පුවත්

කොවිඩ් වසංගත  ඇඳිරි නීති සමයේ  රුපියල් මිලියන 890ක් මුහුදේ සෝදා හැරි බවට චෝදනා ඉදිරිපත්ව ඇති ගල්කිස්ස මුහුදු වෙරළ ආශ්‍රිත වැලි පිරවීමේ ව්‍යාප්තිය හිටපු අමාත්‍ය පාඨලී චම්පික ආරම්භ කරනු ලැබූවක් බව ට පසුගිය දා චෝදනා එල්ල විය.

අද (01) හිටපු අමාත්‍යවරයා මේ සඳහා ප්‍රතිචාර දක්වා තිබිණ.

ඒ මූලික වශයෙන් අපේ රජයේ මෙම විෂයභාර ඇමති මෛත්‍රීපාල සිරිසේන බවත් මේ කාර්යයට අදාළ සංශෝධිත කැබිනට් පත්‍රිකාව ඉදිරිපත් කළේ, වත්මන් පරිසර සහ වනජීවී සම්පත් අමාත්‍යතුමා බවත් සඳහන් කරමින්ය.

මේ සම්බන්ධව හිටපු අමාත්‍ය පාඨලි චම්පික රණවක නිකුත්කළ සම්පූර්ණ නිවේදනය පහත දැක්වෙයි.

සිරිසේනගේ ප්‍රොජෙක්ට් එකක් !

අද (01) උදෑසන ගල්කිස්ස ප්‍රදේශයේ වෙරළ තීරයට සාමාන්‍ය පුද්ගලයන්ට ඇතුළුවීමට ඉඩ නොදී ආරක්ෂක අංශ යොදවමින්, පසුගිය කාලයේ ජනතාව රැවටීමට කූට නාටක හා මඩ ව්‍යාපාර සිදුකළ වෙබ් මාධ්‍යවේදියෙක් ඇතුළු ආණ්ඩුවට සම්බන්ධ මාධ්‍යවේදීන් කිහිපදෙනෙක්, ගල්කිස්ස වෙරළ සෝදාපාළුවීම පිළිබඳව තිර නාටකයක් සමඟ වැඩපිළිවෙළක් සිදුකරමින් සිටින බවට තොරතුරු වාර්තා විය.

මොකක්ද මේ ගල්කිස්ස වෙරළේ සිදුවූ දේ ? මොකක්ද එහි සත්‍ය සිද්ධිය ? ඒ සිද්ධියට පසුගිය ආණ්ඩුව සම්බන්ධයි ද ? ඒ ආණ්ඩුවේ මහනගර හා බස්නාහිර සංවර්ධන අමාත්‍ය ධුරය දැරූ මා හෝ අමාත්‍යාංශය සම්බන්ධයි ද ? මෙය පරිසර හා වනජීවී දෙපාර්තමේන්තුවේ ක්‍රියාවලියක් ද ? වත්මන් ආණ්ඩුවේ ක්‍රියාවලියක් ද ? ජනපති සම්බන්ධයි ද? අගමැති සම්බන්ධයි ද?

මෙය සම්පූර්ණයෙන්ම වෙරළ සංරක්ෂණ දෙපාර්තමේන්තුව විසින් සැලසුම් කරන ලද, ක්‍රියාත්මක කරන ලද ව්‍යාපෘතියකි. වෙරළ සංරක්ෂණ දෙපාර්තමේන්තුව, පසුගිය ආණ්ඩුවේ ජනාධිපති මෛත්‍රීපාල සිරිසේන මහතාගේ පරිසර හා ස්වභාව සම්පත් මහවැලි අමාත්‍යාංශය යටතේ පැවතුණි.  එහි ප්‍රධාන විධායක නිලධාරියා ලෙස ක්‍රියාකළේ, ප්‍රභාත් ධර්මකීර්ති මහත්මා ය. එය මාගේ මහනගර හා බස්නාහිර සංවර්ධන අමාත්‍යාංශයට කිසිදු සම්බන්ධයක් නොතිබිණ.

නිශ්චිත කැබිනට් තීන්දුව පොහොට්ටු ආණ්ඩුව ගත්තේ : ඇඳිරි නීතිය අස්සේ වැලි පුරවපු රහසත් මෙන්න !

කලුතර කැලිඩෝ වෙරළ සහ ගල්කිස්ස හා රත්මලාන ආදී ප්‍රදේශවල වෙරළ ප්‍රතිසංස්කරණ කටයුතු පිළිබඳ නිශ්චිත කැබිනට් තීන්දුව ගෙන ඇත්තේ, 2020 ජනවාරි 22 වන දින ය. ඒ, ගෝඨාභය රාජපක්ෂ, මහින්ද රාජපක්ෂ, පාලනය යටතේ ය. රෝඩ් නීල්සන් නම් සමාගම හරහා මෙම වසරේ මාර්තු මාසයේදී එය ක්‍රියාත්මක කර තිබේ. මේ සඳහා ධීවර ජනතාවගේ විරෝධතාව එල්ලවන හෙයින්, ඇඳිරි නීතියට මුවාවී කඩිමුඩියේ මෙම ව්‍යාපෘතිය ක්‍රියාත්මක කර තිබේ. මේ සඳහා ආණ්ඩුවේ නායකයින් සහ මන්ත්‍රීවරු විශාල දේශපාලන වාසියක් ලබාගැනීමට කටයුතු කර ඇති බව පැහැදිළි ය. එමෙන්ම වෙරළ සංරක්ෂණ දෙපාර්තමේන්තුවේ අධ්‍යක්ෂකවරයා ඒ පිළිබඳව මාධ්‍ය ප්‍රකාශ ද නිකුත් කර ඇති අතර, ඒවා ආණ්ඩුවට සම්බන්ධ පුවත්පත් හා විද්‍යුත් මාධ්‍යවල පළකර තිබේ.

බොරුව හොරකම පිරුණු ආණ්ඩුවක් !

දැන් මොකද වෙලා තියෙන්නෙ ? යම්කිසි සිදුවීමක් හේතුවෙන් රුපියල් දසලක්ෂ අටසිය අනූවක් වැය කර පිරවූ වැලි ප්‍රමාණයෙන් විශාල ප්‍රමාණයක් නැවත මුහුදට ගලාගෙන ගොස් තිබේ. එසේ වීමට හේතු දක්වමින් වෙරළ සංරක්ෂණ ආයතනය පවසන්නේ එය ස්වාභාවික ක්‍රියාවලියක් බවයි. නැවත එම වැලි ඇතිවන බවයි.

අද වත්මන් ආණ්ඩුව ගෙනයන්නෙ බොරුවෙන් හා වංචාවෙනි. විශේෂයෙන්ම හමුදා නිලධාරීන් දාල, බුද්ධි අංශ දාල රටේ ජනතාවගේ කොරෝනා මර්ධනය කිරීමට කටයුතු කළත්, තමන්ගේ හමුදා කඳවුරුවල කොරෝනා මර්ධනය කරගන්න බැරි ආණ්ඩුවක් බව ඔප්පු වී තිබේ. පසුගිය කාලයේ රටේ ආර්ථිකය පාලනය කරගැනීමට නොහැකිව, රාජ්‍ය අංශයේ සේවකයින්ගෙ වැටුප් ගෙවාගැනීමට නොහැකිව, රාජ්‍ය අංශයේ සේවකයින්ගේ වැටුප් කප්පාදු කළ වත්මන් ආණ්ඩුව, මේ සියලු ව්‍යසන මධ්‍යයේ මාර්ග සංවර්ධන අමාත්‍යාංශය හා අනෙකුත් අමාත්‍යාංශ හරහා දැවැන්ත ජාතික මංකොල්ලයක් ගෙනියමින්, ජගුප්සාජනක ලෙස සෑම ක්ෂේත්‍රයක්ම හොරකම හා වංචාව සමඟ ඉදිරියට ගෙනයමින් සිටිති.

බිලියන 9ක වංචාවක් හමුවේ ICTA ප්‍රධානියෙක් ඉල්ලා අස්වුණා !

මෑතකදී ICTA ආයතනයේ ප්‍රධානියෙක් විදියට කටයුතු කළ, ආචාර්ය සංජීව මහතා සිය තනතුරින් ඉවත් විය. එතුමාට ඉන් ඉවත්වීමට සිදුවූයේ, ජාතික හැඳුනුම්පත හරහා රුපියල් බිලියන 9 ක මහා වංචාවක් සිදුවන බව හෙළිදරව් කළ හෙයිනි. 

මේ අය ම තමයි වියත්මඟ ආදියේ කටයුතු කළේ. අද ඒ අය පවා රට තුළ සිදුවන මහා ජාතික මංකොල්ලය දැක සිය තනතුරුවලින් ඉස්ලා අස්වීම පවා සිදුකරති. ආණ්ඩුව තමන්ගේ සුපුරුදු කූට නාටකය නතර කර නොමැති අතර මාධ්‍ය සංග්‍රාමයක් කරමින් ජනතාවට තර්ජන ඉදිරිපත් කරමින් කටයුතු කරමින් සිටිති.

කොවිඩ් මැඩපු සෞඛ්‍ය - ආරක්ෂක අංශ ප්‍රධානීන්ව අවඥාවට ලක්කරවූ ආණ්ඩුව !

තොණ්ඩමන් මැතිතුමාගේ අවමංගල්‍ය කටයුතු සියලු නීති රීති කඩ කරමින් සිදුකෙරිණි. මේ මඟින් පොලීසිය ඇතුළු ආරක්ෂක අංශ මෙන්ම සෞඛ්‍ය සේවා නිලධාරීන්, රට ඇතුලෙ විහිළු සපයන්නන් බවට පරිවර්තනය වී තිබේ. ආරක්ෂක අංශවල ගෞරවය, සෞඛ්‍ය අධ්‍යක්ෂක ජෙනරාල්වරයාගේ ගෞරවය ආදිය අද දේශපාලනමය වශයෙන් ව්‍යසනයට ලක්වෙමින් අද ඒ සියලු දෙනා ජනතාව ඉදිරියේ අවඥාවට ලක්වෙමින් සිටී.

