පුවත්

වහාම ක්‍රියාත්මක වන පරිදි සියලුම තැපැල් සේවකයින්ගේ නිවාඩු මේ වන විට අවලංගු කර තිබේ.

ජනාධිපතිවරණය පැවැත්වෙන දිනය තෙක් තැපැල් සේවකයින්ගේ නිවාඩු මෙලෙස අවලංගු කර ඇති බව නියෝජ්‍ය තැපැල්පති රාජිත රණසිංහ  පැවසුවේය.

ජනාධිපතිවරණයට අදාළ කටයුතු මූලික කර ගනිමින් ඔවුන්ගේ නිවාඩු අවලංගු කිරීමට තීරණය කළ බව රාජිත රණසිංහ  පැවසීය.

කිසියම් අයෙකුට අත්‍යාවශ්‍ය හේතුවක් මත නිවාඩු ලබැගැනීමට අවශ්‍ය වුවහොත් පළාත් භාර නියෝජ්‍ය තැපැල්පතිගේ අවසරය මත එම කටයුතු සිදුකළ යුතුය බව ද නියෝජ්‍ය තැපැල්පති රාජිත රණසිංහ  වැඩිදුරටත් සඳහන් කළේය.

දිවංගත අමාත්‍ය මංගල සමරවීර මහතාගේ අභාවයේ තෙවැනි සංවත්සරය නිමිත්තෙන්, ඔහුගේ පුළුල් හා ආදරණීය පෞද්ගලික පොත් එකතුවෙන් කොටසක් ගෞරවනීය ආයතන තුනකට පරිත්‍යාග කොට ඔහුගේ මතකයට ගෞරව කිරීමට ඔහුගේ පවුලේ සාමාජිකයින්පියවර ගනී.

ඒ බණ්ඩාරනායක ජාත්‍යන්තර අධ්‍යයන මධ්‍යස්ථානය, යාපනය මහජන පුස්තකාලය සහ මාතර මහජන පුස්තකාලය වෙත එම ප්‍රදානයන් සිදු කෙරෙනු ඇත.

විදේශ අමාත්‍යවරයා මෙන්ම මුදල් අමාත්‍යවරයා ලෙස ද කටයුතු කළ කීර්තිමත් ශ්‍රී ලාංකික දේශපාලනඥයෙකු වූ මංගල සමරවීර මහතා ලන්ඩනයේ සෙන්ට්‍රල්ශාන්ත මාටින්ස් හි අධ්‍යාපනය ලැබීමෙන් පසු විලාසිතා නිර්මාණකරුවෙකු සහ ගුරුවරයෙකු ලෙස සිය වෘත්තීය ජීවිතය ආරම්භ කළේය.

කාලීන කටයුතු, ජාත්‍යන්තර සබඳතා, සංවර්ධන අධ්‍යයනය, ඓතිහාසික නවකතා, වැඩියෙන්ම අලෙවි වන ප්‍රබන්ධ, කවි, විකාර සාහිත්‍යය, සංචාර, භාෂා, චිත්‍ර, අත්කම්, සහ ඡායාරූපකරණය ඇතුළු පුළුල් පරාසයක විෂයයන් සම්බන්ධයෙන් වන ඔහුගේ පොත් එකතුව මගින් ඔහුගේ ඉගෙනීමට ඇති රුචිය සහ අන්තර් විෂය ලැදියාවන්මනාව පිළිබිඹු වේ.

වසර 40 කට වැඩි කාලයක් තිස්සේ ජාත්‍යන්තර සබඳතා පිළිබඳව ශ්‍රී ලංකාවේ දැනුම බෙදාගැනීමේ ප්‍රමුඛතම ආයතනයක් ලෙසට ක්‍රියාත්මක වනබණ්ඩාරනායක ජාත්‍යන්තර අධ්‍යයන මධ්‍යස්ථානය මෙම ක්‍රියාවලියේ ප්‍රධාන කාර්යභාරයක් ඉටු කරනු ඇත.

එම මධ්‍යස්ථානය විසින් මෙම පොත් එකතුව ලේඛනගත කිරීමට සහාය වන අතර, රාජ්‍ය තාන්ත්‍රික සහ ජාත්‍යන්තර කටයුතු කෙරෙහි ඔවුන්ගේ අවධානය යොමු කිරීමට වඩාත් අදාළ පොත් ඊට ප්‍රදානයකෙරෙනු ඇත.

මෙම පරිත්‍යාගය විශේෂයෙන් යෝග්‍ය වන්නේ එය රාජ්‍යතාන්ත්‍රික සේවයේ නියැලී සිටින්නන් සහ ගෝලීය වේදිකාවේ විවිධ කර්මාන්තවලදී ශ්‍රීලංකාව නියෝජනය කරන්නන්ගේ අඛණ්ඩ අධ්‍යාපනයට ඉන් සහායක් ලැබෙන බැවිනි.

විනාශ වී තිබූ යාපනය පුස්තකාලය යළි ගොඩනැගීමේ පූරෝගාමී කාර්යයට මුලපුරමින්

යාපනය මහජන පුස්තකාලයට පොත් ප්‍රදානය කිරීමට ගත් තීරණය විශේෂ වැදගත්කමක් දරයි. ගිනි තැබීමට ලක් වූ එම පුස්තකාලය ප්‍රතිසංස්කරණය කිරීමටමංගල සමරවීර දැඩි ලෙස කැප වී සිටි අතර, එම සිද්ධිය සියළුම ශ්‍රී ලංකාවාසීන්ගේ ඛේදවාචකයක් ලෙසින් ඔහු සැලකීය. හිටපු ජනාධිපතිනී බණ්ඩාරනායකකුමාරතුංගගේ පාලන සමයේදී යාපනය පුස්තකාලය සහ එහි මිල කළ නොහැකි පොත් එකතුව නැවත ගොඩනැංවීම සහ ප්‍රතිසංස්කරණය කිරීම සඳහා රට පුරාසිටින ශ්‍රී ලාංකිකයන් බලමුළු ගැන්වීමට උත්සාහ කළ ‘ගඩොලක් හෝ පොතක්’ ව්‍යාපාරයේ සාඩම්බර සංවිධායකයෙකු ලෙසින් ද ඔහු කටයුතු කළේය. මෙමපරිත්‍යාගය නියෝජනය කරන්නේ එම ඓතිහාසික අලාභය පියවා ගැනීමට ගන්නා අඛණ්ඩ උත්සාහයක් ලෙසටයි.

මීට අමතරව, ඔහුගේ පුස්තකාලයේ කොටසක් මාතරට ගෙන ගොස් මහජන පොත් එකතුවක් සැකසීම මගින්, ඔහුගේ ආදරණීය දකුණේ උපන් ගමෙහි විශේෂයෙන් කලා හා සංචාර ක්ෂේත්‍රයන්ට ලැදි තරුණ තරුණියන්ට ප්‍රයෝජනවත් වනු ඇත.

මෙම පරිත්‍යාගය මංගලගේ ජීවිත කාලය පුරාවටම වූ දැනුම වෙනුවෙන් කැපවීම සහ ප්‍රජාවන් අතරට ගෙන ඒමට සහ අවබෝධය වර්ධනය කිරීමට එහි ඇතිශක්තිය පිළිබඳ විශ්වාසයට උපහාරයක් බව ඔහුගේ සහෝදරිය වන ජයන්ති සමරවීර මහත්මිය පැවසුවාය.

 “මෙම ප්‍රදානය මගින් මංගලගේ පුළුල් බුද්ධිමය කුතුහලයෙන් සහ රාජ්‍ය සේවයට කැපවීමේ උරුමය අඛණ්ඩව ඉදිරියට ගෙන යමින් අනාගත පරපුරට ආස්වාදයක් සහ දැනුමක් ලබා දෙනු ඇතැයි අපිබලාපොරොත්තු වෙමු.”

පුස්තකාල මගින් පොත් ලේඛණගත කිරීම සහ තෝරා ගැනීමෙන් පසුව පොත් පරිත්‍යාග කිරීමේ උත්සවය ඔක්තෝම්බර් මාසයේදී සිදු කෙරේ. ඔහුගේ පොත්එකතුවෙන් කුඩා කොටසක් ඔහුගේ පවුලේ රැකවරණය යටතේ තවදුරටත් පවතිනු ඇත.

ජනාධිපති රනිල් වික්‍රමසිංහ කොළඹ රාජකීය විද්‍යාලයේ අධ්‍යාපනය ලබන අවධියේ එහි ගුරුවරයෙකු ලෙස සේවය කළ බී.සිවලිංගම් මඩකලපුව අද (24) පැවති මහජන රැළියේ වේදිකාවට ගොඩවී ජනාධිපති රනිල් වික්‍රමසිංහගේ ජයග්‍රහණය ට ආශීර්වාද කළේය. 

ඉදිරි ජනාධිපතිවරණයේදී ජනාධිපති රනිල් වික්‍රමසිංහ ජයග්‍රහණය තහවුරු කිරීම වෙනුවෙන් දෙමළ මහජන විමුක්ති (ටී.එම්.වි.පි) පක්ෂයේ නායක ඇමති ශිවනේසර්තුරෙයි චන්ද්‍රකාන්ත් (පිල්ලෙයාන්) සංවිධානය කළ "පුලුවන් ශ්‍රී ලංකා" මහජන රැළිය ශිවානන්දා ජාතික පාසල් ක්‍රීඩාංගණයේ පැවති අතර මහජන රැළියේ වේදිකාවට ගොඩවූ සිවලින්ගම් ගුරුතුමා මෙලෙස ජනාධිපතිවරයාට ආශීර්වාද කළේය.

මේ වන විට විශ්‍රාම සුවයෙන් මඩකලපුව සිය නිවසේ පදිංචිව සිටි 98 වියැති බී. සිවලිංගම් සිය ශිෂ්‍යයෙකු වන රනිල් වික්‍රමසිංහ මඩකලපුවට පැමිණෙන බව සැලවීමෙන් පසු මෙම රැළියට පැමිණ තිබුනි.

රනිල් වික්‍රමසිංහ ට අමතරව අග්‍රාමාත්‍ය දිනේෂ් ගුණවර්ධන , අනුර බණ්ඩාරනායක , මලික් සමරවික්‍රම ඇතුලු ඇමති මණ්ඩලයේ බහුතරයකට එතුමා අධ්‍යාපනය ලබාදුන් බව ජනාධිපති රනිල් වික්‍රමසිංහ සිය කතාවේදී සිහිපත් කළේය.

එක්සත් ජාතික පක්ෂයේ හිටපු සභාපති රුක්මන් සේනානායක අද (24) අභාවප්‍රාප්ත විය.

