පුවත්

පැතුම් කර්නර්ව අත්අඩංගුවට අරන්. චෝදනා මොනවද නම් දන්නේ නැහැ.

කොහොමත් අරගලයක් සිදුවෙච්ච සන්දර්භයක් ඇතුලේ 'චෝදනා' කියන්නේ තේරුම් ගන්න අමාරු දෙයක් නෙවෙයි. අරගලකරුවෙක්ට එරෙහිව 'රාජ්‍ය විරෝධී' කියල හංවඩු ගහන්න පුළුවන් නීති සහ විධිවිධාන හොයාගන්න බැරි දේවල් නෙවෙයි. මේ ලියන දේවල් උණත් අන්තිමට 'රාජ්‍ය විරෝධී' කියල කියන්න ඉතාම පහසුවෙන් පුළුවන්.

කර්නර් වමේ දේශපාලනය නියෝජනය කළ තරුණයෙක් ලෙස එළියට ආවේ නැහැ. මම හිතන්නේ ඔහු එන්නේ හරිත පක්ෂය වගේ එකකින්. හැබැයි ඔහුගේ ෆේස්බුක් එක ගත්තම (ඒක විතරක් ගත්තත්) යම් සමාජ-දේශපාලනික බලපෑමක් ඇති දේවල් ඩිජිටල් වේදිකාවේ කියල තියනවා (high impact factor). සහ ඔහු ගොඩක් වෙලාවට ට්‍රෙන්ඩින්. ඒ කියන්නේ සෑහෙන පිරිසක් ඔහුව කියවමින් තියනවා.

මම හිතන්නේ එක්තරා අවස්ථාවකට පස්සේ ඔහු අරගලයෙන් තරමක් වෙන් වෙලා උණත් දිගටම ඔහුගේ අදහස් කියමින් හිටියා. ඒ වගේම පසුගිය 9 වැනිදා ඔහු ලයිව් ආව. අරගලය එක්ක සම්බන්ද උණා. ඔහුගේ මතවාදය සහ ක්‍රියාකාරකම් එක්ක මම එකඟ නොවන තැන් ගොඩක් තියනවා. ඒ උනාට මේ මාස කිහිපය ඇතුලේ යම් විකල්ප දේශපාලන නායකත්ව විභවයක් ඔහුගෙන් දකින්නත් පුළුවන් උනා. විශේෂයෙන් යම් යම් දැනුම්වත් කිරීම් එක්ක ඔහුගෙන් යම් තීරණාත්මක කාර්යයක් සිද්ද උණා.

ඒ වගේම ඔහුගේ පෙනුම වෙනස්. හොඳට ඇඳලා කරලා තමයි ඉන්නේ. නීට් සහ කැපී පෙනෙන සුළුයි.

විශේෂයෙන් අරගලය ඇතුළෙත් ආරම්භයේ ඉඳල විශාල බලපෑමක් ඔහු විසින් කළා. යම් යම් ගණන් බැලීම් එක්ක ගත්තත් ඔහු තරමක් ඉස්සරහින් හිටියා.

සමාජයේ මුල් බැහැගත්ත දේශපාලනය කරපු ගොඩක් අයට වඩා ඔහු තරමක් ඉස්සරහින් හිටිය. ඒ නිසා වමේ සහ දකුණේ ගොඩක් අයට ඔහු අභියෝගයක් වෙන්න ඇති. නීති කඩ කළාට වැඩියෙන් ඔහු අත්අඩංගුවට ගන්න හේතුව ඔහු මේ පවතින ක්‍රමය ඇතුලේ යම් විකල්පයක් ලෙස මතුවීම. අවම වශයෙන් විකල්ප රූපයක්, විකල්ප දේශපාලන ප්‍රතිරූපයක් (alternative political image) හැටියට ඉස්මතු වෙන්න උත්සාහ කිරීම. වෙනත් පරම්පරාවකට කතා කරන්න උත්සාහ කිරීම.

මම කියන්නේ ඒ රූපයට අපි එකඟ වුණත් නැතත් පැතුම්ට අයිතියක් තියනවා එහෙම උත්සාහයක් සහ අත්හදා බැලීමක් කරන්න. ඉනුත් විශේෂයන් ලෝක ගෝලයේ අත්හදා බැලීම් අඩුවෙන් කරන කළාපයක...

ඒ නිසා පැතුම් නිදහස් කරන්න බලකරන්න ඕනි.

අද විජේ ඩයස් සහෝදරයා අප අතරින් වෙන්වෙලා.

මහේෂ් හපුගොඩ ගේ ෆේස්බුක් ගිනුමෙනි

වත්මන් ආර්ථික සහ දේශපාලන අර්බුදය විසඳීම සඳහා වන අවම පොදු ජාතික වැඩපිළිවෙළක් සකස් කිරීමට අදාළ නිර්දේශ ඇතුළත් ලිපියක් ජනාධිපති රනිල් වික‍්‍රමදිංහ වෙත ජාතික නිදහස් පෙරමුණ නායක පාර්ලිමේන්තු මන්ත‍්‍රී විමල් වීරවංශ විසින් යොමු කර ඇත.

අදාල ලිපිය මෙසේය.

ගරු ජනාධිපති රනිල් වික්‍රමසිංහ මහතා,
ජනාධිපති ලේකම් කාර්යාලය,
කොළඹ.

ගරු ජනාධිපතිතුමනි,

පවතින ආර්ථික දේශපාලන අර්බුදය යොදාගනිමින් ශ්‍රී ලංකා රාජ්‍යය බිඳවැට්ටවීම සඳහා දියත් වන ආපදා අධිරාජ්‍යවාදී මෙහෙයුමට ගොදුරු නොවීම සඳහා !

මේ වන විට කවුරු අකමැති වුවත්, කැමති වුවත් ඔබතුමා රටේ ව්‍යවස්ථාවට අනුව ඉදිරි දෙවසරක කාලය සඳහා ජනාධිපතිවරයා ලෙස පත් වී ඇත. අපගේ දේශපාලන කියවීම අනුව ඔබතුමාට ද කැමති වුව ද අකමැති වුව ද තෝරා ගැනීමට සිදු වී ඇත්තේ විකල්ප දෙකකින් එකක් පමණි. ඉන් පළමුවැන්න මේ වනවිට උත්සන්න වෙමින් පවතින ආර්ථික සහ දේශපාලන අර්බුදය යොදාගනිමින් දියත් වන ආපදා අධිරාජ්‍යවාදී මෙහෙයුමේ ගොදුරක් බවට පත් වී ශ්‍රී ලංකාව හයිටියක් බවට පත් කිරීමය. ඒ මගින් ශ්‍රී ලංකාවේ ඉතිහාසය අවසන් වන අතර ඔබගේ දේශපාලන පැවැත්ම ද අනතුරට ලක් වනු ඇත. දෙවැන්න අවසන් පැයේදී හෝ ඓතිහාසික වැරදි නිවැරදි කිරීමට ලැබී ඇති අවස්ථාව ප්‍රයෝජනයට ගනිමින් අර්බුදය විසඳීම සඳහා සමාජ ගිවිසුමක් ඇතිකර ගැනීමට දූරදර්ශී වීමය.

ඔබතුමා විසින් අවංකව එම දෙවන උපායමාර්ගික ප්‍රවේශය තෝරන තත්ත්වයක් තුළ පටු දේශපාලන වාදවිවාදවලින් හෝ ඓතිහාසික ගැටුම් යාවත්කාලීන කිරීමෙන් තොරව ඊට මඟ පෙන්වීම සඳහා අපි ඉදිරිපත් වෙමු. එය මේ රටේ ජාතික බලවේගවලට ඉතිහාසය විසින් පවරා ඇති වගකීමක් ලෙස අපි සලකමු. මෙම ලිපිය සහ යෝජනාවලිය මෙන්ම ඇමුණුමක් ලෙස අප විසින් ඉදිරිපත් කරන අනාගත අවම පොදු වැඩපිළිවෙළක අනිවාර්යෙන්ම අඩංගු විය යුතු බවට අප පක්ෂය විසින් ඉදිරිපත් කරනු ලබන නිර්දේශ ඔබතුමා වෙත ඉදිරිපත් කරනු ලබන්නේ විවෘත මනසකින් සහ අපගේ දීර්ඝකාලීන අත්දැකීම් මෙන්ම න්‍යායාත්මක අවබෝධය මත බව ද දන්වා සිටිමු.

මෙයට
විශ්වාසී,

විමල් වීරවංශ(පා.ම.)
නායක,
ජාතික නිදහස් පෙරමුණ
2022-07-28

වත්මන් ආර්ථික සහ දේශපාලන අර්බුදය තවදුරටත් වර්ධනය වීම වළක්වා ගැනීම සහ නිශ්චිත කාලරාමුවක් තුළ අර්බුදය සමනය කර ගැනීම සඳහා මෙන්ම දීර්ඝකාලීන විසඳුමකට මඟ සැලසීම සඳහා වැඩපිළිවෙළක් සහ එය ක්‍රියාත්මක කිරීම සඳහා මාර්ග සිතියමකට අදාළ දේශපාලන පක්ෂ අතර සහ මහජනයා අතර එකඟතාවක් ඇති කර ගැනීම සඳහා යෝජනාවලිය

පූර්විකාව:

මේ වන විට ගතවන සෑම දිනකම උත්සන්න වෙමින් පවතින දේශපාලන අර්බුදය සහ ඒ සමඟ බැඳුණු නීතියේ ආධිපත්‍යය බිඳවැටීම ආරම්භ වන්නේ ක්‍රමයෙන් වර්ධනය වූ ආර්ථික අර්බුදයට මුහුණ දීම සඳහා ආණ්ඩුවේ පාර්ශ්ව මෙන්ම විපක්ෂය සහ මහජනයා අතර එකඟතාවක් ඇති කර ගැනීමට නොහැකිවීම නිසාය. ශ්‍රී ලංකාවේ රාජ්‍යයට එරෙහිව දියත් වන ආපදා අධිරාජ්‍යවාදී මෙහෙයුම්වලට අවස්ථාව නිර්මාණය වන්නේ ද එම දුර්වලතාව නිසා බව ඉතා පැහැදිලිය. විශේෂයෙන්ම ආර්ථික අර්බුදයට අදාළව මූල හේතුව වන පවතින ආර්ථික මොඩලයේ දුර්වලතා සහ ඒ මගින් ඇති වූ අනිසි ප්‍රතිඵල පිළිබඳව මෙන්ම ඊට අදාළව ආණ්ඩුව විසින් ඉදිරිපත් කරන විසඳුම් පිළිබඳව මහජනයා දැනුවත් නොකිරීම නිසා මහජන අසහනය සහ විරෝධය ද වර්ධනය වෙමින් ඇත.

