පුවත්

ඉදිරි මාස තුන ඇතුළත දී බස් ගාස්තුව යලි 25%කින් වැඩි කිරීම‌ට නියමිතව ඇත.

ඊට අනුව අවම බස් ගාස්තුව රුපියල් 25ත් 30ත් අතර ප්‍රමාණයකින් ඉහළ යනු ඇති අතර එය සිදුවන බව සඳහන් වන්නේ වාර්ෂික ගාස්තු වැඩි කිරීමේ එකඟතාවයට අනුවය.

මේ බව මාර්තු 20 ඉරිදා ලංකාදීප පුවත්පත වාර්තා කර ඇති අතර ලබන සඳුදා වනවිට ටයරයක මිල 15%කින් ඉහළ යන බවද වාර්තා වී ඇතැයි පෞද්ගලික බස්රථ හිමියන්ගේ සංගමයේ සභාපති ගැමුණු විජයරත්න පවසන බවත් වාර්තා කර ඇත.

පසුගිය සතියේ දී බස්ගාස්තුව වැඩි වූයේ ඉන්ධන මිලට සමගාමීව වෙන අතර ඒ මිල ඉහළයාමට අනෙකුත් කරුණු බලපෑවේ නැතැයිද ඔහු එහිදී සඳහන් කර ඇත.

ජාතික ප්‍රතිපත්තියට අනුව වාර්ෂිකව සිදුවන ගාස්තු ඉහළ දැමීමේ ක්‍රියාවලියට අනෙකුත් වියදම්ද එක්වීමෙන් බස් ගාස්තුව යළි වැඩිවෙන බව ඔහු එහිදී පෙන්වා දී තිබේ.

අද රටේ පවතින ආරිථික අර්බුදකාරී තත්වය හා ‌ඩොලර් මිල මේ ආකාරයටම පැවතුනහොත් ලබන ජූනි – ජූලි මාසය වනවිට බස් ගස්තුව තවත් 25%කින් වැඩි වනු ඇතැයිද ඔහු අවධාරණය කර ඇත.

මේ අතර පසුගියදා ප්‍රසිද්ධ ජන හමුවකදී අදහස් දක්වමින් ප්‍රවාහන අමාත්‍ය දිලුම් අමුණුගම පවසා සිටියේ දුම්රිය ගාස්තු ද ඉහළ දැමීමට සිදුව ඇති බවයි.

ලිට්‍රෝ ගෑස් මිල තවත් ඉහළට !

එසේම ලිට්‍රෝ සමාගම ගෑස් සින්ඩරයකින් රුපියල් 2000ක පාඩුවක් ලබන නිසා ගෑස් මිල කළමනාකරණය කර ලිට්‍රෝ ගෑස් සමාගම රැකගැනීමට කටයුතු කරන්නැයි ලිට්‍රෝ ගෑස් සමාගම සුරැකීමේ සංවිධානය බලධාරීන්ගෙන් ඉල්ලා ඇති බවත් වාර්තා වෙයි.

ලිට්‍රෝ ගෑස් සමාගම සුරැකීමේ සංවිධානය සමාගමේ අංශ ප්‍රධානින් ඇතුළු පිරිසකගෙන් සමන්විත බව ප්‍රසිද්ධ කරුණකි.

ඒ බව තහවුරු කරමින් ලිට්‍රෝ ගෑස් සමාගම සුරැකීමේ සංවිධානය වෙනුවෙන් ලිට්‍රෝ සමාගමේ ප්‍රචාරණ කළමනාකරු පියල් කොළඹහෙට්ටිගේ පවසන්නේ පාඩු ලබමින් තව දුරටත් ගෑස් සැපයුව හොත් ලිට්‍රෝ සමාගම තවත් මාස තුනකින් වසා දැමීමට සිදුවන බවය.

රටට ඉතුරුව තිබෙන එකම ගෑස් සමාගම බේරාගැනීමට බලධාරීන් කටයුතු කළ යුතු බවද ඔහු පවසයි.

මේ වනවිට ගෑස් බාමින් තිබෙන නෞකාවෙන් පමණක් ලිට්‍රෝ සමාගම රුපියල් මිලියන 200ක පාඩුවක් ලැබීම හේතුවෙන් ඉදිරියේදී ආනයනය කරන නෞකාවලින් වන පාඩුව රුපියල් මිලියන 200ක් ඉක්මවීම අනිවාර්ය බව කියන ලිට්‍රෝ ප්‍රචාරණ කළමනාකරු පියල් කොළඹහෙට්ටිගේ, කිලෝ 12.5ක ගෑස් සිලින්ඩරයක වර්තමාන පිරිවැය රුපියල් 4,462.25ක් වුවද එය රුපියල් 2,675කට අළෙවි කරන බවද සඳහන් කරයි.

ලිට්‍රෝ සමාගම 2021 වසරේ සිට ජනතාවට සහන සැළසීම සඳහා පාඩු ලබමින් ගෑස් ලබාදීම හේතුවෙන් 2021 වසරේ පමණක් රුපියල් කෝටි 1,100ක් අහිමිකරගත් අතරම මෙම වසරේ මේ දක්වා කාලය තුළ රුපියල් කෝටි 100ක් අහිමිකරගෙන ඇති බවත් වර්තමානය වනවිට ආයතනයේ මූල්‍ය තත්වය ඉතාමත් දුර්වල වී ඇති බවත් ඒ ඔහු අවධාරණය කරයි.

පවතින උග්‍ර මූල්‍ය - ආර්ථික අර්බුදය සමනය කරගන්න ජාත්‍යන්තර මූල්‍ය අරමුදලේ සහය පැතීම සම්බන්ධයෙන් මුදල් ඇමති බැසිල් රාජපක්ෂ සහ මහ බැංකු අධිපති අජිත් නිවාඩ් කබ්‍රාල් අතර පැවති සීතල යුද්ධය අවසන්ව ඇති බවත් අවසානයේ මහ බැංකු අධිපති මුදල් ඇමති හමුවේ දනගසා ඇති බවත් මූල්‍ය වෙළෙඳ පොළ විශ්ලේෂකයන් පවසයි.

ඔවුන් මේ නිරීක්ෂණය ඉදිරිපත් කරන්නේ ,පවතින තත්වය යටතේ මුදල් අර්බුදය විසඳා ගැනීම සඳහා ජාත්‍යන්තර මූල්‍ය අරමුදලට (අයි.එම්.එෆ්) යෑම සුදුසු බව ශ්‍රී ලංකා මහ බැංකුව රජයට නිර්දේශ කර ඇති බවට පළවෙන වාර්තා පදනම් කරගෙන ය.

