V2025

පුවත්

ශ්‍රේෂ්ඨාධිකරණ තීන්දුව ආවේ නෑ කියා වරාය නගර විවාදය කල්දමයි !

වරාය නගර පණත් කෙටුම්පත සම්බන්ධයෙන් වූ විවාදය කල් දැමීමට ආණ්ඩුවට සිදුව ඇත.ඒ අදාළ කෙටුම්පත අභියෝගයට ලක්කරමින් ශ්‍රේෂ්ඨාධිකරණය වෙත ගොනුකළ පෙත්සම් විභාගයේ තීන්දුව අද (04) ලැබී නැති බව කතානායක දැනුම්දීමත් සමඟය.

මීට පෙර පාර්ලිමේන්තුවේ පක්ෂ නායක රැස්වීමේදී ආණ්ඩුව දැඩි ස්ථාවරයක සිට පවසා ඇත්තේ අදාළ තීන්දුව අද (04) කතානායක පාර්ලිමේන්තුවට දන්වන බවත් හෙට (05) එක් දිනක විවාදයක් හරහා පණත් කෙටුම්පත ජන්ද විමසීමට ලක්කරන බවය.

එහිදී පාර්ලිමේතුවේ ආණ්ඩුවට විරුද්ධ පක්ෂ මෙතරම් සංකීර්ණ සහ තීරණාත්මක පණත් කෙටුම්පතක් සම්බන්ධව විවාද කිරීමට එක් දිනයක් කොහෙත්ම ප්‍රමාණවත් නොවන බව දැඩිව පෙන්වාදී ඇතත් ආණ්ඩුව ඊට එකඟ නොවූ බව විපක්ෂයේ පක්ෂ පවසයි.

වාර්තා වන ආකාරයට ආණ්ඩුව මේ දින කිහිපයක විවාදය ප්‍රතික්ෂේප කර ඇත්තේ කොරෝනා වසංගතය  ගැන පවසමිනි.

කෙසේ නමුත් මේ වන විට තීන්දුව වී ඇත්තේ  ලබන 18, 19, 20, 21 යන දිනවල විවාදය පැවැත්වීමටය.

Comment (0) Hits: 108

සංචරණ සීමා සඳහා උපරිම ක්‍රියාමාර්ග ගත යුතුයි – ශ්‍රී ලංකා වෛද්‍ය සංගමය

රෝහල් ශීඝ්‍රයෙන් පිරී යමින් පවතින බැවින් අත්‍යාවශ්‍ය සේවා පමණක් පවත්වාගෙන සංචරණ සීමා උපරිමයෙන්ම ක්‍රියාත්මක කිරීමට ගත හැකි උපරිම ක්‍රියාමාර්ග ගත යුතුව ඇතැයි, ශ්‍රී ලංකා වෛද්‍ය සංගමය පවසයි.

අද (4) මාධ්‍ය සාකච්ඡාවක් කැඳවමින් එහි සභාපතිනි විශේෂඥ වෛද්‍ය පද්මා ගුණරත්න මහත්මිය පැවසුවේ, කොරෝනා රෝගීන් හඳුනා ගැනීම පාලනයකින් තොරව ඉහළ යන බවක් පෙන්නුම් කරන බවයි.

 

Comment (0) Hits: 104

ධම්මික පැනිය වගේම තමයි කොවිඩ් පාලනයත් !

