V2025

පුවත්

ගෝඨාගේ මිලිටරි ජුන්ටාවෙන්  : මහින්දට අභියෝගයක් !

රණවිරුවන් සහ රටේ ඒකීයභාවය වෙනුවෙන් අන්තර්ජාතික වශයෙන් පෙනී සිටින හමුදා නිලධාරියෙක් වන තමාව ළඟ තියා ගන්නවාද නැතහොත් පාර්ලිමේන්තු මන්ත්‍රී ඩිලාන් පෙරේරා ළඟ තියා ගන්නවාද යන්න හිටපු ජනාධිපති මහින්ද රාජපක්ෂ  තීරණය කළ යුතු බව විශ්‍රාමික රියර් අද්මිරාල් සරත් වීරසේකර පවසයි.

පාර්ලිමේන්තු මන්ත්‍රී ඩිලාන් පෙරේරා මහතා විසින් සිදුකළ ප්‍රකාශයකට පිළිතුරු දෙමින් විශ්‍රාමික  රියර් අද්මිරාල් සරත් වීරසේකර  අද(27) මාධ්‍ය වෙත නිවේදනක්  නිකුත් කර තිබුණි.

එම සම්පුර්ණ නිවේදනය පහතින් දැක්වෙයි

“ඊයේ දින ඔබ ප්‍රවෘත්ති විකාශය තුළින් පාර්ලිමේන්තු මන්ත්‍රී ඩිලාන් පෙරේරා මහතා මගේ නම සඳහන් කර කළ ප්‍රකාශයක් සම්බන්ධයෙන් මා සහ මේජර් ජනරාල් කමල් ගුණරත්න ප්‍රතිවාදීන්ය.

අප නිසා දෙමළ මුස්ලිම් ජනතාව ගෝඨාභයගෙන් සහ හිටපු ජනාධිපති මහින්ද රාජපක්ෂ මහතා ගෙන් ඈත් වන නිසා අපව ඉවත් කළ යුතු යැයි පවසන ඩිලාන් පෙරේරා මහතා ඊයේ දින පැවසුවේ මා එක්සත් ජාතික පක්ෂයේ කොන්ත්‍රාත්තුවක් බාරගෙන වෛරය පතුරවමින් මහින්ද රාජපක්ෂ බලවේගය විනාශ කිරීමට වැයම් කරන බව සහ එක්සත් ජාතික පක්ෂයේ වුවමනාවන් ඉටුකරන බවය.

ඩිලාන් පෙරේරා, මෛත්‍රීපාල සිරිසේන ජනාධිපති විසින් වාර්තමාන ජාතික ආණ්ඩුවේ ජාතික ලැයිස්තුවෙන් පත්කරන ලද මන්ත්‍රීවරයෙකි. ඔහු මහින්ද රාජපක්ෂ රජයේ කැබිනට් ඇමතිවරයෙක්ව සිට මහින්ද රාජපක්ෂ මහතා පරාජයවු විගස ඔහුට විරුද්ධව ගොස් එක්සත් ජාතික පකෂයේ රනිල් වික්‍රමසිංහ අගමැති කිරීමට  ශ්‍රී ලංකා නිදහස් පක්ෂයේ මධ්‍යම කාරත සභාවේදී එක හෙලා සහය දුන්නෙකි.

මහින්ද රාජපක්ෂ මහතාගේ ප්‍රජා අයිතිය අහෝසි කළ 19වන ව්‍යවස්ථා සංශෝධනයට පාර්ලිමේන්තුවේ විරුද්ධ වුයේ මා පමණි. ඒකාබද්ධ විපක්ෂයේ අනිත් මන්ත්‍රීවරු 19 සේ බරපතළ සංශෝධන ඉවත් කිරීමට වෑයම් කළද එයට මුළු මනින්ම සහය දුන් අයගෙන් ප්‍රධානතම කෙනෙකි ඩිලාන්. 

අද 19 සංශෝධනය නිසා මෛත්‍රීපාල සිරිසේන මහතාට පවා වර්තමාන රජය විසුරුවා හැරීමට නොහැක. ඩිලාන් පෙරේරා විවේචනය කරන රනිල් වික්‍රමසිංහ අගමැති ධූරයන් පහ කිරීමට නොහැක. එසේනම් වර්ථමාන දේශපාලන ව්‍යකූළ භාවයට වගකිව යුතු ප්‍රධානම පුද්ගලයිනගෙන් කෙනෙකි ඩිලාන් පෙරේරා.

ඩිලාන් පෙරේරා මට ජාතිවාදියෙක් යැයි කියයි. මම ජාතිවාදියා යැයි කියු කොටිහිතවාදී මුනිවන්තයින් ජිනීවා මානවහිමිකම් කවුන්සිලයේදී නිරුත්තර කළ මා ඩිලාන් වැනි අවස්ථාවදී  දේශපාලඥයෙකුට පිළිතුරු දීමට නොයෙමි.

ජාතිවාදියෙක් යනු තමාගේ ජාතිය ගැන උතුම් යැයි සිතමින් අන්‍ය ජාතින් හෙලා දකිමින් ක්‍රියා කරන්නෙකි. අප සැමවිටම දෙමළ, මුස්ලිම් සහෝදර තාවයට සහය දී ක්‍රීයා කළා පමණක් නොව ඔවුන්ගේ ප්‍රශ්නවලදී ස්වේච්ඡාවෙන් ඉදිරිපත්වී උපරිම වශයෙන් උදව් කර ඇතිතෙමු. 
ඩිලාන් පවසන පරිදි ගොඨාභය වටා ජාතිවාදීන් සිටී නම් ඒන්න එන්න ඔහුවටා දෙමළ, මුස්ලිම් ජනතාව ඒක්රොක් වන්නේ කෙසේද යන්න සලකා බැලිව යුතුය. අද වනතුරු කිසිම සාමාන්‍ය දෙමළ,මුස්ලිම් පුද්ගලයෙක් අපට විරුද්ධව එකඳු වදනක් හෝ පවසා නැති අතර අපට ප්‍රශංසා කොට ස්තූති කොට කථා කර ඇති අවස්ථා බොහෝය.

අප එරෙහිවුයේ කොටි ත්‍රස්ථයින්ට පමණි. අප ක්‍රියා කරන්නේ කොටි ත්‍රස්ථයින් විනාශ කළ රණවිරුවන්ව ජාතික සහ ජාත්‍යන්තර වශයෙන් පවා දීමට එරෙහිවය එසේම රණවිරුවන් දිවිහිමියෙන් ආක්ෂා කළ රට ව්‍යවස්ථාවකින් බෙදා වෙන් කිරීම වැලැක්වීම පිනිසය.

විශේෂයෙන්ම ඩිලාන් පෙරේරා අද මහින්ද රාජපක්ෂ මැතිතුමා ළඟට සමීපව ඉන්නේ ඒකාබද්ධ විපක්ෂ තුළ අසමඟිය, ප්‍රශ්න ඇති කොට රට බෙදන ව්‍යවස්ථාව පරාජය කිරීමට අවශ්‍ය තුනෙන් එකක ඡන්ද ප්‍රමාණය අමහිමි කොට දෙමළ බෙඳුම්වාදීන් සහ එක්සත් ජාතික පක්ෂය තමන්ට දී ඇති කොන්ත්‍රාත්තුව ඉටු කිරීමටය.

මා රටේ ඒකීයභාවය වෙනුවෙන් වසර 39ක් සක්‍රීය සේයාවේ යෙදී සිටී, යුද්ධය ජයග්‍රනය කළ හමුදාවන්ට අණ දුන් සෙම්පතියන් පස් දෙනාගෙන් කෙනෙතු ලෙස ජතියේ ප්‍රණාමය ලැබු, අදටත් රණවිරුවන් සහ රටේ ඒකීයභාවය වෙනුවෙන් ජාතික වශයෙන් සහ අන්තර්ජාතික වශයෙන් පෙනී සිටින හමුදා නිලධාරීයෙකි. එසේ තමා ළඟ තබා ගත යුත්තේ මාද නැතිනම් ඩිලාන් පෙරේරා යන්න තීරණය කිරීම මහින්ද රාජපක්ෂ මහතාට බාර කරමි.“

රාජපක්ෂලාගේ බල ගැටුම උග්‍ර අතට !

මේ අතර දේශපාලන ආරංචිමාර්ග සඳහන් කර සිටින්නේ ඒකාබද්ධ විපක්ෂයේ රාජපක්ෂ සහෝදරයන් අතර මතුව තිබෙන  බල ගැටුම උග්‍රවී ඇති බවය.

