පුවත්

ජනමාධ්‍යවේදීන්ගේ වෘත්තීය සංවර්ධනය හා සාර්ථකත්වය අරමුණු කොට ගෙන ජනමාධ්‍ය අමාත්‍යාංශය විසින් පංචවිධ වැඩසටහනක් සකස් කොට ඇති බව ජනමාධ්‍ය අමාත්‍යංශය නිකුත්කළ නිවේදනයක සඳහන් වෙයි.

ජනමාධ්‍ය උදෙසා ඇසිදිසි රක්ෂණය, වරලත් මාධ්‍යවේදී ආයතනය ස්ථාපනය, මාධ්‍යවේදීන් ඇගයීමේ ජනාධිපති සම්මාන උළෙල, රූපවාහිනී විකාශය ඩිජිටල්කරණය සහ ජනමාධ්‍ය හැඳුනුම්පතේ වළංගු කාලය වසර තුනකට දීර්ඝ කිරීම ඊට අයත් බවත් එහි සඳහන් ය.

අදාළ නිවේදනය වැඩිදුරටත් මෙසේද සඳහන් කර ඇත.

2021 වසර අවසානයේ සැලසුම් කළ වැඩසටහන 2022 වසර තුළ ක්‍රියාත්මක කරනු ලැබේ.

අද (30) පෙරවරුවේ මාතර දිස්ත්‍රික් ලේකම් කාර්යාලයේ දී මාතර දිස්ත්‍රික් ප්‍රාදේශීය ජනමාධ්‍යවේදීහු උදෙසා පැවති වැඩමුළුවේදී ජනමාධ්‍ය අමාත්‍ය ඩලස් අලහප්පෙරුම මහතා මෙම තොරතුරු සඳහන් කළේය. “සංවර්ධනය සන්නිවේදනය: නගරයෙන් ගමට ගමෙන් නගරයට” මැයෙන් රජයේ ප්‍රවෘත්ති දෙපාර්තමේන්තුව විසින් වැඩමුළුව සංවිධානය කර තිබිණ. ප්‍රාදේශීය ජනමාධ්‍යවේදීහු 100 කට අධික පිරිසක් ඊට සහභාගී වූහ.
ජනමාධ්‍යවේදීන්ට ප්‍රදානය කෙරෙන ඇසිදිසි රක්ෂණ ක්‍රමය පංචවිධ වැඩසටහනේ ප්‍රමුඛතාවය ගන්නා බව අමාත්‍ය ඩලස් අලහප්පෙරුම මහතා පැවසීය. රක්ෂණ ප්‍රතිලාභියාගේ හෝ ඔහු සේවය කරන ආයතනයේ දායකත්වයක් නොලබා රක්ෂණ ප්‍රතිලාභ ලබා දෙන ශ්‍රී ලංකාවේ ක්‍රියාත්මක වන එකම රක්ෂණ ක්‍රමය ලෙස මෙම රක්ෂණය හඳුන්වා දිය හැක.
ආසියානු රටක ක්‍රියාත්මකවන පළමු වරලත් මාධ්‍යවේදී ආයනය පිහිටුවීමට කැබිනට් අනුමැතිය ලැබී ඇති අතර ජනමාධ්‍යවේදීන්ට වෘත්තීයමය පිළිගැනීමක් ලබාදීමේ අරමුණින් මෙම ආයතනය ස්ථාපිත කෙරේ. අගෝස්තු මාසයේදී ආයතනයේ වැඩ ආරම්භ කිරීමට නියමිතයි.

තවද ජනමාධ්‍යවේදීන්ගේ වෘත්තීයමය කුසලතා ඇගයීමට ලක් කිරීමේ අරමුණින් ජනමාධ්‍යවේදීන් සදහා ජනාධිපති සම්මාන උළෙලක් ආරම්භ කිරීමට සැලසුම් කර තිබේ. මේ සඳහා කැබිනට් අනුමැතිය ද ලැබි ඇත. ඉදිරියේදී මාධ්‍ය අංශ හා මාධ්‍ය ක්ෂේත්‍රයට සම්බන්ධ සියලු වෘත්තීය සංවිධාන ඒකාබද්ධව මෙම සම්මාන උළෙල පැවැත්වීමට නියමිතය.
ජපාන රජයේ අධාර ඇතිව දැනටමත් ආරම්භ කර තිබෙන රූපවාහිනී අවකාශය ඩිජිටල්කරණය කිරීමේ ව්‍යාපෘතිය වසර 2023 මැදභාගය වනවිට බස්නාහිර පලාතේද, 2025 වනවිට මුලු දිවයිනම ආවරණය වන

පරිදි ද ක්‍රියාත්මක කෙරෙනු ඇත. මෙමගින් සියළුම රූපවාහිනී ප්‍රේක්ෂකයන්ට රූපවාහිනී දසුන් සුපැහැදිළිව නැරඹීමේ අවකාශය සැලසේ. නෙළුම් කුළුන සහ දිවයින පුරා පිහිටවනු ලබන තවත් කුළුනු 16 ක් මේ සඳහා උපයෝගී කර ගන්නා බව අමාත්‍යවරයා සඳහන් කළේය.

මීට අමතරව රජයේ ප්‍රවෘත්ති දෙපාර්තුමේන්තුව මගින් ජනමාධ්‍යවේදීන් සඳහා මෙතෙක් වසරක කාල සීමාවකට නිකුත් කළ ජනමාධ්‍ය හැදුනුම්පත මින් ඉදිරියට වසර 3 ක කාලසීමාවක වලංගුවන පරිදි නිකුත් කෙරේ. ප්‍රාදේශීය ජනමාධ්‍යවේදීන් සඳහා නිකුත් කෙරෙන මාධ්‍ය හැඳුනුම්පත් දිස්ත්‍රික් මාධ්‍ය ඒකක මගින් නිකුත් කිරීමටද සැලසුම් කර තිබේ.

දිවයින පුරා අ.පො.ස.(උ.පෙ.) විෂයධාරාව උගන්වන පාසල් 3042 ක ජනමාධ්‍ය කව පිහිටවීම දැනටමත් ආරම්භ කර තිබේ. මේ සඳහා මාධ්‍ය ආයතන ද සම්බන්ධ කර ගැනීමට අපේක්ෂා කරන අතර ජනමාධ්‍ය අමාත්‍යාශය සහ රජයේ ප්‍රවෘත්ති දෙපාර්තුමේන්තුව ඒකාබද්ධව පාසල් දරුවන්ට විවිධ පුහුණු වැඩමුළු සහ අභ්‍යාස පැවැත්වීමට ද අපේක්ෂිතයි.
විශේෂයෙන් විවිධ රටවල ජනමාධ්‍යවේදීන් සමග සම්බන්ධවෙමින් අපේ රටේ ජනමාධ්‍යවේදීන්ට අත්දැකීම් බෙදා ගැනීමට අවස්ථාව ලබාදීම කෙරෙහිද ජනමාධ්‍ය අමාත්‍යාංශයේ අධානය යොමු වී ඇත. මේ පිළිබඳ තානාපතිවරු සමග සාකච්ඡා ආරම්භ කර ඇති අතර ජපාන තානාපතිවරයා දැනටමත් එවැනි අවස්ථාවක් ලබාදීමට එකඟතාවය පල කර ඇත..

ජනමාධ්‍යවේදීන්ට ජාත්‍යන්තර මාධ්‍ය භාවිතය පිළිබඳ අත්දැකීම් ලබාගැනීමට අවස්ථාව ලබා දෙමින් ඔවුන්ගේ වෘත්තීය කටයුතු සාර්ථක කර ගැනීමට අවකාශ සලසා දීමේ අරමුණින් මෙම වැඩපිළිවෙල ක්‍රියාත්මකයි.

