පුවත්

රජය විසින් පනවා ඇති ආදායම් බද්ද කැපී ගිය පසු තමන් විසින් බැංකුවට තවත් රුපියල් 2000 ක මුදලක් ගෙවිය යුතු බවට සමස්ත ලංකා වරාය පොදු සහිත සංගමයේ ප්‍රධාන ලේකම් නිරෝෂන් ගොරකාන ගේ ප්‍රකාශයක් සම්බන්ධයෙන් සමාජ මාධ්‍ය තුළ දැඩි අවධානයක් යොමුව ඇත .

එහිදී ගොරකාන පවසන්නේ තම වැටුප රුපියල් 120,200ක් බවත් එම වැටුපෙන් තමන් ණය හතරක් අරගෙන ඇති බවත් ය.

ආණ්ඩුව විසින් ආදායම් බද්දක් පනවා ඇත්තේ මෙම වැටුපට බවත් ඔහු පෙන්වා දෙයි.

ජවිපෙ මාලිමාව අපේක්ෂකයකු වන ගොරකාන ගේ මේ ප්‍රකාශය සම්බන්ධයෙන් සමාජ මාධ්‍ය ක්‍රියාකාරීන් මෙසේ ප්‍රතිචාර දක්වා ඇත.

අලුතින් පිහිටුවීමට නියමිත මැතිවරණ කොමිෂන් සභාවේ සාමාජිකත්වය ලබා ගැනීමට ආණ්ඩුක්‍රම ව්‍යවස්ථා සභාවට අයදුම්පතක් යොමු කළ බව මැතිවරණ කොමිසමේ වර්තමාන සභාපති නීතීඥ නිමල් ජී පුංචිහේවා පැවසීය.

මැතිවරණ නීතියට අදාළව තමා ඇතුළු වර්තමාන කොමිසම සකස් කළ පනත් කෙටුම්පත් සම්මත කර ගැනීමේ ක්‍රියාවලිය අවසන් කිරීමේ අරමුණෙන් යුතුව අයදුම්පතක් මෙලෙස යොමු කළ බව පැවසූ හෙතෙම මැතිවරණ කොමිසමේ සාමාජිකත්වයට අයදුම් කරන්නැයි සිවිල් සංවිධාන රැසක් තමාගෙන් ඉල්ලා සිටි බවද ප්‍රකාශ කළේය.

මේ අතර මැතිවරණ කොමිසමේ සාමාජිකත්වය සඳහා තමාද අයදුම් කළ බව සීමානිර්ණ කොමිෂන් සභාවේ වර්තමාන සභාපති සහ මැතිවරණ කොමිසමේ හිටපු සභාපති මහින්ද දේශප්‍රිය පසුගියදා පැවසීය.

මැතිවරණ කොමිසමට අමතරව සීමා නිර්ණ කොමිෂන් සභාවේ සාමාජිකත්වය සඳහාද දේශප්‍රිය මහතා අයදුම්පතක් යොමු කරනු ලැබ ඇත.

මේ අතර මැතිවරණ කොමිෂන් සභාව ඇතුළු ස්වාධීන කොමිෂන් සභා නවය පිහිටුවීමේ කටයුතු බොහෝ දුරට ලබන සතියේදී කෙරෙනු ඇතැයි පාර්ලිමේන්තු ආරංචි මාර්ගවලින් පැවසේ.

ස්වාධීන කොමිෂන් සභාවල සාමාජිකත්වය ලබා ගැනීම සඳහා අයදුම්පත් 1600කට ආසන්න සංඛ්‍යාවක් ආණ්ඩුක්‍රම ව්‍යවස්ථාදායක සභාවට ලැබී තිබිණ.

මිනගයා රාත්‍රී දුම්රිය වැසිකිළිය තුළදී බිළිඳු දරුවා දමා ගිය කාන්තාව අත් අඩංගුවට ගැනීමෙන් අනතුරුව ඒ සම්බන්ධයෙන් කටයුතු කළ ආකාරය පිළිබඳ බණ්ඩාරවෙල මූලස්ථාන ප්‍රධාන පොලිස් පරීක්ෂකවරයාට එරෙහිව විශේෂ විමර්ශනයක් ආරම්භ කර ඇතැයි පොලිස් මාධ්‍ය ප්‍රකාශක කාර්යාලය කියයි.

සැකකාරිය අත්අඩංගුවට ගැනීමෙන් අනතුරුව සැකකාරිය ගෙන් ප්‍රශ්න කිරීම මෙන්ම විමර්ශනයේ තොරතුරු පිළිබඳ සැලකිලිමත් වීමකින් තොරව සැකකාර කාන්තාවන් අපහසුතාවයට පත්වන ආකාරයට කටයුතු කිරීම හා ළමුන් හා කාන්තාවන් සම්බන්ධයෙන් ක්‍රියා කළ යුතු ආකාරය පිළිබඳ පොලිස්පතිවරයා විසින් නිකුත් කර ඇති ඇති චක්‍රලේඛණ අනුව කටයුතු නොකිරීම සම්බන්ධයෙන් මෙම විමර්ශනය ආරම්භ කර ඇතැයි මාධ්‍ය ප්‍රකාශක කාර්යාලය කියයි.

කොළඹ කොටුව දුම්රිය ස්ථානයේදී මීනගයා දුම්රියේ මැදිරියක වැසිකිළියක් තුල බිළිදෙකු දමා පලාගොස් සිටියදි බණ්ඩාරවෙල කොස්ලන්ද ප්‍රදේශයේ දී අත්අඩංගුවට ගත් බිළිදා ගේ මවිපිය යුවළ අද (12) බණ්ඩාරවෙල අධිකරණයට ඉදිරිපත් කිරිමෙන් අනතුරුව බණ්ඩාරවෙල වැඩබලන මහේස්ත්‍රාත් කෙනට් සිල්වා සැකකාර තරුණ මව්පිය යුවල මේ මස 15 වනදිනතෙක් රක්ෂිත බන්ධනාගාර ගත කර තැබීමට නියම කර ඇත .

එදිනට සැකකාර යුවල කොළඹ කොටුව මහේස්ත්‍රාත් අධිකරණයට ඉදිරිපත් කරන ලෙසටද වැඩබලන මහේස්ත්‍රාත්වරයා නියෝග කළේය.

