V2025

විදෙස්

රුසියානු ගුවන් අනතුරෙන් 71 දෙනෙක් ජීවිතක්ෂයට

ඊයේ(11) සවස රුසියාවේ මගී ගුවන් යානයක් අනතුරට පත්වීමෙන් මගින් සහ කාර්ය මණ්ඩලය ඇතුළු 71 ක් දෙනෙක් ජීවිතක්ෂයට පත්ව තිබේ.

සාරාටෝව් ගුවන් සමාගමට අයත් මෙම ගුවන් යානය ගුවන් ගතවී මිනිත්තු කිහිපයට පසු සිදුවූ ගුවන් අනතුරට හේතුව සෙවීම සඳහා පරීක්ෂණ ආරම්භ කර ඇති බව වාර්තා වේ.

රුසියානු වාර්තා සඳහන් කරන ආකාරයට මෙම අනතුරට හේතුව කාලගුණය හෝ කාර්මික දෝෂයක් විය හැක. මෙම යානය ඔර්සක් නම් උරල් කඳු වැටියේ පිහිටි කුඩා නගරයක් වෙත ගමන් ගත්තකි.

දෙමොදෙදෝවෝ ගුවන් තොටුපළින් ගමන් ආරම්භ කර ඇති යානය අනතුරට පත්ව ඇත්තේ මොස්කව් නගරයට කිලෝමීටර් 80ක් පමණ දුරින් පිහිටි අර්ගුනොවෝ නම් ප්‍රදේශයේදියි.

ජනාධිපති පුටින් මිය ගිය අයගේ පවුල් වෙත ශෝක පණිවිඩයක් ඒවා ඇති අතර බ්‍රිතාන්‍ය සහ ඇමරිකානු බලධාරීන්ද මෙම ඛේදවාචකය සම්බන්ධයෙන් සිය කණගාටුව පළ කර ඇත.

මෙය වසරකට පමණ පසු මගී ගුවන් යානයක් අනතුරට පත්වූ පළමු අවස්ථාවයි. 2017 වසර ලෝකයේ ගුවන් ගමන් සඳහා සුරක්ෂිතම වසර ලෙස නම් කර තිබුණි.

රුසියාවේ මිට පෙර 2016 වසරේදී ගුවන් හමුදාවට අයත් යානයක් කඩ වැටීම නිසා ජිවිත හානි 92ක් සිදුවිය. එසේම 2015 ඔක්තෝමබර් මාසයේ සංචාරකයන් රැගත් රුසියානු ගුවන් යානයක් ඊජිප්තුවේදී කඩා වැටීම නිසා පුද්ගලයන් 224ක් මරණයට පත්විය.

Comment (0) Hits: 386

ඇමරිකාව රටවල් 11ක් සඳහා සංක්‍රමණික තහනම ඉවතට

තම රට වෙත සංක්‍රමණිකයන් පැමිණීම වළක්වාලමින් පැවති තහනම රටවල් එකොළහක් සඳහා පමණක් ඉවත් කිරීමට ඇමරිකාව පියවර ගෙන තිබේ.

ඒ වෙනුවට එම රටවලින් පැමිණෙන සංක්‍රමණිකයන් දැඩි ලෙස පරික්ෂා කිරීමේ ක්‍රමවේදයක් අනුගමනය කර බව ස්වදේශ ආරක්ෂක අමාත්‍යංශ ලේකම්වරිය පවසයි. එයට හේතුව ඇමරිකාවට පැමිණෙන්නේ කවුරුන්ද යන්න සිය රජය දැන ගත යුතු වීම බව ඇය පවසා තිබේ.

මෙම රටවල් එකොළහ අතරට ඒ මුස්ලිම් බහුතරයක් වෙසෙන රටවල් 10ක් සහ උතුරු කොරියාව අයත් වීම විශේෂත්වයකි.

මුස්ලිම් බහුතරයක් වෙසෙන රටවල් අතරට ඊජිප්තුව, ඉරානය, ඉරාකය, ලිබියාව, මාලි, සෝමාලියාව, දකුණු සුඩානය, සුඩානය, සිරියාව, යේමනය අයත්වේ.

Comment (0) Hits: 359

දෑවැද්ද වෙනුවට වකුගඩුව ගලවාගෙන

දෑවැද්ද නොදීම හේතුවෙන් සැමියා තමන්ගේ වකුගඩුවක් ගලවා ගෙන ඇති බවට චෝදනා කළ ඉන්දියානු කාන්තාවකගේ සැමියා සහ මස්සිනා සිරගත කර තිබේ.

ඉන්දියානු මාධ්‍ය වාර්තා කර ඇති ආකාරයට බෙංගාලි ජාතික රීටා සර්කාර්ගේ සැමියා ඇයට වසර දෙකක් පුරා පැවති උදාර වේදනාවට විසදුමක් ලෙස ඇපෙන්ඩිසයිටිස් සැත්කමක් සිදුකරන මුවාවෙන් වකුගඩුව ලබාගෙන ඇත.

පසුව එම කාන්තාවට දැනුණු අපහසුතා හේතුවෙන් කරන ලද වෛද්‍ය පරීක්ෂණ දෙකකදී සනාථ වී ඇත්තේ ඇගේ එක වකුගඩුවක් නොමැති බවයි.

රීටා සර්කාර් මාධ්‍යට අදහස් දක්වමින් පවසා ඇත්තේ තමන්ගේ සැමියා නිරන්තරයෙන් දෑවැද්දක් ලබාදෙන ඉල්ලමින් තමන්ව පීඩාවට පත්කරන ලද බවයි.

එසේම තම සැමියා අදාළ සැත්කම සිදුකිරීම සඳහා පෞද්ගලික රෝහලක් වෙත රැගෙන ගිය බවත් එම රෝහලේ කාර්ය මණ්ඩලය සහ සැමියා මෙම සැත්කම සිදුකිරිමන් පසු තමන් සුව වෙනු ඇති බව පැවසූ බවත් රීටා සර්කාර් පවසයි.

මගේ පවුලේ උදවියට දෑවැද්දක් ලබා දීමට නොහැකි වීම නිසා මගේ සැමියා වකුගඩුව විකුණා මුදල් ලබාගන්නට ඇති බව ඇයගේ අදහසයි.

ඉන්දියාව තුළ දෑවැදි ලබාදීම 1961 සිට තහනම් කර තිබේ.

Comment (0) Hits: 313

කාබුල් නගරයට ප්‍රහාර පිට ප්‍රහාර

ඇෆ්ගනිස්ථානයේ කාබුල්හි ආරක්ෂක විශ්ව විද්‍යාලය අසල පිහිටි ආරක්ෂක මධ්‍යස්ථානයක් වෙත ප්‍රහාරයක් එල්ල වී ඇති බව වාර්තා වේ.

මෙම ප්‍රහාරයෙන් ඇෆ්ගනිස්ථාන සෙබළු දෙදෙනෙක් ජිවිතක්ෂයට පත්ව දස දෙනෙකු තුවාල ලබා තිබේ.

