පුවත්

පොදුජන පෙරමුණ ජනාධිපති අපේක්ෂකයා වන  ගෝඨාභය රාජපක්ෂ  ඉදිරි ජනාධිපතිවරණයට තරඟ වැදීම සඳහා අද නාමයෝජනා අත්සන් කරනු ලැබූ බව දේශපාලන ආරංචි මාර්ග සදහන් කරයි.

ගෝඨාභය රාජපක්ෂගේ  මිරිහාන පිහිටි නිවසේ දී සුබ මොහොතින් මෙසේ අත්සන් තැබු අවස්ථාවට විපක්ෂ නායක  මහින්ද රාජපක්ෂ ඇතුළු ශ්‍රී ලංකා පොදු ජන පෙරමුනේ ප‍්‍රධානීන් සහභාගී වූ බවත් එම ආරංචි මාර්ග සදහන් කරයි.

ශ්‍රී ලංකා පොදුජන පෙරමුණෙන් පොහොට්ටුව ලකුණින් ජනාධිපතිවරණයට තරඟ වැදීම සඳහා ඔහු මෙම නාම යෝජනා සඳහා අත්සන් තැබුනු අතර ඒ අනූව නව සන්ධානයක් වෙනුවෙන් ශ්‍රිලනිප ය ඉදිරිපත් කළ කොන්දේසිය නොතකා කටයුතු කිරීමට පක්ෂය අභ්‍යන්තරයේ එකඟතාවයක් පැවති බවත් වැඩිදුරටත් වාර්තා වෙයි.

අපේක්ෂකත්වය අවධානමේ !

එසේම මේ වන විට ගෝඨාභය රාජපක්ෂගේ ද්විත්ව පුරවැසි භාවය අභියාචනාධිකරණය විසින් තහවුරු කර ඇති නමුත් ඔහුගේ ශ්‍රී ලාංකික පුරවැසි භාවය සම්බන්ධව ගැටලුවක් ඇති බව දේශපාලන විචාරකයන් පෙන්වා දෙයි.

ඒ අනූව ගෝඨාභය රාජපක්ෂගේ නාම යෝජනා පත්‍රය සම්බන්ධව විරෝධතාවක් මතුවීමට වැඩි ඉඩක් ඇති බවත් ප්‍රශ්නය විසදීමට බොහෝ දුරට ශ්‍රේෂ්ඨාධිකරණය වෙත යෑමට සිදුවනු ඇති බවත් ඔවුන් වැඩිදුරටත් සදහන් කරයි.

මන්ද දේශපාලන විචාරකයන් පෙන්වා දෙන ආකාරයට ජනාධිපතිවරණය සදහා ඉදිරිපත් වීමට අවස්ථාව ලබාදී ඇත්තේ පාර්ලිමේන්තු මන්ත්‍රීවරයකු වීමට සුදුසුකම් ඇති අයෙකුට පමණක් වන අතර ද්විත්ව පුරවැසියකු සඳහා ඊට අවස්ථාව නැත.

විචාරකයන් පෙන්වා දෙන්නේ යම් ආකාරයකට මෙම ප්‍රශ්නය ශ්‍රේෂ්ඨාධිකරණය වෙත ගියහොත් ද්විත්ව පුරවැසි භාවය ඉවත්කර ගැනීම සහ ශ්‍රී ලංකාවේ පුරවැසි භාවය ලබාගැනීමට අදාල ලියවිලි ඉදිරිපත් කිරීමට ගෝඨාභය රාජපක්ෂ වෙත සිදුවනු ඇති බවය.

මේ ප්‍රශ්නය නිසාම මේ වන විට ශ්‍රී ලංකා නිදහස් පොදුජන සන්ධානය හරහා ස්වාධීන අපේක්ෂකයකු ලෙස චමල් රාජපක්ෂ ඉදිරිපත් කිරීමට රාජපක්ෂ පවුල කටයුතු කර ඇති බවත් ඔවුන් පෙන්වා දෙයි.

2020 ජනාධිපති ලෙස එක්සත් ජාතික පක්‍ෂයෙන් සජිත් ප්‍රේමදාස අමාත්‍යවරයා  අතිවිශිෂ්ඨ ජයක් ලබමින් පත්වෙද්දී රාජපක්‍ෂ බලකොටුවක් වූ හම්බන්තොට දිස්ත්‍රික්කයත් එක්සත් ජාතික පක්‍ෂය නියත වශයෙන්ම ජයගන්නා බව ධීවර හා ජලජ සම්පත් සංවර් ධන රාජ්‍ය අමාත්‍ය , හම්බන්තොට දිස්ත්‍රික්කයේ එක්සත් ජාතික පක්‍ෂ බලමණ්ඩලයේ සභාපති , තංගල්ල එක්සත් ජාතික පක්‍ෂ ප්‍රධාන සංවිධායක දිලිප් වෙදආරච්චි  පවසයි .

ඔහු මේ බව සඳහන් කළේ  හම්බන්තොට දිස්ත්‍රික් එක්සත් ජාතික පක්‍ෂ කෘත්‍යාධිකාරී මණ්ඩල රැස්වීමෙන් අනතුරුව මාධ්‍යට අදහස් දක්වමිනි .

මාධ්‍යයට  වැඩිදුරටත් අදහස් දැක්වු  වෙදආරච්චි අමාත්‍යවරයා වැඩිදුරටත් මෙසේද පැවසීය.

"   අද සංවිධානය කල හම්බන්තොට දිස්ත්‍රික්කයේ කෘත්‍යාධිකාරී මණ්ඩලය ඉතාම සාර්ථකයි . මෙම රැස්වීමට දිස්ත්‍රික්කයේ සියලු  මහජන නියෝජිතයින් වගේම පහුගිය කාලයේ පක්‍ෂයේ දේශපාලන කටයුතුවලින් ඇත්ව සිටි හිටපු පාර්ලිමේන්තු මන්ත්‍රීවරුන් ,පළාත් සභා සහ පළාත් පාලන මහජන නියෝජිතයින් ද සහභාගී වීම ඉදිරි ජය තහවුරු වීමක් . මොකද පක්‍ෂයෙන් ඇත් වී සිටි සියලු  දෙනා නැවත පක්‍ෂය වටා ඒකරාශී කරගැනීමට ලැබීමත් විශාල ජයග්‍රහණයක් .    

විපක්‍ෂයේ පොහොට්ටුවෙන් කණ්ඩායම් ගැලවී යද්දී අපි වටා කණ්ඩායම් එක්වීම තමයි ජයග්‍රහණයේ පෙරනිමිති . දැන් බලන්න රටේ ක්‍රියාත්මක වර්ජන රැල්ල , මේ වර්ජන රැල්ල මෙහෙයවන්නේ පොහොට්ටුවෙන් බව අද රහසක් නෙමෙයි . බලය වෙනුවෙන් ජනතව බිල්ලට ගැනීම ඒ අයට හුරු පුරුදු දෙයක් . නමුත් මෙවැනි ජනතාව අපහසුතාවට පත්කරන වැඩ අපිවත් , ප්‍රජාතන්ත්‍රවාදය අගයන කිසිවෙකු අනුමත කරන්නේ නැහැ . එකෙන් පැහැදිලියි ජනාධිපතිවරණය ජයගන්න බැරි බව දන්නා පොහොට්ටුව ජනතාව හිංසනයට ලක් කරන්න කරන වැඩ බව . මෙවැනි කුමන්ත්‍රණ නැවැත්වීම සදහා අද ජනතාව එක්සත් ජාතික පක්‍ෂය වටේ රොක්වෙමින් සිටිනවා . ඒක නවත්වන්න සක්‍රයටවත් බැහැ .    