එවන් තත්ත්වයක් තුළ තවත් කූට නාටකයක් මවමින් ගල්කිස්ස වෙරළ සෝදායාමේ ව්‍යසනය පසුගිය ආණ්ඩුවේ අපේ අමාත්‍යාංශයට දැමීමට උත්සහ කරති. මුහුදු ඛාදනය වැළැක්වීම සඳහා වෙරළ සංරක්ෂණයට වෙරළ සංරක්ෂණ දෙපාර්තමේන්තුව පියවර අරන් තියෙනවනම් එය ඉතාමත් හොඳ දෙයකි. එය විධිමත් ශක්‍යතා අධ්‍යයනයක් සිදුකර, විධිමත් සමාජ අධ්‍යයනයක් සිදුකර, විද්‍යාත්මක ක්‍රමවේදයකට අනුව සිදුවිය යුතු දෙයකි. නමුත් කලබලයෙන්, කඩිමුඩියේ, රහසේ දේශපාලන හා වෙනත් වාසි තකා වැඩකටයුතු කිරීමේ අවසාන ප්‍රතිඵලය තමයි මේ සිදුවෙලා තියෙන්නෙ. එහි තවත් ප්‍රතිඵල අපට අනාගතයේ දැකගන්න පුළුවන්.

මේ ආකාරයටම විධිමත් ශක්‍යතා අධ්‍යයනයක් නොකොට, විධිමත් විද්‍යාත්මක ක්‍රියාවලියකින් තොරව කඩිමුඩියේ වරාය නගරය  ඉදිකිරීමට ද සියලු කටුයුතු සිදුකර තිබිණ. ඒ ආකාරයට වරාය නගරය ඉදිකරානම්, වරාය නගරයට අත්වෙන්නෙත් අද ගල්කිස්ස වෙරළට අත්පත්වෙච්ච ඉරණම ය.

2017 දී සිරිසේන මාරවිල පැත්තෙත් මේ වගේ වැඩක් කරලා !

2017 සිට මෛත්‍රීපාල සිරිසේන මැතිතුමා වෙරළ සංරක්ෂණ දෙපාර්තමේන්තුව හරහා මෙවැනිම ව්‍යාපෘතියක් මාරවිල ප්‍රදේශයේ ක්‍රියාත්මක කළ අතර එහි ප්‍රගතිය කුමක්ද යන්න මා දැනුවත් නැත. අනෙකුත් ප්‍රදේශවලත් මෙය සිදුකරන බව ප්‍රකාශ කර තිබුණු අතර එය ඉතා හොඳ වැඩකි. මේ ආණ්ඩුවේ තක්කඩින්ට, වංචනිකයින්ට හොඳ වැඩක්වත් කරන්න දැනුමක් නොමැත. වැඩ බැරි පිරිසකට ඉංජිනේරුමය කාර්යයන් සිකුළ නොහැක.

සෑම ආකාරයකම මාෆියා සමග ඩීල් දාන ආණ්ඩුවක් !

පසුගිය දිනවල හාල් මාෆියාව කඩන්න ගිහිල්ල හාල් මාෆියාව ඉස්සරහ දණ ගහපු අය, බාර් අරින්නෙ නෑ කියල හිටිඅඩියෙම බාර් ඇරපු හැටි, මේ සියල්ල පිටුපස තිබෙන ගණුදෙනු, ඉදිරි කාලයේ හෙළිදරව් වනු ඇත. කොවිඩ් වසංගතයත් මහා දැවැන්ත වංචාවක් බවට හරවා ගැනීමත්, සැනිටයිසර් එකේ ඉඳන් සිදුකළ වංචාවන්, විදේශවලින් රෝගීන් ආනයනය කිරීම ආදිය අනාගතයේ හෙළිදරව් වෙයි. මේවා මාධ්‍ය සංදර්ශනවලින් වහගැනීමට බැරිබව අණ්ඩුවට අප ප්‍රකාශ කර සිටිමු.

මහනගර හා බස්නාහිර සංවර්ධන අමාත්‍යාංශය මේ වෙරළ තීරයේ තත්ත්වය පිළිබඳව ඉංජිනේරුමය ශක්‍යතා අධ්‍යයනයක් කර තිබුණි. අපේ අරමුණක් තිබුණ මේ වෙරළ තීරය විධිමත්ව ගොඩනගන්න. එලෙස විධිමත්ව ගොඩනැගීම වෙනුවෙන් ශක්‍යතා අධ්‍යයනයක් පමණයි අප සිදුකළේ. ඒක ක්‍රියාත්මක කිරීම අනාගතයට භාරයි. එය විධිමත් ලෙස ක්‍රියාත්මක කළ යුතුයි. මේ වැඩබැරි කල්ලිවලට, ජාවාරම හිතේ තියාගෙන ඉන්න කල්ලිවලට, කූට නාටකවලින් සංවර්ධනය කරන්න පුළුවන් කියල හිතන කල්ලිවලට නම් කවදාවත් මේ වෙරළ සංරක්ෂණය කරගන්න බෑ. රටේ ආර්ථිකය ගොඩනගන්නත්, අනෙකුත් සංවර්ධන කටයුතු සිදුකරන්නත් බෑ.

ජනතාව මර්ධනය කරල, ජනතාව පළවා හැරල, වෙරළ ඛාදනය වළක්වන්න බෑ. තුවක්කු පෙන්නල හාල්මිළ පාලනය කරන්න බෑ, ජනතාවට තර්ජනය කරල, ඇඳිරි නීතිය දාල, කකුලට වෙඩිතියනව කියල කොරෝනා මර්ධනය කරන්න බෑ, ආරක්ෂක අංශවල නිලධාරීන් අනවශ්‍ය රාජකාරීවල යොදවල ඒ හරහා රට පුරාම කොරෝනා බෙදන මධ්‍යස්ථාන ඇති කරපු අයට රටේ කිසිම දෙයක් කරන්න බැරි බව අද ඔප්පු වෙලා හමාරයි.

වෙරළ සංරක්ෂණය කිරීම අතිශය වැදගත් කටයුත්තක්. එය වෙරළ සංරක්ෂණ දෙපාර්තමේන්තුවේ විද්‍යාඥයින්ට අයත් කටයුත්තක්. එය නිවැරදිව සිදුකර නැත්නම් ඒ සඳහා ඔවුන් දඬුවම් ලැබිය යුතුයි. ඒවාට සම්බන්ධ මහවැලි හා වනජීවී දෙපාර්තමේන්තු හා ඒවා භාර ඇමතිවරයා ඒ සම්බන්ධව වගකිව යුතුයි. එහි මුදල් හානියක් සිදුවී ඇත්නම් පොදු දේපොළ පනත යටතේ ඔවුන්ට නඩු පැවරිය යුතුයි. ඒ සඳහා කැබිනට් මණ්ඩලය, අග්‍රාමාත්‍යවරයා, ජනාධිපතිවරයා, වගකිව යුතුයි. මේවා සම්බන්ධව බොරු ප්‍රචාර කරමින් පසුගිය ආණ්ඩුවට හෝ අපේ අමාත්‍යාංශයට පැවරීමෙන් පළක් නොවන බව ප්‍රකාශ කළ යුතුයි. අපේ අමාත්‍යාංශය යටතේ අපි නිවැරදිව වරාය නගරය ගොඩනැගීම විධිමත් පරිසර අධ්‍යයනයකට, ශක්‍යතා අධ්‍යයනයකට, සමාජ අධ්‍යයනයකට යටත්ව සිදුකළා. ඒ වගේම කෙරවලපිටියේ මුහුදුවැලි සැපයීමේ ක්‍රියාවලිය පරිසර, සමාජ හා විද්‍යාත්මක ක්‍රමවේදයකට අනුව සිදුකළා. අපේ ආදර්ශය අරගෙන වැඩකරන හැටි ඉගෙන ගන්න කියල අපි ආණ්ඩුවෙන් ඉල්ලා සිටිනවා.

ලේකම්,
අධ්‍යාපන අමාත්‍යාංශය,
ඉසුරුපාය,
බත්තරමුල්ල.

ලේකම්තුමනි,

#කොරෝනා නීති රීති උල්ලංඝනය කරමින් බප/පිළි කොතලාවලපුර විද්‍යාලයේ විදුහල්පති  ක‍්‍රියා කිරීම සම්බන්ධවයි. !

ඉහත විද්‍යාලයේ විදුහල්පති විසින් 2020. 05. 21 දින තම විද්‍යාලයේ ආචාර්ය මණ්ඩලය පාසලට කැඳවීමත්, ඒ වන විටත් පාසල් භූමිය තුල නාවික හමුදා කඳවුරක් පැවතීමත් පසුගිය දිනක එම කඳවුරේ නාවිකයකු කොරෝනා රෝගියකු ලෙස හඳුනාගැනීමත් යන කරුණු හේතුවෙන් ඇති වී තිබෙන අන්දෝලනාත්මක තත්වයට වගකිවයුත්තේ කවුරුන්ද පිළිබඳ සොයා බැලිය යුතුය.
 
පාසල තුල නාවික හමුදා කඳවුරක් පවතින පසුබිමක් තුල විදුහලේ ආචාර්ය මණ්ඩලය උක්ත දින කැඳවීමට ගෙන ඇති තීරණය පවතින කොරෝනා නීතිරීති  උල්ලංඝනය කිරීමක් බව ඉතා පැහැදිලිය.

මේ හේතුවෙන් පාසලේ ආචාර්ය මණ්ඩලයේ සාමාජිකයනුත් ඔවුන්ගේ පවුල්වල සාමාජිකයන් හා සමීපතයන් බලවත් අපහසුතාවයට පත්වීමත්, ඔවුන් වෙත සමාජයෙන් මතුවන බලපෑමත් පිළිබඳ අධ්‍යාපන හා සෞඛ්‍ය බලධාරීන්ගේත්, දේශපාලන අධිකාරියේත් විශේෂ අවධානය යොමු කරවමු.

අප සංගමය වෙත වාර්තා වී ඇති අන්දමට දිවයිනේ පාසල් බොහොමයක විදුහල්පතිවරුන් කොරෝනා නීති රීති උල්ලංඝනය කරමින් ඉතා අත්තනෝමතික ආකාරයට පාසල්වල ගුරු මණ්ඩල රැස්කිරීම්, දෙමාපියන් රැස්කිරීම්, දරුවන් පාසලට කැඳවීම් සිදුකර ඇති අතර තවදුරටත් එසේ සිදුකරමින්ද පවතී. පළාත් අධ්‍යාපන බලධාරීන්, කලාප අධ්‍යාපන අධ්‍යක්‍ෂකවරුන්, කොට්ඨාශ අධ්‍යාපන අධ්‍යක්‍ෂකවරුන් මේ පිළිබඳ නිසි අවධානය යොමු නොකිරීමත්, නොසැලකිලිමත් ලෙස කටයුතු කිරීමත් හේතුවෙන් පාසල් මට්ටමින් කොරෝනා නීතිරීති උල්ලංඝනය දිගින් දිගටම සිදුවෙමින් පවතී.
 
මෙවැනි කොරෝනා නීති රීති උල්ලංඝනය කිරීම්වලට තවත් උදාහරණ කිහිපයක් පහත පෙන්වමු.