මෙම ප්‍රහාරයයේ වගකීම අයිඑස් සංවිධානය බාරගෙන ඇති අතර ප්‍රහාරය සඳහා සම්බන්ධ වූ තුවක්කුකරුවන්ගෙන් පස් දෙනෙකුගෙන් තිදෙනෙක් ජිවිතක්ෂයට පත්ව ඇත.

සෙනසුරාදා ප්‍රහාරය

පසුගිය සෙනසුරාදා (ජනවාරි 27) ඇෆ්ගනිස්තානයේ කාබුල් අගනුවරට එල්ල වූ මරාගෙන මැරෙන බෝම්බ ප්‍රහාරයෙන් සියයකට අධික පිරිසක් ජිවිතක්ෂයට පත්විය.

මෙම ප්‍රහාරය සඳහා පොලිස් මුර කපොල්ලක් පසුකර, රජයේ ගොඩනැගිලි සහ තානාපති කාර්යාල පිහිටි වීථියක් වෙත ළඟා වීම සඳහා ප්‍රහාරකයන් විසින් ගිලන් රථයක් ධාවනය කොට තිබුණි.

මේ වෙනුවෙන් ඇෆ්ගනිස්ථාන ආණ්ඩුව විසින් ඉරිදා (ජනවාරි 28) ජාතික ශෝක දිනයක්ද නම්කර තිබුණු බව වාර්තා වේ.

ප්‍රහාරයේ වගකීම බාරගනු ලැබුවේ දැඩි මතධාරී තාලිබාන් ඉස්ලාමීය සංවිධානය විසිණි.

සෙනසුරාදා එල්ල වූ ප්‍රහාරයෙන් 191 අධික පිරිසක් තුවාල ලැබිය.

පසුගිය සෙනසුරාදා එල්ලවූ ප්‍රහාරයට සතියකට පෙර කාබුල් නගරයේ පිහිටි හෝටලයකට එල්ලවූ ප්‍රහාරයෙන් විදේශිකයන් 22ක් මරණයට පත්විය.

Comment (0) Hits: 330

තායිවානයේ ප්‍රභල භූ කම්පනයක්

තායිවානයේ නැගෙනහිර වෙරළ තීරයේ ප්‍රබල භූ චලනයක් සිදුවීම හේතුවෙන් හතර දෙනෙක් මියගොස් විශාල පිරිසක් තුවාල ලබා ඇතැයි වාර්තා වේ.

මෙම භූ චලනය රික්ටර් මාපකයේ ඒකක 6.4ක් ලෙස සටහන්වූ බව විදෙස් මාධ්‍ය වාර්තා කර ඇත.

මෙම භූ චලනයත් සමග තායිවාන නැගෙනහිර ප්‍රදේශයේ පිහිටි Hualien හි ගොඩනැගිලි රැසක් විනාශයට පත්ව ඇතැයි සදහන් වේ. එම ගොඩනැගිලි තුළ පුද්ගලයන් රැසක් සිරගත වී ඇති බව විශ්වාස කෙරේ.

Hualien නගරය ලක්ෂයක පමණ ජනතාවක් ජීවත්වෙන තායිවානයේ පිහිටි ප්‍රධාන සංචාරක කේන්ද්‍රස්ථානයකි.

එහි පිහිටි රෝහල්, නිවාස සහ හෝටල් වැනි ගොඩනැගිලි රැසකට හානි සිදුවී ඇති ආකාරය විදෙස් පුවත් සේවා වාර්තා කර තිබේ.

අද උදෑසන කාලයේ පටන් අතුරුදන් පුද්ගලයන් සොයා මෙහෙයුම් කටයුතු සිදුවන බවත් අනතුරින් මිය ගිය සංඛ්‍යාව ඉහල යා හැකි බවද තායිවාන බලධාරින් පවසා සිටියි.

Comment (0) Hits: 330

ඇමරිකා ජිම්නාස්ටික් දොස්තරට වසර 175ක සිර දඬුවම්

ලිංගික අපයෝජන චෝදනා සම්බන්ධයෙන් වැරදිකරුවූ ඇමරිකානු ජාතික ජිම්නාස්ටික් කණ්ඩායමේ හිටපු වෛද්‍යවරයා වූ ලැරී නසාර්ට වසර 175 ක සිර දඬුවමක් මිචිගන් අධිකරණය විසින් ලබාදී තිබේ.

ඔහුට එරෙහිව නඩු විභාගය පුරා දින 7ක් මුළුල්ලේ පැවති අතර, එහිදී වින්දිත කාන්තාවන් 156 දෙනෙකු ඔහුට විරුද්ධව සාක්ෂි ලබාදී තිබුණි.

ඒ අතර පසුගිය වසරේ ඔලිම්පික රන් පදක්කම් හතරක් දිනු සයිමන් බයිල්ස් ඇතුළු තවත් ඔලිම්පික් පදක්කම් ලාභී ක්‍රීඩිකාවන් රැසක් සිටියි. ඔවුන් සෑම කෙනෙක්ම කියා සිටියේ ලැරී නසාර් විසින් වෛද්‍ය ප්‍රතිකාර සහ ශරීර පරික්ෂාවේ මුවාවෙන් ඔවුන්ට ලිංගික අතවර සහ ලිංගික හිංසාවන් කරන ලද බවයි.

පනස් හතර හැවිරිදි ලැරී නසාර්ගේ පරිගණකයේ ළමා ලිංගික අපයෝජනයන්ට අදාළ ජායාරූප පැවතීම හේතුවෙන් පසුගිය දෙසැම්බර් මාසයේදී සිරගත කෙරිණි.

Comment (0) Hits: 334

මාලදිවයින් ශ්‍රේෂ්ඨාධිකරණ විනිසුරු අත්අඩංගුවට

මාලදිවයින් පොලිසිය විසින් එරට ශ්‍රේෂඨාධිකරණයේ ප්‍රධාන  විනිසුරුවරයා සිරගත කිරීමත් සමඟ මාලදිවයිනේ තත්ත්වය තවත් නරක අතට හැරෙමින් පවතියි. 
 
රජය විසින් හදිසි තත්ත්වයක් ප්‍රකාශයට පත්කර පැයකට පසු පොලීසිය විසින් එරට  ප්‍රධාන විනිසුරුවරයා වන අබ්දුල්ලා සයිඩ් සහ තවත් විනිසුරුවරයෙක් අත්අඩංගුවට ගෙන තිබේ. 
 
 මෙතෙක් ඔවුන්ට විරුද්ධව චෝදනා ගොනුකිරීමක් පිළිබඳ කිසිදු තොරතුරක් ලැබී නොමැත.
 
 
 අර්බුදයේ පසුබිම 
 
මාලදිවයින යනු කොරල් පර 26න් සහ තනි තනි දූපත් 1192 න් සහිත සංචාරක කර්මාන්තය ආර්ථිකයේ ප්‍රධාන අදායම් මාර්ගයක් කරගත් රටකි. 
 
