පුවත්

 මැති ඇමතිවරුන් හට දුරකතන ඇමතුම්දී  සමච්චලයට ලක් කරන( බයිට් ) සිවිල් ක්‍රියාකාරිකයකු පිළිබඳව පොලිස්පතිවරයාට පැමිණිලි කළ  බව ප්‍රාථමික කර්මාන්ත රාජ්‍ය අමාත්‍ය  චාමර සම්පත් දසනායක පවසයි .

රාජ්‍ය අමාත්‍යවරයා මේ බව සඳහන් කර සිටියේ  අද (7) පාර්ලිමේන්තුවේදී අදහස් දක්වමින් ය

මේ පුද්ගලයා තමාටත් ඩයනාගමගේ රාජ්‍ය අමාත්‍යවරියටත් දුරකතන ඇමතුම්දී  හෑල්ලුවට ලක්වන ආකාරයට කතා කළ බවද සඳහන් කළ රාජ්‍ය අමාත්‍යවරයා  මෙසේද පැවසීය .

මේ පුද්ගලයාගේ නම  සහන් ගනේගොඩ. මෙයා හිතුවේ නෑ මම එයා හොයා ගනීවි කියලා. පැයක් ඇතුළත මම හොයා ගත්තා . මෙයා අරගලයේ හිටපු කෙනෙක් යුද හමුදාවෙන් පැනල ගියපු කෙනෙක්. ඒ වගේම මෙයාට කාන්තා දූෂණ නඩු අපරාධ රැසක් තියෙනවා. පොලිසි බර ගාණක මෙයාට විරුද්ධව පැමිණිලි තියෙනවා. හැබැයි මෙයාගේ පේජ් එකේ තියෙන්නේ විපක්ෂ නායකතුමාගේ ෆොටෝ එක.

අපිට මඩ ගහලා අපිව නැති කරන්න බැහැ. ඔය වගේ අපතයන්ට අපරාධකාරයන්ට  ඒ දේ කරන්න බැහැ. මේ කතා කරන්නෙ සූදනෙක් වගෙයි. මෙයා පට්ට හොරෙක්. මිනීමරුවෙක් මංකොල්ලකාරයෙක්. මේ රටේ පොලිසිවලින් මෙයා හොයනවා. මෙයා ගැන විමසිල්ලෙන්  ඉන්න කියලා මම මන්ත්‍රීවරුන්ගෙන් ඉල්ලනවා

විද්‍යුත් වාහන 900කට ආසන්න ප්‍රමාණයක් ආනයනය කිරීම සඳහා විදෙස්ගත ශ්‍රමිකයින් සඳහා බලපත්‍ර නිකුත් කර ඇති බව කම්කරු සහ විදේශ රැකියා අමාත්‍ය මනූෂ නානායක්කාර පැවසීය.

අමාත්‍යවරයා මේ බව සඳහන් කර සිටියේ අද (07) අමාත්‍යංශ වැය ශීර්ෂ විවාදයේ අදහස් දක්වමින් ය.

මෙම ක්‍රමවේදය හරහා ඩොලර් මිලියන 100කට වැඩි මුදලක් විදෙස් ශ්‍රමිකයින් මෙරටට එවා ඇති බවද අමාත්‍යවරයා සඳහන් කළේය.

කෙසේ වෙතත් මෙම විදෙස් ශ්‍රමිකයින් වෙත ලබාදුන් විද්‍යුත් වාහන ආනයනය කිරීමේ ක්‍රමවේදයට ණයවර ලිපි නිකුත් කිරීමට අදාළ කටයුතු සිදුකිරීමේදී යම් අවහිරතාවයක් මතුව ඇති බවද ඔහු සඳහන් කළේය.

මහාභාණ්ඩාගාරයේ නිලධාරීන්ගේ ක්‍රියාකලාපය හේතුවෙන් ණයවර ලිපි නිකුත් කිරීම දීර්ඝ කිරීම කටයුතු සිදුකිරීමට බාධා එල්ලවී ඇති බවද අමාත්‍යවරයා වැඩිදුරටත් පෙන්වා දුන්නේය .

ශ්‍රී ලංකා නීති විද්‍යාලයේ සිසුන්ගේ පහසුකම් වැඩිදියුණු කිරීම වෙනුවෙන් රජය සතු ඉඩමක් ලබා දීමට කටයුතු කරන බව ජනාධිපති රනිල් වික්‍රමසිංහ සඳහන් කළේය.

අද (06) පාර්ලිමේන්තු සංකීර්ණයේ පැවති සාකච්ඡාවකදී ජනාධිපතිවරයා විසින් මෙම එකඟතාවට එළැඹිණි.

2024 වර්ෂයට වසර 150ක් සපිරෙන ශ්‍රී ලංකා නීති විද්‍යාලය මඟින් ජනාධිපතිවරු තිදෙනෙකු බිහි වී ඇති බව ජනාධිපති රනිල් වික්‍රමසිංහ මෙහිදී සිහිපත් කළේය.

ජනාධිපතිවරයාගේ ඉල්ලීම පරිදි නාගරික සංවර්ධන අධිකාරියට අයත් ඉඩමක් ශ්‍රී ලංකා නීති විද්‍යාලයට ලබාදීමට කටයුතු කරන බව නාගරික සංවර්ධන හා නිවාස අමාත්‍ය ප්‍රසන්න රණතුංග මෙහිදී පැවසීය.

නීති විද්‍යාලයේ පහසුකම් වැඩිදියුණු කිරීමට අදාළ සැලසුම් කඩිනමින් සකස් කරන ලෙස ජනාධිපතිවරයා අදාළ නිලධාරීන්ට උපදෙස් දුන් අතර මුල් අදියර සඳහා පර්චස් 40ක බිම් කොටසක් වෙන් කිරීමටත්, අදාළ සැලැස්මට අනුව අවශ්‍ය ඉතිරි ඉඩම් ප්‍රමාණය අධිකරණ අමාත්‍යාංශය සමඟ සාකච්ඡා කිරීමෙන් පසු ලබා දීමටත් උපදෙස් දුන්නේය.

මෙහිදී අදහස් දැක්වූ නීති විද්‍යාලයේ විදුහල්පති ආචාර්ය අතුල පතිනායක සඳහන් කළේ වසර 150ක ඉතිහාසය තුළ නීති විද්‍යාලයේ සිසුන්ගේ පහසුකම් වැඩිදියුණු කිරීම වෙනුවෙන් එක් බිම් අඟලක්වත් ලැබී නොමැති බවත්, ජනාධිපති රනිල් වික්‍රමසිංහ ඒ පිළිබඳ විශේෂ අවධානයක් යොමු කර කටයුතු කිරීම පිළිබඳ ස්තූතිවන්ත වන බවත්ය.

ජනාධිපති ලේකම් සමන් ඒකනායක, නාගරික සංවර්ධන හා නිවාස අමාත්‍යාංශයේ ලේකම් ඩබ්ලිව්.එස්. සත්‍යානන්ද, නාගරික සංවර්ධන අධිකාරියේ සභාපති නිමේෂ් හේරත් යන මහත්වරුන් ද නීතිපති දෙපාර්තමේන්තුවේ නිලධාරීන් සහ නීති විද්‍යාලයේ ශිෂ්‍ය සංගමයේ නියෝජිතයන් ද මෙම අවස්ථාවට එක්ව සිටියහ.

අංක 08 සැහැල්ලූ ප‍්‍රවාහන ගුවන් යානා බලඝණයට චිනයේ රජයෙන් මිලදි ගනු ලැබු වයි -12 වර්ගයේ සැහැල්ලු මගී ප‍්‍රවාහන ගුවන් යානා ද්විත්වය ඊයේ (5) රත්මලාන ගුවන් හමුදා කඳවුරට රැගෙන එනු ලැබීය.