මෙම අවස්ථාවට මාතර දිස්ත්‍රික් ලේකම් වයි.වික්‍රමසිරි සහ රජයේ ප්‍රවෘත්ති දෙපාර්තමේන්තුවේ නිලධාරීහු පිරිසක් සහභාගී වූහ.

මින්පසු රණසිංහ ප්‍රේමදාස යන නමවත් කියන්නට එපා යැයි තමන් විපක්ෂ නායක සජිත් ප්‍රේමදාස පැවසූ බව සමගි ජන බලවේගයේ සභාපති , පාර්ලිමේන්තු මන්ත්‍රී ෆීල්ඩ් මාර්ෂල් සරත් ෆොන්සේකා පවසයි.

ඔහු මේ බව සඳහන් කර සිටියේ ජනහමුවක් අමතමින් වන අතර වැඩිදුරටත් මෙසේද පැවසීය.

“අපි ආණ්ඩු ගත්තා කියලා මේ රට දියුණු වෙන්නේ නෑ. අනිත් පැත්තෙත් ආර්ථික විශේෂඥයෝ ඉන්නවානේ. අපෙත් ඉන්නවා ඉතා විශිෂ්ට කට්ටිය. එතකොට දෙපැත්තේම ඉඳළත් මේ රට හැදෙන්නේ නෑ. හැදෙන්නේ නැත්තේ ඇයි ?. දූෂණය සහ අවභාවිතාව. වගකීමක් නෑ.

ඒ හින්දා මොන ආර්ථික විශේෂඥයා ආවත් ඒ ගොල්ලෝ බැලනස් කරලා අරම මෙහෙම කියයි.

රටේ නිෂ්පාදනය නැතිනම් එක පැත්තකින් රට උඩ යන්නේ නෑ. අනිත් පැත්තෙන් දූෂණය. අපේ පක්ෂය වෙනස් වෙන්න ඕනේ නම් අපි මේවා තේරුම් අරගෙන මේ ලයින් එකේ වැඩ කරන්න ඕනේ. නායකතුමා මෙතන හිටියා නම්.. මේ පණිවුඩය මෙහෙම්ම ම කියනවා මං.

එතුමට මම බදුල්ලේ දී කිව්වා.. ඔබතුමා මීට පස්සේ රණසිංහ ප්‍රේමදාස කියන නමවත් කියන්න එපා කියලා. මොකද ඒවාගෙන් දැන් අපිට වැඩක් නෑ. අපි අනිවාර්යයෙන්ම අපේ ගමනක් හදාගන්න ඕනේ. අපේ නායකයෝ හැදෙන්න ඕනේ.”

සහල්, සිමෙන්ති සහ ඖෂධ ආනයනය සඳහා පකිස්ථානයෙන් අමෙරිකානු ඩොලර් මිලියන 200ක ණය පහසුකමක් ලබා ගැනීමට සුදානම් වන බව වාර්තා වේ.

වෙළෙඳ අමාත්‍ය ආචාර්ය බන්දුල ගුණවර්ධනගේ පකිස්ථාන සංචාරය අතරතුර මේ සම්බන්ධයෙන් සාකච්ඡා කර ඇතැයි වාර්තා වේ .

අදාළ භාණ්ඩ ආනයනය කිරීම් වෙළද අමාත්‍යංශ හරහා සිදුකිරීමට නියමිත බවත් ඊට අදාළ ගිවිසුම් කෙටුම්පත නුදුරේදීම මුදල් අමාත්‍යංශයට ඉදිරිපත් කිරීමට නියමිත බවත් තොරතුරු අනාවරණය වේ.=

පකිස්ථාන – ශ්‍රී ලංකා නිදහස් වෙළද ගිවිසුම යටතේ අමෙරිකා ඩොලර් මිලියන 500 ක ද්‍රව්‍ය අපනයනය කිරීමේ හැකියාව ද පකිස්ථානය සතුය.

තවත් කොවිඩ් මරණ 20ක් සෞඛ්‍ය සේවා අධ්‍යක්ෂ ජනරාල්වරයා විසින් තහවුරු කර තිබේ.

සෞඛ්‍ය අංශ පෙන්වා දෙන්නේ එම මරණ ඊයේ (29) තහවුරු කර ඇති බවය.

ඒ අතර අවුරුදු 30ට අඩු පුද්ගලයින් 3 දෙනෙකු ද වාර්තා වී ඇති අතර ඊට කාන්තාවක් සහ පිරිමි පුද්ගලයින් දෙදෙනෙකු අයත්ය.

ඒ අනුව, මෙරටින් මේ දක්වා වාර්තා වී ඇති මුළු කොවිඩ් මරණ ගණන 15,420කි.

පවතින විදුලි අර්බුදය හේතුවෙන් අවශ්‍ය ඉන්ධන හිඟය පියවා ගැනීම සඳහා ඉන්දියන් ඔයිල් සමාගමෙන් (IOC) සෘජුවම ඉන්ධන මිලදී ගැනීමට විදුලි බල මණ්ඩලය සූදානම් වන බව වාර්තා වෙයි.

විදුලිබල ඇමති ගාමිණී ලොකුගේ පවසන්නේ හෙට (31) සහ අනිද්දා (01) දිනවලදී ඉන්දියන් ඔයිල් සමාගම හරහා විදුලිබල මණ්ඩලයට සෘජුවම තෙල් මිලදී ගැනීමට හැකිවනු ඇති බවයි.

ඔහු ප්‍රකාශ කරන්නේ ඉදිරි සතිය සඳහා විදුලිබල මණ්ඩලයට අවශ්‍ය තෙල් ප්‍රමාණය සම්බන්ධයෙන් හෙට (31) දිනයේදී තීරණයක් ගත යුතුව ඇති බවය.

පෞද්ගලික බලාගාර තුළින් කෙටි කාලීනව විදුලිය ලබා ගැනීම සඳහා වැඩපිළිවෙළක් ආරම්භ කරන බවත් ඇමති ගාමිණී ලොකුගේ පවසයි.

“දැනට අපිට තෙල් සැපයීම කෙරෙනවා. සඳුදා ඉදලා බලන්න ඕනේ ඊළඟ සතියේ තෙල් ටික ගන්නේ කොහොමද කියලා. IOC එකත් එක්ක සාකච්ඡා කළා. විදුලිය විසන්ධි කිරීමකින් තොරව පවත්වාගෙන යන්න තමයි අපි කටයුතු කරන්නේ. ඒක තමා ජනාධිපතිතුමා අපිට කියලා තියෙන්නේ. විදුලිබල මණ්ඩලය ඒ වෙනුවෙන් කටයුතු කරන්න. තෙල් සංස්ථාවත් ඒ අනුව කටයුතු කරන්න. ඊට අමතරව අපිට තෙල් සංස්ථාව අවසර දීලා තියෙනවා සෘජුවම තෙල් ගෙන්න. ඒ ගැනත් අපි සාකච්ඡා කරනවා. මං හිතන්නේ ඉන්දියන් ඔයිල් සමාගමෙන් අපිට තෙල් ප්‍රමාණයක් ලබා දෙන්න කටයුතු කරනවා. ඒ ගැන මුදල් අමාත්‍යාංශයත් එක්ක කටයුතු කරගෙන යනවා.”

