V2025

පුවත්

කප්පච්චි ඉදිකිරීම් නිසා වනාන්තර රැසක් අවධානමේ

මල්වතු ඔය කප්පච්චි ප්‍රදේශයෙන් හරස් කර ඉදිකිරීමට සුදානම් වන දැවැන්ත වේල්ල සහ ජලාශය හේතුවෙන් තන්තිරිමලේ අවට ඇති අවශේෂ කැළෑ සහ විල්පත්තුව වනය දැවැන්ත පාරිසරික අනතුරකට මුහුණ පා ඇතැයි වාර්තා වෙයි.

සොබාදහම් අධ්‍යන මධ්‍යස්ථානයේ රවීන්ද්‍ර කාරියවසම් නිවේදනයක් නිකුත්කරමින් මේ බව සඳහන් කරන අතර එහි වැඩිදුරටත් සඳහන් වන්නේ අදාළ වන විනාශය සම්බන්ධව ආණ්ඩුව වගකිව යුතු බවය.

ඒ සම්බන්ධ සම්පූර්ණ ලිපිය පහත දැක්වේ.

Comment (0) Hits: 419

ස්මාර්ට් ලෝකයේ බොරු පුවත්වලට වගේම වාරණයටත් ඉඩක් නෑ - ඇමති මංගල

සාම්ප්‍රදායික ජනමාධ්‍යවේදියා ජනතා විශ්වාසය අහිමිකරගෙන සිටින බවත් ස්මාර්ට් දුරකතන අත දරන සියළු දෙනා වාර්තාකරුවන්වී සිටින බවත් ඒ හමුවේ වාරණය හෝ නීති මඟින් මාධ්‍ය පාලනය කිරීම අවලංගු වී ඇති බව මුදල් හා ජනමාධ්‍ය අමාත්‍ය මංගල සමරවීර සඳහන් කරයි.

අමාත්‍යවරයා මේ අදහස් පළකර සිටියේ ශ්‍රී ලංකා පුවත්පත් මණ්ඩලය මගින් මාතර දිස්ත්‍රික්කයේ පාසල් ගුරුවරුන් වෙනුවෙන් සංවිධානය කළ වැඩමුළුව අමතමිනි.

එම වැඩමුළුව අද (19) මාතර පර්ල් ක්ලිෆ් හෝටලයේ දී පැවැත්වුණු අතර එහිදී වැඩිදුරටත් අදහස් දැක්වූ අමාත්‍යවරයා මෙසේද පැවසීය.

‘‘2017 අවුරුද්දෙ අමෙරිකාවෙ සමීක්ෂණයක් කළා වෘත්තීන්වල විශ්වසනීයභාවය ගැන. ඒ ලැයිස්තුවේ අවසන් ම ස්ථාන හිමි වෙලා තිබුණෙ මාධ්‍යවේදීන්ට සහ දේශපාලඥයන්ටයි. ඒ කියන්නෙ අපි දෙගොල්ලොම එකම බෝට්ටුවෙ. දේශපාලනඥයාට එහෙම වුණේ ඇයි කියන කාරණාව මම කියන්න යන්නෙ නෑ.

අද වන විට සාම්ප්‍රදායික මාධ්‍යවේදියා පිළිබඳව ජනතාව තුළ තියෙන විශ්වාසය නැති වෙමින් තිබෙනවා. ඒකට හේතුව තමයි පදනමක් නැති වාර්තාකරණය. ඉස්සර පුවත්පත්වල කුමන වාර්තා පළ කළත් ඒකට පදනමක් තිබුණ. දැන් එහෙම නෙවෙයි, මාධ්‍යවේදියාගේ, විවිධ පුද්ගලයන්ගේ සහ දේශපාලනඥයන්ගේ වුවමනාවට පුවත් නිෂ්පාදනය කරනවා. නමුත් මේ නවීන සමාජය තුළ මේ බොරු පුවත්වලට ඉස්සරහට යන්න බෑ. ඒව ඔප්පු වෙනවා. ඒ එක්කම ජනමාධ්‍ය පිළිබද තියෙන විශ්වාසය නැති වෙලා යනවා. අද හැමෝම අතේ ස්මාර්ට් ෆෝන් තියෙනවා. ඒ හැම කෙනෙක් ම වාර්තාකරුවෙක් බවට පත් වෙලා තියෙනවා. ඒ නිසා වාරණය කියන දේ අදට වලංගු නෑ.

ප්‍රංශයේ නව ආණ්ඩුව කතාබහක් ඇති කරගෙන යනවා මේ බොරු පුවත් සම්බන්ධයෙන් ගන්නා ක්‍රියාමාර්ග ගැන. ඒ කියන්නෙ එහෙම කතාබහක් ලෝකය තුළ ඇති වෙමින් තියෙනවා. මේ තත්ත්වයෙන් මිදෙන්න වාරණය සහ නීතිවලින් පමණක් බැහැ. අපි කළ යුත්තේ ගෝත්‍රික අදහස් බැහැර කළ නව පරපුරක් නිර්මාණය කිරීමයි.

ගූගල් සමාගම කියනවා සෙක්ස් කියන වචනය වැඩිම සර්ච් කරන්නෙ ශ්‍රී ලංකාවෙන් කියල. නිල් චිත්‍රපට වෙබ් අඩවි බලන වැඩි ම පිරිස අද ඉන්නෙ මැදපෙරදිග රටවල. තහංචි දාගෙන හිරකරගෙන ඉන්න තරමට මේ වගේ දේවල්වලට පෙළඹෙන එක වැඩි වෙනවා. විවෘත සමාජවල මේ තත්ත්වයන් නැහැ. ඒ නිසා ගුරුවරුන් විදියට ඔබට ලොකු වගකීමක් තියෙනවා දරුවන් මේ සදහා පෙළගැස්වීම සිදු කිරීමට."

මෙම අවස්ථාවට එක්සත් ජාතික පක්ෂයේ පාර්ලිමේන්තු මන්ත්‍රී බුද්ධික පතිරණ, ශ්‍රී ලංකා පුවත්පත් මණ්ඩලයේ සභාපති කොග්ගල වෙල්ලාල බන්ධුල, රජයේ ප්‍රවෘත්ති අධ්‍යක්ෂ ජනරාල් නීතීඥ සුදර්ශන ගුණවර්ධන ඇතුළු පිරිසක්ද එක්ව සිටියහ.

Comment (0) Hits: 511

කොමිසමේ නිර්දේශ ක්‍රියාත්මක කරනවා : ආණ්ඩුවේ ප්‍රතිපත්ති ගරුකබව ඔප්පු කරනවා - අගමැති

බැඳුම්කර කොමිසමේ නිර්දේශ ක්‍රියාත්මක කිරීම සඳහා තමන් කැපවෙන් බවත් ඒ හරහා යහපාලන සම්මුති ආණ්ඩුව ප්‍රතිපත්ති ගරුක, විනය ගරුක, ශීලාචාර ආණ්ඩුවක් බව ක්‍රියාවෙන්ම ඔප්පු කිරීම තම අපේක්ෂාව බව අග්‍රාමාත්‍ය රනිල් වික්‍රමසිංහ සඳහන් කරයි.
 
අග්‍රාමාත්‍යවරයා මේ අදහස් පළකර සිටියේ ඊයේ (18 ) ජාතිය අමතා විශේෂ ප්‍රකාශයක් සිදුකරමින්ය.
 
එහිදී වැඩිදුරටත් අදහස් දැක්වූ අග්‍රාමාත්‍යවරයා සඳහන් කර සිටියේ බැඳුම්කර ගනුදෙනුව හරහා රජයට කිසිඳු අලාභයක් සිදුවීමට ඉඩ නොතබන බවත් බැඳුම්කර කොමිසමේ වාර්තාවෙන් චෝදනා ලබන එක්සත් ජාතික පක්ෂයේ සාමාජිකයන් සිටිනවා නම් ඔවුන් පිළිබඳ තීන්දුවක් ගැනීමටද පක්ෂය සුදානම් බවය.
 
එසේම ඒ සඳහා  මේ වන විටත් තිලක් මාරපන අමාත්‍යවරයාගේ ප්‍රධානත්වයෙන් කමිටුවක් පවා පත්කිරීමට තම පක්ෂය කටයුතු කර ඇති බවද අග්‍රාමාත්‍යවරයා එහිදී සඳහන් කර සිටියේය.
 
ඊයේ ජාතිය අමතා අග්‍රාමාත්‍යවරයා සිදුකළ විශේෂ ප්‍රකාශය මෙසේය. 
 
අපි බලයට ආවේ දූෂණය හා වංචාව නවත්වන්නයි. පක්‍ෂ පාට තනතුරු කුමක් වුණත් දූෂිතයන්ට දඬුවම් ලබා දෙන්නයි. බලයට පත් වී ටික කලෙකින් බැඳුම්කර නිකුත් කිරීම පිළිබඳ චෝදනාවක් නැගුණා. අපි එය පාපිස්ස යටට දැම්මේ නෑ.
 
සති දෙකක් ඇතුළත විමර්ෂණ කමිටුවක් පත් කළා. විමර්ෂණ කාලය තුළ මහබැංකු අධිපති රාජකාරි කටයුතු වලින් ඉවත් වුණා. පාර්ලිමේන්තුව දැනුවත් කළා. පාර්ලිමේන්තුවට වුවමනා නම් තේරීම් කාරක සභාවක් පත්කරන ලෙස මම දැනුම් දුන්නා. විමර්ෂණ වාර්තාව පාර්ලිමේන්තුවට ඉදිරිපත් කළා.
 