මෙම ගුවන් යානාවන් මුලික වශයෙන් භාණ්ඩ හා මගීන් ප‍්‍රවාහන කටයුතු සදහා යොදාගනු ලබන වර්ථමානය වනවිට ගුවන් ආවේක්‍ෂණ මෙහෙයුම්, සෝදිසි කිරීමේ සහ මුදවා ගැනීමේ මෙහෙයුම්, පැරෂුටි භටයන් පුහුණු කිරීමේ මෙහෙයුම් ඇතුළු යුද අභ්‍යාස සදහා ද ගුවන් ගිලන්රථ ලෙසද යොදා ගනු ලැබේ.

එමෙන්ම මෙම ගුවන්යානාවලට දේශීය ප‍්‍රවාහන කටයුතු මෙන්ම හදිසි අවශ්‍යතා මත විදේශ රටවලට ද පියාසර කිරීමේ හැකියාව ඇත.

ජනාධිපති රනිල් වික‍්‍රමසිංහගේ උපදෙස් මත ගුවන් හමුදාධිපති එයාර් මාර්ෂල් උදේනි රාජපක්ෂගේ අධීක්ෂණය යටතේ වයි - 12 වර්ගයේ මෙම මගි ප‍්‍රවාහන ගුවන් යානා ද්විත්වය චිනයේ සිට රත්මලාන ගුවන් හමුදා කදවුරට රැගෙන එනු ලැබීය.

චීනයේ සිට පැමිණි එම ගුවන් යානා පිළිගැනිමේ අවස්ථාව සදහා රාජ්‍ය ආරක්ෂක අමාත්‍ය ප්‍රමිත බණ්ඩාර තෙන්නකෝන්, ජාතික ආරක්ෂාව පිළිබද ජනාධිපති ජ්‍යෙෂ්ඨ උපදේශක, ජනාධිපති කාර්ය මණ්ඩල ප්‍රධානි සාගල රත්නායක, ආරක්ෂක අමාත්‍යංශයේ ලේකම් ජෙනරල් (විශ‍්‍රාමික) කමල් ගුණරත්න, ආරක්ෂක මාණ්ඩලික ප්‍රධානී ජෙනරල් ශවේන්ද්‍ර සිල්වා, නාවික හමුදාධිපති වයිස් අද්මිරාල් ප්‍රියන්ත පෙරේරා, ගුවන් හමුදාධිපති එයාර් මාර්ෂල් උදේනි රාජපක්ෂ, ශ්‍රී ලංකාවේ චීන තානාපති කී ෂෙන්ග්හොන්ග්  ඇතුළු ගුවන් හමුදා නිලධාරීහු රැසක් මෙම අවස්ථාවට සහභාගිවූහ.

එක්සත් ජාතීන්ගේ දේශගුණික විපර්යාස පිළිබඳ 28 වන සමුළුව වෙනුවෙන් ඉදිරිපත් කරනු ලැබූ ශ්‍රී ලංකා තරුණ ප්‍රකාශනය (Sri Lanka Youth Statement to COP28) ශ්‍රී ලංකා තරුණ නියෝජිත කණ්ඩායමේ ප්‍රධානී, ජාතික තරුණ සේවා සභාවේ සභාපති/අධ්‍යක්ෂ ජනරාල් පසිඳු ගුණරත්න විසින් ජනාධිපති රනිල් වික්‍රමසිංහ වෙත ජනාධිපති කාර්යාලයේදී පසුගියදා පිළිගන්වනු ලැබීය.

දේශගුණික විපර්යාස තුළින් සිදුවන බලපෑම මෙන්ම ඒ වෙනුවෙන් ගත හැකි විසඳුම් ඇතුළත් ප්‍රධාන නිර්දේශ 10කින් මෙම තරුණ ප්‍රකාශනය සමන්විත වේ.

දේශගුණික විපර්යාස පිළිබඳ පුළුල් අධ්‍යාපනයක් තරුණ තරුණියන්ට ලබාදීම, ප්‍රතිපත්තිමය තීරණ ගැනීමේදී තරුණ නියෝජනය පුළුල් කිරීම, පරිසර සංරක්ෂණය හා ජෛව විවිධත්වය සුරැකීම සම්බන්ධයෙන් ගත යුතු හදිසි මෙන්ම වැදගත් ක්‍රියාමාර්ග රැසක් පිළිබඳව මෙම තරුණ ප්‍රකාශනය තුළින් අවධාරණය කර ඇත.

ජාතික තරුණ සේවා සභාවේ සභාපති පසිඳු ගුණරත්න ගේ පූර්ණ අධීක්ෂණය යටතේ, බෝධ් මාතුර ගේ නායකත්වයෙන් ෆාතිමා ශම්ලා, සන්දෙව් ෆර්ඩිනැන්ඩෝ සහ තරුෂි වීරසිංහ යන මහත්ම මහත්මීන්ගේ සාමාජිකත්වයෙන් පිහිටුවනු ලැබූ කමිටුව මඟින් මෙම ප්‍රකාශනය කෙටුම්පත් කරනු ලැබීය.

මෙහිදී පසිඳු ගුණරත්න ජනාධිපතිවරයා හමුවේ සඳහන් කර සිටියේ ශ්‍රී ලංකා තරුණ පාර්ලිමේන්තු මන්ත්‍රීවරුන් විසින් දේශගුණික විපර්යාසයන් පිළිබඳ ව සිදුකළ විශේෂ තරුණ පාර්ලිමේන්තු සැසිවාරයේදී මෙන්ම ශ්‍රී ලංකා යෞවන සමාජ සම්මේලනය, රාජ්‍ය විශ්වවිද්‍යාලයන්හි සිසු සිසුවියන් සහ ප්‍රථම දේශීය තරුණ සමුළුවට (Inaugural Local Conference of Youth) සහභාගි වූ තරුණ තරුණියන් ඉදිරිපත් කරන ලද යෝජනා සහ අදහස් ද මෙම ප්‍රකාශනය කෙටුම්පත් කිරීමේ කාර්යයේදී වඩාත් වැදගත් වූ බවයි.

එක්සත් ජාතීන්ගේ දේශගුණික විපර්යාස පිළිබඳ 28 වන සමුළුව වෙත ඉදිරිපත් කිරීම සඳහා කෙටුම්පත් කළ මෙම ශ්‍රී ලංකා තරුණ ප්‍රකාශනය පසුගිය දෙසැම්බර් 02 වැනිදා ඩුබායිහිදී පැවති එම සමුළුව අතරවාරයේ සංවිධානය කළ ''ශ්‍රී ලංකා තරුණ වැඩසටහන'' අවස්ථාවේදී පසිඳු ගුණරත්න විසින් එළිදක්වනු ලැබීය.

ඉතිහාසයේ පළමු වතාවට එක්සත් ජාතීන්ගේ දේශගුණික විපර්යාස පිළිබඳ සමුළුවට සමගාමීව අතිසාර්ථක ලෙස පැවති මෙම ''ශ්‍රී ලංකා තරුණ වැඩසටහන'', ජාතික තරුණ සේවා සභාව, ජනාධිපති ලේකම් කාර්යාලයේ දේශගුණික විපර්යාස පිළිබඳ කාර්යාලය සහ පරිසර අමාත්‍යාංශය එක්ව සංවිධානය කර තිබිණි.

එසේම මෙම සමුළුව සඳහා එක්ව සිටි තරුණ නියෝජිත කණ්ඩායම රජයේ කිසිදු අරමුදලක් භාවිත නොකිරීම ද විශේෂත්වයකි.

අදාළ තරුණ ප්‍රකාශනය http://www.nysc.lk/youthstatements.pdf හරහා පරිශීලනය කළ හැකි ය.

සියලු ක්ෂේත්‍ර නවීකරණය කරමින් රට දියුණුව කරා ගෙන යන නව ආර්ථික වැඩපිළිවෙළ එළැඹෙන ජනවාරි 01 වනදා සිට ආරම්භ කරන බව ජනාධිපති රනිල් වික්‍රමසිංහ පැවසීය.

