පුවත්

ශ්‍රී ලංකාවේ ජනවාර්ගික අර්බුදය, බුදුදහම,සංස්කෘතිය ඇතුළු විෂයයන් කෙරෙහි බලපෑම් සහගත අධ්‍යයන සිදු කළ සුප්‍රකට මානව විද්‍යාඥයෙකු වූ, මහාචාර්ය ගණනාථ ඔබේසේකර මහතා අභාවප්‍රාප්ත වී තිබේ.

ඇමරිකාවේ ප්‍රින්ස්ටන් විශ්වවිද්‍යාලයේ මානව විද්‍යාව පිළිබඳ සම්මානිත මහාචාර්යවරයෙකු වන ඔබේසේකර මහතාගේ මිය යනවිට වයස අවුරුදු 96 ක් 1930 පෙබරවාරි දෙවැනිදා උපන් ගණනාථ ඔබේසේකර මහතා වයස අවුරුදු 25 වන විට, එනම් 1955 වසරේදී පේරාදෙණිය විශ්වවිද්‍යාලයේ ඉංග්‍රීසි භාෂාව පිළිබඳ ශාස්ත්‍රවේදී උපාධිය සම්පූර්ණ කළේ ය.

එයින් වසර තුනකට පසු වොෂින්ටන් විශ්වවිද්‍යාලයෙන් සිය පශ්චාත් උපාධියත් 1964 වසරේදී මානව විද්‍යාව සම්බන්ධ ආචාර්ය උපාධියත් හිමි කර ගැනීමට එතුමාට හැකිවිය.

1968 සිට 1972 දක්වා ශ්‍රී ලංකා විශ්වවිද්‍යාලයේ සමාජ විද්‍යා අංශයේ මහාචාර්යවරයෙකු මෙන්ම ප්‍රධානියාද වූ ඔහු, 1972 වසරේ සිට වසර අටක් මානව විද්‍යාව පිළිබඳ ආචාර්යවරයෙකු ලෙස කටයුතු කළේ කැලිෆෝනියා විශ්වවිද්‍යාලයේයි.

1983 - 88 වකවානුවේ ප්‍රින්ස්ටන් විශ්ව විද්‍යාලයේ මානව විද්‍යා දෙපාර්තමේන්තුවේ සභාපතිවරයා ලෙස කටයුතු කළ ගණනාථ ඔබේසේකර මහතා අනතුරුව වසර 2000 දක්වා සිය දැනුම සිසු පරපුරට ලබා දුන්නේ ප්‍රින්ස්ටන් විශ්වවිද්‍යාලයෙනි.

දුටුගැමුණුගේ හෘදසාක්ෂිය, ප්‍රොතෙස්තන්ත බුදුදහම සහ පත් ඇදහිල්ල, සංස්කෘතියේ කාර්යය, මනෝවිශ්ලේෂණයේ සහ මානව විද්‍යාවේ සංකේතාත්මක පරිවර්තනය” ඇතුළු කෘති රැසක් ඔබේසේකර මහතා සම්පාදනය කර තිබේ.

ලෑන්ඩ් ටෙනුවර් ඉන් විලේජ් සිලෝන් ( ශ්‍රී ලංකාවේ ගමක ඉඩම් භුක්තිය ) ඔබේසේකර මහතාගේ වැදගත් කෘතීන් අතරින් එකකි.

මහාචාර්යවරයා, තමා පරිශීලනය කළ පොත් පත් රැසක් අඩංගුව තිබූ පුස්තකාලයද කලකට පෙර පේරාදෙණිය විශ්වවිද්‍යාලයට පරිත්‍යාග කළේ ය.

ශ්‍රී ලංකාවේ සිවිල් යුද්ධය අතරතුර මානව හිමිකම් උල්ලංඝනය කිරීම් සහ අපයෝජනයන් සම්බන්ධයෙන් වගකිව යුතු පුද්ගලයින්ට එක්සත් රාජධානිය විසින් අද (24) සම්බාධක පනවා තිබේ.