පවතින ආර්ථික අර්බුදයට විසඳුමක් ලබාගැනීම සඳහා IMF වෙත යාමට මුදල් අමාත්‍ය බැසිල් රාජපක්ෂ දරන උත්සාහයට කිසිඳු අකාරයකින් බාධා නොකළ යුතු බව හිටපු අග්‍රාමාත්‍ය , රනිල් වික්‍රමසිංහ පවසා ඇති බව වාර්තා වෙයි.

වාර්තා වන ආකාරයට ඔහු මේ බව පවසා ඇත්තේ, පුත්තලම තම්බපන්නි වෙරල අසල පිහිටි 'බෙතලි (Bethany) නිවස්නයේ ඊයේ (29) පැවැති 'බෙතනි කතිකාව' ට එක්වෙමිනි.

 මෙම 'බෙතනි කතිකාව' සඳහා සමාජ නිර්මාණවේදීන් රැසක් එක්ව සිටි බව වාර්තාවේ.

ශ්‍රී ලංකාවේ වත්මන් ආර්ථික තත්ත්වය සම්බන්ධයෙන් 'ෆයිනෑන්ෂල් ටයිම්ස්' පුවත්පත සමග මුදල් අමාත්‍ය බැසිල් රාපපක්ෂ සිදුකර ඇති සම්මුඛ සාකච්ඡාවේදී
ජාත්‍යන්තර මූල්‍ය අරමුදල සමග වැඩපිළිවෙලකට යාමට ද රජය අදහස් කරන බව සිදුකර ඇති ප්‍රකාශය සම්බන්ධයෙන් මෙහිදී දීර්ඝ වශයෙන් සාකච්ජා කර තිබේ.

 ලංකාව මුහුණදී සිටින වත්මන් අර්බුදයෙන් ගොඩඒම සඳහා සියලු දේශපාලන පක්ෂ එක්ව ජාතික ප්‍රතිපත්ති රාමුවක් ගොඩනැගීමේ අවශ්‍යතාවය හිටපු අගමැතිවරයා මෙහිදී අවධාරණය කර ඇත.

රට මෙවැනි ආර්ථික අර්බුදයකට ගිය අවස්ථා තුනකදී, එනම් 1989, 2001 හා 2015 දී තමා IMF සමග සාකච්ජා කොට රටට කිසිඳු ආකාරයෙන් අවාසිදායක නොවන කොන්දේසි යටතේ ආධාර උපකාර ලබාගත් ආකාරය පෙන්වාදී ඇති රනිල් වික්‍රමසිංහ හිටපු අගමැතිවරයා, යලි රට ගොඩනැගීම සඳහා දිර්ඝකාලින විසඳුමක අවශ්‍යතාවය අවධාරණය කර තිබේ.

ආණ්ඩුවෙන් ඉවත් විය යුතු බවට වූ යෝජනාවක් ශ්‍රී ලංකා නිදහස් පක්ෂය විසින් සම්මත කරගෙන ඇති බව වාර්තා වන අතර ඊට දේශපාලන ක්ශේත්‍රයේ විශේෂ අවධානයක් යොමුව ඇත.

අදාළ යෝජනාව සම්මතව ඇත්තේ , කඹුරුපිටිය ශ්‍රීලනිප බලමණ්ඩලයේදීය.

එහිදී මෙම යෝජනාව ඒකමතිකව සම්මත වී තිබීම විශේෂ සිදුවීමක් වන බව ශ්‍රීලනිප පාක්ෂික අදහසයි.

මේ සම්බන්ධයෙන් අදහස් දක්වමින් දේශපාලන විචාරකයන් පවසන්නේ ශ්‍රී ලංකා නිදහස් පක්ෂය , පොදුජන පෙරමුණ වෙත බරපතළ දේශපාලන හානියක් සිදුකරමින් සිටින බවයි.

ලක්ෂ 69 සහ තුනෙන් දෙකේ පොදුජන පෙරමුණේ ජනවරම හමුවේ ශ්‍රීලනිප ය ආණ්ඩුව තුළ පහතට ඇද දැමීමක් රාජපක්ෂවරුන් සිදුකළ බවත් , ඒ පහතට දැමීම දැන් දේශපාලන වාසියක් කරගන්න ශ්‍රීලනිප ය සමත්ව කටයුතු කරමින් සිටින බවත් ඔවුන් පෙන්වා දෙයි.

මේ තත්ත්වය යටතේ ශ්‍රීලනිප අභ්‍යන්තරයේ පොදුජන පෙරමුණේ විරෝධය විටින් විට එළියට ගනිමින් ශ්‍රීලනිප ය ප්‍රචාරක වාසියක් ලබන බවත් , ආණ්ඩුව කරන කිසිදු කටයුත්තක් ගැන වගනොකියන තැනට නොනිල ලෙස ශ්‍රීලනිප ය පත්ව ඇති බවත් දේශපාලන විචාරකයන් වැඩිදුරටත් පෙන්වා දෙයි.

වල් සපුගල ගොවි ජනතාව දෙදහස් විසි එක වසරේ පැවැති අඛණ්ඩ සත්‍ර්‍යග්‍රහයකින් අනතුරුව දිනා ගත් වන අළි කළමණාකරණ රක්ෂිතයට අදාල 2021 අප්‍රේල් 09 වන සිකුරාදා දින අංක 2222/ 62 දරණ ගැසටි පත්‍රයට අනුව කිසිදු ප්‍රයොගික ක්‍රීයාමාර්ගයක් ගෙන නොමැති නිසා නැවතත් අඛංඩ සත්‍යග්‍රහයක් වල් සපුගප ගොවි ජනතාව විසින් ආරමිභ කරණ ලදී .

වන සත්ව හා වෘක්ෂලතා අඥාපනතේ 2 වගන්තියෙ දෙවන උපවගන්තිය ප්‍රකාරව අමාත්‍යවරයාට පැවරේන බලතල අනුව 2021 අප්‍රේල් 09 වන සිකුරාදා දින අංක 2222 /62 හෙක්ටයාර 23,746ක භූමි ප්‍රමාණයකින් යුතු ප්‍රදේශයක් එම වනඅලි කළමණාකරණ රක්ෂිතය ලෙස නම් කර ඇති අතර එම භූමියේ පිහිටා ඇති හෙක්ටයාර 866 කින් යුත් ගුවන් තොටුපොළ ලෙස නම්කර ඇති භූමි ප්‍රමාණය ඉන් ඉවත් කර තිබේ.

වල් හපුගල වන අලි රක්ෂිතයක අවශ්‍යතාවය !

හම්බන්තොටට වනඅලි රක්ෂිතයක අවශ්‍යතාවය පැන නගින්නේ 2009 වසරේ යුද්ධය අවසන් වීමත් සමඟම ජාතික භෞතික සැලැස්ම ක්‍රීයාත්මක කිරීමට රජය මුලීක වීමත් සමගය . එහි එක් ව්‍යාපෘතියක් ලෙස හම්බන්තොට මහානගර සැලැස්ම ක්‍රියාත්මක විය.එම නිසා හම්බන්තොට සූරියවැව තිස්සමහාරාමය ලුණුගම්වෙහෙර තණමල්විල මේ ප්‍රදේශ ගණනාවක්ම ඉතා සීග්‍ර ලෙස කැලෑ කැපීම සිදුවිය .

විශේෂයෙන්ම පැරණි හමිබන්තොට පුළුල් කිරීමේ ව්‍යාපෘතිය යටතේ හම්බන්තොට වරාය, හම්බන්තොට නගරය, ක්‍රීඩා පිටි, මත්තල ගුවන්තොටුපල, සම්මන්ත්‍රණ ශාලා ,හෝටල්, අධිවේගී මාර්ග ආදී විශාල ඉදිකිරීම් සඳහා කැළෑ ඉඩම් අත්පත් කරගැනීම සිදුවිය .