එසේම ඩිලාන් පෙරේරා මන්ත්‍රීවරයා බැසිල් රාජපක්ෂ කඳවුර නියෝජනය කිරීමට එකඟතාව පළවී ඇති බවට ගෝඨාභය පාර්ශවය වෙත දැනගන්න ලැබී ඇති බවත් මෙම නිවේදනය ප්‍රසිද්ධ කිරීම සිදුව ඇත්තේ ගෝඨාභය රාජපක්ෂ මහතාගේ දැනුම්දීම මත බවද එම ආරංචිමාර්ග වැඩිදුරටත් සඳහන් කර සිටියි.

Comment (0) Hits: 273

'ජනාධිපති අපේක්ෂකයා චමල් හෝ දිනේෂ්'  - වාසු ඒකාබද්ධයේ තීන්දු කඩයි 

පාර්ලිමේන්තු මන්ත්‍රීවරුන් වන දිනේෂ් ගුණවර්ධන හෝ  චමල් රාජපක්ෂ යන පාරම්පරික දේශපාලනඥයින් දෙදෙනාගෙන් අයකු ඉදිරි ජනාධිපතිවරණයට ඒකාබද්ධ විපක්ෂයෙන් ඉදිරිපත් කල යුතු බව ප්‍රජාතන්ත්‍රවාදී වාමාංශික පෙරමුණේ නායක පාර්ලිමේන්තු මන්ත්‍රී වාසුදේව නානායක්කාර යළිත්  අවධාරණය කර සිටියි.

පුවත් වෙබ් අඩවියක් සමඟ සම්මුඛ සාකච්ඡාවකට එක්වෙමින් මන්ත්‍රීවරයා මේ බව සඳහන් කර ඇත.එසේම හිටපු ජනාධිපති මහින්ද රාජපක්ෂ අග්‍රාමාත්‍ය ධුරයට වුවහොත් 2020 වසරේදී ජනාධිපතිවරණයක් පැවැත්වීමට අවශ්‍ය නොවන බවද ඔහු සඳහන් කර ඇත.

වාසුදේව නානායක්කාර මන්ත්‍රීවරයා කියා සිටියේ 2020 පෙර අග්‍රාමාත්‍යවරයා ලෙස මහින්ද රාජපක්ෂ මහතා පත් කිරීමේ සැලසුමක් ඇති බවත් එය සාර්ථක වුවහොත් ජනාධිපතිවරණය පැවැත්වීමට අවශ්‍ය නොවන ආකාරයට පවතින ව්‍යවස්ථාව සංශෝධන කරන බවද ඔහු පවසා තිබේ.
අදාළ සාකච්ඡාවේදී  රටේ ඊලඟ ජනාධිපති වෙන්න සුදුස්සා කවුදැයි කල විමසීමේදී වාසුදේව නානායක්කාර මන්ත්‍රීවරයා මෙසේ පවසයි.

'අපි එකඟවෙලා තියෙනවා මේ ප්‍රශ්නය අපි කතා කරන්නේ නැහැ කියලා. ඒ කියන්නේ අපේ ඒකාබද්ධ විපක්ෂයේ මේ ප්‍රශ්නය පිළිබඳ තීන්දුවක් ගන්න තුරු අපි මේ ගැන කතා කරන්නේ නැහැ කියන එකඟත්වයක ඉන්න නිසා මට එකඟත්වය කඩන්න අමාරුයි. 

නැත්නම් මට අදහසක් තියෙනවා කවුද විය යුතු කියලා. ඒක කිවුවොත් මම එතකොට මගේ එකඟත්වය බින්දා වෙනවා. නමුත් මගේ හිතේ තියෙන අදහස නොකිය ඉන්නත් බැහැ මෙහෙම ඇහුවම. එක්තරා විදිහකට මම හිතාගෙන ඉන්න අය තමයි චමල් රාජපක්ෂ, දිනේෂ් ගුණවර්ධන, මේ වගේ අය මම හිතනවා හොඳ දේශපාලඥයෝ, කිළිටි නොවූ ඒ වගේම චෝදනාවලට ලක් නොවූ, ඒවගේම ජනතාවාදී පසුබිමක් තිබෙන.ඔවුන්ගේ දෙමාපියන්ගේ කාලෙ ඉඳලා ඔවුන් ඇත්ත වශයෙන්ම හැදී වැඩී තිබෙන්නේ ඒ ජීවන පරමාර්ථත් එක්කයි.''

රාජපක්ෂ කෙනෙක්ම ඉදිරි ජනාධිපතිවරණයට ඉදිරිපත් වෙන්න  අදහසක් තිබුණොත්  මොකද වෙන්නේ?
''ඔය ප්‍රශ්නය සාකච්ඡාවට ගියත් මම අයිමත් පටලැවෙනවා මම ඉවත්විය යුතුව සිටින සාකච්ඡාවක්. ඒ නිසා මේ කතාව මෙතනින් එහා මට

සම්බන්ධ වෙන්න බැරි කතාවක්ව තිබෙනවා.''

වාසුට එකඟතාව කඩන්න වුනේ ඇයි ?

වාසුදේව නානායක්කාර මහතා මෙම ප්‍රකාශය කරන්නේ ඉදිරි ජනාධිපතිවරණයේ දී ඒකාබද්ධ විපක්ෂය විසින් ඉදිරිපත් කරන අපේක්ෂකයා ගැන ප්‍රසිද්ධියේ අදහස් නොදැක්විය යුතු බවට ඒකාබද්ධ විපක්ෂය තීන්දුවක් ගෙන තිබියදීය.

එහෙත්, 'හිට්ලර්වාදී' විශ්‍රාමික හමුදා ජුන්ටාව සෑම සති අන්තයකම රටපුරා රැස්වීම පවත්වමින් ගෝඨාභය රාජපක්ෂ මහතා ජනාධිපති අපේක්ෂකයා කිරීමට දරන උත්සාහයට ඒකාබද්ධයේ බොහෝ නායකයින් ගෙන් දැඩි විරෝධයක් එල්ලවී ඇති අතර වාසුදේව නානායක්කාර මහතාගේ ඉහත ප්‍රකාශය ඒ සම්බන්ධයෙන් වූ විරෝධය පළකිරීමක් ලෙස දකින්නට හැක.

'ගෝඨා පසුපස සිටින බලවේගය අතිශය භයානකයි'

පසුගියදා පැවති මාධ්‍ය හමුවකදී ද අදහස් දැක්වූ පාර්ලිමේන්තු මන්ත්‍රී වාසුදේව නානායක්කාර මහතා, ''ගෝඨාභය රාජපක්‍ෂ මහතා පසුපස සිටින බලවේග අතිශය භයානක බව'' පැවසිය. 

 ඉතාම දැඩි මිලිටරි ආණ්ඩුවක් ගොඩනැගීමට එම පිරිස සුදානම්වන බවට මන්ත්‍රීවරයා අනතුරු ඇඟවිය.
ගෝඨාභය රාජපක්‍ෂ මහතා දේපාලඥයෙකු නොවන බවත් ඔහු හුදෙක්ම හමුදා නිලධාරියෙක් පමණක් බවද මන්ත්‍රීවරයා එම මාධ්‍ය හමුවේදී අවධාරණය කර සිටියේය.

වාසුදේව නානායක්කාර මහතා එහිදී වැඩිදුරටත් මෙසේද පැවසිය.

හමුදා ආණ්ඩුවක් හදාගැනීමේ අභිප්‍රායෙන්.

''මේ රටේ ප්‍රජාතන්ත්‍රවාදී බලවේගවල කැමැත්තක් නැහැ. අපි අරගෙන බැලුවොත් පක්ෂ හැටියට වමේ පක්ෂ කවුරුත් එකඟ නැහැ. පෙරටුගාමී පක්ෂයත් එකඟ නැහැ. ජේවීපී ගත්තොත් එගොල්ලොත් එකඟ නැහැ. දෙමළ සන්ධානයත් එකඟ නැහැ. යූඑන්පී එකත් එකඟ නැහැ. මේ අපේ ජේඕ එකෙත් කොටසක් එකඟ නැහැ.

හමුදාවේ විශ්‍රාමික නිලධාරීන්, ඉහල මැද පංතියේ ඉංග්‍රීසි කතාකරන මහත්තුරු නෝනලා, වෘත්තීයවේදී කට්ටිය, කර්මාන්ත කරුවෝ, මහා ධනපතියොන්ට මේ රටේ උද්ඝෝෂණ තියෙන්න බැහැ. වැඩ වර්ජන තියෙන්න බැහැ. මේ රටේ අයිතිවාසිකම් ගැන කතා කරන්න බැහැ. ඒවා හරියට මර්ධනය කරන්න පුළුවන් කෙනෙක් තමයි ඒගොල්ලෝ හොයන්නේ.

