඩ් එන්නත් ලබා දිය යුතු බවට තාක්ෂණික කමිටුව නිර්දේශ කර තිබුණද වයස අවුරුදු 30 ට වැඩි සියලු පුද්ගලයින්ට පළමුව එන්නත් ලබාදීමට පියවර ගැනිණ.

ඒ හේතුවෙන් වයස අවුරුදු 60 ට වැඩි අවදානම් කාණ්ඩයේ පුද්ගලයින් විශාල පිරිසකට එන්නත් ලබාදීම ප්‍රමාද වූ බවත්, එය මෙරට කොවිඩ් මරණ වැඩිවීමට හේතුවක් වූ බවත් විශේෂඥයින්ගේ මතයයි.

පෙර දිනයේ පවා කොවිඩ්-19 හේතුවෙන් මියගිය අති බහුතරය වයස අවුරුදු 60ට වැඩි අයයි. ඔවුන් අතරින් ද බහුතරය තවමත් එන්නත ලබාගැනීමට අවස්ථාව නොලැබුණු අයයි.

දිගින් දිගටම විශේෂඥයින්ගේ උපදෙස් අනුව කොවිඩ් මර්දන වැඩසටහන් ක්‍රියාත්මක නොවන තත්ත්වයක් තුළ එමගින් ඉදිරියේදී ඇතිවිය හැකි තත්ත්වයන්ට වගකිව නොහැකි බව විශේෂඥ වෛද්‍ය ආනන්ද විජේවික්‍රම සෞඛ්‍ය බලධාරීන්ට දැනුම්දී ඇත.

හම්බන්තොටට ෆයිසර් දීම !

මේ අතර හම්බන්තොට දිස්ත්‍රික්කයේ වයස අවුරුදු 20 ත් 30 ත් ත් අතර තරුණයින් සඳහා ෆයිසර් එන්නත් ලබාදීමද විශේෂඥ මතයට බැහැරව සිදුවී ඇති බව පැවසේ.

විශේෂඥ වෛද්‍යවරුන් යෝජනා කර ඇත්තේ විවිධ රෝගාබාධවලින් පෙළෙන අවධානම් කාණ්ඩයේ පසුවන දරුවන් සඳහා එම ෆයිසර් එන්නත මාත්‍රා 50,000 වෙන් කරන ලෙසයි.

කෙසේ වෙතත් එම උපදෙස් නොතකමින් ෆයිසර් එන්නත් 50,000 ක් පසුගියදා හම්බන්තොට දිස්ත්‍රික්කයේ එන්නත්කරණ කටයුතු සඳහ යොමු කර ඇත.

theleader

අත්‍යවශ්‍ය ආහාර ද්‍රව්‍ය සැපයීම සහ සැඟවීම වැලැක්වීම සඳහා බව කියමින් ජනාධිපති ගේ නියෝග මත පැනවුණු හදිසි නීති රෙගුලාසි බලාත්මක කිරීමේ යෝජනාව අද (06) පාර්ලිමේන්තුවේදී වැඩි ජන්දයෙන් සම්මත විය.

යෝජනාවට පක්ෂව ඡන්ද – 132 ක් ලැබුණු අතර විපක්ෂව ඡන්ද – 51ක් ලැබිණ.

විපක්ෂයේ සියලුම පක්ෂ හදිසි නීති යෝජනාවට එරෙහිව ජන්දය භාවිත කළේ, මතුව ඇති අර්බුදය විසඳීමට හදිසි නීතිය පැනවීම කිසිසේත් අවශ්‍ය කරුණක් නොවන බව අවධාරණය කරමිනි.

අත්‍යාවශ්‍ය ආහාර ද්‍රව්‍ය සැපයීම සඳහා වන හදිසි නීති රෙගුලාසි පසුගිය දා ජනාධිපති ගෝඨාභය රාජපක්ෂ මහතා විසින් ගැසට් කරනු ලැබිණ.

අදාළ ගැසට් නිවේදනය නිකුත් කෙරුණේ, කොවිඩ් – 19 වසංගත තත්ත්වය හේතුවෙන් රටේ මහජන හදිසි අවස්ථා තත්ත්වයක් පවතින බව සඳහන් කරමිනුයි.