මෙසේ රිමාන්ඩ් බන්ධනාගාර ගත කරනු ලැබූයේ කොස්ලන්ද මීරියබැද්ද සහ බණ්ඩාරවෙල නායබැද්ද වත්තේ පදිංචි යුවළකි.

මොවුන් දෙදෙනා කොළඹ දි දැන හදුනාගෙන ප්‍රේම සම්බන්ධයක් පවත්වා ගෙන ගොස් ඇති බවත් , පසුව පසුගිය මස 25 වන දින මැය බිළිදා බිහිකර ඇති බවත් පොලිසිය කීය .

අනතුරුව පසුගිය 10 වන දින රාත්‍රි මෙම යුවල බිළිදා රැගෙන කොළඹ කොටුව දුම්රිය ස්ථානය ට පැමිණ එහි වේදීකාවේ නවතා තිබූ කොළඹ කොටුව සිට මඩකලපුව බලා ධාවනය වීමට නියමිතව තිබූ මීනගයා දුම්රිය ට ගොඩවී එහි තෙවන පන්තියෙ මැදිරියක වැසිකිළි යක් තුල ප්ලාස්ටික් කූඩයක දමා බිළිදා තබා මෙම යුවල කොළඹ සිට බණ්ඩාරවෙල සහ කොස්ලන්ද නිවෙස්වලට පැමිණ තිබේ.

ලැබුණු තොරතුරක් මත බණ්ඩාරවෙල පොලිසිය මගින් සැකකාර තරුණිය ත්, කොස්ලන්ද පොලිසිය මගින් සැකකාර තරුණයත් අත්අඩංගුවට ගත් බවද පොලිසිය සදහන් කළේය .

අත්‍යවශ්‍ය මහජන සේවා පනත (1979 අංක 61 දරණ) යටතේ වරදක් කරන සෑම තැනැත්තකුගේම සියලු චංචල හෝ නිශ්චල දේපල රාජසන්තක වන බව එක්සත් ජාතික පක්ෂ සභාපති පාර්ලිමේන්තු මන්ත්‍රී වජිර අබේවර්ධන පැවසීය.

අත්‍යවශ්‍ය මහජන සේවා පනත යටතේ වරදක් කරන තැනැත්තකු නඩු විභාගයකින් ද වරදකරු කරනු ලැබූ විට අවුරුදු දෙකකට නො අඩු ද අවුරුදු පහක් නොඉක්මවන්නා වූ ද කාලයකට බරපතළ වැඩ ඇතිව බන්ධනාගාර ගත කරනු ලැබීමට හෝ රුපියල් 2000 කට නො අඩු රුපියල් පන්දහසක් නො ඉක්මවන්නා වූ දඩයකට හෝ බන්ධනාගාර ගත කිරීම සහ ඒ දඩය යන දෙකට ම හෝ යටත් විය යුතු බව පනතේ පැහැදිලිවම සඳහන් වන බවද මන්ත්‍රීවරයා සඳහන් කරයි.

එමෙන්ම අදාළ වරද කරන තැනැත්තාගේ රැකියාව කිරීමේ අයිතිය නැති වන බව ද පනතේ සඳහන් වන්නේ යැයිද ඔහු පවසයි .

අත්‍යවශ්‍ය මහජන සේවා පනතේ 6 සහ 7 වගන්ති උපුටා දක්වමින් වජිර අබේවර්ධන මන්ත්‍රීවරයා මෙසේ පැවසීය.

"මේ පනත යටතේ ඔහු යම් වරදක් සම්බන්ධයෙන් යම් තැනැත්තෙකුට විරුද්ධව අපරාධ නඩුවක් පවරනු ලැබ ඇති අවස්ථාවකදී ඒ තැනැත්තා අයත් වන වෘත්තීය සමිතියක් විසින් ආරම්භ කරන ලද වැඩවර්ජනයක් කරගෙන යාමේ දී ඔහු විසින් වරද සංයුක්ත වන ක්‍රියාව හෝ නොකර හැරීමක් කරන ලද බව ඔහු විසින් ඔප්පු කරනු ලැබීම නිදහසට කරුණක් නොවිය යුතුය."

ලිඛිත නීතියේ කුමක් සඳහන් වුවද මේ පනතේ විධිවිධාන බලපැවැත්විය යුතු අතර ඒ අනුව මේ පනතේ විධිවිධාන සහ එවැනි වෙනත් ලිඛිත නීතියක විධිවිධාන අතර යම් ගැටීමක් හෝ අන් අනුකූලතාවයක් ඇතිවන ඇති වන අවස්ථාවකදී මේ පනතේ විධිවිධාන බල පැවැත්විය යුතුය."යනුවෙන් පනතේ 6 සහ 7 වගන්තිවල පැහැදිලිවම සඳහන් ව තිබෙන බව මන්ත්‍රීවරයා පෙන්වා දෙයි.

වරාය ,ගුවන් තොටුපොළ හා මගී ප්‍රවාහන සේවා හා ආශ්‍රිත සේවාවන් අත්‍යාවශ්‍ය සේවාවන් බවට පත් කරමින් ජනාධිපති රනිල් වික්‍රමසිංහ මහතා ගැසට් නිවේදනයට අත්සන් කර තිබෙන බව සඳහන් කළ වජිර අබේවර්ධන මන්ත්‍රීවරයා අසාධාරණ වැඩ වර්ජන කඩාකප්පල් කිරීම් කරන්නට පෙර ⁣අත්‍යවශ්‍ය මහජන සේවා පනතේ බලවත්කම අවබෝධ කරගෙන සියලු දෙනා කටයුතු කළ යුතුව ඇතැයි ද කීය.

ජනාධිපතිවරයා ගැසට් නිවේදනයකට අත්සන් තබමින් මගීන් හෝ භාණ්ඩ, පිටකිරීම්, මැදිරි, ගොඩබෑම, ගබඩා කිරීම, බෙදා හැරීම සහ ආහාර පාන භාණ්ඩ හෝ ගල් අඟුරු, තෙල්, ඉන්ධන ඕනෑම වරායක් තුළ ඇති යාත්‍රාවලින් ඉවත් කිරීම සඳහා පොදු ප්‍රවාහන සේවා මෙසේ අත්‍යාවශ්‍ය සේවාවන් බවට පත් කළ බව මන්ත්‍රීවරයා සඳහන් කළේය.

