පුවත්

ආණ්ඩුවේ ප්‍රධාන පෙළේ අමාත්‍යාංශ ගණනාවක කැබිනට් ඇමැතිවරුන් සහ අමාත්‍යාංශ ලේකම්වරුන් අතර හටගෙන තිබෙන බරපතළ ආරවුල් නිසා අමාත්‍යාංශ ගණනාවකට කටයුතු අඩාල වී ඇතැයි සතිඅන්ත දේශය පුවත්පත වාර්තා කරයි.

අදාළ පුවතේ වැඩිදුරටත් මෙසේද සඳහන් වෙයි.

ජාතික වශයෙන් වැදගත් වන විෂයකට අදාළ එක් ප්‍රධාන අමාත්‍යාංශයක අමාත්‍යාංශ ලේකම්වරයා සහ අමාත්‍යවරයා අතර මේ දිනවල හටගෙන තිබෙන බරපතළ ආරවුල් තත්ත්වය සමනය කිරීම රජයට මහත් හිසරදයක් වී ඇතැයි දැනගන්නට ඇත.

පසුගියදා විමල් වීරවංශ අමාත්‍යවරයා සහ අමාත්‍යාංශ ලේකම් අනුෂ පැල්පිට මහතා අතර හටගත් අර්බුද දුරදිග යාම නිසා පැල්පිට සේවයෙන් ඉල්ලා අස්විය. ඊට පෙර කෘෂිකර්ම අමාත්‍යාංශ ලේකම්වරයාද එලෙසම අමාත්‍යවරයා සමඟ හටගත් ප්‍රශ්න නිසා ඉල්ලා අස්වූ බව වාර්තා විය. මෙබඳු අර්බුද ඇති තවත් අමාත්‍යාංශ ගණනාවකි.

මේ ආකාරයට අමාත්‍යාංශවල අභ්‍යන්තර පරිපාලන ප්‍රශ්න ව්‍යාකූල තත්ත්වයට පත්වීම නිසා බොහෝ ජාතික ප්‍රශ්න විසඳීමට අගමැතිවරයාට හෝ ජනාධිපතිවරයාටම මැදිහත් වන්නට සිදුව තිබේ.

විරෝධතාවල නිරත පිරිස් අනීතිකව අත්අඩංගුවට ගැනීම භාෂණයේ හා ප්‍රකාශනයේ නිදහස උල්ලංඝනය කිරීමක් බව නිදහස් මාධ්‍ය ව්‍යාපාරය අවධාරණය කරයි.

මේ බව සඳහන් නිවේදනයක් නිදහස් මාධ්‍ය ව්‍යාපාරයේ කැඳවුම්කරු සීතා රංජනී විසින් නිකුත් කර ඇත.

එහිදී , ජනතාවට බලපාන පොදු ගැටලු සහ තමන්ගේ වෘත්තීය ගැටලු වෙනුවෙන් උද්ඝෝෂණ ක්‍රියාමාර්ගවල යෙදුණු සංවිධාන සහ වෘත්තිය සංගම් නායකයින් අත්අඩංගුවට ගැනීමට පොලීසිය ක්‍රියා කරන නීති විරෝධී ආකාරය දැඩි සේ හෙළා දකින නිදහස් මාධ්‍ය ව්‍යාපාරය, මෙමඟින් උත්සාහ කරන්නේ රට තුළ භීතියක් ඇති කරමින් පොදු ප්‍රශ්න සම්බන්ධයෙන් ජනතාව නගන හඩ යටපත් කිරීමටදැයි ප්‍රශ්න කර සිටී.

අගෝස්තු 04 වැනිදා සිය වැටුප් අර්බුදය මුල් කරගනිමින් කොළඹදී විරෝධතාවක නිරතව ආපසු යමින් සිටි ගුරුවරුන් 36 දෙනෙකු ඇතුළත් 44 දෙනෙකු අත්අඩංගුවට ගෙන වරාය පොලීසියේ රඳවා තිබූ අතර ඔවුන් මුණ ගැසීමට එහි ගිය විපක්ෂ නායකවරයාට එම අවස්ථාව අහිමි කර තිබිණ. අගෝස්තු 05 වෙනිදා කොටුව මහේස්ත්‍රාත් අධිකරණයට ඉදිරිපත් කළ එම පිරිස පුද්ගල ඇප මත මුදා හරින ලද්දේ පී.සී.ආර් පරීක්ෂණ සිදු කිරීමට පොලීසිය විසින් කරනු ලැබූ ඉල්ලීමද ප්‍රතික්ෂේප කරමිනි.

මෙම අත්අඩංගුවට ගැනීම්වල නවතම සිදුවීම වන්නේ කොතලාවල පනතට එරෙහිව අගෝස්තු 03 වෙනිදා පාර්ලිමේන්තු පාරේ පැවැති උද්ඝෝෂණයට සම්බන්ධ අන්තර් විශ්ව විද්‍යාල ශිෂ්‍ය බල මණ්ඩලයේ කැඳවුම්කරු වසන්ත මුදලිගේ අත්අඩංගුවට ගැනීමයි. අගෝස්තු 05 වැනිදා රාත්‍රියේ සිරස රූපවාහිනියේ සාකච්ඡාවකට සහභාගී වී (අගෝස්තු 06 අළුයම) ආපසු යමින් සිටි ඔහු අත්අඩංගුවට ගැනීම සිදු කරන්නේද සිවිල් ඇඳුමින් සැරසුණු පුද්ගලයන් දෙදෙනෙකු විසිනි. සිසුවාගේ දැඩි ප්‍රශ්න කිරීම් නිසා නිල ඇඳුමෙන් යුත් පොලිස් නිලධාරියකු එම කටයුත්තට මැදිහත් වේ. මේ වනවිට එම විරෝධතාවලට සම්බන්ධව සිටි චමීර කොස්වත්ත සහ කෝෂිලා හංසමාලි යන ශිෂ්‍ය ක්‍රියාකාරීන් ද අත්අඩංගුවට ගෙන ඇති අතර ජයවර්ධනපුර විශ්ව විද්‍යාලයේ මහා ශිෂ්‍ය සංගමයේ සභාපති අමිල සන්දීප ද බලහත්කාරයෙන් රැගෙන ගොස් අත්අඩංගුවට ගෙන ඇත. කොතලාවල පනතට එරෙහි පිරිසක් ගමන් කළ බස් රථයකට ඇතුළු වූ සිවිල් ඇඳුමෙන් සැරසුණු තැනැත්තෙකු කිසියම් අයෙකු අත්අඩංගුවට ගැනීමට උත්සාහ කිරීම සම්බන්ධ සිදුවීමක් කථිකාචාර්ය අමින්ද ලක්මාල් සමාජ මාධ්‍ය වෙත මුදා හැර තිබේ.

මේ වනවිට කොවිඩ් - 19 වසංගත තත්ත්වයට රට දරුණු ලෙස ගොදුරු වෙමින් පැවතියද ඊට මුවාවෙමින් හෝ වෙනත් හේතු දක්වමින් ජනතාවට බලපාන ප්‍රශ්නවලට විසඳුම් ඉල්ලා කරන විරෝධතා මැඩ පැවැත්වීම හා ඒවාට නායකත්වයට දෙන ක්‍රියාකාරීන් අත්අඩංගුවට ගැනීම හරහා භාෂණයේ සහ ප්‍රකාශනයේ නිදහස උල්ලංඝනය කිරීම ප්‍රජාතන්ත්‍රවාදයේ පැවැත්මට තර්ජනයක් ලෙස නිදහස් මාධ්‍ය ව්‍යාපාරය සළකයි. එසේම අදහස් ප්‍රකාශ කිරීමේ අයිතියට ගරු කිරීම සෑම රාජ්‍ය සේවකයකුගේ වගකීමක් බවට සදහන් වන ආණ්ඩුක්‍රම ව්‍යවස්ථාවේ ප්‍රතිපාදන පිළිබදව පොලිසියට අවධාරණය කිරීමට නිදහස් මාධ්‍ය ව්‍යාපාරය කැමැතිය. රජයේ දේශපාලනඥයන් සහ ඔවුන්ගේ ආධාරකරුවන් නිරෝධායන නීති උල්ලංඝනය කරන විට අහක බලා ගෙන සිටින පොලීසිය තමන්ගේ ගැටලු වෙනුවෙන් ඉදිරියට එන පිරිස් වෙනුවෙන් තව ප්‍රතිපත්තියක් අනුගමනය කිරීමේ දෙබිඩි පිළිවෙත ගැන ජනතාවට රහසක් නොවේ. එම නිසා ගැටලුවලට පිළියම් සෙවිය යුත්තේ කොවිඩ් නිරෝධායන රීති දඩමීමා කරගෙන අදහස් මර්දනය කිරීමෙන් නොවන අතර නීතිය ඉක්මවා ක්‍රියා කිරීමෙන් ද නොවන බව පෙන්වා දෙන නිදහස් මාධ්‍ය ව්‍යාපාරය, ජනතාව ත්‍රස්ත කරවන සියලු ආකාරයේ මර්දනකාරී ක්‍රියාමාර්ගවලින් රටට යහපතක් නොවන බවද අවධාරණය කර සිටී.

