පුවත්

ශ්‍රද්ධා සේයා ඡායාරූප තරගය සහ ප්‍රදර්ශනයේ නිල වේබ අඩෙවිය ශ්‍රී ලංකා පාර්ලිමේන්තු කථානයක ගරු කරු ජයසූරිය මැතිතුමා අතින් 2018 පෙරවාරි මස 05 වන සඳදා පෙරපවරු 10.12 ට යෙදුනු සුබ මොහොතින් නිල වශයෙන් ජන ගතවීය. මෙම ව්‍යාපෘතිය ජාතික ඒකාබද්ධ සහ ප්‍රතිසංවිධාන අමාත්‍යාංශයේ සහ යෝගයෙන් සේයාරූ සිප්හල සහ සේයාරූ සඟරාව සංවිධානය කරයි.

තරගය විවෘත, පාසල් ශිස්‍ය සහ උසස් හා වෘත්තීය අධ්‍යාපන ශිෂ්‍ය වශයෙන් ප්‍රධාන කොටස් තුනෙකි. මෙම අංශ සඳහා සම්මත පටල හෝ අංකිත කැමරා මගින් ගනු ලබන ඡායාරූප ඉදිරි පත් කළ හැකිය. සිව්වැනි අංශය ජංගම දුර කථන මගින් ගනු ලබන ඡායාරූප වෙනුවෙන් වෙන් වී ඇත. පිලිවෙලින් රුපියල් ලක්යෂ, හැත්තෑපන් දහස සහ පනස් දහසප බැගින් වටිනා වවුචර පත් පළමුවැනි, දෙවැනි සහ තෙවැනි ත්‍යාග ලෙස අංශ හතරටම පිරි නැමේ. එක් එක් අංශ වලට සිව්වන ස්ථානයේ සිට දහ තුන් වන ස්ථානය දක්වා රැපියල් දස දහස බැගින් වූ ත්‍යාග ද පිරි නැමේ.

නිර්මාණ ඉදිරි පත් කිරීම වෙබ් අඩෙවිය හරහා සිදු කල හැකි අතර නිර්මාණ භාර ගැනීම මැයි මස 31 වනදා දක්වා විවෘතව පවතී. ත්‍යාග ප්‍රදානය සහ කොළඹ ප්‍රදර්ශනය ජූලි මස පැවැත්වේ. වැඩි විස්තර සඳහා www.shraddhaseya.org වෙබ් අඩෙවියෙන්ද shraddhaseya ෆේස් බුක් පිටුවෙන්ද ලබා ගත හැකිය.

වමේ සිට - අබ්දුල් රහමන් අක්ජු මව්ලවී තුමා, එඩ්මන්ඩ් තිලකරත්න පියතුමා, කුමාර එදිරිසූරිය, මහාචාර්ය පූජ්‍ය කිවුලේගෙදර නාරද ස්වාමීන්වහන්සේ, අනුරුද්ධ පියදාස, කතානායක කරු ජයසූරිය මැතිතුමා, ආචාර්ය ප්‍රණීත් අභයසුන්දර මහතා, නිකරිල් කාන්ත් මහතා (ජාතික ඒකාබද්ධතා හා ප්‍රතිසංවිධාන අමාත්‍යාංශය), විජේසිංහ දිසානායක මහතා (නීතිය හා සාමය පිළිබඳ අමාත්‍යාංශය)

ඡායා - කල්ප දසුන් ගමගේ

ඩුබායිහිදී ප්‍රශ්න කිරීම සදහා පෙරේදා (04දා)  අත්අඩංගුව ගැණුනු රුසියාවේ හිටපු තානාපති උදයංග වීරතුංග දිවයිනට රැගෙන ඒමට සත් දෙනෙකුගෙන් යුත් කණ්ඩායමක් හෙට (07) දිවයිනෙන් පිටත් වීමට නියමිත බව පොලිස් මාධ්‍ය ප්‍රකාශක රුවන්ව ගුණසේකර මහතා  පැවසීය.

මිග් යානා ගනුදෙනුවක් සම්බන්ධයෙන් මූල්‍ය අපරාධ විමර්ශන කොට්ඨාශය සිදු කරන විමර්ශනයකට අදාළව අධිකරණය මඟහැර සිටින උදයංග වීරතුංග මහතාට කොටුව මහෙස්ත්‍රාත් අධිකරණය විවෘත වරෙන්තුවක් නිකුත් කර තිබේ.

මෙරට ප්‍ර‍මුඛ පෙළේ මාධ්‍ය ජාලයක් වන ස්වර්ණවාහිනී මාධ්‍ය ජාලය සහ ඊ.ඒ.පී. සමූහයට අයත් අනෙකුත් ආයතන වන ඊ.ටී.අයි. ෆිනෑන්ස් සමාගම, ඊ.ඒ.පී. චිත්‍රපට සමාගම, හෝටල් ව්‍යාපාරය, ස්වර්ණමහල් හා ස්වර්ණමහල් ෆිනෑන්ස් සමගම ඉහළ මිලකට මිලදී ගැනීමට දේශීය සමාගම් කීපයක් ඉදිරිපත් වී සිටියදී මැලේෂියානු සමාගමකට ලබාදීමට ශ්‍රී ලංකා මහ බැංකු අධිපතිවරයා අනුමැතිය දී ඇතැයි මහ බැංකුවේ අභ්‍යන්තර ආරංචිමාර්ග පවසයි.

සුදීර් ජයරාම් නමැති ව්‍යාපාරිකයකුට අයත් සිංගප්පුරුවේ ලියාපදිංචි Straits Grid Pte. Ltd. නමැති සමාගමට මෙසේ කුණු කොල්ලයට විකිණීමට ශ්‍රී ලංකා මහාබැංකුව තීන්දු කර ඇතැයි එම ආරංචිමාර්ග වැඩිදුරටත් කියා සිටියි.

සුදීර් ජයරාම් නැමැත්තා පසුගිය කාලයේ සිදු වූ මූල්‍ය වංචාවන් ගණනාවක් සම්බන්ධයෙන් සැකකෙරෙන පුද්ගලයෙකි.

මොහු කොළඹ ආශා සෙන්ට්‍රල් රෝහලට අයත් ඉඩමක් මිලදී ගැනීම සඳහා අත්තිකාරම් ගෙවීමට මුදල් ලබාගත් ආකාරය පිළිබඳත් මෙරට තවත් බොහෝ දේපළ මිලදී ගැනීම වෙනුවෙන් අත්තිකාරම් ගෙවූ ආකරය පිළිබඳත් හෙළි කිරීමට අදටත් නොහැකි වී ඇත.

එමෙන්ම රුපියල් මිලියන 31.8ක් වටිනා විදෙස් මුදල් ශ්‍රී ලංකාවෙන් පිටමං කිරීමට සූදානම් වෙද්දී මොහු බණ්ඩාරනායක ජාත්‍යන්තර ගුවන් තොටුපල රේගුවේ අත්අඩංගුවටද පත් වූ අතර මේ වෙනවිට මොහුට විරුද්ධව මූල්‍ය අපරාධ කොට්ඨාසය ද (FCID) විමර්ශනයක් ආරම්භකර ඇත.

 වීඩියෝ 

ස්වර්ණවාහිනිය ඇතුළු ඊඒපී සමූහයේ ව්‍යාපාර ජාලය මිලදී ගැනීමට සූදීර් ජයරාම් නැමැත්තා රුපියල් බිලියන 9.1ක ලන්සුවක් දී ඇති අතර දේශීය සමාගමක් රුපියල් බිලියන 9.3කට එය මිලදී ගැනීමට කැමැත්ත ඵල කර ඇත.

එය සුදීර් ගේ ලන්සුවට වඩා රුපියල් කෝටි 20කටත් වැඩි මිලකි.

කරුණු එසේ වුවත් රු. බිලියන 93කට වඩා වැඩි මිලකට විදේශීය සමාගමක් ස්වර්ණවාහිනිය ඇතුළු සමාගම් මිලදී ගැනීට කැමැත්ත ඵල කර ඇතැයි පවසන මහා බැංකු අධිපතිවරයා එම සමාගමට ඊඒපී සමූහය විකිණීමට තීන්දු කළ බව පවසයි.

නමුත් මහා බැංකු අධිපතිවරයා එම ඉහළ මිල කුමක්දැයි හෙළි කිරීමට මැලි වෙයි. එහෙයින් පෙනී යන්නේ මහා බැංකු අධිපතිවරයා බොරු කියමින්, හොර පාරෙන් ස්වර්ණවාහිනිය ඇතුළු ඊඒපී සමූහය සුදීර්ට දීමට යත්න දරන බවය.

හවුල්කාර ඇමති කව්ද ?

 මෙම ගනුදෙනුව මේ අයුරින් ක්‍රියාත්මක කිරීමට මහා බැංකු අධිපතිවරයා මෙහෙයවන්නේ සුදීර් ජයරාම් සමග කුළුපගු ඇසුරක් පවත්වන අගමැතිවරයාට සමීප ඇමතිවරයකු විසින් බව පැවසේ.

ඔහු මින් පෙර අවස්ථා ගණනාවකදී සුදිර් ජයාරාම් සිදු කළ වංචාවන් වලදී ඔහු රැක ගැනීමට ඉදිරිපත් වී ඇති බව ද මේ වන විට විශ්වාස කටයුතු ආරංචිමාර්ග ඔස්සේ හෙළිදරවු වී ඇත.

මෙරට ප්‍රමුඛ පෙළේ මාධ්‍ය ජාලයක් වන ස්වර්ණවාහිනිය මැලේෂියානු ජාතිකයකුට අලෙවි කිරීමට ගෙන ඇති තීරණය ජනතා විමුක්ති පෙරමුනේ නායක පාර්ලිමේන්තු මන්ත්‍රී අනුර කුමාර දිසානායක මහතා ද පසුගියදා පාර්ලිමේන්තුවේදී ප්‍ර‍ශ්න කළේය.

ශ්‍රී ලංකාවේ මාධ්‍ය ආයතනයක් විදේශීය සමාගමකට අළෙවි කළ හැක්කේ කුමන පදනමින්ද යන්න වහාම රටට හෙළිකරණ ලෙස මෙහිදී ඔහු ආණ්ඩුවට අභියෝග කළේය.

මුලාශ පුවත් වාර්තා :

Concerns over credibility of Rs. 9 b Malaysian bid for EAP assets

CB takes over ETI Finance, Swarnamahal Financial

බැඳුම්කර ගනුදෙනුව සම්බන්ධ පර්පචුවල් ට්‍රෙෂරීස් සමාගමේ හිමිකරු වන අර්ජුන් ඇලෝසියස් මහතාව අත්අඩංගුවට ගනු ලැබුවේ ඡන්දය ඉලක්ක කර කලින් එළන ලද තිරපිටපතක් අනුව බවත්, මැතිවරණය සමයේ සිරගෙට දක්කන මෙවැනි ඡන්ද ගුණ්ඩුවලට මෙවර ඉඩ නොදෙන බවත් ජනතා විමුක්ති පෙරමුණේ නායක පාර්ලිමේන්තු මන්ත්‍රි අනුර කුමාර දිසානායක මහතා අවධාරණය කරයි.

අර්ජුන් ඇලෝසියස්, කසුන් පලිසේන, උදයංග වීරතුංග පමණක් නොව ඉදිරි දින දෙක, තුන තුළ තවත් නොහිතන පුද්ගලයන් කිහිප දෙනෙක් සිර භාරයට ගැනීමේ ඡන්ද ගුණ්ඩු ක්‍රියාත්මක වනු ඇතැයි පැවැසූ මන්ත්‍රිවරයා, එවැනි ආන්දෝලන සිදුවීම්වලට හසු නොවී තම ඡන්දය නිවැරැදිව භාවිත කරන ලෙස රටේ සියලුම ඡන්ද දායකයන්ගෙන් ඉල්ලා සිටියේය.

විශේෂයෙන්ම පෙබරවාරි 10ට පෙර හිටපු මුදල් ඇමැති රවි කරුණානායක මහතාව එජාප උප නායකකමින් ඉවත් කිරීමට ගත් තීන්දුවද එවැනි උපක්‍රමයක් බවත් හෙතෙම පැවසිය.

ඩුබායිහිදී අත්අඩංගුවට ගත් රුසියාවේ හිටපු ශ්‍රී ලංකා තානාපති උදයංග වීරතුංග මහතා මෙරටට රැගෙන ඒම ගැටලුකාරී තත්ත්වයකට පත්ව ඇතැයි මූල්‍ය අපරාධ විමර්ශන කොට්ඨාසය සඳහන් කරයි.