මේ වන විට IMF සමග ක්‍රියාත්මක වියයුතු ආකාරය සම්බන්ධයෙන් විශේෂ යෝජනාවලියක්ද ශ්‍රී ලංකා මහ බැංකුව විසින් රජයට දැනටමත් ඉදිරිපත් කරන ලැබ ඇති බවත් ඔවුන් පවසයි.

මේ සම්බන්ධයෙන් ශ්‍රී ලංකා මහ බැංකුවේ අධිපති අජිත් නිවාඩ් කබ්රාල් වෙතින් මාධ්‍ය කළ විමසුමකදී ඔහු පවසා ඇත්තේ , පවතින තත්වය යටතේ අකමැත්තෙන් හෝ එම තීරණයට යෑමට සිදුවන බවයි.

පවතින ගැටළුව විසඳාගැනීම සඳහා තුන්වැනි පාර්ශ්වයක සහයෝගය ලබා ගැනීමට සිදුවන බවද ඔහු සඳහන් කළ බවත් වාර්තා කර ඇත.

කෙසේ වෙතත් රටට අත්වන වාසි සහ අවාසි තත්වයන් ඉතා සමීපව නිරීක්ෂණය කරමින් එම සාකච්ඡා ක්‍රියාවලිය ආරම්භ කළ යුතු බව පැවසූ මහ බැංකු අධිපතිවරයා ජනාධිපතිවරයා ඒ පිළිබඳවූ පැහැදිලි ස්ථාවරය ජාතිය අමතා කළ කතාවෙන් පැහැදිලි කළ බවද ප්‍රකාශ කළ බවත් වාර්තා වෙයි.

එළැඹෙන ජුනි මාසයේ පළාත් පාලන මැතිවරණය පැවැත්වීමට ආණ්ඩුවේ ප්‍රධානීන් තීන්දුවක් ගෙන ඇති බව දේශපාලන ආරංචි මාර්ග පවසයි.

ජුනි මාසයේ හෝ ඒ ආසන්නයේ පැවැත්වෙන පලාත් පාලන ආයතන මැතිවරණය වෙනුවෙන් පාක්ෂිකයින් ධෛර්යයමත් කිරීමට මැයි දින රැලිය උපරිම ජන සහභාගිත්වයක් ඇතිව පැවැත්වීමට ආණ්ඩුව තීරණය කර ඇති බවත් වාර්තා වෙයි.

මාධ්‍ය වාර්තා සඳහන් කරන ආකාරයට ඒ වෙනුවෙන් මේ වන විට මැයි 1 වනදා යෝධ ජන රැළියක් ගෝල්ෆේස් පිටියේ පැවැත්වීමටත් කටයුතු සූදානම් වෙමින් පවතී.

ඒ වෙනුවෙන් දැනටමත් ගෝල්ෆේස් පිටිය පොදුජන පෙරමුණ ආණ්ඩුව විසින් වෙන්කරගෙන ඇති බවත් වාර්තා සඳහන් කරයි.

එසේම මේ වන විට පළාත් පාලන ආයතන ඉලක්ක කර ප්‍රාදේශීය සංවර්ධන , මංමාවත් සහ හෝම් ෂොප් වැනි කටයුතු කඩිනම් කිරීමට උපදෙස් නිකුත්කර ඇති බවත් වාර්තා වෙයි.

මෙවර මේ කටයුතුවල සියලු මෙහෙයුම් කටයුතු මුදල් අමාත්‍ය බැසිල් රාජපක්ෂ ගේ ප්‍රධානත්වයෙන් සිදුකිරීමට නියමිත බවත් දේශපාලන ආරංචි මාර්ග පවසයි.

ඒ 2024 පොදුජන පෙරමුණේ ජනාධිපති අපේක්ෂකත්වය බැසිල් රාජපක්ෂ වෙත ගැනීමට නියමිත නිසා බවත් දැනගන්නට ඇත.

පවතින ඉන්ධන සහ ගෑස් අර්බුදය විසඳීමේ වැඩපිළිවෙළක් ආණ්ඩුව වහාම ඉදිරිපත් කළ යුතු බව ආණ්ඩුවේ පසුපෙල මන්ත්‍රී කණ්ඩායම ඉල්ලීමක් කර ඇති බව ආණ්ඩු හිතවාදී සමාජ මාධ්‍ය වාර්තා කරයි.

ජනතාව මුහුණ දී ඇති අර්බුදය හමුවේ පාරට බහින්න නොහැකි තත්වයක් තමනට ද උදා වී ඇතැයි ශ්‍රී ලංකා පොදුජන පෙරමුණේ පාර්ලිමේන්තු මන්ත්‍රී ප්‍රමිත බණ්ඩාර තෙන්නකෝන් සඳහන් කළ බවත් අදාළ පුවත පවසයි.

එහි වැඩිදුරටත් මෙසේද සඳහන් වෙයි.

අර්බුදය විසඳන්න වැඩපිළිවෙළක් ආණ්ඩුව රටට ඉදිරිපත් කළ යුතු බවත් හොඳ දේට හොඳයි කීම සහ වැරදි දේය වැරදියි කීම කණ්ඩායමේ ප්‍රතිපත්තිය බවත් කී ඔහු එසේ නැතිව පසු පෙල සිටින්නේ ආණ්ඩුවට ප්‍රසස්ති කීමට නො වන බව ද පැවසීය.

ඉන්ධන හා ගෑස් අර්බුදය හමුවේ ජන ජීවිතය බරපතළ ලෙස කඩා වැටී ඇති බවත් එනිසා ජනතාවගෙන් එල්ලවන අපවාදයෙන් බේරීමට ආණ්ඩුවට හැකියාවක් නැතැයිද ඔහු කියා සිටියේය.

ලලිත් එල්ලාවල !

මේ අතර ශ්‍රී ලංකා පොදුජන පෙරමුණේ පාර්ලිමේන්තු මන්ත්‍රී ලලිත් එල්ලාවල සඳහන් කරන්නේ රට අනිවාර්යෙන්ම හදනවා යැයි ජනාධිපතිවරයා ජාතිය අමතා පැවසුවත් ජනතාව තවදුරටත් එතුමා කෙරෙහි විශ්වාසය තබයි ද යන්න ගැටළුවක් බවයි.

ජනතාව පෝලිම්වල දැඩි පීඩාවකින් සිටින බවත් ජනතාවට තවදුරටත් මෙය දරා ගැනීමට අමාරු බවත් හෙතෙම සඳහන් කළේය.

පසු පෙල මන්ත්‍රීවරුන් ලෙස නායකයන්ට ප්‍රශස්ති නොකියන බවත් ජනතාව විසින් තමන් පාර්ලිමේන්තු යැවුවේ ප්‍රශස්ති ගී ගයන්නට ම නොවන බවත් ඔහු පැවසීය.

බැසිල්ගේ ගෝලයන් !