රේගු ආඥාපනතේ (පරිච්ඡේද 235) අරමුණු සඳහා අර්ථ දක්වා ඇති අතර, මාර්ග, පාලම්, බෝක්කු, ගුවන් තොටුපළ, වරාය සහ දුම්රිය මාර්ග ඇතුළු මාර්ග, දුම්රිය හෝ ගුවන් මගින් ප්‍රවාහන සේවා සඳහා අවශ්‍ය පහසුකම් සැපයීම සහ නඩත්තු කිරීම, වහාම ක්‍රියාත්මක වන පරිදි අත්‍යවශ්‍ය සේවා ලෙස අර්ථ දක්වා ඇති බවද මන්ත්‍රීවරයා සඳහන් කළේය .

එක්ස්ප්‍රස් පර්ල් නෞකාව මගින් අපවිත්‍ර වූ වෙරළ කලාපය පවිත්‍ර කිරීමට රැගෙනවිත් මේ වන විට පරිහරණයෙන් තොරවී ඇති යන්ත්‍රෝපකරණ නැවත භාවිතාකර දිවයින වටා සංචාරක වෙරළ තීර පිරිසිදු කිරීමේ ක්‍රියාවලිය ජාතික ආරක්ෂාව පිළිබඳ ජනාධිපති ජ්‍යෙෂ්ඨ උපදේශක සහ ජනාධිපති කාර්ය මණ්ඩල ප්‍රධානි සාගල රත්නායක ගේ ප්‍රධානත්වයෙන් අද (12) උදෑසන මට්ටක්කුලිය, කාක දූපත් වෙරළ තීරයේ දී නිල වශයෙන් ආරම්භ කෙරිණි.

සමුද්‍රීය පරිසර ආරක්ෂණ අධිකාරිය, වෙරළ සංරක්ෂණ දෙපාර්තමේන්තුව, පළාත් සභා හා පළාත් පාලන අමාත්‍යාංශය, මධ්‍යම පරිසර අධිකාරිය, ශ්‍රී ලංකා පොලිස් පරිසර ඒකකය, ශ්‍රී ලංකා නාවික හමුදාව මෙන්ම තුඩාව බ්‍රදර්ස් පුද්ගලික සමාගම ඒකාබද්ධව වැඩසටහන ක්‍රියාවට නංවනු ලබයි.

මෙහිදී අදහස් දැක්වූ සාගල රත්නායක මහතා කියා සිටියේ ශ්‍රී ලංකාව සංචාරක ආකර්ෂණයට ලක්ව ඇත්තේ සුන්දර වෙරළ තීරය, පරිසරය සහ සංස්කෘතික උරුමයන් නිසා බවයි.

එබැවින් වෙරළ තීරය රැක ගනිමින් සංචාරක කර්මාන්තය ශක්තිමත්ව ඉදිරියට පවත්වාගෙන යාම මෙන්ම මතු පරපුර වෙනුවෙන් පරිසරය රැක දීම සියලුදෙනාගේ වගකීමක් බව ඒ මහතා අවධාරණය කළේය.

මෙම වෙරළ සංරක්ෂණ වැඩසටහන තිරසර ලෙස, දීප ව්‍යාප්තව ඉදිරියට ක්‍රියාත්මක කිරීමට කටයුතු කරන බව සඳහන් කළ සාගල රත්නායක මහතා ඒ වෙනුවෙන් රාජ්‍ය නොවන සංවිධානවල සහ සම්පත් දායකයන්ගේ සහාය ලබා ගැනීමට ද අපේක්ෂා කරන බව කියා සිටියේය.

නාවික හමුදාපති වයිස් අද්මිරාල් ප්‍රියන්ත පෙරේරා, සමුද්‍රීය පරිසර ආරක්ෂණ අධිකාරියේ සභාපති නීතිඥ අසේල බී. රැකව, Clean Ocean Force සංවිධානයේ සභාපති ජෙරොම් ප්‍රනාන්දු යන මහත්වරු ඇතුළු පිරිසක් මෙම අවස්ථාවට එක්ව සිටියහ.

ජනාධිපතිවරයා ප්‍රමුඛ රජය සාර්ථක ගමනක් ආරම්භ කර තිබෙන බැවින් සියලු පාර්ශ්ව ඊට සහයෝගය දැක්විය යුතුව ඇති බව හිටපු මුදල් අමාත්‍ය රවී කරුණානායක පවසයි .

හැමදාම මහා පාරට ඇවිත් උද්ඝෝෂණය කරමින් අවස්ථාවාදී,පටු සහ දේශද්‍රෝහී විපක්ෂය කරන්නේ රට තව තවත් අරාජික කිරීම යැයි ද හිටපු අමාත්‍යවරයා සඳහන් කර සිටියි.

හිටපු මුදල් අමාත්‍ය රවී කරුණානායක මේ බව සඳහන් කර සිටියේ කොළඹ පැවැති උත්සවයකින් අනතුරුව ජනමාධ්‍යවීදීන් ඇසූ ප්‍රශ්නවලට උත්තර ලබා දෙමින් ය.

එහිදී ඔහු වැඩිදුරටත් මෙසේද පැවසීය .

ප්‍රජාතන්ත්‍රවාදයේ මූලික ස්ථානය පාර්ලිමේන්තුවයි. එසේ නම් රටේ ජනාධිපතිවරයා පාර්ලිමේන්තුවට නිතර නිතර පැමිණීම කෙතරම් වටිනවා ද..?

වත්මන් ජනාධිපතිවරයා නිතර පාර්ලිමේන්තුවට පැමිණීම ප්‍රශ්න කරන මෙම අවස්ථාවාදීන් සහ ද්‍රෝහීන් එදා මර හඬ දුන්නේ ජනාධිපතිවරුන් පාර්ලිමේන්තුවට පැමිණෙන්නේ නැතැයි කියමින්. ඔවුන් පාර්ලිමේන්තුවට වග කියන්නේ නැතැයි කියමින් .

හොඳට වැඩ කර ගෙන යන විට මේ රටේ මෙවැනි ප්‍රශ්න මතු කරනවා. මේ මොහොතේ අවශ්‍ය වන්නේ මේ වගේ පටු සහ අවස්ථාවාදී ප්‍රශ්න කිරීම් නෙවෙයි , ජනතාව ජීවත් කරවමින් රට ගොඩනගන්නේ කෙසේද යන්න පිළිබඳවයි. මේ රටේ තිබෙන්නේ කයිවාරුව විතරයි.