ඒ සියල්ලෙහි ප්‍රතිඵලයක් ලෙස මේ වන විට රට තුළ නීතියේ ආධිපත්‍යය බිඳවැටෙමින් තිබෙන අතර එම හේතුව මත අර්බුදය තවදුරටත් වර්ධනය වන අතර ඊට විසඳුම් සෙවීම සඳහා වන ඉඩකඩ හැකිළෙමින් තිබෙන බව ද පිළිගැනීමට සිදු වේ. එම තත්ත්වය තුළ ආරක්ෂක හමුදා සහ මහජනයා අතර ගැටුම් වර්ධනය වීමේ තත්වයක් සහ රාජ්‍ය සේවා බිඳවැටීමේ තත්ත්වයක් ද නිර්මාණය වෙමින් ඇත. එම නිසා ආර්ථික අර්බුදයෙන් පීඩාවට පත් වී සිටින ජනතාව තවදුරටත් අසරණ සහ අනාරක්ෂිතභාවයට පත්වේ. රාජ්‍ය සේවා, නිෂ්පාදන පද්ධතිය සහ වෙළඳපළ නිසි ලෙස ක්‍රියාත්මක වීම සඳහා නීතියේ ආධිපත්‍යය පිහිටුවීම මූලික පූර්ව කොන්දේසියකි. එසේම කඳුළු ගෑස් හෝ ජල ප්‍රහාර මගින් රජයට එරෙහි විරෝධතාකරුවන් දේශපාලන වශයෙන් නිරායුද කළ නොහැකි බව ද මේ වන විට ඉතා හොඳින් ඔප්පු වී ඇත.

එම නිසා මහජන අසහනය සහ විරෝධය සමනය කරමින් ආර්ථික සහ දේශපාලන අර්බුදය විසඳීම සඳහා විපක්ෂයේ සහ පොදු මහජනතාවගේ සහාය ලබාගත හැක්කේ ආණ්ඩුවේ පාර්ශව විසින් අවංක උවමනාවක් පෙන්නුවහොත් පමණි. විශේෂයෙන්ම ආපදා අධිරාජ්‍යවාදී මෙහෙයුමේ කුලීකරුවන් ලෙස කටයුතු කරන පිරිස් සහ අර්බුදය තම පටු දේශපාලන අරමුණු සඳහා යොදා ගැනීමට උත්සාහ කරන පිරිස් සැබෑ විරෝධතාකරුවන් නොමඟ යැවීම මගින් ප්‍රචණ්ඩත්වය වැපිරීම වැළැක්විය හැකි වන්නේ ද ඒ මගිනි. ඒ අනුව අර්බුදය විසඳීම සඳහා නිශ්චිත ඉලක්ක සහගත වැඩපිළිවෙළක් සහ එය ක්‍රියාත්මක කිරීම සඳහා මාර්ග සිතියමක් රටට ඉදිරිපත් කිරීම සඳහා පොදු එකඟතාවක් ඇතිකර ගැනීම ඉතා වැදගත් මූලික පූර්ව කොන්දේසියකි. ඒ සඳහා සියලු පාර්ශ්ව නියෝජනය වන ආකාරයට සර්වපාක්ෂික සමුළුවක් කැඳවීම සහ අදාළ එකඟතාවන්ට අනුව ඒවා ක්‍රියාත්මක කිරීමේ යාන්ත්‍රණයක් ලෙස එකගතා ආණ්ඩුවක් ව්‍යවස්ථානුකූලව පිහිටුවිය යුතු වේ.

එකඟතාව සඳහා යෝජනා

1. නීතියේ ආධිපත්‍යය පිහිටුවීම සඳහා හදිසි නීතිය යොදා ගැනීමේදී එය දෙපැත්ත කැපෙන අවියක් බව පිළිගනිමින් හදිසි නීතිය දීර්ඝ කිරීමේදී එය යොදා ගනිමින් නීතියේ ආධිපත්‍යය පිහිටුවීමේ ක්‍රියාවලිය සිදු කෙරෙන ආකාරය ආවේක්ෂණය කිරීම සහ එම ක්‍රියාවලිය තුළ, නීතිමය රාමුව තුළ රාජ්‍යයට එරෙහිව විරෝධතා පැවැත්වීම සඳහා මහජනයා සතු ප්‍රජාතන්ත්‍රවාදී අයිතිවාසිකම් ආරක්ෂා කිරීම සඳහා පාර්ලිමේන්තු කාරක සභාවක් පත් කිරීම

2. නිශ්චිත කාලරාමුවක් තුළ අර්බුදය සමනය කිරීම සහ දීර්ඝකාලීනව අර්බුදය විසඳීම සඳහා නිශ්චිත වැඩපිළිවෙළක් සහ එය ක්‍රියාත්මක කිරීම සඳහා මාර්ග සිතියමක් පිළිබඳ එකඟතාවක් ඇති කර ගැනීම සඳහා සර්වපාක්ෂික සමුළුවක් කැඳවීම සහ එම සමුළුවට විරෝධතාකරුවන්ගේ නියෝජිතයන්ට ද ආරාධනා කිරීම.

3. එම සර්වපාක්ෂික සමුළුව මගින් මේ වන විට ජාතික සංවිධාන මෙන්ම අරගලකරුවන් සහ විවිධ දේශපාලන පක්ෂ සහ කණ්ඩායම් විසින් මහජන සංවාදයට ලක්කර ඇති උපායමාර්ගික ප්‍රවේශයන් සහ නිශ්චිත ක්‍රියාකාරකම් සහිත ප්‍රකාශන සැලකිල්ලට ගත යුතු අතර එම ලේඛන නිල වශයෙන් සර්වපාක්ෂික සමුළුවේ සභාගත කිරීම.

4. එම පොදු එකඟතාව තුළින් ආර්ථික අර්බුදය සමනය කිරීම මගින් යහපත් දේශපාලන සංවාදයකට අවස්ථාව නිර්මාණය කිරීමෙන් පසුව පමණක් ව්‍යවස්ථා සංශෝධන යෝජනා ඉදිරිපත් කරන බවට සහතික වීම මගින් නව දේශපාලන අර්බුද නිර්මාණය වීම වැළැක්වීම. එමෙන්ම ආර්ථික අර්බුදය සමනය කිරීමට සමගාමීව දේශපාලන අර්බුදය සැබෑ ලෙසම විසඳීම සඳහා නිදහස් මැතිවරණයකට ඉඩ සලසන බවට මහජනයා තුළ විශ්වාසය ජනිත කිරීම ද වැදගත් වේ. (එම මැතිවරණ ක්‍රියාවලිය තුළ ව්‍යවස්ථා සංශෝධනයට අදාළ සංවාදය දිරිමත් කිරීමේ හැකියාව සියලු දේශපාලන පක්ෂවලට ලැබේ.)

5. සර්වපාක්ෂික සමුළුව මගින් සම්මත කරනු ලබන වැඩපිළිවෙළ සහ මාර්ග සිතියම හෙවත් අවම පොදු එකඟතාව ජනගත කිරීමෙන් අනතුරුව එය ක්‍රියාත්මක කිරීම සඳහා ව්‍යවස්ථානුකූලව ජනවරම සහිත පාර්ලිමේන්තුව නියෝජනය කරන සියලු පාර්ශ්වවලට ආරාධනා කිරීම මගින් එකගතා ආණ්ඩුවක් පිහිටුවීම.

6. එකගතා ආණ්ඩුව තුළ ප්‍රතිපත්තිමය සහ උපායමාර්ගික තීන්දු ගැනීමේ බලය සියලු දේශපාලන පක්ෂ නියෝජනය වන ජාතික විධායක සභාවකට පැවරීම.

7. අරගලයට දායක වූ සියලු පාර්ශ්ව සහ රටේ පොදු ජනතාවගේ, විද්වතුන්ගේ හරස්කඩක් නියෝජනය වන ආකාරයට මහජන සභාවක් පිහිටුවීම සහ එම නියෝජිතයන් ඔවුන්ගේ පසුබිම සහ ඔවුන් විසින් නියෝජනය කරනු ලබන පාර්ශ්ව පිළිබඳව පොදු මහජනතාව දැනුම්වත් කිරීම.

8. එම මහජන සභාව සහ ජාතික විධායක සභාව ඒකාබද්ධව ජාතික ආවේක්ෂණ සභාවක් පිහිටුවීම මගින් අවම පොදු එකඟතාව ක්‍රියාත්මක කිරීමට අදාළ සමස්ත ක්‍රියාවලිය ආවේක්ෂණයට ලක් කිරීම. ඊට අනුව ඉදිරි මඟ පෙන්වීම ලබා දීම. එමෙන්ම එම කටයුතු සම්බන්ධීකරණය සහ පරිපාලනය කිරීම සඳහා මෙන්ම මහජන දායකත්වය දිරිමත් කිරීම සහ එම ක්‍රියාවලිය කළමනාකරණය කිරීම සඳහා ලේකම් කාර්යාලයක් පිහිටුවීම සහ අදාළ සියලු සාකච්ඡා ජනමාධ්‍යට නිරාවරණය කිරීම.