"ධම්මික පැනිය වගේම තමයි ජනාධිපතිවරයා ඇතුළු මුළු ආණ්ඩුවේම කොවිඩ් පරිපාලනය. මුලු ආණ්ඩුවම ධම්මික පැනියක්. 
අති විශිෂ්ඨ කාර්ය මණ්ඩලයක් ඉන්න, නොමිලයේ සෞඛ්‍ය පහසුකම් ලබාදෙන සැකිල්ල හරි තියෙන රටක, සාක්‍ෂරතාවය 95% පැනලා තියෙන රටක මොනවද මේ කරන්නේ? රට විද්‍යානුකූලව පරිපාලනය කරලා ගෙනියන්න තිබුණු තත්වය අවුල් කළේ මේ ආණ්ඩුව. මේ සෞඛ්‍ය ඇමතිතුමිය ධම්මික පැණිය බීලා, ආණ්ඩුවේ සහ පෞද්ගලික නාලිකා යොදාගෙන ජනතාව අතරට ප්‍රචාරයන් යැව්වා. බොරු දේශප්‍රේමී කතන්දර වපුරලා මුළු රටක් රාජ්‍ය අනුග්‍රහයෙන් මේ පිස්සුව පස්සේ එළෙව්වා. අද මොකද වෙලා තියෙන්නේ? මේවට ආණ්ඩුව සහ නාලිකා වගකියන්න  ඕනෑ නැද්ද? ආණ්ඩුවම ධම්මික පැණිය වගේ තමයි. මේව සරල නැහැ. ව්‍යසනය පාලනය කරන්න ක්‍රම ලෝකය පුරා තියෙද්දී ඒවා නොකර ආණ්ඩුව සහමුලින්ම මේක අවුල් කළා." යැයි ජනතා විමුක්ති පෙරමුණේ ජාතික සංවිධායක බිමල් රත්නායක පවසයි.
ඔහු මේ බව සඳහන් කර සිටියේ ඊයේ (03) ජවිපෙ මුලස්ථානයේ පැවති මාධ්‍ය හමුවක් පවත්වමින්ය.
එහිදී ඔහු වැඩිදුරටත් මෙසේද පැවසීය.
රට පුරා භයානක අන්දමින් වර්ධනය වෙමින් තිබෙන, ඒ වගේම අයාලේ යාමට ඉඩ හැර තිබෙන කොවිඩ් වසංගතය සම්බන්ධයෙන් ජනතාව සහ අදාල බලධාරීන් දැනුවත් කිරීම වෙනුවෙන් මේ මාධ්‍ය  හමුව පවත්වනවා. පසුගිය සති තුනකට ආසන්න කාලයක් තුළ සතියක් තුළදී කොරෝනා ආසාධිතයින් 10,000කට වැඩි ප්‍රමාණයක් බැගින් වර්ධනය වෙමින් තිබෙනවා. මහජන සෞඛ්‍ය පරීක්‍ෂකවරුන්ගේ සංගමය මෙම ආසාධිතයින් සංඛ්‍යාව පී.සී.ආර්. පරීක්‍ෂණ 15,000 වගේ මට්ටමක් තුළ වාර්තා වන බව ප්‍රකාශ කර තිබෙනවා. ලෝකයේම ගත්තත් ආසාධිත ප්‍රතිශතය ඉහළ අගයකට ගොස් තිබෙනවා. මහජන සෞඛ්‍ය පරීක්‍ෂකවරුන්ගේ සංගමය කරුණු දෙකක් අවධාරණය කරනවා. 
එකක් තමයි පී.සී.ආර්. පරීක්‍ෂණවලින් වාර්තා වන ප්‍රමාණය “ඊයේ” කියලා සඳහන් නිවේදනවල වාර්තා වෙන්නේ දින තුනකට පෙර ආසාධිතයින් බව. මේක බරපතළ තත්වයක්. අපේ රටේ වෛරසය ව්‍යාප්ත වෙන්න පටන් ගෙන මාස 15කට පස්සෙත් ඊයේ තිබිච්ච තත්වය හරියට කියන්න බැරිනම් ආණ්ඩුවේ කලමණාකරණය පිළිබඳ බරපතළ ගැටලුවක් පැන නගිනවා. වේගයෙන් පැතිරෙන වසංගත තත්වයක් හමුවේ මෙය ඉතා භයානක තත්වයක්.  
ඊයේ(02) මහජන සෞඛ්‍ය පරීක්‍ෂකවරුන්ගේ සංගමේ ප්‍රකාශයක් උපුටාගෙන මාධ්‍ය වාර්තා කර තිබෙන්නේ බිම් මට්ටමේ රාජකාරී කරන දත්ත අනුව කොරෝනා මරණ ප්‍රමාණය පිළිබඳව සැකයක් තිබෙන බවයි. අපිටත් මේ බරපතළ සැකය තිබෙනවා. මහජන සෞඛ්‍ය පරීක්‍ෂකවරුන් අහඹු පරීක්‍ෂණ සිදුකිරීම සම්බන්ධයෙන් රිමෝට් කන්ට්‍රෝල් එක වගේ දත්ත වැඩි කරන, අඩු කරන තත්වය ගැන අනතුරු අඟවා තිබෙනවා. ආසාධිතයන් අඩුවෙන් කියන්න ඕනෑ නම් ඒ වෙනුවෙන් මොන ප්‍රදේශවල පී.සී.ආර්. කළ යුතුද කියලා දැන් දන්නවා. ආසාධිතයින් වැඩියෙන් දක්වන්න ඕනෑ නම් ඒ පී.සී. ආර්. සංඛ්‍යාවම කළ යුත්තේ මොන ප්‍රදේශවලද කියලත් දන්නවා. 
පී.සී.ආර්. ප්‍රමාණය උඩ පහළ යවමින් සහ තම තමන්ට ඕනෑ ප්‍රදේශවල පී.සී.ආර්. කරමින් දේශපාලන සූදුවක් ආණ්ඩුව කරන බව පැහැදිලි වෙනවා. තමන්ගේ අන්ත අරාජික නූගත් උද්දච්ඡ දේශපාලන තීන්දු ගන්නා ජනාධිපතිවරයා ඇතුලු කැබිනට් මණ්ඩලයේ මේ හැසිරීම වහගන්න පී.සී.ආර්. පරීක්‍ෂණ සූදුව ඉතා හොඳින් ගෙන යනවා. මේ තත්වය තුළ මරණ ප්‍රමාණය ඉතා බරපතළ තත්වයක්. මේ නිසා සෞඛ්‍ය ක්‍ෂේත්‍රයේ සියලුම වෘත්තිකයන්ට අවබෝධයක් ලැබී තිබෙනවා. වෘත්තීය සමිති නැති ක්‍ෂේත්‍රවලට තමන් දකින බරපතළ තත්වය කියා ගන්න බැරිව ඉන්නවා. කාර්ය සාධක බලකායක් තියෙනවා. හමුදාපතිවරයා විවිධ දේවල් කියනවා. දෙහිඅත්තකණ්ඩියේ රෝගීන් හැටකට ආසන්න ප්‍රමාණයක් ප්‍රවාහනය කරන්න පහසුකම් නැතිව පැය හයක් තිස්සේ මුළු රැයක් පුරා කැබ් රථයක ගෙනගිය ආකාරය ඡායාරූපත් සමග වාර්තා කර තිබුණා. මේ වගේ වාහනයකින් රෝගීන් ප්‍රවාහනය කරනවා නම් තිබෙන තත්වය මොකක්ද? බස් එකක්, ඇම්බියුලන්ස් එකක්, වෑන් එකක් දෙන්න බැරිනම් මේ කාර්ය සාධනය මොකක්ද? මෙහෙමද ලෙඩ්ඩු ප්‍රවාහනය කරන්නේ? 
තමන්ගේ නොහැකියාව ජනාධිපතිවරයා ප්‍රමුඛ ආණ්ඩුව ඉතාමත් සරල තැන්වලින් පවා එළියට ඇවිල්ලා තියෙනවා. අපි මෙතන ප්‍රශ්න කරන්නේ එන්නත ගැන නෙවෙයි. නමුත් කාර්ය සාධනය කරන්නේ මෙහෙමද? කොරෝනා පිළිබඳව අඩුම ගානේ 06දෙනෙක් ප්‍රකාශ නිකුත් කරනවා. හමුදාපතිවරයා, ජනාධිපති මාධ්‍ය අංශය, සෞඛ්‍ය ඇමතිවරිය, සෞඛ්‍ය අධ්‍යක්‍ෂ ජනරාල්වරයා, චන්ද ජයසුමන අමාත්‍යවරයා සහ කොරෝනා සම්බන්ධම රාජ්‍ය ඇමති වෛද්‍ය සුදර්ශනී ප්‍රනාන්දුපුල්ලේ මහත්මිය ප්‍රකාශ නිකුත් කරනවා. එකම ප්‍රශ්නය ගැන මේ හය දෙනා විවිධ දේවල් කියනවා. මේ ඔක්කොටම අමතරව මැදිහත් වෙමින් ජනාධිපතිවරයාට හිතෙන දේවල් කියනවා. මේක ජංජාලයක් වෙලා තියෙන්නේ. එක මොහොතකදී සම්පූර්ණ උත්සව නතර කරන බව කිවුවා. ඊට පස්සේ විවාහ මංගල උත්සවවලට බලපාන්නේ නැහැ කියලා හමුදාපතිවරයා කිවුවා. මේ නිසා බිම් මට්ටමේ පී.එච්.අයි මහත්වරු, එම්.ඕ.එච්. කාර්යාලවල ඉන්න වෛද්‍යවරු බැනුම් අහනවා. අඩු ගානේ මේ තුන්වැනි රැල්ලටවත් එක ප්‍රකාශකවරයෙක් පත්කර නැහැ. 
අපිට එන්නත් ලැබුණේ ලක්‍ෂ දොළහයි. ලෝක සෞඛ්‍ය සංවිධානය යෝජනා කර තිබුණේ මරණ අඩු කරගන්න මුලින්ම සෞඛ්‍ය ක්‍ෂේත්‍රයට සම්බන්ධ අය සහ වැඩිහිටියන්ගෙන් පටන් ගන්න කියලා. නමුත් ලක්‍ෂ 12ක් එන්නත් ආවාට පස්සේ මුල් අදියරේදී ලක්‍ෂ 06කට ලබාදී ඉතිරි ලක්‍ෂ 06 දෙවැනි අදියරේදී දෙන්න සැලසුම් කර තිබුණා. නමුත් ජනාධිපතිවරයා ඒක ඇනුවා. එන්නත් ඕනෑ තරම් ලැබෙනවා කියලා. වයස අවුරුදු 30ට වැඩි අයටත් දුන්නා. කොළඹ නගරයේ එක පෝලිමක වයස අවු. 60ට වැඩි අයට දෙන අතර තවත් ග්‍රාම සේවක වසමක වයස අවු. 30ට වැඩි අයටත් දුන්නා. මේ රාජ්‍ය පාලනයද? ඊයේ පෙරේදා දෙවැනි මාත්‍රාව දෙන්න පටන්ගෙන තිබෙනවා. ඊට අවශ්‍ය ප්‍රමාණය තියෙනවාද කියලා අපි දන්නේ නැහැ. මුල් වටයේ දුන් වැඩිහිටයන්ගේ දෙවැනි මාත්‍රාව ලබාදිය යුතු කාලය ඉක්ම ගොස් තිබෙනවා. මගේ මවටත් එහෙමයි. නොමිලේ ලබාදුන් එන්නත් ටික හරියාකාරව කරන්න නොදී ආණ්ඩුවෙන් ඇනුවා. 
අනික් පැත්තෙන් ආණ්ඩුව වානිජ අරමුණු වෙනුවෙන් රට ඉබාගාතේ ඇරියා. පළවැනි රැල්ල, දෙවැනි රැල්ල ඇතිවූ අවස්ථාවල හැඳින්වූයේ කොරෝනා පොකුරු කියලා. මාස 10ක් විතර තිස්සේ පෑලියගොඩ පොකුර කියලා ආණ්ඩුව හඳුන්වමින් තිබුණා. රටේ කොහෙන් හමුවුණත් ඒ හැඳින්වීම වැරැද්දක්. අඩු ගානේ මේ සම්බන්ධයෙන් හඳුන්වන්න තැනක් තිබුණා. ලෝකය පුරා කොරොනා පොකුරු කියන්නේ ඇයි? මේ සාහිත්‍යාර්ථයකින් නම් දැම්මා නෙවෙයි. නිශ්චිත ප්‍රදේශයක පවතින තත්වය ගැන නිවැරදි අදහසක් දෙන්න. නමුත් ගෝඨාභය රාජපක්‍ෂ මහත්තයාගේ වියත් මග ආණ්ඩුව දැන් “අවුරුදු පොකුර” කියලා දැම්මා. අවුරුදු පොකුර කොහෙද තියෙන්නේ? සෞඛ්‍ය නිලධාරීන්ට මෙහෙම පොකුරක් හොයන්න තියෙන්නේ කොහෙන්ද? මේ නාමකරණයේ තිබෙන මගපෙන්වීම මොකක්ද? දැන් ඊළඟට එන්නේ වෙසක් පොකුරද? ඉන්දියාවේ ඉන්නෙත් මේ ජාතියේම උද්දච්ඡ තකතීරු තීන්දු ගන්න පාලකයෝ. අති දැවැන්ත සම්පත් තියෙද්දී, අබ්දුල් කලාම්ලා වගේ ඉහළම විද්‍යාඥයෝ නායකත්වය දැරූ රටක අද ඔක්සිජන් නැතිව මිනිස්සු මැරෙනවා. එවැනි වූ ඉන්දියාව කුම්භ මේලා පොකුර කියලා නාමකරණයක් කළේ නැහැ. ධම්මික පැනිය වගේම තමයි ජනාධිපතිවරයා ඇතුළු මුළු ආණ්ඩුවේම කොවිඩ් පරිපාලනය. මුලු ආණ්ඩුවම ධම්මික පැණයක්. 
අති විශිෂ්ඨ කාර්ය මණ්ඩලයක් ඉන්න, නොමිලයේ සෞඛ්‍ය පහසුකම් ලබාදෙන සැකිල්ල හරි තියෙන රටක, සාක්‍ෂරතාවය 95% පැනලා තියෙන රටක මොනවද මේ කරන්නේ? රට විද්‍යානුකූලව පරිපාලනය කරලා ගෙනියන්න තිබුණු තත්වය අවුල් කළේ මේ ආණ්ඩුව. මේ සෞඛ්‍ය ඇමතිතුමිය ධම්මික පැණිය බීලා, ආණ්ඩුවේ සහ පෞද්ගලික නාලිකා යොදාගෙන ජනතාව අතරට ප්‍රචාරයන් යැව්වා. බොරු දේශප්‍රේමී කතන්දර වපුරලා මුළු රටක් රාජ්‍ය අනුග්‍රහයෙන් මේ පිස්සුව පස්සේ එළෙව්වා. අද මොකද වෙලා තියෙන්නේ? මේවට ආණ්ඩුව සහ නාලිකා වගකියන්න  ඕනෑ නැද්ද? ආණ්ඩුවම ධම්මික පැණිය වගේ තමයි. මේව සරල නැහැ. ව්‍යසනය පාලනය කරන්න ක්‍රම ලෝකය පුරා තියෙද්දී ඒවා නොකර ආණ්ඩුව සහමුලින්ම මේක අවුල් කළා. 
ඒ වගේම කොරෝනා තත්වය හමුවේ ජනතාවට ලබාදිය යුතු අත්‍යාවශ්‍ය සහන තවම ලබාදෙන්නේ නැහැ. උදාහරණයක් හැටියට පාසැල් අධ්‍යාපනය වෙනුවෙන් සියලුම දරුවන්ගේ ඉගැන්වීම් රූපවාහිනියෙන් කරන්න කියලා අපි ඇතුලු බොහෝ දෙනක් පෙන්වා දුන්නා. දරුවන්ට නොමිලේ අන්තර්ජාල පහසුකම් ලබාදෙන්න කීවා. අවුරුද්දක් තිස්සේ පොඩි දරුවන්ගේ අධ්‍යාපනය සහමුලින් බිඳවැටිලා ඉවරයි. ඒ වගේම විදේශගත ශ්‍රී ලාංකිකයන් සම්බන්ධයෙන් අනුගමනය කරන ක්‍රියාමාර්ග, එයින් කරන ගසාකෑම් වගේ මාස 14කට පසු ආණ්ඩුව අනාගෙන තිබෙන කරුණු රැසක් තිබෙනවා. අඩියක් අඩියක් ගානේ, වචනයක් වචනයක් ගානේ අපි යමින් සිටින්නේ ඉන්දියාව ගිහින් තියෙන මාර්ගයේම තමයි. ඒ නිසා අපි බරපතල අනතුරු ඇඟවීම් සිදුකරනවා. 
Comment (0) Hits: 95

