පුවත්
රට ගොඩනගන්න ඉදිරිපත් කළ IMF නිර්දේශ 05 මෙන්න !
මෑතක දී සංවාදයට ලක්වූ ජාත්‍යන්තර මූල්‍ය අරමුදලේ (IMF) ශ්‍රී ලංකාව පිළිබඳ වාර්තාව මාර්තු 25 වැනිදා ප්‍රසිද්ධ කරනු ලැබීය.
ශ්‍රී ලංකාව වර්තමානයේ මුහුණ දෙන ගැටලු විසඳාගැනීම සඳහා නිර්දේශ පහක් ඉන් ඉදිරිපත් කර ඇත.
ජාත්‍යන්තර මූල්‍ය අරමුදලේ හතරවන වගන්තියට අදාල මෙම වාර්තාව උපදේශන වාර්තාවක් ලෙස සැලකේ. සෑම වර්ෂයකම නිකුත්කෙරෙන මෙම වාර්තාව රටේ ආර්ථිකය පිළිබඳ විශේෂඥ දැක්මකි.
තාක්ෂණික සහායක් ලෙස ලබා දෙන මෙම වාර්තාව පිළිගන්නේ ද නැද්ද යන්න රටට ඇති අයිතියකි. එය ක්‍රියාත්මක කරන්නේ ද නැද්ද යන්න ද ශ්‍රී ලංකාව විසින් ගත යුතු තීරණයකි.
කෙසේ වෙතත් ආර්ථික විශේෂඥයින් පෙන්වා දෙන්නේ ආර්ථික අර්බුදයෙන් ගොඩඒමට නම් මෙම වාර්තාව පදනම්කරගෙන දැඩි තීරණ ගතයුතු බව යි.
IMF හතරවන වගන්තියේ ක්‍රියාවලිය:
2021 වසරේ දෙසැම්බර් මාසයේ දී ජාත්‍යන්තර මූල්‍ය අරමුදලේ නිලධාරී කණ්ඩායමක් ශ්‍රී ලංකාවේ සංචාරයක නිරත වූ අතර, එහිදී මුදල් අමාත්‍යාංශය සහ ශ්‍රී ලංකා මහ බැංකුව මෙන්ම තවත් රාජ්‍ය ආයතන කිහිපයක්, මූල්‍ය ආයතන, පෞද්ගලික අංශයේ, ආයතන සහ පුද්ගලයින් සමග සාකච්ඡා පැවැත්වීම ජාත්‍යන්තර මූල්‍ය අරමුදලේ මූලස්ථානයට නැවත පැමිණීමෙන් පසු නිලධාරී කණ්ඩායම වැඩිදුර පැහැදිලිකිරීම් ඉල්ලා සිටීම
හතරවන වගන්තිය පිළිබඳ ජාත්‍යන්තර මූල්‍ය අරමුදලෙහි විධායක මණ්ඩලයේ සාකච්ඡා පැවැත්වීම සහ ඒ වන විට ශ්‍රී ලංකා බලධාරීන් වාර්තාව ප්‍රකාශයට පත් කිරීමට ප්‍රතිපත්තිමය වශයෙන් එකඟතාව පළකිරීම
විධායක මණ්ඩල සාකච්ඡාව අවසන් වූ පසු ජාත්‍යන්තර මූල්‍ය අරමුදල මාධ්‍ය නිවේදනයක් නිකුත් කිරීම
හතරවන වගන්තිය යටතේ වූ උපදේශනයෙන් ලබාගත් තොරතුරු පිළිබඳව ජනාධිපති දැනුවත් කිරීම සඳහා ජාත්‍යන්තර මූල්‍ය අරමුදලෙහි නිලධාරී කණ්ඩායමක් දිවයිනට පැමිණීම
ශ්‍රී ලංකා බලධාරීන් එම වාර්තාවට අවශ්‍ය සංශෝධන ඉදිරිපත් කර එකඟ වීමෙන් අනතුරුව අවසන් අවසරය ලබාදීමට කටයුතු කිරීම
අවසන් වාර්තාව 2022 මාර්තු 25 දින ප්‍රකාශයට පත් කිරීම
මූලික ගැටලු
පූර්ව වසංගත සමයේ රාජ්‍ය බදු කප්පාදුව සහ COVID-19 බලපෑම 2020 සහ 2021 දී දළ දේශීය නිෂ්පාදිතයෙන් 10%කට වඩා විශාල මූල්‍ය හිඟයක් ඇති කිරීමට හේතු වූ බව ජාත්‍යන්තර මූල්‍ය අරමුදල පෙන්වා දෙයි.
2021 දී රාජ්‍ය ණය, දළ දේශීය නිෂ්පාදිතයෙන් 119%ක් දක්වා ශීඝ්‍රයෙන් වැඩිවීම ද කැපී පෙනෙන කරුණක් වශයෙන් ජාත්‍යන්තර මූල්‍ය අරමුදල දක්වා ඇත.
2020 දී ශ්‍රී ලංකාවට ජාත්‍යන්තර ප්‍රාග්ධන වෙළඳපොළවල් සඳහා ප්‍රවේශය අහිමි වූ අතර එය ජාත්‍යන්තර සංචිත දැඩි ලෙස පහත වැටීමට හේතු වූ බව ද එම අරමුදල පෙන්වා දෙන කාරණයකි.
IMF නිර්දේශ
සැලකිය යුතු ආදායමක් මත පදනම් වූ මූල්‍ය ඒකාග්‍රතාව ප්‍රතිසංස්කරණ කෙරෙහි අවධානය යොමු කළ යුතු ය. වැට් බදු සහ ආදායම් බදු ශක්තිමත් කිරීම, බදු අනුපාත වැඩි කිරීම, සහ බදු පදනම් පුළුල් කිරීම හරහා පියවර ගත යුතු ය. පාඩු ලබන රාජ්‍ය ව්‍යවසායයන්ගෙන් මූල්‍ය අවදානම් අවම කිරීම උදෙසා රාජ්‍ය මූල්‍ය ගැලපීම සමග බලශක්ති මිලකරණ ප්‍රතිසංස්කරණ ද සිදු කළ යුතු ය
ණය තිරසාරභාවය යථා තත්ත්වයට පත් කිරීම සඳහා පුළුල් උපාය මාර්ගයක් සංවර්ධනය කිරීම සිදු කළ යුතු ය
උද්ධමන ඉලක්කයන්හි මෑතකාලීන කඩවීම තාවකාලික බව සහතික කිරීම සඳහා මෑතකාලීන මුදල් ප්‍රතිපත්ති දැඩි කිරීම - ශ්‍රී ලංකා මහ බැංකුවේ විශාල භාණ්ඩාගාර බිල්පත් ප්‍රමාණය ක්‍රමක්‍රමයෙන් ඉවත් කිරීම (මුදල් අච්චුගැසිම නතරකිරිම) සඳහා මෑතකාලීන පියවර මුදල් අමාත්‍යාංශය සමග සමීප සම්බන්ධීකරණයක් තුළින් ඉදිරියට ගෙන යා යුතු ය
ක්‍රමානුකූලව වෙළඳපළ තීරණය කරන ලද සහ නම්‍යශීලී විනිමය අනුපාතයක් ප්‍රතිෂ්ඨාපනය කිරීම - විනිමය අනුපාතිකයේ අක්‍රමික චලනයන් වලක්වා ගැනීම සඳහා සංක්‍රාන්තිය පරිස්සමින් අනුපිළිවෙලට සකස් කර, විස්තීරණ සාර්ව ආර්ථික ගැලපුම් පැකේජයක කොටසක් ලෙස ක්‍රියාත්මක කළ යුතු ය
අවදානමට ලක්විය හැකි කණ්ඩායම් මත සාර්ව ආර්ථික ගැලපුම්වල අහිතකර බලපෑම් අවම කිරීම සඳහා වියදම් වැඩි කිරීම, ආවරණය පුළුල් කිරීම, සහ ඉලක්ක වැඩිදියුණු කිරීම මඟින් සමාජ ආරක්ෂණ දැල් ශක්තිමත් කළ යුතු ය (පවතින සමෘද්ධිය සමාජ ආරක්ෂණ ක්‍රමය විධිමත්ව අත්‍යාවශ්‍ය ජනතාවට පමණක් ලබාදීම)
IMF අධ්‍යක්ෂ මණ්ඩල තක්සේරුව
ජාත්‍යන්තර මූල්‍ය අරමුදලේ විධායක අධ්‍යක්ෂ මණ්ඩලය තක්සේරුකර ඇති ආකාරයට, දරාගත නොහැකි තරම් ඉහළ ගොස් ඇති රාජ්‍ය ණය, පහළ බැස ඇති ජාත්‍යන්තර සංචිත, සහ ඉදිරි වසරවල අඛණ්ඩව ඉහළ යන විශාල මූල්‍ය අවශ්‍යතා ශ්‍රී ලංකාව මුහුණ දෙන අභියෝග ලෙස දක්වා ඇත.
මේ පසුබිම තුළ සාර්ව ආර්ථිකය ප්‍රතිෂ්ඨාපනය කිරීම සඳහා විශ්වසනීය සහ සුසංයෝගී උපායමාර්ගයක් ක්‍රියාත්මක කිරීමේ හදිසි අවශ්‍යතාවය මෙන්ම ස්ථාවරත්වය සහ ණය තිරසාරත්වය, අවදානමට ලක්විය හැකි කණ්ඩායම් ආරක්ෂා කිරීම සහ ධරිද්‍රතාවය අඩු කිරීම පිළිබඳව දජාත්‍යන්තර මූල්‍ය අරමුදලේ අධ්‍යක්ෂ මණ්ඩලය අවධාරණය කර තිබේ.
ජාත්‍යන්තර මූල්‍ය අරමුදල ශ්‍රී ලංකාව බදු අනුපාත වැඩිකිරීම් සහ බදු පදනම් පුළුල් කිරීමේ ක්‍රියාමාර්ග හරහා වැට් සහ ආදායම් බදු ශක්තිමත් කිරීම කෙරෙහි අවධානය යොමු කළ යුතුබව නිර්දේශ කර ඇත.
මෙය සාර්ව ආර්ථික ස්ථාවරත්වය සහ ණය තිරසාරභාවය යථා තත්ත්වයට පත් කිරීම, අවශ්‍යවන ආසන්න හා මධ්‍ය කාලීන යන දෙකම ආවරණය වන පරිදි විශ්වසනීය සහ සුසංයෝගී උපායමාර්ගයක් ක්‍රියාවට නැංවීම අදහස් කරයි.
