පුවත්

මෙරට ආර්ථිකය නිවැරදි මගකට යොමු කෙරෙන ආර්ථික පරිවර්තන පනත් කෙටුම්පත සම්මත කර ගැනිමට සහාය වූ පාර්ලිමේන්තුවේ සියලු දේශපාලන පක්ෂ වෙත සිය ස්තුතිය පළ කළ ජනාධිපති රනිල් වික්‍රමසිංහ එම වැඩපිළිවෙළ අඛණ්ඩව ඉදිරියට ගෙන යාමට එක්වන ලෙස සියලු දේශපාලන පක්ෂ වෙත ආරාධනා කළේය.

අපනයන කේන්ද්‍රීය ඩිජිටල් සහ හරිත ආර්ථිකයක් රට තුළ ගොඩනැඟිමට අවශ්‍ය පරිපාලන සහ ආයතනික ව්‍යුහය මෙම පනත් කෙටුම්පත තුළ අන්තර්ගත බවද ජනාධිපතිවරයා පෙන්වා දුන්නේය.

ජනාධිපති රනිල් වික්‍රමසිංහ මේ බව සඳහන් කර සිටියේ, අධ්‍යාපන හා තාක්ෂණ අමාත්‍යාංශ එකාබද්ධව ක්‍රියාත්මක කරන “ඩිජිටල් ආර්ථික ක්‍රමෝපාය 2030” වැඩසටහන යටතේ පාසල් සහ පිරිවෙන් සඳහා සුහුරු පන්ති කාමර උපකරණ ලබාදීම වෙනුවෙන් රඹුක්කන පරාක්‍රම මහා විද්‍යාලයේදී අද (26) පැවති උත්සවයට එක්වෙමිනි.

මෙහිදී අදහස් දැක්වු ජනාධිපති රනිල් වික්‍රමසිංහ වැඩිදුරටත් මෙසේද පැවසීය,

අද මෙම පාසලට පැමිණෙන විට මම පාසල් ගිය කාලය මට සිහිපත් වුණා. එදා අපට තිබුණේ කළු ලෑල්ල සහ, හුණු කෑල්ල පමණයි. එදා මෙම පහසුකම් තිබුණේ නැහැ. මම පළමුවරට පරිගණකයක් දුටුවේ විශ්වවිද්‍යාල අධ්‍යාපනයත් නිම කිරීමෙන් පසුවයි. අද ඔබට නවීන උපකරණ සහිත සුහුරු පන්ති කාමර ලැබී තිබෙනවා. අද ලෝකය සෑම අංශයකින්ම සීග්‍රයෙන් වෙනස් වෙනවා. අපත් ඒ වෙනසට මුහුණ දීමට අවශ්‍ය දැනුම ලබාගත යුතුයි.

මේ රට බංකොළොත්ව පැවති සමයේ දී එම බංකොලොත්භාවයෙන් නිදහස් වීමෙන් පසුව අප රටක් ලෙස ඉදිරියට යන්නේ කෙසේද කියා මම සිතුවා. ඒ වගේම අපට අවශ්‍ය විදේශ විනිමය සොයා ගන්නේ කොහොමද කියන ප්‍රශ්නයක් තිබුණා. නව තාක්ෂණ දැනුම සමඟ ඩිජිටල් ආර්ථිකයකට අප කඩිනමින් ගමන් කළයුතු බව එහිදී අප තීරණය කළා. අප දැන් සිටම ඒ සඳහා කටයුතු කළයුතුයි.

කෘෂිකර්ම සහ ව්‍යාපාර ක්ෂේත්‍රය තුළට මෙන්ම පාසල් තුළට ඩිජිටල්කරණය ගෙන ඒමට ඒ අනුව අප පියවර ගෙන තිබෙනවා. ඒ අනුව පාසල් සහ පිරිවෙන්වල මෙම සුහුරු පන්ති කාමර ඇති කිරීමේ වැඩසටහන ක්‍රියාත්මක කර තිබෙනවා. ඒ වගේම ග්‍රාමීය ප්‍රදේශවලට ද මෙහි ප්‍රතිලාභය ලබා දිය යුතුයි. ඒ වෙනුවෙන් ලංකාවට පැමිණ එම වැඩකටයුතු ආරම්භ කිරීමට මම ඊලෝන් මස්ක් මහතාට ආරාධනා කළා. දැන් ඒ සඳහා අවශ්‍ය බලපත්‍රය නිකුත් කර තිබෙනවා. හැකි උපරිම අයුරින් තාක්ෂණ දැනුම ගමට ගෙන යාමට අප අපේක්ෂා කරනවා. එය භාවිතා කරමින් ඉදිරියට යාමට ඔබ සූදානම් විය යුතුයි.

කෘෂි නවීකරණ වැඩපිළිවෙළ ක්‍රියාත්මක කිරීමේ දී ඔබට මෙම තාක්ෂණ දැනුම භාවිතා කළ හැකියි. රට තුළ හරිත ආර්ථිතයක් සහ ඩිජිටල් ආර්ථිකයක් ඇති කළ යුතුයි. පසුගිය බදාදා AI තාක්ෂණය පිළිබඳ පාර්ලිමේන්තුවේ විවාදයක් තිබුණා. එහිදී බොහෝ කතිකයන් කථා කළේ ChatGPT වෙතින් කරුණු අරගෙනයි. පාර්ලිමේන්තුව දැන් එවන් තත්ත්වයකට පත්ව තිබෙනවා. අප මෙම තාක්ෂණය නිසි ලෙස ප්‍රයෝජනයට ගත යුතුයි.

ඒ වගේම ඇතැම් විට මෙම තාක්ෂණය භාවිතයෙන් ආගමික කරුණු විකෘති කිරීමට හැකියාව තිබෙනවා. එම ත්ත්ත්වයන් වැළැක්වීමට අදාළ නිති කෙටුම්පත් අප මේ වන විට සකස් කරගෙන යනවා. ඒ වගේම මෙම නව තාක්ෂණය හඳුන්වාදිමේ දී ඉන්දියාවේ සහාය ලබා ගැනීමට ද අප තීරණය කර තිබෙනවා.

ඒ වගේම තාක්ෂණය පදනම් කරගත් විශ්වවිද්‍යාල ඇති කිරීමට අප සැලසුම් කර තිබෙනවා. මෙම තාක්ෂණික දැනුමත් සමඟ නව ආර්ථික පරිවර්තනයක් රට තුළ ඇති කරමින් ඉදිරියට යාමට අප කටයුතු කරනවා. ඒ වෙනුවෙන් අවශ්‍ය නීති සකස් කිරීමට අප ආර්ථික පරිවර්තන පනත් කෙටුම්පත පාර්ලිමේන්තුවට ඉදිරිපත් කර තිබෙනවා. ඒ සම්බන්ධව අප පාර්ලිමේතුවේ දී විවාද කළා. එහිදී විවිධ අදහස් පළ වුණා. අවසානයේ කිසිවෙකුගේ විරුද්ධත්වයකින් තොරව එය සම්මත වුණා. සියලුදෙනා එක්ව මෙම කටයුතු සිදු කිරීම පිළිබඳව මම පාර්ලිමේන්තුවේ සෑම දේශපාලන පක්ෂයකටම ස්තූතිවන්ත වෙනවා. ඒ පිළිබඳ ස්තූති කරමින් අප සියලුදෙනා එක්ව මෙම වැඩකටයුතු ඉදිරියට ගෙන යමු කියා ප්‍රකාශ කරනවා.

අද ඉන්දියාව, චීනය වැනි රටවල් වේගයෙන් ඩිජිටල්කරණයට ලක්ව තිබෙනවා. ඔවුන්ගේ මුදල් ගනුදෙණු සියල්ල සිදුවන්නේ ජංගම දුරක්ථනය භාවිතයෙන්. අපත් එම තත්ත්වයට පත්විය යුතුයි. එහිදී QR කේතය වැදගත් වෙනවා.

ඒ පිළිබඳ ජනතාව දැනුවත් කර එම තාක්ෂණය ඔවුන්ට හඳුන්වාදිය යුතුයි. ඒ නිසා මෙම වැඩසටහන ඉතා වැදගත් බව ප්‍රකාශ කිරීමට කැමතියි.

ඉදිරියේදී මේ රටේ ඕනෑම අයෙකුට ඉන්දියාව, චීනය, සිංගප්පූරුව ඇතුළු සියලු රටවල ආර්ථිකයන් සමඟ එක්ව වැඩකටයුතු කිරීමට අවස්ථාව සලසාදීමට මම බලාපොරොත්තු වෙනවා. ඒ සඳහා අපි රුපියල ශක්තිමත් කළ යුතුයි.

ඒ වගේම අපේ විදේශ සංචිතය ඉහළ නංවාගත යුතුව තිබෙනවා. එම වැඩකටයුතු මේ වන විට අප සිදු කරගෙන යනවා. මෙරට අපනයන ආර්ථිකය ශක්තිමත් කිරීම සමඟ අපට තිබෙන විදේශ විනිමය ප්‍රමාණය වැඩි වෙනවා. එවැනි විදේශ විනිමය සංචිතයක් සමඟ අපට කිසිඳු ගැටලුවකින් තොරව එම රටවල් සමඟ ගනුදෙණු කිරිමට අවස්ථාව ලැබෙනවා.

මෙම වැඩපිළිවෙළ සමඟ ඉදිරි වසර 10 තුළ මේ රටේ නවීන ආර්ථිකයක් ඇති කිරීමට හැකිවනු ඇතැයි අප විශ්වාස කරනවා. එය කොළඹට සීමා නොකර ගම්බද ප්‍රදේශවලටද ලබාදීමට කටයුතු කරනවා.

2024 ජනාධිපතිවරණය සැප්තැම්බර් 21දා පැවැත්වෙන බව ඊට අදාළ අති විශේෂ ගැසට් නිවේදනය නිකුත් කරමින් මැතිවරණ කොමිෂන් සභාව පවසයි.

 එමෙන්ම නාමයෝජනා කැඳවීම අගෝස්තු 15 වැනිදා සිදුකිරීමට නියමිතයිි.

ජාත්‍යන්තර මූල්‍ය අරමුදලේ පාලන විනිශ්චය තක්සේරුවෙහි තාක්ෂණික සහාය පිළිබඳ වාර්තාවෙහි දක්වා ඇති දූෂණ විරෝධය සඳහා වන නෛතික, සංවිධානාත්මක සහ ක්‍රමෝපායික රාමුවට අනුකූලව “දූෂණ විරෝධය පිළිබඳ ජාතික න්‍යාය පත්‍රය” ක්‍රියාත්මක කිරීම සඳහා පසුගියදා ජනාධිපති රනිල් වික්‍රමසිංහ ඉදිරිපත් කළ අමාත්‍ය මණ්ඩල සංදේශය සඳහා අමාත්‍ය මණ්ඩලයේ අනුමැතිය හිමිව තිබේ.

දූෂණ විරෝධය පිළිබඳ ජාතික න්‍යාය පත්‍රයට ප්‍රධාන ක්‍රියාකාරි පියවර කිහිපයක් අන්තර්ගත වන අතර 2023 වසරේ සම්මත කරගන්නා ලද දූෂණ විරෝධී පනත පූර්ණ වශයෙන් බලාත්මක කිරීම, ඒ සඳහා ක්‍රියාකාරී සැලැස්මක් සකස් කිරීම, මාස හයකට වරක් එකී ක්‍රියාකාරී සැලැස්මේ ප්‍රගතිය සමාලෝචනය කිරීම සහ ක්‍රියාකාරී සැලැස්මට අවශ්‍ය ප්‍රමාණවත් අයවැය ප්‍රතිපාදන ලබාදීම සඳහා ද අවශ්‍ය විධිවිධාන එහි අන්තර්ගත වේ.

2025 – 2029 කාලරාමුව සඳහා පැහැදිලිව ජාතික දූෂණ විරෝධී සැලැස්මක් නිර්මාණය කිරීමටද මෙකී න්‍යාය පත්‍රයට ඇතුළත් කර තිබේ. තවද විගණකාධිපතිවරයා සතු නීතිමය බලතල තවදුරටත් පුළුල් කරමින් 2018 අංක 19 දරන ජාතික විගණන පනත සංශෝධනය කිරීමද මෙම ජාතික න්‍යාය පත්‍රයට ඇතුළත් වෙයි.

එම සංශෝධනයන්ට අනුව ප්‍රශ්න ගත විගණනයන්හි සම්පූර්ණ වාර්තාවන් පාර්ලිමේන්තුවේ සභාගත කිරීමට ප්‍රථම එමගින් අනාවරණය කරගනු ලබන වංචා සහ දූෂණ පිළිබඳ සිදුකළ හැකි අපරාධමය විමර්ශනය සඳහා, නීතිය බලාත්මක කිරීමේ ආයතන සමඟ මූලික හෝ වෙනත් සොයා ගැනීම් හුවමාරු කර ගැනීමට විගණකාධිපතිවරයා වෙත අවසර ලබාදීමට යෝජනා කර තිබේ. එමෙන්ම අධීක්ෂණය සහ වගවීම පිළිබඳ නිසි වගකීම් ඉටුකිරීමට අපොහොසත් වන ප්‍රධාන ගණන් දීමේ නිලධාරීන් ඇතුළු නිලධාරීන්ගෙන් ඊට අදාළ අධිභාරය අය කරගැනීම සඳහාද විගණකාධිපතිවරයා වෙත බලය පැවරීම ද මේකී දූෂණ විරෝධි ජාතික න්‍යාය පත්‍රයට ඇතුළත් කර ඇත.