ඉල්ලීම ප්‍රබල නිසා පිළියන්දල අරින්න වුනා - හමුදාපති

යම් ප්‍රදේශයක් හුදාකලා කිරීමේ තීරණය ගන්නේ තත්වයන් විශ්ලේෂණය කර ප්‍රදේශයේ සෞඛ්‍ය බළධාරින්ගේ නිර්දේශ මත යැයි යුධ හමුදාපති ශවේන්ද්‍ර සිල්වා පවසයි.

නමුත් පිලියන්දල පොලිස් බල ප්‍රදේශය හුදකලා කිරීමට ගත් තීරණය “ප්‍රබල ඉල්ලීම්” නිසා වෙනස් කිරීමට සිදුවූ බව යුධහමුදාපතිවරයා පවසයි.

ඊයේ රාත්‍රී පෞද්ගලික රූපවාහිනි නාලිකාවක සාකච්ඡාවකට එක්වෙමින් වැඩිදුරටත් අදහස් පල කල යුධහමුදාපති ශවේන්ද්‍ර සිල්වා “පිලියන්දල හුදකලා කිරීමට ගත් තීරණයත් සමඟ විවිධ පාර්ශවවලින් මට දුරකතන ඇමතුම් රාශියක් ආවා.

මේ අය ජනාධිපතිතුමාට සහ අගමැතිතුමාටත් මේ ගැන දැනුම් දී ඇති බව මට පසුව දැනගන්න ලැබුනා.

ඉතින් ඒ ඉල්ලිම් “ප්‍රබල” නිසා පිලියන්දල හුදකලා කිරීමට ගත් තීරණය වෙනස් කරන්න සිද්ධ වුනා.” යනුවෙන් පවසයි.

මේ අතර කැස්බෑව සෞඛ්‍ය වෛද්‍ය නිළධාරි වෛද්‍ය සමන්තිකා විජේසුන්දර පවසන්නේ ප්‍රදේශයේ පවතින දැඩි අනාරක්ෂිත බව සලකා පිලියන්දල පොලිස්බල ප්‍රදේශය හුදකලා කරන ලෙස තමන් ලිඛිතව ඉල්ලීමක් කල බවයි.

තම ඉල්ලීම අනුව ප්‍රදේශය හුදකලා කලත් පසුව තමන්ගේ දැනුවත්භාවයකින් තොරව පැය කිහිපයක් ඇතුලත එම හුදකලාභාවය ඉවත් කර ඇති බවයි.

පිලියන්දල පොලිස්බල ප්‍රදේශයට පනවා තිබු හුදකලාතත්වය ඉවත් කිරීමට ඉවහල්වූ “ප්‍රබල ඉල්ලිම්” යුධහමුදාපතිවරයාට යොමු කරවුයේ නමගිය දේශපාලඥයෙකු වන ගාමිණි ලොකුගේ විසින් යැයි වාර්තා වේ.

lanka truth

Comment (0) Hits: 139

පරිස්සම් නොවුණොත් ඉදිරියේදී : දිනකට ආසාදිතයන් 8000ක් 10000ක් වාර්තා වෙයි !

කොරෝනා පාලනය සඳහා නිකුත් කර ඇති සෞඛ්‍ය මාර්ගෝපදේශ නොතකමින් ජනතාව විනයකින් තොරව තවදුරටත් කටයුතු කරන්නේ නම් ඉදිරි දින කිහිපය තුළ දිනකට ආසාදිතයන් 8,000-10,000ක් වාර්තා වීමේ අවදානමක් ඇතැයි කොරෝනා රෝග පාලන රාජ්‍ය ඇමතිනී වෛද්‍ය සුදර්ශනී ප්‍රනාන්දුපුල්ලේ  සඳහන් කරයි.

මේ වන විට දිනකදී වාර්තා වන ආසාදිත පුද්ගලයෙකු තවත් හතර දෙනෙකුට වෛරසය ව්‍යාප්ත කළහොත් හා ජනතාව වෛරසය ව්‍යාප්තිය ගැන නොසැලකිලිමත් වුවහොත් මෙම ඉලක්කම් වාර්තා වනු ඇතැයිද ඇමැතිවරිය කියා සිටියාය.

කෙසේ වෙතත් වෛරය පාලනය කිරීමට රට තුළ තවමත් හැකියාව ඇති බවද පැවසූ ඇය ජනතාව ස්වයං විනයකින් තොරව කටයුතු කරන්නේ නම් ඉදිරි සතිය දෙක ඇතුළත එය ගිලිහී යනු ඇතැයිද කියා සිටියාය.අත්‍යවශ්‍යම කරුණකට හැර නිවසෙන් බැහැරව නොයන්නැයි ද ඉල්ලා සිටි ඇය නිවසින් බැහැරට යන්නේ නම් අනිවාර්යෙන්ම මුව ආවරණ නිසි ලෙස පළදින ලෙසද ඉල්ලා සිටියාය.

දුරස්ථ භාවය රැක ගන්නා ලෙසත්, ජනතාව රැස්වන ස්ථානයන්ට නොයන ලෙසත් පැවසූ ඇය මෙවන් සරල ක්‍රියාමාර්ග මගින් වෛරස ආසාදනයෙන් වැළකී සිටිය හැකි යැයිද කියා සිටියාය.

