පුවත්

ලිට්‍රෝ ගෘහස්ථ ගෑස් කිලෝග්‍රෑම් 12.5 ක සිලින්ඩරයක මිල රුපියල් 271 කින් අඩු කළ බව ලිට්‍රෝ ගෑස් සමාගමේ සභාපති මුදිත පීරිස් අද (5) පැවසීය.

නව මිල සංශෝධනය සමග රුපියල් 4,551 ක් පැවති කිලෝග්‍රෑම් 12.5 ක ගෑස් සිලින්ඩරයක මිල රුපියල් 4280 ක් දක්වා පහත දමා තිබේ.

මෙම මිල පහත දැමීමත් සමග කිලෝග්‍රෑම් 5 ක සිලින්ඩරයක මිල රුපියල් 107 කින් ද, කිලෝග්‍රෑම් 2.3 ක සිලින්ඩරයක මිල රුපියල් 48 කින් ද, අඩු කළ බවත් නව මිල අද (5) මධ්‍යම රාත්‍රියේ සිට ක්‍රියාත්මක වන බවත් සභාපතිවරයා පවසයි.

ඒ අනුව රුපියල් 1,827 ක්ව පැවැති කිලෝග්‍රෑම් 5 ක සිලින්ඩරයක මිල රුපියල් 1720 ක් දක්වා ද, රුපියල් 848 ක්ව පැවැති කිලෝග්‍රෑම් 2.3 ක සිලින්ඩරයක මිල රුපියල් 800 ක් දක්වා ද, මිල පහත දමා තිබේ.

රජයේ ගිණුම් පිළිබඳ කාරක සභාවේ ( කෝපා කමිටුවේ) සභාපතිධූරය සඳහා සමගි ජන බලවේගයේ පාර්ලිමේන්තු මන්ත්‍රී කබීර් හෂීම් නම්කර ඇත.

අමාත්‍ය ප්‍රසන්න රණතුංග විසින් අද(05) පාර්ලිමේන්තුවේදී මේ බව පැවසීය.

ඒ සඳහා ජනාධිපති රනිල් වික්‍රමසිංහ ගේ එකඟත්වය පළ වූ බව ද ප්‍රසන්න රණතුංග අමාත්‍යවරයා එහිදී පැවසීය.

රජයේ ගිණුම් පිළිබඳ කාරක සභාව හෙවත් කෝපා කමිටුව අද (05) පළමු වරට රැස්වීමට නියමිත අතර එහි මීට පෙර සභාපති ධුරය දැරුවේ අනුර ප්‍රියදර්ශන යාපා මන්ත්‍රීවරයාය.

පාසල් දිවා ආහාර වැඩසටහන තවදුරටත් ව්‍යාප්ත කරමින් තවත් සිසුන් ලක්ෂ 10කට පමණ සම්පූර්ණ පෝෂ්‍යදායී දිවා ආහාර වේලක් දීම වෙනුවෙන් අතිරේකව රුපියල් කෝටි 400ක මුදලක් වෙන් කිරීමට රජය තීරණය කර ඇත.

"කිසිදු පුරවැසියකු ආහාර නැතිකම නිසා කුසගින්නේ නොතැබිය යුතුය" යන මූලික අරමුණ සාක්ෂාත් කර ගැනීම වෙනුවෙන් වැඩසටහනක් ලෙස ජනාධිපති රනිල් වික්‍රමසිංහ ඉදිරිපත් කළ කැබිනට් යෝජනාව සඳහා මෙසේ අමාත්‍ය මණ්ඩලයේ අනුමැතිය හිමිව තිබේ.

පාසල් දිවා ආහාර වැඩසටහන මේ වන විට රට පුරා පාසල් 7,926ක ක්‍රියාත්මක කෙරෙන අතර සිසුහු දසලක්ෂ අසූදහසක් (මිලියන 1.08ක්) ඉන් ප්‍රතිලාභ හිමි කර ගනිති.

කැබිනට් මාධ්‍ය ප්‍රකාශක අමාත්‍ය බන්දුල ගුණවර්ධන ඊයේ (04) රජයේ ප්‍රවෘත්ති දෙපාර්තමේන්තුවේදී පැවති මාධ්‍ය හමුවේදී මේ බව සඳහන් කල අතර මෙයින් ප්‍රතිලාභ ලබන සමස්ත සිසුන් සංඛ්‍යාව විසි ලක්ෂ අසූදහසක් (මිලියන 2.08) බවත් පැවසීය.

දැනට ක්‍රියාත්මක වැඩසටහන සඳහා රුපියල් කෝටි 400ක් වැය කරන අතර මේ සිසුන් ලක්ෂ 10 සඳහාත් වැඩසටහන ව්‍යාපත් කිරීමට අතිරේකව තවත් රුපියල් කෝටි 400ක් මේ අනුව වෙන් කෙරෙනු ඇත. ඒ අනුව සමස්ත වැඩසටහන සඳහා රුපියල් කෝටි 800ක මුදලක් වැය වෙයි.