ඒ අනුව ශ්‍රී ලංකාවේ සිවිල් යුද්ධය අතරතුර නීති විරෝධී ඝාතන, වදහිංසා පැමිණවීම් සහ ලිංගික ප්‍රචණ්ඩත්වය සිදු කිරීම ඇතුළු බරපතළ මානව හිමිකම් උල්ලංඝනය කිරීම් සම්බන්ධව පුද්ගලයින් සිව් දෙනෙකුට එම සම්බාධක පනවා ඇති බව සඳහන් වෙයි.

එම පිරිසට හිටපු යුද හමුදාපතිවරුන් වන ජෙනරාල් ශවේන්ද්‍ර සිල්වා, සහ ලුතිනන් ජනරාල් ජගත් ජයසූරිය මෙන්ම හිටපු නාවික හමුදාපති අද්මිරාල් ඔෆ් ද ෆ්ලීට් වසන්ත කරන්නාගොඩ යන පිරිස අයත් වේ.

එමෙන්ම LTTE සංවිධානයේ කලක් සේවය කළ LTTE සංවිධානයේ නැගෙනහිර සන්නද්ධ අංශ නායකයා ලෙස කටයුතු කළ විනයාර්ගමූර්ති මුල්ලිදරන් හෙවත් කරුණා අම්මාන් ද ඇතුලත් වෙයි.

ඒ අනුව එම පිරිසට එක්සත් රාජධානියේ සංචාරය තහනම් කිරීම තහනම් කරන අතර එරට තුළ ඔවුන් සතුව ඇති වත්කම් පවතින්නේ නම් ඒවාද රාජසන්තක වනු ඇති බවයි සඳහන් වෙයි.

බහරේන් රාජ්‍යයට පැමිණෙන විදේශීය ශ්‍රමිකයින්ට මෙනින්ගොකොකල් රෝගය ඇතිවීම වැළැක්වීම සඳහා Meningococcal vaccine එන්නත්කරණය අනිවාර්ය කර ඇති බව එරට සෞඛ්‍ය අමාත්‍යාංශය නිවේදනය කර තිබේ.

ඒ අනුව මෙය ශ්‍රී ලාංකික ශ්‍රමිකයින්ටද ඒ අනුව අනිවාර්ය වී ඇතැයි ශ්‍රී ලංකා විදේශ සේවා නියුක්ති කාර්යංශය පවසයි.

විදේශ කටයුතු අමාත්‍යාංශය, බහරේන් ශ්‍රී ලංකා තානාපති කාර්යාලය එක්ව බහරේන් රාජ්‍ය හා ගල්ෆ් සහයෝගිතා කවුන්සලයේ උපදෙස් මත ශ්‍රී ලාංකිකයින්ගේ එන්නත්කරණ වැඩසටහන ක්‍රියාත්මක කිරීමට නියමිතව ඇත.

මෙනින්ගොකොකල් රෝගය යනු නයිසීරියා මෙනින්ජිටිඩිස් බැක්ටීරියාව මගින් ඇතිවන ආසාදන රෝගයක් වන අතර ප්‍රතිකාර නොකළහොත් එය මරණයට පත්වීමේ අවදානමක්ද පවතී.

මෙනින්ජයිටිස් බෝවන රෝගයක් වන අතර සංවර්ධිත සහ ඌන සංවර්ධිත රටවල රෝග, මරණ සහ ආබාධිතභාවය සඳහා මෙනින්ජයිටිස් සහ මෙනින්ගොකොක්සිමියාව ප්‍රධාන හේතුව බවට පත්ව තිබේ.

විශේෂයෙන් සංක්‍රමණික සේවකයින් විශාල සංඛ්‍යාවක් සිටින කලාපවල, රෝගය පැතිරීම අවම කිරීම සඳහා ඔවුන්ගේ ප්‍රතිශක්තිකරණ උපාය මාර්ගයේ වැදගත් කොටසක් ලෙස මෙනින්ගොකොකල් එන්නත භාවිතා කිරීම හා ගල්ෆ් සහයෝගිතා කවුන්සල මාර්ගෝපදේශ නිර්දේශ කර තිබේ.

නව විදෙස් තානාපතිවරු තිදෙනෙකු ජනාධිති අනුර කුමාර දිසානායක  වෙත අක්තපත්‍ර භාරදී තිබේ.