මේ සම්බන්ධයෙන් අදහස් දක්වන දේශපාලන විචාරකයන් පවසන්නේ , පසුපෙළ මන්ත්‍රීවරුන් ගේ මුවින් පිටවුණත් මේ ප්‍රකාශය පසුපස ආණ්ඩුවේ අභ්‍යන්තර දේශපාලන ගැටුමක් නිරීක්ෂණය වන බවයි.

මේ වන විට ආණ්ඩුව ජාත්‍යන්තර මූල්‍ය අරමුදලේ සහය ලබාගන්නට කටයුතු කරමින් සිටින බවත් එහි සහය ලැබුණත් එය මාස කිහිපයක් ගතවෙන ක්‍රියාවලියක් බවත් ඔවුන් පෙන්වා දෙයි.

ඒ පසුබිමේ මෙවැනි ප්‍රකාශ හරහා සෘජුව ජනාධිපති අපහසුතාවට පත්වෙන බවත් විචාරකයන් පවසයි.

ඊට හේතුව ලෙස ඔවුන් දක්වන්නේ , ජනාධිපති ගෝඨාභය රාජපක්ෂ ජාතිය අමතා සතියක් ඉක්මයන්න පෙර මේ ප්‍රකාශ සිදුවීමත්, ජනාධිපති පත්කළ ජාතික ආර්ථික කමිටුව හා ඊට උපදෙස් දෙන්න පත්කළ උපදේශක සභාව ක්‍රියාත්මක වීමට පෙර මේ ආකාරයට ප්‍රකාශ නිකුත්වීමය.

අනෙක් අතට ජනාධිපති පූර්ණ බලතල සහිත විධායකය නියෝජනය කළත්, ඔහුට ආණ්ඩුවේ දේශපාලන නායකත්වය නොමැති පසුබිමේ සමස්ථ ආණ්ඩුව විසින් උත්තර සෙවිය යුතු ප්‍රශ්නයක් මේ ආකාරයට සුළඟේ පාකර ප්‍රසිද්ධ කිරීම පැහැදිලි ගැටලුවක් බවත් දේශපාලන විචාරකයන් අවධාරණය කරයි.

වැඩිදුරටත් අදහස් දක්වමින් දේශපාලන විචාරකයන් පවසන්නේ ආණ්ඩුවේ පසුපෙළ සඳහා දේශපාලන නායකත්වය ලබාදෙන්නේ මුදල් ඇමති බැසිල් රාජපක්ෂ බවයි. ඒ හමුවේ සෘජුව ඔහු වෙත මේ දුක්ගැනවිල්ල ඉදිරිපත් නොකර ප්‍රසිද්ධ කිරීම පැහැදිලි දේශපාලන ගැටුමක් ලෙස හඳුනා ගැනීම දුෂ්කර නොවන බවත් දේශපාලන විචාරකයන් පවසයි.

ආනයනික කිරිපිටි මිල යළිත් ඉහළ දැමීමට සිදුව ඇතැයි කිරිපිටි ආනයන කරුවෝ පවසති.

ඒ අනුව ආනයනික කිරිපිටි කිලෝවක් රුපියල් 1,345 සිට රුපියල් 1,945 දක්වාද ග්‍රෑම් 400ක පැකට්ටුවක මිල රුපියල් 540 සිට රුපියල් 800 දක්වා වැඩි කිරිමට සිදුව ඇතැයි ඔවූහු පෙන්වා දෙති.

පාරිභෝගික සේවා රාජ්‍ය අමාත්‍ය ලසන්ත අලගියවන්න වෙත පසුගිය 07 වැනිදා කළ දැනුම් දිමට අනුව කිරිපිටි කිලෝවක් රුපියල් 600කින් හා ග්‍රෑම් 400ක පැකට්ටුවක මිල රුපියල් 260 ඉහළ යනු ඇතැයිද ඔවුහු කියති.

ලෝක වෙළෙඳ පොළේ කිරිපිටි කිලෝවක මිල ඩොලර් 2.80සිට ඩොලර් 5.30 දක්වා ඉහළ යාම සහ ඇමෙරිකා ඩොලරයක වටිනාකම රුපියල් 202 සිට රුපියල් 280 දක්වා වැඩිවීම හේතුවෙන් ආයනයන කිරිපිරි මිල වැඩිකිරීමට සිදුව ඇතැයිද එම සමාගම් සඳහන් කරයි.

බොරතෙල් නොමැතිවීම හේතුවෙන් සපුගස්කන්ද තෙල් පිරිපහදුව හෙට (20) රාත්‍රියේ සිට යළි වසා දැමීමට තීරණය කර ඇතැයි ලංකා ඛනිජ තෙල් නීතිගත සංස්ථාව පවසයි.

සමාගම් කිහිපයකින් මේ වනවිට බොරතෙල් ඇණවුම් කර ඇති බව ද එම සංස්ථාව ප්‍රකාශ කළේ ය.

එහි ප්‍රකාශකයෙකු සඳහන් කළේ, අදාළ ඇණවුම් ලැබෙන නිශ්චිත දිනයක් මෙතෙක් ප්‍රකාශ වී නොමැති බවය.

කෙසේ වෙතත් ඇණවුම් ලද විගස පිරිපහදුවේ මෙහෙයුම් යළි ආරම්භ කරන බව ද, ලංකා ඛනිජ තෙල් සංස්ථාව සඳහන් කළේ ය.

මේ අතර, ඩීසල් මෙට්‍රික් ටොන් 20,000ක් රැගත් නෞකාවක් ඉන්දියාවේ සිට හෙට(20) මෙරටට ළඟාවීමට නියමිතව ති‌බේ.

කඩදාසි ඇතුළු අත්‍යවශ්‍ය ද්‍රව්‍ය හිඟයක් හේතුවෙන් බස්නාහිර පළාත් පාසල්වල විභාග නිසි පරිදි පැවැත්වීමට නොහැකිව ඇති බව වාර්තා වෙයි.

මේ හේතුවෙන් පළාත් අධ්‍යාපන අධ්‍යක්ෂ ශ්‍රීලාල් නෝනිස් සියලුම කලාප අධ්‍යාපන අධ්‍යක්වරුන් වෙත විශේෂ ලිපියක් යොමු කරමින් දැනුම් දී ඇත්තේ මේ පිළිබඳව දැනුවත් කිරීම් කරන ලෙසය.

මේ නිසා 6, 7, 8, ශ්‍රේණි සඳහා වර්ෂ අවසාන ඇගයීම් සංශෝධනය කිරීමට උපදෙස් ලබා දී තිබේ.

ඒ අනුව බස්නාහිර පළාත් අධ්‍යාපන දෙපාර්තමේන්තුව ප්‍රශ්න පත්‍ර අනුව වාර විභාගය පැවැත්විය හැකි සෑම පාසලක්ම එම කාල සටහන අනුව විභාගය පැවැත්විය හැකියි.

