පුවත්

ජාතික ඖෂධ නියාමන අධිකාරියේ දත්ත මැකීමේ සිද්ධිය සම්බන්ධයෙන් සැකපිට අත්අඩංගුවට ගෙන සිටින සහකාර ඉංජිනේරුවරයා ලබන 18 වනදා දක්වා යළි රක්ෂිත බන්ධනාගාරගත කෙරිණ.

ඒ සැකකරු අද කොළඹ ප්‍රධාන මහේස්ත්‍රාත්වරයා හමුවට ඉදිරිපත් කිරීමෙන් අනතුරුවයි.

මැකීම සම්බන්ධ චෝදනා මත එපික් ලංකා ටෙක්නොලජීස් සමාගමේ සහකාර මෘදුකාංග ඉංජිනේරුවරයා අත්අඩංගුවට ගනු ලැබුවේ, පසුගිය 28 වනදායි.

නිරූපමා රාජපක්ෂ මේ වනවිට රටින් පිටවගොස් ඇතැයි වාර්තා වේ.

පැන්ඩෝරා පත්‍රිකා එළිදැක්වීමට දින දෙකකට පෙර, එනම් පසුගිය 01 දා ඇය කටුනායක ගුවන්තොටුපලින් උදෑසන 9ට ගුවන් ගත වූ එමිරේට්ස් ගුවන් යානයකින් පිටවී ඩුබායි වෙත ගොස් තිබේ.

ඊට ප්‍රථම ඇයගේ සැමියාවන තිරු නඩේසන් රටින් පිටවී ඇත. (03) ගවේෂණාත්මක මාධ්‍යව්දීන්ගේ ජාත්‍යන්තර සාමූහිකය (ICIJ) විසින් එලි දක්වන ලද ලෝක දේශපාලකයින්ගේ දූෂණ පිළිබඳ “පැන්ඩෝරා පත්‍රිකා“ මගින් නිරූපමා රාජපක්ෂ සහ ඇයගේ සැමියා තිරු නඩේසන් රහසිගත සමාගමක් භාවිත කරමින් ලන්ඩනයේ සහ ඔස්ට්‍රේලියාවේ සිඩ්නි නුවර සුඛෝපභෝගී මහල් නිවාස සහ දේපළ මිලදී ගැනීමේ ව්‍යාපාරයක් පවත්වාගෙන ගොස් ඇති බව අනාවරණය කළේය.

තිරු නඩේසන් විසින් තවත් රහස් සමාගම් කිහිපයක් හරහා අකර්ෂණීය උපදේශන සේවා සැපයීමේ කොන්ත්‍රාත් ලබා ගැනීමට සහ විශිෂ්ඨ ගණයේ කලා නිර්මාණ මිලදී ගැනීමේ ව්‍යාපාරයක් පවත්වාගෙන ගිය බවටද පැන්ඩෝරා පේපර්ස් වාර්තාව විසින් එළිකරනු ලැබුවේය.

2018 වසරේදී මෙම සමාගම් අතරින් එකක් වන පැසිෆික් කොමොඩිටීස් සමාගම විසින් වටිනා සිතුවම් 31ක් සහ තවත් දකුණු ආසියාතික කලා නිර්මාණ ගණනාවක් ස්ටිව්සර්ලන්තයේ ජිනීවා හි අධි ආරක්ෂිත ගබඩාවක් වෙත කිසිදු බදු ගෙවීමකින් තොරව රැගෙන ගොස් ඇති බවද හෙළි කරන මෙම ගවේශකයන් 2011 වන විට නඩේසන් ගේ මෙම සමාගම් සතුව පැවැති වත්කම ඇමෙරිකානු ඩොලර් මිලියන 160කට අධික බව පෙන්වා දී තිබුණේය.

සැප්තැම්බර් 20 වනතුරු මේ හෙළිකීරීම්වලට අදාළ පැහැදිලි කිරීම් සඳහා චෝදනාවට ලක් වූවන්ට ඉඩකඩ ලැබී තිබේ.

(Lanka lead )

නිරූපමා රාජපක්ෂ සහ තිරු නඩේෂන් ළඟ ඇති බවට හෙළිදරව් වූ මුදල මෙරටින් හොරකම් කරගෙන ගිය මුදල් වලින් 10 % ක පමණ මුදල් ප්‍රමාණයක් පමණක් බව 43 සේනාංකයට අනුබද්ධ නීති ප්‍රතිසංස්කරණ ව්‍යාපාරය පවසයි.

එම සංවිධානය ඊයේ (05) පැවැත්වූ මාධ්‍ය හමුවේ අදහස් දැක්වූ නීතිඥ ශිරාල් ලක්තිලක සඳහන් කළේ , ණය ගෙවීම ඩොලර් බිලියන 7 ක් පමණ අවශ්‍ය වන බවය.

ශ්‍රී ලංකාවේ අපනයන ආදායම පහළ ගොස් තිබේ. කිරිපිටි, ගෑස් ආදී අත්‍යාවශ්‍ය භාණ්ඩ නැති වෙමින් යන්නේ රට සතු ඩොලර් හිඟය නිසා ය.

“මේ ඩොලර් තියෙන්නේ කා ගාවද? තීරු නඩේෂන් ගාව. නිරූපමා රාජපක්ෂ ගාව. ඔය එළි වුනේ එක පොඩ්ඩයි. කීප දෙනෙක් විතරයි. ඔය අපේ රටෙන් හොරකම් කරගෙන ගියපු මුදල් වලින් මම කියන්නේ ඒක 10% ක වගේ ප්‍රමාණයක්. හැබැයි ඉතුරු තව 90% ක් මේ වැනි ඩොලර් සංචිත ලංකාවෙන් කොල්ල කාගෙන ගියපු දේශපාලඥයන් විසින් හොර සල්ලි කළු සල්ලි හැටියට තැන්පත් කරලා තියෙනවා.”

සිංගප්පූරු නීතියට අනුව යම් විදිහකින් යම් පුද්ගලයෙක් අක් වෙරළ සමාගමක් සමග ගනුදෙනු කරද්දී ඒ පුද්ගලයා යම් රටක දේශපාලන පවුලකට සම්බන්ධ පුද්ගලයෙක් නම් ඒ පුද්ගලයා සම්බන්ධයෙන් සිංගප්පූරු රජයට වාර්තා කිරීමේ වගකීමක් ඒ අක් වෙරළ සමාගමට තිබේ. තිරු නඩේෂන් කියන මහතා ඇසට් නම් අක් වෙරළ සමාගම සමග ගනුදෙනු කොට ඇති නමුත් තිරු නඩේෂන් මහතා, රාජපක්ෂ පවුලත් සමග සම්බන්ධ බවට එකී අක් වෙරළ සමාගම දැන සිටි නමුත්, ඒ පිළිබඳව, සිංගප්පූරු රජයට වාර්තා කොට නොමැත. ඒ අනුව එය සිංගප්පූරු රජය ඉදිරියේ කරන ලද, නීතිය ඉදිරියේ කරන ලද වරදකි.

දෙවැනි කරුණ වන්නේ තිරු කුමාර නඩේෂන්ට විරුද්ධවම නීතිපතිවරයා විසින් අධිචෝදනා යොමු කරමින් වර්ෂ 2017 දී ගම්පහ අධිකරණයේ නඩුවක් පවරා තිබේ. ඒ අනුව චුදිතයෙක් හැටියට සිටින පුද්ගලයෙක් සමහ අක් වෙරළ සමාගමට ගනුදෙනු කළ නොහැක. නමුත් අදාළ ඒෂියා සිටි නම් සමාගම මේ සම්බන්ධයෙන් සිංගප්පූරු රජයට දැන්වීමක් සිදු කොට නොමැති අතර එය නීති විරෝධී කාර්යයකි.

“නිරූපමා රාජපක්ෂ මහත්මිය චලාම් ඔයිල් එන්ටර්ප්‍රයිසස් සහ රොසෙට්කි කියන ඉතාලිය අක්වෙරළ සමාගම් සමග ගනුදෙනු කරලා තියෙනවා. ඒ වගේම තිරු නඩේෂන් මහත්මයා අක් වෙරළ සමාගම් 21 ක් සමග ගනුදෙනු කරලා තියෙනවා. දැන් මේ වෙබ් අඩවිය සඳහන් කරන විදිහට තව පුද්ගලයෝ දෙන්නෙක් මේ අක්වෙරළ සමාගම් එක්ක ගනුදෙනු කරලා තියෙනවා. එක්කෙනෙක් තමයි තිරකුමාර් අයංකා නඩේෂන් අනිත් පුද්ගලයා සනාරා නිරන්ත රාජපක්ෂ නඩේෂන් එතකොට පුද්ගලයන් හතර දෙනෙක් මේ අක්වෙරළ සමාගම් 11 ක් එක්ක ඩොලර් මිලියන 160 ක ගනුදෙනුව කරලා තියෙනවා. මේක බරපතලයි. එතකොට මේ හතර දෙනාම ශ්‍රී ලාංකික පුරවැසියන්.”

මේ පුද්ගලයන් සම්බන්ධයෙන් පරීක්ෂණ පැවැත්වීමේ වගකීමක් අල්ලස් හෝ දූෂණ කොමිසමට තිබේ. එමෙන්ම අල්ලස් හෝ දූෂණ කොමිසම විසින් වත්කම් ප්‍රකාශ කිරීමේ නඩුවක් නැතහොත් විමර්ශනයක් පවත්වන්නට අමතරව දූෂණ සිදුකිරීම පිළිබඳව සාක්ෂි විමර්ශනය කිරීම කළ යුතුය. ඩොලර් මිලියන 160ක් යනු විශාල මුදලකි. ඒ සියලු මුදල අයිති ශ්‍රී ලාංකික පුරවැසියන්ට ය. ඒ මුදල් වංචා කොට ඇත්නම් ඒ මුදල නැවත අප වෙත ලබා ගත යුතුය.