අපි අද තීරණය කළා සැලසුම් කළා එක්සත් ජාතික පක්‍ෂය නොවැම්බර් 16 දින ජයගන්න කොට දිස්ත්‍රික්කයත් ජයගැනීමේ වැඩපිළිවෙල .  පොහොට්ටුව වැඩ වර්ජන රැල්ලක් නිර්මාණය කරමින් දේශපාලනය කරද්දී අපි එක්සත් ජාතික පක්‍ෂය වශයෙන් ජනතාවගේ කැමැත්ත දිනාගනිමින් මැතිවරණයේ ජය වෙනුවෙන් ජනතාව සමග එක්ව කටයුතු කරමින් ඉන්නවා . මේක තමයි වෙනස . වසර 29 කට පස්සේ තමයි අපිට මෙවැනි අවස්ථාවක් ලැබිලා තියෙන්නේ".

මාර්තු 12 සංවිධානය හා පැෆරල් සංවිධානය විසින් මෙවර ජනපති අපේක්ෂකයන් එකම වේදිකාවට ගෙනවිත් රටේ ප්‍රශ්න සඳහා ඔවුන් ලබාදෙන පිළිතුරු කවරේද යන්න පිළිබඳව වන මහජන වේදිකාව වැඩ සටහන ඊයේ  (05) කොළඹ සුගතදාස ගෘහස්ථ ක්‍රීඩාංගණයේදී පැවැත්විණ.

මෙවැනි වැඩසටහනක් ශ්‍රී ලංකාවේ පැවැත්වූ පළමු අවස්ථාව මෙය  වූ අතර මෙවර ජනපතිවරණයට ඉදිරිපත්ව සිටි ප්‍රධාන අපේක්ෂකයන් වන එක්සත් ජාතික පෙරමුණේ සජිත් ප්‍රේමදාස හා ජාතික ජන බලවේගයේ අනුර කුමාර දිසානායක ඇතුළු පිරිසක් මෙම ප්‍රශ්නවලට පිළිතුරු දීමේ වැඩසටහනට එක්විය.

කෙසේ වෙතත් ශ්‍රී ලංකා පොදුජන පෙරමුණේ ජනපති අපේක්ෂක ගෝඨාභය රාජපක්ෂ මෙම වැඩසටහනට එක්නොවීය.

ප්‍රශ්න ඇසීම ගෝඨාට ඇලජික් !

මේ සම්බන්ධව අදහස් දක්වමින් දේශපාලන විචාරකයන් පෙන්වා දෙන්නේ ගෝඨාභය රාජපක්ෂ සජීවී වැඩසටහන් සඳහා සහභාගී නොවන බවත් ඊට හේතුව බරපතල ප්‍රශ්න ඉදිරිපත් වූ විට ඔහුට පාලනය කරගැනීමට නොහැකි කේන්තියක් එන බව පසුගිය රාජපක්ෂ පාලනය තුළ නිරීක්ෂණය වූ බවය.

වරක් බීබීසී මාධ්‍යවේදියා ලසන්ත වික්‍රමතුංග සම්බන්ධව විමසූ අවස්ථාව සහ සිරස මාධ්‍ය භාවිතය සම්බන්ධව ඔහු අවස්ථා කිහිපයක ප්‍රතිචාර දැක්වූ ස්වභාවය ද දේශපාලන විචාරකයන් සිහිපත් කරයි.

මේ පිළිබඳ වැඩිදුරටත් අදහස් දක්වමින් දේශපාලන විචාරකයන් සදහන් කරන්නේ ගෝඨාභය රාජපක්ෂ මාධ්‍ය වෙත විවෘත නොකිරීමේ ප්‍රතිපත්තියක් පොදුජන පෙරමුණ පාර්ශවය වෙතින්ද නිරීක්ෂණය වන බවය.

සජිත්ගේ ඉදිරිපත් වීම ප්‍රශංසනීයයි !

එසේම දේශපාලන විවාද සඳහා සාමාන්‍යයෙන් ඉදිරිපත් වනවා දැක නොමැති සජිත් ප්‍රේමදාස අපේක්ෂකයා මීට සහභාගී වීම අතිශය වැදගත් බවත් ඒ අනූව අභියෝග සඳහා මුහුණදීමට සහ එයින් පළානොගොස් අභිමුඛ වීම සාධනීය කරුණක් බවත් දේශපාලන විචාරකයන් අවධාරණය කරයි.

ඉදිරි ජනාධිපතිවරණය සම්බන්ධයෙන් ශ්‍රී ලංකා නිදහස් පක්ෂය වෙනුවෙන් අවසන් තීරණයක් ගැනීමේ බලය ජනාධිපතිවරයා වෙත පැවරීමට පක්ෂයේ මධ්‍යම කාරක සභාව තීරණය කල බවත්, එම තීන්දුව හෙට පෙරවරු 11.00ට දැනුම් දෙන බවත් එම පක්ෂයේ මාධ්‍ය ප්‍රකාශක වීරකුමාර දිසානායක මන්ත්‍රීවරයා  පැවසිය.

ජනාධිපතිවරණය සම්බන්ධයෙන් ගතයුතු ක්‍රියාමාර්ගය පිළිබඳව ශ්‍රීලනිප මධ්‍යම කාරක සභාවේ තීරණාත්මක  රැස්වීම අද (05) පස්වරුවේ ආරම්භවූ අතර එය නිමාවට පත්වුයේ රාත්‍රී 10.30ට පමණය.

එහිදී 'පොහොට්ටු' පක්ෂයේ අපේක්ෂක ගෝඨාබයට සහයදිය යුතු බවට සන්ධාන මහ ලේකම් මහින්ද අමරවීර ඇතුළු ශ්‍රීලනිප මධ්‍යම කාරක සභාවේ බහුතරයක් සාමාජිකයින් අදහස් දක්වා ඇතැයි වාර්තාවේ.

ශ්‍රීලනිප සහය 'පොහොට්ටුවට ! - ඩලස් කියයි

මේ අතර ජනාධිපතිවරයා හා ගෝඨාබය රාජපක්ෂ අතර අද (05) පස්වරුවේ දී ජනාධිපති ලේකම් කාර්යාලයේ පැවති සාකච්ජාවේදී ඉදිරි ජනාධිපතිවරණය සම්බන්ධයෙන් එකඟතාවයක් ඇතිකර ගත් බවත්, ඒ අනුව  ශ්‍රී ලංකා නිදහස් පක්ෂය, ජනාධිපති අපේක්ෂක ගෝඨාබය රාජපක්ෂ සමග හා පොහොට්ටු පක්ෂය සමග වෙන වෙනම අවබෝධතා ගිවිසුම් දෙකක් අත්සන් කිරීමට නියමිතව ඇති බවත්  'පොහොට්ටුවේ' අභ්‍යන්තර ආරංචිමාර්ග පවසයි.

එම සාකච්ජාවට විපක්ෂනායක මහින්ද රාජපක්ෂ හා 'පොහොට්ටු' පක්ෂයේ නිර්මාතෘ බැසිල් රාජපක්ෂ මෙන්ම, ශ්‍රීලනිපයේ පාර්ලිමේන්තු මන්ත්‍රීවරුන් කිහිප දෙනෙකු ද සහභාගී වී ඇතැයි ද පැවසේ.