පෙරේදා (04දා) දින මොහුව අත්අඩංගුවට ගත් බව සඳහන් වුවත් ඊයේ (05දා) වන විටත් එරට පිහිටි ජාත්‍යන්තර පොලිසියේ ශාඛාවෙන් මෙරටට නිල දැනුම්දීමක් සිදු නොකර ඇතැයිද එම කොට්ඨාශයේ උසස් නිලධාරියකු පැවැසීය.

ජාත්‍යන්තර පොලිසියේ මෙරට කාර්යාලය අපරාධ පරීක්ෂණ දෙපාර්තමේන්තුවේ ස්ථාපිත බවත් ඉන් අබුඩාබිහි පිහිටි එරට කාර්යාලයට මෙම අත්අඩංගුවට ගැනීමේ සිද්ධිය නිල වශයෙන් දන්වන ලෙසට ලිඛිතව දැන්වුවත් ඊට මෙතෙක් ප්‍රතිචාර නොලැබී ඇතැයිද එම උසස් නිලධරයා සඳහන් කළේය.

මිග් යානා ගනුදෙනුවක් සම්බන්ධයෙන් මූල්‍ය අපරාධ විමර්ශන කොට්ඨාශය සිදු කරන විමර්ශනයකට අදාළව අධිකරණය මඟහැර සිටින උදයංග වීරතුංග මහතාට කොටුව මහෙස්ත්‍රාත් අධිකරණය විවෘත වරෙන්තුවක් නිකුත් කර තිබේ.

මහින්ද එරට බලධාරීන්ට කතා කරයි :

නීතිය හා සාමය සහ දක්ෂිණ සංවර්ධන අමාත්‍ය සාගල රත්නායක මහතා මේ සම්බන්ධයෙන් සඳහන් කරන්නේ උදයංග වීරතුංග මහතා මෙරටට ගෙන ඒමට අවශ්‍ය කටයුතු විදේශ කටයුතු අමාත්‍යාංශය හරහා මේ වන විටත් ගනිමින් සිටින බවය.

එසේම ඔහුව රැගෙන ඒමට පොලිස් නිලධාරීන් සූදානමින් සිටින බවද අමාත්‍යවරයා කියා සිටී.

උදයංග වීරතුංග මහතා මෙරටට ගෙන ඒම සම්බන්ධව අපරාධ පරීක්ෂණ දෙපාර්තමේන්තුව, මූල්‍ය අපරාධ කොට්ඨාසය, ආගමන විගමන දෙපාර්තමේන්තුව, තානාපති කාර්යාලය සහ විදේශ කටයුතු අමාත්‍යාංශය යන රාජ්‍ය අංශ එක්ව සාකච්ඡා පවත්වයි.

මේ අතර හිටපු ජනාධිපති මහින්ද රාජපක්ෂ මහතා ඩුබායිහි බලධාරීන්ට කතා කරමින් උදයංග වීරතුංග මහතා සම්බන්ධයෙන් කරුණු දක්වා ඇත. එම සාකච්ඡා තුලින් සාර්ථක ප්‍රතිපල ලැබී ඇතැයි හිටපු ජනාධිපතිවරයාගේ සම්බන්ධිකරණ ලේකම්වරයකු පැවසිය.

''ශ්‍රී ලංකාවට භාර නොදී තවදුරටත් පරීක්ෂණ පැවැත්වීමට එම බලධාරීන්ගේ අවධානය යොමු වී තිබෙනවා'' - ආචාර්ය නීතිඥ ප්‍රතිභා මහානාම හේවා

මේ සම්බන්ධයෙන් අදහස් දැක්වූ කොළඹ විශ්වවිද්‍යාලයේ ජේ‍යෂ්ඨ කථිකාචාර්ය ආචාර්ය නීතිඥ ප්‍රතිභා මහානාම හේවා මහතා අප කළ විමසීමකදී පැවැසුවේ යම් රටක පුරවැසියකු වෙනත් රටකට ගොස් වරදක් සිදු කර ඇති බවට චෝදනා එල්ල වුවහොත් එම පුද්ගලයා මෙරටට ගෙන්වා ගත යුත්තේ උදර්පණ නීතිය අනුව බවත් ශ්‍රී ලංකාව හා එක්සත් අරාබි එමීර් රාජ්‍ය අතර උදර්පණ ගිවිසුමක් අස්සන් කර නොමැති නිසා මෙම ගැටලුව මතු වී ඇති බවත්ය.

එම නිසා මෙවැනි අවස්ථාවකදී ඉදිරි ක්‍රියාමාර්ග ගැනීමට නම් දෙරටේ තානාපතිවරුන් හරහා සාකච්ඡා කළ යුතු බවත් ඒ හැරෙන්නට වෙනත් විසඳුමක් නොමැති බවත් මහානාම හේවා මහතා ප්‍රකාශ කරයි.

යම් ආකාරයකින් උදයංග වීරතුංග මහතා තමාට එල්ල කර තිබෙන චෝදනාවලින් නිදහස් වුවහොත් යන කාරණයද ඩුබායි බලධාරීන්ගේ සැලකිල්ලට ලක් වන නිසා උදයංග වීරතුංග මහතා ක්ෂණිකව ශ්‍රී ලංකාවට භාර නොදී තවදුරටත් පරීක්ෂණ පැවැත්වීමට එම බලධාරීන්ගේ අවධානය යොමු වී තිබෙන බව ප්‍රතිභා මහානාම හේවා මහතා සඳහන් කරයි.

 හිටපු මහ බැංකු අධිපති අර්ජුන් මහේන්ද්‍රන් මහතා ලබන 15 වනදාට පෙර අපරාධ පරීක්ෂණ දෙපාර්තමේන්තුව හමුවේ, ප්‍රකාශයක් ලබා දීම සඳහා මෙරටට නොපැමිණියහොත්, අධිකරණය මගින් ඔහුට එරෙහිව නිතීමය ක්‍රියාමාර්ග ගන්නා බව නීතිපති ජයන්ත ජයසූරිය මහතා අවධාරණය කර සිටියි.

ඔහු එබව සඳහන් කලේ 'නිව්ස්ෆස්ට්' රුපවාහිනී නාලිකාව කළ විමසීමකදීය.

මතභේදයට තුඩු දී ඇති මහබැංකු බැඳුම්කර ගනුදෙනුවේ සැකකරුවකු ලෙස අර්ජුන් මහේන්ද්‍රන් මහතා මේවනවිට නම් කර ඇත.

බැඳුම්කර ගනුදෙනුව සම්බන්ධයෙන් ප්‍රකාශයක් ලබා ගැනීම සඳහා ලබන 15 වැනිදාට පෙර අපරාධ පරීක්ෂණ දෙපාර්තමේන්තුවේ පෙනී සිටින ලෙස මහ බැංකුවේ හිටපු අධිපති අර්ජුන් මහේන්ද්‍රාන් මහතාට කොටුව මහේස්ත්‍රාත් අධිකරණය විශේෂ නියෝගයක් නිකුත් කලේ පසුගිය 02දාය.

දැනට සිංගප්පූරුවේ වාසය කරන්නේ යයි සැලකෙන මහබැංකු හිටපු අධිපති අර්ජුන් මහේන්ද්‍රන් මහතා පෙබරවාරි පහළොස් වනදාට ප්‍රථම ශ්‍රී ලංකාවට පැමිණ රහස් පොලිසිය වෙත කට උත්තරයක් ලබාදෙන නියෝගයක් නිකුත් කරන ලෙස නීතිපති දෙපාර්තමේන්තුවේ ජ්‍යෙෂ්ඨ නියෝජ්‍ය සොලිසිටර් වසන්ත කෝදාගොඩ මහතා කළ ඉල්ලීමක් සැලකිල්ලට ගනිමින් විමර්ශනයට සහාය දැක්වීමක් ලෙස කොටුව මහේස්ත්‍රාත් ලංකා ජයරත්න මහත්මිය මෙම නියෝගය නිකුත් කළාය.

එම නියෝගයේ ඉංග්‍රීසි පිටපතක් සිංගප්පුරුවේ අන්තර්ජාතික පොලිසිය මගින් මහේන්ද්‍රන් මහතාට ලැබීමට සලස්වන ලෙස ද මහේස්ත්‍රාත්වරිය දැනුම් දී සිටියාය.

අගමැති වගකිව යුතුයි :

මේ අතර ශ්‍රීලනිප මූලස්ථානයේ පෙරේදා (03) පැවති මාධ්‍ය හමුවකට එක්වෙමින් අමාත්‍ය සුසිල් ප්‍රේමජයන්ත මහතා පැවසුයේ, අර්ජුන් මහේන්ද්‍රන් මහතා ශ්‍රී ලංකාවට ගෙන්වා ගැනීමේ ප්‍රධාන වගකීම අගමැතිවරයා සතු වන බවයි.

2015 වර්ෂයේදී මහබැංකු අධිපති ලෙස අර්ජුන් මහේන්ද්‍රන් මහතා පත් කරන විට ඔහු පිළිබඳව සම්පූර්ණ වගකීම තමා ගන්නා බව අග්‍රාමාත්‍යවරයා පාර්ලිමේන්තුවේදී ප්‍රකාශ කළ බව ද ඇමතිවරයා එහිදී සිහිපත් කළේය.

සබැඳි පුවත් :

ඡන්දයට පෙර අර්ජුන් නොඑන හැඩයි !

පෙබරවාරි 10 වෙනිදාට යෙදී තිබෙන පළාත් පාලන මැතිවරණය පිළිබඳව බීබීසී සිංහල සේවය වෙනුවෙන් මේ ලිපිය සම්පාදනය කළේ එඩින්බරා විශ්වවිද්‍යාලයේ ආචාර්ය උපාධි අපේක්ෂිකාවක වන චූලනී කොඩිකාර සහ කාන්තා හිමිකම් ක්‍රියාකාරිනී කුමුදිනි සැමුවෙල් විසිනි.

********

මෙවර පළාත් පාලන මැතිවරණය හේතු ගණනාවක් නිසා වැදගත් වන්නකි:

• පළාත් පාලන මැතිවරණය පවත්වනු ලබන්නේ කල් දැමීම් කිහිපයකින් අනතුරුවය
• 2015 අගෝස්තු මස බලයට පත් වූ ජාතික හවුල් ආණ්ඩුව විසින් පවත්වනු ලබන පළමු මැතිවරණය මෙයය
• පළාත් පාලන ක‍්‍රමය සඳහා 2012 දී හඳුන්වා දී, 2017 සංශෝධනය කරනු ලැබූ නව මිශ‍්‍ර මැතිවරණ ක‍්‍රමය යටතේ පවත්වන පළමු මැතිවරණයත් මෙයය
• පළාත් පාලන ආයතන තුළ කාන්තාවන්ගේ නියෝජනය 25% ක් අනිවාර්ය කිරීම ක්‍රියාවට නංවන පළමු මැතිවරණය ද මෙයය
• ශ‍්‍රී ලංකාවේ පළාත් පාලන මට්ටමේ මැතිවරණ ප‍්‍රතිසංස්කරණවල ඉතිහාසය සහ දේශපාලනය පිළිබඳව මෙන්ම එළඹෙන මැතිවරණය පිළිබඳව ද බොහෝ දෑ ලිවීමට සහ කීමට ඇති නමුත්, අප මෙහිදී කාන්තාවන් වෙනුවෙන් වෙන් කරන ලද පංගුව පිළිබඳව පමණක් සාකච්ඡා කරන්නෙමු.

කෙටි ඉතිහාසයක්

ශ‍්‍රී ලංකාවේ පළාත් පාලන ආයතනවල ඉතිහාසය වසර 1946 දක්වා දිව යන්නකි.

1977 වසරේදී ප‍්‍රාදේශීය සභා, නගර සභා සහ මහනගර සභා යන ස්ථර තුනකින් යුත් ක‍්‍රමය හඳුන්වා හඳුන්වා දීමෙන් පසු පළාත් පාලන ආයතන නව පණක් ලැබීය. එම ආයතන සඳහා වන මැතිවරණ ක‍්‍රමය ද 1977 වසරේදී කොට්ඨාස පදනම් කරගත් සරල බහුතර ක්‍රමයක සිට, සමානුපාතික නියෝජනය සහ ලැයිස්තු ක‍්‍රමය පදනම් කරගත් මැතිවරණ ක්‍රමයක් දක්වා මාරු විය. (මුලින්ම මෙය ක්‍රියාත්මක කරන ලද්දේ 1989 වසරේදීය*)

සමානුපාතික නියෝජනයේ අක‍්‍රමිකතා දුරලීම සහ 1989 දී අත්හැර දමන ලද කොට්ඨාස ක‍්‍රමයේ ධනාත්මක ලක්ෂණ යළි හඳුන්වා දීම සඳහා කේවල කොට්ඨාස* ක‍්‍රමය සහ සමානුපාතික නියෝජනය සංයුක්ත කරන ලද මිශ‍්‍ර මැතිවරණ ක‍්‍රමයක් 2012 වසරේදී හඳුන්වා දෙන ලදී.