“අපි රජයට කියනවා වහාම මේ සම්බන්ධයෙන් පියවරක් ගන්න. ඒ වගේම අපි රජයට කියනවා මේ පුද්ගලයන් වහාම ලංකාවේ පවතින නීතිය යටතේ අත්අඩංගුවට ගන්න කියලා. ඇත්ත වශයෙන්ම මේ සිදුවෙලා තියෙන වංචාකාරී ගනුදෙනු ජාත්‍යන්තර මට්ටමෙන් සිදුවෙලා තියෙන්නේ. ඔවුන් මුදල් විතරක් නෙවෙයි හොරකම් කරලා තියෙන්නේ. මේ වාර්තා වල තියෙන විදිහට ජාත්‍යන්තර වශයෙන් වටිනා කියන ශ්‍රී ලාංකික චිත්‍ර 31 ක් මේ ගනුදෙනුවල තියෙනවා. ඔවුන් ස්විට්සර්ලන්තයේ චිත්‍ර සංරක්ෂිත තත්වයේ පවත්වාගෙන යා හැකි ගබඩාවක් තුළ තැන්පත් කරලා තියෙන්නේ. තිරුකුමාර නඩේෂන්ලගේ, ඔවුන්ගේ සහචරයොන්ගේ ගිණුම් ඇතුලේ මේ ඩොලර්, ඕන තරම් තියෙනවා. අපිට ඩොලර් නැතුව, අපි කන්න බොන්න නැතුව, අද බංකොලොත් ජාතියක් බවට පත්වෙනවා. ඒ නිසා, නීති ප්‍රතිසංස්කරණ ජාතික ව්‍යාපාරය හැටියට, අපිට අවශ්‍යතාවයක් තියෙනවා වහාම මේ නීති ප්‍රතිසංස්කරණය කරන්න. විශේෂයෙන්ම වත්කම් හා වගකීම් ප්‍රකාශ කිරීමේ පනත, වහාම නීතිය ඉදිරියේ සංශෝධනයට ලක්විය යුතුයි.

කෝටි 3200 ක් මේ රටේ අහිංසක මිනිස්සුන්ගේ සල්ලි කොල්ල කාලා - නීතීඥ ගුණරත්න වන්නිනායක

මෙහිදී අදහස් දැක්වූ නීතීඥ ගුණරත්න වන්නිනායක මෙසේ සඳහන් කළේය.

“ලංකා දේශපාලන ඉතිහාසයේ හොඳ හෙළිදරව්වක් වෙලා තිබෙනවා. මේ රටේ ජනයාගේ, මිනිසුන්ගේ, සල්ලි කොල්ල කාපු ආකාරයකින් හෙළිවෙමින් පවතිනවා. දැනට එක හෙළිදරව්වක් වෙලා තියෙනවා, දේශපාලන පවුල්වල සාමාජිකයන්ට, ඒ අනුව මේ රටේ අහිංසක මිනිස්සුන්ගේ කොල්ල කාලා තියෙන ධනයේ වටිනාකම මේ සමාජයට හිතාගන්න බෑ.

කෝටි 3200 ක් මේ රටේ අහිංසක මිනිස්සුන්ගේ සල්ලි කොල්ල කාලා තිබෙනවා. ඒ නිසා දැන් මේ ආණ්ඩුවට යන එන මං නැති වෙන තත්වෙට උද්ගත වෙලා තියෙනවා.”

මේ සම්බන්ධයෙන් පරීක්ෂණ කළ යුතු අතර, අල්ලස් කොමිසම ජනතාව වෙනුවෙන් වැඩ කරන ආයතනයක් නම් ඔවුන් මේ සම්බන්ධයෙන් වහාම ක්‍රියාත්මක විය යුතු බව ද නීතිඥ වන්නිනායක අවධාරණය කළේය.

“එහෙම නැත්නම් අපි විශ්වාස කරන්නෑ මේ ආණ්ඩුව මේ සම්බන්ධයෙන් පරීක්ෂණ කරයි කියලා. ඒ නිසා අපි උත්සාහ කරනවා තව අවුරුදු දෙකකින් මේ ආණ්ඩුව නියත වශයෙන් ගෙදර ගියාම පසුව නැවත එළඹෙන ආණ්ඩුවක් තුළ මේවා ප්‍රශ්න කරන්න. ඒ නිසා තමුන්නාන්සේලා විශ්වාස කරන විදිහට මේ රටේ ධනය කොල්ල කාපු සියලු දෙනා මේ එක්කෙනෙක් දෙන්නෙක් පමණයි. විශාල චෞර වළල්ලක බද්ධ වෙලා තිබෙන මෙහෙ පරම්පරාවේ කොල්ලකරුවන් තව කොපමණ ප්‍රමාණ්‍යක් රටේ ධනය කොල්ල කා ඇද්ද යන්න අපිට ප්‍රශ්න කළ යුතුව තිබෙනවා.”

මේ රජය මෙය යට ගැසීමට කොතරම් උත්සාහ කළ ද මේ සිදුවීම මේ වන විට ලෝකය පුරා ගොස් අවසන් ය. ඒ අනුව දැන් මෙය වසා දැමීමේ හැකියාවක් ආණ්ඩුවට නොමැත.

“ඒ නිසා මේ ආණ්ඩුව මේ සම්බන්ධයෙන් ක්‍රියාත්මක නොවෙනවා නම් ඉදිරි දේශපාලනය තව වසර දෙකකින් මේ කොල්ලකරුවන්ට දඬුවම් දෙන්න අපි නායකයෙක් හදන්න ඕනේ. ඒ නායකයා මේ නිකන් නම් පචන් නායකයෙක් නෙමෙයි. මේ රටේ බුද්ධියක් තිබෙන ඥාන ශක්තියක් තිබෙන පුරුෂ ශක්තියක් තිබෙන නායකයෙක් අපි ගොඩනගන්න ඕන. ඒ නිසා ඒ සඳහා මේ වන විටත් සාකච්ඡා පවත්වනවා.”

මේ රටේ සමස්ත ජනතාව දැන් තේරුම් ගත යුතු කරුණක් තිබේ. එනම්, සාම්ප්‍රදායික දේශපාලනඥයන්ට ඥාන මණ්ඩල දරිද්‍රතාවයෙන් පෙළෙන නායකයන්ට මේ කාර්යය කිරීමට නොහැකි බවය. ඒ අනුව නැවත මේ රටේ ඉතිහාසය වෙනස් කරමින් නැවත ඊළඟට පත්වන ආණ්ඩුවේ බුද්ධියෙන්, දැනුමෙන් සන්නද්ධ නායකයෙක් සහ කණ්ඩායමක් ගොඩනගන්න මේ රටේ සමස්ත ජනතාවම ඒකරාශී විය යුතුය යන්න තමන් විශ්වාස කරන බව ද හෙතෙම සඳහන් කළේය.

“සාම්ප්‍රදායික දේශපාලනය තුළ පක්ෂ පාට නැත්තං තමන්ට ගැති භාවයෙන් කටයුතු කරන පුද්ගලයන්ට මේ සමාජයේ කොල්ලකරුවන්ට දඬුවම් දීමේ හැකියාවක් ඉතිහාසය විසින් ඔප්පු කරලත් නෑ. අපි විශ්වාස කරනවා වර්තමානයද එවන් තත්වයක් කටයුතු නොකරයි කියලා. ඒ නිසා මේ රටේ සමස්ත ජනතාව දැන් තේරුම් අරන් තිබෙනවා. මේ රටේ මේ කොල්ලකරුවන්ට දඬුවම් දෙන්න. එවන් ඍජු නයකයෙක් සහ කණ්ඩායමක් බිහිවිය යුතුයි.”

එහෙයින් මේ රටේ සකලවිධ දේශපාලන බලයක් ඒකරාශී කොට ගනිමින් මේ අපරාධකරුවන්ට දඬුවම් දීමේ වගකීම මේ රටේ සමාජයේ දෙවුර මත තිබෙන බව ද නීතිඥ ගුණරත්න වන්නිනායක අවධාරණය කළේය.

නිරූපමා රාජපක්ෂ ලංකාවේ ඇතුලේ කරපු එක ව්‍යාපාරයක් තියෙනවනම් කියන්න - හිටපු පළාත් සභා මන්ත්‍රී නිශාන්ත ශ්‍රී වවර්ණසිංහ !

නිරූපමා රාජපක්ෂ මහත්මියට එල්ල වී ඇති පැන්ඩෝරා චෝදනාව සම්බන්ධයෙන් ආණ්ඩුවේ සිටින රාජපක්ෂ රෙජිමයේ කිසිම සාමාජිකයෙක් මෙතෙක් කිසිදු ප්‍රකාශයක් සිදු කොට නොමැති බව මේ මාධ්‍ය හමුවට එක් වූ හිටපු පළාත් සභා මන්ත්‍රී නිශාන්ත ශ්‍රී වර්ණසිංහ පෙන්වා දුන්නේය.