ඔක්තෝම්බර් මස 09දා එම ගිවිසුම් අත්සන් කරන බව ගෝඨාබය රාජපක්ෂගේ මාධ්‍ය ප්‍රකාශකයකු වන ඩලස් අලහප්පෙරුම මන්ත්‍රීවරයා එම සාකච්ජාවෙන් අනතුරුව මාධ්‍ය වෙත පවසා තිබිණ.

එජාපය සමග එක් නොවන බව ශ්‍රීලනිපය කියයි

ඉදිරියේ පැවැත්වෙන කිසිදු මැතිවරණයකදී එක්සත් ජාතික පක්ෂයට සහාය ලබා නොදෙන බව ශ්‍රී ලංකා නිදහස් පක්ෂයේ ජ්‍යෙෂ්ඨයින් කිහිප දෙනෙකුම අද (05) ප්‍රකාශ කළේය. ඒ, ඇල්පිටිය මහජන ක්‍රීඩාංගණයේ පැවති ගාල්ල දිස්ත්‍රික් ශ්‍රී ලංකා නිදහස් පක්ෂ සමුලුව අමතමිනි.

 සමුළුව ඇමතූ පක්ෂයේ සභාපති ජනාධිපති මෛත්‍රීපාල සිරිසේන මෙසේ පැවසිය.

ජනාධිපති මෛත්‍රීපාල සිරිසේන ශ්‍රී ලංකා නිදහස් පක්ෂයේ ආසන සංවිධායකින් කැඳවා ඉදිරි ජනාධිපතිවරණයේ දී ශ්‍රීලනිපය ගතයුතු දේශපාලනික පියවර කවරේදැයි මතවිමසීමක් සිදුකර ඇත.

ඊයේ (04) සවස ජනාධිපතිවරයාගේ ප්‍රධානත්වයෙන් කොළඹ පැජට් පාරේ ජනාධිපති නිල නිවසේ දී රැස්වූ මෙකී පිරිස ඉදිරි ජනාධිපතිවරණයේ දී ශ්‍රීලනිපය ගත යුතු ක්‍රියාමාර්ගය ගැන සාකච්ඡා කර ඇති අතර එහි දී ප්‍රධාන ක්‍රියා මාර්ග 5 ක් පිළිබඳ මතය විමසා තිබේ.

කරුණු පහක් සංවිධායකයින් වෙත ලබාදී ඇති ජනාධිපතිවරයා, එම කරුණු සම්බන්ධයෙන් තම තමන් කැමති කාරණා  තුනක් අනුපිළිවෙලින් සඳහන් කරන්නැයි දැනුම්දී ඇත. එම කාරනා පහේ අන්තර්ගතය සැකෙවින් මෙසේය.

ඉදිරි ජනාධිපතිවරණයේදී,

1 ශ්‍රීලනිපයෙන් ජනාධිපති සිරිසේන ජනාධිපතිවරණයට ඉදිරිපත් විය යුතුය.
2 ශ්‍රීලනිපයෙන් වෙනත් අයෙකු ඉදිරිපත් කළ යුතුය.
3 පොහොට්ටු අපේක්ෂක ගෝඨා සමග සන්ධානයකට යා යුතුය.
4 පොහොට්ටු අපේක්ෂක ගෝඨා සමග සන්ධානයකට නොයා යුතුය.
5 ප්‍රජාතන්ත්‍රවාදී ජාතික සන්ධානයේ අපේක්ෂක සජිත් ප්‍රේමදාසට සහාය දිය යුතුය.

ශ්‍රී ලංකා නිදහස් පක්ෂ ආරංචිමාර්ග පවසන්නේ තම පක්ෂය දේශපාලන තීන්දුවක් ගැනීම සඳහා මෙලෙස සංවිධායකයින් කැඳවා මතවිමසිමක් කරනු ලැබුවේ වසර 18කට පසුව බවයි.

ඊයේ දිනයේ මතවිමසිමේදී සංවිධායකයින් ගෙන් ලද ප්‍රතිචාරය ජනාධිපතිවරයා විසින් අද (05) රාත්‍රී පැවැත්වෙන පක්ෂයේ මධ්‍යම කාරක සභාව වෙත ඉදිරිපත් කිරීමට නියමිතය.

මාධ්‍ය ඒකකයටත් ප්‍රශ්න පත්‍රයක් !

ඒ අතර ඊයේ  (04) ‌පෙරවරු 10.30ට පමණ කිසිඳු පුර්ව දැනුම්දීමකින් තොරව ජනාධිපති මාධ්‍ය ඒකකයේ සියලු ‌දෙනාම කැදවා ඇති ජනාධිපතිවරයා, ඒ සියලු ‌දෙනාටම ඈත්ව අසුන් ගන්නා ‌ලෙස දැනුම් දී තිබේ.

ඉන් අනතුරුව ප්‍රශ්න 4ක් සහිත ලියවිල්ලක් ලබා දී ඇති ජනාධිපතිවරයා විනාඩි 10ක් ඇතුළත ඊට පිළිතුරු ලබා ‌දෙන ‌ලෙසට දැනුම් දී ඇත.

එම ලියවිල්ලේ ශ්‍රීලනිපය ‌පොහොට්ටුව සමග සන්ධානගත විය යුතුද?  සජිත් ‌ප්‍රේමදාස ප්‍රමුඛ එජාපය සමග සන්ධානගත විය යුතුද? එසේත් නැත්නම් තනිවම ජනාධිපතිවරණයට ඉදිරිපත් විය යුතුද ? යනාදී වශයෙන් ප්‍රශ්න 4ක් ඇතුළත් කර තිබී ඇත.

පසුව මාධ්‍ය ඒකකයේ නිලධාරීන් විනාඩි 10ක් ඇතුළත පිළිතුරු ලබා දීමෙන් පසු සියලු ප්‍රශ්න පත්‍ර එකතු කරගෙන ජනාධිපතිවරයා පිටව ‌ගොස් ඇති බවද දැනගන්නට ඇත.

පොහොට්ටුව සුබවාදී බලාපොරොත්තුවක !

අද රාත්‍රී පැවැත්වෙන මධ්‍යම කාරක සභා රැස්වීමේදී ජනාධිපතිවරණය සම්බන්ධයෙන් අවසන් තීරණයක් ගැනීමට හැකිවනු ඇතැයි තමන් විශ්වාස කරන බව ශ්‍රී ලංකා නිදහස් පක්‍ෂයේ මහලේකම්, පාර්ලිමේන්තු මන්ත්‍රී දයාසිරි ජයසේකර පැවසිය.

ශ්‍රී ලංකා පොදුජන පෙරමුණේ ජනාධිපති අපේක්‍ෂක ගෝඨාබය රාජපක්‍ෂට සහාය දැක්වීම සදහා අවබෝධතා ගිවිසුමක් ඇති කර ගැනීමට අදාළ කරුණු සම්බන්ධයෙන් දෙපාර්ශවය ඉකුත්දා එකගතාවකට පැමිණියේය.  ඒ, ජනාධිපති ධුර අපේක්‍ෂක ගෝඨාබය රාජපක්‍ෂ සහ ශ්‍රී ලංකා නිදහස් පක්‍ෂ නියෝජිතයන් අතර පැවති සාකච්ඡාවකදීය.