රාජ්‍ය ඖෂධ නිෂ්පාදන සංස්ථාව මගින් දේශීය වශයෙන් නිෂ්පාදනය කළ ඖෂධ වර්ග දෙකක් වෙළෙඳ පොළට නිකුත් කිරීමේ අවස්ථාව ඊයේ (06) රත්මලාන ඖෂධ නිෂ්පාදන සංස්ථාවේදී පැවැත්වුණු අතර ඒ මුදල් අමාත්‍ය බැසිල් රාජපක්ෂ ගේ ප්‍රධානත්වයෙනි.

මේ සම්බන්ධව මුදල් අමාත්‍යංශය නිකුත් කළ නිවේදනයේ මෙසේ සඳහන් වෙයි.

වේදනා නාශකයක් වන ට්‍රැමඩෝල් (Tramadol) සහ තයිරොක්සීන් ඌණතාව වෙනුවෙන් භාවිත කෙරෙන ලෙවොතයිරොක්සීන් (Levothyroxine) යන ඖෂධ වෙළෙඳ පොළට නිකුත් කිරීම මෙහි දී සිදු විය. ට්‍රැමඩෝල් මිලිග්‍රෑම් 50 කරල් මිලියන 9.8ක් වාර්ෂිකව ශ්‍රී ලංකාවේ භාවිත වන අතර ලෙවොතයිරොක්සීන් මිලිග්‍රෑම් 50 පෙති මිලියන 98ක් පමණ වාර්ෂිකව භාවිත කෙරේ. මෙම ඖෂධ ආනයනය නතර කිරීම මගින් වාර්ෂික ඉතිරි වන මුදල රුපියල් මිලියන 88කි.

ජනාධිපතිතුමාගේ සෞභාග්‍ය දැක්ම ප්‍රතිපත්ති මාලාවට අනුව දේශීය නිෂ්පාදනය ප්‍රමුඛ කරගත් ආර්ථිකයක් ගොඩනැංවීමට රජය මේ වන විට කටයුතු කරමින් ඇති අතර එහි මූලික පියවරක් ලෙස තෝරා ගත් ආහාර ද්‍රව්‍ය 16ක ආනයනය සීමා කිරීමට කටයුතු කළ බව පෙන්වා දුන් රාජපක්ෂ මහතා එතුළින් මේ වන විට සාර්ථක ප්‍රථිපල ළගා කර ගැනීමට හැකි වී ඇති බව ද කියා සිටියේ ය. දේශීය ගොවියා කෙරෙහි විශ්වාසය තබමින් දේශීය ආහාර නිෂ්පාදනය ඉහළ නැංවීමට කටයුතු කළා සේ ම ඖෂධ නිෂ්පාදනය ඇතුළු අනෙකුත් නිෂ්පාදන ක්ෂේත්‍රයන්හි උන්නතිය වෙනුවෙන් රජය ක්‍රමවත් වැඩපිළිවෙළක් දියත් කරමින් සිටින බව ද බැසිල් රාජපක්ෂ මහතා මෙහි දී පැවැසීය.

මෙහි දී වැඩි දුරටත් අදහස් දැක් වූ රාජපක්ෂ මහතා සඳහන් කළේ පසුගිය රජය විසින් රාජ්‍ය සහ පෞද්ගලික ආයතයන වෙත ගෙවීමට විශාල ණය ප්‍රමාණයක් ඉතිරි කර තිබූ අතර එම ණය ගෙවා දැමීමට තමාට පෙර මුදල් අමාත්‍ය ධුරය දැරූ අග්‍රාමාත්‍ය මහින්ද රාජපක්ෂ මහතා කටයුතු කළ බවයි. ඒ අතර ඖෂධ නිෂ්පාදන සංස්ථාව වෙත ගෙවීමට තිබූ රුපියල් මිලියන 1945ක මුදල ද පියවීමට කටයුතු කළ බව මුදල් අමාත්‍යවරයා මෙහි දී පැවැසීය.

ශ්‍රී ලංකාවේ භාවිත කෙරෙන ඖෂධවලින් 20%ක් පමණක් මේ වන විට දේශීය වශයෙන් නිපදවන අතර එය 50% දක්වා ඉහළ නැංවීම රජයේ අපේක්ෂාව බව ද මුදල් අමාත්‍යවරයා මෙහි දී වැඩි දුරටත් පැවැසීය.

ඖෂධ නිෂ්පාදන සිදු ­කෙරෙන ආකාරය පිළිබඳ නිරීක්ෂණ චාරිකාවකට ද මුදල් අමාත්‍ය බැසිල් රාජපක්ෂ මහතා මෙහි දී එක් වූ අතර මහාචාර්ය චන්න ජයසුමන සහ ආචාර්ය නාලක ගොඩහේවා යන රාජ්‍ය අමාත්‍යවරු ද මෙම අවස්ථාවට එක් වූහ.

ගුරු විදුහල්පති වැටුප් අරගලය සාධාරණ බව රජය විසින්ම පිළිගෙන ඇති තත්වයක් හමුවේ ඊට විසදුම් නොදෙමින් කොරෝනාවෙන් ගොඩයන්න උත්සාහ කිරීම බරපතල වරදක් බව වැඩකරන ජන බලය සංවිධානයේ කැඳවුම්කරු රවී කුමුදේශ් පවසයි.

ගුරු විදුහල්පති ඉල්ලීම්වලට නිශ්චිත විසදුම් ලබා දීම ප්‍රමාද කිරීම හේතුවෙන් අනවශ්‍ය උද්ඝෝෂණ ගනනාවක් ඇතිව තිබෙන බවත් ඔහු පෙන්වාදෙයි.

මාධ්‍ය වෙත ප්‍රකාශයක් කරමින් වැඩ කරන ජන බලය සංවිධානයේ කැඳවුම්කරු මේ අදහස් දැක්වූ අතර මේ වන විට කොවිඩ් වසංගතයේ ශීඝ්‍ර පැතිරීම ගුරු විදුහල් පති අරගලය හා අනෙකුත් උද්ඝෝෂණ මත පටවා, කොවිඩ් මර්ධනයේ තීරණ වල වැරදි වසා ගැනීමට ඇතැම් පාර්ශව උත්සහ ගනු ලැබුවද , තවම අප සිටින්නේ රට තුල මතුවූ තුන්වෙනි රැල්ල පාලනය කර ගැනීමට නොහැකිව බවද සිහි තබා ගත යුතු බවත් පැවසීය.

පසුගිය මාස තුල උද්ඝෝෂණ 150ක් පමණ සිදු වී ඇති බවත්, එමගින් වර්තමාන කොවිඩ් ව්‍යාප්තිය සිදු වී ඇති, අපරාධ විමර්ෂණ ඒකකය වාර්ථා කර ඇති බවට ජනාධිපති මාධ්‍ය අංශය නිවේදනයක් නිකුත් කර ඇති අතර, උද්ඝෝෂණ ප්‍රමාණය සෙවීමේ හැකියාව තිබූ පමණින්, වසංගතයේ පැතිරීම පිළිබද තීරණයක් ලබාදීමට අපරාධ පරීක්ෂණ දෙපා‍ර්තුමේන්තුව විසින් තීන්දු කරනු ලැබුවේ කෙසේද යන්න, විද්‍යාත්මක ප්‍රෙහේලිකාවක් බවත් ඔහු පවසයි.

කොවිඩ් ආසාදිතවූ තවත් 98 දෙනකු ඊයේ (5) මරණයට පත් වී ඇතැයි සෞඛ්‍ය සේවා අධ්‍යක්ෂ ජනරාල්වරයා අද (6) තහවුරු කළේය.

මියගිය අය අතර පිරිමි අය 54 දෙනෙක් සහ කාන්තාවෝ 44 දෙනෙක් වෙති.

ඒ අනුව මේ දක්වා මෙරට සිදුවී ඇති සමස්ත කොවිඩ් මරණ සංඛ්‍යාව 4,919ක් දක්වා ඉහළගොස් ඇත.

මියගිය අයගෙන් 70 දෙනකු වයස අවුරුදු 60 ට වැඩි අය වන අතර අවුරුදු 30 ත් 59 ත් අතර වයසේ පසුවන 27 දෙනෙක් සහ වයස අවුරුදු 30ට අඩු එක් අයෙක්ද වෙති.

කොරෝනා ආසාදිතයින් 2,792 ක්

මේ අතර, මෙරටින් තවත් කොරෝනා ආසාදිතයින් 882 දෙනෙකු හඳුනා ගෙන ඇතැයි, කොවිඩ් -19 පැතිරීම වැළැක්වීමේ ජාතික ක්‍රියාන්විත මධ්‍යස්ථානයේ ප්‍රධානී, යුද හමුදාපති ජෙනරාල් ශවේන්ද්‍ර සිල්වා පවසයි.

ඒ අනුව අද (6) දිනයේ මේ දක්වා මෙරටින් හඳුනා ගත් කොරෝනා ආසාදිතයින් සංඛ්‍යාව 2,792 දක්වා ඉහළ යනු ඇති.

අද දිනයේ මීට පෙර හඳුනා ගැනුණු කොරෝනා ආසාදිතයින් සංඛ්‍යාව 1,910 කි.

පානදුර මහ රෝහලේ හා නාගොඩ රෝහලේ මෘතශරිරාගාරය (මෝචරිය) තුල ද මේවනවිට කෝවිඩ් 19 ආසාදනයෙන් මියගිය පුද්ගලයින්ගේ සිරුරු ගොඩගසා ඇතැයි රෝහල් ආරංචිමාර්ග පවසයි.