“රටට ඩොලර් නෑ. කිරිපිටි ටික ගේන්න විදිහක් නෑ. කිරිපිටි නැතුව පෝලිම් වල ජනතාව රස්තියාදු වෙනවා. හඩා වැටෙනවා තමන්ගේ දරුවන්ට කිරි ටිකක් දෙන්න විදිහක් නෑ කියලා. ඒ වගේම ගෙවල් වල උයන්න පිහන්න අවශ්‍ය කරන ගෑස් ටික නෑ. තෙල් ටික ගේන්න සල්ලි නෑ. ඒ වගේම තමයි ගෑස් ටික ගේන්න සල්ලි නෑ. අත්‍යාවශ්‍ය භාණ්ඩ ගෙන්න සල්ලි නෑ. ආනයන ආනයන සීමා කරලා තියෙනවා තහනම් කරලා තියෙනවා වාහන ගේන එක නතර කරලා තියෙනවා. එහෙනම් අපි අහන්නේ මේ ඩොලර් මිලියන 160 ක් මෙතන තියෙනවා.”

“නිරූපමා රාජපක්ෂ ලංකාවේ ඇතුලේ කරපු එක ව්‍යාපාරයක් තියෙනවනම් කියන්න. මොනවද කරපු ව්‍යාපාර? මොකක් හරි නිෂ්පාදනයක් මේ රට ඇතුලේ කරලා තියෙනවද? සිල්ලර කඩයක් කරගෙන ගිහිල්ලා තියෙනවද? එහෙම නැත්නම් මොනවා හරි මේ රටේ නිෂ්පාදන ආර්ථිකයට, ජාතික ආර්ථිකයට යම්කිසි දායකත්වයක් ලබාදෙන දෙයක් කරලා තියෙනවද? එහෙනම් කොහොමද මේ මුදල් උපයා ගත්තේ? ඒකයි අද තියෙන ප්‍රශ්නෙ. මේ මුදල් කොහොමද උපයාගත්තේ කියන එක අද කියන්න ඕනේ මේ රටට.

“මෙන්න මේ ආකාරයට මේ රටේ සාරය උරා බීලා, මේ රටේ ජාතික ධනය කොල්ල කාලා අයුතු විදියට මුදල් උපයගෙන මේවා ගෙනිහිල්ලා පිටරටවල් වල විවිධ තැන්වල තැන්පත් කරලා තියෙනවා. ලෝකයේ පිළිනොගත් ඇතැම් රාජ්‍යයන් ඇතුලේ එහෙම නැත්නම් මේ රහස් යභාවය රකිනවාය කියන විවිධ රාජ්‍යයන් අර්ධ රාජ්‍යයන් ඇතුළේ මේ විදිහට මේ මුදල් තැන්පත් කරලා පවත්වාගෙන යනවා. මේ මුදල් වලින් කොටසක් රට ඇතුලට ගන්න පුළුවන් නම් දැන් පහුගිය දවස් වල ඔය මුදල් විශුද්ධිකරණයට අදාළව ගෙනාවා පනතක්.

“මෙවැනි හෙළිදරව් කිරීම් පසුගිය කාලේ මේ රටේ ඉන්න බහුජන සංවිධාන, සිවිල් සංවිධාන, දූෂණ විරෝධී සංවිධාන කිව්වම ඒ සියල්ල නොසලකා හැරියා. එහෙම නැත්නම් ඒවට හිනා වුණා. ඒවා හෑල්ලුවට ලක් කරා. ඒවා පට්ටපල් බොරු කියලා කිව්වා. දැන් මේක හෙළිදරව් කරලා තියෙනවා. ඒ නිසා අපි කියනවා පුලුවන්නම් වහාම මේ සම්බන්ධයෙන් ජනාධිපතිවරයාගේ ස්ථාවරය කියන්න. අගමැති මහින්ද රාජපක්ෂ මැතිතුමාගේ ස්ථාවරය කියන්න ඒ වගේම අපි කියනවා මුදල් ඇමතිතුමා අර විශ්වකර්මයා කියලා කිව්වේ මේ රටේ ආර්ථිකය ගොඩ දාන්න පුළුවන්, මේ රටේ ආර්ථිකය හදන්න පුළුවන් වැඩ කරපු විදියට කිව්වේ මොළ හතක් තියෙනවයි කිව්වේ අන්න ඒ බැසිල් රාජපක්ෂට අපි කියනවා මේ සම්බන්ධයෙන් කරුණාකරලා තමන්ගේ ස්ථාවරය ඇවිල්ලා කියන්න. තමන්ගේ මේ ඥාති නැන්දණීය ගේ මේ ගනුදෙනුව පිළිබඳව අපේ තරුණ ඇමතිතුමාගෙන් ඉල්ලා සිටිනවා. දැන් මොකද කියන්නේ? මේකත් බොරුද? මේ ජාත්‍යන්තර පර්යේෂණාත්මක මාධ්‍යවේදීන්ගේ සම්මේලනය කරලා තියෙන මේ හෙළිදරව්වක් තව බොරුවක්. අද මුළු ලෝකයම මේ ගැන සාකච්ඡා වෙනවා. ඒක නිසා ලංකාව චෞර වළල්ලකට හසු වෙච්ච චෞරයන්ගේ රාජ්‍යයක් කියන එක ජාත්‍යන්තර වශයෙන් තහවුරු වෙමින් තියෙනවා. අනාගතයේදී මේ රටේ ජාතික ධනය කොල්ලකාපු හොරාකාපු මේ සහගහන අපරාධ කරපු මේ සියලු දෙනාට එරෙහිව අනාගතයේදී ජනතා අධිකරණයක් ඉදිරියේ මේ සියලු දෙනාම වගඋත්තරකරුවෝ බවට පත්වෙනවා”

මේ වනවිට ඉන්දියාව ඇතුළු ලොව පුරා රටවල් රැසක අතිශය ජනප්‍රියත්වයට පත් ව සිටින නව පරපුරේ ගායිකා යොහානි ද සිල්වා ශ්‍රී ලංකාවේ සංචාරක කර්මාන්තය ප්‍රවර්ධනය කිරීම සදහා වන සන්නාම තානාපතිවරියක ලෙස පත් කිරීමට සංචාරක අමාත්‍යාංශය පියවර ගෙන තිබේ.

සන්නාම තානාපතිවරියක ලෙස ගිවිසුම්ගත වීමට ගායික යොහානි ද සිල්වා එකගත්වය පළ කර ඇති අතර මේ සම්බන්ධයෙන් අදාළ අනුමැති ලබා ගැනීමට අමාත්‍ය මණ්ඩලයට කැබිනට් පත්‍රිකාවක්ද යොමු කර ඇත.

මෙරට සංචාරක කර්මාන්තය ප්‍රවර්ධනය කිරීම සදහා වන සන්නාම තානාපතිවරියක් වශයෙන් ඇය පළමුවෙන්ම ඩුබායි හි ආරම්භ වී ඇති ‘වර්ල්ඩ් එක්සපෝ-2020’ ප්‍රදර්ශනයේ සමාගමී අංගයක් වන ගෝල්බල් ෆෙස්ටිවල් හී ශ්‍රී ලංකාව නියෝජනය කරමින් ”ශ්‍රී ලංකා සංචාරක ගීතය” ලබන ජනවාරි 03 වැනිදා එළි දක්වන බවද එම අමාත්‍යාංශය සඳහන් කරයි.

තවද එම ශ්‍රී ලංකා ජාතික දින සැමරුම් විශේෂාංගයේ කොටසක් ලෙස යොහානි සමග සංස්තෘතික විවිධ ප්‍රසංගයක්ද ඩුබායි එක්ස්පෝ හීදී පැවත්වන බව සංචාරක අමාත්‍යාංශය කියා සිටී.

මෙම ශ්‍රී ලංකා සංචාරක ප්‍රවර්ධනය වෙනුවෙන් යොහනී කළ එම ගීත නිර්මාණය වෙනුවෙන් රුපියල් ලක්ෂ 50ක මුදලක් ප්‍රදානය කිරීමටද නියමිත බවද පැවසේ.

තවද යොහානි විසින් පද රචනය කර ගායනා කරන ශ්‍රී ලංකාවේ සුන්දරත්වය ඉස්මතු කරන සංගීත රූප රචනාවක්ද ඉදිරියේදී සංචාරක ප්‍රවර්ධනය වෙනුවෙන් එළි දැක්වීමට නියමිතව ඇත.

යොහානි ද සිල්වා ”මැණිකේ මගේ හිතේ” ගීතය ප්‍රතිගායනා කරමින් නිකුත් කළ වීඩියෝව මේ වන යූ ටියුබ් ඔස්සේ කෝටි 14ක පිරිසක් නරඹා තිබේ.

ලොව පුරා මහත් ආන්දෝලනයක් ඇතිකරමින් ‘පැනඩෝරා පේපර්ස් " හෙළිදරව් කරන ලද වාර්තාවල සිටින ශ්‍රී ලාංකිකයන්ගේ ගනුදෙනු ගැන වහා පරීක්ෂණයක් පවත්වන්නැයි ජනාධිපති ගෝඨාභය රාජපක්ෂ දැනුම් දී තිබේ.

අද උදෑසන (06) අල්ලස් හෝ දූෂණ කොමිෂන් සභාවට ජනාධිපතිවරයා විසින් මෙම නියෝගයක් කර ඇති බව ජනාධිපති මාධ්‍ය ප්‍රකාශක කිංස්ලි රත්නායක පවසයි.

එසේම අද පැවති කැබිනට් මාධ්‍ය හමුවේ දී කැබිනට් ප්‍රකාශක ඇමැති ඩලස් අලහප්පෙරුම සඳහන් කළේ අදාළ පරීක්ෂණ වාර්තාව මාසයක් ඇතුළත ලබා දෙන ලෙසද ජනාධිපතිවරයා නියෝග කර ඇති බවයි.