2006 වැනි කාලවලදී ඉතාමත් කැලෑබදව තිබූ ප්‍රදේශ විශාල ලෙස එළි කිරීමේ ප්‍රතිඵලයක් ලෙස හම්බන්තොට දිස්ත්‍රික්කයේ අලි මිනිස් ගැටුම ඉතාමත් දරුණු ලෙස වර්ධනය විය .ඒ අනුව 2006 වර්ෂයේදී සාදන ලද වන අලි කළමනාකරණ කළමනාකරණය පිළිබඳ ජාතික ප්‍රතිපත්තියට අනුව මෙවන් අලි මිනිස් ගැටුමට ගොදුරුවන ප්‍රදේශ වල අලි කළමනාකරණ කලාප ඉදි කිරීමේ ප්‍රතිපත්තියක් එළිදැක්වෙන ලදී .

ඒ අනුව හම්බන්තොට දිස්ත්රික්කයේ වන අලි කළමනාකරණ රක්ෂිතය යෝජනා වූ අතර . බහුතර ඉඩමි ප්‍රමාණයක් චීන ව්‍යාපෘති වලට ලබාදිම හා ව්‍යාපාරීක අවස්ථාවලට ලබාදීමේ අවශ්‍යතාවය මත හම්බන්තොට වනාතර ඉඩමි කොල්ල කෑම පසුගිය වසර දෙලහ තුල වැඩි වශයෙන් සිදුවිය . එහි ප්‍රතිපලයක් ලෙස වන අලි ඇතුලි සතුන්ගේ වාස භූමි අහිමි වීම ,අලි මිනිස් ගැටුම් වර්ධනය විමී ,ප්‍රදේශයේ පුරාණ වාරි පද්ධතිය විනාශ වී යාම හා ජලය සතුන්ට හා ගොවි බිමිවලට හිගවීම , වනානත්ර ආශ්‍රීත ආර්ථිකය ගොඩ නගාගන සිටි ජනතාවද දුප්පත්කමේ අන්තයට ඇද වැටීම සිදුවිය

මෙම තත්වයන් පදනම් කරගනිමින් හා එහි පිඩාව දැනුන ජනතාව දෙදහස් පහළව වසරේ සිට වන අලි රක්ෂිතය ප්‍රකාශයට පත්කර කැලෑ ප්‍රදේශය ආරක්ෂා කරන ලෙස විවිධ අරගල ගෙන ගිය අතර අවසාන දින අසුහයට පෙර වසර හයක් එම අරගලය අඛණ්ඩව ගෙන යන ලදී. සංවර්ධනයෙන් වඩා පිඩාවට පත්වූ ගොවි ජනතාව දෙදහස් නවය වැනි වසර වලදී සංවර්ධන සිහිනය දැක එයට අනුමැතිය දුන්නද එම සිහිනය බිද වැටී එයින් පිඩාවට පත්වන විට ඒ වෙනුවෙන් අරගල කර තමන්ට හා වන සතුන්ට ජයග්‍රණ ලබාදීම ඉතාමත් වටි.

සංවර්ධනයට අත එසවු ජනතාව එය වෙනුවට කැලෑ ඉල්ලා අරගල කරන්නේ ඇයි ?

හම්බන්තොට ජනතාවගේ ආර්ථිකය සම්පුර්ණ වශයෙන් ගොඩ නැගී තිබුනේ කෘෂි කර්මය හා වනාන්තර පදනමි කරගනිමින්ය. විශාල ලෙස වනානතර අහිමි විමත් සමගම වන සතුන්ට වාසස්ථාන අහිමි වුවා පමණක් නොව මිනිසුන්ගේ ආර්ථිකය බරපතල ලෙස කඩා වැටුන අතර බරපත පොෂණ ඌණතාවයන්ට හා දුප්පත් කමේ අන්තයට අද වන විට මිනිසුන් වැටි ඇත.

වනාන්තරයෙන් ලැබූ ආර්ථිකය හා පෝෂණය අහිමිවිමත් ,කාබන් ප්‍රමාණය ඉහළයාම නිසා උෂ්නත්වය වැඩි විමත්, ජල හිගයන් වලට මුහුණ දිමත් ඒ සියල්ල සමගින් අලි මිනිස්ගැටුමට ගොවි ජනතාව මුහුණ දීමත් යන සියල්ල එක් වී මෙම අරගලය ආරම්භය සනිටුවහන් කෙරුණේ දෙදහස් පහළව වසරෙදිය.

වනාන්තර අහිමි වීම නිසා තමන්ගේ ජීවිත වලට එල්ලවී ඇති බලපෑම ජයගත හැක්කේ වනානත්ර රකින ලෙස රජයට බලකිරමින් අරගල කිරීම බව වටහා ගත් ගොවි ජනතාව සංවර්ධනයට කියා දුන් අවසරයට දුන් මනාපයෙන් වනාන්තර අහිමිවීම හා එහි පිඩාව මනාව වටහා ගන එයට විරුද්ධව පෙළ ගැසීම පැසසිය යුතුය .

1986 සංවර්ධනයට ඇති අයිතිය පිළිබඳ ප්‍රකාශනයෙහි පළමු වෙනි වගන්තියෙහි දැක්වෙන්නේ සංවර්ධනය වීම සඳහා ඇති අයිතිය අහිමි කළ නොහැකි මානව අයිතිවාසිකමක් බවයි. මෙම ප්‍රකාශනයට ජාත්‍යන්තර ප්‍රජාවගේ අතිමහත් සහයෝගයක් ලැබුණි.

1992 රියෝ ප්‍රකාශනයේ 3 වන මූලධර්මය මගින් සංවර්ධනයට ඇති අයිතිය සපුරාලීමේ අවශ්‍යතාව නැවත වරක් සහතික කෙරිණි. සංවර්ධනය යනුවෙන් අදහස් කරන්නේ ඇත්ත වශයෙන්ම එය සංවර්ධනය උදෙසාම හෝ එමගින් බිහි කරන ආර්ථික ප්‍රතිලාභ උදෙසාම ක්‍රියාත්මක වන දෙයක් නොවන බව සංවර්ධනය මානව ඉතිහාසයේ සිට සිදුවු යම් යම් ආකාරයන්ගෙන් හඳුනා ගත හැකිය.

එහෙයින් සියළුම ජනතාවන්ට සංවර්ධන ව්‍යාපෘති ආරම්භ කිරීමටත් ඒවායෙහි ප්‍රතිලාභ භුක්ති ඳීමටත් අයිතියක් ඇති අතරම එබඳු ව්‍යාපෘති මගින් පරිසරයට ප්‍රතිනිර්මාණය කළ නොහැකි හානියක් සිදු නොවන තැනට වගබලා ගැනීම සම්බන්ධයෙන් එකි රාජ්‍යයන් මෙන්ම ජන සමාජයද වග බලා ගත යුතුය.

ආචාර්ය රවීන්ද්‍ර කාරියවසම්

පරිසර හා සොබාදහමි අධ්‍යයන මධ්‍යස්ථානය

පෙබරවාරි මැද හෝ මාර්තු මුල වනවිට, අනිවාර්යයෙන්ම විදුලිය කප්පාදුවකට යෑමට සිදුවනු ඇතැයි, බලශක්ති අමාත්‍ය උදය ගම්මන්පිල පවසයි.