පානදුර හා නාගොඩ රෝහල්වලත් මළසිරුරු ගොඩ ගැසේ

පානදුර රෝහල් මොචරියේ එකවර මළසිරුරු 12ක් පමණක් තැම්පත් කිරීමට ඉඩකඩ ප්‍රමාණවත් වුවද මේවනවිට මළසිරුරු 37 ක් ගොඩගසා ඇතයි ද ඉහත ආරංචිමාර්ග කියා සිටියි.

ඇතැම් මෘතදේහයන් බාර ගැනීමට කිසිවකු හෝ මේ දක්වා ඉදිරිපත්ව නොමැත්තේ එසේ මියගිය පුද්ගලයින්ගේ පවුලේ ඥාතින්ද කෝවිඩ් ආසාදනය වීමෙන් රෝහල්ගතකර ඇති නිසා බව පැවසේ.

කෝවිඩ් අසාදනයෙන් මියගිය පුද්ගලයින්ගේ දේහයන් ආදාහනය කිරීම සඳහා ප්‍රදේශයේ ආදාහනාගාර පැය 24 තුලම විවෘතව තැබීමට කටයුතු කර ඇතැයි ද වාර්තාවේ.

ඒ සම්බන්ධයෙන් 'ද ලීඩර්' කල විමසීමක දී පානදුර මහ නගර සභාවේ සභාපති නන්දන ගුණතිලක පැවසා ඇත්තේ , තත්ත්වය දවසින් දවස බරපතල වෙමින් පවතින බවයි.

පානදුර රෝහල තුල කෝවිඩ් මළසිරුරු විශාල ප්‍රමාණයක් තිබෙන බව තහවුරුකර සිටි නගරාධිපතිවරයා, එම තත්ත්වය තුල පානදුර ආදාහනාගාර රාත්‍රී 9.00 හා රාත්‍රී 12.00 වශයෙන් දේහයන් ආදාහනය කිරීමට සැලසුම්කර ඇතැයි ද ඔහු පවසා  ඇත. 

මේ අතර අන්තර් විශ්වවිද්‍යාල ශිෂ්‍ය බල මණ්ඩලයේ කැඳවුම්කරු වසන්ත මුදලිගේ සහ ජයවර්ධනපුර විශ්වවිද්‍යාලයේ මහා ශිෂ්‍ය සංගමයේ සභාපති අමිල සංදීප යන සැකකරුවන් ලබන 11 වැනිදා දක්වා දක්වා රක්ෂිත බන්ධනගාරගත කළේය. ඒ, සැකකරුවන් අද කඩුවෙල ප්‍රධාන මහේස්ත්‍රාත් මංජුල රත්නායක මහතා හමුවට ඉදිරිපත් කිරිමෙන් අනතුරුවයි.

වසන්ත මුදලිගේ මහතා ඇතුළු පිරිස අද අලුයම රත්මලාන ප්‍රදේශයේදී අත්අඩංගුවට ගනු ලැබුවේ, පසුගියදා පාර්ලිමේන්තුව ඉදිරිපිට පැවති විරෝධතාවයේදී පොලිස් නිලධාරියෙකුට තුවාල සිදු කිරිම ඇතුළු චෝදනා යටතේය.

මේ අතර අත්අඩංගුවට පත් වූ අන්තර් විශ්වවිද්‍යාල ශිෂ්‍ය බල මණ්ඩල ක්‍රියාකාරීන් තිදෙනෙකු රුපියල් ලක්ෂය බැගින් වු පුද්ගලික ඇප මත මුදා හැරිණි.

ඒ, එම නඩුව කොළඹ ප්‍රධාන මහේස්ත්‍රාත්වරයා හමුවේ කැඳවූ අවස්ථාවේදීය.

මහජනතාවට හිරිහැරයක් වන පරිදි උද්ඝෝෂණ ව්‍යාපාරයක නිරත වූයේ යැයි චෝදනා කරමින් කුරුඳුවත්ත පොලීසිය විසින් සැකකරුවන් අත්අඩංගුව ගනු ලැබිණි.

නඩුව ලබන දෙසැම්බර් 06 වැනිදා යළි කැඳවීමට නියමිතය.

ආණ්ඩුව දැන් නීතිවිරෝධී නොවන උද්ඝෝෂණවලට සහභාගි වූ අයව මඟ රැක සිට අත්අඩංගුවට ගැනීමේ දඩයමක් සිදුකරමින් සිටින බවත් එය ඉතාමත්ම බරපතළ තත්වයක් බවත් ජනතා විමුක්ති පෙරමුණේ ප්‍රධාන ලේකම් ටිල්වින් සිල්වා පවසයි.

ඔහු මේ බව සඳහන් කර සිටියේ අද (06) එම පක්ෂ මූලස්ථානයේ කැඳවා තිබූ මාධ්‍ය හමුවකදී අදහස් දක්වමින් වන අතර එහිදී මෙසේද පැවසීය.

“ආණ්ඩුව අනුගමනය කරමින් තිබෙන මර්දනකාරී ක්‍රියාවලිය පිළිබඳව අපගේ විරෝධය පළකිරීම සඳහා මෙම මාධ්‍ය හමුව පවත්වනවා. සාධාරණ හේතු මත පසුගිය දවස්වල උද්ඝෝෂණ ගණනාවක් පැන නැගුණා. කොතලාවල පනත මගින් අධ්‍යාපනය පෞද්ගලීකරණය හා මිලිටරීකරණය කිරීමට එරෙහිව, ඒ වගේම මේ දක්වා නොවිසඳී තිබෙන විදුහල්පතිවරු සහ ගුරුවර ගුරුවරියන්ගේ වැටුප් විෂමතාවය ඉවත් කරගන්න වගේම පොහොර ප්‍රශ්නය මුල් කරගෙන ඉතාම සාධාරණ උද්ඝෝෂණ පැනනැගුණා. ඒ උද්ඝෝෂණවලට ඇහුම්කන් දී සාධාරණ උත්තර ලබාදෙනවා වෙනුවට එක පැත්තකින් උද්ඝෝෂණවලට එරෙහිව ජනතා මතයක් හදන්නත් අනෙක් පැත්තෙන් උද්ඝෝෂණවලට සහභාගි වන ක්‍රියාකාරීන් හුදකලා කර දඩයම් කරන්නත් ආණ්ඩුව පෙළඹී සිටිනවා. මේක ඉතා බරපතළ කාරණයක්. මේ සාමකාමී උද්ඝෝෂණ පවත්වන්නේ ආණ්ඩුක්‍රම ව්‍යවස්ථාවෙන් ජනතාවට ලබාදී තිබෙන අයිතිය පාවිච්චි කරමිනුයි. ව්‍යවස්ථාවෙන් ලබාදී තිබෙන ඒ අයිතිය ගුරුවරු, ආචාර්යවරු, ශිෂ්‍යයෝ පාවිච්චි කරමින් යනවා. ඒ උද්ඝෝෂකයන්ගේ සාධාරණ ඉල්ලීම්වලට ඇහුම්කන් දී විසඳනවා වෙනුවට මර්දනය කිරීමට ගත් පියවර කිහිපයක් පසුගිය දවස්වල අපි දැක්කා.

අන්තරේ කැඳවුම්කරු අත්අඩංගුවටගත් ආකාරය : ප්‍රජාතන්ත්‍රවාදය පැත්තෙන් ගත්තොත් මේක පැහැර ගැනීමක් !

ඊයේ (05) රාත්‍රියේ රූපවාහිනී සංවාදයකට සම්බන්ධ වී පිටතට පැමිණි අන්තර් විශ්වවිද්‍යාල ශිෂ්‍ය බල මණ්ඩලයේ කැඳවුම්කරු වසන්ත මුදලිගේ මාධ්‍ය ආයතනය අසල රැකලා ඉඳලා අත්අඩංගුවට ගත්තා. අවම වශයෙන් අත්අඩංගුවට ගැනීමේ චෝදනාව ඉදිරිපත් කරන්න, අධිකරණ වරෙන්තුවක් ඉදිරිපත් නොකර පොලීසියෙන් ඔහුව අත්අඩංගුවට ගත්තා. ප්‍රජාතන්ත්‍රවාදය පැත්තෙන් ගත්තොත් මේක පැහැර ගැනීමක්. මෙම තත්වය පරාජයට පත්කළ යුතුයි. ඒ වගේම ඊයේ දහවල් පැවති අධ්‍යාපනය මිලිටරීකරණයට එරෙහි ජනතා ව්‍යාපාරය පැවත්වූ උද්ඝෝෂණයට සම්බන්ධ වූ කිහිප දෙනෙක් අත්අඩංගුවට ගත්තා. එය වෘත්තීය සමිති, බහුජන සංවිධාන, විශ්වවිද්‍යාල ආචාර්යවරුන් එකතුවී ඉතාමත්ම සාමකාමීව කොරෝනා තත්වය සලකා බලා සිදු කළ උද්ඝෝෂණයක්. මේ උද්ඝෝෂණයට පැමිණෙමින් සිටි ජයවර්ධනපුර විශ්වවිද්‍යාලයේ මහා ශිෂ්‍ය සංගමයේ සභාපති අත්අඩංගුවට ගත්තා. උද්ඝෝෂණය අවසානයේ කැළණිය විශ්වවිද්‍යාලයේ ශිෂ්‍යයෙක් අත්අඩංගුවට ගත්තා. ඒ වගේම ජයවර්ධනපුර විශ්වවිද්‍යාලයේ ආචාර්යවරුන් ආපසු යමින් සිටි බස් රථයක් මඟදී නවත්වලා සිවිල් ඇඳුමින් සැරසී සිටි කණ්ඩායමක් චිකාගෝවල කප්පම් ගන්න පැහැර ගන්නවා වගේ ක්‍රියාමාර්ග ගෙන තිබුණා.