ශ්‍රී ලංකා නිදහස් පක්‍ෂ මහලේකම්, පාර්ලිමේන්තු මන්ත්‍රී දයාසිරි ජයසේකර, පක්‍ෂයේ උප සභාපති පාර්ලිමේන්තු මන්ත්‍රී මහින්ද අමරවීර සහ පක්‍ෂයේ භාණ්ඩාගාරික පාර්ලිමේන්තු මන්ත්‍රී ලසන්ත අලගියවන්න එම සාකච්ඡුවට එක් ව තිබිණ.

කෙසේවෙතත් ශ්‍රී ලංකා නිදහස් පක්‍ෂයේ ප්‍රධානතම ඉල්ලීමක් වන ලකුණ වෙනස් කිරීම සම්බන්ධයෙන් දෙපාර්ශවය අතර එකඟතාවක් ඇති වී නොමැත.

මේ අතර ශ්‍රී ලංකා නිදහස් පක්‍ෂය සහ ශ්‍රී ලංකා පොදුජන පෙරමුණ අතර පැවැත්වූ සාකච්ඡා බොහෝ දුරට සාර්ථක වී ඇති බව පාර්ලිමේන්තුමන්ත්‍රී ප්‍රසන්න රණතුංග පවසයි. මාධ්‍යවේදීන කළ ප්‍රශ්න කිරීමකදී ඔහු ඒ පිළිබද අදහස් දැක්වූයේ මෙසේය.

ජනාධිපතිවරයාගේ යෝජනාව අනුව ශ්‍රී ලංකා පොදුජන පෙරමුණ නම වෙනස්කර මැතිවරණයට ඉදිරිපත් වීමට පොහොට්ටුව සිය එකඟත්වය පළකරමින් ජනාධිපති මෛත්‍රීපාල සිරිසේන වෙත ඊයේ (04) සවස විශේෂ ලිපියක් භාර භාර දී ඇතැයි විමල් විරවංශ මන්ත්‍රීවරයා විසින් පවත්වාගෙන යන lankaleadnews.comවෙබ් අඩවිය වාර්තා කරයි.

එම වාර්තාවේ මෙසේද සඳහන් වේ.

''ශ්‍රී ලංකා පොදුජන පෙරමුණේ ලේකම් නීතිඥ සාගර කාරියවසම් මහතාගේ අත්සනින් යවන ලද මෙම ලිපිය අනුව සන්ධානයේ නම වෙනස් කිරීමටත් පොහොට්ටුව වෙනුවට පුටුව ලකුණින් තරග කිරීමටත් සිය එකඟතාව පළකර ඇත.

එම ලිපියේ වැඩිදුරටත් සඳහන් වන්නේ ගෝඨාභය රාජපක්ෂ මහතා පොහොට්ටුව ලකුණින් දැනටමත් ඇප තැන්පත් කර ඇති නිසා නීතිමය බාධාවක් පවතින බැවින් ඒ ගැන මැතිවරණ නීති විශාරදයන්ගෙන් උපදෙස් ගත යුතු බවයි. 

පවත්නා නීතිමය තත්ත්වය තුළ ඇප තැන්පත් කළ අපේක්ෂකයාට පසුව ඡන්ද ලකුණ වෙනස් කළ හැකිනම් ඒ අනුව ක්‍රියා කිරීමට ශ්‍රී ලංකා පොදුජන පෙරමුණ එකඟත්වය පලකර ඇත.

පොහොට්ටුවේ අපේක්ෂකයා ශ්‍රී ලංකා නිදහස් පොදුජන සන්ධානය සහ නව සන්ධානය යටතේ තරගයට ඉදිරිපත් කිරීමටද පොහොට්ටුව එකඟ බව තවදුරටත් එම ලිපියේ සඳහන්ය. 

එම නිසා ගිවිසුම සම්බන්ධයෙන් වන දෙපක්ෂයේ යෝජනා කඩිනමින් සලකා බලා ශ්‍රීලනිපය සහ පොහොට්ටුව සන්ධානය සඳහා ගිවිසුම් අත්සන් කිරීමට දිනයක් හා වේලාවක් ලබාදෙන ලෙසද ශ්‍රී ලංකා පොදුජන පෙරමුණ මහලේකම්වරයා ඉල්ලීමක් කර තිබේ.''
(උපුටා ගැනීම අවසන්)

පොහොට්ටුවට ලකුණ මාරු කළ හැකිද ?

මෙම කාරණය සම්බන්ධයෙන් 'නෙත් නිවුස්' කළ විමසීමකදී මැතිවරණ කොමිසමේ ප්‍රකාශකයෙකු පැවසුයේ, කිසියම් පක්‍ෂයක් වෙනුවෙන් ඇප මුදල් තැන්පත් කර ඇත්නම් මැතිවරණ නීතිය අනුව එම පක්‍ෂයේ ලකුණ වෙනස් කිරීම සම්බන්ධයෙන් නීතිමය ගැටළු පවතින බවයි. 

කෙසේවෙතත් පිළිගත් දේශපාලන පක්‍ෂයක් ඇප මුදල් තැන්පත් කිරීමෙන් පසු සන්ධානගත වන්නේ නම් ඊට අදාළව එම  ලකුණ වෙනස් කිරීම සම්බන්ධ අවසන් තීරණයක් ලබාදීම මැතිවරණ කොමිසම වෙත පැවරෙන බව එම ප්‍රකාශකයා වැඩිදුරටත් සදහන් කළේය. 

ජනාධිපතිවරණයට ඉදිරිපත්වීම සඳහා හිටපු කතානායක චමල් රාජපක්ෂ ඊයේ (04)  මැතිවරණ කොමසාරිස් කාර්යාලයේ දී ඇප මුදල් තැන්පත් කර ඇත්තේ විපක්ෂ නායක මහින්ද රාජපක්ෂගේ දැනුම්දීම මතය.

ඒ අනුව 'ශ්‍රී ලංකා නිදහස් පොදුජන සන්ධානය' නමින් ස්වාධින අපේක්ෂකයකු ලෙස ඔහු වෙනුවෙන් ඇප මුදල් තැම්පත් කරනු ලැබුවේ රාජපක්ෂ පවුලේ සමීපතම ඥාතියකු වන නීතිඥ සුමිත් විජේසිංහය. ශ්‍රී ලංකා නිදහස් පොදුජන සන්ධානයේ ලේකම් ලෙස ඔහු එම ඇප මුදල් තැම්පත්කර ඇත.

මෙසේ චමල් රාජපක්ෂ වෙත ඇප මුදල් තැම්පත් කරන්නැයි විපක්ෂනයකවරයා දැනුම් දී ඇත්තේ, ගෝඨාබය රාජපක්ෂ ශ්‍රී ලාංකික පුරවැසියකු වශයෙන් පිළිගැනීම වළක්වාලමින් තහනම් නියෝගයක් නිකුත් කරන ලෙස ඉල්ලා ගොනු කර තිබූ පෙත්සම සම්බන්ධයෙන් අභියාචනාධිකරණය විසින් ගෝඨාබයට අවාසිදායක තීන්දුවක් දීමට බොහෝදුරට ඉඩ ඇතැයි 'පොහොට්ටුවේ' ජ්‍යෙෂ්ඨ නීතිඥයින් විපක්ෂ නායකයා හමුවී කර තිබු පැහැදිලි කිරීම් හමුවේය.