2017 වසරේදී පළාත් පාලන මැතිවරණ පනතට ගෙන ආ වැඩි දුර සංශෝධනය (2017 අංක 16 දරණ පළාත් පාලන ආයතන ඡන්ද විමසීම් (සංශෝධන*) පනත) මගින් දැන් පළාත් පාලන නියෝජිතයන් සමානුපාතික නියෝජන ක‍්‍රමය යටතේ ද පත් වන අතර, ඉන් 60% ක් පමණ තනි නියෝජිත හෝ බහු නියෝජිත කොට්ඨාස නියෝජනය කරමින් ද, 40% ක් පමණ කොට්ඨාස ක‍්‍රමයට ඡන්ද පදනමක් නොමැති "අතිරේක තැනැත්තන්" ලැයිස්තුවකින් ද පත් වන බවට සහතික කරනු ලැබේ.

පළාත් පාලන ආයතන සඳහා වන නියෝජිතයින් සංඛ්‍යාව 4486 සිට 8356ක් දක්වා ඉහළ නංවා තිබේ. සංශෝධනයේ 27(ඊ) අනුව, සෑම පළාත් පාලන ආයතනයකම මුළු නියෝජිතයින් සංඛ්‍යාවෙන් 25% ක් කාන්තාවන්ගෙන් සමන්විත විය යුතුය.

මිශ‍්‍ර නියෝජිත සමානුපාතික මැතිවරණ ක‍්‍රමය සහ කාන්තාවෝ
මෙම නව ක‍්‍රමය යටතේ, සෑම දේශපාලන පක්ෂයක්ම නාමයෝජනා පත‍්‍ර දෙකක් භාර දිය යුතුය - පළමු නාමයෝජනා පත‍්‍රය තුළ අඩංගු වන්නේ එක් එක් පළාත් පාලන බල ප‍්‍රදේශය තුළ කොට්ඨාස සඳහා වෙන් කරන ලද නියෝජිතයන්ගේ නම් ලැයිස්තුවකි. කොට්ඨාස සඳහා නම් කරනු ලබන නියෝජිතයන්ගෙන් අවම වශයෙන් 10%ක් වත් කාන්තාවන් විය යුතුය.

දෙවන ලේඛනය අමතර තැනැත්තන්ගේ නාම ලේඛනය වන අතර, ඉන් 50% ක් කාන්තාවන් විය යුතුය.

කෙසේවුවත්, කොට්ඨාස මට්ටමින් එක් ඡන්දදායකයකු හට සලකුණු කළ හැක්කේ තම කැමැත්ත අනුව එක් දේශපාලන පක්ෂයකට හෝ ස්වාධීන අපේක්ෂක කණ්ඩායමකට පමණි.

මැතිවරණය අවසානයේ, කොට්ඨාස ගණනාවකින් සමන්විත වන පළාත් පාලන ප‍්‍රදේශය තුළ දේශපාලන පක්ෂයක් හෝ ස්වාධීන කණ්ඩායමක් ලබා ගත් මුළු ඡන්ද සංඛ්‍යාව ගණන් බැලීමෙන් අනතුරුව, කොට්ඨාස තුළින් සහ අමතර තැනැත්තන්ගේ නාමලේඛන තුළින් එක් එක් පක්ෂවලට හිමි වන නියෝජිතයින් සංඛ්‍යාව ගණනය කිරීම සඳහා එය යොදා ගනු ලැබේ. මැතිවරණ ප‍්‍රතිඵල තහවුරු කිරීමෙන් අනතුරුව මැතිවරණ කොමසාරිස්වරයා විසින් එය සිදු කරනු ලැබේ.

මෙය සිදු කිරීම සඳහා නියෝජිතයකු වීමට කොපමණ ඡන්ද ප‍්‍රමාණයක් අවශ්‍ය වන්නේද යන්න කොමසාරිස්වරයා විසින් පළමුව තීරණය කළ යුතුය.

මෙය ගණනය කරනු ලබන්නේ, සියලු පක්ෂ සහ ස්වාධීන කණ්ඩායම් විසින් ලබා ගත් මුළු සංඛ්‍යාව, එක් එක් පළාත් පාලන අධිකාරිය සඳහා නියමිත නියෝජිතයින් සංඛ්‍යාවෙන් බෙදීම මගිනි. (මෙම සංඛ්‍යාව ගැසට් කරනු ලැබේ*). ඉන් අනතුරුව, එක් එක් දේශපාලන පක්ෂය සහ ස්වාධීන කණ්ඩායම ලබා ගත් මුළු ඡුන්ද සංඛ්‍යාව නියෝජිතයකු වීම සඳහා අවශ්‍ය ඡන්ද සංඛ්‍යාවෙන් බෙදනු ලබන අතර, එමඟින් එක් එක් පක්ෂය මඟින් පත් කෙරෙන නියෝජිතයින් සංඛ්‍යාව නිශ්චය කරනු ලැබේ.

මීට සමානවම, යම් දේශපාලන පක්ෂයක් හෝ ස්වාධීන කණ්ඩායමක් පළාත් පාලන අධිකාරියේ ප‍්‍රදේශය තුළ 20% කට අඩු ඡන්ද ප‍්‍රමාණයක් ලබා ගෙන තිබේ නම් සහ නියෝජිතයන් තුනකට අඩු සංඛ්‍යාවක් සඳහා හිමිකම් කියයි නම්, අමතර තැනැත්තන්ගේ ලේඛනය තුළින් කාන්තාවන් පත් කිරීමට ඔවුන්ට ද හැකියාවක් නොමැත.

මෙහි ප‍්‍රතිඵලයක් ලෙස, නව අනිවාර්ය වෙන් කිරීමේ ක‍්‍රමය අනුව, පළාත් පාලන අධිකාරීන්හි කාන්තා නියෝජනය සම්පූර්ණ කිරීමේ වගකීම, බහුතර ඡන්ද සංඛ්‍යාවක් ලබා ගන්නා පක්ෂය වෙත නොව, දෙවනුව ඉහළ ඡන්ද සංඛ්‍යාවක් ලබා ගන්නා පක්ෂ මත පැටවීමට ඉඩ තිබේ.

අනිවාර්ය වෙන් කිරීමේ වැදගත්කම

මෙම වෙන් කිරීම වූ කලී, ක‍්‍රියාකාරිනියන්, සංවිධාන සහ ජාතික කාන්තා කමිටුව විසින් 20 වසරක් පුරා, පොදුවේ දේශපාලනය තුළ සහ විශේෂයෙන් පළාත් පාලන ආයතන තුළ අවම කාන්තා නියෝජනය පිළිබඳ ගැටලුව ආමන්ත‍්‍රණය කිරීම සඳහා දියත් කළ දිගු කාලීන අරගලයක ප‍්‍රතිඵලයකි.

දේශපාලන පක්ෂ තුළ පුරුෂ මූලික සංස්කෘතියෙහි බලපැවැත්ම සහ මැතිවරණවලදී කාන්තාවන්ට නාමයෝජනා ලබා දීම අතිශයින් අඩු වීම හේතුවෙන් ශ‍්‍රී ලංකාවේ පළාත් පාලනය තුළ කාන්තා නියෝජනය ඓතිහාසිකව ගත් කළ ඉතා පහළ මට්ටමක පැවති අතර කිසි විටෙකත් 2% ඉක්මවා නොගියේය. නිදසුනක් ලෙස, ඉතිහාසය පුරා ප‍්‍රධාන සාමූහිකත්වයන්/පක්ෂ තුළ කාන්තාවන් සඳහා ලබා දුන් නාමයෝජනා ප‍්‍රතිශතය සාමාන්‍යයෙන් 4% සිට 10% අතර ප‍්‍රමාණයක් විය.

සමානුපාතික නියෝජනයේ සිට මිශ‍්‍ර ක්‍රමය දක්වා මාරු වීම පිළිබඳ විධිමත් හෝ නිල සාකච්ඡා 2000 වර්ෂයේ මුල් කාලයේ ආරම්භ වූ අතර, එය දශකයකට වැඩි කාලයක් ඇදී ගියේය.

එම සාකච්ඡා ප‍්‍රධාන වශයෙන් කේන්ද්‍ර වූයේ විශාල, ස්ථාවර දේශපාලන පක්ෂවල අවශ්‍යතා සහ වුවමනාවන් සපුරාලීම හා පවත්නා තත්ත්වය, විශේෂයෙන්ම ඓතිහාසික නියෝජන ස්වරූපයන් තවදුරටත් පවත්වාගෙන යන්නේ කෙසේද සහ ඡන්ද පදනම් හා ඡන්දය ප‍්‍රකාශ කිරීමේ රටාවන් ආරක්ෂා කිරීම හා සුළුතර පක්ෂ සඳහා වඩාත් සාධාරණ නියෝජනයක් සුරක්ෂිත කිරීම යන මාතෘකා වටාය.

විස්මයජනක ලෙස, අනෙකුත් ඓතිහාසිකව කොන් කරනු ලැබූ කණ්ඩායම් සහ ඡන්දදායකයින්, විශේෂයෙන්ම නියෝජිත දේශපාලනය තුළ තරුණයන් සහ කාන්තාවන් මෙන්ම, විවිධ මැතිවරණ ප‍්‍රතිසංස්කරණ හරහා කාන්තාවන් අත් විඳි කොන් කිරීම් සහ වෙනස්කොට සැලකීම් සඳහා පිළියම් යොදන ලෙස කරනු ලැබූ අඛණ්ඩ ඉල්ලීම් ද මෙම ක‍්‍රියාවලිය තුළ මුළුමනින්ම අමතක කරන ලදි.

ඇත්තෙන්ම, මිශ‍්‍ර ක‍්‍රමය හඳුන්වා දෙනු ලැබූ 2012 වසරේ නීතිය මඟින් වයස අවුරුදු 18 ත් 35 ත් අතර තරුණයන් සහ කාන්තාවන් සඳහා වන අනිවාර්ය වෙන් කිරීම මුළුමනින්ම ඉවත් කොට, ඒ වෙනුවට දේශපාලන පක්ෂවලට කිසිදු ප‍්‍රතිවිපාකයක් රහිතව අමතක කොට දැමිය හැකි කාන්තාවන් සහ තරුණයින් සඳහා වන 25% ක අභිමතානුසාරී වෙන් කිරීමක් හඳුන්වා දෙන ලදි.

එවැනි පසුබිමක් තුළ ප‍්‍රාදේශීය මට්ටමින් ආරම්භ කර, කොට්ඨාස තුළ ජනතාව සහ ඔවුන්ගේ නියෝජිතයින් අතර සමීප සම්බන්ධයක් කෙරෙහි මඟ පෙන්වමින්, දේශපාලනය ප‍්‍රජාතන්ත‍්‍රීයකරණය කිරීමට නව මැතිවරණ ක‍්‍රමවේදය අපට අවස්ථාව සලසා දී තිබේ.

තවදුරටත්, කාන්තාවන් සඳහා අනිවාර්ය ආසන සංඛ්‍යාවක් වෙන් කිරීම මගින්, කාන්තාවන් නියෝජිත දේශපාලනයේ පොදු අවකාශය තුළට ගෙන ඒම, කාන්තාවන් දේශපාලනයෙහි නිරත වීම ඉහළ නැංවීම, කාන්තාවන්ට දේශපාලනය කිරීමට ඇති හැකියාව පිළිබඳ මහජන ආකල්පය වෙනස් කිරීම සහ දේශපාලනය සඳහා විශාල ලෙස වියදම් කිරීමේ මුල් බැසගත් දේශපාලන සංස්කෘතිය, අනුග‍්‍රාහකත්වය, දූෂණය සහ ප‍්‍රචණ්ඩත්වය නතර කිරීම සඳහා ඓතිහාසික අවස්ථාවක් සලසා දී තිබේ.

එහෙත් මෙම අනිවාර්ය වෙන් කිරීම සහ එමගින් කාන්තාවන් සඳහා 25% ක නියෝජනයක් තහවුරු කරනු ලැබීම අධිතක්සේරු කළ නොහැකිය.