9. අවම පොදු වැඩපිළිවෙළ ක්‍රියාත්මක කිරීමට අදාළ වගකීම් සඳහා ප්‍රමුඛතාව ලැබෙන ආකාරයට අමාත්‍ය මණ්ඩලයක් පත්කිරීම සහ එහි සාමාජිකත්වය උපරිම වශයෙන් 30කට සීමා කිරීම මෙන්ම එම අමාත්‍යවරුන්ට මන්ත්‍රීවරයෙකුගේ වරප්‍රසාද පමණක් ලබාදීම. එසේම එම අමාත්‍ය මණ්ඩලය අනිවාර්යයෙන්ම සතියකට දෙවතාවක් රැස්වීම.

10. අවම පොදු වැඩපිළිවෙළ ක්‍රියාත්මක කිරීමට අදාළ බහුපාර්ශ්වීය නියෝජනයක් අවශ්‍ය වන සුවිශේෂී කාර්යභාරයන් ඉටු කිරීම සඳහා නිලධාරීන්ගෙන් සමන්විත කාර්යසාධක බල ඇණි පිහිටුවීම සහ ඒවා තුළ උපදේශකයින් ලෙස හෝ නිරීක්ෂකයින් ලෙස මහජන සභාව විසින් තෝරනු ලබන නියෝජිතයන්ට අවස්ථාව ලබාදීම.

11. සියලුම අමාත්‍යාංශවලට අදාළව පත් කරනු ලබන උපදේශක කාරක සභාවලට පාර්ලිමේන්තු මන්ත්‍රීවරුන් 224 දෙනා ඔවුන්ගේ කැමැත්ත සහ විශේෂඥතාවන් අනුව පත්කිරීම. එසේම එම කාරක සභාවලට අදහස් සහ යෝජනා ඉදිරිපත් කිරීම සඳහා මහජනයාට අවස්ථාව ලබාදීම සහ අදාළ සාකච්ඡා ජනමාධ්‍යට නිරාවරණය කිරීම.

12. සියලුම අමාත්‍යාංශ නියෝජනය වන ආකාරයට ලේකම් මණ්ඩලයක් පත්කිරීම. එම ක්‍රියාවලිය අමාත්‍ය මණ්ඩල ලේකම්වරයා විසින් සිදු කිරීම මෙන්ම එම ලේකම් මණ්ඩලයේ නියෝජිතයන් අවශ්‍යතාව අනුව ජාතික ආවේක්ෂණ සභාවට සහ ජාතික විධායක සභාවට කැඳවීම සඳහා ක්‍රමවේදයක් සකස් කිරීම සහ එම මණ්ඩලය සතියකට එක් වතාවක් රැස්වීම.

ඇමුණුම 01

 අර්බුදය විසඳීම සඳහා අවම පොදු ජාතික වැඩපිළිවෙළක් සකස් කිරීම සඳහා සර්වපාක්ෂික සමුළුව විසින් සැලකිල්ලට ගතයුතු බවට ජාතික නිදහස් පෙරමුණ විසින් නිර්දේශ කරනු ලබන යෝජනා:-

1. පීඩාවට පත් වන අඩු ආදායම්ලාභී ජනතාවට සහන සැලසීම සඳහා විශේෂිත අරමුදලක් පිහිටුවීම සහ කළමනාකරණ ක්‍රියාවලිය සඳහා සම්ප්‍රදායානුකූල පරිපාලන ක්‍රමවේදයෙන් බැහැරව විශේෂිත කාර්යක්ෂම යාන්ත්‍රණයක් පිහිටුවීම.

2. 2017 විදේශ විනිමය පනත සංශෝධනය කිරීම මගින් කළු මුදල් වෙළඳපොළ පාලනය කිරීම සහ විනිමය පාලනය විධිමත් කිරීම. (ඊට අදාළව එම පනත අහෝසි කොට 1953 මුල් පනතට අවශ්‍ය සංශෝධන ගෙන ඒම වඩා සුදුසු විය හැක)

3. විදේශ රැකියා නියුක්තිකයන්ගේ ප්‍රේෂණ වර්ධනය කිරීම සඳහා සුවිශේෂී දිරිගැන්වීම් පැකේජයක් හඳුන්වා දීම සහ එම ක්‍රියාවලිය කළමනාකරණය සඳහා මහ බැංකුව මගින් විශේෂිත යාන්ත්‍රණයක් පිහිටුවීම.

4. කර්මාන්තකරුවන් ණය අර්බුදයෙන් ගොඩගැනීම සහ සුළු නිෂ්පාදකයින් ක්‍ෂුද්‍රමූල්‍ය වහල්භාවයෙන් ගලවා ගැනීම මගින් නිෂ්පාදන පද්ධතියට ජවය ලබා දීම සඳහා විශේෂිත ප්‍රතිපත්තිමය තීන්දුවක් ගැනීම සහ එය ක්‍රියාත්මක කිරීම සඳහා බහුපාර්ශ්වීය කාර්ය සාධක බලකායක් පිහිටුවීම.

5. දේශීය නිෂ්පාදන පද්ධතිය ආරක්ෂා කිරීම සහ ශක්තිමත් කිරීම සඳහා උපායමාර්ගික වශයෙන් වැදගත් තෝරාගත් නිෂ්පාදනවලට අදාළව තරගකාරී ආනයනික නිෂ්පාදන අධෛර්යවත් කිරීම සඳහා විශේෂිත පරිභෝජන බදු පැනවීම සහ ඊට අදාළ භාණ්ඩ සහ ද්‍රව්‍ය ලැයිස්තුව, බදු ප්‍රමාණයන් ප්‍රසිද්ධ කිරීම. එමෙන්ම එම නව බදු අඩු ආදායම්ලාභීන්ගේ සුබසාධනය සඳහා පිහිටුවනු ලබන අරමුදලට සහ නිෂ්පාදකයාට දිරිගැන්වීම් ලබාදීම සඳහා පමණක් විනිවිදභාවයෙන් යුතුව යොදා ගැනීම පිළිබඳ සහතිකයක් ලබාදීම.

6. ඛනිජ තෙල් සහ ගෑස් ආනයනය කිරීමේදී බොරතෙල් නිෂ්පාදනය කරන සහ ලෝක වෙළඳපොළේ අඩුම මිලට ඒවා සපයන රුසියාව සමග රාජ්‍යතාන්ත්‍රික සාකච්ඡා වහාම ආරම්භ කිරීම සහ ගිවිසුම්වලට එළැඹීම. එසේම අඩු මිලට බොරතෙල් සැපයීමේ කොන්දේසියට යටත්ව ඛනිජ තෙල් පිරිපහදුව නවීකරණය කිරීම හෝ නව පිරිපහදුවක් ආරම්භ කිරීම සඳහා ජාත්‍යන්තර ටෙන්ඩර් කැඳවීම් මගින් රාජ්‍ය පුද්ගලික ඒකාබද්ධ ව්‍යාපාරයක් ආරම්භ කිරීම.

7. අත්‍යවශ්‍ය ද්‍රව්‍ය සඳහා මිල පාලනය නැවත පැනවීම සහ එම ක්‍රියාවලිය අධීක්ෂණය සඳහා බිම් මට්ටමේ රාජ්‍ය නිලධාරීන් යොදා ගනිමින් විශේෂිත යාන්ත්‍රණයක් සකස් කිරීම. එසේම ස.තො.ස. ආයතනය මගින් දේශීය තොග මිලදී ගැනීම, ආනයනය කිරීම, තොග බෙදාහැරීම, ආරක්ෂණ තොග පවත්වාගෙන යාම සහ අඩු ආදායම්ලාභීන් සඳහා ආහාර සලාක බෙදාහැරීම යන කර්තව්‍යයන් ඉටුකර ගැනීම සඳහා වහාම එම ආයතනය නැවත ස්ථානගත කිරීම.

8. ජාතික වගා සංග්‍රාමයක් ආරම්භ කිරීම සහ ඊට අදාළව සියලුම රාජ්‍ය නිලධාරීන්ගේ විශේෂයෙන්ම බිම් මට්ටමේ නිලධාරීන්ගේ, පළාත් පාලන ආයතනවල, පාසල්, ආගමික ස්ථාන, ගොවි සංවිධාන, වෙනත් පරිසර සහ ස්වේච්ඡා සංවිධාන මෙන්ම ආරක්ෂක හමුදාවල කාර්යභාරය නිශ්චිතව හඳුනාගැනීම සහ ඔවුන්ගේ වගකීම පිළිබඳ අධීක්ෂණය සහ පහසුකම් සැලසීම සඳහා දිස්ත්‍රික් මට්ටමින් කාර්ය සාධක බලඇණි පිහිටුවීම සහ ඒවාට අරගලයට දායක වූ පාර්ශවවල නියෝජිතයන් පත් කිරීමට අවස්ථාව සැලසීම.