මෙතෙක් කල් කෝප් කමිටුවේ සභාපතීත්වය දැරුවේ ආණ්ඩු පක්ෂයේ මන්ත්‍රීවරයෙක්. වත්මන් පාර්ලිමේන්තුවේ කෝප් කමිටු සභාපතිත්වය විපක්‍ෂ මන්ත්‍රීවරයෙකුට දුන්නා. කමිටුව මගින් බැඳුම්කර නිකුතුව පිළිබඳ පරීක්‍ෂණ ආරම්භ කළා. ඒ වාර්තාව පාර්ලිමේන්තුවට ඉදිරිපත් කළා. විවාද කළා.
 
මේ වාර්තාව පිළිබඳ සුදුසු ක්‍රියා මාර්ග ගැනීම සඳහා 2016 ඔක්තෝබර 31 වන දා නීතිපතිවරයාට යොමු කළා. මේ ගැන, විශේෂයෙන්ම පර්පචුවෙල් ටේ‍රෂරීස් සමාගම ගැන වැඩි දුර පරීක්‍ෂණ පැවැත්විය යුතු බව කෝප් කමිටුව නිර්දේශ කර තිබුණා. ඒ අනුව ජනාධිපතිතුමා මා සමගත් සාකච්ඡා කර ජනාධිපති කොමිසම පත් කළා. කොමිසමේ කටයුතු වලට අපි සහය දුන්නා. අපේ ඇමතිවරු කොමිසම හමුවට ගියා. මමත් ගියා.
 
චෝදනාවක් එල්ල වූ විට එය විමර්ෂණය කිරීම සඳහා මේ ආකාරයට කටයුතු කළ කිසිම ආණ්ඩුවක් නෑ. තුන් වතාවක් අප මේ ගැන පරීක්ෂණ කළා. පසුගිය ආණ්ඩුව සමයේ අවස්ථා ගණනාවකදීත් මේ ආකාරයෙන් චෝදනා එල්ල වුණා. නමුත් ඒ කිසිම අවස්ථාවක ඒ පිළිබඳ පරීක්‍ෂණ සිදු කළේ නෑ. පාර්ලිමේන්තුවට කරුණු හෙළි කළේ නෑ. පාර්ලිමේන්තුවේ ප්‍රශ්න කළ අවස්ථාවන්හි පවා පිළිතුරු දුන්නේ නෑ.
 
ලංකාවේ මුල්‍ය පාලනය සතු පාර්ලිමේන්තුවටයි. පාර්ලිමේන්තුවේ මේ බලය අමතක කර තිබුණා. අපි පාර්ලිමේන්තුවේ මූල්‍ය පාලන බලය යලිත් තහවුරු කිරීමටයි කෝප් කම්ටුව සහ පාර්ලිමේන්තුවට මේ වගකීම භාර දුන්නේ.එම වගකීම එතනින් ඉවත් කිරීමට බැහැ. පාර්ලිමේන්තුව සිය මුල්‍ය පාලන බලතල  නිසි අයුරින් පාවිච්චි කළ අවස්ථාවක් ප්‍රදර්ශනය කිරීමක් ලෙස බැඳුම්කර සිදුවීම උඩ අපි දැක්කා, ආණ්ඩුව විනිවද භාවයෙන් යුතුව ක්‍රියා කරන බවට හොඳම උදාහරණයක්. 
 
මේ බැඳුම්කර නිසා පර්පචුවෙල් ට්‍රෙෂරීස් සමාගම අයුතු ලෙස බිලියන 9.2 ක් උපයා ගෙන ඇති බව කොමිසම් වාර්තාවේ සඳහන්. මා ඇමති ධූරය දරන ජාතික ප්‍රතිපත්ති අමාත්‍යංශය යටතේ ඇති මහ බැංකුව මේ වන විටත් ඒ සමාගමේ බිලයන 12 ක මුදලක් රඳවා ගෙන තිබෙනවා. ඒ නිසා කොමිසම නිර්දේශ කළ පරිදි රුපියල් බිලියන 9. 2 ක නැවත ලබා ගන්න පුළුවන්. අපි ඒ සඳහා කොමිසම විසින් යෝජනා කළ ක්‍රියාමාර්ග අනුගමනය කරනවා. එවිට මේ මුළු මුදලම රජයට ලබා ගන්න පුළුවන්. රජයට කිසිදු අලාභයක් සිදු වන්නේ නෑ. 
 
ඒ වගේම මේ වංචාවට කිසියම් හෝ නිලධාරීන් පිරිසක් හවුල් නම් ඒ අයට නීතිය අනුව ක්‍රියා කරනවා. බැඳුම්කර පිළිබඳ චෝදනාව එල්ල වූ අවස්ථාවේ පටන් ඒ සඳහා අවශ්‍ය විමර්ෂණ කරන්නට අපි උපරිම සහය දුන්නා. දැන් කොමිසමේ නිර්දේශ ක්‍රියාත්මක කරන්නත් අපි උපරිමයෙන් ක්‍රියාමාර්ග ගන්නවා.
 
අපේ ආණ්ඩුව ප්‍රතිපත්ති ගරුක, විනය ගරුක, ශීලාචාර ආණ්ඩුවක් බව ක්‍රියාවෙන්ම ඔප්පු කිරීමට අපට පුළුවන් වෙලා තිබෙනවා. මෑත ඉතිහාසයේ මේ ආකාරයෙන් ආණ්ඩුව කටයුතු කළ අවස්ථාවක් අප දුටුවේ නැහැ. අපේ ඇමතිවරු සම්ප්‍රදාය කඩ කිරීම පිළිබඳව ඉල්ලා අස්වුණා. නීතිය ක්‍රියාත්මක වුණා. ඇඟිලි ගැසීම් නොමැතිව අධිකරණය තීන්දු දුන්නා. ජනතාව නිදහසේ අදහස් දැක්වූවා. ජනමාධ්‍ය බයක් නැතුව කටයුතු කළා. ඒ විතරක් නෙවෙයි. බැඳුම්කර වාර්තාවෙන් චෝදනා ලබන අපේ පක්‍ෂයේ සාමාජිකයන් ඉන්නවා නම්, ඒ අය පිළිබඳව සොයා බලා තීරණයක් ගන්නට අපි තිලක් මාරපන මහතාගේ ප්‍රධානත්වයෙන් කමිටුවක් පත්කර තිබෙනවා. කමිටු නිර්දේශය අනුව අපි ක්‍රියා මාර්ග ගන්නවා.
 
ඒ එක්සත් ජාතික පක්‍ෂ සම්ප්‍රදායයි. ඒ අප ඇති කරමින් ක්‍රියාත්මක කරන සම්ප්‍රදායයි. අපේ පක්‍ෂයේ සම්ප්‍රදාය සහ යහපාලන සංකල්පය අනුව යමින් අපි රට හදනවා. ගම හදනවා. යහපත් හෙටක් මේ රටට උදා කරනවා.
 
ජනවාරි 08 වන දා මේ රටේ ජනතාව බලාපොරොත්තු වුණු වෙනස, යහපත් සමාජය අපි උදාකරනවා. එය එක දවසින්, එක රැයෙන් කරන්න පුළුවන් දෙයක් නෙවෙයි. මේ විභාගයත් එයට ආරම්භයක් ලෙස සළකන්න පුළුවන්. අපි අතීතයත් වර්තමානයත් පිළිබඳව එක සේම අවධානය යොමු කරනවා. අපි හරි පාරේ ඉදිරියට යනවා. වැරදි නිවැරදි කර ගන්නවා. අඩුපාඩු සකස් කර ගන්නවා.
 
බැඳුම්කරය පිළිබඳ චෝදනාව එල්ල වූ අවස්ථාවේ සිට මේ දක්වා අප ගත් ක්‍රියා මාර්ග මගින් පෙන්නුම් කරන්නේ අප හොඳ ආරම්භයක් ගෙන ඇති බවයි. අප සොයා බලන්නේ පසුගිය රජයේ දූෂණ වංචා ගැන පමණක් නෙවෙයි. වර්තමානයේ එල්ල වන දූෂණ චෝදනා ගැනත් අප සොයා බලනවා. විමර්ෂණය කරනවා. නිසි පියවර ගන්නවා.
 
අපේ රටට යහපත් අනාගතයක් උදා කර දීම අපේ අරමුණයි. අපේ රට යහපත් හා පොහොසත් රටක් බවට පත් කිරීම අපේ අරමුණයි. ඒ අරමුණ ජය ගැනීම සඳහා අපි එකට එක්ව කටයුතු කරමු. අභියෝග ජය ගනිමු. බලගතු ශ්‍රී ලංකාවක් නිර්මාණය කරමු.
Comment (0) Hits: 429

දූෂණයට වැට බඳින්න ජනාධිපති කාර්යාලයේ විද්වත් කතිකාවක්

බොහෝ රටවල සිදුකර ඇති පරිදි වංචාව හා දූෂණය පිටුදැකීම සඳහා විවිධ සම්මුතීන්, නීති රීති හා යාන්ත්‍රණයන් ක්‍රියාත්මක කර ඇති පරිදි මෙරට තුළද දුෂණයට එරෙහිව ක්‍රියාත්මක වීම සඳහා ජාතික ක්‍රියාකාරී සැලැස්මක් සම්පාදනය කිරීම මෙහි අරමුණ වී තිබේ. 
 