එහි සැකැස්ම සහ ක‍්‍රියාත්මක වීම තුළ ගැටලුකාරී තත්ත්වයන් තවමත් දැකිය හැක.

මෙම වෙන් කිරීම මඟින් පළාත් පාලන අධිකාරීන් තුළ කාන්තා නියෝජනය සැලකිය යුතු ලෙස ඉහළ නංවන නමුත්, එය භෞතිකව පවත්නා පිරිමි අධිකාරීත්වයට අභියෝග නොකරයි. ආසන ගණනාවක් (60%*ක්) සඳහා කොට්ඨාස මට්ටමින් තරග වදින නමුත්, එම ආසන හෝ කොට්ඨාසවලින් කාන්තාවන් සඳහා වෙන් වන්නේ 10% ක් පමණි.

කොට්ඨාසයක් ජයග‍්‍රහණය කිරීම වූ කලී ආසනයක් හිමි වන බවට තහවුරු කිරීමක් වන අතර, කොට්ඨාසය අයත් වන කුඩා ඡන්ද බල ප‍්‍රදේශය නිසා පහසුවෙන් හා අඩු වියදමකින් ඡන්ද ව්‍යාපාරය පවත්වාගෙන යාමට ද, ඡන්ද දායකයින් හඳුනා ගැනීමට ද පහසුව සලසයි.

කාන්තාවන්ගෙන් බහුතරය නාමයෝජනා පත‍්‍රය තුළින් තේරී පත් වන අතර, එහෙයින් තමාගේම ඡන්ද කොට්ඨාසයක් නොමැති වන අතර, එසේ ගොඩ නඟා ගැනීමට සහ ඡන්දදායකයින් සමඟ සබඳතා තර කර ගැනීමට ඇති අවස්ථාව ද අහිමි වී යයි.

ඔවුන් කිසිවකුට වග නොකියන කණ්ඩායමක් ලෙස පෙනී යනු ඇති අතර, එහෙයින් බරපතල ලෙස ගණන් නොගැනීම නිසා පළාත් පාලන ආයතන තුළ ඔවුන්ගේ කාර්යක්ෂමතාවට සහ සමාන සහභාගිත්වයට බාධා පැමිණෙනු ඇත.

කොට්ඨාස සඳහා තරඟ වැදීමට කාන්තාවන් නම් කිරීම, කාන්තාවන්ට නාමයෝජනා ලබා දෙන කොට්ඨාස කවරේදැයි තීරණය කිරීම සහ සමානුපාතික නියෝජන ලැයිස්තුවට කාන්තාවන්ගේ නම් ඇතුළත් කිරීම යනාදියෙහි වගකීම පක්ෂය සතු වෙයි.

ඇත්තෙන්ම, එය බහුතරය පිරිමින් වන පළාත් පාලන සහ දිස්ත‍්‍රික්ක මට්ටමේ පක්ෂ සංවිධායකයින් සතු වන්නකි.

මෙම ක‍්‍රමය අභියෝගයට ලක් නොවී පවතින අතර, නාමයෝජනා ලබා ගැනීමට සහ ඡන්ද විමසීමෙන් අනතුරුව සමානුපාතික නියෝජන ලැයිස්තුව තුළින් පත්වීම් ලබා ගැනීමට තම පක්ෂවල දේශපාලන බලය දරණ තැනැත්තන් මත යැපීමට කාන්තාවන්ට සිදු වේ.

කිසියම් පක්ෂයක් ඡන්ද බහුතරයක් ලබා ගැනීමට සමත් වේ නම්, තරග වදින සියලූ කොට්ඨාසවල ආසන දිනා ගැනීමට හැකි වන අතර, අතිරේක ලැයිස්තුවෙන් පත් වන නියෝජිතයින් සඳහා ආසනයක් ලබා ගැනීමට ඇති පදනම කවරේ ද යන්න අවිනිශ්චිත ය.

ඔවුන්ට ද කොට්ඨාසයෙන් පිටත සම්පූර්ණ පළාත් පාලන අධිකාරී බල ප‍්‍රදේශය තුළ ඡන්ද ව්‍යාපාරය පවත්වා පක්ෂ වෙනුවෙන් ඡන්දය රැස් කිරීමට සිදු වේ.

එහෙයින්, කාන්තාවන්ට වැඩිපුර මැතිවරණ ව්‍යාපාරයේ යෙදීමට සිදු වන නමුත්, ආසනයක් හිමි වේ දැයි සහතිකයක් නොලැබේ.

දේශපාලන පක්ෂ තුළ පවත්නා ස්ත‍්‍රී විරෝධය හේතුවෙන්, කාන්තාවන් යනු අතරමැදියන් කොට්ඨාසයක් ලෙස ද, 25% ක ප‍්‍රතිශතය යනු අනවශ්‍ය වරප‍්‍රසාදයක් ලෙස ද දකිනු ලබන අතර, ඒ හේතුවෙන් කාන්තාවන්ට නොයෙකුත් බිය ගැන්වීම් සහ සමානුපාතික නියෝජන ලැයිස්තුව යටතේ තරඟ වදින අනෙකුත් පිරිමි නියෝජිතයින් වෙතින් තර්ජන ඇති වී තිබේ.

එමෙන්ම, ඉහතින් විස්තර කළ අන්දමට, කාන්තාවන් සඳහා 25% ක ප‍්‍රතිශතයක් වෙන් කිරිමේ අවසාන වගකීම සියලු පක්ෂ කෙරෙහි සමානව බෙදී නොයයි.

එහෙයින්, ප‍්‍රාදේශීය දේශපාලනය තුළ ස්ත‍්‍රී පුරුෂ සමාජභාවී සබඳතා වෙනස් කිරීමට මෙම අනිවාර්ය වෙන් කිරීම සතු වන හැකියාව කෙරෙහි, මෙකී විවිධ දිශානතීන්හි ප‍්‍රතිඵල විසින් ඇති කරනු ලබන බලපෑම තවමත් පෙනෙන්නේ නැත.

(මෙහි දැක්වෙන්නේ චූලනී කොඩිකාර සහ කුමුදිනි සැමුවෙල්ගේ පුද්ගලික අදහසය. ඔවුන් ඉංග්‍රීසි භාෂාවෙන් සකස් කළ ලිපිය කෞශල්‍යා ආරියරත්න විසින් සිංහලට පරිවර්තනය කරන ලදි)

බැඳුම්කර ගනුදෙනුවට සම්බන්ධ සැකකරුවෙකු බවට පත්ව සිටින හිටපු මහබැංකු අධිපති අර්ජුන් මහේන්ද්‍රන් මහතා පළාත් පාලන මැතිවරණයට පෙර ශ්‍රී ලංකාවට නොඑන බව මේවනවිට තහවුරු කර ඇතැයි ඔහුගේ නීතිඥයින් පවසති.

ඔහු විසින් එවැනි තීරණයක් ගෙන ඇත්තේ බැඳුම්කර සිද්ධිය සම්බන්ධයෙන් සැකකරුවන් ලෙස නම් කරන ලද පර්පෙචුවල් ට්‍රෙෂරිස් සමාගමේ හිමිකරු අර්ජුන් ඇලෝසියස් මහතා හා එහි ප්‍රධාන විධායක නිලධාරී කසුන් පළිසේන මහතා රහස් පොලිසිය විසින් අත්අඩංගුවට ගෙන මාධ්‍ය සංදර්ශනයක් පවත්වා රිමාන්ඩ් භාරයට පත්කිරීම නිසාය.

බැඳුම්කර ගනුදෙනුව සම්බන්ධයෙන් ප්‍රකාශයක් ලබා ගැනීම සඳහා ලබන 15 වැනිදාට පෙර අපරාධ පරීක්ෂණ දෙපාර්තමේන්තුවේ පෙනී සිටින ලෙස මහ බැංකුවේ හිටපු අධිපති අර්ජුන් මහේන්ද්‍රාන් මහතාට කොටුව මහේස්ත්‍රාත් අධිකරණය විශේෂ නියෝගයක් නිකුත් කර තිබේ.

එහෙත් මැතිවරණයට පෙර ලංකාවට පැමිණියහොත් ඔහුව ද අත්අඩංගුවට ගෙන ආණ්ඩුවේ ඇතැමුන් දේශපාලන වාසි ලබාගැනීමට ඉඩ ඇති බව ඔහුගේ නීතිඥයින් වැඩිදුරටත් පවසති.

ඇප අයැදුම්පත් සලකා බැලීම 07 දා :

මතභේදාත්මක බැඳුම්කර සිදුවීම සම්බන්ධයෙන් අත්අඩංගුවට ගෙන අධිකරණයට ඉදිරිපත් කළ සැකකරුවන් නැවතත් එළැඹෙන 16 දා තෙක් රක්ෂිත බන්ධනාගාර ගත කිරීමට කොළඹ කොටුව මහේස්ත්‍රාත් ලංකා ජයරත්න මෙනවියගේ නියෝගය කළාය.

කෙසේවුවද, ඔවුන්ගේ ඇප අයැදුම්පත් සලකා බැලීම ලබන 07 වැනිදා සිදු කිරීමට ද මෙහිදී නියෝග කෙරුණි.

අපරාධ පරීක්ෂණ දෙපාර්තමේන්තුවේ නිලධාරීන් ඊයේ (04) පෙරවරුවේ 'සිරස' නාලිකාවේ මාධ්‍යවේදීන් පෙරටුකොට ගෙන පැමිණ ඔවුන් දෙදෙනා අත්අඩංගුවට ගනු ලැබිය.

 සබැඳි පුවත් :

ඡන්දයට පෙර අර්ජුන් නොඑන හැඩයි !

සේයා - රොෂාන් චතුරංග

අගමැතිවරයා 2016දී නීතිපතිවරයාට වාර්තාව ඉදිරිපත් කරපු අවස්ථාවේ දී ක්‍රියාත්මක වුවා නම් බැදුම්කරය සම්බන්ධයෙන් නඩු හබ අවසන් වී මේ වන විට වරදකරුවන් හිර බත් කන තත්ත්වයකට පැමිණීමට ඉඩ තිබූ බව රාජ්‍ය ඇමැති ආචාර්ය හර්ෂද සිල්වා මහතා ප්‍රකාශ කරයි.

නියෝජ්‍ය ඇමැතිවරයා එසේ ප්‍රකාශ කළේ පර්පචුවෙල් ට්‍රෙසරීස් සමාගමේ හිමිකරු සහ එහි ප්‍රධාන විධායක නිලධාරියාව රහස් පොලිසිය විසින් ඊයේ (4) සැකපිට අත්අඩංගුවට ගැනීම සම්බන්ධයෙන් අදහස් දක්වමිණි.

වැඩිදුරටත් අදහස් දැක්වූ රාජ්‍ය ඇමැති ආචාර්ය හර්ෂ ද සිල්වා මහතා,

''රජය ලෙස අප අතිෂයින් සන්තෝෂ වෙනවා මේ කටයුත්ත පරක්කු වී හෝ සිදුවීම සම්බන්ධයෙන්. මොවුන් අධිකරණය ඉදිරියේ වරදකරුවන් වීමෙන් පසු උපරිම දඬුවම් ලබා දිය යුතුයි කියා අප විශ්වාස කරනවා.

මේ වංචාවට සම්බන්ධ අනෙකුත් පුද්ගලයන්ටත් මේ ආකාරයෙන් නීතිය ක්‍රියාත්මක වෙයි කියා බලාපොරොත්තු වෙනවා.

අගමැතිතුමා 2016 දී නීතිපතිවරයාට වාර්තාව ඉදිරිපත් කරපු අවස්ථාවේ දී ක්‍රියාත්මක වුනා නම් මෙළහකට මේ නඩු හබ ඉවර වෙලා ඔවුන්ට අවශ්‍ය හිර බත් කන තත්ත්වයකට පැමිණෙන්න තිබුණ කියල මම විශ්වාස කරනවා.''

'අගමැති පර්පෙචුවල් ගිණුම් අත්හිටුවූයේ වසරකටත් කලින්' -අකිල

 මේ අතර එක්සත් ජාතික පක්ෂයේ නියෝජ්‍ය මහා ලේකම් අධ්‍යාපන අමාත්‍ය අකිල විරාජ් කාරියවසම් මහතා පවසන්නේ, ශ්‍රී ලංකා මහා බැංකු බැඳුම්කර නිකුත් කිරීමේ සිද්ධියට අදාළව පර්පෙචුවල් ට්‍රෙෂරීස් සමාගමේ ගිණුම්, අග්‍රාමාත්‍ය රනිල් වික්‍රමසිංහ මහතාගේ නියෝග මත අත්හිටුවා වසරකට අධික කාලයක් ගත වුවද සමාගමේ අධ්‍යක්ෂ අර්ජුන් ඇලෝසියස් අත්අඩංගුවට ගැනීම සඳහා වසරකට අධික කාලයක් තිස්සේ අදාළ බලධාරීන් කිසිදු පියවරක් නොගත් බවයි.