9. එරෝෆ්ලොට් සිද්ධිය මෙන්ම ශ්‍රී ලංකාව ජාත්‍යන්තර සබඳතා ආශ්‍රිතව අර්බුදයට ලක් කිරීම සඳහා සිදුවී ඇතැයි විශ්වාස කරන වෙනත් සිදුවීම් පිළිබඳව සොයා බැලීම සඳහා විශේෂිත කොමිසමක් පත් කිරීම. එසේම 2015 සිට මේ දක්වා මහබැංකුව විසින් ගනු ලැබූ තීන්දු මගින් ආර්ථික අර්බුදයට දැක්වූ දායකත්වය පිළිබඳව සොයා බැලීම සඳහා පරීක්ෂණ කණ්ඩායමක් පත් කිරීම. ඊට අමතරව රාජපක්ෂවරුන්ගේ හොරකම් නිසා ආර්ථික අර්බුදය ඇති වූ බවට පවතින සමාජ මතය පිළිබඳව සත්‍ය සොයාබැලීම, අර්බුදය විසඳීමට අමතරව මහජන සහාය ලබා ගැනීම සඳහා පූර්ව කොන්දේසියක් වන බැවින් ඊට අදාළව චෝදනා ඉදිරිපත් කරන සියලු පාර්ශවවලට තම චෝදනා සහ සාක්ෂි ඉදිරිපත් කිරීම සඳහා පරීක්ෂණ කොමිෂන් සභාවක් පත් කිරීම.

10. සියලුම ජාත්‍යන්තර ආයෝජන, වෙළෙඳ හෝ ආරක්ෂක ගිවිසුම් අත්සන් කිරීමට පෙර ඒවා පාර්ලිමේන්තුවේ අනුමැතියට ඉදිරිපත් කිරීම සහ අදාළ සාකච්ඡා ක්‍රියාවලිය මෙන්ම ඊට සහභාගී වන පුද්ගලයින් පිළිබඳව සහ ඔවුන්ගේ නිර්දේශ එළිදරව් කිරීම. එසේම රාජ්‍යයන් දෙකක් අතර ගිවිසුම් හැර සෙසු සියලුම ආයෝජන ව්‍යාපෘති සඳහා තරගකාරී ලංසු කැඳවන බවට ප්‍රතිඥාවක් ලබාදීම.

හදිසි නීතිය පැනවීම ශ්‍රී ලංකා පොදුජන පෙරමුණේ ප්‍රතිපත්ති හා ව්‍යවස්ථාවට විරුද්ධ බව එහි ආරම්භක සභාපති, පාර්ලිමේන්තු මන්ත්‍රී ජී.එල් පීරිස් පවසයි .

එය ජිනීවාහිදී තවත් මසකින් පැවැත්වෙන මානව හිමිකම් කොමිෂන් සභාවේදී ශ්‍රී ලංකාවට අහිතකර ලෙස බලපෑ හැකි බවත් ජී.එස්.පී ප්ලස් සහනය අහිමිවීමට ද හේතු විය හැකි බවත් ඔහු පවසයි .

ජී.එල් පීරිස් මන්ත්‍රීවරයා මේ බව පැවසුවේ කොළඹ දී අද (28) පැවති මාධ්‍ය හමුවක් අමතමිනි.

ශ්‍රී ලංකාවේ පවතින තත්වය අනුව මහජන ජීවිත හා දේපල ආරක්‍ෂා කිරීමට පවතින සාමාන්‍ය නීතිය ප්‍රමාණවත් බවත්, හදිසි නීතිය පැනවීමේ කිසිඳු අවශ්‍යතාවයක් නැති බවත් ඔහු පැවසීය .

ජනාධිපතිවරයා තෝරා පත්කරගැනීම වෙනුවෙන් පාර්ලිමේන්තුවේ පැවති ඡන්ද විමසීමේදී රනිල් වික්‍රමසිංහට වාසිය හිමි නොවී තමන් තේරී පත් වූයේ නම් මෙරට අට වන විධායක ජනාධිපතිවරයා රටේ අවසන් විධායක ජනාධිපතිවරයා වන බව පාර්ලිමේන්තු මන්ත්‍රී ඩලස් අලහප්පෙරුම පැවසීය.

තමන් ඇතුළු කණ්ඩායම හඬනැගුවේ සර්ව පාක්‍ෂික ආණ්ඩුවක් වෙනුවෙන් මිස සර්ව පූට්ටු ආණ්ඩුවක් වෙනුවෙන් නොවන බවත් ඩලස් අලහප්පෙරුම මන්ත්‍රීවරයා පවසයි .

ඔහු මේ බව සඳහන් කර සිටියේ කොළඹ දී අද (28) පැවති මාධ්‍ය හමුවක් අමතමිනි.

පවතින අර්බුදය විසඳාගැනීමට නම් සර්වපාක්ෂික ආණ්ඩුවක් ගොඩනගාගැනීම ඉතා වැදගත් බව ද ඔහු එහිදී සඳහන් කළේය.

අවශ්‍ය වුවහොත් විපක්‍ෂයේ අසුන් ගැනීමට වුවත් තම කණ්ඩායම පැකිලෙන්නේ නැතැයිද මන්ත්‍රීවරයා වැඩිදුරටත් පැවසීය .

කෙසේ වුවත් හිටපු ජනාධිපතිනී චන්ද්‍රිකා බණ්ඩාරනායක කුමාරතුංග මෙන්ම මහින්ද රාජපක්ෂ ද ජනාධිපති ධූරය ලබාගන්නට විධායක ජනාධිපති ධූරය අහෝසි කරන පොරොන්දුව ලබා දුන් නමුත් ඔවුන්ගේ ධූර කාලය තුළ එවැන්නක් සිදුවූයේ නැත.

අරගලය ආරම්භයේ සිටම එහි පාර්ශවකාර සංවිධානයක් ලෙස ක්‍රියාකාරීව සිටින 'කළු තොප්පි ව්‍යාපාරය' (Black Cap Movement ) ගෝල්ෆේස් අරගල භූමියෙන් ඉවත්වීමට තීරණය කර ඇත.

එසේම, අරගලය ගාලුමුවදොරින් ඔබ්බට ගෙන යන 'අරගලය 4.0' නමින් අලුත් මෙහෙයුමක් ආරම්භ කිරීමටද තීරණය කර තිබේ.

ඒ සම්බන්ධයෙන් ජනතාව දැනුවත් කරමින් 'කළු තොප්පි ව්‍යාපාරය' විසින් නිකුත්කර ඇති නිවේදනයක ඒ සඳහන් අතර අදාළ නිවේදනය පහත දැක්වෙයි .

පාර්ලිමේන්තුව විසින් විධායක ජනාධිපති ධුරයට රනිල් වික්‍රමසිංහ පත්කර ගැනීම පිළිගත් ආණ්ඩුක්‍රම ව්‍යවස්ථා ක්‍රියාවලියක් හරහා සිදු වූ බව පිළිගන්න බව ප්‍රතිසංස්කරණ සඳහා සාමූහිකය නිවේදනයක් නිකුත් කරමින් සඳහන් කරයි.

ප්‍රජාතන්ත්‍රවාදී වටිනාකම් අනුව නීතියේ ආධිපත්‍ය ආර්ථික හා දේශපාලන නිදහස තහවුරු කිරීම සඳහා වූ ජනතා අරගලයේ විරෝධතාකරුවන්ට හමුදා පොලීසිය සහ හමුදාව විසින් පසුගිය දා රාත්‍රියේ බලහත්කාරයෙන් අමානුෂික හා ප්‍රචණ්ඩ ලෙස පලවා හැරීම පිළිබඳව තම ව්‍යාපාරය විරෝධය සටහන් කරන බවද එම නිවේදනයේ සඳහන් වේ.

එසේම විපක්ෂය ඇතුළත් සර්ව පාක්ෂික ආණ්ඩුවක් පිහිටුවීමට මෙන්ම කඩිනමින් සිදුකළ යුතු යෝජනා 5 ක් ද එකී නිවේදනය තුළ සඳහන් කර ඇත .

අදාළ නිවේදනය පහත දැක්වෙයි .

ගතවූ පැය 24 ක කාලය තුළ කොවිඩ් 19 ආසාදිතයින් සංඛ්‍යාව 154ක් සහ මරණ 04ක් වාර්තා වී ඇති බව වසංගත රෝග විද්‍යා ඒකකය සඳහන් කර සිටියි.

ඊයේ (26) වන විට මෙරට කොවිඩ් ආසාදිතව සිටින සමස්ත ආසාදිතයින් සංඛ්‍යාව 921ක් වූ අතර වාර්තා වී ඇති මුළු ආසාදිතයින් සංඛ්‍යාව 665,094 ක් බවත් වාර්තා වෙයි .

එමෙන්ම මෙරටින් වාර්තා වී ඇති සමස්ත කොවිඩ් ආසාදිත මරණ සංඛ්‍යාව 16,544 කි.

ඒ අනුව ගතවු සතියක පමණ කාලය සිට නැවතත් මෙරට තුල කොවිඩ් ආසාදිතයින් වාර්තා වීම ඉහළ යමින් තිබෙන බව සෞඛ්‍ය අංශ අනතුරු අඟවා සිටියි.

හිටපු පාර්ලිමේන්තු මන්ත්‍රී රංජන රාමනායක නිදහස ලබාදීම සම්බන්ධයෙන් වන ලිපි ලේඛන සියල්ල මේ වන විට සකසා අවසන් කර ඇතැයි අමාත්‍ය හරීන් ප්‍රනාන්දු පැවසීය.

හිටපු පාර්ලිමේන්තු මන්ත්‍රී රන්ජන් රාමනායක නිදහස් කර ගැනීම සඳහා අවශ්‍ය කරන ලිපිලේඛන ගොන්නට නීතිපතිවරයාගේ තවත් එක් නිර්දේශයක් අවශ්‍යව තිබෙන බව කී හරීන් ප්‍රනාන්දු අමාත්‍යවරයා එය ලැබුනු සැනින් ජනාධිපතිවරයා රංජන් රාමනායක නිදහස් කිරීමේ ලිපියට අත්සන් කරනු ඇතැයිද පැවසීය.