මිය යන විට ඔහු 76 වියේ පසු විය.

ශ්‍රී ලංකාවේ ප්‍රථම අග්‍රාමාත්‍ය ඩී.එස්.සේනානායක මහතාගේ මුණුපුරා, එජාප ප්‍රබලයෙකු මෙන්ම හිටපු කැබිනට් අමාත්‍යවරයෙකු වූ රුක්මන් සේනානායක  1973 දී දේශපාලනයට පිවිසියේ දැදිගම ආසනයෙනි.

1994 දී නැවත පාර්ලිමේන්තුවට පිවිසි ඔහු 2004 මැතිවරණයේදී කෑගල්ල දිස්ත්‍රික්කය නියෝජනය කරමින් පාර්ලිමේන්තු මන්ත්‍රී ධූරයක් දිනා ගත්තේය.

රුක්මන් සේනානායක  2002 සිට 2004 දක්වා පරිසර හා ස්වභාවික සම්පත් කැබිනට් අමාත්‍යවරයා ලෙස කටයුතු කළේය.

ඉන්පසු ඔහු 2007 වසරේ එක්සත් ජාතික පක්ෂයේ සභාපතිවරයා ලෙස පත් විය.

ජනා­ධි­ප­ති­ව­ර­ණය නිරී­ක්ෂ­ණය සඳහා යුරෝපා සංග­මයේ මැති­ව­රණ නිරී­ක්ෂ­ක­යින් මේ වන­වි­ටත් දිව­යි­නට පැමිණ ඇත.

මීට අම­ත­රව ජනා­ධි­ප­ති­ව­රණ නිරී­ක්ෂණ කට­යුතු සඳහා පොදු රාජ්‍ය මණ්ඩ­ලීය මැති­ව­රණ නිරී­ක්ෂ­ක­යින් හා ආසි­යානු මැති­ව­රණ නිරී­ක්ෂණ ජාලයේ නියෝ­ජි­ත­යන්ද දිව­යි­නට පැමි­ණී­මට නිය­මි­තය.

එම සංවි­ධාන කළ ඉල්ලී­ම­කට අනුව මැති­ව­ර­ණය නිරී­ක්ෂ­ණ­යට අව­ස­රය ලබා­දුන් බව මැති­ව­රණ කොමි­ෂන් සභාව ප්‍රකාශ කළේය‍. ඉන්දි­යාව,නේපා­ලය,බංග්ලා­දේ­ශය, පකි­ස්තා­නය, මාල­දි­ව­යින ඇතුළු රට­වල මැති­ව­රණ නිරී­ක්ෂණ සංගම් සහ නියෝ­ජි­ත­යන් ද මැති­ව­රණ නිරී­ක්ෂ­ණය සඳහා අව­සර ඉල්ලා ඇත.

අව­සර ලබා ගන්නා ආය­තන සහ නියෝ­ජි­ත­යන් ජනා­ධි­ප­ති­ව­ර­ණයේ ඡන්ද විම­සීම ඇතුළු සියලු කට­යුතු නිරී­ක්ෂ­ණය කිරී­මෙන් පසු වාර්තා­වක් මැති­ව­රණ කොමි­සම වෙත ලබා දිය යුතුය.

පසුගිය කාලයේ බිහි වූ ආණ්ඩු ආගම ජාතිය භාෂාව කුලය කේන්ද්‍ර කර ගෙන ජන ජීවිත විනාශ කළ බව විපක්ෂ නායක සජිත් ප්‍රේමදාස පැවසී ය.

විපක්ෂ නායකවරයා මෙලෙස පැවසුවේ ඊයේ (23) මහනුවර අකුරණ නගරයේ දී පැවති ජන රැලියේ දී ය.

මතු දැක්වෙන්නේ එම අවස්ථාවේ දී විපක්ෂ නායක සජිත් ප්‍රේමදාස කළ සම්පූර්ණ කතාව ය.

 මම, කඩා වැටුණු රට එක්සේසත් කරනවා

‘‘ජාතිවාදයට ජාතිභේදයට ආගම්වාදයට විරුද්ධව පාරට බැස්සේ සමගි ජන බලවේගය යි. ආදාහනය සහ භූමදානය ගැටලුවේ දී මුස්ලිම් ජනතාව වෙනුවෙන් මහපාරට බැහැලා ජාතික සමගිය ආගම් අතර සමගිය වෙනුවෙන් පාරට බැස්සෙත් සමගි ජන බලවේගය යි. සමහර අය පාර්ලිමේන්තුවේ වරප්‍රසාදවලට යට වෙලා ඉස්ලාම් ආගමට අපහාස කරමින් අන්තවාදී චෝදනා එල්ල කරා. මේ රටේ කිසිම කෙනෙකුට: කිසිදු ආගමකට, ජාතියකට, අපහාස කරන්න අයිතියක් නෑ. සෑම ආගමකට ම ජාතියකට ම ගරු කළ යුතුයි. මේ රට අපි හැමෝගෙ ම රට.

මේ බෙදුනු රට; කඩාවැටුණු රට එක්සේසත් කිරීම මම කරනවා. අපේ ආණ්ඩුවක් යටතේ: ජාතිවදයට, ජාතිභේදයට, ආගම්වාදයට, ආගම්භේදයට, අන්තවාදයට ඉඩ නෑ. අපේ රටේ මේ මොහොතේ පවතින්නේ ගැටුම්කාරී දේශපාලනය රජවුණු යුගයක්. තරහ මරහකම්, එදිරිවාදිකම්, හතුරුකම්, ජාතිවාදය ආගම්වාදය, ගෝත්‍රවාද,ය වර්ණභේදය, කුල භේදය යනාදි විදියටරට බෙදිලා; රට බංකොලොත් වෙලා ලක්ෂ දෙසිය විස්සක් ජනතාව අතරමං වෙලා ඉන්න මොහොතක තවදුරටත් නොබෙදී එකතු වෙන්න ඕනෙ. ඊර්ෂ්‍යාව වෛරය බල තන්හාව බැහැර කරලා රට ගොඩනගන එකමුතුභාවයකට එක්වෙන්න ඕනෙ. එහෙම නැතුව මේ විදියට නම් ඉදිරියට යන්න බෑ.

වත්මන් ජනාධිපතිවරයා ප්‍රමුඛ රජයට මේ රටේ පොදු ජනතාව ගැන හිතන්නේ නෑ; පොදුජන හදගැස්ම ගැන අවබෝධයක් නෑ. සංහිඳියාව, සහෝදරත්වය හා මිත්‍රශීලීත්වය තුළ ජනතාවක් විදියට එකට එකතු වී එකමුතුභාවය රට ගොඩනගන ශක්තිය බවට පත්කරගත යුතුයි. බෙදුණු රට තුළ විවිධ හේතු නිසා කඩා වැටුණු, ගරා වැටුණු ජන සමාජය එකමුතුභාවය තුළින් යළි ගොඩනැගීමට එක්වන්නැයි මම හැම දෙනාට ම මිත්‍රත්වයේ හස්තය දිගු කරනවා.

රට සින්නක්කරව ලියා ගන්න කාටවත් අයිතියක් නෑ

බංකොලොත් රට ගොඩ ගත යුතුයි. අප රට ආර්ථික වශයෙන් දියුණු වනවා වෙනුවට බංකොලොත් වෙලා. ඒකටට හේතුව තමයි කණ්ඩායමක් රට සින්නක්කරව ලියාගෙන වගේ පාලනය කිරීම. මේ රට තනි පුද්ගලයකුට... එහෙමත් නැතිනම් කණ්ඩායමට අයිති රටක් නෙවෙයි; ලක්ෂ දෙසිය විස්සක් ජනතාවට අයිති රටක්. ජනාධිපතිවරණය හරි මහමැතිවරණය හරි දිනුවා කියලා රට සින්නක්කරව ලියාගන්න බෑ. එහෙම කරන්න දෙන්නෙත් නෑ. ඒක තාවකාලික භාරකාරත්වයක් විතරයි. අපි නව ආර්ථික දැක්මක් තුළින් රට ගොඩගන්නවා. සියලු දෙනාට සමාන ප්‍රතිලාභ ලැබෙන සමාජ වෙළෙඳපොළ ආර්ථිකය ගොඩනංවා රට නැවතත් දියුණු කරනවා. අපේ රටේ සීමසහිත සන්නාම තිබුණට කොරියාව තුළ විවිධ ක්ෂේත්‍රයන්ට අදාළ සන්නාම තියෙන නිසා අපේ රටත් ඒ තත්ත්වයට ගත යුතුම යි.

බෝම්බ දෙකක් වැටුණු ජපානයත්, යුද්ධයෙන් විනාශ වූ වියට්නාමයත්, ගෝත්‍රික යුද්ද නිසා විනාශ වුණ රුවන්ඩාවත් අද ලෝකයේ දියුණු රටවල්. අපිත් ඒ විදියට දියුණු විය යුතු යි. ඒ සඳහා ශීඝ්‍ර සංවර්ධන ක්‍රියාදාමයක් ක්‍රියාත්මක කළ යුතුයි. ‘නැහැ බැහැ බලමු’ කියන අදහස නැති කරගෙන එකමුතුභාවයෙන් සහ කැපකිරීම් සිදු කරලා, සද්ජාතිකත්වයක් ඔස්සේ අපේ රට ගොඩ ගැනීමට එකතු වන ලෙස මම ඔබ සැමගෙන් ඉල්ලා සිටිනවා.

(සටහන - ජයසිරි අලවත්ත)

එදා ජන­තාව විඳි දුක දැක දැකත් අනු­කම්පා නොකර පැන ගිය සජිත් ප්‍රේම­දාස සහ අනුර දිසා­නා­යක රට ඉදි­රි­යට ගෙන­යෑ­මට සුදුසු දැයි මේ රටේ ජන­තාව තීර­ණය කළ යුතු බව ජනා­ධි­පති රනිල් වික්‍ර­ම­සිංහ පැව­සීය.

ජනා­ධි­පති රනිල් වික්‍ර­සිංහ  මේ බව සඳ­හන් කළේ ඊයේ (23) පස්ව­රුවේ මඩ­ක­ල­පුව, එරා­වුර් අහ­මඩ් ෆරීද් ක්‍රීඩාං­ග­ණයේ දී පැවති ‘පුළු­වන් ශ්‍රී ලංකා’ විජ­ය­ග්‍රාහී ජන රැලි­යට එක්වෙ­මිනි.