පර්පෙචුවල් ට්‍රෙෂරීස් සමාගමේ අධ්‍යක්‍ෂ අර්ජුන් ඇලෝසියස් අත්අඩංගුවට ගැනීමට හැකි පසුබිම සකස් කර තිබුණද වසරකට වැඩි කාලයක් ඔහු අත්අඩංගුවට නොගෙන සිට මේ අවස්ථාවේදී ඒ පියවර ගත්තේ පළාත් පාලන මැතිවරණය අරමුණු කරගෙන දැයි අමාත්‍යවරයා ප්‍රශ්න කරයි.

බැඳුම්කර සිද්ධිය සම්බන්ධයෙන් එලවන දේශපාලන බලපෑම් සම්බන්ධයෙන් රහස් පොලිසියේ නිලධාරීන් බලවත්සේ කනස්සල්ලට පත්ව සිටින බව පොලිස් මුලස්ථාන ආරංචිමාර්ග පවසයි.

පර්පෙචුවල් ට්‍රෙෂරීස් හිමිකරු අර්ජුන් ඇලෝසියස් සහ එම සමාගමේ ප්‍රධාන විධායක නිළධාරී කසුන් පලිසේන අත්අඩංගුවට ගත් ආකාරය හා අත්අඩංගුවට ගැනීමට අදාළ තොරතුරු මාධ්‍ය ආයතනවලට ලබාදීම සම්බන්ධයෙන් මේ වනවිට රහස් පොලිසියට බරපතල චෝදනාවක් එල්ලවී ඇත.

සැකකරුවන් දෙදෙනා අත්අඩංගුවට ගත් ආකාරය සිරස මාධ්‍ය ජාලය විසින් සජීවී ව විකාශය කෙරුණේ රහස් පොලිසියට අනුයුක්තකර සිටින දේශපාලන සම්බන්ධතා ඇති පරිගණක විශේෂඥයකු විසින් ලබාදී ඇති තොරතුරු මතබව මේවනවිට අනාවරණයවී තිබේ. එය රහස් පොලිසියේ කීර්ති නාමයටවිශාල හානියක් කර තිබේ.

 පියාත් අත්අඩංගුවට ගන්නැයි බලපෑම් :

 එසේම, මෙම බැඳුම්කර ගනුදෙනුව සම්බන්ධයෙන් අර්ජුන් ඇලෝසියස් මහතාගේ පියා ඇතුළු පස්දෙනෙකු අත්අඩංගුවට ගන්නැයි නීතිපති දෙපාර්තමේන්තුවේ ජ්‍යෙෂ්ඨ නිලධාරියකු රහස් පොලිස් නිලධාරීන්ට දිගින් දිගටම බලපෑම් කර තිබේ.

එහෙත් ඇලෝසියස් මහතාගේ පියා ඇතුළු තවත් අයෙක් මෙම සිද්ධියට කිසිඳු සම්බන්ධයක් නැතැයි කියමින් රහස් පොලිස් නිලධාරීන්, මහබැංකු බැඳුම්කර සිද්ධියේ' සැකකරුවන් ලෙස, හිටපු මහබැංකු අධිපති අර්ජුන් මහේන්ද්‍රන්, පර්පෙචුවල් ට්‍රෙෂරීස් සමාගමේ සභාපති අර්ජුන් ඇලෝසියස් සහ එම සමාගමේ ප්‍රධාන විධායක අධ්‍යක්ෂ කසුන් පළිසේන යන පුද්ගලයින් නම් කරන්නැයි කොළඹ කොටුව මහේස්ත්‍රාත් අධිකරණයෙන් පෙබරවාරි 02දා කල ඉල්ලීමට අවසර ලැබිණ.

රහස් පොලිසිය වෙනුවෙන් නීතිපති දෙපාර්තමේන්තුවේ නිලධාරීන් කළ ඉල්ලීමක් සලකා බැලීමෙන් පසුව කොළඹ කොටුව මහේස්ත්‍රාත් ලංකා ජයරත්න, මෙම නියෝග නිකුත් කළාය.

කොළඹ කොටුව මහේස්ත්‍රාත්වරිය අර්ජුන් මහේන්ද්‍රන්, අර්ජුන් ඇලෝසියස් සහ කසූන් පළිසේන යන පුද්ගලයින් මහබැංකු බැඳුම්කර සිද්ධියේ සැකකරුවන් ලෙස නම් කිරීමට අවසර ලබා දුන්නේ එම ඉල්ලීම පිළිගනිමිනි.

 ඇලෝසියස් සහ කසුන් පලිසේන සඳුදා තෙක් රිමාන්ඩ්

මේ අතර බැඳුම්කර වංචාවට සැකපිට අත්අඩංගුවට ගත් පර්පචුවල් ට්‍රෙෂරීස් හිමිකරු අර්ජුන ඇලෝසියස් සහ එහි ප්‍රධාන විධායක නිලධාරී කසුන් පලිසේන යන මහත්වරුන් සඳුදා (05) තෙක් රිමාන්ඩ් කරන ලෙස කොටුව ප්‍රධාන මහේස්ත්‍රාත් ලංකා ජයරත්න මහත්මිය නියෝග කළාය. 

ඔවුන් දෙදෙනා රහස් පොලිස් භාරයට ගනු ලැබුවේ ඉරිදා (04) උදෑසනය. ඉන් පසු රහස් පොලිස් මූලස්ථානයට රැගෙන ගොස් ප්‍රකාශ සටහන් කර ගැනීමෙන් පසු රහස් පොලිසිය ඊයේ රාත්‍රී ඔවුන් කොටුව මහේස්ත්‍රාත් නිල නිවසට ඉදිරිපත් කළේය.

බැඳුම්කර වංචාවට අදාලව හිටපු මහ බැංකු අධිපති අර්ජුන් මහේන්ද්‍රන්, අර්ජුන් ඇලෝසියස් සහ කසුන් පලිසේන සැකකරුවන් බවට නම් කිරීමට කොටුව මහේස්ත්‍රාත් අධිකරණය පසුගියදා අවසර ලබා දුන්නේය.

අර්ජුන් මහේන්ද්‍රන් මහතා සිංගප්පූරුවේ ජීවත් වන අතර ලබන 15 වැනිදාට පෙර රහස් පොලිසියේ පෙනී සිටින්නැයි සිංගප්පූරුවේ අන්තර් ජාතික පොලිසිය හරහා මහේන්ද්‍රන් මහතාට නොතීසි යවන ලෙස අධිකරණය නියෝග කළේය.

 සබැඳි පුවත්

CID හාස්‍ය රංගනය සහ සිරස මාධ්‍ය සදාචාරය (වීඩියෝ)

අද උදෑසන ලංකාව 70 වැනි නිදහස සමරමින් සිටියදී බැඳුම්කර සිද්ධිය සම්බන්ධයෙන් පර්පෙචුවල් ට්‍රෙෂරීස් හිමිකරු අර්ජුන් ඇලෝසියස් සහ එම සමාගමේ ප්‍රධාන විධායක නිළධාරී කසුන් පලිසේන අත්අඩංගුවට ගත් ආකාරය සිරස මාධ්‍ය ජාලය විසින් සජීවී ව විකාශය කෙරුණේ සිරස මාධ්‍ය සදාචාරය නැවත වරක් ප්‍රශ්නගත කරමින් පමණක් නොවේ. අපරාධ පරීක්ෂණ දෙපාර්තමේන්තුවේ කීර්ති නාමයට ද විශාල හානියක් සිදු කරමිනි.

සීඅයිඩී ය හෙවත් අපරාධ පරීක්ෂණ දෙපාර්තමේන්තුවේ මූල්‍ය විමර්ශන අංශයේ ස්ථානාධිපතිවරිය, පසුගිය 2 වැනිදා කොටුව මහේස්ත්‍රාත්වරයා ඉදිරියේ සිදුකළ කරුණු දැක්වීමෙන් පසු මෙම අත්අඩංගුවට ගැනීම් මෙසේ සිදුවෙද්දී සී අයි ඩී නිළධාරීන්ට එක් මූලික නීතිමය කාරණයක් අමතකව ඇති සෙයකි.

එනම්, මෙකී ලක්ෂ්මන් අර්ජුන මහේන්ද්‍රන්, අර්ජුන ජෝෂෆ් ඇලෝෂියස්, කසුන් ඔෂධී පලිසේන යන අය සැකකරුවන් පමණක් බවයි.

සීඅයිඩී ය විසින්ම ඉදිරිපත් කරන ලද ලිඛිත කරුණු දැක්වීමේ සඳහන් වන්නේ ද ‘‘ඔවුන් සැකකරුවන් සේ සලකන ලෙසට අධිකරණයෙන් අයැද සිටින බව‘‘ යි.

එසේ අධිකරණයෙන් අයැද සිට සැකකරුවන් වශයෙන් නම් කරනු ලැබූ තිදෙනාගෙන් දෙදෙනෙක් අද උදෑසන ඔවුන් විසින් අත්අඩංගුවට ගෙන තිබෙන්නේ ඔවුන් ට සැකකරුවන් වශයෙන් සලකමින්ද? නැතිනම් වරදකරුවන් වශයෙන් සලකමින් ද?

භාරවන ලෙසට දැනුම් දීමක් කළේ නැහැ :

අද කොටුව මහේස්ත්‍රාත් වෙත ඉදිරිපත් කිරීමෙන් අනතුරුව ඔවුන් වැඩිදුර විමර්ශන සඳහා රක්ෂිත බන්ධනාගාර ගත කෙරෙනු ඇත්තේද සැකකරුවන් වශයෙන් මිස වරදකරුවන් වශයෙන් නොවන බවට වන සාමාන්‍ය නීතිය, අපරාධ පරීක්ෂණ දෙපාර්තමේන්තුවේ නිළධාරීන් දන්නේ නැතිද...?

පසුගිය සිකුරාදා කොටුව මහේස්ත්‍රාත් අධිකරණයෙන් මෙම අවසරය ලබාගැනීමෙන් අනතුරුව අපරාධ විමර්ශන දෙපාර්තමේන්තුව කිසිම අවස්ථාවක සැකකරුවන්ට පැමිණ භාරවන ලෙසට දැනුම් දීමක් කළේ නැත.

ඉන්පසු හිටි හැටියේ එතැනට එන කැමරා මානාගත් සිරස මාධ්‍ය කණ්ඩායමක් ඉදිරියේ මේ හාස්‍ය රංගනය රඟ දැක්වෙයි.

මෙම සැකකරුවන් තිදෙනා අතරින් හිටපු මහබැංකු අධිපති අර්ජුන් මහේන්ද්‍රන්, දෙවැනිදා අධිකරණය ඉදිරියේ කරුණු දැක්වීම සිදුවන විටත් සිටියේ රටින් බැහැර ව ය. ඇලෝෂියස් සහ කසුන් පලිසේන යන දෙදෙනාම සිටියේ විවෘත සමාජයේ ය.

සීඅයිඩී ය විසින් අධිකරණයට ඉදිරිපත් කළ කරුණු දැක්වීම අනුව ඔවුන් පොදු දේපළ වරදක් හෝ වරදවල් කර ඇති හෙයින්ද, ඒවා සංඥෙය වරද ගණයට වැටෙන හෙයින් ද, වරෙන්තු රහිතව ඔවුන් ව අත්අඩංගුවට ගැනීමට බලය තිබෙන බව සැබෑවකි.

නිසි ‍ගෞරවය සහ අභිමානය ?

නමුත් එසේ වරෙන්තු රහිතව අත්අඩංගුවට ගත යුත්තේ, සෑම සැකකරුවෙකුටම නීතිය මගින්ම පිරිනමා තිබෙන නිසි ‍ගෞරවය සහ නිසි අභිමානය රැකෙන පරිදි ය.

මේ සැකකරුවන් තිදෙනා පෙබරවාරි 7 වැනිදාට පෙර අත්අඩංගුවට ගැනීමට නියමිත බවට සති කිහිපයක පටන් මාධ්‍ය වාර්තා පළ වෙද්දී සහ සිකුරාදා කොළඹ කොටුව මහේස්ත්‍රාත් අධිකරණයට සිදුකළ කරුණු දැක්වීම් ගැන පවා මාධ්‍ය විසින් වාර්තා කරද්දී මේ සැකකරුවන් දෙදෙනා කිසිම අවස්ථාවක නීතියෙන් පළා යාමට උත්සාහ කළේ නැත. දැනුම් දීමක් කළේ නම් ඔවුන් භාරවීමට ඉඩ තිබිණි.