ජාත්‍යන්තර මුල්‍ය අරමුදලේ ණය මුදල සහ සහයෝගය ලබා ගත්තා කියා එක රැයකින් මේ රටේ තිබෙන සියලු ප්‍රශ්න විසඳෙන්නේ නැහැ. නමුත් ඒ ප්‍රශ්න විසඳන්න තිබෙන මාර්ගය විවෘත්ත වනවා. ලෝක බැංකුව, ජාත්‍යන්තර මුල්‍ය අරමුදල සහ ආසියානු සංවර්ධන බැංකුව අපට සහය ලබා දීම සඳහා ඉදිරියට පැමිණි නිසා ඒ අය එක්ක අපට මේ ගමන යා හැකියි. මේ වන විට රටේ ඇති කර තිබෙන මුල්‍ය විනය නිසා එම ආයතනවල සහ ලෝකයේ දියුණු රටවල විශ්වාසය ඇති වී තිබෙනවා.

මේ අභියෝගය ජය ගැනීමට නොහැකි බව විපක්ෂය හැමදාම කිව්වා. මේ රටේ විපක්ෂයට පුළුවන් කිසිවක් නැහැ. ඒ අය දන්නේ සියල්ලට බැහැ-බැහැ කියමින් සහ විවේචනය කරමින් රට-ජනතාව නොමඟ යැවීමට විතරයි. ඕනෑම අභියෝගයක් ජය ගත හැකි බව අප මේ වන විට ඔප්පු කර තිබෙනවා. එදා දහසය වැනි වතාවට මේ රටේ මුදල් ඇමතිවරයා වශයෙන් ජාත්‍යන්තර මුල්‍ය අරමුදලට ගියේ මමයි. මෙදා මුදල් ඇමති ලෙස ජාත්‍යන්තර මුල්‍ය අරමුදලට ගොස් එම අරමුදලේ සහය ලබා ගනිමින් අපට ඕනෑම අභියෝගයක් ජය ගත හැකි බව ඔප්පු කළේ ජනාධිපති රනිල් වික්‍රමසිංහ මහතායි. ඒ ගැන අප සතුටු වනවා.

ජාත්‍යන්තර මුල්‍ය අරමුදල ඇතුළු ලෝක සංවිධාන ද, දියුණු රටවල් ද අපට ලබා දෙන මෙම සහයෝගය අහිමි නොකර ගෙන අප කළ යුත්තේ අපනයනය වැඩි කරමින් ආනයනය අඩු කර රට සංවර්ධනය කර ජනතාවට උපරිම සහන ලබා දීම බව කිව යුතුයි. අවස්ථාවාදී ලෙස රට පුරා උද්ඝෝෂණය කරමින් සියල්ල කඩාකප්පල් කර ජීවන වියදම අඩු කර රට සංවර්ධනය කරන්න පුළුවන් ද..? එසේ සංවර්ධනය වූ රටවල් ලෝකයේ තිබෙනවා ද..? සංවර්ධිත රටවල් පවා කඩා වැටුණේ මෙවැනි අවස්ථාවාදී, පටු සහ කුමන්ත්‍රණකාරී උද්ඝෝෂණ නිසයි.

ප්‍රජාතන්ත්‍රවාදී සහ එම අයිතීන් ආරක්ෂා කිරීම අවශ්‍යයි. එහෙත් සියල්ලටම සීමාවක් තිබිය යුතුයි. ඒ නිසා අප සියලු දෙනා කළ යුත්තේ මුලින්ම ජනතාව ජීවත් කරවීමයි. කඩා වැටුණු ආර්ථිකයක් යථා තත්ත්වයට පත් කිරීමට හැකි වීම ගැන සතුටු විය යුතුයි. එසේ නොමැතිව හැමදාම මේ වගේ උද්ඝෝෂණය කරන්න ගියාම රටට සංචාරකයින් සහ ආයෝජකයින් පැමිණෙයි ද..?

රටක් හදන්න අවුරුදු ගණනාවක් යනවා. එහෙත් රටක් විනාශ කිරීමට පැයක් යන්නේ නැහැ. ජනාධිපතිවරයා ප්‍රමුඛ රජය සාර්ථක ගමනක් ආරම්භ කර තිබෙනවා. ඒ නිසා සියලු දේශපාලන පක්ෂ, පාට, ජාති සහ ආගම් භේද ඉවතලා රට වෙනුවෙන් එකට එකතු විය යුතුයි

ශ්‍රී ලංකා පොදුජන පෙරමුණ විසින් පළාත් පාලන මැතිවරණය වෙනුවෙන් ප්‍රධාන ජන රැලි පැවැත්වීම ආරම්භ කිරීමට තීරණය කර ඇත.

එම පක්ෂයේ නායක හිටපු ජනාධිපති මහින්ද රාජපක්ෂගේ ප්‍රධානත්වයෙන් පළමු ජන රැලිය පැවැත් වීමට නියමිතව ඇත.

ඒ අනුව මොණරාගල නගරයේ දී එම රැලිය හෙට (12) දින පැවැත්වීමට සංවිධානය කර තිබේ.

මෙවර මැයි දින රැලිය ද ශ්‍රී ලංකා පොදුජන පෙරමුණ විසින් ඉහළින් සංවිධානය කිරීමට පක්ෂ නායකයන් සාකච්ඡා කර ඇති බවත් වාර්තා වෙයි .

උපාධිධාරීන් ඇතුළුව රාජ්‍ය සේවයේ සියලු රැකියා අවස්ථා සඳහා බඳවාගැනීම් සිදුකිරීමේදී සහ උසස්වීම් ලබාදීමේදී රාජ්‍ය විරෝධී මෙන්ම නීත්‍යනුකූල නොවන කටයුතුවල නිරතව ඇතිද යන්න සම්බන්ධයෙන් විශේෂ සොයාබැලීමක් සිදුකිරීමට රජයේ අවධානය යොමුවී තිබේ.

මේ වනවිට රාජ්‍ය සේවයේ ඉහලම තනතුරුවලට පවා රාජ්‍ය විරෝධී කටයුතු වලට සහය දක්වන කඩාකප්පල්කාරී මානසිකත්වයෙන් යුතු පුද්ගලයින් පත්ව ඇති බවත් එම පිරිස් සුක්ෂම ලෙස රජයේ කටයුතු කඩාකප්පල් කරන බවට ලැබී ඇති බුද්ධි වාර්තා මෙන්ම රාජ්‍ය සේවයේ විශ්‍රාමික උසස් නිලධාරීන්ගේ නිර්දේශ මත පදනම්ව රජය මෙම තීරණය ගෙන ඇත.