පාඩු ලබන රාජ්‍ය ව්‍යවසායයන්ගේ මූල්‍ය අවදානම් අවම කිරීම සඳහා බලශක්ති මිලකරණ ප්‍රතිසංස්කරණ සමග මූල්‍ය ගැලපුම් සිදුකළ යුතු බවට ද ජාත්‍යන්තර මූල්‍ය අරමුදල නිර්දේශකර ඇත.
ඉහළ යන උද්ධමන පීඩනය පාලනය කිරීම සඳහා දැඩි මූල්‍ය ප්‍රතිපත්ති ස්ථාවරයක් අවශ්‍ය බව IMF අධ්‍යක්ෂවරුන් එකඟ වී තිබේ.
අයවැය හිඟය සඳහා මහ බැංකුවේ සෘජු මූල්‍යකරණය ක්‍රමානුකූලව ඉවත් කිරීම ද නිර්දේශ අතර වෙයි.
බාහිර ගැලපීම් සහ ජාත්‍යන්තර සංචිත නැවත ගොඩ නැගීම උදෙසා වෙළඳපොළ තීරණය කරන ලද සහ නම්‍යශීලී විනිමය අනුපාතයකට ක්‍රමානුකූලව නැවත පැමිණීම නිර්දේශ කර ඇත.
කොන්දේසිවලට අනුව ප්‍රාග්ධන ප්‍රවාහ කළමනාකරණ පියවර ක්‍රමයෙන් ලිහිල් කරන ලෙස ද IMF අධ්‍යක්ෂවරුන් බලධාරීන්ගෙන් ඉල්ලා තිබේ.
"දැනටමත් ප්‍රතිපත්ති ක්‍රියාමාර්ග කිහිපයක් ක්‍රියාත්මක යි" - මහ බැංකුව
ජාත්‍යන්තර මූල්‍ය අරමුදලේ හතරවන වගන්තියට අදාල වාර්තාව සම්බන්ධයෙන් ලංකා මහ බැංකුව ප්‍රකාශ කළේ, මුදල් අමාත්‍යාංශය සහ ශ්‍රී ලංකා මහ බැංකුව දැනටමත් ප්‍රතිපත්ති ක්‍රියාමාර්ග කිහිපයක් ක්‍රියාත්මක කර ඇති බව යි.
එම ප්‍රතිපත්තීන් වනුයේ, 2021 වසරේ අගෝස්තු මාසයේ සිට දැඩි මුදල් ප්‍රතිපත්තියක් ක්‍රියාත්මක කිරීම, විනිමය අනුපාතිකයෙහි නම්‍යශීලී බවක් සඳහා ඉඩ හැරීම, විදේශ විනිමය වෙළඳපොළ ගනුදෙනුවලට ඇති සීමාකිරීම් ඉවත් කිරීම, ආදායම් ඉහළ නැංවීමට සැලසුම් කළ පියවර ක්‍රියාත්මක කිරීම, සහ ප්‍රධාන භාණඩ සදහා වෙළඳපොළ මත පදනම්ව මිල ගැලපීමට ඉඩහැරීම යනාදිය යි.
ජාත්‍යන්තර මූල්‍ය අරමුදල සමග සමීප සම්බන්ධතාවයක් අපේක්ෂා කරන බව රජය පෙන්වාදීමත් සමග, එවැනි සම්බන්ධතාවයකට සහයෝගය දැක්වීමට සූදානම්ව සිටින බව ශ්‍රී ලංකා මහ බැංකුව නිවේදනය කළේ ය.
රජයට ප්‍රතිපත්තිමය කරුණු පිළිබඳව තවදුරටත් සවිස්තරාත්මක විශ්ලේෂණ සැපයීම සහ ඒ පිළිබඳව රජය සමග අඛණ්ඩව සමීප සංවාදයක නිරතවීමට අමතරව, සිය විශ්ලේෂණ අඛණ්ඩව ප්‍රකාශයට පත්කර ඇතැ යි ද ශ්‍රී ලංකා මහ බැංකුව සඳහන් කළේ ය.
IMF වාර්තාව පදනම් කර ගෙන දැඩි තීරණය ගත යුතු යි
වයඹ විශ්වවිද්‍යාලයයේ කළමනාකරණ හා මූල්‍ය පීඨයේ මහාචාර්ය අමින්ද මෙත්සිල පෙරේරා පවසා සිටින්නේ IMF වාර්තාව පදනම් කර ගෙන දැඩි තීරණය ගත යුතු බව යි.
ආණ්ඩුව ජාත්‍යන්තර මූල්‍ය අරමුදලෙන් ණය ගැනීමට බලාපොරොත්තු වන්නේ නම්, මේ වාර්තාවේ දක්වා ඇති නිර්දේශ ක්‍රියාත්මක කිරීමට සිදුවනු ඇතැ යි ද ඔහු ප්‍රකාශ කළේ ය.
මහචාර්යවරයා පැවසුවේ සාධාරණ පදනමක් මත එම කරුණු ඉදිරිපත් කර ඇති බව යි.
ජාත්‍යන්තර මූල්‍ය අරමුදල විසින් පෙන්වා දී ඇති ශ්‍රී ලංකාවේ රාජ්‍ය ණය ඉහළ යෑම, ආදයම වියදම අතර පරතරය ඉහළ යෑම, මුදල් මුද්‍රණය, බදු කප්පාදුව වැනි දෑ අලුත් කරුණු නොවන බවත් මහාචාර්යවරයා පෙන්වා දුන්නේ ය.
"ජාත්‍යන්තර මූල්‍ය අරමුදල පිළිබඳ අනියත බියක් ඇති කළානේ පසුගිය කාලේ. හැබැයි මේ වාර්තාව බලපු කෙනෙක්ට තේරෙන්න ඕනේ කිසිම එහෙම නරක පැත්තක් නෙමේ, රට නිවැරදි මාර්ගයට ගන්න ඉතා හොඳ නිගමන ගොඩක් යෝජනා කරලා තියෙනවා," මහාචාර්ය පෙරේරා පවසා සිටියේ ය.
"IMF එක අපිට මේ වාර්තාව දීල තියෙන්නේ, අපි ඉල්ලන ලෝන් එකට සම්බන්ධව නොවේ. මේක සාමාන්‍ය වාර්තාව. මේකට කැමති වුණත්, අකැමති වුණත් රජයට මේ වාර්තාව ක්‍රියාත්මක කරන්න සිද්ධ වෙනවා. එහෙම නැත්නම් ඔවුන්ට අප්‍රේල් මාසයේ IMF එකට යන්න බැහැ," මහාචාර්යවරයා සඳහන් කළේය .
මහාචාර්ය අමින්ද මෙත්සිල පෙන්වා දුන්නේ මේ වාර්තාවේ සියලු කරුණු මේ රටේ සාමාන්‍ය ජනතාවට හානිකර නොවන දේවල් බව යි.
"හැබැයි අපි ඔළුවෙන් තීරණ ගන්නවා නම් හානිකර වෙන්නැහැ. හැබැයි පපුවෙන් තීරණ ගන්නවා නම් හානිකර වෙයි. මොකද සමහර තැන්වල කතා කරනවා රාජ්‍ය අයතන ප්‍රතිව්‍යුහගත කිරීම ගැන."
"හැඟීම්වලට යට වුණොත් අපිට දැනෙයි මේවා හොඳ නැහැ කියලා. හැබැයි අපි තේරුම් ගන්න ඕනේ පාඩු ලබන ආයතනවල හැම පාඩුවක්ම අවසානයේ අපි ගන්න සීනි ග්‍රෑම්100න් ගෙවනවා කියලා," ඔහු පෙන්වා දුන්නේ ය.
"ඒ හින්දා පාඩු ලබන ආයතන, එක්කෝ අකාර්යක්ෂම ආයතන පෞද්ගලීකරණ කරන්න ඕනේ, ප්‍රතිව්‍යුගතකරණය කරන්න ඕනේ හෝ නිලධාරීන්ට ටාර්ගට් දීලා ඒවා දුවන්න යම් ක්‍රමයක් හදන්න ඕනේ. එයාර් ලංකා එක පාඩුයි කියලා සදාකාලිකව ඒ පාඩුව දරන්න බැහැ."
"රටේ සියලු අර්බුදවලට ප්‍රධාන හේතුව විදේශ සංචිත බංකොලොත් වීම යි"
මේ රජය බලයට පත් වන විට අමෙරිකානු ඩොලර් බිලියන 7.6ක් වූ විදේශ සංචිතය අද වන විට 80%කින් බංකොලොත් වී ඇතැ යි සමගි ජන බලවේගය පාර්ලිමේන්තු මන්ත්‍රී ඉරාන් වික්‍රමරත්න ප්‍රවෘත්ති සාකච්ඡාවකට එක්වෙමින් කියා සිටියේ ය.
රටේ උද්ගතව ඇති සියලු අර්බුදවලට ප්‍රධාන හේතුව විදේශ සංචිත බංකොලොත් වී ඩොලර් හිඟය ඇතිවීම බවත්, කෝවිඩ් නිසා ආර්ථිකය කඩා වැටුනායැ යි ආණ්ඩුවේ පාලකයන් හුවාදැක්වීමට උත්සාහ කළ ද රටට ගලා එන ප්‍රේෂණය අඩුවී විදේශ සංචිතය 80%කින් පහත බැස ඇති ලොව එකම රට ශ්‍රී ලංකාව බවත් ඉරාන් වික්‍රමරත්න ප්‍රකාශ කළේ ය.
ලංකාවේ දැනට පවත්නා අර්බුදවලට මුල වත්මන් ජනාධිපති බලයට පත්වූ වහාම බදු කපාහැර රාජ්‍ය ආදායම අඩු කිරිම බව මෙම වාර්තාවේ පැහැදිලිවම සඳහන් කර ඇතැ යි මන්ත්‍රී වික්‍රමරත්න පෙන්වා දුන්නේ ය.
"රටේ ආදායම තුනෙන් එකක ප්‍රමාණයකින් අඩුවීමට තරම් මෙසේ බදු කපා හැරීමට කිසිදු විද්‍යාත්මක පදනමක් තිබී නැති බව ජාත්‍යන්තර මූල්‍ය අරමුදලේ වාර්තාවේ සඳහන් කර තිබෙනවා," ඔහු කියා සිටියේ ය.