දේශපාලන සිරකරුවන් නිදහස් කරන ලෙස එරට උසාවිය මගින් ලබාදුන් නියෝගය  ජනාධිපති අබ්දුල්ලා යමීන්  ප්‍රතික්ෂේප කිරීමත් සමඟ එරට තුළ අර්බුදකාරී තත්ත්වයක් වර්ධනය විය. 
 
හිටපු ජනාධිපති මොහොමඩ් නෂීඩ්ට   එරෙහිව පැවැත්වූ නඩු විභාග දෝෂසහගත සහ දේශපාලන අරමුණකින් දියත් වූවක් බව අධිකරණයේ නිගමනය විය.
 
 ශ්‍රේෂ්ඨාධිකරණයේ නියෝගය ප්‍රකාර සිරගත කරනු ලැබ සිටින විරුද්ධ පක්ෂයේ දේශපාලාන සිරකරුවන් නිදහස් කරන මෙන ඉල්ලා සිටිමින් මාලදිවයින් විරුද්ධ පක්ෂ ආධාරකරුවෝ දිවා රෑ නොබලා උද්ඝෝෂණවල නිරතව සිටියි.
 
නමුත් යමින් පාලනය එම ඉල්ලීම් ප්‍රතික්ෂේප කර තිබේ. 
 
2013 වසරේ ජනාධිපති යමින් බලයට පත්වීමත් සමඟ මාලදිවයින තුළ භාෂණයේ නිදහස, විරුද්ධවාදීන් මර්දනය, අධිකරණයේ ස්වාධිනත්වය සම්බන්ධ ගැටළු  ඇතිවිය. 
 
එරට මැතිවරණයකින් පත්වූ පළමු ජනාධිපතිවරයා වන මොහොමඩ් නෂීඩ්ද මෙම සිදුවීම සම්බන්ධව සිය විරෝධය පළකර තිබේ. 
 
ඊට අමතරව මෙම  ක්‍රියාවලිය පිළිබඳ  විරෝධය පළකරමින් ඇමරිකානු ආරක්ෂක කවුන්සිලයද නිවේදනයක් නිකුත්කර ඇත. 
Comment (0) Hits: 359

ඇමරිකා ෆස්ට්" තීරුබදු ආසියාවට බලපාවිද?

ආනයනික රෙදි සේදුම් යන්ත්‍ර සහ සූර්ය කෝෂ සම්බන්ධයෙන් වන මතභේදයට තුඩු දී ඇති තීරුබදු සඳහා ඇමරිකාවේ අනුමැතිය හිමිව තිබේ.

ඇමරිකා එක්සත් ජනපදය විසින් ඉහත කී පියවර ගනු ලැබ ඇත්තේ ජනාධිපති ඩොනල්ඩ් ට්‍රම්ප්ගේ "ඇමරිකාව පළමුව" (America First) යන ප්‍රතිපත්තිය අනුව යමින්ය.

විදේශීය තරගකරුවන්ගෙන් දේශීය නිෂ්පාදකයන් ආරක්ෂා කර ගැනීම ඉහත කී වෙළඳ ප්‍රතිපත්තියේ අරමුණ වී තිබේ.

ඒ සම්බන්ධයෙන් අදහස් දක්වමින් ප්‍රකාශකයෙකු කියා සිටියේ ට්‍රම්ප් පාලනය "සෑම විටම ඇමරිකානු සේවකයන්, ගොවීන්, ගොවිපල හිමිකරුවන් සහ ව්‍යාපාරිකයන් ආරක්ෂා කරනු ඇති" බවය.

මේ අතර ඉහත කී තීරුබදු වැඩි වශයෙන්ම බලපාන චීනය සහ දකුණු කොරියාව එකී පියවර විවේචනයට ලක් කරති.

කෙසේ නමුත් වෙළද ක්ෂේත්‍රයට බලපාන තවත් ක්‍රියාමාර්ග ඉදිරියේ දී ගනු ඇති බව ඇමරිකානු බලධාරීහු පවසති.

"ඇමරිකානු නිෂ්පාදකයන්ගේ ආරක්ෂාව"
 99707508 hi043540410
තීරුබදු හඳුන්වා දීමේ පුවත සම්බන්ධයෙන් චීනය සහ දකුණු කොරියාව කෝප සහගත ප්‍රතිචාරයක් පළ කරති

"අපේ නිෂ්පාදනම සකසන, අපේ සමාගම් සොරා ගන්න සහ අපේ රැකියා විනාශ කරන" රටවලින් ඇමරිකාව ආරක්ෂා කර ගන්නා බවට වසරකට පෙර පැවති සිය දිවුරුම් දීමේ උත්සවයේ දී ජනාධිපති ඩොනල්ඩ් ට්‍රම්ප් ප්‍රතිඥා දුණි.

ඉහත කී තීරුබදු සඳහා අනුමැතිය ලබා දීම ජනාධිපති ට්‍රම්ප් විසින් එරට වෙළඳ ගණුදෙනු සම්බන්ධයෙන් ගනු ලැබූ සුවිශේෂී පියවරක් ලෙස සැලකේ.

ඇමරිකානු ජනපති ට්‍රම්ප්ගේ වෛද්‍ය වාර්තාව

සූර්ය කෝෂ සඳහා පනවන ලද තීරුබදු දේශීය නිෂ්පාදන සඳහා පනවා ඇති බදුවලට වඩා අඩු අගයක් ගනු ඇති බවට බලාපොරොත්තු පළ වුවද රෙදි සේදුම් යන්ත්‍ර සහ අමතර කොටස් සඳහා පනවා ඇති තීරු බදු බලාපොරොත්තු වුවාට වඩා ඉහළ අගයක් ගනු ඇති බව වාර්තා පෙන්වා දෙයි.

දකුණු කොරියාව සහ මෙක්සිකෝ සිට මිලෙන් අඩු උපකරණ සහ උපාංග ආනයනය කරනු ලැබීමෙන් ආරක්ෂා වීම සඳහා උත්සාහ කරමින් සිටි ඇමරිකානු නිෂ්පාදකයෙකු වන 'Whirlpool' සමාගම තීරුබදු පැනවීම සඳහා අනුමැතිය ලබා දීම පිළිබඳ සතුට පළ කර තිබේ.

චීනයේ සහ දකුණු කොරියාවේ ප්‍රතිචාරය
 99483279 mediaitem99468798
"ඇමරිකානු නිෂ්පාදන නිර්මාණය කරන, ඇමරිකානු සමාගම් සොරකම් කරන සහ ඇමරිකානු රැකියා විනාශ කරන" රටවලින් ඇමරිකාව ආරක්ෂා කර ගන්නා බව ජනාධිපති ට්‍රම්ප් පවසයි

මේ අතර සූර්ය කෝෂවල මිල ඉහළ යාම එරට ක්‍රියාත්මක පුනර්ජනනීය බලශක්ති ව්‍යාපෘතිවලට අයහපත් අයුරින් බලපානු ඇති බවට පරිසරවේදීහු තර්ක කරති.

තීරුබදු හඳුන්වා දීමේ පුවත සම්බන්ධයෙන් චීනය සහ දකුණු කොරියාව කෝප සහගත ප්‍රතිචාරයක් පළ කරති.