උද්ඝෝෂකයින් අත්අඩංගුවට ගන්න කිසිම නීතිමය බලයක් පොලීසියට නැහැ !

උද්ඝෝෂණය කිරීම නීතිවිරෝධී නැහැ. ඒ නිසා උද්ඝෝෂකයින් අත්අඩංගුවට ගන්න කිසිම නීතිමය බලයක් පොලීසියට නැහැ. අනෙක් පැත්තෙන් උද්ඝෝෂණය කරන තැන නීති කැඩෙනවා නම් එතැනදී අත්අඩංගුවට ගත යුතුයි. එහෙම නොකර වාහන පසුපස ගිහින්, මුහුණු බලාගෙන ඉඳලා සැලසුම් කරලා දඩයමක් කරනවා. මෙහෙම මිනිස්සු පැහැර ගන්න, දඩයම් කරන්න කිසිම අයිතියක් නැහැ.

ආණ්ඩුව දැන් කරමින් ඉන්නේ සැලසුම් කරලා උද්ඝෝෂකයන් දඩයම් කිරීමක්. මෙය ඉතාමත්ම බරපතළ තත්වයක්. එතැනින් නතර නොවී සටන්වල ඉන්න නායකයින්ගේ ගෙවල්වලට ගිහින් බිය වද්දන ක්‍රියාවලියකුත් සිදු කරමින් ඉන්නවා. පේරාදෙණිය විශ්වවිද්‍යාලයේ මහා ශිෂ්‍ය සංගමයේ සභාපතිගේ ගෙදරට ගිහින් තියෙනවා. ඊට කලින් ලංකා ගුරුසේවා සංගමයේ නායක මහින්ද ජයසිංහ සහෝදරයාගේ ගෙදරට ගිහින් තිබුණා. මේ විධිහට බියවැද්දීම් කර එයින් නතර නොකර පහුගිය 04වැනිදා කොළඹ තිබුණු ගුරු විදුහල්පති උද්ඝෝෂණය අවසන් කර යමින් සිටි ගුරුවරුන්ව ස්ථාන කිහිපයකදීම අත්අඩංගුවට ගත්තා. දෙමටගොඩ, පෑලියගොඩ, වැල්ලවත්ත පොලීසිවලින් මේ විදිහට අත්අඩංගුවට ගත්ත විදුහල්පතිවරුන් සහ ගුරුවරුන් ගත්ත චෝදනාව කියන්නවත් පොලීසිය සමත් වෙලා නැහැ.

ආණ්ඩුව පෙන්වන්න හදන්නේ භීතියක් මැවීමයි !

අත්අඩංගුවට ගත් අය වරාය පොලීසියේ රඳවනවා. ඔවුන් ඉන්න ඕනෑ අත්අඩංගුවට ගත්ත පොලීසියේමයි. වරාය පොලීසිය තුළ රඳවා ගැනීම වැරදි රඳවා ගැනීමක්. නීතිඥවරුන්ටවත් අඩුම ගානේ පොලීසියට යන්න දෙන්නේ නැහැ. නීතිඥ සහාය ලබාගැනීමේ මූලික අයිතිවාසිකමත් උල්ලංඝනය කළා. ත්‍රස්තවාදීන් අල්ලා ගත්තා නෙවෙයිනේ, ඔවුන්ගේ ඥාතීන්ට ඔවුන්ව පෙන්වන්න ඕනෑ. සාමාන්‍ය නීතිය යටතේ අත්අඩංගුවට ගත් අය නීතිඥවරුන්ට බලන්න දෙන්නේවත් නැතිව රඳවාගෙන ඉන්නවා. ආණ්ඩුව පෙන්වන්න හදන්නේ භීතියක් මැවීමයි. ඒ තුළින් සටන් මර්දනය කරන්න ආණ්ඩුව උත්සාහ කරනවා. ගෝඨාභය රාජපක්‍ෂ මහත්මයාගේ ආණ්ඩුවයි සරත් වීරසේකර මහත්තයාගේ පොලීසියයි කරන්නේ සාධාරණ අයිතීන් වෙනුවෙන් සටන් කරන අයව හුදකලා කර දඩයම් කිරීමයි. ඔය පොලීසිය බාර ඇමතිතුමාම පියුමි හංසමාලි නිරෝධායනයට අරන් යනකොට බස් හරවාගෙන ඇවිත් ඇඳුම් ටික අරන් දුන්නා. ඒ ඇමතිවරයා ගුරුවර ගුරුවරියෝ අත්අඩංගුවට අරගෙන බලන්නවත් දුන්නේ නැහැ. ගුරුවරියන්ට විශේෂ අවශ්‍යතා තියෙනවා.

ඒගොල්ලන්ට ඇඳුමක් දෙන්නවත් ඉඩක් නොදී නීතිය වල් වැදිලා. තමන්ට කැමති අයට එක නීතියක්. අකමැති අයට තව නීතියක්. දැන් වෙලා තියෙන්නේ අපරාධකාරයින් නිදහස් කර තනතුරු ලබාදී අයිතිවාසිකම් වෙනුවෙන් සටන් කරන සියලු දෙනාට මර්දනය ගේන එක. අපි මේ රටේ පුරවැසියන්ගෙන් අහන්නේ ගෝඨාභය රාජපක්‍ෂ මහත්තයා ජයග්‍රහණය කරලා මේකද බලාපොරොත්තු වුණේ කියලා. මේකට එරෙහි වෙන්න කියලා අපි සමාජයෙන් ඉල්ලා හිටිනවා. මේ තත්වය පටන් ගන්නේ ගුරුවරුන්ගෙන්, විදුහල්පතිවරුන්ගෙන්, ශිෂ්‍ය නායකයින්ගෙන් වෙන්න පුළුවන්. හැබැයි අවසන් වෙන්නේ හැමෝගෙම ගෙවල්වලට ගිහිල්ලා. ඒ නිසා මේක පරද්දන්න ඕනෑ.

උද්ඝෝෂණවලට සහභාගි වුණ ගුරුවරුන් 70%ක් විතර ගෝටාභයට ඡන්දය දීපු අය !

උද්ඝෝෂණවලට කලින් ඒවා වැළැක්වීමේ නියෝග ගන්න අධිකරණයට ගියා. හැබැයි අධිකරණය ඒ නියෝග දුන්නේ නැහැ. උද්ඝෝෂණ වළක්වන්න අයිතියක් ආණ්ඩුක්‍රම ව්‍යවස්ථාවෙන් ලබාදී නැහැ. පොලීසියෙන් අත්අඩංගුවට ගත්ත අයට විරුද්ධව ඉදිරිපත් කළ චෝදනා එකක්වත් අධිකරණය ගණන් ගත්තේ නැහැ. ඒ නිසා ශරීර ඇප දුන්නා. නීතිපති දෙපාර්තමේන්තුවෙන්ම ආව කෙනෙක් මේ අයව රිමාන්ඩ් භාරයට පත් කරන ලෙස අධිකරණයෙන් ඉල්ලා සිටියා. ඒ වගේම නිරෝධායනයට දාන්න කියලත් ඉල්ලා සිටියා. අධිකරණය මේ දෙකම ප්‍රතික්‍ෂේප කළා. ශරීර ඇප මත මේ අය නිදහස් කළා. නීති විරෝධී නොවන උද්ඝෝෂණවලට සහභාගි වූ අයව මඟ රැක සිට අත්අඩංගුවට ගැනීම නීති විරෝධීයි. පොලීසිය යොදවා නීති විරෝධී වැඩ කරමින් ඉන්නේ ආණ්ඩුවයි. ඒගොල්ලෝ මේ ගමන් කරමින් ඉන්නේ තමන්ව නිර්මාණය කළ ජනතාව තමන්ට අහිමි කර ගැනීමකයි. උද්ඝෝෂණවලට සහභාගි වුණ ගුරුවරුන් 70%ක් විතර ගෝටාභය රාජපක්‍ෂ මහත්තයාට ඡන්දය දීපු අය. ඒ අයගේ උද්ඝෝෂණ මර්දනය කරන්න ක්‍රියා කිරීම ඔවුන්ගේ පදනම් අහිමි කරගැනීමක්. ලුණු හැදෙන්නෙත් වතුරෙන්, ලුණු දියවෙන්නෙත් වතුරෙන් කියල ගමේ කියමනක් තියෙනවා. ආණ්ඩුව මේ ගමන් කරමින් තිබෙන්නේ තමන්ව සිංහාසනයේ තැබූ ජනතාවට එරෙහිව පොල්ල උස්සලා තියෙන්නේ. ගෝඨාභය රාජපක්‍ෂ මහත්තයලාව සිංහාසනයේ තිබ්බ මේ ජනතාවම නුදුරු අනාගතයේදී ඔවුන්ව සිංහාසනයෙන් බස්සවයි කියලා අපි විශ්වාස කරනවා.

සිවිල් ඇඳුමින් ඇවිත් අත්අඩංගුවට ගැනීම් ?