ඒ අනුව මහජන ආරක්ෂාව රටේ යථා පැවැත්ම, සුරක්ෂිත කිරීම හා ජන ජීවිතයට අත්‍යාවශ්‍ය සැපයීම් හා සේවා පවත්වා ගෙන යාම සඳහා අදාළ පියවර ගන්නා බව අදාළ ගැසට් නිවේදනය නිකුත් කරමින් වැඩිදුරටත් සඳහන් කෙරිණ.

කොරෝනා මරණ 180 !

මේ අතර තවත් කොරෝනා මරණ 180ක් සෞඛ්‍ය සේවා අධ්‍යක්ෂ ජනරාල්ගේ තහවුරුව යටතේ, අද රජයේ ප්‍රවෘත්ති අධ්‍යක්ෂ ජනරාල් විසින් නිවේදනය කර ඇත.

මේ මරණ 180 ඊයේ (05) දිනට අදාළව තහවුරු කර ඇති අතර ඒ අනුව මෙරටින් වාර්තා වන කොරෝනා මරණ සංඛ්‍යාව 10320ක් දක්වා ඉහළ ගොස් ඇත.

රජයේ ප්‍රවෘත්ති දෙපාර්තමේන්තුව නිකුත් කළ නිවේදනයට අනුව, මියගිය පිරිස අතරින් 97 දෙනෙකු පිරිමි පුද්ගලයින් වන අතර ඉතිරි 83 දෙනා කාන්තාවන් ය.

වාර්තා වූ කොරෝනා මරණ අතර වයස අවුරුදු 30ට අඩු ආසාදිතයින් 7 දෙනෙක් සිටිති.

මියගිය පිරිස අතර අවුරුදු 30 – 59 ත් අතර වයසේ පසුවන ආසාදිතයින් 40 දෙනෙකු සිටින අතර ඉතිරි ආසාදිතයින් 133 දෙනා ම වයස අවුරුදු 60 සහ එම වයස් සීමාව ඉක්ම වූ වැඩිහිටියන් ය.

ඊට අදාළ නිවේදනය පහත දැක්වෙයි.

වැලිගම නගරසභාවේ යමුනා කාන්ති නගරාධිපතිනියගේ (එක්සත් ජාතික පක්ෂය ) අත්තනෝමතික ක්‍රියාවක් හේතුවෙන් එහි සේවය කරන කාර්ය මණ්ඩලය කොවිඩ් 19 ආසාදිත අවධානමකට නිරානවරණයවීමක් සම්බන්ධව තොරතුරු වාර්තා වෙයි.

විශ්වාස කටයුතු ආරංචිමාර්ග සඳහන් කරන ආකාරයට මෙම අවධානම මතුව ඇත්තේ, කොරෝනා ආසාදිත බවට රෝග ලක්ෂණ පෙන්නුම්කළ නගරසභා සේවකයකු සෞඛ්‍ය අංශ උපදෙස් පවා නොතකා නගරාධිපතිනිය සිදුකළ රාජකාරි පැවරීමක් නිසාය.

වැඩිදුරටත් වාර්තා වන ආකාරයට අදාළ සේවකයා තමන්ට කොවිඩ් ආසාදනයවූ බවට සැකසංකා මතුවූ රෝග ලක්ෂණ හේතුවෙන් PCR පරීක්ෂණයක් සඳහා යොමුව තිබේ.

නගරසභාවේ සෞඛ්‍ය පරීක්ෂකවරයා වෙත සිදුකළ දැනුම්දීමක් අනුව මෙසේ නගරසභා සේවකයා PCR පරීක්ෂණයට යොමුව ඇති අතර, එහිදී දැනුම්දී ඇත්තේ, PCR පරීක්ෂණයේ ප්‍රතිඵල වාර්තාව ලැබෙනතුරු සේවයට වාර්තා නොකර දින 7ක් නිවෙස් නිරෝධායනය සඳහා යොමුවන ලෙසය.

ඒ අනුව සේවකයා නිවෙස් නිරෝධායනයට යොමුව ඇත. නමුත් PCR ප්‍රතිඵල වාර්තාව ලැබීමට පෙර වැලිගම නගරාධිපතිනිය අදාළ සේවකයාට වහාම රාජකාරියට වාර්තා කරන ලෙස දන්වා ඇති අතර ඒ, ඊයේ (05) දිනට යෙදුනු එක්සත් ජාතික පක්ෂයේ 75 වන සංවත්සරය නිමිත්තෙන් නගරසභාව ආශ්‍රිත සැරසිළි සිදුකිරීම සඳහාය.