අදාළ තීරුබදු "අසාධාරණ" බව පවසන දකුණු කොරියාව කියා සිටියේ ඒ සම්බන්ධයෙන් ලෝක වෙළඳ ආයතනයට පැමිණිලි කරන බවය. රෙදි සේදුම් යන්ත්‍ර වෙළඳපොල තුළ 'Samsung' සහ 'LG' වැනි දකුණු කොරියානු සමාගම් ඇමරිකාවේ 'Whirlpool' වැනි සමාගම් සමග තරග කරති.

මේ අතර ලොව විශාලතම සූර්ය කෝෂ නිෂ්පාදකයා වන චීනය කියා සිටියේ ඉහත කී ක්‍රියාමාර්ගය හේතුවෙන් ගෝලීය වෙළඳපොළට තවත් බලපෑම් එල්ලවනු ඇති බවය.

Comment (0) Hits: 348

සීතල යුද්ධ එපා - ඇමරිකාවේ යුධ සැලසුමට චීනයේ විරෝධය

සීතල යුධ මානසිකත්වය නැතිකරගන්න ලෙස චීනය ඇමරිකාවෙන් ඉල්ලා ඇතැයි වාර්තා වේ. මෙම ඉල්ලීම සිදුකර ඇත්තේ තමන් කුඩා බෝම්බ නිෂ්පාදනය තුළින් න්‍යෂ්ටික ශක්තිය වැඩිදියුණු කරන බවට ඇමරිකාව විසින් නිවේදනය කිරීමත් සමඟයි.

චීන ආරක්ෂක අමාත්‍යංශය පවසා තිබුණේ ලෝකයේ වැඩිම න්‍යෂ්ටික අවි ප්‍රමාණයක් ඇති රට ලෙස ඒවා අවම කිරීමට පියවර ගැනීම වෙනුවට ඇමරිකාව එම ප්‍රතිපත්තියට විරුද්ධව යමින් සිටින බවයි.

ඇමරිකානු හමුදාව ඔවුන් සතුව පවතින න්‍යෂ්ටික ආයුධ විශාල වැඩි බව කල්පනා කිරීම හේතුවෙන් මේ ආකාරයට කුඩා ප්‍රමාණයේ බෝම්බ නිෂ්පාදනයට යොමුවී ඇති බව විදෙස් පුවත් සේවා වාර්තා කර තිබේ.

රුසියාවද ඇමරිකාවේ මෙම යුධ සැලසුම හෙළා දැක තිබුණි.

ඉරාන විදේශ ඇමතිවරයා මේ පිළිබද අදහස් දක්වමින් පවසා තිබුණේ ඇමරිකාවේ සැලසුම ලෝකයම සමූල ඝාතනයක් වෙත තල්ලු කිරීමක් බවයි.

ඇමරිකාවේ නව සැලැස්ම

තමන් සතු න්‍යෂ්ටික අවි අයුධ යල් පැන ඇති බව සහ ඵලදායිතාවයෙන් අඩු බව ඇමරිකාව විශ්වාස කරන බව පැවසේ. එසේම ඔවුන් තමන්ට යුධමය වශයෙන් තර්ජනයක් ඇතිවිය හැකි රටවල් ලෙස චීනය, රුසියාව, උතුරු කොරියාව, සහ ඉරානය නම්කර ඇත.

පෙන්ටගනය විසින් පසුගිය සිකුරාදා නිකුත්කළ ආරක්ෂක තත්ත්වය විමසා බැලීමකට අනුව තර්ක කර ඇත්තේ කුඩා ප්‍රමාණයේ අවි නිෂ්පාදනය කිරීම එම උපකල්පනයන්ට අභියෝගයක් බවයි. අඩු ශක්තියකින් යුතු එම අවි ආයුධ අඩු ශක්තියකින් යුතු වුවත් විනාශකාරී බවෙහි අඩුවක් නැත.

පසුගිය මාසයේ නිවේදනය කළ පරිදි ඇමරිකාවේ යුධ උපක්‍රමය වන්නේ චීනය රුසියාව වැනි ප්‍රතිසංස්කරණවාදී බලවතුන්ගේ තර්ජනයන්ට එරෙහි වීමයි.

Comment (0) Hits: 442

පුටින් අධික ශීතල ජලයේ ස්නානය කිරීමට හේතුව හෙළිවේ

රුසියානු ජනාධිපති ව්ලදීමීර් පුටින් පසුගියදා අධික ශීත දියේ ගිලී ස්නානය කරන අයුරු දැක්වෙන ජායාරූප සහ වීඩියෝ විදෙස් මාධ්‍ය පළ කර තිබුණි.

රුසියානු ජනාධිපතිවරයා මෙලෙස අධික ශීතල වතුරේ ගිලී ස්නානය කරනු ලැබුවේ රුසියානු ඕතඩොක්ස් කිතුනු ආගමික වතාවත්වලට අනුව ප්‍රාදූර්භාවය (Epiphany) අනුස්මරණය කරමින් රුසියානුවෝ අධික ශීත දියේ ගිලී ස්නානය කිරීමේ සිරිත අනුගමනය කරමිනුයි.

 එම ආගමික වතාවත්වල අරමුණ වන්නේ ජේසුස් වහන්සේගේ බෞතිස්මය සනිටුහන් කිරීමයි.

පුටින් මාර්තු 18 දින පැවැත්වෙන මැතිවරණයේදී නැවතත් ජනාධිපති තනතුර සඳහා තරඟ වැදීමට නියමිතය. මේ දිනවල ඔහු මැතිවරණ ප්‍රචාරණ කටයුතුවල නියැලෙමින් සිටියි. පුටින්ගේ මෙම ආගමික භක්තියේ අරමුණ රුසියානු ඕතඩොක්ස් කිතුනු ආගමික ජනතාවගේ කැමැත්ත ලබාගැනීම විය හැකි බවට මත පළව තිබේ.

Comment (0) Hits: 350

මාලදිවයිනේ කුමන්ත්‍රණයක් ; හමුදාව පෙරට

ආණ්ඩුව ආරක්ෂා කර ගැනීම වෙනුවෙන් අවශ්‍ය නම් සිය ජීවිත වුවත් පරිත්‍යාග කරන බවට මාලදිවයින් හමුදාවේ සහ පොලිසියේ ඉහළ නිලධාරීහු දිවුරුම් දෙති.

මාලදිවයින් ජනාධිපති අබ්දුල්ලා යමීන්ට එරෙහිව දෝෂාභියෝගයක් ගෙන ඒමට එරට ශ්‍රේෂ්ඨාධිකරණය උත්සාහ කරන බව එරට නීතිපතිවරයා පවසා තිබිණි.

"එම තැත" වැලැක්වීමට කටයුතු කරන ලෙස නීතිපතිවරයා එරට ආරක්ෂක අංශ වෙත නියෝග කර ඇත.

ඒ අනුව ඉහත කී දිවුරුම් දීමේ උත්සවය එරට රූපවාහිනිය ඔස්සේ විකාශය කෙරිණි.