WION News නමැති විදෙස් මාධ්‍යය හා එක් වෙමින් අමාත්‍යවරයා මේ බව පවසා තිබේ.

තමා පුරෝකථනය කරන විදුලිය කප්පාදුවට හේතුව ඩොලර් හිගයම නොවන බවද අමාත්‍යවරයා පවසා තිබේ.

රටේ විදුලිය ඉල්ලූම සෑම වසරකම 8% කින් ඉහළ යන බවත්, එම ඉහළ යන විදුලිය ඉල්ලූමට සපයා ගැනීම සදහා අවශ්‍ය පුණර්ජනනීය හෝ තාප බලාගාර ඉදිකිරීමක් 2014 වසරේ සිට සිදු ව නැති බවත් අමාත්‍යවරයා පවසයි.

මේ හේතුව මත, ජලාශවල ජල මට්ටම පහත යෑම හේතුවෙන්, ජලවිදුලි බලාගාරවලට ප‍්‍රමාණවත් ලෙස විදුලිය උත්පාදනය කිරීමට නොහැකි වනු ඇති බවත්, ඒ අනුව, ජනවාරි සිට අපේ‍්‍රල් දක්වා වූ වියළි කාලගුණයක් සහිත කාලය තුල විදුලි ඉල්ලූම සපුරා ලීමට නොහැකි වනු ඇති බවත් අමාත්‍යවරයා පවසයි.

- mawrata

රන්ජන් රාමනායක මහතාට ජනාධිපති සමාව ලබාගැනීම පිළිබඳව කතාබහ මේ වනවිට නැවත දේශපාලන තලයේ ප්‍රධාන මාතෘකාවක් බවට පත්ව තිබේ.

එක්සත් ජාතීන්ගේ සංවිධානය විසින් ද අන්තර් පාර්ලිමේන්තු සංගමය විසින් ද මෙයට පෙර රන්ජන් රාමනායක මහතා නිදහස් කිරීමට අවශ්‍ය කටයුතු සම්පාදනය කරන මෙන් අවධාරණාත්මක ලිපියක් ද රජයට යොමු කර තිබේ.

තත්ත්වය එසේ තිබියදී රන්ජන් නිදහස් කරගැනීමේ මෙහෙයුමට ජනාධිපතිවරයාට අතිශය සමීප, තීරණ ගැනීම සඳහා බලපෑම් කලහැකි ප්‍රධානම පුද්ගලයෙක් වන නිශ්ශංක සේනාධිපති මහතා රන්ජන් නිදහස් කරගැනීමේ මැදහත් භූමිකාවට අවතීර්ණ වී ඇති බවක් දක්නට ලැබේ.

එම මැදිහත්වීමෙ එක් අංගයක් ලෙස රන්ජන් රාමනායක මහතාට නිදහස ලබාදෙන ලෙස ඉල්ලා අර්ජුන් කමලනාත් සහ ගීතා කුමාරසිංහ ඇතුළු පොදුජන පෙරමුණේ කලා කරුවන් විසින් සකස්කරන ලද ලිපියක් ජනාධිපතිවරයා වෙත භාරදීම සඳහා නිශ්ශංක සේනාධිපති වෙත බාරදීම පසුගිය දා සිදුවිය.

සේනාධිපති ගේ මැදිහත්වීම දේශපාලන උගුලක පෙරනිමිති ද?

රන්ජන් සිරගත වීමේ හේතුව සහ පාර්ලිමේන්තු වේ විපක්ෂ භූමිකාව තුළ මේ වන විට පවතින දේශපාලන සන්දර්භය අප මෙහිදී විමසා බැලිය යුතුය.

සත්‍ය වශයෙන්ම රන්ජන් සිරගත වන්නේ අධිකරණයට අපහාස කිරීම යන චෝදනාව යටතේය. අධිකරණයට අපහාස කිරීම සම්බන්ධව ලංකාවේ නීතිය තුළ විධිමත් ව්‍යවස්ථාපිත ප්‍රතිපාදන දක්නට නොලැබේ. ඉන්දියාව පාකිස්තානය සහ එංගලන්තය වැනි රටවල අදාළ ක්ෂේත්‍රයේ නීතිමය තත්ත්වයට සාපේක්ෂව ලංකාවේ ඒ සම්බන්ධව ව්‍යවස්ථාපිත ප්‍රතිපාදනයන් හි හිස් තැනක් පවතී.

නමුත් පාර්ලිමේන්තු වරප්‍රසාද පනත අනුව පාර්ලිමේන්තු මන්ත්‍රීවරයකුට පාර්ලිමේන්තුව සභා ගැබ තුළ පුළුල් භාෂණයේ නිදහසක් පවතින අතර ඒ සම්බන්ධව අධිකරණ ක්‍රියාමාර්ග ගැනීමට නොහැකිය. ඒ අනුව රන්ජන්ට වැරදුනේ රන්ජන් පාර්ලිමේන්තුව තුළ කිව යුතු දෙයක් එළියේ කිවු නිසා බවට ඕනෑනම් කෙනෙකුට තර්ක කල හැක.

දැන් ආණ්ඩුවට බරපතලම හිසරදයක් වී ඇති විපක්ෂ මන්ත්‍රීවරයා වන්නේ හරීන් ප්‍රනාන්දුය. පාස්කු ඉරුදින ත්‍රස්ත ප්‍රහාරයේ විමර්ශන කටයුතු රජය විසින් සිදු කරන ආකාරයේ අපැහැදිලිතාවය පිළිබඳවත් විශේෂයෙන් පාස්කු ඉරුදින ප්‍රහාරය සම්බන්ධ ජනාධිපති විශේෂ කොමිසමේ වාර්තාව මේ දක්වා සම්පූර්ණ ලියවිල්ලක් ලෙස පාර්ලිමේන්තුවට ඉදිරිපත් නොකිරීමත් මූලික කරගෙන හරීන් විසින් දැඩි විවේචනයක් මේ මොහොතේ රජයට එල්ල කරමින් සිටී. ආණ්ඩුවට මේ මොහොතේ අවශ්‍ය වන්නේ කෙසේ හෝ හරීන්ව නිහඬ කිරීම බව තේරුම් ගැනීමට අමුතුවෙන් දේශපාලන විශ්ලේෂණ අවශ්‍ය වන්නේ නැත.

ඒ සඳහා ආණ්ඩුව ගසන්නට යන ගේම රන්ජන් නිදහස් කිරීමය. නිශ්ශංක සේනාධිපති මේ කටයුත්තට මැදිහත් වන්නේ ඒ නිසාය. ඒ මොන අපභ්‍රංශයක් ද? කෙනෙකුට එසේ සිතීමට පුළුවන. එහෙත් කටුක යථාර්ථය එයයි.

රන්ජන් නිදහස් වී පැමිණෙන්නේ නම් ජාතික ලැයිස්තු මන්ත්‍රී දූරය රන්ජන්ට ලබාදී තමා පාර්ලිමේන්තුවෙන් ඉවත්වීමට සූදානම් බව හරීන් ප්‍රනාන්දු විසින් මෙයට පෙර ප්‍රකාශ කර තිබේ. ආණ්ඩුවට දැන් වුවමනා කරන්නේ පාස්කු ප්‍රහාරය පිළිබඳව සොයමින් ආණ්ඩුව ප්‍රශ්න කරන හරීන්ගේ කට නිහඬ කර ඒ වෙනුවට රන්ජන් කරලියට ගෙන ඒමය.

රන්ජන් ගේමට හසුවේද?