කිසිම අවස්ථාවක සීඅයිඩී ය එසේ භාරවන ලෙසට ඔවුන්ට දැනුම් දීමක් කර නැත.

මෙම හාස්‍ය රංගනයේ පිටපත ඉතා දුර්වල බව අප කියන්නේ එනිසා ය.

අඩුම ගණනේ මරු සිරා පවා මෙසේ ටෙලි නාට්‍යයක් රූගත කරන ආකාරයට අත්අඩංගුවට ගැනීමට සී අයි ඩීයට නොව කිසිම අධිකාරියකට බලයක් නැත.

සිරස දැනගත්තේ කෙසේද ?

අර්ජුන් ඇලෝසියස් පවා නොදැන සිටි මොහොතක ඇලෝසියස්ලා වෙත සී අයි ඩී ය යන බව සිරස දැනගත්තේ කෙසේද යන්න වෙනම විමසා බැලිය යුතු කාරණයකි.

එය හුදෙක් ඔවුන්ගේ විස්කමක් ලෙස කෙනෙක් විසින් අර්ථ දක්වන්නට ඉඩ ඇතත්, මෙතැනදී බරපතළ ලෙස ප්‍රශ්න කළ යුත්තේ එය නොව සිරසේ මාධ්‍ය සදාචාරයයි.

ඔවුන්ට මේ සිද්ධියේ සැකකාර පාර්ශවයන් සමග යම් පුද්ගලික කෝන්තරයක් පිරිමසා ගන්නට තිබෙනවාද? මෙය, බදු ගෙවන ජනතාව ජීවත් වන රටක විකාශන බලපත්‍රයකින් ක්‍රියාත්මක වන ප්‍රධාන පෙළේ ටෙලිවිෂන් නාලිකාවක වගකීම් විරහිත හැසිරීම නැවත වරක් ප්‍රදර්ශන කිරීමකි.

‘‘අධිකරණයේ නිසි ක්‍රියාදාමය මගින්, එනම් නඩු විභාගය අවසන් ව තීන්දුව ලැබෙන තෙක් සැකකරුවෙකුට වරදකරුවෙකු සේ නොසැලකිය යුතු බව‘‘ අපරාධ නීතියේ එක් මූලිකාංගයකි.

පාසල් ළමුන් පවා දන්නා මේ සිද්ධාන්තයට කියන්නේ ‘නිර්දෝෂී බවේ පූර්ව නිගමනය‘ කියා ය.

එනම් අධිකරණමය වරදකරුවෙක් බවට පත්වන තෙක් සෑම පුද්ගලයෙක්ම නිර්දෝෂියෙකු වන බව ය.

මෙය ශත වර්ෂ ගණනාවක් මුළුල්ලේ ලෝකය තුළ සැලකෙන්නේ නීතියේ ආධිපත්‍යය හෙවත් නීතිය මත පාලනයේ ද එක් මුල් ගලක් ලෙස ය. නීතියේ ආධිපත්‍යය, ජනපති මෛත්‍රිපාල සිරිසේන මහතා මැතිවරණ වේදිකාවල වරනගන ‘යහපාලනයේ‘ මූලිකම පදනමයි.

ජනාධිපතිගේ 'නිදහස් කතාවට' තල්ලුවක් ද?

මෙම අත්අඩංගුවට ගැනීම්වලට සමගාමී ව හෝ ඊට ආසන්න වේලාවක ජනාධිපතිවරයා නිදහස් සමරු උත්සවයට සහභාගි වෙමින් කියා සිටින්නේ ‘‘අද දවසේ දේශප්‍රේමිත්වය යනු මූල්‍ය විනයක් සහිතව කටයුතු කිරීමයි‘ යනුවෙනි.

මේ අනුව සී අයි ඩී නිළධාරීන් අද උදෑසන සිරසෙන් සජීවී මාධ්‍ය ආවරණයක් ලබාගනිමින් රටේ බරපතළම මූල්‍ය වංචාවක් ලෙස සැලකෙන මෙම සිද්ධියේදී මෙසේ කටයුතු කළේ ජනපතිවරයා හෝ වෙනත් දේශපාලකයෙක් පිනවීමට ද යන බරපතළ ගැටළුව මෙහිදී නිරායාසයෙන් මතු වේ.

පසුගිය කාලය්දී කොණ්ඩයාගේ සිද්ධියේ පටන් ගිරිබාව ස්ත්‍රී දූෂකයා දක්වා පොලිසිය විසින් විමර්ශන කටයුතු සඳහා සැකකරුවන් යැයි කියමින් සාමාන්‍ය සිවිල් වැසියන් කුදලාගෙන යන අවලස්සන ආකාරය අපි දැක ඇත්තෙමු.

ඒ ඇතැම් අවස්ථාවන් සඳහා ද මෙබඳුම බාල ගණයේ මාධ්‍ය ආවරණ සපයාගෙන තිබිණි.

නමුත් රටේ ජාතික ආර්ථිකයට තීරණාත්මක හානියක් සිදුකළ සිද්ධියක් ලෙසට අර්ථ දක්වා ඇති බැඳුම්කර සිද්ධිය සම්බන්ධයෙන් විමර්ශන කටයුතු කළේ සහ මෙම අත්අඩංගුවට ගැනීම් කළේ ගමේ පොලිසිය නොව මේ සම්බන්ධයෙන් ලංකාවේ පොලිසියේ තිබෙන ඉහළම අධිකාරිය වශයෙන් සැලකෙන අපරාධ පරීක්ෂණ දෙපාර්තමේන්තුවයි.

මෙම දෙපාර්තමේන්තුවේ කීර්තිමත් නිළධාරීන් විසින් විද්‍යා දැරියගේ සමූහ දූෂණ සිද්ධිය වැනි අවස්ථාවලදී අතිශය ප්‍රශංසනීය ලෙස හැසිරුණු ආකාරය පිළිබඳ අපි කතා කර ඇත්තෙමු.

නමුත් අසීරුවෙන් දොවාගත් කිරි කළයකට ඒ දෙපාර්තමේන්තුවේම සිටින අවිදුර දෘෂ්ටිකත්වයෙන් පෙළෙන ඇතැම් නිළධාරීන් ගොම බිඳු මුසු කරමින් සිටින අයුරු ශෝචනීය ය.

සැකකරුවන් ගේ මූලික අයිතිවාසිකම් කඩලා :

මේ අනුව බැඳුම්කර සිද්ධියේ සැකකරුවන් ව අත්අඩංගුවට ගැනීමේදී ඔවුන් විසින් ඉතාම පැහැදිලිව සැකකරුවන් ගේ මූලික අයිතිවාසිකම් කඩ කර තිබේ. ඒ බවට සාක්ෂි ද ඔවුන් විසින් සජීවී ව රටට සපයා අවසන් ය.

ඒ, ඔවුන් මෙම අත්අඩංගුවට ගැනීම් සිදුකළේ ටෙලිවිෂන් නාලිකාවකින් ලැබුණු සජීවී මාධ්‍ය ආවරණයක් ද සහිතව නිසා ය.

මේ නිසා අවසානයේ මේ සිද්ධියේදී අමාරුවේ වැටී සිටින්නේ සීඅයිඩී යයි.

යුක්තිය පසිඳලීමට සහාය වීම පිණිස අවංක උවමනාවක් තිබේ නම් මේ සී අයි ඩී නිලධාරීන් මුලින්ම කළ යුත්තේ දේශපාලකයන් පිනවීම නතර කිරීමයි.

මෙවැනි හාස්‍ය රංගනවලින් බොළඳ මාධ්‍ය සන්දර්ශනවලට උඩ ගෙඩි දීමෙන් වැළකී සිටීමයි.

(lankanewsweb.net)

මෙවර පළාත් පාලන මැතිවරණ සටනේදී ජනාධිපති මෛත්‍රීපාල සිරිසේන මහතාගේ දායකත්වය නොවන්නට එක්සත් ජාතික පක්ෂය නන්නත්තාර වීමට බොහෝදුරට ඉඩතිබු බව එජාප තරුණ මන්ත්‍රීවරයකු 'නිව්ස් ටියුබ්' වෙත පැවසිය.

පසුගිය වසර තුනක යහපාලන ආණ්ඩුවේ මැති ඇමතිවරුන්ගෙන් ලැබුනාවූ 'කුඩම්මාගේ සැලකිලි' සම්බන්ධයෙන් කනස්සල්ලට පත්ව සිටි එජාප ක්‍රියාකාරීන්ට හා හිතවතුන්, ජනාධිපතිවරයා පසුගිය සති කිහිපයේ එජාප නායකත්වය හා එජාපය ඉලක්කකර ගනිමින් කල ප්‍රකාශ වලින් ආවේගයට පත්ව යළි පක්ෂය දිනවීමට සක්‍රියව මැදිහත්ව සිටින බව ඔහු කියා සිටියේය.

මෙම මැතිවරණයේදී එජාප හිතවතුන් ඡන්ද පොලට ගෙනයාමේ බරපතල අර්බුදයක් පැවතියද ජනාධිපතිවරයාගේ අවේගාත්මක ප්‍රකාශ තුලින් මෙසේ ඊට විසඳුමක් ලැබුන බවද හෙතෙම සඳහන් කළේය.

මැතිවරණයට අදාලව එජාප මාධ්‍ය අංශය හා ප්‍රචාරක කටයුතු මුළුමනින්ම පාහේ අඩාලව පවතින මොහොතක  ජනාධිපතිවරයාගේ දායකත්වය ඉහලින්ම අගයකල යුතු බවද එම මන්ත්‍රීවරයා වැඩිදුරටත් පැවසිය.

 බුකිය කළඹන වීඩියෝවක් ! - ජනාධිපති-අගමැති රණ්ඩුවට සම කරයි

 ආණ්ඩුව කරවන ප්‍රධාන පාර්ශවයන් දෙක මෙවර වෙන වෙනම මැතිවරණයට ඉදිරිපත් වී සිටිය ද ජනතාව ඉදිරිපිට හතුරන් මෙන් ඇන කොටා ගනිමින් ඉතා සූක්ෂම ලෙස තම තමන්ගේ අභිප්‍රායන් ඉටු කර ගනිමින් සිටිති.

මේ බැව් හැගෙන විනෝදාත්මක ජවනිකා සහිත එකල ජනප්‍රිය විකට නලුවකු වන ඩී ආර් නානයක්කාර රගපෑ චිත්‍රපටයක කොටසක් මෛත්‍රී-රනිල් ගැටුම ලෙස හුවා දක්වමින් අන්තර්ජාලය ඔස්සේ හුවමාරු වෙයි.

දැඩි මතභේදයට තුඩුදී තිබෙන 'මහබැංකු බැඳුම්කර සිද්ධියේ' සැකකරුවකු ලෙස අධිකරණය විසින් නම්කර ඇති පර්පෙචුවල් ට්‍රෙෂරීස් සමාගමේ ප්‍රධාන විධායක අධ්‍යක්ෂ කසුන් පළිසේන මහතා ඔහුගේ බේරුම සඳහා සැකසු වාර්තාව අනුව ගණුදෙනු 7 කින් සේවක අර්ථසාධකයට පමණක් රු. බිලියන 26 ක පාඩුවක් සිදුව ඇතැයි කැෆේ සංවිධානයේ විධායක අධ්‍යක්ෂ හා ශ්‍රී ලංකා මානව හිමිකම් කේන්ද්‍රයේ විධායක අධ්‍යක්ෂ කීර්ති තෙන්නකෝන් මහතා පවසයි.

කීර්ති තෙන්නකෝන් මහතා එබව කියා සිටියේ අද (04) දහවල් පැවති පුවත්පත් සාකච්ඡාවක දීයි.

බෑනා ගේ සමාගමේ විධායක අධ්‍යක්ෂ පලිසේන විසින් හෙළි කළ තොරතුරු අනුව එම සමාගම විසින් ගණුදෙනු 7 ක් තුලින් සේවක අර්ථසාධක අරමුදලට රු. බිලියන 26 ක පාඩුවක් සිදු කර ඇතැයි දැන් හෙළිවන බව කීර්ති තෙන්නකෝන් මහතා එහිදී පැවසීය.

ඔහු වැඩිදුරටත් මෙසේද කියා සිටියේය.