නගරාධිපතිගේ නියෝගය අනුව අදාළ සේවකයා රාජකාරියට වාර්තා කර ඇති අතර, එහිදී ඔහු සුපුරුදු පරිදි නගර සභාවේ අංශ කිහිපයක් වෙතද ගොස් ඇති බව ආරංචිමාර්ග පවසයි. මෙම සේවකයාට අදාළ PCR පරීක්ෂණයේ ප්‍රතිඵල වාර්තාව ලැබී ඇත්තේ, ඔහු සිය රාජකාරි සිදුකිරීමෙන් පසුව වන අතර එහි ප්‍රතිඵලය වී ඇත්තේ කොරෝනා positive බවය.

මේ සම්බන්ධව අදහස් දක්වන නගරසභා කාර්ය මණ්ඩලය චෝදනා කරන්නේ, නගරාධිපතිනිය දේශපාලන ලකුණු දමා ගැනීමට සිදුකළ අත්තනෝමතික ක්‍රියාව හේතුවෙන් රැසකගේ ජීවිත අවධානමේ දැමුණු බවය. වසංගත සමයක සෞඛ්‍ය අංශ නියෝගපවා කඩකළ නගරාධිපතිනියගේ ක්‍රියාව හෙළාදකින ඔවුන් වැඩිදුරටත් සඳහන් කරන්නේ, නිරෝධායන නීති උල්ලංඝනය කිරීම සම්බන්ධව නගරාධිපතිනියට එරෙහිව සෞඛ්‍ය බලධාරීන් ක්‍රියාමාර්ග ගෙන දිවයිනේ රාජ්‍ය අංශ මෙන්ම පළාත් පාලන ආයතන වෙත එය අත්දැකීමක් කල යුතු බවය.

පොහොර නැතිව, වල් - කෘමි - දිලීර නාශක නැති මෙවර මහ කන්නය ‘කුඹුරු පිදුරු‘ කරනු ඇතැයි ද, ආණ්ඩුවේ ‘සාගතයක දැක්ම‘ මෙගා නාට්‍යය රඟදක්වමින් සිටින බව ද මාතලේ දිස්ත්‍රික් පාර්ලිමේන්තු මන්ත්‍රීනී  රෝහිණී කවිරත්න පවසයි.

එල්.ටී.ටී.ඊ. සංවිධානයේ භාෂා පරිවර්තක ලෙස කටයුතු කළ 'ජෝර්ජ් මාස්ටර්' (George Master) අද (05) දින යාපනය රෝහලේදී අභාවප්‍රාප්ත වී ඇත.

පසුගිය මාස කිහිපයේ රෝගී තත්ත්වයන් යුතුව සිටි ඔහු මියැදෙන විට වයස අවුරුදු 85කි.

වෘත්තියෙන් තැපැල් ස්ථානාධිපතිවරයකු වූ වේලුපිල්ලේ කුමාරු පංචරත්නම් එල්.ටී.ටී.ඊ. සංවිධානය තුළ හඳුන්වන ලද්දේ ජෝර්ජ් මාස්ටර් යන නමිනි.

එල්.ටී.ටී.ඊ. සංවිධානයට සම්බන්ධ වීමෙන් අනතුරුව ඔහු එහි දේශපාලන අංශයේ නායක තමිල් සෙල්වම් සමඟ කටයුතු කළේය.

එල්.ටී.ටී.ඊ. සංවිධානයේ භාෂා පරිවර්තකයකු වූ ජෝර්ජ් මාස්ටර් ඉංග්‍රීසි සහ සිංහල භාෂා ප්‍රවීණයකු වූ අතර ශ්‍රී ලංකා ආණ්ඩුව සහ කොටි සංවිධානය අතර රට තුළ සහ විදේශයන්හි පැවැත්වුන සාම සාකච්ඡාවන්හි දී භාෂා පරිවර්තකයකු මට්ටමින් ඒවාට සහභාගී විය.

