පුවත්

කොවිඩ් අවදානම හේතුවෙන් පාසල් අධ්‍යාපන කටයුතු වසර එකහමාරකට වැඩි කාලයක් තිස්සේ නිසි පරිදි සිදු නොවීය. අවසන් වරට පසුගිය අප්‍රේල් මාසයට පෙර වසා දැමූ පාසල් යළි ලබන 21 වැනිදා සිට ආරම්භ කිරීමට අධ්‍යාපන බළධාරීන් තීරණය කර තිබේ.

21 වැනිදා විවෘත වන්නේ සිසුන් 200 ට අඩු පාසල්වල ප්‍රාථමික ශ්‍රේණි පමණි. පාසල් සම්පූර්ණයෙන් විවෘත කිරීම සඳහා අවම වශයෙන් තවත් මාසයකට වැඩි කාලයක් ගතවනු ඇත.

පාසල් යළි විවෘත කළද බොහෝ දරුවන් පාසල් යාමට මැලිකමක් දැක්විය හැකි බවත්, සැළකිය යුතු සිසු සිසුවියන් ප්‍රමාණයක් පාසල් හැරයාමට ඉඩ තිබෙන බවත්, කරාපිටිය ශික්ෂණ රෝහලේ ළමා හ‍ා යොවුන් මනස පිළිබඳ විශේෂඥ වෛද්‍ය දර්ශනී හෙට්ටිආරච්චි පවසයි. දිගුකාලීනව පාසල් වසා තැබීම, ඔන්ලයින් අධ්‍යාපන කටයුතු නිසි පරිදි සිදු නොවීම ඊට හේතු ලෙස දැක්විය හැකි බවයි වෛද්‍යවරිය පවසයි.

විශේෂයෙන් 9 - 10 ශ්‍රේණිවල සිට ඉහළ ශ්‍රේණිවල අධ්‍යාපනය ලබන දරුවන් සැළකිය යුතු ප්‍රමාණයක් පාසල් හැරයන තත්ත්වයට පත්විය හැකි බවද වෛද්‍යවරිය සඳහන් කරයි.

ඔන්ලයින් අධ්‍යාපන කටයුතු හේතුවෙන් දරුවන් පරිගණක හා ජංගම දුරකතන සමග වැඩි කාලයක් ගත කළ අතර, එහි අහිතකර ප්‍රතිඵලයක් ලෙස දරුවන් අන්තර්ජාල ක්‍රීඩාවලට සහ සමාජ ජාලා මාධ්‍යවලට ඇබ්බැහි වී ඇති බවද වෛද්‍යවරිය පෙන්වා දෙයි.

මීට අමතරව මෙම කාල සීමාව තුළ පෙරට වඩා මානසික ගැටලුවලට දරුවන් ලක්වීමේ ප්‍රවණතාවයක් දක්නට ලැබුණු බවද දර්ශනී හෙට්ටිආරච්චි සඳහන් කර= අන්තර්ජාලයට ඇබ්බැහි වීම මෙන්ම කායික හා මානසිකව හිංසනයට ලක්වීම මේ සඳහා හේතු වී ඇති බවයි ඇය පවසයි. බොහෝවිට දරුවන් හිංසනයට ලක්වන්නේ සමීපතම ඥාතීන් අතින් බව පෙන්වා දෙන වෛද්‍යවරිය පවසන්නේ මෙය ඉතාම බරපතල තත්ත්වයක් බවයි.

LNW

වෙළඳපොළේ සීනි පාලන මිල ඉවත් කරන ලෙස සීනි ආනයන කරුවන් මුදල් අමාත්‍යංශයෙන් ඉල්ලීමක් කර ඇති බව වාර්තා වෙයි.

ඔවුන් මෙම ඉල්ලීම සිදු කරන්නේ යළිත් වෙළඳපොල තුළ සීනි මිල ඉහළ ගොස් ඇති අවස්ථාවකය.

පාලන මිල ඉවත් කර ගැනීම සඳහා සීනි ආනයන කරුවන් මේ වන විට මුදල් අමාත්‍ය බැසිල් රාජපක්ෂ වෙත ලිපියක් යොමු කර ඇති බවත් වාර්තා වෙයි.

මේ වනවිට වෙළඳපොල තුළ සීනි සඳහා පාලන මිලක් නියම කර තිබුණ ද එම පාලන මිලට සීනි නැත.

පසුගිය කාලසීමාව තුළදී සීනි තොග සඟවා තැබීම හේතුවෙන් සීනි කිලෝග්‍රෑමයක මිල රුපියල් 230 දක්වා ශීඝ්‍ර ලෙස ඉහළ ගිය තත්ත්වයක් ඇතිවිය.

ඒ අනුව, සුදු සීනි කිලෝග්‍රෑමයක් සඳහා රුපියල් 122ක පාලන මිලක් පනවමින් ගැසට් නිවේදනයක් ද නිකුත් කෙරුණ නමුත් වෙළඳපොල තුළ සීනි කිලෝවක මිල රුපියල් 135ක් පමණ වෙයි . දුඹුරු සීනි කිලෝවක් සඳහා ද රුපියල් 125 ක පාලන මිලක් සඳහන් කර තිබුණත් එම මිලට වෙළෙඳ පොල තුළ සීනි නැත .

එසේම වෙළෙඳපොළ තුළ විටින් විට සීනි හිඟයක් සම්බන්ධවද වාර්තා ලැබී ඇත.

එහිදී වෙළඳ පොළ ආරංචි මාර්ග පවසන්නේ නමුත් ඩොලර් හිඟවීම නිසා සීනි ආනයනය දුෂ්කර වී ඇති බවයි.

ආණ්ඩුවේ සිටින බැසිල් පාර්ශ්වය සහ බැසිල් විරෝධී පාර්ශ්වය ලෙස ජාතික තලයේ තිබූ බෙදීම මේ වන විට බිම්මට්ටම දක්වා ඔඩුදුවා ඇති බව දේශපාලන නිරීක්ෂකයන් පෙන්වා දෙයි.

ඊට ආසන්නතම සිදුවීම ලෙස ඔවුන් පෙන්වා දෙන්නේ ජාතික නිදහස් පෙරමුණ නියෝජනය කරමින් ශ්‍රී ලංකා පොදුජන පෙරමුණෙන් පාර්ලිමේන්තුවට පත් වී සිටින නුවරඑලිය දිස්ත‍්‍රික් පාර්ලිමේන්තු මන්ත්‍රී නිමල් පියතිස්ස මහතා සහ ශ්‍රී ලංකා පොදුජන පෙරමුණේ ආධාරකරුවන් අතර සිදුවූ ගුටිබැට හුවමාරුවයි.

කොත්මලේ ප්‍රාදේශීය සංවර්ධන හමුවකදී මෙම ආරවුල ඇති වී ඇත්තේ සංවර්ධන කටයුත්තක් පිලිබද ඇතිවූ මතබේදයක් හේතුවෙනි.

එම ප්‍රාදේශීය සංවර්ධන කමිටුවේ සභාපති ධුරය දරන්නේ නිමල් පියතිස්ස මන්ත්‍රීවරයා යි.