පැරණි ක්‍රමවේදය අනුව ඉදිරියට යාමෙන් රටට හෙට දවසක් නොමැති බවත් පසුගිය වසර කිහිපය තුළ ජාතියක් ලෙස මුහුණ දූන් කටුක අත්දැකීම මතු පරපුරට උරුම කළ නොහැකි බවත් ජනාධිපතිවරයා අවධාරණය කළේය.

එබැවින් නව ආර්ථික ප්‍රතිසංස්කරණ සමග ඉදිරියට යනවා හැර වෙනත් විකල්පයක් රටට නොමැති බව පෙන්වා දුන් ජනාධිපතිවරයා ඒ සමඟ සියලුදෙනා එක්විය යුතු බවද සඳහන් කළේය.

ජනාධිපති රනිල් වික්‍රමසිංහ මේ බව සඳහන් කර සිටියේ පිටකෝට්ටේ සෝලිස් හෝටලයේ අද (06)පැවති රජයේ තක්සේරු දෙපාර්තමේන්තුවේ සියවස් සැමරුමට එක්වෙමිනි.

බංකොලොත්භාවයට පත්ව තිබූ රට මාස 18ක් වැනි කෙටි කාලයකින් බංකොලොත් භාවයෙන් මුදවා ගැනීමට හැකි වූ බව ජනාධිපති රනිල් වික්‍රමසිංහ මෙහිදී සඳහන් කළේය.

රට බංකොලොත්භාවයෙන් මුදවා ගැනීමට රාජ්‍ය ආයතන ප්‍රධානීන් මෙන්ම සේවක ප්‍රජාව සිදුකළ මෙහෙය අගය කළ ජනාධිපතිවරයා දැනට රට පත්ව තිබෙන ආර්ථික තත්ත්වය මනාව කළමනාකරණය නොකර ඉදිරියට ගියහොත් ඉදිරි දශකයේදී නැවතත් ආර්ථික අර්බුදයකට මුහුණදීමට සිදු වන බවද පෙන්වා දුන්නේය.

එම නිසා දැනට ස්ථාවරව ඇති ආර්ථිකය ඩිජිටල් ආර්ථිකයක් දක්වා ගෙන යාමට නව සැලසුම් අනුව කටයුතු කළ යුතු බවත්, එහිදී නවීන ආර්ථික ක්‍රමවේද භාවිතා කළ යුතු බවත් ජනාධිපතිවරයා පැවසීය.

ලෝක ආර්ථික අවපාතය හමුවේ බංකොලොත් වූ රටවල් අතුරින් ශ්‍රී ලංකාව සීග්‍රයෙන් යථා තත්ත්වයට පත් කිරීමට හැකිව තිබෙන බව ලෝක මූල්‍ය සමාගම් පවා පිළිගන්නා බවද ජනාධිපති රනිල් වික්‍රමසිංහ වැඩිදුරටත් සඳහන් කළේය.

රජයේ තක්සේරු දෙපාර්තමේන්තුවේ උන්නතිය වෙනුවෙන් කැපවීමෙන් සේවය කළ සේවක පිරිසකට තිළිණ ප්‍රදානය කිරීමද ජනාධිපති රනිල් වික්‍රමසිංහ මහතා විසින් සිදු කළ අතර සියවස් සැමරුම වෙනුවෙන් රුපියල් 25ක සමරු මුද්දරයක් හා මුල්දින කවරයක් නිකුත් කිරීමද සිදු කෙරිණි.

රජයේ තක්සේරු දෙපාර්තමේන්තුවේ ගීතය හා ධජය එළිදැක්වීම සහ රජයේ තක්සේරු දෙපාර්තමේන්තුව ඩිජිටල්කරණය කිරීම සඳහා "ඊ තක්සේරු" ක්‍රමවේදය හඳුන්වාදීමද මෙහිදී සිදු විය.

එහිදී වැඩිදුරටත් අදහස් දැක්වූ ජනාධිපති රනිල් වික්‍රමසිංහ මෙසේද පැවසීය.

තක්සේරු දෙපාර්තමේන්තුවේ ක්‍රියාවලිය පෘතුගීසි සමය දක්වා ඈතට දිව යනවා. බ්‍රිතාන්‍ය යුගයේදී මිනින්දෝරු සහ තක්සේරු ක්‍රියාවලිය ඉදිරියට ගෙනාවා. 1923 දී තක්සේරුකරු තනතුර ඇති කළා.

1972 හඳුන්වාදුන් ඉඩම් ප්‍රතිපත්තිය මඟින් තක්සේරු දෙපාර්තමේන්තුවේ කාර්යභාරය තවදුරටත් පුළුල් වුණා. ඒ අනුව මේ වන විට තක්සේරු දෙපාර්තමෙන්තුව නව යුගයකට පත්ව තිබෙනවා. එහිදී ඩිජිටල්කරණය ඉතා වැදගත්. ඩිජිටල් ආර්ථිකයේදී තක්සේරුව වෙනුවෙන් පිරිස් බලය අවශ්‍ය වෙනවා. ඒ සඳහා තක්සේරු කරුවන් නිර්මාණය කිරීමට විශ්වවිද්‍යාලවල සිසුන් බඳවා ගැනීම වැඩි කළ යුතුයි.

ඒ වගේම ඉදිරියේදී වසර පහෙන් පහට දේපළ තක්සේරු කිරීම ද සිදු කළ යුතුයි. බදු එකතු කිරීමේ ක්‍රමවේදය සඳහා ද තක්සේරු කරණයේ දායකත්වය ඉතා වැදගත් වෙනවා. එම නිසා තක්සේරු ක්‍රියාවලිය ඩිජිටල් කිරීම මෙම වසරේ සිට ආරම්භ කිරීම මම ඉතා අගය කරනවා.

පසුගිය වසරේදී අප රටක් ලෙස විශාල ආර්ථික අර්බුදයකට මුහුණ දුන්නා. එම අර්බුදයෙන් රට ගොඩගැනීමේදී රාජ්‍ය නිලධාරීන් හා රටේ සමස්ත ජනතාව විශාල කැපකිරීමක් කළා. ඒ වෙනුවෙන් අප ඔවුන්ට ස්තූති කළ යුතුයි.

මෙම මාසයේ මැද භාගයේ දී පමණ අප රට බංකොලොත්භාවයෙන් මිදී ඇති බවට ජාත්‍යන්තර මූල්‍ය අරමුදල විසින් ප්‍රකාශයක් නිකුත් කිරීමට නියමිතයි. නමුත් රටේ ආර්ථිකය ස්ථාවර කිරීම සඳහා අප නව ආර්ථික ක්‍රමවේද අනුව ඉදිරියට යා යුතුයි. එසේ නොමැතිව පැරණ ආර්ථික ක්‍රමවේද ක්‍රියාත්මක කළහොත් ඉදිරි වසර 10 ඇතුළත නැවත මේ රටේ ආර්ථික අර්බුදයක් ඇතිවීම වැළැක්විය නොහැකියි.

මහ බැංකුව මඟින් මුදල් මුද්‍රණය කිරීම මේ වන විටත් නවතා දමා තිබෙනවා. ඒ වගේම සංවර්ධනය සඳහා රාජ්‍ය බැංකුවලින් ණය ලබාදීම නවතා තිබෙනවා. මෙම කොන්දේසි නොමැතිව ආර්ථික වර්ධනයක් ලබා ගන්න බැහැ. රටට මූල්‍ය විනයක් අවශ්‍යයි. මූල්‍ය විනයක් සහිතව ආර්ථිකය කළමනාකරණය කළහොත් ඉදිරියේදී ජනතාවට මීට වඩා සහන ලබාදිය හැකියි.