යුද්ධය නිමාවේ යුදකලාපයෙන් පිටව අනාථ කඳවුරකට පැමිණීමෙන් පසු අත්අඩංගුවට පත්වූ ජෝර්ජ් මාස්ටර් නීතිපති උපදෙස් මත හත්වසරකට පසු 2016 ජුලි 04 දා ඇප මත මුදා හරිනු ලැබුණි. ජෝර්ජ් මාස්ටර්ට එරෙහිව පැමිණිල්ල ගොනු කර තිබුනේ 2009 වසරේ දී ය.

the leader

හදිසි අවස්ථා යටතේ අත්‍යවශ්‍ය ආහාර සැපයුම සම්බන්ධයෙන් අත්‍යවශ්‍ය සේවා කොමසාරිස් ජෙනරාල්වරයා වෙතින් පොලිස්පතිවරයාට, සියලුම දිසාපතිවරුන් ට, පාරිභෝගික කටයුතු පිළිබඳ අධිකාරිය හා ආහාර කොමසාරිස්වරයා වෙත ලිඛිත නියෝගයක් කර තිබේ.

එමගින් දන්වා ඇත්තේ නිත්‍යානුකූල නොවන ලෙස අත්‍යවශ්‍ය ආහාර ද්‍රව්‍ය තොග රැස් කරන්නන්ගෙන් එම තොග රජයේ අනුමත මිලට මිලදී ගෙන ජනතාවට සාධාරණ මිලට ලබාදීමට කටයුතු කරන ලෙසයි.

ඒ සඳහා වන මැදිහත්වීම සිදු කර තමන් වෙත වාර්තා කරන ලෙස ද ඉන් නියෝග කර තිබේ.

කෙසේවුවත් මේ ආකාරයට අත්අඩංගුවට ගනුලබන ආහාර තොග සඳහා ආණ්ඩුව එම ව්‍යාපාරිකයන්ට මුදල් ගෙවීමක් සිදුකරන බවත් වාර්තා වෙයි.

පහත දැක්වෙන්නේ අත්‍යවශ්‍ය සේවා කොමසාරිස් ජෙනරාල් නිකුත් කල නිවේදනයයි.

එක්සත් ජාතික පක්ෂයට වසර 75ක් පිරීම නිමිත්තෙන් වූ සංවත්සර සැමරුම අද (05) සිදුවිය.

"ජ්‍යෙෂ්ඨ ඉතිහාසයක් ශ්‍රේෂ්ඨ අනාගතයක්" යන තේමාවෙන් මෙවර එජාප සංවත්සර සැමරුම් උත්සවය මෙවර පැවැත්වුණේ කොරෝනා වසංගතය හේතුවෙන් ඔන්ලයින් තාක්ෂණය ඔස්සේය.

එහිදී පිරිස අමතමින් එක්සත් ජාතික පක්ෂයේ නායක , හිටපු අග්‍රාමාත්‍ය රනිල් වික්‍රමසිංහ පවසා සිටියේ , තව වසර විසි හතකින් නිදහසේ සියවස සමරන දා ශ්‍රේෂ්ඨ ශ්‍රී ලංකාවක් බිහි කරන්නට හැකියාව ඇත්තේ එක්සත් ජාතික පක්ෂයට පමණක් බවය.

නව ශ්‍රී ලංකාවක් බිහි කරන වැඩපිළිවෙළ සමඟ අලුත් වූ එක්සත් ජාතික පක්ෂය අරඹන ගමනට නායකත්වය ගනිමින් එකතු වන්නැයි තරුණ පරපුර ඇතුළු සියලු දෙනාට ආරාධනා කරන බවත් එජාප නායකයා සංවත්සර උත්සවය අමතමින් පැවසීය.

එක්සත් ජාතික පක්ෂ නිර්මාතෘ මහාමාන්‍ය ඩී.එස්.සේනානායක ප්‍රමුඛ පක්ෂයේ ආදි නායකයන් සිහිපත් කිරීමෙන් අනතුරුව වත්මන් නායක හිටපු අග්‍රාමාත්‍ය රනිල් වික්‍රමසිංහ පක්ෂයේ ඉදිරි වැඩපිළිවෙළ ප්‍රකාශයට පත් කරමින් සංවත්සර උත්සවය අමතනු ලැබීය.

එක්සත් ජාතික පක්ෂ මහ ලේකම් පාලිත රංගේ බණ්ඩාර මහතා මෙහිදී පිළිගැනීමේ කතාව කළ අතර නියෝජ්‍ය නායක රුවන් විජයවර්ධන ඇතුළු පක්ෂයේ ප්‍රධානීන් මේ අවස්ථාව සඳහා එක්වූහ.