එළැ­ඹෙන ජනා­ධි­ප­ති­ව­ර­ණයේ දී ජනා­ධි­පති රනිල් වික්‍ර­ම­සිංහගේ ජය­ග්‍ර­හ­ණය තහ­වුරු කිරීමේ අර­මු­ණින් පැවැති මෙම ජන­හ­මු­වට සිංහල, දෙමළ, මුස්ලිම් භේද­ය­කින් තොරව ප්‍රදේ­ශයේ අති­වි­ශාල ජන­තා­වක් එක්ව සිටි­යහ. ජන­හ­මු­වට එක්වූ ජනා­ධි­ප­ති­ව­ර­යාව එම ජන­තාව මහත් හර­ස­රින් යුතුව පිළි­ගත්හ.

මෙහිදී වැඩි­දු­ර­ටත් අද­හස් දැක්වූ ජනා­ධි­පති රනිල් වික්‍ර­ම­සිංහ  මෙසේද පැව­සීය.

“2022 ජූලි මාසයේ දී මා ආණ්ඩුව භාර­ගෙන පළමු වරට සිදු කළේ ගොවි ජන­තා­වට අවශ්‍ය පොහොර ලබා­දී­මයි. එම කන්න 04 සාර්ථක කර ගනි­මින් රටේ වී නිෂ්පා­ද­නය ඉහළ නංවා කුඹු­රත් මුළු­තැ­න්ගෙ­යත් පිර­වී­මට කට­යුතු කළා.

කැමති අයට භූම­දා­නය කිරී­ම­ටත් කැමති අයට ආදා­හ­නය කිරී­මට හෝ ශරී­රය වෛද්‍ය පීඨ­යට භාර දීම­ටත් හැකි­යාව ලැබෙන පරිදි නව නීති ගෙන ඒමට අදාළ කෙටු­ම්පත ලබන සතියේ ඇමැති මණ්ඩ­ල­යට ඉදි­රි­පත් කර ගැසට් කිරී­මට කට­යුතු කර­නවා. එසේම එම තත්ත්ව­යට මුහුණ දුන් පාර්ශ්ව­යන්ට වන්දි ගෙවී­මට කමි­ටු­වක් පත් කර­නවා.

මීට වසර දෙක­කට පෙර ආහාර නැතිව, ගොවි­තැන් කිරී­මට පොහොර නැතිව ජන­තාව සිටියා. ගොවි­තැන් කිරී­මට පොහොර නොමැ­තිව ගොවීන් අස­රණ වුණා. ආහාර, ඖෂධ නොමැ­තිව ජන­තාව ඉතා අසී­රු­වෙන් ජීවත් වුණා. මා 2022 වසරේ ජූලි මාසයේ දී ආණ්ඩුව භාර­ගෙන මුලින්ම කට­යුතු කළේ ගොවි ජන­තා­වට අවශ්‍ය පොහොර ලබා­දී­ම­ටයි. මෙහිදී 2022, 2023 යල, මහ කන්න සාර්ථක වුණා.

මා රට භාර ගන්නා විට ඩොල­ර­යක මිල රුපි­යල් 370 දක්වා ඉහළ ගොස් තිබුණා. අද ඩොල­ර­යක මිල රුපි­යල් 300ක්. මේ රට මා භාර ගනිද්දි දළ දේශීය නිෂ්පා­ද­නය ඩොලර් බිලි­යන 76කට අඩු වී තිබුණා. 2023 අව­සන් වන විට එය ඩොලර් බිලි­යන 84ක් බවට පත්කර ගැනී­මට කට­යුතු කළා.

ජන­තා­වට තව­දු­ර­ටත් සහන ලබා­දිය යුතුයි. ඒ වගේම දළ දේශීය නිෂ්පා­ද­නය ඩොලර් බිලි­යන 89ක් බවට පත්කර ගත යුතුයි. උද්ධ­ම­නය සිය­යට 9ක් බවට පත්ක­ර­ගත යුතුයි. එවිට රුපි­යල තවත් ශක්ති­මත් වෙනවා. එප­ම­ණක් නොවෙයි දළ දේශීය නිෂ්පා­ද­නය ඩොලර් බිලි­යන 92ක් බවට පත්කර ගත­හොත් රුපි­යල තවත් ශක්ති­මත් වෙනවා. අද අප සිදු කරන්නේ එම කට­යු­ත්තයි. එම වැඩ­පි­ළි­වෙළ ක්‍රියා­ත්මක කිරී­මට සජිත්ට හෝ අනු­රට හැකි­යා­වක් නැහැ. රට භාර ගන්නා ලෙස ඉල්ලූ විට සජිත් සහ අනුර පැනලා දිව්වා. එවන් පිරි­ස­කට රටක් පාල­නය කළ හැකිද ජන­තාව අසී­රු­තා­වට මුහුණ දුන් අව­ස්ථාවේ ඔවුන් පැනලා ගියා.

මට තිබුණේ තනි මන්ත්‍රී ආස­න­යක්. නමුත් ජන­තාව දුක් විඳින නිසා මම මේ රට භාර ගත්තා. ජන­තාව දුක් විඳින අයුරු මම දැක්කා. ත්‍රීවීල් රියැ­දු­රන්ට හයර් එක්ක යෑමට නොහැකි වුණා. මේවා දැකලා මේ නාය­ක­යන් අනු­කම්පා කළාද? නමුත් ඒ අව­ස්ථාවේ රට භාර­ගත් මම ද්‍රෝහි­යෙක් කියලා අද ඔවුන් කිය­නවා. මම හොරු ආරක්ෂා කර­න­වලු. ඔවුන් හිතන්නේ එප­ම­ණයි. ජන­තා­වගේ දුක ගැන ඔවුන් හිතුවේ නැහැ. ඔවුන් කිව්වා සමෘ­ද්ධිය ගෙවන්න සල්ලි නැහැ කියලා.

නමුත් මම අස්වැ­සුම හරහා ජන­තා­වට සමෘද්ධි දීම­නාව මෙන් තුන් ගුණ­යක මුද­ලක් ලබා දුන්නා. ප්‍රති­ලා­භීන් සංඛ්‍යාව ලක්ෂ 16 – සිට ලක්ෂ 24 දක්වා ඉහළ නංවා තිබෙ­නවා. පාසල් දරු­වන්ට ආහාර වේලක් ලබා­දී­මට අප කට­යුතු කළා. ඒ වගේම වැඩි­හිටි දීම­නාව වැඩි කළා. සජිත් හා අනුර මෙම කට­යුතු සිදු කිරීම වෙනු­වෙන් මා සමඟ එක් නොවුණේ ඇයි? මේ රටේ ජන­තාව සජිත්ට හා අනු­රට වර­දක් කළාද? ඒකද ඔවුන් ජන­තා­වට උදව් නොක­රන්නේ. ඔවුන් ජන­තා­වගේ ප්‍රශ්න ගැන සිතුවේ නැහැ. තමන් ගැන පම­ණයි සිතුවේ. එසේ­නම් ජන­තාව ඔවුන්ට ඡන්දය ලබා­දිය යුතුද.

භූම­දා­නය කරන්නේ නැතිව ආදා­හ­නය කිරීම නිසා මුස්ලිම් ජන­තා­වට විශාල හානි­යක් සිදු වණා. කැමති අයට භූම­දා­නය කළ හැකි අතර, කැමති අයට ආදා­හ­නය කිරී­ම­ටත් කැමති අයට තමන්ගේ සිරුර වෛද්‍ය පීඨ­යට ලබා දිය හැකි ආකා­ර­යට අප අලුත් නීති­යක් ගෙන එනවා. අලි සබ්රි ඇමැ­ති­තුමා එය ලබන සතියේ කැබි­නට් මණ්ඩ­ල­යට ඉදි­රි­පත් කර, අප එය ගැසට් කර­නවා. ඇයි සජිත් හෝ අනුර මෙහෙම පන­තක් ගෙනාවේ නැත්තේ. මෙය මුදල් පන­තක් නොවෙයි, ඕනෑම මන්ත්‍රී­ව­ර­ය­කුට ගෙන ආ හැකි පන­තක්. ඒ වගේම මේ තත්ත්ව­යට මුහුණ දුන් පාර්ශ්ව­යන්ට වන්දි ගෙවී­ම­ටද කමි­ටු­වක් පත් කර­නවා. මෙම සිදු­වීම පසු­ගිය ආණ්ඩු සමයේ සිදු වුවත් වත්මන් ආණ්ඩුව ඒ පිළි­බඳ මුස්ලිම් ජන­තා­ව­ගෙන් සමාව ඉල්ලුවා.

අප තව දුර යා යුතුයි. අප මෙම වැඩ කට­යුතු ආරම්භ කළා පම­ණයි. තවත් ඉදි­රි­යට යා යුතුයි. ඒ සඳහා අපට ආධාර අව­ශ්‍යයි. මම ජාත්‍ය­න්තර මූල්‍ය අර­මු­දල සහ රට­වල් 17ක් සමඟ සාකච්ඡා කර ආධාර ලබා­ගෙන තිබෙ­නවා. අපි ජාත්‍ය­න්තර මූල්‍ය අර­මු­දල සමඟ ගිවි­සු­ම­කට එළැඹ තිබෙ­නවා. එම ගිවි­සුම කඩ කළ­හොත් අපට මුදල් ලැබෙන්නේ නැහැ. නමුත් සජිත් කිය­නවා එම ගිවි­සුම වෙනස් කර­නවා කියලා. අනු­රත් කිය­නවා මෙම ගිවි­සුම වෙනස් කර­නවා කියලා. එසේ කළ­හොත් නැවත මේ රටේ ආර්ථි­කය කඩා­වැ­ටෙ­නවා. ගඟට වැටී මැරෙන්න ගිය මිනිහා බේරා­ගෙන ගංඉ­වු­රට ගෙන ආ විට නැවත ගඟට පනි­නවා ද? අපි මේ රට ගොඩ­නැ­ඟිය යුතුයි. තරු­ණ­යන්ට අනා­ග­ත­යක් ගොඩ­නඟා දිය යුතුයි. මෙය ආර­ම්භය පම­ණයි. අප ඉදි­රි­යට යා යුතුයි. ඔබේ අනා­ග­තය ගැන සිතා ගෑස් සිලි­න්ඩ­ර­යට ඡන්දය දෙන්න කියා මම කිය­නවා” යැයි පැව­සීය.

ලංකා සතොස අත්‍ය­වශ්‍ය පාරි­භෝ­ගික භාණ්ඩ මිල තව­දු­ර­ටත් පහළ දමා ඇත.

ඒ අනුව

සුදු සීනි කිලෝ­වක් රුපි­යල් 242ක්

සම්බා සහල් කිලෝ­වක් රුපි­යල් 226ක්

කඩල කිලෝ­වක් රුපි­යල් 439ක් ලෙස මිල සංශෝ­ධ­නය කොට තිබේ.