 ශ්‍රී ලංකාව තුළ අල්ලස් හා දූෂණය තුරන් කිරීම සඳහා ජාතික ක්‍රියාකාරී සැලැස්මක් සකස් කිරීම වෙනුවෙන් විද්වත් අදහස් ලබාගැනීමේ විශේෂ කතාබහක්   ඊයේ(18) ජනාධිපති කාර්යාලයේදී පවත්වා ඇති බව වාර්තා වෙයි. 
 
ජනාධිපති ලේකම් ඔස්ටින් ප්‍රනාන්දු මහතාගේ ප්‍රධානත්වයෙන් පැවති එම කතාබහ සඳහා මුදල් අමාත්‍යංශ ලේකම්වරයා, මහ බැංකු අධිපතිවරයා, විගණකාධිපතිවරයා, අල්ලස් හා දූෂණ කොමිෂන් සභාවේ අධ්‍යක්ෂ ජනරාල්වරයා, පොලිස්පතිවරයා ඇතුළු පිරිසක් සහභාගී වී තිබේ. 
 
 එහිදී  අල්ලස් හෝ දූෂණ චෝදනා විමර්ශන කොමිෂන් සභාව ශක්තිමත් කිරීම, විමර්ශන ක්‍රියාවලිය ශක්තිමත් කිරීම, අල්ලස් හෝ දූෂණ නඩු මෙහෙයවීමේ ක්‍රියාවලිය ශක්තිමත් කිරීම, අල්ලස හා දූෂණය නිවාරණය සම්බන්ධයෙන් සම්බන්ධයෙන් ගතයුතු ක්‍රියාමාර්ග ආදී කරුණු පිළිබඳ සාකච්චාවට ලක්වූ බවද වාර්තා වෙයි.
 
ඊට අමතරව මෙම සැලැස්ම හරහා පෞද්ගලික අංශයේ දූෂණ ක්‍රියා වැළක්වීම, රාජ්‍ය මුදල් කළමනාකරණයේදී සිදුවන අක්‍රමිකතා වැළක්වීම, අපරාධ වැරදිවලින් උපයන ලද වත්කම් ආපසු ලබාගැනීමට අදාළ නීති සකස් කිරීම, දුෂණයට එරෙහිව හඬ නගන්නන් ආරක්ෂා කිරීම සම්බන්ධ නීති පිළිබඳ අවධානය යොමු කිරීමට නියමිත බව පැවසේ. 
Comment (0) Hits: 459

ජනාධිපති කාර්යාලය පාර්ලිමේන්තුවට දී ඇත්තේ බැදුම්කර වාර්තාවෙන් කොටසක් පමණයි

 
ජනාධිපති කාර්යාලය විසින් පාර්ලිමේන්තුවට නිකුත් කර ඇත්තේ බැඳුම්කර වාර්තාවෙන් කොටසක් පමණක් බවත් එම වාර්තාවේ ඉතිරි කොටස් පාර්ලිමේන්තුවට ලබා නොදීම ගැටළු සහගත බව කැෆේ සංවිධානය සඳහන් කරයි.
 
නිවේදනයක් නිකුත් කරමින් කැෆේ සංවිධානය මේ බව සඳහන් කරන අතර එහි වැඩිදුරටත් සඳහන්ව ඇත්තේ බැඳුම්කර කොමිසමේ වාර්තාවේ එන  ෆුට් නෝට් සටහන් පිළිබද විශේඥන ලියවිලි, රහස් පොලිස් පරීක්ෂණ වාර්තාව ඇතුළු වැදගත්ම ලේඛන කිසිවක් පාර්ලිමේන්තුව වෙත නිකුත්කර නොමැති බවය.
 
ඒ පිළිබඳ විශේෂ ලිපියක් කතානායකවරයා වෙත යොමුකරන්නද එම සංවිධානය ක්‍රියාකර ඇත.
 
එම ලිපිය හරහා කැෆේ සංවිධානය කතානායකවරයාට අවධාරණය කර ඇත්තේ බැඳුම්කර කොමිෂන් වාර්තාවේ වැදගත්ම කොටසක් වන ‘කොමිෂන් සභාව වෙත ඉදිරිපත් වූ‘ සලකුණු කළ ලේඛන‘ සහ සාක්ෂි සටහන් මේ දක්වාම ගරු පාර්ලිමේන්තුව වෙත හෝ ඔබතුමන් වෙත හෝ ලැබි නොමැති බව තම සංවිධානය විශ්වාස කරන බවය.
 
එසේම උදා හරණයක් ලෙස ‘සී 350‘ ලෙස සලකුණු කොට ඇති ලේඛනය මත පදනම් වූ නිරීක්ෂණ පිළිබද ප්‍ර‍ධාන වාර්තාවේ සදහන් වන නමුත්, එම ලේඛනය මේ දක්වා පාර්ලිමේන්තු මන්ත්‍රීවරුන් වෙත ලබා දී නොමැති බවත්   එම ලිපියේ සඳහන් කර ඇත.
 
තවද මන්ත්‍රීවරුන්ට බැදුම්ක වංචාව  හා එයට සම්බන්ධ පාර්ශව පිළිබද සම්පූර්ණ අවබෝධයක් ලබා ගැනීමට සහ තාර්කික, දත්ත පාදකව නිගමනයන්ට එලැඹීම උදෙසා මෙම අතිරේක ලේඛන පරිශීලනය අනිවාර්ය වූ අවශ්‍යතාවයක් බවත්   එබැවින්, අදාළ සලකුණු කළ ලේඛන හා සාක්ෂි සටහන්  අතුලත් වෙළුම කොටස් 2 ද, ගරු පාර්ලිමේන්තු මන්ත්‍රීවරුන් වෙත ලබාදීම පිණිස ගරු කථානායකවරයාට මැදිහත්වන ලෙසද එම ලිපිය හරහා කැෆේ සංවිධානය දැනුම්දී ඇත. 
Comment (0) Hits: 467

හිටපු අගවිනිසුරු මොහාන් පීරිස්ට විරුද්ධව අල්ලස් කොමිසමෙන් චෝදනා

හිටපු අගවිනිසුරු මොහාන් පීරිස්, වත්මන් අභියාචනාධිකරණ විනිසුරු ඒඑච්එම්ඩී නවාස් සහ විදුලිබල අමාත්‍යාංශයේ හිටපු ලේකම් එම්එම්සී ෆර්ඩිනැන්ඩුට විරුද්ධව අල්ලස් හා දූෂණ කොමිසම චෝදනා පත්‍රයක් ගොනුකොට තිබේ.

එම චෝදනා පත්‍රය සළකා බැලීමෙන් අනතුරුව කොළඹ ප්‍රධාන මහේස්ත්‍රාත් ලාල් රණසිංහ බණ්ඩාර විසින් ඔවුන් තිදෙනාට මාර්තු 08 වෙනි දින අධිකරණය හමුවේ පෙනී සිටින ලෙස දන්වමිනි සිතාසි නිකුත් කර ඇතැයි පැවසේ .

සීමාසහිත ලංකා විදුලිබල සමාගමට ඉඩම් මිලදී ගැනීමක් සම්බන්ධයෙන් සිරිපාල ජයලත් සහ රත්නපාල ඩයස් යන කමිටු දෙකක් මගින් සිදුකළ පරීක්ෂණයන්ට අනුව අදාල මිලදී ගැනීම්වලදී අක්‍රමිකතා සිදුව ඇති බවත් ඊට වගකිවයුතු පුද්ගලයින්ට එරෙහිව නීතිමය ක්‍රියාමාර්ග ගන්නා මෙන් ඉහත කී කමිටු මගින් සිදු කළ පරීක්ෂණවලින් අනතුරුව නිර්දේශ කර තිබූ බව ද අල්ලස් කොමිසම පවසයි.

එසේ තිබියදී 2010 වසරේ දෙසැම්බර් 01 වෙනි දින සහ දෙසැම්බර් 31 වෙනි දින දක්වා කාලසීමාව තුළ එවක නීතිපතිවරයා ලෙස කටයුතු කළ මොහාන් පීරිස් සහ එම වකවානුවේ නීතිපති දෙපාර්තමේන්තුවේ නියෝජ්‍ය සොලිසිටර් ජෙනරාල් ලෙස කටයුතු කළ වත්මන් අභියාචනාධිකරණ විනිසුරු ඒඑච්එම්ඩී නවාස් එම අපරාධවලට වගකිවයුතු පුද්ගලයන්ට එරෙහිව නීතිමය ක්‍රියාමාර්ග ගැනීම වැළැක්වීම තුලින් අල්ලස් පනත යටතේ වරදක් සිදුකර ඇති බව අල්ලස් කොමිසම අධිකරණයට ගොනු කළ චෝදනා පත්‍රයේ වැඩිදුරටත් සඳහන් කර තිබේ.

Comment (0) Hits: 452

කාන්තාවන්ට මත්පැන් ගැන තිබූ සහන ඉවතට

මත්පැන් නිෂ්පාදනය කරන සහ අලෙවි කරන ස්ථානවල කාන්තාවන් රැකියා කිරීමට සහ කාන්තාවන්ට මත්පැන් මිලදී ගැනීමට තිබූ තහනම ඉවත් කරමින් නිකුත් කර තිබූ ගැසට් නිවේදනය අමාත්‍ය මණ්ඩලය විසින් කරන ලද ඉල්ලීමකට අනුව මුදල් හා ජනමාධ්‍ය අමාත්‍ය මංගල සමරවීර මහතා විසින් අද (18) දිනයේදී ඉල්ලා අස්කරගත් බව මුදල් හා ජනමාධ්‍ය අමාත්‍යංශය නිකුත් කළ නිවේදනයක දැක්වේ.