තවත් කොරෝනා මරණ තවත් කොරෝනා මරණ 189ක් සෞඛ්‍ය අධ්‍යක්ෂක ජනරාල්වරයා විසින් තහවුරු කර රජයේ ප්‍රවෘත්ති අධ්‍යක්ෂ ජනරාල් විසින් අද (05) නිවේදනය කර ඇත.

ඒ සමගම මෙරට කොරෝනා මරණ ගණන 10140 දක්වා ඉහළ යයි.

රජයේ ප්‍රවෘත්ති දෙපාර්තමේන්තුව නිකුත් කළ නිවේදනයට අනුව, මියගිය පිරිස අතරින් 96 දෙනෙකු පිරිමි පුද්ගලයින් වන අතර ඉතිරි 93 දෙනා කාන්තාවන් ය.

වාර්තා වූ කොරෝනා මරණ අතර වයස අවුරුදු 30ට අඩු එක් කාන්තා ආසාදිතයෙකු ද වේ.

මියගිය පිරිස අතර අවුරුදු 30 – 59 ත් අතර වයසේ පසුවන ආසාදිතයින් 34 දෙනෙකු සිටින අතර ඉතිරි ආසාදිතයින් 154 දෙනා ම වයස අවුරුදු 60 සහ එම වයස් සීමාව ඉක්ම වූ වැඩිහිටියන් ය.

අද නිකුත්කළ වාර්තාව පහත දැක්වෙයි.

කොරෝනා වසංගතයෙන් බේරාගත හැකි මිනිස් ජිවිත ගනන සැළකිල්ලට ගෙන රට වසා දැමීම තවත් කාලයක් දීර්ඝ කලයුතු බව ශ්‍රීලංකා වෛද්‍ය සංගමය ආණ්ඩුවට නිර්දේශ කර ඇත.

ශ්‍රී ලංකා වෛද්‍ය සංගමය හා එක්ව අන්තර් වෛද්‍ය විද්‍යාල කමිටුව කොවිඩ් 19 සමනයට නිර්දේශ ඉදිරිපත් කරමින් පෙන්වාදී ඇත්තේ , ඔක්තෝම්බර් 02 වැනිදා තෙක් රට වසා දැමුවහොත් මිනිස් ජිවිත 10,000 ක් බේරා ගත හැකි බවයි.

''සංචාරක ව්‍යාපාරයට හිතකර තත්වයක් රට තුල ඇති කර ගැනීමට නම්, දිනකට වාර්තා වන රෝගීන් ගණන 950 කට අඩු විය යුතුව ඇති බවත් එසේම , පරීක්ෂණවලින් තහවුරු වන කොවිඩ් ආසාදිතයන් අනුපාතයද සියයට 2.5 ට අඩු විය යුතු බවත් ශ්‍රී ලංකා වෛද්‍ය සංගමයේ සභාපති විශේෂඥ වෛද්‍ය පද්මා ගුණරත්න හා අන්තර් වෛද්‍ය විද්‍යාල කමිටුවේ කැඳවුම්කාර මහාචාර්ය තමාසි මකුළොලුව නිකුත් කළ නිවේදනයේ සඳහන් ය.  

සංචරණ සිමා හා සෞඛ්‍ය උපදෙස් දැඩි ලෙස ක්‍රියාත්මක කරමින් කෘෂි කාර්මික හා එළිමහන් වෙළඳපොල සඳහා අවසර ලබා දීම නිර්දේශ කරන වෛද්‍ය සංගමය, පොදු ප්‍රවාහන සේවා, මංගල උත්සව, රුපලවන්‍යාගාර, ආපන ශාලා, සමාජ ශාලා සහ තැබෑරුම් යළි විවෘත කිරීම නොකළ යුතු බවත් එම නිවේදනය සඳහන් කර ඇත.

දැනට රට වසා දැමීමේ ක්‍රමවේදයේ  ලිහිල්භාවය නිසා නිසි ප්‍රථිපල ලබා ගත නොහැකි බවද ඔව්හු අවධාරණය කරති.

  ''වයස අවුරුදු 60 ට වැඩි සියලු දෙනාටත්, වයස අවුරුදු 18 ත් 60 ත් අතර රෝගී අයටත් ප්‍රමුඛතාවය  දෙමින් එන්නත්කරණය කළ යුතුය'' යි  පවසන වෛද්‍ය සංගමය, ඒ සඳහා දැනට බහුලව ඇති සයිනොෆාම් එන්නත නිර්දේශ කරයි.  