මෙමඟින් සමස්ත සිසුන්ගෙන් සියයට 51ක පමණ පිරිසකගේ ආහාර සුරක්ෂිතතාව ඇති වන බව පෙන්වා දුන් ඇමැතිවරයා විශේෂයෙන්ම ග්‍රාමීය පාසල් දරුවන්ගේ පෝෂණ මට්ටම රැක ගැනීමට මේ තුළින් හැකියාව ලැබෙන බව ද මේ වෙනුවෙන් යුනිසෙෆ්, ලෝක බැංකුව, චීන රජය සහ තවත් පෞද්ගලික සංවිධානවල ආධාර ලැබී තිබෙන බව ද සඳහන් කළේය.

මේ අතර ආහාර සුරක්ෂිතතාව හා පෝෂණය සහතික කිරීම වෙනුවෙන් "ආහාර ප්‍රතිපත්ති කමිටුව" පිහිටුවීමට රජය තීරණය කර තිබෙන අතර ඒ වෙනුවෙන් අමාත්‍ය මණ්ඩලයේ අනුමැතිය හිමිව තිබෙන බව ද ඇමැතිවරයා පැවසීය.

සිපෙට්කෝ’ පිරවුම්හල්වලින් පරිහණය ගාස්තු ලෙස අය කළ බද්ද නැවත බැර කිරීම නිසා ඉන්ධන තොග ඇනවුම් කිරීම නැවත ආරම්භ කළ බව ඛනිජ තෙල් බෙදුම්කරුවන්ගේ සංගමයේ සම ලේකම් කපිල නාඔටුන්න අද (4) පැවසීය.

ඉන්ධන පිරවුම්හල් තොග ඇනවුම් සඳහා ඊයේ (3) බැර කළ මුදල්වලින් බද්දක් සඳහා මුදල් කපාගැනීම නිසා ඊයේ දිනය සඳහා කර තිබූ ඇනවුම් අවලංගු කළ බවත් කපාගත් මුදල් අද පස්වරුව වන විට පිරවුම්හල්වල ගිණුම්වලට නැවත බැර කර තිබූ බවත් ඔහු පැවසීය .

ඉන්ධන තොග හෙට දිනයේ ලැබෙන පරිදි බෙදාහැරීමට සූදානමින් සිටින බව ද ඔහු වැඩි දුරටත් සඳහන් කළේය.

හිටපු අමාත්‍ය පාර්ලිමේන්තු මන්ත්‍රී පාඨලී චම්පික රණවකගේ දුරකථන දත්ත හා සංවාද වලට නෛතික බලයකින් තොරව අපරාධ පරීක්ෂණ දෙපාර්තමේන්තුව විසින් සවන්දීමට අදාලව අද (04) පාර්ලිමේන්තුවේදී තීරණයක් ගෙන තිබේ.

43 සේනාංකය සඳහන් කරන ලෙස 2021.09.24 වන දින අපරාධ පරීක්ෂණ දෙපාර්තමේන්තුව විසින් නාගරික සංවර්ධන, වෙරළ සංරක්ෂණ, අපද්‍රව්‍ය බැහැර කිරීමේ හා පවිත්‍රතා කටයුතු අමාත්‍යංශය තුළ සිදුවුයේ යයි කියන මුදල් අවභාවිතාවක් පිළිබඳව සිදුකෙරෙන පරීක්ෂණයකට අදාලව මෙසේ දුරකථන දත්ත හා සංවාද වලට නෛතික බලයකින් තොරව අපරාධ පරීක්ෂණ දෙපාර්තමේන්තුව විසින් සවන්දී ඇත.

ඒ අනුව එළඹෙන 18 වනදා අදාල අපරාධ පරීක්ෂණ දෙපාර්තමේන්තුවේ නිලදාරීන් හා දුරකථන ජාල සැපයුම්කරුවන්, වරප්‍රසාද කමිටුව ඉදිරියට කැඳවීමට මෙහිදී පාර්ලිමේන්තුව තීරණය කර ඇති බව වාර්තා වේ.

පාර්ලිමේන්තුව මෙම තීරණය ගනු ලැබුවේ 2021.09.24 වන දින තමන් අපරාධ පරීක්ෂණ දෙපාර්තමේන්තුවට කැඳවා තමන්ගේ දුරකථන සංවාදයන් නිසි අවසරයකින් තොරව සවන්දීම මගින් තම පාර්ලිමේන්තු වරප්‍රසාද කඩකර ඇති බවට පාඨලී චම්පික රණවක මන්ත්‍රීවරයා විසින් කතානායකවරයා වෙත යොමුකරන ලද ලිපියකට අදාලවය.

එළඹෙන 2023 වසර සඳහා වන විසර්ජන පනත් කෙටුම්පත පාර්ලිමේන්තුව වෙත ඉදිරිපත් කිරීමට මුදල්, ආර්ථික ස්ථායීකරණ සහ ජාතික ප්‍රතිපත්ති අමාත්‍ය වශයෙන් ජනාධිපතිවරයා ඉදිරිපත් කළ යෝජනාවට අමාත්‍ය මණ්ඩල අනුමැතිය හිමි වී තිබේ.

ඒ අනුව රජයේ ගැසට් පත්‍රයේ පළ කර ඉන් අනතුරුව විසර්ජන පනත් කෙටුම්පත පාර්ලිමේන්තුව වෙත ඉදිරිපත් කරනු ඇත.