ඒ අද (24) ජනාධිපති කාර්යාලයේදීය.

ප්‍රංශය, පලස්තීනය සහ නේපාලය යන රටවල් වෙනුවෙන් මෙලෙස නව තානාපතිවරු සිය අක්තපත්‍ර භාර දී තිබේ.

ඒ අනුව, ප්‍රංශ තානාපතිවරයා ලෙස රෙමි ලැම්බර්ට්, පලස්තීන තානාපතිවරයා ලෙස ඉහාබ් අයි.එම්.කලීල් සහ නේපාල තානාපතිවරයා ලෙස ආචාර්ය පූර්ණ බහදූර් නේපාලි යන  ජනපති හමුවේ අක්තපත්‍ර භාරදී ඇත.

හිටපු ඇමති මර්වින් සිල්වා  ලබන 03 වැනදා දක්වා යළි රක්ෂිත බන්ධනාගාර ගත කිරීමට අධිකරණය අද (24) නියෝග කළේ ය.

ඒ ඔහු අද මහර මහේස්ත්‍රාත් කාංචනා එන් සිල්වා මහත්මිය හමුවට ඉදිරිපත් කිරීමෙන් අනතුරුවයි.

හිටපු ඇමති මර්වින් සිල්වා  ගොනුකළ ඇප අයදුම්පත ප්‍රතික්ශේෂ කරමින් මහේස්ත්‍රාත්වරිය එම නියෝගය කළාය.

හිටපු අමාත්‍යවරයා ඇතුළු තුන්දෙනෙකු පසුගිය 06 වැනිදා අපරාධ පරීක්ෂණ දෙපාර්තමේන්තුව අත්අඩංගුවට ගත්තේ ය.

ඒ, රජයේ ඉදිකිරීමක් සඳහා පවරා දුන් ඉඩමක් පෞද්ගලික ගැනුම්කරුවෙකුට විකිණීමේ සිද්ධියක් මුල්කර ගනිමින් පොදු දේපල පනත යටතේ ගැණෙන වැරදි කළ බවට චෝදනා නගමිනි.

නඩුව ලබන 03 වැනිදා යළි කැඳවීමට නියමිතයි.

රාජ්‍ය නිවේදිත නිලධාරීන්ගේ ස්ථාන මාරුකිරීම් හා පත්කිරීම් සම්බන්ධව පොලිස් මූලස්ථානයෙන් විශේෂ දැනුම්දීමක් කර තිබේ.

ඒ අනුව මහනුවර හා මාතලේ දිසාව භාර නියෝජ්‍ය පොලිස්පති ලෙස කටයුතු කළ නියෝජ්‍ය පොලිස්පති (රා/ඉ) ඩී. එම්. යූ. එම්. දිසානායක  විශේෂ ආරක්ෂක දිසාව භාර නියෝජ්‍ය පොලිස්පති තනතුරේ රාජකාරි ඉටුකිරීම සඳහා මාරුකර ඇත.

එමෙන්ම මඩකලපුව දිසාව භාර නියෝජ්‍ය පොලිස්පති ලෙස කටයුතු කළ නියෝජ්‍ය පොලිස්පති (රා/ඉ) ඩබ්. ඒ. ජේ. විශාන්ත  අගමැති ආරක්ෂක දිසාව භාර නියෝජ්‍ය පොලිස්පති තනතුරේ රාජකාරි ඉටුකිරීම සඳහා මාරුකර තිබේ.

මීට අමතරව ජ්‍යෙෂ්ඨ පොලිස් අධිකාරීවරු දෙදෙනෙකුට රාජකාරී ඉටුකිරීම සඳහා නව පත්කිරීම් සිදුකර තිබේ.

ඒ සම්බන්ධයෙන් පොලිස් මූලස්ථානය නිකුත්කළ නිවේදනය පහත දැක්වේ.

රක්ෂිත බන්ධනාගාරගත කර සිටින පොලිස්පති දේශබන්දු තෙන්නකෝන් මහතාට නිවසින් ආහාර ගෙනඒමට බන්ධනාගාර දෙපාර්තමේන්තුවේ අනුමැතිය හිමිව තිබේ.