ආනයන අපනයන පරතරය මෙන්ම අයවැය හිඟය මෙරට ආර්ථික අර්බුදයට හේතුවී තිබෙනවා. එම නිසා අපනයන ආදායම වැඩි කිරීමටත් රාජ්‍ය වියදම් අඩුකර රාජ්‍ය ආදායම් වැඩි කිරීමටත් අප නව සැලසුම් සම්පාදනය කර තිබෙනවා.

සංචාරක කර්මාන්තය තුළින් විශාල විදේශ විනිමයක් උපයා ගැනීමට හැකියාව තිබෙනවා . ලබන වසරේදී වසරකට සංචාරකයන් ලක්ෂ 25ක් මෙරටට ගෙන්වා ගැනීමට අප සැලසුම් කර තිබෙනවා. එම සංචාරකයන්ගේ ප්‍රමාණය ලක්ෂ 50 දක්වා වැඩි කර ගතහොත් මෙරට ආර්ථික ප්‍රශ්නයට කඩිනම් විසඳුම් ලබා ගැනීමට හැකි වනු ඇති බව අප විශ්වාස කරනවා.

ඉඩම් අක්කර ලක්ෂ 3ක ප්‍රමාණයක් වගා කටයුතු සඳහා ජනතාවට ලබා දෙන්න මෙවර අයවැයෙන් යෝජනා කර තිබෙනවා. එම අරමුණ ඉටුකර ගැනීමේදී තක්සේරු දෙපාර්තමේන්තුවට විශාල කාර්යභාරයක් පැවරෙනවා. තක්සේරු දෙපාර්තමේන්තුව ඩිජිටල්කරණය කිරීම නිසා එම කටයුතු වඩාත් කාර්යක්ෂම ලෙස සිදු කර ගත හැකි වනු ඇතියි.

බලශක්ති ක්ෂේත්‍රය තුළද නව ප්‍රවේශයක් අවශ්‍යයි. එහිදී අප පුනර්ජනනීය බලශක්තිය පිළිබඳ වැඩි අවධානයක් යොමු කළ යුතුයි. සුළං බලයෙන් ගිගාවොට් 35 ක්ද, සූර්ය බලයෙන් ගිගාවොට් 200 ක් ද නිෂ්පාදනය කිරීමට හැකියාව තිබෙනවා. මෙරට පාරිභෝජනය සඳහා අවශ්‍ය වන්නේ ගිගාවොට් 50කට අඩු ප්‍රමාණයක්. එම නිසා එම බලශක්ති ක්ෂේත්‍රය මඟින්ද විශාල විදේශ විනිමයක් උපයා ගත හැකියි. කෘතිම බුද්ධිය පිළිබඳවද වැඩි අවධානයක් යොමු කරමින් ඩිජිටල් ආර්ථිකයට එය යොදා ගැනීමට සැලසුම් සකස් කළ යුතුයි. එමඟින් රට තුළ ඉතා කෙටිකාලයකදී ශක්තිමත් ආර්ථිකයක් නිර්මාණය කළ හැකියි.

මුදල් රාජ්‍ය අමාත්‍ය රංජිත් සියඹලාපිටිය, ජනමාධ්‍ය රාජ්‍ය අමාත්‍ය ශාන්ත බණ්ඩාර, රජයේ ප්‍රධාන තක්සේරුකරු පුෂ්පා මුතුකුමාරණ, තැපල්පති රුවන් සත්කුමාර යන මහත්ම මහත්මීන් සහ රජයේ තක්සේරු දෙපාර්තමේන්තුවේ සේවක මහත්ම මහත්මීහු මෙම අවස්ථාවට එක්ව සිටියහ.

අමෙරිකානු ඩොලර් මිලියන 150ක ණය මුදලක් ශ්‍රී ලංකාවට ලබාදීමට ලෝක බැංකුව එකඟතාවය පළ කර ඇත.

අද (06) පැවති අමාත්‍ය මණ්ඩල තීරණ දැනුම්දීමේ මාධ්‍ය හමුවට එක්වෙමින් අමාත්‍ය බන්දුල ගුණවර්ධන විසින් මේ බව පැවසීය.

ශ්‍රී ලංකාවේ තැන්පත් රක්ෂණ අයෝජන ක්‍රමය, ප්‍රාග්ධනීයකරණය හා මහ බැංකුවේ ආයතන ධාරිතාකරණය සහ එම ව්‍යාපෘතිය ක්‍රියාත්මක කිරීම යන සංරචකයන් යටතේ මෙම ණය මුදල පිරිනැමේ.

ඒ අනුව අදාළ යෝජනාවට එළැඹීම පිණිස ජනාධිපතිවරයා විසින් ඉදිරිපත් කළ යෝජනාවට අමාත්‍ය මණ්ඩල අනුමැතිය හිමිව තිබේ.

සියලූ ශ්‍රේණි සඳහා වන නව අධ්‍යාපන ප්‍රතිසංස්කරණ හඳුන්වාදීමේ නියමු වැඩසටහන ලබන වසරේ දී ආරම්භ කරන බවත් දේශීය හා විදේශීය අනුග්‍රාහක පාර්ශවයන්ගෙන් ද සහාය ඇතිව සමස්ත අධ්‍යාපන පද්ධතිය ඩිජිටල්කරණය සඳහා පියවර ගන්නා බවත් අධ්‍යාපන අමාත්‍ය සුසිල් ප්‍රේමජයන්ත  පැවසීය.

ඉදිරියේ දී අ.පො.ස සාමාන්‍ය පෙළ විභාගය 10 ශ්‍රේණියේදීත් අ.පො.ස උසස් පෙළ විභාගය 12 ශ්‍රේණියේදීත් පැවැත්වීමට සැලසුම් කරන බව ද අමාත්‍යවරයා සඳහන් කළේය.

අධ්‍යාපන අමාත්‍ය සුසිල් ප්‍රේමජයන්ත මේ බව සඳහන් කළේ ‘ස්ථාවර රටකට සැවොම එක මඟකට’ මැයෙන් අද (06) ජනාධිපති මාධ්‍ය කේන්ද්‍රයේ පැවති ප්‍රවෘත්ති සාකච්ඡාවට එක්වෙමිනි.

එහිදී වැඩිදුරටත් අදහස් දැක්වූ අමාත්‍යවරයා මෙසේද පැවසීය.

2024 අයවැයෙන් අධ්‍යාපන අමාත්‍යාංශය සඳහා රුපියල් බිලියන 237ක් වෙන් කර තිබෙනවා. ඒ වගේම පළාත් මට්ටමින් අධ්‍යාපනයට වෙන් කළ රුපියල් බිලියන 280ක් සමඟ මෙවර අයවැයෙන් අධ්‍යාපනයට රුපියල් බිලියන 517ක් පමණ වෙන් කර තිබෙනවා.

එසේම විශේෂ අවශ්‍යතා සහිත දරුවන්ගේ අධ්‍යාපනික දියුණුව සඳහා විවිධ වැඩසටහන් සකස් කළා. සාමාන්‍ය දරුවන් ඉගෙන ගන්නා පන්ති කාමරවලට ඔවුන් ඇතුළත් කළ හැකි පරිදි අධ්‍යාපන ක්‍රමයත් අප ඉදිරියේදී හඳුන්වා දෙනවා.

බොහෝ දියුණු රටවල ජාතික ධනයෙන් විශාල කොටසක් නියෝජනය කරන්නේ STEAM අධ්‍යාපනය තුළින් ගොඩ නැගුණු මානව සම්පතක්. මෙරට පාසල් පද්ධතිය තුළ ද ඒ වෙනස ඇති කිරීම වෙනුවෙන් විද්‍යා, තාක්ෂණ, ඉංජිනේරු, කලා සහ ගණිත ක්ෂේත්‍රයන් හරහා විධිමත් ප්‍රවේශයක් සිසු දරුවන්ට ලබාදිය යුතුයි. ඒ වෙනුවෙන් ප්‍රමුඛතාව ලබාදීමට අප පියවර ගනිමින් සිටිනවා.