එමෙන්ම, සුරාසල් විවෘත කිරීමේ වේලාවන් දීර්ඝ කරමින් නිකුත් කරන ලද ගැසට් නිවේදනයද අමාත්‍ය මණ්ඩලයේ ඉල්ලීම පරිදි අද දින (18) ඉල්ලා අස්කර ගන්නා ලද බව ඉහත නිවේදනයේ දැක්වේ.

මෙසේ ඉල්ලා අස්කරගන්නා නිවේදනය සඳහන් අතිවිශේෂ ගැසට් පත්‍රය සඳහා මුදල් හා ජනමාධ්‍ය අමාත්‍ය මංගල සමරවීර මහතා විසින් අද දින අත්සන් තබා තිබේ.

 සබැඳි පුවත් :

මේක ගෝත්‍රික තීරණයක් : නමුත් කැබිනට් සාමුහිඛත්වයට ගරු කරනවා - ඇමති මංගල

කාන්තා මත්පැන් තහනමට එරෙහිව අධිකරණයට පෙත්සමක්

භික්ෂූන් විරුද්ධවුයේ සුරාවට නෙවෙයි : කාන්තාවන්ට සමතැන දීමටයි - නීතිඥ ජේ.සී.වැලිඅමුණ

ලැජ්ජයි මෛත්‍රී.....!

මංගලගේ දේශපාලන අවබෝධය අවතක්සේරු කළ හැකිද? - ශ්‍රී ලංකා ගාර්ඩියන් කතු වැකිය

“සිරිසේන සිරිකොතට යයි! ” - දිනමිණ කතුවැකිය නොදැනීම ඔප්පු කරයිද ?

ගෑනුන්ට මොන අරක්කුද ඩෝ..! : ලෞකික ආතල් කඩන ලෝකෝත්තර ගැට

 

 

 

 

https://newstube.lk/featured/631-2018-01-13-13-34-00

Comment (0) Hits: 433

භාෂා තුනෙන්ම නොමැතිව බැඳුම්කර වාර්තාව පාර්ලිමේන්තුවට යොමුකිරීම ස්ථාවර නියෝග කඩකිරීමක් !

බැඳුම්කර වාර්තාව ඊයේ(17) දිනයේ දී කථානායකවරයා වෙත බාර දෙනු ලැබුවත් එහි භාෂා ත්‍රිත්වයෙන්ම පිටපත් නොමැතිව එක් භාෂාවකින් පමණක් වීම හේතුවෙන් එය ස්ථාවර නියෝග යටතේ පාර්ලිමේන්තුවට ඉදිරිපත් කිරීමේ හැකියාව නොමැති බව ජාතික නිදහස් පෙරමුණේ මාධ්‍ය ප්‍රකාශක මොහොමඩ් මුසම්මිල් මහතා පවසයි .

අද(18) පැවති ජාතික නිදහස් පෙරමුණේ මාධ්‍ය හමුවකට එක්වෙමින් ඔහු මේ බව පවසා තිබේ.

ස්ථාවර නියෝග යටතේ භාෂා තුනෙන්ම බැඳුම්කර වාර්තාව කථානායකවරයා වෙත බාර නොදීමට හේතුව එළඹෙන මැතිවරණයෙන් පසුව ඒ සම්බන්ධ කතා බහ යට ගැසීම බව ද මුසම්මිල් මහතා සඳහන් කරයි.

කෙසේ වෙතත් ජනාධිපති කාර්යාලය මේ පිළිබඳ හොඳින්ම දැනුවත් වී ඇති බැවින් මෙවැන්නක් සිදු කිරීමෙන් අපේක්ෂා කරන්නේ පෙබරවාරී මස 10 වන දා තෙක් බැඳුම්කර ගනු දෙනුව පිළිබඳ කතා කර ඉන් පසුව එය ජනතාවට අමතක කරවීමේ උත්සහයක් විය හැකි බව ඒ මහතාගේ අදහස වී තිබේ.

එමෙන්ම බැඳුම්කර ගනුදෙනුව තුළින් ලංකා රජයට සිදු වු පාඩුව පියවා ගැනීමට එය සිතා මතා සිදු කරනු ලැබු සැළසුම් සහගත අපරාධයක් වන බැවින් අපරාධ නීතිය යටතේ නඩුවක් ගොනු කළ යුතු යැයි ද මුසම්මිල් මහතා සඳහන් කර ඇත.

Comment (0) Hits: 379

මිලියන 20 ක් වංචා කිරීමේ නඩුවේ ගම්මන්පිලට එරෙහිව සාක්ෂි රැසක් අධිකරණය හමුවට

උදය ගම්මන්පිල මහතාට එරෙහිව නීතිපතිවරයා විසින් පවරා තිබෙන මිලියන 20 ක වංචාවක් කරන ලදැයි සඳහන් නඩුව සනාථ කිරීම සඳහා සාක්ෂි කරුවන් 20 ක් සහ ලේඛන 14 ක් ඉදිරපත් කිරීමට සුදානමින් සිටින බව නීතිපතිවරයා අධිකරණයට දැනුම් දී තිබේ.

2000 වසරේදී ඩිජිටල් නොමිනීස් සමාගම විසින් මිලදීගෙන තිබූ කොළඹ පෑන් ඒෂියා බැංකුව විසින් නිකුත් කරන ලද ව්‍යාපාර කොටස් ප්‍රසිද්ධ ව්‍යාපාරික ධම්මික පෙරේරා මහතාට විකිණීමෙන් රුපියල් මිලියන 20ක මුදලක් වංචා කරන ලදැයි යන නඩුව සම්බන්ධයෙන් නීතිපතිවරයා මෙම දැනුම්දීම සිදුකර ඇත.

ඩිජිටල් නොමිනීස් පුද්ගලික සමාගමේ අධ්‍යක්ෂකවරුන් ලෙස එවකට සේවය කළ බ්‍රයන් රොස් ෂැඩ්ඩික් මහතා හා ජැනට් එලිසබෙත් ෂැඩික් මහත්මිය අත්සන් නොකළ බව දනිමින්ම හා ඔවුන් අත්සන් කළ බවට විශ්වාස කිරීමට කිසිඳු සාධාරණ හේතුවක් නොමැතිව, ව්‍යාජ ලෙස සකස් කළ ඇටෝර්නි බලපත්‍රයක්, ප්‍රසිද්ධ ව්‍යාපාරික ධම්මික පෙරේරා මහතා හට සත්‍ය ලේඛණයක් ලෙස ඉදිරිපත් කිරීම සම්බන්ධයෙන්ද නීතිපතිවරයා විසින් තවත් නඩුවක් පවරා තිබුණි.

මෙම නඩුවල හරස් ප්‍රශ්ණ ඇසීම අද(18) කොළඹ මහාධිකරණයේදී සිදුවිය.

මීට අමතරව, වර්ෂ 1996 සැප්තැම්බර් මස 26 වැනිදා හා වර්ෂ 1997 සැප්තැම්බර් 21 වැනිදාත් අතර කාලය තුල රුපියල් මිලියන 21ක මුදලක් සම්බන්ධයෙන් විශ්වාසය කඩ කිරීම මෙන්ම අදාල මුදල සාවද්‍ය පරිහරණය කිරීම පිළිබඳව ද අධි චෝදනා 04ක් යටතේ නීතිපති වරයා විසින් තවත් නඩුවක් පවරා ඇත.

නඩුව මේ මස 26 වනදාට කල් තබා තිබේ.

Comment (0) Hits: 431

ඛනිජ තෙල් සංස්ථාවේ භූතයෙක් - ලක්ෂ ගණනක ඩීසල් අතුරුදහන් - පරීක්ෂණත් නෑ

ඛනිජ තෙල් සංස්ථාවට අයත් ගබඩාවලට යවන ඩීසල් ටැංකි අතර මගදී හිස්කර ඩීසල් වෙනුවට භූමිතෙල් පුරවන ජාවාරමක තොරතුරු අනාවරණය වී ඇතත් ඒ පිළිබඳ මෙතෙක් කිසිඳු ක්‍රියාමාර්ගයක් ගෙන නොමැති බව වාර්තා වෙයි.

මේ වන විටත් කුරුණෑගල ගබඩාවට යවන ලද ඩීසල් ටැංකි හයකින් ලීටර් 6600ක් ඉවත් කර ඒ වෙනුවට භූමිතෙල් පුරවා ඇති බවට තොරතුරු අනාවරණය වී ඇති ඒ තුළ රුපියල් ලක්ෂ 6කට අධික වංචාවක් සිදුව ඇත.

ලැබී ඇති තොරතුරු වලට අනුව ඩීසල් වෙනුවට භූමිතෙල් පුරවා තිබියදී හසුවූ බවුසරය ගම්පහ, උඩුගම්පොල ප්‍රදේශයේ පදිංචිකරුවකුට අයත් බව පැවසෙන අතර එම බවුසරය මුතුරාජවෙල තෙල් ගබඩා සංකීර්ණයෙන් පිටත් වී ඇත්තේ බවුසරයේ ටැංකි හයේම ඩීසල් පුරවාගෙන ය.
ඒ පසුගිය දෙසැම්බර් 31 වනදාය. නමුත් මෙම බවුසරය කුරුණෑගල ගබඩාවට වාර්තා කර ඇත්තේ ජනවාරි 02 වනදා පෙරවරු 11.47 ට පමණය.