'මල්ලි හොරු අල්ලන්න බෑ මල්ලි. ඒ හැමෝම යාළුවෝ මල්ලි' යයි කීවේ රන්ජන් ය. එසේ කිවූ රන්ජන් දැන් ඒ ගජමිතුරු යාළුවන්ගෙන් කෙනෙකු වන්නේද නැද්ද යන්න තීරණය කිරීමේ හැකියාව ඇත්තේ ද රන්ජන්ට ය.

රන්ජන්ට වුවමනා නම් හරීන්ට ඉල්ලා අස් නොවන ලෙසත් තමා හරීන්ගේ අසුන අරන් පාර්ලිමේන්තු එන්නේ නැති බවත් ප්‍රකාශ කල හැක. ඒ වෙනුවට තමා බස්නාහිර පළාත් සභා මහ ඇමති අපේක්ෂකයා වන බව හෝ ඊළඟ මහ මැතිවරණයට සූදානම් වන බව ප්‍රකාශ කලහැක. නමුත් එය තීරණය වන්නේ නිශ්ශංක සේනාධිපති හා රන්ජන් අතර ඇතිවන්නේ කුමන ආකරයේ සම්බන්ධයක් ද යන්න මත වේ. යම් හෙයකින් රන්ජන් හරීන්ගේ අසුන රැගෙන පාර්ලිමේන්තු පැමිණීමට තීරණය කලහොත් අපට තීරණය කළහැකි වන්නේ රන්ජන්ගේ නහයට සේනාධිපති ගේ ලණුව වැටී ඇති බවකි. ඒ අනුව රන්ජා ඇත්තටම වන්ෂොට් ද ගොන්ෂොට් ද යන්න ජනතාවට තීරණය කළහැකි වනු ඇත.

හරීන්ට මොකද වෙන්නෙ?

හරීන් ප්‍රනාන්දු පාර්ලිමේන්තුවෙන් එලියට පැමිණිය හොත් එක්කෝ ඔහු පාස්කු ප්‍රහාරය සම්බන්ධව රජයට එල්ල කරන් විවේචනයක් අල්ලාගෙන ඔහුව අත්අඩංගුවට ගත හැක. නැතහොත් රන්ජාට කල ආකාරයෙන්ම අධිකරණයට අපහාස කිරීමක් පිළිබඳව සිවිල් පුද්ගලයකු ලවා නඩුවක පැටලවිය හැක. හරීන්ව පාර්ලිමේන්තුවෙන් එලියට ගතහොත් පාස්කු ප්‍රහාරය පිළිබඳව සහ රජයේ විමර්ශන පිළිබඳව ඔහු කරන ප්‍රකාශයන් සහ විවේචනයන් පාර්ලිමේන්තු හැන්සාඩ් ගතවන්නේ ද නැත. හරීන්ව හුදකලා කර දේශපාලන ජීවිතය අවසන් කර දැමීමට ද එය පදනමක් කරගත හැකිය. ආණ්ඩුව ගසන්නට හදන්නෙ එම ගේම බව පෙනෙන්නට තිබේ.

සජිත් කුමක් කරයි ද?

සජිත්ට ද හරීන් වැනි ආකර්ෂණීය නායකත්වීය පෞරුෂයක් පිළිබඳව හීනමානයක් ඇති නොවීමට හේතුවක් නැති බව සජිත්ගේ අතීත දේශපාලන භාවිතාව අනුව නිගමනය කළහැක.
සජිත් මෙන්ම සජිත්ගේ හිතවාදී හර්ෂණ රාජකරුනා සහ කාවින්ද ජයවර්ධන වැන්නන්ට ගම්පහින් හරීන් ඉවත්වනවාට එමනිසා යටිසිතින් කැමති වන්නට පුළුවන. එමනිසා හරීන්ගේ ඉවත්වීමට ඔවුන් ද වඩාත් පහසුවෙන් ඉඩහසර සැලසීමට වැඩි ඉඩකඩක් තිබේ.

විපක්ෂය චෙක්මේට් කරන සේනාධිපති ගේම හරි යයි ද?

සේනාධිපති විසින් දියත් කරන්නට යන විපක්ෂය චෙක්මේට් කරන ගේම හරියනවාද නැද්ද යන තීරණය සම්පූර්ණයෙන්ම ඇත්තේ රන්ජන් අතේ සහ සජිත් අතේය. රන්ජන්ට වුවමනා නම් හරීන්ට ඉල්ලා අස්වෙන්නට එපා යයි ප්‍රකාශ කරන්නට හැකියාව තිබේ. නමුත් එය තීරණය වන්නේ රන්ජන් සහ සේනාධිපති අතර ඇතිවන එකඟතාවයේ ස්වභාවය අනුවය. අනෙක් අතට සජිත් ප්‍රේමදාසට වුවමනා නම් හරීන් වැනි ප්‍රබල චරිතයක් පාර්ලිමේන්තුවේ සිටිය යුතු බව අවධාරණය කරමින් මයන්ත දිසානායක වැනි නිහඬ චරිතයකට පාර්ලිමේන්තුවෙන් ඉල්ලා අස්වී මධ්‍යම පළාත් සභාවේ මහ ඇමති තනතුරට තරඟ කරන් ලෙසත් එම අසුන රන්ජන්ට ලබාදෙන ලෙසත් ප්‍රකාශ කළ හැක.

මේ සියල්ල තීරණය වන්නේ ආණ්ඩුව සහ විපක්ෂය දේශපාලන බල සූදුවට අල්ලන ඔට්ටුවේ ස්වභාවය මතය. හරීන් වැනි අවංක අනාගතයක් ඇති නායකයකු බිලි දීමට ආණ්ඩුවත් විපක්ෂයේ ඇතැමුනුත් එක්ක ක්‍රියා කරයිද යන්න අප දන්නේ නැත. නමුත් විපක්ෂයේ ජනත හඬ එවැන්නක් සිදුවන්නේ නම් එයට එරෙහිව වහා අවදිවිය යුතුය.

ත‍්‍රස්තවාදය වැළැක්වීමේ පනත යටතේ අත් අඩංගුවට ගෙන මාස විස්සකට ආසන්න කාලයක් රදවාගෙන සිටින නීතීඥ හිජාස් හිස්බුල්ලාට ඇප ලබා දීම ඊයේ (28) පුත්තලම මහාධිකරණය ප‍්‍රතික්ෂේප කර තිබේ.

නීතීඥ හිජාස් හිස්බුල්ලාට ඇප ලබා දීමට නීතිපති දෙපාර්තමේන්තුවෙන් විරෝධයක් එල්ල නොවූවද, එය තමන්ගේ බල ප‍්‍රදේශය නොවන බව පවසමින් පුත්තලම මහාධිකරණ විනිසුරුවරිය ඇප ලබා දීම ප‍්‍රතික්ෂේප කර තිබේ.

නැවත පෙබරවාරි නමවනදා, නීතීඥ හිජාස් හිස්බුල්ලා අභියාචනාධිකරණයට ඉදිරිපත් කිරීමට නියමිත අතර, එහිදී ඇප ඉල්ලා සිටින ලෙස පුත්තලම මහාධිකරණ විනිසුරුවරිය විත්තිකරුට දැනුම් දී තිබේ.

පසුගිය විසිවන දා නීතීඥ හිජාස් හිස්බුල්ලා අභියාචනාධිකරණයට ඉදිරිපත් කළ අවස්ථාවේ නීතිපති දෙපාර්තමේන්තුව පවසා සිටියේ, ඔහුට ඇප ලබා දීම සම්බන්ධයෙන් නීතිපති දෙපාර්තමේන්තුවේ විරෝධයක් නැති බවයි.