Comment (0) Hits: 90

පූජිත්ට හා හේමසිරිට අධි චෝදනා 863ක්

පාස්කු ඉරුදින ත්‍රස්ත ප්‍රහාරය පිළිබඳ බුද්ධි තොරතුරු ලැබී තිබියදී එය වළක්වා ගැනීමට නිසි ක්‍රියා මාර්ග ගැනීමට අපොහොසත් වී යැයි, හිටපු පොලිස්පති පුජිත් ජයසුන්දර හා හිටපු ආරක්ෂක ලේකම් හේමසිරි ප්‍රනාන්දු යන අයට එරෙහිව අධි චෝදනා 863ක් යටතේ කොළඹ මහාධිකරණය හමුවේ වෙන වෙනම නඩු දෙකක් පැවරීමට නීතිපතිවරයා ඊයේ (03) පියවර ගෙන තිබේ.

අදාළ නඩු විභාග කිරීම සඳහා වෙන වෙනම විශේෂ ත්‍රි පුද්ගල මහාධිකරණ විනිසුරු මඩුලු දෙකක් පත්කරන ලෙසට නීතිපතිවරයා ඊයේ (03) අගවිනිසුරුවරයාගෙන් ලිඛිතව විශේෂ ඉල්ලීමක් කළ බව ද නීතිපති සම්බන්ධිකාරක අධි නීතිඥ නිශාරා ජයරත්න පැවසුවාය.

මරාගෙන මැරෙන බෝම්බ ප්‍රහාර එල්ල කළ ජාතික තවුහිද් ජමාත් සංවිධානයේ සහරාන් හෂිම් ඇතුළු කණ්ඩායම බෝම්බ ප්‍රහාර එල්ල කිරීමට සංවිධානය වී තිබෙන බවට ආසන්න බුද්ධි තොරතුරු ලැබී තිබියදී නිසි ක්‍රියාමාර්ග නොගැනීම, බෝම්බ ප්‍රහාර වළක්වා ගැනීමට කටයුතු නොකිරීම, රාජ්‍ය බුද්ධි සේවයේ අධ්‍යක්ෂ නිලන්ත ජයවර්ධනගේ බුද්ධි තොරතුරු නොසලකා හැරීම ඇතුළු චෝදනා 863 බැගින් ඉදිරිපත් කරමින් මෙම නඩු පවරා ඇත.

විත්තිකරුවන් දෙදෙනා දණ්ඩනීති සංග්‍රහයේ 296 වගන්තිය යටතේ මිනී මැරීම හා 306 වගන්තිය යටතේ මිනී මැරීමට තැත් කිරීම යන චෝදනා ඉදිරිපත් කර ඇති බවද අධි නීතිඥවරිය පැවසුවාය.

නිශාරා ජයරත්න මෙසේද පැවසුවාය.

හිටපු පොලිස්පති පුජිත් ජයසුන්දර හා හිටපු ආරක්ෂක ලේකම් හේමසිරි ප්‍රනාන්දු යනට එරෙහිව 2019 පාස්කු ඉරු දින බෝම්බ ප්‍රහාරයට අදාළව මියගිය හා තුවාල ලැබූ පුද්ගලයන් සම්බන්ධයෙන් මිනී මැරීමේ හා මිනී මැරීමට තැත්කිරීමේ චෝදනාවලට අදාළව තොරතුරු ප්‍රදර්ශනය කිරීම නීතිපතිවරයා විසින් ඊයේ කොළඹ මහාධිකරණයේදී සිදුකරනු ලැබීය. මෙම නඩු විභාග කිරීම සඳහා විශේෂ ත්‍රි පුද්ගල මහාධිකරණ දෙකක් පත්කරන ලෙස ද නීතිපතිවරයා අගවිනිසුරුවරයාගෙන් ලිඛිතව ඉල්ලීමක් කර ඇති අතර, 2019 අප්‍රේල් 07 දින හා 2019 අප්‍රේල් 21 යන කාල සීමාව අතරතුරදි රාජ්‍ය බුද්ධි සේවයේ අධ්‍යක්ෂ නිලන්ත ජයවර්ධන ලබාදුන් සංවේදී තොරතුරු හා බුද්ධි තොරතුරු වන සහරාන් හෂිම් සහ ඔහුගේ කණ්ඩායම ආගමික සිද්ධස්ථාන හා හෝටල්වලට හා අනෙකුත් ස්ථානවලට බොම්බ ප්‍රහාර එල්ල කිරීමට සංවිධානව සිටි බවට හා ප්‍රහාර එල්ල කිරීමට ආසන්නව හා සුදානම්ව සිටින බවට ඔවුන්ට ලැබුණු තොරතුරු නොසලකා හැරීම සහ ඒ මත කටයුතු කිරීමට මුළු මුණින්ම අපොහොසත් වීම හේතුවෙන් 2019 පාස්කු දින බොම්බ ප්‍රහාරය වැළැක්වීමට අපොහොසත් වීමෙන් දණ්ඩ නීති සංග්‍රහයේ 296 වගන්තිය හා 306 වගන්තිය යටතේ දඬුවම් ලැබිය යුතු වරදක් සිදු කිරීම යන චෝදනා යටතේ මේ නඩුව පැවරීය.

Comment (0) Hits: 38

කම්කරු කාර්යාලයේ සේවාලාභීන් සීමා කෙරේ

කම්කරු කාර්යාලයේ ප්‍රධාන කාර්යාලයට සහ පළාත්/දිස්ත්‍රික් කාර්යාල සඳහා පැමිණෙන සේවාලාභීන් සීමා කිරීමට තීරණය කර ඇති බව කම්කරු දෙපාර්තුමේන්තුව නිවේදනය කරයි.

රටේ පවතින කොවිඩ් -19 වෛරස ව්‍යාප්තිය පාලනය කිරීමේ අවශ්‍යතාවය එම තීරණය ගත් බව කම්කරු කොමසාරි ජනරාල් බී.කේ ප්‍රභාත් චන්ද්‍රකීර්ති  පවසයි.

සේවක අර්ථ සාධක අරමුදල් ප්‍රතිලාභ ලබාගැනීම සඳහා ප්‍රධාන කාර්යාලයට පැමිණෙන සේවාලාභීන් දෙපාර්තමේන්තු වෙඩ් අඩවියට පිවිස ඒ සඳහා දිනයක් හා වේලාවක් වෙන් කරවා ගෙන තම සේවාවන් ලබා ගැනීමට කටයුතු කරන ලෙස ද එම නිවේදනයේ සඳහන් වෙයි

#මෙම නිවේදනයට අදාළ වැඩිදුර විස්තර පහතින් දැක්වෙයි

Comment (0) Hits: 100

ලොකුගේ ලොකුසීන් ආණ්ඩුව කනවා : ඇතුළෙන් විරෝධයක් !

සෞඛ්‍ය බළධාරින් විසින් හුදකලා කළ පිළියන්දල  පොලිස් බල ප්‍රදේශයේ හුදකලාබව ඉවත්කළ ආකාරය මේ වන විට ජාතික දේශපාලන පුවතක් බවට පත්වෙමින් ඇති අතර ආණ්ඩුවට දැඩි අපකීර්තියක් අත්වෙන සිදුවීමක් බවටද පත්වෙමින් ඇත.

ඊට හේතු වන්නේ කොරෝනා ආසාදිතයන් ව්‍යාප්තවීමේ සීග්‍රතාව සැළකිල්ලට ගෙන සෞඛ්‍ය අංශ විසින්  මැයි 2 වනදා හුදකළා කළ පිළියන්දල පොලිස් බල ප්‍රදේශයේ හුදකළා කිරීමේ තීන්දුව අමාත්‍ය ගාමිණි ලොකුගේ ගේ දේශපාලන බලපෑම මත සංශෝධනය කර ඇති බවට පුවත් පලවෙමින් ඇති නිසාය.

ආණ්ඩුවට සම්බන්ධ දේශපාලන ආරංචිමාර්ග ද මේ වන විට මේ සිදුවීම විවේචනය කරමින් සිටින අතර ලොකුගේ වැනි වගකීම් විරහිත අමාත්‍යවරුන් හේතුවෙන් ආණ්ඩුව අප්‍රසාදයට පත්වෙන බවත් එබැවින් මේ අදුරදර්ශී හැසිරීම් පාලනය කළ යුතු බවත් පවසයි.