තවද,

හාල් මැස්සන් ග්‍රෑම් 100ක් රුපි­යල් 92.50,

රතු ලූනු ග්‍රෑම් 100ක් රුපි­යල් 47ක්

වියළි මිරිස් ග්‍රෑම් 100ක් රුපි­යල් 78ක්

මුංඇට ග්‍රෑම් 100ක් රුපි­යල් 89ක්

ග්‍රෑම්155 ටින්මාළු (ආන­ය­නික/දේශීය) රුපි­යල් 270ක්

ග්‍රෑම් 425 ටින්මාළු (දේශීය) රුපි­යල් 450ක් සහ

ග්‍රෑම් 425 ටින්මාළු (ආන­ය­නික) රුපි­යල් 500ක් ලෙස මිල සංශෝ­ධ­නය කර ඇත.

ජාතික ජන බලවේගය රට වෙනස් කිරීමේ කටයුත්ත එළඹෙන සැප්තැම්බර් 22වැනිදා සිට ම ආරම්භ කරන බව අනුර කුමාර දිසානායක  පැවසී ය.

ඔහු මේ බව  පැවසුවේ පසුගිය දා  බණ්ඩාරගම පැවති මහජන රැලිය අමතමිනි.

එහිදී  අනුර කුමාර දිසානායක මෙසේ අදහස් දැක්විය.

රෝහිත මිලියන හතළිහක වත්කම් උපයා ගත්තේ කොහොම ද?

‘‘රට පුරාම මේ ක්‍රමය වෙනස් කිරීමේ වුවමනාවක්, මතයක් වාගේම අරමුණක් තිබෙනවා. මෙතෙක් නොතිබුණු අවස්ථාවක් මේ ක්‍රමය වෙනස් කරන්න උදා වී තිබෙනවා. ඒ සඳහා මෙතෙක් බලා සිටි අයට සැප්තැම්බර් විසි එක්වැනිදා ඒ තීන්දුව ක්‍රියාත්මක කිරීමේ අවස්ථාව ලැබී තිබෙනවා. ජාතික ජන බලවේගය ජයග්‍රහණය කරවා වෙනස් කිරීමේ ආරම්භය ගන්න ඕනෑ. ජාතික ජන බලවේගයේ අපි වෙනස් කිරීම පටන් ගන්න ලෑස්තියි. විසිදෙවෙනිදා ඉඳලා ම අපි ඒ වැඩේට බහිනවා. වංචාවේ, දූෂණයේ ගිලී තිබෙන ආණ්ඩුකරණය වෙනුවට එයින් මුදා ගන්නා ආණ්ඩුකරණයක් ඕනෑ. එය කළ හැක්කේ ජාතික ජන බලවේගයේ ආණ්ඩුවකට විතරමයි. මහජනයාට වඩා උඩින් සඳලුතලයේ ඉන්න දේශපාලනඥයන් සහ පතුලේ ඉන්න ජනතාවක් වෙනුවට හැමෝම සම තත්වයේ හිඳිමින් කටයුතු කෙරෙන වෙනසක් ජාතික ජන බලවේගයෙන් සිදු කරනවා. මේ දක්වා පාලකයාට නීතිය ක්‍රියාත්මක නොවීම නිසා රෝහිත පාර්ලිමේන්තුවේ ඉන්නවා. මිලියන හතළිහක වත්කම් උපයා ගත්තේ කොහොම ද කියලා අල්ලස් කොමිසමෙන් පරීක්‍ෂණයක් පැවැත්වූවා. හරියටම පරීක්‍ෂණය පවත්වන දවසේ නයා කෑවා. සාමාන්‍ය පුරවැසියෙක් මෙහෙම කළා නම්, පොලිසියට නයාවත් ගේන්න කියනවා. පොදු ජනයාටත්, පාලකයාටත් සමාන ලෙස නීතිය ක්‍රියාත්මක කරන රටක් ජාතික ජන බලවේගයෙන් බිහි කරනවා.

දෙදහස් හතළිස් අට වන තුරු රනිල් ඉඳීවි ද...?

පොලිසියේ මහත්වරුන්ටත් තමන්ගේ යුනිෆෝම් එකේ, තමන්ගේ සහ රැකියාවේ ගෞරවය තබාගෙන කිසිම දේශපාලනඥයකුට යටත් නොවී නීතිය සාධාරණව ඉටු කිරීම සඳහා රටක් හදන්න ඕනෑ. ඒ වෙනස කරන්නේ ජාතික ජන බලවේගයේ ආණ්ඩුවකින්. මුළුමනින්ම කඩාවැටී, සාමාන්‍ය පුරවැසියකුට ඉක්මනින්ම තමන්ගේ කටයුතු කරගත නොහැකි මට්ටමේ පවතින රාජ්‍ය යාන්ත්‍රණය ගොඩනගන්නේ ජාතික ජන බලවේගයෙන්. දරුවන්ට අධ්‍යාපනය ලබා දෙන අධ්‍යාපනයත් මුළුමනින්ම වෙනස් කරන්න ඕනෑ. විෂයයන් නවීකරණය කරන්න ඕනෑ. ලෝකයේ අලුත් විද්‍යාව හා තාක්‍ෂණය උරා ගන්නා, දෙමාපියන්ට බරක් නොවන අධ්‍යාපනයක් අපි හඳුන්වා දෙනවා. ඒ අධ්‍යාපනය ලබා දීම රජයේ වගකීමක්. ක්‍රමානුකූලව මෙම කටයුතු සිදු කරන තෙක් ජනතාව ජීවත් කරවන්න ඕනෑ. රනිල් වික්‍රමසිංහ කියන්නේ දෙදහස් හතළිස් අටේ දී එයා රට හදන තෙක් ඉවසන්න කියලයි. මරු මෑන්... දෙදහස් හතළිස් අට වෙන කොට එයාට අවුරුදු අනූනවයයි. එයා දෙදහස් තිහේ දී රට හදන බව කීවේ නැහැ. එහෙම කීවා නම්, මාධ්‍යවේදියො ප්‍රශ්න කරයි. නමුත්, දෙදහස් හතළිස් අට වන තුරු එයාවත් ඉඳී ද? අපි පියවරෙන් පියවර රට ඉදිරියට ගෙන යන අතර, දිළිඳු ජනතාව ආණ්ඩුව විසින් බලා ගන්නවා. ආහාර, සෞඛ්‍යය, අධ්‍යාපනය ලබාගත නොහැකි පුරවැසියන්ට මාසයකට රුපියල් 10,000කට වැඩි දීමනාවක් ලබා දෙන්න අපි තීරණය කර තිබෙනවා. මේ ආධාරය ලබා දෙන්නේ ජීවිතාන්තය දක්වා නොවෙයි. රට ගොඩනගමින්, ප්‍රතිලාභ ලැබෙන තුරු සෞඛ්‍යාරක්‍ෂිතව, දරුවාට අධ්‍යාපනය ලබා දෙමින් ජීවත් වෙන්නයි.

සෞඛ්‍යය සහ අධ්‍යාපනය සම්බන්ධ බදු ඉවත් කරනවා

රැකියාවක් කරන කෙනාටත් බඩු මිල, සෞඛ්‍ය වියදම් වාගේම දරුවන්ගේ අධ්‍යාපන වියදම් දරා ගන්න බැහැ. ඒ නිසා ආහාර, සෞඛ්‍යය සහ අධ්‍යාපනය සම්බන්ධ බදු ජාතික ජන බලවේගයේ පාලනයක් යටතේ මුළුමනින්ම ඉවත් කරනවා. ජාතික ජන බලවේගයට ඒ වෙනුවෙන් සල්ලි කොහෙන් ද කියලා කට්ටියක් අහනවා. රනිල් වික්‍රමසිංහ අද කියලා තියෙනවා හෙක්ටයාර් එකකට රුපියල් පහළොස් දහස බැගින් පොහොර සහනාධාරයක් දෙනවාලු. අවුරුද්දකට දළ වශයෙන් හෙක්ටයාර් ලක්‍ෂ දාහතරක් වගා කරනවා. ආසන්න වශයෙන් රුපියල් මිලියන විසි දෙදහසක් විතර අවශ්‍ය වෙනවා. ඒ වාගේම ලබන ජනවාරියේ සිට රාජ්‍ය සේවකයන්ට රුපියල් විසිපන් දහස ගාණේ වැඩි කරනවාලු. ආසන්න වශයෙන් අවුරුද්දකට රුපියල් කෝටි හතළිස් දහසක් විතර ඕනෑ වෙනවා. ඒ ගැන ප්‍රශ්න නොකරන අය ජාතික ජන බලවේගයෙන් දිළිඳු ජනතාවට ලබා දෙන සහනාධාර ගැන ප්‍රශ්න කරනවා. අපි ඒ සහනාධාර ලබා දෙන්නේ හොඳින් තෝරා බලා සකස් කර ගත් නිර්ණායක අනුව අවශ්‍යම ජනතාවට. එක කන්නයක් පොහොර සහනාධාරය ලබා දෙයි. ඔය කියන පඩි වැඩි වීම කරන්නේ නැහැ. එයා ජනවාරි වෙන කොට ගෙදර බව දන්නවා.

ජාතික ජන බලවේගය රට ගොඩනගමින් යන අතර, ජනතාව රැකබලා ගැනීම ගැන වැඩපිළිවෙළක් ක්‍රියාත්මක කරනවා. ඒ වෙනුවෙන් මේ වන විටත් අය කර ගත හැකිව තිබෙන නමුත්, අය කරගෙන නොමැති බදු රුපියල් කෝටි එක් ලක්ෂ දසදහසක් තිබෙනවා. ජනතාවගෙන් අය කර ගත් සමහර බදු වර්ග ඒ ජාවාරම්කාරයන් ආණ්ඩුවට ගෙවා නැහැ. ආණ්ඩුවට සම්බන්ධ අයගේ අරක්කු පැක්ටරි තුනකින් විතරක් රුපියල් කෝටි හයසිය ගණනක් එකතු කර ගන්න තිබෙනවා. ජොන්ස්ටන් ප්‍රනාන්දු, අර්ජුන් ඇලෝසියස්, සජිත් ප්‍රේමදාසගේ වේදිකාවට නැග්ග ලක්‍ෂ්මන් වසන්ත පෙරේරා මේ විදියට බදු පොලු තියලා තිබෙනවා.