රට බංකොලොත් කළ පිරිසට දඬුවම් නොදී අරගල බිමේ තරුණ තරුණියන් හිරගෙට ‍යැවීමට ආණ්ඩුවට තිබෙන සදාචාරාත්මක අයිතිය කුමක්දැයි 43 සේනාංකය නායක, පාර්ලිමේන්තු මන්ත්‍රී පාඨලී චම්පික රණවක ප්‍රශ්න කරයි.

රාජ්‍ය ආයතනවලට වෘත්තීය මට්ටමේ පිරිසක් පත් කරගෙන විශ්වාසය දිනාගන්නා මට්ටමකට ආණ්ඩුව පත් කරගන්නවා විනා පක්ෂවලින් මන්ත්‍රිවරුන් හෝ ඔවුන්ගේ හිතවතුන්, නිලධාරීන් ගැනීමෙන් රටේ ප්‍රශ්නය විසඳිය නොහැකි බව ද හෙතෙම පෙන්වා දෙයි.

ජනාධිපතිවරයාගේ ඊළඟ රාජාසන කතාවේ දී එම වැඩපිළිවෙළ, විවෘතභාවය, සහ අවංකභාවය ප්‍රකාශ නොකළහොත් රටේ ජනතාව ඔහුව ද, ධූරයෙන් ඉවත් කිරීම සඳහා අරගල කරනවාට සැකයක් නොමැති බව රණවක මන්ත්‍රීවරයා අවධාරණය කළේය.

අද (27) පාර්ලිමේන්තුව අමතමින් පාඨලී චම්පික රණවක මන්ත්‍රීවරයා සිදු කළ කතාව පහත දැක්වෙයි .

"අපිට ඇහෙනවා මේ හදිසි නීතිය මගින් පාර්ලිමේන්තු ප්‍රජාතන්ත්‍රවාදයට පිටතින් රාජ්‍ය බලය අල්ලා ගැනීමේ කුමන්ත්‍රණකාරී වැඩපිළිවෙලක්, විදේශ කුමන්ත්‍රණයක් තිබෙනවා. එය මර්දනය කිරීම සඳහා, ආරක්ෂක අංශවලට නව බලතල අවශ්‍යයි කියන ඒ අදහස. අනිත් පැත්තෙන් මේ රටේ 55 ලක්ෂයක් පවුල් පාරට ඇද වැටිලා තියෙනවා. ඒ 55 ලක්ෂයේ දුක් වේදනාව මත ඒ මිනිස්සු හිතන ආකාරයට අනුව ඒ අය අද අරගල බිමට බැහැලා තියෙනවා. අපිට අද තෝරා ගැනීම තියෙන්නේ මෙතන.

ඇයි මේ රටේ 55 ලක්ෂයක් පිරිස විශේෂයෙන්ම අපේ තරුණ පරපුර පාරට බැහැලා ජනාධිපති මන්දිරයේ, අග්‍රාමාත්‍ය මන්දිරයේ, ජනාධිපති කාර්යාලය අල්ලගන්න මේ ආකාරයට දස ලක්ෂ සංඛ්‍යාත පිරිසක් ක්‍රියාත්මක වුණේ. දරුවන්ට කිරිපිටි නැති, වැඩිහිටියන්ට බේත් නැති, ඒ වගේම අම්මාවරුන්ට පොළට ගිහිල්ලා බඩු ටික ගන්න විදිහක් නැති, ඒ වගේම තෙල් නැති, ගෑස් නැති, විදුලි බලය නැති රටක්, බංකොලොත් රටක් ඇති වෙච්ච නිසයි. මේ අවුරුද්දේ අප්‍රේල් 12 වෙනිදා අපිට ඒ බංකොලොත් රට ඇති වුණා. 2020 මාර්තු 7 වෙනිදා මහ බැංකුවට, අන්තර්ජාතික මූල්‍ය අරමුදලෙන් පණිවිඩයක් ලැබුණා ඔබේ ණය ප්‍රතිව්‍යුහගත කරගත්තේ නැත්නම් ඉතා ඉක්මනින් අමාරුවේ වැටිලා, බංකොලොත් භාවයට ලක් වෙන්න නියමිතයි කියලා. ඒක නොතකා හැරියා මූල්‍ය මණ්ඩලය, මහ බැංකු අධිපති.

අපේ රටේ තියෙනවා මොනිටරි ලෝ ඇක්ට් එක 1950 ඉඳන්. මේ රට බංකොලොත් භාවයට පත් කිරීම සඳහා වගකිවයුතු ඒ මහ බැංකු අධිපතිලාට, මූල්‍ය මණ්ඩලයට කවුරුවත් නැහැ නඩු දාන්න. 2002 දි අපි සම්මත කර ගත්තා ෆිස්කල් රෙස්පොන්සිබිලිටි මැනේජ්මන්ට් ඇක්ට් කියලා එකක්. ඒ මගින් මේ රටේ ණය පාලනය කිරීමේ වගකීම භාණ්ඩාගාරයේ ලේකම්ට, මුදල් අමාත්‍යාංශයෙ ලේකම්ට ලැබුණා. ඒ දීලා තිබුණු ඉලක්ක අනුව 2013 දී අපේ රටේ ණය බර වෙන්න ඕනේ දළ ජාතික ආදායමෙන්, නිෂ්පාදනයට සාපේක්ෂව 60% යි. අද කීයද? 120 යි. එතකොට ඒ වගකීම මුදල් අමාත්‍යාංශයේ ලේකම්ලා, මුදල් ඇමතිලා, භාණ්ඩාගාර ලේකම්ලා ඉටුකරලා තියෙනවද? අද මේ ජනතාව දුක් විඳින්න එක හේතුවක් ඒක නේද? රාජපක්ෂ පවුලට අමතරව, ඒ මහා ජාතික මංකොල්ලයට අවශ්‍ය රැකවරණය ලබාදීපු අයට මූල්‍ය පනත යටතේ හෝ මූල්‍ය කළමනාකරණ පනත යටතේ හෝ දඬුවම් දෙන්නෙ නැතිව අරගල බිමේ ඉන්න තරුණ, තරුණියෝ හිරගෙට යවන්න. මොකක්ද ආණ්ඩුවකට තියෙන සදාචාරාත්මක අයිතිය?

මම බොහොම පැහැදිලිව කියනවා, ඉදිරියේ ඉතාම බියකරු තත්වයක් තියෙන්නේ. අපි මේ බංකොලොත්භාවයේ තාමත් පසුපසින් යාමයි සිදුවෙන්නේ. පහුගිය 25 වෙනිදා ලංකා විදුලිබල මණ්ඩලයේ ඉල්ලුම ගිගා වොට් පැය 38 යි. ගිගාවොට් පැය 50ක ඉල්ලුමක් තිබුණ රටක් 38 ට වැටිලා තියෙනවා. මේ විදුලි කප්පාදුව හින්දා නෙමෙයි. 20% කින් විදුලි බල ඉල්ලුම අඩු වෙලා තියෙනවා කියන්නේ, ආර්ථිකයත්, ඒ වගේම ප්‍රමාණයකින් සංකෝචනය වෙලා තියෙනවා කියන එකයි. පළවෙනි මාස 3 ඇතුලේ 1.6 ක ආර්ථික සංකෝචනයක් තිබුනේ. දැන් ඒක 20% සීමාවට ගමන් කරමින් තිබෙනවා. සැප්තැම්බර් මාසේ වෙනකොට මේ ඉන්දියානු ණය හෝ වෙනත් පැත්තකින් මේ ණය ලැබුනේ නැත්නම් මේ රට ඉතාමත්ම භයානක අඳුරු අගාධයකට යනවා විතරක් නෙවෙයි අපි දැකපු අප්‍රේල් 9, මැයි 9, ජුනි 9, ජුලි 9 සතියෙන් සතිය එන්න පුළුවන් ඉදිරි කාලයේදී. අපි ඒක මතක තබා ගත යුතුයි.

ඒ වගේම අපි අවධාරණය කරන්න ඕනේ. මේ ප්‍රජාතන්ත්‍රවාදී රාමුවෙන් පිටත කවුරුන් හෝ බලය ස්ථාපිත කරන්න උත්සාහ කරනවා නම්, ඒක නතර කිරීමේ වගකීම ආරක්ෂක අංශවලට තිබෙනවා. නමුත් ඒ අතරේ අපේ සානුකම්පිතභාවය තියෙන්න ඕනේ. නියම වගකිවයුත්තන් එළියේ සිටියදී මේ ගැන හඬ නගන, දුක් විඳින ජනතාව මර්දනය කිරීම සඳහා මේක යොදා ගැනීම සාහසික අපරාධයක් බවයි මගේ හැඟීම.