නුගේගොඩ ශාන්ත ජෝන් විද්‍යාලයේ පසුගිය දිනක ගුරුවරුන් කැඳවා සෞඛ්‍යාරක්‍ෂිත ක‍්‍රම අනුගමනය කිරීමකින් තොරව ගුරු රැස්වීම් පවත්වා ඇති අතර, බප/පිළි/මාම්පේ ධර්මරාජ විදුහලේද මේ ආකාරයේ ගුරු රැස්වීම් පවත්වා ඇත්තේද කොරෝනා නීති රීති උල්ලංඝනය කරමින් බව පෙන්වා දෙමු.

ඉහත කී සිද්ධීන් පිළිබඳව දැඩි අවධානය යොමුකරන මෙන් අධ්‍යාපන හා සෞඛ්‍ය බලධාරීන්ගෙන් ඉතා  ඕනෑකමින් යුතුව ඉල්ලා සිටින අප සංගමය පවතින වසංගත තත්වය තුල අධ්‍යාපන අධ්‍යක්‍ෂකවරුන්, විදුහල්පතිවරුන් හා ගුරුවරුන් ක‍්‍රියා කළ යුතු ආකාරය පිළිබඳව විධිමත් උපදෙස් මාලාවක් නිකුත් කරන ලෙසද ඉල්ලා සිටිමු. ඉහත තත්වය කඩිනමින් පාලනය නොකළහොත් පාසල් මට්ටමින් කොරෝනා වසංගතය ව්‍යාප්තවීම දක්වා මෙය වර්ධනය විය හැකි බවද පෙන්වා දෙමු.

ස්තූතියි.

මෙයට,
විධායක සභාව වෙනුවෙන්,
මහින්ද ජයසිංහ
ප‍්‍රධාන ලේකම්
ලංකා ගුරුසේවා සංගමය.

මයික්‍රෝසොෆ්ට් සමාගම සිය MSN වෙබ් අඩවියේ සේවයේ නිරත ජනමාධ්‍යවේදීන් ගණනාවක් ප්‍රතිස්ථාපනය කිරීමටත් පුවත් වාර්තා තෝරා ගැනීම සඳහා ස්වයංක්‍රීය පද්ධතියක් භාවිත කිරීමටත් සැරසෙන බව එක්සත් ජනපදයේ හා එක්සත් රාජධානියේ මාධ්‍ය වාර්තා කළහ.

ප්‍රවෘත්ති ආයතනවලින් ලැබෙන පුවත් වාර්තා MSN වෙබ් අඩවිය සඳහා සැකසීම මෙන් ම සිරස්තල හා ඡායාරූප තෝරා ගැනීම ආදිය මේ වන විට ඉටුකරනු ලබන්නේ ජනමාධ්‍යවේදීන් විසිනි.

මෙම ප්‍රවෘත්ති සම්පාදන කාර්යය ඉටු කිරීම සඳහා ඉදිරියේදී කෘත්‍රිම බුද්ධිය (Artificial intelligence) භාවිත කෙරෙනු ඇති බව තොරතුරු මාර්ග උපුටා දක්වමින් සියැටල් ටයිම්ස් (Seattle Times) වාර්තා කළේය.

මෙය සිය ව්‍යාපාරය පිළිබඳ කෙරෙන ඇගයීමක අංගයක් බව මයික්‍රෝසොෆ්ට් සමාගම පැවසීය.

"සියලු සමාගම් සේ ම අප ද නිරන්තරයෙන් අපගේ ව්‍යාපාරය පිළිබඳ ඇගයීමක් කරනවා. ඇතැම් තැන්වල ආයෝජන ඉහළ නැංවීම හා වෙනත් අංශවලට යෙදවීම ද කලින් කලට කෙරෙනවා. මේ තීරණ දැනට පවතින වසංගතය නිසා ඇති වුණු ප්‍රතිඵලයක් නොවේ," යැයි නිවේදනයක් නිකුත් කරමින් එම සමාගම සඳහන් කළේය.

වෙනත් ඇතැම් තාක්ෂණ සමාගම් මෙන් මයික්‍රෝසොෆ්ට් ද සිය වෙබ් අඩවියේ පුවත් පළකිරීම වෙනුවෙන් පුවත් ආයතන වෙත ගෙවීම් කරයි.

එහෙත්, පළකිරීම සඳහා කවර පුවත් වාර්තා භාවිත කරන්නේ ද යන්න හා ඒවා කෙසේ ඉදිරිපත් කළ යුතු ද යන්න තීරණය කිරීම සඳහා ජනමාධ්‍යවේදීන් සේවයේ යොදවා ඇත.

සියැටල් ටයිම්ස් පුවත් පත් වාර්තාවට අනුව ජුනි මාසය අග වන විට 50 ක් පමණ වූ කොන්ත්‍රාත්තු පදනම මත සේවයේ නිරත පුවත් නිෂ්පාදකයින් පිරිසකට සේවය අහිමි වන අතර පූර්ණ කාලීන මාධ්‍යවේදීන් පිරිසක් තවදුරත් රැදී සිටිනු ඇත.

"අප වෙනුවට යන්ත්‍රවලට ක්‍රියා කිරීමට හැකි යැයි සිතනවා නම් එය අධෛර්යයට පත් කෙරන දෙයක්, ඒත් එය දැන් සිදුවෙනවා" යැයි රැකියාව අහිමි වීමට මුහුණ දෙන්නෙක් පුවත්පතට පවසා තිබිණි.

දැඩි කර්තෘ මණ්ඩල මාර්ගෝපදේශන පිළිබඳ කෘත්‍රිම බුද්ධිය පූර්ණ වශයෙන් දැනීමක් නොවිය හැකි යැයි අනතුරු අඟවන රැකියාව අහිමි වූ ඇතැම් ජනමාධ්‍යවේදීහු නුසුදුසු පුවත් වාර්තා පළකිරීමට ඉඩ හැරීමක් මින් සිදුවිය හැකියයි පවසති.

මෙසේ රැකියාව අහිමි වන විසි හත් දෙනෙකු එක්සත් රාජධානියේ පීඒ (PA) මාධ්‍ය ආයතනය විසින් බඳවා ගනු ලැබ ඇති බව ගාඩියන් (Guardian) පුවත් පත වාර්තා කළේය.

"මගේ මුළු කාලය ම ගත කළේ ස්වයංක්‍රීය පද්ධති සහ කෘත්‍රිම බුද්ධිය අපේ රැකියා කෙසේ පවරා ගනීවි දැයි අධ්‍යයනය කරමින්. දැන් ඒක මගේ රැකියාව අරගෙන," යැයි එම පුවත්පත් උපුටා දැක්වූ එක් මාධ්‍යවේදියෙක් සඳහන් කළේය.

පිරිවැය කපා හැරීම සඳහා, රොබෝ ජනමාධ්‍යවේදය වැනි ක්‍රමවේද පිළිබඳ පරීක්ෂණ මෙහෙයවන බොහෝ තාක්ෂණ සමාගම් අතරින් මයික්‍රෝසොෆ්ට් ද එකකි. මෙවැනි ක්‍රමවේදයක් කෙසේ ක්‍රියාත්මක වනු ඇත්දැයි යන්න පිළිබඳ අධ්‍යයනයට ගූගල් සමාගම ද ආයෝජනය කරයි.

(බීබීසී )

හිටපු මහබැංකු අධිපති අර්ජුන් මහේන්ද්‍රන් මෙරටට ගෙන්වා ගැනීම වෙනුවෙන් ඉදිරිපත් කළ ලිපිලේඛන සඳහා අත්සන් විසිඑක්දහසක් පමණ යෙදීමට තමන්ට සිදු වූ බව හිටපු ජනාධිපති මෛත්‍රීපාල සිරිසේන  පවසයි.

පසුගියදා පුවත්පතක පළ වු පුවතක් සම්බන්ධයෙන් ප්‍රතිචාර දක්වමින් හිටපු ජනාධිපතිවරයා මේ බව සඳහන් කළ අතර ඒ පොළොන්නරුවේ පැවති මාධ්‍ය හමුවකදීය.

එහිදී වැඩිදුරටත් අදහස් දක්වමින් හිටපු ජනාධිපති සිරිසේන  මෙසේද  පැවසීය.

"වෝහාරික විගණනය ජනතාව දැනගත්තේ මං පත් කළ කොමිසමේ වාර්තාවෙන්.

මෙම වාර්තාව තුළ ප්‍රධාන වගඋත්තරකරු අර්ජුන් මහේන්ද්‍රන්.
 
මම 2019 දි සිංගප්පුරු අගමැතිව පෞද්ගලිකව හම්බවුණා.

එහිදී මම කිව්වා සියලු ලිපි ලේඛන එවලා තියෙනවා, අර්ජුන් මහේන්ද්‍රන්ව ලංකාවට භාරදෙන්න කියලා ඉල්ලීමක් කළා.

මහේන්ද්‍රන් ගෙන්වා ගන්න නීතිපති දෙපාර්තමේන්තුව හදපු ලිපිවලට මට අත්සන් 21000ක් ගහන්න වුණා.

ඒ නිසා අත්සන් කළ තුන්වැනි දවසේදි අතේ දියපට්ට ආවා.

ජනාධිපති විදිහට මම අර්ජුන මහේන්ද්‍රන් ගෙන්වාගන්න අත්සන් ගැහුවා..ඒ විදිහේ වැඩ කොටසක් මම කළා."

මෙරට ප්‍රධානතම ව්‍යාපෘති සඳහා  වසර විස්සකටත්  වඩා පැරණි විදේශ තාක්ෂණික ක්‍රම ඉහළ මිල ගණන්වලට මිලදී ගැනීමට විරෝධය පළකරමින්, රජයට අයත් මෙරට ප්‍රධානතම තොරතුරු සන්නිවේදන තාක්ෂණ ආයතනය වන ICTA හෙවත් තොරතුරු තාක්ෂණ නියෝජිත ආයතනයේ අධ්‍යක්ෂවරයකු වන සංජීව වීරවර්ණ සිය තනතුරින් ඉල්ලා අස්වී තිබේ.

ලොව පිළිගත් නවීනතම තාක්ෂණ ක්‍රමවේද තිබියදී වසර විස්සක් පැරණි තාක්ෂණික ක්‍රමවලට රුපියල් මිලියන නවදහසකට අධික වටිනාකමින් යුත් මෙරට රියදුරු බලපත්‍ර  නිකුත් කිරීමේ ටෙන්ඩරය ලබාදීම හා රුපියල් මිලියන තුන්දහසකට දුම්රිය ප්‍රවේශ පත්‍ර නිකුත් කිරීමේ ටෙන්ඩරය ලබාදීම රටට පාඩු ගෙනදෙන බවත් එය තමන් අනුමත නොකරන බවත් ඔහු කියා සිටියි.