මෙම විසර්ජන පනත් කෙටුම්පත කෙටුම්පත් කිරීමට අගෝස්තු 22 දින අමාත්‍ය මණ්ඩල රැස්වීමේදී අනුමැතිය ලබා දී ඇති අතර
එහිදී එක් එක් වැය ශීර්ෂය සඳහා වන කෙටුම්පත් අයවැය ඇස්තමේන්තු ඇතුළත්ව සකස් කළ 2023 වර්ෂය සඳහා වන විසර්ජන පනත් කෙටුම්පත අමාත්‍ය මණ්ඩලය සලකා බලා තිබේ.

ඊට අනුව 2023 වර්ෂය සඳහා වන මුළු පුනරාවර්තන වියදම රුපියල් බිලියන 4,634 වශයෙන් සහ මුළු මූලධන වියදම රුපියල් බිලියන 3,245ක් වශයෙන් ඇස්තමේන්තුගත කර ඇත.

උග්‍ර විදේශ විනමය අර්බුදයකට මුහුණ දෙන ශ්‍රී ලංකාව ආරක්ෂිත ක්‍රමවේද යටතේ ඖෂධ සඳහා අවශ්‍ය කරන කංසා අපනයන කිරීම වැදගත් යැයි තමන් සිතන බව කැබිනට් ප්‍රකාශක බන්දුල ගුණවර්ධන පවසයි.

කංසා අපනයන කිරීම සම්බන්ධයෙන් අද ( 4) පැවති කැබිනට් තීරණ දැනුම් දීමේ මාධ්‍ය හමුවේදී මාධ්‍යවේදියෙකු නැගූ ප්‍රශ්නයකට පිළිතුරු දෙමින් ගුණවර්ධන මේ බව ප්‍රකාශ කළේ ය.

අමාත්‍යවරයා ප්‍රකාශ කළේ, අධිකරණය විසින් රාජ්‍ය සන්තක කරන ලද කංසා, ඖෂධ සංස්ථාවට ලබා දෙන බවත් ඇතැම් දේශීය ඖෂධ කංසා සහිතව නිෂ්පාදනය කරන බව ත් ය.

“විෂය භාර අමාත්‍යතුමත් ඒ පිළිබඳව නීතිපතිතුමාට කරුණු දක්වලා තියෙනවා අපනයනය සඳහා පමණක් මත්ද්‍රව්‍යක් ලෙස කිසිසේත් ම නොවන ආකාරයට ආරක්ෂිත වැඩපිළිවෙළක් යටතේ නිපදවනවා නම් හොඳයි.”

ඔහු වැඩිදුරට ත් පැවසුවේ, තමන් මේ පිළිබඳව මීට පෙර කතා කළ බව ත් ඊට පාර්ලිමේන්තුවේදී සහ පිටතදී විවේචන එල්ලවූ බව ත් ය.

“මේ මත් වෙන්න පාවිච්චි කරන්න කංසා වර්ගය නෙවෙයි, ඖෂධ සඳහා අවශ්‍ය කරන අපනයන සඳහා වෙළෙඳපොළක් තියෙන එයින් ඉතා ම කුඩා ප්‍රමාණයක්වත් දේශීය වෙළෙඳපළට නිකුත් කරන්නැති සම්පූර්ණ ටික අපනයන කිරීම සඳහා ආරක්ෂිත ක්‍රමවේදයක් යටතේ කර්මාන්තය පටන් ගැනීම උග්‍ර විදේශ විනමය අර්බුදයක් තියෙන අපේ රටට වැදගත් වෙනවා කියලා හිතනවා.

ඒ වගේ ම විශාල දේශීය ඖෂධ නිෂ්පාදන ව්‍යාපාර ඒ කියන්නේ අපේ රටට දැනටමත් විදේශ විනිමය ප්‍රමාණයක් ගේන ආයුර්වේද ඖෂධ නිෂ්පාදන කරන අය ඖෂධවල කොටසක් ලෙස පාවිච්චි කරන්න දිගට ම අවසර ඉල්ලා ඇති අතර දිගට ම ඒ අයට රජය විසින් යම් කිසි ප්‍රමාණයක් සපයලත් තියෙනවා. උසාවි විසින් රාජ සන්තක කරන ලද වැරැද්දක් ලෙස නීතිගත වෙලා තියෙන නිසා ඒවා ඖෂධ සංස්ථාවට මගේ දැනුම හැටියට ලබා දෙනවා.මේ දේශීය ඖෂධ කංසා සහිතව නිෂ්පාදනය කෙරෙනවා. ඉතින් මේ ගැන සංවාදයක් ඇති වීම යහපත්.”

mawbima

තමන්ගේ ක්‍රීඩා සංගමය මගින් පත් කර ඇති තේරීම් කමිටුවෙන් තමාට යම් අසාධාරණයක් සිදු වෙනවානම් එම අසාධාරණය පිළිබදව දින 07 ක් ඇතුළත අමාත්‍යවරයා ලෙස තමා වෙත හෝ ජාතික ක්‍රීඩා සභාවට, ජාතික ක්‍රීඩා තේරීම් කමිටුව වෙත එම අභියාචනය ඉදිරිපත් කළ හැකිබව ක්‍රීඩා හා යෞවන කටයුතු අමාත්‍ය රොෂාන් රණසිංහ  පැවසීය.