ටැංකි 6කින් සමන්විත බවුසරයේ ටැංකි දෙකක භූමිතෙල් ඇති බව අනාවරණය වී ඇත්තේද එහිදී වන අතර අප ආරංචිමාර්ග සඳහන් කර සිටින්නේ මුතුරාජවෙල සිට මෙම ගමන සම්පුර්ණ කිරීම සඳහා ගතවන්නේ පැය හයකට ආසන්න කාලයක් වුවත් අදාළ ගමන සම්පුර්ණ කිරීමට දින දෙකකට ආසන්න කාලයක් ගැනීම සහ ටැංකි දෙකක භූමිතෙල් පිරවීම පිටුපස දැවැන්ත ජාවාරමක් සිදුව ඇති බවය.

සාමාන්‍යයෙන් ඩීසල් ලීටරයක මිල රුපියල් 95 ක් වන අතර ඉහත බවුසරයේ එක් ටැංකියක පරිමාව ලීටර් 3300කි. ඒ අනුව ටැංකි දෙකක ඩීසල් ඉවත්කර ඒ වෙනුවට භූමිතෙල් පිරවීම හමුවේ ඩීසල් ලීටර 6600 ක් සංස්ථාවට අහිමිවී ඇති අතර එම ඉන්දන තොගයේ වටිනාකම රුපියල් 627,000 කට ආසන්නය.

මේ බව පෙන්වා දෙමින් අප පුවත් මුලාශ්‍ර සඳහන් කර සිටින්නේ ඉහත සිදුවීම තුළ පැහැදිළි වංචාවක් සිදුව ඇති නමුත් මේ වන තෙක් අදාළ විමර්ශන පොලීසියට භාර නොදී සංස්ථාවේ විමර්ශන අංශය භාරයේ තබාගෙන ඇති බවය. එසේම මේ වන තුරුත් බවුසරයේ හිමිකාර පාර්ශවයෙන් ප්‍රකාශයක් හෝ ලබාගෙන නොමැති බවත් ඒ තුළ මෙම ජාවාරම යට ගැසීමේ උත්සාහයක් තිබෙන බවට බරපතල සැකයක් ඇති බවද එම ආරංචිමාර්ග සඳහන් කරයි.

Comment (0) Hits: 406

කාන්තා මත්පැන් තහනමට එරෙහිව අධිකරණයට පෙත්සමක්

මත්පැන් මිල දී ගැනීමට සහ මත්පැන් අළෙවි සැල්වල සේවය කිරීම සඳහා කාන්තාවන්ට අවසර ලබාදෙමින් මුදල් අමාත්‍යවරයා විසින් නිකුත් කර ඇති ගැසට් නිවේදනයක් අවලංගු කිරීමට අමාත්‍ය මණ්ඩලය මගින් ගෙන ඇති තීරණය නීති විරෝධී යැයි ප්‍රකාශ කරන මෙන් ඉල්ලා ශ්‍රේෂ්ඨාධිකරණයට මූලික අයිතිවාසිකම් පෙත්සමක් ඉදිරිපත් කෙරිණ.

නිශාන්ති බණ්ඩාරනායක, එම්ඩීජේබී ප්‍රනාන්දු, සමන්මලී ෆොන්සේකා, චන්දිමා රවිනි ජිනදාස, දීපාංජලී අබේවර්ධන, සබ්රිනා එසුෆාලි, ශාරන්‍යා සේකරම, රන්දුලා ද සිල්වා, මේනකා ගල්ගමුව, සුජාතා ගමගේ සහ විශාඛා පෙරේරා තිලකරත්න යන කොළඹ නගරයේ පදිංචි කාන්තාවන් එකොළොස් දෙනෙකු විසින් එම පෙත්සම ඉදිරිපත් කරනු ලැබ තිබේ.

මුදල් අමාත්‍ය මංගල සමරවීර, මුදල් අමාත්‍යාංශයේ ලේකම්වරයා සහ නීතිපතිවරයා පෙත්සමේ වග උත්තරකරුවන් ලෙස නම් කර තිබෙන පෙත්සම්කාරියෝ, කාන්තාවන්ට මත්පැන් මිලදී ගැනීමට සහ මත්පැන් අලෙවි කරන වෙළෙඳ සැල්වල සේවය කිරීමට නීත්‍යානුකූලව අවසර දෙමින් ඉකුත් 10 වෙනි දින මුදල් අමාත්‍යවරයා විසින් ගැසට් නිවේදනයක් ප්‍රකාශයට පත් කළ බව සඳහන් කරති.

ජනාධිපති මෛත්‍රීපාල සිරිසේන සහ අමාත්‍යවරුන් කිහිප දෙනෙකුම මුදල් අමාත්‍යවරයාගේ එම තීන්දුවට දැඩි විරෝධය පළ කළේය.

Twitter සටහන්

twiter 1000px

එම ගැසට් නිවේදනය පිළිබඳව සමාජය තුළ විරෝධතා මතු වීමෙන් පසුව එම ගැසට් නිවේදනය අහෝසි කිරීමට අමාත්‍ය මණ්ඩලය තීරණය කර ඇති බවට ප්‍රවෘත්ති පළවී ඇතැයි ද පෙත්සමේ සඳහන් වේ.

කැබිනට් මණ්ඩලයේ එම තීරණය මගින් කාන්තාවන්ට සමාජය තුළ සමාන ආකාරයෙන් කටයුතු කිරීමට ඇති අයිතිවාසිකම් උල්ලංඝනය වන බව පෙත්සම්කාරියන්ගේ තර්කය වී තිබේ.

මේ හේතුවෙන් රජය සිය මූලික අයිතීන් කඩ කර ඇති බවට තීන්දුවක් ලබා දෙන මෙන් ඉල්ලා සිටින පෙත්සම්කාරියෝ, මත්පැන් මිලදී ගැනීමට සහ මත්පැන් අලෙවිහල් වල සේවය කිරීමට නීත්‍යානුකූලව අවසර ලබාදෙන ගැසට් නිවේදනය අහෝසි කිරීමට රජය ගෙන ඇති තීරණය අත්හිටුවීමේ නියෝගයක් නිකුත් කරන මෙන් ද ශ්‍රේෂ්ඨාධිකරණයෙන් ඉල්ලීමක් කරති.

මේ අතර ඊයේ (17) ජනමාධ්‍ය අමාත්‍යංශයේ පැවති මාධ්‍ය සාකච්ජාවේදී මෙම කාරණය සම්බන්ධයෙන් මාධ්‍යවේදීන් කල විමසීමේදී ආණ්ඩුවේ සම මාධ්‍ය ප්‍රකාශක අමාත්‍ය රාජිත සේනාරත්න මහතා, "කොළඹ ඉන්න ගෑනු විතරක් නෙවෙයි කාන්තාවෝ කියන්නේ" යයි කියා සිටියේය.

 

වීඩියෝ

 කාන්තාවන් පිරිසක් ගොනුකළ පෙත්සම පහත පළවේ.

 

Comment (1) Hits: 495

පර්පෙචුවල් ට්‍රෙෂරීස් සමාගමේ දේපළ අත්කරගැනීමේ සුදානමක්

ශ්‍රී ලංකා  මහ බැංකුවේ බැඳුම්කර නිකුතුවෙන් නීති විරෝධී ලෙස උපයන ලද  Perpetual Treasuries Limited (PTL) සමාගමේ සහ එයට සම්බන්ධ වෙනත් සමාගම් සහ පුද්ගලයන්ගේ දේපල වහාම අත්කර ගැනීම  සඳහා නීතිපතිවරයාගේ  අවධානය යොමු ඇතැයි ජනාධිපති මාධ්‍ය ඒකකය සඳහන් කරයි.

බැදුම්කර කොමිසම විසින් සිදුව ඇති පාඩු පියවා  ගැනීම සඳහා සිවිල් නඩු පවරන ලෙස නිර්දේශ කර තිබුණද, සිවිල් නඩු කටයුතු සම්පූර්ණ කිරීමට කාලය ගතවන බැවින් නීති නීති දෙපාර්තමේන්තුව මේ සඳහා අවධානය යොමුකර ඇතැයි පැවසේ. 

 කොමිසම විසින් නීතිපතිවරයාට නිර්දේශ කර ඇත්තේ, අර්ථසාධක අරමුදලට සහ රජයට අයවිය යුතු  මුදල් නැවත අයකරගැනීම සඳහා ආණ්ඩුක්‍රම ව්‍යවස්ථාව උල්ලංඝනය නොවන පරිදි පාර්ලිමේන්තු පනත සම්මත කළ යුතු බවයි. 

Comment (0) Hits: 465

මුස්ලිම් විවාහ පනත සංශෝධනය කිරීමට කැපවෙනවා - ජිනීවාහිදී ලංකාව පොරොන්දු වෙයි

මුස්ලිම් විවාහ නීතිය අනුව ක්‍රියාත්මක අවම වයස් සීමාව ප්‍රතිසංස්කරණය කිරීමට ශ්‍රී ලංකාව කැපවී සිටින බව ළමා අයිතිවාසිකම් පිළිබඳ කමිටුවේදී (CRC) ශ්‍රී ලාංකික නියෝජිතයින් ප්‍රකාශ කර තිබේ.