මේ සඳහා දේශීය ආයතනවලට අවස්ථාව ලබා දීම හෝ දේශීයව මේවා සිදු කිරීමකින් තොරව ශ්‍රී ලංකාව දියුණු කල නොහැකි බවත් ඔහු සිය ඉල්ලා අස්වීමට හේතු ලෙස දක්වා තිබේ.

මොහුව මෙම තනතුරට පත් කරන ලද්දේ වත්මන් රජය බලයට පත්වීමෙන් පසු ජනාධිපති ගෝඨාභය රාජපක්ෂ විසිනි.

මෙරට තොරතුරු තාක්ෂණයට සම්බන්ධ සියලු කටයුතු තොරතුරු තාක්ෂණ නියෝජිත ආයතනයේ අවසරය හා අනුමැතිය ඇතිව සිදු කරන ලෙස ජනාධිපති ගෝඨාභය රාජපක්ෂ දැනට මාස කීපයකට පෙර සියලුම රාජ්‍ය ආයතන සඳහා දැනුම්දීමක්ද සිදු කරන ලද අතර ඒ අනුව අදාල ව්‍යාපෘති වලට සම්බන්ධ සියලු රැස්වීම් සඳහා එම ආයතනයේ නියෝජිතයෝ සහභාගී කර ගැනේ.

පාඨලී කියපු කතාව :  බිලියන 9 ක ගැහිල්ලක් !

මෙම ඉල්ලා අස්වීම සම්බන්ධයෙන් අදහස් දැක්වූ  හිටපු අමාත්‍ය පාඨලී චම්පික පැවසුයේ, මෑතකදී ICTA ආයතනයේ ප්‍රධානියෙක් විදියට කටයුතු කළ ආචාර්ය සංජීවට සිය තනතුරින් ඉවත්වීමට සිදුවූයේ, ජාතික හැඳුනුම්පත හරහා රුපියල් බිලියන 9 ක මහා වංචාවක් සිදුවන බව හෙළිදරව් කළ නිසා බවයි.

''මේ අය ම තමයි වියත්මඟ ආදියේ කටයුතු කළේ. අද ඒ අය පවා රට තුළ සිදුවන මහා ජාතික මංකොල්ලය දැකලා   තනතුරුවලින් ඉල්ලා අස්වෙනවා ..'' යයි පැවසු පාඨලි චම්පික රණවක,  ආණ්ඩුව තමන්ගේ සුපුරුදු කූට නාටකය නතර කර නොමැති බවත් මාධ්‍ය සංග්‍රාමයක් කරමින් ජනතාවට තර්ජන ඉදිරිපත් කරමින් කටයුතු කරමින් සිටින බවත් වැඩිදුරටත් පැවසිය.

(මූලාශ්‍රය - ද ලීඩර් )

බඩඉරිඟු ලබාගත නොහැකි වීම හේතුවෙන් ජාඇල ත්‍රීපෝෂ කම්හල මුළුමනින්ම වසා දමා ඇතැයිද එ හේතුවෙන් එහි සේවය කළ සේවකයන් 300කට ආසන්න පිරිස මේ වනවිට නිවෙස්වල රැඳී සිටිතැයිද වාර්තා වේ.

මෙම තත්වය සති තුනක් තිස්සේ පවතින බවත් එහි සේවකයෝ කියති.

මැයි මස මුල් සතියේ බඩඉරිඟු සදහා රුපියල් 55ක පාලන මිලක් නියම කිරීමට ආණ්ඩුව පියවර ගත් අතර නමුත් ත්‍රීපෝෂ කම්හල ඒ වනවිට ත‍්‍රිපෝෂ ආයතනය ටෙන්ඩර් කැදවා මිලදී ගනිමින් තිබුණේ රුපියල් 58 බැගිනි.

පාලන මිල නියම කිරීමත් සමග එම මිලට ගැලපෙන පරිදි ටෙන්ඩර් කැදවීමට ආයතනයට යළි සිදුවූ අතර මේ වනවිට දෙවතාවක් ටෙන්ඩර් කැදවූ නමුත් තවමත් කිසිවෙකු රුපියල් 55ට බඩඉරිඟු ආසන්න මිලකට ටෙන්ඩර් පත‍්‍රිකා ඉදිරිපත් නොකල බව ත‍්‍රිපෝෂ කම්හලේ නිලධාරීහු කියති.

මේ හේතුවෙන් සති දෙකක පමණ කාලයක් තිස්සේ බඩඉරිඟු නොමැතිවීම හේතුවෙන් ත්‍රීපෝෂ හා සුපෝෂ නිපදවීම මේ වනවිට සම්පූර්ණයෙන් නැවතී ඇති බවත් ඉදිරියේ දී ගැබිණි මවුවරුන්ට හා ළදරුවන්ට දෙන ත‍්‍රීපෝෂ නවතිනු ඇති බවත් වෙළද පොලේ සුපෝෂ හිඟයක් ඇතිවනු ඇත් බවත් ඔහු කියා සිටියි.

ත‍්‍රිපෝෂ ගැබිණි මවුවරුන්ට හා ළදරුවන්ට නොමිලේ දෙන ආහාරයක් වන අතර සුපෝෂ අතිරේක ආහාරයක් ලෙස වෙළද පොලේ අලෙවියට පොදුවේ අලෙවි කරන්නකි.

සුපෝෂ සදහා මේ වනවිට විශාල ඉල්ලුමක් ඇති බවත් ඒ සදහා මසකට රුපියල් මිලියන 75ක පමණ අලෙවියක් පවතින බවත් එම නිලධාරිවරයා සදහන් කරයි.

ත‍්‍රීපෝෂ කම්හල සෞඛ්‍ය අමාත්‍යංශයට අනුබද්ධ අර්ධ රාජ්‍ය ආයතනයක් වන සමාගමකි.

(lanka truth )

ලංකා ඉතිහාසයේ දරුණුම විදේශ විනිමය අර්බුදයට රට මුහුණදී ඇති බව  කැබිනට් ප්‍රකාශක අමාත්‍ය බන්දුල ගුණවර්ධන පවසයි.

ඒ පසුගිය 28 දින පැවති කැබිනට් තීරණ දැනුම්දීමේ ප්‍රවෘත්ති සාකච්ඡාවේදී අදහස් දක්වමින්ය.

මෙම විදේශ විනිමය අර්බුදය නිසා ආනයන සීමා කිරීම සඳහා පැනවූ ගැසට් නිවේදනයට අමාත්‍ය මණ්ඩල අනුමැතිය හිමිවූ බවත් අමාත්‍යවරයා කියා සිටියේය.

එනපොට හොඳ නැත !

සංචාරක කර්මාන්තය, ඇඟලුම් කර්මාන්තය සහ ශ්‍රී ලාංකීය විදෙස් ශ්‍රමිකයින් ශ්‍රී ලංකාවට ප්‍රධාන වශයෙන් විදෙස් රටවලින් මුදල් ගලා එන ක්ෂේත්‍ර වන නමුත්  COVID-19 ගෝලීය වසංගතයක් ලෙස පැතිර යාමත් සමග එම ප්‍රධාන අදායම් මාර්ග සියල්ල අවහිර වී ඇත.

එමෙන් ම රට තුළ නිෂ්පාදන හා සේවාවන් ක්‍රියාත්මක කිරීම ද ඇණහිට තිබේ. මේ තුළ තේ ඇතුළු සියලු නිෂ්පාදනවල අපේක්ෂිත අපනයන ආදායම ද ශ්‍රී ලංකාවට අහිමි වේ. විශේෂයෙන් ශ්‍රී ලංකාවේ අපනයන භාණ්ඩ සඳහා ඇමරිකාව, යුරෝපය ඇතුළු වෙළඳපොල අහිමිවීම තිබේ. එමෙන්ම නිෂ්පාදන සඳහා අමුද්‍රව්‍ය චීනය ඇතුළු රටවලින් ලබා ගැනීමේ මාර්ග ද දැන් අහිමිවී ඇත.

2020 වසරේ ජනවාරි මාසයේ අපනයන අදායම 2019 ජනවාරි මාසයට සාපේක්ෂව ඩොලර් මිලියන 1005 දක්වා 3.2%කින් පහත වැටුණු බව ශ්‍රී ලංකා මහ බැංකුව අප්‍රියල් 03 වෙනිදා නිකුත් කළ ආර්ථික දර්ශක වාර්තාවේ සඳහන් වේ.

එමෙන්ම 2020 වසරේදී ජනවාරි මාසය තුළ ආනයන වියදම පෙර වර්ෂයේ ජනවාරි මාසයට සාපේක්ෂව ඩොලර් මිලියන 1735 දක්වා 4.8%කින් ඉහළ ගොස් තිබේ.

රටේ ප්‍රධාන අදායම් මාර්ග අහිමි වූ පසුබිමක සෞඛ්‍ය පහසුකම් සැලසීම හා අත්‍යවශ්‍ය සහන කටයුතු අඛණ්ඩව සිදු කරගෙන යාමට සහ මේ වසර තුළ නියමිත ණය ගෙවීමට රජයට සිදුවේ.

රුපියල් ට්‍රිලියන 12.89ක ණයක් !

ශ්‍රී ලංකා මහ බැංකුවේ සංඛ්‍යාන දෙපාර්තමේන්තුව 2020 පෙබරවාරි මාසයේ නිකුත් කළ වාර්තාවට අනුව ශ්‍රී ලංකාවේ මුළු ණය ප්‍රමාණය රුපියල් ට්‍රිලියන 12.89කි.

ඉන් රුපියල් ට්‍රිලියන 6.5ක් දේශීය වශයෙන් ලබා ගෙන ඇති අතර තවත් රුපියල් ට්‍රිලියන 6.39ක් විදේශීය ණය වේ.

ඉන් මේ වසර තුළ ගෙවීමට ඇති ණය මුදල ගෙවීමට සහන කාලයක් ලබා ගැනීම ඇතුළු ක්‍රියාමාර්ග මේ දිනවල ගනිමින් සිටින බව ශ්‍රී ලංකා මහ බැංකුව පවසයි.