පොලීසියෙන් අත්අඩංගුවට ගන්නවා නම් නිල ඇඳුමින් ඇවිත් චෝදනාව ඉදිරිපත් කර එහෙම නැත්නම් වරෙන්තුවක් ඉදිරිපත් කර අත්අඩංගුවට ගැනීමයි නීතිය. හැබැයි දැන් සිදුකරන්නේ සිවිල් ඇඳගෙන ඇවිත් සුදු වෑන් සංස්කෘතියේ ඡායාවන් පෙන්වීමක්. කවුරුත් නැති තැනක පැහැරගෙන ගියොත් පොලීසියෙන් කියයි ඔවුන් ගෙනිච්චේ නැහැ කියලා. මේක ඉතාමත්ම බරපතළ තත්වයක්. සාධාරණ උද්ඝෝෂණය කරන අය මර්දනය කිරීමෙන් ආණ්ඩුව තව සටන් බිමක් හදා ගන්නවා. සාධාරණ ඉල්ලීම් මත සටන් කරන ශිෂ්‍යයෝ, ආචාර්යවරු සහ ගුරු විදුහල්පතිවරුන්ගේ උද්ඝෝෂණවලට අමතරව පොලිස් මර්දනයට එරෙහිව සටන් කරන පිරිස් ඒකාබද්ධ වීමක් වෙනවා. ආණ්ඩුවට ඕනෑ සටන් වැඩිකර ගන්නද, එහෙම නැත්නම් ජනතාවගේ සාධාරණ ප්‍රශ්නවලට විසඳුම් ලබාදෙන්නද කියලා අපි අහනවා. මර්දනය කරලා සටන් නවත්වන්න බැහැ. ලෝකයේ කොහේවත් එහෙම වෙලා නැහැ. මර්දනය හැම විටම අලුත් සටන් නිර්මාණය කරනවා. සටන්වල වේගය වැඩි කරනවා. අලුත් පිරිස් සටන්වලට ඒකරාශී කරනවා. ඒ නිසා වහාම ආණ්ඩුව මේ මර්දනය නතර කර සාධාරණ උද්ඝෝෂණ කරන අයගේ හඬට ඇහුම්කන් දිය යුතුයි. ඒක ලොකු දෙයක් නෙවෙයි. හැමෝම ඉල්ලන කෙතලාවල පනත අයින් කරගන්න පුළුවන්. මේ වනවිට දෙවරක්ම හකුළාගෙන තියෙනවා. මේ පනත නොගෙනෙන බව ආණ්ඩුව කියනවා නම් ඊට විරුද්ධව ගේන උද්ඝෝෂණ නතර වෙනවා. හරිම සරලයි.

ගුරුවරුන් ඉර හඳ තාරකා ඉල්ලනවා නෙවෙයි !

ගුරු විදුහල්පතිවරුන්ගේ වැටුප් විෂමතාවය සම්බන්ධයෙන් ප්‍රතිපත්තියක් ලෙස පිළිගෙන විසඳන ක්‍රමයක් ඉදිරිපත් කළා නම් ඒ සටන නතර වෙනවා. ගුරුවරුන් ඉර හඳ තාරකා ඉල්ලනවා නෙවෙයි. මේ ඉල්ලීම් වෙනුවෙන් කරන උද්ඝෝෂණ මුග්ධ විදිහට පොලීසිය යොදවා මර්දනය කරන්න ආණ්ඩුව උත්සාහ කරනවා නම් ආණ්ඩුව පෙරළීමේ රැල්ලක් දක්වා ගමන් කරන්න ඉඩ තියෙනවා. කොරෝනා තත්වය පෙන්වා උද්ඝෝෂණ මර්දනය කරන්න ආණ්ඩුව කල්පනා කරන අතර ආණ්ඩුවේ උද්දච්ඡ හැසිරීම නිසා කොරෝනා ව්‍යාප්ත වෙමින් තිබෙනවා. ආණ්ඩුවට මිනිස් ජීවිතවලට වඩා තමන් වටේ ඉන්න ජාවාරම්කරුවන්ගේ ව්‍යාපාර රකින්න උත්සාහ කරනවා. උද්ඝෝෂණවලින් කොරොනා වර්ධනය වන බව ප්‍රචාරය කර අනෙක් පැත්තෙන් රුසියාවෙන් සංචාරකයෝ ගේන්න යනවා. ඔවුන් වැක්සීන් එක ගන්නවත් පී.සී.ආර්. එක කර ගන්නවත් ලැහැස්ති නැහැ. පහුගිය කාලයේ රට විවෘත කරන්න පියවර තිබ්බේ කවුද? ආණ්ඩුවට කොරෝනා සම්පතක්. ඒ ගොල්ලෝ කොරෝනා තියෙනවාට කැමතියි. කොරෝනා පෙන්නලා ජනතාවගේ කට වහලා ජනතා විරෝධී දේවල් ඔක්කොම කර ගන්නවා. අනෙක් පැත්තෙන් මිනිස්සුන්ගේ අයිතිවාසිකම් නොදී ඉන්නවා. ඒ වගේම දවසකට 100කට ආසන්න පිරිසක් කොරෝනා නිසා මිය යන අතර අවශ්‍ය කිසිම පහසුකමක් ලබාදී නැහැ. වගකීමකින් තොරව හැසිරෙනවා. ගුරුවරුන්ගේ උද්ඝෝෂණ පටන් ගැනීමට පෙර මංගල උත්සව, ස්පා අරින්න, පොළවල් විවෘත කරන්න, වගේ මිනිස්සුන් ඒකරාශී වෙන තැන් ක්‍රමානුකූලව විවෘත කළා. ඊට අමතරව පහුගිය දෙවැනිදා සිට සියලුම රාජ්‍ය සේවකයන් සේවයට කැඳවූවා.

රාජ්‍ය සේවකයන් පොදු ප්‍රවාහන මාධ්‍යවල තෙරපෙමින් එනවා. අවශ්‍ය තරම් ප්‍රවාහන පහසුකම් නැහැ. නමුත් උද්ඝෝෂකයන් මීටරයක් දුරින් ඉන්න උත්සාහ කරනවා. බස්වල, කෝච්චිවල ඒ පරතරය තියාගන්න බැහැ. කොරෝනා පාලනය අත්හැර දාලා සාධාරණ ඉල්ලීම් කරන කණ්ඩායම්වලට එරෙහිව කොරෝනා පෙන්නලා මහජන මතයක් හදනවා. ආණ්ඩුව හැසිරෙන්නේ කිසිම තර්කනයක් නැති ආකාරයට. ආණ්ඩුව මන්දබුද්ධික ලෙස හැසිරෙනවා. 02වැනිදා ඉඳලා රජයේ සේවකයෝ සියලු දෙනාම සේවයට කැඳවලා 05වැනිදා ගැබිණි මව්වරුන් සේවයට කැඳවීම නවත්වනවා. අනෙක් පැත්තෙන් රජයේ සේවකයන් අදියර දෙකක් යටතේ සේවයට කැඳවීමේ ගැසට් නිවේදනයක් නිකුත් කළා. කිසිම සිහි බුද්ධියක් නැති ආණ්ඩුවක් හැටියට ක්‍රියාමාර්ග ගන්නවා. කොහොම වුණත් ආණ්ඩුවට සියලු ගැසට් වගේම අනෙකුත් ක්‍රියාමාර්ගත් රිවස් කිරීමක් තියෙන්නේ. මෙහෙම රටක් ගෙනියන්න බැහැ. ගෝඨාභය රාජපක්‍ෂ මහත්තයා ආවාම දුර දැකලා තීන්දු ගන්න, වියත්මඟේ විද්වතුන්ගේ පාලනයක් බලාපොරොත්තු වුණා. දැන් වෙලා තියෙන්නේ අද ගහන ගැසට් එක හෙට වෙනස් කිරීමක්. ආණ්ඩුවේ මේ බැරිකම් වහගන්න දියත් කර තිබෙන මර්දනය වහාම නවත්වන්න ඕනෑ. කිසිම කෙනෙක් අසාධාරණ ඉල්ලීම් කරමින් උද්ඝෝෂණ කරන්නේ නැහැ. උද්ඝෝෂණ හමුවේ පැහැරගෙන යෑමේ මර්දනකාරීත්වය වහාම නතර කරන්න අපි බල කරනවා. හිතුවක්කා, මෝඩ මර්දනකාරී ක්‍රියාවලිය පරාජයට පත්කිරීම සඳහා එකතු වෙන්න කියලා ජනතාවට ආරාධනා කරනවා. ඒ වගේම අපි ආණ්ඩුවට අනතුරු අඟවනවා මේ යන්නේ සිංහාසනය අහිමි කර ගැනීමේ පාරක බව. ගෝඨාභය රාජපක්‍ෂ මහත්තයා ඇතුළු රාජපක්‍ෂ පවුල සිංහාසනයේ තිබ්බ ජනතාවම ඒ ගොල්ලන්ව සිංහාසනයෙන් බස්සන දිනය වැඩි ඈතක නෙවෙයි කියලා අනතුරු අඟවනවා.

මාධ්‍යවේදීන් නැගූ ප්‍රශ්නවලට පිළිතුරු ලබාදෙමින්…!