දෙවෙනි එක හමුදා නිලධාරීන්. හමුදා ආණ්ඩුවක් හදාගැනීමේ අභිප්‍රායෙන්. වියත් මගේ සම්පූර්ණ බලඇණිය තමයි ඔය කියන වෘත්තීයවේදීන්, දේශීය මහා ධනවතුන් හා මහා ව්‍යාපාරිකයින් තමයි ඒකේ ප්‍රධාන බලඇණිය. මහින්ද මහත්තයාගේ චරිතයේ ලක්ෂණ නෙවෙයිනෙ තියෙන්නේ. අපිට ඕනේ මහින්ද මහත්මයාගේ නායකත්වය. දැන් එතුමා දාන්න බැහැනෙ මේකට. ඒ නිසා එතුමාගේ නායකත්වයක් වැනි නායකත්වයක් අපිට උවමනායි.''

එකාබද්ධයේ ගැටුම පැහැදිළියි !

කෙසේ වුවත් මීට පෙර හිටපු ජනාධිපති මහින්ද රාජපක්ෂ සඳහන් කර තිබුනේ  ඒකාබද්ධයේ ප්‍රධානීන් කිසිවෙක් ඊළඟ  ජනාධිපතිවරණයට ඉදිරිපත් කරන අපේක්ෂකයා ගැන ප්‍රසිද්ධියේ අදහස් නොදක්වන ලෙසය. එහෙත්  වාසුදේව නානායක්කාර මන්ත්‍රීතුමා මෙවැනි ප්‍රකාශයක් කලේ, ගෝඨාභය රාජපක්ෂව ඊළඟ ජනාධිපතිවරණ අපේක්ෂකයා කර ගැනීම වෙනුවෙන්  විශ්‍රාමික මිල්ටරි ජුන්ටාව සෑම සති අන්තයකම රටපුරා රැස්වීම පවත්වමින් සිටින පසුබිමකය. එයින් පෙනෙන්නේ වාසුදේව මන්ත්‍රීවරයා ඇතුළු පිරිසක්  ගෝඨාභය රාජපක්ෂව  ජනාධිපති අපේක්ෂකයා කිරීමට දරන උත්සාහය සම්බන්ධ බරපතල  විරෝධය පෑමක් දක්වමින් සිටින බවය.

Comment (0) Hits: 236

"පර්පෙචුවල් ට්‍රෙෂරිස්" එරෙහිව : රාජ්‍ය ආයතන 5 කින් නඩු 5ක් ! 

භාණ්ඩාගාර බැඳුම්කර මිල ගණන් කෘත්‍රිම ලෙස ඉහළ දමමින් අයුතු ධනවත්වීමක් අත්කැරගෙන ශ්‍රී ලංකා රජය, මහ බැංකුව ඇතුළු රාජ්‍ය ආයතන පහකට අලාභයක් සිදු කළේ යැයි සඳහන් කරමින්  'පර්පෙචුවල් ට්‍රෙෂරිස්' සමාගමෙන් රුපියල් බිලියන නවයකට අධික මුදලක් අයකර දෙන්නැයි ඉල්ලා  එම රාජ්‍ය ආයතන කොළඹ දිසා අධිකරණයේ නඩු පහක් පවරා ඇති බව වාර්තා වෙයි.

රජය වෙනුවෙන් නීතිපතිවරයා, ශ්‍රී ලංකා මහ බැංකුව, සේවක අර්ථසාධක අරමුදල, ශ්‍රී ලංකා ඉන්ෂුවරන්ස් සමාගම, සේවා නියුක්තිකයින්ගේ බාර අරමුදල් මණ්ඩලය හා විශ්වවිද්‍යාල ප්‍රතිපාදන කොමිෂන් සභාව මඟින් මෙම නඩු පහ ගොනුකර ඇති අතර එහි විත්තිකාර පාර්ශවය ලෙස  ශ්‍රී ලංකා මහ බැංකුවේ ප්‍රාථමික අලෙවිකරුවකු ලෙස වසර ගණනාවක් ව්‍යාපාර කටයුතුවල නියැළි ප‍ර්පෙචුවල් ට්‍රෙෂරිස් සමාගම නම් කර ඇත.

ඒ අනුව සේවක අර්ථසාධක අරමුදල හා සේවා නියුක්තිකයන්ගේ භාර අරමුදල් මණ්ඩලය මඟින් පර්පෙචුවල් ආයතනයට පැවරූ නඩුව ඔක්තෝබර් 30 දින, විශ්වවිද්‍යාල ප්‍රතිපාදන කොමිෂන් සභා නඩුව නොවැම්බර් 09 දින, ශ්‍රී ලංකා ඉන්ෂුවරන්ස් කෝපරේෂන් ආයතනය මහ බැංකුව පැවරූ නඩු දෙක දෙසැම්බර් 11 දින විභාග කිරීමට කොළඹ දිසා අධිකරණය දින නියම කැර ඇත.

වැඩිදුරටත් වාර්තා වන ආකාරයට 2015 ජූනි 03 දින හා 2016 සැප්තැම්බර් 30 දින අතර කාලය තුළදී මහ බැංකු භාණ්ඩාගාර බැඳුම්කර පැමිණිලිකාර ආයතනවලට අලෙවි කර ඇති පර්පෙචුවල් ට්‍රෙසරිස් සමාගම එම ආයතනවලට පාඩු සිදුවන අන්දමින් නීති විරෝධීව, ප්‍රාථමික අලෙවිකරණ ආචාරධර්ම හා ප්‍රතිපත්තිවලට පටහැනිව කටයුතු කරමින් ව්‍යාපාර කටයුතුවල යෙදීම හා එම කාලය තුළ අයුතු ධනවත්වීමක් ලබාගෙන මහා පරිමාණ ලාභ ඉපැයීමට එරෙහිව මෙම නඩු පැවරීම සිදුව තිබේ.

භාණ්ඩාගාර බැඳුම්කර මිල දී ගැනීමේ දී අභ්‍යන්තර තොරතුරු භාවිතා කිරීම පැමිණිලිකාර රාජ්‍ය ආයතනවලට අවාසිදායක වන අයුරින් බැඳුම්කර විකිණීමේදී වෙළෙඳ‍ෙපාළ මිල ගණන් කෘත්‍රිම ලෙස වෙනස් කිරීම, වෙළෙඳ‍ෙපාළ තොරතුරු සාවද්‍ය ලෙස ප්‍රචාරය කිරීම ඇතුළු ප්‍රාථමික අලෙවිකරුවකුට නොගැළපෙන කටයුතු කරමින් මෙම අයුතු ධනවත්වීම ලබා ඇති බව එහි සඳහන්කර ඇත.

එසේම ශ්‍රී ලංකා මහ බැංකුව හරහා සේවක අර්ථසාධක අරමුදලට බැඳුම්කර අලෙවි කිරීම තුළින් රුපියල් 6989277943.63 ක අයුතු ධනවත්වීමක් ද, අ‍ලාභයක් ද ශ්‍රී ලංකා ඉන්ෂුවරන්ස් කෝපරේෂන් ආයතනයට රුපියල් 1225009346.83 ක මුදලක් ද, විශ්වවිද්‍යාල ප්‍රතිපාදන කොමිෂන් සභාවට රුපියල් 141739775.37 ක් ද, සේවා නියුක්තිකයන්ගේ භාර අරමුදල් මණ්ඩලයට රුපියල් 129674400 වශයෙන් රුපියල් 8485701465.8 අයුතු ධනවත්වීමක් හා තවත් රාජ්‍ය ආයතනයකට කළ පාඩුව හා අලාභය අයකැර ගැනීමට මෙම නඩු කටයුත්තේ අපේක්ෂාව වී තිබේ.

Comment (0) Hits: 298

GMOA වැඩ වර්ජනය අසාධාරණයි - කිරිඇල්ල 

සිංගප්පූරු-ශ්‍රි ලංකා වේළඳ ගිවිසුම ඇතුළු ඉල්ලීම් 10ක් මුල් කර ගනීමින් අගොස්තු 03වනදා රජයේ වෛද්‍ය නිළධාරින්ගේ සංගමය දියත් කිරිමට නියමිත දීප ව්‍යාප්ත වැඩ වර්ජනය සාධාරණ නොවන බව රාජ්‍ය ව්‍යසාය සංවර්ධන අමාත්‍ය ලක්ෂ්මන් කිරි ඇල්ල  පවසයි.

මහනුවර ඊයේ (26) පැවති උත්සවයකට එක්වෙම්න් අමාත්‍යවරයා මේ බව සඳහන් කළේය.

එමෙන්ම සිංගප්පූරු වෙළඳ ගිවිසුමෙන් කිසිසේත්ම ශ්‍රී ලංකාවේ වෛද්‍යවරුන්ට බලපෑමක් ඇති නොවන බවද අමාත්‍යවරයා ප්‍රකාශ කළේය.