අපි අහිංසකයි : නිරූපමාගේ සැමියා ජනාධිපතිට ලියයි !

මේ අතර හිටපු නියෝජ්‍ය අමාත්‍යවරිය වන නිරූපමා රාජපක්ෂ ගේ සැමියා වන ටී. නඩේෂන් විසින් ජනාධිපති වෙත යොමුකළ ලිපියක් මාධ්‍ය වෙත නිකුත්කර ඇත.

එහිදී ඔහු සඳහන් කර ඇත්තේ රහසිගත වත්කම් පිළිබඳ ජාත්‍යන්තර මාධ්‍ය කණ්ඩායමක් විසින් හෙළිදරව් කළ ආන්දෝලනාත්මක පැන්ඩෝරා පත්‍රිකාවන්හි නම් සඳහන් තමා සහ ඔහුගේ බිරිඳ සම්පූර්ණයෙන්ම අහිංසක බවත් එල්ලවන කිසිදු චෝදනාවකට වැරදිකරු නොවන බවයි.

මෙම චෝදනා විමර්ශනය කිරීම සඳහා ස්වාධීන විමර්ශකයෙකු පත් කරන ලෙසත් එමගින් ඔහු ඉල්ලා ඇත.

සමාජ මාධ්‍ය වෙබ් අඩවි වල පළවූ එම ලිපිය පහත දැක්වෙයි.

රසායනික පොහොර ගෙන්වීමට අවසර දිය යුතුද නැද්ද යන්න ගැන ආණ්ඩුවේ මන්ත‍්‍රී කණ්ඩායම අතර රහස් ඡුන්දයක් පවත්වන්නැයි සමගි ජන බලවේගයේ මාධ්‍ය ප‍්‍රකාශක පාර්ලිමේන්තු මන්ත‍්‍රී මනුෂ නානායක්කාර ආණ්ඩුවට අභියෝග කළේය.

රහස් ඡන්දයක් තිබුවහොත් රසායනික පොහොර ගෙන්වීමට තුනෙන් දෙකක කැමැත්තක් හිමිවන බවද මන්ත‍්‍රීවරයා සදහන් කළේය.

වැඩිදුරටත් අදහස් දැක්වූ මන්ත‍්‍රීවරයා මෙසේද කීවේය.

පොහොර ප‍්‍රශ්ණය නිසා ගොවියා අසරණ වෙලා. කන්න බොන්න බැරි තත්වයකට ඔවුන් ඇදගෙන වැටෙනවා. රටේ ආර්ථිකය කඩාගෙන වැටෙනවා. ඵලදායිතාවය වැටෙනවා.

පොහොර අවශ්‍යද නැද්ද කියලා ආණ්ඩුවේ මන්ත‍්‍රීවරු අතරේ රහස් ඡුන්දයක් තියන්න කියලා මම ආණ්ඩුවට අභියෝග කරනවා. පොහොර අවශ්‍ය යැයි කියලා තුනෙන් දෙකකින් දිනනවා.

පොහොර තහනම නිසා ආණ්ඩුවේ මන්ත‍්‍රීවරුන්ටත් ගෙදර යන්න බැරිව ඉන්නේ. ගමට යන්න බැරිව ඉන්නේ. ඒ නිසා ආණ්්ඩුවට රහස් ඡුන්දයක් තියලා විමසන්න කියලා අපි කියනවා

සිසුන් 200 ට අඩු පාසල්වල ප්‍රාථමික අංශ ලබන 21 වැනිදා සිට ආරම්භ කිරීමට තීරණය කර තිබේ.

අධ්‍යාපන අමාත්‍ය දිනේෂ් ගුණවර්ධන පැවසුවේ, සෞඛ්‍ය රෙගුලාසි හා පාසල් සෞඛ්‍ය මාර්ගෝපදේශ මත පළමු අදියරේදී පාසල් 3,000 ක් විවෘත කරන බවයි.

පළාත් සභා යටතේ පාලනය වන සියලු පාසල් එළඹෙන 21වන දා සිට යළි ආරම්භ කිරීමට සූම් තාක්ෂණය ඔස්සේ අද (05) පෙරවරුවේ පැවැති පළාත් ආණ්ඩුකාර සංසදයේ විශේෂ සාකච්ඡාවකදී තීරණය කෙරුණු බව මධ්‍යම පළාත් ආණ්ඩුකාර නිතිඥ ලලිත් යු ගමගේ පැවසිය.

සෞඛ්‍ය සේවා අධ්‍යක්ෂ ජනරාල්වරයා තවත් කොරෝනා මරණ 40 ක් අද (05) වාර්තා කිරීමත් සමග මෙරට සමස්ත කොරෝනා මරණ සංඛ්‍යාව 13,142 ක් දක්වා ඉහළගොස් ඇත.

මියගිය පිරිස අතරින් 22 දෙනෙකු පිරිමි පුද්ගලයින් වන අතර ඉතිරි 18 දෙනා කාන්තාවන්  බවත්, රජයේ ප්‍රවෘත්ති දෙපාර්තමේන්තුව නිකුත් කළ නිවේදනයේ සදහන් වේ.

ඊට අමතරව අවුරුදු 30 – 59 ත් අතර වයසේ පසුවන ආසාදිතයින්‍ 04 දෙනෙකු සිටින අතර ඉතිරි ආසාදිතයින් 36 දෙනා ම වයස අවුරුදු 60 සහ එම වයස් සීමාව ඉක්ම වූ වැඩිහිටියන් ය.

අද (05) වාර්තා කරන ලද මෙම මරණ 40 සෞඛ්‍ය සේවා අධ්‍යක්ෂ ජනරාල්වරයා විසින් තහවුරු කරනු ලැබ ඇත්තේ, ඊයේ දිනයි.

මේ අතර අද දිනයේ මේ දක්වා නව කොරෝනා ආසාදිතයින් 563 දෙනෙකු හඳුනාගෙන තිබේ.

රජයේ නිල ක්ලවුඩ් දත්ත පද්ධතියේ ගබඩා කර තිබූ ජාතික ඖෂධ නියාමන අධිකාරියේ මැකුණු දත්ත යළි ලබා ගැනීම සම්බන්ධයෙන් ක්‍රයාත්මක වන කමිටුවේ සිටින්නේ කවු ද? මේ පිළිබඳව රටට විශ්වාසයක් ගොඩ නැගිය හැක්කේ, එහි සාමාජිකයන් ගැන දැන ගත හොත් පමණි.

ඒ පිළිබඳව අප ඖෂධ නිෂ්පාදන නියාමන රාජ්‍ය අමාත්‍යාංශයේ ලේකම් වෛද්‍ය සමන් රත්නායකගෙන් විමසීමක් කළේ ය.

කෙසේ‌ වෙතත් අමාත්‍යංශ ලේකම්වරය සඳහන් කරන්නේ, කමිටුවට ඉතාම සාධාරණව, බලපෑම්වලින් තොරව කටයුතු කරගෙන යාම අවශ්‍ය බැවින් කමිටු සාමාජිකයින් කවුරුන්ද යන්න පිළිබඳව හෙළි නොකරන බවයි.

එපික් ආයනය විසින් අදාළ කමිටුවේ අධීක්ෂණය මත දත්ත ප්‍රතිෂ්ඨාපනය කිරීමේ කටයුතු සිදු කරන බව අමාත්‍යංශ ලේකම්වරයා වැඩිදුරත් සඳහන් කළේ ය.

”මේ වෙනකොට දත්ත මැකී යාම සම්බන්ධයෙන් අපිට ලබාදීල තියෙන පිටපත අපි NMRA එකට ගෙනල්ලා, ඩේටා රිකවර් කරන්න කටයුතු කරනවා. කමිටුවේ අධීකෂණය මත එපික් ආයතනයට තමයි ප්‍රතිෂ්ඨාපනය කිරීමේ බලතල දීල තියෙන්නෙ, මොකද එපික් ආයතනය තමයි රිකවර් කරන්නේ. පහසුකම් ඕන වුණොත්, ICTA එකෙන්. අධීක්ෂණයට කොළඹ විශ්වවිද්‍යාලය හා කටුබැද්ද විශ්වවිද්‍යාලයෙනුත් කණ්ඩායමක් පත් කරලා තියෙනවා. NMRA සෞඛ්‍ය අමාත්‍යංශයේ එක්කෙනා බැගින් ඉන්නවා. කමිටුවට බලපෑමක් නැතිව ඉතාම සාධාරණව කටුයුතු කරගෙන යන්න ඒ පරිසරය හදලා තියෙන්නේ. එපික් ආයතනය කියන විදිහට මේ දත්ත ඉක්මනින් ප්‍රතිෂ්ඨාපනය කර ගන්න පුළුවන් වෙයි. අපේ කමිටුව පත් කරල තියෙන්නේ ඒ අයට ඉතාම සාධාරණව බලපෑම්වලින් තොරව සාධාරණව කරගෙන යන්න තමයි අපි කමිටුව හෙළිදරව් නොකරන්නේ”

( news 1st )

දූරදර්ශිව හා අපක්ෂපාතීව කටයුතු කර රටේ ජාතික ආරක්ෂව තහවුරු කිරීමට ක්‍රියාකරන ලෙස ඉල්ලා ජාතික විද්වත් සංඝ සභාව විසින් පොලිස්පති වෙත පැමිණිල්ලක් සිදුකර ඇත.