එහිදී ඔවුන්ගේ නිර්දේශය වී ඇත්තේ රාජ්‍ය විරෝධී සහ කඩාකප්පල්කාරී මානසිකත්වයෙන් යුතු පිරිස් රාජ්‍ය සේවයට එක්වීම ස්ථාවර රාජ්‍ය පාලනයකට බාධාවක් බැවින් රාජ්‍ය සේවයේ බඳවාගැනීම් සිදුකරන විට ඒ සම්බන්ධව විශේෂ අවධානයක් යොමුකළ යුතුව ඇති බවය. රජය මේ පිළිබඳව කඩිනමින් අවධානය යොමු නොකළහොත් එවැනි පුද්ගලයින්ගේ හැසිරීම හේතුවෙන් ඉදිරියේදී කිසිම රජයකට රට පාලනය කල නොහැකි වනු ඇති බවය.

මෙවැනි පිරිස් මැදිහත්ව සිදුකරන, රටේ ආර්ථිකයට තීරණාත්මකව බලපාන අතිශය වැදගත් සංවර්ධන ව්‍යාපෘති කඩාකප්පල් කිරීම් , රාජ්‍ය ප්‍රතිපත්ති සමඟ වෘත්තීය සමිති මට්ටමෙන් ගැටුම් ඇතිකර එම වැදගත් ප්‍රතිපත්ති කෙරෙහි වැරදි සමාජ මත නිර්මාණය කිරීම වැනි කටයුතු හේතුවෙන් රටට සිදුවන හානිය ගණනය කළ නොහැකි බවද රාජ්‍ය සේවයේ විශ්‍රාමික උසස් නිලධාරීන්ගේ මතය වී තිබේ.

මේ අතර කැබිනට් අමාත්‍යවරයකු සඳහන් කර සිටියේ , කඩාකප්පල්කාරී මානසිකත්වයෙන් යුතු පිරිස් මෙන්ම කලහාකාරී ක්‍රියා සැලසුම් කරන පුද්ගලයින් පිළිබඳව සොයා බැලීමට බුද්ධි අංශ කටයුතු කරමින් සිටින බවයි. ඒ හරහා මින් ඉදිරියට රජයේ සේවයට මෙන්ම රාජ්‍ය සංස්ථා සහ බැංකු සඳහා බදවා ගැනීමේ දී මෙන්ම උසස් වීම් ලබා දීමේදී එම පුද්ගලයින් පිළිබඳව පොලිස් වාර්තා ලබා ගැනීම අනිවාර්යය කිරීම කෙරෙහිද රජයේ අවධානය යොමු වී ඇති බවද එම අමාත්‍යවරයා පැවසීය.

දේශපාලන බල අධිකාරිය විසින් සිදුකරන පත්වීම් සඳහා ද මෙම විශේෂ පොලිස් වාර්තා ගැනීම සිදුකරන බවත් මෙය සිදුකරන්නේ මුළුමනින්ම ශ්‍රී ලංකා රාජ්‍යයේ යහපත වෙනුවෙන් මිස වෙනත් කිසිඳු අපේක්ෂාවකින් නොවන බවද අමාත්‍යවරයා වැඩිදුරටත් සඳහන් කළේය.

නැගෙනහිර පළාතේ අතුරුදන් වූවන්ගේ සංගමයේ දෙමාපියන් හා ඥාතීන් විසින් වව්නියාව නගරයේ පවත්වාගෙන යන කුටියකට අනවසරයෙන් විදුලිය ලබා ගැනීමේ හේතුව මත එම සංගමයේ සභාපතිනිය අත්අඩංගුවට ගෙන ඇති බව වාර්තා වෙයි .

අදාළ ස්ථානයට කලක පටන් විදුලි රැහැන් ඇද අනවසරයෙන් විදුලි ලබාගෙන ඇති බව විදුලි බලමණ්ඩලයට ලැබී තිබු පැමිණිල්ලකට අනුව කොළඹ විදුලිබලමණ්ඩලයේ වැටලිම් ඒකකයේ නිලධාරීන් කණ්ඩායමක් විසින් ඊයේ (9) වව්නියාව පොලිසිය සමග එක්ව මෙම වැටලීම සිදුකර ඇත.

විදුලි රැහැන ඇද අනවසරයෙන් විදුලි ලබාගෙන ගැනීම සම්බන්ධයෙන් එහි සභාපතිනිය අත්අඩංගුවට ගෙන වව්නියාව පොලිස් ස්ථානය වෙත ඉදිරිපත් කර ඇත.

අත්අඩංගුවට ගත් සැකකාරිය නෙඩුන්කේනි පෙරියමඩු ප්‍රදේශයේ පදිංචි (54) හැවිරිදි කාන්තාවකි.

අත්අඩංගුවට ගත් සැකකාරිය වව්නියාව මහේස්ත්‍රාත් අධිකරණයට අද ඉදිරිපත් කිරීමට නියමිතව ඇත.

ආනයන සීමා පනවා ඇති භාණ්ඩ වල එම ආනයන සීමාවන් ලිහිල් කරන්නේ නම් එය වඩාත් ගෑඹුරින් සොයාබලා කළමනාකරණයකින් යුතුව සිදු කළ යුතු බව මුදල් රාජ්‍ය අමාත්‍ය රංජිත් සියඹලාපිටිය මහතා පවසයි.

අමාත්‍යවරයා මේ බව ප්‍රකාශ කළේ අද දෙහිඕවිට ප්‍රදේශයේදී පැවති වැඩසටහනකින් අනතුරුව මාධ්‍ය වෙත අදහස් දක්වමිනි.

මෙහිදී තවදුරටත් අදහස් දැක්වූ අමාත්‍ය රංජිත් සියඹලාපිටිය මහතා පැවසුයේ ඩොලරයට සාපේක්ෂව රුපියල ශක්තිමත් වීමත් සමඟ ඖෂධ, ආහාර , පාරිභෝගික භාණ්ඩ ඇතුළු ආනයන භාණ්ඩ වල හා සේවා වල මිල ගණන් ඉදිරියේදී ක්‍රමයෙන් පහළ යා යුතු බවයි.