සිංගප්පූරු වෛද්‍යවරයෙකු එරට තුළදි ලක්ෂ 40කට ආසන්න වැටුපක් ලබන බැවින්  මෙරට සේවයට කිසි සේත් ඔවුන් නොපැමිණෙන බවත් මෙරට වෛද්‍යවරුන් එම රටට රැකියාව සඳහා යෑමට උත්සහ කරන බවත් අමාත්‍යවරයා පැවසීය.

මෙම වැඩ වර්ජන පිටුපස දේශපාලන කුමන්ත්‍රණ පවතින බවද අමාත්‍යවරයා වැඩිදුරටත් පැවසීය.

Comment (0) Hits: 292

වැලිකඩ බන්ධනාගාරයේ බුද්ධි අංශය විසුරුවා හැරේ

වහාම ක්‍රියාත්මක වන පරිදි  වැලිකඩ බන්ධනාගාරයේ බුද්ධි අංශය වහාම ක්‍රියාත්මක වන පරිදි විසුරූවා හැරීමට තීරණය කර ඇති බව වාර්තා වෙයි.

අධිකරණ හා බන්ධනාගාර ප්‍රතිසංස්කරණ අමාත්‍ය නීතීඥ තලතා අතුකෝරළගේ  උපදෙස් පරිදි මෙම තීරණය ගෙන ඇත.

 පසුගිය දිනවල බන්ධනාගාර දෙපාර්තුමේන්තුව සම්බන්ධයෙන් විවිධ දූෂණ හා අක්‍රමිකතා සම්බන්ධයෙන් කෙරුණු සොයාබැලීමකින් අනතුරුව මෙම තීරණය ගෙන තිබේ.

තවද විසුරවා හරින ලද බන්ධනාගාර බුද්ධි අංශය වෙනුවට අළුත් බුද්ධි අංශයක් පිහිටුවීමටත් කටයුතු සම්පාදනය කර ඇති බවද දැනගන්නට ඇත.

Comment (0) Hits: 207

පරිසර විෂය ගත්තේ මොකටද ? : මෛත්‍රී කරුණු දක්වයි !

තමන් ජනාධිපති ධූරයට පත්වීමෙන් අනතුරුව පරිසර විෂය ද තමා යටතට පවරා ගත්තේ පරිසර විනාශයට දේශපාලන බලයේ ආශිර්වාදය හිමිවීම වැළැක්වීමට බව ජනාධිපති මෛත්‍රීපාල සිරිසේන සඳහන් කර ඇත.

ජනාධිපතිවරයා මේ බව ප‍්‍රකාශ කර සිටියේ  මධ්‍යම සංස්කෘතික අරමුදල මගින් ජාතික නාමල් උයනේ සංවර්ධන හා ප‍්‍රවර්ධන කටයුතු ආරම්භ කිරීමේ අවස්ථාවට අද (26) පෙරවරුවේ එක්වෙමිනි. 

පසුගිය වසර 50ක කාලය තුළ මේ රටේ සිදුවූ දැවැන්ත පරිසර විනාශයේ ප‍්‍රධාන වගකීම ගෙන තිබෙන්නේ ඇතැම් දේශපාලඥයින් වන අතර, දේශපාලන බලය පදනම් කර ගනිමින් සිදුවූ එම ව්‍යසනය ජාතියේ අවාසනාවක් බව ද ජනාධිපතිවරයා එහිදී සඳහන් කර ඇත.

අද මෙරට වන ඝනත්වය සියයට 29  ක් පමණ අඩු මට්ටමක පවතින අතර, එම ප‍්‍රමාණයෙන් ද සියයට 1.4 ක ප‍්‍රමාණයක් වාර්ෂිකව විනාශවන බවට තොරතුරු අනාවරණය වී තිබෙන බව මෙහිදී ස`දහන් කළ ජනාධිපතිතුමා නිසි වැඩපිළිවෙළක් සහ ප‍්‍රතිපත්තිමය තීන්දු තීරණ ඔස්සේ  මෙම අයහපත් තත්ත්වය වැළැක්වීමට කඩිනමින් සියලූදෙනා එක්විය යුතු බව ද ජනාධිපතිවරයා එහිදී  අවධාරණය කර ඇත.

එමෙන්ම ඉතිහාසයේ පළමු වතාවට පරිසරයේ ආරක්ෂාව වෙනුවෙන් ති‍්‍රවිධ හමුදාවේ දායකත්වය ලබා ගැනීමට ද තමන් කටයුතු කළ බව පැවසූ ජනාධිපතිවරයා  ඒ වෙනුවෙන් අද ති‍්‍රවිධ හමුදාවෙන් ලැබෙන සහය ද ඇගයීමට ලක් කළේය. 

පුරාවිද්‍යාත්මක හා ඉහළ ජෛව විවිධත්ව වටිනාකමකින් යුතු රෝස තිරුවාණා කදුවැටිය සහිත නා උයන  මධ්‍යම සංස්කෘතික අරමුදල වෙත පවරාදීමට එහි භාරකාර පූජ්‍ය වනවාසී රාහුල හිමියන් විසින් පියවර ගෙන ඇති අතර  වසර 25 ක් පුරා නාමල් උයන ආරක්ෂා කරමින් එය මේ දක්වා රැකබලාගත් පූජ්‍ය වනවාසී රාහුල හිමියන්ගේ මෙහෙවරද   මෙහිදී ජනාධිපතිවරයාගේ  දැඩි ප‍්‍රසාදයට ලක්විය.

ජපන් ජාතිකයෙකුගේ ආධාර මත නාමල් උයන පරිශ‍්‍රයේ ඉදිකෙරුණු ජේ.ආර්. ජයවර්ධන අනුස්මරණ භාවනා මධ්‍යස්ථානය ද විවෘත කෙරුණේ ද ජනාධිපතිවරයාගේ ප්‍රධානත්වයෙන්ය.

මේ අතර ජනාධිපති මාධ්‍ය අංශය නිකුත් කල නිවේදනයක දැක්වෙන්නේ  ජාතික නාමල් උයන මධ්‍යම සංස්කෘතික අරමුදල වෙත පවරාදීමත් සමග එහි ප‍්‍රවර්ධන කටයුතු රාශියක් සිදුකිරීමට සැලසුම් කර තිබෙන බවත් වසරකට ලක්ෂ හයක් පමණ සංචාරකයින් පැමිණෙන සීගිරිය ආසන්නයෙ ඇති මෙම ජාතික නාමල් උයන කෙරෙහි පවතින සංචාරක ආකර්ශනය තවදුරටත් වර්ධනය කිරීමට වැඩසටහන් රැසක් කි‍්‍රයාත්මක බවත්ය.

image df7b546939

Comment (0) Hits: 173

විශේෂ මහාධිකරණයේ පළමු නඩු විභාගයට අධි චෝදනා ගොනු කරයි !

විශේෂ ත්‍රිපුද්ගල මහාධිකරණයේ පළමු නඩු විභාගයට අදාළව අධි චෝදනා ගොනුකර තිබෙන බව නීතිපති දෙපාර්තමේන්තු ආරංචිමාර්ග සඳහන් කරයි.

ඒ අනුව හිටපු ජනාධිපති මහින්ද රාජපක්ෂගේ කාර්ය මණ්ඩල ප්‍රධානියා වන ගාමිණී සෙනරත් සහ  පියදාස කුඩාබාලගේ, නීල් බණ්ඩාර හපුහින්න සහ ලසන්ත බණ්ඩාර යන අයට එරෙහිව අධි චෝදනා ගොනුකර ඇත.

හිටපු ජනාධිපති කාර්ය මණ්ඩල ප්‍රධානී ගාමිණී සෙනරත්, ශ්‍රී ලංකා රක්ෂණ සංස්ථාවේ හිටපු අධ්‍යක්ෂවරුන් වන පියදාස කුඩාබාලගේ සහ නීල් හපුහින්නට රජයේ මුදල් සාවද්‍ය පරිහරණය යටතේ මීට පෙර චෝදනා එල්ල වී තිබිණ.

ඒ ශ්‍රී ලංකා රක්ෂණ සංස්ථාවට අනුබද්ධිත සමාගමක් යටතේ ඉදිකෙරෙන කොල්ලූපිටිය ප්‍රදේශයේ හෝටල් ව්‍යාපෘතියක් සඳහා කැබිනට් අනුමැතිය යටතේ 2012 වසරේ වෙන් කෙරුණු රුපියල් බිලියන 185ක මුදලින් රුපියල් බිලියන 4ක් නීතිවිරෝධී ලෙස හම්බන්තොට ප්‍රදේශයේ හෝටල් ව්‍යාපෘතියක් සඳහා යෙදවූ බව කියන සිද්ධියක් සම්බන්ධයෙන්ය.