අමාත්‍යවරයා මේ බව ප්‍රකාශ කර සිටියේ අද (04) ක්‍රීඩා හා යෞවන කටයුතු අමාතයාංශයේ දී ජාතික ක්‍රීඩා තේරීම් කමිටුව වෙත නිළ වශයෙන් පත්වීම් ලිපි ප්‍රදානය කිරීමේ අවස්ථාවට එක් වෙමිනි.

පත් කරන ලද නව ජාතික ක්‍රීඩා තේරීම් කමිටුව

01 ආරක්ෂක මණ්ඩල ප්‍රධානී ජෙනරාල් ශවේන්ද්‍ර සිල්වා  - සභාපති
02 අර්ජුන් රිශ්යා ප්‍රනාන්දු  - ලේකම්
03 දොස්තර මහියා ගුණසේකර  - සාමාජික
04 ක්‍රීඩා හා යෞවන කටයුතු අමාත්‍යාංශයේ - අතිරේක ලේකම් ප්‍රසන්න චන්දිත්  - සාමාජික
05 සනත් ජයසූරිය  - සාමාජික
06 ජාතික ඔලිම්පික් කමිටු ලේකම් මැක්ස්වෙල් ද සිල්වා  - සාමාජික
07 තිලකා ජිනදාස මිය - සාමාජිකා

අද (04) මධ්‍යම රාත්‍රියේ සිට කිලෝග්‍රෑම් 50ක සිමෙන්ති කොට්ටයක මිල පහළ දමා තිබේ.

ඒ අනුව INSEE සංස්ථා සහ INSEE මහවැලි මැරීන් ප්ලස් කිලෝග්‍රෑම් 50 සිමෙන්ති කොට්ටයක් රු.100කින් අඩු කෙරෙනු ඇත.

සිමෙන්ති මිල ඉහළ යෑමෙන් ඉදිකිරීම් කර්මාන්තය මුහුණ දී සිටින අපහසුතාව පිළිබඳව අවධානය යොමු කරමින් මේ ආකාරයට මිල සහනයක් දී ඇති බව වෙළඳපොළ ආරංචිමාර්ග පවසයි.

පහුගිය කාලෙ විශාල වියදමක් දරල රට පුරා පෝස්ටර් ගහල, රටට හඳුන්වා දූන්න උත්තර සංවිධානෙට නම් මේ දවස්වල උත්තර නැතුවලු ඉන්නේ. ඒ සද්ද බද්ද නැතුව පටන් ගත්ත, නිදහස ජනතා සභාව , මෙච්චර ඉක්මනට ජනප්‍රිය වේගෙන එන්නේ කොහමද කියන එක ගැන.

ප්‍රධාන නාලිකාවල හැමදාම වගේ ඔය ජී එල් , ඩලස්, ඩිලාන්, නාලක , චරිත , වසන්ත යාපා වගේ කවුරු හරි ඉන්නවමයි කියල , උත්තර සංවිධානේ ලොක්ක විමල්ට මළ පැනලලු ඉන්නේ.

ඒ නිසා අපේ අයත්, හැමදාම මොකක් හරි මාධ්‍ය සාකච්ඡාවක් තියන්න ඕන කියල, විමල් උපදෙස් දුන්නට උදය මීක් නෑලු. මෙච්චර කල් විමල් එක්ක ඉදිකට්ටයි නූලයි වගේ හිටපු උදය දැන් මේ මාධ්‍ය සාකච්චාවලින් කට්ටි පනින්නේ නිදසටවත් එකතු වෙන්නද දන්නේ නෑ කියල, පොඩි සැකයක් විමල්ගේ මංත්‍රී කන්ඩායමේ තියනවලු.

ඒ අස්සේ උදය දැන් පාර්ලිමේන්තුවේ වාඩි වෙලා ඉන්නෙත් නාලක ගොඩහේවයි, චන්න ජයසුමනයි ලගමලු.

පසුගිය දවස්වල කිප වතාවක්ම උදය , ජී එල් පීරිස්ගේ ගෙදර ගිය බවත්, විමල්ලට ආරංචි වෙලා ඒ ගැනත් කට්ටිය බය වෙලාලු ඉන්නේ.

ඔය අස්සේ උත්තර සභාවට එකතු නොවී, කට්ටි පැනපු තවත් පක්ෂ නායකයෙක් වන, අසංක නවරත්නත් නාලක ගොඩහේවා හා චන්න ජයසුමනගේ ඉල්ලීමක් මත, ජී එල් හම්බවෙලා තියෙනවා කියලා ආරංචියි.

මහජන පක්ෂේ පැත්තෙන් එන ආරංචි විදියට අසංකත් නිදහස් ජනතා සභාවට සහාය දෙන්න එකඟ වෙලාලු.

චන්ද්‍රිකා නෝනත් ගියසතියේ එයාගේ කන්ඩායමක් එක්ක, නිදහස කන්ඩායමේ ජී එල්, නාලක හා චරිත හමුවෙලා තියෙනවනේ.

ලොක්කී එදා අනුර යාපාටයි, චන්දිම වීරක්කොඩිටයි, සුදර්ශිනී ප්‍රනාන්දු පුල්ලේටයි කියල තියෙන්නේ, සජබේ හා නිදහස කන්ඩායම් එක්ක සහයෝගෙන් වැඩකරමු කියලලු.

හැබැයි මේ කවුරුවත් විමල්ගේ උත්තර සබාව නම් විශ්වාස කරන්නේ නැති පාටලු.