කෙසේ වුවත් මේ නිර්ලැජ්ජිත හැසිරීම මෙතනින් අවසන් නොවනු ඇති බව දේශපාලන නිරීක්ෂකයන් පවසයි. ඒ මේ වන විට ශ්‍රී ලංකා නිදහස් පක්ෂයේ ප්‍රබලයන් සහ පොදුජන පෙරමුණේ ප්‍රබලයන් අතර ගැටුමත් බිම්මට්ටම දක්වා යනු ඇති බවට පුරෝකථනය කරමිනි.

මෙහිදී දේශපාලන නිරීක්ෂකයන් පෙන්වා දෙන්නේ ශ්‍රී ලංකා නිදහස් පක්ෂයේ නායක ඇතුළු ප්‍රබලයන් මේ වන විට පොදුජන පෙරමුණේ ප්‍රබලයන් විසින් දැඩිව විවේචනය කිරීමක් සිදුවන බවයි. එසේම පසුගිය මහමැතිවරණයේදී එල්ලවූ "පොහොට්ටුවේ වේදිකා හූව"ත් ඔවුන් සිහිපත් කරයි.

කෙසේ වුවත් ආණ්ඩුව ලැබූ බරපතළ ජනතා අප්‍රසාදය හමුවේ ශ්‍රීලනිප සහ ජනිපෙ ක්‍රියාකාරීන් එකට එක කිරීම අරඹා ඇති බවත් දේශපාලන නිරීක්ෂකයන් පෙන්වා දෙයි. මෙකී ගැටුම් නිරීක්ෂණය කිරීමේදී ඔවුන් ආණ්ඩුවේ බැසිල් පාර්ශ්වය සහ බැසිල් විරෝධී පාර්ශ්වය ලෙස පැහැදිලිව හඳුනා වෙන්කර ගැනීමට හැකි බවත් නිරීක්ෂක මතයවී තිබේ.

ගව ඝාතනය තහනම් කිරීම සම්බන්ධයෙන් ආණ්ඩුව යළිත් වරක් ක්‍රියාත්මක වෙමින් ඇත.

ඒ අනුව ඊයේ (18) ගව ඝාතනය තහනම් කරන යෝජනාවකට කැබිනට් අනුමැතිය ලබා ගෙන තිබේ.

බුද්ධ සාසන හා අගාමකි කටයුතු ඇමති වශයෙන් අගමැති මහින්ද රාජපක්ෂ මීට අදාළ කැබිනට් සංදේශය ඉදිරිපත් කර ඇත.

ඒ අනුව මෙම තහනම ක්‍රියාත්මක කිරීම සඳහා දැනට වලංගුව පවතින නීති 5ක් සංශෝධනය කිරීමට කැබිනට් අනුමැතිය ලබාදී ඇත.

මේ ආණ්ඩුව බලයට පත්වූ වහාම ගව ඝාතනය තහනම් කරන බවට නිවේදනය කෙරුණු නමුත් එය සිදුවූයේ නැත.

එහෙත් එය ක්‍රියාත්මක නොවූ අතර ඉන්පසු අවස්ථා කිහිපයකදී මෙය නතර බවට අගමැතිවරයාම ප්‍රකාශ කර තිබුණ නමුත් එයත් ක්‍රියාත්මක වූයේ නැත.

රාජ්‍ය ඖෂධ නීතිගත සංස්ථාවේ (SPC) ඉහළ තනතුරු දෙකක් ඉදිරි දින කිහිපය තුළ අනිවාර්යෙන්ම හිස්වන බව විශ්වාස කටයුතු ආරංචි මාර්ග සදහන් කරන බව මව්බිම පුවත්පත අනාවරණය කර ඇත.

අදාළ පුවත අනුව රාජ්‍ය ඖෂධ නීතිගත සංස්ථාවේ සංස්ථාවේ සභාපති විශේෂඥ වෛද්‍ය ප්‍රසන්න ගුණසේන සහ කළමනාකාර අධ්‍යක්ෂ ලලිත් ජයකොඩි සිය තනතුරුවලින් ඉල්ලා අස්වීමට තීරණය කිරීම නිසා එම තනතුරු මෙසේ හිස්වන බව එම සංස්ථාවට සම්බන්ධ තොරතුරු අනාවරණය කර ඇත.

එම පුවතේ වැඩිදුරටත් මෙසේද සඳහන් වෙයි.

දැනට කොවිඩ් මර්දනය සදහා එන්නත් ආනයනය කිරීමේ කටයුතු රාජ්‍ය ඖෂධ නීතිගත සංස්ථාව මගින් සිදුකෙරෙන අතර එම කටයුතු සාර්ථකව සිදු කෙරෙමින් පවතින පසුබිමක සංස්ථාවේ සභාපතිවරයා සහ කළමනාකාර අධ්‍යක්ෂවරයා මෙසේ හිටිහැටියේම ඉල්ලා අස්වීම මතභේදයට තුඩු දී ඇතැයිද වාර්තාවේ.

ඖෂධ නීතිගත සංස්ථාවේ සභාපතිවරයාගේ සහ කළමනාකාර අධ්‍යක්ෂවරයාගේ හදිසි ඉල්ලා අස්වීම සෞඛ්‍ය ඇමතිවරයා සමග ඇතිවූ මතභේදාත්මක තත්ත්වයක් නිසා නිර්මාණ වුවක් බව සභාපතිවරයාගේ සමීපතම ආරංචි සදහන් කරයි.

ඉකුත් සති කිහිපය තුල අවස්ථා කිහිපයකදී මෙම ඉහල නිලධාරින් කැබිනට් ඇමතිවරයාගේ දෝෂාදර්ශනයට ලක්ව ඇති බවට සෞඛ්‍ය අමාත්‍යාංශයට සම්බන්ධ තොරතුරු අනාවරණය කරයි.

– මව්බිම

ලබන සඳුදා සිට යළි සේවයට වාර්තා කිරීමට වර්ජිත ගුරු - විදුහල්පතිවරු තීරණය කළ බව ගුරු විදුහල්පති වෘත්තීය සමිති සංධානය අද තීරණය කළේය.

ඒ අනුව 25 වැනිදා සිට සේවයට වාර්තා කරන බවයි එම සන්ධානය පවසයි.

අද පෙරවරුවේ වෘත්තීය සමිති සන්ධානය නියෝජනය කරන වෘත්තීය සමිති නියෝජිතයන් හමු වී සාකච්ඡා කර ඇති අතර එහිදී එකඟතාවයකට පැමිණ තිබෙන්නේ 25 වැනිදා සිට පාසල්වල සේවයට වාර්තා කිරීමටයි.

සිසුන් 200 ට අඩු පාසල් 21 වැනිදා සිට විවෘත කිරීමට මේ වනවිටත් තීරණය කර ඇති අතර, කෙසේ නමුත් 25 වැනිදා දක්වා වැඩවර්ජනය අඛණ්ඩව ක්‍රියාත්මක කිරීමට ගුරු විදුහල්පති වෘත්තීය සමිති සන්ධානය තීරණය කර තිබේ.

වැටුප් විෂමතාව විසඳුම් ඉල්ලා ගුරු - විදුහල්පති සංගම් ඔන්ලයින් ඉගැන්නුම්වලින් ඉවත්ව අදට දින 99 කි.

