පුවත්

ජනාධිපති ලේකම් කාර්යාලය විසින් පුද්ගලයින් කැනඩා රටේ රැකියා සඳහා යවන බව පවසා මුදල් ලබාගෙන පුද්ගලයින් 34 දෙනකු ඩුබායි රටේ අතරමං කළ සැකකරුවන් තිදෙනකු අත්අඩංගුවට ගැනීමට විමර්ශනයක් ආරම්භ කළ බව කොළඹ ප්‍රධාන මහේස්ත්‍රාත් අධිකරණය හමුවේ කරුණු ඉදිරිපත් කළ අපරාධ පරීක්‍ෂණ දෙපාර්තමේන්තුව අද (20) පැවසුවා.

හවුස් ඔෆ් ෆැෂන්ස් හි හිමිකරු සහ කළමනාකාර අධ්‍යක්ෂ ජයවර්ධන මුදලිගේ ප්‍රියලාල් බන්දුල රේගු තක්සේරු උල්ලංඝනය කිරීමේ චෝදනාව මත අත්අඩංගුවට ගෙන කොළඹ ජාතික රෝහලේ ප්‍රතිකාර ලබමින් සිටියදී හෘද රෝග තත්ත්වයක් වර්ධනය වීමෙන් පසු රිමාන්ඩ් භාරයට පත් කළ එහි හිමිකරු ඇප මත මුදාහරින ලෙස නීතිඥවරුන් සිදුකළ ඉල්ලීම සම්බන්ධයෙන් නියෝගය ලබන විසි දෙක තෙක් කල් තබන ලෙස කොටුව මහේස්ත්‍රාත් පසන්න අමරසේන අද නියෝග කළේ ය.

විනිසුරුතුමන්ලා ගේ අනිවාර්ය විශ්‍රාම වයස දීර්ඝ කිරීම පිළිබඳ සාකච්ඡාවට දැන් දින 43ක් ගත වී ඇති බවත්,  මේ වන විට: ශ්‍රී ලංකා නීතිඥ සංගමය, කොළඹ නීතිඥ සංගමය, බදුල්ල නීතිඥ සංගමය ඇතුළු දිස්ත්‍රික්ක් සංගම්, නීතිඥ එකමුතුව (ලෝයර්ස් කලෙක්ව්), පොදු රාජ්‍ය මණ්ඩලීය නීතී සංගමය, ආසියානු නීතිඥ සංගමය, අධිකරණ සේවා සංගමය ඇතුළු සියලු දෙනා සේවා දිගුවක් ලබා දීමට සහ විශ්‍රාම වයස ඉහළ දමනවාට විරුද්ධයි යැයි ෆ්‍රී ලෝයර්ස් සංවිධානයේ ප්‍රධාන විධායක නිලධාරී රජිත් කීර්ති තෙන්නකෝන් සඳහන් කරයි.

බදු ගෙවීමට සූදානම් දේශීය ව්‍යාපාරිකයින් පවා අත්අඩංගුවට ගෙන ඔවුන් තළා පෙළා දැමීමට මේ ආණ්ඩුව කටයුතු කරන බව ශ්‍රීලංකා පොදුජන පෙරමුණේ ජාතික සංවිධායක පාර්ලිමේන්තු මන්ත්‍රී නාමල් රාජපක්ෂ පැවසී ය.

පාර්ලිමේන්දු මහලේකම්වරියට කථානායකවරයා නියෝග කර ඇත්තේ "මම රහසේ සඟවාගෙන ඉන්න තොරතුරු කවුද යකෝ මාධ්‍යවලට දුන්නේ කියලා හොයා බලපල්ලා" යන්න යැයි පිවිතුරු හෙළ උරුමය නායක උදය ගම්මන්පිල පැවසී ය.