එසේ පැවැත්වීමට අපහසු පාසල් සඳහා ප්‍රශ්න පත්‍ර සහ කාලසටහන් පාසල් මට්ටමින් සකස් කරගෙන විභාගය පැවැත්වීමට හැකි වේ.

4, 9, 10 හා 11 ශ්‍රේණි වර්ෂ අවසාන ඇගයීම් අප්‍රේල් නිවාඩුවෙන් පසු පැවැත්වීමට බස්නාහිර පළාත් අධ්‍යාපන දෙපාර්තමේන්තුව තීරණය කර තිබේ.

(මූලාශ්‍රය news 1st )

1979 අංක 48දරණ ත්‍රස්තවාදය වැලැක්වීමේ පනත ( විශේෂ විදිවිධාන පනත) දශක ගණනාවක් මුලුල්ලේ අහෝසි කරන බවට ව්‍යාජ පොරොන්දු දෙමින් එය හුදෙක් ආණ්ඩු විරෝධීන් දඩයම් කරන ප්‍රජාතන්ත්‍රවාදයට මරු පහරක් එල්ල කළ පනතක් ලෙස අතීතයට වඩා වර්ථමානයේ සාහසික මුහුණුවරක් ගෙන ඇත.

උතුරෙන් දකුණට එන ගමනට මතක මංගලත් එක්වෙයි…!

පාර්ලිමේන්තු මංත්‍රී සුමන්තිරන්, ශානික්‍යන් රාසමානික්කම් විසින් අත්සන් කිරීමේ පෙත්සම රැගෙන ගාල්ලේ සිට මාතර දක්වා පැමිණි අතර, ඔවුන් දිවංගත හිටපු අමාත්‍ය මංගල සමරවීරයන්ගේ නිවසේ සූදානම් කළ තේ පැන් සංග්‍රයට මුලින්ම සහභාගීවූයේ සමරවීරයන්ගේ සහෝදරිය වූ ජයන්ති සමරවීර හා පවුලේ හිතවතුන් කීපදෙනෙක් සමගින්…

විශේෂයෙන්ම මංගල සමරවීරයන්ගේ හදිසි අභාවය නිසාවෙන් ඔහු වෙනුවෙන් විශේෂ අවසන් ගෞරවය පවුලේ හිතවතුන් සමග බෙදාගැනීම ප්‍රධනව, හිටපු අමාත්‍ය මංගල සමාවීරයන් විසින් නිරන්තරයෙන් සිදුකළ PTA පනත අහෝසිකිරීමෙහිලා කල අවංක කැපවීමට විශේෂ ගෞරවයක් ලෙස එතුමාගේ නිවසේදී සවස 3.30 සිට සවස 4.00දක්වා ත්‍රස්තවාදය වැලැක්වීමේ පනතට විරුද්ධව අත්සන් තැබීම ඇරඹුණි..

ආණ්ඩු විරෝධීන් දඩයම් පණත හකුළවන සටනට දකුණෙන් දැවැන්ත සහායක්…!

ඊයේ ( 17 ) දින සවස 4.00 සිට 5.00 දක්වා කාළය තුළ මාතර උයන්වත්ත ක්‍රීඩාංගනය ඉදිරිපිට පැවති ත්‍රස්තවාදය වැලැක්වීමේ පනත අහෝසිකරන ලෙස ඉල්ලා සංවිධානය කළ අත්සන් ලභාගැනීමේ ක්‍රියාවලිය අතිසාර්ථක කරමින් දැවැන්ත ජන සහභාගීත්වයක් දක්නට ලැබුණි….

එහිදී විශේෂයෙන්ම පාර්ලිමේන්තු මංත්‍රී ශානික්‍යන් රාසමානික්කම් හා සුමන්තිරන් විසින් පනත අවභාවිතා කරමින් සිදුකරන සිරගත කිරීම් පිළිබඳ වැඩිදුරටත් කරුණු දැක්වූ අතර එක්සත් සමජවාදී පක්ෂයේ නායක සිරිතුංග ජජයසූරිය සහෝදරයාද එම අවස්තාවට සහභාගී වීම විශේෂත්වයක් වූ අතර ඉතා උද්වේගකරව වත්මන් ආණ්ඩුව PTA පනත භාවිතා කරමින් ආණ්ඩුවට යම් තර්ජනයක්වන පුද්ගලයන් හා ජනමාධ්‍යවේදින් මර්ධනය කිරීම ගැන දැඩි විවේචනයත් විරෝධයත් පළ කලහ…

එමෙන්ම විපක්ෂය නියෝජනය කරමින් පාර්ලිමේන්තු මංත්‍රී එරාන් වවික්‍රමරත්න අදහස් දැක්වූ අතර අනතුරුව විපක්ෂ නායක සජිත් ප්‍රේමදාස, බුද්ධික පතිරණ, චතුර ගලප්පත්ති, රෙහාන් ජයවික්‍රම ඇතුලු පිරිසක් හා සිවිල් ක්‍රියාකාරීන් ලෙස විශ්‍රාමික විදුලි ඉංජිනේරු අජිත් මුණසිංහ,වෛද්‍ය ප්‍රසාද් මොහොට්ටි ඇතුලු විශාල ජන සහභාගීත්වයකින් ඉතා උද්‍යෝගයෙන් අත්සන් එකතුකිරීමේ ව්‍යාපාරය සාර්ථකව අවසන් වූ අතර වත්මන් ආණ්ඩුව බලයට ගෙන ඒමේදී සහාය දැක්වූ දකුණේ ප්‍රභල පිරිස් කීපයක් ඒ හා එක්විය…

.එමෙන්ම වත්මන් අමාත්‍ය ඩලස් අලහප්පෙරුමගේ ලේකම්වරයකු ලෙස කටයුතු කල දැනට ක්‍රියාකාරී දේශපාලනයෙන් ඉවත්ව සිටින උදය හිත්තැටියගේද සහභාගී වීම විශේෂත්වයක්..

ඔබේ නගරයේද නුදුරු දිනක ආරම්භ වීමට නියමිත ත්‍රස්තවාදය වැලැක්වීමේ පණත අහෝසි කිරීම වෙනුවෙන් ඔබේ වටිනා අත්සන ලභාදෙන මෙන් ඉල්ලමු……

සුමුදු මද්දුමආරච්චි.
මිලානෝ,
ඉතාලිය.

ශ්‍රී ලංකාවට මෙතරම් දරුණු ආර්ථික අර්බුදයකට මුහුණ දෙන්නට සිදුවූයේ ජාත්‍යන්තර මූල්‍ය අරමුදලට යෑම ප්‍රමාද වූ නිසා බව එක්සත් ජාතික පක්ෂ නායක සහ හිටපු අග්‍රාමාත්‍ය රනිල් වික්‍රමසිංහ පැවසීය.