සමාජමාධ්‍යයේ අනුර පුම්බන්න ජවිපෙ කෝටි පහක් වියදම් කරලා - සාක්ෂිත් සමගම කැම්පේන් විස්තර එළියට” යන ශීර්ෂය සහිතව ලංකා මැග් (Lanka MAG) නම් වෙබ් අඩවියේ පළකර තිබූ පුවත සාවද්‍ය බව ජනතා විමුක්ති පෙරමුණ පවසයි.

අදාළ පුවත සඳහා කූඨ ලේඛන සකසා ඇති බවත් ඒ සම්බන්ධයෙන් නීති ක්‍රියාමාර්ග ගැනීමට පක්ෂය කටයුතු කරන බවත් ජවිපෙ ප්‍රචාරක ලේකම් පාර්ලිමේන්තු මන්ත්‍රී විජිත හේරත් නිවේදනයක් නිකුත්කරමින් සඳහන් කර සිටියි.

අදාළ නිවේදනය පහත දැක්වෙයි.

ව්‍යාජ පුවතක් සම්බන්ධ පැහැදිලි කිරීමයි !

“සමාජමාධ්‍යයේ අනුර පුම්බන්න ජවිපෙ කෝටි පහක් වියදම් කරලා - සාක්ෂිත් සමගම කැම්පේන් විස්තර එළියට” යන ශීර්ෂය සහිතව ව්‍යාජ පුවතක් ලංකා මැග් (Lanka MAG) නම් වෙබ් අඩවියක පළ කරනු ලැබ තිබේ.

මෙම පුවත මේ වන විට සියලු ක්ෂේත්‍රයන්හි අසාර්ථක වෙමින්ද ජනතා විරෝධයට ලක්වෙමින්ද සිටින ආණ්ඩුවේ බංකොලොත් ප්‍රචාරවලින් එකක් ලෙස හඳුනා ගන්නා අපි මෙම අවලාදාත්මක පුවත තරයේ ප්‍රතික්ෂේප කරමු.

මෙම පුවතෙහි සඳහන් වෙළඳ දැන්වීම් ප්‍රචාරණ ආයතනය සමග අපගේ කිසිදු සබඳතාවක් තිබී නැති අතර එය හුදෙක් අප පක්ෂයට අවලාද නැගීම වෙනුවෙන්ම මවන ලද පුවතකි. අප පක්ෂයේ බවට හැඟෙන ලද සකසන ලද ව්‍යාජ රබර් මුද්‍රාද පක්ෂයේ නායකයින්ගේ ව්‍යාජ අත්සන්ද යොදා ගනිමින් මෙම පුවත සකසනු ලැබ ඇත.

ආණ්ඩුවට එරෙහිව ප්‍රබල ජන මතයක් ගොඩනැගෙමින් තිබියෙදී එය වෙනතක හැරවීමට ආණ්ඩුව විසින් ගන්නා ලද තවත් අසාර්ථක උත්සාහයක් වශයෙන් මෙය හඳුනාගන්නා අපි මෙම ක්‍රියාමාර්ග පිටුපස ඇති දේශපාලනය පරාජය කිරීමට පෙරට එන ලෙස ජනතාවගෙන් ඉල්ලා සිටිමු.

එසේම මෙම ව්‍යාජ පුවත සහ ඊට පදනම් කරගත් කූට ලේඛනය පිළිබඳව නීතිමය ක්‍රියාමාර්ග ගන්නා බවද වැඩිදුරටත් සඳහන් කරමු.

විජිත හේරත්

ප්‍රචාරක ලේකම්

ජනතා විමුක්ති පෙරමුණ

2021.10.18

ඔක්තෝබර් 16වන සෙනසුරාදා ලන්ඩනයේ පාර්ලිමේන්තු පරිශ්‍රයේදී පැවැත්වූ ඉල්ලීම් කීපයක් මුල්කරගත් විරෝධතා උද්ඝෝෂණය ඉතා විශාල වෘත්තීයවේදීන් රැසකගේ සහභාගීත්වයෙන් සිදුවිය.

ලන්ඩන් පාර්ලිමේන්තු පරිශ්‍රයේ ඕනෑම කෙනෙක්ට තම අදහස් යෝජනා විරෝධතා දැක්වීමට තරම් නිදහස හා ප්‍රජාතන්ත්‍රවාදය තිබුනද, ඉන්න රටක් එක නීතියක් ඉල්ලූ ලාංකිකයාට එය හිමිද යන්න ප්‍රශ්නයකි. ඒ නිසාවෙන් ලන්ඩන් ශ්‍රී ලාංකික ඩයස්පෝරාව 16 වෙනිදා පාස්කු වින්දිතයින්ට යුක්තිය ඉල්ලා සිටියහ.

හිටපු අගමැති දියණියකුත් විරෝධතාවට එක්වෙලා..!

හිටපු අග්‍රාමාත්‍ය අභහවප්‍රාප්ත රත්නසිරි වික්‍රමනායකගේ දියණියකවන වෛද්‍ය තුෂ් වික්‍රමනායකද එම විරෝධතාව අතරට එක්ව සිටියාය. එහිදී ඇය දැඩිව ආණ්ඩුව විවේචනය කරමින් පාස්කු ප්‍රහාරයේ මහමොළකරුවන් හෙළිකරගැනීම, වින්දිතයින්ට යුක්තිය මෙන්ම භාෂණයේ හා ප්‍රජාතන්ත්‍රවාදයේ නිදහස වෙනුවෙන් එක්ව ක්‍රියාකරමින් වෙනසකට මුලපිරීමට දමිල ඩයස්පෝරාව වත්මන් පරම්පාරාවට ආරාධනා කලේ සිංහල ඩයස්පෝරාව හා එක්ව එකම ධජය යටතේ ශ්‍රී ලංකන් ඩයස්පෝරාව ලෙස අත්වැල් බැඳ ගන්නා ලෙසයි.

ඇය තවදුරටත් කියා සිටියේ වත්මන් රජය බලය ලබාගැනීම පිණිස ජාතිවාදය උපරිමයෙන් භාවිතා කළ බැවින් එකී අවස්ථාවේම තමන් හා තම දරුවන් මුස්ලිම් වරුන්ගේ ව්‍යාපාර වෙත ගොස් සැබෑ ශ්‍රී ලාංකියන් බෙදෙන්නට සූදානම් නොමැති බව ක්‍රියාවෙන්ම ඔප්පු කළ බවත්ය.

විද්වතුන් රැසක් එක්ව විරෝධතාව බල ගන්වයි….!

ලන්ඩනයේ වෙසෙන වෛද්‍ය වරුන් ඉංජිනේරුවන් නීතීඥයින් හා විවිධ වෘත්තිකයන් එක්ව විරෝධතාවට ජවයක් එක් කළහ,

එහිදී පිළිගැනීමේ කතාව Milton Keynes University රෝහලේ නාරි හා ප්‍රසව වෛද්‍ය පියල් පෙරේරා විසින් ආරම්භ කරමින් ආරම්භ කළ උද්ඝෝෂණයට වෛද්‍ය රංජිත් වෙල්ගම, ඇතුලු බොහෝ පිරිස් එක්ව සිටියහ.

උද්ඝෝෂණ රැල්ල දියකරන කුමන්ත්‍රණය දිගටම !