ඇමති බන්දුල කියන කතාව : 'බරපතල තත්වයක්'

මෙරට ප්‍රධාන ආදායම් මාර්ගයක් වන සංචාරක කර්මාන්තය බිඳවැටීම නිසා රට තුළට විදේශ විනිමය ගලා ඒම අඩුවී ඇති බවත්, විදේශ විනිමය අර්බුදයට ගත් ආනයන සීමා කිරීමේ පියවර සම්බන්ධයෙන් ගැටලුවක් ඇත්නම් එම ගැටලු මුදල් අමාත්‍යාංශ ලේකම්වරයාට යොමු කළ හැකි බවත් ගුණවර්ධන ඇමතිවරයා 28 වනදා වැඩිදුරටත් පැවසිය.

වෙළඳපොළ තුළ ඇතිවී තිබෙන අස්ථාවර තත්වය හමුවේ රටට ඇතිවන පීඩනය අවම කර ජාතික ආර්ථිකයක් ගොඩනැංවීම සඳහා මෙම ආනයන සීමා කිරීම කළ බවත් ඔහු  ප්‍රකාශ කළේය.

සමාජ දූරස්ථකරණ නීති අනුගමනය කරමින්, මැතිවරණය පැවැත්වීමේදී සැලසුම් කළ සංඛ්‍යාවට වඩා වැඩි ඡන්ද මධ්‍යස්ථාන ප්‍රමාණයක් අවශ්‍ය වීමේ ඉඩකඩක් තිබෙන බවත් ඡන්ද මධ්‍යස්ථාන සඳහා ගොඩනැගිලි සපයාගැනීම අභියෝග යක් වී තිබෙන බවත් මැතිවරණ කොමසාරිස් ජෙනරාල් සමන් ශ්‍රී දිසානායක කීය.

සාමාන්‍යයෙන් ඡන්ද මධ්‍යස්ථානයකදී විනාඩියකට ඡන්දය ප්‍රකාශ කළ හැක්කේ ඡන්දදායකයන් 2.3ක් ලෙස සලකමින් ඡන්ද මධ්‍යස්ථාන සංඛ්‍යාව තීරණය කරන නමුත්, අත් සේදීම ඇතුළු කටයුතු කරමින් ඡන්දය පැවැත්වීමේදී එම ඡන්දදායකයන් සංඛ්‍යාවට එම වේගයෙන් ඡන්දය ලබාදීම සිදුකළ හැකිද යන්න ගැටලුවක් වී ඇති බව ඔහු කීය.

උතුරු කොළඹ වැනි ජන ඝනත්වයෙන් වැඩි නාගරික ප්‍රදේශවල ඡන්ද මධ්‍යස්ථාන පිහිටුවීම සාමාන්‍ය තත්වයකදී වුව අභියෝගයක් බව ඔහු කීය.

ඇතැම් තැන්වල තාවකාලික ඉදිකිරීම් පාවිච්චි කරමින් ඡන්ද මධ්‍යස්ථාන පිහිටුවා තිබෙන නමුත්, තාවකාලික ඉදිකිරීම් සඳහා පවා ඉඩ පහසුකම් සපයාගත හැකිවේද යන්න අභියෝගයක් බව ඔහු කීය.

මේ වන විට සෞඛ්‍ය අමාත්‍යාංශයේ කණ්ඩායමක් හා මැතිවරණ දෙපාර්තමේන්තුවේ කණ්ඩායමක් සෞඛ්‍යාරක්ෂිතව මැතිවරණය පැවැත්වීම සඳහා මාර්ගෝපදේශ සකස් කරමින් සිටින බවත්, එම කණ්ඩායම වරින් වර මැතිවරණ දෙපාර්තමේන්තුව වෙත කරුණු සැපයීම සිදුකරන බවත් ඔහු කීය.

ඒ අනුව මැතිවරණ දෙපාර්තමේන්තුවේ කණ්ඩායමක්ද එම කරුණු පිළිබඳව සාකච්ඡා කරමින් සිටින බව ඔහු පෙන්වාදුන්නේය.

(අනිද්දා )

මෙරටින් වාර්තා වන 11 වන කොවිඩ් 19 වසංගතය ආශ්‍රිත මරණය අද (01) වාර්තා විය.

සෞඛ්‍ය සේවා අධක්ෂ ජෙනරාල් විශේෂඥ වෛද්‍ය අනිල් ජාසිංහ මේ බව තහවුරු කර ඇත.

මෙසේ මිය ගොස් ඇත්තේ වයස අවුරුදු 45 ක් වු කුවේට්වල සිට පැමිණි පිරිමි පුද්ගලයෙකි. ඔහු හෝමාගම රෝහලේ දැඩි සත්කාර ඒකකයේ ප්‍රතිකාර ලබමින් සිට ඇත.

එසේම ඊයේ (31) රාත්‍රී 11 වන විට මෙරට සමස්ත කොරෝනා ආසාදිතයින් ගණන 1633 ක් දක්වා ඉහළ ගියේය. මේ වන විට පුද්ගලයින් 822 ක් රෝහල්වල වෛද්‍ය අධීක්ෂණය යටතේ පසුවෙයි. පුද්ගලයින් 801 ක් මේ වන විට පුර්ණ සුවය ලබා ඇති බව බලධාරීන් පවසයි.

කොවිඩ් 19 වසංගතයට එරෙහිව ක්‍රියාත්මක ඉහළම සෞඛ්‍ය බලධාරියා වන  සෞඛ්‍ය සේවා අධ්‍යක්ෂක ජනරාල් විශේෂඥ වෛද්‍ය අනිල් ජාසිංහ හට අභාවප්‍රාප්ත හිටපු අමාත්‍ය ආරුමුගම් තොණ්ඩමන් ගේ අති සමීපතම අයෙකු  දුරකථනයෙන් අමතා බලපෑම් එල්ල කොට ඇති බව ශ්‍රී ලංකා මහජන සෞඛ්‍ය පරීක්ෂකවරුන්ගේ සංගමය නිවේදනයක් නිකුත් කරමින් ප්‍රකාශ කර සිටියි.

සියලු සෞඛ්‍ය උපදෙස් උල්ලංඝනය කරමින් හිටපු අමාත්‍යවරයාගේ මරණය සිදුවූ දින සිටම එම පිරිස වගකීම් විරහිතව ක්‍රියා කරන බවත් එවැනි ක්‍රියාවන්ට එරෙහිව රටපුරාම සමස්ත ජනතාව පෙල ගැසිය යුතු බවද ඔවුන් සිය නිවේදනයෙන් පෙන්වා දෙයි.

මිලඟ කොරෝනා රැල්ලට මෙය හේතුවක් විය හැකි බවද බෝවන රෝග පිලිබඳව අධ්‍යයනය කරන, රාජකාරි ඉටුකරන නිසි නිලධාරින් කණ්ඩායමක් ලෙස තමන් අනතුරු අඟවා සිටින බව මහජන පරීක්ෂකවරුන්ගේ සංගමය සිය නිවේදනයෙන් පෙන්වා දී ඇත.

මෙවැනි වැරදි ආදර්ශයන් හේතුවෙන් රටේ මහජනතාවද කොව්ඩ් නිවාරණය සම්බන්ධයෙන් තිබෙන කැපවීම අවම වී ඇති බව ශ්‍රී ලංකා මහජන සෞඛ්‍ය පරීක්ෂකවරුන්ගේ සංගමය ප්‍රකාශ කර සිටියි.

අභාවප්‍රාප්ත හිටපු අමාත්‍ය ආරුමුගම් තොණ්ඩමන්ගේ අවමඟුල් කටුයුතුවලට සහභාගි වූ කිසිවෙකුට හෝ කොවිඞ් 19 ආසාදනය වී නව රෝගීන් පොකුරක් මතුවුවහොත් නිරෝධායන පනතේ රෙගුලාසිවලට පටහැනිව යමින් කටයුතු කිරීම පිළිබදව ජාතික හා ජාත්‍යන්තර වශයෙන් නඩු පවරන බව ශ්‍රී ලංකා මහජන සෞඛ්‍ය පරික්ෂකවරුන්ගේ සංගමයේ සභාපති උපුල් රෝහණ අනතුරු අඟවයි.

ශ්‍රී ලංකා මහජන සෞඛ්‍ය පරික්ෂකවරුන්ගේ සංගමය නිකුත්කළ සම්පූර්ණ නිවේදනය පහත දැක්වෙයි.

ද ෆිනෑන්ස්' අර්බුදය පිළිබඳ අර්බුදය තවමත් විසඳී නැත. වාර්තා වන තොරතුරුවලට අනුව එහි තැන්පතුකරුවන් සහ සේවක මණ්ඩලය තව තවත් අපහසුතාවට පත් කරමින් පසුගිය මැයි 22 වන දා මහ බැංකුව විසින් සියළු  ද ෆිනෑන්ස් ශාඛා සීල් කර වසා තැබීමට නියෝග කර ඇත. 

මැයි 21 වන දා රැස් වූ මහ බැංකු මුදල් මණ්ඩලය විසින් මෙම තීරණය ගෙන ඇති බවට ද ෆිනෑන්ස් සේවක සංගමයේ සභාපති දුමින්ද තිලකරත්න විසින් පවසන ලදි. මේ පිළිබඳව දැඩි විරෝධය පළ කරමින් මැයි 27 වන දින එහි සේවකයන් සහ තැන්පතුකරුවන් විසින් දිවයිනේ සෑම ද ෆිනෑන්ස් ශාඛාවක් ඉදිරිපිටදීම දැවැන්ත උද්ඝෝෂණයක් ද දියත් කරනු ලැබූහ.

තැන්පතුකරුවන්  කබළෙන් ළිපට !

මුදල් මණ්ඩලය විසින් මෙම තීරණය ගෙන ඇත්තේ අන් කවරදාටත් වඩා තැන්පතුකරුවන් අසරණ තත්ත්වයක පසුවන මොහොතකය. 

පැවති තත්ත්වය හමුවේ මාර්තු මස අඩකුත්, අප්‍රේල් සහ මැයි මාසවල පොලිය මුළුමනින්මත් ගෙවා නොමැති පසුබිමක සේවාලාභීන් තම තැන්පතු මුදල්වලට හිමි පොලී මුදල ලබා ගැනීමට නොහැකිව ව්‍යාකූලව සිටින පසුබිමක මුදල් මණ්ඩලය මෙවැනි තීරණයක් ගැනීම ඔවුන් කබළෙන් ළිපට ඇද දැමීමක් බඳුය. 

දිළිඳු ජනතාවට රජයෙන් 5000ක දීමනාවක් දුන් අතර, හිඟමං යදින මිනිසුන් ද රැකබලා ගත් වාතාවරණයක් තුළ කිසිදු පාර්ශ්වයක පිහිටක් නොලැබූ ද ෆිනෑන්ස් තැන්පතුකරුවන් අසරණ වී ඇති බව තිලකරත්න පවසයි. 