"රුපියලේ අගය කෘතිමව පවත්වාගෙන යෑම පිළිබඳව විපක්ෂය සඳහන් කළ ආකාරයට මජාත්‍යන්තර මූල්‍ය ආයතනයේ වාර්තාවේ ද සඳහන් කර තිබෙනවා. විපක්ෂයේ අවවාදය පිළිනොගෙන රුපියලේ අගය එසේ කෘතිමව පවත්වාගෙන යෑම හා එහි ප්‍රතිඵලයක් ලෙස නව කලු කඩයක් බිහිවූ අතර, ඒ හරහා රුපියල 250 දක්වා බාල්දු වුණා. ශ්‍රී ලංකාවට ලැබෙන විදේශීය ප්‍රේෂණ මෙන්ම අපනයන ආදායම ද නොලැබී ගියා. අද රටේ ආර්ථිකයේ ඇති වී තිබෙන ප්‍රධාන අර්බුදය රුපියල කෘතිමව පාලනය කිරීම හරහා රටට ඩොලර් නැතිවී අත්‍යාවශ්‍ය භාණ්ඩ කිසිවක් ආනයනය කරවීමට නොහැකිවීම යි. රටේ ඩොලර් නැති අඩුපාඩුව රුපියල වැඩිපුර මුද්‍රණය කරමින් විසඳිය හැකියැ යි වැරදි මුදල් ප්‍රතිපත්තියක් අනුගමනය කළා. රුපියල මුද්‍රණය කිරීමෙන් ඩොලර් නැති හේතුවෙන් ඇති වූ ආර්ථික අර්බුදය විසඳන්නට හැකි වේයැ යි සිතෙන ආර්ථික විශේෂඥයනුයි මේ රජයේ ඉන්නේත්, රජයට උපදෙස් දෙන්නේත්," ඔහු පැවසීය.
ලංකාව උද්ධමනයෙන් කප් ගසයි?
සමගි ජන බලවේගය පාර්ලිමේන්තු මන්ත්‍රී ඉරාන් වික්‍රමරත්න කියා සිටියේ දැන් ලෝකයේ වැඩිම උද්ධමනය ඇති රට ශ්‍රී ලංකාව බව යි. ප්‍රවෘත්ති සාකච්ඡාවකට එක්වෙමින් ඔහු මිල ගණන් සැසඳීමක් සිදු කළේ ය.
• 2019 වසරේ දී රුපියල් පනහක්ව තිබූ පාන් රාත්තලක මිල වසර 2කින් පසුව අද වන විට රුපියල් 110 යි. රුපියල් 90ක තිරිඟු පිටි කිලෝව දැන් රුපියල් 196 යි. රුපියල් 85ක සීනි කිලෝව දැන් 195 යි.
• සාමාන්‍ය ආර්ථික පිළිවෙත අනුව භාණ්ඩ මිල පොදුවේ වාර්ෂිකව 5%කින් හෝ 10%කින් වැඩිවන්නට ඉඩ ඇතත්, එයට සාපේක්ෂක සේවක වැටුප් වැඩිවීම පොදු ප්‍රවණතාවකි. රුපියල් 140 පරිප්පු කිලෝවක් 420ට දැන් අලෙවි කෙරේ. "පරිප්පු නැති හෝටලයක් නැතැ" යි යන කියමන අනුව දැන් බත් පැකට් එකේ මිල ද 2019ට වඩා 2022 වන විට රුපියල් 100ත් 120ත් අතර මුදලකින් වැඩි වී ඇත.
• රුපියල් 200ට පැවති කොත්තු එකක් අද රුපියල් 500 දක්වා ඉහළ ගොස් ඇත.
• රු. 380ට පැවති ග්‍රෑම් 400ක කිරි පැකට්ටුවක් මේ සතියේ රුපියල් 800කි. එහෙත් වෙළඳපොලේ සොයාගන්නට නැත.
• යකඩ හා සිමෙන්ති විශාල ප්‍රමාණයකින් වැඩි වීම හේතුවෙන් ඉදිකිරීම් ක්ෂේත්‍රයට ප්‍රධාන බාධකයක් ඇතිවී තිබේ. රුපියල් 90ක සිමෙන්ති කොට්ටයක් රු. 1950ට වැඩි වී ඇති අතර, යකඩ ටොන් එකක මිල 120,000 සිට 240,000 ඉක්මවා ඇත.
• ඉන්ධන මිල 100%කින් පමණ වැඩි වි ඇති අතර, ඒ හරහා සියලු භාණ්ඩ හා සේවාවන්හි මිල ද ජනතාවට දරාගත නොහැකි මට්ටමින් වැඩි වී ඇති නිසා සේවා සපයන්නන්ගේ ආදායම් මාර්ගය ද අඩුවී ඇත.
• 2014 වසරේ දී රු. 165ක්ව තිබූ පෙට්‍රල් ලීටරය 2019 වන විට 137 දක්වා යහපාලනය විසින් අඩු කළ නමුදු දැන් එහි මිල රු 254කි. එහෙත් ඉන්දියානු තෙල් සමාගම අලෙවි කරන්නේ රු. 303ට ය.
• රු. 130 ඔටෝ ඩීසල් 2019 දී 104ට අඩු කළා. දැන් 2022 දී එය රු. 176 කි. ඩීසල් හා පෙට්‍රල් මිල වැඩිවීමේ විපාකය සමස්ත සමාජයටම අහිතකර බලපෑම් ඇති කරන බව නොරහසකි.
• 2019 වන විට රු. 1375ක් වූ ගෑස් මිල දැන් එහි සහතික මිල අභිබවා රු. 4000 දක්වා මිලකට අලෙවි කෙරේ.
-BBC සිංහල
ඉන්දීය විදේශ ඇමතිගෙන් ආචාර්ය හර්ෂට මල් මිටක් !
ඉන්දීය විදේශ අමාත්‍ය එස්. ජයශංකර් සහ 1990 සුවසැරිය පිහිටුවීමට කැපවූ ආචාර්ය හර්ෂ ද සිල්වා අතර විශේෂ සාකච්ඡාවක් අද (29) පස්වරුවේ රාජගිරියේ පිහිටි 1990 සුවසැරිය ප්‍රධාන මූලස්ථානයේදී සිදුව ඇත.
මෙම අවස්ථාවේදී ඉන්දීය විදේශ අමාත්‍ය ජයශංකර් පැවසුවේ ඉන්දීය සහයෝගයෙන් ආරම්භ කෙරුණු 1990 සුවසැරිය ගිලන්රථ සේවය අද තිබෙන තත්ත්වය පිළිබඳව තමා අතිශයින්ම සතුටට පත්වන බවයි. ඉදිරියටත් ශ්‍රී ලංකාවට සහයෝගය ලබාදීමට සූදානම් බව පැවසූ ඉන්දීය විදේශ අමාත්‍යවරයා 1990 සුවසැරිය මෙරට ආරම්භ කිරීමට සිදුකළ කැපවීම වෙනුවෙන් ආචාර්ය හර්ෂ ද සිල්වා ට විශේෂ ස්තුතියක්ද පිරිනැමීය. මෙම අවස්ථාවට අමාත්‍ය සුදර්ශනී ප්‍රනාන්දුපුල්ලේ ඇතුළු නිළධාරීන් පිරිසක් සහභාගීවී ඇත.
බැසිල්ගේ හැසිරීම දැක්කාම : ගම්මන්පිලට කෝසම් සුල්තානා මතක් වෙලා !
බැසිල්ගේ කල් ක්‍රියාව දුටු විට අපට සිහිපත් වෙන්නේ ඔටෝමාන් අධිරාජ්‍යයේ සිටි කෝසම් සුල්තානා බව පාර්ලිමේන්තු මන්ත්‍රී උදය ගම්මන්පිල මන්ත්‍රීවරයා පවසයි.
මාධ්‍ය වෙත අදහස් දක්වමින් ඔහු මේ බව සඳහන් කර ඇති අතර වැඩිදුරටත් මෙසේද පවසා තිබේ.
මහද්විප තුනක් පුරා පැතිරුණු දැවැන්ත ඔටෝමාන් අධිරාජ්‍යයේ 17වන සියවසේ සිටි අහ්මත් සුල්තාන්ගේ සුරූපි බිරිඳ තමයි කෝසම් සුල්තානා. අධිරජුගේ පිටුපස සිට රට පාලනය කලේ කෝසම්. ඔහු මිය ගියාට පස්සේ සිය පුතු මුරාද් සිහසුනේ තබාගෙන ඇය රට පාලනය කලා. මවගේ ඇඟිලි ගැසීම් වලට මුරාද් විරුද්ධ වුණාම ඔහු මරා දමා බාල පුතු ඊබ්‍රහිම් රජ පුටුවේ තබා රූකඩ නැටවීම ඉදිරියට ගෙන ගියා. අවසානයේ සිය මවගේ රූකඩ නැටවීමට ඊබ්‍රහිම් විරුද්ධ වුණාම සිය පුතු මරා දමා සිය මුණුබුරු මෙහෙමද් රජ කිරීමට කෝසම් කටයුතු කළා. ඒදා තුර්කියේ කවුරුන් රජ වුණත් රට පාලනය කරන්නේ කෝසම් වගේ ලංකාවේ මොන රාජපක්ෂ රජ වුණත් අන්තිමට රට පාලනය කරන්නේ බැසිල්.
ද්විත්ව පුරවැසියන්ට තනතුරු අහිමි කරන විසි දෙවන ආණ්ඩුක්‍රම ව්‍යවස්ථා සංශෝධනයක් !
බැසිල් රාජපක්ෂ මහතාමහතා රජ වුණේ 20 වන සංශෝධනය නිසා කියලා මිත්‍යාවක් අද සමහරු පතුරනවා. 20 වන සංශෝධනය නිසා සිදු වුණේ බැසිල්ට මුදල් ඇමති ධූරය ලැබුණු එක විතරයි. මුදල් ඇමතිට රට පාලනය කරන්න බලයක් කොහෙන් ද? ජේ ආර් ආණ්ඩුවේ රට පාලනය කලේ රොනී ද මැල් ද? ප්‍රේමදාස ආණ්ඩුවේ රට පාලනය කලේ කේ එන් චොක්සි ද? සිරිසේන ආණ්ඩුවේ රට පාලනය කලේ මංගල සමරවීර ද? නෑ. අද බැසිල් රාජපක්ෂ මහතාමහතා රට පාලනය කරන්නේ 20 වන සංශෝධනය හරහා පත් වූ මුදල් ඇමති විධියට නොවේ. පාර්ලිමේන්තු බහුතරය තිබෙන පොහොට්ටු පක්ෂයේ නායකයා විධියටයි ඔහු අදරට පාලනය කරමින් සිටින්නේ. හරියටම කියනවනම් රට විනාශ කරමින් සිටින්නේ. ඒ වගේම අර්ජුන් මහේන්ද්‍රන්ට මහ බැංකු අධිපති වෙන්න පුළුවන් වුණෙත්19 වන සංශෝධනයේ හිලකින් රිංගලා. 19 වන සංශෝධනය යටපත් කරගෙන 20 වන සංශෝධනය නාවත් බැසිල් රාජපක්ෂ මැතිතුමා මේ ආකාරයෙන්ම රට පාලනය කරණවා. ඒසේ නම් 19 වන සංශෝධනයෙන් වැසුවේ නැති හිල් ටිකක් දැන් වැසිය යුතුයි.