බොලොඤ්ඤාවලින් ආරම්භ වී ඉතා වේගයෙන් ලොව පුරා පැතිරෙන පාස්කු වින්දිතයින්ට යුක්තිය ඉටුකිරීම හා මහ මොළකරුවන් හෙළිකිරීමේ විරෝධතා උද්ඝෝෂණ රැල්ල දියකර හැරීමේ උත්සාහයක ආණ්ඩු හිතවාදීන් කිහිපදෙනෙකු නිරතව සිටියි. ආසන්තම හේතුව ලෙස ඉතාලියේ මිලානෝ නගරයේ පැවති උද්ඝෝෂණය සත්‍යග්‍රහයක් ලෙසින් දියාරු කිරීමට යාමේදී රැස්ව සිටි පිරිසෙන් ආ විරෝධය මත නැවත උද්ඝෝෂණ ස්වරූපයෙන් එය අවසන් කළද කඩාකප්පල් කාරී කුමන්ත්‍රණ කරුවන් උද්ඝෝෂණය අසාර්ථක බවට පුවත් මැවීමය.

එමෙන්ම ලන්ඩන් උද්ඝෝෂණය හුදෙක් දේශපාලන උවමනාවක් බව පෙන්වමින් ඊට සහභාගී වීමට සිටි බොහෝ පිරිස් නොමග යවමින් දුරකථන ඇමතුම් ලැබී ඇති බවද වාර්ථා වී ඇත…

සුමුදු මද්දුමආරච්චි

මිලානෝ,

ඉතාලිය.

යුගදනවි බලාගාරයේ කොටස් අමෙරිකානු නිව්ෆෝට්‍රස් සමාගමට පවරාදීමට එරෙහිව කොළඹ අගරදගුරු මැල්කම් කාදිනල් රංජිත් හා ඇල්ලේ ගුණවංශ හිමියන් ශ්‍රේෂඨාධිකරණයට මූලික අයිතිවාසිකම් පෙත්සමක් ගොනු කර ඇත.

පෙත්සම්කාර පාර්ශ්වය ඉල්ලා ඇත්තේ, එම සමාගමට ද්‍රව වායු සැපයීමේ කොන්ත්‍රාත්තුව ලබාදීම වළක්වමින් නියෝගයක් නිකුත් කරන ලෙසය.

මෙම පෙත්සමේ වගඋත්තරකරුවන් ලෙස අග්‍රාමාත්‍ය මහින්ද රාජපක්ෂ ඇතුළු කැබිනට් මණ්ඩලය, කැබිනට් මණ්ඩලයේ ලේකම්වරයා, මුදල් අමාත්‍යාංශයේ ලේකම්වරයා සහ නීතිපතිවරයා ඇතුළු 54 දෙනෙකු වගඋත්තරකරුවන් ලෙස නම් කර තිබේ.

මෙම වගඋත්තරකරුවන් අතරට නිව් ෆෝට්‍රස් අමෙරිකානු සමාගමද ඇතුළත් ය.

කාබනික පොහොරෙ භාවිතා කර 1%ක් ගොවිතැන් කර පෙන්වන්නැයි ජනාධිපතිවරයාටත් කෘෂිකර්ම අමාත්‍යවරයාටත් අභියෝග කරන බව පාර්ලිමේන්තු මන්ත්‍රී පාඨලී චම්පික රණවක පවසයි.

මන්ත්‍රීවරයා මේ බව කියා සිටියේ කොළඹ පැවති මාධ්‍ය හමුවකට එක් වෙමිනි.

ගොවි ජනතාව සඳහා ප්‍රමිතියෙන් යුතු පොහොර ලබා දීමට ආණ්ඩුව කටයුතු නොකළහොත් රට තුළ සාගතයක් ඇති වීම මෙන්ම බරපතළ කැරලිකාරී තත්ත්වයක් ඇතිවීමට ද ඉඩ තිබෙන බව සමගි ජනබලවේග පාර්ලිමේන්තු මන්ත්‍රි චම්පික රණවක සඳහන් කරයි.

කාබනික පොහොර වලින් ගොවිතැන් කිරීම අසාර්ථක බව ජනාධිපතිවරයා සහ කෘෂිකර්ම අමාත්‍යවරයා පිළිගත යුතු බව ද මන්ත්‍රීවරයා පැවසීය.

ඒ හේතුවෙන් ජනාධිපති ගෝඨාභය රාජපක්ෂ කෘෂිකර්ම අමාත්‍ය මහින්දානන්ද අලුත්ගමගේ ගොවි ජනතාවට වැඳ ඔවුන්ගෙන් සමාව ගත යුතු බවද මන්ත්‍රීවරයා කීය.

වර්තමානයේ කටයුතු සිදුවන ආකාරයට රට සාගතයක් කරා යාම පමණක් නොව ඉතා බරපතළ කැරළිකාරී තත්ත්වයක් මෙන්ම සමාජ පිපිරුමක් ඇති වීමේ වැඩි ඉඩක් ඇති බවද ඔහු තවදුරටත් එහිදී කියා සිටියේය.

අඛණ්ඩව වර්ධනය වෙමින් තිබෙන ඉන්දීය ධීවරයින්ගේ බලපෑම් සම්බන්ධයෙන් විසඳුම් ඉල්ලා අද (17) උතුරේ ධීවරයින් විශාල පිරිසක් මුලතිව් මුහුදු තීරයේ සිට යාපනය පේදුරුතුඩුව මුහුදු තීරය දක්වා මුහුදෙන් ගමන් කරමින් විරෝධතාවක් සංවිධානය කොට තිබුණි.

අද උදෑසන මුලතිව් මුලිලිවයික්කාල් මුහුදු තීරයෙන් පේදුරුතුඩුව දක්වා ධීවරයින් විරෝධතා දක්වමින් බොට්ටු ගමන් ඇරඹු බව වාර්තා වෙයි.

‘අපේ ධීවරයින් ආරක්ෂා කරමු ‘ යන සටන් පාඨය යටතේ ඉන්දීය ට්‍රෝලර් යාත්‍රා බලපෑම වහාම නවතන ලෙස ඉල්ලමින් මුලතිව් මුහුදු තීරයෙන් ධීවර බෝට්ටු 50 කට අධික ප්‍රමාණයක් විරෝධතාව සඳහා එක්වු බවත් වාර්තා වෙයි.

එසේම පේදුරුතුඩුවේදී යාපනයේ ධීවරයින්ද විශාල ප්‍රමාණයක් මෙම විරෝධතාවට එක්ව ඇත.

තවද ද්‍රවිඩ ජාතික සන්ධානයේ දේශපාලන නායකයන් , මන්ත්‍රීවරුන් ඇතුළු පිරිසක් ඊට එක්ව සිටියහ.

වෙළෙඳ අමාත්‍ය බන්දුල ගුණවර්ධන සම්බන්ධයෙන් බරපතළ චෝදනාවක් ඉදිරිපත් කර ලිඛිත දැනුම්දීමක් පාරිභෝගික අයිතීන් සුරැකීමේ ජාතික ව්‍යාපාරයේ සභාපති විසින් අල්ලස් හෝ දූෂණ විමර්ශන කොමිසමේ අධ්‍යක්ෂ ජනරාල් වෙත යොමුකර ඇත.