ගෝඨාබය, මහින්දගෙන් කළ ඉල්ලීම !

කෙසේවුවද, තමාට වාසිදායක නඩු තීන්දුවක් ලැබෙන බවට සිය නීතිඥ මණ්ඩලය දැනුම් දී ඇති බව විපක්ෂ නායකයා වෙත කිහිප වරක්ම පවසා ඇති ගෝඨාබය රාජපක්ෂ, ඊයේ දහවල් ද යලිත් එම කාරණය අවධානය කර ඇත්තේ, එහෙයින් වෙනත් කිසිඳු අපේක්ෂකයකු ඉදිරිපත් නොකරන්නැයි ද ඉල්ලා සිටිමිනි.

ගෝඨාබයගේ 'වියත්මඟ' ප්‍රබලයින් කිහිප දෙනෙකු ද විපක්ෂ නායකවරයාගේ පවුලේ සාමාජිකයින් වරින් වර හමුවෙමින් විකල්ප අපේක්ෂකයකු ඉදිරිපත් නොකරන්නැයි බලපෑම් කර ඇත.

එම බලපෑම් හමුවේ විපක්ෂ නායකවරයා දැඩි ලෙස පවසා ඇත්තේ මේ මොහොතේදී අවධානමක් ගත නොහැකි බවයි.  කෙසේවුවද ගෝඨාබය සම්බන්ධ නඩු තීන්දුව සලකා බලා චමල් රාජපක්ෂ වෙනුවෙන් ඇප තැම්පත් කිරීම ඉරිදා දිනයට යොදා ගැනීමට විපක්ෂ නායකවරයා එකඟ වී තිබේ.

මැතිවරණ කොමසාරිස් කාර්යාලයේ ප්‍රකාශකයා?

එහෙත්, ඊයේ දහවල් විපක්ෂ නායකවරයාගේ නියෝජිතයකුට දුරකථන ඇමතුමක් ලබාදී ඇති මැතිවරණ කොමසාරිස් කාර්යාලයේ ප්‍රධානියකු, චමල් රාජපක්ෂ වෙනුවෙන් වහාම ඇප මුදල් තැම්පත් කිරීමට කටයුතු කරන්නැයි දැනුම් දී ඇත. 

ඒ සෙනසුරාදා රජයේ නිවාඩු දිනයක් ලෙස ප්‍රකාශකර තිබීමත්, ඉරිදා දින දහවල් දක්වා ඇප තැම්පත් කල හැකිවුවත් එදින රජයේ නිවාඩු දිනයක් යයි කියමින් ඇතැමුන් විරෝධයක් දැක්විය හැකි බවත් මැතිවරණ කොමසාරිස් කාර්යාලයේ නිලධාරියා පැහැදිලි කර තිබේ.

චමල් රාජපක්ෂ ඊයේ දිනයේම ඇප මුදල් තැම්පත් කරනු ලැබ ඇත්තේ ඒ අනුවය.

කෙසේවුවද චමල් රාජපක්ෂ විකල්ප අපේක්ෂයකයා ලෙස ඉදිරිපත් කිරීමේ පුර්ව සුදානමක් තිබී ඇතිබව ඒකාබද්ධ විපක්ෂයේ අභ්‍යන්තර ආරංචිමාර්ග පවසයි. විමල් විරවංශ මන්ත්‍රීවරයා විසින් පවත්වාගෙන යන 'ලංකා සී නිව්ස්' පසුගිය 01 අඟහරුවාදා පෙරවරුවේ ''චමල් රාජපක්‍ෂ ජනාධිපතිරවණයට නාම යෝජනා දීම ස්ථිරයි…'' යනුවෙන් විශේෂ පුවතක් වාර්තා කර තිබිණ.

ඉදිරි ජනාධිපතිවරණයේදී තමන් කටයුතු කරන ආකාරය සම්බන්ධයෙන් වූ ශ්‍රී ලංකා නිදහස් පක්ෂයේ අවසන් තීරණයට අද (05) එළඹෙන බව එම පක්ෂයේ මහලේකම් පාර්ලිමේන්තු මන්ත්‍රී දයාසිරි ජයසේකර  සදහන් කරයි.

පක්ෂයේ සභාපති ජනාධිපති සිරිසේනගේ ප්‍රධානත්වයෙන් අද රාත්‍රි ජනාධිපති නිලනිවසේදී පැවැත්වෙන ශ්‍රී ලංකා නිදහස් පක්ෂ මධ්‍යම කාරක සභා රැස්වීමේදී මෙම තීරණය ගැනීමට නියමිත බවද මහ ලේකම්වරයා සඳහන් කරයි.

කෙසේ වුවත් ශ්‍රී ලංකා නිදහස් පක්ෂයේ අභ්‍යන්තර ආරංචි මාර්ග සදහන් කරන්නේ ජනාධිපතිවරණය අවස්ථාවේ ශ්‍රිලනිප සහය කාටද යන්න සම්බන්ධව පක්ෂයේ මත දෙකක් ඇති බවය.

පක්ෂයේ මත කිහිපයක් !

ඒ අනූව පාර්ලිමේන්තු මන්ත්‍රී නිමල් සිරිපාල ද සිල්වා ඇතුළු පිරිසක් පොහොට්ටු පාර්ශවය සමග එක්ව ජනාධිපතිවරණය තුළ කටයුතු කල යුතු බවට දැඩි මතයක සිටින අතර අනෙක් පාර්ශවය කොන්දේසි සහිතව එනම් ශ්‍රී ලංකා නිදහස් පක්ෂයේ අනන්‍යතාවයට හානි නොවන ආකාරයට ඕනෑම සන්ධානයක් වෙත සහය දීමේ වැදගත් කම අවධාරණය කරමින් සිටියි.

මේ සම්බන්ධව බරපතල සාකච්ඡා පක්ෂ අභ්‍යන්තරයේ සිදුවෙන බවත් ඒකාධිපති පවුල් පාලනයක් යළිත් ඇතිවීමේ අවධානමක් පොහොට්ටු පාර්ශවයේ ජයග්‍රහණය තුළ ඇති බැවින් ඒ පවට කර නොගසා සිටීම මේ මොහොතේ දේශපාලනය බවට මතයක් දරණ පිරිසක්ද ශ්‍රිලනිපය තුල සිටින බව දේශපාලන ආරංචි මාර්ග වැඩිදුරටත් සදහන් කරයි.

ශ්‍රී ලාංකීය දෙමල, මුස්ලිම්, බර්ගර්, මැලේ ජාතිකයින් සුළු ජාතින්  ලෙස හැඳින්වීම නොසුදුසු බවත් තමා විසින් ඔවුන්ව හඳුන්වන්නේ 'සෙසු ජාතින්' ලෙස බවත් එජාපෙ ජනාධිපති අපේක්ෂක සජිත් ප්‍රේමදාස අමාත්‍යවරයා පවසයි. 

ඔහු එබව කියා සිටියේ පෙරේදා (03) රාත්‍රී කොළඹ 'රමාඩා' හෝටලයේ පැවති සුහඳ හමුවකදීය. මුස්ලිම් විද්වත් තරුණ සංවිධානයක් විසින් එම හමුව සංවිධානය කර තිබිණ.