ඒ, තමාට නිවසෙන් ආහාර ගෙන්වා ගැනීමට අවසර දෙන්නැයි ඔහු කළ ඉල්ලීමක් අනුවයි.

සිය ආරක්ෂාව තර කරන්නැයි කළ ඉල්ලීම සැළකිල්ලට ගනිමින් බන්ධනාගාරය තුළ ඊට සුදුසු ස්ථානයක දේශබන්දු තෙන්නකෝන්  රඳවා ඇතැයි බන්ධනාගාර මාධ්‍ය ප්‍රකාශ ගාමිණි බී දිසානායක  පැවසුවේ ය.

මාතර මහේස්ත්‍රාත් අධිකරණය පසුගියදා නියෝග කළේ, ලබන 03 වැනිදා දක්වා ඔහු රක්ෂිත බන්ධනාගාරගත කරන ලෙසයි.

ඒ අනුව ඔහු මේ වනවිට පල්ලේකැළේ දුම්බර බන්ධනාගාරයේ රඳවා සිටී.

වසර කිහිපයකට පසු කොළඹ සහ කෝට්ටේ ප්‍රදේශවල ''චිකුන්ගුන්යා'' රෝගය ව්‍යාප්තිය වැඩි වශයෙන් වාර්තා වෙමින් පවතින බව සෞඛ්‍ය අංශ පෙන්වා දෙයි.

මදුරුවන් බෝවන ස්ථාන හැකි පමණින් විනාශ කිරීම මගින් පමණක් ''චිකුන්ගුන්යා'' රෝගය ව්‍යාප්තිය පාලනය කරගත හැකි බව වෛද්‍යවරු පවසයි.

''චිකුන්ගුන්යා'' රෝගය මේ වනවිට හඳුනාගෙන ඇත්තේ, අප්‍රිකාව, අමෙරිකාව, යුරෝපය හා ආසියානු මහද්වීපවල මෙන්ම පැසිෆික් හා ඉන්දියානු සාගරවල පිහිටි දූපත්වල පැතිරෙන රෝගී තත්ත්වයක් ලෙසය.

''චිකුන්ගුන්යා'' වෛරසය ආසාදිත මදුරුවකු දෂ්ට කිරීමෙන් මිනිසුන්ට රෝගය පැතිරෙන අතර රෝගය වැළඳුණු සංචාරකයින්ගෙන්, බලපෑමට ලක්නොවූ ප්‍රදේශවලට ද රෝගය පැතිරීම සිදුවේ.

සෞඛ්‍ය අංශ පෙන්වාදෙන්නේ මෙරට තුළ යළිත් චිකන්ගුන්යා රෝගය ව්‍යාප්තවීමේ තත්ත්වයක් මතුව ඇති බවය.

මේ දිනවල පාසල් නිවාඩු සමය බැවින් දරුවන් නිතර පරිසරයට නිරාවරණය වන පසුබිමක ඇතැම් ප්‍රදේශවලට වැසි තත්ත්වය ද වර්ධනය වීමෙන් මදුරු ගහණය ඉහළ යා හැකි බැවින් ජනතාව ඒ සම්බන්ධයෙන් අධානයෙන් සිට මඳුරුවන් බෝවන තැන් විනාශ කිරීමට මෙන්ම අවට පරිසරය පිරිසිදුව තබා ගැනීමට වගබලා ගත යුතු වේ.

පළාත් පාලන ඡන්ද විමසීමට අදාළ ඡන්ද පත්‍රිකා මුද්‍රණය කිරීමට අදාළ කටයුතු අද (23) සිට ආරම්භ කිරීමට පියවර ගන්නා බව මැතිවරණ කොමිෂන් සභාව පවසයි.

පළාත් පාලන ආයතන ඡන්ද විමසීම මැයි මස 06 වැනිදා පවත්වන බව මැතිවරණ කොමිෂන් සභාව පසුගිය 20 වැනිදා නිවේදනය කළේය.