පට්ටපල් බොරුවක් :

''කොමිසම හමුවේ හෙළි වූ ලෙස කසුන් පළිසේන ගේ බෝසන් එක රුපියල් මිලියන 10 කි. ඔහු කොමිසමට බොරු කිව්වේ, සේවක අර්ථසාධක අරමුදලේ නිලධාරීන්ට අල්ලස් දුන්නේ, දුරකතන සංවාද මැකුවේ, පරිගණක දත්ත මකා දැමුවේ ආණ්ඩුවට ලාබ කරන්නට යැයි කසුන් පළිහේන විසින් වාර්තාවක් ලියා ඇත.

ඒ පෙබ. 6 දින පාර්ලිමේන්තු විවාදයට බැදුම්කර වංචාවක් සිදු නොවූ බව කියන්නටය. ඔහුගේ මේ කථාව පට්ටපල් බොරුවක් බව අද හෙළි වී ඇත.

පලිසේන විසින් සකස් කළ ව්‍යාජ වාර්තාවේ පර්පචුවල් සමාගම බැදුම්කර මිලදී ගත් හා විකුණු මුදල සදහන් නොවේ.

අපි ඒ අංක අනුව යමින් මෙම බැදුම්කර මිලදී ගත් මුදල හා විකුණු මුදල සොයා ගනු ලැබීවා. ඒ අනුව, සේවක අර්ථ සාධක අරමුදල විසින් සිදු කළ ගණුදෙනු 7 ක් මගින් පමණක් මේ රටේ වැඩකරන ජනතාවට රු. බිලියන 26 ක්.

පලිසේන විසින් සැකසූ ව්‍යාජ වාර්තාවේ දැක්වෙන්නේ LKB 02035 C155 අංකය යටතේ සිදු වූ ගණුදෙනුව මගින් සේවක අර්ථ සාධක අරමුදලට ලභායක් ලැබී ඇති බවයි. එය පාර්ලිමේන්තු මන්ත්‍රීවරුන් නොමග යැවීමට සකස් කර ඇති මෙම ලේඛනය පට්ටපල් බොරුවකි.

පලිසේන රු. 100 කට ඉලක්කම් දක්වා ඇති නමුත් එහි බැදුම්කර 6100 ක් මිලදී ගෙන ඇත්තේ රු. 73 ක මුදලකට ය. ඒ සදහා පර්පචුවල් සමාගම රු. මිලියන 4453 ක් ගෙවා ඇත.

රු. 73 කට ගත් බැදුම්කරය සතියක් තුල රු. 116 ට එනම් රු. 43 ක ලාභයක් ඇතිව සේවක අර්ථ සාධක අරමුදලට විකුණා ඇත. අංක LKB 02035 C155 ගණුදෙනුව මගින් පමණක් පලිසේන ගේ සමාගම ලබා ඇති ලාභය රු. මිලියන 2669 කි.

'සැබෑ පාඩුව බිලියන 11.4 ක් නොව ඊටත් වඩා විශාලයි'

කසුන් පලිසේන සිය වාර්තාවෙන් ඔහු පාර්ලිමේන්තු මන්ත්‍රීවරුන්ට කියන්නේ බැදුම්කර රු. 100 බැගින් ගත් බවකි.

සත්‍ය නම් එම ගණුදෙනු 7 හි ISIN අංක මේ සමග ඇත. මේ ගනුදෙනු 7 සදහා පර්පචුවල් සමාගය වැය කළ මුදල රු. මිලියන 52826 කි.

දින 4-5 ක් තුල ඔවුන් එය සේවක අර්ථ සාධක අරමුදලට විකුණා ලැබූ ලාභය රු. මිලියන 79146 කි. ඒ අනුව, මේ ගනුදෙනු 7 න් පමණක් බෑනා ගේ සමාගම ලැබූ ලාභය බිලියන 26 කි.

එයින් ගම්‍ය වන්නේ මෙම වංචාවේ සැබෑ පාඩුව විගණකාධිපති හෙළි කළ අයුරින් බිලයන 12 ක් හෝ කොමිසම හෙළි කළ අන්දමින් බිලියන 11.4 ක් නොවන බව එයට වඩා විශාල බවයි. ''

මෙම මාධ්‍ය හමුවට රුසිරිපාල තෙන්නකෝන් මහතාද එක්ව සිටියේය.

හෙට දිනයේ ශ්‍රී ලංකා මානව හිමිකම් කේන්ද්‍ර‍ය විසින් මේ පිළිබද සවිස්තර වාර්තාවක් නිකුත් කරන බව ද රැසිරිපාල මහතා එහිදී පැවසිය.

කසුන් පළිහේන වාර්තාව

සබැඳි පුවත් 

බැඳුම්කරය නිසා රාජ්‍ය ආයතන රුපියල් බිලියන 25ක් ලාභ ලැබුවා : ඇලෝසියස්ගෙන් ආන්දෝලනාත්මක ප්‍රකාශයක්

ඩුබායි ගුවන්තොටුපලේ ආගමන විගමන නිලධාරීන් විසින් අද (04) උදැසනදී අත්අඩංගුවට ගත් රුසියාවේ හිටපු ශ්‍රී ලංකා තානාපති උදයංග වීරතුංග මහතා වහාම දිවයිනට රැගෙන එන්නැයි ජනාධිපති කාර්යාලයේ ප්‍රධානියකු අදාල බලධාරීන්ට නියෝගකර ඇතැයි වාර්තාවේ.

ඒ අනුව විදෙස් කටයුතු අමාත්‍යංශයේ හා පොලිස් මුල්‍ය අපරාධ කොට්ඨාශයේ නිලධාරීන් මේවනවිට අබුඩාබියේ රාජ්‍යතන්ත්‍රීක නිලධාරීන් සමග සාකච්ජා ආරම්භකර තිබේ. ඒ උදයංග මහතා ඩුබායිහිදී අත්අඩංගුවට පත්වුවද, රාජතාන්ත්‍රික වශයෙන් ඔහු ශ්‍රී ලංකාවට බාර ගැනීමට ගනුදෙනුකළ යුතුවන්නේ අබුඩාබි රාජ්‍ය සමඟවීම නිසාය.

උදයංග වීරතුංග මහතා ප්‍රශ්න කිරීමට ලක්ව ඇත්තේ ශ්‍රී ලංකා විදේශ ගමන් බලපත්‍රයකින් ඇමරිකාව බලා යාමට පැමිණි අවස්ථාවේදිය.

කොළඹ කොටුව මහේස්ත්‍රාත් අධිකරණයේ නියෝගයක් මත ආගමන විගමන දෙපාර්තමේන්තුව විසින් ඔහුගේ විදෙස් ගමන් බලපත්‍රය අත්හිටුවා තිබී ඇති අතර උදයංග මහතා ඇමරිකාවට යාමට උත්සාහ කර ඇත්තේ ඒ පිළිබඳව නොදැනුවත්වය.

යුක්රේනයට යන්න ඉල්ලයි :

ඩුබායි ආගමන නිලධාරීන් විසින් උදයංග මහතාව රිමාන්ඩ් භාරයට පත් කිරීමට උත්සාහ කර ඇති අතර එහිදී තමා යුක්රේන පදිංචිකරුවකු බැවින් එරටට යාමට අවසර දෙන්නැයි ඔහු ඉල්ලීමක් කර තිබේ.

කෙසේවුවද, ඔහු ලංකාවේ විදේශ ගමන් බලපත්‍රයක් සමගින් අත්අඩංගුවට පත්වීමත්, පැවති ආණ්ඩු සමයේ සිදු වූ බව පැවසෙන මිග් යානා ගනුදෙනුවේ සැකකරු ලෙස නම් කර සිටින ඔහු අධිකරණය මඟහැර සිටින හෙයින් අත්අඩංගුවට ගන්නා ලෙස දන්වා කොළඹ කොටුව මහේස්ත්‍රාත් අධිකරණය ජාත්‍යන්තර පොලිසිය වෙත මීට වසරකට පමණ පෙර වරෙන්තු නිකුත් කර ඇති නිසාත් ඔහු ලංකාවට බාරදෙන ලෙස ශ්‍රී ලංකා රජය මේවනවිට අබුඩාබි බලධාරීන්ගෙන් ඉල්ලීම් කර තිබේ.

වරෙන්තු පිට සිටි උදයංග වීරතුංග හිටපු ජනාධිපතිවරයා සමග විදෙස් සංචාරයේ ...

හිටපු ජනාධිපති මහින්ද රාජපක්ෂ මහතාගේ පවුලේ ඥාතියෙකු වන උදයංග වීරතුංග මහතා ශ්‍රී ලංකාවට රැගෙන ඒමට පොලිස් මුල්‍ය අපරාධ කොට්ටාශයේ නිලධාරීන් අද (04) රාත්‍රියේ ඩුබායි වෙත යාමට නියමත බව පොලිසිය පවසයි.

හිටපු ජනාධිපති මහින්ද රාජපක්ෂ මහතා විදේශ සංචාරවල නියැලුණු ඇතැම් අවස්ථාවලදී වරෙන්තු පිට සිටි උදයංග වීරතුංග ද හිටපු ජනාධිපතිවරයා සමග සිටින ආකාරය දැක්වෙන ඡායාරූප මීට පෙර මාධ්‍ය ඔස්සේ පළ වී තිබිණි.

උදයංග වීරතුංග මහතාට අයත් දේපළ කිහිපයක් විකිණීම, උකස් කිරීම සහ පැවරීම තහනම් කරමින් කොළඹ කොටුව මහේස්ත්‍රාත් අධිකරණය පසුගියදා තහනම් නියෝගයක් නිකුත් කර තිබේ.

රාජපක්ෂ පාලන සමයේදී ශ්‍රී ලංකා ගුවන් හමුදාව සඳහා මිග් යානා මිලදී ගැනීමේදී සිදුව ඇතැයි පැවසෙන අක්‍රමිකතා සම්බන්ධයෙන් එල්ල වන චෝදනා උදයංග වීරතුංග මහතා ප්‍රතික්ෂේප කරයි.

යහපත් දේශපාලන සංස්කෘතියක් ගොඩනැගීම අද අත්‍යවශ්‍ය වී තිබෙන බවත් අයහපත් දූෂිත දේශපාලනය ඊට බරපතළ ප්‍රශ්නයක් හා අභියෝගයක් වි තිබෙන බවත් ජනාධිපති මෛත්‍රිපාල සිරිසේන මහතා 70 වැනි ජාතික නිදහස් සමරු උළෙලේ දී ජාතිය අමතමින් ප්‍රකාශ කළේ ය.

පහළ සිට ඉහළටත් ඉහළ සිට පහළට විධිමත්භාවයෙන්, විනයක් ඇති දේශපාලන පරපුරක් සමඟ රට ඉදිරියට යෑමේ අවශ්‍යතාවය තිබෙන බව ඔහු එහිදී අවධාරණය කර සිටියේය.

දුෂණ විරෝධී මතය ශක්තිමත් කිරීම ජාතික ප්‍රගමනයේ ආත්ම ආරක්ෂාව බවත්, දේශප්‍රේමීත්වය යනු මූල්‍ය විනය අනුව කටයුතු කිරීම බවත්, මූල්‍ය විනයක් ඇති කිරීමට පුළුල් ජාතික ව්‍යාපාරයක අවශ්‍යතාවය තිබෙන බවත්, ඔහු සඳහන් කළේය.

 එහිදී වැඩිදුරටත් අදහස් දැක්වූ ජනාධිපතිවරයා,

''ඉතාමත් ගෞරවයෙන් හා අභිමානයේ සිහිපත් කරන්නේ, අපේ රටට යටත් විජිත යුගයෙන් නිදහස් ලැබී වසර 70ක් ගතවන ඓතිහාසික නිදහස් සමරුමයි. 1948 නිදහස ලැබීමෙන් පසු අපේ අභියෝග ගණනාවක් ජයගැනීම සඳහා එදා සිට මෙදා දක්වා බලයට පත් වූ රජයන්, රාජ්‍ය නායකත්වයන්, ආරක්ෂක අංශ, පොදු මහජනතාව වගකීම් හා යුතුකම් මනා ලෙස ඉටු කර තිබෙන බව දැඩි ලෙස විශ්වාස කරනවා.

බලාපොරොත්තු නොවූ ආකාරයට රට බෙදීමට, වෙන් කිරීමට,උත්සහ කළ මිලේච්ඡ LTTE ත්‍රස්තවාදය පරාජය කිරීමට වසර 26ක දීර්ගකාලින යුද්දයකට මුහුණ දීමට සිදු වුණා. මෙය විවිධ ක්ෂේත්‍රවල ජාතික ප්‍රගමනයට පසුගමනයන් ඇතිවීමට හේතු වුණා.