නීතිඥ හිජාස් හිස්බුල්ලා සම්බන්ධ මේ නඩුව මේ වන විට ජාත්‍යන්තර මානව හිමිකම් සහ නීතිඥ සංවිධාන වල දැඩි අවධානයක් යොමුව ඇති නඩුවක් බවට පත්ව ඇත.

ආන්දෝලනාත්මක විශේෂ භාණ්ඩ හා සේවා බදු පනත් කෙටුම්පත දෙවැනිවර කියවීම පෙබරවාරි 10 වැනිදා පැවැත්වීමට පාර්ලිමේන්තු කටයුතු පිළිබඳ කාරක සභාව තීරණය කර ඇති බව වාර්තා වෙයි.

මෙම පනත් කෙටුම්පතට එරෙහිව මේ වන විට දේශීය ආදායම් දෙපාර්තමේන්තුවට අයත් වෘත්තීය සමිති විරෝධය දැක්වීම ආරම්භ කර ඇත.

පාර්ලිමේන්තු මන්ත්‍රී ආචාර්ය හර්ෂ ද සිල්වා මාධ්‍ය හමුවකදී අදහස් දක්වමින් ප්‍රකාශ කර සිටියේ මීට එරෙහිව නීති මඟින් කටයුතු කරන බවය.

එසේම අදාළ පනත් කෙටුම්පත මගින් රජයේ මූල්‍ය හා බදු පාර්ලිමේන්තු විෂය පථයෙන් ඉවත් කර ඇමතිවරයෙකු යටතට පත් කෙරෙන බවට එක්සත් ජාතික පක්ෂය ද චෝදනා කරයි.

පනත් කෙටුම්පත පාර්ලිමේන්තුවේ පරමාධිපත්‍ය අභිබවා යන්නක් බව විපක්ෂයේ මතය වී ඇති අතර මේ සම්බන්ධයෙන් විශේෂ අවධානයක් යොමුකරන බව ශ්‍රී ලංකා නිදහස් පක්ෂයේ සභාපති , හිටපු ජනාධිපති මෛත්‍රීපාල සිරිසේන ද වෘත්තීය සමිති වෙත පසුගියදා පැවති සාකච්ඡාවක් අවස්ථාවේ පොරොන්දු වී ඇත.

යළිත් වරක් කටුස්සා යන අන්වර්ථ නාමයෙන්, අමාත්‍ය විමල් වීරවංශ ඇමතීමට ආණ්ඩුවේ දැඩි බැසිල්වාදියකු වන , පුවත්පත් මණ්ඩලේ සභාපති මහින්ද පතිරණ කටයුතු කර ඇත.

ඒ අනුව ඊයේ (28) සිය ෆේස්බුක් ගිනුමේ මහින්ද පතිරණ සභාපති , විමල් වීරවංශ අමාත්‍යවරයා "කටුස්සා" කර ෆේස්බුක් සටහනක් තබා ඇති අතර එය පහත දැක්වෙයි.

"ඇමති වීමල් වීරවංශ කාබනික කෘෂි කර්මාන්තය සඳහා වූ තීරණය සිදු වූ වරදක් බව කියමින් අද ඊට පහර ගහනව දැක්ක. ඇත්තටම ඔය තීරණයේ හරි වැරැද්ද දකින්න තාම කල් වැඩියි. ඒ කොහොම වුනත් ඕක හරි ගියා නම් ඕකෙ ක්‍රෙඩිට් එක ගන්න මුලින්ම එන්නෙත් විමලසිරි ගම්ලත් ම තමා. රාජපක්ෂ ආණ්ඩුලින් කරපු හොඳ දේවල් සේරම ඔය දෙතුන් දෙනා කරල තියෙන්නෙ. "වැරදි" සේරම රාජපක්ෂල තනියෙම කරපුව. මේව අපෙයි අලින්ගෙයි වැඩ කියල ගස් පෙරළපු අලියෙකුගෙ පිටේ හිටිය කටුස්සෙකුත් කීවලුනෙ.''

කෙසේ වුවත් අමාත්‍ය විමල් වීරවංශ බැසිල් පාර්ශ්වය වෙතින් මෙසේ ප්‍රහාරයට ලක්ව ඇත්තේ , රටම එක කන්නයකින් කාබනික කෘෂිකර්මාන්තයක් කරන්න යාමෙන් සිදුව ඇති වින්නැහිය විසඳාගැනීම ගැන කතා කිරීම හේතුවෙනි.

ඊයේ කර්මාන්ත අමාත්‍ය, ජාතික නිදහස් පෙරමුණේ නායක විමල් වීරවංශ පවසා ඇත්තේ වාණිජ කෘෂිකර්මාන්ත විනාශ නොකර සිදුවූ වැරැද්ද වහාම නිවැරදි කරගත යුතු බවයි.

රටේ වාණිජ කෘෂිකර්මාන්තය සමඟ සෙල්ලම් කිරීම නොකළ යුතු බවත් වාණිජ කෘෂිකර්මාන්තය බිඳවැටුණ හොත් ආහාර සුරක්‍ෂිතාව බිඳ වැටෙන බවත් අමාත්‍යවරයා කියා ඇත.

කෘෂිකර්මාන්තය පිළිබඳ ප්‍රශ්නය ඉතාම සංවේදී එකක් බව කී අමාත්‍ය විමල් විරවංශ, පොහොරවල හෝ මොනයම් ප්‍රශ්නයක් තියෙනවා නම් ඒකට උත්තර සෙවිය යුත්තේ කෘෂිකර්මාන්ත කඩා බිඳවැටෙන ආකාරයට නොවන බව ද සඳහන් කර තිබේ.

මීට පෙර සිරස මාධ්‍ය ජාලය විසින් ද දේශපාලන කටුස්සකු ලෙස ව්‍යංගයෙන් විමල් වීරවංශ ඉලක්ක කර විවේචනයක් දියත් කළ අතර , ඊට පසුව විමල් වීරවංශ ජවිපෙ පාර්ලිමේන්තු කණ්ඩායම් නායකත්වයෙන් සහ ප්‍රචාරක ලේකම් ධූරයෙන් ඉවත්ව, ජාතික නිදහස් පෙරමුණ පිහිටුවා ගනිමින් මහින්ද රාජපක්ෂ ආණ්ඩුවට එක්වූ බව දේශපාලන විචාරකයන් සිහිපත් කරයි.

රාජ්‍ය අමාත්‍ය ලසන්ත අලගියවන්න හටද කොරෝනා ආසාදිත වී ඇති බව තහුවරු වී ඇත.

ඒ අනුව මේ වනවිට අමාත්‍යවරයා ප්‍රතිකාර සදහා යොමුවී ඇති බව වාර්තා වේ.

මේ අතර කතානායක මහින්ද යාපා අබේවර්ධන වැඩිදුර ප්‍රතිකාර සඳහා කොළඹ IDH රෝහලට යොමුකර ඇති බවත් වාර්තා වෙයි.

නීතියෙන් බේරීම සඳහා විදෙස්ගතව සිටි එතනෝල් ව්‍යාපාරිකයකු මෙරටට පැමිණි අවස්ථාවේදී කටුනායක ගුවන් තොටුපොළේ ප්‍රභූ පර්යන්තය හරහා කැඳවාගෙන ආ බවට චෝදනා එල්ලවී සිටින රාජ්‍ය අමාත්‍යවරයා සහ මන්ත්‍රීවරයා සම්බන්ධයෙන් රජයේ ප්‍රධානින් දැඩි පියවරක් ගැනීමට සූදානම් වන බව ආණ්ඩුවේ ආරංචිමාර්ගවලින් පැවසේ.