Comment (0) Hits: 204

පළාත් 07 ක මැතිවරණ පළමුව !

ජනාධිපතිවරණය සහ මහ මැතිවරණයට පෙර පළාත් සභා ජන්දය පැවැත්වීමට  අග්‍රාමාත්‍ය රනිල් වික්‍රමසිංහ  සහ පාර්ලිමේනතුව නියෝජනය කරන පක්ෂ නායකයින් අතර අද (26) පැවැති සාකච්ජාවකදී තීරණයවී ඇති බව වාර්තා වෙයි.

පාර්ලිමේන්තු සංකීර්ණයේදී මෙම රැස්වීම පැවැත්වුණු අතර ශ්‍රී ලංකාවේ පළාත් සභා 09 කින් පළාත් සභා 07ක මැතිවරණය එකවර පැවැත්වීමට පවතින හැකියාව පිළිබඳව එහිදී අවධානය යොමුව ඇත.

මේ වන විටත් උතුරු මැද, සබරගමුව හා නැගෙනහිර පළාත් සභා 03 හි නිළ කාලය අවසන්ව ඇති අතර මධ්‍යම, වයඹ හා උතුරු පළාත් සභාවන්හි නිල කාලය සැප්තැම්බර් මාසයේදී අවසන් වේ.

එසේම දකුණු පළාත් සභාවේද නිල කාලය ලබන වසර මුල දී අවසන් වීම හේතුවෙන් පළාත් සභා 07 ක මැතිවරණය පැවැත්වීමට පක්ෂ නායකයන්ගේ  අවධානය යොමුව පවතින බවද වාර්තාවේ. 

මීට පැවැත්වු ඡන්ද අනුව බස්නාහිර හා ඌව යන පළාත් සභා දෙකේ පමණක් නිල කාලය අවසන් වීමට ලබන වසරේ තවත් මාස කීපයක් ඉතිරිව පවතියි.

Comment (0) Hits: 201

ගෑණුන්ට ගහපු රාළහාමිට වැඩ වරදී!

රත්නපුර නගරයේදී පොලිස් නිලධාරියකුගේ පහරකෑමට ලක්වූ  "බට්ටි" නමැති කාන්තාව පිළිබඳව රටේම අවධානය දිනාගත් පුවතක් වූ අතර  ඇයට සිදුවූ අසාධාරණය වෙනුවෙන් නීතිඥ උදුල් ප්‍රේමරත්න විසින්  පවරන ලද මානව හිමිකම් නඩුව ඊයේ  (25) අවසන් විය.

ඒ ඇයගේ මානව අයිතිවාසිකම් කඩ වූ බවට තීන්දු කරමින් ඇයට රුපියල් 50,000/- ක වන්දි මුදලක් ගෙවන ලෙස පොලිස් නිලධාරියාට නියෝගයක් නිකුත් කරමින්ය.

2014 වසරේදී රත්නපුර බස් නැවතුම්පළ අසලදී පොලිස් නිළධාරියෙකු විසින් ඇයට පහර දෙන ආකාරය එම ස්ථානයේ සිටි අයෙකු රහසිගතව පටිගත කර සමාජජාලා වෙත යොමුකිරීමත් සමඟ කරළියට පැමිණි මේ සිදුවීම පසුව අනාවරණය වුයේ 2014 වසරේ සැප්තැම්බර් 6 වැනිදා සවස 3.00ට පමණ බට්ටී නමැති මෙම කාන්තාව රත්නපුර නගරයේ සිටියදී පොලිස් නිලධාරියා කිසිදු හේතුවකින් තොරව ඇයට පහරදුන් බවට පොලිසීයට කරුණු ඉදිරිපත් කර තිබූ අතර පොලිසිය විසින් එම පැමිණිල්ල පවා සටහන් කර නොගත් බවය.

තවද  රත්නපුර පොලිසියේ ස්ථාන භාර නිලධාරියාද ඇයගේ අයිතිවාසිකම් උල්ලංඝනය වන ලෙස  කටයුතු කර තිබුණේ අදාළ  කාන්තාවගේ මවද පසුව පාදඩ ආඥා පනත යටතේ අත්අඩංගුවට ගනිමින්ය.

Comment (0) Hits: 186

ලසන්තගේ දුවගෙන් සහ කීත්ගෙන් ප්‍රකාශ ගන්න CIDය ඕස්ට්‍රේලියාවට

රාජපක්ෂ පාලන සමයේදී ජ්‍යෙෂ්ඨ මාධ්‍යවේදී කීත් නොයාර් මහතාව පැහැරගෙන ගොස් වදහිංසා පැනවීමට අදාළ සිද්ධිය සම්බන්ධයෙන් හා 'සන්ඩේ ලීඩර්' කර්තෘ ලසන්ත වික්‍රමතුංග මහතාගේ ඝාතන සිද්ධියට සම්බන්ධයෙන් ඔහුගේ දියණිය ගෙන් ප්‍රකාශයක්  ලබා ගැනීමට අපරාධ පරීක්ෂණ දෙපාර්තමේන්තුවේ විමර්ශන නිලධාරීන් ඕස්ට්‍රේලියාව බලා පිටත්ව ගොස් ඇත.

එම නඩුවේ විමර්ශන නිලධාරීන් වශයෙන් කටයුතු කරන සහකාර පොලිස් අධිකාරි බී. එස්. තිසේරා සහ පොලිස් පරීක්ෂක නිශාන්ත සිල්වා යන මහත්වරුන් මෙලෙස ඕස්ට්‍රේලියාවේ මෙල්බන් නුවර බලා ගොස් ඇති බව වාර්තා වෙයි.

මෙම සිද්ධිය සම්බන්ධයෙන් ප්‍රකාශයක් ලබා ගැනීමට කීර්ති නොයාර් මහතා මෙරටට කැඳවා තිබුණද ඔහු මෙරටට නොපැමිණීම නිසා පොලිසිය ඔහු සොයා ඕස්ට්‍රේලියාවට යාමට තීරණය කර තිබේ.

Comment (0) Hits: 196

ශ්‍රී ලංකන් හිටපු ලොක්කට ටෙලිකොම් එකෙනුත් පඩි

කපිල චන්ද්‍රසේන මහතා ශ්‍රී ලන්කන් ගුවන් සේවයේ ප්‍රධාන විධායක නිලධාරි ධුරය දරද්දී එම ගුවන් සේවාවට දැනුම් නොදී ශ්‍රී ලංකා ටෙලිකොම් සහ මොබිටෙල් ආයතනවලින් රුපියල් ලක්ෂ පහක මාසික වැටුපක් ලබමින් වැඩබලන ප්‍රධාන විධායක නිලධාරි ධුරයේ ක්‍රියාකර තිබෙන බව කොමිසම හමුවට ඊයේ (25) ලැබුණ ලිඛිත දැනුම්දීමකින් අනාවරණය වුණි.

පසුව එම ආයතනවල උපදේශකවරයකු ලෙස මාසිකව රුපියල් හාරලක්ෂ පනස්දහසක වැටුපක් ලබා තිබෙන බවත් එම ලිඛිත දැනුම්දීමෙන් තවදුරටත් අනාවරණය වුණි.

තවද චන්ද්‍රසේන මහතා මිහින්ලංකා සමාගමේ ප්‍රධාන විධායක නිලධාරි ධුරය දරමින් ශ්‍රී ලන්කන් ගුවන් සේවයට ප්‍රකාශ කර තිබෙන්නේ අධ්‍යක්ෂ ධුරය දරන බව යැයිද සාක්කිකාරිය වන ගුවන් සේවයේ ලේකම්වරිය ඩැල්රීන් තිරුකුමාර් මහත්මිය රජයේ අධිනීතිඥ සජිත් බණ්ඩාර මහතාගේ විමසීම් හමුවේ සාක්ෂි දෙමින් පැවසුවේ අදාළ ලේඛන කොමිසමට ඉදිරිපත් කරමින්ය.

ශ්‍රී ලංකා ටෙලිකොම් සහ මොබිටෙල් සභාපති කුමාරසිංහ සිරිසේන මහතා කොමිසමේ දැනුම්දීමකට අනුව කොමිසමේ ලේකම් ආරියදාස කුරේ මහතා වෙතට ලිඛිතව ඉදිරිපත් කරන ලද ලේඛනයකට අනුව කපිල චන්ද්‍රසේන මහතා එම ආයතනයේ දැරූ තනතුරු ලද වරප්‍රසාද සියල්ලම එම ලේඛනය මගින් කොමිසම හමුවට කුමාරසිංහ මහතා ඉදිරිපත් කර තිබුණි. මේ අනුව කපිල චන්ද්‍රසේන මහතා ප්‍රධාන විධායක නිලධාරි තනතුරු තුනක් රාජ්‍ය ආයතන තුනක දරමින් වැටුප් වරප්‍රසාද ලබාතිබෙන බවත් වැඩිදුරටත් හෙළිවී ඇත.