එම  ආරංචිමාර්ග පෙන්වා දෙන්නේ ආණ්ඩුවේ තවත් ප්‍රබල අමාත්‍යවරයෙකු වන මහින්දානන්ද අලුත්ගමගේ මේ වන විට සිය ආරක්ෂක නිලධාරියකු සහ රියදුරෙකුට කොරෝනා ආසාදනයවීම හේතුවෙන් ඒ බව ප්‍රසිද්ධියේ සමාජ මාධ්‍ය තුළ සටහනක් තබා ස්වයංනිරෝධායනයට යොමුව ඇති බවය.

ආණ්ඩුවේ ප්‍රබලයකුට එසේ කටයුතු කළ හැකි නම් අමාත්‍ය ගාමිණි ලොකුගේ ට එසේ හැසිරීමට නොහැකිවීම ආණ්ඩුවේ මෙම ආරංචිමාර්ග වල බරපතළ විවේචනයට හේතුවී ඇත.

ස්වයංනිරෝධානයට ගිය මහින්දානන්ද තැබූ ෆේස්බුක් සටහන !

mahindanadas

මේ අතර ගාමිණි ලොකුගේ අමාත්‍යවරයාගේ ක්‍රියාව විවේචනය කරමින් ජාතික හෙළ උරුමය ලේකම් බන්දුල චන්ද්‍රසේකර ද සිය ෆේස්බුක් ගිණුමේ සටහනක් තබා ඇති අතර එම සටහන පහත දැක්වෙයි.

පිළියන්දල හුදෙකලාවීද? මරු වසඟයට ගත්තේද?

bandula lokuge 1000px

මැයි 2 දින උදෑසනම පිළියන්දල පොලිස් බල ප්‍රදේශය හුදෙකලා කිරීමට ගත් තීන්දුව පැය විසිහතරකට පසු ඉවත් කරගැනීමට කටයුතු කිරීම ගැන අළුත් ආන්දෝලනයක් ඇති වී තිබේ.

දින කිහිපයක සිට පිළියන්දල නාගරික බල ප්‍රදේශයට අයත් ග්‍රාම සේවා කොට්ඨාශ 10 ක් හුදෙකලාකර තිබූ අතර, ආයතනගත පිරිස් මගින් වෛරසය වේගයෙන් ව්‍යාප්තවීමක් ද දකින්නට තිබූ බැව් ප්‍රාදේශීය සෞබ්‍ය බලධරයෝ කියා සිටියහ.

ලංකාවේ විවිධ දිස්ත්‍රික්වල ග්‍රාමසේවා වසම් රැසක් දැන් දින ගණනක සිටම හුදෙකලාකොට ඇති අතර එම කොට්ඨාශ එකක් හෝ නැවත විවෘත කර නැත.

එහෙත්, පිළියන්දල පොලිස් වසම පමණක් පැය විසි හතරක් ඇතුළත නැවත විවෘත කිරීම පුදුමයට කරුණකි.

එය මුළුමනින්ම සෞඛ්‍ය බලධාරීන්ගේ තීරණයට ඉහළින් ගොස් දේශපාලන බලධාරියෙකුගේ බලපෑමෙන් ගත් අත්තනෝමතික තීරණයක් බැව් දැන් අනාවරණය වී තිබේ.ඊයේ රාත්‍රියේ මා ඇමතූ කැස්බෑව නගර සභාවේ විපක්ෂයේ සභිකයෙකුවන පර්සි වික්‍රමගේ, මෙම අමනෝඥ තීන්දුව ගැනීමට යන බැව් දැණුම් දුන්නේය.

මම ඔහුගේ ස්ථාවරය මේ පිළිබඳව විමසූ විට දැන්වූයේ “හුදෙකලා කිරීමේ තීන්දුව සෞඛ්‍ය බලධාරීන් ගත යුතු තීන්දුවක් බවත්, මොන දේශපාලඥයා හෝ ඊට බලපෑම්කොට වෙනස් කිරීමට යන්නේ නම් තමා ඊට දැඩිසේ විරුද්ධවන බව” ය.

විනාඩි කිහිපයක් ගතවීමටත් පෙර ඔහුගේ එම මතය තම මුහුණු පොතේ සටහන් කර තිබූ අයුරු මම දුටුවෙමි. කැස්බෑව ආසනයේ ආණ්ඩු පක්ෂයේ ජ්‍යෙෂ්ඨ දේශපාලඥයෙකුවන, පාර්ලිමේන්තු මන්ත්‍රී, ප්‍රවාහන අමාත්‍ය ගාමිණි ලොකුගේ නිවසේ ඇති කාර්යාලයේ සේවකයන් කිහිපදෙනෙකුම කෝවිඩ් වසංගතයට ගොදුරු වී ඇති බව ද සැලය.

ගාමිණි ලොකුගේ දේශපාලන කරළියට පැමිණියේ එක්සත් ජාතික පක්ෂයෙනි. එම යුගයේ ඔහු ප්‍රචලිතව සිටියේ දේශපාලන මැරවරයෙකු වශයෙනි. ජේ. ආර් ජයවර්ධන ආණ්ඩු සමයේ ඛණිජ තෙල් සංස්ථාවේ දේශපාලන මැර කල්ලිවලට සිරිකොතේ සිට නායකත්වය දුන්, කුප්‍රකට ප්‍රාදේශීය දේශපාලනයෙකු වූයේ ගාමිණි ලොකුගේය. එදා, කම්කරු හා සිසු අරගලවලට පහර දුන් එම මැර කණ්ඩායම ආණ්ඩුවේ “තග් හමුදාව” ලෙස හැඳින්වීය. පසුව, ආර්.ප්‍රේමදාස පාලන කාලයේ, ආණ්ඩුවෙන් ඉවත් වී නව දේශපාලන බලයක් ගොඩනැඟූ ලලිත් ඇතුළත්මුදලිට පළමුවෙන් ම මැරයන් ලවා පහර දුන්නේ ද කැස්බෑවේ දී ය. කාලයාගේ ඇවෑමෙන්, පරිණත දේශපාලඥයෙකු වූ ලොකුගේ මෙවැනි උද්ධච්චවූත් මුග්ධ තීරණයක් ගනු ඇතැයි කිසිවෙකු විශ්වාස නොකළත්, කැස්බෑව නගර සභාවේ විපක්ෂ කණ්ඩායම කියනුයේ, නගරයේ වෙළඳ ප්‍රජාවේ බලපෑමට ඔහු එය සිදුකළ බවයි. තම කාර්යාලයේ සේවකයන් වසංගතයට බිලිවෙද්දී, තමන් ස්වයං නිරෝධායනයවීම හැර අත්තනෝමතික ලෙස සෞඛ්‍ය බලධාරීන්ගේ කාර්යය කිරීමට යාම, අතීතයේ තමන් රඟ දැක් වූ ජනතාද්‍රෝහී මැරවර චරිතයම යළි රඟ දැක්වීමකට වඩා අන් යමක් නොවන බැව් අසරණ වූ කැස්බෑවේ ජනතාව කියති.

අද රටම අනතුරකට පත්ව ඇත්තේ සෞඛ්‍ය බලධාරීන්ගේ විශේෂඥ උපදෙස් නොසළකා, උද්ධච්ච පාලකයන් ගනු ලැබූ මුග්ධ තීන්දු නිසා බැව් ජනතාව වටහාගෙන අවසානය. දශක 4 ට වැඩි කාලයක් ජනතාව අතර සේවය කළ මහජන නියෝජිතයෙකුවන ගාමිණි ලොකුගේ එවැනි තකතීරු තීරණයක් ගැනීමත්, ආරක්ෂක අංශ සහ සෞඛ්‍ය අංශ ලවා එම තීරණය ක්‍රියාත්මක කරගැනීමට බලපෑම් කිරීමත් කැස්බෑවේ පොදු මහා ජනතාව සුදු කොඩියක් නැති, මිණි පෙට්ටියක් නැති මරණයක් වෙත දක්කාගෙන යෑමකි.

මෙවැනි මුග්ධ බලපෑම් හමුවේ ප්‍රාදේශීය මෙන්ම රජයේ වගකිව යුතු සෞඛ්‍ය බලධරයෝ කොන්දක් නැති වැනෙන සුළු ප්‍රතිපත්තියකින් කටයුතු කරන්නේ නම් මේ රටේ සුවහසක් ජනයාට අබ සරණයි කියනු හැරෙන්නට කුමක් කියන්නද? පිළියන්දල පොලිස් වසම හුදෙකලා කිරීම ඉවත්කොට එ සැනින් ම, පිළියන්දල නගර සීමාවට යාබද මහරගම පොලිස් වසමේ ඇරව්වල ග්‍රාම සේවක කොට්ඨාශය හුදෙකලා කළ බැව් නිවේදනය කිරීමෙන්ම අණතුරේ බරපතලකම කාටත් වැටහෙනු ඇත.