සමස්ත අධ්‍යාපන පද්ධතිය ඩිජිටල්කරණයට දේශීය හා විදේශීය අනුගාහක පාර්ශවයන්ගෙන් ද සහාය ඇතිව පියවර ගන්නවා. 1-5 සහ 6-9 මෙන්ම 10-13 ශ්‍රේණි වශයෙන් නව අධ්‍යාපන ප්‍රතිසංස්කරණ හඳුන්වාදීමේ නියමු වැඩසටහන ද ලබන වසරේ දී ආරම්භ කරනවා.

එමෙන්ම වයස අවුරුදු 21ට පෙර සරසවියෙන් පිටවීමට හැකිවන පරිදි සිසුන්ගේ පාසල් විභාග පැවැත්වෙන ශ්‍රේණි සංශෝධනය කිරීමට ද සැලසුම් කර තිබෙනවා. ඒ අනුව ඉදිරියේ දී අ.පො.ස සාමාන්‍ය පෙළ විභාගය 10 ශ්‍රේණියේදීත් අ.පො.ස උසස් පෙළ විභාගය 12 ශ්‍රේණියේදීත් පැවැත්වීමට සැලසුම් කරනවා.

ඒ වගේම ඉදිරි වසර තුළ වතු පාසල් සංවර්ධනය වෙනුවෙන් ගුරුවරුන් 2535ක් බඳවා ගනිමින් ඔවුන් සඳහා පුහුණු අවස්ථා ලබාදීමට ද කටයුතු කරනවා.

වයස අවුරුදු 3-5 දක්වා වන මුල් ළමා විය සංවර්ධනය වෙනුවෙන් විශේෂ වැඩපිළිවෙළක් ද අධ්‍යාපන අමාත්‍යාංශය ළමා ලේකම් කාර්යාලය, ජාතික අධ්‍යාපන ආයතනය හා යුනිසෙෆ් සංවිධානය සමඟ එක්ව සැලසුම් කර තිබෙනවා.

ඒ වගේම ගුරු අධ්‍යාපනඥ සේවය, ගුරු උපදේශක සේවා, ගුරු පුරප්පාඩු ඇතුළු අධ්‍යාපන සේවයේ දැනට පවතින සියලුම පුරප්පාඩු ද ලබන වසරේ පාසල් ආරම්භ කිරීමට පෙර පිරවීමට අවශ්‍ය පියවර ගෙන තිබෙනවා.

ඇල්පිටිය ප්‍රාදේශීය සභාවේ මෙවර අයවැය අද (05) පරාජයට පත්ව ඇති බව වාර්තා වෙයි .

ඇල්පිටිය ප්‍රාදේශීය සභාවේ සභාපති කරුණාසේන පොන්නම්පෙරුම විසින් 2024 වසරට අදාළ අයවැය යෝජනා සභාව වෙත ඉදිරිපත් කර තිබූ අතර එහිදී වැඩි ඡන්ද 9කින් එය පරාජයට පත්ව ඇත.

සභාවේ උප සභාපතිවරයා ප්‍රමුඛ පාලක පොදුජන පෙරමුණ නියෝජනය කරන මන්ත්‍රීවරුන් හත් දෙනෙකුද මෙවර අයවැයට විරුද්ධව චන්දය ප්‍රකාශ කිරීම මෙහිදී විශේෂත්වයකි.

එහිදී අයවැය ට පක්ෂව ජන්දය ලබාදී ඇත්තේ පොදුජන පෙරමුණ නියෝජනය කළ මන්ත්‍රීවරුන් 10 ක් පමණි.

සමගි ජන බලවේගයේ මන්ත්‍රීවරුන් 7ක් , ශ්‍රී ලංකා නිදහස් පක්ෂය නියෝජනය කරන මන්ත්‍රීවරුන් 3ක් සහ ජාතික ජන බලවේගයේ මන්ත්‍රීවරුන් 2ක් අයවැයට විරුද්ධව ඡන්දය ප්‍රකාශ කර ඇත.

වැට් බදු සංශෝධන පනත් කෙටුම්පත පිළිබඳ විවාදය එළඹෙන දෙසැම්බර් 10 වැනිදා පැවැත්වීමට පාර්ලිමේන්තුවේ අනුමැතිය අද (5)හිමිව තිබේ.

ස්ථාවර නියෝග අනුව පාර්ලිමේන්තුව ඉරිදා දින රැස් කිරීමට හැකියාව නොමැති අතර එසේ රැස්වීමක් සිදුකෙරෙනවා නම් ස්ථාවර නියෝග අත්හිට විය යුතුව තිබේ.

ඒ අනුව මෙම විවාදය වෙනුවෙන් සභාව එදින රැස් කිරීම සඳහා ස්ථාවර නියෝග අත්හිටුවීමටද පාර්ලිමේන්තුවේ අනුමැතිය අද හිමිවූ අතර එසේ ස්ථාවර නියෝග අත්හිටුවීමේ යෝජනාව සභානායක අමාත්‍ය ආචාර්ය සුසිල් ප්‍රේමජයන්ත විසින් පාර්ලිමේන්තුවට ඊයේ (04) ඉදිරිපත් කරනු ලැබීය.

මේ අනුව පාර්ලිමේන්තුව එදින උදේ 9.30 සිට සවස 4.30 දක්වා රැස්වීමට නියමිතය.

කුමන්ත්‍රණවලින් අරගල වලින් බය කර පොහොට්ටුව වට්ටන්න බැරි බව හම්බන්තොට දිස්ත්‍රික් මන්ත්‍රී නාමල් රාජපක්ෂ පවසයි.

විශාල ජන සහභාගීත්වයකින් යුතුව පොදුජන පෙරමුණේ දෙවන මහා සම්මේලනය අති උත්කර්ෂවත් අන්දමින් පැවැත්වීමට නියමිත බව ද ඔහු සඳහන් කරයි.

නාමල් රාජපක්ෂ මන්ත්‍රීවරයා මේ බව සඳහන් කර සිටියේ පොදුජන පෙරමුණේ තංගල්ල කාර්‍යාලයේ පැවති උත්සවයකදී අදහස් දක්වමින් ය.

පක්ෂය නැවත වතාවක් බිම් මට්ටමේ සිට ගොඩනගා රටේ ජාතික දේශපාලනයේ තීරණාත්මක බලවේගය බවට පත් කරන බවත් ඒ සමග එක්වන ලෙස ශ්‍රි ලංකාවාසී සියලු ප්‍රගතශීලී පොදු ජනතාවගෙන් ඉල්ලා සිටින බවත් මන්ත්‍රීවරයා එහිදී පැවසීය .

පොදුජන පෙරමුණේ දෙවන මහා සම්මේලනය අති උත්කර්ෂවත් අන්දමින් සුගතදාස ගෘහස්ථ ක්‍රීඩාංගණයේදී දෙසැම්බර් මස 15 දා පස්වරු 1ට පැවැත්වෙන අතර ඒ සඳහා පක්ෂය නියෝජනය කරමින් බිම් මට්ටමේ සාමාජිකයන් සතර දෙසින් පැමිණිමට නියමිත බවද එහිදී ඔහු වැඩිදුරටත් පැවසීය .

ලන්දේසි යටත් විජිත සමයේ ශ්‍රී ලංකාවෙන් නෙදර්ලන්තයට රැගෙන ගොස් යළි මෙරටට භාරදෙන ලද කෞතුක භාණ්ඩ මහජන ප්‍රදර්ශනය සඳහා විවෘත කිරීම බුද්ධ ශාසන සහ සංස්කෘතික කටයුතු අමාත්‍ය විදුර වික්‍රමනායක සහ ජාතික ආරක්ෂාව පිළිබඳ ජනාධිපති ජ්‍යෙෂ්ඨ උපදේශක හා ජනාධිපති කාර්ය මණ්ඩල ප්‍රධානි සාගල රත්නායක ගේ ප්‍රධානත්වයෙන් ජාතික කෞතුකාගාරයේ දී අද (05) සිදු විය.