ආණ්ඩුව බලයට පත්වීමේ ඡන්ද පොරොන්දුවක් හැටියට ගුරු-විදුහල්පති වැටුප් විෂමතාවය විසඳන බව ප්‍රකාශ කළා. නමුත් එය සිදු නොකරන නිසා මේ ආණ්ඩුවට ඡන්දය දුන් ගුරු සහ විදුහල්පතිවරු විශාල පිරිසක් උද්ඝෝෂණවලට සහභාගි වෙනවා. එය ජනතා විමුක්ති පෙරමුණේ ඕනෑකමට කරන දෙයක් කියලා ආණ්ඩුව කියනවා නම් ඒ තරම් මෝඩකමක් තවත් නැහැ. ජනතා විමුක්ති පෙරමුණේ වෘත්තීය සමිති මේ සටනේ පෙරමුණේ ඉන්නවා. හැබැයි අපි කාටත් ඕනෑ වෙලා තියෙන්නේ ගුරුවරුන්ගේ සාධාරණ ගැටලුවලට විසඳුමක් ලබාදෙන්න. හැබැයි ආණ්ඩුවට කාව හරි බිලි අරගෙන සටන් මර්දනය කරන්න අවශ්‍යතාවයක් තියෙනවා. අපි ආණ්ඩුවෙන් අහන්නේ ගුරුවරුන්ගේ මේ ඉල්ලීම් සාධාරණද නැද්ද කියලා. ආණ්ඩුවට තියෙන්නේ සල්ලි නැහැ කියන එක නෙවෙයි, ප්‍රශ්නය විසඳන ක්‍රමයක් ඉදිරිපත් කරන එකයි. ආණ්ඩුවේ නාස්තිකාර වියදම්වලට සල්ලි නැහැ කියන්නේ නැහැ. හොරකම් කරනකොට මේක හොඳම වෙලාව. මැති ඇමතිවරුන්ට වාහන ගන්න හොඳම වෙලාව. හැබැයි අයිතිවාසිකම් ඉල්ලනකොට මේක හොඳ වෙලාවක් නෙවෙයි කියනවා. කොරෝනා අස්සේ බඩු මිල වැඩි කරන එක ආණ්ඩුව හොඳ වෙලාවට කරන වැඩක්ද? ගුරුවරු තමන්ගේ ඉල්ලීම් ඉල්ලනකොට තිබුණ බඩු මිල නෙවෙයි දැන් තියෙන්නේ.

ධනපති ආණ්ඩුවලට මිනිස්සුන්ගේ ඉල්ලීම් ලබාදෙන්න හොඳ වෙලාවක් තිබිලාම නැහැ. ජනතාව තමන්ගේ ඉල්ලීම් ලබාගත යුත්තේ ආණ්ඩුව නැකතක් බලලා ලබාදෙන වෙලාවකට නෙවෙයි. තමන්ගේ ප්‍රශ්නය තමන්ට දැනුණු වෙලාවට. ආණ්ඩුව දැන් කියන්නේ සල්ලි නැහැ කියලා. හැබැයි ජනාධිපතිවරණයට ඉස්සෙල්ලා ගෝඨාභය රාජපක්‍ෂ මහත්මයාගේ මාධ්‍ය සාකච්ඡාවකදී මාධ්‍යවේදියෙක් මුදල් හොයාගන්නේ කොහොමද කියලා ඇහුවා. ගෝඨාභය රාජපක්‍ෂ මහත්තයා උත්තර නොදී මහින්ද මහත්තයා දිහා බැලුවාම ඔහු කීවේ යුද්දය කාලෙත් සල්ලි හොයාගන්න බැහැ කියලා කීවත් අපි සල්ලි හොයා ගත්තා කියලා. සල්ලි හොයාගන්න ප්‍රශ්නයක් අපට නැහැ කීවා. අපි කියන්නෙත් ඒ කියපු විදිහට සල්ලි හොයාගෙන ප්‍රශ්න විසඳන්න කියලා. ඊට පස්සේ බැසිල් රාජපක්‍ෂ මහත්තයා ආපු ගමන් ප්‍රශ්න විසඳනවා කියනවා. දැන් කියන්නේ භාණ්ඩාගාරය හිස් කියලා. බලය ගන්නකොට පොරොන්දු දහස් ගණනක් දුන්නා. බලය ගත්තාට පස්සේ ඒ ගොල්ලෝ සල්ලි නාස්ති කරනවා. ජනතාව මොනවා හරි ඉල්ලපුවාම භාණ්ඩාගාරය හිස් කියනවා. ඒක හිස් නම් වගකියන්න ඕනෑ මහින්ද රාජපක්‍ෂ මහත්තයා, හිටපු ජනාධිපති මෛත්‍රීපාල මහත්තයා සහ රනිල් ආණ්ඩුව වගකියන්න ඕනෑ. භාණ්ඩාගාරයේ සල්ලි නැත්නම් මේ සමස්ත ක්‍රමයම වගකියන්න ඕනෑ. එහෙම ආණ්ඩු රටට වැඩක් නැහැ. භාණ්ඩාගාරය හිස් කරන ආණ්ඩු රටට වැඩක් නැති බව අපි ජනතාවට කියනවා. එහෙම නම් භාණ්ඩාගාර පුරවන්න බැරි ආර්ථික ක්‍රමය වෙනස් කරලා භාණ්ඩාගාරය පුරවමින් ජනතාවට සාධාරණව බෙන්න පුළුවන් ආණ්ඩුවක් පිහිටුවන්න කියලා ජනතාවගෙන් ඉල්ලා සිටිනවා.”

කිසිදු එන්නත් මාත්‍රාවක් ලබාගෙන නොමැති අවුරුදු 30ට වැඩි ඕනෑම අයෙකුට ඕනෑම එන්නත්කරණ මධ්‍යස්ථානයකින් එන්නත ලබාදීමට රජය තීරණය කර ඇත.

එන්නත්කරණය සහ ඉදිරි මෙහෙයුම් සම්බන්ධයෙන් කොවිඩ් මර්දන විශේෂ කමිටුව සමඟ අද (06) පෙරවරුවේ ජනාධිපති කාර්යාලයේ පැවති හමුවේදී ජනාධිපතිතුමා මේ බව සඳහන් කර තිබේ.

ඒ අනුව දෙවන එන්නත් මාත්‍රාව ලබාදෙන ඕනෑම මධ්‍යස්ථානයකින් ද වයස අවුරුදු 30ට වැඩි ඕනෑම අයෙකුට පළමු මාත්‍රාව ලබාගත හැකි වේ.

මේ වන විට තවත් මැති ඇමතිවරුන් තිදෙනෙකු කොරෝනා ආසාදිත බව වාර්තා වෙයි.

ඒ අනුව පොදුජන පෙරමුණේ පාර්ලිමේන්තු මන්ත්‍රී රෝහණ දිසානායකට කොරෝනා වෛරසය ආසාදනය වී ඇති අතර තම සමාජ ජාල ගිණුමේ සටහනක් තබමින් ඔහු මේ බව කියා සිටියි.

ආසන්න දින කිහිපය තමන් ඇසුරු කළ සියලු දෙනාට ස්වයං නිරෝධායනය වන ලෙසද ඔහු ඉල්ලා සිටී.

මේ අතර ආණ්ඩුව නියෝජනය කරන බදුල්ල දිස්ත්‍රික් මන්ත්‍රී තිස්ස කුට්ටිආරච්චිටද කොරෝනා ආසාදිත බව දැනගන්නට ඇත.

සමගි ජන බලවේගය පාර්ලිමේන්තු මන්ත්‍රී දිලිප් වෙදාරච්චි ද සඳහන් කරන්නේ තමන්ට කොරෝනා වෛරසය ආසාදනය වී ඇති බවයි.

ආසන්න සතියේ තමන් ආශ්‍රය කළ සියලු දෙනා නිරෝධායනයට ලක් වන ලෙස ද ඔහු ඉල්ලා සිටි.

තවද මේ වන විට අමාත්‍ය මහින්දානන්ද අලුත්ගමගේ කොරෝනා වැළඳී සිටියි.

ත්‍රස්තවාදය වැළැක්වීමේ පනතේ විධිවිධාන යටතේ ජනාධිපති ගෝඨාභය රාජපක්ෂ මහතා විසින් නිකුත් කරන ලද දැඩි අන්තවාදි මතවාදවලින් මුදා ගැනීමේ රෙගුලාසි ක්‍රියාත්මක කිරීම වළක්වාලමින් ශේෂ්ඨාධිකරණය ඊයේ (05) අතුරු නියෝගයක් නිකුත් කළේය.

මෙම අතුරු නියෝගය ලබන 24 වැනිදා තෙක් බලපැවැත්වෙන පරිදි නිකුත් කරනු කර ඇත.

මෙම රෙගුලාසි ක්‍රියාත්මක වීම වළක්වා ලන අතුරු නියෝගය නිකුත් කරන්නැයි ඉල්ලා මාධ්‍යවේදීන් හා මානව හිමිකම් ක්‍රියාකාරීන් පිරිසක් විසින් ගොනු කරන ලද මූලික අයිතිවාසිකම් පෙත්සම් 3ක් සලකා බලමින් ශේෂ්ඨාධිකරණය මෙම අතුරු නියෝග නිකුත් කළේය.

මුර්දු ප්‍රනාන්දු , යසන්ත කෝදාගොඩ සහ අචල වෙංගප්පුලි යන මහත්ම මහත්මීන්ගෙන් සමන්විත ත්‍රිපුද්ගල ශ්‍රේෂ්ඨාධිකරණ විනිසුරු මඩුල්ලක් හමුවේ මෙම පෙත්සම් සලකා බැලිණි.