කොයි වෙලේ හරි විමල් ආයේ මහින්දට සෙට්වෙලා "ලී කුවාන් යූ" කියල අපි හිතපු ගෝටාභය රට කෑව . දැන් අපි රිටයර් වෙලා ඉදල ආපු, මහතීර් මොහොමඩ් වගේ මහින්ද එක්ක ආයේ රට ගොඩනගනව " කියල මයික් පලන්න පටන් ගත්තොත් පුදුම වෙන්න දෙයක් නෑ කියලලු සජබේ කට්ටිය නම් කියන්නේ.

- දේශපාලන වාර්තාකරු

කරුණු හරිහැටි අනාවරණය කර නොගෙන සිදුකළ ප්‍රකාශයක් හේතුවෙන් එස්.එම්. මරික්කාර් මන්ත්‍රීවරයා අද (04) පාර්ලිමේන්තුවේදී දැඩි අපහසුතාවකට පත්විය.

එහිදී මන්ත්‍රීවරයා සඳහන් කර සිටියේ ජනාධිපති රනිල් වික්‍රමසිංහ හා හිටපු මහබැංකු අධිපති අර්ජුන් මහේන්ද්‍රන් සිංගප්පූරුවේදී එක්ව දිවා ආහාරය ගෙන ඇති බවය.

ඊට ප්‍රතිචාර දක්වමින් නැගී සිටි ජනාධිපති රනිල් වික්‍රමසිංහ මෙසේ පැවසීය.

"මගේ නම සඳහන් කළා. මං අර්ජුන් මහේන්ද්‍රන් මැතිතුමා එක්ක සිංගප්පූරුවේ දී දවල් කෑම ගත්තා යැයි කිව්වා. උදේ වරුවේ සිංගප්පූරුවේ අභ්‍යන්තර කටයුතු ඇමතිතුමා එක්ක උදේ කෑම ගත්තා. දවල් කෑම ගත්තේ සිංගප්පූරු එයාර් ලයින් එකේදි. මොකද මං දවල් 1.00ට යන්න තිබුනේ. ඒ වෙලාවේ ගුවන් යානයට නැග්ගම කෑම ගත්තා.ඕ න නම් මම මෙනු එකත් ගෙනත් පෙන්නන්නම්. මොනවද එදා කෑවෙ කියලා.

මරික්කාර් මන්ත්‍රීතුමා මෙවැනි අසත්‍ය ප්‍රකාශයක් කිරීම ගැන මම කනගාටු වෙනවා. අනෙක් අතට මරික්කාර් මන්ත්‍රීතුමා කිව්වා දැන් මැද පන්තිය එකතුවෙලා අරගලයට එන බව. විශාල අර්බුදයක් තියෙනවා , අරගලයක් එනවා කියලා එතුමා කිව්වා.මේක මීට ඉස්සෙල්ලා කිව්වේ හිරුණිකා ප්‍රේමචන්ද්‍ර මැතිනිය. මං දැන් කැමතියි දෙදෙනාම එකම ප්‍රකාශයක් කරන එක ගැන. මම ඒකට එකඟ වන්නේ නැහැ. නමුත් හිරුණිකා ප්‍රේමචන්ද්‍ර මැතිනියගේ අඩි පාරේ මරික්කාර් මන්ත්‍රීතුමා දැන් යන බව අපට පේනවා."

මෙහිදී දැඩි අපහසුතාවකට පත්වූ මරික්කාර් මන්ත්‍රීවරයා පවසා සිටියේ, තමන් මේ ගැන දැනගත්තේ මාධ්‍යයෙන් බවයි. එසේම තමන් කිසිමදාක හිරුනිකා ගේ අඩි පාරේ නොයන බවත් ඔහු පැවසීය.

ඊට පිළිතුරු දෙමින් ජනාධිපති රනිල් වික්‍රමසිංහ පවසා සිටියේ, හිරුනිකා ගේ අඩි පාරේ නොයනවා නම් , දැන් ඇත්තේ තමන් සමඟ එකතුවී කටයුතු කිරීම බවය.

යහපාලන රජය පැවති කාලයේදී හිටපු ජනාධිපති මෛත්‍රිපාල සිරිසේන විසින් තමන්ට අගමැතිකම භාරගන්නා ලෙස 71 වතාවක් ආරාධනා කළ බැව් විපක්ෂ නායක සජිත් ප්‍රේමදාස පවසා ඇත.

විපක්ෂ නායකවරයා මේ බව සඳහන් කර සිටියේ සමගි ජනබලවේගයේ හිනිදුම ආසන බලමණ්ඩල රැස්වීමට එක්වෙමින්ය.

එහිදී ඔහු වැඩිදුරටත් මෙසේද පැවසීය.