මේ අර්බූදයට විසඳුම විධියට ද්විත්ව පුරවැසියන්ට පාර්ලිමේන්තු මන්ත්‍රි ධූර, ජනාධිපති ධූරය පමණක් නොවේ රාජ්‍යයේ කිසිම වැදගත් තනතුරක් දරන්න බැරි කරන විසි දෙවන ආණ්ඩුක්‍රම ව්‍යවස්ථා සංශෝධනයක් අප්‍රේල් මාසයේ දී පාර්ලිමේන්තුවට ඉදිරිපත් කරන්න බලාපොරොත්තු වෙනවා. ඒ අනුව ද්විත්ව පුරවැසියන්ට කිසිම මහජන නියෝජිත තනතුරක්, ආණ්ඩුවේ තනතුරක් වගේම අධිකරණයේ විනිසුරු තනතුරක් ද දරන්න බැරි වෙනවා.
ජල විදුලි බලාගාරවලටත් අසීරූ කාලයක් !
මේ වන විට ජල විදුලි බලාගාර ආශ්‍රිත ජලාශවල ජල මට්ටම ඉතා සීඝ්‍රයෙන් තවදුරටත් පහත බැස ගොස් ඇති බව විදුලි බල අමාත්‍යංශය පවසයි.
එම නිසා ජල විදුලි විදුලිය ජනනය ඉතා අඩු මට්ටමකට පත්ව ඇතැයි ද සඳහන් වෙයි.
එම නිසා විදුලිය ඉතා අරපිරිමැස්මෙන් භාවිත කරන්නේ රටේ ජනතාවගෙන් ඉල්ලා සිටින බවද එම අමාත්‍යාංශය සඳහන් කරයි.
කාසල්රි ජලාශයේ ජල මට්ටම මීටර් 15ක් පමණ දක්වා ද දක්වාද මාඋස්සාකැලේ ජලාශය දක්වා ද මාවුස්සාකැලේ ජලාශයේ ජල මට්ටම මීටර් දහතුන13ක් දක්වා ද දක්වාද සමනල වැව ජලාශයේ ජල මට්ටම මීටර් 25 ක් දක්වාද කොත්මලේ ජලාශයේ ජල මට්ටම මීටර් 24 ක් දක්වාද වික්ටෝරියා ජලාශයේ ජල මට්ටම මීටර් 27ක් දක්වා ද ආදී වශයෙන් ඉතා පහත ගොස් ඇතැයි ද විදුලිබල අමාත්‍යාංශය පවසයි.
මහවැලි ජලාශවලින් පානය පානීය ජල අවශ්‍යතාවලට සහ කෘෂිකාර්මික කටයුතුවලටත් ජලය මුදාහැරීමට සිදුවීම නිසා විදුලි ජනනය තවදුරටත් සීමා වන බව ද අමාත්‍යංශය වැඩිදුරටත් සඳහන් කර ඇත.
ඉන්දියාව සහ ශ්‍රී ලංකාව අතර ගිවිසුම් 06 ක් අත්සන් කරයි
ඉන්දියාව සහ ශ්‍රී ලංකාව ද්වීපාර්ශවීය අවබෝධතා ගිවිසුම් 06 කට අත්සන් තබා තිබේ.
විදේශ අමාත්‍යංශයේදී ඊයේ අදාළ ගිවිසුම් සඳහා අත්සන් කළ බව ඉන්දීය මහකොමසාරිස් කාර්යාලය සඳහන් කළේය.
ඒ අනුව,
- ඒ අනුව ඩිජිටල් අන්‍යනතා වැඩසටහනක් ක්‍රියාත්මක කිරීම ,
- සමුද්‍රීය ගලවා ගැනීමේ සම්බන්ධීකරණ මධ්‍යස්ථානයක් ඇති කිරීම ,
- යාපනයට ඔබ්බෙන් වූ දූපත් 03ක දෙමුහුන් බලාගාර ව්‍යාපෘති ක්‍රියාත්මක කිරීම සම්බන්ධයෙන් වන අවබෝධතා ගිවිසුම්වලට අත්සන් තබා තිබේ.
- විදේශ අමාතයංශය පැවසුවේ, ශ්‍රී ලංකාවේ ධීවර වරායන් සංවර්ධනය කිරීම ,
- ගාල්ල දිස්ත්‍රික්කයේ පාසල් 200ක පරිගණක විද්‍යාගාර පිහිටුවීම සඳහා වන ගිවිසුම්වලට ද අත්සන් තැබූ බවයි.
මීට අමතරව සුශ්මා ස්වරාජ් විදේශ සේවා ආයතනය සහ බණ්ඩාරනායක ජාත්‍යන්තර රාජ තාන්ත්‍රික පුහුණු ආයතනය අතර ද අවබෝධතා ගිවිසුමකට අත්සන් තබා තිබේ.
කන්න කියා ණය ගන්නා ආණ්ඩුව දරුවන්ගේ පෝෂණ වේලටත් තට්ටු කරලා
අත්‍යවශ්‍ය ආහාර ද්‍රව්‍ය ආනයනය කිරීම සඳහා බව පවසමින් අසල්වැසි ඉන්දියාවෙන් තවත් ඩොලර් බිලියන එකහමාරක ණයක් ලබා ගැනීමට සැරසෙන ආණ්ඩුව, පාසල් දරුවන්ගේ පෝෂණය වෙනුවෙන් ලබාදෙන ආහාර වේලත් කප්පාදු කර ඇති බව ලංකා ගුරු සංගමයක් චෝදනා කරයි.
ලංකා ගුරු සංගමය පවසන පරිදි දිවයින පුරා තෝරා ගත් පාසල් 7000 කට ආසන්න ප්‍රමණයක පාසල් දරුවන්ට පෝෂණ ව්‍යාපෘතියක් ලෙස ආහාර වේලක් ලබාදීම වසර පහක පමණ කාලයක සිට සිදු කරනු ලබයි.
නිවේදනයක් නිතුක් කරමින් ලංකා ගුරු සංගමයේ ප්‍රධාන ලේකම් ජෝසප් ස්ටාලින් පෙන්වා දෙන්නේ, 2017 වසරේ මාර්තු 17 දිනැති චක්‍රලේඛය අනුව නියමිත වට්ටෝරුවක් යටතේ මෙම ආහාරවේල ලබාදීම සිදු කරන අතර, 2022 මාර්තු 21 දිනැති අධ්‍යාපන ලේකම්වරයාගේ අත්සනින් යුතු ලිපිය මගින් එම ආහාර වට්ටෝරුව සංශෝධනය කර ඇති බවයි.
"රටේ පවතින වර්තමාන ආර්ථික තත්වය මත එක් දරුවෙකුගේ ආහාර වේල සඳහා ගෙවන දෛනික මුදල ප්‍රමාණවත් නොවන බවට ආහාර සැපයුම්කරුවන් විසින් සිදු කරන ලද ඉල්ලීම අනුව ජාතික ක්‍රමසම්පාදන දෙපාර්තමේන්තුව හා සෞඛ්‍ය අමාත්‍යාංශයේ නිර්දේශ මත අවස්ථානුකූලව ගතයුතු හොඳම පියවර ලෙස 10/2017 චක්‍රලේඛයේ සඳහන් කර ඇති ආහාර වට්ටෝරුව වහාම ක්‍රියාත්මක වන පරිදි සංශෝධනය කරන බව අධ්‍යාපන ලේකම්වරයාගේ උක්ත ලිපියෙහි සඳහන් කර ඇත."
දිවයිනේ ජ්‍යෙෂ්ඨ ගුරු සංගම් නායකයකු වන ජෝසප් ස්ටාලින් පෙන්වා දෙන්නේ, ඒ අනුව එක් ශිෂ්‍යයකුගේ ආහාර වේල වෙනුවෙන් දෛනිකව වෙන් කරන රුපියල් 30 ක මුදල තුළම සංශෝධිත ආහාර වට්ටෝරුව ලබාදිය යුතු බව එම ලිපියෙහි සඳහන් කර ඇති බවයි.
මෙය දරුවන්ගේ පෝෂණ තත්වය සම්බන්ධයෙන් නොසලකා හැර ගන්නා ලද තීරණයක් බව අවධාරණය කරන ගුරු සම්ගම් නායකයා අවධාරණය කරන්නේ ආර්ථික ගැටලු හමුවේ පාසල් දරුවන්ගේ ආහාර වේල වෙනුවෙන් ලබාදෙන ප්‍රතිපාදන වැඩි නොකර දරුවන්ගේ ආහාරවේල කප්පාදු කිරීම බරපතල ගැටලුවක් බවයි.
"10/2017 චක්‍රලේකයට අනුව එක් දරුවෙකුට සහල් ග්‍රෑම් 75 ක බත් ලබාදිය යුතු වූ අතර, සංශෝධිත ආහාර වට්ටෝරුව යටතේ ලබාදෙන්නේ සහල් ග්‍රෑම් 60 ක බත් ප්‍රමාණයකි. ග්‍රෑම් 50 ක් ලෙස ලබාදිය යුතු බිත්තර ප්‍රමාණය ග්‍රෑම් 25 දක්වා අඩු කර ඇත. හාල්මැස්සන්, කරවල ආදිය සම්පූර්ණයෙන්ම සංශෝධිත ආහාර වට්ටෝරුවෙන් ඉවත් කර ඇති අතර, තවත් සංශෝධන ගණනාවක් එහි අඩංගු වේ. මේ ආකාරයෙන් පෝෂණ තත්වය හීන වන ලෙස දරුවන්ගේ ආහාර වට්ටෝරුව සංශෝධනය කර තිබීම බරපතල ගැටලුවක් වන අතර, සෞඛ්‍ය බලධාරීන් සහ අධ්‍යාපන බලධාරීන් අවස්ථානුකූල හොඳම තීරණය ලෙස මේ ආකාරයෙන් දරුවන්ගේ පෝෂණය හීන කිරීමට තීරණ ගන්නේ කෙසේද යන්න බරපතල ගැටලුවකි."