ඵලදායී හා විනිවිදභාවයෙන් යුතු වත්කම් ප්‍රකාශනයන් සහ බැඳියා පිළිගැටුම් කාර්ය ක්‍රමයක් ස්ථාපිත කිරීමටද මේකී ජාතික න්‍යාය පත්‍රය මගින් යෝජනා කර තිබේ. බැඳියා පිළිගැටුම් සම්බන්ධයෙන් නීති (Conflict-of-Interest Rules) සහ දූෂණ විරෝධී පනතේ සඳහන් වත්කම් ප්‍රකාශ කිරීම පිළිබඳව වැඩපිළිවෙල ක්‍රියාත්මක කිරීම සඳහා ඊට අදාළ රෙගුලාසි බලාත්මක කිරීම, බැඳියා පිළිගැටුම් යන්න නිර්වචනය කිරීම, ප්‍රකාශයට පත් කිරීම, පිළිගැටුමක් කළමනාකරණය සඳහා මාර්ගෝපදේශ සැපයීම, ඒවා කිරීමට අසමත් වීම සම්බන්ධයෙන් නිලධාරීන්ට දඬුවම් පැමිණවීම සහ මීට අදාළ කාර්ය සාධනය සම්බන්ධයෙන් වාර්තා කිරීමද ඇතුළත් කර ඇත.

එමෙන්ම දූෂණ විරෝධී පනතට අනුකූලව ජ්‍යෙෂ්ඨ නිලධාරින් සඳහා මෙකී වත්කම් ප්‍රකාශන නම් කරන ලද වෙබ් අඩවියක ප්‍රකාශයට පත් කිරීමටද අවශ්‍ය විධි විධාන සලසා ඇති අතර වැඩපිළිවෙළෙහි අර්ධ වාර්ෂික හා වාර්ෂික ප්‍රගති සමාලෝචන සිදු කළ යුතු බවටද නියම කර තිබේ.

අපරාධ සහ මුදල් විශුද්ධිකරණය මගින් උපයා ගත් ධනය නැවත අයකර ගැනීම සඳහා ජාතික ක්‍රමෝපාය හා ප්‍රතිපත්ති නිර්මාණය කිරීමට ද කටයුතු කර ඇත. මේ සඳහා අල්ලස් කොමිසම වෙත ලබාදී ඇති නව බලතල අනුව නිසි අයුරින් ක්‍රියාත්මක වීම සඳහා අවශ්‍ය සහාය ලබාදීම සහ නව විමර්ශන මගින් නිසි ලෙස නඩු පැවරීම සහ වරදකරුවන් කිරීම පිළිබඳවත්, දේශපාලනික වශයෙන් අනාවෘත වූ පුද්ගලයන් (Politically Exposed Persons)හඳුනා ගැනීම සම්බන්ධයෙන් කටයුතු කිරීමද මීට ඇතුළත් කර තිබේ.

දූෂණ නඩු සම්බන්ධ විමර්ශන හා ඊට නඩු පැවරීමට අදාළ කටයුතු ශක්තිමත් කිරීමටද මෙම ජාතික න්‍යාය පත්‍රය මඟින් කටයුතු සලසා ඇත. සමාගමක අර්ථලාභී අයිතිය පිළිබඳ තොරතුරු සැපයීමට සහාය පළ කිරීම සඳහා රෙගුලාසි සකස් කිරීමටත් විනිවිදභාවය ඉහළ නැංවීම සඳහා පොදු අර්ථලාභීන්ගේ ලේඛනයක් ස්ථාපිත කිරීමත් මීට අන්තර්ගත වේ.

රාජ්‍ය ප්‍රසම්පාදනයේ විනිවිදභාවය සහතික කිරීම වෙනුවෙන් ජාත්‍යන්තර ප්‍රමිතීන්ට අනුකූල වන රාජ්‍ය ප්‍රසම්පාදන නීතියක් (Public Procurement Law) බලාත්මක් කිරීමත්, රුපියල් බිලියනයට වැඩි රාජ්‍ය ප්‍රසම්පාදන කොන්ත්‍රාත්තුවල තොරතුරු ප්‍රකාශයට පත් කිරිමත් දූෂණ විරෝධය පිළිබඳ ජාතික න්‍යාය පත්‍රයේ සඳහන් වේ.

බදු නිදහස් කිරීමේ වටිනාකම් පිළිබඳ ඇස්තමේන්තුවක් සහිතව බදු නිදහස්කිරීම් ලබන සියලුම සමාගම් ප්‍රසිද්ධ කිරීම, ආයෝජන ප්‍රවර්ධන කොන්දේසි පිරිවැයකරණය හා යෝජනා ඇගයීම සඳහා නිසි ක්‍රියාවලියක් සකස් කරන තුරු ක්‍රමෝපාය සංවර්ධන ව්‍යාපෘති පනත තාවකාලිකව අත්හිටුවීම, පුහුණ හා ස්වාධීන කාර්යමණ්ඩලයක් ඇති කිරිම සඳහා රාජ්‍ය ව්‍යවසාය ප්‍රතිසංස්කරණය කිරීම සහ රජයට ආදායම් ලබාදෙන දෙපාර්තමේන්තුව තුළ කෙටිකාලීන දූෂණ විරෝධී පියවර ගැනීම වැනි සාධනීය පියවර ද මීට ඇතුළත් ය.

ශ්‍රී ලංකා මහ බැංකුව විසින් සෘජු කළමනාකරණය අවසන් කරනු ලබන සේවක අර්ථ සාධක අරමුදල සඳහා නව කළමනාකරණ කටයුතු ස්ථාපිත කිරීම, විධායක හා අධ්‍යක්ෂ මණ්ඩල සාමාජිකයින් තෝරා ගැනීම වැඩිදියුණු කිරීම මගින් රජයේ හිමිකාරීත්වය සහිත බැංකු සඳහා සංස්ථාපිත පාලනයන් ශක්තිමත් කිරීම, අධිකරණ සේවා කොමිෂන් සභාව බලාත්මක කිරීම ආදී ප්‍රතිසංස්කරණද මෙම න්‍යාය පත්‍රයට ඇතුළත් වේ.

දූෂණ විරෝධය පිළිබඳ ජාතික න්‍යාය පත්‍රය මගින් තොරතුරු දැනගැනීමේ අයිතිවාසිකම ශක්තිමත් කිරීම සම්බන්ධ විධිවිධානද ඇතුළත් කර තිබේ.

එමෙන්ම වත්මන් දූෂණ විරෝධී ප්‍රයත්නයන්හි ප්‍රගතිය පිළිබඳව ජාත්‍යන්තර මූල්‍ය අරමුදල විසින් 2024 මැයි මස 29 වැනි දින නිකුත් කරන ලද විස්තීරණ අරමුදල් පහසුකමෙහි දෙවන සමාලෝචනය මගින් ඉදිරිපත් කර ඇති නිර්දේශ ද සැලකිල්ලට ගනිමින් මේ රට සමස්ත දූෂණ විරෝධී රාමුව ශක්තිමත් කිරීමට මෙම න්‍යායපත්‍රය මඟින් වැඩපිළිවෙළක් යෝජනා කර ඇත.

ඒ සඳහා අල්ලස් හෝ දූෂණ චෝදනා විමර්ශන කොමිෂන් සභාව වෙත පහසුකම් සැපයීම, රාජ්‍ය ආදායම් පරිපාලනය, රාජ්‍ය මූල්‍ය කළමනාකරණය, රාජ්‍ය වත්කම් අධීක්ෂණය හා කළමනාකරණය සහ මුදල් විශුද්ධිකරණය වැළැක්වීම හා ත්‍රස්තවාදයට මුදල් සැපයීම මැඩ පැවැත්වීම යන අංශ ද ඇතුළත් වේ

ජනාධිපතිවරණයේදී පොදුජන මන්ත්‍රීවරුන් බහුතරයක් ජනාධිපති රනිල් වික්‍රමසිංහට සහාය දැක්වීමට තීරණය කර ඇති බව ආණ්ඩුව නියෝජනය කරන කැබිනට් හා රාජ්‍ය අමාත්‍යවරුන් ඇතුළු මන්ත්‍රීවරුන් 30 දෙනකු හිටපු ජනාධිපති මහින්ද රාජපක්ෂට අද (25)දැනුම් දී තිබෙන බව දේශපාලන ආරංචි මාර්ග සඳහන් කරයි.

පාර්ලිමේන්තු සංකීර්ණයේදී මෙම හමුව සිදුවී ඇති බවද එම ආරංචි මාර්ග සඳහන් කරන අතර මේ මොහොතේ පක්ෂයේ බහුතරයක් දෙනා ජනාධිපති රනිල් වික්‍රමසිංහ ට සහය පළ කිරීමට තීරණය කර ඇති බැවින් පක්ෂයෙන් වෙනත් අපේක්ෂකයකු ඉදිරිපත් කළහොත් එයින් පක්ෂයේ ඡන්ද පදනම⁣ට හානි විය හැකි බවද ඔවුන් හිටපු ජනාධිපති මහින්ද රාජපක්ෂ ට පෙන්වා දී ඇති බවද සඳහන් වෙයි.

එබැවින් පක්ෂයෙන් වෙනත් අපේක්ෂකයකු ඉදිරිපත් නොකරන ලෙසද මෙම මැති ඇමති පිරිස හිටපු ජනාධිපතිවරයාගෙන් ඉල්ලීමක් කර ඇති බවද ආරංචි මාර්ග පවසයි.

එහිදී හිටපු ජනාධිපති මහින්ද රාජපක්ෂ පවසා ඇත්තේ තමන් පක්ෂය සමඟ සාකච්ඡා කර කඩිනමින් තීන්දුවක් ලබා දෙන බවයි.

රනිල්ට උදව් කරලා පක්ෂය කැඩුණා : නාමල් පරළ වෙයි !

මේ අතර පොදුජන පෙරමුණ පක්ෂයේ ජාතික සංවිධායක නාමල් රාජපක්ෂ මන්ත්‍රීවරයා පවසන්නේ ජනාධිපති රනිල් වික්‍රමසිංහ ට උදව් කිරීමෙන් ලැබුණු එකම දායාදය පක්ෂය දෙකට කැඩීම බවයි.

ඔහු මේ බව සඳහන් කර සිටියේ නෙලුම් මාවත පොහොට්ටු පක්ෂ මුලස්ථානයේ අද (25) පැවැති සාකච්ඡාවකින් අනතුරුව මාධ්‍යය වෙත අදහස් දක්වමිනි.

එහිදී ඔහු මෙසේ අදහස් දැක්වීය.

''අපි ඒ වෙලාවේ තීන්දුවක් ගත්තා පක්ෂයක් විදියට.. විපක්ෂ නායකතුමාට ආරාධනා කලා, එතුමා ආවේ නෑ.. අනුර කුමාර දිසානායක හිටපු අමාත්‍යතුමාට ආරාධනා කලා එතුමා ආවේ නෑ. රනිල් වික්‍රමසිංහ ජනාධිපතිතුමාට ආරාධනා කලා එතුමා ආවා, එතුමා බාරගත්තා, අපි එතුමාට අපි පූර්ණ සහයෝගය දුන්නා..

මං හිතන්නේ අපි අද වෙනකන් වචනෙකින්වත් එතුමාටවත් ආණ්ඩුවටවත් අපිට නොගැලපෙන දේවල් කෙරුවත්, අපිට ගැලපෙන්නේ නැති ප්‍රතිපත්ති ක්‍රියාත්මක කලත්, වචනෙකින්වත් ආණ්ඩුව අපහසුතාවයට පත් කරන්න හෝ මේ රටේ දේශපාලන ස්ථාවරත්වය කඩන්න අපි කටයුතු කරලා නෑ.. හැබැයි පක්ෂයක් විදියට අපිට ලැබිච්ච දායාදෙ නම් පක්ෂය දෙකට කඩපු එක. හැබැයි ඒ කෙසේ වෙතත් අපි අපේ වගකීම ඉටු කරලා තියෙනවා. ඉදිරියේදී අපි හොඳ දේශපාලන තීන්දුවක් ගමු..

ජාතික ජන බලවේගය පක්ෂයේ ආණ්ඩුවක් යටතේ ඇප නැතුව මූලික ප්‍රාග්ධනයන් ලබාදීම සඳහා නව සංවර්ධන බැංකුවක් බිහිකරන බවට එම පක්ෂයේ නායක අනුර දිසානායක මන්ත්‍රීවරයා සිදුකළ ප්‍රකාශයක් සම්බන්ධයෙන් මහ බැංකුවේ අධිපති නන්දලාල් වීරසිංහ ප්‍රතිචාර දක්වා තිබේ.