විනිසුරුවරුන් ගේ වැඩ කරන කාලය අවුරුදු දෙකක් දීර්ඝ කිරීම පිළිබඳ කතිකාවක් සමාජයේ ඇති වී තිබෙනන බවත්, ඒ පිළිබඳ විවිධ ප්‍රශ්නසහ ගැටලු විවාදයට භාජනය වෙලා තිබෙන බවත් මහාචාර්ය ජී. එල්. පීරිස් පැවසී ය.

සම්මානිත මහාචාර්ය විජිතපුර විමලරතන හිමි විසින් රචිත "ශ්‍රී ලංකාවේ සංවර්ධනය අඩපණ කළ තුවාල 64" සහ මහාචාර්ය විමලරතන හිමි සහ පුෂ්පකුමාර විසින් රචිත "Debt Crisis in Sri Lanka: Facts and Fallacies" යන කෘති කොළඹ වෘත්තීය සංගම් මූලස්ථානයේ (OPA) දී මෙම මස 30 වැනිදා එළිදැක්වීමට නියමිත ය.

ශ්‍රී ලංකාව සහ වියට්නාමය අතර ගුවන් සබඳතා තවදුරටත් පුළුල් කරමින්, වියට්නාමයේ ප්‍රමුඛතම ගුවන් සේවය වන VietJet, කොළඹ සහ හෝ චි මිං නගරය (Ho Chi Minh City) අතර සිය කුලුඳුල් ඍජු ගුවන් ගමන් සේවාව ඊයේ (අගෝස්තු 18) නිල වශයෙන් ආරම්භ කළේ ය.

කෑගල්ල දිස්ත්‍රික්කයේ ප්‍රධානතම සෞඛ්‍ය සේවා සපයනු ලබන මධ්‍යස්ථානය වන කෑගල්ල දිස්ත්‍රික් මහ රෝහලේ වත්මන් රෝගී ප්‍රතිකාර සේවා, සංවර්ධන කටයුතු, ඉදිරි සැලසුම් සහ අවශ්‍යතා පිළිබඳව සොයා බැලීම සඳහා සෞඛ්‍ය හා ජනමාධ්‍ය අමාත්‍ය වෛද්‍ය නලින්ද ජයතිස්ස 17වන දා එම රෝහලේ  නිරීක්ෂණයක නිරත විය; අනතූරුව රෝහල් කළමණාකරණ කමිටු රැස්වීමකට ද සහභාගි විය.

මෙරට ප්‍රකට ඇඟලුම් සහ විලාසිතා ක්ෂේත්‍රයේ ප්‍රමුඛතම ව්‍යාපාරික ආයතනයක් වන “හවුස් ඔෆ් ෆැෂන්ස්” (House of Fashions) හි හිමිකරු වන ප්‍රීති ජයවර්ධන රක්ෂිත බන්ධනාගාරගත කිරීමට කොළඹ ප්‍රධාන මහේස්ත්‍රාත් අධිකරණය පසුගිය 17 වනදා නියෝග කළේ ය.

රුපියල් මිලියන 10කට අධික වටිනාකමකින් යුත් කොකේන් මත්ද්‍රව්‍ය ග්‍රෑම් 237ක් ළඟ තබාගෙන සිටි ඇන්ගෝලා ජාතික කාන්තාවක් රේගු මත්ද්‍රව්‍ය පාලන ඒකකයේ නිලධාරීන් විසින් කටුනායක ගුවන්තොටුපොළේදී අත්අඩංගුවට ගෙන තිබෙනවා.

සබන් නිෂ්පාදන වෙළෙඳපොලට නිකුත් කිරීමේ දී ඒවායේ ඇසුරුමෙහි, නම සහ මේද ප්‍රතිශතය (TFM අගය) ප්‍රදර්ශනය කිරීම අනිවාර්‍යය කරමින් නව ගැසට් පත්‍රයක් නිකුත් කිරීමට පාරිභෝගික කටයුතු පිළිබඳ අධිකාරිය පසුගියදා සිකුරාදා කටයුතු කර තිබුණ බවත්, පාරිභෝගික සංවිධානයක් වශයෙන් ඒ පිළිබඳ  සිය සතුට පළ කරන බවත් පාරිභෝගික අයිතීන් සුරැකීමේ ජාතික ව්‍යාපාරයේ සභාපති රංජිත් විතානගේ සඳහන් කරයි.