මෛත්‍රිපාල සිරිසේන හිටපු ජනාධිපතිතුමා 71 වතාවක් මට ආරාධනා කළා. අගමැතිකම භාරගන්න කියලා. ඉන් 10 වතාවක් ආරාධනා කළේ ඔක්තෝබර් මස 26ට පෙර. 61 වතාවක් ඔක්තෝබර් 26 න් පසුව අගමැතිකම භාරගන්නා ලෙස ආරාධනා කළා. මා එජාපයේ නියෝජ්‍ය නායකයා විදියට සිටියදී රනිල් වික්‍රමසිංහ මහතාගේ නායකත්වයෙන් පාර්ලිමේන්තුවේ බහුතර ආසන සංඛ්‍යාවක් දිනාගෙන තිබියදී මට පුළුවන් ද රනිල් වික්‍රමසිංහ මහත්තයට විරුද්ධව පිටුපස්සෙන් ගිහින් කිණිස්සෙන් අනින්න. මට පුළුවන්ද අගමැති වෙන්න මම එදා ඒක ප්‍රතික්ෂේප කළා. ඒක කළේ ප්‍රතිපත්තියක් අනුව. සක්විති රජකම දෙනවා කීවත් ඒක කරන්න බැහැ. ගෝඨාභය ජනාධිපතිතුමාත් මට කීවා අගමැතිකම භාරගන්න කියලා.

ඊයේ ආණ්ඩුවෙ ගෲප් මීටින් එකේදි 21 ගැන කතාව ලොකුවටම ඇදිල.

වෙඩිමුරේ පත්තු කරලා තියන්නේ, එස් බී.

'' ජනාධිපතිට වැඩ කරන්න බලය තියෙන්න ඕන. මහින්ද මහත්තයා යුද්දෙ ඉවර කලෙත්, විධායක බලය හරියටම තිබ්බ හින්දා . මේ විකාර සංශෝධනය නම් ගේන්න එපා. එච්චරයි මම කියන්නෙ...'' එස් බී කියාගෙන කියාගෙන ගිහින්..

ඊට පස්සෙ සාගර කාරියවසම් බැටන් එක අතට අරන්..

'' ජනාධිපතිතුමනි...දැන් කවුද මේකට ජන්ද 150 ක් හොයන්න වගකීම බාර ගන්නෙ. අනික 20 ටත් ජන්දෙ දීල ඒකම අනිත් පැත්ත පෙරලන්න 21 ටත් ජන්දෙ දුන්නම කොහොමද අපි මිනිස්සුන්ට මූණ දෙන්නෙ. 21 ගේනව නම් විජේදාස ඇමතිතුමාටම කියන්න වගකීම බාර ගන්න කියලා ..'' පොහොට්ටුවේ ලේකම් කියල තියෙන්නේ එහෙම..

ඒ කතාවට නං විජේදාස රාජපක්ෂ අධිකරණ ඇමතිතුමාට මළ පැනලා ...

''මේක මගෙ පෞද්ගලික උවමනාවකට ගෙනාපු සංශෝධනයක් නෙවෙයි. මම කලේ ඒ දවස්වල ගෝඨාභය ජනාධිපතිතුමා මට පවරපු රාජකාරිය එච්චරයි . කැබිනට් මණ්ඩල දෙකක දීම ඕක අනුමත කෙරුවා.. '' විජේදාසත් කියාගෙන කියාගෙන ගියා ලු..

ඔය වෙලාවේ සරත් වීරසේකර කිව්වලු, මම නම් 21 ට ජන්දෙ දෙන්න සූදානම් නෑ කියල.

''අපි බලමු මොකක්ද වෙන්නෙ කියලා . අනික මම බ්‍රහස්පතින්දා ආර්ථික තත්ත්වය ගැන, පාර්ලිමේන්තුවේ දි කතාවක් කරන්න ඉන්නෙ. '' ජනාධිපති රනිල් 21 ගැන කතාව වෙනම පැත්තකට හරවලා .

ජනාධිපති රනිල් ඒ විදියට නොකියා කිව්වෙ, එදා වැදගත් වැඩේ 21 ගේන එක නෙවෙයි කියල .

සාකච්ඡාව ඉවර වෙලා යන ගමන් විජේදාස රාජපක්ෂ , සංජීව එදිරිමාන්නට මොකහරි ලොකු පැහැදිලි කිරීමක් කරනව කට්ටියම දැකලා..දෙන්නගෙ මූණ වලින් පෙණුන ලු කතාව සීරියස් එකක් කියල .

'' මොකක්ද මල්ලි අපේ ඇමතිතුමා කියන්නෙ '' කියාගෙන ජයන්ත කැටගොඩට කතාව මැද්දට පැනලා.

''ඇමතිතුමා කියන්නෙ, 21 වෙනි සංශෝධනය එතුමගෙ පුද්ගලික උවමනාවක් නෙවෙයි කියල අයියෙ'' එදිරිමාන්න කැටකොඩට උත්තර දීල තියන්නේ එහෙම..

''කොහොම උණත් ඇමතිතුමා මම නම් ජන්දෙ දෙන්න නෑ '' කියල, කැටගොඩට විජේදාස රාජපක්ෂගෙ මූණටම කියලා.

ඔය කතාවලින් තේරෙන්න ඔය ව්‍යවස්ථා සංශෝධනේ හරියන මගුලක් නෙවෙයි කියන එකද ?

තව දවස් දෙක තුනකින් ඒක බලාගන්න පුළුවන්නේ..

-දේශපාලන වාර්තාකරු

පොදු ව්‍යාපාර පිළිබඳ කාරක සභාව (කෝප්) සඳහා එම කමිටුවේ හිටපු සභාපති චරිත හේරත් සාමාජික මන්ත්‍රීවරයකු ලෙස නැවත පත්කරන ලෙස විපක්ෂ නායක සජිත් ප්‍රේමදාස ඉල්ලා ඇත.