''මතුව ඇති වත්මන් තත්ත්වය සම්බන්ධයෙන්

සාමකාමී විසඳුමකට

පැමිණෙන ලෙස අප සියලුම

පාර්ශවයන්ගෙන් ඉල්ලා සිටිනවා
රනිල් වික්‍රමසිංහ, ශ්‍රී ලංකා අග්‍රාමාත්‍ය''

දේශපාලන සිරකරුවන් නව දෙනෙකු නිදහස් කරන ලෙසට මාලදිවයිනේ ඉහළම අධිකරණය පසුගියදා ලබා දුන් නියෝගයට එරට බලධාරීන් අවනත නොවීමත් සමග එහි අර්බුදකාරී තත්ත්වයක් හට ගෙන තිබේ.

හිටපු ජනාධිපති මොහොමඩ් නෂීඩ් ඇතුළු විපක්ෂයේ දේශපාලනඥයන් අට දෙනකු ඉහත කී දේශපාලන සිරකරුවන් අතර වෙති.

මාලේ අගනුවර

මාලදිවයින් විපක්ෂය පවසන්නේ අධිකරණ තීන්දුවට අවනත නොවීම කුමන්ත්‍රණයක් හා සමාන බවය.

ශ්‍රේෂ්ඨාධිකරණ තීන්දුව ක්‍රියාත්මක වුවහොත් මාල දිවයින් සමූහාණ්ඩු පාර්ලිමේන්තුවේ බහුතර බලය විපක්ෂයට හිමිවනු ඇත.

මොහොමඩ් නෂීඩ් මුදා හරින්න - ශ්‍රේෂ්ඨාධිකරණය

ඒ අනුව විපක්ෂයේ පාර්ලිමේන්තු බහුතරයට ඉඩ සලසමින් පදවියෙන් ඉල්ලා අස්වෙන ලෙස බලයේ සිටින ජනාධිපති අබ්දුල්ලා යමීන් වෙත ඉල්ලීමක් ඉදිරිපත්ව ඇත.

මාලේ අගනුවර සිටින මාධ්‍යවේදියෙකු බීබීසී සිංහල සේවය වෙත අදහස් දක්වමින් කියා සිටියේ ශ්‍රේෂ්ඨාධිකරණ තීන්දුව ක්‍රියාත්මක කරන ලෙස ඉල්ලා විපක්ෂ ආධාරකරුවන් උද්ඝෝෂණ සිදු කරන බවය.

මාලදිවයින් පාර්ලිමේන්තු සංකීරණය අසල ද එවැනි උද්ඝෝෂණයක් දියත් වූ බව නම හෙළි කිරීමට අකමැති වූ එම මාධ්‍යවේදියා වැඩිදුරටත් සඳහන් කළේය.

කෙසේ නමුත් ඔහු පවසන පරිදි එහි පවතින වත්මන් තත්ත්වය හේතුවෙන් අගනුවර ජන ජීවිතයට මෙතෙක් බලපෑමක් එල්ල වී නොමැත.

ශ්‍රී ලංකාව

male Pm

මේ අතර සෙනසුරාදා (පෙබරවාරි 03) ට්විටර් පණිවුඩයක් නිකුත් කරමින් ශ්‍රී ලංකාවේ අගමැති රනිල් වික්‍රමසිංහ කියා සිටියේ මාලදිවයිනේ මතුව ඇති තත්ත්වය පිළිබඳ විමසිල්ලෙන් පසුවන බවය.

මාලදිවයින් ව්‍යවස්ථාවට සහ නීතියේ ආධිපත්‍ය ආරක්ෂා වන පරිදි එරට සියලුම පක්ෂ කටයුතු කරනු ඇති බවට ද අග්‍රාමාත්‍යවරයා බලාපොරොත්තු පළ කර තිබිණි.

"මතුව ඇති වත්මන් තත්ත්වය සම්බන්ධයෙන් සාමකාමී විසඳුමකට පැමිණෙන ලෙස අප සියලුම පාර්ශවයන්ගෙන් ඉල්ලා සිටිනවා" යනුවෙන් ශ්‍රී ලංකා අගමැතිවරයා නිකුත් කළ ට්විටර් පණිවුඩයේ වැඩිදුරටත් සඳහන් වේ.

Comment (0) Hits: 354

තුර්කි හමුදාව සිරියාවට ඇතුළු වෙයි

තුර්කි පාබල හමුදාව කුර්දි ගරිල්ලන්ට අයත් ප්‍රදේශ මුදාගැනීමේ අරමුණින් ක්‍රියාත්මක Ankara ව්‍යාපාරයේ කොටසක් ලෙස උතුරු සිරියාවේ එෆ්‍රින් (Afrin) කලාපයට ඇතුල් වූ බව තුර්කි අගමැතිවරයා සනාථ කර තිබේ.

සිරියාව අභ්‍යන්තරයේ කිලෝමීටර් තිහක (30) ආරක්ෂක තීරයක් නිර්මාණය කර ගැනීම තුර්කියේ සැලසුම වී ඇති බවද ඔහු පෙන්වා දී ඇත.

එහෙත් YPG කුර්දි කැරලිකරුවන් කියා සිටින්නේ තම සංවිධනය ප්‍රතිප්‍රහාර එල්ල කරමින් තුර්කි හමුදා එෆ්‍රින් (Afrin) කලාපයෙන් පසුබස්වන ලද බවය.

එහෙත් තුර්කි අගමැති බිනාලි යිල්දිරීම් මීට පෙර අදහස් දක්වමින්,සිය පාබල හමුදා සිරියානු භූමියට ඇතුල්වීමේ ඉඩකඩ කල්තබාම ප්‍රකාශයට පත් කරනු ලැබ තිබුණි.

IS ප්‍රහාරකයන්ට එරෙහිව සටන් වදින කුර්දි YPG සන්නද්ධ ව්‍යාපාරය ඇමෙරිකා එක්සත් ජනපදයේ සහයෝගය ලබන්නකි. එවැනි තත්වයක් පවතිද්දී එක්සත් ජනපදයත් සමඟ දැනටමත් පවතින ගැටුම්කාරී සබඳතා තවත් අනතුරුදායක තත්වයකට තල්ලු කළ 'අන්කාරා' පාලනය කුර්දි විරෝධී යුද සැලසුම සෙනසුරාදා ප්‍රකාශයට පත් කළේය.

සෙනසුරාදා රාත්‍රියේ කිලිස් (Kilis) නගරයට එල්ල වූ ප්‍රහාරවලදී කිසිවකුට හානි සිදු වී නැති බව තුර්කිය පවසයි.මේ අතර තුර්කි ප්‍රහාර මගින් එෆ්‍රින් (Afrin) නගරයේ සාමාන්‍ය වැසියන් ද ඇතුළුව නව දෙනකු මරණයට පත්ව ඇති බව කුර්දි YPG සන්නද්ධ ව්‍යාපාරය පවසා තිබුණි.