තරුණයෙක් හැටියට මීට අවුරුදු 30කට කළින් අපිත් විශ්ව විද්‍යාලයේ හිටියා. ඒ අවස්ථාවේදී අපි දැක්කා මර්දනය කොහොමද එල්ල වුණේ කියලා. අපි පිටකොටුවට ගියහම දර පොලු වලින් අපිට ගැහුවේ. පළවෙනි දවසේ, දෙවෙනි දවසේ, තුන්වෙනි දවසේ ජයවර්ධන ජනාධිපතිතුමාගේ ආණ්ඩුවෙන්. අද මේ හුඟක් කතා කරන ගුණරත්නම් චරිතය, රංජිතම් ගුණරත්නම්, අපට කොළඹ විශ්ව විද්‍යාලයේ පිට්ටනියට එන්න කියලා කිව්වා. අපි නැවත අත්දෙක වන වනා උද්ඝෝෂණ වලට එන්නේ නැහැ කියලා. ශිෂ්‍යයෝ මහා ආවේගයෙන් අත්පුඩි ගහලා පිළිගත්තා. මොකක්ද ඉරණම? ජයවර්ධන ජනාධිපතිතුමා නම් සාමකාමීව මිය පරලොව ගියා. නමුත් 66,000 ක් මහ පාරවල්වල ආදාහනය වුණා. මහා ඛේදවාචකයකට රට ගියා. ඒ නිසා මම මතක් කරන්න ඕනේ. වෙඩි තබලා මේ ප්‍රශ්නය යටපත් කරන්න හදනවා නම් උතුරේ අත්දැකීමත් ඒකයි. දකුණේ අත්දැකීමත් ඒකයි. නැවත මේ රට ලේ විලක් කරා ගෙනියන්න ඉඩ තියන්න එපා. රංජිතම් ගුණරත්නම්ලා තව දහස් ගාණක් බිහි කරන්න ඉඩ දෙන්න එපා. අපේ ජීවිත වලින් අපි ලබාගත්ත ඒ අත්දැකීම ලක්ෂ සංඛ්‍යාත පිරිසක් මහපොළොවේ මරා දාලා, දස ලක්ෂ සංඛ්‍යාත පිරිසක් මේ රටෙන් පිටමන් කරලා, එක තරුණ පරපුරක්ම විනාශ කරපු ඒ ක්‍රියාවලිය නැවත ඇති වෙන්න දෙන්න එපා. මොකද අපිත් වගකිවයුත්තෝ. මේ රට මේ බංකොලොත්භාවයට ගේන්න.

ජනාධිපතිතුමා එන්නේ සර්ව පාක්ෂික ආණ්ඩුවකට නම්, එතුමාගේ විවෘත භාවය, එඩිතරභාවය, අවංකභාවය පෙන්නන්න ඕනේ. සර්වපාක්ෂික ආණ්ඩුවක් කියන්නේ මොකක්ද කියන එක අපි පෙන්නලා දුන්නා. ඒක තමයි ප්‍රතිපත්ති තීරණ පිළිබඳව, අනාගත ආර්ථික වැඩපිළිවෙල පිළිබඳව අවම එකඟතාවයක් මේ පාර්ලිමේන්තුවේ පක්ෂ නායකයින් ඇතිකර ගැනීම. ඒ වගේම 224 දෙනාම මේ අමාත්‍ය මණ්ඩලවලට සම්බන්ධ වෙන විධායක කාරක සභා ක්‍රමයක් ඇතිකර ගැනීම. විශේෂයෙන්ම මේ රටේ දැවෙන ප්‍රධාන ආයතන, කඩා වැටෙන්න නියමිත බැංකු පද්ධතිය, කඩා වැටෙමින් තියෙන බලශක්ති පද්ධතිය, ඒ ආයතන වලට වෘත්තීය මට්ටමේ පිරිසක් පත් කරලා, විශ්වාසය දිනා ගන්න වැඩපිළිවෙළකට ගමන් කිරීම. එහෙම නැතුව සැලුන් දොර අරිනවා වගේ, අතනින් මෙතනින්, පක්ෂ වලින් කට්ටිය ගැනීමෙන්, එහෙම නැත්නම් ඒ අයගේ හිතවතුන් ගැනීමේ, නිලධාරීන් ගැනීමෙන් මේ ප්‍රශ්නෙ විසඳන්න බෑ.

අපි බලාපොරොත්තු වෙනවා එතුමාගේ ඊළඟ රාජාසන කතාවේදී මේ වැඩපිළිවෙළ, විවෘතභාවය, අවංකභාවය ඔහු ප්‍රකාශ කරයි කියලා. එහෙම නොවුණොත් මේ රටේ ජනතාව එතුමාවත් මේ ධූරයෙන් ඉවත් කිරීම සඳහා අරගල කරනවාට සැකයක් නෑ. අපි ඉන්නේ ඉතිහාසයේ, අතිශය තීරණාත්මක තැනක මතක තබා ගත යුතුයි.

ග්‍රීසිය බංකොලොත් වෙලා අවුරුදු 12 ක්, ආජන්ටිනාව බංකොලොත් වෙලා අවුරුදු 10 ක් විටින් විට නැවත නැවතත් බංකොලොත් වෙමින්, අතිශය අන්තවාදී ආණ්ඩු පිහිටවමින්, ප්‍රජාතන්ත්‍රවාදී සීමා වලින් ඔබ්බට ගමන් කරමින් තිබෙනවා. අපි වගකීමෙන් මේ මොහොතේ කටයුතු නොකලොත් අපි අවංක නොවුනොත්, එඩිතර නොවුනොත්, දූරදර්ශීභාවයකින් තොරව, එකමුතුභාවයකින් තොරව කටයුතු කලොත් මේ රට නැවතත් ලේ ගංගාවකට ගමන් කරනවා. ඒ නිසා මම නම් විරුද්ධයි මේ හදිසි නීතියට එයට එරෙහිව මම ඡන්දය පාවිච්චි කරනවා. මොකද මගේ දරු පරපුර ලේ සාගරයක ගිල්ලවන්න කිසිම ආකාරයකින් මේ රටේ මූල්‍ය වංචා කරමින්, මේ රට කොල්ලකාපු පරපුරුවලට නොහැකි නිසා."

නාමල් උයන රක්ෂිතයේ සහ කලාවැව රක්ෂිතයේ වසර 50 කට අධික කාලයක් සැරිසැරූ "බරණ" නම් ඇත් රජුගේ මරණය සම්බන්ධයෙන් විධිමත් පරීක්ෂණයක් පවත්වන්නැයි නාමල් උයන බාරකාර වනවාසී රාහුල හිමියෝ පැවසූහ.

නාමල් උයන රක්ෂිතය ඉදිරිපිට වන ලැහැබ්ක වැටී මියගොස් සිටි බරණ නමැති ඇතාගේ මළ සිරුර ප්‍රදේශ්වාසීන් සොයාගෙන ගල්කිරියාගම වනජීවී නිලධාරීන්ට දැනුවත් කොට තිබිණි.

බරණ නැමති මෙම ඇතාගේ සොඬයේ පිලිස්සුණු තුවාල කිහිපයක් දක්නට තිබෙන බවත් කිසියම් පිරිසක් මෙම ඇතා ගේ ජීවිතය විනාශ කළ බව ප්‍රදේශවාසීහු සැක පළකරති .

වනජීවී නිලධාරීන් ඇතාගෙ පශ්චාත් මරණ පරීක්ෂණය අද වන දින පැවැත්වීමට නියමිතව තිබුණි.

එම ස්ථානයට වැඩම කළ නාමල් උයන බාරකාර වනවාසී රාහුල හිමියන් දැඩඩිව කියා සිටියේ මෙම ඇතාගෙන් කිසිදු අයකුට කිසිදු කරදරයක් නොවූ බවයි ,මෙම ඇතා සමග තවත් ඇතුන් දෙදෙනකු නිරන්තරයෙන් මෙම ප්‍රදේශයේ ගැවසුණු බවත් පෙන්වා දෙන උන්වහන්සේ වසර ගණනාවක සිට අලි මිනිස් ගැටුම සඳහා රාජ්‍ය නිලධාරී කටයුතු නොකිරීම බරපතළ ප්‍රශ්නයක් බවය.

lankadeepa

හදිසි නීතිය යෝජනාව අද (27) පාර්ලිමේන්තුවේදී සම්මත විය .

ඒ පිළිබඳව පැවති ඡන්ද විමසීමේදී ඊට පක්ෂව ඡන්ද 120ක් සහ විපක්ෂව ඡන්ද 63ක් ලැබිණ .

ඒ අනුව මහජන ආරක්ෂක ආඥාපනත යටතේ ජනාධිපතිවරයා විසින් ප්‍රකාශයට පත් කරන ලද හදිසි තත්ත්වය පිළිබඳ ප්‍රකාශය වැඩි ඡන්ද 57 කින් සම්මත විය.

ඇමරිකා එක්සත් ජනපද තානාපතිනි ජූලි චංග් ජනාධිපති රනිල් වික්‍රමසිංහ හමුවී තිබේ.

හමුව අද (27) පෙරවරුවේ ජනාධිපති කාර්යාලයේ දී සිදුව ඇත .

ජනාධිපතිවරයා වෙත සිය සුබපැතුම් පිරිනැමු තානාපතිනිය සමග සුහද කථා බහක නිරතව ඇති බව වාර්තා වෙයි .

ශ්‍රී ලංකාව සහ එක්සත් ජනපදය අතර පවතින සබඳතා ශක්තිමත් ප්‍රවේශයක් ඔස්සේ ඉදිරියට ගෙන යාම පිළිබඳ මෙහිදී සාකච්ඡා කළ බවත් වාර්තා වෙයි .

නව රජයේ ඉදිරි කටයුතු වෙනුවෙන් සහාය ලබා දෙන බවට ද තානාපතිනිය සහතික වූ බවත් වාර්තා වෙයි .

වත්මන් ආර්ථික අර්බුදයට වගකිවයුතු පුද්ගලයින්ට එරෙහිව විමර්ශනයක් සිදුකරන ලෙස රජය වෙත නියෝගයක් නිකුත් කරන්නැයි ඉල්ලා ගොනු කර ඇති පෙත්සම් වල වගඋත්තරකරුවන් වශයෙන් නම් කර සිටින හිටපු මුදල් අමාත්‍යවරුන් වන මහින්ද රාජපක්ෂ සහ බැසිල් රාජපක්ෂ ට එරෙහිව පනවා තිබෙන විදේශ ගමන් තහනම අගෝස්තු මස 02 වනදා දක්වා දීර්ඝ කරන ලෙස ශ්‍රේෂ්ඨාධිකරණය නියම කර ඇත .