  ප්‍රතිශක්තිය අඩු ලේ පිළිකා, ටියුමර්, අවයව බද්ධ කර ඇති අය,  ඩිජෝර්ජ් සින්ඩ්‍රෝමය, විස්කොට් ඇල්ඩ්රිච් සින්ඩ්‍රෝමය ආදී රෝගයන්ගෙන් පෙළෙන සහ ඒඩ්ස් ආසාදිතයන් ට ප්‍රමුඛතාවය දිය යුතු බවත්, වකුගඩු රෝග, පිළිකා, දියවැඩියාව, මස්තිෂ්ක අංශභාගය, හෘද රෝග, තැලසීමියා හා පෙනහළු, අක්මා, වල නිදන්ගත රෝග වලින් පෙළෙන වයස අවුරුදු 12 ත් 18 ත් අතර ළමුන් සඳහා ෆයිසර් එන්නත ලබා දීමට වෛද්‍ය සංගමය නිර්දේශ කරයි. 

  ස්පුට්නික් දෙවන මාත්‍රාව ලබා ගැනීමට නොහැකි බැවින් ඒ වෙනුවට ෆයිසර්, මොඩර්නා හෝ අස්ට්‍රෝසොනිකා එන්නත් ලබා දීමත්, එතරම් ප්‍රතිශක්තියක් නොමැති වයස අවුරුදු 60 ට වැඩි ඇස්ට්‍රෝසොනිකා, ෆයිසර්, සහ මොඩර්නා එන්නත් ලබා ගත් සියල්ලටම පළමු මාත්‍රා දෙක ලබා ගෙන මාස 6 කට පසු තුන්වෙනි මාත්‍රාව ලෙස ඇස්ට්‍රා සෙනිකා එන්නත නිර්දේශ කර තිබේ. 

 ඊට අමතරව වෛද්‍ය සංගමය යෝජනා කරන්නේ ප්‍රතිශක්තිය අඩුව අයගේ ප්‍රතිශක්තිය වැඩි කිරීම සඳහා ''බුස්ටර්''` මාත්‍රාවක් ලබා දිය යුතු බවය.

ජාතික ඖෂධ නියාමන අධිකාරියේ දත්ත පද්ධතිය මැකී යාම සම්බන්ධයෙන් වන සැබෑ තත්වය අනාවරණය කරගැනීම වෙනුවට ආණ්ඩුවේ මන්ත‍්‍රීවරු පිරිසක් ඖෂධ ජාවාරම්කරුවන්ට සුදු හුණු ගෑමට උත්සාහ කරමින් සිටින බවත්, සුදු හුණු ගෑම පසෙකින් තබා දත්ත පද්ධතිය මකා දැමුවේ කවුරුන්ද යන්න අනාවරණය කරගැනීමට උත්සාහ ගන්නැයි සමගි ජන බලවේගයේ මාධ්‍ය ප‍්‍රකාශක පාර්ලිමේන්තු මන්ත‍්‍රී මනුෂ නානායක්කාර පැවසුවේය.

මෙම මන්ත‍්‍රීවරු කළ යුතුව ඇත්තේ දත්ත පද්ධතිය මැකී යාම සම්බන්ධයෙන් වන සත්‍ය තොරතුරු අනාවරණය කරගැනීම බවද මාධ්‍ය වෙත ප‍්‍රකාශයක් ලබාදෙමින් ඔහු කීවේය.

වැඩිදුරටත් අදහස් දැක්වූ මන්ත‍්‍රීවරයා මෙසේද කීය.

ජාතික ඖෂධ නියාමන අධිකාරියේ දත්ත පද්ධතිය මැකී යාම ගැන වෙන කාටවත් ඇගිල්ල දිගු කරලා හරියන්නේ නෑ. මේ අධිකාරියේ තියෙන්නේ වටිනා දත්ත පද්ධතියක්. ලංකාවට ගෙන්වන ප‍්‍රාථමික බෙහෙත් පෙත්තේ ඉදලා සියලුම රෝග සදහා අවශ්‍ය, මිල අධික බෙහෙත දක්වා වන දත්ත තියෙන්නේ මෙම අධිකාරියේ.

මේ වගේ සංවේදී දත්ත පද්ධතියක් සතියකට වරක් නැවත වරක් ගබඩා කරගන්නවා. ඒ මේ වගේ දත්ත පද්ධතියකට මොන යම් හෝ හානියක් සිදුවුනොත් ඒක ආරක්ෂා කරගැනීමට අවශ්‍ය වෙන නිසා.