එසේම අපනයනය සඳහා රුපියල් ශක්තිමත් වීම මේ මොහොතේ යම් බලපෑමක් එල්ල කළද , එය තාවකාලික තත්ත්වයක් බවද අමාත්‍යවරයා පැවසීය.

අපනයන භාණ්ඩ සඳහා යොදාගන්නා අමුද්‍රව්‍ය හා යෙදවුම් වල මිල ගණන්ද අඩුවීම හේතුවෙන් ඉදිරියේදී එම අපනයන භාණ්ඩ වලට සෘණාත්මක බලපෑමක් ඇති නොවන බවද අමාත්‍යවරයා පැවසීය.

– Media unit

ලොව පුරා පැතිර ගිය කොරෝනා වසංගතයට පසුව චීනයේ ෂැංහයි නුවර සිට ශ්‍රී ලංකාවට පැමිණි පළමු චීන සංචාරකයන් පිරිස ඊයේ (10) දින රාත්‍රී කටුනායක ගුවන් තොටුපළ වෙත පැමිණ ඇත.

181 දෙනෙකුගෙන් සමන්විත මෙම චීන සංචාරකයන් පිරිස දින 07 ක කාළයක් ශ්‍රී ලංකාවේ සංචාරය කිරීමට නියමිතය .

ඔවුන් ඊයේ රාත්‍රී 06.51 ට චීනයේ ෂැංහයි නුවර සිට චයිනා ඊස්ටන් ගුවන් සේවයේ එම්.යූ.- 231 දරන ගුවන් යානයෙන් කටුනායක ගුවන් තොටුපළ වෙත පැමිණ තිබුණි .

ඔවුන් පිළිගැනීම සදහා විදේශ කටයුතු පිළිබඳ රාජ්‍ය අමාත්‍ය තාරක බාලසූරිය , ශ්‍රී ලංකාවේ චීන තානාපති චී ෂෙන් හොං ( Qi Zhen Hong ) , ශ්‍රී සංචාරක ප්‍රවර්ධන කාර්යාංශයේ උසස් නිලධාරීන් පිරිසක් ද කටුනායක ගුවන් තොටුපළ පැමිණීමේ පර්යන්තය වෙත පැමිණ සිටියහ .

මෙතැන් සිට සෑම සතියක චීනයේ ෂැංහයි සහ කුංමිං ජාත්‍යන්තර ගුවන් තොටුපළ වල සිට ගුවන් ගමන් වාර 06 ක් චයිනා ඊස්ටන් ගුවන් සේවයේ ගුවන් යානා චීන සංචාරකයන් රැගෙන කටුනායක ගුවන් තොටුපළ වෙත පැමිණීමට නියමිතය .

මීට පෙර 03/01 දින කොරෝනා වසංගතයෙන් පසුව චීනයේ සිට ශ්‍රී ලංකාවට පැමිණි පළමු සංචාරකයන් පිරිස වූ සංචාරකයන් 117 දෙනෙකු රැගෙන චීනයේ ග්වැන්ෂෝ නුවර සිට ශ්‍රී ලන්කන් ගුවන් සේවයේ ගුවන් යානයක් කටුනායක ගුවන් තොටුපළ වෙත පැමිණ තිබුණි .

දෙහිවල ගල්කිස්ස මහනගර සභාවේ නගරාධිපති ඇතුළු මන්ත්‍රීවරුන් 8 දෙනෙකු ශ්‍රී ලංකා පොදුජන පෙරමුණ පක්ෂයෙන් නෙරපීම වළක්වමින් කොළඹ දිසා අධිකරණය මගින් අද (10) වාරණ නියෝගයක් නිකුත් කර තිබේ.

අදාළ මන්ත්‍රීවරුන් විසින් ඉදිරිපත් කළ පැමිණිලි විභාග කිරීමෙන් අනතුරුව කොළඹ දිසා විනිසුරු පූර්ණිමා පරණගම විසින් මෙම වාරණ නියෝගය නිකුත් කළාය.

ශ්‍රී ලංකා පොදුජන පෙරමුණේ නායක මහින්ද රාජපක්ෂ, එහි සභාපති මහාචාර්ය ජී .එල්. පීරිස්, මහලේකම් සාගර කාරියවසම් ඇතුළු පිරිසකට එරෙහිව මෙම වාරණ නිකුත් කෙරුණි.

දෙහිවල ගල්කිස්ස මහනගර සභාවේ නගරාධිපති ස්ටැන්ලි ඩයස් ඇතුළු නාගරික මන්ත්‍රීවරුන් පිරිසක් විසින් මෙම පෙත්සම් ඉදිරිපත් කර තිබුණි.

ශ්‍රී ලංකා පොදුජන පෙරමුණේ පක්ෂ ව්‍යවස්ථාවට පටහැනි ආකාරයෙන් තමන්ව පක්ෂයෙන් නෙරපීමේ ලිපි නිකුත් කර ඇති බව පැමිණිලිකරුවන් කියා සිටියේය.

ඉදිරිපත් වූ කරුණු සලකාබැලූ දිසා විනිසුරුවරිය ලබන 24 වනදා දක්වා බලපැවැත්වෙන පරිදි අදාළ වාරණ නියෝගය නිකුත් කළාය.

ගෝලීය ආර්ථික වර්ධන ගමන් පථය ආසියාව දෙසට යොමුව ඇති බැවින්, ස්ථාවරත්වය පවත්වා ගැනීම සඳහා බිම්ස්ටෙක් රටවල වෙළඳ හා ආයෝජන සංරචකය යළි පුබුදුවාළිය යුතු බව ශ්‍රී ලංකා විදේශ කටයුතු අමාත්‍ය අලි සබ්රි  පවසයි.

සූම් ඔස්සේ පැවති 19 වැනි බහු – ආංශික තාක්ෂණික හා ආර්ථික සහයෝගිතාව සඳහා වූ බෙංගාල බොක්ක ප‍්‍රවේශය හෙවත් BIMSTEC සාමාජික රටවල විදේශ අමාත්‍යවරුන්ගේ රැස්වීමට එක්වෙමින් අමාත්‍යවරයා මේ බව සදහන් කළේය.

එහිදී පිරිස ඇමතූ අමාත්‍ය අලි සබ්රි  එක් එක් රටවල සංසන්දනාත්මක ප‍්‍රතිලාභ කෙරෙහි අවධානය යොමු කරමින් අන්තර් කලාපීය වෙළෙඳාම ඉහළ නැංවීම සඳහා සහයෝගිතා ප‍්‍රයත්න ශක්තිමත් කිරීමේ අවශ්‍යතාව පිළිබඳ කරුණු දැක්වීය.