ජාතික විද්වත් සංඝ සභාව වෙනුවෙන් එහි ලේකම් හැඩිගල්ලෙ විමලසාර හිමි ලිඛිතව පොලිස්පති වෙත මෙකී පැමිණිල්ල ලබාදී ඇති බවත් වාර්තා වෙයි.

පොලිස්පතිවරයාට සිදුකළ අදාළ පැමිණිල්ලේ මෙසේද සඳහන් වෙයි.

"මුතුරාජවෙල සහ කෙරවලපිටිය දේවස්ථාන වලට ප්‍රහාරයක් එල්ල විය හැකි බවට ඒකී දේවස්ථානවලට ගොස් නාවික හමුදා සෙබළුන් කරුණු දැක්වීමේ සිදුවීමද බරපතල සැක සංකා ජනිත කරන්නකි. මේ සිදුවීමෙන් පසු ආරක්ෂක ලේකම්වරයාගේ ප්‍රතිචාරය වූයේ නාවික සෙබළුන්ගේ එම කරුණු දැක්වීම පදනම් විරහිත බවය. ඒසේම පසුගිය දිනක පොලීසිය භාර අමාත්‍ය වරයා ප්‍රකාශ කළේ එය වනාහී 'ආරක්ෂක අභ්‍යාසයක්' බවයි. ජනතාව මරණ බියට ඇද දමමින් කරන්නාවූ ආරක්ෂක අභ්‍යාස ගැන අපි නම් අසා නැත්තෙමු. මේ සිදුවීම් සහ බලධාරීන් ඒවා කෙරෙහි දක්වන ප්‍රතිචාර වනාහී ඉතා අසාමාන්‍ය සහ පුදුමාකාර ඒවාය. ඒසේම පසුගිය දින කිහිපය තුළ ඇතැම් ආගමික සිද්ධස්ථාන වෙත ආරක්ෂක අංශ ගොස් අදාල සිද්ධස්ථානවලට ප්‍රහාර ඒල්ලවීමේ ඉඩ කඩක් ඇති බව ප්‍රකාශ කරඇත. මේ සිදුවීම පිළිබඳ අපට ඇත්තේ බලවත් කුතුහලයක් හා සැක සංකාවකි.

මෙබඳු වාතාවරණයක් තුළ රටේ ජාතික ආරක්ෂව පිළබඳව ප්‍රශ්න නගන සමාජ ක්‍රියාකාරිකයන් හා මහජන නියෝජිතයන් රහස් පොලීසියට කැඳවමින් ප්‍රශ්න කිරීම මගින් පෙනී යන්නේ කිසියම් බිය වැද්දීමකට හා අපහසුතාවකට ඔවුන් ලක්කීරී ම බව අපගේ හැඟීම්යි. ප්‍රශ්න කළයුත්තන්ගෙන් ප්‍රශ්න නොකර සිදුකරගෙන යන මෙම ක්‍රියාවලිය මගින් පෙනී යන්නේ මෙරට ජාතික ආරක්ෂාව මහත් අනතුරකට ලක්ව ඇති බවයි."

ජාතික විද්වත් සංඝ සභාව විසින් පොලිස්පති වෙත යොමුකළ පැමිණිල්ල පහත දැක්වෙයි.

පොලිස්පතිතුමා, පොලිස් මූලස්ථානය කොළඹ 01.

පොලිස්පතිතුමනි,

ජාතික ආරක්ෂාව තහවුරු කිරීම සම්බන්ධවයි.

රාජ්‍යයක මුඛ්‍ය අරමුණ වන්නේ එහි වෙසෙන පුරවැසියන්ගේ ආරක්ෂාව සෑම අතින්ම තහවුරු කිරීමය. ජාතික ආරක්ෂාවට මේසා විශාල වැදගත්කමක් පවතින බැවින් ඒය සැළකෙනුයේ සියලු දේශපාලන න්‍යාය පත්‍රවලට ඉහළින් තැබිය යුතු මහජන අභිලාෂයක් ලෙසය. එනමුදු අද වන විට රටේ ජාතික ආරක්ෂාව ඉතා බියකරු ලෙස බිඳවැටෙමින් පවතින බවක් බැලූ බැල්ම ට පෙනෙනන්ට ඇති බැවින් සිවිල් ආරක්ෂාවට අදාල වගකීම් සහගත තනතුරක් හොබවන ජනරජයේ පොලිස්පතිවරයා වන ඔබතුමා වෙත මේ සංදේශය ඉදිරිපත් කිරිමට අපි අදහස් කළෙමු.

2018 අප්‍රෙල් 21 වන පාස්කු ඉරුදින අප රට තුළ සිවිල් ජනයා ඉලක්ක කරගනිමින් සිදු වූ ත්‍රස්තවාදී ප්‍රහාරයට වගකිව යුත්තන් නිසි පරිදි හඳුනා ගැනීමටත් ඔවුන් නීතිය හමුවට පැමිණවීමටත් රටක් ලෙස අපි අසාර්ථක වී ඇත්තෙමු. මේ ත්‍රස්තවාදී ක්‍රියාව ආගමික අන්තවාදී ක්‍රියාවක් බවත් එයට සහභාගී වූ ත්‍රස්තවාදීන් එම අන්තවාදී කටයුතුවල දිගු කලක් තිස්සේ නියුතු වෙමින් සිටි බවත් තව දුරටත් රහසක් නොවේ. එසේම ප්‍රහාරය එල්ල වූ ආකාරය සහ ප්‍රහාරයට සම්බන්ධ වූ සහරාන් ඇතුලු ත්‍රස්තවාදීන්ගේ අතීත සම්බන්ධතා ගැන විමසා බැලීමේදී සහ විමර්ශන කමිටු හමුවේ අනාවරණය වූ ඇතැම් කරුණු අනුව මෙකී ආගමික අන්තවාදය පසුපස අදෘෂ්‍යමාන හස්තයක්' තිබිය හැකි බවද අප සමාජයේ මේ වන විටත් තහවුරු වී ඇති මතයකි.

මෙබඳු පසු බිමක් තුළ පාස්කු ප්‍රහාරය වැනි ත්‍රස්ත ප්‍රහාර තවදුරටත් ඇතිවීමේ ඉඩකඩක් පවතින බවත් ඒ් සඳහා තමන්ට සාක්ෂි සාධක තිබෙන බව ද ප්‍රකට මාධ්‍ය මගින් කරුණු අනාවරණය කළ පුද්ගලයන්ගෙන් ඔබතුමා යටතේ පවතින් පොලිස් දෙපාර්තමෙන්තුව හෝ රටේ ආරක්ෂක අංශ මෙතෙක් කරුණු විමසීමක් නොකිරීම අපට මහත් ගැටළුවකි.

ත්‍රස්තවාදයෙන් හා ආගමික අන්තවාදයෙන් අප්‍රමාණව බැටකා ඇති අප රටට තවදුරටත් එබඳු ගැටුම් අවශ්‍ය නොවේ. එනමුත් බෞද්ධ කතෝලික ගැටුමක් නිර්මාණය කිරීමට පදනම සැකසෙන අයුරින් මෑතදී ඇතැම් සමාජ ක්‍රියාකාරිකයන් ප්‍රසිද්ධ මාධ්‍ය ඔස්සේ කරුණු දක්වන අයුරු අපි දුටුවෙමු.එනමුදු ඒබඳු වාතාවරණයක් වලක්වා ගැනීම සඳහා වගකිව යුතු බලධාරීන් ක්‍රියා කරන බවක් ද නොපෙනේ.

මෙබඳු පසු බිමක් තුළ නාරාහේන්පිට 'ලංකා හොස්පිට්ල්' රෝහල් පරිශ්‍රයේ සහ මීගමුව ජ්‍යෙෂ්ඨ පොලිස් අධිකාරී කාර්යාලයේ කුඩා අත්බෝම්බ හමුවීමේ සිදුවීම් පිටුපස ද සිටිනා වගකිව යුත්තන් කවුරුන්දැයි තවමත් සමාජයට අනවරණය වී නොමැත.

එසේම මුතුරාජවෙල සහ කෙරවලපිටිය දේවස්ථාන වලට ප්‍රහාරයක් එල්ල විය හැකි බවට ඒකී දේවස්ථානවලට ගොස් නාවික හමුදා සෙබළුන් කරුණු දැක්වීමේ සිදුවීමද බරපතල සැක සංකා ජනිත කරන්නකි. මේ සිදුවීමෙන් පසු ආරක්ෂක ලේකම්වරයාගේ ප්‍රතිචාරය වූයේ නාවික සෙබළුන්ගේ එම කරුණු දැක්වීම පදනම් විරහිත බවය. ඒසේම පසුගිය දිනක පොලීසිය භාර අමාත්‍ය වරයා ප්‍රකාශ කළේ එය වනාහී 'ආරක්ෂක අභ්‍යාසයක්' බවයි. ජනතාව මරණ බියට ඇද දමමින් කරන්නාවූ ආරක්ෂක අභ්‍යාස ගැන අපි නම් අසා නැත්තෙමු. මේ සිදුවීම් සහ බලධාරීන් ඒවා කෙරෙහි දක්වන ප්‍රතිචාර වනාහී ඉතා අසාමාන්‍ය සහ පුදුමාකාර ඒවාය. ඒසේම පසුගිය දින කිහිපය තුළ ඇතැම් ආගමික සිද්ධස්ථාන වෙත ආරක්ෂක අංශ ගොස් අදාල සිද්ධස්ථානවලට ප්‍රහාර ඒල්ලවීමේ ඉඩ කඩක් ඇති බව ප්‍රකාශ කරඇත. මේ සිදුවීම පිළිබඳ අපට ඇත්තේ බලවත් කුතුහලයක් හා සැක සංකාවකි. මෙබඳු වාතාවරණයක් තුළ රටේ ජාතික ආරක්ෂව පිළබඳව ප්‍රශ්න නගන සමාජ ක්‍රියාකාරිකයන් හා මහජන නියෝජිතයන් රහස් පොලීසියට කැඳවමින් ප්‍රශ්න කිරීම මගින් පෙනී යන්නේ කිසියම් බිය වැද්දීමකට හා අපහසුතාවකට ඔවුන් ලක්කීරී ම බව අපගේ හැඟීම්යි. ප්‍රශ්න කළයුත්තන්ගෙන් ප්‍රශ්න නොකර සිදුකරගෙන යන මෙම ක්‍රියාවලිය මගින් පෙනී යන්නේ මෙරට ජාතික ආරක්ෂාව මහත් අනතුරකට ලක්ව ඇති බවයි. රටේ සිවිල් ආරක්ෂාව සහ නීතිය හා සාමය සුරැකීමට වගකීමකින් බැඳී සිටින පොලිස්පතිවරයා වන ඔබ මේ මොහොතේ දූරදර්ශිව හා අපක්ෂපාතීව කටයුතු කර රටේ ජාතික ආරක්ෂව තහවුරු කිරීමට ක්‍රියාකරන ලෙස ඉල්ලා සිටිමු. තෙරුවන් සරණයි මෙයට