ඊයේ (ජනවාරි 21) සිරියාවේ ජනාධිපති බෂාර් අල් අසාද් තුර්කිය සිය රට තුළට ඇතුල්වීම හෙළා දැක තිබුණි. මේ අතර ප්‍රංශ විදේශ ඇමති Jean-Yves Le Drian එක්සත් ජාතීන්ගේ ආරක්ෂක මණ්ඩලයේ හදිසි රැස්වීමක් කැඳවන ලෙස ඉල්ලා ඇති බවද වාර්තා වේ.

Comment (0) Hits: 482

මාලදිවයින් ආරක්ෂක අංශය පාර්ලිමේන්තුව වටලයි

මාලදිවයින් ආරක්ෂක අංශ සාමාජිකයින් පාර්ලිමේන්තුව වට කර විපක්ෂ මන්ත්‍රීවරුන් දෙදෙනෙකු අත්අඩංගුවට ගෙන තිබේ.

විපක්ෂ ක්‍රියාකාරීන් නිදහස් කිරීමට අධිකරණය ලබා දුන් නියෝගය ක්‍රියාත්මක නොකිරීමෙන් මාලදිවයිනේ දේශපාලනික අර්බුදය උග්‍ර වී ඇතැයි විදෙස් මාධ්‍ය අනාවරණය කරයි.

 දැනට අත්අඩංගුවේ සිටින විපක්ෂ නායකයින් 09 දෙනෙකු නිදහස් කර ඔවුන්ට එරෙහි නඩු විභාග යළි පවත්වන ලෙස පසුගියදා මාලදිවයින් ශ්‍රේෂ්ඨාධිකරණය නියෝග කළේය.

කෙසේ වෙතත් මෙම තීන්දුවට අනුව මෙතෙක් මාලදිවයින් ආණ්ඩුව ක්‍රියාකර නොමැත.

මෙම තත්ත්වය තුළ මාලදිවයින් ජනාධිපති අබ්දුල්ලා යාමීන් ධූරයෙන් ඉවත්කිරීමට එරට ශ්‍රේෂඨාධිකරණය සූදානම් වන බවත් අධිකරණයේ නියෝගයට අනූකූලව කටයුතු නොකරන ලෙසත්, එරට නීතිපතිවරයා ආරක්ෂක අංශවලින් ඉල්ලා තිබේ.

Comment (0) Hits: 328

ඩොනල්ඩ් ට්‍රම්ප් පාලනය අකර්මණ්‍ය වීමේ අනතුරක්!

ආණ්ඩුවේ වියදම් වලට අදාළ පනත් කෙටුම්පතක් සෙනේට් සභාවේ දී පරාජයට පත්වීමත් සමඟ ඇමෙරිකානු ෆෙඩරල් ආණ්ඩුවේ බොහෝ ආයතන අකර්මණ්‍ය වෙමින් පවතින බව වොෂිංටන් වාර්තා මගින් පැවසෙයි.

ජනාධිපති ඩොනල්ඩ් ට්‍රම්ප් විසින් ව්‍යවස්ථාදායකය වන ඇමෙරිකානු කොන්ග්‍රස් මණ්ඩලයට යොමු කරන ලද මූල්‍ය පනත් කෙටුම්පත නියෝජිත මන්ත්‍රී මණ්ඩලය තුළ වැඩි ඡන්දයෙන් සම්මත වුනත් සෙනේට් සභාවේදී එය පරාජයට පත් වීමත් සමග එම අර්බුදය පැණ නැගුණි.

අදාළ පනත් කෙටුම්පත නියෝජිත මන්ත්‍රී මණ්ඩලයේ දී ඊට පක්ෂව ඡන්ද 230 ක් සහ විපක්ෂව ඡන්ද 197 ක් ලැබීමෙන් වැඩි ඡන්දයෙන් සම්මතවී තිබුණි.

පෙබරවාරි 16 වෙනිදින තෙක් අවශ්‍ය වැය සඳහා අදාළ එම මුදල් පනත් කෙටුම්පත සම්මත වීමට නම් සෙනේට් සභාව තුළත් ඡන්ද හැටකින් (60) සම්මත විය යුතුව තිබුණි.

එහෙත් සංක්‍රමණිකයන් සහ දේශසීමා ආරක්ෂාව මුල්කර ගත් තියුණු විවාදයක් හමුවේ සෙනේට් සභාව තුළ එම අවශ්‍ය ඡන්ද ප්‍රමාණය පනතට පක්ෂව ලැබී නැත.

ඇමෙරිකානු ආණ්ඩුක්‍රම ව්‍යවස්ථාව අනුව මූල්‍ය බලය හිමි වෙන්නේ ව්‍යවස්ථාදායකයවන කොන්ග්‍රස් මණ්ඩලයටය.

එබැවින් විධායකයට අවශ්‍ය මුදල් අනුමැතිය ව්‍යවස්ථාදායකයෙන් නොලැබීමේ තේරුම ෆෙඩරල් ආණ්ඩුව දුෂ්කර තත්වයකට පත් කිරීමකි.

ඇමරිකානු ව්‍යවස්ථාදායකය සංයුක්ත ද්විමණ්ඩලය වන නියෝජිත මන්ත්‍රී මණ්ඩලයේ සහ සෙනේට් සභාවේ බහුතර බලය දැනට විධායක බලය අයත් ජනාධිපති ඩොනල්ඩ් ට්‍රම්ප් නියෝජනය කරන රිපබ්ලිකන් පක්ෂයට හිමි තත්වයක් යටතේ මුදල් පනත් කෙටුම්පතක් ප්‍රතික්ෂේප වීම සුවිශේෂී මෙන්ම විරල සිද්ධියක් ද වෙයි.

විධායකයට අවශ්‍ය පරිදි ව්‍යවස්ථාදයකයේ මූල්‍ය අනුමැතිය නොලැබීමත් සමඟ එය සේවා අත්හිටවීම් ෆෙඩරල් ආණ්ඩුවේ ලක්ෂ සංඛ්‍යාත සේවක පිරිසකට බලපාන අතර, එම තත්වය මුල්කර ගනිමින් මේවන විටත් විවේචන සහ අවලාද එල්ල කර ගැනීම් ආරම්භ වී ඇත.

ඇමෙරිකානු දේශපාලනය තුළ අවසන් වරට මෙවැන්නක් සිදුව ඇත්තේ 2013 වසරේ වන අතර එම අර්බුදය දවස් දාසයක (16 )කාලයක් බල පැවැත්විණි.

'මුදල් පනතක් බල රහිත වීමත් සමඟ ඇමරිකානු රජයේ සියලු කටයුතු අත්හිටවීමක් වන්නේය' යන්නෙන් අදහස් කෙරෙන්නේ, මධ්‍යම රජයට අයත් බොහෝ කාර්යාංශවලට ක්‍රියාත්මක වීමට නොහැකි තත්ත්වයක් උදාවීමය.

එවැනි අවස්ථාවක දී අත්‍යාවශ්‍ය සේවා යටතට ගැනෙන රාජ්‍ය ආරක්ෂක කටයුතු සහ සෞඛ්‍ය අංශ ක්‍රියාත්මක වන නමුත්, බොහෝ රාජ්‍ය ආයතන වසා දමනු ලැබෙයි.