නෙදර්ලන්තයේ සුප්‍රසිද්ධ Rijks කෞතුකාගාරයේ තැනපත් කර තිබූ රනින් නිම කරන ලද කොපුව සහිත කස්තානයක්, රිදියෙන් නිම කරන ලද කොපුව සහිත කස්තානයක්, රනින් නිමකළ පිහියක්, මහ තුවක්කු දෙකක් (බිත්ති තුවක්කු) සහ ලෙව්කේ දිසාවේ හට අයත්ව තිබූ බවට සැලකෙන කාලතුවක්කුවක් යන කෞතුක භාන්ඩ 06ක් වර්ෂ 1765 දී ලන්දේසීන් මහනුවර රජ මාලිගාව වටලන අවස්ථාවේදී ලන්දේසි පෙරදිග ඉන්දීය වෙළෙඳ සමාගම විසින් රැගෙන ගොස් ඇති බවට තහවුරු විය.

පසුකාලීනව පර්යේෂණයකින් සිදු කරන ලද තහවුරු කිරීම් මත පදනම්ව මෙම කෞතුක භාණ්ඩ හය නැවත ශ්‍රී ලංකාවට භාරදෙන ලෙස රාජ්‍ය තාන්ත්‍රික ඉල්ලීමක් සිදු කර තිබිණි. ඒ අනුව දෙරට අතර රාජ්‍ය තාන්ත්‍රික සබඳතා ශක්තිමත් කිරීමේ සුවිශේෂ අවස්ථාවක් ලෙස මෙම කෞතුක භාණ්ඩ 06 නිල වශයෙන් ශ්‍රී ලංකාවට භාරදීමට නෙදර්ලන්ත රජය කටයුතු කරනු ලැබීය.

මෙම කෞතුක භාණ්ඩ දෙසැම්බර් 5 වන දින සිට නැවත දැනුම් දෙන තුරු කොළඹ ජාතික කෞතුකාගාරයේ මහජන ප්‍රදර්ශනයට තැබීමට නියමිතය.

එම අවස්ථාව සනිටුහන් කරමින් විශේෂ සමරු මුද්දරයක් ද නිකුත් කිරීම ද මෙහිදී සිදු කෙරිණි.

ශ්‍රී ලංකාවේ නෙදර්ලන්ත තානාපතිනි බොනි හෝබාහ් (Bonnie Horbach), ජනමාධ්‍ය රාජ්‍ය අමාත්‍ය ශාන්ත බණ්ඩාර, ජාතික කෞතුකාගාර දෙපාර්තමේන්තුවේ අධ්‍යක්ෂ ජනරාල් සජානි කස්තුරිආරච්චි ඇතුළු පිරිසක් මෙම අවස්ථාවට එක්ව සිටියහ.

බේරේ වැව සංවර්ධන ව්‍යාපෘතියේ ප්‍රගතිය හා ඉදිරි සැලසුම් සම්බන්ධයෙන් සකස් කළ වාර්තා ජනාධිපතිවරයා වෙත ඉදිරිපත් කිරීම සඳහා මෙම දෙසැම්බර් 15 දිනට පෙර ලබා දෙන ලෙස ජාතික ආරක්ෂාව පිළිබඳ ජනාධිපති ජ්‍යෙෂ්ඨ උපදේශක හා ජනාධිපති කාර්ය මණ්ඩල ප්‍රධානි සාගල රත්නායක සින් අදාළ ආයතන ප්‍රධානීන්ට උපදෙස් දුන්නේය.

එසේම කොළඹ නගර අලංකරණ සැලැස්ම හා එහි වර්තමාන ප්‍රගතිය පිළිබඳ වාර්තාවක් ද ජනාධිපතිවරයා වෙත ඉදිරිපත් කිරීම සඳහා කඩිනමින් ලබා දෙන ලෙස සාගල රත්නායක  අදාළ ආයතන ප්‍රධානීන්ට වැඩිදුරටත් දැනුම් දුන්නේය.

සාගල රත්නායක  මෙම උපදෙස් ලබා දුන්නේ කොළඹ නගර අලංකරණ සැලැස්ම ක්‍රියාත්මක කිරීම හා බේරේ වැව සංවර්ධන ව්‍යාපෘතියේ ප්‍රගති සමාලෝචනය වෙනුවෙන් ඊයේ (04) ජනාධිපති කාර්යාලයේදී පැවති සාකච්ඡාවේදීය.

බේරේ වැව ආශ්‍රිත මහජන ක්‍රියාකාරකම් සඳහා සංවර්ධනය කර භාවිතා කළ හැකි හඳුනාගත් ඉඩම් කොටස් පෞද්ගලික අංශයේද සහභාගීත්වයෙන් සංවර්ධනය කිරීම මෙන්ම බේරේ වැවට හරවන ලද මළ අපද්‍රව්‍ය නළ මාර්ග වළක්වාලීම සහ වැවේ බැක්ටීරියා හා ඇල්ගී ප්‍රතිශතය අවම කිරීමේ ව්‍යාපෘතියේ වර්තමාන ප්‍රගතිය ද මෙහිදී විමසා බැලීම සිදුවිය.

මේ වන විට ස්ථාන 03ක පිහිටි මධ්‍යම බස් නැවතුම්පොළ, කොටුව දුම්රිය ස්ථානයට යාබදව ස්ථානගත කර දැනට බස් නැවතුම්පොළ පිහිටි ඉඩම් වාණිජමය කටයුතු සඳහා පෞද්ගලික අංශය සමඟ එක්ව සංවර්ධනය කිරීම, කොළඹ නගරයේ පිහිටි අනාරක්ෂිත ගස් ඉවත් කර ඒ වෙනුවට සුදුසු ගස් වර්ග නැවත සිටුවීම, කොළඹ නගරයේ අත්හැර දමන ලද වල් බිහිවී ඇති ගොඩනැගිලි හඳුනාගෙන ඒවා නඩත්තු කිරීම සඳහා සුදුසු වැඩපිළිවෙළක් සැකසීම, කොළඹ නගරයේ රථ වාහන ධාවනය, මගීන් නංවාගැනීම හා නතර කිරීම සම්බන්ධව නියාමන සැලැස්මක් සැකසීම, වැසි ජලය බැසයාම ක්‍රමවත් කිරීම සඳහා දැනට ක්‍රියාත්මක වන ව්‍යාපෘතිවල ප්‍රගතිය සම්බන්ධයෙන් ද මෙහිදී දීර්ඝ ලෙස සාකච්ඡා කෙරිණි.

එමෙන්ම එළැඹෙන නත්තල් සමයේ කොළඹ නගරයේ තදබදය අවම කර ගැනීම සහ කළමනාකරණය සඳහා ශ්‍රී ලංකා පොලීසිය, කොළඹ මහ නගර සභාව හා වෙළෙඳ සංගම් ඒකාබද්ධව වැඩපිළිවෙළක් සකස් කිරීම කෙරෙහිද මෙහිදී අවධානය යොමු විය.

කොළඹ මහ නගර සභාව, නාගරික සංවර්ධන අධිකාරිය, මාර්ග සංවර්ධන අධිකාරිය, ශ්‍රී ලංකා ඉඩම් සංවර්ධන සංස්ථාව සහ ශ්‍රී ලංකා පොලීසිය නියෝජනය කරමින් ජ්‍යෙෂ්ඨ නිලධාරීහු මෙම සාකච්ඡාවට සහභාගි වූහ.