කාට සල්ලි සොයාගන්න බැරි වුනත් අපිට පුළුවන්

ජනාධිපතිවරු, ඇමැතිවරු නඩත්තු කරන්න මහජනතාවගේ ධනයෙන් කොච්චර වියදමක් දරනවා ද? අවුරුද්දක දී විදේශගත වෙන්න අවශ්‍ය මුදල් තක්සේරු කරලා වෙන් කරනවා. නමුත්, රනිල් වික්‍රමසිංහට අවුරුද්දට ම වෙන් කළ මුදල් මාස කිහිපයක දී ඉවර කරලා. ඒ ගොල්ලන්ගේ දේශපාලනය කරන්න මහජනයාගේ ධනය වියදම් කරනවා. මේ විදියට වෙන් කර ගත් සල්ලි මදි වෙලා අලුතින් ලක්‍ෂ දෙදාහක් රට යන්න විතරක් වෙන් කර ගත්තා. ජාතික ජන බලවේගයේ ආණ්ඩුවක් යටතේ මේ නාස්තිය නතර වෙනවා. ඇමැතිවරුන්ට නිවාස, ලයිට් බිල්, වතුර බිල්, වාහන හත අටක්, ඉන්ධන, ටෙලිෆෝන් බිල් ගෙවන්නෙත් මහජනතාව. කෙහෙළිය රඹුක්වැල්ලගේ ගෙදරට එක්ලක්ෂ විසි එක්දහසක මාසික ලයිට් බිලක් ආවා. භාණ්ඩාගාරයට ලැබෙන සල්ලි හොරකම් කරනවා විතරක් නොවෙයි, අත දිගහැර නාස්ති කරනවා. ජාතික ජන බලවේගයේ ආණ්ඩුවක් යටතේ හොරකම නතර කර වංචාව දූෂණය නතර කර අය කරගත යුතු බදු අය කරගෙන අත්‍යවශ්‍ය කටයුතුවලට යොදවනවා. ඒ නිසා කාට සල්ලි හොයා ගන්න අමාරු වුණත්, ජනතාවට ලබා දිය යුතු සහන ලබා දීම වෙනුවෙන් ජාතික ජන බලවේගයේ ආණ්ඩුවකට සල්ලි හොයා ගන්න වැඩපිළිවෙළක් තිබෙනවා.

මෘදුකාංග ඉංජිනේරුවරුන් ලක්ෂ දෙකක් බිහි කරනවා

පියවරෙන් පියවර රට ගොඩනඟන අතර, එක දරුවකුවත් අධ්‍යාපනයෙන් පිටමං වී පාරට වැටෙන්න ඉඩ දෙන්නේ නැහැ. දුප්පත්භාවයෙන් මිදෙන්න තිබෙන ප්‍රධාන අවස්ථාව අධ්‍යාපනයයි. අපේ සැලැසුම්වල වැඩිම අවධානය යොමු කර තිබෙන්නේ නැණවත්, ගුණවත්, නිරෝගීසම්පන්න දරු පරම්පරාවක් ගොඩනැඟීමේ අධ්‍යාපනය වෙනුවෙන්. ලෝකයේ වටිනාම සම්පත් හැටියට වෙනත් භෞතික දේවල් හඳුනාගෙන තිබුණත්, අද වෙන කොට දැනුම මූලිකම සම්පතක් හැටියට ඉදිරියට පැමිණ තිබෙනවා. අපේ තරුණ, තරුණියන් මෘදුකාංග ඉංජිනේරුවරුන් හැටියට අඩුම තරමින්, ලක්‍ෂ දෙකක්වත් බිහි කරන්න සැලැසුම් සකස් කර තිබෙනවා. ඒ වාගේම ඉදිරි කාලයේ දී ක්‍රියාත්මක කරන සමස්ත වැඩපිළිවෙළක් අපි සකස් කර තිබෙනවා. ලබන විසි එක්වන දින පැවැත්වෙන ජනාධිපතිවරණය කියන්නේ ඒ සැලැස්ම ක්‍රියාත්මක කරන්න ඔබ අපට බලය ලබා දෙන දවසයි. ඒ නිසා ඉදිරි ටික දින තුළ අපි හැම දෙනාම ඉතා හොඳින් සැලැසුම් කරලා තවත් අය හමු වී දැනුවත් කර ගමේ ඡන්ද පෙට්ටියේ වැඩිම ඡන්ද ප්‍රමාණය මාලිමාවට ලබා දෙන්න ක්‍රියා කරන්න. ඒ වෙනුවෙන් අපි හැම දෙනාම ක්‍රියා කර රට ගොඩනැගීමට එකතු වෙමු කියලා ආරාධනා කරනවා.’’

අන්තර්ජාල සේවාව හරහා දුම්රිය ප්‍රවේශ පත් තම ජංගම දුරකතනයෙන් වෙන් කර ගැනීමේ පහසුකම්  ක්‍රියාත්මක බව දුම්රිය දෙපාර්තමේන්තුව පවසයි.

අද (අගෝ. 23) සිට www.pravesha.lk වෙබ් අඩවිය මගින් මගී ජනතාවට ඩිජිටල් දුම්රිය ප්‍රවේශ පත්‍රයක් මිල දී ගැනීමට හැකි ය.

අග්‍රාමාත්‍ය ලේකම් අනුර දිසානායකගේ ප්‍රධානත්වයෙන් සහ ප්‍රවාහන හා මහාමාර්ග අමාත්‍යංශයේ ලේකම් රංජිත් ගංගනාත් රූබසිංහගේ සහභාගීත්වයෙන් ඊයේ (අගෝ. 22) පෙරවරුවේ නෙළුම් කුළුණ පරිශ්‍රයේදී මෙම එළි දැක්වීම සිදු කර ඇත.

දැනට දුම්රිය ධාවනය වන ඕනෑම දුම්රිය ස්ථාන දෙකක් අතර ගමන් කිරීමට අවශ්‍ය 2 වන හා 3 වන පන්තියේ ප්‍රවේශ පත්‍ර බැංකු මගින් නිකුත් කරනු ලබන ඩෙබිට් හෝ ක්‍රෙඩිට් කාඩ්පතක් මගින් මුදල් ගෙවා මිල දී ගත හැකි වන අතර මුදල් ගෙවූ පසු කෙටි පණිවිඩයක් මගින් හෝ ඊමේල් පණිවිඩයකින් මුදල් ගෙවන්නාගේ ජංගම දුරකතනය වෙත ප්‍රවේශපතේ QR කේතය ලබා ගත හැකි ය.

එම QR කේතයට අදාළව දුම්රිය ස්ථානයෙන් පරීක්ෂා කර ප්‍රවේශ පත්‍රයේ සදහන් ගමන් කරන දිනය තුළ දී පමණක් දුම්රියේ ගමන් කිරීමට අවස්ථාව හිමි වේ.

ගමන් කිරීමට අපේක්ෂා කරන දිනට දින හතකට පෙර සිට මෙම වෙබ් අඩවිය ඔස්සේ ඩිජිටල් ප්‍රවේශපත්‍ර ලබා ගත හැකි ය.

ජනාධිපතිවරණය සඳහා ඉදිරිපත්ව සිටින අපේක්ෂකයෙක් මේ වනවිට අභාවප්‍රත්ත වී සිටින අවස්ථාවක ඔහු වෙනුවෙන් වෙනත් අයෙකු එම දේශපාලන පක්ෂයෙන් හෝ කණ්ඩායමෙන් එම ලකුණ යටතේ නම් කිරීමට අවස්ථාව පවතින බවද කොමසාරිස් ජෙනරාල්වරයා  පැවසීය.

ඔහු මේ බව සඳහන් කළේ, අද (23) පෙරවරුවේ මාධ්‍ය වෙත අදහස් දක්වමින්ය. 

එහිදී ඒ පිළිබද තවදුරටත් අදහස් දක්වමින් ඔහු මෙසේද පැවසීය.

තවද, වෙනත් අපේක්ෂකයෙක් නම් කළත් ඡන්ද පත්‍රිකාවේ වෙනසක් සිදුනොවන බවද ඔහු මෙහිදී සඳහන් කළේය.

අලුතින් නම්කරන අපේක්ෂකයාට තරග කිරීමට සිදුවන්නේ පෙර අපේක්ෂකයාගේ (අභාවප්‍රාප්ත වූ අපේක්ෂකයා) නමින් බව කොමසාරිස් ජෙනරාල්වරයා වැඩිදුරටත් පැවසීය.

එළඹෙන ජනාධිපතිවරණය සඳහා ඉදිරිපත්ව සිටින අපේක්ෂකයින් අතුරින් එක් අපේක්ෂකයෙකුට 50% ට වැඩි බහුතරය ලබාගැනීමට නොහැකි අවස්ථාවක දෙවැනි මනාපය ගණන් කිරීමට සිදුවන බව මැතිවරණ කොමසාරිස් ජෙනරාල් සමන් ශ්‍රී රත්නායක වැඩිදුරටත්  පැවසීය.

ජල ගාස්තු සංශෝධනයට අදාළව අති විශේෂ ගැසට් නිවේදනය නිකුත් කර තිබේ.

අගෝස්තු 21 වන දා සිට බලාත්මක වන පරිදි ජලසම්පාදන සහ වතු යටිතල පහසුකම් සංවර්ධන අමාත්‍ය ජීවන් තොණ්ඩමන්ගේ අත්සනින් යුතුව මෙම අති විශේෂ ගැසට් නිවේදනය නිකුත් කර ඇත.

මිල සූත්‍රය මත පදනම්ව ගෘහස්ථ ජල පාරිභෝගිකයින්ගේ ජල ගාස්තු 7% කින්ද, රජයේ රෝහල්වල 4.5% කින්ද, පන්සල් සහ ආගමික ස්ථානවල 6.3% කින් ද අඩු කිරීමට කැබිනට් අනුමැතිය හිමි විය.

එම ගැසට් නිවේදනය පහතින් දැක්වේ.

අපේ රටේ මෙතෙක් කල් ආණ්ඩු හැදුණේ අනෙකාට විරුද්ධව බවත්, එබැවින් ලංකාවේ පළමු වතාවට: සිංහල, දෙමළ, මුස්ලිම් ජනතාවගේ සමගි සම්පන්න ආණ්ඩුවක් නිර්මාණය කරන බවත් අනුර කුමාර දිසානායක (AKD) පැවසී ය.

හෙතෙම මෙලෙස පැවසුවේ පසුගිය 21වන දින අකුරණ පැවති මහජන රැලියේ දී ය.

මතු දැක්වෙන්නේ එම රැලියේ දී අනුර කුමාර දිසානායක කළ සම්පූර්ණ කතාව ය.