අ.පො.ස (සාමාන්‍ය පෙළ) විද්‍යාව ප්‍රශ්න පත්‍රය සම්බන්ධව සමාජ මාධ්‍ය තුළ සංසරණයවන ව්‍යාජ පුවතක් පිළිබඳව අධ්‍යාපන අමාත්‍යාංශය නිවේදනයක් නිකුත් කර තිබේ.ෙ

අධ්‍යාපන අමාත්‍යාංශයේ සහ විභාග දෙපාර්තමේන්තුවේ නම අවභාවිතා කරමින් ව්‍යාජ ලෙස සැකසූ නිවේදනයක් මේ වනවිට සමාජ මාධ්‍ය තුළ සංසරණය වන බව අධ්‍යාපන අමාත්‍යාංශය සඳහන් කරයි.

එම නිවේදනයට අනුව “මෙවර ප්‍රශ්න පත්‍රය විෂය බාහිරට ගොස් ප්‍රශ්න රටාව වෙනස්කොට සකසා ඇති අතර ඊට පිළියමක් වශයෙන් විද්‍යාව විෂය සඳහා මුහුණ දුන් සියලු සිසුන්ට අමතර ලකුණු 08ක් හිමිවන බවත් ඒ ඒ සාමාර්ථයන් සඳහා වන ලකුණු මට්ටම් ලකුණු 10කින් අඩු කර තිබෙන බව ද විශිෂ්ට සාමාර්ථයක් ලකුණු 65කට වඩා ලබාගත් සෑම කෙනෙකුට ම හිමි” බව සඳහන්කර ඇත.

නිවේදනයක් නිකුත් කරමින් අධ්‍යාපන අමාත්‍යාංශය දැනුම් දෙන්නේ එය සම්පූර්ණ අසත්‍ය තොරතුරක් බවයි.

එය ව්‍යාජ ලෙස සකසා සමාජ මාධ්‍ය තුළ පමණක් සංසරණය වීමට සලස්වා ඇති බවත් එවැනි කිසිදු තීන්දුවක් අධ්‍යාපන, උසස් අධ්‍යාපන සහ වෘත්තීය අමාත්‍යාංශය හෝ ශ්‍රී ලංකා විභාග දෙපාර්තමේන්තුව විසින් ගෙන නොමැති බවත් එම නිවේදනයේ සඳහන් වේ.

එමෙන්ම අධ්‍යාපන, උසස් අධ්‍යාපන හා වෘත්තීය අධ්‍යාපන අමාත්‍යාංශය හෝ විභාග දෙපාර්තමේන්තුව විසින් ප්‍රවෘත්ති නිවේදන නිකුත් කිරීම සිදු කරනු ලබන්නේ නීත්‍යනුකූලව ලියාපදිංචි ජනමාධ්‍ය ආයතන සහ අන්තර්ජාල වෙබ් අඩවි සඳහා පමණක් වන බවයි එම නිවේදනයේ වැඩිදුරටත් වාර්තා වෙයි.

ඒ සෑම නිවේදනයක්ම අධ්‍යාපන, උසස් අධ්‍යාපන හා වෘත්තීය අධ්‍යාපන අමාත්‍යාශයේ ලිපි ශීර්ශය සහිතව හෝ ශ්‍රී ලංකා විභාග දෙපාර්තමේන්තුවේ ලිපි ශීර්ශය සහිතව අදාළ බලධාරියාගේ අත්සන ද සහිතව අධ්‍යාපන අමාත්‍යාංශයීය මාධ්‍ය ඒකකය විසින් මාධ්‍ය වෙත නිවැරැදි සුපරීක්ෂණයකින් පසුව සිදු කරන බව සඳහන් වේ.

එම නිසා එවන් ව්‍යාජ පුවත්වලට නොරැවටෙන ලෙසද අධ්‍යාපන අමාත්‍යාංශය මහජනතාවගෙන් ඉල්ලා සිටී.

එළැඹෙන පළාත් පාලන මැතිවරණය සඳහා වන මැතිවරණ පැමිණිලි සම්බන්ධව පොලිස් මූලස්ථානය නිවේදනයක් නිකුත් කර තිබේ.

ඒ අනුව දිවයින පුරා පොලිස් ස්ථාන වෙත ඊයේ (22) වැනිදා මැතිවරණ පැමිණිලි 02ක් වාර්තා වී ඇති බව එම නිවේදනයේ සඳහන් වේ.