'' ත්‍රස්තවාදයට කිසිඳු ඉඩක් නොදිය යුතු බව මෙහිදී පෙන්වා දුන් සජිත් අමාත්‍යවරයා,  ''කොටින්ම කිව්වොත් ත්‍රස්තනාදය විනාස කරන්න ඕනේ'' යයි අවධාරණය කර සිටියේය.

එහිදී තවදුරටත් අදහස් දැක්වූ සජිත් අමාත්‍යවරයා මෙසේ ද පැවසිය.

''දැන් මට ඇහුනා බොහෝ තැන්වල සුළු ජාතීන් කියන වචනේ පාවිච්චි කරනවා. මම කියන්න කැමති මම සුළු ජාතීන් කියන වචනේ පාවිච්චි කරන්නට යන්නේ නැහැ. මම ඔවුන්ව හඳුන්වන්නේ සෙසු ජාතීන් කියලා. මේ රටේ ජිවත්වන හැම පුරවැසියෙකුටම අභිමානයක් තිබෙනවා. සුළු කිව්වම නිකන් පහතට හෙලනවා වගේ මේ මට එන හැගීම. 

විශේෂයෙන්ම මම කියන්න කැමති සජිත් ප්‍රේමදාස පාලනයක් තුළ මම විශ්වාස කරන ආකාරයට මම අනුගමනය කරන ප්‍රතිපත්තී මම බොහොම එලිපිට මගේ පපුවෙන්ම ඔයාලාට ප්‍රකාශ කරන්න කැමතියි.

 අපි අපේ රට ආරක්ෂා කරන්න ඕනේ. මේක එක්කෙනෙකුගේ  දෙන්නෙකුගේ පවුලක රටක් නෙවෙයි . ඔබගෙත් මගෙත් අපි සියලු දෙනාගේම රට. මේ රටේ ජාතික ආරක්ෂාව අති වැදගත් කාරනාවක්. ජාතික ආරක්ෂාව ශක්තිමත් කරන්නට අපි හැම විටම කටයුතු කරන්නට ඕනේ. 

ත්‍රස්තවාදය හෝ වේවා වෙනත් බලවේග හෝ වේවා අපේ රට රුකගන්න ඕන රටේ ජනතාව රැක ගන්නට ඕනේ මම කියනවා තමුන් වහන්සේලාට අපි ත්‍රස්රස්තවාදය විනාස කරන්න ඕනේ.  

හැබැයි මිත්‍රවරුනි සමහරෙක් හිතාගෙන ඉන්නවා මේ ත්‍රස්තවාදය විනාස කරනවා කියන්නේ මුළු ජාතියක්ම විනාස කියන එක, මුළු ආගමක්ම විනාස කරනවා කියන එක. ඒක මහා මෝඩ සිතුවිල්ලක්, මහා බොලද සිතුවිල්ලක්. ඇයි මම එහෙම කියන්නේ ඔය සෙසු ජාතීන් විනාස මුඛය කරා ගෙන යනකොට ජාතික ආරක්ෂාව තහවුරු වෙනවද? පල්ලි කඩනකොට දේවස්තාන කඩනකොට කොවිල් කඩනකොට රටේ ස්වෛරීත්වය ශක්තියක් ලැබෙනවද ? ඒක මනුස්සකමද? මනුෂ්‍යත්වයද?                                                                                   නැහැ, මිත්‍රවරුනි ජාතික ආරක්ෂාව ශක්තිමත් කරන්නට නම් එක පැත්තකින් අපේ ත්‍රීවිඩ හමුදාව, පොලීසිය, සිවිල් ආරක්ෂක බලකාය වැනි ආරක්ෂක ක්ෂේත්‍රය අපි ශක්තිමත් කරන්නට ඕනේ. විදේශ පුහුණු වලට යවන්නට ඕනේ නූතන ත්‍රස්තවාදය හදුනා ගන්නට ඕනේ. 

නූතන ත්‍රස්තවාදය මේ භූමියක් අල්ල ගන්න කරන ත්‍රස්තවාදයක් නොවේ. කුමන ජාතීකයින් කුමන ආගමක් සම්බන්ධ කරගෙන මේ ත්‍රස්තවාදය ක්‍රියාත්මක කරත් අපි ඒක මැඩ පවත්වන්නට ඕනේ. කොටින්ම කිව්වොත් ත්‍රස්තනාදය විනාස කරන්න ඕනේ. 

හැබැයි ත්‍රස්තවාදය විනාස කරනවා කියන්නේ පල්ලි කොවිල් දේවස්තාන විනාස කරනවා කියන එක නෙ‌වෙයි. යම් ආගමකට සම්බන්ධ යම් ජාතීයකට සම්බන්ධ ජන කොට්ඨාසයක් සම්පූර්ණයෙන්ම විනාස කිරීම තුළින් ඒ ජාතික ආරක්ෂාව තහවුරු වෙන්නේ නැහැ. එතනදි  තව තවත් ත්‍රස්තවාදයට හොද භූමියක් නිර්මාණය කරනවා ත්‍රස්තවාදය වර්ධනය කරනවා.''

මෙම සුහඳ හමුවට මුදල් අමාත්‍ය මංගල සමරවීර මෙන්ම ආණ්ඩුව නියෝජනය කරන මුස්ලිම් ජාතික මැති ඇමතිවරුන්ද සහභාගී වී සිටියේය.

මහින්ද  අයියා ජනපති වූ පසු යලි මෙරටට සැපත් වූ ඇමෙරිකන් ගෝටා 2005 වසරේදී යලි ලාංකික පුරවැසි භාවය ලබා ගෙන ඇත්තේ හොර පාරෙන් නොවේ යයි මීට ස්වල්ප වේලාවකට ‌පෙර අභියාචනාධිකරණය තීන්දු ‌ කළේය.  ඒ අනුව ලබන 7 වෙනිදා ආරම්භ වන නාමයෝජනා භාර දීම සඳහා ගෝඨාභය රාජපක්ෂටද ඉදිරිපත් විය හැකිය.

ගෝටාබයට දෙබලක් !

නාමයෝජනා ඉදිරිපත් කිරීමෙන් පසු මැතිවරණ කොමිෂන් සභාව එම නාම යෝජනා පත්‍රය පිළිගැනීමට පෙර ඕනෑම කෙනෙකුට එම නාමයෝජනා පත්‍රය වෙනුවෙන් විරෝධතා ඉදිරිපත් කළ හැකිය. ගෝටාබයට එරෙහි විරෝධතාව දැනටමත් සූදානම් කොට අවසානය . එනම් ගෝඨාභය අමෙරිකානු පුරවැසියෙකුය යන  විරෝධතාවය මතු වන්නේය . තමා ද්විත්ව පුරවැසියෙකු නොවන බව ඔප්පු කිරීමට නොහැකි වුවහොත් ගෝඨාට අපේක්ෂකත්වය අහිමි වේ. ගෝඨාභය වෙනුවෙන් පොහොට්‍ටුව ඇප තැන්පත් කර තිබියදි ශ්‍රි ලංකා නිදහස් පොදුජන සන්ධානය නමින් චමල් රාජපක්ෂ ඇප තැන්පත් කළේ එකී තත්වය නිසාය.

ගෝටා නිෂ්ක්‍රීය කිරීම කාගේ සැලසුමක්ද?