ජාතික සමගිය ගොඩනැගීමේ ආරම්භය

 ‘‘අපි මෙච්චර කාලයක් උතුරට එරෙහි දකුණේ ආණ්ඩු, මුස්ලිම් ජනයාට එරෙහි ආණ්ඩු ලෙස ආණ්ඩු හැදුවා. දෙදහස් දහනමය මැතිවරණ ව්‍යාපාරය දියත් වුණේ මුස්ලිම් ජනයාට එරෙහිවයි. මහනුවර දිස්ත්‍රික්කයේ කවර පක්ෂයක් පාර්ලිමේන්තු මැතිවරණයට අපේක්ෂක ලැයිස්තුවක් ඉදිරිපත් කළත් අකුරණ, හාරිස්පත්තුව, මහනුවර ප්‍රදේශ නියෝජනය කරමින් මුස්ලිම් අපේක්ෂකයන් ඉදිරිපත් කරනවා.

ගිය සැරේ පොහොට්ටුවේ අපේක්ෂක ලැයිස්තුවේ මුස්ලිම් අපේක්ෂකයන් හිටියේ නැහැ. මුස්ලිම් ජනතාවට එරෙහිව ඔවුන් ඡන්ද ව්‍යාපාරය දියත් කළා. කළුතර හා කොළඹ ලැයිස්තුවලත් නැහැ. ඔවුන් ඡන්ද ව්‍යාපාර දියත් කළේ අනෙකාට එරෙහිවයි. අනෙකාට එරෙහිව ආණ්ඩු හදලා රටේ සමගිය හදන්න බැහැ. මේ හැමෝගෙම බහුතරය දිනාගත් ආණ්ඩුවක් හදන්න ඕනෑ. මේ හැමෝම සහයෝගය දෙනවා නම් එතන තමයි ජාතික සමගිය ගොඩනැගීමේ ආරම්භය.

ආණ්ඩුවෙන් නඩත්තු වෙන එජාපය

අපේ මැතිවරණ ව්‍යාපාරය ආරම්භ කරලා, ගම්මාන මට්ටමෙන් සංවිධාන යාන්ත්‍රණය එළලා, සමාජයේ විවිධ කණ්ඩායම් බලවේග විදිහට පෙළගස්වලා, ශක්තිමත් මැතිවරණ ව්‍යාපාරයක් දියත් කර තිබෙනවා. මේ ජනාධිපතිවරණයේ දී ශක්තිමත්ව, ක්‍රමවත්ව, පිළිවෙළකට මැතිවරණ ව්‍යාපාරය දියත් කර තිබෙන්නේ ජාතික ජන බලවේගයේ අපියි. ජනතාවට තීන්දු ගන්න නම් මේ මැතිවරණ ව්‍යාපාරය දෙස බැලුවත් ඇති. මැතිවරණ ව්‍යාපාරය ආරම්භ කරාට පස්සෙ මේ වෙනකම් රනිල් පවත්වලා තිබෙන්නේ එක රැස්වීමයි. ඒකත් රටෙන් ම ඇදලා. ජනතාව ආමන්ත්‍රණය කිරීමක් ඔහුගේ මැතිවරණ ව්‍යාපාරයේ නැහැ.

රනිල්ගේ මැතිවරණ ව්‍යාපාරය තුළ සම්පූර්ණයෙන්ම රාජ්‍ය දේපළ, රාජ්‍ය මුදල් මුළුමනින් ම මැතිවරණ ව්‍යාපාරයට යොදවනවා. මුළු එක්සත් ජාතික පක් ෂයම නඩත්තු වෙන්නේ ආණ්ඩුවෙන්. රනිල් ආණ්ඩුවෙන් නඩත්තු වුණාට කමක් නැහැ. හැබැයි ජනාධිපති උපදේශක සාගල, පක්ෂයේ නියෝජ්‍ය නායක රුවන් විජේවර්ධන, ජනාධිපති උපදේශකයෙක් වන අකිල විරාජ් ඇතුළු මේ සියලු දෙනාට ආණ්ඩුවෙන් පඩි, වාහන, තෙල්, ආරක්ෂාව ඔක්කෝම ආණ්ඩුවෙන්. ජාතික සංවිධායක, සබරගමුවේ සංවිධායක, නවීන් දිසානායක, ආණ්ඩුවෙන් ගෙවල්, පඩි, වාහන, තෙල්, සල්ලි. ආශු මාරසිංහ තවත් ජනාධිපති උපදේශක කෙනෙක්. ආණ්ඩුවෙන් පඩි, වාහන, තෙල්, ආරක්ෂාව. හරීන් ප්‍රනන්දු, මනුෂ නානායක්කාර දෙන්නා අමාත්‍ය ධුර හෙබවූයේ ආණ්ඩුවේ වාහන, සල්ලි, තෙල්, ආරක්ෂාව, ඇතිව. ආණ්ඩුවේ සල්ලිවලින් සංගීත සංදර්ශන තියනවා, විදේශ සේවා නියුක්ති කාර්යාංශය ගිහින් තරුණ තරුණියන් එකතු කරනවා. නඩු තීන්දුවකින් මන්ත්‍රීකම නැතිවුණා. ඒ එක්කම ඇමතිකමත් නැති වුණා. මනුෂ නානායක්කාර, හරීන් ප්‍රනාන්දු දැන් ජනාධිපති උපදේශකවරුන්. මේ තරම් උපදේශකවරු ඉන්නෙ රනිල් මෝඩයෙක්ද? මේ කරන්නේ ආණ්ඩුවේ මුදල් වියදම් කිරීම සඳහා උපදේශක තනතුරු දීමක්.

සජබයට ගිය උස මෑන්

ඒ විතරක් නොවෙයි. ජනාධිපති ඡන්දෙට තව දවස් 30යි. ඒ කාලෙටත් ඇමතිකම් දෙකක් දෙනවා. සුරේෂ් වඩිවෙල්ට, අලි සහීබ් මවුලානාට රාජ්‍ය ඇමතිකම් දෙනවා. මේ මොකටද, ආණ්ඩුවෙන් වාහන, තෙල්, පඩි, ලැබෙනවා, ඒ වගේම ඡන්දෙට ආණ්ඩුවේ ව්‍යාපෘති කරන්න පුළුවන්. රනිල් වික්‍රමසිංහ කියනවා පොලිස්පති පත්කරන්න බැහැ. එම පත්කිරීම මැතිවරණ කාලේ වැරදියි කියලා. හැබැයි මව්ලානා, සුරේෂ වඩිවේල් පත් කරන්න පුළුවන්. මනුෂ නානායක්කාර, හරීන් ප්‍රනාන්දු උපදේශකවරුන් ලෙස පත් කරන්න පුළුවන්. රනිල් වික්‍රමසිංහගේ මුළු කැම්පේන් එක තිබෙන්නේ ආණ්ඩුවේ සල්ලි, වාහන, තෙල්, ආරක්ෂාව මත. ඡන්දයකදි අපේක්ෂකයන්ට සමාන ලෙස තරග වදින්න ඉඩ තියෙන්න ඕනෑ. රනිල් වික්‍රමසිංහ තරග වදින්නේ ආණ්ඩුවේ භාණ්ගාරයේ සල්ලිවලින්. අපි තරග වදින්නේ ජාතික ජන බලවේගයෙන්.

සජිත් ප්‍රේමදාසගේ මැතිවරණ ව්‍යාපාරයේ එක පැත්තකින් අවලාද. අනෙක් පැත්තෙන් ෆොටෝ එකක්. ඡායාරූපයක් ගන්නවා, වීඩියෝ කරනවා, බ්රේකින් නිව්ස් එකක් ගහනවා. එක උස මෑන් කෙනෙක් හැමතැනටම ගිහින් යන්න තැනක් නැතිව අවසානේ සජබයට ගියා. නගර සභාවේ කුණු ලොරියට ගියා. කිසි මතයක්, ප්‍රතිපත්තියක් තිබෙන කඳවුරක් නොවෙයි. ක්‍රිකට් බෝඩ් එකට සූදුව ගෙනාවේ, ක්‍රිකට් බෝඩ් එකේ සල්ලි විනාශ කළේ, ෂම්මි සිල්වලා පස්සේ ඉන්න තිලංග සුමතිපාල කියලා කෑ ගැහුවා. ක්‍රිකට් බෝඩ් ඒකෙ ආරක්ෂකයා අර්ජුන රණතුංග කිවුවා. ඒ තිලංගයි, අර්ජුනයි දෙන්නා ම සජිත්ලා ගාව. ක්‍රිකට් බෝඩ් එක විනාශ කළ කෙනයි, එය ආරක්ෂා කරනවා කියන කෙනයි දෙන්නා ම එකම තැනක. මේ දේශපාලනය මොකක්ද? ඒගොල්ලන්ට තිබෙන්නේ එහෙන් මෙහෙන් කට්ටිය එකතු කරන දේශපාලනය විතරයි. ඔය ගොඩක් අය සජිත් ළඟට යන්න කලින් අපේ දොරටත් තට්ටු කරා. අපට එහෙම ඕන නැහැ. අපට තිබෙන්නේ ප්‍රතිපත්තිගරුක දේශපාලනයක්. අපේ මේ වේදිකාවේ ඉන්න හැමදෙනාම යම් ප්‍රතිපත්තියකට එකඟ වූ, අවංක, අදූෂිත අය. ඒ වගේම මේ රටත්, ජාතියටත් අසීමිත ලෙස ආදරය කරන අය.

සිර බත් කෑ තිස්ස අත්තනායක

ඒ ගොල්ලන්ගේ වේදිකාවේ ඉන්නේ කොහොම හරි ඇමතිකමක් ගන්න බලාගෙන ඉන්න අය. තිස්ස අත්තනායක පසුගිය දා ප්‍රකාශයක් කරනවා, ‘නුවර පෙරහැර නතර කරනවා’ කියලා හරිනි සහෝදරිය කිවුවා කියලා. තිස්ස කියන්නේ දෙදහස් පහළවේ මෛත්‍රීගෙ පිලයි, සම්බන්ධන්ලාගේ පිලයි රට බෙදන්න ගිවිසුමක් ගහලා කියලා කූට ලේඛන හදලා හිරේ ගියපු කෙනා. ඒකට තිස්ස අත්තනායක සමාව ගත්තේ නැත්නම් ආපහු තිස්ස අත්තනායක හමුවෙන්නේ අධිකරණයේ දී. මේ බොරු, අසත්‍ය අවලාද ගහන්න අපි ඉඩ දෙන්නේ නැහැ.