ඒ ශ්‍රී ලංකා මහ බැංකුවේ පැවති මාධ්‍ය හමුවකදී මාධ්‍යවේදියෙකු කළ විමසීමකට ප‍්‍රතිචාර දක්වමිනි.

එහිදී අදහස් දක්වමින් මහ බැංකු අධිපතිවරයා මෙසේ සඳහන් කළේය.

සංවර්ධන බැංකුවක් කියන අදහස ගොඩක් කල් ඉඳන් සාකච්ඡා වෙච්ච එකක්. ඇප නැතිව ණය දෙනව කියන එක කවුරු හරි ඇප සහතික කළ යුතුයි. ඒ අනුව රජය සූදානම් නම් ඒ ගැරන්ටි එක දෙන්න.. ඒක දෙන්න පළුවන්.

එතකොට රජය සහතික කරනවා කියන්නේ ණය ආපසු ලබාගත්තේ නැත්නම් රජය බදු ගෙවන්නාගේ මුදලින් ඒ ණය පියවනවා කියන එකයි.

ඉතින් ඔබතුමන්ලා බදු ගෙවන්නන් විදිහට කැමතිනං කවුරු හරි ගත්ත ණයක් පියවන්න, ඒක ක‍්‍රියාත්මක කරන්න පුළුවන්.

ශ්‍රී ලංකා නිදහස් පක්ෂ ප්‍රධාන කාර්යාලයට ඉබි යතුරු දැමීමේ අර්බුදය පාදක කරගනිමින් තිලංග සුමතිපාල විසින් අමාත්‍ය නිමල් සිරිපාල ද සිල්වා ට එරෙහිව මාලිගාකන්ද මහේස්ත්‍රාත් අධිකරණයේ ගොනු කර තිබෙන පෞද්ගලික පැමිණිල්ල ඉදිරියට විභාග කිරීම වළක්වාලමින් අතුරු තහනම් නියෝගයක් අභියාචනාධිකරණය විසින් නිකුත් කර තිබේ.

අභියාචනාධිකරණය මෙම අතුරු තහනම් නියෝගය නිකුත්කර ඇත්තේ අමාත්‍ය නිමල් සිරිපාල ද සිල්වා මහතා විසින් ඉදිරිපත් කළ රිට් පෙත්සමක් සලකා බැලීමෙන් අනතුරුව ය.

අභියාචනාධිකරණය විසින් නිකුත් කළ මෙම නියෝගයට අනුව අදාළ අතුරු තහනම් නියෝගය අගෝස්තු මස 06 දින දක්වා ක්‍රියාත්මක ය.

අදාළ නියෝගය මාලිකන්ද මාලිගාකන්ද මහේස්ත්‍රාත්වරයා වෙත යොමු කරන ලෙසද අභියාචනාධිකරණය නියෝග කර තිබේ.

සින්නක්කර ඉඩම් ඔප්පු ලබාදීමේ “උරුමය” වැඩසටහන කිසිසේත්ම දේශපාලන වැඩසටහනක් නොවන බවත් එබැවින් මැතිවරණ පැවැත්වෙන කාලයන්හි වුවද අඛණ්ඩව එම වැඩසටහන ක්‍රියාත්මක වන බවත් සංචාරක හා ඉඩම් අමාත්‍යාංශයේ ලේකම් සෝමරත්න විදානපතිරණ  පැවසීය.

උරුමය වැඩසටහන යටතේ සින්නක්කර ඉඩම් ඔප්පු ලක්ෂ 20ක් ලබා දීම වසර දෙකක් තුළ අවසන් කිරීමට බලාපොරොත්තු වන බවද ඔහු සඳහන් කළේය.

සංචාරක හා ඉඩම් අමාත්‍යාංශයේ ලේකම් සෝමරත්න විදානපතිරණ මේ බව සඳහන් කර සිටියේ ‘දෙවසරක ප්‍රගතිය සහ ඉදිරිය’ යන මැයෙන් අද (25) ජනාධිපති මාධ්‍ය කේන්ද්‍රයේ පැවති ප්‍රවෘත්ති සාකච්ඡාවට එක්වෙමිනි.

මෙහිදී වැඩිදුරටත් අදහස් දැක්වූ සංචාරක හා ඉඩම් අමාත්‍යාංශයේ ලේකම් සෝමරත්න විදානපතිරණ මෙසේද පැවසීය,

මෙම දෙවසර තුළ මෙරට ජනතාවට වඩාත්ම වැදගත් වූ වැඩසටහන වන සින්නක්කර ඉඩම් ඔප්පු ලබාදීමේ “උරුමය” වැඩසටහන, අප අමාත්‍යංශය යටතේ සිදු කෙරෙනවා. මෙම වැඩසටහන තුළින් වසර දෙකක කාලයක් තුළ ඉඩම් ඔප්පු ලක්ෂ 20ක් ලබා දීමට අපේක්ෂා කරනවා. මේ වන විට ඒ සඳහා ලක්ෂයකට වැඩි අයදුම්පත් ප්‍රමාණයක් ලැබී තිබෙනවා.

උරුමය වැඩසටහන අදියර කිහිපයක් යටතේ ක්‍රියාත්මක වන අඛණ්ඩ වැඩපිළිවෙලක් බවද පැවසිය යුතුයි. මේ වන විට ක්‍රියාත්මක වන්නේ එහි පළමු අදියරයි. මෙය කිසි සේත්ම දේශපාලන වැඩසටහනක් නොවෙයි. මැතිවරණ පවත්වන කාලවලදී වුවත් මෙම ඉඩම් ඔප්පු ලබා දීම සිදු කෙරෙනවා. නමුත් ඊට කිසිදු දේශපාලන මැදිහත් වීමක් සිදු වන්නේ නැහැ. ප්‍රාදේශීය ලේකම් හරහා සිදු කෙරෙන වෙනත් සේවාවන් පරිදිම ඔප්පු ලබා දීමද සිදු වෙනවා. එබැවින් මැතිවරණයකට දින නියම කිරීම මෙම වැඩසටහන නවත්වන්න හේතුවක් වෙන්නේ නැහැ. කිසිම මැතිවරණ නීති උල්ලංඝණයක් මෙම වැඩසටහනින් සිදු වන්නේ නැහැ. ඒ මෙම සින්නක්කර ඉඩම් ඔප්පු ලබා දීම ප්‍රසිද්ධ වේදිකාවල හෝ දේශපාලනඥයින්ගේ සහභාගීත්වයෙන් මැතිවරණ කාල සීමාව තුළ සිදු නොවන නිසයි. ඉඩම් ඔප්පු ලබා දීමේ ක්‍රියාවලිය කාර්යක්ෂම කිරීම සඳහා අදාළ රාජ්‍ය නිලධාරීන් වෙනුවෙන් දිරි දීමනා ලබා දීමද අනුමත කර තිබෙනවා

අපනයන ආර්ථිකයක් කරා රට ගෙන යාමේදී මෙරට තේ කර්මාන්තය එහි සියලු මානයන් ඔස්සේ ප්‍රවර්ධනය කිරීම අත්‍යවශ්‍ය බවත් රාජ්‍ය සහ පෞද්ගලික අංශයේ හවුල්කාරිත්වයෙන් ඒ වෙනුවෙන් විධිමත් සැලැස්මක් ඔස්සේ කටයුතු කරන බවත් ජනාධිපති රනිල් වික්‍රමසිංහ පැවසීය.

“සිලෝන් ටී” සඳහා ජාත්‍යන්තරය තුළ ඇත්තේ ප්‍රමුඛ සන්නාමයක් බව පැවසූ ජනාධිපතිවරයා නව උපායමාර්ගික වැඩපිළිවෙළක් ඔස්සේ එය තවදුරටත් ප්‍රවර්ධනය කළ යුතු බවද සඳහන් කළේය.

ජනාධිපති රනිල් වික්‍රමසිංහ මේ බව සඳහන් කර සිටියේ අද (25) පෙරවරුවේ කොළඹ සිනමන් ග්‍රෑන්ඩ් හෝටලයේ ආරම්භ වූ “කොළඹ ජාත්‍යන්තර තේ සම්මේලනයේ (Colombo International Tea Convention)” සමාරම්භක අවස්ථාවට එක් වෙමිනි.

දෙදිනක් පුරා පැවැත්වෙන මෙම සම්මේලනය “තේ – ජීවන රටාවක් සහ ජීවනෝපායක්” යන තේමාව යටතේ කොළඹ තේ වෙළඳ සංගමය සහ ශ්‍රී ලංකා තේ මණ්ඩලය එක්ව සංවිධානය කර ඇත.

කෙන්යාව, ශ්‍රී ලංකාව, චීනය, ඉන්දියාව, ජපානය, එක්සත් රාජධනිය, ගල්ෆ් කලාපිය රටවල් සහ ඇමෙරිකා එක්සත් ජනපදය වැනි රටවල් රැසකින් තේ භෝගයේ සිට තේ කෝප්පය දක්වා වන සමස්ත ගෝලීය තේ වටිනාකම් දාමයේ කර්මාන්ත ප්‍රවීණයන්, විශේෂඥයන් ප්‍රමුඛ සන්නාම සහ සමාජ සංවිධාන මේ සඳහා එක්ව සිටී.

මෙරට තේ නිෂ්පාදකයින් සහ ඒ ආශ්‍රිත ව්‍යාපාර රැසක ප්‍රදර්ශනයක් ද මේ හා සමගාමීව සංවිධානය කර තිබේ.
කොළඹ තේ වෙළෙඳ සංගමයේ සභාපති සංජය හේරත් මහතා විසින් මෙහිදී ජනාධිපති රනිල් වික්‍රමසිංහ මහතා වෙත විශේෂ සිහිවටන තිළිණයක් ද පිළිගැන්වීය.

මෙහිදී වැඩිදුරටත් අදහස් දැක්වූ ජනාධිපති රනිල් වික්‍රමසිංහ මෙසේද පැවසීය,

අද අප මෙහි රැස්ව සිටින අවස්ථාව වන විට පාර්ලිමේන්තුවේ ආර්ථික පරිවර්තන පනත් කෙටුම්පත විවාදයට ගනිමින් තිබෙනවා. පහුගිය අවුරුදු හතරක කාලසීමාව තුළ අප සිදු කළ වැඩකොටස පිළිබඳ මම අමුතුවෙන් සඳහන් කළ යුතු නැහැ.

නමුත් අපගේ ආනයනික භාණ්ඩ සඳහා ගෙවීමට තවමත් විදේශ විනිමය අවශ්‍ය බව අප මතක තබා ගත යුතුයි. ඉදිරි දශකය තුළ අපනයන ආර්ථිකයකට රට පරිවර්තනය කිරිම වෙනුවෙන් අප කැපවී සිටින්නේ ඒ නිසයි. එය ශුද්ධ ශුන්‍ය විමෝචන ඉලක්කය සපුරාගත් සහ ඩිජිටල්කරණය මත පදනම් වූ ඉහළ තරගකාරි ආර්ථිකයක් ද විය යුතුයි. අද විවාදයට ගැනෙන මෙම පනත තුළ ඊට අදාළ මූලධර්ම හා ආයතනික ව්‍යුහය අන්තර්ගත වෙනවා.

පාර්ලිමේන්තුවේ පක්ෂ, විපක්ෂ සියලුදෙනාගේ සහාය මේ සඳහා හිමි වනු ඇතැයි මම විශ්වාස කරනවා. රට අපනයන ආර්ථිකයකට පරිවර්තනය කිරීමේ දී තේ කර්මාන්තයට ද විශාල වගකීමක් පැවරී තිබෙනවා. 19 වැනි සහ 20 වැනි සියවස්වල පැවති වැඩවසම් ආර්ථිකයේ සිට නවීන ආර්ථිකයකට අප පරිවර්තනය වූයේ තේ ඇතුළු අපගේ වැවිලි කර්මාන්තය නිසයි. තේ කර්මාන්තය නොතිබුණා නම් අද මේ රටේ බොහෝ නවීකරණ ක්‍රම ඇති නොවන්න තිබුණා. තේ කර්මාන්තය ඇති නොවන්න ඇල්ල ප්‍රදේශය සංචාරක ආකර්ෂණයක් සහිත ප්‍රදේශයක් නොවන්නත් ඉඩ තිබුණා.

අප දැන් සිටින්නේ එහි තවත් සුවිශේෂි අදියරකයි. මෙහිදී අප යථාර්ථවාදී විය යුතුයි. අප වසර 30-40ක් තිස්සේ ඉඩම්වලින්, වතුකරයෙන් ලබාගැනීමට හැකිව තිබු ආදායම් අහිමිකරගත් රටක් බවට පත්වී තිබෙනවා. එම ආදායම් නැවත ලබා ගැනීම වෙනුවෙන් වතුකරයත්, රටත් දියුණු කිරීමට අප සැලසුම් කර තිබෙනවා.