දර්ශනපති පූජ්‍ය හැඩිගල්ලේ විමලසාර හිමි

ලේකම්.

ඉදිකිරීම් අවසන් කර වසර 3කට ආසන්න කාලයක් ගතවී තිබියදී මේ දක්වා කිසිදු ප්‍රයෝජනයක් නොගත් නෙළුම් කුළුණ සම්බන්ධයෙන් මෙතෙක් හෙළි නොවූ තොරතුරු රැසක් කැබිනට් සංදේශයකින් අනාවරණය වී ඇත.

තාක්ෂණ ඇමතිවරයා ලෙස ගෝඨාභය රාජපක්ෂ ඉදිරිපත් කර තිබෙන කැබිනට් සංදේශයක මෙම කරුණු අඩංගු වේ. නෙළුම් කුළුණ ඉදි කිරීම සඳහා ලබා ගෙන තිබෙන ඉඩම වෙනුවෙන් රුපියල් කෝටි 1,161ක බදු කුලියක් වශයෙන් ගෙවීමට තිබේ. මෙම මුදල රුපියල් මිලියන 300ක වාර්ෂික ගෙවීමක් හැටියට ගෙවිය යුතු අතර මෙම බදු කුලිය සම්පූර්ණ වශයෙන් රුපියල් කෝටි 150ක් බව දැක්වේ. මෙම බදු කුලිය ගෙවීමෙන් පසුව අදාල බදු අනුපාතයන් වෙනස් වේ.

එසේම මෙම බදු ගිවිසුම් ඇතුළු නීතිමය කටයුතු සඳහා රුපියල් ලක්ෂ 3ක් වැය කර ඇත. බදු ගාස්තු රුපියල් 24,000ක් වශයෙන් දැක්වේ. මුද්දර ගාස්තු ලෙස 89,999,000 නාගරික සංවර්ධන අධිකාරිය විසින් විදුලි සංදේශන කොමිෂන් සභාවට ගෙවීමට ඇත.

මීට අමතරව, හම්බන්තොට තොරතුරු තාක්ෂණ උද්‍යානයේ ඉදිකිරීම් කටයුතු වෙනුවෙන් විශාල මුදලක් වැය කිරීමෙන් පසුව අතරමග නවතා දමා ඇති බව ද, අදාළ කැබිනට් පත්‍රිකාවෙන් හෙළිවේ. මෙම කැබිනට් පත්‍රිකාව නම්කර තිබෙන්නේ “නෙළුම් කුළුණ ව්‍යාපෘති සංකීර්ණය සඳහා ශ්‍රී ලංකා විදුලි සංදේශ නියාමන කොමිෂන් සභාව ( TRCSL) වෙත ඉඩම් අත්පත්කර ගැනීම” යනුවෙනි. එම කැබිනට් පත්‍රිකාවෙන් නෙළුම් කුළුණ සහ ඒ ආශ්‍රිතව පවතින මූල්‍යමය ගණුදෙනු රැසක් පිළිබඳව කරුණු ඇතුළත් කර තිබේ.

(Lanka truth )

ලෝකයේ ධනය සඟවන ලද පුද්ගලයන් සම්බන්ධයෙන් හෙලිදරවු කිරීමක් සිදු කර ඇති සිදු කර ඇති විමර්ශනාත්මක මාධ්‍යවේදීන්ගේ ජාත්‍යන්තර ජාලය (ICIJ) විසින් මෙරට හිටපු ඇමතිනි නිරූපමා රාජපක්ෂ සම්බන්ධයෙන් හෙලිදරවු කිරීමක් කර තිබිණි.

අදාල හෙලිදරවු කිරීමට පෙර ඒ සම්බන්ධයෙන් ඇයගෙන් විමසුවත් ඒ සදහා ප‍්‍රතිචාර නොදැක්වූ බවද ඔවුන් සදහන් කරයි.

එම සංවිධානය විසින් හිටපු ඇමතිනියට යොමු කර ඇති ප්‍රශ්න වල සිංහල පරිවර්ථනය මෙසේය.

1) අපි දැක ඇති ලියකියවිලි වලින් පෙන්නුම් කෙරෙන්නේ 1990 ගණන් වල මුල් භාගයේ සිට 2010 ගණන් වල මුල් භාගය දක්වා (ලංකාවේ ගැටුම් පැවති සමයේ) ඔබ රොසෙට් සමාගමේ “පාලන පක්ෂය” වූ අතර මෙම සමාගම උපදේශක ගාස්තු ලබා ගැනීම , සිඩ්නි සහ ලන්ඩන්හි දේපළ මිලදී ගැනීමට භාවිතා කරන ලදී. මේක හරිද? රොසෙට් හි ඔබේ භූමිකාව කුමක්ද?

2) ඔබ රටේ නීතියට අනුව ඔබ පාර්ලිමේන්තු මන්ත්රීවරයෙකු වලෙස පත් වූ විට රොසෙට්ටි හි ඔබේ අයිතිය ඔබ ප්‍රකාශ කළාද? ඔබ දේපල වල ඔබේ අයිතිය ප්‍රකාශ කළාද?

3) ඔබේ සමාගම කොන්ත්‍රාත්කරුවෙකු ලෙස බඳවා ගත් රජයේ ආයතනවලට රොසෙට්ටිගේ අයිතිය ඔබ හෙළි කළාද? එසේ නොකළේ නම් ඇයි?

4) අපි දුටු ලේඛන වලින් පෙන්නුම් කරන්නේ ඔබ ඩොලර් මිලියන 51 ක කලා එකතුවක් ඇති “පැසිෆික් භාරයේ” ප්‍රතිලාභියෙකු බවයි. මෙය නිවැරදිද? එසේ නම්, ඔබ රටේ නීතියට අනුව එසේ කිරීමට අවශ්‍ය නම් ඔබ බදු බලධාරීන්ට මෙය අනාවරණය කළාද?

5) ඔබේ සැමියා වන නඩේසන් විසින් පිහිටුවන ලද සමාගම් සහ භාරයන්, එනම් Sරි ණිති ඨෘස්ට්, ඵcඉෆිc ඨෘස්ට්, ඵcඉෆිc cඔම්මොඩිටීස්, ඵල්ලෙනෙ, ඡලන් Oඉල් අන්ඩ් ර්‍එඩ් ර්‍උත් ඓන්වෙස්ට්මෙන්ට්ස් තුළ ඔබේ භූමිකාව කුමක්ද?

6) 2014 සම්මුඛ සාකච්ඡාවකදී ඔබ පැවසුවේ “කාන්තාවන් වශයෙන් අපට පිරිමින්ට වඩා හොඳ ගුණාංග තිබෙන බවත් වඩාත් අවංක බවත් අල්ලස හා දූෂණයට ගොදුරු වීමේ අවදානම අඩු බවත්” ය. කරුණාකර ඔබට ඒ ගැන විස්තර කළ හැකිද?

(Lanka lead )

සුදුළූණු වංචාවක් සතොස ආයතනයේ සිදු වූ බව අවංකවම පිළිගන්නා බව වෙළෙඳ අමාත්‍ය බන්දුල ගුණවර්ධන සඳහන් කරයි.

එම ආයතනයේ වංචාවක් සිදු වූ පළමු හෝ අවසන් අවස්ථාව එය නොවන බවත් අමාත්‍යවරයා පවසයි.

වෙළෙඳ අමාත්‍ය බන්දුල ගුණවර්ධන මෙසේ සඳහන් කර සිටියේ විපක්ෂ නායක මතුකළ ප්‍රශ්නයකට ප්‍රතිචාර දක්වමින් ය.

සුදුළූණු වංචාව සම්බන්ධ ගනුදෙනුවේදී ටෙන්ඩර් ක්‍රියා පටිපාටියෙන් බැහැරව මිල ගණන් අයථා ලෙස ලබාගෙන ඇති බව මෙන්ම ඊට අදාළ තොරතුරු පාර්ලිමේන්තුවට ඉදිරිපත් කිරීමට බලාපොරොත්තු වන බවත් අමාත්‍යවරයා පැවසීය.

අදාළ මිලදී ගැනීම් පවා සිදුවී ඇත්තේ නිශ්චිත ක්‍රමවේදයෙන් බැහැරව බවත් අමාත්‍යවරයා වැඩිදුරටත් සඳහන් කර ඇත.