චරිත හේරත් කුරුණෑගල ගිහින් කියනවා අපි ආවහම ඇත්කඳ විහාරයේ පෙරහැර නතර කරනවාලු. මීට සති දෙක තුනකට පෙර චරිත හේරත් අපිට කොළ එළිය දමමින් හිටියා. අපි ගත්තේ නැහැ. මේවා කියන්නේ ඒ ගොල්ලන්ගේ ක්‍රියාව වෙලා තිබෙන්නේ අවලාද නිසා. දැන් රාවුෆ් හකීම් මුස්ලිම් ජනතාව කේන්ද්‍ර කරගෙන අවලාද පටන්ගෙන තිබෙනවා. අපි කිව්වාලු ‘සහරාන්ලා, ත්‍රස්තවාදීන් බිහි වෙන්නේ මුස්ලිම් අම්මාගේ ගර්භාෂයෙන්’ කියලා. වට්ස්ඇප්වල යනවා; හකීම් තැන තැන කියමින් යනවා. සහරාන්ගේ සිද්ධිය සිදුවුණාට පස්සේ පාර්ලිමේන්තුවේ මම කළ කතාවක් තිබෙනවා. ඒක බලන්න මම කිව්වේ මොකක්ද කියලා. මම කිවුවා ‘මේ ත්‍රස්තවාදය, සිංහල, දෙමළ, මුස්ලිම් ප්‍රචණ්ඩ ක්‍රියා, ත්‍රස්තවාදී ගැටුම්, ඇති වන්නේ අන්තවාදීන්ගේ ගර්භාෂයෙන්’ කියලා. හකීම්ට සමහර විට මම කිවුව වචනය තේරුණේ නැද්ද දන්නේ නැහැ.

ඇමතිවරයෙක් යනු කවුද...?

දිගනට, අලුත්ගමට පහර දෙන්නේ පොදු සිංහල ජනයා නොවෙයි. අන්තවාදී, සිංහල ජාතිවාදී ගර්භාෂය තුළ ගොඩනැගුණු ප්‍රචණ්ඩත්වය. ප්‍රභාකරන්ලා බිහි වෙන්නේ දෙමළ ජාතිවාදී ගර්භාෂයේ. සහරාන්ලා බිහි වුණෙත් මුස්ලිම් අන්තවාදී ගර්භාෂයේ. ජාතික ජන බලවේගයේ අපි මොනතරම් අසීරු අවස්ථාවලදිවත් ජාතිවාදයට නොවැටුණු අයයි. මේ රට පත්වෙලා තිබෙන විපත්තියේ: සිංහල, දෙමළ, මුස්ලිම් අපි ඔක්කෝම වින්දිතයන් වෙලා තියෙනවා.

ඒ නිසා අපේ ඔක්කෝගෙම වගකීමක් තමයි මේ විපත්තියෙන් මේ රට මුදා ගැනීම. ඒ මුදා ගැනීම සඳහා තිබෙන ආරම්භක අවස්ථාව තමයි සැප්තැම්බර් විසි එක ජාතික ජන බලවේගය අතට දේශපාලන බලය මාරු කර ගැනීම. අපි පළමුවෙන්ම දේශපාලකයා ආදර්ශය දෙන්න පටන් ගන්නවා. ඇමතිවරයා මහජනයාගේ සේවකයෙක් කියන සංකල්පයට අපේ රටේ දේශපාලනය පරිවර්තනය කරනවා. අපි දිනලා ජයග්‍රහණය සැමරීමේ ආදර්ශයත් මේ රටට දෙමු. පියවරෙන් පියවර මේ රට හදන්න පටන් ගනිමු.

අපි ජනතාවට දෙන ආදර්ශ

පළමුව ජාතික සමගිය ගොඩනගන්න ඕනෑ. අපි අලුත් ව්‍යවස්ථාවක් සම්මත කර ගන්නවා. කතා කරන භාෂාවේ අයිතිය, අදහන ආගමේ අයිතිය, අනුගමනය කරන සංස්කෘතියේ අයිතිය පිළිගන්නා රාජ්‍යයක් බවට පරිවර්තනය කරනවා. හැමෝටම සමානව සලකන ආණ්ඩුව බවට පත් කරනවා. ආණ්ඩුවට ධනය එන්නේ කොහොමද? එළියේ කර්මාන්තකරුවා, ව්‍යාපාරිකයා, ධීවර කර්මාන්තයේ ඉන්න ව්‍යවසායකයා, කෘෂිකර්මාන්තයේ ඉන්න ගොවියා රටට ධනය උත්පාදනය කරනවා. ඒ ගොල්ලන් උපයන ධනයෙන් බද්දක් ලෙස යම් ප්‍රමාණයක් ආණ්ඩුවට අරගන්නවා. භාණ්ඩාගාරයට සල්ලි වැඩි කර ගන්න නම්, තව තවත් කර්මාන්ත, ව්‍යාපාර, ඇති කරන්න ඕනෑ. ධීවරයා මත්ස්‍ය අස්වැන්න වැඩි කරන්න ඕනෑ. එතකොට රටේ ධනය වැඩි වෙනවා. භාණ්ඩාගාරයටත් ධනය එකතු වෙනවා. රට පොහොසත් වෙනවා, ආණ්ඩුවත් පොහොසත් වෙනවා. එතකොට අධ්‍යාපනය සඳහා, සෞඛ්‍යය සඳහා සල්ලි ආණ්ඩුවෙන් වැඩිපුර ගලාගෙන එනවා. ජාතික ජන බලවේගයේ ආණ්ඩුවේ වැඩේ තමයි, ව්‍යවසායකයාට, කර්මාන්තකරුවාට සහාය දීලා ඒ අයගේ ධනය වැඩි කිරීම. ඒ වගේම අලුත් ව්‍යාපාරිකයන් හදන්න ඕනෑ. එතකොට තමයි භාණ්ඩාගාරයට වැඩිපුර සල්ලි එන්නේ.

ඇප රහිත ණය මුදලක්

අපි ආරම්භ කරනවා අලුත් සංවර්ධන බැංකුවක්. ඕනෑම තරුණයෙකුට පුළුවන් තමන් ආරම්භ කරන ව්‍යාපාරය පිළිබඳව ව්‍යාපෘති වාර්තාවක් දෙන්න. ඒ ව්‍යාපෘති වාර්තාව සැලකිල්ලට භාජනය කරලා, ශක්‍යතාවයෙන් යුතු ව්‍යාපෘතියක් නම්, ආණ්ඩුව බැංකුවට ගැරන්ටියක් දෙනවා. එවිට තරුණයාට සල්ලි ලැබෙනවා. ප්‍රාදේශීය ලේකම් කාර්යාලයේ ව්‍යාපෘති නිලධාරියා අදියරෙන් අදියර මේ ගැන සොයා බලනවා. ඒ තුළ අලුත් කර්මාන්තකරුවෙක් හැදෙනවා. ජාතික ජන බලවේගයේ සංවර්ධන බැංකුවේ සංකල්පය ඒක. අපි දෙන්නේ ඇප රහිත ණය මුදලක්. අලුත් කර්මාන්තකරුවන්, අලුත් ව්‍යවසායකයන් බිහිකරන්න ආණ්ඩුව අතහිත දෙනවා.

අපි ලෝකයේ ආර්ථිකය සොයා යන්න ඕනෑ. අප්‍රිකානු කලාපයේ දැවැන්ත ව්‍යාපාර කරන ශ්‍රී ලාංකිකයන් ඉන්නවා. අප්‍රිකානු කලාපයේ විශාල අවස්ථාවන් තිබෙනවා. නමුත් තානාපති කාර්යාලයක් නැහැ. අපි ඉතා ඉක්මනින් තානාපති කාර්යාල අරිනවා. අලුත් වෙළඳපොළ හොයන්න හොඳ තරුණ කණ්ඩායමක් යවනවා. ඒ අවස්ථාවන් සොයා ඒ සඳහා රජය මැදිහත් වෙනවා. අපි සියලු දෙනා එකතු වෙලා, සිංහල, දෙමළ, මුස්ලිම් ජනතාව එකතු වෙලා, විශ්වාසය තිබෙන ආණ්ඩුවක්, විශ්වාසය තිබෙන පාලනයක් ගොඩනගමු. ඒ වෙනුවෙන් සැප්තැම්බර් මාසේ විසි එක්වෙනිදා ජාතික ජන බලවේගය ජයග්‍රහණය කරවන්න වැඩ කරන්න; මැදිහත් වෙන්න; එකතු වෙන්න.’’

(සටහන - ජයසිරි අලවත්ත)

ස්වාධීන ජනාධිපති ධූර අපේක්ෂකයෙකු ලෙස නාමයෝජනා ලබාදුන් අපේක්ෂකයෙකු වන අයිදුරුස් මුහම්මද් ඉල්යාස් අභාවප්‍රාප්ත වී තිබේ.

ඔහු මිය යන විට 79 වන වියේ පසු විය.

හදිසියේ ඇතිවූ රෝගී තත්ත්වයක් හේතුවෙන් පුත්තලම මූලික රෝහලේ ප්‍රතිකාර ලබමින් සිටියදී ඔහු මිය ගොස් තිබේ.

චන්ද්‍රිකා බණ්ඩාරණායක කුමාරතුංග රජය සමයේ යාපනය දිස්ත්‍රික්කය නියෝජනය කරමින් පාර්ලිමේන්තු මන්ත්‍රිවරයෙකු ලෙසද ඔහු කටයුතු කර තිබුණි.

ශ්‍රී ලංකාව ශීත සෘතුමය සංචාරක ගමනාන්තයක සිට වසර පුරා සංචාරක ගමනාන්තයක් සහිත රටක් ලෙස පත් කරන බව ස.ජ.බ ප්‍රතිපත්ති සම්පාදක මණ්ඩලයේ ප්‍රධානියා ද වන පාර්ලිමේන්තු මන්ත්‍රී ඉරාන් වික්‍රමරත්න ප්‍රකාශ කළේය.

ඔහු මෙම ප්‍රකාශය කළේ සමගි ජන බලවේගයේ ප්‍රතිපත්ති සහ ඒවා ක්‍රියාත්මක කිරීමේ ක්‍රියාකාරී සැලස්ම පිළිබඳව  කොළඹ පැවති තරුණ වෘත්තියවේදීන්ගේ සංවිධානයේ සම්මේලනයේ දි ය.

මේ සඳහා සියයකට අධික රටවල සංචාරකයන්ට වීසා අවශ්‍ය නොමැති නම්‍යශීලී ක්‍රමයක් බවත් එය සජිත් ප්‍රේමදාස ජනාධිපතිවරණයෙන් ජයග්‍රහණය කර ආණ්ඩුවක් පිහිටවූ වහාම ක්‍රියාත්මක කරන බව ද ඔහු පැවසී ය.

එහි දී වැඩි දුරටත් කරුණු දැක්වූ ඉරාන් වික්‍රමරත්න...