විෂය බාර ඇමතිවරයාට හෝ නොදන්වා ගත් තීන්දුවක් ද ?

ඔහු අප සමග වැඩිදුරටත් පැවසුවේ මාර්තු 06 වන දින අගමැති කාර්යාලයේදී මුදල් අමාත්‍යාංශ ලේකම් මෙන්ම මහ බැංකු නියෝජ්‍ය අධිපති එස්.ආර්.ආටිගල, අජිත් නිවාඞ් කබ්රාල්, ඕම්බුඞ්ස්මන් සහ ද ෆිනෑන්ස් තැන්පතුකරුවන් ඇතුළු මෙම අර්බුදයට සම්බන්ධ සියලු වගකීම්සහගත පාර්ශ්වයන් එක්රැස්ව කළ සාකච්ඡාවේ දී අගමැතිවරයා ප්‍රකාශ කර සිටියේ තම ආණ්ඩුවක් තුළ කිසිදු ව්‍යාපාරයක් නොවසන බවත්, මෙය නැවත ප්‍රතිව්‍යුහගත කිරීමට සැලැස්මක් ඉදිරිපත් කරන ලෙසත් මහ බැංකුව විසින් පත් කළ අධ්‍යක්ෂ මණ්ඩලයට දැනුම් දුන් බවත් ය. 

එසේ නම් අවසානයේ මුදල් මණ්ඩලය තම සමාගම වසා දැමීමට තීරණය කර ඇත්තේ අදාළ විෂය බාර ඇමතිවරයා හෝ දැනුවත් කිරීමකින් තොරව ද යන්න ඔවුන් නගන තර්කයයි.

“මහ බැංකු නියෝජ්‍ය අධිපති ඊයෙ පෙරේදා ප්‍රකාශයක් කරනවා බිලියන 20ක වත්කම් තියනවා බිලියන 10ක් ඒකෙන් ගන්න පුළුවන්ලු. එතකොට බිලියන 20ක වත්කම් තියනවා කියන්නේ ඇනුවල් රිපෝර්ට් එක බලලා, ගිණුම් පොත් බලලා ද? මේ තනිකර බොරු. හරි අපි හිතමුකෝ එයා කියන්නේ ඇත්ත කියලා, එතකොට එයා කියනවා බිලියන 20ක වත්කම්වලින් බිලියන 10යි ගන්න පුළුවන් කියලා. එතුමා දැන්ම කියනවා මේක වහන්න ඉස්සෙල්ලා බිලියන 10ක් හොරකන් කරනවා කියලා. ද්‍රවශීලතා අරමුදලෙන් බිලියන 11ක් හම්බ වෙනවා, බිලියන 20ක වත්කම් තියනවා. බිලියන 31 තියනවා එතකොට තැන්පතුකරුවන්ට ගෙවන්න. බිලියන 26 යි තැන්පතු දාලා තියෙන්නේ. එතකොට තැන්පතුකරුවන්ට රුපියලකවත් අවාසියක් වෙන්නේ නැහැනේ. මේ බොරු කියන්නේ. මෙයාලා හැමදාම බැලුවා ලක්ෂ 6ක මුදලක් දීලා ඉක්මනට මේක වහලා දාන්න. 2011 තමයි මේ තීරණය ගන්න තිබ්බෙ. මහ බැංකු නිලධාරීන්ගේ අදක්ෂ පාලනය තමයි අද ද ෆිනෑන්ස් එක මේ තත්ත්වයට පත්වෙන්න හේතුව. මේ නිලධාරින් නිදාගෙන හිටියේ. දැන් තමයි ඇහැරලා තියෙන්නේ. හැබැයි දේශපාලනය ඉදිරියේ මොවුන් ආයි නිදා ගන්නවා.”

දේශපාලන අධිකාරිය තීරණය !

කොරෝනා වසංගතයත් සමග රට තුළ පැවති වාතාවරණය සලකා බලා දේශපාලන අධිකාරිය තීරණය කර සිටියේ ව්‍යාපාර අඩපණවීම් සමග මුදල් ගෙවීමට ඇති අපහසුව හමුවේ මාස 6ක කාල සීමාවක් වාරික අයකර නොගැනීමට ය. 

ද ෆිනෑන්ස් ආයතනය ද ආයෝජනයන් ඇසුරෙන් මිලියන 160ක පමණක් මුදලක් ලබාගෙන ඇති අතර රජය ගත් මෙම තීරණය හමුවේ ඔවුන්ට එම මුදල අහිමි වී ගිය අතර ද ෆිනෑන්ස් සමාගමට මුදල් ගලා ඒමේ ගැටලුවක් පැවතීම හේතුවෙන් මැයි 22 වන දින මහ බැංකුව මෙම තීරණය ගෙන ඇත. 

එහෙත් මෙම තත්ත්වය සියලු මුල්‍ය සමාගම්වලට සහ බැංකු පද්ධතියට පොදු වන අතර එයට විසඳුමක් ලෙස රජය මගින් මහ බැංකුව හරහා සහන වැඩපිළිවෙළක් යටතේ මුදල් යොදවන බව කීව ද එවැනි සහන මුදලක් ද ෆිනෑන්ස් ආයතනයට ලැබී නොමැත. 

මාස 3ක කාලයක් ද ෆිනෑන්ස් සේවකයින්ට වැටුප් ගෙවීමක් ද සිදු වී නොමැති නිසා තැන්පතුකරුවන් මෙන්ම සේවකයින් ද ඉමහත් අපහසුතාවට පත් වී ඇත. 

නවතම තත්ත්වය අනුව මැයි 22 වන දින සියලු ද ෆිනෑන්ස් සේවකයින්ගේ සේවය අත්හිටුවා ඇති අතර සේවකයින් 80ක් පමණක් ඉතිරි රාජකාරි කටයුතු සඳහා ගෙන්වා ගැනීමට තීරණය කර ඇත. ඔවුන් ලවා පළමුව සේවකයින්ගේ වැටුප් ගෙවීමට වැඩපිළිවෙළක් සකස් කිරීමට මහ බැංකුව කටයුතු කරනු ඇතැයි දුමින්ද අප සමග පැවසුවේය. 

මාස දෙක හමාරක ගෙවා නොමැති තැන්පතුකරුවන්ගේ පොලී මුදල ද මහ බැංකුව විසින් තැන්පතුකරුවන්ට ගෙවීමට නියමිත ලක්ෂ 6ට ම එක් කරන බවත් ලක්ෂ 6ක මුදලක් පමණක් ගෙවිය හැකි බවත් මහ බැංකුව පවසන බව හේ වැඩිදුරටත් පැවසුවේය.

“මාස දෙක හමාරක් පොලී ගෙවලා නැහැ''

“මාස දෙක හමාරක් පොලී ගෙවලා නැහැ. ඒ පොලියත් අර ලක්ෂ 6ට ම එකතු කරලා වන්දි ගෙවන්න හදනවා. මහ බැංකුවට ඕනෙ ඕනෙ විදිහට නීති හදලා තැන්පතුකරුවන්ව අසරණ කරලා තියෙන්නේ. මේක මහ බැංකුව කරන මහා විනාශයක්. 

මේ මූල්‍ය සමාගම් පාලනය වෙන්නේ මෙවැනි මහ බැංකුවක් තුළින් නම් තැන්පතුකරුවන්ට කිසිම සුරක්ෂිතභාවයක් ලැබෙන්නේ නැහැ. 

මං අභියෝග කරනවා මහ බැංකු නිලධාරීන්ට, ඉස්සරහට ඇවිල්ලා කියන්න මොකද්ද ඔයගොල්ලන්ගේ ප්‍රතිපත්තිය කියලා. සමාගම් පනතේ අදාළ නීති රාමුව යටතේ ක්‍රියාත්මක වුණා නම් ඇයි තැන්පතුකරුවෝ මෙතරම් දුක් විඳින්නේ? අද සේවකයෝ 670ක් පාරට ඇදලා දාලා. 

මේ වෙන දේවල්වලින් පැහැදිලි වෙන්නේ රටේ කම්කරු නීතියකුත් නැහැ කියලා. රටට ශ්‍රේෂ්ඨාධිකරණයකුත් නැහැ. ආණ්ඩුක්‍රම ව්‍යවස්ථාවේ තියන සියලු දේ මහ බැංකුව විසින් යටත් කරගෙන. එක රැයකට සේවකයෝ 670ක් සේවයෙන් ඉවත් කළා කියලා මහ බැංකුව ලියුමක් ගහන්නේ කොහොමද? අද අපේ රැකියාව මොකද්ද කියලා කියාගන්න බැරි තත්ත්වයක් අපිට උදා වෙලා තියෙන්නේ. 

''2009 වසරෙදිත් මේ විදිහටම වුණා. රටේ නීතිය නමා ගත්තා''

2009 වසරෙදිත් මේ දේවල් මේ විදිහටම වුණා. රටේ නීතියක් තිබ්බට නීතිය නමා ගත්තා. මේවා සම්පූර්ණයෙන්ම කරන්නේ දේශපාලනයත් දැනුවත්ව කියන එක තමයි දැන් අපිට හිතෙන්නේ. මොකද මහ බැංකුවේ ඉන්නේ රාජ්‍ය නිලධාරීන්. ඔවුන්ට තියනවා සමාගමක් පවත්වාගෙන යන්න අදාළ නීති රාමුවක්. එතකොට මොවුන්ගෙන් ඒ නීති රාමුව ගැළවුණේ කොහොමද?”

තැන්පතුකරුවන් සහ සේවක සංගමයේ ඉල්ලීම වන්නේ වහාම ජනාධිපතිවරයා විසින් මේ පිළිබඳ කමිටුවක් පත් කර විමර්ශනය කළ යුතු බවය. මහ බැංකුව විසින් අධීක්ෂණය කළ ආයතනයක් මෙවැනි තත්ත්වයකට පත්වීමට බලපෑ හේතු විමසා බැලිය යුතු බවත්, 2019 වසරේ ද ෆිනෑන්ස් සමාගමට ආයෝජකයෙකු කැඳවීමට ගත් තීරණය සැබැවින්ම ක්‍රියාත්මක කළ යුතුව තිබුණේ කවදා යන්න ඔවුන්ගෙන් විමසා බැලිය යුතු බවත්, එම තීරණය නොගැනීමට හේතු මොනවා ද යන්නත් වහාම අදාළ බලධාරීන්ගෙන් ප්‍රශ්න කර පැහැදිලි කර ගත යුතු බවටත් ඔවුහු යෝජනා කරති. ■

- හිරුණි කුරුප්පුආරච්චි
(ravaya.lk - May 30, 2020 )

මෙරට රාජ්‍ය වෙබ් අඩවි දෙකකට සයිබර් ප්‍රහාර එල්ලවී ඇති බව ශ්‍රී ලංකා පරිගණක හදිසි ප්‍රතිචාර සංසදය පිළිගෙන ඇත.