රටේ පවතින ආර්ථික අවපාතය තුළ දරිද්‍රතාවයෙන් පෙළෙන දෙමව්පියන්ට තම දරුවන් පෝෂණය කිරීමේ බරපතල ගැටලුවකට මුහුණ පෑමට සිදුව ඇති අතර, සමහර පාසල් දරුවන්ට ලැබෙන එකම පෝෂ්‍යදායී ආහාර වේල වන්නේ පාසලෙන් ලබාදෙන මෙම ආහාරවේල පමණක් බව පෙන්වා දෙන ලංකා ගුරු සංගමය වැඩි දුරටත් අවධාරණය කරන්නේ සමහර දරුවන් ආහාරවේල ලබාගැනීම සඳහා පාසල් පැමිණෙන තත්වයන් ද දක්නට ලැබෙන බවයි.
=මේ වන විට රුපියල් 30 ක මුදලට ආහාර වේල ලබාදිය නොහැකිව බොහෝ ආහාර සැපයුම්කරුවන් විසින් පාසල්වලට ආහාර ලබාදීම නතර කර ඇති අතර, ඒ තත්වය යටතේ දරුවන්ට ආහාර ලැබීම සිදු නොවන බවත් ජෝසප් ස්ටාලින් ගුරු සංගම් නායකයා සිය නිවේදනය මගින් පෙන්වා දී තිබේ.
මේ තත්වය තුළ පාසල් දරුවන්ගේ ආහාර වේල කප්පාදු නොකර පෝෂ්‍යදායී හා ප්‍රමාණවත් ආහාර වේලක් දරුවන්ට ලබාදීමට කටයුතු යොදන ලෙස ලංකා ගුරු සංගමය අධ්‍යාපන බලධාරීන්ගෙන් ඉල්ලා සිටී.
සජබ බෙදීමක් එළියට පැනලා !
' වෙලාවේ කවුරුවත් ආණ්ඩු බලය ලබාගැනීමක්, පක්ෂ දේශපාලනයක් කරන්න, මේබොර දියේ මාළු බාන වෙලාවක් නෙමෙයි. මේ වෙලාවේ ජනතාව දැඩි ලෙස අසීරුතාවයට පත්වෙලා, පෝලිම්වල මැරී වැටෙන, තුන්වේල තියා දෙවේලක්වත් කන්න බැරි වෙලා ඉන්න වෙලාවක්. ධනවතුන්, මධ්‍යම පංතිය කඩාගෙන වැටෙන, දුප්පත් ජනතාවට කන්න බොන්න නැතිවෙන දුර්භාග්‍ය සම්පන්න කාලයක් උදාවෙලා තියෙන්නේ." යැයි සජබ පාර්ලිමේන්තු මන්ත්‍රී මනූෂ නානායක්කාර පවසයි.
ප්‍රසිද්ධ මාධ්‍ය හමුවකදී අදහස් දක්වමින් ඔහු මේ බව සඳහන් කළ අතර වැඩිදුරටත් මෙසේද පැවසීය.
මේ වගේ වෙලාවක දේශපාලන ගේම් ගහන්නවත්, මේ හරහා වෙනත් බල තුලනයක් ඇති කිරීම නෙමෙයි විය යුත්තේ. මේ වෙලාවේ අපි සියලු දෙනාම එකට එකතුවිය යුතුයි. එකට එකතුවෙලා රාජපක්ෂලා එලවන්න කටයුතු කළ යුතුයි.
එහෙම නැතිව පුද්ගලික ඉලක්ක වෙනුවෙන්, තම තමන්ගේ න්‍යාය පත්‍රය අනුව කටයුතු කරන වෙලාවක් නෙමෙයි මේක.
සියලු වාද බේද අතහැරලා, පැත්තකට දාලා මේ ආණ්ඩුකරණ භාරගත යුතුයි. එතැනදී පක්ෂ දේශපාලනයවත්, තම තමන්ගේ පුද්ගලික න්‍යාය පත්‍රවත් තිබිය යුතු නෑ.
පෝලිමේ මැරෙන මිනිස්සු තවදුරටත් මැරුනට පස්සේ, තවදුරටත් මිනිස්සු හාමතේ මැරුණට පස්සේ, දරුවන්ගේ අධ්‍යාපනය කඩාගෙන වැටුනට පස්සේ, ආර්ථිකය බංකොලොත් වුනාට පස්සේ අපි කවුරු ආණ්ඩු ගත්තත් වැඩක් නෑ. කවුරු කවුරුත් ජනාධිපතිකම් ගන්න සූටි මහගෙන හිටියත් ඒ ජනාධිපතිකම් වලට ගිහින් වැඩක් නෑ.
එතැනදී අරයා අරහෙට යනවාද, මෙතැනට යනවාද කියන එක අදාල වෙන්නේ නෑ. සියලු දෙනාම තමන් ඉන්නා තැන්වලම සිටිමින් රටේ මිනිසුන්ගේ දුක වෙනුවෙන් මිනිස්සු එකතුවෙන්න ඕන. එහෙම නැතිව තමන්ගේ පුද්ගලික අරමුණු තියාගෙන, මිනිස්සුන්ට කන්න බොන්න නැතිව මැරිලා වැටුනට පස්සේ අපිට ඉබේම බලය ලැබේවි කියලා හිතාගෙන කවුරු කවුරු හරි දේශපාලනය කරනවා නම් ඒක වැරදියි.
පක්ෂ දේශපාලනයට වඩා අපිට මේ අවස්ථාවේදී වැදගත් වන්නේ පොදු ප්‍රතිපත්තියක් නිර්මාණය කර ගැනීමයි. ජනතාව හාමතේ මැරෙන හැටි, දරුවන්ගේ අධ්‍යාපනය කඩාකප්පල් වෙන හැටි අපිට තවදුරටත් බලාගෙන ඉන්න බෑ.''
සජිත් වෙන මතයක !
කෙසේ වුවත් මේ සම්බන්ධයෙන් අදහස් දක්වමින් දේශපාලන විචාරකයන් පවසන්නේ මනූෂ නානායක්කාර මන්ත්‍රීවරයා සහ පක්ෂයේ නායක සජිත් ප්‍රේමදාස පවසන අරමුණුවල ගැටුමක් නිරීක්ෂණය වන බවයි.
මේ වන විට මේ ආකාරයට සජබ තුළ ප්‍රවණතා කිහිපයක්ම නිරීක්ෂණය වන බවත් එහිදී ආර්ථික අර්බුදය සම්බන්ධයෙන් එරාන් වික්‍රමරත්න , හර්ෂ ද සිල්වා සහ කබීර් හෂීම් යන මන්ත්‍රීවරුන් දක්වන අදහස් , තතලතා අතුකෝරළ සහ රෝහිණී කවිරත්න මන්ත්‍රීවරියන් දක්වන අදහස් , මනූෂ නානායක්කාර සහ හරීන් ප්‍රනාන්දු ඇතුළු තරුණ මන්ත්‍රීවරුන් දක්වන අදහස් සහ පක්ෂ නායක සජිත් ප්‍රේමදාස දක්වන අදහස් වල වෙනස්කම් ඇති බවත් දේශපාලන විචාරකයන් පවසයි.
ඉන්දියාවෙන් තවත් ඩොලර් බිලියනයක් ණයට ඉල්ලලා !
අත්‍යවශ්‍ය ආහාර ද්‍රව්‍ය ආනයනය කිරීම සඳහා ශ්‍රී ලංකාව, ඉන්දියාවෙන් තවත් ඩොලර් බිලියන 01ක අතිරේක ණයක් ඉල්ලා ඇති බව රොයිටර් පුවත් සේවය වාර්තා කරයි.
රොයිටර් වාර්තාවට අනුව සහල්, තිරිඟු පිටි, ධාන්‍ය වර්ග, සීනි සහ ඖෂධ වැනි අත්‍යවශ්‍ය ද්‍රව්‍ය ආනයනය කිරීම සඳහා ශ්‍රී ලංකාව ඉල්ලා සිටින ලද නව ණය මුදල පිළිබඳ ඉල්ලීම ඉටු කරන බව ඉන්දීය බලධාරීන් පෙන්වා දී ඇති බවය.
මෙය දැනටමත් ඉන්දියාව විසින් ප්‍රතිඥා දී ඇති ඩොලර් බිලියන 01 ක ණය මුදලට අමතරව ලබා දෙනු ඇති.
මුදල් අමාත්‍ය බැසිල් රාජපක්ෂ මේ මාසයේ ඉන්දියාවේ නවදිල්ලි අගනුවරදී ඩොලර් බිලියන 01 ක මුල් ණය මුදලක් ලබා ගැනීමේ ගිවසුමටකට ද අත්සන් තැබුවේ ය.
ඊට අමතරව, ඉන්දියාව මේ වසර මුලදී ශ්‍රී ලංකාවට ඉන්ධන මිලදී ගැනීම් සඳහා ඩොලර් මිලියන 500 ක් සහ ඩොලර් මිලියන 400 ක විනිමය හුවමාරු පහසුකමක් ලබා දුන්නේ ය.
සජිත්ගේ ඉක්මන් ජනාධිපතිවරණ සිහිනය හබක් !
ඉක්මන් ජනාධිපතිවරණයක් අවශ්‍ය බව පසුගියදා සජබ සංවිධානය කළ විරෝධතා උද්ඝෝෂණයක් අමතමින් එම පක්ෂයේ නායක සජිත් ප්‍රේමදාස පවසා සිටියත්, වසර දෙකහමාරයක් යනතුරු පාර්ලිමේන්තුව විසුරුවාහැරීමට ජනාධිපතිවරයාටවත් නොමැති බව කථානායක මහින්ද යාපා අබේවර්ධන පවසයි.
ඊයේ (27) මාතර පාලටුව බෞද්ධෝදය විහාරස්ථානයේ පැවති උත්සවයකින් අනතුරුව මාධ්‍යවේදියෙකු ඇසූ ප්‍රශ්නයකට පිළිතුරුදෙමින් ඔහු මේ බව සඳහන් කර ඇත.
එහිදී වැඩිදුරටත් අදහස් දක්වමින් කතානායක මෙසේද සඳහන් කර ඇත.