 ස.ජ.බ රජයක ක්‍රියාකාරි සැලැස්ම

‘‘පුරාණ සංස්කෘතික නගර, වනජීවී, උත්සව ආදී සෑම කාල වකවානුවකම පවතින ආකර්ෂණීය ස්ථාන ප්‍රදර්ශනය කිරීමේ සුවිශේෂී වෙළඳපළ ප්‍රදර්ශණ ක්‍රියාකාරකම් ඇතුළත් ප්‍රචාරණයක් සිදු කරනවා. අපට ඇති සාම්ප්‍රදායික සංචාරක ව්‍යාපාරය වන්නේ ශීත ඍතුවේ දී සංචාරකයින් පැමිණීම යි. අපගේ අරමුණ වෙනස් කිරීමයි.

මැතිවරණ ජය ගැනීමට එහා ගිය පිරිසිදු රාජ්‍ය පාලනයක් සඳහා රටේ පාලන තන්ත්‍රයට ඇතුළත්වන විවිධ කරුණු ක්ෂේත්‍ර විසි හතකට බෙලා එක් එක් ක්ෂේත්‍ර සඳහා වසර දෙකක් තිස්සේ විද්වතුන් සහ වෘත්තිකයන් සමඟ සාකච්ඡා කර ප්‍රතිපත්ති සම්පාදනය කරනවා. ස.ජ.බ රජයක පළමු දින සිට ක්‍රියාවට නැංවීමට අවශ්‍ය ක්‍රියාකාරී සැලස්ම ද මේ වෙද්දි සම්පාදනය කර අවසන්.

අපි අනුගමනය කරන්නේ සමාජ වෙළෙඳපොළ ප්‍රතිපත්ති

ප්‍රජාතන්ත්‍රවාදී වටිනාකම් අගයන ප්‍රජාතන්ත්‍රවාදී පක්ෂයක් වන සමගි ජන බලවේගය අපේ රජය යටතේ සමාජ වෙළෙඳපොළ ආර්ථික ප්‍රතිපත්තියක් අනුගමනය කරනවා. අපේ නායක සජිත් ප්‍රේමදාස මහතා අන්ත වාමාංශිකෙයකු හෝ අන්ත දක්ෂිණාංශිකයෙකු නොවෙයි. ඔහු මූලික වශයෙන් අනුගමනය කරන්නේ සමාජ වෙළෙඳපොළ ප්‍රතිපත්ති සම රාජ්‍ය පාලනයේ මැද මාවතක්.

අපි නිදහස් වෙළඳපොළ විශ්වාස කරනවා පමණක් නෙවෙයි... සියල්ල ඇතුළත් සංවර්ධනයක් සහිත සාධාරණ සමාජයක් ගැනද විශ්වාස කරනවා.

අපි සංචාරක ක්ෂේත්‍රය ලොවට ම විවෘත කරනවා

ලංකාවේ බොහෝ දේශපාලන පක්ෂ පුරුදු වෙලා තියෙන්නේ මැතිවරණයක් කෙසේ හෝ ජය ගැනීම ඉලක්ක කර ගෙන අවස්ථාවට මැතිවරණ ප්‍රකාශනයක් නිකුත් කිරීම. එහෙම නිකුත් කරාට පස්සෙ ඒක ක්‍රියාවට නැංවීමේ වැඩ පිළිවෙළක් නැති නිසා රට අගාධයට ඇද වැටුණු අවස්ථා බොහෝමයි. හොඳම නායකයා සහ හොඳ ම කණ්ඩායමක් ඉන්න ස.ජ.බ ය බංකොලොත් වී තිබෙන රටට අවශ්‍ය ඩොලර් හා ප්‍රේෂණ ලබා ගැනීම උදෙසා ප්‍රථමයෙන් සංචාරක ක්ෂේත්‍රය ලොවටම විවෘත කරනවා.

අපේ රටේ පාලකයන් හා ජනතාව තම දූපත් මානසිකත්වයෙන් මිදිය යුතුයි. අපි බලයට පත්වූ වහාම සියයකට වැඩි රටවල සංචාරකයන්ට වීසා නොමැතිව මෙහි පැමිණීමට අවසරය දෙනවා. ඒ වගේම ශ්‍රී ලංකාව සෘතුමය සංචාරක ගමනාන්තයක් වෙනුවට වසර පුරා සංචාරක ගමනාන්තයක් ලෙස ප්‍රසිද්ධ කරමින් එයට අදාළ සංස්කෘතික, උත්සව ඓතිහාසික ස්ථාන පිළිබඳ පුළුල් උපාය මාර්ගික සංචාරක ව්‍යාපාරයක් ප්‍රවර්ධනය කරනවා.

නැති බැරිකම නිසා මවුවරු දරුවන්ට කිරි දෙන්නෙ නෑ

අද රටේ පෙනෙන්නට තිබෙන්නේ බොහොම දුර්වල හා පසුගාමී සමාජ ත්ත්ත්වයක්. පෝලිම් නැති කර රට ස්ථාවර කර තිබෙනවා යැයි කියන්නට උත්සහ කරන පිරිසක් ඉන්නවා. අයි එම් එෆ් එකත් එක්ක සාකච්ඡාව සාර්ථක කරගෙන පෝලිම් නැති කරගෙන තියෙන්නේ රටේ බොහෝ ජනතාවගේ ජීවිත අතිශයින් දුෂ්කරතාවයට පත් කරලා. දරුවන්ට කිරි දෙන අම්මලාගෙන් සියයට විසි පහක් නැති බැරිකම නිසා දරුවන්ට කිරි දීම නවතා දමා තිබෙනවා. මෙම රජය බලයට පත්වෙද්දි දරිද්‍රතා රේඛාවෙන් පහළ හිටපු මිලියන තුනක ජනතා සංඛ්‍යාව පසුගිය වසර තුන තුළ මිලියන හත දක්වා වැඩිවීමෙන් රටේ ජනතාවට අත්වූ ඉරණම පැහැදිලි වෙනවා.’’

(සටහන - ජයසිරි අලවත්ත)

ජනාධිපති ධූර අපේක්ෂකයන්ගේ වත්කම් හා බැරකම් ප්‍රකාශවල පිටපත් ජනතා ප්‍රවේශය සඳහා මුදා හැර ඇති බව අල්ලස් හෝ දූෂණ චෝදනා විමර්ශන කොමිෂන් සභාව පවසයි.

සිය නිල වෙබ් අඩවිය හරහා ඒවා ප්‍රසිද්ධ කිරීමට කටයුතු කර ඇති බව අල්ලස් හෝ දූෂණ චෝදනා විමර්ශන කොමිෂන් සභාව දැනුම් දෙනු ලබයි.

දූෂණ විරෝධී පනතේ 89 වගන්තිය ප්‍රකාරව නාමයෝජනා පත්‍ර සමග ජනාධිපති අපේක්ෂකයිනගේ වත්කම් බැරකම් ප්‍රකාශ මැතිවරණ කොමිෂන් සභාව වෙත බාර දෙනු ලැබුවේ ය.

ඒ අනුව, එහි හෙළි නොකළ යුතු බවට දන්වා ඇති තොරතුරු හැර අනෙකුත් තෙරතුරු සහිත පිටපත්  අල්ලස් හෝ දූෂණ චෝදනා විමර්ශන කොමිෂන් සභාවේ නිල වෙබ් අඩවිය හරහා  ප්‍රසිද්ධ කිරීමට කටයුතු කර ඇති බව සදහන් වේ.

හිටපු සෞඛ්‍ය ඇමති කෙහෙළිය රඹුක්වැල්ල ඇතුළු සැකකරුවන් සිව් දෙනෙක් එළැඹෙන 29 වනදා තෙක් අද (22) යළි රක්ෂිත බන්ධනාගාරගත කෙරුණි.

ඒ, ප්‍රමිතියෙන් තොර හියුමන් ඉමියුනොග්ලොබියුලින් එන්නත් මාත්‍රා මිලදී ගැනීමේ නඩුව අද මාළිගාකන්ද මහෙස්ත්‍රාත් අධිකරණය හමුවේ කැඳවූ අවස්ථාවේදීය.

ප්‍රමිතියෙන් තොර ප්‍රතිදේහ එන්නත් සිද්ධිය සම්බන්ධයෙන් චෝදනා එල්ලවූ හිටපු සෞඛ්‍ය අමාත්‍ය කෙහෙළිය රඹුක්වැල්ල  ඉකුත් පෙබරවාරි 02 වනදා අත්අඩංගුවට ගැනුණු අතර ඊට පසුදින මාලිගාකන්ද මහෙස්ත්‍රාත් අධිකරණය මගින් සැකකරු රක්ෂිත බන්ධනාගාරගත කෙරුණි.

ඒ අනුව මේ වන තෙක් හිටපු සෞඛ්‍ය අමාත්‍යවරයා පසුවන්නේ රිමාන්ඩ් භාරයේ ය.

පසුගිය වසරේ පැවැත්වීමට නියම කළ පළාත් පාලන ඡන්ද විමසීම නොපැවැත්වීම තුළින් එවක මැතිවරණ කොමිසමේ සාමාජිකයන් හා මුදල් ඇමැතිවරයා ලෙස ජනාධිපතිවරයා මූලික මිනිස් අයිතිවාසිකම් උල්ලංඝනය කර ඇතැයි ශ්‍රේෂ්ඨාධිකරණය තීන්දු කර තිබේ.

අගවිනිසුරු ජයන්ත ජයසූරිය, විජිත් මලල්ගොඩ, මුර්දු ප්‍රනාන්දු, ගාමිණී අමරසේකර සහ යසන්ත කෝදාගොඩ යන පංච පුද්ගල ශ්‍රේෂ්ඨාධිකරණ විනිසුරු මඩුල්ලක් විසින් මෙම තීන්දුව අද(22) ලබා දී ඇත.

පසුගිය වසරේ මාර්තු මස 09 වැනි දා පළාත් පාලන ඡන්ද විමසීම පැවැත්වීමට නියම කළ ද එය නියමිත නොපැවැත්වීම තුළින් මුලික අයිතිවාසිකම් උල්ලංඝනය වී ඇති බවට තීන්දුවක් ලබා දෙන ලෙස ඉල්ලා සමගි ජන බලවේගය, ජාතික ජන බලවේගය, විකල්ප ප්‍රතිපත්ති කේන්ද්‍රය සහ පැෆ්රල් ආයතනය විසින් අදාළ පෙත්සම් ඉදිරිපත් කර තිබිණි.

ඒ අනුව හැකි ඉක්මනින් පළාත් පාලන ඡන්ද විමසීම පැවැත්වීමට පියවර ගන්නා ලෙස ශ්‍රේෂ්ඨාධිකරණය මැතිවරණ කොමිසමට අද නියම කළේය.