ඒ බව සඳහන් කරමින් ආරක්ෂක අමාත්‍යාංශය නිවේදනයක් නිකුත්කර ඇති අතර එහි වැඩිදුරටත් සඳහන් වන්නේ මෙවැනි සයිබර් ප්‍රහාර සඳහා අනවශ්‍ය ප්‍රසිද්ධියක් ලබාදිය යුතු නැති බවය.

ආරක්ෂක අමාත්‍යාංශය විසින් නිකුත්කළ එම සම්පූර්ණ නිවේදනය පහත දැක්වෙයි.

මේ අතර ලංකා තොරතුරු තාක්ෂණ සංගමය ද  අදාළ සයිබර් ප්‍රහාර සම්බන්ධව නිවේදනයක් නිකුත්කර ඇති අතර එය පහත දැක්වෙයි.

යල්පැනගිය වෙබ් අඩවි පැවතීම සයිබර් ප්‍රහාරකයන්ට අත වැනීමක් !

ඉදිරියේදී සයිබර් ප්‍රහාරවලට ඉතා පහසුවෙන් ගොදුරුවියහැකි රාජ්‍ය හා රාජ්‍ය නොවන වෙබ් අඩවි විශාල ප්‍රමාණයක් හදුනාගැනීමට අප ශ්‍රී ලංකා තොරතුරු තාක්ෂණ සංගමයට හැකිව තිබේ. 

විශේෂයෙන්ම බොහොමයක් වෙබ් අඩවි යල්පැනගිය වසර පහකට වඩා කාලයක් තිස්සේ යාවත්කාලීන නොකරන ලද ඒවා බව අප ශ්‍රී ලංකා තොරතුරු තාක්ෂණ සංගමයට සිදුකල අධ්‍යනයකදී හෙළිවිය. විශේෂයෙන්ම යම් වෙබ් අඩවි අවසන්වරට යාවත්කාලීන කර ඇත්තේ 2015 වර්ෂයේදී පමණ වේ.

මෙසේ යල්පැනගිය වෙබ් අඩවි පැවතීම සයිබර් ප්‍රහාරකයන්ට අත වැනීමක් වන අතර මෙම වෙබ් අඩවි පිලිබදව උනන්දුවක් දැක්වීමට වගකිවයුතු පාර්ශව කටයුතු කරනු ලබන්නේ එම වෙබ් අඩවි වලට යම් ආකාරයක් සයිබර් ප්‍රහාරයක් එල්ලවූ විටදී පමණක් වීම කණගාටුවකට කරුණකි. සයිබර් ආරක්ෂණය සම්බන්ධයෙන් ශ්‍රී ලංකාව තුල නව නීති සම්පාදනය වන වාතාවරණයක් තුල ශ්‍රී ලංකාවේ ක්‍රියාත්මක වන වෙබ් අඩවි වල ආරක්ෂාව සම්බන්ධයෙන් රජය ඉතා වගකීමෙන් කටයුතු කළයුතු බව අප ශ්‍රී ලංකා තොරතුරු තාක්ෂණ සංගමය ලෙස අවධාරණය කරමු.

TECF නම් සයිබර් ප්‍රහාරක කණ්ඩායම විසින් අද (30) රාජ්‍ය වෙබ් අඩවි තුනක වෙබ් පිටු Defacement කිරීමක් සිදුකොට ඇති අතර මේ සමගම TECF සයිබර් ප්‍රහාරක කණ්ඩායම මේ වසරේදී (2020) සිදුකරනු ලැබූ සයිබර් ප්‍රහාර ගණන අටක් දක්වා ඉහල යනු ඇත. අද දින එල්ලවූ සයිබර් ප්‍රහාරයේදී සෞඛ්‍ය සහ දේශීය වෛද්‍ය ‍සේවා අමාත්‍යාංශයේ වෙබ් අඩවියද ගොදුරු වූ බැවින් ජනතාවට අත්‍යවශ්‍ය වෙබ් අඩවි කෙරෙහි විශේෂ අවධානයක් යොමු කිරීමට කටයුතු කරන ලෙස අප ශ්‍රී ලංකා තොරතුරු තාක්ෂණ සංගමය ලෙස අදාළ බලධාරීන් දැනුවත් කරමු.

රජීව් යසිරු කුරුවිටගේ මැතිව්  

සභාපති                                                                

ශ්‍රී ලංකා තොරතුරු තාක්ෂණ සංගමය

දීමනා සහ පහසුකම් අහෝසි කිරීම නිසා රජයේ රෝහල් සේවකයන් අතර බරපතල විරෝධයක් වර්ධනය වෙමින් තිබේ.

අතිකාල, විශේෂ, අමතර සේවා, ප්‍රසිද්ධ නිවාඩු දින සහ කාර්ය වියුක්ත දින නිවාඩු (පැය 24 ක  සේවයෙන් පසු ලැබෙන නිවාඩු ) වෙනුවෙන් ගෙවිය යුතු  දීමනා නොගෙවීම, සෞඛ්‍ය ආරක්ෂන උපකරන නිසිලෙස සම්පාදනය නොකිරීම හා ප්‍රවාහන පහසුකම් අහෝසි කිරීම මෙම විරෝධයට හේතුවයි.

වැටුප් සහ රැකියා කප්පාදුවට එරෙහිව මෑත සති වල වතු සහ ඇඟලුම් කම්කරුවන්ගේ අරගල පැන නැගුන අතර රජයේ රෝහල් කිහිපයක කාර්ය මන්ඩල විරෝධතා උද්ඝෝෂන වල යෙදුනි.

මැයි 11 වතුපිටිවල රෝහලේ  සේවකයෝ දහවල් කෑම විවේකය තුල උද්ඝෝෂනයක නිරත වූහ. මෙම උද්ඝෝෂනය පැවැත් වුනේ අත්‍යවශ්‍ය සේවාවන් සඳහා ප්‍රවාහන පහසුකම් සැපයීමේ කොටසක් ලෙස එම  සේවකයන් සඳහා පවත්වාගෙන ගිය රජයේ ප්‍රවාහන සේවය මැයි 11 වෙනිදා සිට නතර කිරීමට හා අප්‍රේල් මාසයට නියමිත දීමනා ලබා නොදීමට විරෝධය  පෑමක් ලෙස ය.  හෙද සේවකයන් 200 ට වැඩි පිරිසක් එයට එක්ව සිටියේය.

ප්‍රවාහන පහසුකම් සැපයීම නතර කිරීම නිසා  අත්‍යවශ්‍ය සේවයක කැපවීමෙන් සේවය කරන සෞඛ්‍ය සේවකයන් බරපතල අපහසුතාවයකට පත්වන බව උද්ඝෝෂනයට සම්බන්ධ වූ හෙද සේවකයෙකු සඳහන් කලේ ය.

“අප්‍රේල් මාසයේ අතිකාල සඳහා ගෙවීම් ලැබුනේ නැහැ. මේ වර්ෂයට ලැබිය යුතු වාර්ෂික වැටුප් වැඩිවීම තවමත් දීලා නැහැ. කොරෝනා වසංගතය ව්‍යාප්ත වන තත්වයක් තුල සැපයිය යුතු සෞඛ්‍යාරක්ෂක පහසුකම් නිසි ලෙස සම්පාදනය කෙරෙන්නේ නැහැ. දිනකට මුහුනු ආවරන දෙකයි  දෙන්නේ. ඒවත් ප්‍රමිතියට සහ හෙද  කාර්ය මන්ඩලය අවශ්‍ය තරමට නැහැ. මගේ වාට්ටුවට අවම වශයෙන් හෙද නිලධාරීන් 8 ක් අවශ්‍යයි. ඉන්නේ 6 දෙනයි” ඔහු පැවසීය.

රට විවෘත කිරීම නිසා වසංගතය පැතිරීම අනිවාර්යෙන් ම වැඩි වෙන බව ද ඔහු සඳහන් කලේ ය.

 “ආන්ඩුවට උවමනා කෙසේ හෝ වැඩ පටන් ගන්න. මහජනයාගේ ජීවිත ගැන කිසිම තැකීමක් නැහැ”යි ඔහු පැවසී ය. පාර්ලිමේන්තු මැතිවරනයෙන් පසුව ආන්ඩුව  වැටුප් හා දීමනා තව දුරටත් කප්පාදු කරන බවත්, කම්කරු පන්තියේ අරගල මර්දනය කරන බවත් ඔහු කීවේය.

N-95 වගේ ප්‍රමිතියට අනුකුල මුහුනු ආවරන කිසිම රෝහලක නැහැ

මැයි 20 වෙනිදා මහනුවර ශික්ෂන රෝහලේ හෙද නිලධාරීන්ගේ උද්ඝෝනයට 300 ක් පමන සහභාගී වී ඇත. සෞඛ්‍ය  ආරක්ෂන ක්‍රමයක්  ලෙස කොටස් වශයෙන් සේවයට කැඳවීමේ දී හෙද සේවකයන් ට පැය  24 ක් එක දිගට වැඩ කිරීමට සිදු වෙයි. පසු දින නිවාඩුවක් ලැබෙයි. හෙද සේවකයෙකුගේ සම්මත සාමාන්‍ය සේවා කාලය පැය 6 කි. ආණ්ඩුවෙන් සම්පාදනය කල ප්‍රවාහන  පහසුකම් මැයි 17 වෙනිදා සිට නතර කිරීම  නිසා මහමග රස්තියාදු වීමට සහ පෙර මෙන් තද බද වී බස්වල ගමන් කිරීමට සිදු වී ඇති බව උද්ඝෝෂකයින් පැවසූහ.

“අනෙක් තැන්වල වගේම අපටත් අවශ්‍ය පහසුකම් ප්‍රමානවත් තරම් ලැබුනෙ නැහැ. සාමාන්‍ය මුහුනු ආවරන  මිස ලෝක සෞඛ්‍ය  සංවිධානය නිර්දේශ කරන  N-95 වගේ ප්‍රමිතියට අනුකුල මුහුනු ආවරන කිසිම රෝහලක නැහැ.

අපේ නිල  ඇඳුම නිල්පාට යි. නමුත් හදිසියේම කොලපාටින් මහගන්න කියල නියෝගයක් ලැබුනා. අපේ මුදල් වලින් මහ ගත්තේ. එකකට රුපියල් 1,500 ක් වියදම් වුනා. මුහුනු ආවරන මසා ගත්තෙත් අපේ වියදමින්” හෙද පාලිකාවක් (මේට්‍රන්)  සඳහන් කළාය.