ළමා අයිතිවාසිකම් පිළිබඳ එක්සත් ජාතීන්ගේ කමිටුව සඳුදා (ජනවාරි 15) සහ අඟහරුවාදා දෙදින තුළ ජිනීවාහිදී පැවැත්වුණි. මීට පෙරාතුව නිර්දේශ කරන ලද පරිදි විවාහවීම සඳහා අවම වයස් සීමාවක් නියම කරමින් මුස්ලිම් විවාහ නීතිය සහ උඩරට නීතිය සංශෝධනය කිරීම පිණිස ගනු ලැබ තිබෙන පියවර පැහැදිලි කරන මෙන් ළමා අයිතිවාසිකම් පිළිබඳ එක්සත් ජාතීන්ගේ කමිටුව ශ්‍රී ලංකා ආණ්ඩුවෙන් ඉල්ලීමක් කර තිබුණි. එයට පිළිතුරු වශයෙන් ශ්‍රී ලංකා නියෝජිතයින් පවසා ඇත්තේ අවම වයස් සීමාව සංශෝධනය කිරීම සඳහා අවශ්‍ය නීතිමය පියවර ගැන සොයාබැලීමට අධිකරණ අමාත්‍යංශය යටතේ කමිටුවක් පත් කර ඇති බවයි.

මුස්ලිම් පුද්ගල නීතිය යටතේ විවාහ වූ වයස අවුරුදු 16ට දැරියන් "ව්‍යවස්ථාපිත දූෂණයට ලක්වීම" සම්බන්ධයෙන් රටේ නීතිය සංශෝධනය පිළිබඳ සිතා බැලිය හැකිවන්නේ මෙම විවාහවන වයස් සීමාව සහ දික්කසාද නීතිය වෙනස් කිරීමෙන් වන බැවින් මුස්ලිම් දැරියන්ගේ අයිතිවාසිකම් උල්ලංඝණය වන පරිදි ඇති සියලු නීති සංශෝධනය කිරීමට ඇති හැකියාව එක්සත් ජාතීන්ගේ කමිටුව විමසා තිබේ.

එසේම ශ්‍රී ලංකාව පිළිබඳ සොයාබැලීමේ විශේෂ නියෝජිතයා වන ක්‍රිස්ටීන් සැන්බර්ග් පවසා ඇත්තේ ළමා අයිතිවාසිකම් සුරැකීම සම්බන්ධයෙන් ලංකාව යම් යම් සාධනීය පියවර ගෙන තිබුණත් සමස්ථය දෙස බැලීමේදී මෙරට තුළ දරුවන් අයිතිවාසිකම් හිමිකරුවන් ලෙස සහ පූර්ණ ප්‍රමුඛතාවයෙහි ලා සැලකීමක් සිදුනොවන බව පෙනෙන බවයි.

ශ්‍රී ලංකාවේ දූත පිරිසේ ප්‍රධානත්වය දරන ලද්දේ කාන්තා හා ළමා කටයුතු ලේකම් චන්ද්‍රානි සේනාරත්න මහත්මිය විසිනි.

Comment (0) Hits: 502

බැඳුම්කර ගනුදෙනුවට රවී සම්බන්ධ නෑ - කොමිසමේ නිර්දේශ මෙන්න

ප්‍රශ්නගත බැඳුම්කර ගනුදෙනුව සම්බන්ධව විමර්ශනය කළ ජනාධිපති කොමිෂන් වාර්තාවේ අදාළ ගනුදෙනුව සඳහා හිටපු අමාත්‍ය රවී කරුණානායකගේ සම්බන්ධයක් ඇති බව සඳහන්ව නොමැති බව වාර්තා වෙයි.

විශ්වාසවන්ත ආරංචිමාර්ග සඳහන් කර සිටින ආකාරයට එම වාර්තාවේ හිටපු අමාත්‍ය රවී කරුනානයකට අදාළව නිර්දේශ තිබෙනුයේ දෙකක් පමණි.

එම නිර්දේශ අතුරින් එකක් වන්නේ බැඳුම්කර වාර්තාවේ 920 පිටුවේ 24 පරිච්ඡේදය තුළ සඳහන් වන ආකාරයට රවී කරුණානායක මහතා මුදල් අමාත්‍යවරයා වශයෙන් කටයුතු කරන සමයේදී ඔහු හා පවුලේ සාමාජිකයන් පදිංචිව සිටි මහල් නිවාසයේ කුළී ගෙවීමේ කටයුත්ත පර්පෙචුවල් ට්‍රෙෂරීස් සමාගමට අනුබද්ධිත වෝල්ට් ඇන්ඩ් රෝ ඇසෝසියේට් (පෞද්ගලික) සමගම විසින් ගෙවීම සහ ඒ හරහා අමාත්‍යවරයා අයතා ප්‍රතිලාභයක් ලබා ඇතිද යන්න අල්ලස් හෝ දුෂණ විමර්ශන කොමිෂන් සභාව විසින් සලකා බැලිය යුතු බවය.

එසේම එම විමර්ශනයෙන් අනතුරුව රවී කරුණානායක මහතාට එරෙහිව ක්‍රියාමාර්ග ගැනීම අල්ලස් හෝ දුෂණ විමර්ශන කොමිසමේ කාර්යයක් බවද එහි සඳහන්ව ඇතැයිව එම ආරංචිමාර්ග පවසයි.

බැඳුම්කර කොමිසමේ රවී කරුණානායකට අදාළ දෙවැනි නිර්දේශය වන්නේ බැඳුම්කර ජනාධිපති කොමිසම හමුවේ රවී කරුණානායක මන්ත්‍රීවරයා ලබාදුන් සාක්ෂි සාවධ්‍යද යන්න නීතිපතිවරයා ඇතුළු ඊට අදාළ වගකිවයුතු පාර්ශව වෙත නිර්දේශ කරන බවත් ඒ පිලිබඳ තහවුරු කරගෙන යම් ආකාරයක සාවධ්‍ය සාක්ෂි ලබාදීමක් සිදුකර ඇත්නම් දණ්ඩ නීති සංග්‍රහයේ 179 හෝ 178 වගන්ති යටතේ රවී කරුනානයකට එරෙහිව නීති මඟින් කටයුතු කළයුතු බවය.

මේ පිළිබඳ තොරතුරු ලබාදෙමින් රවී කරුණානායක මන්ත්‍රීවරයාගේ නීතිඥයන් සඳහන් කර සිටියේ පසුගිය වසර දෙක පුරා තම සේවාදායකයා ප්‍රශ්නගත බැඳුම්කර ගනුදෙනුව සම්බන්ධව වගකිව යුතු බවට ගෙන ගිය ප්‍රචාර අසත්‍ය බව අදාළ වාර්තාව සාක්ෂි දරන බවය.

මේ අතර බැඳුම්කර ගනුදෙනුවට අදාල ජනාධිපති පරීක්ෂණ කොමිෂන් සභා වාර්තාවෙහි පිටපත් 26 (ඉංග්‍රීසි) ක් සහ සංක්ෂිප්ත වාර්තාවක් ද, බරපතල වංචා සහ දූෂණ පිළිබඳ විමර්ශන වාර්තාවෙහි පිටපත් 34 (සිංහල) ක් ද අද පෙ.ව.11.18ට ජනාධිපති කාර්යාලයේ නීති නිලධාරී නීතිඥ මුදිත දිසානායක මහතා විසින් පාර්ලිමේන්තු මහලේකම්වරයා වෙත භාර දෙනු ලැබීය.

එසේම ඒ පිළිබඳ විශේෂ ප්‍රවෘත්ති සාකච්ඡාවක් අද (17) දින ප.ව 01.00 ට පාර්ලිමේන්තු කමිටු ශාලා අංක 01 දී ගරු කථානායකතුමා සහ නියෝජ්‍ය කථානායකතුමාගේ සහභාගීත්වයෙන් පැවැත්වුණු අතර එළඹෙන සඳුදා(22) දිනයේ දී පක්ෂ නායක රැස්වීමක් කැඳවා බැඳුම්කර වාර්තාව සම්බන්ධයෙන් ඉදිරි වැඩ කටයුතු සිදු කරන බව එහිදී නිවේදනය වූ බවද දැනගන්නට ඇත.

26940840 1763174580373503 1567057241 n

26942863 1763174590373502 1843639029 n

Comment (0) Hits: 533

මේක ගෝත්‍රික තීරණයක් : නමුත් කැබිනට් සාමුහිඛත්වයට ගරු කරනවා - ඇමති මංගල

ගෝත්‍රික තීරණයක් වන නමුත් කැබිනට් මණ්ඩල සාමුහිඛත්වයට ගරු කිරීමක් ලෙස මත්පැන් අලෙවිසැල් ආශ්‍රිතව රැකියා කිරීම සහ මත්පැන් මිලදී ගැනීම සම්බන්ධව පැවති තහනම ඉවත් කරමින් නිකුත් කළ ගැසට් නිවේදන දෙක අවලංගු කරන බව මුදල් හා ජනමාධ්‍ය අමාත්‍ය මංගල සමරවීර සඳහන් කරයි.

අමාත්‍යවරයා මේ අදහස් පළකර ඇත්තේ ඊයේ (16) පැවැත්වුණු කැබිනට් මණ්ඩල හමුවේදී අදාළ ගැසට් නිවේදන දෙක අවලංගු කිරීමට අමාත්‍ය මණ්ඩලය එළඹී එකඟතාව සම්බන්ධව ප්‍රතිචාර දක්වමින්ය.

වර්තා වන අන්දමට මෙම අමාත්‍යමණ්ඩල හමුවේදී මංගල සමරවීර අමාත්‍යවරයා නිකුත් කළ ගැසට් නිවේදන දෙක සම්බන්ධව අමාත්‍යවරුන් වන රාජිත සේනාරත්න, පාඨලී චම්පක රණවක සහ දයාසිරි ජයසේකර විසින් දැඩිව විවේචනය කර ඇත. එහිදී ඔවුන් සඳහන් කර ඇත්තේ මේ හරහා යහපාලන ආණ්ඩුව ආරම්භ කළ මත්ද්‍රව්‍ය පිටුදැකීමේ වැඩසටහන කඩාකප්පල් වන බවත් එසේම එය රටේ සංස්කෘතියටද නොගැළපෙන බව ඔවුන් දැඩිව කියා ඇත.