අතීත එක්සත් ජාතික පක්ෂ ආණ්ඩු මෙවැනිම ආර්ථික අර්බුද සහිත අවස්ථා වල රට බාර ගෙන ආර්ථිකය ගොඩ ගත් අවස්ථා ඕනෑතරම් තිබෙන බවද හිටපු අග්‍රාමාත්‍යවරයා සඳහන් කළේය.

ඔහු මේ අදහස් දක්වා සිටියේ සමාජ මාධ්‍ය සමග පැවති විශේෂ සාකච්ඡාවකදීය.

එහිදී හිටපු අග්‍රාමාත්‍ය රනිල් වික්‍රමසිංහ වැඩිදුරටත් පැවසූයේ පමාවී හෝ මූල්‍ය අරමුදලට යාම හැර වෙනත් විසඳුමක් නැති බව තමා දිගින් දිගටම සඳහන් කළ බවයි.

ශ්‍රී ලංකා රූපවාහිනී සංස්ථාවේ නිවේදිකාවක් ලෙස සේවය කළ පාරමී නිලේප්තා රණසිංහ ගේ සේවය වහාම ක්‍රියාත්මක වන පරිදි අත්හිටුවා තිබේ.

වාර්තා වන ආකාරයට ඒ, ඇය තැබූ ෆේස්බුක් සටහනක් පදනම් කරගෙන ය.

අදාළ නිවේදිකාව ජනාධිපති විවේචනය වන ආකාරයට තැබූ බව සඳහන් ෆේස්බුක් සටහන මෙසේය.

 "දවසට වේලක් කන්න වෙරදරන රටේ, බහුතර මිනිස් ජිවිත ගැන , අල්ප මාත්‍රයක සංවේදීකමක්, මෙවන් බෝල් චරිතයකට සහය නොදැක්වීමට ගත් තීරණය සම්බන්ධයෙන්, අදටත් ඇත්තේ නිහතමානී සතුටකි."

 මේ සටහන හේතුවෙන් වැඩ තහනමට ලක්වූ පාරමී නිලේප්තා රණසිංහ නිවේදිකාව තම වැඩ තහනම සම්බන්ධයෙන් ද තවත් ෆේස්බුක් සටහනක් තබා ඇති අතර එය පහත දැක්වෙයි.

පුරවැසියෙකු ලෙස මාගේ භාෂණය හා ප්‍රකාශනයේ නිදහස අභියෝගයට ලක් ව ඇති මොහොතක සමාජ වගකීමක් සහිත සම්ප්‍රවේශිකාවක ලෙස සුව දුක් විමසන හිතැතියන් වෙනුවෙන් මේ සටහන තබමි.

අද පටන් රූපවාහිනිය මා හට තහනම් භූමියක් බවට පත් ව ඇත්තේ මාගේ මුහුණුපොතේ පෝස්ටුවක් හරහා බහුතර ශ්‍රී ලාංකික ජීවිත ගැන අල්ප මාත්‍රයක් හෝ සංවේදී වීම නිසාවෙනි.
රිවිදින අරුණැල්ල, නුග සෙවන, සුසර දැහැන, නැණ මිහිර,චක්‍රාවාටය, Hard Talk, ගුරුතලාව වැනි වැඩසටහන් තුළින් මා හට ප්‍රේක්ෂකාදරය ළගා කර දුන් රූපවාහිනියට මාගේ ගෞරවයද, ගල් මුල් මැද ආදර පැසසුම් දුන් ප්‍රේක්ෂකයන්ට මාගේ ආදරයද පුද කරමි.

හංස වෙස් ගෙන පාත්තයින් රඟන විටත් රූපවාහිනිය මට හුදු දේශපාලන කෙළි මඩලක් නොවීය.මව් ගුණ හඳුනන දරුවකු ලෙස රූපවාහිනියට සුබ පතමි...
සදාකල් යෙහෙන් වැජඹේවා..

නැවතුමක් නොවේ හැරවුමක් පමණි........

සිදුකර ඇති වැඩ තහනම සම්බන්ධයෙන් විරෝධය පලකරමින් මේ වන විට නිදහස් මාධ්‍ය ව්‍යාපාරය ඇතුළු මාධ්‍ය සංවිධාන කිහිපයක්ම නිවේදන නිකුත්කරමින් ඊට බරපතළ විරෝධයක් එල්ල කර ඇත.

මේ වන විට ජනමාධ්‍ය අමාත්‍ය ධූරය හොබවන්නේද හිටපු මාධ්‍යවේදියකු වන ඩලස් අලහප්පෙරුම වුවත් ඔහුද මේ ක්‍රියාව හමුවේ නිරුත්තර බවක් පෙන්නුම් කරයි.

ජනතාව මේ වසර අවසාන වන තෙක් ඉවසීමෙන් සිටිය යුතු බව ඉඩම් අමාත්‍ය එස් එම් චන්ද්‍රසේන සඳහන් කළේය.

අමාත්‍යවරයා මේ බව කියා සිටියේ අනුරාධපුර කලාවැව ආසනයේ ශ්‍රී ලංකා පොදුජන පෙරමුණේ කාන්තා බලමණ්ඩලය අමතමිනි.

එහිදී අමාත්‍යවරයා තවදුරටත් සඳහන් කළේ මේ වසර අවසාන වනවිට ශ්‍රී ලංකාවට ඩොලර් ටිකක් එන බවත් එම ප්‍රමාණය පැමිණි වහාම ඉන්ධන මිල අඩු කරන බවත්ය.

එමෙන්ම එම කාලයේදී ගෑස් පෝලිම් අවසන් වනු ඇති බවත්, විදුලිය කප්පාදුවක් සිදු නොවනු ඇති බවත් පැවසූ ඔහු එම කාලය වන තෙක් ටිකක් ඉවසීමෙන් ඉන්නැයිද ඔහු ජනතාවගෙන් ඉල්ලා සිටියේය.

බොහෝ නිවාසවල, ආයතනවල සහ සූර්ය පැනල ස්ථාපිත කර ඇති ස්ථානවල උත්පාදනය කරන විදුලිය මෙතෙක් ජාතික විදුලි පද්ධතියට එකතු කිරීම ප්‍රමාද වී ඇතැයි අමාත්‍ය මණ්ඩල අනුකමිටුවේ සභාපති, ආණ්ඩු පක්ෂයේ ප්‍රධාන සංවිධායක මහාමාර්ග අමාත්‍ය ජොන්ස්ටන් ප්‍රනාන්දු ප්‍රකාශ කරයි.

අමාත්‍යවරයාගේ මාධ්‍ය ඒකකය විසින් නිකුත්කළ නිවේදනයක මේ බව සඳහන් වන අතර එහි වැඩිදුරටත් මෙසේද දැක්වෙයි.