රාජපක්ෂ පවුල තුල බල අරගලයක් ඇති බව ප්‍රසිද්ධ රහසකි. කොන්දගල නිවසින් මැදමුලන දසයන් බලය කොල්ල කෑහ. දැන් මේ ගෙවී යන්නේ මැදමුලන නිවසින් කාල්ටන් දසයන් බලය කොල්ල කන හෝරාවය. යම් හෙයකින් ගෝටා දිනුව හොත් මහින්දට ඔහු පාලනය කල නොහැක. ප‍තෝල වැනි චමල් මහින්දට පාලනය කල හැක .එහෙයින් ගෝටා නිෂ්ක්‍රීය කල යුතුව ඇත.  ගෝටා දිනුව හොත් මැදමුලන දේශපාලන බලය සංක්‍රමනය වන්නේ කාල්ටන් නිවසට නොව මිරිහානේ නිවසටය .  මැදමුලන කොල්ලයේදී  බැසිල්ගේ සහාය හිමිව ඇත්තේ කාල්ටන් නිවසටය. චමල්ට ඇප බදින ලෙස දන්වා සිටියේ  මැකෝ විසිනි.  මේ සියල්ල හීන් නූලෙන් කලමනාකරණය කළේ මැකො සමග රෑට රෑට ඩ්‍රින්ක් දාන බැසිල්ය.

කොන්දගලින් මැදමුලනට , මැදමුලනින් කාල්ටන් නිවසට –නාමල්ට චතුරිකාලාට හෙටක් !

චමල් ඉල්ලන්නේ අලුත් පක්ෂයකිනි. මෙය සජිත් ප්‍රේමදාසට එරෙහිව සියළු බලවේග ගොනු කල හැකි උපක්‍රමයකි. පොහොට්ටුව නොවන වෙනත් ලකුණකින් මැතිවරණයට ඉල්ලා සිටීම තුල  ශ්‍රි ලංකා නිදහස් පක්ෂයට චමල් හා එකට සිට ගත හැක.  ශ්‍රි ලංකා නිදහස් පක්ෂයට ගැලපෙන විසඳුමක් ක්‍රියාත්මක කරන බවට මහින්ද මෛත්‍රීට දුන් පොරොන්දුව ඉ‍ටු කිරීමකි .මරා- සිරා ගිවිසගත් පරිදි නාමල්ලාට චතුරිකාට හෙටක් තැනිය හැක. තවද කුමාර වෙල්ගම වැනි  උග්‍ර ගෝඨා වීරෝධීන්ට පිලියමද චමල්ය. ගෝටා කපා චමල් ගෙන ඒම හරහා දෙමල මුස්ලිම් ජාතිකයන් රාජපක්ෂලා කෙරේ දක්වන බිය තනූක කල හැක.

කාල්ටන් දසයන්ගේ මැදමුලන කොල්ලය !

කාල්ටන් දසයන්ගේ  මැදමුලන කොල්ලය අවසන් වන්නේ ගෝටා නිෂ්ක්‍රීය කිරීමෙනි. එය ගෝටා වාදීන්ට  බලවත් සිත් බිදීමක්  වනවා නොඅනුමානය . නමුත් මහින්ද විසින් සූක්ෂමව චමල් නැමති විකල්පය ඉදිරි පත් කරන නිසා  ඔවුන්ට නිහඩ වීමට සිදු වනු ඇත. තවද ගෝටාගේ අපේක්ෂකත්වය ප්‍රතික්ෂේප වන්නේ ඔහු ඇමෙරිකන් පුරවැසියෙකු වීම නිසාවෙනි. එනම් ගෝඨාභයට ඉල්ලන්න බැරි වන්නේ මහින්ද මෙහෙයවන මැදමුලන කොල්ලය නිසා නොව  දෙස් විදෙස් කුමන්ත්‍රනයකිනි . කරුනු එසේ හෙයින් ගෝටාගේ චින්තනය ඉදිරියට ගෙනයාමට ඇති එකම  මාර්ගය චමල්ට ඡන්දය දීම බව මහින්ද කියනු ඇත.

By තුෂාරා වන්නිආරච්චි

(Lankanewsapp)

මෙවර ජනාධිපතිවරණයට තරග කිරීම සඳහා අද (04) වනවිට අපේක්ෂකයෝ  33 ක් ඇප මුදල් තැන්පත් කර ඇති බව මැතිවරණ කොමිසමන් සභාව සඳහන් කරයි.

මේ අතර ඊයේ (04) දිනයේ තවත් අපේක්ෂකයෝ 11 දෙනෙක් මැතිවරණ කොමිසමට ඇප මුදල් තැන්පත් කර ඇත.

සජිත් ප්‍රේමදාස අමාත්‍යවරයා  නව ප්‍රජාතන්ත්‍රවාදී පෙරමුණින් ද,ජයන්ත ලියනගේ  සිංහල දීප ජාතික පෙරමුණෙන්ද , දුමින්ද නාගමුව  පෙරටුගාමී සමාජවාදී පක්ෂය වෙනුවෙන් ද ,  මහේෂ් සේනානායක  ජාතික ජනතා පක්ෂය වෙනුවෙන්ද , අරුණ ද සොයිසා  ප්‍රජාතන්ත්‍රවාදී ජාතික ව්‍යාපාරය වෙනුවෙන් ද ඇප මුදල් තැන්පත් කර තිබිණි.

මේ අතර අජන්ත ද සොයිසා රුහුණු ජනතා පෙරමුණ නැමති ලියාපදිංචි නොකළ දේශපාලන පක්ෂයෙන්ද ඇප මුදල් තැන්පත් කර ඇත.

මේ අතර පාර්ලිමේන්තු මන්ත්‍රීවරුන් වන බෂිර් සේගුදාවුද් , ඉල්ලියාස් මොහොමඩ් , පියසිරි විජේනායක , රජීව විජේසිංහ, කුමාර වෙල්ගම ද  ස්වාධීන අපේක්ෂකයින් ලෙසද ඇප මුදල් තැන්පත් කර තිබිණි.

ගෝඨාබය රාජපක්ෂ ශ්‍රී ලාංකික පුරවැසියකු වශයෙන් පිළිගැනීම වළක්වාලමින් තහනම් නියෝගයක් නිකුත් කරන ලෙස ඉල්ලා ගොනු කර තිබූ පෙත්සමක් ප්‍රතික්ෂේප කිරීමට ත්‍රිපුද්ගල අභියාචනාධිකරණ විනිසුරු මඬුල්ල අද (04) පස්වරුවේ ඒකමතිකව තීරණය කිරීමත් සමග එම පෙත්සම ඉදිරිපත්කළ මහාචාර්ය චන්ද්‍රගුප්ත තේනුවර සහ ගාමිණී වියන්ගොඩ වෙත සමාජ මාධ්‍ය ඔස්සේ තර්ජන එල්ලවෙමින් පවතී.

ඇතැම් එවැනි සටහන් මගින් පෙත්සම්කරුවන් දෙදෙනාට එකහෙලාම මරණීය තර්ජන සිදුකර ඇති අතර ඇතැමුන් ව්‍යංගයෙන් යුතුව එවැනි තර්ජන සිදුකර ඇත. රාජපක්ෂවාදියකු වන අකිල රොහාන් සිය FB පිටුවේ ව්‍යංගයෙන් යුතුව තර්ජනය කර ඇත්තේ මෙසේය.



එම පොස්ටුවට ප්‍රතිචාර දක්වා ඇති අයකු මෙසේ සඳහන් කර තිබේ.