එහිදී වැඩිදුරටත් ඔවුන්ට ප්‍රතිචාර දක්වමින් අමාත්‍ය මංගල සමරවීර දැඩිව සඳහන් කර ඇත්තේ කාන්තාවන් සම්බන්ධව පැවති යල්පැනගිය නීති සංශෝධනය කිරීමට අදාළව එම ගැසට් නිවේදන නිකුත් කටයුතු කළේ යහපාලන ආණ්ඩුවේ ප්‍රතිපත්තීන්ට සහ ආණ්ඩුක්‍රම ව්‍යවස්ථාවට අනුකූලව බවත් ඒ හැර බීමත්කම ප්‍රවර්ධනය කිරීමක් ඒ හරහා තමන් අරමුණු නොකළ බවත්ය.

හෙළ උරුමයේ ඉන්නේ කන්නේ බොන්නේ නැති මිනිස්සුද - දීප්ති

මේ අතර පසුගියදා newstube.lk වෙත අදහස් දක්වමින් ශ්‍රී ලංකා පෙරටුගාමී පක්ෂයේ දීප්ති කුමාර ගුණරත්න සඳහන් කර සිටියේ මත්පැන් ආදී ප්‍රශ්න දිහා සදාචාරාත්මක දෘෂ්ටියකින් බලන අසනීපය ලංකාවට ගෙන ඒමට කටයුතු කළේ නවසිය අනූගණන්වල අගදි ජාතික හෙළ උරුමය විසින් බවත් ඒ හමුවේ ජාතික හෙළ උරුමය කියන්නෙ කන්නෙ බොන්නෙ නැති අය ඉන්න තැනක්ද යන ප්‍රශ්නය මතුවන බවත්ය.

එසේම ජාතික හෙළ උරුමයේ පිරිස් හොඳට කන බොන අතරේ ගම්වල සිටින ජනතාව මෝඩයින් බව සිතා මෙවැනි දේවල් වෙනුවෙන් පෙනී සිටින බවත් 21වන සියවසේ තව ටික කාලයක් යද්දි අලුත් පාලකයන් බිහිවීමත් සමඟ මෙවැනි අදහස් නැතිවී යනු ඇති බවට තමන් විශ්වාස කරන බවද ඔහු පැවසීය.

2017-2021 මානව හිමිකම් ජාතික ක්‍රියාකාරී සැළැස්ම විහිළුවක්ද ?

මේ අතර අප හා අදහස් දැක්වූ සිවිල් සමාජ දේශපාලන සහ මානව අයිතිවාසිකම් ක්‍රියාකාරීන් කිහිපදෙනෙකුම පෙන්වා දුන්නේ අදාළ සිදුවීම හරහා වත්මන් ආණ්ඩුවේ ඇති පරස්පරතා රැසක් එලියට පැමිණි බවය. ඒ බව තහවුරු කරමින් නිදර්ශන රැසක් පෙන්වාදීමට ඔවුන් කටයුතු කළ අතර එහිදී විශේෂයෙන් දක්වා සිටියේ, ජනාධිපති මෛත්‍රීපාල සිරිසේන විසින් ඉදිරිපත් කළ "2017- 2021 මානව අයිතිවාසිකම් ආරක්ෂා කිරීම සහ ප්‍රවර්ධනය කිරීම සඳහා වූ ජාතික ක්‍රියාකාරී සැලැස්ම" ය.

එම ප්‍රකාශනයේ 3 වන පරිච්ඡේදයේ පිටු 39 සිට 65 දක්වා කාන්තා ප්‍රශ්න පිළිබඳව සඳහන් වන බවත් 'පෞද්ගලික අංශයේ සේවා ස්ථාන ඇතුළුව සියලුම සේවා ස්ථානයන්හී ස්ත්‍රී පුරුෂභාවය,ජාතිය, ලිංග භේද අනන්‍යතාවය ඇතුළුව තහනමට ලක්වන පදනම මත වෙනස් ලෙස නොසැලකීම සඳහා අයිතිය සහතික කිරීමට නීති පැනවීම" සිදුකරන බවට පොරොන්දුවී ඇති නමුත් අවසානයේ සමස්ත කැබිනට් මණ්ඩලයම තමන් විසින් ලබාදුන් ප්‍රතිපත්තියට විරුද්ධව වැඩකර ඇති බව පැහැදිලි වන බවද ඔවුන් සඳහන් කරයි.

ජනාධිපතිට අමතකද ?

එසේම ඊට පණිවිඩයක් නිකුත් කරමින් ජනාධිපතිවරයා "ජාතික මානව හිමිකම් ක්‍රියාකාරී සැලැස්ම සමාජයේ දුර්වලම කොටස්ද ඇතුළුව සියළු ශ්‍රී ලාංකිකයින්ගේ අයිතිවාසිකම් ආරක්ෂාවට හා ප්‍රවර්ධනයට රජය විසින් ගනුලැබූ තවත් එක් සාධනීය පියවරක් බව මාගේ විශ්වාසයයි.මෙම සැලසුම සකස් කිරීමටත්, ඉදිරි පස් අවුරුද්ද තුලදී එයා සාර්ථකව ක්‍රියාවට නංවන බවට පොරොන්දුවී ඇතත් වැඩ කිරීමේදී ඔහුටද ඒ පොරොන්දු අමතකවීම ගැටලුසහගත බවද පෙවුන් පෙන්වා දෙයි.

අගමැතිටත් අමතක වෙලා !

තවද 2017- 2021 මානව අයිතිවාසිකම් ආරක්ෂා කිරීම සහ ප්‍රවර්ධනය කිරීම සඳහා වූ ජාතික ක්‍රියාකාරී සැලැස්ම සඳහා තම පණිවිඩය එකතු කළ අවස්ථාවේ"සැළසුමේ පූර්ණ සාර්ථකත්වය ළඟාකර ගැනීම සඳහා රාජ්‍ය ආයතන සහ රේඛීය අමාත්‍යංශ විසින් නියමිත වේලාවට හා සාර්ථකව ක්‍රියාත්මක කිරීම සඳහා අවශ්‍ය සියළු පියවර ගතයුතු බවට සඳහන් කළ අග්‍රාමාත්‍යවරයා එවැනි පියවරක් ගැනීමට රේඛීය අමාත්‍යාංශයක් කටයුතු කළ අවස්ථාවේ ඊට අවශ්‍ය සහයෝගය දක්වුයේද යන ප්‍රශ්නය තමන්ට පවතින බවද ඔවුන් සඳහන් කර සිටියි.

වචන විතරයි - වැඩ නෑ

එසේම මෙවැනි කටයුතු හරහා ආණ්ඩුව කට වචනයෙන් සහ ලිඛිත පොරොන්දු විශාල ප්‍රමාණයක් ලබාදුන්නත් ඒ කිසිවක් ප්‍රයෝගිකව සිදුකිරීමට අසමත් බව සහ අවශ්‍ය වුවමනාවෙන් යුතුව කටයුතු නොකරන බව තහවුරුවූ බවද ඔවුන් පෙන්වා දෙයි.

Comment (0) Hits: 6972

භික්ෂූන් විරුද්ධවුයේ සුරාවට නෙවෙයි : කාන්තාවන්ට සමතැන දීමටයි - නීතිඥ ජේ.සී.වැලිඅමුණ

කාන්තාවන්ට මත්පැන් මිලදී ගැනීමේ සහ ඒ ආශ්‍රිත රැකියා කිරීමේ අයිතියට එරෙහිව විරෝධය දක්වන භික්ෂුන් කාන්තාවන්ගේ සම අයිතිය පිළිනොගන්නා ප්‍රගතිශීලී නොවන කණ්ඩායමක් බව නීතිඥ ජේ.සී.වැලිඅමුණ පවසයි.

එසේම ඇතැම් චීවරධාරීන් නොපෙනෙන ලෙසින් සුරා පානය කරන බවත් එවැනි පසුබිමක කාන්තාවන්ට සමතැන දීමේ අවස්ථාවක් අහිමි කිරීමට බලපෑම් කිරීම් කිසිඳු පදනමක් නොමැති ඉතා පටු කෝණයකින් දැක සිදුකරන්නක් බවද ඔහු සඳහන් කරයි.

නීතිඥ ජේ.සී.වැලිඅමුණ මේ බව සඳහන් කර සිටියේ කාන්තාවන් සඳහා මත්පැන් මිලදී ගැනීම සහ මත්පැන් අලෙවිසැල් විවෘතව තැබෙන වෙලාව සංශෝධනය කරමින් මුදල් අමාත්‍යංශය නිකුත් කළ ගැසට් නිවේදනය අවලංගු කිරීමට ජනාධිපතිවරයා ගනුලැබූ තීරණය සම්බන්ධව අදහස් දක්වමින්ය.

එහිදී වැඩිදුරටක් අදහස් දැක්වූ නීතිඥ ජේ.සී.වැලිඅමුණ ,

මත්පැන් පනතෙ තිබුණු රෙගුලාසි මගින් කාන්තාවන්ව දීර්ග කාලීනව වෙන්කොට දැක්වීමක් නතර කරන්න දරපු උත්සාහයේදි කාන්තාවන්ව වෙන්කොට දැක්වීමට ගත් උත්සාහය නතරවෙන්නයි ගියේ. දැන් නැවතත් ඒක තිබුණු තැනටම ගෙනියනව කියන්නෙ කාන්තාවන්ට තියෙන අයිතිවාසිකමක් අහිමිවීමක්.