ගම්පොළ, නවකුරුදුවත්ත පොලිස් වසමේ වැටකෙදෙණිය ප්‍රදේශයේ පිහිටි නිවසකට ගල්වලින් පහරදීමක් සම්බන්ධව පැමිණිල්ලක් ලැබී ඇති අතර ඒ පිළිබඳ නවකුරුදුවත්ත පොලිස් ස්ථානය වැඩිදුර විමර්ශන සිදු කරයි.

එසේම අම්පාර, අක්කරපත්තුව පොලිස් වසමේ පල්ලිකුඩිඉරිප්පු 02 ප්‍රදේශයේ පුද්ගලයෙකුට බැන තර්ජනය කිරීමක් පිළිබඳ පැමිණිල්ලක් ලැබී තිබේ. අක්කරපත්තුව පොලිසිය ඒ සම්බන්ධයෙන් වැඩිදුර විමර්ශන සිදු කරනු ලැබේ.

වෛද්‍යවරුන්ගේ අමතර රාජකාරි සඳහා සිදුකරන ගෙවීම් සම්බන්ධයෙන් වූ ප්‍රශ්නයට මෙවර අයවැයෙන් සාධනීය විසඳුමක් හිමි වූ බව

රජයේ වෛද්‍ය නිලධාරින්ගේ සංගමයේ මාධ්‍ය ප්‍රකාශක වෛද්‍ය චමිල් විජේසිංහ පවසයි.

ඒ අද පැවැති අද ප්‍රවෘත්ති සාකච්ඡාවකදී අදහස් දක්වමින්ය.

අයවැය යෝජනා හරහා සෞඛ්‍ය ක්ෂේත්‍රයේ දීමනා කප්පාදුවන බව පවසමින් පසුගිය කාලසීමාව පුරා රට තුළ පැවතියේ දැඩි කතාබහකි.

ඇතැම් සෞඛ්‍ය වෘත්තිය සංගම් වැඩවර්ජන ක්‍රියාමාර්ගවලටද අවතීර්ණ වූ අතර බලධාරින් සමඟ සාකච්ඡා ද පවත්වා තිබුණේ මේ සඳහා සාධනීය පිළිතුරක් අපේක්ෂාවෙනි.

කොළඹ - නුවර මාර්ගයේ වරකාපොළ, හැලගල ප්‍රදේශයේ සිදුවූ බස් අනතුරකින් පුද්ගලයින් 40 දෙනෙකු තුවාල ලබා තිබේ.

පොලීසිය සඳහන් කළේ, ලංගම බස් රථ දෙකක් එකිනෙක ගැටීමෙන් මෙම අනතුර සිදුව ඇති බවයි.

එලෙස අනතුරට ලක්ව ඇත්තේ, කොළඹ සිට මහනුවර දෙසට සහ මහනුවර සිට කොළඹ දෙසට ධාවනය වූ බස් රථ දෙකක් වන අතර
තුවාලකරුවන් වරකාපොළ රෝහලට ඇතුළත් කර තිබේ.

මෙරට පාසල් සිසුන්ගෙන් 28.4%ක් සමාජ මාධ්‍ය භාවිතය, මාර්ගගත සන්නිවේදනය ආදි අන්තර්ජාලයේ සැරිසැරීම සඳහා සුපිරි ජංගම දුරකතන භාවිත කරන බව ඉකුත් දා නිකුත් වූ ශ්‍රී ලංකාවේ ගෝලීය පාසල් පාදක ශිෂ්‍ය සෞඛ්‍ය සමීක්ෂණය හෙළි කරයි.

ඒ පිරිසගෙන් 31.3%ක් පිරිමි දරුවන් වන අතර, ගැහැනු දරුවන්ගේ ප්‍රතිශතය 25.5%කි.