මාධ්‍යවේදීන් හා මානව හිමිකම් ක්‍රියාකාරිකයන් වන රුවන් ලක්නාත් ජයකොඩි , කවින්ද්‍යා ක්‍රිස්ටෝපර් තෝමස්, විකල්ප ප්‍රතිපත්ති කේන්ද්‍රයේ විධායක අධ්‍යක්ෂ ආචාර්ය පාක්‍යසෝති සරවනමුත්තු හා ශිරාන් සනුර නමැත්තන් ගොනු කොට ඇති මෙම පෙත්සම්වල වගඋත්තරකරු ලෙස නීතිපතිවරයා නම් කරනු ලැබ සිටී.

පෙත්සම්කරුවන් සිය පෙත්සම් වලින් කියා සිටින්නේ 1979 අංක 48 දරණ ත්‍රස්තවාදය වැළැක්වීමේ තාවකාලික විධිවිධාන පනත යටතේ ජනාධිපති ගෝඨාභය රාජපක්ෂ මහතා විසින් පසුගිය මාර්තු 12 වැනි දින නිකුත් කරන ලද අංක 2218/68 /2021 දරණ අතිවිශේෂ ගැසට් නිවේදනය මගින් එම පනතේ 27 වැනි ඡේදය යටතේ අංක 01 නමින් “ දැඩි අන්තවාදි මතවාදයන්ගෙන් මුදාගැනීම් නමින් රෙගුලාසියක් ප්‍රකාශයට පත් කර ඇති බවය.

මෙම රෙගුලාසි යටතේ ඔනෑම පුද්ගලයකු අධිකරණ ක්‍රියාවලියකින් තොරව අත්අඩංගුවට ගෙන, පුනරුත්ථාපනයට යොමු කළ හැකි බවද පෙත්සම්කරුවෝ පෙන්වා දෙති.

මේ හේතුවෙන් පුද්ගලික නිදහසට දැඩි ලෙස තර්ජන එල්ල වන බවද පෙත්සම්කරුවෝ සිය පෙත්සම් වලින් කියා සිටිති.

මෙම රෙගුලාසි හේතුවෙන් ආණ්ඩුක්‍රම ව්‍යවස්ථාවේ 10 ,11 , 12.1 ,12.2 , 13.1 ,13.2 , 13.4 , 13 .5 ,13.6 ,13.1 (ආ) , 14.1 (ඈ) සහ 17 යන වගන්තී සෘජුවම උල්ලංඝනය වන බැවින් , මෙම පෙත්සම් විභාගයට ගැනීමට අවසර ලබා දෙන ලෙසත් , තමන්ගේත් රටේ ජනතාවගේත් මූලික අයිතිවාසිකම් කඩ වන බවට ප්‍රකාශ කරන ලෙසත් , මෙම රෙගුලාසිය ක්‍රියාත්මක කිරීම වළකාලන අතුරු නියෝගයක් නිකුත් ලෙසත් පෙත්සම්කරුවෝ සිය පෙත්සමින් ඉල්ලා සිටිති.

– lankadeepa

පවතින කොවිඩ් තත්ත්වය සැලකිල්ලට ගනිමින් විවාහ උත්සව ඇතුළු උත්සව පැවැත්වීමේදී අනුගමනය කළ යුතු මාර්ගොපදේශ නැවත සංශෝධනය කර තිබේ.

ඊට සමගාමීව ජනයා සමූහ වශයෙන් එක්රැස් වන වෙනත් කාර්යන්ට ද සීමා පනවා තිබේ.

ආසන සංඛ්‍යාව 500කට වැඩි උත්සව ශාලාවක පැවැත්වෙන විවාහ මංගල උත්සවයකට සහාභාගී විය හැකි උපරිම මට්ටම 150කි.

උත්සව ශාලාවේ ආසන සංඛ්‍යාව 500ට අඩුනම් උපරිමය 100 දෙනකුට සීමා කෙරේ.

අවමංගල්‍යයකට වරකට සහභාගීවීමට අවසර ලැබෙනුයේ 25 දෙනකුට පමණී.

සියලුම රාජ්‍ය උත්සව සැප්තැම්බර් 1 දක්වා කල් දැමේ.

රජයේ සේවකයන්ගේ පැමිණිම ආයතනයේ ප්‍රධානියා විසින් තීරණය කළ යුතුය.

හිටපු පාර්ලිමේන්තු මන්ත්‍රී රන්ජන් රාමනායකට Covid-19 ආසාදනයවී ඇත.

ඔහු අගුණකොළපැලැස්ස බන්ධනාගාර කොවිඩි ප්‍රතිකාර මධ්‍යස්ථානයේ ප්‍රතිකාර ලබමින් සිටින බව බන්ධනාගාර මාධ්‍ය ප්‍රකාශකවරයා පැවසීය.

අධිකරණයට අපහස කිරීමේ චෝදනා මත දැනට බන්ධනාගාර ගතව සිටි රන්ජන් රාමනායක  මීට දින කීපයකට පෙර ඔහුගේ ඥාතියකුගේ අවමඟලකට සහභාගීවීම සඳහා බන්ධනාකාර නිලධාරීන්ගේ ආරක්ෂාව යටතේ සීදුව ප්‍රදේශයට පැමිණියේය.

අන්තර් විශ්වවිද්‍යාලයීය ශිෂ්‍ය බල මණ්ඩලයේ කැඳවුම්කරු වසන්ත මුදලිගේ අද අලුයම රත්මලාන ප්‍රදේශයේදී අත්අඩංගුවට ගෙන තිබේ.

වසන්ත මුදලිගේ මහතා සිරස STEIN මැදිරියේ පැවති “මාවත” වැඩසටහන නිමවා යමින් සිටියදී රත්මලාන බොරුපන ප්‍රදේශයේදී පොලිස් අත්අඩංගුවට පත් ව ඇත.

පසුගියදා කොතලාවල පෞද්ගලික විශ්වවිද්‍යාල පනතට එරෙහිව පාර්ලිමේන්තුව ආසන්නයේ උද්ඝෝෂණයක් පවත්වා මහරගම පොලිස් ස්ථානාධිපතිවරයාට බරපතළ තුවාල සිදු කිරීම, මිනී පෙට්ටියක් පුළුස්සා මාර්ගයට හානි කිරීම, පළාත් අතර සංචරණ සීමා උල්ලංඝනය කිරීම සම්බන්ධයෙන් අන්තර් විශ්වවිද්‍යාල ශිෂ්‍ය බල බලමණ්ඩලයේ කැඳවුම්කරු වසන්ත මුදලිගේ, ජයවර්ධනපුර සරසවියේ මහා ශිෂ්‍ය සංගමය සභාපති අමිල සංදීප,ඇතුළු පස් දෙනකු මෙලෙස අත්අඩංගුවට ගත් බව පොලිස් මාධ්‍ය ප්‍රකාශක ජ්‍යෙෂ්ඨ නියෝජ්‍ය පොලිස්පති අජිත් රෝහණ  පවසයි.

මෙම දෙදෙනාට අමතරව සෙසු පුද්ගලයින් තිදෙනා අත්අඩංගුවට ගෙන ඇත්තේ පළාත් අතර සංචරණ සීමා උල්ලංඝනය කරමින් වෑන් රථවලින් කොළඹට පුද්ගලයන් ප්‍රවාහනය කිරීම සම්බන්ධයෙන් බවත් ඔවුන් පිරිස් ප්‍රවාහනය කළ වෑන් රථ 03 ද පොලිස් භාරයට බාරයට ගෙන ඇති බවත් පොලිස් මාධ්‍ය ප්‍රකාශකවරයා වැඩිදුරටත් පවසයි.

අත්අඩංගුවට ගත් සැකකරුවන් පස්දෙනා අද කඩුවෙල මහේස්ත්‍රාත් අධිකරණයට ඉදිරිපත් කිරීමට නියමිතව ඇත.

ජනාධිපති ලේකම් කාර්යාලය අසල ඊයේ (04) විරෝධතාවයේ නිරතවී සිටියදී අත්අඩංගුවට ගත් ගුරුවරුන් ඇතුළු 44 දෙනා පුද්ගලික ඇප මත නිදහස් කර තිබේ.

අද (05) පස්වරුවේ ඔවුන්ව කොටුව මහෙස්ත්‍රාත් අධිකරණය වෙත ඉදිරිපත් කර තිබුණි.

ඔවුන් සමග පොලිස් භාරයට ගත් වාහන ද නිදහස් කිරීමට අධිකරණය නියෝග කර ඇත.

නඩුව සැප්තැම්බර් 17වනදා යළි කැඳවීමට නියමිතය.

තවත් කොරෝනා මරණ 94 ක් සෞඛ්‍ය අධ්‍යක්ෂක ජනරාල්වරයා විසින් තහවුරු කර රජයේ ප්‍රවෘත්ති දෙපාර්තමේන්තුව විසින් ප්‍රකාශයට පත්කර ඇත.

ඒ අනුව මේ වාර්තා කර ඇත්තේ දිනක් ඇතුලත ඉහලම කොරෝනා මරණ ගණන විය යුතුය.

මෙම මරණ සමඟ මෙරට කොරෝනා ආසාදිතව මියගිය සමස්ත සංඛ්‍යාව 4,821 ක් දක්වා ඉහළ යයි.

මිනිස්සු මැරිලා වැටෙනවා - චන්න

මේ අතර සෞඛ්‍ය රාජ්‍ය අමාත්‍යවරයකු වන චන්න ජයසුමන පවසන්නේ, කොවිඩ් පැතිරීම නිසා මිනිසුන් රෝහල්වල මැරී වැටෙන තත්වයක් ඇතිවී ඇති බවය.