ඉදිරියේ දී ඒවා ජාතික විදුලි බල පද්ධතියට එකතු කිරීමට අවශ්‍ය ක්‍රියාමාර්ග ගන්නා බවත් අමාත්‍ය ජොන්ස්ටන් ප්‍රනාන්දු වැඩි දුරටත් ප්‍රකාශ කරයි.

තවද මෙසේ සූර්ය පැනල ස්ථාපිත කර ඇති ස්ථාන වලින් උත්පාදනය කරන විදුලිය ජාතික විදුලි බල පද්ධතියට එකතු නොකිරීම හා ප්‍රමාද කිරීම පිලිබඳව කඩිනම් වාර්තාවක් ලබා දෙන ලෙස අදාල බලධාරීන්ට අමාත්‍ය මණ්ඩල අනුකමිටුව නියෝග කල බව අමාත්‍ය ජොන්ස්ටන් ප්‍රනාන්දු ප්‍රකාශ කරයි.

සූර්ය බලශක්ති පැනල මඟින් උත්පාදනය කරනු ලබන විදුලිය ජාතික විදුලි බල පද්ධතියට මෙතෙක් එකතු නොකිරීම සම්බන්ධයෙන් විමර්ශනය කිරීමේ දී හිටපු බලශක්ති අමාත්‍ය උදය ගම්මන්පිල මහතාගේ නිවසට පවා සූර්ය බලශක්ති පැනල සවිකිරීම සිදු කලද ජාතික විදුලි බල පද්ධතියට අවශ්‍ය සම්බන්ධතාවය ලබා දීම සඳහා මාස 6 කට අධික කාලයක් ගත වී ඇති බව අමාත්‍ය මණ්ඩල අනුකමිටුවේදී නිරීක්ෂණය විය. මේ සම්බන්ධයෙන් අමාත්‍ය මණ්ඩල අනුකමිටුවේ අවධානය යොමු වීමෙන් අනතුරුව එය ජාතික විදුලි බල පද්ධතියට එකතු කරන ලදි.

ලොකුගේ පවිත්‍රා දුමින්ද මොකද කරේ ?

මෙම නිවේදනය සම්බන්ධයෙන් අදහස් දක්වමින් විදුලි බල සහ බලශක්ති ක්ෂේත්‍රයේ ප්‍රවීණයන් පවසන්නේ මෑත කාලීනව මෙකී ක්ශේත්‍රයේ කටයුතු කළ අමාත්‍යවරුන් නිසි ලෙස සිය වගකීම ඉටුකරාද යන ප්‍රශ්නය මෙහිදී පැනනගින බවයි.

රට තුළ විදුලි කප්පාදුවක් අඛණ්ඩව සිදුවන පසුබිමේ ඊට පෙර නිසි සූදානමක් පැවතියේ නම් මෙවැනි අඩුපාඩුවක් සිදුවිය නොහැකි බව ඔවුන්ගේ වැඩිදුර අදහස වෙයි.

එම නිසා මේ අඩුපාඩු විමසීමට අමාත්‍ය මණ්ඩල අනු කමිටු ස්ථාපිත කිරීමට සිදුව ඇති බවත් බලශක්ති අර්බුදයක් සම්බන්ධයෙන් නිවැරදි පුරෝකථනයක් කර ගැනීමට අසමත්වීම අතිශය කණගාටුවට කරුණක් බවත් ඔවුන් පෙන්වා දෙයි.

වර්තමානයේ රට මුහුණදී සිටින දරුණු අර්බුද ජාලය විසඳීමට බැසිල් රාජපක්ෂ හැර විකල්පයක් නැති බවත් ඔහුට සම කිරීමට කෙනෙක් නැති බවත් සඳහන් ප්‍රචාරක ව්‍යාපෘතියක් දියත්කර ඇති බව දේශපාලන විචාරකයන් පවසයි.

මුදල් අමාත්‍ය බැසිල් රාජපක්ෂ ගේ දැඩි අනුගාමිකයකු වන පුවත්පත් මණ්ඩල සභාපති මහින්ද පතිරණ මෙන්ම උදයංග වීරතුංග ඇතුළු පිරිසක් මේ සඳහා සමාජ මාධ්‍ය තුළ සක්‍රීයව ඇති බවත් මෙය බැසිල්ගේ ඊළඟ දේශපාලන පිම්ම වෙනුවෙන් දියත්කර ඇති බවත් ඔවුන් පවසයි.

මෙම ප්‍රචාරක යුද්ධය විපක්ෂය සමහ වන්නක් නොව මෙය රාජපක්ෂ කඳවුර තුළ මතුව ඇති තත්ත්වයන් සමග හැප්පී බලන්නක් බවත් ඔවුන් වැඩිදුරටත් පවසයි.

එසේම බැසිල් පාර්ශ්වය සිදුකරන මෙවැනි ප්‍රචාරක උපක්‍රම හේතුවෙන් ජනාධිපති ගෝඨාභය රාජපක්ෂ සහ අග්‍රාමාත්‍ය මහින්ද රාජපක්ෂ බරපතළ අපහසුතාවට පත්වීමට ඉඩවැඩි බවත් ඔවුන් පවසයි.

ඉන්දියාවෙන් ඩොලර් බිලියනයක ණය පහසුකම ලබා ගැනීම සඳහා ඉන්දියාව සහ ශ්‍රී ලංකාව අතර ගිවිසුමට අත්සන් තබා ඇති බව ඉන්දියාවේ ශ්‍රී ලංකා මහ කොමසාරිස් කාර්යාලය සඳහන් කරයි.

ශ්‍රී ලංකා මහ බැංකු අධිපති අජිත් නිවාඩ් කබ්‍රාල් ට එකී ධූරයෙන් ඉල්ලා අස්වන ලෙස ජනාධිපති ගෝඨාභය රාජපක්ෂ නියෝග කර ඇති බවට පළවෙන වාර්තා ජනාධිපති මාධ්‍ය අංශය ප්‍රතිකේෂ්ප කරයි.

ඒ බව සඳහන් කරමින් ජනාධිපති මාධ්‍ය අංශය නිවේදනයක් නිකුත්කර ඇත.
ඉංග්‍රීසි පුවත්පතක පළ වූ වාර්තාවක් ප්‍රතික්ෂේප කරමින් ජනාධිපති මාධ්‍ය අංශය සඳහන් කර ඇත්තේ , ජාත්‍යන්තර මූල්‍ය අරමුදල සමග පැවැත්වූ සාකච්ජාවලදී මූල්‍ය කරුණු හැර නිලධාරීන් සම්බන්ධයෙන් සාකච්ජා නොකළ බවය.