රාජ්‍ය අංශයේ නිරත අඩක් පමණ සේවකයන් වැටුප් රහිත නිවාඩු යවනු ඇත.

dawala1ජාතික උද්‍යාන සහ ස්මාරක ද වසා තැබීමට සිදු වෙයි.

එවැනි අර්බුදයක් මතු වී තිබෙන්නේ ජනාධිපති ඩොනල්ඩ් ට්‍රම්ප් පදවියට පත්වීමෙන් වසරක් තුළ වීමත් විශේෂත්වයකි.

මෙම අර්බුදය නිසා සතියකට සිදුවන අලාභය ඇමරිකානු ඩොලර් බිලියන 6.5ක් පමණ වෙතැයි ඇස්තමේන්තු කරනු ලැබ ඇත.

මේ අතර ඉහත කී අර්බුදය සම්බන්ධයෙන් රිපබ්ලිකන් සහ ඩිමොක්‍රටික් පක්ෂ නායකයන් එකිනෙකා කෙරෙහි වගකීම් පවරමින් වාග් සංග්‍රාමයක පැටලී ඇති බවක් ද වාර්තා වෙයි.

ඩිමොක්‍රටික් පක්ෂය තම උවමනා සඳහා ජනතාව ඇපයට තබා ඇතැයි රිපබ්ලිකන් පක්ෂ බලධාරීහු ඩිමොක්‍රටික් පක්ෂයට චෝදනා කරති.

"ඩිමොක්‍රටික් පක්ෂය අපගේ ජාතික ආරක්ෂාව, යුද හමුදා පවුල්වල සාමාජිකයන් , මෙන්ම ඇමෙරිකානු ජනතාවට සේවය කිරීමේ වගකීම අස්ථාවර අඩියකට පත්කර ඇතැයි ධවල මන්දිර ප්‍රකාශිකා සාරා සැන්ඩර්ස් චෝදනා කරයි.

trump 1

ඩිමොක්‍රටික් පාක්ෂිකයන් ද සිය ප්‍රතිවාදී රිපබ්ලිකන් පක්ෂයට පෙරලා පහර දෙමින් 'ජනාධිපති ඩොනල්ඞ් ට්‍රම්ප් එක්සත් ජනපද සෙනේට් සභාවේ ද්වි පක්ෂ එකඟතාවලට පටහැණිව කටයුතු කරණ බවට' චෝදනා කර ඇත.

කෙසේවුවද, එක් පක්ෂයක් විසින් ව්‍යවස්ථාදායක සහ විධායක යන ද්විත්ව බලය පාලනය කරන මොහොතක ඇමෙරිකානු දේශපාලන ඉතිහාසයේ ජනාධිපතිවරයකු කිසිදාක මෙවැනි පරාජයක් ලබා නැතැයි විචාරකයෝ පෙන්වා දෙති.

Comment (0) Hits: 294

ෆිදෙල් කැස්ත්‍රෝගේ පුතා දිවි නසාගෙන

කියුබානු විප්ලවවාදී  නායක ෆිදෙල් කස්ත්‍රෝගේ වැඩිමහල් පුත්‍රයා  වන කස්ත්‍රෝ ඩියෙස්  බලාර්ට් හවානාහිදී සිය දිවි නසාගෙන ඇති බව වාර්තා වේ. 

ඊයේ(01) උදෑසන ඔහුගේ සිරුර හමුවී ඇති අතර ඔහු විෂාදය නම් රෝගයෙන්  පෙළුනෙක් බව විදෙස් පුවත් සේවා වාර්තා කර ඇත. 'Fidelito' යන සුරතල්  නාමයෙන්  හැඳින්වුණු  ඩියෙස්  බලාර්ට් මිය යනවිට 68 වන වියේ පසුවී තිබේ. 

ඔහු  න්‍යෂ්ටික විද්‍යාඥයෙක් ලෙසද කටයුතු කර තිබේ. කියුබාවේ නිල පුවත්පත වන Granma වාර්තා කර ඇති ආකාරයට ඩියෙස්  මාස ගණනාවක් බරපතල විෂාදය තත්ත්වය හේතුවෙන් ප්‍රතිකාර ලබාගෙන ඇති බව පැවසේ. 

මිය යනවිට ඩියෙස් කියුබානු ජාතික කවුන්සිලයේ විද්‍යා උපදේශකයෙකු සහ කියුබා විද්‍යා ඇකඩමියේ උප සභාපතිවරයා ලෙස කටයුතු කර ඇත. ඊට අමතරව ඔහු පොත් කිහිපයක්ද ලියා පළකර තිබේ. 

ඔහුගේ පියාවන ෆිදෙල් කස්ත්‍රෝ ලෝකයේ වැඩිම කලක් නායකත්වය දැරු පුද්ගලයා ලෙස ඉතිහාසගත වෙමින්  වයස අවුරුදු 90 දී එනම් 2016 වසරේදී ජිවිතක්ෂයට පත්විය. 

Comment (0) Hits: 410

CNN මාධ්‍යවේදියා ධවල මන්දිරයෙන් එළියට දමයි

ධවල මන්දිරයේ පැවැත්වූ ප්‍රවෘත්ති සාකච්ඡාවක් අතරතුර CNN පුවත් සේවයට අනුයුක්ත ජ්‍යෙෂ්ඨ මාධ්‍ය වේදියකු වන ජිම් අකොස්ටා එම ස්ථානයෙන් ඉවත් කිරීමට ඇමරිකානු ජනාධිපති ඩොනල් ට්‍රම්ප් කටයුතු කර ඇති බව විදෙස් මාධ්‍ය වාර්තා කරයි.

ඊට හේතු ලෙස සඳහන් වන්නේ ජිම් අකොස්ටා විසින් ජනාධිපතිවරයා වර්ගවාදී ආකාරයකින් කටයුතු කරන බව හැඟවෙන ප්‍රශ්න අසමින් ඔහුගේ කෝපය ඇවිස්සීමට කටයුතු කිරීමය. 

එහිදී අකොස්ටා විසින් ඩොනල්ඩ් ට්‍රම්ප් වෙත  නෝර්වේ රටින් ජනතාව ඇමරිකාවට ආවාට කමක් නැද්ද? සුදු මින්ස්සු සුදු රටවලින් ආවාට කමක් නැද්ද සර් යනුවෙන් ප්‍රශ්න යොමුකර ඇති බවත් ධවල මන්දිර ප්‍රවෘත්ති සාකච්ඡාවලදී ඉදිරිපස  සිටිමින් ජනාධිපති ට්‍රම්ප් හා ඔහුගේ සහායකයන්ගේ කතාවලට බාධාවන අයුරින් ප්‍රශ්න ඇසීමට  ජිම් අකොස්ටා ප්‍රකට බවත් එම මාධ්‍ය වාර්තා වල සඳහන්ව ඇත.