ශ්‍රී ලංකා වාණිජ මණ්ඩලයේ හිටපු සභාපති චන්ද්‍රා ජයරත්න ඇතුළු පිරිසක් විසින් ඉදිරිපත් කළ පෙත්සමක් අද (27) යලි සලකා බැලීමෙන් අනතුරුව මෙම නියෝගය කර ඇත .

එමෙන්ම හිටපු ජනාධිපති ගෝඨාභය රාජපක්ෂ අදාළ පෙත්සමේ වගඋත්තරකරුවකු වශයෙන් පෞද්ගලික මට්ටමින් නම් කිරීමට අවසර දුන් ශ්‍රේෂ්ඨාධිකරණ විනිසුරු මඩුල්ල අගෝස්තු මස 01 වනදා මෙම පෙත්සම් සම්බන්ධයෙන් කරුණු දක්වන ලෙස දන්වා ගෝඨාභය රාජපක්ෂ මහතා වෙත නොතීසි යවන ලෙසත් පෙත්සම්කාර පාර්ශවයට නියෝග කර තිබේ.

එම නොතීසි හිටපු ජනාධිපති ගෝඨාභය රාජපක්ෂ අවසන් වශයෙන් පදිංචිව සිටි ලිපිනය වෙත යොමු කරන ලෙසයි අධිකරණය වැඩි දුරටත් නියෝග කර ඇති බවත් වාර්තා වෙයි.

ඊට අමතරව අදාල පෙත්සමේ වගඋත්තරකරුවන් ලෙස නම් කර සිටින හිටපු මහ බැංකු අධිපතිවරුන් වන අජිත් නිවාඩ් කබ්රාල්, ආචාර්ය ඩබ්ලිව්. ඩී. ලක්ෂ්මන් සහ මුදල් අමාත්‍යාංශයේ හිටපු ලේකම් එස්. ආර්. ආටිගල අධිකරණයේ අවසරයකින් තොරව විදේශගතව නොවන බවට ලබාදී තිබෙන ප්‍රතිඥාව අගෝස්තු මස 02 වනදා දක්වා දීර්ඝ කරන ලෙසත් ශ්‍රේෂ්ඨාධිකරණය විසින් නියම කර ඇත .

අගවිනිසුරු ජයන්ත ජයසූරිය, බුවනෙක අලුවිහාරේ, ප්‍රියන්ත ජයවර්ධන, එල්.ටී.බී.දෙහිදෙනිය සහ මුර්දු ප්‍රනාන්දු යන පංච පුද්ගල ශ්‍රේෂ්ඨාධිකරණ විනිසුරු මඩුල්ල ඉදිරියේ මෙම පෙත්සම කැදවනු සලකා බැලිණ.

මෙම පෙත්සම ගොනු කළ අවස්ථාවේ දී එවක ජනාධිපති ගෝඨාභය රාජපක්ෂ ද එහි වග උත්තරකරුවකු ලෙස නම් කර තිබිණ .

එහෙත් ගෝඨාභය රාජපක්ෂ මේ වනවිට තනතුරින් ඉවත් වී සිටින බැවින් ඔහු මෙම පෙත්සමේ පුද්ගලිකව වග උත්තරකරුවකු ලෙස නම් කිරීමට අවසර දෙන ලෙස පෙත්සම්කාර පාර්ශ්වය වෙනුවෙන් පෙනී සිටි ජනාධිපති නීතිඥ චන්දක ජයසුන්දර අධිකරණයෙන් ඉල්ලා සිටියේය .

තවත් පෙත්සමක් ඉදිරිපත් කර තිබු ආචාර්ය මහීම් මෙන්ඩිස් ඇතුළු කථිකාචාර්යවරු තිදෙනෙකු වෙනුවෙන් පෙනී සිටි ජනාධිපති නීතිඥ උපුල් ජයසූරිය ද එම ඉල්ලීම අධිකරණයට ඉදිරිපත් කර ඇත .

එම ඉල්ලීම පිළිගත් විනිසුරු මඩුල්ල ගෝඨාභය රාජපක්ෂ මෙම පෙත්සම් වල වග උත්තරකරුවකු ලෙස නම් කිරීමට අවසර ලබාදී ඇති බවත් වාර්තා වෙයි .

එමෙන්ම අගෝස්තු මස 01 වනදා මෙම පෙත්සම් සම්බන්ධයෙන් කරුණු දක්වන්නැයි දන්වා ගෝඨාභය රාජපක්ෂ වෙත නොතීසි යවන ලෙසත් විනිසුරු මඩුල්ල විසින් පෙත්සම්කාර පාර්ශවය ට නියෝග කර ඇත .

ගෝඨාභය රාජපක්ෂ මේ වනවිට විදේශ ගතව සිටින බවට වාර්තා පලවී ඇති හෙයින් ඔහුට අදාළ නොතීසි භාරදීම සඳහා ඔහුගේ ලිපිනය සොයා ගැනීමට නොහැකි වී ඇති බවත් ජනාධිපති නීතිඥ චන්දක ජයසුන්දර අධිකරණය හමුවේ කරුණු දක්වා ඇති බවත් වාර්තා වෙයි .

මෙම පෙත්සම ගොනු කළ අවස්ථාවේ දී ගෝඨාභය රාජපක්ෂ ජනාධිපති ලෙස කටයුතු කළ බැවින් එම අවස්ථාවේදී ඔහුට එරෙහිව විදේශ ගමන් තහනමක් ඉල්ලා නොසිටි බව සඳහන් කළ ජනාධිපති නීතිඥවරයා එහෙත් ඔහු මේ වනවිට ධුරයෙන් ඉවත්ව සිටින හෙයින් සුදුසු අවස්ථාවක එම විදේශ ගමන් තහනම ඉල්ලා සිටීමේ අයිතිය රදවා ගන්නා බවත් ප්‍රකාශ කර ඇත .

ඊට අමතරව පෙත්සම්කරුවන් වෙනුවෙන් පෙනී සිටි ජනාධිපති නීතිඥ වරු අධිකරණයට දන්වා සිටියේ අදාළ පෙත්සම් වල වගඋත්තරකරුවෙකු වශයෙන් නම් කර සිටින රනිල් වික්‍රමසිංහට නඩු කටයුත්තක් පවත්වාගෙන යාමේ අවශ්‍යතාවක් නොමැති හෙයින් ඔහු මෙම නඩුකරයෙන් මුදාහරිණ ලෙස ඉල්ලා සිටි අතර එම ඉල්ලීම පිළිගත් ශ්‍රේෂ්ඨාධිකරණය රනිල් වික්‍රමසිංහ මෙම පෙත්සම් වලින් නිදහස් කිරීමට නියෝග කළ බවත් වාර්තා වෙයි .

අනතුරුව අදාළ පෙත්සම් සලකා බැලීම සඳහා අගෝස්තු මස 01 වනදා කැඳවන ලෙසත් ශ්‍රේෂ්ඨාධිකරණය විසින් නියම කර සිටියා.

පෙත්සම්කරුවන් කියා සිටින්නේ වගඋත්තර කරුවන් විසින් අනුගමනය කළ අදුරදර්ශී සහ අකාර්යක්ෂම ආර්ථික ප්‍රතිපත්ති හා පරිපාලනය හේතුවෙන් වත්මන් ආර්ථික අර්බුදය නිර්මාණය වූ බවයි. මේ හේතුවෙන් මහජනතාව දැඩි පීඩාවට පත්ව සිටින බවත් ඉන්ධන, විදුලිය, ආහාර, ඖෂධ ඇතුළු අත්‍යවශ්‍ය සේවා අඛන්ඩව සපයා ගැනීමට නොහැකි තත්ත්වයක් උද්ගතව තිබෙන බවත් පෙත්සමෙන් චෝදනා එල්ල කර තිබේ.

වග උත්තරකරුවන්ගේ මෙම ක්‍රියාකලාපය තුලින් මූලික අයිතිවාසිකම් උල්ලංගනය වී ඇති බවට තීන්දුවක් ලබාදෙන ලෙසත් මෙම අර්බුදයට වගකිව යුතු පුද්ගලයින්ට එරෙහිව විමර්ශනයක් සිදු කරන ලෙස රජය වෙත නියෝගයක් නිකුත් කරන ලෙසත් පෙත්සමෙන් වැඩිදුරටත් ඉල්ලා ඇත .

ශානි ප්‍රනාන්දු

අන්තර් විශ්වවිද්‍යාල ශිෂ්‍යසංගමයේ ක්‍රියාකාරික, රුහුණු මහා ශිෂ්‍ය සංගමයේ හිටපු සභාපති ඇන්තනි වෙරංග පුෂ්පික පැහැර ගැනීමට ලක්ව ඇති බව වාර්තා වේ.

කොටුවේ පැවති උද්ඝෝෂණයට සහභාගී වී ආපසු යෑම සදහා බස් රථයකට ගොඩ වී සිටිය දී මෙසේ පැහැර ගැනීම සිදුව ඇති බවයි වාර්තා වේ.

වෙරංග පුෂ්පික අනිද්දා පුවත්පතේ කතෘ මණ්ඩල සාමාජිකයෙකු ලෙසත් සේවය කර ඇත.

දිනේෂ් ගුණවර්ධන ශ්‍රී ලංකාවේ අග්‍රාමාත්‍ය ධුරයට පත්වීම පිළිබඳව චීන අග්‍රාමාත්‍ය ලී ක චිය්‍යන් සුබ පැතුම් පිරිනමයි.