එසේම කොරෝනා රෝගීන්ට අවශ්‍ය ඔක්සිජන් ඉන්දියාවෙන් සහ සිංගප්පූරුවෙන් මිලදී ගැනීමට කටයුතු කරගෙන යන බවත් ඔහු පැවසීය.

ඒ අද (05) පාර්ලිමේන්තුවේ පැවති කොරෝනා මර්දන කටයුතු සඳහා සෞඛ්‍ය අමාත්‍යාංශයට අතිරේක මුදල් ප්‍රතිපාදන වෙන් කිරීම සඳහා ඉදිරිපත් කෙරුණු පරිපූරක ඇස්තමේන්තුව පිළිබඳ විවාදයේදී අදහස් දක්වමිනි.

විශාල ව්‍යසනකාරී තත්ත්වයක් මතුවී ඇති අවස්ථාවක උද්ඝෝෂණ පැවැත්වීම සුදුසු නැති බවත් උද්ඝෝෂණ නවත්වා රජයේ කොරෝනා පාලන වැඩපිළිවෙළට සහාය දක්වන්නැයි තමා සියලු ගුරුවරුන්ගෙන් ආයාචනාත්මකව ඉල්ලා සිටින බවත් රාජ්‍ය අමාත්‍යවරයා ඉල්ලා සිටියේය.

මංගල උත්සව සහ මූව ආවරණ ඉවත් කර එකට ආහාර ගැනීම වැනි කටයුතු කොවිඩ් පැතිරීමට ප්‍රධාන වශයෙන් හේතු වී ඇති බව සෞඛ්‍ය අංශ සොයා ගෙන ඇති බවත් මේ තත්ත්වය නිසා එවැනි ක්‍රියාකාරකම් ගැන වඩාත් සැලකිලිමත් වීමට සිදුවන බවත් හෙතෙම ප්‍රකාශ කළේය.

කොවිඩ් ආසාදනයවූ දරුවන් 45,831ක් මේ දක්වා වාර්තා වී ඇති බවත්, ඉන් වයස 18ට අඩු දරුවන් 14ක් මියගොස් ඇති බවත් සෞඛ්‍ය ඇමැතිනී පවිත්‍රා වන්නිආරච්චි පවසයි.

අමාත්‍යවරිය මේ බව සඳහන් කර සිටියේ අද (05) පාර්ලිමේන්තුවේදී විපක්ෂ නායකවරයා ඇසූ ප්‍රශ්නයකට පිළිතුරු දෙමින්ය.

මෙසේ කොවිඩ් ආසාදනයවූ ළමුන් අතර , වයස අවුරුදු 10 ට අඩු 19,688ක්, වයස අවුරුදු 10ත්18ත් අතර 26,143ක් ඇතුළත් වන බවත් අමාත්‍යවරිය පැවසුවාය.

එසේම ඇය වැඩිදුරටත් සඳහන් කර සිටියේ රටේ කොවිඩ් 19 ආසාදිත දරුවන් සංඛ්‍යාව සැලකිය යුතු ලෙස ඉහළ යමින් පවතින බවයි. .

මේ අතර මියගොස් සිටි දරුවන් 14 අතර, වයස අවුරුදු 0-5 අතර දරුවන් 7ක්, වයස අවුරුදු 6-10 අතර දරුවන් 3ක්, වයස අවුරුදු 11-15 අතර දරුවන් 2ක්, වයස 16-18 අතර දරුවන් 2ක්, වන බවත් සෞඛ්‍ය ඇමැතිවරිය සඳහන් කළාය.

පසුගිය සඳුදා සිට සියලුම රජයේ සේවකයන් සේවයට වාර්තා කරන ලෙස කල නියෝගය වෙනස් කරමින් සේවා මුර දෙකකට සේවකයන් රාජකාරියට ගෙන්වීමට රජය තීරණය කල බව රාජ්‍ය අමාත්‍ය චන්න ජයසුමන පවසයි.

මෙයට අමතරව රාජ්‍ය සේවයේ නිරතව සිටින ගැබිනි සේවිකාවන්ට නිවසේ සිට රාජකාරිය කිරීම සඳහා අවස්ථාව සලසා දීමටද එහිදී තීරණය කෙරුණු බව හෙතෙම සඳහන් කළේය.

මෙම තීරණ වලට අදාල චක්‍රලේඛ රාජ්‍ය පරිපාලන අමාත්‍යංශයේ ලේකම්වරයා විසින් අද හෙටම නිකුත් කෙරෙනු ඇතැයිද ඔහු සඳහන් කළේය.

මේ අනුව රාජ්‍ය සේවකයන් ආයතන ප්‍රධානීන්ගේ අභිමතය පරිදි සඳුදා අඟහරුවාදා, බදාදා සහ බ්‍රහස්පතින්දා සිකුරාදා සෙනසුරාදා වශයෙන් මුර දෙකකට සේවයට කැඳවීමට පියවර ගැනෙනු ඇතැයි පැවසූ චන්න ජයසුමන  සෞඛ්‍ය නිර්දේශ නිසියාකාරව ක්‍රියාත්මක වන්නේදැයි සොයා බැලීම සඳහා සෑම ආයතනයකම නිසි බලධාරියකු බැගින් පත් කිරීමටද එහිදී තීරණය කෙරුණු බව පැවසුවේය.

රාජ්‍ය පරිපාලන අමාත්‍යංශයේ ලේකම්වරයා එම කටයුතු සිදු කරනු ඇතැයිද හෙතෙම ප්‍රකාශ කළේය.

සාහිත්‍යය නිර්මාණ හරහා මුස්ලිම් අන්තවාදයට ආධාර අනුබල දුන් බවට චෝදනා කරමින් අත්අඩංගුවට ගෙන මාස 10ක් තිස්සේ පොලිස් රැදවුම්භාරය යටතේ කොළඹ රක්ෂිත බන්ධනාගාරයේ රදවා සිටින මුස්ලිම් ජාතික කවියකු වන අනාෆ් ජසීම් නැමැත්තා මුණ ගැසීමට ඔහුගේ නීතිඥයින්ට අවසර දෙන්නැයි ශ්‍රේෂ්ඨාධිකරණය ඊයේ (04) බන්ධනාගාර බලධාරීන්ට නියෝග කර තිබේ.

සාහිත්‍ය නිර්මාණ හරහා අන්තවාදයට අනුබල ලබාදුන් බවට චෝදනා කරමින් අනාෆ් ජසීම් මාස 10 ක පමණ කාලයක් තිස්සේ අත්අඩංගුවේ පසුවේ. ඔහු දමිළ භාෂාවෙන් කාව්‍ය නිර්මාණ සිදු කරන මුස්ලිම් ජාතික කවියෙකි. සිය කාව්‍ය නිර්මාණ හරහා ඔහු අන්තවාදයට ආධාර අනුබල ලබාදී ඇති බවයි පොලීසිය පවසයි.=

අධිකරණයකට ඉදිරිපත් නොකර රැඳවුම් භාරයේ තබාගෙන සිටින තමාව නිදහස් කිරීම සඳහා නියෝගයක් නිකුත් කරන්නැයි ඉල්ලා ඔහු ගොනුකළ මූලික අයිතිවාසිකම් පෙත්සම ඊයේ ශ්‍රේෂ්ඨාධිකරණය හමුවේ කැඳවා තිබිණි. ඒ මුර්දු ප්‍රනාන්දු, යසන්ත කෝදාගොඩ, ශිරාන් ගුණරත්න යන මහත්ම මහත්මී‍න්ගෙන් සමන්විත ත්‍රිපුද්ගල ශ්‍රේෂ්ඨාධිකරණ විනිසුරු මඩුල්ල හමුවේයි.

පෙත්සම්කරු වෙනුවෙන් පෙනී සිටි නීතිඥයන් පෙන්වා දුන්නේ පසුගිය මැයි මාසයෙන් පසුව සිය සේවාදායකයා අධිකරණය වෙත ඉදිරිපත් කර නොමැති බවයි. ඒ අනුව සිය සේවාදායකයා හමුවීම සඳහා කිසිදු අවස්ථාවක් හිමිව නොමැති බවත්, එය පෙත්සමේ ඉදිරි කටයුතු සඳහා බාධාවක් බවත් නීතිඥවරුන් පෙන්වා දී තිබේ.

නීතිපතිවරයා වෙනුවෙන් කරුණු දැක්වූ අතිරේක සොලිසිටර් ජනරාල් නෙරින් පුල්ලේ = සඳහන් කළේ රඳවා ගැනීමේ නියෝගය අවසන්වීමෙන් පසුව ඔහු මහේස්ත්‍රාත් අධිකරණය වෙත ඉදිරිපත් කරන බවයි. සැකකරු වෙනුවෙන් ඉදිරිපත් කර ඇති මූලික අයිතිවාසිකම් පෙත්සමට එරෙහිව නීතිපතිවරයා විසින් සීමිත විරෝධතා ගොනුකර ඇති බවද ඔහු පවසා තිබේ.

කරුණු සලකා බැලූ ශ්‍රේෂ්ඨාධිකරණ විනිසුරු මඩුල්ල, රිමාන්ඩ් බන්ධනාගාර ගතව සිටින අනාෆ් ජසීම් හමුවීම සඳහා නීතිඥවරුන්ට අවස්ථාව ලබාදෙන ලෙසට බන්ධනාගාර නිළධාරීන් වෙත නියෝග කර තිබේ.

පෙත්සම වැඩිදුර සලකා බැලීම සැප්තැම්බර් 08 වැනිදා දක්වා කල්තබා ඇත.