ව්‍යාපාරිකයෝ, දේශපාලකයෝ පමණක් නොව දේශපාලකයන්ගේ අධෝමුඛය ලෙවකන ප්‍රාදේශීය පොලිස් ලොක්කෝ ද ප්‍රදේශයේ මහජන සෞඛ්‍ය නිලධාරීන්ට තර්ජනය කරන බැව් දැන් කියවේ.

එහෙත්, නිවෙස් තුළ හුස්ම ගැනීමේ අපහසුවෙන් පෙළෙන පණහකට ආසන්න, කෝවිඩ් රෝගීන් ප්‍රමාණයක් පිළියන්දල නගර සභා බලප්‍රදේශයේ මේවන විටත් සුසුම්ලද්දී, සුදුසු වෛද්‍ය ප්‍රතිකාර සඳහා රෝහලක් වෙත ඔවුන් පිටත්කර යැවීමේ දුෂ්කර අර්බුදයක පෙරමුණේ සිටින සුව නිලධාරීන්ට සිදුව ඇත.

මේ තකතීරු, මරිමෝඩ, වැනෙන සුළු තීරණ නිසා ඔවුන්ගේ සටන තව දුෂ්කරවනවා පමණක් නොව, තත්ත්වය බරපතලවන රෝගී ප්‍රමාණයද තව ඉහළ යනු නො අනුමානය.

බන්දුල චන්ද්‍රසේකර

Comment (0) Hits: 494

කොවිඩ් වසංගතයෙන් රට බේරා ගැනීමට දේශපාලන බේදයකින් තොරව එකතුවෙමු!

ගෝලීය වසංගතයයෙන් රට මුදවා ගැනීම සදහා දේශපාලන බේදයකින් තොරව සියලුම දෙනා එකතුවෙන්නැයි පාරිභෝගික අයිතීන් සුරැකීමේ ජාතික ව්‍යාපාරය නිවේදනයක් නිකුත් කරමින් ඉල්ලීමක් කර ඇත.

එම නිවේදනයේ වැඩිදුරටත් මෙසේද සදහන් වේ.

අපේ රට මේ මොහොත වන විට ඉතාම අසීරු කාල සීමාවක් පසුකරමින් සිටින බව අප කවුරුත් දන්නා කරුණකි. ගෝලීයව පැතිරයන කොවිඩ් වසංගතය හේතුවෙන් මෙරට ජන ජීවිතය අවුල් වියවුල් කරමින් දහස් ගණනකට රැකියා අහිමි කරමින් හා විශාල සංඛ්‍යාවක් බඩගින්නේ තබමින් ජනතාව පීඩාවට පත්කරමින් සිටී.එපමණක්ද නොව අපේ රටේ ජනතාව දිනෙන් දින කොරෝනා මාරයාට බිලිවෙමින්ද සිටී.

දෛනිකව වැඩිවන කොරෝනා රෝගීන් සංඛයාව හා කොරෝනා මරණ සංඛයාව දෙස බැලීමේදී අපේ රට දැඩි අවධානම් තත්වයකට පත්වී ඇති බව නොරහසකි. මෙම තත්වය තේරුම් නොගත් මෙරට බහුතරයක් වූ ජනතාව වගකීම් විරහිතව හැසිරෙන ආකාරයක් දැකගත හැක.

අසල්වැසි ඉන්දියාව කොරෝනා වෛරසය නිසා දැඩිව පීඩාවිදින ආකාරය දෙස බැලීමේදී පෙනී යන්නේ එවැනි අවදානම් තත්වයක් අප රට තුළද ඇති විය හැකි බවයි.

කෙසේ වෙතත් මෙම තත්වය පාලනය කර ගැනීම සදහා අපට තවත් කාලය ඉතිරිව ඇති බව පෙනී යන හෙයින් කොරෝනා මාරයාගෙන් අපේ රටේ ජනතාවගේ ජීවිත බේරාගැනීම සදහා දේශපාලන පක්ෂ භේදයකින් තොරව සියලුම දෙනාට එක්වන ලෙස අප සංවිධානය සියලුම පාර්ශවවලින් ඉල්ලා සිටිමු.

මෙවැනි මාරාන්තික උවදුරකින් ජනතාව බේරාගැනීම රජයට පමණක් කලහැකි කාර්යයක් නොවන නිසාත් සෑම දේශපාලන පක්ෂයකටම දේශපාලනය කිරීම සදහා රටක් හා ජනතාවක් සිටිය යුතු නිසාත් බහුතරයක් වූ ජනතාව කුමන හෝ දේශපාලන පක්ෂයක සමාජිකයෙක් වන නිසාත් සියලුම දේශපාලන පක්ෂවලට මෙම වසංගතයට එරෙහිව කටයුතු කිරීමට යුතුකමක් ඇති බව අප සංවිධානයේ අදහසයි.

එම නිසා පවතින තත්වය මනාව තේරුම් ගෙන රටත් ජනතාවත් මෙම උවදුරෙන් බේරා ගැනීම සදහා වන වැඩ පිළිවෙළක් සැකසීම සදහාත් එම වැඩපිළිවෙළ ක්‍රියාත්මක කිරීම සදහාත් සියලුම දේශපාලන පක්ෂ,ආගමික නායකයින්,ආගමික සංවිධාන, වෘතිකයින්, වෘත්තීය සමිති,සිවිල් සංවිධාන එකට එකතු වන ලෙස අප ඉල්ලා සිටින අතර මෙම අවස්ථාවේ දේශපාලන වාසි ලබා ගැනීම හා පටු ලාබ ප්‍රයෝජන ලබා ගැනීමට කටයුතු නොකරන ලෙසද අප සියලුම දෙනාගෙන් ඉතාමත් ආදරයෙන් හා කොරෝනා වෛරසයට ගොදුරු වී සුසුම් හෙලමින් සිටිනා ජනතාවගේ නාමයෙන් ඉල්ලා සිටිමු.

කොරෝනා උවදුරෙන් රට බේරා ගනිමු. එක්සත්ව නැගී සිටිමු.

මීට විශ්වාසී,

රංජිත් විතානගේ - සභාපති

පාරිභෝගික අයිතීන් සුරැකීමේ ජාතික ව්‍යාපාරය

Comment (0) Hits: 87

කොවිඩ් ආසාදිතයින් නම් 1906ට දැනුම් දෙන්න

නිවෙසෙ කෝවිඩ් -19 ආසාදිතයන් සිටී නම් 1906 අමතා දැනුම් දෙන්නැයි යුද හමුදාපති ජෙනරාල් ශවේන්ද්‍ර සිල්වා පවසයි.

රෝහල්වලට යා නොහැකිව නිවෙස්වල සිටින රෝගීන් සම්බන්ධයෙන් මෙම පියවර ගත් බව ද යුද හමුදාපතිවරයා පවසයි.

Comment (0) Hits: 83

කොවිඩ් අගුළු අරින්නැයි තග දැමූ ලොකුගේ ගේ ගෙදර 05ක් පොසිටිව්

සෞඛ්‍ය බළධාරින් විසින් හුදකලා කළ පිලියන්දල පොලිස් බල ප්‍රදේශය පැය 8ක් ගත වනවිට ඉහළ දේශපාලන බලය යොදවා හුදකලා භාවයෙන් ඉවත් කළ ගාමිණි ලොකුගේ ඇමතිවරයාගේ පිළියන්දල මාවිත්තර නිවසේ පිහිටුවා ඇති කාර්යාලයේ සේවය කරන පුද්ගලයන් පස්දෙනෙක් කොවිඩ් – 19 ආසාදිතයන් ලෙස හඳුනාගෙන ඇතැයි වාර්තා වේ.