එහිදී ඉහළම ඉපැයීම් දෙස අවධානය යොමු කරන කුඩා වතු හිමියන් සහ විශාල කළමනාකරණ සමාගම් යන දෙඅංශයෙන්ම දියුණු වන කෘෂි ව්‍යාපාර අපට අවශ්‍යයි. එහිදී සුවිශේෂි පියවර දෙකක් තිබෙන අතර වැටුප් ප්‍රශ්නය විසඳීම එහි පළමු අවශ්‍යතාවයයි. වතුකරයේ ජනතාව පසුගිය ආර්ථික අර්බුදයට හමුවේ වැඩිම පීඩාවකට ලක් වු ජනතාව අතර ඉදිරියෙන්ම සිටින බව අප අමතක නොකළ යුතුයි.

එසේම වතුකරයේ දැනට පවතින සියලුම ලයින් කාමර සහ ඒ අවට ප්‍රදේශ රජයට පවරාගෙන ගම්මාන ලෙස නැවත ගැසට් කිරීමට අප බලාපොරොත්තු වෙනවා. එවිට වතුකරයේ ඇති වන දියුණුව සමඟ ලයින් කාමර සංකල්පය තුරන් වී යනු ඇතැයි අප බලාපොරොත්තු වෙනවා.

නුවරඑළිය ප්‍රදේශයේ බහුමාන දරිද්‍රතා දර්ශක, යුද්ධයෙන් පීඩාවට පත් උතුරු පළාතේ ඇතැම් ප්‍රදේශවලට ද වඩා ඉතා ඉහළ මට්ටමක පවතිනවා. ඒ නිසා අප මේ කෙරහි ප්‍රමුඛ අවධානයක් යොමු කර කටයුතු කළයුතුයි. ඒ වගේම මෙම කාලය තුළ ඇතැම් ව්‍යවසායන්, විශේෂයෙන් කුඩා පරිමාණයේ ව්‍යවසායකයින් මුහුණ දී සිටින ණය ප්‍රශ්නය විසඳන්නේ කෙසේද යන ගැටළුව තිබෙනවා.

එසේම රුසියානු වෙළඳපොළට ප්‍රවේශ වීම අප අවධානය යොමු කළ යුතු තවත් කරුණක් බවට පත්ව තිබෙනවා. රුසියාව වෙත පනවා ඇති සම්බාධක ඔවුන්ට කිසිඳු ආකාරයකින් පසුබෑමක් ඇතිකර නැහැ. ඔවුන් කෙසේ හෝ ආසියාවට පැමිණ තිබෙනවා. ගැටලුව ඇතිවී තිබෙන්නේ රුසියාව සමඟ වෙළඳාම් කිරීමට සිටින අප වැනි රටවලටයි. අපට නව දැක්මක් අවශ්‍ය වෙනවා. නමුත් ඒ සඳහා ඇමෙරිකානු ජනාධිපතිවරණයේ ප්‍රතිඵලය එනතෙක් අපට බලා සිටිය යුතුයි. එතෙක්, ඔබ ඔබේ තේ රුසියාවට ගෙන යන ආකාරය පිළිබඳ ඔබේ මාධ්‍යයන් භාවිතා කළ යුතුයි.

අපේ රටේ කුඩා වතු හිමියන් විශාල පිරිසක් සිටින අතර, ඒ හරහා වැවිලි කර්මාන්තය කෘෂි ව්‍යාපාරයක් බවට පත් කරන්නනේ කෙසේද කියා අප අවධානය යොමු කළයුතුයි. අප තේ වගාව පමණක් සිදු කරනවාද, නැතහොත් ඔබේ ප්‍රදේශවල සුහුරු කෘෂිකර්මාන්තය සඳහා ඉඩ ලබා දෙනවාද? කියා තීරණය කළ යුතුයි. ඉදිරි කාලය තුළ කෘෂි ව්‍යාපාර වර්ධනය සඳහා රටේ අනෙකුත් ප්‍රදේශවල ඉඩම් ලබාදීමට ද අප අපේක්ෂා කරනවා. ඒ පිළිබඳ සොයා බැලීමට ඔබට අවස්ථාව තිබෙනවා.

අපේ ඇතැම් සමාගම් පිටරට ගොස් ව්‍යාපාර කටයුතු ආරම්භ කර තිබෙනවා. තේ කර්මාන්තය තුළ ශ්‍රී ලංකාව ප්‍රමුඛයා වී සිටින තාක් එය ආණ්ඩුවට ප්‍රශ්නයක් නොවෙයි. ඒ යටතේ අප තවදුරටත් ඉදිරියට යා යුතුයි. තේ වෙළෙඳපොළ තුළ ශ්‍රී ලංකාව ආධිපත්‍ය දැරිය යුතුයි.

අද තේ සඳහා පවතින ඉල්ලුම කුමක්දඅ? 80 සහ 90 දශකවල ඉපදුණු (Millennials) සහ Gen Z පරපුරේ අවශ්‍යතාව කුමක්ද, ඔබ මෙහි සිදුකරන ප්‍රවර්ධන, පර්යේෂණ සහ සංවර්ධන කටයුතු හැර එම වැඩපිළිවෙළ ශ්‍රි ලංකාව තුළ හඳුනාගෙන නැහැ. එහිදී ඔබ යුරෝපය සහ ඇමරිකාව වැනි රටවල් පිළිබඳ අවධානය යොමු කළ යුතු අතර නව ප්‍රවනතා සොයා බැලිය යුතුයි කියා මම විශ්වාස කරනවා.

ඒ වගේම අපගේ තේ පර්යේෂණ ආයතනය ශක්තිමත් කළ යුතුයි. ඒ වෙනුවෙන් රජය සහ පෞද්ගලික අංශය ඒකාබද්ධව වැඩසටහනක් ක්‍රියාත්මක කිරීමට ද සැලසුම් කර තිබෙනවා.

අප සියලුදෙනා එක්ව මෙම කටයුතු ඉදිරියට ගෙන යා යුතුයි. අපනයන ආර්ථිකයක් සමඟ රට ඉදිරියට ගෙන යාමේ දී තේ කර්මාන්තයේ නව ප්‍රවර්ධනය ඉතා වැදගත් වෙනවා. එම කටයුතු සඳහා රජය සමඟ එක්වන ලෙස මම සියලුදෙනාගෙන් ඉල්ලා සිටිනවා.

කෘෂිකර්ම හා වැවිලි කර්මාන්ත අමාත්‍ය මහින්ද අමරවීර :

මෙරට තේ තර්මාන්තය සහ එම ක්ෂේත්‍රය ශක්තිමත් කිරීමට සහ තිරසරව පවත්වාගෙන යාමට පරිවර්තනීය ගමනක් අප ආරම්භ කර තිබෙනවා. 2024 වසර අවසන් වන විට ශ්‍රී ලංකාවේ තේ සඳහා ගෝලීය වශයෙන් පිළිගත් ජාතික තිරසාර ප්‍රමිතියක් අප ස්ථාපිත කරනවා. මෙය ශ්‍රී ලංකාවේ තේ කර්මාන්තය තුළ සුවිශේෂී සන්ධිස්ථානයක් සනිටුහන් කරනු ඇති අතර සංවර්ධනය සහ යහපැවැත්ම සහතික කිරීම සඳහා අපගේ කැපවීම පිළිබඳ සාක්ෂියක් බවට ද පත්වෙනවා.

මෙම නව ප්‍රමිතිය මගින් අඩු කාබන් ප්‍රමාණයක් විමෝචනය කරන තේ නිෂ්පාදනය ප්‍රවර්ධනය කරමින් පුනර්ජනනීය කෘෂිකාර්මික ආකෘතියක් සංවර්ධනය කිරීම සහ ක්‍රියාත්මක කිරීම සඳහා මග පෙන්වනු ඇතියි. මෙම බහුවිධ ක්‍රියාපටිපාටි සහිත ප්‍රවේශය සඳහා අපගේ තේ නිෂ්පාදන ක්‍රියාවලීන් පාරිසරික වශයෙන් තිරසර හා ආර්ථික වශයෙන් වටිනා බව සහතික කිරීම සඳහා ශක්තිමත් ජීවන චක්‍ර විශ්ලේෂණයක් සිදු කිරීම ද ඇතුළත් වෙනවා.

මෙම සම්මේලනය සිලෝන් තේ සහ ගෝලීය පාර්ශවකරුවන් සඳහා වැදගත් සංසදයක් වෙනවා. ලොව පුරා තේ කර්මාන්තය තීරණාත්මක කාලයකට මුහුණ දී සිටින අතර “තේ – ජීවන රටාවක් සහ ජීවනෝපායක් ” යන මෙම සමුළුවේ තේමාව තේ කර්මාන්තය සඳහා කාලෝචිත සහ තීරණාත්මක වෙනවා. ඉදිරි දින දෙක තුළ සැලසුම් කර ඇති මෙම සංවාද තේ කර්මාන්තයේ අනාගතය සඳහා ඉතා වැදගත් වෙනවා.

ජනාධිපති කාර්ය මණ්ඩල ප්‍රධානී හා ජාතික ආරක්ෂාව පිළිබඳ ජනාධිපති ජ්‍යෙෂ්ඨ උපදේශක සාගල රත්නායක, කෘෂිකර්ම හා වැවිලි කර්මාන්ත අමාත්‍යාංශයේ ලේකම් ජානක ධර්මකීර්ති, ශ්‍රී ලංකා තේ මණ්ඩලයේ සභාපති නිරාජ් ද මෙල්, කොළඹ ජාත්‍යන්තර තේ සම්මේලනයේ සම සභාපතිවරුන් වන ගනේෂ් දේවනායගම් සහ අනිල් කූක් ඇතුළු තේ වතු හිමියන්, තේ කර්මාන්තශාලා හිමියන් සහ තේ කර්මාන්තයට සම්බන්ධ දෙස් විදෙස් නියෝජිතයින් මෙම අවස්ථාවට එක්ව සිටියහ.

ආදායම් පරිපාලන කළමනාකරණ තොරතුරු පද්ධතිය (RAMIS) ඵලදායි අයුරින් යොදා ගන්නේ කෙසේද යන්න පිළිබඳව සොයා බලා නිර්දේශ ලබා දීම සඳහා පත් කළ අමාත්‍ය මණ්ඩල අනුකමිටුවේ වාර්තාව පසුගියදා ජනාධිපති කාර්යාලයේදී ජනාධිපති රනිල් වික්‍රමසිංහ  වෙත පිළිගැන්වීය.

මුදල්, ආර්ථික ස්ථායිකරණ සහ ජාතික ප්‍රතිපත්ති පිළිබඳ අමාත්‍යවරයා වශයෙන් ජනාධිපති රනිල් වික්‍රමසිංහ  විසින් ‘ආදායම් පරිපාලන කළමනාකරණ තොරතුරු පද්ධතිය (RAMIS) – නඩත්තු සේවා ලබා ගැනීම’ මැයෙන් අමාත්‍ය මණ්ඩල සංදේශ අංක 24/0696/604/079 වෙත ලබා දුන් 2024 අප්‍රේල් මස 8 දිනැති අමාත්‍ය මණ්ඩල තීරණයට අනුව මෙම අමාත්‍ය මණ්ඩල අනුකමිටුව පත් කෙරිණි.

විදුලිබල හා බලශක්ති අමාත්‍ය කංචන විජේසේකර මහතාගේ සභාපතිත්වයෙන් යුත් එම අනුකමිටුවේ සෙසු සාමාජිකයන් වශයෙන් අමාත්‍යවරුන් වන ටිරාන් අලස් සහ නලීන් ප්‍රනාන්දු යන මහත්වරුන් කටයුතු කළ අතර මෙම අමාත්‍ය මණ්ඩල අනු කමිටුවේ ලේකම් ලෙස ජනාධිපති සහකාර ලේකම් රසාලි විජේසූරිය  කටයුතු කළාය.

එසේම මෙම අමාත්‍ය මණ්ඩල අනු කමිටුවට සහාය වීම සඳහා තාක්ෂණ අමාත්‍යාංශයේ ලේකම් ආචාර්ය ධර්මසිරි කුමාරතුංගගේ සභාපතීත්වයෙන් යුත් නිලධාරීන්ගේ කමිටුවක් ද පත්කර තිබිණ.

ජනාධිපතිතුමාගේ සංකල්පයකට අනුව ක්‍රියාත්මක කරන තරුණ තරුණියන්ගේ ක්‍රීඩා කෞශල්‍ය ඔප් නැංවීමේ සහ තරුණ තරුණියන්ගේ මානසික සහනය සඳහා ගෙනයන වැඩපිළිවෙලේ එක් වැඩසටහනක් ලෙස බෙල්ලන්විල ප්‍රදේශයට නව ක්‍රීඩාංගනයක් ලබාදීම එක්සත් ජාතික පක්ෂයේ කැස්බෑව ආසනයේ ප්‍රධාන සංවිධායක සමන් රත්නප්‍රියගේ ප්‍රධානත්වයෙන් ඊයේ, (24) සිදු කෙරිණ.