මේ සිද්ධිය සම්බන්ධයෙන් රජය බුද්ධි අංශවලින් සම්පූර්ණ වාර්තාවක් දැනටමත් ලබාගෙන ඇතැයි පවසන එම ආරංචි මාර්ග ජනාධිපතිවරයා සිද්ධිය කැබිනට් මණ්ඩලයටද ඉදිරියේදී දැනුම් දීමට නියමිතව ඇතැයි සඳහන් කරයි.

ඉන් අනතුරුව ජනාධිපතිවරයා සහ අගමැතිවරයා මේ සම්බන්ධයෙන් දීර්ඝව සාකච්ඡා කිරීමෙන් පසු කිසියම්වූ ක්‍රියාමාර්ගයක් ගනු ඇතැයි දැනගන්නට ඇත.

චෝදනාවට ලක්ව සිටින රාජ්‍ය අමාත්‍යවරයාගේ එම අමාත්‍ය පදවිය මේ යටතේ අහිමිවීමට බොහෝ දුරට ඉඩ ඇතැයිද සඳහන් වේ.

මෙහි ව්‍යාපාරිකයා කලකට පෙර විදේශගතව ඇතැයි පැවසෙන්නේ පොලිසිය ඔහු අත්අඩංගුවට ගැනීමට සොයමින් සිටි අවස්ථාවේදීය.

ව්‍යාපාරිකයා මෑතකදී මෙරටට පැමිණ එම දේශපාලඥයන් මාර්ගයෙන් පොලිසියට බාරවීමෙන් පසු අධිකරණයට ඉදිරිපත් කිරීමෙන් ඇප මත මුදාහරිනු ලැබ සිටියේය.

දේශපාලඥයන් දෙදෙනා එම ව්‍යාපාරිකයා කටුනායක ගුවන් තොටුපොළේ ප්‍රභූ පර්යන්තය හරහා කැඳවාගෙන පැමිණ ඇතැයි පැවසෙන්නේ මීට දින කිහිපයකට ඉහතදීය.

-Lankadeepa

 දේශීය ජල බෝතල් සඳහා උපරිම සිල්ලර මිල ඉවත් කරමින් පාරිභෝගික කටයුතු පිළිබඳ අධිකාරිය ගැසට් නිවේදනයක් නිකුත් කර තිබේ.

මේ අනුව වෙළෙඳ පොල විශ්ලේෂකයන් පවසන්නේ පානීය ජල බෝතලයේ මිලත් අනෙක් සෙසු භාණ්ඩ සේ හිතුමතේ මිල නියමවීමේ අවධානමක් ඇති බවයි.

මීට පෙර පාලන මිලක් පැවති සියලු භාණ්ඩවල උපරිම මිල ඉවත් කිරීම හමුවේ ඒවායේ මිල අත්තනෝමතික ලෙස ඉහළ ගිය බවත් ඔවුන් සිහිපත් කරයි.

එසේම කිසියම් ආකාරයකට ජල බිල්පත් ගාස්තු වැඩිවීමක් නුදුරේදීම සිදුවේදෝ යන සැකයත් මේ තුළ පවතින බව ඔවුන් වැඩිදුරටත් සඳහන් කර සිටියි.

උඩරට කැරැල්ල කාලේ සුද්දෝ රටේ ගෙඩි හැදෙන ගහක් ගානේ විනාශ කළ බවත්, කාලිංඝ මාඝ යුගයේ මේ රටේ අතීත ශිෂ්ටාචාරය විනාශ කළ බවත් පැවසූ විපක්ෂ නායක සජිත් ප්‍රේමදාස මහතා, වර්ථමාන ආණ්ඩුව රටේ කෘෂිකර්ම ශිෂ්ටාචාරය සහමුලින්ම විනාශ කළ බව අවධාරණය කරයි.

විපක්ෂ නායකතුමා මේ බව පවසා සිටියේ ඊයේ (28) දඹුල්ල නගරාසන්න පැවති සමගි ජන බලවේගයේ ජන හමුවකට එක්වෙමින්ය.

පිපිරීම් නවත්තන බව කියා පැමිණි ආණ්ඩුව යටතේ අතට ගන්න ගෑස් සිලින්ඩරය පවා පිපිරෙන තැනට පත්වී ඇති බවත්,එපමණක් නොව පොහොර කෑන් පවා පිපිරෙන බවත් විපක්ෂ නායක පැවසීය.

ඒ මදිවට,ගෙන්වා ඇති දියර පොහොර උහුලන්නට බැරි තරම් දුගදකින් යුක්ත බව කී විපක්ෂ නායක ඒ දුගඳ අරලියගහ මන්දිරයට දැනෙන්නේ නැති බවත් , ජනාධිපති මන්දිරයට දැනෙන්නේ නැති බවත්, පාර්ලිමේන්තුවට දැනෙන්නේ නැති බවත් පැවසීය.

ජනතාවගේ දුක වේදනාව දැනෙන ස්නායු ආණ්ඩුවට නැතැයි කී විපක්ෂ නායකතුමා, සීනි වංචාව, පොල්තෙල් වංචාව, කෝවිඩ් ගසාකෑම ඇතුලු මහා දූෂණ වංචා අක්‍රමිකතාවලට ආණ්ඩුව වගකිවයුතු බව පැවසීය. අද වන විට ශ්‍රී ලංකාව දූෂණ දර්ශකයේ අතිශය පහල තැනකට රට පත්වී ඇතැයි ද ඔහු පැවැසීය.

පාස්කු වින්දිතයන්ට යුක්තිය ප‍්‍රමාද වීම සහ බොරැල්ල සියළු සාන්තුවරයන්ගේ දෙව් මැදුරේ අත් බෝම්බ සිද්ධිය පිළිබදව ශුද්දොත්තම පාප් වහන්සේගේත් වතිකාන පරිපාලනයේත් අවදානය යොමු වී ඇති බව මව්රට පුවත් වෙබ් අඩවිය වාර්තා කරයි.

අදාළ පුවත වැඩිදුරටත් මෙසේද වාර්තා කර ඇත.

පාස්කු ප‍්‍රහාරය පිළිබදවත්, බොරැල්ල සියළු සාන්තුවරයන්ගේ දේවස්ථානයේ අත් බෝම්බය තැබීමේ සිද්ධිය පිළිබදවත් පැවැත්වෙන විමර්ෂණ පිළිබද තමන්ට විශ්වාසයක් නැති බව මැල්කම් රන්ජිත් කාදිනල් හිමියෝ අවස්ථා කිහිපයකදීම ප‍්‍රකාශ කර තිබුණි.

පරීක්ෂණ සදහා ජාත්‍යන්තර මැදිහත් වීමක් අවශ්‍ය බවටද උන් වහන්සේ පැවසී ය.

ඒ අනුව, පාස්කු ප‍්‍රහාරය සහ ඒ හා සම්බන්ධ අනෙකුත් සියළු සිද්ධීන් පිළිබදව ස්වාධීන වෙනම පරීක්ෂණයක් පැවැත්වීමට අවශ්‍ය සහයෝගය ලබා දීමට වතිකානය කටයුතු කරමින් සිටින බව වාර්තා වේ.

මේ පිළිබදව මෙරට කතෝලික ප‍්‍රජාවේ ගිහි පැවිදි නායකයන් කිහිප දෙනෙකු වතිකානය සමග සාකච්ඡා කරමින් සිටින බව පැවසේ.