''තීන්දුව ලැබී මොහොතකින් මෙහෙම නම්
බලය සම්පූර්ණයෙන්ම ලැබුණොත් කොහොම වෙයිද?''

පෙත්සම්කරුවන් දෙදෙනාට එල්ලවෙමින් පවතින තර්ජන සම්බන්ධයෙන් සටහනක් තබා ඇති lankadaily.com සංස්කාරක මාධ්‍යවේදී සුභාෂ් ජයවර්ධන මෙසේ සටහනක් තබා ඇත.

පෙත්සම් කරුවන් දෙදෙනාට එරෙහිව මේවනවිට ක්‍රියාත්මක අවලාද අපහාස හා මරණිය තර්ජන සම්බන්ධයෙන් ප්‍රතිචාර දක්වා ඇති මාධ්‍යවේදී සිසිර යාපා සිය FB පිටුවේ මෙසේ සඳහන් කර තිබේ.

පැරදුණ තේනුවර සහ වියන්ගොඩ:

මේ අතර පෙත්සමට අදාළ නඩු තීන්දුව ප්‍රකාශයට පත්කිරීමෙන් පසු නීතිඥ අථිල අතාවුද විසින් සිය FB පිටුවේ පළකර ඇති ලිපියක මෙසේ සඳහන් වේ.  

''ගෝඨාභය රාජපක්ෂගේ ද්විත්ව පුරවැසිභාවය අභියෝගයට ලක්කරමින් මහාචාර්ය චන්ද්‍රගුප්ත තේනුවර සහ ජ්‍යෙෂ්ඨ මාධවේදී ගාමිණී වියන්ගොඩ විසින් ගොණුකරන ලද රිට් පෙත්සම ඉවත දැමීමට ත්‍රිපුද්ගල අභියාචනාධිකරණ විනිසුරු මඩුල්ලක් ඒකමතිකව තීන්දු කරන ලදී.

ඒ හා සමගම ඔවුන් වෙත පසුගිය දින කිහිපය තිස්සේ එල්ල වෙමින් පැවති අවලාද, නින්දා අපහාස, ශාප කිරීම් දෙගුණ තෙගුණ වී ඇති බව පෙනේ. ඔවුන් සාර්ථක විණි නම් එහි වාසිය ලැබීමට සිටි එජාපයද ඉතා පහසුවෙන් “එය අපේ වැඩක් නොවේ” කියමින් ඇඟ බේරාගනු දක්නට ලැබුණි. එබැවින් ප්‍රජාතන්ත්‍රවාදය අගයන පුරවැසියෙකු වශයෙන් මේ මොහොතේ ඔවුන් වෙනුවෙන් යමක් කිව යුතු වේ.

පෙත්සම විසිවුනාට නොසලකා හැරිය නොහැකි කරුණු !

පෙත්සම ඉවත දැමුණද ඒ  පිළිබඳව පහත කරුණු නොසලකා හැරිය නොහැකිය.

1. ඔවුන් අභියෝගයට ලක්කරන ලද්දේ දවස් තුනක් (සති අන්ත දින දෙකක් ඇතුලත්ව) ඇතුලත නිකුත් කරන ලද පුරවැසිභාවය පිළිබඳව සහතිකයකි.

2. එවැනි කෙටි කාලයකින් ද්විත්ව පුරවැසිභාවය පිළිබඳව සහතිකයක් ලබාගැනීමට ඔබ සහ මම වැනි සාමාන්‍ය පුරවැසියන්ට කිසිසේත් නොහැකිය.

3. ඔහු සතුව තිබූ ද්විත්ව පුරවැසිභාවය පිළිබඳව සහතිකයට අදාළව අනිවාර්යයෙන්ම තිබියු යුතු වාර්තා ආගමන විගමන දෙපාර්තමේන්තුවේ නොතිබුණි.

4. ඔබ මම වැනි සාමාන්‍ය පුරවැසියෙකු අත රජයේ කාර්යාලයේ වාර්තා හා සමපාත නොවන යම් ලේඛනයක්, සහතිකයක් හෝ බලපත්‍රයක් ළඟ තබාගෙන සිට හසුවීනම් කුමන ඉරණමක් අත්වනු ඇත්තේදැයි සළකා බැලීම වටී.

5. ඔහුගේ ද්විත්ව පුරවැසිභාවයට අදාළ අයදුම්පත් අංකය අනුව ගත්කල එන ලැයිස්තුවේ එකී අංකයට අදාළව තිබුණේ වෙනත් පුද්ගලයෙකුගේ නමකි.

6. ඔබේ මගේ යම් අනන්‍යතා ලේඛනයක අනුක්‍රමික අංකයකට අදාළ රජයේ ලැයිස්තුවක වෙනත් නමක් තිබුණේ නම් බොහෝවිට තවම ඇපවත් නොලබා රක්ෂිත බන්ධනාගාරයේය.

7. ඉහත කී කරුණු කිසිවක් ගෝඨාභය රාජපක්ෂට අදාළ ඒවා නොවේ. ඔහු ඔහුවෙත නිකුත් කරන ලද නීත්‍යානුකූල යැයි ඔහු සද්භාවයෙන් විශ්වාස කරන සහතිකයක සද්භාවී දාරකයාය.

8. එවැනි කතා මීට පෙරද අසා ඇත. ඩේසි ආච්චිගේ මැණික් මල්ල එයට එක් උදාහරණයකි.

චන්ද්‍රගුප්ත තේනුවර සහ ගාමිණී වියන්ගොඩ විසින් ප්‍රශ්න කරන ලද්දේ එහෙව් සහතිකයක් පිළිබඳවය. ඒවා සාමාන්‍ය සිහිබුද්ධිය ඇති ඕනෑම පුරවැසියෙකුගේ ඔලුවට එන නමුත් ප්‍රශ්න කිරීමට බියවන කරුණුය. ඒ බියට හේතුව ප්‍රශ්න වලට විෂය වන පුද්ගලයාය. ඔහු කළක් ශ්‍රී ලංකාවේ කිසිවෙකුට ප්‍රශ්න කිරීමට අයිතියක් නැති පුද්ගලයෙකු විය. ඔහු අදටත් ප්‍රශ්න කරනු ලැබිය හැකි සීමාවට නොපැමිණීමට පරිස්සම් වන්නෙකි. එවන් පුද්ගලයෙකුව ප්‍රශ්න කිරීමට තරම් වූ නිර්භීතබාවය අචාරයට පාත්‍ර විය යුතු එකකි.

අධිකරණය එම පෙත්සම ඉවත දැමීමට තීරණය කරන ලදී. නීතිගරුක පුරවැසියන් වශයෙන් අධිකරණ තීරණයට ගරු කිරීමට අප බැඳී සිටිමු.

නමුත් තේනුවර සහ වියන්ගොඩ ආරම්භ කරන ලද “සාමාන්‍යයෙන් ප්‍රශ්න නොකරන්නන් ප්‍රශ්න කිරීමේ සංස්කෘතිය” මෙයින් අභාවයට යාමට ඉඩදිය යුතු නොවේ. එය ප්‍රජාතන්ත්‍රවාදී ශ්‍රී ලංකාවේ නවතම ප්‍රවණතාවය ලෙස දිරිගන්වා ඉදිරියට ගත යුතුය. ඒ සඳහා ප්‍රජාතන්ත්‍රවාදය අගයන සියල්ලෝම භේදයකින් තොරව පෙළගැසිය යුතුමය.