බෙල්ලන්විල ප්‍රදේශයේ තරුණ තරුණියන්ට ක්‍රීඩා කිරීමට නිසියාකාර ක්‍රීඩාංගනයක් නොතිබීම හේතුවෙන් ඔවුන් විවිධ දේශපාලනික සහ විවිධ පුද්ගලයන්ගෙන් ක්‍රීඩාංගනයක අවශ්‍යතාවය සපුරාලන ලෙස ඉල්ලා තිබිණ .

එම ඉල්ලීමට කඩිනම් ප්‍රතිචාරයක් දක්වමින් කැස්බෑව එජාප ප්‍රධාන සංවිධායක සමන් රත්නප්‍රිය මහතාගේ මැදිහත්වීමෙන් බෙල්ලන්විල විහාර මාවතේ දිවුල් පිටිය පාරේ ඉඩම් ගොඩකිරීමේ සහ සංවර්ධනය කිරීමේ සංස්ථාව සතු ඉඩමක් ක්‍රීඩාංගනයකට සුදුසු පරිදි සකස් කොට ලබාදී තිබේ.

ඉඩම් ගොඩකිරීමේ හා සංවර්ධනය කිරීමේ සංස්ථාවේ පූර්ණ මැදිහත්වීමෙන් සිදුකෙරුණු මෙම ක්‍රීඩාංගනය ලබාදීමේ අවස්ථාවට
ඉඩම් ගොඩකිරීමේ සංස්ථාවේ සභාපති කොමදෝරු හිරාන් S. බාලසූරිය ද සහභාගි වී සිටියේ ය.

එසේම කැස්බෑව එක්සත් ජාතික පාක්ෂිකයින් විශාල පිරිසක්ද බෙල්ලන්විල ක්‍රීඩා සමාජයේ නිලධාරීන් ඇතුළු ප්‍රදේශවාසීන්ද මෙම අවස්ථාවට එක්ව සිටියහ.

ක්‍රීඩාංගණය නිල වශයෙන් බෙල්ලන්විල ක්‍රීඩා සමාජයේ සභාපති හට බාරදීමෙන් අනතුරුව පිරිස සුහද ක්‍රිකට් තරගයක් සඳහා ද සහභාගී වූහ.

පසුව මාධ්‍ය ඇමතු එජාප කැස්බෑව ප්‍රධාන සංවිධායක සමන් රත්නප්‍රිය ජනාධිපති රනිල් වික්‍රමසිංහ ගේ තරුණ තරුණියන් සවි බල ගැන්වීමේ වැඩසටහන පිළිබඳව ද අදහස් දැක්වීමක් සිදුකළේ ය.

රාජ්‍ය සේවයේ විශ්‍රාමිකයන් සඳහා රුපියල් 3000ක විශේෂ මාසික දීමනාවක් ලබාදීමට අද (24) රැස්වූ කැබිනට් මණ්ඩලයේදී අනුමතව ඇති බව වාර්තා වෙයි.

ඒ අනුව මෙම විශේෂ මාසික දීමනාව 2024 සැප්තැම්බර් මස සිට වැටුප් විෂමතා නිවැරදි කරන තෙක් ගෙවීමට නියමිත බවද වාර්තා වෙයි.

මේ බව තහවුරු කරමින් අමාත්‍ය සුසිල් ප්‍රේමජයන්ත මෙසේ සඳහන් කර ඇත.

"රාජ්‍ය සේවයේ වැටුප් විෂමතා සම්බන්ධයෙන් වෙනම කමිටුවක් පත් කරලා තිබෙනවා. සෑම ක්ෂේත්‍රයකම තිබෙන වැටුප් විෂමතා එකවර විසඳන්න තමයි කමිටුව පත් කළේ. ඒ අතරතුර ඒ කමිටුවේම අදහසක් අනුව තමයි මේ කටයුතු සම්පූර්ණ වෙනකම් විශ්‍රාමිකයන්ට සැප්තැම්බර් මාසයේ සිට රුපියල් 3000ක දීමනාවක් දෙන්න තීරණය කළේ. ලක්ෂ 7කට විතර ඒ ප්‍රතිලාභය ලැබෙනවා."

මේ සම්බන්ධයෙන් අදහස් දක්වමින් දේශපාලන හා ආර්ථික විශ්ලේෂකයන් පෙන්වා දෙන්නේ විශ්‍රාමික ප්‍රජාව පසුගිය ආර්ථික අර්බුදය හමුවේ දැඩි පීඩනයකට මුහුණ දුන් පිරිසක් බැවින් ඔවුන් සම්බන්ධයෙන් වන සමාජ ආරක්ෂණ ජාලය ශක්තිමත් කිරීමට රජය ගෙන ඇති තීන්දුව අතිශය වැදගත් බවයි.

එසේම රට අර්බුදයෙන් මිදෙමින් ආර්ථික ස්ථාවරත්වයක් කරා ශක්තිමත් ලෙස ගමන් කිරීමට ගෙන ඇති බව මේ හරහා තවදුරටත් තහවුරු කෙරෙන බවද ඔවුන් පෙන්වා දෙයි.

කෙසේ වුවත් වත්මන් ප්‍රතිපත්තියේ කිසියම් හෝ වෙනසක් අනාගතයේ සිදුවුවහොත් මේ පළමුව අහිමි වන්නේ සහ කප්පාදු වන්නේ මෙවැනි සුබසාධක ප්‍රතිලාභ බවද ඔවුන් වැඩිදුරටත් සඳහන් කරයි.

වත්මන් ජනාධිපති රනිල් වික්‍රමසිංහ මීට වසර දෙකකට පෙර ජනාධිපති ධුරය භාර නොගත්තේ නම් සිදු වන්නේ අමරකීර්ති මන්ත්‍රීතුමාට සිදු වූ දේම බව නාගරික සංවර්ධන හා නිවාස අමාත්‍ය ප්‍රසන්න රණතුංග පවසයි.

පොහොට්ටුව නිවැරැදි මොහොතේදී හරි තීන්දුව ගනු ඇතැයි තමන්ට තවමත් විශ්වාස බවද ඇමතිවරයා වැඩිදුරටත් පෙන්වා දෙයි. ‍

ප්‍රසන්න රණතුංග අමාත්‍යවරයා මේ බව සඳහන් කර සිටියේ නෙළුම් මාවත කාර්යාලයේදී පැවැති සාකච්ඡාවට සහභාගීවීමෙන් පසුව මාධ්‍යවේදීන් හමුවේ අදහස් පළ කරමින් ය.

එහිදී මාධ්‍යවේදීන් පළ කළ ප්‍රශ්න ඇමතිවරයා ලබා දුන් පිළිතුරු මෙසේය,

ප්‍රශ්නය – ඔබතුමාලා දෙන්නා ඉන්නේ මත දෙකක. අපිට හරි මතය කියන්න?

පිළිතුර – තව සතියක් ඇතුලත කියනවා.

ප්‍රශ්නය – ඇයි ඒ

පිළිතුර – මගේ මතය කියලා ඉවරයිනේ. මට අලුතින් කියන්න දෙයක් නෑනේ. මම වෙනස් කරලා නෑ.

ප්‍රශ්නය – ඒ කියන්නේ රනිල් මහත්තයා ඕනේ.

පිළිතුර – ඔව්

ප්‍රශ්නය – තිස්සකුට්ටිආරච්චි මහත්තයා කියන්නේ පොහොට්ටුවෙන් කවුරු හරි ඕනි කියලා.

පිළිතුර – ඒක හරි. අපි දෙගොල්ලොම කියන්නේ හොඳ අපේක්ෂකයෙක් දෙන්න කියලා.

ප්‍රශ්නය - තිස්සකුට්ටිආරච්චි මන්ත්‍රීවරයා - ඇයි එච්චර කලබල.

නාගරික සංවර්ධන හා නිවාස අමාත්‍ය ප්‍රසන්න රණතුංග – මේ භූමියේ ඒක අහන්න එපා. එළියෙදි ඇහුවොත් මම ඒකට උත්තරය දෙන්නම්. මේ මහත්තයාගෙන් අහන්න මෙයා තමයි දවසේ නායකයා.

ප්‍රශ්නය – පොහොට්ටුවේ කවුද දිනන්න පුළුවන් අපේක්ෂකයා දාන්න ඕනේ. ඔබතුමා පක්ෂ කාර්යාලයේ ඉදන්නේ කිව්වේ නැත්තේ දැන් ඉන්නේ පාරේ.

පිළිතුර – නාගරික සංවර්ධන හා නිවාස අමාත්‍ය ප්‍රසන්න රණතුංග මහතා – මේ පක්ෂය හදපු කෙනෙක් මම. මම මේ පක්ෂය හානිවෙන්න දකින්න කැමැති කෙනෙක් නෙමෙයි. ඒක නිසා මම ඒක කතා කරන්න සුදානමක් නෑ. හැබැයි මගේ මතය ඉන්න වේදිකාවේදී පැහැදිලිවම කියලා තියෙනවා. ඒ මතයේ අදත් ඉන්නවා මම.

ප්‍රශ්නය – මොකක්ද ඒ මතය

පිළිතුර – රනිල් වික්‍රමසිංහ මහත්තයා මේ රටේ ජනාධිපති වෙන්න ඕනේ. කලගුණ දන්න මිනිස්සු නම් අද මතක තියා ගන්න ඒ අරගලය වෙන කෙනෙක්ගේ අතට ගියා නම් මහින්ද මහත්තයටත්, ගෝඨාභය මහත්තයාට වෙන්නෙත්, අපිට වෙන්නෙත් අමරකීර්තිට වෙච්ච දේමයි. ජනාධිපති රනිල් වික්‍රමසිංහ මහත්තයා නීතිය හා සාමය ස්ථාපිත කරා විතරක් නෙමෙයි ආර්ථිකය ගොඩ නගන්න පියවර ගත්තා. අපි ඒකට ගරු කරන්න ඕනේ. මහින්ද මහත්තයා වෙනුවෙන් අපි එළියට බැස්සේ මහින්ද මහත්තයා යුද්ධය ජයග්‍රහණය කළ නිසා. එතුමා රටට වැඩක් කළ නායකයෙක් හින්දා. අදටත් අපි එතුමත් එක්ක ඉන්නවා. ඒකනේ අපි මෙතැනට එන්නේ. මම විශ්වාස කරනවා පක්ෂය හරි වෙලාවට හරි තීන්දුවක් ගනියි කියලා.

ආණ්ඩු වෙනස් වීමේදී ප්‍රතිපත්ති ද වෙනස් වීම අපේ රටේ පවතින ප්‍රධාන ගැටළුවක් බවත් එම ක්‍රමය වෙනස් කිරීම වෙනුවෙන් රජය, මූල්‍ය හා පාලන අංශවල ව්‍යුහාත්මක ප්‍රතිසංස්කරණ ගණනාවක් සිදු කර ඇති බවත් ජනාධිපති කාර්ය මණ්ඩල ප්‍රධානී සහ ජාතික ආරක්ෂාව පිළිබඳ ජනාධිපති ජ්‍යෙෂ්ඨ උපදේශක සාගල රත්නායක පැවසීය.

එම සෑම පියවරක්ම ගනු ලැබූවේ ස්ථාවර ආර්ථික ක්‍රමයක් රට තුළ නිර්මාණය කිරීමට බව ද පෙන්වා දුන් ඒ මහතා මහබැංකු පනත, රාජ්‍ය මුල්‍ය පනත, රාජ්‍ය ණය කළමනාකරණ පනත මේ වන විටත් ඉදිරිපත් කර තිබෙන අතර ආර්ථික පරිවර්තන නීතිය ද සම්මත කරගැනීම සඳහා පාර්ලිමේන්තුවට ඉදිරිපත් කර ඇති බවද සඳහන් කළේය.

සාගල රත්නායක මහතා මේ බව සඳහන් කළේ අද (24) කොළඹ සිනමන් ලේක්සයිඩ් හෝටලයේ පැවති ප්‍රවාහන හා මහාමාර්ග අමාත්‍යාංශය විසින් සංවිධානය කරන ලද වරාය පිවිසුම් අධිවේගී මාර්ගය පිළිබඳ තාක්ෂණික සම්මන්ත්‍රණයේ ප්‍රධාන දේශනය සිදුකරමිනි.

වරාය පිවිසුම් අධිවේගී මාර්ග ව්‍යාපෘතියේ වැඩකටයුතු මේ වන විට සාර්ථකව අවසන් කෙරෙමින් පවතින බව සඳහන් කළ සාගල රත්නායක මහතා මෙම ව්‍යාපෘතිය අවසන් වීමත් සමඟම එමඟින් මෙරට ආර්ථිකයට විශාල ශක්තියක් ලැබෙන බව ද පැවසීය.