“ව්‍යවස්ථාවේ හැටියට පාර්ලිමේන්තුව විසුරුවාහැරීමේ ක්‍රම තියෙනවා. ඒ ක්‍රමයකින් විසුරුවාහරිනවා හැරෙන්නට පාර්ලිමේන්තුව විසුරුවාහරින්න කාටවත් බැහැ. ජනාධිපතිතුමාටවත් බැහැ. කවුරුන් කිව්වත් ජනාධිපතිතුමාටවත් මේ මොහොතේ පාර්ලිමේන්තුව විසුරුවාහරින්න බැහැ. පාර්ලිමේන්තුව ඇතුළේ මන්ත්‍රීවරු එකතුවෙලා මොනවා හරි වෙනසක් කරගන්නවා නම් ඒක වෙනම කතාවක්. නමුත් පාර්ලිමේන්තුව විසුරවාහරින්න වසර දෙකහමාරක් යනතුරු පාර්ලිමේන්තුවට, ජනාධිපතිවරයාටවත් බලයක් නැහැ.”
පාර්ලිමේන්තුව ඇතුලේ ආණ්ඩුව පෙරළන හැටි මෙන්න !
පාර්ලිමේන්තුව තුළින් ආණ්ඩුව පෙරළා දමන්නේ කෙසේදැයි 43 සේනාංක නායක, හිටපු අමාත්‍ය, පාර්ලිමේන්තු මන්ත්‍රී පාඨලී චම්පික රණවක විසින් හෙළිදරව්වක් සිදුකර ඇත.
ඔහු පෙන්වා දෙන්නේ පාර්ලිමේන්තුව තුළ වත්මන් පොදුජන පෙරමුණු ආණ්ඩුවේ සරළ බහුතරය අහිමි වීම සඳහා තවත් ඇත්තේ මන්ත්‍රී ආසන 3 ක වෙනසක් පමණක් බවය.
හිටපු ජනාධිපති මෛත්‍රීපාල සිරිසේන ගේ නායකත්වයෙන් යුත් ශ්‍රී ලංකා නිදහස් පක්ෂය වත්මන් ආණ්ඩුව සම්බන්ධයෙන් සිදු කරන විවේචන මෙන්ම ශ්‍රී ලංකා පොදුජන පෙරමුණ සමග සන්ධානගතව සිට පසුගියදා අමාත්‍ය ධුරයන්ගෙන් ඉවත් කරන ලද විමල් - ගම්මන්පිල ප්‍රමුඛ පක්ෂ 11 සන්ධානය බැසිල් රාජපක්ෂ ඇතුළු රාජපක්ෂවරුන් සම්බන්ධයෙන් දැන් සිදු කරන ප්‍රකාශ සැබෑ අවංක විවේචනයන් නම්, සමගි ජන බලවේගය තුළ සිටින පැහැදිලිව වත්මන් ආණ්ඩුව එළවා දැමීම සඳහා අවංකව කටයුතු කරන අය යන මේ සියල්ලන් පාර්ලිමේන්තුව තුළ වත්මන් ආණ්ඩුවට එරෙහිව අවංකව කටයුතු කරන්නේ නම් ආණ්ඩුවේ සරළ බහුතරය අහිමි වීම පැහැදිලිව නුදුරේදීම සිදු විය හැක්කක් බව රණවක මන්ත්‍රීවරයා ගේ අදහසය.
ඊයේ මාධ්‍ය හමුවේ අදහස් දැක්වූ රණවක මන්ත්‍රීවරයා පෙන්වා දුන්නේ ද රාජපක්ෂවරු යවන ක්‍රමය ගැන කතා කරන සර්වපාක්ෂික සමුළුවක් තිබේ නම් තමන් ඉතා කැමැත්තෙන් ඊට සහභාගී වන බවය. එක්සත් ජාතික පක්ෂයන් විසින් සංවිධානය කරන ලද සත්‍යග්‍රහයට එක්වූ 43 සේනාංකය ඉදිරියේ දී ශ්‍රී ලංකා නිදහස් පක්ෂය, ජනතා විමුක්ති පෙරමුණ මෙන්ම රාජපක්ෂවරු නොවන ආණ්ඩුව තුළ සිටින කණ්ඩායම් ආරාධනා කළහොත් 43 සේනාංකය ඒ අය සමග කටයුතු කිරීමට සූදානමින් සිටින බවය.
"රටට දැන් අවශ්‍යයි පුළුල් සන්ධානයක්. පොදු එකඟතාවයක්. මේ අර්බුධයෙන් ගැලවෙන්න මේ තනි මතවලට, තනි ගමන් වලට වඩා සාමූහික ප්‍රයත්නයක් රටට දැන් අවශ්‍යයි. එකිනෙකට වෙනස් මත තියෙන අය එකතු කරගන්න එක ඉතාම දුෂ්කර දෙයක් . නමුත් මේ මොහොතේ රටට අවශ්‍ය කාරණය ඒක තමයි. ඒ සඳහා අපි එක්සත් ජාතික පක්ෂය එක්ක විතරක් නෙවෙයි. ශ්‍රී ලංකා පොදුජන පෙරමුණේ රාජපක්ෂවරු නොවන වෙනස් අදහස් දරන ප්‍රගතිශීලී සියලු දෙනා එක්කම කටයුතු කරන්න සූදානම්."
ඛණිජ තෙල් අර්බුදය සම්බන්ධයෙන් ද අදහස් දක්වන පාඨලී චම්පික රණවක මහතා පවසන්නේ දිනපතා ඉන්ධන මිල වැඩි කිරීමේ ක්‍රියාදාමයකට ආණ්ඩුව දැන් පෙළඹී ඇති බවය. අයිඕසී සමාගම වෙත රුසියාව විසින් තෙල් ලබාදෙන්නේ වෙළෙඳපොලේ පවතින මිලට ඉතා අඩු මිලකටය. එසේ අඩුමිලට ලබාගනිමින් ශ්‍රී ලංකාවේ පාරිභෝගිකයන් වෙත අධික මිලකට ඉන්ධන අලෙවි කරන අයි ඕ සී සමාගම ඉන් ලබන්නේ දැවැන්ත ලාභයක් බව රණවක මන්ත්‍රීවරයා හෙළිදරව් කළේය.
ලංකා ඛණිජ තෙල් සංස්ථාව ද අයි ඕ සී ය වෙතින් තෙල් ලබාගන්නා පසුබිමක් තුළ අයි ඕ සීය ලබන අධික ලාභය සිපෙට්කෝව වෙත ලබාගැනීමේ වැඩපිළිවෙලක් සඳහා ආණ්ඩුව කටයුතු නොකරන්නේ කුමන හේතුවක් නිසා දැයි රණවක මන්ත්‍රීවරයා ප්‍රශ්න කරයි.
මේ වෙලාවේ අගමැති වෙන්න : රනිල්ට පිස්සු නෑ !
අග්‍රාමාත්‍ය ධූරය හිටපු අග්‍රාමාත්‍ය රනිල් වික්‍රමසිංහ වෙත දීමට කිසිදු සූදානමක් නැති බව පොදුජන පෙරමුණේ මහ ලේකම් පාර්ලිමේන්තු මන්ත්‍රී සාගර කාරියවසම් පවසයි.
අගමැති ධුරය සඳහා සුදුසුම පුද්ගලයා මේ වන විට එම තනතුර දරන බවත් ඔහු පවසන අතර ඒ එම පක්ෂයේ මාධ්‍ය හමුවකදී අදහස් දක්වමින් ය.
අගමැති ධූරය සහ ජාතික ආණ්ඩුවක් පිළිබඳව පළ වන වාර්තා පිළිබඳව අද පැවති මාධ්‍ය හමුවේදී ශ්‍රී ලංකා පොදු ජන පෙරමුණ අදහස් පළ කළ අතර මාධ්‍යවේදීන් කළ ප්‍රශ්න කිරීම්වලට පිළිතුරු දෙමින් අමාත්‍ය රෝහිත අබේගුණවර්ධන පැවසුවේ, රනිල් වික්‍රමසිංහ මහතාට අගමැතිකම ලබා දීමට තරම් මොලේ අමාරුවක් සිය පක්ෂයේ කිසිවෙකුට ඇතැයි, තමන් නොසිතන බවයි.
මේ වෙලාවේ අගමැති වෙන්න තරම් මොලේ අමාරුවක් රනිල්ට තියෙනවාද ?
මේ සම්බන්ධයෙන් අප කළ විමසීමකට ප්‍රතිචාර දක්වමින් එජාප ප්‍රබලයකු සඳහන් කර සිටියේ මේ මොහොතේ අගමැති වීමට තරම් මොළේ අමාරුවක් රනිල් වික්‍රමසිංහ නායකයාට ඇතැයි තමන්ද නොසිතන බවයි.
හිටපු අග්‍රාමාත්‍ය රනිල් වික්‍රමසිංහ රට හමුවේ යෝජනා කර ඇත්තේ , රාජ්‍ය පාලනයේ අසමත් බව සෑම අංශයකින්ම ඔප්පු කළ වත්මන් පාලනය තුළ අගමැති වීමක් නොව, ජාතික ප්‍රතිපත්ති රාමුවක් සකස්කර රට වැටී ඇති ගිනිය නොහැකි අර්බුදයෙන් ගොඩ ගැනීම බව්ත් ඔහු පැවසීය.
එහිදී එජාප ප්‍රබලයා වැඩිදුරටත් මෙසේද අදහස් දැක්වීය.
අපිට කිසිම හදිසියක් නෑ හෙට ආණ්ඩුව ගන්න. අනික එහෙම ආවට ගියාට ආණ්ඩු ගන්නත් බෑ. අපි ඔය සසමහරු වගේ ව්‍යවස්ථාව අමතක වෙලා, හෙට ජනාධිපතිවරණයක් තියන්න කියන්නෙත් නෑ. මහින්ද අගමැතිතුමාගෙන් කොයි වෙලාවෙද අගමැතිකම ගන්නේ කියලා කුරුමාණම් ඇල්ලිල්ලකුත් අපේ නෑ. අපිට දැක්මක් වැඩපිළිවෙළක් තියෙනවා. නමුත් එය මේ මොහොතට ප්‍රමාණවත් නෑ. මොකද ඒ වැඩපිළිවෙළ ක්‍රියාත්මක කරන්න බලය අපිට නෑ. හැබැයි අපි, ඒ බලය ලබාගන්න ක්‍රියාත්මක වෙනවා. ඒක ආවට ගියාට කරන්න බෑ. යහපාලනය සම්බන්ධයෙන් අපිට උගත් පාඩම් ප්‍රමාණයක් තියෙනවා.