මෙම කොරෝනා ආසාදිත පුද්ගලයන්ගේ පළමු පෙළ ආශ්‍රිතයෙකු ලෙස හඳුනාගෙන ඇති ලොකුගේ ඇමතිවරයා ස්වයං නිරෝධායනයේ සිටිය යුතු වුවත් ප්‍රදේශයේ පොහොට්ටු හිතවාදි ව්‍යාපාරිකයන් සමඟ රැස්විම් පවත්වමින් සෞඛ්‍ය මාර්ගෝපදේශ උල්ලංඝනය කරමින් කටයුතු කරමින් සිටින බව වාර්තා වේ.

lankatruth.com

Comment (0) Hits: 274

Lockdown කළ ප්‍රදේශයන් සංශෝධනයක්

අද උදෑසන සිට පිළියන්දල පොළිස් බල ප්‍රදේශය  Lockdown කළද මේ වන විට  පිළියන්දල පොලිස් බල ප්‍රදේශය හුදකලා බවින් නිදහස් කර තිබේ.

එසේ වුවද  හෙට(03) අලුයම 5.00 සිට ක්‍රියාත්මකවන පරිදි පිළියන්දල ග්‍රාම නිලධාරී වසම් 10ක් හුදකලා(Lockdown) කරන බව යුද හමුදාපති ශවේන්ද්‍ර සිල්වා  පවසයි.

එලෙස හුදකලා කෙරෙන ග්‍රාම නිලධාරී වසම් වන්නේ

කැස්බෑව දකුණ,

දම්පේ,

බටකැත්තර උතුර,

පැලැන්වත්ත නැගෙනහිර/බටහිර,

මාකන්දන නැගෙනහිර,

මාවිත්තර උතුර,

මඩපාත යන ග්‍රාම නිලධාරී වසම් වේ.

ගොරකාපිටිය 584 සහ නාම්පමුණුව 584A යන ග්‍රාම නිලධාරී වසම් දැනටමත් හුදකලා කර ති⁣බෙන අතර එය ද මෙම ලැයිස්තුවට ඇතුළත් කර තිබේ.

මේ අතර හෙට(03) අලුයම 5.00 සිට මහරගම පොලිස් බල ප්‍රදේශයේ ඇරැව්වල උතුර ග්‍රාම නිලධාරී වසම හුදෙකලා කරන බව ද යුද හමුදාපතිවරයා සඳහන් කළේය.

Comment (0) Hits: 140

රිෂාඩ් නිදහස් කරන්නැයි පුත්තලමේ උද්ඝෝෂණයක්

අත්අඩංගුවට ගෙන සිටින, සමස්ත ලංකා මහජන කොංග්‍රසයේ නායක සහ වන්නි දිස්ත්‍රික් පාර්ලිමේන්තු මන්ත්‍රී රිෂාඩ් බදියුදීන් වහා නිදහස් කරන ලෙස බල කරමින්, පුත්තලම, කොළඹ මුහුදු තීරයේදී උද්ඝෝෂණයක් අද (02) පැවැත්විණ.

''රිෂාඩ් නිදහස් කරනු, අපේ නායක රිෂාඩ් ට සාධාරණය ඉටු කරන්න, රාජපක්ෂලාට සහය නොදක්වන්නෝ අපරාධකරුවන්ද?, සුළු ජාතීන්ගේ ප්‍රජාතන්ත්‍රවාදී අයිතිවාසිකම් සුරකිනු, අපේ නායකයා නිදහස් කරන්න" ආදී ලෙස සඳහන් පුවරු ප්‍රදර්ශනය කරමින් උද්ඝෝෂණය පැවැත්විණ. අයුක්ති සහගත ආකාරයෙන් අත්අඩංගුවට ගෙන රඳවාගෙන සිටින රිෂාඩ් බදියුදීන් මන්ත්‍රීවරයා නිදහස් කරන ලෙස උද්ඝෝෂකයෝ ආණ්ඩුවට බල කළහ.

මෙහිදී අදහස් දැක්වූ කල්පිටිය ප්‍රාදේශීය සභා මන්ත්‍රී අෂික් කියා සිටියේ ''මහ රාත්‍රියේ නිවසට ගොස් රිෂාඩ් බදියුදීන් මන්ත්‍රීවරයා අත්අඩංගුවට ගැනීම සදාචාරාත්මක නොවන බවයි. රිෂාඩ් බදියුදීන් මන්ත්‍රීවරයා අත්අඩංගුවට ගෙන තිබෙන්නේ දේශපාලන කුමන්ත්‍රණයක ප්‍රතිපළයක් ලෙස බවත්'' ඔහු කියා සිටී.

මන්නාරම ප්‍රාදේශීය සභාවේ සභාපති මුජාහිර් සඳහන් කළේ ''පාස්කු ප්‍රහාරය සම්බන්ධයෙන් මේ දක්වා සිදු කර ඇති සියලු විමර්ශනවලදී රිෂාඩ් බදියුදීන්  නිර්දෝශී පුද්ගලයෙක් බවට අනාවරණය වී තිබියදී යළි අත්අඩංගුවට ගෙන රඳවා තබා ගැනීම තුළ කිසියම් අදෘශ්‍යමාන දේශපාලන හස්තයක් ක්‍රියාත්මක වන බවට සැකයක් මතුවන බවයි."

මෙම උද්ඝෝෂණය සඳහා මන්නාරම, පුත්තලම ප්‍රදේශවල මහජන නියෝජිතයන්, සමස්ත ලංකා මහජන කොංග්‍රසයේ ආධාරකරුවන් ඇතුළු විශාල පිරිසක් කොරෝනා සෞඛ්‍ය මාර්ගෝප දේශ අනුව මුව ආවරණ පැළඳ සහභාගී වී සිටින ආකාරය දක්නට ලැබින. උද්ඝෝෂණය සඳහා කාන්තාවන් විශාල පිරිසක් සහභාගී වූහ.

risa p

Comment (0) Hits: 91

ප්‍රමිති සභාපති ඉල්ලා අස්වෙයි

ශ්‍රී ලංකා ප්‍රමිති ආයතනයේ සභාපති ධුරයෙන් නුෂාඩ් පෙරේරා ඉල්ලා අස් වී තිබේ.

පෞද්ගලික අංශයට සම්බන්ධ වීම සඳහා සිය ධුරයෙන් ඉල්ලා අස්වන බව ශ්‍රී ලංකා ප්‍රමිති ආයතනයේ සභාපති නුෂාඩ් පෙරේරා කියයි.

Comment (0) Hits: 110

ධම්මික පැණිය පල් බොරුවක් : රෝගීන්ට නොසුදුසුයි !

කෑගල්ල, හෙට්ටිමුල්ල භද්‍රකාලි කෝවිලේ කපු මහතා විසින් සකස් කළ පැණිය හෙවත් ධම්මික පැණිය කොවිඩ් රෝගීන්ට ප්‍රතිකාර කිරීම සඳහා නුසුදුසු බව සායනික පරීක්ෂණවලින් තහවුරු වී තිබේ.

රජරට විශ්වවිද්‍යාලයේ වෛද්‍ය පීඨයේ සායනික පරීක්ෂණය සිදුකළේ සෞඛ්‍ය අමාත්‍යාංශයේ උපදෙස් පරිදිය.

ඒ අනුව අනුරාධපුර ශික්ෂණ රෝහලේ ප්‍රතිකාර ලබන කොවිඩ් රෝගීන් 68 දෙනකුට එම පැණිය ලබාදී නිරීක්ෂණය කර ඇත. එහෙත් කොවිඩ් රෝගීන්ට සුව වීමක් දක්නට නොලැබුණු බව රජරට විශ්වවිද්‍යාලයේ වෛද්‍ය පීඨයේ වෛද්‍ය සේනක පිලපිටිය ප්‍රකාශ කළේය.

වතුපිටිවල මූලික රෝහලේ කොවිඩ් රෝගීන්ට ලබාදීමේදී 100% ප්‍රතිඵල ලැබුණු බව සෞඛ්‍ය අමාත්‍යාංශය මිට පෙර නිවේදනය කළේය.

සියලු පරීක්ෂණ වාර්තා රජරට විශ්වවිද්‍යාලය විසින් සෞඛ්‍ය අමාත්‍යාංශය පත්කළ විද්වත් කමිටුවට යොමුකර ඇත.විද්වත් කමිටුව පසුගිය බදාදා (28දා) රැස්වී මේ පිළිබඳ අධ්‍යයනය කර ඇති අතර, එය කොවිඩ් රෝගීන්ට ප්‍රතිකාර කිරීමට නුසුදුසු බව අනාවරණය වී තිබේ.

කෙසේ වෙතත් විද්වත් කමිටු නිර්දේශය රජරට විශ්වවිද්‍යාලයට යොමු කිරීමෙන් පසු ස්ථිර වාර්තාවක් ලබන සතියේදී සෞඛ්‍ය අමාත්‍යාංශයට ලැබීමට නියමිතය.