එමෙන්ම වත්මන් මහබැකු අධිපතිවරයා පිළිබඳව ජනාධිපතිවරයාට සහ රජයට පූර්ණ විශ්වාසයක් ඇතැයි ද ජනාධිපති මාධ්‍ය අංශය නිකුත් කළ නිවේදනයේ සඳහන් වෙයි.

කෙසේ වුවත් මේ සම්බන්ධයෙන් වන පුවත වාර්තා කළ ඉංග්‍රීසි මාධ්‍ය පුවත්පත වන්නේ දෙරණ මාධ්‍ය ජාලයට අයත් " ද මෝනින්" පුවත්පත යි. දෙරණ මාධ්‍ය ජාලය කෝටිපති ව්‍යාපාරික දිලිත් ජයවීර ට අයත් අතර ඔහු ජනාධිපති ගේ සමීපතමයකු ලෙසත් ප්‍රකටය.

ගරු ජනාධිපතිතුමනි, ඉන්ධන අරපිරිමැස්මෙන් පාවිච්ච් කරන්නේ කොහොමද? යනුවෙන් පාර්ලිමේන්තු මන්ත්‍රී හර්ෂ ද සිල්වා ප්‍රශ්න කරයි.

සමාජ මාධ්‍ය තුළ සටහනක් තබමින් හර්ෂ ද සිල්වා පාර්ලිමේන්තු මන්ත්‍රීවරයා මේ ආකාරයට ජනාධිපති ගෝඨාභය රාජපක්ෂ වෙතින් විමසා සිටියේ ඊයේ (16) ජනාධිපති ජාතිය ඇමතූ අවස්ථාවේ දැක්වූ අදහස්වලට ප්‍රතිචාරයක් ලෙසය.

එහිදී සිය ෆේස්බුක් ගිනුමේ පාර්ලිමේන්තු මන්ත්‍රී හර්ෂ ද සිල්වා තැබූ සටහන පහත දැක්වෙයි.

අතිගරු ජනාධිපතිතුමනි ඔබගේ ජාතිය ඇමතීමේ කතාව මා ඇහුවා. ප්‍රශ්න කිහිපයක් ඇතිවූ නිසයි මේක ලියන්නේ. ඔබ කියන විදිහට ඔබ මේ අර්බුදය කලින්ම දුටුවාලු. ඒ නිසා, වාහන ආනයනය නතර කර විදේශ විනිමය ඉතිරිකර ගැනීමට ක⁣ටයුතු කළ බවයි ඔබතුමා සඳහන් කළේ.

නමුත්, ඔබ මෙවැනි අර්බුදයක් දුටුවා නම් දේශපාලන ජනප්‍රියතාවය දිනාගැනීම වෙනුවෙන් දැවැන්ත ලෙස බදු අඩුකර රුපියල් බිලියන 600 ක පමණ බදු ආදායමක් අහිමි කරගත්තේ ඇයි? අර්බුදයේ ආරම්භයක් බවට පත්වුණේ ලෝකයේ අඩුම රාජ්‍ය ආදායමක් තිබෙන රටක් වන ලංකාවේ රාජ්‍ය ආදායම් මේ ආකාරයෙන් දැවැන්ත ලෙස කඩා වැටීමයි.

ඒ වගේම, රුපියල පා කිරීම නිසා, අපනයන ආදායම වැඩිවන බවත් ඒ තුළින් වෙළෙඳ හිඟය අඩුකර ගත හැකි බවත් ඔබතුමා පැවසුවා. ඔබ කියන විදිහට අර්බුදය කලින්ම දුටුවා නම් රුපියල කෘත්‍රිම ලෙස පාලනය කිරීමට උපදෙස් දුන්නේ ඇයි? ඒ තුළින් ඩොලර් බිලියන 04 ක පමණ ආදායමක් රටට අහිමි වූ බව ඔබතුමා දන්නවාද? රුපියල ආරක්ෂා කිරීමට ඩොලර් බිලියන 1.5 ක් විතර පුච්චන්න වුණා ජනාධිපතිතුමනි. ඒ වගේම, රුපියල කෘත්‍රිම ලෙස පාලනය කිරීම නිසා රටට ඩොලර් බිලියන 2.5 ක පමණ විදේශ ප්‍රේෂණ ආදායමක් අහිමිවුණා. විදේශ විනිමය අර්බුදය දිග් ගැස්සුණේ ඒ විදිහටයි ජනාධිපතිතුමනි.

රට වෙනුවෙන් මේ අවස්ථාවේ විදුලිය සහ ඉන්ධන අර පිරිමැස්මෙන් පාවිච්ච් කරන ලෙස ඔබ ඉල්ලා සිටිනවා. ඉන්ධන අර පිරිමැස්මෙන් පාවිච්චි කරන්න තියා ඉන්ධන ටිකක් හොයාගන්නවත් බැරිවයි ජනතාව ඉන්නේ. අනිත් අතට, මේ වගේ ගිනි ගණන් වලට ඉන්ධන අරගෙන ඒවා ජනතාව නාස්ති කරයි කියල හිතන එකත් වැරදියි. ඒ වගේම, ඉන්ධන සහ විදුලිය කියන්නේ ආර්ථිකයක ගාමක ශක්තිය. හයර් දුවන මනුස්සයෙක් ඉන්ධන පරිස්සමෙන් පාවිච්ච් කරන්නේ කොහොමද? ඔහුට හයර් දුවන එක අඩුකරල තමයි ජාතිය ගොඩ ගන්න ඔබ කියන සහයෝගය දෙන්න වෙන්නේ. ඒ කියන්නේ ඔහුගේ ආර්ථිකය වැටෙනවා. සමස්තයක් විදිහට ඉන්ධන අරපිරිමැස්මෙන් පාවිච්චි කරනවා කියන්නේ ආර්ථිකය වැටෙන එක.

කෙසේවෙතත්, ඔබ රටේ නායකයා ලෙස මේ අවස්ථාවේ ජාතිය අමතා ජනතාවගේ ශක්තිය නැංවීමට උත්සාහ කිරීම ගැන මා ස්තූතිවන්ත වෙනවා. එය නායකයෙකු ලෙස හොඳ දෙයක්. නමුත්, මේ ගැටලු ඇතිවූයේ විචක්ෂණශීලී නොවූ ආර්ථික කළමනාකරණය නිසා යැයි ඔබට බැහැර කළ නොහැකියි.

ණය ගෙවා දැමීමට ක්‍රමවේදයක් සකස් කිරීමට මූල්‍ය අරමුදල සමග සාකච්ඡා ආරම්භ කළ බවත් ඔබතුමා සඳහන් කළා. එය හොඳ දෙයක්. නමුත්, ගැටලුව වන්නේ අර්බුදය කල් තියා දුටුවා නම් මූල්‍ය අරමුදල සමග සාකච්ඡා කිරීමට මෙතරම් ප්‍රමාදවූයේ ඇයිද යන්නයි. මෙවැනි අර්බුදයකට රට වැටෙනු ඇති බවත් ඊට පෙර මූල්‍ය අරමුදල සමග සාකච්ඡා කර විසඳුම් ලබාගන්නා ලෙසත් ස්වාධීන ආර්ථික විශේෂඥයින් මීට මාස 18 කට පෙර සිටම සඳහන් කළා.