වෙළඳ හා ආයෝජන ප්‍රවාහය වැඩිදියුණු කිරීම සඳහා ඉවහල් වන ශක්තිමත් වූත් ගතික බවින් යුක්ත වූත් පෞද්ගලික අංශ ජාලයක් ගොඩනැගීම සඳහා කටයුතු කරන මෙවලමක් ලෙස බිම්ස්ටෙක් සංවිධානය පෙරමුණ ගත යුතු බවද එතුමා මෙහිදී අවධාරණය කළේ ය. මෙවැනි පසුබිමක් තුළ, වෙළඳ හා ආයෝජන ක්ෂේත්‍ර සම්බන්ධයෙන් ක්‍රියාකාරීව කටයුතු කිරීම සඳහා ශ්‍රී ලංකාව සතුව පවතින කැපවීම පිළිබඳව යළිදු අවධාරණය කළ අමාත්‍යවරයා, සියලු දෙනාටම පරිවර්තනීය ආර්ථික වර්ධනයක් ළඟා කරගැනීම සඳහා ඉවහල් වන, අන්තර් කලාපීය ආයෝජන දිරිගන්වන අන්තර් ජාතික ව්‍යාපාරික ආයතන ජාලයක් ගොඩනැගීමට ශ්‍රී ලංකාවේ පූර්ණ සහයෝගය ලබා දෙන බව සඳහන් කළේ ය.

මෙම රැස්වීම අතරතුර, බිම්ස්ටෙක් බැංකොක් දැක්ම 2030 (BIMSTEC Bangkok Vision 2030), සමුද්‍රීය ප්‍රවාහන සම්බන්ධතා පිළිබඳ ගිවිසුම සහ බිම්ස්ටෙක් හි කීර්තිමත් පුද්ගලයන්ගෙන් සමන්විත කණ්ඩායමක් පිහිටුවීම වැනි වැදගත් කරුණු සාකච්ඡාවට බඳුන් කෙරිණි. තායිලන්තයේ සභාපතිත්වය යටතේ පැවති මෙම අමාත්‍ය රැස්වීම, තායිලන්ත නියෝජ්‍ය අග්‍රාමාත්‍යවරයාගේ සහ විදේශ කටයුතු අමාත්‍යවරයාගේ ප්‍රධානත්වයෙන් පැවැත්විණි. බංග්ලාදේශය, භූතානය, ඉන්දියාව, නේපාලය, මියන්මාරය සහ ශ්‍රී ලංකාව යන බිම්ස්ටෙක් රටවල විදේශ කටයුතු අමාත්‍යවරු ඊට සහභාගි වූහ.

පළාත් පාලන ආයතන ඡන්ද විමසීම පැවැත්වීමට දින නියම කරමින් එක් එක් තේරීම්භාර නිලධාරීන් විසින් අතිවිශේෂ ගැසට් පත්‍ර නිකුත් කරනු ලැබ තිබේ.

එහි දැක්වෙන්නේ, මැතිවරණ කොමිෂන් සභාවේ උපදෙස් පරිදි එක් එක් තේරීම්භාර නිලධාරීන් විසින් අංක 2322/28 සිට 2322/52 දක්වා වූ අතිවිශේෂ ගැසට් පත්‍ර මගින් ඡන්ද විමසීම පැවැත්වීමට දින නියම කරනු ලැබ ඇති බව ය.

අදාළ නිවේදනය පහතින් දැක්වේ.

රංගන ශිල්පිනී දමිතා අබේරත්න සජිත් ප්‍රේමදාසගේ සමගි ජන බලවේගය වේදිකාවේ රඟපාන්නේ මුදල්වලට බව ජාතික ජන බලවේගය පක්ෂයේ මාතර මහ නගර සභා අපේක්ෂක සුනිල් හඳුන්නෙත්ති පවසා ඇත .

ඒ පුවත්පතක් වෙත අදහස් දක්වමින් ය.

එහිදී ඔහු සඳහන් කර ඇත්තේ ,‘දමිතා අබේරත්න කරන්නේ එයාගේ ජොබ් එක. ඇය ඉතින් කොහොමත් රංගන ශිල්පිනියක්නේ. ඉතින් ඇය සජිත්ගෙ වේදිකාවෙත් සල්ලිවලට රඟපානවා. චිත්‍රපටයක රඟපෑවත් එකයි දේශපාලන වේදිකාවේ රඟපෑවත් එකයි’ යනුවෙනි .

රුපියලේ අගය වැඩිවීම ගැන අද සියලු පාර්ශ්වයන්ට කතා කිරීමට සිදු ව ඇත්තේ රජය විසින් සිදු කරන ලද සුවිශේෂී පාලනයන් නිසා බව මුදල් රාජ්‍ය අමාත්‍ය ආචාර්ය රංජිත් සියඹලාපිටිය පවසයි.

ඊට සමගාමීව සංචාරක කර්මාන්තයේ විශේෂ වර්ධනය ද මීට හේතු වූ බව අමාත්‍යවරයා පෙන්වා දෙයි.

ජනවාරි මස ශ්‍රී ලංකාවට ප්‍රේෂණ ලෙස ඩොලර් මිලියන 437ක් ලැබී ඇතැයි පෙන්වා දෙන අමාත්‍යවරයා එක පසුගිය වසරේ ජනවාරි මාසයට සාපේක්ෂව 68%ක වර්ධනයක් බවයි පේන්වා දෙන්නේ. විදේශ සංචිත ප්‍රමාණය ද ඩොලර් බිලියන 2.2ක් දක්වා ඉහළ ගොස් ඇති බවයි.

සුරාබදු නිවේදන සහ ආනයන අපනයන රෙගුලාසි කිහිපයක් පාර්ලිමේන්තුවේ අනුමැතියට ඉදිරිපත් කරමින් අමාත්‍යවරයා මේ බව පැවැසීය.

සංචාරක ව්‍යාපාරය ප්‍රවර්ධනය කිරීමේ අරමුණෙන් ක්‍රියාත්මක මෘදු මත්පැන් බලපත්‍ර නිකුත් කිරීමේ වැඩපිළිවෙළ යටතේ ස්ථාන 211ක් වෙත මේ වන විට බලපත්‍ර නිකුත් කර ඇතැයි මුදල් රාජ්‍ය අමාත්‍ය ආචාරය රංජිත් සියඹලාපිටිය මහතා කියයි.