Comment (0) Hits: 173

මීතොටමුල්ල විනාෂයට වගකිව යුත්තන්ට නඩු පැවරීම ප්‍රමාදයි - මරික්කාර්

මීතොටමුල්ල කසල කන්ද නායයෑම පිළිබදව විමර්ශනයට පත් කල ජනාධිපති විමර්ශන කොමිෂන් සභාවේ වාර්තාව මේ පසුගිය පෙබරවාරි මාසයේදී ජනාධිපතිතුමාට භාර දී ඇති බවත්, මේ වන තෙක් ඒ සම්බන්ධව නඩු පැවරීමක් සිදුව නැති බවත් පාර්ලිමේන්තු මන්ත්‍රී එස්.එම්.මරික්කාර් පවසයි.
මන්ත්‍රීවරයා මේ අදහස් පළකරන ලද්දේ, මීතොටමුල්ල කසල කන්ද නායයෑම හේතුවෙන් දේපල අහිමිවූවන්ගේ ඉඩම් වලට අදාල වන්දි ප්‍රදානය කිරීමේ අවස්ථාවකට එක්වෙමින්ය. 

මෙහෙදී වන්දිලාභී පවුල් 61 ක් අතරේ රුපියල් මිලියන 327 ක මුදලක් බෙදා දෙන ලදී.

එහිදී වැඩිදුරටත් අදහස් දැක්වූ මන්ත්‍රීවරයා,

සාමාන්‍යයෙන් වන්දියක් ලබා දෙන විට අපි හරි සතුටින් එය ලබා කටයුතු කරනවා. ඒත්  මේ වන්දි එලෙස සතුටින් වන්දි ලබා දෙන්නක් නෙමෙයි. මේ කසල කන්ද නායයෑමේ වගකීම වර්තමාන රජයත් පසුගිය රජයත් භාර ගන්න ඕනේ. පොල් කර්මාන්තයට, සීනී කර්මාන්තයට පවා ඇමතිවරු සිටිය රටක කසල කළමණාකරණයට වගකිව යුතු ආයතනයක්, අමාත්‍යාංශයක් නෑ. විශේෂයෙන්ම අතිගරු ජනාධිපතිතුමා කොමිසමක් පත් කළා මේ සිදුවීම ගැන හොයන්න. ඒ කොමිසමට මේ ප්‍රදේශයේ ජනතාව වගේම මමත් ස්වේච්ඡාවෙන් ගිහිල්ලා සාක්ෂි දුන්නා. ඒ වාර්තාව ජනාධිපතිතුමාට භාර දුන්නා පෙබරවාරි මාසේ. ඒ නිසා ජනාධිපතිතුමාට මේකේ තව ඉතුරු වැඩකොටසක් තියෙනවා. ඒ තමයි මේ පත් කරපු ජනාධිපති කොමිෂන් සභා වාර්තාව අධිකරණයට ඉදිරිපත් කරලා. සෘජුවම වැරදි කරුවන් ලෙස නම් කරපු දෙන්නෙක් ඉන්නවා. ඒ වගේ රාජ්‍ය ආයතන 05 ක් තියෙනවා, මේ වැරදිකරුන්ට විරුද්ධව නීතිමය ක්‍රියාමාර්ග අරගන්න ඕනේ.පසුව ඒ වැරදිකරුවන් හිරේ යවනකම් මේක ඉවර වෙන්නේ නෑ. මේ වන්දි ලබා ගන්න මං මහන්සි වුනා වගේම , මේ විපතට වගකිව යුතු අය හිරේ දානකම් මහන්සිවෙනවා යැයි පැවසීය. 

Comment (0) Hits: 195

මොණරාගල මහින්ද පිලේ ටියුෂන් ගුරාලා සිසුවියන් රැසක් දූෂණය කරලා !

උපකාරක පන්ති සඳහා පැමිණි සිසුවියන් දුෂණය කිරීම සම්බන්ධව  මොණරාගල ප්‍රදේශයේ රජයේ විද්‍යාලයක ඉතිහාස ගුරුවරෙයෙක් හා පෞද්ගලික උපකාරක පංති ගුරුවරයෙකු පසුගිය 24 වනදා  රාත්‍රියේ මොණරාගල  පොලීසිය අත් අඩංගුවට ගෙන ඇති  අතර  ඔවුන් ලබන මස 03 වෙනිදා දක්වා රක්ෂිත බන්ධනාගාරගත කර තිබේ.

මොවුන් මොණරාගල මධුරකැටිය විද්‍යාලයේ ඉතිහාසය ගුරුවයා වන හෂාන් රත්නායක හා උසස් පෙළ තාක්ෂණවේදය විෂය සඳහා වන ටියුෂන් ගුරුවරයෙකු වන සුනෙත් ප්‍රියන්ක හෙට්ටිගොඩ නැමති අයවළුන් වේ.

මේ වන විටත් අනාවරණය වී ඇති ආකාරයට  මොනරාගල කලාපයේ දක්ෂතම ගුරුවරයා ලෙස ජනාධිපති සම්මාන ලබා ඇති හෂාන් රත්නායක ඌව හිටපු ප්‍රධාන අමාත්‍ය ශෂීන්ද්‍ර රාජපක්ෂගේ සමීපතමක හිතෙවතුකුද වේ. හිටපු ජනාධිපති මහින්ද රාජපක්ෂ සහාය පලකරන ශ්‍රී ලංකා පොදුජන පෙරමුණේ ක්‍රියාකාරී සාමාජිකයින් වන මේ පුද්ගලයින් සිය දේශපාලන බලය පෙන්වා ප්‍රදේශයේ කටයුතු කරන බවද අනාවරණ‍ය වී තිබේ.

මොණරාගල කොට්ඨාශ අපරාධ විමර්ශන ඒකකය මෙම සැකකරුවන් දෙදෙනා අත්අඩංගුවට ගෙන ඇති අතර ඉතිහාසය විෂය උගන්වන  හෂාන් රත්නායක නම්  ගුරුවරයා තම බිරිඳව පොළොන්නරුව ප්‍රදේශයේ සිය දෙමාපියන්ගේ නිවසේ නවතා දැරියව ඔහුගේ නිවසට ගෙන්වාගෙන දූෂණය කර තිබෙන බවත් පසුව එම දැරිය ඔහුගේ ටියුෂන් මිතුරෙකු වන අනෙක් සැකකරුට ලිංගික කාර්ය සඳහා ලබා දී ඇති බවත් අනාවරණය වී ඇත.

පසුව එම ටියුෂන් ගුරුවරයා මෙම දැරිය මොණරාගල නගරයේ ප්‍රධාන කනිෂ්ඨ විද්‍යාලයක් ආසන්නයේ ඇති ලැගුම්හලකට රැගෙන ගොස් එම දැරිය සමග ලිංගිකව හැසිරෙන දර්ශන තම ජංගම දුරකථනයෙන් වීඩීයෝ ගත කරගෙන ෆේස්බුක් වෙත නිදහස් කර තිබෙන බව අනාවරණය වී ඇත.

සැකකාර ගුරුවරුන් දෙපළ මීට අමතරව තවත් දැරියන් රැසක් අපයෝජනයට ලක් කර තිබෙන බවද සිදු කළ විමර්ශනවලදී අනාවරණය වෙමින් ඇතැයි මොණරාගල පොලිස් ආරංචිමාර්ග සඳහන් කරයි.

එසේම මොවුන් ජාතිවාදී අදහස් ප්‍රචලිත කරන්නන් බවත් තම පන්ති වලදී පවා මේ රට සිංහලයන්ගේ පමණක් රට වන අතර සිංහල ජාතිය රැකගැනීමට නම් මහින්ද රාජපක්ෂ හෝ රාජපක්ෂවරුන් සම්බන්ධ පාර්ශවයකට රට භාරදිය යුතු බවට දරුවන්ට උගන්වා ඇති බවද දැනගන්නට ඇත. එසේම ශ්‍රී ලංකා පොදුජන පෙරමුණට සහය දෙන ලෙසත් එහි දේශපාලන කටයුතු වලට සම්බන්ධවී අනාගතය ජයගන්නා ලෙස නිතර පන්ති වල සඳහන් කර තිබෙන බවද වාර්තා වෙයි. මේ පිළිබඳ එම ප්‍රදේශවල තරුණයන් සඳහන් කරන ආකාරයට ඔවුන් ඊළඟ රාජපක්ෂ නැගිටීමේදී පළාත් සභා මැතිවරණයට ඉදිරිපත්වීමටද අපේක්ෂාවෙන් සිටි බවත් ඒ ගැන නිතර තරුණයන් දැනුවත් කර දේශපාලන කටයුතු සඳහා එක්වන ලෙස ආරාධනා කල බවද ඔවුන් සඳහන් කරයි.