කොවිඩ් රෝගීන් 100%ක් සුව වන බව ප්‍රකාශ කරමින් සකස් කළ මෙම පැණිය පාර්ලිමේන්තු මන්ත්‍රීවරු ඇතුළු විශාල ජන කොට්ඨාසයක් ලබාගැනීමත් සමග සායනික පරීක්ෂණයක් කිරීමට සෞඛ්‍ය අමාත්‍යාංශය හා ආයුර්වේද දෙපාර්තමේන්තුව තීරණය කළේය.

කෙසේ වෙතත් මෙම පැණියට ආයුර්වේද දෙපාර්තමේන්තුවේ මිල සූත්‍ර කමිටුවද අනුමැතිය ලබාදී ඇත.

මෙම පුවත අරුණ පුවත්පතින් උපුටාගත් අතර අප මේ ගැන ඉතා කෙටියෙන් කියන්නේ  "හෙළ පැණි" ගැන ජවුසම් නැටූ සමයේ විදෙස් රටවල නිෂ්පාදිත එන්නත් ඇණවුම් කිරීමට වෙහෙසෙනා නම් අද රට මෙතැන නැති බවය.

Comment (0) Hits: 148

රජයේ ප්‍රවෘත්ති දෙපාර්තමේන්තුවේ දෝෂ වැඩිවෙයි !

රජයේ ප්‍රවෘත්ති දෙපාර්තමේන්තුවේ වගකීම් විරහිත හැසිරීමට අදාළ තවත් සිදුවීමක් සම්බන්ධව මාධ්‍ය ක්ෂේත්‍රයේ බොහෝ දෙනෙකුගේ අවධානය යොමුව ඇත.

ඒ ඊයේ (01) නිකුත්කළ "2021 මැයි 01 සිට ක්‍රියාත්මක කොවිඩ් මර්දන මාර්ගෝපදේශ" සඳහා වූ නිල නිවේදනය නිකුත් කිරීමේදීය.

එහි 1 කරුණ යටතේ Brand Lunches යන්න රජයේ ප්‍රවෘත්ති දෙපාර්තමේන්තුව පරිවර්තනය කර ඇත්තේ "සන්නාම දිවා භෝජන" ලෙසය.

නමුත් පසුව එහි සංශෝධිත නිවේදනයක් නිකුත් කිරීමට රජයේ ප්‍රවෘත්ති දෙපාර්තමේන්තුව කටයුතු කර තිබිණ.

වසංගත සමයක ආතතිගත පසුබිමක සාමාන්‍ය අක්ෂර සම්බන්ධව අත්වැරදීමක් සිදුවිය හැකි නමුත් මුළුමනින්ම මේ ආකාරයේ දෝෂ සහගත දෙයක් අවසන් මාධ්‍ය නිවේදනය නිකුත් කරන මොහොත දක්වා කිසිවෙකුගේ ඇස නොගැටීම අපරික්ෂාකාරී බව මිස අන් යමක් නොවන බව මාධ්‍ය ක්ෂේත්‍රයේ අදහස වී ඇත.

මෙහි පහත පළමුව දැක්වෙන්නේ අපරික්ෂාකාරී ලෙස නිකුත්කළ නිවේදනය වන අතර දෙවනුව දැක්වෙන්නේ සංශෝධිත නිවේදනයයි.

Screenshot 20210502 104742

Screenshot 20210502 104425

Comment (0) Hits: 140

ජපන් රජයෙන් vaccine carriers (Cold Box) 500 ක්

මෙරට කොවිඩ් එන්නත් වැඩපිළිවෙල ශක්තිමත් කිරීමේ අරමුණින් ජපන් රජයේ අධාර යටතේ එක්සත් ජාතීන්ගේ අන්තර්ජාතික ළමා අරමුදල (UNICEF) සම්බන්ධීකරණයෙන් රුපියල් මිලියන 05 කට අධික වටිනාකමකින් යුත් Medical Protable Freeze free vaccine carriers (Cold Box) (සීතල දාම ආධාරක උපකරණ) 500 සෞඛ්‍ය අමාත්‍යාංශය වෙත අද දින (01) ප්‍රදානය කෙරිනි.

කොළඹ පිහිටි යුනිසෙෆ් ප්‍රධාන කාර්යාලයේ දී සෞඛ්‍ය අමාත්‍ය පවිත්‍රා වන්නිආරච්චි  වෙත ශ්‍රී ලංකා ජපන් තානාපති Sugiyama Akira මහතා විසින් මෙම පරිත්‍යාගය සංකේතාක්මකව ලබාදෙන ලදි.

මෙහි දෙවන අදියර යටතේ ඉදිරියේ දී Medical Protable Freeze free vaccine carriers (Cold Box) 750 ක් ලබාදීමට ද නියමිතය.

සෞඛ්‍ය වෛද්‍ය නිලධාරී කාර්යාලයේ (MOH) සිට ක්ෂේත්‍රයේ දී එන්නත්කරණ අවස්ථාවන් දක්වා ආරක්ෂිතව, නියමිත උෂ්ණත්වය යටතේ මෙම vaccine carriers මගින් එන්නත් රැගෙන යාම සිදු කළ හැක.

මෙහිදී අදහස් දැක් වූ සෞඛ්‍ය අමාත්‍යවරිය,

“සීතල දාම ආධාරක උපකරණවල පළමු තොඟය අද “Vaccine Carriers” මෙරට සෞඛ්‍ය ක්ෂේත්‍රය වෙත ලබාදීමට කටයුතු කිරීම මගින් මෙරට කොවිඩ් එන්නත්කරණ වැඩපිළිවෙල තව තවත් ශක්තිමත් කිරීමට හැකිවෙනවා. මේ සදහා ප්‍රතිපාදන ලබාදීම පිළිබඳව ජපාන රජයට සෞඛ්‍ය අමාත්‍යවරිය ලෙස ස්තූතිය පුද කරනවා. ශ්‍රී ලංකාව සහ ජපානය අතර දිගුකාලීන මිත්‍රත්ත්වයක් පවතිනවා. අප රටට සහයෝගය දැක්වීමට කිසි විටෙකත් ජපන් රජය පසුබට නොවන බව අප හොදටම දන්නා කාරණයක්. මෙම උපකරණ ලබාදීම සදහා සම්බන්ධීකරණ කටයුතු කළ යුනිසෙෆ් ආයතනයට ද මම විශේෂ ස්තූතිය පුද කරනවා. මෙලෙස ලබාදෙන ප්‍රදානයන් සහ සහයෝගයන් මත COVID-19 මර්දන වැඩපිළිවෙල ශක්තිමක් කිරීමට රජය කටයුතු කරනු ලබනවා.”

මෙම අවස්ථාව යුනිසෙෆ් අරමුදලේ මෙරට නේවාසික නියෝජිත Emma Brigham, සන්නිවේදන අංශ ප්‍රධානී Bismarck swangin, සෞඛ්‍ය හා පෝෂණ නිලධාරී වෛද්‍ය ධම්මිකා රොවෙල්, සෞඛ්‍ය අමාත්‍යාංශයේ අතිරේක ලේකම් (මහජන සෞඛ්‍ය) වෛද්‍ය ලක්ෂ්මි සෝමතුංග  එක්ව සිටියහ.

Comment (0) Hits: 117

හරීන්ට හෘද සැත්කමක් !

සමගි ජන බලවේග පාර්ලිමේන්තු මන්ත්‍රී හරීන් ප්‍රනාන්දුට හෘද සැත්කමක් සිදුකර තිබේ.

අදාළ  සැත්කම සිදුකරන ලද වෛද්‍යවරුන් ඇතුළු කාර්ය මණ්ඩලයට ස්තුතිය පළකරමින් සිය සමාජ ජාල ගිණුමේ මන්ත‍්‍රීවරයා විසින් තබා ඇත.

මෙම සැත්කම සිදුකර ඇත්තේ කොළඹ නවලෝක රෝහලේ දී වන අතර ඒ සම්බන්ධව මන්ත්‍රීවරයා තැබූ සමාජ මාධ්‍ය සටහන පහත දැක්වෙයි.

harin

කෙසේ වුවත් පසුගිය සමයේ ආණ්ඩුවේ හිතවාදින් චෝදනා කර සිටියේ අත්අඩංගුවට ගැනීමට බියවී මන්ත්‍රීවරයා රෝහල් ගතව සිටින බවය.

Comment (0) Hits: 113

Page 5 of 564