හිටපු අමාත්‍ය රිෂාඩ් බදියුදීන්  මේ මස 08වනදා තෙක් තවදුරටත් රක්ෂිත බන්ධනාගාරගත කර තිබේ.

ඒ බදියුදීන්ට එරෙහි පැමිණිල්ල අද (05) කොළඹ කොටුව මහෙස්ත්‍රාත් ප්‍රියන්ත ලියනගේ  ඉදිරියේ කැඳවූ අවස්ථාවේදීය.

සැකකාර රිෂාඩ් බදියුදීන මහතා කර්මාන්ත අමාත්‍යවරයාව සිටිය දී පාස්කු ඉරුදින සිනමන් ග්‍රෑන්ඩ් හෝටලයේ මරාගෙන මැරෙන බෝම්බ ප්‍රහාරයක් එල්ල කළ මොහොමඩ් ඉන්සාෆ් නමැති මරාගෙන මැරෙන බෝම්බකරුට අයත් "කෝලෝසස්" තඹ කර්මාන්ත ශාලාවට විශේෂ සැලකිල්ලක් දක්වා තඹ තොග ලබා දීම තුළින් ත්‍රස්තවාදී ක්‍රියාකාරකම්වලට ආධාර අනුබල දුන්නේයැයි සැකපිට අපරාධ පරීක්ෂණ දෙපාර්තමේන්තුව මගින් ඔහු අත්අඩංගුවට ගෙන රක්ෂිත බන්ධනාගාර ගත කර තිබේ.

මාස පහකට අධික කාලයක් රැදවුම් නියෝග මත රදවා තබාගෙන ප්‍රශ්න කිරීමෙන් පසු ත්‍රස්තවාදය වැළැක්වීමේ පනතේ 7 (02) වගන්ති ප්‍රකාරව අපරාධ පරීක්ෂණ දෙපාර්තමේන්තුව සැකකරු මෙම සිද්ධියට අදාළව පළමු වරට අධිකරණයට ඉදිරිපත් කර තිබුනේ ඉකුත් සැප්තැම්බර් මස 10 වැනිදාය.

පාස්කු ඉරුදින ප්‍රහාර මාලාව සම්බන්ධයෙන් ප්‍රශ්න කිරීම සඳහා අපරාධ පරීක්ෂණ දෙපාර්තමේන්තුව හිටපු අමාත්‍ය රිෂාඩ් බදියුදීන්ව අත්අඩංගුවට ගෙන තිබුණේ ඉකුත් අප්‍රේල් මස 21 වැනිදාය.

අද (05) ට යෙදී තිබෙන ලෝක ගුරු දිනය වෙනුවෙන් ජනාධිපති ගෝඨාභය රාජපක්ෂ සිය ෆේස්බුක් පිටුව ඔස්සේ පණිවිඩයක් නිකුත්කර ඇත.

එය මෙසේය.

“ගුරුවරයා යනු සුපැහැදිලි අනාගතයක් උදෙසා දරුවාට මඟ පෙන්වන්නා ය. දෙමව්පිය ඇසුරෙන් පසු ගුරු ඇසුරට පත් වන දරුවා හික්මවමින් ගුණවත්, විනයගරුක හා දැනුමින් සපිරි දරුවකු බවට පරිවර්තනය කර සමාජගත කරන්නේ ගුරුවරයා ය. එවැනි අභිමානවත් හා ගෞරවනීය වෘත්තියක නියැලෙන ඔබ සැමට සුබ ගුරු දිනයක් වේවා යි අද දින මාගේ සුභාශිංසන එක් කරන අතර ම තවත් සුවහසක් දරු පිරිසක් දැනුමින්, නුවණින් හා විනයෙන් පෝෂණය කිරීමට හැකි වේවා යි මම ප්‍රාර්ථනා කරමි.”

ගුරුවරුන් කළුකොඩි දායි !

ජනාධිපති ගෝඨාභය රාජපක්ෂ මෙසේ ලෝක ගුරු දිනය වෙනුවෙන් සුබ පැතුවත්, මේ මොහොතේ පොදුජන පෙරමුණේ ගුරු වෘත්තීය සමිතිය හැර අනෙක් සියලු ගුරු - විදුහල්පති වෘත්තීය සමිති වර්ජනයක් දියත් කර ඇත.

ඒ වසර 24 ක් පැරණි ගුරු - විදුහල්පති වැටුප් විෂමතා ඉවත්කර ගැනීම සඳහා ය.

අදාළ ගැටළුව විසඳන බව වත්මන් පාලනයේ මැතිවරණය පොරොන්දුවක් ද වෙයි. එසේම වැටුප් විෂමතා ඉවත්කරන ගුරු විදුහල්පති වෘත්තීය සමිති ක්‍රියාත්මක කරන ලෙස ඉල්ලන සුබෝධිනී කමිටු වාර්තාවත් ආණ්ඩුව ඉදිරිපත් කරනු ලැබුවකි.

මාස කිහිපයක් වන මේ ගුරු විදුහල්පති වෘත්තීය අරගලය කුමන්ත්‍රණයක් , කඩාකප්පල් වැඩක්, කාලකන්නි, ෂයිලොක්, නිකං ඉඳලා පඩි ගන්න පිරිසක් ආදී විවිධ ලේබල් ගැසීමට ආණ්ඩුවේ මැති ඇමතිවරුන් පසුගිය සමයේ කටයුතු කරනුද දකින්නට ලැබිණ.

එසේම ගුරු විදුහල්පති වෘත්තීය සමිති විරෝධතාවක් හේතුවෙන් පිරිසක් බලහත්කාරයෙන් නිරෝධායනයට යොමුකිරීම, අපරාධ පරීක්ෂණ දෙපාර්තමේන්තුවට කැඳවීම , අධිකරණයට ඉදිරිපත් කිරීම් ද සිදුවිය.

කෙසේ වුවත් ආණ්ඩුව දැනට ආණ්ඩුව කියන්නේ රුපියල් 5000ක දීමනාවක් දැනට ගෙවන්න සූදානම් බවයි. ගුරු විදුහල්පති වෘත්තීය සමිති කියන්නේ තමන්ගේ ඉල්ලීම දීමනාවක් නොවන බවයි. එබැවින් ඉල්ලීම ඉටුවන තුරු වෘත්තීය අරගලය ඉදිරියට ගෙනියන බවත් ඔවුන් පවසයි.

එහිදී ලෝක ගුරු දිනය නිමිත්තෙන් අද අධ්‍යාපන කළාප මට්ටමින් උද්ඝෝෂණ විරෝධතා දියත්කරන බවත් හෙට රට පුරා කලුකොඩි දමන බවත් වැඩිදුරටත් වාර්තා වෙයි.

හිටපු පුරාවිද්‍යා අධ්‍යක්ෂ ජනරාල්, ආචාර්ය ශිරාන් දැරණියගල මහතා අභාවප්‍රාප්ත වී තිබේ.

මියයන විට ඒ මහතා 79 හැවිරිදි වියේ පසුවිය.

1992 වසරේ සිට 2001 වසර දක්වා ආචාර්ය ශිරාන් දැරණියගල මහතා පුරවිද්‍යා අධ්‍යක්ෂ ජනරාල්වරයා ලෙස කටයුතු කළේය.

විශ්‍රමිකව සිටි හිටපු පුරාවිද්‍යා අධ්‍යක්‍ෂ ජනරාල්වරයා කුරුවිට එක්නැළිගොඩ වලව්වේ ජීවත්වූ අතර පාහියන්ලෙන ආශ්‍රිතව කැනීම් ආරම්භ කරන ලද්දේ ශිරාන් දැරණියගල මහතාගේ ප්‍රධානත්වයෙනි.

පෝල් එඩ්වඩ් පීරිස් දැරණියගල ( පී.ඊ.පී. දැරණියගල)  ශිරාන් දැරණියගල මහතාගේ පියා විය. මව ප්‍රීති මොලමුරේ මහත්මියයි. පවුලේ තුන්වැන්නා ශිරාන් දැරණියගල මහතායි.

ඓතිහාසික එක්නැළිගොඩ පරපුර ඔහු නියෝජනය කරයි.

ගල්කිස්ස ශාන්ත තෝමස් විද්‍යාලයෙන් මුලික අධ්‍යාපන ලැබූ ශිරාන් දැරණියගල මහතා වාස්තු විද්‍යාව සහ සංස්කෘතික භාෂාව සම්න්‍ධයෙන් කේම්බි්‍රජ් විශ්ව=විද්‍යාලයෙන් ශාස්ත්‍රවේදී සහ ශාස්ත්‍රපති උපාධි ලබා ඇත. ලන්ඩන් විශ්ව විද්‍යාලයේ පුරා විද්‍යාව සම්බන්‍ධයෙන් ගෞරව පන්තියේ උපාධියක් හිමිකරගෙන ඇත.

1968 දී කැනීම් අංශයේ සහකාර කොමසාරිස්වරයකු ලෙස පුරාවිද්‍යා දෙපාර්තමේන්තුවට එක්විය. බුලත්සිංහල පාහියන්ලෙන ආශ්‍රිව පුරාවිද්‍යා කැණීම් 1968 දී මුල්වරට ආරම්භ වන්නේ ද ආචාර්ය ශිරාන් දැරණියගල මහතාගේ මූලිකත්වයෙනි. ඒ අනුව පුරාවිද්‍යාත්මක සාධක සහිත මිනිස් සුසානයන් පාහියන්ගලින් සොයාගන්නේ ද ආචාර්ය ශිරාන් දැරණියගල මහතා විසිනි.