එසේම පසුගියදා දකුණු අප්‍රිකානු රටවලට නිගා දෙන පරිද්දෙන් ට්‍රප්ම් ජනාධිපතිවරයා ප්‍රකාශ කළ වචනය නිරන්තරයෙන් CNN පුවත් සේවයේ විකාශය කිරීමට කටයුතු කිරීම ගැනද ජනාධිපතිවරයාගේ අවධානය යොමුවී තිබෙන්නට ඇති බවත් ඒ හැසිරීමට විරෝධය පළකිරීම සඳහා ජනාධිපතිවරයා මෙසේ කටයුතු කරන්නට ඇති බවද එහි සඳහන්ය.

Comment (0) Hits: 320

රුසියාව සම්බන්ධ ලියවිල්ලක් නිසා අමෙරිකාවේ මතභේදයක්

පසුගිය ජනාධිපතිවරණයේදී රුසියාව සිදු කළ බව කියන මැදිහත් වීම් සම්බන්ධ ලියවිල්ලක් පිළිබඳ අමෙරිකාවේ FBI සංවිධානය සහ එරට රිපබ්ලිකන් පක්ෂ නීති සම්පාදකයින් අතර මේ වනවිට මතභේදාත්මක තත්ත්වයක් හට ගෙන ඇතැයි  වාර්තා වේ.
 
 නීති සම්පාදකයින් විසින් එළිදැක්වීමට නියමිත මෙම ලියවිල්ලේ නිරවද්‍යතාවය කෙරෙහි තමන් ඉතා විමසිලිමත්වන බව FBI සංවිධානය පවසා තිබුණි.  
 
පසුගිය ජනාධිපතිවරණයේ රුසියාව මැදිහත්වූ බවට වන මතය මිට පෙර ට්‍රම්ප් මෙන්ම රුසියාවද ප්‍රතික්ෂේප කර ඇත. ඩිමොක්‍රටික්  පාක්ෂිකයින් පවසන්නේ මෙම ලියවිල්ල , තම  පක්ෂය  අපකීර්තියට පත් කිරීමේ ප්‍රයත්නයක් බවයි.
 
රිපබ්ලිකන් පාක්ෂික නීති සම්පාදකයිනගේ මෙම කි‍්‍රයාකලාපය සම්බන්ධයෙන් FBI සංවිධානයට මේ වනවිටත් අනතුරු ඇගවීම් නිකුත් කර ඇති බව පැවසේ.
 
ධවල මන්දිරය උපුටා දක්වමින් විදෙස් මාධ්‍ය මීට පෙර වාර්තා කර සිටියේ  එම මතභේදාත්මක ලියවිල්ල අද(01)  දිනය තුලදී එළි දැක්වෙනු ඇති බවටයි. ධවල මන්ධිර ප්‍රධානි ජෝන් කෙලි Fox News ගුවන් විදුලිය සමඟ පැවති  වැඩසටහනකදී ද පැවසුවේ එය තොරතුරු ඉතා ඉක්මණින්  එළි  දැක්වීමට නියමිත බව පවසා තිබුණි. 
 
නමුත් ඊට පැයකට  පමණ පසු අභ්‍යන්තර බුද්ධි අංශවල මතය අනුව මෙම ලියවිල්ල හෙට (02) දින ප්‍රකාශයට පත් කිරීමට නියමිත බව ප්‍රකාශ කරන ලදී . 
Comment (0) Hits: 332

ට්‍රම්ප්ට ඇති පිස්සුවක් නැහැ - ධවල මන්දිරයේ දොස්තර කියයි

ඇමරිකානු ජනාධිපති ඩොනල්ඩ් ට්‍රම්ප් ඉතා යහපත් මානසික මට්ටමින් සහ සෞඛ්‍ය තත්ත්වයකින් පසුවන බව ධවල මන්දිර වෛද්‍යවරයා පවසා තිබේ. පසුගිය සතියේ ජනාධිපති ධූරයට පත්වීමෙන් පසුව පැවැත්වූ පළමු වෛද්‍ය පරීක්ෂණයට ට්‍රම්ප් මුහුණ දෙන ලදී. එහිදී ඔහු පැය තුනක පරීක්ෂණයකට මුහුණ දුන් බව සඳහන් විය.

වෛද්‍ය පරීක්ෂණයේ එක් කොටසක් ලෙස the Montreal Cognitive Assessment ( MoCA) ලෙස හැඳින්වෙන මානසික තත්ත්වය පරික්ෂා කෙරෙන පරීක්ෂණයකටද ඔහු මුහුණ දුන් බව සඳහන් වේ. මෙම පරීක්ෂණයේදී අවධානය, මතකය, භාෂාමය හැකියාව, චින්තනමය හැකියාව, ගණනය කිරීමේ හැකියාව, කැපවීම පරික්ෂා කෙරුණි. කෙසේවෙතත් මෙම මානසික තත්ත්වය පරික්ෂා කෙරෙන පරීක්ෂණයෙන් ඔහු ලකුණු 30 න් 30 ම ලබාගෙන ඇති බව විදෙස් පුවත් සේවා වාර්තා කර ඇත.

වෛද්‍ය පරීක්ෂණය පැවැත්වීමට මූලික හේතුවක් ලෙස සැලකෙන්නේ පසුගියදා ජනාධිපතිවරයාගේ මානසික සෞඛ්‍ය සම්බන්ධව මතබේදාත්මක පොතක් නිකුත්විමයි. මයිකල් වුල්ෆ්ගේ Fire and Fury පොතට අනුව ධවල මන්දිරයේ සිටින සියලුදෙනා ට්‍රම්ප්ව දකින්නේ ඉක්මන් විසඳුම් අවශ්‍ය ළදරු මානසිකත්වයෙන් යුතු පුද්ගලයෙකු ලෙසයි . මෙම පොත රචනා කිරීම සඳහා මයිකල් කරුණු රැස්කොට ඇත්තේ ට්‍රම්ප් සිදුකළ සාකච්ජාවල ඇතුලත් තොරතුරු සහ ඇමරිකානු ජනාධිපතිවරයාට සමීපතම පුද්ගලයෙකු වන හිටපු උපාය මාර්ගික ප්‍රධානියෙකුද වන ස්ටීව් බැනන්ගෙන් ලබාගත් තොරතුරු ඇසුරිණි.

එහෙත් ධවල මන්දිර වෛද්‍ය ජැක්සන් පවසන්නේ ඔහු දැනට ඉතා හොඳ සෞඛ්‍ය තත්ත්වයෙන් පසුවන බව මේ පරීක්ෂණයෙන් තහවුරු වූ බව සහ ඔහු ජනාධිපති ධූරය දරන කාලය අතර තුර එම තත්ත්වය පවතිනු ඇති බවයි.එසේම වෛද්‍ය ජැක්සන් පවසන ආකාරයට 71 වැනි වියේ පසුවන ට්‍රම්ප් දුම්කොළ සහ මධ්‍යසාර භාවිතයෙන් තොරවීම නිසා ජීවිත කාලය පුරා හෘද රෝගවලින් තොර ඉතා හොඳ සෞඛ්‍ය තත්ත්වයෙන් පසුවෙනු ඇති.

Comment (0) Hits: 309

Page 10 of 12