මෙහිදි වැඩිදුරටත් අදහස් දැක්වූ සාගල රත්නායක  මෙසේ ද පැවසීය,

“අපේ අනාගත පරපුර රටේ සංවර්ධනය වෙනුවෙන් දායක කරගැනීම සඳහා මෙවැනි සම්මන්ත්‍රණයක් සංවිධානය කිරීම පිළිබඳ පළමුවෙන්ම මගේ ස්තූතිය පිරිනමනවා. මේ ව්‍යාපෘතිය තාක්ෂණය අතින් ඉතා විශේෂ ව්‍යාපෘතියක් බව පැවසිය යුතුයි. ඒවගේම මෙම ව්‍යාපෘතිය සිදුකිරීමේදී ප්‍රශ්න ගණනාවකට මුහුණ දීමට සිදුවූ බවත් සඳහන් කළ යුතුයි.

පළමුවැන්න ලෙස ඉතාමත්ම කාර්ය බහුල වරාය පරිශ්‍රයක් හරහා මෙම ව්‍යාපෘතියේ ඉදිකිරීම් කටයුතු සිදු කිරීමට සිදුවුණා. මෙම වරාය පරිශ්‍රය තුළ දැනට පවතින ඉඩකඩ ද ප්‍රමාණවත් නැහැ. ඒ තත්ත්වය තුළ වුවත් මේ ව්‍යාපෘතිය සිදු කිරීම සඳහා වැඩපිළිවෙලක් සකස් කිරීමට සිදුවුණා. වරාය මෙහෙයුම් කටයුතු කිසිවකට හානියක් නොවන අයුරින් මේ වැඩපිළිවෙළ සකස් කර මෙම ව්‍යාපෘතිය කළා. එහිදී වරාය මූලස්ථානය පවා වෙනත් ස්ථානයකට ගෙන යාමේ කටයුතු ද ආරම්භ කළා. ඒ සියල්ල සිදුකරමින් 2019 වසරේදී මෙම ව්‍යාපෘතියේ ඉදිකිරීම් කටයුතු ආරම්භ කළා.

2020 වසරේ ඇතිවූ කොව්ඩ් වසංගතය මඟින් ඇතිවූ බලපෑම ද පාලනය කරගනිමින් මෙහි ඉදිකිරීම් සමාගම එම කටයුතු සාර්ථකව ගෙන ගියා. ඉන්පසුව ඇතිවූ ආර්ථික අර්බුදය අනෙක් සියලු කාරණාවලට වඩා මෙම ව්‍යාපෘතියට බලපෑමක් එල්ල කළා. විදේශ විනිමය හිඟය වැනි කරුණු මේ සඳහා දැඩි ලෙස බලපෑවා. නමුත් අද වන විට විශාල ප්‍රමාදයකින් තොරව මෙම ව්‍යෘපෘතියේ වැඩකටයුතු සාර්ථකව අවසන් කෙරෙමින් පවතිනවා. ඒත් සමඟම මේ හරහා අපේ ආර්ථිකයට විශාල ශක්තියක් ලැබෙනවා.

දශක තුනකට පමණ පෙර සැලසුම් කරන ලද අධිවේගී මාර්ග පද්ධතියක් අපට තිබෙනවා. විවිධ ප්‍රශ්නවලට මුහුණ දෙමින් වූවද අප ක්‍රමක්‍රමයෙන් මෙම කටයුතු සිදුකරගෙන යනවා. මේ වන විට මෙම සැලැස්මේ බොහෝ කොටස් ඉදිවෙමින් පවතින නමුත් අපට මෙහි වැදගත්ම කොටස අතහැරී තිබෙනවා. ඒ මෙම සියලුම අධිවේගී මාර්ග එකිනෙකට සම්බන්ධ කරනු ලබන වටරවුම් පද්ධතියයි. ඒ මඟින් නගරය තුළටත් ඉන් පිටතටත්, නගරයේ කටයුතුවලට බාධාවක් සිදු නොකරමින් නගරයට හරහා ගමන් කළ යුතු වාහන පිටතට ගෙනයනු ලබනවා. එම පද්ධතියේ එක් වැදගත් කොටසක් බවට මෙම කණු මත දිවෙන වරාය පිවිසුම් අධිවේගී මාර්ගය පත්වෙනවා.

විශේෂයෙන්ම කොළඹ වරායත්, කටුනායක ජාත්‍යන්තර ගුවන්තොටුපොළත් අතර පවතින රථවාහන තදබදය මෙම අධිවේගී මාර්ගයට සම්බන්ධ කෙරෙනවා.

රථවාහන තදබදයක් පවතින විට ඒ සමඟ ප්‍රමාදය ඇතිවෙනවා. ප්‍රමාදය කියන්නේ මුදල්. ඒ ප්‍රමාදය මඟහරවා ගැනීම සඳහා අප අපගේ සැපයුම් මධ්‍යස්ථාන නගරයෙන් පිටතට ගෙනයනවා. ඒ කියන්නේ යළිත් කාලය සහ මුදල් වැයවෙනවා. මෙම අධිවේගී මාර්ග භාවිතය කාලයත් මුදලත් අපතේ යාම වලක්වා ගැනීමට හැකිවෙනවා. නමුත් අප කොළඹ නගරය සැලකුවහොත් අනාගත සංවර්ධනයට ඉඩකඩ වෙන් කරමින් නගර සංවර්ධන කටයුතු නිසිලෙස සිදුව නැහැ. මැලේසියාව, සිංගප්පූරුව වැනි රටවල මාර්ග පද්ධතිය සැලකුවහොත් එම මාර්ග පුළුල් කිරීම සඳහා ඉඩක් වෙන් කර තබමින් ඉදිකිරීම් කටයුතු සිදුකර තිබෙනවා. නමුත් කොළඹ නගරය පැරණි නගරයක් නිසා එවැනි තත්ත්වයක් නැහැ. ඒ වගේම නගර සංවර්ධනයේදී කාලයෙන් කාලයට ප්‍රතිපත්ති වෙනස් කළ නිසා මෙවැනි ඉඩකඩක් පවත්වාගෙන ගොස් නැහැ. එනිසා අද අප කොළඹ නගරය තුළ විශාල රථවාහන තදබදයකට ලක්වී තිබෙනවා.

අධිවේගී මාර්ග පද්ධතියකින් පමණක් මෙම ගැටළුව විසඳාගැනීමට හැකියාවක් නැහැ. මාර්ග පද්ධතියකට පමණක් සීමා වුවහොත් මෙම ප්‍රශ්න විසඳා ගැනීමට හැකියාවක් ලැබෙන්නේ ද නැහැ. මේ සඳහා අධිවේගී දුම්රිය පද්ධතියක් කෙරෙහි අපගේ අවධානය යොමු කළ යුතුයි. දැනට පවතින දුම්රිය පද්ධතිය දියුණු කරනවාද, කණු මත දිවෙන දුම්රිය පද්ධතියක් ඉදි කරනවාද නැතහොත් උමං දුම්රිය මාර්ගය පද්ධතියක් වෙත යොමුවෙනවාද යන්න පිළිබඳ අප අවධානය යොමු කළ යුතු වෙනවා. එහිදී සුදුසුම ක්‍රමවේදය උමං දුම්රිය මාර්ග පද්ධතිය වූවත් ඒ සඳහා අධික පිරිවැයක් දැරීමට සිදුවෙනවා. ඊට සාපේක්ෂව කණු මත දිවෙන දුම්රිය පද්ධතියක් සඳහා වැයවන පිරිවැය අඩුයි.

වියදම් අඩුම ක්‍රමවේදය වන්නේ දැනට පවතින දුම්රිය පද්ධතිය වැඩිදියුණු කිරීමයි. දුරදිග බලා අප විසින් සිදු කළ යුතු සුදුසුම ක්‍රමවේදය කුමක්ද යන්න විශේෂඥයින් විසින් තීරණය කර අපට ලබාදිය යුතුයි. එවගේම එය වාණිජමය කටයුත්තක් බවට පත්කරගන්නේ කොස්ද යන්න පිළිබඳවත් අප අවධානය යොමු කළ යුතුයි. මේ සඳහා වියදමක් දැරීමට සිදුවෙනවා. ඒ වියදම පියවාගන්නේ කෙසේද යන්න පිළිබඳ ව ද අවධානය යොමු කළ යුතුයි. එය සිදුකළ යුතු වන්නේ ප්‍රවේශ පත්‍ර මඟිනුයි. නමුත් අපේ ජනතාවගේ වත්මන් ආදායම් තත්ත්වය තුළ එම වියදම ඇතුළත් ප්‍රවේශපත්‍රයක් මිලදී ගැනීමේ හැකියාවක් නැහැ. අප ඒ තත්ත්වයට ගමන් කළ යුතු නමුත්, ඒ සඳහා යම් කාලයක් ගතවෙනවා. එනිසා අප මේ පිළිබඳ අලුත් ක්‍රම සොයාබැලිය යුතු වෙනවා.

හොංකොං වල සිදුකළේ දුම්රිය ස්ථාන සහිත ඉඩම් රජය විසින් උමං දුම්රිය පද්ධතිය සංවර්ධනය කළ ආයෝජකයින් වෙත ලබාදීමයි. ඔවුන් එම ඉඩම්වල පොළොව යට දුම්රිය ස්ථාන ඉදිකර පොළොව මතුපිට සාප්පු සංකීර්ණ, කාර්යාල සංකීර්ණ, මහල් නිවාස ව්‍යාපෘති වැනි මිශ්‍ර සංවර්ධන ව්‍යාපෘති සිදුකළා. එමඟින් එම වියදම් පියවාගෙන ජනතාවට දැරිය හැකි මුදලකට ප්‍රවේශ පත්‍ර ලබාදීමේ ක්‍රමවේදයක් ඇතිකළා. ඒ ආකාරයෙන්ම අපේ රටට සුදුසු ක්‍රමවේදයක් අප සොයාගත යුතුව තිබෙනවා. ඒ පිළිබඳ දැනටමත් කටයුතු සිදු කෙරෙමින් පවතිනවා, නමුත් අප ඊට වැඩි අවධානයක් යොමු කළ යුතුයි.

අප ජපාන ආධාර යටතේ සැහැල්ලු දුම්රිය ව්‍යාපෘතියක් ආරම්භ කිරීමට සැලසුම් කළා. නමුත් ආණ්ඩු වෙනස්වීමේදී සිදුවන ප්‍රතිපත්ති වෙනස්වීම් නිසා එම ව්‍යාපෘතිය අතරමඟ නැවතුණා. රජයක් වෙනස් වීමේදී ප්‍රතිපත්ති ද වෙනස් වීම අපේ රටේ පවතින ප්‍රධාන ගැටළුවක් බව කිව යුතුයි. එවිට වැඩ කටයුතු අතර මඟ නතර වෙනවා. මෙම ක්‍රමය වෙනස් කිරීම සඳහා අප මේ ආර්ථික අර්බුදය පැමිණි අවස්ථාවේ ප්‍රධාන වශයෙන් මූල්‍ය හා පාලන අංශවල ව්‍යුහාත්මක ප්‍රතිසංස්කරණ ගණනාවක් සිදුකළා. ඒ සෑම අවස්ථාවකම අප සිදුකලේ ආණ්ඩුවේ ඇඟිලිගැසීම් සහ ප්‍රතිපත්ති රටේ කටයුතුවලට බලපෑමක් නොවන ආකාරයට ස්වාධීනව කටයුතු කිරිමට අවස්ථාව ඇතිකිරීමයි.

මහබැංකු පනත, රාජ්‍ය මුදල් පනත, රාජ්‍ය ණය කළමනාකරණ පනත ආදී මෙම ප්‍රතිසංස්කරණ අප නීතියෙන් පනවා තිබෙනවා. ආර්ථික පරිවර්තන නීතිය ද සම්මත කරගැනීම සඳහා මේ වන විට පාර්ලිමේන්තුවට ඉදිරිපත් කර තිබෙනවා. ඒ තුළ නීති කිහිපයක්ම අන්තර්ගත වෙනවා.

විදේශ ව්‍යාපාරිකයෙකු හෝ ආයෝජකයෙකු පැමිණි අවස්ථාවේදී විනිවිදභාවයෙන් යුතුව කටයුතු කිරීම, කඩිනමින් අවශ්‍ය තීන්දු තීරණ හා අනුමැතීන් ලබාගැනීමට හැකිවන අයුරින් කාර්යක්ෂම ක්‍රමවේදයක් හඳුන්වාදීමට එමඟින් කටයුතු කර තිබෙනවා. එවගේම අපේ රටේ ආර්ථිකය අප විසින් ගෙනයාමට අපේක්ෂා කරන දිශානතිය වෙත ගෙනයාමට වැදගත්වන කරුණු මෙම නීතියේ ඇතුළත් වෙනවා. මේ අයුරින් අප ක්‍රමක්‍රමයෙන් රට ගොඩ නගමින් තිබෙනවා.