ඒ පාරිභෝගික අයිතීන් සුරැකීමේ ජාතික ව්‍යාපාරය විසින් රාජ්‍ය විවිධ නීතිගත සංස්ථාවේ අල්ලස් හෝ දූෂණ වරදක් සම්බන්ධයෙන් සිදුකළ පැමිණිල්ලක් පිළිබඳව සාක්ෂිකරුවන් සහ පැමිණිලිකාර පාර්ශ්වය වෙත අගතියක් වන ආකාරයට වෙළෙඳ අමාත්‍ය බන්දුල ගුණවර්ධන ක්‍රියාකර ඇති බව දැනුම් දෙමිනි.

අදාළ ලිපිය පහත දැක්වෙයි.

අධ්‍යක්ෂක ජනරාල්

අල්ලස් හෝ දූෂණ විමර්ශණ කොමිෂම

බෞද්ධාලෝක මාවත

කොළඔ 07.

10-16-2021

අධ්‍යක්ෂක ජනරාල්තුමණි,

අල්ලස් හෝ දූෂණ විමර්ශණ කොමිෂමට කරන ලද පැමිණක් සම්බන්ධව.

රාජ්‍ය විවිධ නීතිගත සංස්ථාව විසින් සිදුකරන ලද අල්ලස් හෝ දූෂණ වරදක් සම්බන්ධයෙන් විෂයභාර අමාත්‍ය බන්දුල ගුණවර්ධන මහතාට හා තවත් කිහිපදෙනෙකුට විරුද්ධව මා විසින් 2021/10/13 වන දින අල්ලස් හෝ දූෂණ කොමිෂන් සභාව වෙත පැමිණිල්ලක් ඉදිරිපත් කරන ලදී.

ඊට දින දෙකකට පසුව එනම් 2021/10/15 දින වෙළද අමාත්‍ය බන්දුල ගුණවර්ධන අමාත්‍යවරයා අල්ලස් හෝ දූෂණ විමර්ශණ කොමිසම වෙත පැමිණ 2021/10/13 වන දින මා විසින් කරන ලද පැමිණිල්ල ස්වාධිනව හා කඩිනමින් විභාග කරන ලෙස ඉල්ලා ලිපියක් භාරදුන් බව මාහට මාධ්‍ය මගින් දැනගැනීමට ලැබුණි.

අදාල ඉල්ලීම කර අල්ලස් හෝ දූෂණ විමර්ශණ කොමිසමෙන් ඔහු ඉවත්ව යන විට මාධ්‍ය අමතා ඔහු විසින් කරන ලද තර්ජනාත්මක හා අපහාසාත්මක ප්‍රකාශ නිසා අදාල පැමිණිල්ල සිදුකල මාහට හා අදාල පැමිණිල්ල සදහා සාක්ෂි ලබාදීමට සිටින පුද්ගලයින්ට හා අල්ලස් හෝ දූෂණ විමර්ශණ කොමිෂමට ව්‍යාංගාර්ථයෙන් කරන ලද තර්ජනාත්මක හා අපහාසාත්මක ප්‍රකාශ සම්බන්ධයෙන් නිසි පරීක්ෂණයක් සිදු කරන ලෙස මෙයින් ඉල්ලා සිටින අතර පැමිණිලිකරුවෙකු වන මාගේ අයිතිවාසිකම් තහවුරු කරන ලෙසද ගෞරවයෙන් ඉල්ලා සිටිමි.

එහිදී ඔහු මෙසේ පවසයි“මුහුණු ආවරණයකින් රුපියල් දෙකක අල්ලසක් ලබා ගත්තා යැයි අල්ලස් හා දූෂණ විමර්ශන කොමිෂන් සභාවට පැමිණිල්ලක් කර තිබෙනවා. එය ද්වේෂසහගත, අමූලික අසත්‍්‍ය , වෛරී චේතනාවෙන් කරන ලද පැමිණිල්ලක් වශයෙන් පෙන්වා දිය හැකියි. මක්නිසාද යත් මම ලාංකේය නිදහස් අධ්‍යාපනයේ හැඩතලය වෙනස් කරමින් තාක්ෂණවේදය විෂය හඳුන්වා දුන්නා. මෙම තාක්ෂණවේදය විෂය හදාරන උසස්පෙළ දරුවන්ට මාස්පතා ශිෂ්‍යත්වයක් ලබා දීම සඳහා මාගේ පසුගිය උපන්දිනය දා මාගේ පෞද්ගලික ධන පරිත්‍යාගයෙන් ලක්ෂ සියයක් යොදවමින් අග්‍රාමාත්‍ය මහින්ද රාජපක්ෂ මහතාගේ ප්‍රධානත්වයෙන් කොළඹ බණ්ඩාරනායක සම්මන්ත්‍රණ ශාලාවේදී පැවති නිල සමාරම්භක උත්සවයේදී ප්‍රඥා බන්දු ශිෂ්‍යත්ව අරමුදල ආරම්භ කළා. මෙම ශිෂ්‍යත්ව අරමුදල, මාගේ ඥාතීන් හා අපේ හිතවතුන් විසින් දැක්වූ දායකත්වය මත මේ වන විට ලක්ෂ දෙසීයකට ආසන්න වී තිබෙනවා. එවන් තත්වයක් තුළදී මුහුණු ආවරණයකින් සත පහක්වත් මේ අරමුදලට මේ දක්වා බැර වෙලා නෑ. එසේ තිබියදී ඔහු විසින් පැමිණිල්ලක් ඉදිරිපත් කරමින් සිදු කර ඇති අපහාසය මට පමණක් නෙවෙයි, මේ අරමුදලේ භාරකරුවන්ට සහ මේ අරමුදලෙන් ප්‍රතිලාභ ලබන්නට සිටින ශිෂ්‍යයන්ටත් සිදු කර ඇති නින්දාවක් වශයෙන් පෙන්වා දිය හැකී. මේ නිසා අපක්ෂපාතී,ස්වාධින හා සාධාරණ ලෙස කඩිනමින් මෙම පරීක්ෂණය සිදු කරන ලෙස ඉල්ලමින් මම අද අල්ලස් හා දූෂණ විමර්ශන කොමිෂන් සභාවට පැමිණිල්ලක් භාර දුන්නා.”

01.ඉහත ප්‍රකාශය අනුව මගේ පැමිණිල්ල විභාග කිරීමට පෙර එය බොරු පැමිණිල්ලක් බවට වගඋත්තරකරුම ප්‍රකාශ කිරීම හා පැමිණිලිරුකරු බොරුකාරයෙක් බවට වන සිතුවිල්ලක් විමර්ශකයින් තුළ ඇති කිරීම තුළින් පැමිණිලකරුවන මාහට අගතියක් ඇති වී තිබේ.

2. ඉහත ප්‍රකාශය අනුව මෙම පැමිණිල්ල සදහා සාක්ෂි ලබාදීමට සූදානම්ව සිටින සාක්ෂිකරුවන්හට අගතියක් ඇති වී තිබේ.