කොහොම නමුත් ජනතාව මේ වෙලාවේ හිටපු අග්‍රාමාත්‍ය රනිල් වික්‍රමසිංහ ඇතුළු එක්සත් ජාතික පක්ෂය දිහා බැලීම වැදගත්. කොහොමටත් වෙන්න ඉඩක් නැති , පොදුජන පෙරමුණ ආණ්ඩුවේ රනිල් අගමැති වෙන්න වගේ හිනා යන ගොසිප් වලට ආණ්ඩුවේ ප්‍රධාන පක්ෂයේ ලේකම් මාධ්‍ය හමුවක් තියනවා. ඒවා දැකලා සමහරු සැනසුම් සුසුම් හෙළනවා. ඒ කියන්නේ මොකක්ද ? මේ මහ අර්බුදය ගොඩදාන්න පුළුවන් නායකයා රනිල් වික්‍රමසිංහ බව මේ උදවිය දන්නවා. ඔවුන් ගේ නායකයන් අසමත් බවත් දන්නවා. වෙනමොන කතාද ?"
රටඉඳි බද්ද රුපියලට බස්සයි !
ආනයනික රට ඉඳි කිලෝග්‍රෑම් 1ක් සඳහා රුපියල් 200ක විශේෂ වෙළෙඳ භාණ්ඩ බද්ද රුපියල් 199කින් අද (28) සිට ක්‍රියාත්මක වන පරිදි අඩු කර ඇත.
රාමසාන් සමයේ මුස්ලිම් ජනතාවට සහන සැලසීමේ පියවරක් ලෙස මේ බදු මුදල් අඩු කරන ලෙස මුස්ලීම් ජාතික පාර්ලිමේන්තු මන්ත්‍රීවරුන් ඇතුළු පිරිසක් අවස්ථා කිහිපයකම ප්‍රසිද්ධියේ ආණ්ඩුවට බලකරනු පසුගිය සමයේ දකින්නට ලැබිණි.
අදාළ බදු අඩුකිරීම සම්බන්ධයෙන් මුදල් අමාත්‍යංශය විසින් ද නිවේදනයක් නිකුත්කර ඇති අතර එය පහත දැක්වෙයි.
ඉන්දීය විදේශ ඇමති ජනපති හමුවෙයි
තෙදින නිල සංචාරයක් සඳහා දිවයිනට පැමිණ සිටින ඉන්දීය විදේශ අමාත්‍ය ආචාර්ය එස්. ජෙයිශංකර් අද (28) පෙරවරුවේ ජනාධිපති ගෝඨාභය රාජපක්ෂ හමු විය.
ජෙයිශංකර් මහතාගේ පැමිණීම පිළිබඳවත් ආහාර, ඖෂධ ඇතුළු අත්‍යවශ්‍ය ද්‍රව්‍ය ආනයනය සඳහා ඇමෙරිකානු ඩොලර් බිලියනයක ණය ප්‍රදාන ලබා දීම පිළිබඳව ත් ජනාධිපතිවරයා එහිදී සිය සතුට පළ කළ බව ජනාධිපති මාධ්‍ය අංශය පවසයි.
ජෙයිශංකර් මහතා දිවයිනට පැමිණ සිටින්නේ, අද කොළඹදී ඇරඹෙන පස්වන බිම්ස්ටෙක් සමුළුවට සහභාගී වීම සඳහායි.
මේ අතර මේ වසරේදී ශ්‍රී ලංකාව සහ ඉන්දියාව අතර රාජ්‍ය තාන්ත්‍රික සබඳතාවලට 75 වසරක් සැපිරීම නිමිත්තෙන් සමරු කාසියක් සහ සමරු මුද්දරයක් නිකුත් කිරීම ඇතුළු සැමරීමේ උත්සව ගණනාවක් සංවිධාන කර ඇති බව ද ජනාධිපති මාධ්‍ය අංශය නිකුත් කළ නිවේදනයේ සඳහන් ය.
ජාත්‍යන්තර ගුවන් ගමන් සඳහා රත්මලාන විවෘත කෙරේ
රත්මලාන ගුවන්තොටුපොළ යළි ජාත්‍යන්තර ගුවන් තොටුපොළක් බවට පත් කර තිබේ.
වසර 54කට පසු රත්මලාන ගුවන් තොටුපලේ සිට ජාත්‍යන්තර ගුවන් ගමන් යළි ආරම්භ කර ඇත.
ඒ අනුව ජාත්‍යන්තර ගුවන් තොටුපොළක් බවට පත් කරමින් පළමු ගුවන් යානය (27) මාලදිවයින සිට පැමිණියේ ය.
මෙම ගුවන්තොටුපොළ යළි ජාත්‍යන්තර ගුවන්තොටුපළක් බවට පත්කිරීම වෙනුවෙන් වු නියමයන් සපුරා ඇති බව සදහන් කරමින් ගුවන් තොටුපොළ සහතික කිරීමේ ජාත්‍යන්තර සහතිකය ද මෙහිදී සිවිල් ගුවන්සේවා අධිකාරිය මගින් ගුවන්තොටුපොළ හා ගුවන් සේවා ශ්‍රී ලංකා පුද්ගලික සමාගම වෙන භාර දුන්නේය.
රනිල්ගේ උත්සාහය සාර්ථකයි : IMF වාර්තාව ගැන විවාදයක් !
ජාත්‍යන්තර මූල්‍ය අරමුදල විසින් ලංකාව සම්බන්ධයෙන් නිකුත්කර ඇති වාර්තාව ගැන පාර්ලිමේන්තුවේදී වහාම විවාදයක් පවත්වන ලෙස හිටපු අග්‍රාමාත්‍ය රනිල් වික්‍රමසිංහ ඉල්ලා ඇත.
මේ බව සඳහන් කරමින් එජාප මාධ්‍ය ඒකකය නිවේදනයක් නිකුත්කර ඇති අතර අදාළ වාර්තාව සම්බන්ධයෙන් රජය තම සැලැස්ම ඉදිරිපත් කිරීම අතිශය වැදගත් බවත්, මූල්‍ය ආධාර සඳහා IMF සම්බන්ධ කර ගැනීමට රජය තෝරාගෙන ඇති බැවින් පාර්ලිමේන්තුව තුල IMF වාර්තාව පිළිබඳව සාකච්ඡා කරන බවත් හිටපු අග්‍රාමාත්‍ය රනිල් වික්‍රමසිංහ පැවසූ බවත් එහි සඳහන් ය.
අදාළ නිවේදනය පහත දැක්වෙයි.
මේ අතර වාර්තා වන්නේ හිටපු අග්‍රාමාත්‍ය රනිල් වික්‍රමසිංහ ගේ ඉල්ලීම අනුව එළැඹෙන අප්‍රේල් මුල් සතියේ පාර්ලිමේන්තු විවාදයක් ලබාදීමට ආණ්ඩුව පාර්ශ්වය එකඟව ඇති බව ය.
ඒ බව ආණ්ඩුවේ ප්‍රධාන සංවිධායක අමාත්‍ය ජොන්ස්ටන් ප්‍රනාන්දු තහවුරු කර ඇත.
රනිල්ගේ උත්සාහය සාර්ථක වෙලා !
මාර්තු 23 පැවති සර්ව පාක්ෂික සමුළුවට පෙර IMF වාර්තාව සම්බන්ධයෙන් ආණ්ඩුව නිහඬ පිළිවෙතක් අනුගමනය කිරීමට උත්සාහ කරත්, හිටපු අග්‍රාමාත්‍ය රනිල් වික්‍රමසිංහ ගේ අදහස් හමුවේ IMF වාර්තාව ලැබීම පිළිගැනීමට මුදල් ඇමති බැසිල් රාජපක්ෂ ට සිදුවිය.
එහිදී හිටපු අග්‍රාමාත්‍ය රනිල් වික්‍රමසිංහ සහ මුදල් ඇමති බැසිල් රාජපක්ෂ අතර වචන හුවමාරුවක් පවා සිදුවූ අතර , කෙසේ වුවත් ලැබුණු අවස්ථාව ප්‍රයෝජනයට ගෙන රනිල් වික්‍රමසිංහ සිදුකළේ විපක්ෂ නායක භූමිකාවක් බව දේශපාලන ක්ශේත්‍රයේ කතා බහක් පවා නිර්මාණය වී තිබේ.
පාර්ලිමේන්තුවේදී සජබ මන්ත්‍රීවරුන් මෙන්ම හිටපු අග්‍රාමාත්‍ය රනිල් වික්‍රමසිංහ ද අවස්ථා කිහිපයක්ම IMF වාර්තාව පාර්ලිමේන්තුව ට ලබා ගැනීම සම්බන්ධයෙන් මුදල් ඇමති වෙතින් ඉල්ලීම් සිදුවුවත් ඊට නිසි ප්‍රතිචාර ලැබුණේ නැත.
ඒ අනුව මෙය සර්ව පාක්ෂික සමුළුව අවස්ථාව උපයෝගී කරගෙන සිදුකළ දේශපාලන මැදිහත්වීමක ප්‍රතිඵලයක් බව දේශපාලන විචාරකයන් ද පවසයි.
මහින්ද යනවද ? අලුත් අග්‍රාමාත්‍යවරයකු එනවද ? මහින්දම කියයි !
අග්‍රාමාත්‍ය ධුරයෙන් මහින්ද රාජපක්ෂ ඉවත්ව ජුනි 10ට ප්‍රථම අලුත් අග්‍රාමාත්‍යවරයකු පත්වන බවට මේ දිනවල සමාජ ජාල ඔස්සේ සිදුකරන ප්‍රචාරයන් අසත්‍ය බව අග්‍රාමාත්‍ය මහින්ද රාජපක්ෂ සඳහන් කර ඇත.
මේ සම්බන්ධයෙන් ප්‍රතිචාර දක්වමින් අගමැති මහින්ද රාජපක්ෂ පවසා ඇත්තේ ,මේ මොහොතේ ධූරය අතහැර යාමට හෝ වෙනත් අයෙකුට පැවරීමට කිසිදු අවශ්‍යතාවක් නැති බවය.
තමන් හෝ ආණ්ඩුවේ වෙනත් මැති ඇමතිවරුන් පිළිබඳව විවිධ කතා පැතිර යෑමට ඉඩ ඇති බවත් මේවා සම්පූර්ණ අසත්‍ය බවත් ඔහු එහිදී පවසා ඇත.
ආණ්ඩුව හිතවාදී මාධ්‍යත් වාර්තා කළා !