ශ්‍රී ලංකා නිදහස් පක්ෂයේ 76 වැනි සංවත්සරය පැවැත්වීමට සූදානම් වී සිටින බවත්, ශ්‍රී ලංකා නිදහස් පක්ෂයේ 76 වැනි සංවත්සරය යනු පක්ෂයේ සාමාජිකයන්ට පමණක් නොව, මේ රටේ සමස්ත ජනතාවට ම වැදගත් අවස්ථාවක් යැයි ශ්‍රී ලංකා නිදහස් පක්ෂයේ මහ ලේකම් දුමින්ද දිසානායක පැවසී ය.

පාස්කු ඉරුදින ත්‍රස්ත ප්‍රහාර සිද්ධිය සම්බන්ධයෙන් සිදු කරන විමර්ශනවලට අදාළව තමන්ව ත්‍රස්තවාදය වැළැක්වීමේ පනත යටතේ අත්අඩංගුවට ගෙන රඳවා ගැනීම අභියෝගයට ලක් කරමින් රාජ්‍ය බුද්ධි සේවයේ හිටපු අධ්‍යක්ෂ මේජර් ජෙනරාල් (විශ්‍රාමික) සුරේෂ් සලේ ඉදිරිපත් කළ රීට් පෙත්සම අද (17) අභියාචනාධිකරණය හමුවේ සලකා බැලිණි.

කේපාපිලයි, පලාලි, කාංචි ගම්වල ජනතාව ගේ ඉඩම් බලහත්කාරයෙන් පැහැරගෙන දැනට අවුරුදු 36ක් අවසන් බවත්, යුද්ධය අවසන් වී වෙලා අවුරුදු 14කට පසුව ද එම ජනතාවට හිමි ඉඩම් නැවත ඔවුන්ට ලබා දීමට මේ රටේ පාලකයන්ට තවමත් නොහැකි වී ඇතැයි සම අයිතිය ව්‍යාපාරයේ කැඳවුම්කරු පෙරටුගාමී සමාජවාදී පක්ෂයේ මධ්‍යම කාරක සභික ඉන්ද්‍රානන්ද ද සිල්වා පැවසී ය.

අඟුණකොළපැලැස්ස මහේස්ත්‍රාත් අධිකරණයේ විනිසුරුවරියගේ වැඩ තහනම් කිරීමට අධිකරණ සේවා කොමිෂන් සභාව පියවර ගෙන ඇති බව වාර්තා වේ.

යෝෂිත රාජපක්ෂ ශ්‍රී ලංකා නාවික හමුදාවේ ලුතිනන්වරයෙකු ලෙස සිටි කාලයේ උපයා ගෙන තිබූ රුපියල් කෝටි 6කට ආසන්න මුදලක් උපයා ගත් ආකාරය තහවුරු කිරීමට අසමත් වීම සම්බන්ධයෙන් මුදල් විශුද්ධිකරණය වැළැක්වීමේ පනත යටතේ මහාධිකරණය ඉදිරියේ නඩු පවරා ඇත.

අධිකරණ නියෝග කඩ කරමින් අයුතු ජනරාශියක සාමාජිකයින් වෙමින් උද්ඝෝෂණ සිදු කළ බවට චෝදනා ලැබ, ඇප මත මුදා හැර සිටින පාර්ලිමේන්තු මන්ත්‍රී ජගත් මනුවර්ණ ඇතුළු සැකකරුවන් හය දෙනෙක් අත්අඩංගුවට ගෙන අධිකරණයට ඉදිරිපත් කරන ලෙස කොටුව අතිරේක මහේස්ත්‍රාත් කිංස්ලි හෙට්ටිආරච්චි අද (17) නියෝග කළේ ය.