අද ඔබ ගැනීමට යන තීරණය එදා ගත්තා නම් ජනතාවට මේ විදිහට දුක් විඳින්න වෙන්නෙ නෑ ජනාධිපතිතුමනි.

අර්බුද මධ්‍යයේ වුවද අමෙරිකාව සහ රුසියාව අතර පවතින හොද හිත පලුදු කරමින් අමෙරිකානු ජනාධිපති ජෝ බයිඩන් රුසියානු ජනාධිපති ව්ලැදිමීර් පුටින්ට ප්‍රබල වාග් ප්‍රහාරයක් එල්ල කර ඇත. ඒ, රුසියානු ජනාධිපති ව්ලැදිමීර් පුටින් යනු, යුධ අපරාධකරුවකු බව ජාත්‍යන්තරය හමුවේ ප්‍රසිද්ධියේ ප්‍රකාශ කරමිනි.

යුක්‍රේන අර්බුදයේදී රුසියානු හමුදාව එල්ල කරන ප්‍රහාර හමුවේ යුක්‍රේනයේ සිවිල් වැසියන් ඝාතනය වීම හෙලා දකිමින් අමෙරිකානු ජනාධිපතිවරයා ධවල මන්දිරයේ සිට එම ප්‍රකාශය නිකුත් කර ඇති අතර, එමෙන්ම රුසියාව යුක්‍රේනය ආක්‍රමණය ඇරඹීමෙන් පසුව ඇමරිකානු ජනාධිපති ජෝ බයිඩන් රුසියානු ජනාධිපති ව්ලැදිමීර් පුටින්ට එල්ල කළ ප්‍රබලතම වාග් ප්‍රහාරය ද එයයි.

යුක්‍රේනයේ “නයේ මරිපෝල්” නගරයේ පිහිටි විශාලතම රෝහල තුළ වෛද්‍යවරුන් සහ රෝගීන් සිය ගණනක් රුසියානු හමුදාව විසින් ප්‍රාණ ඇපයේ තබාගෙන සිටින බවත් එය කෘර ක්‍රියාවක් බවත් අමෙරිකානු ජනාධිපති ජෝ බයිඩන් ප්‍රකාශ කළේය.

යුක්‍රේනය වෙනුවෙන් ලෝක ප්‍රජාව එකමුතුව නැගී සිටිය යුතු බව අමෙරිකානු ජනාධිපතිවරයා අවධාරණය කළේය.

ඇමරිකානු ජනාධිපති ජෝ බයිඩ්න් මෙම අදහස් දැක්වූයේ යුක්‍රේන ජනාධිපති ව්ලොඩිමීර් ස්ලෙනෙස්කි ඇමරිකානු කොංග්‍රස් මණ්ඩලය අමතා සංවේදී ප්‍රකාශයක් සිදුකර පැය කීපයකින් පසුව වීම විශේෂත්වයකි.
 
එහිදී යුක්‍රේන ජනාධිපතිවරයා ඇමෙරිකාවෙන් ඉල්ලා තිබුනේ රුසියාවට එරෙහිව තනිව සටන් වදින සිය රටට සහය ලබාදෙන ලෙසයි. යුක්‍රේන ජනාධිපතිවරයාගේ ආයාචනය පිලිගනිමින් ප්‍රහාරක ගුවන් යානා නාශක අවිඇතුලු තවත් අවිආයුද රැසක් සහ ඩ්‍රෝන යානා ද සමගින් යුද ආධාර සැපයීමට අමෙරිකානු ජනාධිපති ජෝ බයිඩන් තීරණය කර ඇති බව විදෙස් මාධ්‍ය පැවසා සිටී.

පෝලිම් දිග ඇදෙන මේ සමාජ ආර්ථික කඩා වැටීමේ වගකීම කාටද? මැයෙන් සටහනක් ජ්‍යෙෂ්ඨ මාධ්‍යවේදියකු මෙන්ම දේශපාලන විචාරකයකු වන කුසල් පෙරේරා විසින් තබා ඇති අතර එය පහත දැක්වෙයි.

පෝලිම් දිග ඇදෙන මේ සමාජ ආර්ථික කඩා වැටීමේ වගකීම කාටද?

පැහැදිලිවම එහි වගකීම බාර ගත යුත්තේ රට සංවර්ධන කිරීමේ වගකීම ඉල්ලා ගත් රජයේ හා මේ ආණ්ඩුවේ ප්‍රධානියා සමග ඔහුගේ මැති ඇමතිවරුන්ය. දෑවුරුද්දක් කිසිදු සාර්ථක මූල්‍ය කලමනාකරණයක් නොවුනු ආණ්ඩුවේ ප්‍රධානීන්ය.

මේ ආණ්ඩුවේ නායකත්වය ගැන බහුතර ජනතාවකට තවදුරටත් විශ්වාසයක් නොමැත්තේ අර්බූද පෝලිම් දිග ඇදෙනවා මිස අඩුවක් නොවන බැවිනි.

නමුත් මේ අර්බූද වල නිර්මාපකයින් කවුරුන්දැයි ඇසුවහොත් ඒ දේශපාලකයින් පමණක්ම නොවේ. මා නිතර කියන අයුරු, දේශපාලකයින්ට තනිව යෝධ හොරකම් කළ නොහැක. සංවර්ධනයට කිසිදු සම්බන්ධයක් නොමැති විදේශ ණය මත ආරම්භ කෙරුණු හැම යෝධ දූෂිත ව්‍යාපෘතියකම පිටුපස ඉන්නේ අමාත්‍යාංශවල ඉන්නා ටයි පටි පළඳින රාජ්‍ය පරිපාලනයේ ලොකු නිලධාරීන් සමග අමාත්‍යාංශ ගණකාධිකාරීවරුන් සහ ටෙන්ඩර මණ්ඩලවල වාඩිවන සහ ඒවායින් අන්ත දූෂිත ව්‍යාපෘති අනුමත කරන ඉංජිනේරු, වෛද්‍ය, පරිඝණක තාක්ෂණ, නීතිඥ වැනි රජයේ හා පෞද්ගලික අංශයේ ප්‍රාඥයින් ලෙස පෙනී සිටින විශේෂඥ වෘත්තිකයින්ය.

ඔවුන්ද මේ සමාජ ආර්ථික කඩා වැටීමට දායක වූ නීල හොරුන් බව සමාජයට කිව යුතුය.

කුසල්
2022 මාර්තු 17