විපක්ෂ නායකවරයා මේ ඉල්ලීම සිදුකර ඇත්තේ අද (04) පාර්ලිමේන්තුවේදීය.

නවවෙනි පාර්ලිමේන්තුවේ තෙවැනි තෙවැනි සභාවාරයේ පොදු ව්‍යාපාර පිළිබඳ පාර්ලිමේන්තු කාරක සභාවේ සාමාජික මන්ත්‍රීවරු ඊයේ (3) පත්කරනු ලැබු අතර ඊට පාර්ලිමේන්තු මන්ත්‍රී චරිත හේරත්ගේ නම ඇතුළත්ව තිබුණේ නැත.

තම පක්ෂය එම කමිටුව සඳහා ආචාර්ය හර්ෂ ද සිල්වා ගේ නම මුලින් යෝජනා කර තිබුණු බවත් හර්ෂ ද සිල්වා මන්ත්‍රීවරයා එම කමිටුවෙන් ස්වෙච්ඡාවෙන් ඉවත්වීමට තීරණය කර ඇති බැවින් ඒ පුරප්පාඩුව සඳහා කෝප් කමිටුවේ හිටපු සභාපති චරිත හේරත් නැවත පත් කරන ලෙස යෝජනා කරන බවත් විපක්ෂ නායකවරයා එහිදී යෝජනා කර ඇත.

මේ අතර සිය නම කෝප් කමිටුවට යෝජනා නොවීම හේතුවෙන් මැසිවිලි නගමින් පාර්ලිමේන්තු මන්ත්‍රී චරිත හේරත් ඊයේ සිය ට්වීටර් ගිණුමේද සටහනක් තබා තිබිණ.

කෝප් කමිටුවේ සද්දය විතරයි !

මේ සම්බන්ධයෙන් අදහස් දක්වමින් දේශපාලන විචාරකයන් පවසන්නේ, වර්තමානය වන විට මන්ත්‍රීවරුන් කෝප් සාමාජිකත්වය සහ එහි සභාපතිත්වය පෞද්ගලික දේශපාලන ජනප්‍රියත්වය වෙනුවෙන් යොදාගන්නා ස්වභාවයක් පෙන්නුම් කරන බවයි.

විශේෂයෙන් කෝප් සභාපතිත්වය හොරු දුෂිතයන් අල්ලන, ඔවුන් නීතිය හමුවට ගෙනෙන පොලිස් කාර්යයක් වැන්නක් ලෙස අඟවන නමුත්, පාර්ලිමේන්තුව නියෝජනය කරන ඕනෑම මන්ත්‍රීවරයෙකුට සිය වරප්‍රසාද පවා යොදා ගනිමින් අධිකරණ ක්‍රියාමාර්ග සම්බන්ධව අවධානම පවා නොගෙන හොරු දුෂිතයන් අනාවරණය කළ හැකි බවත් විචාරක මතයවී තිබේ.

පසුගිය කෝප් කමිටු සභාපතිවරයකු වූ සුනිල් හඳුන්නෙත්ති සිය ධූරය සූක්ෂම ලෙස පක්ෂයේ ප්‍රචාරණ යාන්ත්‍රණය සමඟ මුසුකර කැපීපෙනෙන චරිතයක් ලෙස මාධ්‍ය සහ සමාජ මාධ්‍ය තුළ පෙනී සිටියත් ජනතා ජන්දය ඔහුට නොලැබුණ බවත් දේශපාලන විචාරකයන් සිහිපත් කරයි.

කෙසේ වුවත් කෝප් සභාපති ධුරය දිගටම සරල ආණ්ඩු විරෝධයට හෝ පෞද්ගලික දේශපාලන ප්‍රචාරකවාදයට යටකර දමුණහොත් ඊට හිමි සංකේතීය වටිනාකමද අහිමිව යනු ඇති බවත් විචාරක මතයවී තිබේ.

පොදු ව්‍යාපාර පිළිබඳ පාර්ලිමේන්තු කාරක සභාව( කෝප් කමිටුව) සඳහා පත් කෙරුණු සාමාජික මන්ත්‍රීවරුන්ගේ නාම ලේඛනය ප්‍රසිද්ධ කර ඇත .

කතානායක මහින්ද යාපා අබේවර්ධන අද (03) පාර්ලිමේන්තුවේ දී මෙම නාම ලේඛනය ප්‍රකාශයට පත් කළේය.

ඊට අනුව කෝප් කමිටු සාමාජිකයන් මෙසේය.