3. අපක්ෂපාතී,ස්වාධින හා සාධාරණ ලෙස කඩිනමින් පරීක්ෂණයක් සිදු කරන ලෙස ඉල්ලීම තුළ අල්ලස් හෝ දූෂණ කොමිෂම අපක්ෂපාතී, ස්වාධින, කඩිනම්ව පරීක්ෂණ සිදු නොකරන ආයතනයක් බවට හැගීමක් ජනතාව තුළ ඇති කිරීමට කටයුතු කරතිබේ. අල්ලස් හෝ දූෂණ විමර්ශණ කොමිසම යනු අධිකරණ ක්ෂ්ත්‍රයේ කීර්තිමත් නාමයක් දිනගෙන සිටින හිටපු ශ්‍රේෂ්ඨාධිකරණ විනුසුරුවරියක වන ඊවා වනසුන්දර මැතිණිය හා ගරු විශ්‍රාමික විනිසුරු දීපාලී විජේසුන්දර මැතිණිය හා චන්ද්‍ර නිමල් වාකිෂ්ඨ මහතා සාමාජිකයින් ලෙස කටයුතු කරන හා කාර්යක්ෂම නිළධාරීන්ගෙන් සමන්විත ස්වාධින ආයතනයක් වන නිසාම මා විසින් මාගේ අල්ලස් පැමිණිල්ල ඉදිරිපත් කිරීමට කටයුතු කල බව සදහන් කරමි.

4. ඔහුගේ එම ප්‍රකාශය නිසා අල්ලස් හෝ විමර්ශණ කොමිෂම වෙත පැමිණිලි ඉදිරිපත් කිරීමට බලාපොරොත්තුවෙන් සිටින තැනැත්තන්ට බියගැන්වීමක් සිදු කර ඇත.

5. සෑම වගඋත්තරකරුවෙකුටම මෙසේ තර්ජනාත්මක ප්‍රකාශ නිකුත් කිරීමට මෙය නරක පූර්වාදර්ශයක් විය හැක.

6. පැමිණිලිකරුවන මා බියගැන්වීමකට ලක්කර ඇත.

මාධ්‍ය විසින් ප්‍රචාරය කර ඇති ඔහු විසින් කරන ලද ප්‍රකාශය මේ සමග අමුණා එවමි.

මීට විශ්වාසී,

රංජිත් විතානගේ - සභාපති

පාරිභෝගික අයිතීන් සුරැකීමේ ජාතික ව්‍යාපාරය

බලය ලබාගත් පසු උන්මත්තකයො ලෙස උද්ද්ච්ඡ කමින් හැසිරෙන්නෙ නැතිව මිනිසුන්ගේ හඬට කන් දීමට ආණ්ඩුවකට හැකියාව තිබිය යුතු බව ශ්‍රී ලංකා නිදහස් පක්ෂයේ මහ ලේකම් , රාජ්‍ය අමාත්‍ය දයාසිරි ජයසේකර පවසයි.

ගමේ ජීවත් වෙන කෙනෙක් විදිහට තමන් මේ පොහොර සම්බන්ධ තීන්දුව ලොකු අර්බුදයක් බවට පත්වෙන බව මුලසිටම පැවසූ බවත් ඔහු පැවසීය.

අමාත්‍යවරයා මේ අදහස් දක්වා සිටියේ ඊයේ (16) නිකවැරටිය ගල්කන්ද ප්‍රදේශයේ බතික් කර්මාන්ත පුහුණු මධ්‍යස්ථානයක් ආරම්භ කිරීමේ අවස්ථාවට එක්වෙමින්ය.

දැන් පිටරටින් ගෙනත් තියෙන්නෙත් ඇත්තටම රසායනික පොහොරක්. එක පුද්ගලයකු විතරයි කියන්නේ ඒවා රසායනික නෙමෙයි කියලා. මේ ගෙනත් තියෙන්නෙත් රසායනික පොහොරම තමයි. ඒකේ ටොන් එකක් ඩොලර් 400 ක් වෙලා තියෙනවා. ඒ වෙලාවෙ යූරියා ටොන් එකක් ගෙනාවේ ඩොලර් 225 ට.

ඒ වෙලාවේ යූරියා ටික ගෙනාවනම් අද මෙහෙම වෙන්නෙ නැහැ. ගොවීන්ගේත් අදහස වෙන්නේ සීයට පනහ බැගින් රසායනික පොහොර සහ කාබනික පොහොර යෙදීම කළොත් හොදයි කියලා. දැන් තව දවස් 15 ක් විතර වෙනකොට පොහොර නොලැබුණොත් ගොවි බිම් සෑහෙන ප්‍රමාණයක් අතහැර දමන තත්වයක් ඇතිවෙයි. අද ගොවීන් වී ටික ගෙවල්වල තියාගෙන ඉන්නවා විකුණන්නේ නැතිව.

ඒකට හේතු දෙකක් තියෙනවා. එකක් සධාරණ මිළක් නොලැබීම. අනික මේ පොහොර ප්‍රශ්නය නිසා මෙවර මහ කන්නයේ අස්වැන්න ගැන ඔවුන්ට විශ්වාසයක් නැහැ. ඒ නිසා තමන්ට කන්න හරි වී ටිකක් තියාගන්න ඕන කියන අරමුණින් වී විකුණන්නේ නැහැ.

ඒ හේතුවෙන් නැවත වෙළද පොලේ හාල් හිගයක් ඇතිවෙනවා. ඒකට විකල්පය වෙන්නේ හාල් පිටරටින් ගෙන්වන එක. මේක විශම චක්‍රයක් වගේ වෙලා තියෙන්නේ මේ පොහොර සම්බන්ධයෙන් ගත් වැරදි තීරණය නිසා.

ජනාධිපතිතුමාගේ කාබනික පොහොර තීන්දුව හොදයි . ප්‍රශ්නය තියෙන්නේ මේක අවුරුදු දහයකින් විතර කරන්න තිබුණ වැඩක්.

නමුත් මේ හදිස්සියේ කරන්න ගියාම ලොකු අර්බුදයක් එනවා. මම ගමේ ඉන්න කෙනෙක් විදිහට කියන්නේ මේ රසායනික පොහොර ටික ගෙනල්ලා දෙන්න කියලා තවමත් පරක්කු නැහැ. ලංකාවෙ මොන ප්‍රශ්න තිබුණත් අපි බත් ටිකක් උයාගෙන පොල් සම්බෝලයක් හදාගෙන හරි කපු රටක්. දැන් අද ඒකත් නැති වුණාම හාමතේ බඩගින්නේ මැරෙන්න වෙයිද කියන බය මිනිස්සුන්ට තියෙනවා.

අද ලෝකයේ තෙල් මිළ වැඩිවෙලා නිසා අපේ රටෙත් තෙල් මිළ වැඩිවෙන්න පුලුවන්. ගෑස් මිළ වැඩිවෙලා. කිරිපිටි මිළ වැඩිවෙලා.ඒවා ඔක්කොම කොවිඩ් වසංගතය නිසා ලෝකයේ ඇතිවුණ ප්‍රශ්න. නමුත් මේ පොහොර ප්‍රශ්නය අපිම ඇතිකරගත් ප්‍රශ්නයක් එයින් මිදුනොත් අපට අනිත් ප්‍රශ්නවලට මුහුණ දෙන්න පුලුවන් වෙයි කියලා මම විශ්වාස කරනවා.