නමුත් අවාසනාවකට වගේ ලංකාවෙ කාන්තාවන් ඉදිරියට ඇවිත් මේ සම්බන්ධව මත ඉදිරිපත් කිරීමක් දකින්න ලැබෙන්නෙ නැහැ .ඒ වුණත් පිරිමින්ට වගේම කාන්තාවන්ටත් සම තැන දෙන්න තිබුණු එක් අවස්ථාවක් මෙතනදි නැති වෙලා ගියා. එතනදි වැදගත් වෙන්නෙ ඒ අවස්ථාව ලොකුද පොඩිද කියන එක නෙවෙයි.ඒත් සමාජයේ විකුණන්න තියෙන යම්කිසි නිත්‍යානුකූල දෙයක් කාන්තාවන්ට ගන්න බැහැ කියනව නම් ඒක වැරදියි. ඒක ගන්නවද නැද්ද කියන එක තීරණය කරන්නෙ කාන්තාවො.

ඒ වගේම මත්පැන් මිලදී ගැනීමේ,විකිණීමේ අයිතිය කාන්තාවන්ට ලබා නොදෙන්න සමාජමය හෝ ආර්ථිකමය කිසිම පදනමක් නැහැ.

අරාබිකරයේ හැර ලෝකයේ මත්පැන් අලෙවි කරන හැම රටකම මම දන්න විදියට කාන්තා පිරිමි දෙගොල්ලටම මිලදීගන්න පුළුවන්. මේ රටේ විතරක් එහෙම කරන්නෙ ඇයි කියන ප්‍රශ්නයත් මතුවෙනවා. අද සමාජයේ කතා නොකළට දළදා මාළිගාවෙ දිය වඩන නිළමේ පත්කර ගන්නා ඡන්ද අයිතිය කාන්තාවන්ට නෑ. ඒ වගේ දීර්ග කාලීනව කාන්තාවන්ට සමාජ අසාධාරණකම් සිදුවුණා .ඒ දේවල් කවදා හරි දවසක නැති කිරීම අවශ්‍යයයි. ඒත් ඒක නැති කරන්න ගත්ත පොඩි හරි උත්සාහයක් නතර කරනව නම් එය දීර්ග කාලීනව නැවත වරක් ඇයගෙ ඉදිරි ගමනට බලපෑමක්.

මෙතනදි කාන්තාවන්ට තියෙන රැකියා අවස්ථාවකුත් අහිමි වෙනවා. කාන්තාවන්ට සුරා සැල්වල වැඩ කරන්න දෙන්නෙ නෑ කියල අතීතයෙ නඩු පවා තිබිල තියෙනවා. එක්තරා අවස්ථාවකදි ඩියුටි ෆ්‍රී ෂොප්වල (Duty Free) කාන්තාවන්ට වැඩ කරන්න නොදීම සම්බන්ධව උසාවිය ඉස්සරහ අභියෝගයටත් ලක්වුණා. ඒඅනුව ඒවා විකුණන සේල්ස් වුමන්ල (sales women)ඉන්න පුළුවන් නම් ගන්න බැරි ඇයි.

Comment (0) Hits: 531

නීති ලොක්කන්ට සුපිරි වාහන

නීතිපති දෙපාර්තමේන්තුවේ ඉහළම තනතුරු කිහිපයක් සඳහා නව සුපිරි මෝටර් රථ කිහිපයක් ලබා දී ඇති බව වාර්තා වෙයි.

වාර්තා වන ආකාරයට නීතිපති ජයන්ත ජයසූරියට හයිබ්‍රිඩ් බෙන්ස් රථයක් ලබා දී ඇති අතර, නීතිපතිවරයා මෙතෙක් භාවිතා කළ මෝටර් රථය අතිරේක සොලිසිටර් ජනරාල් දප්පුල ද ලිවේරාට ලබා දී ඇත.

මීට අමතරව අතිරේක සොලිසිටර් ජනරාල් යසන්ත කෝදාගොඩට ෆ්‍රී-ලෑන්ඩර් වර්ගයේ නවතම රථයක් ද ලබා දී ඇති බවද වාර්තා වන අතර එසේම ඉදිරි දින කිහිපයේදී නීතිපති දෙපාර්තමේන්තුවට තවත් පහසුකම් රැසක් ලබාදීමට නියමිත බවද වාර්තා වෙයි.

නීතිපති දෙපාර්තමේන්තුවේ ඇති යටිතල පහසුකම් හිඟය සම්බන්ධයෙන් පසුගිය කාලයේ අවස්ථා ගණනාවකදීම ජනාධිපතිවරයා ඇතුළු ආණ්ඩුවේ ප්‍රධානීන් දැනුවත් කර තිබූ අතර, ඒ සම්බන්ධයෙන් ආණ්ඩුවේ අවධානය යොමු වී ඇති බව ද දැනගන්නට ඇත. විශේෂයෙන්ම කනිෂ්ඨ රජයේ නීතිඥයන්ට ආසන පහසුකම් පවා නොමැති බවත්, ඔවුන්ට කොළඹින් පිට පළාත්වල නඩුවලට යාමේදී අතින් වියදම් කරගැනීමට සිදු වී ඇති බවත් එහිදී දැනුම්දී ඇත.

Comment (0) Hits: 440

මේ මැතිවරණ ක්‍රමයෙන් ප්‍රතිපත්ති දේශපාලනයට ඉඩක් නැහැ - සංජීව බණ්ඩාර

මේ මැතිවරණ ක‍්‍රමය විසින් ප‍්‍රතිපත්තිමය දේශපාලනය කරන අයකුට ඉදිරියට පැමිණීෙ මේ ඉඩකඩත් උදුරාගෙන ඇතැයි විප්ලවවාදී ශිෂය සංගමයේ සංජීව බණ්ඩාර පවසයි.

ඔහු මේ බව ප‍්‍රකාශ කළේ ‘නොරැවටෙමු-නැගී සිටිමු‘ යන තේමාවෙන් පෙරේදා (15) ගාල්ල කරන්දෙනියේදී පැවති පෙරටුගාමි සමාජවාදී පක්ෂයේ ජනහමුවක් අමතමිනි.

සංජිව බණ්ඩාර මහතා පැවසුවේ ”අපි පක්ෂයක් ලෙස මේ මැතිවරණයේදි තරඟ කරන්න ඉදිරිපත් නොවුණත් අපට බරපතළ වගකීමක් තිබෙනවා, සමාජයක් ලෙස රටක් ලෙස අපට මුහුණ දෙන්නට නියමිත අදුරු ඉරණම සම්බන්ධයෙන් ජනතාව දැනුවත් කරන්න. ඒ් වගේම ඒ් විනාශය වැළැක්වීම සදහා ජනතාව දැනුවත්කිරීමට ඇති අයිතිය වෙනුවෙන් අපි ඔබ ඉදිරියට ආවෙ."

2015 මේ අය බලයට පත්වෙන්න කලින් ජනාධිපතිවරණය හමුවේ ගෙනාව සටන්පාඨය වුණේ ප‍්‍රජාතන්ත‍්‍රවාදය, සමාජ සාධාරණත්වය වැනි දේවල්. හොරු අල්ලනවා කියපු අය දැන් ලොකුම හොරකමක මේ චූදිතයන් වෙලා. ආණ්ඩුවේ ප‍්‍රධාන පොරොන්දුවක් වුණෙත් දූෂිත මැතිවරණ ක‍්‍රමය ඉවත් කරලා ජනතා පරමාධිපතය තහවුරු කළ හැකි මැතිවරණ ක‍්‍රමයක් සකස් කිරීමයි. අලූතින් පළාත්පාලන මැතිවරන ක‍්‍රමය සංශෝධන කර තිබෙන්නෙ ජනතාවට වාසිදායක වන්නට නොවේ, ආණ්ඩුවේ බලය තහවුරු කරගැනීමටයි. ඒ් නිසා තමයි සමහර අය කියන්නෙ මේක හරක් හොරුන්ගේ ක‍්‍රමයට පනත් සම්මත කිරීමක් හැටියටයි. ලොරිය ඉස්සරහින් බුදු සරණයි කියලා ගහගෙන හොර හරක් පන්නාගෙන යනවා.

ඉතින් මේ ආණ්ඩුව විතරක් නෙවෙයි දැන් ප‍්‍රජාතන්ත‍්‍රවාදය ගැන කයිවාරු ගහන හැමෙදනාම මේ මැතිවරණයෙන් පස්සට දාගන්න උත්සාහ කළා. ඒ්කාබද්ධ විපක්ෂය අවුරුදු 3ක් මැතිවරණ වෙනුවෙන් කෑ ගැහුවලූ. ඒ්ත් ඒහෙම හඩක් නැගුවද නැද්ද කියලා අපි දන්නවා. ජනතා විමුක්ති පෙරමුණත් රෙද්දක් ඇදගෙන පාරට බහින්න බැරුව හිටියෙ. එයට හේතුව 2015 මෛත්‍රීපාල සිරිසේන බලයට පත් කරන්න අනියමින් සහාය දීලා ඉන්පස්සෙ ආණ්ඩුවෙ ජනතා ද්‍රෝහී අණපනත් සෙරටම පක්ෂව අත උස්සපු නිසයි.

Comment (0) Hits: 407

Page 372 of 391