පසුගිය වසරට වඩා මෙවර අයවැයෙන් අධ්‍යාපනය වෙනුවෙන් වෙන්ව ඇති ප්‍රතිපාදන තුළ රුපියල් බිලියන 55ක වැඩිවීමක් සිදුව ඇති බවත්, අර්බුදකාරී ආර්ථික පසුබිමක පැවතියදීත් රටක් වශයෙන් අධ්‍යාපනය නගාසිටුවීම වෙනුවෙන් එවැනි අවධානයක් යොමුවීම පිළිබඳ විෂය භාර අමාත්‍යවරයා වශයෙන් තමා සතුටට පත්වන බවත් අධ්‍යාපන අමාත්‍ය සුසිල් ප්‍රේමජයන්ත පැවසීය.

පාර්ලිමේන්තුවේ අද(05) ට යෙදී තිබුණු අධ්‍යාපන වැය ශිර්ෂය සම්බන්ධව සාකච්ඡාවට එක්වෙමින් අමාත්‍යවරයා මේ බව ප්‍රකාශ කළේය.

2023 වර්ෂයේ අධ්‍යාපනය වෙනුවෙන් තිබූ මුදල රුපියල් බිලියන 466. 276 වන බවත් මෙවර අයවැයෙන් අධ්‍යාපනය වෙනුවෙන් රුපියල් බිලියන 517.05 ක් වෙන්ව ඇති බව ද එය පසුගිය වසරට සාපේක්ෂව රුපියල් බිලියන 55ක වැඩිවීමක් බව ද වැඩිදුරටත් අමාත්‍යවරයා පෙන්වා දුන්නේ ය.

පෙළ පොත් මුද්‍රණයට කඩදාසි නොතිබුණු, ගුරුවරුන්ට විභාග රාජකාරී සඳහා යාමට තෙල් පෝලිම්වල සිටින්නට සිදුවුණු රට ම අර්බුදයකට පත්ව තිබූ මොහොතක විෂය භාර අමාත්‍යවරයා වශයෙන් වත්මන් ජනාධිපතිතුමන් විසින් 2022 වර්ෂයේ තමා පත්කරන ලද බවත් එතැන් සිට මේ වනවිට අධ්‍යාපන ක්ෂේත්‍රයේ පැවති බොහෝ ගැටළු හඳුනාගනිමින් පියව‍රෙන් පියවර මෙම තත්වයට පත්කරගැනීමට කටයුතු කළ බවත් මෙහි දී අමාත්‍යවරයා පෙන්වා දුන්නේය.

බොහෝ දියුණු රටවල ජාතික ධනයෙන් විශාල කොටසක් නියෝජනය කරන්නේ STEAM අධ්‍යාපනය තුළින් ගොඩනැගුණු මානව සම්පත් බවත් මෙරට පාසල් පද්ධතිය තුළ ද ඒ වෙනස ඇති කිරීම වෙනුවෙන් විද්‍යා, තාක්ෂණ, ඉංජිනේරු, කලා සහ ගණිත ක්ෂේත්‍රයන් හරහා විධිමත් ප්‍රවේශයක් දරුවන්ට ලබාදිය යුතු බව ද ඒ වෙනුවෙන් ප්‍රමුඛතාව ලබාදීමට පියවර ගනිමින් සිටින බව ද අමාත්‍යවරයා පැවසීය.

මෙවර උසස් පෙළ සමත් සිසුන්ගෙන් සිසුන් 43000කට සරසවි ප්‍රවේශයට අවස්ථාව සලසා දෙන බවත්, විෂය වර්ග අනුව විශ්වවිද්‍යාල 17ටම සරසවි ආචාර්යවරුන්ගේ පුරප්පාඩු සියල්ල පිරවීමට පියවර ගන්නා බවත්, සමස්ත අධ්‍යාපන පද්ධතිය ඩිජිටල්කරණයට දේශීය හා විදේශීය අනුගාහක පාර්ශවයන්ගෙන් ද සහාය ඇතිව පියවර ගන්නා බවත්, 1-5/6-9/10-13 ශ්‍රේණි සඳහා නව අධ්‍යාපන ප්‍රතිසංස්කරණ හඳුන්වාදීමේ නියමු වැඩසටහන ලබන වසරේ දී ආරම්භ කරන බවත් වැඩිදුරටත් කරුණු දක්වමින් අමාත්‍යවරයා සඳහන් කළේය.

එමෙන්ම වයස අවුරුදු 21ට පෙර සරසවියෙන් පිටවීමට හැකිවන පරිදි සිසුන්ගේ පාසල් විභාග පැවැත්වෙන ශ්‍රේණි සංශෝධනයට සැලසුම් කර ඇති බවත් ඒ අනුව ඉදිරියේ දී සාමාන්‍ය පෙළ විභාගය 10 ශ්‍රේණියේදීත් උසස් පෙළ විභාගය 12 ශ්‍රේණියේදීත් පැවැත්වීමට සැලසුම් කරන බවත් අමාත්‍යවරයා පැවසීය.

එමෙන්ම ඉදිරි වසර තුළ වතු පාසල් සංවර්ධනය වෙනුවෙන් ගුරුවරුන් 2535ක් බඳවා ගනිමින් ඔවුන් සඳහා පුහුණු අවස්ථා ලබාදීමට ද කටයුතු කරන බව අමාත්‍යවරයා සඳහන් කළේය.

වයස අවුරුදු 3-5 දක්වා වන මුල් ළමා විය සංවර්ධනය වෙනුවෙන් විශේෂ වැඩපිළිවෙළක් ද අධ්‍යාපන අමාත්‍යාංශය ළමා ලේකම් කාර්යාලය ජාතික අධ්‍යාපන ආයතනය හා යුනිසෙෆ් සංවිධානය සමග එක්ව සැලසුම් කර ඇති බවත්, මෙරට විශේෂ අධ්‍යාපනය සංවර්ධනයට ජාත්‍යන්තර ප්‍රමිතීන්ට අනුගතව සැලසුම් සකස් කිරීමට ඉදිරියේ දී පියවර ගන්නා‍ බවද වැඩිදුරටත් පෙන්වා දුන්නේ ය.

2030 වසර වනවිට සෑම දරුවෙකුට ම දිවා ආහාර වේලක් ලබාදීමට පියවර ගන්නා බව ද, පාසල් දරුවන්ට පාවහන් ලබාදීම වෙනුවෙන් මෙවර අයවැයෙන් රුපියල් මිලියන 2500 ක් වෙන්ව ඇති බවත් එබැවින් පාවහන් තිළිණපත් ලබාදෙන සිසුන් සංඛ්‍යාව ලක්ෂ 10ක් දක්වා වැඩිකිරීමට අපේක්ෂා කරන බවත් අමාත්‍යවරයා පැවසීය.

එළඹෙන වසරේ මුල වනවිට මෙරට පාසල් පද්ධතිය තුළ පවත්නා ගුරු හිඟය සම්පූර්ණයෙන් පියවීමට අපේක්ෂා කරන බව ද අමාත්‍යවරයා තවදුරටත් පැහැදිලි කළේය.

– Media unit

මධ්‍යම තැපැල් හුවමාරුවට ලැබී තිබූ සැකකටයුතු පාර්සල් 25 ක තිබී රුපියල් කෝටි 4 කට අධික වටිනාකමින් යුත් මත්ද්‍රව්‍ය තොගයක් ශ්‍රී ලංකා රේගු මත්ද්‍රව්‍ය පාලන අංශය අත්අඩංගුවට ගත් බව වාර්තා වෙයි.