ජාතික ඖෂධ නියාමන අධිකාරිය තමන්ගේ දත්ත පද්ධතිය භාරදීලා තියෙන්නේ එපික් ලංකා කියන ආයතනයටයි. ආචාර්ය දෙහිගම මහත්තයා තමයි මෙහි ප‍්‍රධානත්වය දරනවා. මේ ක්ෂේත‍්‍රය ගැන දැනුමක් ඇති අයෙක්. මේ දත්ත පද්ධතියේ වටිනාකම ඔහු දන්නේ නැද්ද?

මේ දත්ත පද්ධතිය තියෙන්නේ වෙනම ස්ථානයක. මේ දත්ත පද්ධතියේ ආරක්ෂාව වෙනුවෙන් යොදා ගත හැකි ක‍්‍රමවේදයන් කවරේද කියලා සොයා බැලුවේ නැද්ද?

මේ දත්ත පද්ධතිය මැකී ගොස් ඇත්තේ එක් පුද්ගලයෙක්ගේ වරදක් නිසා යැයි දැන් කියනවා. මේක වෙන කාගේවත් පිට දාලා බේරෙන්න හදන්නේ.

මේ දත්ත පද්ධතියට අයත් මුර පදය හතර දෙනෙක් අතේ තමයි තිබිලා තියෙන්නේ. මේ හතර දෙනාගේ අනුදැනුම නොමැතිව මේ දත්ත මැකිය හැකිද? මේ හතර දෙනාගෙන් කෙනෙක් නෙමෙයිද මේ දත්ත පද්ධතිය මකලා දැම්මේ. මේ හතර දෙනාගෙන් කෙනෙක් නම් කළේ ඒක කළේ කවුද?

සාමාන්‍යයෙන් අපේ ජංගම දුරකතනයෙන් ඡුායාරූපයක් ඉවත් කරන්න ගියත් ඒක ඉවත් කරන්නද කියලා අහනවා. ඒක මකලා දැම්මත් එකවර දුරකතනයෙන් ඉවත් වෙන්නේ නෑ. ඒක බින් එකට යනවා. එතැනිනුත් අයින් කරන්නද කියලා ඇහුවාම තමයි මේ ඡුායාරූප ඉවත් වන්නේ.

දැන් තියෙන අලුත් ජංගම දුරකතනයකින් ඡුායාරූපයක් ගත්තම ඒක ක්ලවුඩ් එකකට යනවා. දුරකතනයෙන් ඡයාරූපය ඉවත් කළත් ඒක ක්ලවුඩ් එකේ තියෙනවා. ඒ ගබඩාවෙන් ඉවත් කරන්න ගියත් මේක කරන්නම ඔ්නද කියලා අහනවා. එතකොට ජාතික ඖෂධ නියාමන අධිකාරියේ දත්ත මකනකොට මේ ප‍්‍රශ්ණවලට උත්තර දුන්නේ කවුද? එක බොත්තමක් එබූ පමණින් ඉවත් එම දත්ත ඉවත් වෙන්නේ නැහැ.

මේ දත්ත පද්ධතිය ඉවත් කරනවා නම් ඒ සදහා ඉහළ අධිකාරියකින් අනුමැතිය ලබාගැනීමේ අවශ්‍යතාවයක් තිබුණේ නැද්ද?

මේ දත්ත මකා දැමීමට විධායන දුන් පුද්ගලයා කවුද? මේ විධායනය දුන් පුද්ගලයා කවුරුන්ද කියලා අයි.පී. ලිපිනය හරහා සොයා ගන්න පුලුවන්. කොතැනිින්ද පරිඝනයකට ඇතුළු වුනේ කියලා සොයා ගන්න පුලුවන්. කාගේ මුර පදයෙන්ද ඇතුළු වුනේ.

මේ එකකටවත් උත්තර දෙන්නේ නැතිව ආණ්ඩුවේ මන්ත‍්‍රීවරු සුදු හුණු ගාන්න, තමන්ගේ යාළු මිත‍්‍රයින් බේරා ගන්න උත්සාහ කරනවා. බෙහෙත් මාෆියාවට අවශ්‍ය කරන ආකාරයට කවුරුන් හෝ දත්ත පද්ධතිය මකා දැමූ විට ඒකට සුදු හුණු ගාන්න හදනවා.