මේ වන විට රට යම් ස්ථාවර මට්ටමකට පැමිණ තිබෙනවා. පැවති අර්බුදය සමයේ බොහෝ දෙනා දුකටත් පීඩාවටත් පත්වුණා. ජාත්‍යන්තර මූල්‍ය අරමුදල සමඟ අප ගිවිසුම්ගත වූ නිසා ඔවුන් ප්‍රකාශ කරන සියලුදේ අප කරන බව ඇතැමුන් පැවසුවා. අකමැත්තෙන් වූවද සමහර දේ අපට කිරීමට සිදුවුණා. ඒ අපේ රටේ යහපත වෙනුවෙන්. නමුත් බොහෝ දේ අපේ රටේ පවතින තත්ත්වය පිළිබඳ ඔවුන් සමඟ ප්‍රායෝගිකව සාකච්ඡා කර සිදු කිරීමට කටයුතු කළා.

අප ගිවිසුම් ගත වුණේ ඒ සඳහායි. අප ඉදිරිපත් කර ඇති ආර්ථික ප්‍රතිසංස්කරණ පනත් කෙටුම්පත ඉන් ඔබ්බට ගිය දෙයක් බව සඳහන් කළ යුතුයි. ස්ථාවර කරගත් රටේ ආර්ථිකය වේගයෙන් දියුණු කළ යුතුයි. රට වැටුණු අවස්ථාවේ අප ආනයනය මත පදනම් වූ ආර්ථිකයක සිටි නිසා රුපියල අවප්‍රමාණය වීම සමඟ අත්‍යාවශ්‍ය භාණ්ඩ හා සේවා මිල ඉහළ ගියා. නමුත් අපගේ ආදායම් මට්ටම ඉහළ ගියේ නැහැ. එනිසා ජනතාවගේ ජීවන වියදම දරාගත හැකි මට්ටමකටත් ඉන් ඔබ්බටත් ගෙනයාම සඳහා අප උත්සාහ කරමින් සිටිනවා. ඒ සඳහා වේගවත් ආර්ථික දියුණුවක් අවශ්‍යයි. ඒ සඳහා ප්‍රවාහන ක්ෂේත්‍රය ඇතුළු මහාමාර්ග පද්ධතියේ සම්බන්ධතාව ඉතා වැදගත් වෙනවා.

ඉන්දියාව සමඟ අපේ සම්බන්ධතාව වැඩිදියුණු කරමින් පවතිනවා. ඒ මෙරට ආර්ථිකයට රුකුලක් වීම සඳහායි. අප බලාපොරොත්තු වන සම්බන්ධතා කොරිඩෝවේ ගොඩබිම් සම්බන්ධතාව කියන්නේ ශ්‍රී ලංකාව සහ ඉන්දියාව අතර පාලමක් ඉදි කිරීමයි. කිලෝමිටර් 50ක් පමණ දිගකින් යුතුව මුහුද හරහා මෙම පාලම ඉදි කළ යුතු නිසා අප මේ අද සාකච්ඡා කරනු ලබන තාක්ෂණය එතැනින් ඉදිරියට ගෙන යායුතු වෙනවා. පැරණි කාලයේ පැවතුණා යැයි මතයක් පවතින ආදම්ගේ පාලම මාර්ගය ඔස්සේ මෙම පාලම ඉදිකිරීමට කටයුතු සිදු කෙරෙමින් පවතිනවා. එයින් අපට ඉදිකිරීම් තාක්ෂණය පිළිබඳ දැනුම ලැබෙනවා. අනාගත පරම්පරාවේ ඉංජිනේරුවන්ට එයින් රැකියා සහ දැනුම ලැබෙනවා. ඒවගේම ආර්ථිකයට විශාල ශක්තියක් ලැබෙනවා. වරාය හා සැපයුම් කටයුතු වර්ධනය වෙනවා. මෙයින් දකුණු ඉන්දියාවේ ආනයන සහ අපනයන ඇතුළු වෙළෙඳ කටයුතු ශ්‍රී ලංකාවේ වරායන් හරහා සිදුකළ යුතු වෙනවා. මේ හරහා ඔවුන්ගේ සැපයුම් වියදම් 50%කින් පමණ අඩු වනවා සේම වරාය තුළ වගේම අනෙකුත් සේවා සඳහා ද අපට විශාල අවස්ථා ප්‍රමාණයක් ඇතිවෙනවා.

ඒ නිසා අපේ රටට හොඳ අනාගතයක් තිබෙනවා. නමුත් අප ස්ථාවර ප්‍රතිපත්ති ඔස්සේ මේ ගමන යා යුතුයි. ඒ සඳහා අප සියලුදෙනා එකතු විය යුතුයි.”

පොලිස්පතිවරයා සම්බන්ධයෙන් ශ්‍රේෂ්ඨාධිකරණය ලබාදුන් තීන්දුවේ නීතිමය කරුණු ගැඹුරින් අධ්‍යයනය කර ඉදිරි දින දෙක තුළදී ඇමති මණ්ඩලයේ ප්‍රතිචාරය ප්‍රකාශ කිරීම⁣ට අද (24) සවස ජනාධිපති කාර්‍යාලයේ රැස්වූ විශේෂ අමාත්‍ය මණ්ඩල හමුවේ දී තීරණය කර ඇති බව වාර්තා වෙයි.

පොලිස්පතිවරයා සම්බන්ධයෙන් ශ්‍රේෂ්ඨාධිකරණය දී ඇති තීන්දුව පිළිබඳව එහිදී දීර්ඝ ලෙස අදහස් හුවමාරු වූ අතර එම තීන්දුවේ නීති ගැටලු පවතින බව එහිදි අවධානයට ලක්වූ බවද එම ආරංචි මාර්ග පවසයි.

එබැවින් අදාළ තීන්දුව සම්බන්ධයෙන් අමාත්‍ය මණ්ඩල ප්‍රතිචාරය දැක්වීම ගැඹුරු ලෙස කරුණු අධ්‍යයනය කිරීමෙන් පසුව ඉදිරි දින දෙක තුළදී ප්‍රකාශයට පත් කිරීමටද තීරණය කෙරුණු බවද වැඩිදුරටත් වාර්තා වෙයි.

මේ අතර කැබිනට් ප්‍රකාශක අමාත්‍ය බන්දුල ගුණවර්ධන උපුටා දක්වමින් මාධ්‍ය වාර්තා සඳහන් කරන්නේ , පොලිස්පති සම්බන්ධයෙන් ශ්‍රේෂ්ඨාධිකරණ තීන්දුව අමාත්‍ය මණ්ඩලය වෙත ලැබුණේ අද පස්වරුවේ බැවින් ඊට අදාළ නීති ගැටලු සම්බන්ධයෙන් ගැඹුරු අධ්‍යයනයක් කිරීමට කාලය අවශ්‍ය බව අමාත්‍ය මණ්ඩලයේ මතය බව සඳහන් කළ බවයි.

ඒ අනුව මීට අදාළ අමාත්‍ය මණ්ඩලයේ ප්‍රතිචාරය ඉදිරි දින දෙක තුළ ප්‍රකාශ කිරීම වඩාත් සුදුසු බව අමාත්‍ය මණ්ඩලයේ ඒකමතික තීරණය වූ බවද අමාත්‍ය බන්දුල ගුණවර්ධන පැවසූ බවත් සඳහන් වෙයි.

ඉදිරි ජනාධිපතිවරණය වෙනුවෙන් වත්මන් ජනාධිපති රනිල් වික්‍රමසිංහ ගේ අපේක්ෂකයත්වය සඳහා පොදුජන පෙරමුණේ සහාය අවශ්‍ය නම් අගමැති ධූරය පාර්ලිමේන්තු මන්ත්‍රී නාමල් රාජපක්ෂ වෙත ලබාදිය යුතු බවට රාජපක්ෂවරුන් වෙතින් බලපෑම් එල්ල වෙමින් තිබෙන බව දේශපාලන ආරංචි මාර්ග සඳහන් කරයි.

රාජපක්ෂ පවුලේ ප්‍රබලයකු වෙතින් ද මේ සම්බන්ධයෙන් වන යෝජනාවක් වත්මන් ආණ්ඩුවේ ප්‍රබල රාජ්‍ය අමාත්‍යවරයකු වෙත ඉදිරිපත් වී ඇති බවද එම ආරංචි මාර්ග සඳහන් කරයි.

මේ සම්බන්ධයෙන් වන ප්‍රකාශයක් අද (24) පාර්ලිමේන්තු මන්ත්‍රී නාමල් රාජපක්ෂ විසින් ද සිදුකර ඇත.

එහිදී ඔහු පවසා සිටින්නේ , අපේක්ෂකයා එළියෙන් එනවා නම් තම පක්ෂයට අගමැති ධූරය ලැබිය යුතු බවය.

එසේම අගමැති ධූරය ලබාදීම ද තමන් සමඟ නොව පක්ෂය සමඟ සාකච්ඡා කළ යුතු බවද මන්ත්‍රීවරයා සඳහන් කළේය.

නාමල් රාජපක්ෂ මන්ත්‍රීවරයා මේ බව සඳහන් කර සිටියේ හිටපු ජනාධිපති මහින්ද රාජපක්ෂ මහතාගේ විජේරාම නිල නිවසේ පැවති පොදුජන පෙරමුණේ රැස්වීමක් අවසානයේ මාධ්‍ය කළ විමසුමකදීය.

එහිදී ඔහු වැඩිදුරටත් මෙසේද පැවසීය .

මැතිවරණ කොමිසම ජනාධිපතිවරණය ගැසට් කළාට පස්සේ රටට ගැලපෙන අපේක්ෂකයා තෝරා ගැනීමට බලාපොරොත්තු වෙනවා. අපි තෝරා ගන්නා අපේක්ෂකයා රටේ ආර්ථිකය ශක්තිමත් කරන , අපේ ප්‍රතිපත්ති ක්‍රියාත්මක කරන , අපේ දේශපාලන කඳවුර ගැන මනා අවබෝධයක් තිබෙන කෙනකු විය යුතුයි. එසේ නිර්මාණය වන ආණ්ඩුව තුළ පක්ෂයට තිබෙන තැන ගැන අපි තීරණය කළ යුතු වෙනවා.

කෙසේ වුවත් දේශපාලන ආරංචි මාර්ග සඳහන් කරන්නේ , ජනාධිපති රනිල් වික්‍රමසිංහ ගේ අදහස වන්නේ තමන්ට සහාය දෙන සන්ධානයේ වැඩිම මන්ත්‍රී පිරිස තෝරාපත් වන පක්ෂයට අගමැති ධූරය ලබාදීමට බවය. එහිදී ධූරය ලබාදෙන්නේ කාටද යන්න තීරණය කිරීම එම පක්ෂය තීන්දු කළ යුතු බව ජනාධිපතිවරයාගේ වැඩිදුර ස්ථාවරය බවද සඳහන් වේ.

මෙරට තරුණ තරුණියන් රැකියා සොයා විදේශගත වීම වෙනුවට එම තරුණ තරුණියන්ට අවශ්‍ය රැකියා රට තුළ නිර්මාණය කිරීමේ ආර්ථික පරිවර්තනය වෙනුවෙන් ඉදිරි වසර 10 තුළ නිසි සැලැස්මක් ඔස්සේ කටයුතු කරන බව ජනාධිපති රනිල් වික්‍රමසිංහ පැවසීය.

එසේ නොවුණහොත් අධ්‍යාපනය වෙනුවෙන් විශාල මුදලක් වැය කරමින් රජය සිදු කරන කැපවීමේ ප්‍රතිලාභයක් රටට නොලැබෙන බවද පෙන්වා දුන් ජනාධිපතිවරයා ශ්‍රි ලංකාව ඉදිරියටත් නොදියුණු රටක් නොවිය යුතු බවද අවධාරණය කළේය.

ජනාධිපති රනිල් වික්‍රමසිංහ මේ බව සඳහන් කර සිටියේ, ගම්පහ බණ්ඩාරනායක විද්‍යාලයේ 106 වන සංවත්සරය නිමිත්තෙන් අද (24) පැවති උත්සවයට එක්වෙමිනි.

නව තාක්ෂණයට ගැලපෙන ආකාරයට අධ්‍යාපන ක්‍රමය ප්‍රතිසංස්කරණය කිරීමට කටයුතු කරන බව මෙහිදී පැවසු ජනාධිපතිවරයා ඒ වෙනුවෙන් අවශ්‍ය ප්‍රතිපාදන වෙන් කරන බවද සඳහන් කළේය.

ගම්පහ බණ්ඩාරනායක විද්‍යාලය වෙත පැමිණි ජනාධිපති රනිල් වික්‍රමසිංහ  විද්‍යාලයීය තූර්ය වාදක කණ්ඩායම විසින් මහත් හරසරින් පිළිගත් අතර විද්‍යාලයේ ශිෂ්‍ය භට බලකාය විසින් ජනාධිපති උත්තමාචාරයක්ද පිරිනමන ලදී.

විද්‍යාලයීය රණවිරු ස්මාරකය වෙත පුෂ්පෝපහාර දැක්වීමට ද ජනාධිපතිවරයා එක් විය.