රේගු මාධ්‍ය ප්‍රකාශක, ජ්‍යේෂ්ඨ රේගු අධ්‍යක්ශ සීවලී අරුක්ගොඩ සඳහන් කරන අතර මධ්‍යම තැපැල් හුවමාරුව තුළ කළ ආවේක්ෂණ රාජකාරිවලදී මත්ද්‍රව්‍ය අඩංගු යයි සැක පිට පාර්සල් 25 ක් පරීක්ෂණ කළ බවත් මෙම පාර්සල් ජර්මනිය සහ එංගලන්තය සිට කොළඹ,මහරගම,බත්තරමුල්ල, බොරලැස්ගමුව, පානදුර මොරටුව හා මහනුවර යන ප්‍රදේශවල පදිංචි පුද්ගලයන් වෙත එවා තිබුණද සොයා බැලීමේදී ඒවා ව්‍යාජ ලිපිනයන් බව තහවුරු වූ බවත් සඳහන් කළේය.

එම පාර්සල් තුළ එක්ටසි නැමැති මෙතන්පිටමයින් අඩංගු මත්පෙති 2193 ක්, කුෂ් නැමැති ගංජා විශේෂය ග්‍රෑම් 1740 ක් සහ එම්පෙතමින් නමැති මත්ද්‍රව්‍ය ග්‍රෑම් 29 සොයා ගත් බවත් අත්අඩංගුවට ගන්නා ලද මත්ද්‍රව්‍යවල වෙළෙඳපොළ වටිනාකම රුපියල් මිලියන 43 කට ආසන්න බවත් ඔහු පවසයි.

මෙම වැටලීම ශ්‍රී ලංකා රේගුව මත්ද්‍රව්‍ය පාලන අංශයේ නිලධාරීන් සිදුකර ඇති අතර ඒ සඳහා තැපැල් දෙපාර්තමේන්තුවේ නිලධාරීන්ගේ සහාය ලැබුණු බවද ඔහු පැවසීය.

පරීක්ෂණ කටයුතු අවසානයේ මත්ද්‍රව්‍ය තොගය වැඩිදුර විමර්ශන කටයුතු සඳහා ශ්‍රී ලංකා පොලිසිය මත්ද්‍රව්‍ය නාශක අංශයට භාරදීමට නියමිත බවද රේගු මාධ්‍ය ප්‍රකාශක, ජ්‍යේෂ්ඨ රේගු අධ්‍යක්ශ සීවලී අරුක්ගොඩ වැඩිදුරටත් සඳහන් කර සිටියේය.

නව ක්‍රීඩා අමාත්‍ය හරීන් ප්‍රනාන්දු විසින් ශ්‍රී ලංකා ජාතික ක්‍රිකට් කණ්ඩායම සඳහා නව තේරීම් කමිටුවක් පත්කර ඇත.

මෙහි ඇති විශේෂත්වය වන්නේ මෙම තේරීම් කමිටුවේ සියලුම ක්‍රීඩකයන් ජාතික ක්‍රිකට් කණ්ඩායම නියෝජනය කර මෑතකදී විශ්‍රාම ලැබුවන් වීමය.

ඒ අනුව හිටපු ආරම්භක පිතිකරුවකු වූ උපුල් තරංග සභාපති ධූරය දරණ නව ක්‍රිකට් තේරීම් කමිටුවේ සෙසු සාමාජිකයන් ලෙස දඟ පන්දු යවන්නන් වන ඩිල්රුවන් පෙරේරා සහ අජන්ත මෙන්ඩිස් මෙන්ම හිටපු ආරම්භක පිතිකරුවකු වන තරංග පරණවිතාන පත්කර තිබේ.

මෙරට පළමු ඩිජිටල් උප්පැන්න සහතිකය අද (දෙසැ. 5) කළුතර දිස්ත්‍රික් ලේකම් කාර්යාලයේදී නිකුත් කර තිබේ.

ස්වදේශ කටයුතු රාජ්‍ය අමාත්‍ය අශෝක ප්‍රියන්තගේ ප්‍රධානත්වයෙන් සිදු කෙරුණු E – ජනගහනය ලේඛන වැඩසටහන යටතේ මෙම ජාතික ඩිජිටල් උප්පැන්න සහතිකය නිකුත් කිරීම සිදු කර ඇත.

කළුතර දිස්ත්‍රික්කයෙන් ආරම්භ කර ඇති මෙම ජාතික ඩිජිටල් උප්පැන්න සහතිකය ලබා දීමේ වැඩසටහන සෙසු දිස්ත්‍රික්ක සඳහා කඩිනමින් ව්‍යාප්ත කිරීම ආරම්භ කර ඇති බව ස්වදේශ කටයුතු රාජ්‍ය අමාත්‍ය අශෝක ප්‍රියන්ත සඳහන් කර තිබේ.

එමෙන් ම ඩිජිටල් තාක්ෂණය සහිත ජාත්‍යන්තර ප්‍රමිතියට අනුව මෙම ජාතික උප්පැන්න සහතිකයට ලබා දෙන අංකය ජාතික හැඳුනුම්පත් අංක බවට පරිවර්තනය කරන බව ද ඔහු ප්‍රකාශ කර ඇත.

ඒ අනුව, නිකුත් කළ ජාතික ඩිජිටල් උප්පැන්න සහතිකය මගින් ආකර්ෂණීය බව, නිවැරදි බව හා පිළිගැනීම වැඩි ආරක්ෂිත උපාංග ඇතුළත් මුද්‍රිත සහතිකයක් ලබා දීම ද අරමුණ කර ගෙන E – ජනගහන ලේඛන වැඩසටහන ආරම්භ කරන තිබේ.

ඒ යටතේ නිකුත් කිරීමට නියමිත උප්පැන්න සහතිකය “ජාතික උප්පැන්න සහතිකය ” ලෙසින් නම් කර ඇත.

මෙම උප්පැන්න සහතිකයේ දරුවාට ඉදිරියේදී ලබා දීමට නියමිත ජාතික හැඳුනුම්පත් අංකය “මගේ අංකය” ලෙසින් පුද්ගලයින් ලියාපදිංචි කිරීමේ දෙපාර්තමේන්තුව සමග එක්ව ඇතුළත් කර තිබේ.

ඒ් අනුව දරුවකුට උපතේදී ම අනන්‍යතා අංකයක් ලබා දීමට හැකියාව ලැබෙන අතර ඒ් තුළින් ජනගහන ලේඛනයක් ගොඩනැගීමට හැකියාව ලැබෙනු ඇත.

ජාතික උප්පැන්න සහතිකයන් නිකුත් කිරීමේ ක්‍රමවේදය පහතින් දැක්වේ.

සහතිකයේ ඇතුළත් වන තොරතුරු

උපන් ස්ථානය පිළිබඳ තොරතුරු

මගේ අංකය

සම්පූර්ණ නම ( සිංහල / ඉංග්‍රීසි හෝ දෙමළ / ඉංග්‍රීසි)

පියාගේ ජාතික හැඳුනුම්පත් අංකය / නම / ජාතිය / ජාතිකත්වය

මවගේ ජාතික හැඳුනුම්පත් අංකය / නම / ජාතිය / ජාතිකත්වය

මෙලෙස නිකුත් කිරීමට නියමිත සහතිකයේ විශේෂ ලක්ෂණ

රෙජිස්ට්‍රාර් ජනරාල්ගේ අත්සනින් නිකුත් වීම.

සහතිකයේ පුද්ගලයාගේ ජාතිය / ජාතිකත්වය ඇතුළත් වීම.

මව්පියන්ගේ විවාහක / අවිවාහක බව ඉවත් වීම.

මෙම උප්පැන්න සහතිකය සිංහල / ඉංග්‍රීසි හෝ දෙමළ / ඉංග්‍රීසි භාෂාවලින් නිකුත් කිරීම.

විශේෂ ආරක්ෂිත උපාංග යෙදූ සහතිකයක් නිකුත් කිරීම.

සහතිකයේ තොරතුරු සංශෝධනය කළ හොත් එකී නිවැරදි තොරතුරු පමණක් ඇතුළත් නව සහතිකයක් නිකුත් කිරීම.

mawbima.lk