කෙසේ වුවත් මේ පුවත සමාජ මාධ්‍ය ඇතුළු ප්‍රසිද්ධ වෙබ් අඩවි පවා වාර්තා කළ අතර , එහි විශේෂත්වය වූයේ ආණ්ඩුව හිතවාදී වෙබ් අඩවි පවා මෙම පුවත වාර්තා කර තිබීමය.
ඒවායේ සඳහන් වූයේ , නව අග්‍රාමාත්‍යවරයකුගේ පැමිණීම සම්බන්ධයෙන් අගමැති මහින්ද රාජපක්ෂ විසින් අරලිය ගහ මන්දිරය භෝජනාගාර සේවකයින් වෙත ඉඟි පළකර ඇති බවයි.
කාගෙද මේ ප්ලාන්ට් එක ?
මේ සම්බන්ධයෙන් අදහස් දක්වමින් දේශපාලන විචාරකයන් පෙන්වා දෙන්නේ මෙවැනි පුවත් ආවට ගියාට ප්‍රචාරය නොවන බවයි.
අග්‍රාමාත්‍ය ධූරය අපේක්ෂා කරන පාර්ශ්වයක් වෙතින් මිස එවැන්නක් සිදුවිය නොහැකි බවත් විචාරකයන් පවසයි.
සජිත් සර්ව පාක්ෂික සමුළුවට නොගියේ : රනිල්ගේ ප්‍රතිරූපයට බයේද ?
ශ්‍රී ලංකා නිදහස් පක්ෂයේ ඉල්ලීමක් අනුව ජනාධිපති ගෝඨාභය රාජපක්ෂ විසින් කැඳවා තිබූ සර්ව පාක්ෂික සමුළුව විපක්ෂ නායක සජිත් ප්‍රේමදාස විසින් වර්ජනය කර ඇත්තේ ප්‍රතිරූපය සම්බන්ධයෙන් වූ ප්‍රශ්නයක් නිසා බව අනාවරණය වෙයි.
මේ බව ජාතික පුවත්පතක "රාජ්‍ය රහස්" හෙළිදරව් කරන දේශපාලන ගොසිප් විශේෂාංගයක වාර්තා කර ඇත.
එහි සඳහන් ආකාරයට අදාළ සර්ව පාක්ෂික සමුළුව අවස්ථාවේ එක්සත් ජාතික පක්ෂයේ නායක , හිටපු අග්‍රාමාත්‍ය රනිල් වික්‍රමසිංහ ගේ ප්‍රතිරූපය නැංවෙනු ඇති බවට සජබ ට වාර්තා වී ඇත. එහිදී සජබ කොන්කරනු ඇති බවටත් තොරතුරු ලැබී ඇත.
කොවිඩ් වසංගතය පැමිණි අවස්ථාවේ දී ද ජනාධිපති ගෝඨාභය රාජපක්ෂ කැඳවූ සර්ව පාක්ෂික සමුළුව අවස්ථාව සඳහා සජබ නායක සජිත් ප්‍රේමදාස සහභාගි වූ නමුත් ප්‍රතිරූපය නැංවුනේ හිටපු අග්‍රාමාත්‍ය රනිල් වික්‍රමසිංහ ගේ බවත් දැනගෙන ඇත.
පසුව මේ ගැන පැරණි වීඩියෝ විමර්ශනය කිරීමට වෙනම කණ්ඩායමක් පත්කිරීමටත් සජිත් ප්‍රේමදාස විපක්ෂ නායකවරයා කටයුතු කර ඇත.
ඔවුන් වාර්තා කර ඇත්තේ ද කොවිඩ් වසංගතය අවස්ථාවේ පැවැත්වූ සර්ව පාක්ෂික සමුළුවේදී හිටපු අග්‍රාමාත්‍ය රනිල් වික්‍රමසිංහ ගේ ප්‍රතිරූපය නංවා ඇති බවයි.
මේ සම්බන්ධයෙන් අදාළ පුවත්පත් වාර්තාවේ කොටස පහත දැක්වෙයි.
කලින් කළා වගේ රනිල් පුම්බයිද? වීඩියෝ බලන්න වෙනම ටීම් එකක්!
මීට පෙර පැවැති සර්වපාක්ෂික සමුළුවේදීද මෙවැනිම ආකාරයේ සිදුවීමක් සිදුවූ බව එහිදී කතා කළ බොහෝ දෙනා සජිත්ට දැනුම්දී තිබිණි. ඉකුත් කොරෝනා සමයේදී අගමැතිවරයාගේ ප්‍රධානත්වයෙන් මෙම සර්වපාක්ෂික සමුළුව පැවැති අතර, ඊට සජබ නායකයා සහභාගි වුවත්, රනිල්ගේ ප්‍රතිරූපය වර්ධනය වන ආකාරයට එහි මාධ්‍ය ආවරණ කටයුතු සිදුකොට තිබූ බව ඉන් කියැවිණි. ඒ අනුව සජිත් කළේ එදින රාත්‍රියේ විශේෂ කණ්ඩායමක් පත්කොට අගමැතිවරයාගේ ප්‍රධානත්වයෙන් පැවැති සර්වපාක්ෂික සමුළුවේ විකාශය කළ රූපරාමු ගෙන්වාදෙන ඒවා විමර්ශනය කරන ලෙස උපදෙස් ලබා දීමය. ඒ අනුව එම කණ්ඩායම වහාම අදාළ දිනයේ සියලුම රූපවාහිනී විකාශයන්වල රූප රාමු ගෙන්වාගෙන ඒවා විකාශය කළ ආකාරය සියුම්ව නිරීක්ෂණය කිරීමට පියවර ගත්හ. ඒ අනුව ඔවුන්ටද තහවුරු වූයේ රාජ්‍ය මාධ්‍ය පමණක් නොව ආණ්ඩුවට හිතවත් පෞද්ගලික මාධ්‍ය පවා රනිල්ගේ ප්‍රතිරූපය වර්ධනය වන ආකාරයට පුවත් විකාශය සිදුකර ඇති බවය. ඒ අනුව ඊට අදාළ වාර්තාව සකස් කළ එම කණ්ඩායම එදිනම රාත්‍රියේ සජිත්ට එය ලබාදීමට පියවර ගත්හ.
ප්‍රතිරූපය ඉබේ හදන්න බෑ : අවස්ථාව ප්‍රයෝජනයට ගැනීමත් නායකත්ව ලක්ෂණයක් !
මේ සම්බන්ධයෙන් අදහස් දක්වමින් දේශපාලන විචාරකයකු පවසා සිටියේ , දේශපාලන පක්ෂ නායකයන් එකට විවෘතව අදහස් හුවමාරු කරගන්නා අවස්ථාවක එහි සම්පූර්ණ අවධානය අත්පත් කර ගැනීමත් නායකයකු සතු ගුණ ලක්ෂණයක් බවයි.
එහිදී වීඩියෝ කෝණ වලට වඩා දක්වනු ලබන අදහස් තීරණාත්මක බවත් වීඩියෝ කොණ හෝ වෙනත් තාක්ෂණික උපාය උපක්‍රම අතික්‍රමණය කිරීමට වැදගත් වන්නේ දක්වනු ලබන අදහස් සහ අන්තර්ගතය බවත් ඔවුන් පවසයි.
පසුගිය 23 වනදා පැවති සර්ව පාක්ෂික සමුළුව අවස්ථාවේ කැමරා කෝණ වලට වඩා හිටපු අග්‍රාමාත්‍යවරයා රටේම අවධානය දිනා ගත්තේ ලැබුණු අවස්ථාව උපයෝගී කරගෙන නායකයකු ලෙස දැක්වූ දේශපාලන පරිණතභාවය හරහා බවත් දේශපාලන විචාරකයන් පවසයි.
ඔවුන් වැඩිදුරටත් පෙන්වා දෙන්නේ ජනාධිපති මාධ්‍ය ඒකකය හෝ ආණ්ඩුවක්, විශේෂයෙන් රාජපක්ෂ පාලනයක් කිසිම විටෙක වෙනත් දේශපාලන පක්ෂ නායකයකු ඔසවා තැබීමේ සැළැස්මක් යන්න විහිලුවකට වඩා වැඩි දෙයක් නොවන බවයි. විශේෂයෙන් ආණ්ඩුවත්, රාජපක්ෂවරුන් ගැනත් ජනතාව අතර බලවත් අප්‍රසාදයක් මතුව ඇති පසුබිමක එවැනි විහිලු විපක්ෂ නායක විශ්වාස කරයි නම් එය අදේශපාලනික බව ප්‍රදර්ශනය කිරීමක් බවත් දේශපාලන විචාරකයන් අවධාරණය කරයි.
ආණ්ඩුවේ 10ක් ස්වාධීන වෙන තීන්දුවක !
ශ්‍රී ලංකා පොදුජන පෙරමුණ ආණ්ඩුවේ පාර්ලිමේන්තු මන්ත්‍රීවරුන් 10 දෙනකු ඉදිරියට ස්වාධීන කණ්ඩායමක් ලෙස පෙනී සිටීමට තීන්දුවක් ගෙන ඇති බව වාර්තා වෙයි.
දේශපාලන ආරංචි මාර්ග සඳහන් කරන ආකාරයට සුසිල් ප්‍රේමජයන්ත , අනුර ප්‍රියදර්ශන යාපා , චන්දිම වීරක්කොඩි , නිමල් ලන්සා , ගෙවිදු කුමාරතුංග , ප්‍රේම්නාත් සී දොලේවත්ත යන පාර්ලිමේන්තු මන්ත්‍රීවරුන් මෙන්ම තවත් රාජ්‍ය අමාත්‍යවරුන් 03 ක් මේ පිරිස අතර සිටින බවත් වාර්තා වෙයි.
මේ සම්බන්ධයෙන් කරුණු පෙනී සිටින බව දැනුම්දීමට ජනාධිපති ගෝඨාභය රාජපක්ෂ හමුවීමට තීරණය කොට ඇති බව පාර්ලිමේන්තු මන්ත්‍රී සුසිල් අධිකරණ පවසයි.
මෙම මන්ත්‍රීවරුන් පිරිසට සුසිල් ප්‍රේමජයන්ත්, චන්දිම වීරක්කොඩි, නිමල් ලන්සා, ගෙවිඳු කුමාර, අනුර ප්‍රියදර්ශන යාපා, ප්‍රේමනාත් සි දොලවත්තය, රාජ්‍ය අමාත්‍යවරුන් තිදෙනකුද ඇතුළත් බවද වාර්තාවේ.
Page 273 of 385