හෙතෙම ඊයේ (26) එම සුබපැතුම් පණිවුඩය යොමු කර තිබේ. චීනය හා ශ්‍රී ලංකාව අතර ඇත්තේ ගැඹුරු සාම්ප්‍රදායික මිත්‍රත්වයකි. දෙරට මිත්‍ර අසල්වැසි රටවල් වන අතර උපාය මාර්ගික සහයෝගිතා හවුල්කරුවන් ද වන බව ලී ක චිය්‍යන් මහතා සිය සුබ පැතුම් පණිවුඩයේ සඳහන් කරයි. දෙරට අතර රාජ්‍යතාන්ත්‍රික සබඳතාව ස්ථාපිත කර ගතවූ 65 වසර තුළ දෙපාර්ශ්වය සැම විටම අන්‍යෝන්‍ය ලෙස ගරු කරමින් සාධාරණව සලකා දේශපාලන විශ්වාසය අඛණ්ඩව තහවුරු කර තිබේ.

අන්‍යෝන්‍ය ජයග්‍රහණ මත සහයෝගිතා පවත්වා අසීරුතාවන් හා අභියෝගයන්ට එක්ව මුහුණ දෙමින් දෙරටේ සබඳතාව විධිමත් හා ස්ථිරව වර්ධනය වී ඇති බව ද ලී ක චිය්‍යන් මහතා කියා සිටී. චීන -ශ්‍රී ලංකා මිත්‍ර සහයෝගිතාවට ස්ථිර ලෙස අනුබල දෙන චීනය, ශ්‍රී ලංකා ජනතාව වත්මන් මුහුණ දෙන තාවකාලීක අසීරුතාවන් පූර්ණව අවබෝධ කර ගනිමින් ශ්‍රී ලංකා ජනතාවට උපරීම සහාය හා අනුබල ලබා දීමට කැමැත්තෙන් සිටී.

දිනේෂ් ගුණවර්ධන අග්‍රාමාත්‍යවරයා සමඟ සංවර්ධනය වෙමින් පවතින රටවල් අතර ඒ ඒ ක්ෂේත්‍ර වල පවතින ප්‍රායෝගික සහයෝගිතා තහවුරු කර දෙරටට හා ජනතාවට ප්‍රතිලාභ ගෙන දීමට කැමැත්තෙන් සිටින බව ද හෙතෙම පැවසීය.

දිනූෂි ධීරසිංහ

මිට ඉහත දී දකුණේ කැරලි මර්ධනය කළ ආකාරයටම වත්මන් අරගලයද මර්ධනය කළ යුතු බව පොහොට්ටු පක්ෂයේ පුත්තලම් දිස්ත්‍රීක් පාර්ලිමේන්තු මන්ත්‍රී සනත් නිශාන්ත අවධරණය කර සිටියි.

 හිටපු ජනාධිපති ගෝඨාභය රාජපක්ෂට ජනාධිපති ධුරය අතහැර, රට ද හැරදමා යාමට සිදු වූයේ, නිසි ලෙස අරගලයට මුහුණ නොදීමේ ප්‍රතිපලයක් ලෙස බව ඔහු පවසයි.

''බංකොලොත් වෙච්ච පෙරටුගාමී පක්ෂය, 3% කඩා වැටිච්ච ජනතා විමුක්ති පෙරමුණ මේ කණ්ඩායම ගෑස් පෝලිමේ ඉන්න ඉන්ධන පෝලිමේ ඉන්න ජනතාව ඒකරාශි කරගෙන පටන් ගත්ත අරගලය මේ කැරැල්ලට හරියටම ගෝඨාභය රාජපක්ෂ මහත්මයා මුහුණ නොදුන්න එකේ ප්‍රතිපලයක් විදිහට එතුමාට සිද්ද වුණා ජනාධිපතිධුරය දාලා රට අතෑරලා යන්න''

මන්ත්‍රීවරයා මේ බව පැවසුවේ, ශ්‍රී ලංකා පොදුජන පෙරමුණේ පක්ෂ මූලස්ථානයේ අද පැවති මාධ්‍ය හමුවට එක්වෙමිනි.

 ඔහු වැඩි කියා සිටියේ, ගෝඨාභය රාජපක්ෂ හිටපු ජනාධිපතිවරයා මෙම ප්‍රශ්නයට නිසි ලෙස මුහුණ නොදුන්නා යන්න, සිය පෞද්ගලික මතය බවත් 71, 88 සහ 89 මෙන් අරගලය මර්දනය කළ යුතුව තිබූ බවත් ය.

මන්ත්‍රීවරයා තවදුරටත් මෙසේද පැවසිය.

''ගෝඨාභය රාජපක්ෂ අතිගරු ජනාධිපතිතුමා මේ ප්‍රශ්නයට හරියට මුහුණ දුන්නේ නෑ කියන එකයි පෞද්ගලික මගේ මතය. මේක ශ්‍රී ලංකා පොදුජන පෙරමුණේ මතය නෙවෙයි මේක සනත් නිශාන්තගේ මතය. සිරිමාවෝ ආර්. ඩී. බණ්ඩාරනායක මැතිනිය 71 කැරැල්ලට මුහුණ දුන්නා නම්, 1988 1989 ජේ. ආර්. ජයවර්ධන මහත්මයාට ප්‍රේමදාස මහත්මයාට ඒ කැරැල්ලට මුහුණ දෙන්න පුළුවන් උනා නම් එදා ත්‍රස්තවාදීන්ව මර්ධනය කරගත්තානං අද මේ ත්‍රස්තවාදීන්ට බුදු ගුණ ගයලා හරියන්නෑ''

 ''නවගුණවැල කරේ දාගෙන හරියන් නෑ. මේ අයට සලකන්න ඕනේ විදිහක් තියෙනවා ඒ සලකන්න ඕන විදිහට සලකපු නැති එකේ ප්‍රතිපලයක් හැටියට මම හිතන්නේ''

 ඔහු ගෝඨාගෝගම අරගල භූමිය සම්බන්ධයෙන් මෙලෙස අදහස් පළ කළේය.

''අපරාධ පරීක්ෂණ දෙපාර්තමේන්තුවට අපි ගිය වෙලාව අපරාධ පරීක්ෂණ දෙපාර්තමේන්තුවේ මගෙත් එක්ක කිව්වා සමහර වෙනම කුටි තියෙනවා ගංජා ගහනකුටි, සමහර කුටි තියනවා අයිස් ගහන කුටි, සමහර කුටි තියෙනවා හෙරොයි ගහන කුටි. ඔබතමුන්නාන්සේලා දකින්න ඇතිනේ සමාජ ජාලාවල ගියා. පොලිසිය යන්න පොලිසිය යන්න මේක අපේ ගම. දැන් ඒ ගමේ නීතියක් නැද්ද? මේ රටේ ග්‍රාම සේවා වසම් දාහතරදාහස් විසිදෙකක් ලියාපදිංචි අංකයක් තියන තියන ග්‍රාම නිලධාරි වසමේ තියන නීතිය ගෝඨා ගම කියන ගමට නැද්ද?''

(News 1st)

ඉන්දීය ජනතාව විසින් මෙරට ජනතාවට පරිත්‍යාග කරන ලද මානුෂීය ආධාර තොගයේ අවසන් කොටස අද කොළඹ වරායට ළඟා විය.

එම ආධාර අතරට සහල් මෙට්‍රික් ටොන් 16,595 ක්, කිරිපිටි මෙට්‍රික් ටොන් 200 ක් සහ ඖෂධ ඇතුළු අනෙකුත් වෛද්‍ය උපකරණ මෙට්‍රික් ටොන් 38 ක් ඇතුළත් ය.

මෙරට ඉන්දීය මහකොමසාරිස් ගෝපාල් බග්ලේ, සෞඛ්‍ය සහ ජල සම්පාදන අමාත්‍ය කෙහෙළිය රඹුක්වැල්ල, වෙළඳ වාණිජ හා ආහාර සුරක්ෂිතතා අමාත්‍යාංශ ලේකම් එස්.ටී. කොඩිකාර ඇතුළු පිරිසක් එම පරිත්‍යාගය පිළිගෙන තිබේ.

ඉන්දියාවෙන් මෙරටට ඇමරිකානු ඩොලර් මිලියන 22 ක වටිනාකමින් යුත් සහල් මෙට්‍රික් ටොන් 40,000 ක් කිරිපිටි මෙට්‍රික් ටොන් 500 ක් සහ ඖෂධ ඇතුළු අනෙකුත් වෛද්‍ය උපකරණ මෙට්‍රික් ටොන් 102 ක් අදියර තුනක් යටතේ මෙරටට ලැබී ඇතැයි, වෙළඳ වාණිජ හා ආහාර සුරක්ෂිතා අමාත්‍යාංශය නිකුත් කළ නිවේදනයේ සඳහන් ය.

යම් අමාත්‍යවරයෙකුට නිශ්චිතව පැවරීමක් සිදු කර නොමැති සියලු විෂයන්, කාර්යයන් , දෙපාර්තමේන්තු , රාජ්‍ය සංස්ථා හා ව්‍යස්ථාපිත ආයතන සියල්ලක්ම ජනාධිපති රනිල් වික්‍රමසිංහ යටතට ගෙන ඇත .

ජනාධිපති රනිල් වික්‍රමසිංහ විසින් අමාත්‍යාංශ විෂය පථ වෙන් කරමින් අතිවිශේෂ ගැසට් නිවේදනයක් නිකුත් කරනු ලැබ තිබේ.

එහිදී ආවරණය නොවන විෂයන්, කාර්යයන් , දෙපාර්තමේන්තු , රාජ්‍ය සංස්ථා හා ව්‍යස්ථාපිත ආයතන සියල්ලක්ම ජනාධිපති යටතට පත්වන අතර අදාළ ගැසට් නිවේදනය නිකුත් කර ඇත්තේ, පසුගිය 22 වැනිදා සිට බලාත්මක වන පරිදිය.