වැඩිම ඉහළ ජංගම දුරකතන භාවිතයක් ඇත්තේ වයස අවුරුදු 16-17 අතර වයස් කාණ්ඩයේ වන අතර, එය 40.6%ක ප්‍රතිශතයකි. එමෙන්ම ඉකුත් මාස 12 තුළ මෙරට පාසල් සිසුන්ගෙන් 5.4%ක් සයිබර් හිරිහැර කිරීම්වලට (Cyber bullying) ලක් වී ඇති බවද සමීක්ෂණ වාර්තාවෙන් වැඩිදුරටත් අනාවරණය වේ. ඒ අතරින් වයස අවුරුදු 13- 15 දක්වා වයස් කාණ්ඩයේ ළමයින් 5.6%ක් සයිබර් හිංසා කිරීම්වලට ලක් වන අතර, ගැහැනු දරුවන්ට සාපේක්ෂව පිරිමි දරුවන් සයිබර් හිංසාවලට ලක් වීම වැඩි අගයක් ගන්නා බවද නිරීක්ෂණය වී ඇත.

ගෝලීය පාසල් පාදක ශිෂ්‍ය සෞඛ්‍ය සමීක්ෂණය (GSHS) 2024 මඟින් මෙරට රජයේ පාසල්වල අවුරුදු 13-17 අතර සිසුන්ගේ ආහාර පුරුදු, ශාරීරික ක්‍රියාකාරකම්, සනීපාරක්ෂාව, මානසික සෞඛ්‍යය, මුඛ සෞඛ්‍යය, මත්ද්‍රව්‍ය භාවිතය, ප්‍රචණ්ඩත්වය, මවුපියන් සහ සම වයසේ මිතුරන් සමඟ සම්බන්ධ වීම සහ ලිංගික හැසිරීම් ආදිය පිළිබඳ සමීක්ෂණයට ලක් කර ඇත.

2025 විසර්ජන පනත් කෙටුම්පතේ තෙවැනිවර කියවීම වැඩි ඡන්ද 159 කින් සංශෝධන සහිතව අද (21) පාර්ලිමේන්තුවේ දී සම්මත විය.

අද දිනයේ මුදල් ක්‍රමසම්පාදන සහ ආර්ථික සංවර්ධන අමාත්‍යශයේ වැය ශීර්ෂ විවාදයට ගනු ලැබීය.

එහිදී උදෑසන 10.00ට විවාදය ආරම්භ වූ අතර පස්වරු 6.00ට විවාදය අවසන් වීමෙන් පසු පැවැති අයවැය තුන්වනවර කියවීමේ ඡන්ද විමසීමේ දී, පක්ෂව ඡන්ද 159 ක් ප්‍රකාශ වූ අතර විරුද්ධව ඡන්ද 45 ක් ප්‍රකාශ විය.

ඒ අනුව වැඩි ඡන්ද 114කින් අයවැය තෙවන වර කියවීම සම්මත වූ අතර මෙහිදී ශ්‍රී ලංකා කම්කරු පක්ෂයේ, කාදර් මස්තාන් අයවැයට පක්ෂව ඡන්දය ලබා දීම විශේෂත්වයක් විය.

රාජ්‍ය සේවයට අදාළව පවත්නා නීතිරීති හා රෙගුලාසි සමාලෝචනයට ලක්කර සරල කිරීම සඳහා මහජන අදහස් හා යෝජනා කැඳවා ඇතැයි රාජ්‍ය පරිපාලන, පළාත් සභා සහ පළාත් පාලන අමාත්‍යාංශය නිවේදනය කරයි.

ශ්‍රී ලංකාවේ දිස්ත්‍රික් හා ප්‍රාදේශීය පරිපාලන සහ පළාත් පරිපාලනය යාන්ත්‍රණය තවමත් ක්‍රියාත්මක වන්නේ බ්‍රිතාන්‍ය යටත්විජිත සමයේ ආඥා පනත් සහ 1950 සිට 1970 දශකවල පනවනු ලැබූ නීති රෙගුලාසි හා ක්‍රියා පටිපාටි අනුවය.

එවකට පැවති සමාජ ආර්ථික තත්ත්වය, ප්‍රවාහන හා සන්නිවේදන යටිතල පහසුකම් පදනම් කරගනිමින් මෙම ක්‍රියා පටිපාටි ගොඩනගා ඇති අතර, වර්තමාන සංවර්ධන අවශ්‍යතා සහ මහජන කාර්යයන් ඉටුකිරීමට මෙම ක්‍රියා පටිපාටි කාලීනව සංශෝධනය විය යුතු බව අදාළ අමාත්‍යාංශය දැනුම් දෙයි.