ශ්‍රී ලංකා නිදහස් පක්ෂයේ මහ ලේකම් රාජ්‍ය අමාත්‍ය දයාසිරි ජයසේකර පසුගිය කාලයක සිට ආණ්ඩුවේ ප්‍රතිපත්තිය දැඩිව විවේචනය කරමින් පසුවන බවත් ඒ හරහා පෙන්නුම් කෙරෙන්නේ ආණ්ඩුවේ ඉන්න සූදානමක් නොව ඉක්මනින් ආණ්ඩුවෙන් එළියට බහින්න සූදානමක් බවත් දේශපාලන විචාරකයන් පෙන්වා දෙයි.

යුගදනවි බලාගාරයේ කොටස් 40% ක් ඇමරිකානු සමාගමකට ලබාදීම සහ ඒ ආශ්‍රිත ගිවිසුම සම්බන්ධයෙන් සාකච්ඡා කිරීම සඳහා ආණ්ඩුවේ හවුල්කාර පක්ෂ 11 විසින් ජනාධිපති ගෝඨාභය රාජපක්ෂ වෙත කරතිබූ ඉල්ලීම ප්‍රතිකේෂ්පවීම සමග එම පක්ෂ බරපතළ අර්බුදයකට පත්ව ඇත.

කෙසේ වුවත් මේ වන විට එම කණ්ඩායම තීරණය කර ඇත්තේ එළැඹෙන 23 වනදා රැස්වී ඉදිරි ක්‍රියාමාර්ග සම්බන්ධයෙන් සාකච්ඡා කිරීමටය.

මෙකී ගිවිසුම සම්බන්ධයෙන් ජනාධිපති සමග සාකච්ඡාව ඉල්ලූ පක්ෂ 11 නායකයන්ට ජනාධිපතිගේ ප්‍රතිචාරය වී තිබුණේ , අදාළ කරුණ සම්බන්ධයෙන් වන සාකච්ඡාව අග්‍රාමාත්‍ය සහ මුදල් අමාත්‍යවරයා සමග සිදුකර ගන්නා ලෙසය.

එහෙත් මේ ආණ්ඩුවේ හවුල්කාර පක්ෂ 11 ජනාධිපති සමග සාකච්ඡාව ඉල්ලා සිටියේම අගමැති සහ මුදල් අමාත්‍යවරයා සමග සිදුකළ සාකච්ඡාව අසාර්ථක වූ නිසාය.

මේ සම්බන්ධයෙන් දේශපාලන විචාරකයන් පවසන්නේ විමල් වීරවංශ අමාත්‍යවරයා ඇතුළු මේ පක්ෂ 11 කණ්ඩායම සතු බලය ආණ්ඩුව අභ්‍යන්තරයේ පළමුවත්, දෙවනුව සමාජය තුළත් අතාර්කික කරදැමීමේ උපක්‍රමයක් මේ තුළ තිබෙන බවයි.

තවදුරටත් මේ ඊනියා දේශප්‍රේමී කතා සාප්පු සමග ඉදිරි ගමනක් නැති බවට නිවැරදි තක්සේරුවක් රාජපක්ෂවරුන් සිදුකර ඇති බවත් ඔවුන් පවසයි.

එසේම සිය දේශපාලන පැවැත්ම පමණක් නොව දේශපාලන පෞරුෂය පවා ආරක්ෂා කරගන්නට නම් විමල් ප්‍රමුඛ මේ පක්ෂ 11පිරිසට ආණ්ඩුවෙන් ඉවත්ව යාම හැර වෙනත් විකල්පයක් ඇත්නම් ඒ බැසිල් රාජපක්ෂ ආණ්ඩුවෙන් ඉවත්වීම බවත් ඔවුන් පවසයි.

බැසිල් රාජපක්ෂ අමාත්‍යවරයා කිසිසේත් ආණ්ඩුවෙන් ඉවත් නොවන බැවින් දැන් ඇත්තේ පක්ෂ 11 කණ්ඩායම එළියට බැසීම බවත් විචාරකයන් පෙන්වා දෙයි.

පළාත් සභා මැතිවරණය කඩිනමින් පවත්වන ලෙස ශ්‍රී ලංකා නිදහස් පක්ෂය ආණ්ඩුවට ප්‍රසිද්ධ දැනුම්දීමක් සිදුකර ඇත.

ඊයේ (15) සවස ශ්‍රී ලංකා නිදහස් පක්ෂයේ මධ්‍යම කාරක සභා රැස්වීම පැවැත්වී ඇති අතර හැකි ඉක්මණින් පළාත් සභා මැතීවරණය පවත්වන ලෙසට ආණ්ඩුවට දැනුම්දීමේ තීන්දුව ගෙන ඇත්තේ එහිදිය.

එසේම එදින මාධ්‍ය විසින් සිදුකළ විමසීමකට ප්‍රතිචාර දක්වමින් ශ්‍රී ලංකා නිදහස් පක්ෂයේ සභාපති , හිටපු ජනාධිපති මෛත්‍රීපාල සිරිසේන ද මේ බව පැවසීය.

එසේම ඉදිරි පළාත් සභා මැතිවරණය සදහා පක්ෂය සූදානම් කිරීමටත් පක්ෂ මධ්‍යම කාරක සභාව තීන්දු කොට ඇත.

ඒ අනුව වහාම හිස්ව පවතින ආසන සංවිධායක ධූර පිරවීමටද පක්ෂය තීරණය කර ඇති බව ශ්‍රීලනිප මහ ලේකම් රාජ්‍ය අමාත්‍ය දයාසිරි ජයසේකර පවසයි.

මෙරට ප්‍රකට සමාගමක් විසින් රේගු බදු වංචා කර, පසුව එකී බදු මුදල් සහ දඩ ගෙවීමට නියම කෙරුණු විට ශ්‍රී ලංකා රේගුවට එරෙහිව නඩු පැවරීමේ සිදුවීමක් වාර්තා වෙයි.

මේ සම්බන්ධයෙන් LNW ඇතුළු සමාජ මාධ්‍ය වෙබ් අඩවි කිහිපයක්ම අනාවරණය කර ඇත.

ඒ අනුව මෙකී සමාගම වන්නේ මෙරට සුප්‍රකට සමාගමක් වන යුනිලීවර් සමාගමයි.

මේ වන විට ලංකා රජය දැඩි මූල්‍ය අර්බුදයකට ලක්ව සිටින අතර ඊට අදාළව රාජ්‍ය ආදායම අඩුවීම ප්‍රධානය. ඊට මූලික හේතුවක් ලෙස , ආර්ථික විශේෂඥයන් පෙන්වා දෙන්නේ , රාජ්‍ය බදු ආදායම් අහිමිකර ගැනීමයි. එහිදී බදු වංචා විශේෂ බව තේරුම් ගන්නට අලුතින් ආර්ථික විද්‍යාව උගතයුතු නැත.

වාර්තා වන ආකාරයට 2018 ඔක්තෝබර් 09 සිට 2019 අප්‍රේල් 04 දක්වා කාලය තුළ යුනිලීවර් හී මෙකී ප්‍රශ්නගත සිදුවීම සිදුව ඇත. ඒ සබන් නිෂ්පාදනය කිරීමට යොදන සංඝටකයක් වන palm oil fatty acid ආනයනය කිරීමේදීය.