පාලනයක් සිදු කිරීම සහ රජයට බදු ආදායම ලබා ගැනීම යන කරුණු දෙක පදනම්ව ආරම්භ කළ මෙම වැඩසටහන සාර්ථකව සිදු කෙරෙමින් පවතින බවයි අමාත්‍යවරයා පෙන්වා දෙන්නේ.

ලෝක සෞඛ්‍ය සංවිධානය විසින් නිකුත් කරන ලද වාර්තාවකට අනුව 2004 සිට 2016 වසර දක්වා මත්පැන් කර්මාන්තය 95%ක් ඉහළ ගොස් තිබේ. ඉන් නීත්‍යානුකූල මත්පැන් කර්මාන්තය වර්ධනය වී ඇත්තේ 50%කිනි. නීත්‍යානුකූල නොවන මත්පැන් නිෂ්පාදනයේ වර්ධනය 300%ක් පමණ වන බවයි එම වාර්තාව මගින් පෙන්වා දෙන්නේ.

බලපත්‍ර සහිත මත්පැන් අලෙවි සැල් ශ්‍රී ලංකාව තුළ ඇත්තේ 2800ක් පමණ ය. එහෙමත් මෙම අලෙවිසැල්වල අවිධිමත් ස්ථානගත වීමක් දක්නට ලැබේ. උදාහරණයක් ලෙස උතුර නැගෙනහිර ඇතැම් ප්‍රදේශවල කිලෝමීටර් 80ක් පමණ යන තුරු මත්පැන් අලෙවි සැලක් නොමැත. මෙහි ප්‍රතිඵලය වන්නේ නීත්‍යානුකූල නොවන මත්පැන් ප්‍රචලිය වීමයි.

2022 වර්ෂය තුළ තිරිගු පිටි කිලෝ ග්‍රෑම් 67,964,160ක් ආනයනය කර තිබේ. මේ සඳහා වියදම ඩොලර් මිලියන 30කි. එම පිටි ප්‍රමාණය මෙරට ජනගහනයෙන් බෙදූ කළ තිරිගු පිටි කිලෝග්‍රෑම් තුනක් පමණ වාර්ෂිකව පරිභෝජනය කර ඇත.

“සහල් අලෙවි කර ගැනීම පිළිබඳ ගැටලුවකට මුහුණ දෙමින් සිටින මේ අවස්ථාවේ මේ පිටි කිලෝග්‍රෑම් තුනෙන් එකක් ජනතාවට හැකි නම් සහල් භාවිතය බවට පරිවර්තන කර ගන්න මේ වාගේ අවස්ථාවක ගත හැකි වටිනාම පියවරක් වෙනවා.

ජනලේඛන හා සංඛ්‍යා ලේඛන දෙපාර්තමේන්තුවේ වාර්තාවලට අනුව අපට හොඳ අස්වැන්නක් ලැබී ඇති නිසා සංචාරක කර්මාන්තයට අවශ්‍ය සහල් හැර අනිත් සහල් ආනයනය අත්හිටුවන්න.

2020 දී අපි ආනයනය කරල තියෙන්නේ සහල් මෙට්‍රික් ටොන් 5,735කි. නිෂ්පාදනය අඩු විමත් එක්ක 2021 වසරේ දී ඒම සංඛ්‍යාව 2261%ක ප්‍රතිශතයකින් ඉහළ නංවමින් සහල් මෙට්‍රික් ටොන් 135,476ක් ආනයනය කිරීමට සිදු තිබේ. 2022 වන විට එය යළිත් මෙට්‍රික් ටොන් 733,385ක් දක්වා ඉහළ දැමීමට සිදු විය.

අද වන විට මෙම සහල් ආනයනය සම්පූර්ණයෙන් ම අත්හිටුවා තිබේ. ඒ මේ මහ කන්නයේ දී මෙට්‍රික් ටොන් ලක්ෂ 24ක අස්වැන්නක් ලැබෙනු ඇතැයි අපේක්ෂාවෙන්.

අපි රුපියල් මිලියන 10,000ක් වැය කරල ආරම්භයක් ලෙස සහල් මෙට්‍රික් ටොන් 85,000ක් මිල දී ගන්න උත්සහ කරනවා පවුල් වෙත බෙදා දෙන්න” යැයි අමාත්‍යවරයා වැඩිදුරටත් පැවැසීය.

– Media unit

සියලු රාජ්‍ය විශ්වවිද්‍යාලවල අධ්‍ය්‍යන සහ විභාග කටයුතු අත්හිටුවන බව විශ්වවිද්‍යාල ආචාර්ය සමිති සම්මේලනය අද (09) නිවේදනය කළේය.

විශ්වවිද්‍යාල ආචාර්යවරුන්ගේ සමිති සම්මේලනයේ මාධ්‍ය ප්‍රකාශක ජ්‍යෙෂ්ඨ කථිකාචාර්ය චාරුදත්ත ඉලංගසිංහ  මාධ්‍ය හමුවකදී පවසා සිටියේ අද සිට අඛණ්ඩ වෘත්තිය සමිති ක්‍රියාමාර්ගයක ද නිරතවන බවය.

එසේම එළැඹෙන 13 වැනිදා සිට සතියක් වැඩ වර්ජනයක සිට ඕනෑම වෘත්තිය ක්‍රියාමාර්ගයක නිරත වන බව ද විශ්ව විද්‍යාල ආචාර්යවරුන්ගෙ සමිති සම්මේලනය පවසයි .

ලබන 15 වැනිදා මෙරට සියලු සේවා වෘත්තිය සමිති වර්ජනයක නිරත වන බව ද එම සම්මේලනය පවසයි .

මේ අතර කැළණිය විශ්වවිද්‍යාලය ආචාර්යවරුන් සහ අනධ්‍යන සේවක පිරිස් මෙන්ම කොළඹ සරසවියේ අනධ්‍යයන සේවකයෝ ද අද (09) විරෝධතාවක නිරත වෙති.

රජයේ බදු ප්‍රතිපත්තිය, ඉහළ යන ජීවන වියදමට සහ විදුලි ගාස්තුවට විරෝධය දක්වමින් එම විශ්වවිද්‍යාල ඉදිරිපිට ඔවුහු විරෝධතාවක නිරත වූහ.