ඒ අනුව පහත සඳහන් ආයතනවලින් ලබාගන්නා සේවා සම්බන්ධයෙන් නිරීක්ෂණය කර ඇති නීති, රෙගුලාසි හා ක්‍රියා පටිපාටි ගැටලු, එම ගැටලු විසඳීම සඳහා වූ යෝජනා පහත ලිපිනයට එවන ලෙසත් අමාත්‍යාංශය මහජනතාවගෙන් ඉල්ලා සිටී.

සම්බන්ධීත රාජ්‍ය ආයතන –

• දිස්ත්‍රික් ලේකම් කාර්යාල
• ප්‍රාදේශීය ලේකම් කාර්යාල
• මහ නගර සභා
• ප්‍රාදේශීය සභා
• රෙජිස්ට්‍රාර් ජනරාල් දෙපාර්තමේන්තුව
• විශ්‍රාම වැටුප් දෙපාර්තමේන්තුව

අදහස් එවිය යුතු ලිපිනය –

විද්‍යුත් ලිපිනය – This email address is being protected from spambots. You need JavaScript enabled to view it.
Whatsapp – 00740896768
ලිපිනය – ප්‍රාදේශීය පරිපාලන ප්‍රතිසංස්කරණ අංශය, 17 වන මහළ, නිල මැදුර ඇල්විටිගල මාවත, කොළඹ 05

2025 පළාත් පාලන ආයතන ඡන්ද විමසීම සඳහා මෙවර පිළිගත් දේශපාලන පක්ෂවලින් හා ස්වාධීන කණ්ඩායම්වලින් අපේක්ෂකයින් 80,000කට ආසන්න පිරිසක් ඉදිරිපත්ව සිටී.

එම පිරිස ඉදිරිපත් වූයේ පිළිගත් දේශපාලන පක්ෂ 107 කින් හා ස්වාධීන කණ්ඩායම් 49 කින් ය.

ඉන් සභිකයින් 8500කට ආසන්න පිරිසක් තෝරාපත් කර ගැනීමට නියමිතය.

නාමයෝජනා භාර ගැනීම ඊයේ දහවල් 12 ට අවසන් විය.

ඡන්ද විමසීම සඳහා පිළිගත් දේශපාලන පක්ෂ සහ ස්වාධීන කණ්ඩායම් ඉදිරිපත් කළ නාම යෝජනා පත්‍ර රැසක්ද ප්‍රතික්ෂේප වී තිබේ.

මැතිවරණ කොමිසම පැවසුවේ, මැයි 06 වැනිදා පළාත් පාලන මැතිවරණය පැවැත්වෙන බවයි.

මේ අතර, මැතිවරණ අපේක්ෂකයින්ගේ නම් ගැසට් මගින් ප්‍රකාශයට පත් කිරීම ඉදිරි සතිය තුළ සිදු කරන බව මැතිවරණ කොමිෂන් සභාව ප්‍රකාශ කළේ ය.

වාරියපොළදී ගුවන් හමුදා පුහුණු යානයක් කඩා වැටී තිබේ.

නියමුවන් දෙදෙනා පැරෂුට් මගින් ආරක්ෂිතව ගොඩ බැස ඇති අතර , ගුවන් අනතුරින් කිසිදු පුද්ගලයෙකුට ජීවිත හානි නොමැති බව ගුවන් හමුදා ප්‍රකාශකවරයා සඳහන් කරයි.

ශ්‍රී ලංකා ගුවන් හමුදාවට අයත් නියමුවන් පුහුණු කිරීමේ K8 වර්ගයේ යානයක් වාරියපොල ප්‍රදේශයට කඩා වැටීමේ සිද්ධිය සම්බන්ධයෙන් පරීක්ෂණ පැවැත්වීම සඳහා ගුවන් හමුදාපති විසින් සත්පුද්ගල කමිටුවක් පත් කර තිබේ.