“දරුවෝ ගැන නොතකා, මහන්සිය සහ අන්තරාය නොතකා අපි දිවා රෑ නොබලා කැපවීමෙන් වැඩ කරනවා. ‘සුවවිරුවෝ‘ කියල අපිට ව්‍යාජ නම්ම්බු නාමෙකුත් දුන්න. හැබයි අපේ මහන්සියට, කැපවීමට ලැබිය යුතු දීමනා නොගෙවීම හරිම අසාධාරනයි.”

“මගේ මුලික වැටුප රුපියල් 44,000 යි.  අතිකාල සහ අනෙකුත්  දීමනා සහිතව 54,000 ක් පමන ගන්නවා. වැටුපෙන් ණය වලට කැපෙන්නේ නැති නිසා මාසේ වියදම යන්තම් පිරිමහ ගන්න පුලුවන්.  නමුත් සියයට 80 පමන අයගේ පඩියෙන් විශාල මුදලක් ණය  වලට කැපෙනවා. අතිකාල සහ දීමනා නොලැබුනොත් ඉහල යන ජීවන වියදමත් එක්ක  වියදම පිරි මහ ගන්න බැහැ”  ඇය සඳහන් කලාය.  

'මැරෙන සංඛ්‍යාව අපි නොහිතන මට්ටමින්  ඉහල යා හැකියි''

“ලෝකයේ හැම රටකම වසංගතයෙන් විශාල වශයෙන් මිනිස්සු මැරෙනවා. ලංකාවට විශේෂයක් නැහැ. පාලනය කරලා කිව්වට ආර්ථිකය විවෘත කිරීමත් සමග ආසාදිතයන් සංඛ්‍යාව ඉහල යන්න පටන් අරගෙන. ඒ නිසා වසංගතයෙන් මැරෙන සංඛ්‍යාව අපි නොහිතන මට්ටමින් ඉහල යා හැකි” බව ද ඇය පැවසුවාය.

මැයි 22  දකුනු පලාතේ බලපිටිය සහ වලස්මුල්ල රෝහල්වල කනිෂ්ට  කාර්ය මන්ඩල උද්ඝෝෂනවලට උපස්ථායක, රියදුරු, දුරකථන ක්‍රියාකරු හා මැහුම් සේවකයන් ඇතුලු අංශ කිහිපයක සේවකයෝ  සම්බන්ධ වුහ. අතිකාල දීමනා, නිල ඇඳුම් දීමනා සහ හිඟ වැටුප් නොගෙවීමට විරුද්ධව පැවති මෙම උද්ඝෝෂනයනට  300 ක් පමන සහභාගී  වී ඇත.      

මැයි 24 වෙනිදා ගම්පහ දිස්ත්‍රික් රෝහලේ පැවති උද්ඝෝෂනයට හෙද, පරිපුරක වෛද්‍ය සේවකයන්, උපස්ථායකයන් හා රියදුරන් ඇතුලු 400 ක් පමන සහභාගි  වී ඇත. බස්නාහිර පලාත් සභාව විසින් අදාල මුදල් නොගෙවීම නිසා ශ්‍රී ලංකා ගමනා ගමන මන්ඩලය විසින් සැපයු විශේෂ ප්‍රවාහන සේවය මැයි 17 වෙනිදායින් පසු නතර කර තිබේ.

“අප්‍රේල්  මාසයේ අතිකාල හා නිවාඩු  දීමනා මේ වනතුරු ගෙව්වේ නැහැ. පීආර්සී පරීක්ෂන කෙරෙන්නේ වෛරසය ආසාදනය වූ රෝගීන් ඇසුරු කල බවට සැක කරන සේවකයන් සම්බන්ධයෙන් පමනයි. අපට ලැබිය යුතු දීමනාවන් නොගෙවන ගමන් අපේ පඩියත් පරිත්‍යාග කරන්න කියලා ආන්ඩුව කියනවා. රෝහලේ කිසිම කෙනෙක් පඩිය කපන්න කැමැත්ත  දීලා නැති” බව හෙද සේවකයෙකු සඳහන් කලේ ය.

මැයි 26 වෙනිදා දඹුල්ල රෝහල ඉදිරිපිට පැවති   පිකට් උද්ඝෝෂනයට හෙද සේවක සේවිකාවන් 100 ට වැඩි පිරිසක් සහභාගී වී ඇත. නියමිත දීමනා නොගෙවීමට විරුද්ධව නිහඬ උද්ඝෝෂනයක යෙදුන හෙද සේවකයෝ, “සුවවිරුව රූපවාහිනියට පමන ද ?”, “රාජකාරිය ගන්නා තෙක් සෞඛ්‍ය සේවය සුවවිරුවෝ” සහ  “ප්‍රවාහන පහසුකම් විධිමත් කරනු!” ආදී සටන් පුවරු අත දරා සිටියහ.

ජනතා විමුක්ති පෙරමුන විසින් මෙහෙයවන සමස්ත ලංකා සුව සේවා සංගමය විසින් ඉහත උද්ඝෝෂන සංවිධානය කර තිබූ නමුත්, රාජ්‍ය  සේවා එක්සත් හෙද සංගමයේ සහ රජයේ හෙද නිලධාරීන්ගේ සංගමයේ සාමාජිකයන් ද  ඒවාට සහභාගී වී තිබිනි.

වෘත්තීය සමිති සහ ශ්‍රේනි  භේදයකින් තොරව  උද්ඝෝෂන වලට රෝහල් සේවකයන්ගේ සහභාගිත්වය පෙන්නුම් කරන්නේ  තම අයිතීන් සඳහා එකාවන් ව සටන් කිරීමට ඔවුන්  තුල පවතින දැවෙන උවමනාවයි.  

(ඩබ්ලිව්.ඒ. සුනිල්- wsws.org )

සම්පුර්ණ ලිපිය මෙතනින්

අභාවප්‍රාප්ත ඇමති ආරුමුගම් තොණ්ඩමන් විසින් දරන ලද අමාත්‍ය ධූරය අගමැති මහින්ද රාජපක්ෂ  වෙත පැවරීමට ජනාධිපති ගෝඨාභය රාජපක්ෂ මහතා තීරණය කර ඇති බව වාර්තා වෙයි.

මේ බව ආණ්ඩු හිතවාදි සමාජ මාධ්‍ය වෙබ් අඩවි මේ වන විට වාර්තා කරන අතර එළැඹෙන සදුදා (ජුනි 01 ) දින අග්‍රාමාත්‍යවරයා එම ධූරයේ දියුරුම් දෙනු ඇතැයිද එම මාධ්‍ය වාර්තා සඳහන් කරයි.

තොණ්ඩමන් අමාත්‍යවරයා  දරනු ලැබුවේ ‍ප‍්‍රජා සවිබල ගැන්වීම් සහ වතු යටිතල පහසුකම් සංවර්ධන අමාත්‍ය ධූරයයි.

මේ අතර තොණ්ඩමන් අභාවයෙන් පුරප්පාඩු වූ නුවරඑලිය දිස්ත‍්‍රික් ශ්‍රී ලංකා නිදහස් පොදුජන සන්ධානය අපේක්ෂකත්වය සඳහා ඔහුගේ  පුත්‍රයා වන ජීවන් තොණ්ඩමන් නම් කිරීමට තීරණය කර තිබේ.

බස්නාහිර පළාතේ පාසල් 200 කට ආසන්න ප‍්‍රමාණයක ආරක්ෂක අංශවල පිරිස් නවාතැන් ගෙන සිටින අතර, ඒ අනුව බප/පිළි/කොතලාවල පුර විදුහලේ නාවික හමුදා සෙබළුන් නවාතැන් ගෙන සිටිති. එසේ සිටියදී විදුහල්පතිවරයා විසින් පසුගිය 21 දින වැටුප් ලේඛන අත්සන් කිරීමට එම පාසලේ ගුරුවරු පාසලට ගෙන්වා ඇත. මේ වන විට එම පාසලේ නවාතැන් ගෙන සිටින නාවික හමුදා සෙබළුන් 6කට ආසන්න පිරිසක් කෝවිඞ් 19 ආසාධිතයන් බව තහවුරු වී ඇති අතර, ඉන් පසු 21 දින පාසලට කැඳවූ ගුරුවරුන් 26 දෙනා ඔවුන්ගේ නිවෙස් තුළම නිරෝධායනය කිරීමට ගල්කිස්ස හා මොරටුව පොලීසි විසින් දැන්වීම් ප‍්‍රදර්ශනය කර ඇත.

ආරක්ෂක අංශවල නවාතැන් සඳහා පාසල් යොදාගැනීම සම්බන්ධයෙන් අප දිගින් දිගටම කරුණු දැක්වූවද ඒ සම්බන්ධයෙන් නිසි පියවර ගැනීමට රජය කටයුතු නොකළ අතර, අධ්‍යාපන නිලධාරීන් විසින් විවධාකාර හේතු දක්වමින් දිගින් දිගටම ගුරුවරු පාසල්වලට ගෙන්වීමට ද කටයුතු කරන ලදී. එම තත්වය මත මේ වන විට බප/පිළි/කොතලාවලපුර විදුහලට පසුගිය 21 වෙනිදා ගෙන්වූ ගුරුවරු කෝරෝනා ආසාධිතයන්වීමේ අවදානමකට ලක්ව ඇත.

ගුරුවරු පාසල්වලට ගෙන්වා වැටුප් ලේඛන අත්සන් කිරීමට අධ්‍යාපන අමාත්‍යාංශය දැනුම් දී නොමැති අතර, මේ ආකාරයෙන් කොතලාවලපුර විදුහලේ විදුහල්පතිවරයා ගුරුවරු පාසලට ගෙන්වා ඔවුන් අනාරක්ෂිත තත්වයට පත් කිරීම සම්බන්ධයෙන් පරීක්ෂණයක් සිදු කරන ලෙසත්, බස්නාහිර පළාතේ පාසල්වලට විවිධ හේතු දක්වමින් ගුරුවරු ගෙන්වීම නතර කිරීමට පියවර ගන්නා ලෙසත් ලංකා ගුරු සංගමය බස්නාහිර පළාත් ආණ්ඩුකාරවරයාගෙන් ඉල්ලා සිටී.

එසේම ආරක්ෂක අංශ සාමාජිකයන් සඳහා පාසල්වල නවාතැන් ලබාදීම සම්බන්ධයෙන් රජය අවධානය යොමු කළ යුතු බවද වැඩිදුරටත් පෙන්වා දෙමු.

මෙයට,

ජෝසප් ස්ටාලින්
ප‍්‍රධාන ලේකම්