1. ජගත් කුමාර

2. ජානක වක්කුඹුර

3. ලොහාන් රත්වත්තේ

4. ඉන්දික අනුරුද්ධ හේරත්

5. ඩී වී චානක

6. ශාන්ත බණ්ඩාර

7. අනුර දිසානායක

8. රවුෆ් හකීම්

9. පාඨලී චම්පික රණවක

10. මහින්දානන්ද අලුත්ගමගේ

11. රෝහිත අබේගුණවර්ධන

12. හර්ෂ ද සිල්වා

13. ඉරාන් වික්‍රමරත්න

14. නිමල් ලාන්සා

15. එස්.එම්.එම් මුෂාරෆ්

16. නලීන් බණ්ඩාර ජයමහ

17. එස්.එම්. මරික්කාර්

18. මුජිබර් රහුමාන්

19. රෝහිණි කුමාරි විජේරත්න

20. සංජීව එදිරිමාන්න

21. ජගත් කුමාර සුමිත්‍රාරච්චි

22. ප්‍රේම්නාත් සී. දොලවත්ත

23. උපුල් මහේන්ද්‍ර රාජපක්ෂ

24. ෂානක්කියන් රාජපුත්තිරන් රාසමාණික්කම්

25. රාජිකා වික්‍රමසිංහ

26. මධුර විතානගේ

27. රංජිත් බණ්ඩාර

කෙසේ වුවත් තමන්ව කෝප් කමිටුවට නම් නොකිරීම සම්බන්ධයෙන් හිටපු කෝප් කමිටු සභාපති පාර්ලිමේන්තු මන්ත්‍රී චරිත හේරත් සිය ට්වීටර් ගිනුමේ සටහනක් තබා ඇති අතර ඒ ජනාධිපති සහ අග්‍රාමාත්‍යවරයාට විරෝධය දක්වමින් ය.

අදාළ ට්වීටර් සටහන පහත දැක්වෙයි .

ලක්ෂ 20 ක ජනතාවක් මැයි 09 වැනිදා කොළඹට පැමිණි බව බුද්ධි අංශ වාර්තා කර ඇතැයි පෙරටුගාමී සමාජවාදී පක්ෂයේ ප්‍රචාරක ලේකම් දුමින්ද නාගමුව සඳහන් කරයි.

ගාළු මුවදොර අරගල භූමියට විටින් විට කෝටියක පමණ ජනතාවක් පැමිණ සහයෝගය ලබා දුන් බවද ඔහු පවසයි .

පෙරටුගාමී සමාජවාදී පක්ෂයේ ප්‍රචාරක ලේකම් දුමින්ද නාගමුව මේ අදහස් දක්වා ඇත්තේ සම්මන්ත්‍රණයක් අමතමිනි.

කිසිදාක පන්නා දැමිය නොහැකි යයි බොහෝ පිරිසක් සිතා සිටි ගෝඨාභය රාජපක්‍ෂ පන්නා දැමීම සඳහා දැඩි අධිෂ්ඨානයකින් නායකත්වය දුන්නේ අන්තර් විශ්ව විද්‍යාල ශිෂ්‍ය බල මණ්ඩලයේ බවද ඔහු පවසා ඇත .

එවන් නායකත්වයක් දුන් ශිෂ්‍ය ව්‍යාපාරය මර්දනය කරද්දී නිහඬව සිටින ජනතාව එම ශිෂ්‍ය ව්‍යාපාරයට ණය ගැති බව ද ඔහු පැවසීය.

එනිසා එම ණය ගෙවීමට ඉදිරියට එන්නැයි ජනතාවගෙන් ඉල්ලා සිටින බවද හෙතෙම කියා සිටී.

ලිට්‍රෝ ගෘහස්ථ ගෑස් සිලින්ඩරයක මිල මේ මස 5 වැනිදා මධ්‍යම රාත්‍රීයේ සිට යළිත් අඩු කිරීමට නියමිත බව වාර්තා වෙයි.

ලිට්‍රෝ ගෑස් සමාගමේ සභාපති මුදිත පීරිස් මේ බව සඳහන් කර ඇත.

ගෑස් මිල සූත්‍රයට අනුව ලෝක වෙළෙඳපොලේ ගෑස් මිල ඇතුළු සෙසු පිරිවැය අනුව මෙම අඩුකිරීම ක්‍රියාත්මක වන බවත් සභාපතිවරයා සඳහන් කර ඇත.

පසුගිය සමයේ මෙරට ගෑස් පෝලිම් යුගයක් පැවති අතර රනිල් වික්‍රමසිංහ අග්‍රාමාත්‍ය ධුරයට පත්වීමෙන් පසුව නව පාලනාධිකාරිය විසින් එම තත්ත්වය අවසන් කර ඇත. එසේම මීට පෙර අවස්ථා කිහිපයකදීම ලිට්‍රෝ ගෑස් මිල පහත දැමුණි.

සේවා කාලය නිම කර සිය රට බලා පිටත්ව යන ශ්‍රී ලංකාවේ කැනඩා මහ කොමසාරිස් ඩේවිඩ් මකිනන් (David McKinnon) සහ ශ්‍රී ලංකාවේ ප්‍රංශ තානාපති එරික් ලවෙ(ර්)තු (Eric Lavertu) අද (03) පෙරවරුවේ ජනාධිපති කාර්යාලයේ දී ජනාධිපති රනිල් වික්‍රමසිංහ හමු විය.

මෙරට සේවා කාලය නිම කළ බව ජනාධිපතිවරයා වෙත නිල වශයෙන් දැනුම් දුන් ඔවුහු ජනාධිපතිවරයා සමග සුහද පිළිසඳරක නිරත වූහ.

ඩේවිඩ් මකිනන් 2017 ඔක්තෝම්බර් 23 වන දින සිට මෙරට කැනඩා මහකොමසාරිස්වරයා ලෙස කටයුතු කළ අතර එරික් ලවෙ(ර්)තු 2018 නොවැම්බර් 01 වැනි දා සිට ශ්‍රී ලංකාවේ ප්‍රංශ තානාපතිවරයා වශයෙන් කටයුතු කළේය.