අපේ ඉතිහාසයේ වසර දහස් ගණනක ශ්‍රේෂඨත්වය අභිමානය, මහා කතාන්දරයෙන් තිබෙන අද්දැකීම හා ඉන් ඇති වී තිබෙන ජීව ගුණය අපේ අනාගතය සඳහා ඉදිරි වැඩපිළිවෙල ශක්තිමත් කරගැනීමට උගතුන් විවිධ ක්ෂේත්‍රවල විද්වතුන් සිය යුග මෙහෙවර කරමින් සිටිනවා.

අනාගතය ගොඩනැගීමේ අභියෝග :

අනාගතය ගොඩනැගීමට අභියෝග තේරුම්ගත යුතු වෙනවා. ආර්ථික ජයග්‍රහන ළඟාකරගැනීමට රජයක් ලෙස කැපවී සිටිනවා. දුගීභාවය ප්‍රබල අභියෝගයක්. මීට පෙර බලයට පත් වූ සෑම රජයක් ම පුළුල් වැඩපිළිවෙලවල් ක්‍රියාත්මක කර ඇති අතර, අතීත අද්දැකීම් සමඟ නව වැඩපිළිවෙල සමඟ දුගී බවින් මිදීමට මීට වඩා කාර්යක්ෂමව ඉටු කළ යුතු වෙනවා.

සංවර්ධනයේ ජාතික ප්‍රමුඛතා හදුනාගැනීම අවශ්‍ය වෙනවා. ජාතික ප්‍රමුඛතා නොසළකා, පෞද්ගලික න්‍යාය පත්‍රයන් තුළ දසක කීපයක් තුළ කළ සංවර්ධන ජාතික ආර්ථිකයට අයහපත් ප්‍රතිඵල ගෙන දී තිබෙනවා. ජාතික ප්‍රමුඛතා හඳුනාගෙන ඒ අනුව කටයුතු කිරීම වැදගත් වෙනවා.

ජාතියේ අනාගතය ශක්තිමත් වන්නේ උගතුන් වැඩි වූ රටකයි. අධ්‍යාපන ප්‍රතිසංස්කරණවල ප්‍රතිපත්ති අදට ඔබින ආකාරයට හා හෙටට ගැළපෙන ආකාරයට සැකසිය යුතු වෙනවා. නවෝත්පාදන, හරිත ආර්ථිකය සඳහා කැපවීම් අවශ්‍ය වෙනවා. නිපුණත සංවර්ධනයට වෘත්තීය අධ්‍යාපනයට වැදගත් ස්ථානයක් ලබාදීම අවශ්‍යවශ්‍යයි. පැරණි මුදල් රෙගුලාසි කඩිනම් සංශෝධනයකට යටත් කළ යුතු වෙනවා. කාර්යක්ෂම සංවර්ධනයක්, විනයක් ඇති පරිපාලනය, මූල්‍ය විනයක් සඳහා රෙගුලාසි සංශෝධනය කඩිනම් කළ යුතු වෙනවා.

දේශපාලඥයාගේ අවංකභාවය ?

දේශපාලඥයාගේ අවංකභාවය රට ගොනැගීමට වැදගත් වෙනවා. මාතෘභූමිය ගොඩනැගීම සඳහා කැපවීම, අවංකභාවය, පිරිසිදුබව, නොකිළිටි බව යුගයේ අවශ්‍යතාවයක්. ගහකොළ ඇතුළ සියලු සතුන්ට නිදහසේ පැවැත්ම අවශ්‍යයි.

අසීමිත වස්තූන්වලට නිදහසත් මිනිසාට තිබෙන නිදහසෙත් කිසිදු වෙනසක් නොතිබිය යුතුයි. සැබෑ නිදහස යනු මිනිසේකුගේ නිදහස පමණක් නොවෙයි. වගකීම් සහගත තත්ත්වය පාසල් දරුවාගේ සිට දැනුවත් කිරීම වැදගත් වෙනවා.

අපේ ආදරණීය ජනතාව, ඉල්ලා සිටින්නේ නිදහස හා සෞභාග්‍යයයි.ආර්ථික සමෘද්ධිය සෞභාග්‍ය ජනතාවගේ ප්‍රාර්ථනයයි. අපේ ජනතාවගේ අනනය්‍යතාවය දේශීයත්වය,අපේ සංස්කෘතිය උදාකිරීමට වගකීමෙන් කටයුතු කළ යුතු වෙනවා. දැනුම ලබාගැනීමත් සමඟ ස්වදේශික උරුමයන් නොබිඳ කටයුතු කළ යුතු වෙනවා.

දූෂණ විරෝධය රටක ආත්ම ආරක්ෂාවයි:

මේ සඳහා රජ්‍ය අංශය හා පෞද්ගලික අංශයේ වගකිම් ඉටු කළ යුතු වෙනවා. අවධානය යොමු කළ යුතුයි, අභියෝග සිහිපත් කළ යුතුයි. දූෂණ විරෝධය රටක ආත්ම ආරක්ෂාවයි. දුෂණ විරෝධී මතය ශක්තිමත් කිරීම ජාතික ප්‍රගමනයේ ආත්ම ආරක්ෂාවයි. ආර්ථික නිදහස ගොඩනැගෙමින් තිබෙන විට ඊට එරෙහිව දූෂණය, අල්ලස, හොරකම අප විසින් පිටු දැකිය යුතූයි.

සෑම දේශපාලඥයන් ම ඒ ආදර්ශය ලබාදීම යුගයේ කර්යයක් ලෙස හඳුන්වනවා. කාර්යාක්ෂමව , එඩිතරව, සටන්කාමීත්වයෙන් ආර්ථිකය ගොඩනැගීමට රට ඉදිරියට ගෙන යෑමට කැපවීමේ අත්‍යාවශ්‍යතාව දකිනවා.

ජීවත්වීමේ අයිතිය :

මේ රට ගොඩනැගීමට ජාතිවාදී අඳහස්වලින් තොරව සංහිදියාව ගොඩනගමින් ජීවත්වීමේ අයිතිය සහතික කිරීම අත්‍යාවශ්‍ය වෙනවා. ආගමික සහජීවනය, භාෂා, ජාතික සහජීවනය, ශක්තිමත් කරමින් සැකෙන් බියෙන් තොරව ජීවත් වීම සහතික කළ යුතු වෙනවා. අද මූලික වශයෙන් දේශප්‍රේමීත්වය යනු මූල්‍ය විනය අනුව කටයුතු කිරීමයි.

දේශප්‍රේමීත්වය එක් එක් යුගවල නිර්වචන දිය හැකියි. මූල්‍ය විනයක් තුළ කටයුතු කිරීම වැදගත්. මූල්‍ය විනයක් ඇති කිරීමට පුළුල් ජාතික ව්‍යාපාරයක අවශ්‍යතාවය දකිනවා. ඒ නිසා පිරිසිදු නොකිලිටි දේශපාලනයක් සඳහා සියලු දෙනා කැපවෙමින් විවිධ ක්ෂේත්‍රවල විද්වතුන්ගෙන් සැදුම් ලත් රට ගොඩනැගීමට දුෂණය, අල්ලස වළක්වාගැනීමට පුළුල් ජාතික ව්‍යාපාරයක් ගොඩනැගිය යුතුයි කියන පණිවිඩය ලබාදීමට කැමතියි.

අපේ රට බෙදන්නට එල් ටී ටී ඊ ත්‍රස්තවාදීන් කටයුතු අවස්ථාවේ දී ජීවිත පරිත්‍යාග කරමින් ආබාධිත වෙමින්,පවුල් ජීවිත අහිමි කරමින් වේදනාකාරි අද්දැකීම් සමඟ මේ රටේ භෞමික අඛණ්ඩතාවය වෙනුන් රණවිරුවන් සටන් කළා. මම රජයේ ගෞරවය ප්‍රණාමය යුද, ගුවන්, නාවික,පොලිස් ක්ෂේත්‍රවලට රාජ්‍ය සේවයට ගෞරවය පුදකරනවා. ජාතියේ අනාගතය සඳහා දුඟීබවින්, දූෂිතයයෙන් තොර ප්‍රබුද්ධ රටක් සඳහා උගත් තරුණ පරපුර සමඟ කැපවෙමු යැයි ජනාධිපතිවරයා පැවසීය.

ඉන්ටර්පෝල් රතු වරෙන්තු ලද රුසියාවේ හිටපු ශ්‍රී ලංකා තනාපති උදයංග වීරතුංග විදේශ රටකදී අත්අඩංගුවට ගෙන ඇතැයි නිල නොවන ආරංචි මාර්ගවලින් වාර්ත වේ

 එම  තොරතුරුවලට අනුව ඔහු ඇමෙරිකාව බලා පිටත්ව යන අවස්ථාවේදී ඩුබායි ගුවන් තොටුපලකදී ප්‍රශ්න කිරීම සදහා අත්අඩංගුවට ගෙන ඇති බව පැවසේ.

මතු සම්බන්ධයි

දැඩි මතභේදයට තුඩුදී තිබෙන 'මහබැංකු බැඳුම්කර සිද්ධියේ' සැකකරුවන් ලෙස අධිකරණය විසින් නම්කර ඇති පර්පෙචුවල් ට්‍රෙෂරීස් සමාගමේ සභාපති අර්ජුන් ඇලෝසියස් සහ එම සමාගමේ ප්‍රධාන විධායක අධ්‍යක්ෂ කසුන් පළිසේන යන පුද්ගලයින් රහස් පොලිසිය විසින් අත්අඩංගුවට ගෙන ඇතැයි වාර්තාවේ.

රහස් පොලිස් කණ්ඩායමක් අද (04) උදැසන සිට අර්ජුන් ඇලෝසියස්ගේ නිවස පිහිටි කොළඹ මල්වත්ත පාරේ සීරුවෙන් තබා තිබිණ.

'මහබැංකු බැඳුම්කර සිද්ධියේ' සැකකරුවන් ලෙස, හිටපු මහබැංකු අධිපති අර්ජුන් මහේන්ද්‍රන්, පර්පෙචුවල් ට්‍රෙෂරීස් සමාගමේ සභාපති අර්ජුන් ඇලෝසියස් සහ එම සමාගමේ ප්‍රධාන විධායක අධ්‍යක්ෂ කසුන් පළිසේන යන පුද්ගලයින් නම් කිරීම සඳහා කොළඹ කොටුව මහේස්ත්‍රාත් අධිකරණය පෙබරවාරි 02දා රහස් පොලීසියට අවසර ලබා දුන්නේය.

රහස් පොලිසිය වෙනුවෙන් නීතිපති දෙපාර්තමේන්තුවේ නිලධාරීන් කළ ඉල්ලීමක් සලකා බැලීමෙන් පසුව කොළඹ කොටුව මහේස්ත්‍රාත් ලංකා ජයරත්න, මෙම නියෝග නිකුත් කළාය.

මහබැංකු බැඳුම්කර සිද්ධිය පිළිබඳව සොයා බැලූ ජනාධිපති කොමිසම සිදුකර තිබෙන නිර්දේශ මත, රහස් පොලිසිය පරීක්ෂණයක් ආරම්භකර ඇති බව නීතිපති දෙපාර්තමේන්තුවේ අතිරේක සොලිස්ටර් ජනරාල්වරයා අධිකරණය හමුවේ කියා සිටියේය.

එම පරීක්ෂණවල දී අදාළ සිද්ධියට මහ බැංකුවේ හිටපු අධිපති අර්ජුන් මහේන්ද්‍රන්, පර්පෙචුවල් ට්‍රෙෂරීස් සමාගමේ සභාපති අර්ජුන් ඇලෝසියස් හා එම සමාගමේ ප්‍රධාන විධායක කසුන් පළිසේන යන පුද්ගලයන් සම්බන්ධ බවට සැකකෙරෙන තොරතුරු අනාවරණය වී ඇති බැවින්, ඔවුන් සැකකරුවන් ලෙස නම් කිරීමට ඉඩදෙන මෙන්, රජයේ නීතිඥවරයා අධිකරණයෙන් ඉල්ලා සිටියේය.

කොළඹ කොටුව මහේස්ත්‍රාත්වරිය අර්ජුන් මහේන්ද්‍රන්, අර්ජුන් ඇලෝසියස් සහ කසූන් පළිසේන යන පුද්ගලයින් මහබැංකු බැඳුම්කර සිද්ධියේ සැකකරුවන් ලෙස නම් කිරීමට අවසර ලබා දුන්නේ එම ඉල්ලීම පිළිගනිමිනි.