රටේ වැදගත් දත්ත පද්ධතිය ආරක්ෂා කරගැනිමට අවශ්‍ය මෘදුකාංග පද්ධතියක් තිබුණේ නැද්ද? මෙසේ ඉවත් වන දත්ත බැකප් කරගැනීම සදහා ක‍්‍රමවේදයක් තිබුණේ නැද්ද කියන එක බරපතල ප‍්‍රශ්ණයක්.

ජාතික ආරක්ෂාව රකිනවා කියලා ආණ්ඩුව ආවේ. ඒත් ජාතික ඖෂධ නියාමන අධිකාරියේ දත්ත පද්ධතියවත් ආරක්ෂා කරගැනීමට නොහැකි වෙලා තියෙනවා.

තාක්ෂණික වශයෙන් ගත්තම මේ දත්ත මැකීමට ඉහළ විධානයක් තිබිය යුතුයි. ඒ විධානය දුන්නේ කවුද? මේ දත්ත පද්ධතියට ඇතුළුවුනේ කවුද? ඔහුගේ අයි.පී. ලිපිනය මොකක්ද? ඔහු දත්ත පද්ධතියට ඇතුළු වුනේ කොතැනින්ද? මේ දත්ත පද්ධතියේ මුර පදය හතර දෙනෙක් සතුව තිබෙනවා නම් ඒ හතර දෙනා කවුද? මේ හතර දෙනාගෙන් පිට අයෙක් මේ දත්ත පද්ධතියට ඇතුළු වුනා නම් ඒ කවුද? කොතැන තිබෙන පරිඝනකයකින්ද ඒ සදහා ඇතුළුවී තිබෙන්නේ? කුමන රටින්ද, කුමන තැනකින්ද ඒ පද්ධතියට ඇතුළු වුනේ කියලා සොයා ගැනීමට අමාරු දෙයක් නෙමෙයි.

මේ මන්ත‍්‍රීවරු කරන්න ඔ්න මේ ඇත්ත සොයා ගෙන ප‍්‍රසිද්ධ කිරීමයි. මේක වෙන ආණ්ඩුවක් පිටින් දාලා අත සෝදාගන්න එපා.

– Manusha Media

රට තුළ විනිමය අනුපාත තුනක් ක්‍රියාත්මක වන බව ඒ ගැන සිදු කළ විමර්ශනයකදී හෙළිදරව් විය.

ඉන් පළමුවැන්න අමෙරිකානු ඩොලර් සඳහා මහ බැංකුව නියම කරන විදේශ විනිමය විකිණීමේ නිල අනුපාතයයි. දැන් එය ඩොලරයකට රු. 204/-ක් පමණය.

දෙවැනි විනිමය අනුපාතය ක්‍රියාත්මක කර ඇත්තේ පෞද්ගලික වාණිජ බැංකු විසිනි. එම බැංකුවලින් නිවේදනය කර ඇති පරිදි ඩොලරයක් විකුණන්නේ රු. 226/-ත් 228/-ත් අතර මිලකටය.

මෙම විනිමය අනුපාත දෙකටම අමතරව කොළඹ චැතැම් වීදිය ඇතුළු කළුකඩ වෙළෙඳපොළේ ඩොලරයක් අලෙවි වන්නේ රු. 240/-ත් රු. 250/-ත් අතර මිලකටය. මෙම නිල නොවන මූල්‍ය වෙළෙඳාම සඳහා බලපත් ලැබූ ව්‍යාපාරිකයෝද සිටිති.

එහෙත් ඔවුන් මෙයට පෙර ඩොලර් අලෙවි කළේ මහ බැංකු අනුපාතයට වඩා රුපියල් දෙක තුනක් මිල ඉහළ නංවමිනි.

රටේ වාණිජ බැංකුද මහ බැංකු අනුපාතයට සාපේක්ෂව රුපියලක දෙකක මිල වෙනසක් ඇතිව ඩොලර් අලෙවි කළේය.

පවත්නා ඩොලර් හිඟය නිසා රට තුළ මේ වන විට ඩොලර් අලෙවියට විනිමය අනුපාත තුනක් ක්‍රියාත්මකය. එසේම අනාගත වෙළෙඳපොළ සඳහා (Forward Market) ඩොලර් අලෙවිය සිදු කිරීමේදී විවිධ ඉහළ මිල අනුපාත වාණිජ බැංකු විසින් නියම කර තිබේ.

– Deshaya