Comment (0) Hits: 590

අර්ජුනගේ අවලාද නිසා ජනාධිපතිත් කිපිලා ! 

ක්‍රීඩා අමාත්‍යාංශයේ කටයුතුවලට සම්බන්ධ නොවී තමන්ට පැවැරී ඇති රාජකාරි නිසි ලෙස ඉටු කරන ලෙස ජනාධිපති මෛතී‍්‍රපාල සිරිසේන මහතා ඛනිජ තෙල් සම්පත් සංවර්ධන අමාත්‍ය අර්ජුන රණතුංගට පවසා ඇතැයි වාර්තා වෙයි.

ඒ පසුගියදා පැවති කැබිනට් මණ්ඩල රැස්වීමේදී ය.

කැබිනට් මණ්ඩල රැස්වීමේදී ක‍්‍රීඩා ඇමැති ෆයිසර් මුස්තාෆා සහ ඛනිජ තෙල් සම්පත් සංවර්ධන ඇමැති අර්ජුන රණතුංග යන අමාත්‍යවරුන් අතර කැබිනට් මණ්ඩලයේදී ඇතිවූ උණුසුම් තත්ත්වය හමුවේ ජනාධිපතිවරයා මේ බව සඳහන් කර තිබේ.

ක‍්‍රිකට් නිලවරණය සම්බන්ධයෙන් අමාත්‍ය අර්ජුන රණතුංග අමාත්‍යවරයා කළ විමසීමකින් අනතුරුව මෙම තත්ත්වය ඇතිවී ඇත.

අර්ජුන රණතුංග අමාත්‍යවරයා ක්‍රිකට් අතුරු කමිටුවක් පත්කරන ලෙස ප‍්‍රකාශ කළ ප‍්‍රකාශය පිළිබදව ඊයේ පැවැති කැබිනට් මණ්ඩල රැස්වීමේදී සාකච්ඡා වී ඇති අතර ඒ පිළිබඳ අදහස් දක්වමින් ෆයිසර් මුස්තාපා අමාත්‍යවරයා පවසා ඇත්තේ තමන් නීතිපතිවරයාගේ නියමයන්ට අනුව කටයුතු කරන බවයි.

ක‍්‍රිකට් නිලවරණය සම්බන්ධයෙන් ක‍්‍රීඩා අමාත්‍යවරයා නිසි ලෙස කටයුතු කර නොමැති බව එහිදී අර්ජුන රණතුංග අමාත්‍යවරයා කැබිනට් මණ්ඩල රැස්වීමේදී පවසා තිබේ.

ඊට ප‍්‍රතිචාර දක්වමින් ක‍්‍රීඩා අමාත්‍යවරයා පවසා ඇත්තේ තමන්ද ජනාධිපති නීතිඥයෙක් බවත්, තමන්ද නීතිය හරි හැටි දන්නා බවත්ය. ක‍්‍රිකට් නිලවරණය නීතියට අනුව සිදු කරන බව ක‍්‍රීඩා අමාත්‍යවරයා ප‍්‍රකාශ කිරීමත් සමග ජනාධිපති මෛත‍්‍රීපාල සිරිසේන මහතාද මීට මැදිහත් වී ඇත.

ජනාධිපතිවරයා එහිදී අර්ජුන රණතුංග අමාත්‍යවරයා වෙත පවසා ඇත්තේ ක‍්‍රීඩා අමාත්‍යාංශයේ කටයුතුවලට සම්බන්ධ නොවී තමන්ට පැවැරී ඇති රාජකාරි නිසි ලෙස ඉටු කරන ලෙසයි. ශ‍්‍රී ලංකා ක‍්‍රිකට් ආයතනයේ නිලවරණය කඩිනමින් පවත්වා ඊට නිලධාරීන් පත්කරන ලෙසද ජනාධිපතිවරයා ක‍්‍රීඩා අමාත්‍යවරයා වෙත මෙහිදී උපදෙස් දී තිබේ.

ඊට පත්වන පුද්ගලයින් කවුරුන්ද යන්න තමන්ට අදාළ නොමැති බවත් නිලවරණය කඩිනමින් පවත්වා නිලධාරීන් පත්කරන්නැයිද ජනාධිපතිවරයා මෙහිදි ක‍්‍රීඩා අමාත්‍ය ෆයිසර් මුස්තාෆා වෙත පවසා ඇතැයි අමාත්‍ය මණ්ඩල ජ්‍යෙෂ්ඨ ප‍්‍රකාශකයකු පැවැසීය.

Comment (0) Hits: 205

රාජිතගේ හිතෙත් සංගක්කාර

හිටපු ශ්‍රී ලංකා ක්‍රිකට් නායක කුමාර සංගක්කාර මහතා ක්‍රියාකාරී දේශපාලනයට සම්බන්ධ වන්නේ නම් හැකි උපරිම සහයෝගය ඒ මහතා වෙත ලබාදෙන්නේ යැයි සම කැබිනට් ප්‍රකාශක අමාත්‍ය රාජිත සේනාරත්න  පවසයි.

අමාත්‍යවරයා මේ බව පවසා සිටියේ ඊයේ  (25 දා) පෙරවරුවේ පැවැති අමාත්‍ය මණ්ඩල තීරණ දැනුම් දීමේ මාධ්‍ය හමුවකදී මාධ්‍යවේදීන් ඇසූ ප්‍රශ්නවලට පිළිතුරු ලබා දෙමිනි.

සංගක්කාර මහතා ඉදිරි ජනාධිපතිවරණය සඳහා එක්සත් ජාතික පෙරමුණ යටතේ ඉදිරිපත් වන්නේදැයි එහිදී මාධ්‍යවේදීන් ප්‍රශ්න කර සිටි අතර, ඊට පිළිතුරු දෙමින් සේනාරත්න මහතා ප්‍රකාශ කර සිටියේ ඒ පිළිබඳ එක්සත් ජාතික පෙරමුණ කතාකර නොමැති බවත්, එහෙත් එක්සත් ජාතික පක්ෂය කතා කළාද යන්න පිළිබඳ තමන් නොදන්නා බවත්ය.

Comment (0) Hits: 304

අධ්‍යාපන සේවයේ  වර්ජනයත් අවසන් : සහනත් අවසන් !

ගුරු – විදුහල්පති වෘත්තීය සමිති ඇතුළු අධ්‍යාපන ක්ෂේත්‍රයේ වෘත්තිය සමිති කිහිපයක් අද (26) ක්‍රියාත්මක කිරීමට නියමිතව තිබූ එක්දින සංකේත වැඩ වර්ජනය අත්හිටුවීමට තීරණය කර ඇති බව වාර්තා වෙයි.

ඒ ඊයේ (25) ජනාධිපති මෛත්‍රීපාල සිරිසේන සමඟ අදාළ වෘත්තීය සමිති පැවැත්වූ විශේෂ සාකච්ඡාවකින් පසුවය.

අධ්‍යාපන සේවයේ වෘත්තීය සමිති කිහිපයක් මෙම වැඩ වර්ජනය කැඳවා තිබුණේ දේශපාලන පළිගැනීම් කමිටු නිර්දේශ මත අධ්‍යාපන සේවාවන්ට නුසුදුස්සන් පත් කිරීමට විරෝධය පළ කරමින්ය.

එහෙත් අධ්‍යාපන අමාත්‍යංශය දිගින් දිගටම පෙන්වා දුන්නේ පසුගිය කාලයක් පුරාවට දේශපාලන පළිගැනීම් වලට ලක්වූ සුදුසුකම් තිබෙන අයට  සාධාරණයක් ඉටුකිරීමට මෙම වැඩපිළිවෙල විධිමත්ව සිදුකරන බවය. 

එහෙත් ජනාධිපති මාධ්‍ය අංශය සඳහන් කරන්නේ 25 වනදා  පැවති සාකච්ඡාවේදී දේශපාලන පළිගැනීම් පදනම් කර ගනිමින් ලබාදීමට සැලසුම් කර තිබූ පත්වීම් සහ උසස්වීම් ලබාදීම වහාම ක්‍රියාත්මක වන පරිදි තාවකාලිකව නතර කිරීමට තීරණය කළ බවය.