එකී සංඝටකයට අදාළ HS අංකය වන්නේ 3823.19.20 යි. ඒ ආනයනයේදී 25% ක රේගු බද්දක් ගෙවිය යුතුය. නමුත් අදාළ සංඝටකය, එහි HS අංක 3823.19.90 යටතේ ආනයනය කිරීමට යුනිලීවර් සමාගම කටයුතු කර ඇති අතර ඒ හරහා බදු මුදල් ගෙවීම මඟහැර ඇත.

කෙසේ වුවත් ශ්‍රී ලංකා රේගුව මේ බව අනාවරණය කරගෙන රුපියල් මිලියන 570ක බදු මුදල සහ අදාළ දඩය ගෙවීමට දැනුම්දි ඇත. ඒ අනුව රුපියල් බිලියනයක පමණ මුදලක් ගෙවීමට එකී සමාගමට සිදුව තිබේ.

නමුත් මෙහිදී යුනිලීවර් සමාගම සිදුකර ඇත්තේ ශ්‍රී ලංකා රේගුවට එරෙහිව අභියාචනාධිකරණයට නඩුවක් යොමුකිරීම ය. අදාළ නඩුව අංක 19/2021 ලෙස පවරා ඇති අතර ඒ 2021.01.11 වනදා ය.

ඒ අනුව ශ්‍රී ලංකා රේගුව වෙනුවෙන් අධිකරණය හමුවේ පෙනීසිටිය යුත්තේ නීතිපති දෙපාර්තමේන්තුව යි. නමුත් මේ වන විට නඩුව ගොඩින් සමතයට පත්කර ගැනීමට විවිධ බලපෑම් එල්ලවෙමින් ඇති බවත් වාර්තා වෙයි.

වැඩිදුරටත් වාර්තා වන ආකාරයට මේ පිටුපස සිටින්නේ පසුගිය ආණ්ඩුවේ මෙන්ම වත්මන් ආණ්ඩුවේ ද ප්‍රබල සම්බන්ධතා ඇති බලවතුන් පිරිසකි. ඥාතීන් ආණ්ඩුව, විපක්ෂය යන දෙපාර්ෂවයම බවට පත්වීම මේ සමයේ විලාසිතාවක් වී ඇති අතර ඒ හරහා කොයි ආණ්ඩුව බලයට ආවත් තමන්ට අවශ්‍ය ලෙස වැඩකර ගැනීමේ හපනුන් බවට පත්ව ඇත.

මේවා මාරවැඩ ලෙස පෙනීගියත් මේ මාරවැඩ නිසා අමාරුවේ වැටෙන්නේ රටේ ආර්ථිකය ය. එනිසා එක රටක් එක නීතියක් ක්‍රියාත්මක කරන්න යන ජනාධිපති , පසුගිය අඩුපාඩු හඳුනාගෙන ඉදිරිය නිවැරදි කරගන්නට සූදානම් වෙන ජනාධිපති මේවත් සොයා බැලුවොත් හොඳය.

යුගදනවි බලාගාරයේ කොටස් 40% ක් ඇමරිකානු සමාගමක් වෙත ලබාදීම සම්බන්ධයෙන් සහ ඊට අදාළ එළඹී ඇති ගිවිසුම් පිළිබඳව ආණ්ඩුවේ හවුල්කාර පක්ෂ ජනාධිපති වෙතින් ඉල්ලා තිබූ සාකච්ඡාව ලැබී නැත.

මේ බව ආණ්ඩුව හිතවාදී වෙබ් අඩවි වාර්තා හරහා ප්‍රසිද්ධ කෙරෙමින් තිබේ.

ඒ අනුව ආණ්ඩුවේ හවුල්කාර පක්ෂ 11ක් අදාළ ඉල්ලීම ජනාධිපති ගෝඨාභය රාජපක්ෂ වෙතින් ලිඛිතව සිදුකර තිබුණු අතර ඊට ලිඛිතව ප්‍රතිචාර දක්වමින් ජනාධිපති පාර්ශ්වය දන්වා ඇත්තේ අදාළ කාරණය සම්බන්ධයෙන් අග‍්‍රාමාත්‍යවරයා සහ මුදල් අමාත්‍යවරයා සමග සාකච්ඡා කරන ලෙසය.

මේ හේතුවෙන් අදාළ ලිපිය සම්බන්ධයෙන් තවදුරටත් සාකච්ඡා කිරීමට ආණ්ඩුවේ හවුල්කාර පක්ෂ වල නායකයින් අද දිනයේ දී හමුවීමට නියමිතය.

ඇමති වාසුදේව නානායක්කාර පවසා ඇත්තේ පක්ෂ නායකයින් වෙත ජනාධිපතිවරයා තම ප්‍රතිචාරය ලිපියක් මගින් දැනුම් දී ඇති බවයි.

කෙසේ වුවත් යුගදනවිය සම්බන්ධයෙන් අගමැති සහ මුදල් ඇමති සමග ආණ්ඩුවේ පක්ෂ 11 කණ්ඩායම් නායකයන් මීට පෙර සාකච්ඡා කරනු ලැබිණ. මෙම පක්ෂ 11 කණ්ඩායම ජනාධිපති සමග සාකච්ඡාවක් ඉල්ලා සිටියේ ද එකී සාකච්ඡාව අසාර්ථක වූ නිසා ය.

දැන් සිදුව ඇත්තේ 20 සංශෝධනය අවස්ථාවේ ද්විත්ව පුරවැසි භාවය සම්බන්ධ කරුණේදී වුවාටත් වඩා අසීරු දෙයකි. එහිදී ජනාධිපති සමග සාකච්ඡා කිරීමේදී ඔහු සංවේදී වූ නිසා කියා, 20 ට අත ඉස්සීම සාධාරණීකරණය කරගන්නට හැකි වුවත් මෙවර ඒ අවස්ථාවත් නැත. ඒ ජනාධිපති සාකච්ඡාවක් හෝ ලබාදී නැති නිසාය.

ලිතුවේනියාවේ සිට ආනයනය කර ඇත්තේ පොටෑසියම් නයිට්‍රේට් නම් පොහොර බවට තමන්ට තොරතුරු ලැබී ඇතැයි ශ්‍රීලනිප මහලේකම් රාජ්‍ය අමාත්‍ය දයාසිරි ජයසේකර පවසයි.

එම පොහොර වර්ගය ගොයම් ගස් වර්ධනය වැඩි කිරීම සඳහා යොදන බන්ඩි පොහොර වර්ගයක් බවද රාජ්‍ය අමාත්‍යවරයා පැවසීය.

ලොව කිසිම රටක කාබනික ගොවිතැන සියට සීයක් කරන රටක් සොයාගැනීමට නොමැති බවත් අමාත්‍යවරයා සඳහන් කළ අතර වර්තමාන ක්‍රමය යටතේ ඉදිරියේදී සහල් හිඟයක් ද ඇතිවනු ඇති බවත් අප්‍රේල් අලුත් අවුරුද්ද විශාල අමාරු තත්ත්වයකට පත්වනු ඇති බවත් පැවසීය.