අනුරාධපුර ගෙඩිගේ ආශ්‍රීතව පුරාවිද්‍යා කැණීම් 1969 දී මුලින් ම ආරම්භ කරන්නේ ද ආචාර්ය ශිරාන් දැරණියගල මහතාගේ උපදෙස් අනුවය.

වසර එක් ලක්‍ෂ තිස් දහසකට පෙර ලංකාවේ නැගෙනහිර වෙරළ ආශ්‍රිතව ‘ඉරණමඩු පාංශු සංගතිය’ සම්බන්‍ධයෙන් ශිරාන් දැරණියගල මහතා කළ ගවේෂණය ඇතුළත් නිබන්ධනයට හාවඩ් විශ්වවිද්‍යාලය මගින් 1988දී ආචාර්ය උපාධියක් පිරිනැමීය. 1992 සිට 2001 දක්වා ලංකාවේ පුරා විද්‍යා අධ්‍යක්‍ෂ ජනරාල්වරයා ලෙස කටයුතු කළේ ද ආචාර්ය ශිරාන් දැරණියගල මහතායි. 

ශ්‍රීලංකාවේ පුරාවිද්‍යා අධක්‍ෂ ජනනරාල් තනතුරේ පියපුතු දෙපලක් සේවය කිරීමේ ගෞරවය ලබාදුන්නේද ශිරාන් දැරණියගල මහතාටය.

ශ්‍රීලංකාවේ පැරණිම මානවයා විසු බවට පුරා විද්‍යා සාධක සොයාගත් කුරුවිට ඓතිහාසික බටදොඹ ලෙනට කිලෝමීටර් දෙකක පමණ දුරකින් ආදාර්ය ශිරාන් දැරණියගල මහතා ජීවත්ව ඓතිහාසික එක්නැළිගොඩ වලව්ව පිහිටා ඇත.

ඉතාලියේ බොලොඤ්ඤා නගරයෙන් ඇරඹි ආණ්ඩු විරෝධී උද්ඝෝෂණ රැල්ල ඉතාලියෙන් ප්‍රංශයට , ප්‍රංශයෙන් ඇමරිකාවට පැමිණ පසුගියදා ජිනීවා වෙත සේන්දු විය.

පාස්කු ප්‍රහාරයේ මහමොළකරුවන් නීතිය හමුවට ගෙන ඒම, පාස්කු වින්දිතයන්ට යුක්තිය ඉටුකිරීම , දේශපාලන විරුද්ධවාදීන් ඉලක්කකර දියත්කර ඇති මර්දනය ඇතුළු ආණ්ඩුවේ ප්‍රජාතන්ත්‍ර විරෝධී පාලන පිළිවෙතට විරෝධය දැක්වීම මෙහිදීද සිදුවිය.

ශ්‍රී ලංකාව තුළ සිටිමින් ප්‍රජාතන්ත්‍රවාදීව තම අයිතිවාසිකම් වෙනුවෙන් හඬක් නගන්නට නොහැකිව මර්දනයට මුහුණදී සිටින සහෝදර ජනතාව වෙනුවෙන් ඉතාලියේ වෙසෙන සැබෑ දේශප්‍රේමී ශ්‍රී ලාංකියන් ප්‍රමුඛව සමස්ථ යුරෝපයේම ජනතාව එක්ව සිටින බවේ පණිවිඩය මේ හරහා නිකුත්වීම විශේෂය.

එසේම ඉතාලිය, ස්විස්ටර්ලන්තය, ප්‍රංශය,ඔස්ට්‍රියා හා ජර්මනිය ඇතුලු යුරෝපා රටවල් රැසකින් දැඩි අහිතකර කාළගුණික තත්ත්වය පවා නොතකා මෙකී විරෝධතා උද්ඝෝෂණය සඳහා සහභාගි වීමත් සුවිශේෂී සිදුවීමකි.

සිවිල් ක්‍රියාකාරීන්, නීතිවේදීන්, ලේඛකයන්, මාධ්‍යවේදීන්, විවිධ වෘත්තිකයන් මීට එක්ව සිටි අතර ඒ තුළ සිංහල දෙමළ මුස්ලීම් සියලු ජනකොටස් නියෝජනය විය.

ඒ අනුව මෙය ශ්‍රී ලාංකික ඩයස්පෝරාවෙ , සැබෑ දේශප්‍රේමී ශ්‍රී ලාංකියන්ගෙ යුරෝපා හඬ බවට විවාදයක් නැත.

ඒ බව තහවුරු කෙරුනේ සිංහල, දමිල, මුස්ලිම් සියලු අගම් නියෝජනය කරමින් , ආගමික නායකයින් පවා මෙම විරෝධතා උද්ඝෝෂණය සඳහා එක්වීම නිසයි.

මවුලවි වරුන්, බෞද්ධ භිභික්ෂුන්, කතොලික පූජක තුමන්ලා රැසක්ද රැස්ව සිටි පිරිස් වෙත අධිෂ්ඨානයෙන් එකමුතුව පාස්කු ප්‍රගාරයේ සත්‍ය සොයා යන ගමනට ආශිර්වාද කරද්දී, පැමිණ සිටි පිරිස් එක් හඬින් කියා සිටියේ තව දුරටත් පාස්කු ප්‍රහාරයේ සත්‍ය වසන් කරන්නේ නම් ජිනීවා වලින් නොනැවතී "හේට් යුධ අධිකරණය" දක්වා වුවත් මේ අවනඩුව ගෙනියන බවයි.

එසේම පක්ෂ පාට භේදයකින් තොරව අඛණ්ඩව විරෝධතා ක්‍රියාත්මක කරණ බවත් පැවසිණ.

ඉතාලියේ වෙසෙන වත්මන් ආණ්ඩුවේ හෙංචයියන් කීප දෙනෙක් සිටින " අටේ කල්ලිය සහ කුප්‍රකට කෝට් කල්ලිය" මෙවරත් උද්ඝෝෂණය සඳහා පිරිස සහභාගිවීම වැළැක්වීමට විවිධ කඩාකප්පල් ක්‍රියා දියත් කරත් ඒවා විශ්වාස කරන උදවිය ඉතාලියේ හිඟවෙමින් ඇත.

ජනතාව වෙත පාලකයන් ලබාදුන් ප්‍රධාන පොරොන්දු ඉටුකිරීමට බලකිරීම දේශද්‍රෝහි ක්‍රියාවක් නොව, සැබෑ පුරවැසි වගකීම බව මිනිසුන් විශ්වාස කරන්න ගෙන ඇත. මානව හිමිකම් උල්ලංඝනය කිරීමට එරෙහිව ජිනීවා යාම තවදුරටත් කොටින්ට කඩේයාමක් ලෙස මිනිසුන් සලකන්නේ නැත.

දැන් එය සිය සහෝදර ජනතාවගේ අයිතිවාසිකම් රැකදීමට , ඒ වෙනුවෙන් ලෝකයේ අවධානය යොමුකිරීමට සහ ඒ හරහා ආණ්ඩුවේ මර්දන ක්‍රියාවලිය පාලනය කරවීමට කරන ශිෂ්ට සම්පන්න මැදිහත්වීමක් බව මිනිසුන් පිළිගනිමින් ඇත.

එනිසා , මැති ඇමතිලා ගේ හයියෙන් යුරෝපයේ පුරසාරම් දොඩවන, අගමැති ඉන්න හෝටලය වටේ කැරකෙමින් තේ සාදයක් ඉල්ලගෙන , හරි සර්, බුදු සර් ගාන, පම්පෝරිකාරයන්ව මිනිසුන් පිළිකුලෙන් බැහැර කරන්න ගෙන ඇත.

මේ හරහා කියාපාන්නේ ශ්‍රී ලංකාවේ ප්‍රජාතන්ත්‍රවාදී දේශපාලන පසුබිම ස්ථාවර කිරීමට , වින්දිතයන්ට යුක්තිය ඉටුකර දීමට ඇතුළු ආණ්ඩුවේ මර්දනීය ප්‍රතිපත්තියට එරෙහි ශ්‍රී ලාංකික ඩයස්පෝරාවෙ විරෝධතා උද්ඝෝෂණ රැල්ල ඉදිරියට තවත් සාර්ථකව නැගෙන්නට නියමිත බවය.

සුමුදු මද්දුමආරච්චි.

මිලානෝ,

ඉතාලිය.

ලෝක ප්‍රකට ෆේස්බුක් ආයතනය සතු, Facebook, Instagram, WhatsApp හා Messenger සමාජ ජාල මාධ්‍ය හා සන්නිවේදන පද්ධතියේ බිඳ වැටීමක් වාර්තා වෙයි.

මෙරට වේලාවෙන් පස්වරු 9 .15 ට පමණ මෙම තත්ත්වය වාර්තා වන බව විදෙස් මාධ්‍ය සඳහන් කරයි.

බිඳවැටුණු වෙබ් අඩවි සම්බන්ධයෙන් තොරතුරු ලබා දෙන downdetector.com උපුටා දක්වමින් අදාළ සමාජ මාධ්‍ය හා සන්නිවේදන මාධ්‍යවල බිඳ වැටීමක් තහවුරුව ඇති බව විදෙස් මාධ්‍ය තහවුරු කරයි.

මව් අයතනය වන ෆේස්බුක් ආයතනය නිකුත්කල නිවේදනයේ දැක්වෙන්නේ හැකි ඉක්මනින් නැවත යතා තත්ත්වයට පත් කිරීමට කටයුතු කරන බවයි.