අදාළ පත්වීම් සඳහා තෝරාගෙන ඇති පුද්ගලයින්ගේ ලිපි ගොනු නැවත විමර්ශනය කිරීමටත් දේශපාලන පළිගැනීම් සිදුවී තිබෙන යන්න නැවත විමර්ශනය කර නිර්දේශ ලබාදීමට ජ්‍යෙෂ්ඨ නිලධාරී කමිටුවක් පත්කර මසක් තුළ නිර්දේශ ලබා ගැනීමටත් මෙහිදී තීරණය කර ඇති බවද වාර්තා වෙයි.

එමෙන්ම ජනාධිපතිවරයා පත් කරනු ලබන එම කමිටුවේ නිර්දේශ වැඩිදුර අනුමැතිය සඳහා රාජ්‍ය සේවා කොමිෂන් සභාව වෙත යොමු කර නිර්දේශ ලබාගනු ඇති බවත් පත් කරන ලද නිලධාරී කමිටුවට අදහස් ඉදිරිපත් කිරීම සඳහා වෘත්තීය සමිතිවලට ද අවස්ථාව දෙන බවද ජනාධිපතිවරයා සඳහන් කර ඇතැයිද වාර්තා වෙයි.  

මෙම ක්‍රියාමාර්ගයන්ගෙන් අනතුරුව දේශපාලන පළිගැනීම් මත පත්වීම් හා උසස්වීම් ලබාදීමේදී යම් පුද්ගලයකුට අසාධාරණයක් වී ඇත්නම් එය නිවැරදි කිරීමට ද  පැවති සාකච්ඡාවේදී වැඩිදුරටත් තීරණය කර තිබේ.

Comment (0) Hits: 170

දුෂණ විරෝධී රටවල් අතර පළමු තැනට ලංකාව ගේනවා - ජනාධිපති  

තම ධුර කාලය තුළ දී  ලෝකයේ දූෂණයට එරෙහිව ක‍්‍රියාකරන රටවල් අතර ශ‍්‍රී ලංකාව පළමු තැනට පත්කිරීම තම අරමුණ බව ජනපති මෛත්‍රීපාල සිරිසේන සඳහන් කර ඇත.

ජනාධිපතිවරයා මේ බව සඳහන්කර සිටියේ  අද (25) පෙරවරුවේ කොළඹ දී ආරම්භ වූ ජකර්තා මූලධර්ම පිළිබඳ  එක්සත් ජාතීන්ගේ විශේෂඥ කණ්ඩායම් රැස්වීමේ ප‍්‍රධාන ආරාධිතයා ලෙස එක්වෙමිනි.

ලොව පුරා දූෂණයට එරෙහිව ක‍්‍රියාකරන ආයතන ශක්තිමත් කිරීමේ අරමුණින් 2012 වසරේ දී ඉන්දුනීසියාවේ ජකර්තා නුවර දී රැස්වූ රටවල් 88 කට අයත් සංවිධාන සහ ආයතන විසින් පැමිණි එකඟතා, ජකර්තා මූලධර්ම ලෙසින් හැඳින්වෙන  අතර, එහිදී එළිදක්වන ලද ප‍්‍රකාශය ශක්තිමත් කිරීමේ අරමුණින් මෙවර සමුළුව කොළඹ දී සංවිධානය කොට ඇත.

බලය සහ දූෂණය එක්ව බැඳී ඇති දම්වැලක් සේ එකට ගමන් ගන්නා බව මෙහිදී සඳහන් කළ ජනාධිපතිවරයා අල්ලස සහ දූෂණය ද අපරාධ සහ මත්ද්‍රව්‍ය ද ලොව පුරා සංවර්ධිත හා සංවර්ධනය වෙමින් පවතින රටවල් මුහුණ දෙන ප‍්‍රධානතම අභියෝගය බව ද කියා සිිටියේය. 

2015 ජනාධිපතිවරණය ජයග‍්‍රහණය කිරීමෙන් අනතුරුව එම ජනාධිපතිවරණ සටනේ ප‍්‍රධාන පොරොන්දුවක් වූ ජනාධිපති ධුරයේ අසීමිත බලතල ඉවත් කිරිමට තමා කළ කැපවීම මෙහිදී සිහිපත් කළ ජනාධිපතිවරයා, තමා ජනාධිපති ධුරයට පත්වන විට 18 වන ව්‍යවස්ථා සංශෝධනය මගින් රාජාණ්ඩුවක තත්ත්වයේ බලතල ජනාධිපති ධුරයට එක්කර තිබූ බවත් සිහිපත් කළේය.

ස්වාධීන කොමිෂන් සභා ස්ථාපනය කොට, ස්වාධීන අල්ලස් හෝ දූෂණ විමර්ශන කොමිසම, ස්වාධීන අධිකරණය ඇතුළු ආයතන රට තුළ තහවුරු කිරීමට හැකිවීම මෙරට පොදු ජනයා ලද සුවිශාල ජයග‍්‍රහණයක් බව ප‍්‍රකාශ කළ ජනාධිපතිතුමා දුරකතන ඇමතුම් මගින් විනිශ්චයකාරවරුන් දිය යුතු නඩු තීන්දුව දේශපාලනඥයින් විසින් දැනුම් දුන් යුගය එයින් අවසන් කිරීමට හැකි වූ බවද සඳහන් කළේය.

එසේම ශ‍්‍රී ලංකාවේ අල්ලස් කොමිසම පිහිටුවා වසර 25 කට ආසන්න කාලයක් ගතව තිබුණ ද මෙරට අල්ලස හෝ දූෂණය මැඞීමට ප‍්‍රමාණවත් බලයක් එම ආයතනයට හිමි ව නොතිබූ බව සඳහන් කළ ජනාධිපතිතුමා, 19 වන සංශෝධනය මගින් පූර්ණ ස්වාධීනත්වයෙන් යුත් අල්ලස් හෝ දූෂණ කොමිසමක් ස්ථාපනය කිරීමට හැකිවූ බව ද ප‍්‍රකාශ කළේය.

දූෂණයට එරෙහිව එක්සත් ජාතීන්ගේ සංවිධානය ප‍්‍රමුඛ ජාත්‍යන්තර සංවිධාන සමග ශක්තිමත්ව එක්ව ගමන් කිරීම තම රජයේ අරමුණ බව ද පෙන්වා දුන් ජනාධිපතිතුමා විදේශ රටවල සැඟව  සිටින මහා පරිමාණ දුෂණ ක‍්‍රියා සිදුකළ පුද්ගලයින් නීතියේ රැහැනට හසුකර ගැනීමට ජාත්‍යන්තර සංවිධාන වල ද මැදිහත්වීම සහ සහාය අපේක්ෂා කරන බව ද කියා සිටියේය.

දූෂිත රාජ්‍ය නිලධාරීන් සහ දූෂිත දේශපාලනඥයින් පාට පක්ෂ භේදයකින් තොරව සන්ධානගත වී දූෂණ විරෝධී වැඩපිළිවෙල වැළැක්වීමට ක‍්‍රියාමාර්ග ගනිමින් සිටින බව ද මෙහිදී කියා සිටි ජනාධිපතිතුමා කුමන බාධක පැමිණියත් එම වැඩපිළිවෙල අඛණ්ඩව ක‍්‍රියාත්මක කරන බව අවධාරණය කර ඇත.

Comment (0) Hits: 173

2014 අළුත්ගම ගැටුමේ දේපල හානි වලට  වන්දි පිරිනැමීම හෙට (26)

2014 වසරේ අළුත්ගම දර්ගා නගරයේ ඇති වූ ගැටුම්කාරී වාතාවරණයෙන් හානියට පත් වෙළෙදසැල් සහ නිවාස සදහා වන්දි ප්‍රදානය කිරිම සෞඛ්‍ය, පෝෂණ හා දේශීය වෛද්‍ය අමාත්‍ය දොස්තර රාජිත සේනාරත්නගේ ප්‍රධානත්වයෙන් සහ අමාත්‍ය එම්.ඩී ස්වාමිනාදන්ගේ සහභාගීත්වයෙන් අළුත්ගම දර්ගා නගරයේ සහිරා විද්‍යාලයේ දී හෙට (26) පස්වරු 3.00 ට පැවැත්වෙයි.

මෙහිදී හානියට පත් නිවාස සහ වෙළෙදසැල් 122 කට රුපියල් මිලියන 188 ක වන්දි මුදලක් පිරිනැමෙයි. අමාත්‍ය මණ්ඩල අනුමැතිය ඒ සදහා ලැබී ඇත.
යහපාලන රජයේ තවත් පොරොන්දුවක් වන මෙය සහජීවනය උදෙසා වන්දි ප්‍රදානය කරන බව සෞඛ්‍ය අමාත්‍යවරයා ප්‍රකාශ කරයි.

Comment (0) Hits: 162

Page 218 of 338