ගම්පහ බණ්ඩාරනායක විද්‍යාලීය 106 වන සංවත්සරයට සමගාමීව පවත්වනු ලබන “X-ban” 2024 අධ්‍යාපන විද්‍යා තාක්ෂණ හා වෙළද ප්‍රදර්ශනය විවෘත කෙරුණේ ද ජනාධිපතිවරාය අතිනි.

විදුහල්පති කසුන් ගුණරත්න මහතා විසින් X-ban” 2024 සමරු කලාපය ජනාධිපතිවරයා වෙත පිළිගන්වන ලදී.

අ.පො.ස උසස් පෙළ විභාගයෙන් විශිෂ්ට ප්‍රතිඵල ලැබූ ශිෂ්‍යයන්ට තිළිණ සහ සහතිකපත් ප්‍රදානය කිරීමද ජනාධිපතිවරයා අතින් සිදු කෙරිණි .

මෙහිදී වැඩිදුරටත් අදහස් දැක්වූ ජනාධිපති රනිල් වික්‍රමසිංහ මෙසේද පැවසීය,

මා අවසන් වරට මෙම විද්‍යාලයට පැමිණියේ 1992 වසරේදීයි. ඊට පෙර මම අධ්‍යාපන ඇමතිවරයා ලෙස මෙම විද්‍යලයට පැමිණ විද්‍යාලයට අවශ්‍ය ගොඩනැඟිලි ලබාදීමට කටයුතු කර තිබෙනවා. ඉන්පසු 1992 වසරේ දී මෙම විද්‍යාලයට මා පැමිණියේ කර්මාන්ත සහ තාක්ෂණ අමාත්‍යවරයා ලෙසයි. එදා අපි කථා කළේ තාක්ෂණ දියුණුව ඇති කිරීම පිළිබඳවයි.

අද ගම්පහ බණ්ඩාරනායක විද්‍යාලයේ එය සිදුව තිබෙනවා. එය මෙම ප්‍රදර්ශනයෙන් පිළිඹිබු වෙනවා. ගෙවි ගිය වසර 30 තුළ මේ රට සීග්‍ර ලෙස වෙනස් වී තිබෙනවා. නමුත් මීට වසර 04කට පෙර කොවිඩ් වසංගතය නිසා රටේ ආර්ථිකය කඩා වැටී ඉතා අසීරු තත්ත්වකට මුහුණ දීමට සිදු වුණා. සියලු ජනතාව ඒ අසීරුතාවට මුහුණ දුන්නා. ඉන්ධන, ඖෂධ, ආහාර ලබා ගැනීමට පෝලිම්වල සිටීමට සිදු වුණා. කිසාගෝතමිය අඹ මිටක් සොයා ගියා වගේම අපට එවන් දුෂ්කරතාවට මුහුණ නොදුන් නිවසක් සොයා ගැනීමට නොහැකි වුණා. කෙසේ හෝ අප මේ වන විට එම දුෂ්කර තත්ත්වයෙන් මිදී තිබෙනවා. බංකොලෝත් භාවය අවසන් වීමත් සමඟ ළඟදීම අපට විදේශ ආධාර මුදල් නැවත හිමි වෙනවා. නමුත් තවත් අසීරුතා තිබෙනවා. ඒ නිසා අප නිසි සැලැස්මක් ඔස්සේ ඉදිරියට යා යුතුයි. ඒ අනුව ක්‍රමානුකූලව ඉදිරි වසර දෙක, තුන තුළ මෙම ආර්ථික බර අඩු කරගෙන ආර්ථිකය ශක්තිමත් කර ගැනීමට හැකි වෙනවා. ආර්ථිකය ශක්තිමත් වීමත් සමඟ ජනතාවට වැඩි වැඩියෙන් සහන ලබාදීමට හැකි වෙනවා.

ඒ වගේම පසුගිය වසර 04ක් අප අධ්‍යාපනය සඳහා වියදම් සීමා කර තිබුණා. ඒ නිසා අපට දැන් අධ්‍යපනය වෙනුවෙන් මුදල් වැය කිරීමට සිදුව තිබෙන අතර නව තාක්ෂණය සමඟ පාසල් පද්ධතිය ගොඩනැඟිය යුතු වෙනවා. අද අපි මෙම ප්‍රදර්ශනයේදී විද්‍යාලයේ සිසුන් පිරිසක් නිෂ්පාදනය කළ ඩ්‍රෝන යන්ත්‍ර දුටුවා. ඒ වගේම පාසල්වල කෘත්‍රීම බුද්ධි (AI) සමාජය ඇති කරගෙන යනවා. මෙම කටයුතු සඳහා මුදල් අවශ්‍යයි. ඒ වගේම පාසල් සඳහා අවශ්‍ය ගුරුවරුන් බඳවා ගත යුතුයි. අධ්‍යාපන ක්ෂේත්‍රයේ මෙම ගැටලු විසඳීමට කරන උපකාරයක් ලෙස දුෂ්කර පාසල්වලට ආධාර, උපකාර කරන ලෙස මම ඊලොන් මස්ක් මහතාගෙන් ඉල්ලීමක් කර තිබෙනවා. මෙම මාසය අවසන් වන විට එතුමාට ලංකාවේ එම කටයුතු සිදු කිරීමට අවශ්‍ය බලපත්‍ර ලබා දීමට බලාපොරොත්තු වෙනවා.

ඒ වගේම පාසල් අධ්‍යාපනය නිම කරන තරුණ තරුණියන් පිළිබඳවද අවධානය යොමු කළ යුතුයි. අපට වසර 04ක් රැකියා ලබා දීමට නොහැකි වුණා. ඉදිරියේදී මෙම පිරිස තවත් වැඩි වෙනවා. ඒ සඳහා අප විසඳුමක් සොයා දිය යුතුයි. මෙම ප්‍රශ්න වැඩි වුණොත් නැවත රට තුළ විරෝධතා ඇතිවිය හැකියි. එවිට ජාත්‍යන්තරය එය දකිනවා. එසේනම් රැකියා ආදායම් මාර්ග ඇති කිරීමට රට තුළ විශාල ආර්ථික පරිවර්තනයක් සිදු කළ යුතුව තිබෙනවා.

අපි 1977 දී මුහුණ දුන්නේ ද එවන් තත්ත්වයකටයි. අපි ඊට මුහුණ දුන්නා. එදා ගම්පහ දිස්ත්‍රික්කයේ කර්මාන්ත තිබුණේ නැහැ. අපි කටුනායක සහ බියගම වෙළෙඳ කලාප ආරම්භ කළා. චන්ද්‍රිකා කුමාරතුංග මැතිණිය අත්තනගල්ල ප්‍රදේශයේ කර්මාන්තශාලා අරම්භ කළා. දැන් ගම්පහ දිස්ත්‍රික්කය තුළ කර්මාන්ත ශාලා විශාල ප්‍රමාණයක් තිබෙනවා. ඒ වගේම ලබන වසරේ කෑරගල ප්‍රදේශයේ කර්මාන්ත පුරයක් ආරම්භ කිරිමට අප සැලසුම් කර තිබෙනවා. තෙල් පිරිපහදුව ත්‍රිකුණාමලයට ගෙන ගිය විට විශාල කර්මාන්ත පුරයක් සපුගස්කන්ද ප්‍රදේශයේ පිහිටුවීමට ඉඩ ලැබෙනවා. නව රැකියා උත්පාදනය වෙනුවෙන් නව අයෝජන ලබාගත යුතුයි. ඒවා නැවතුනහොත් රැකියා ලබාදීමට හැකියවක් ලැබෙන්නේ නැහැ. එවිට රට තුළ විරෝධතා ඇතිවිය හැකියි.

ඒ වගේම රට තුළ කෘෂිකර්ම දියුණුවක් ඇති කිරීම වෙනුවෙන් කෘෂි නවීකරණ වැඩසටහන අප ආරම්භ කර තිබෙනවා. එසේම සංචාරක ව්‍යාපාරය ලක්ෂ 25 සිට ලක්ෂ 50 දක්වා ඉහළ නංවා ගැනීමටත්, විශාල තාක්ෂණ ආර්ථිකයක් ඇති කිරීමටත් අප කටයුතු කරමින් සිටිනවා. එහිදී නව තාක්ෂණික දැනුම ඇති තරුණ පරපුරක් අවශ්‍යයි. ඒ වෙනුවෙන් නව තාක්ෂණ විශ්වවිද්‍යාල 04ක් ආරම්භ කිරීමට ද සැලසුම් කර තිබෙනවා. මෙම සෑම අංශයකම විශාල පෙරළියක් සිදු කර රට තුළ නව ආර්ථිකයක් ගොඩනැඟීමට අප කැපවී සිටිනවා. එම අලුත් ආර්ථිකය නිර්මාණය නොකළහොත් මේ රටේ දරුවන්ට අනාගතයක් නැහැ.

අද අපේ තරුණ තරුණියන් රැකියා සොයා ගෙන ඇමරිකාව, ඩුබායි, සිංගප්පූරුව වැනි රටවලට යනවා. එම රටවල තිබෙන තත්ත්වය අප ලංකාවේ ඇති කරන්නේ නැත්තේ ඇයි කියා ඇසිය යුතුයි. ඉදිරි වසර 10 තුළ අප කැපවිය යුත්තේ මෙම ප්‍රශ්නය විසඳිම සඳහායි. රට දියුණු කර නව රැකියා අවස්ථා ඇති කළ යුතුයි. නැත්නම් මෙම ලබාදෙන අධ්‍යාපනයෙන් ප්‍රතිලාභයක් රටට ලැබෙන්නේ නැහැ. එසේ වු විට අපට හැමදාමත් දුප්පත් රටක් ලෙස සිටීමට සිදු වෙනවා.

ඉදිරි වසර 10 තුළ අප සැලැස්මක් අනුව කටයුතු කළ යුතුයි. එම ආර්ථික පරිවර්තනය වෙනුවෙන් අවශ්‍ය නීති ගෙන ඒමට රජය කටයුතු කර තිබෙනවා. අපනයන ආර්ථිකය ශක්තිමත් කර ලෝක වෙළෙඳපොළ ජයග්‍රහණය කළයුතුයි. ථෙරවාද බුදු දහම පවතින ප්‍රධාන රටවල් වන්නේ ලංකාව, බුරුමය සහ තායිලන්තයයි. පැරණි ක්‍රමය තුළ මියන්මාරය සිර වී සිටිනවා. නමුත් නව ක්‍රමය අනුව ඉදිරියට යාම නිසා තායිලන්තය සීග්‍ර දියුණුවක් ලබා තිබෙනවා. එසේනම් ථෙරවාද බුදු දහම ආරක්ෂා කළ අප රට යා යුත්තේ කුමන මාර්ගයේද කියා තීරණය කළයුතුයි. අපත් තායිලන්තයේ වගේ බෞද්ධ පරිසරයක් යටතේ ලෝක වෙළෙඳපොළ ජයග්‍රහණය කළ යුතුයි. අප සියලුදෙනා අනාගතය දෙස බලා වැඩ කරමු. අලුත් ආර්ථිකයක් නිර්මාණය කළ විට රැකියා ප්‍රශ්නයට විසදුම් ලැබී ලංකාවේ රැදි සිටිය හැකි පරිසරයක් ඇති වෙනවා.

පාර්ලිමේන්තු මන්ත්‍රී මිලාන් ජයතිලක, දේශගුණික විපර්යාස පිළිබඳව ජනාධිපති ජ්‍යෙෂ්ඨ උපදේශක රුවන් විජේවර්ධන, හිටපු අමාත්‍ය පණ්ඩු බණ්ඩාරනායක, ගුවන් හමුදාපති එයාර් මාර්ෂල් උදේනි රාජපක්ෂ, ජනාධිපති මාධ්‍ය අධ්‍යක්ෂ වරුණ රාජපක්ෂ යන මහත්වරුන් සහ ආචාර්ය මණ්ඩලය , සිසු දරුවන් ඇතුළු පිරිසක් මෙම අවස්ථාවට එක්ව සිටියහ.

දේශීය කෘෂිකර්මාන්තය නඟාසිටුවීම වෙනුවෙන් වත්මන් ආණ්ඩුව ආරම්භ කර තිබෙන සැලසුම් සහගත කෘෂි නවීකරණ වැඩ පිළිවෙල හමුවේ ගොවි ජනතාව තවදුරටත් දේශපාලන අතකොලු බවට පත්කර ගැනීමට නොහැකි වී ඇතැයි කෘෂිකර්ම සහ වැවිලි කර්මාන්ත අමාත්‍ය මහින්ද අමරවීර පැවසීය.

යල හා මහ කන්න ආශ්‍රිතව වෙල් ඉපනැල්ලේ මුං ඇට වගාකර මෙට්‍රික් ටොන් 18,828ක අස්වැන්නක් ලබා ගැනීම සඳහා වන වැඩසටහනක් ක්‍රියාවට නංවා ඇති බවත් ඒ යටතේ එක් ගොවියෙකුට හෙක්ටයාරයක් සඳහා බීජ මුං ඇට කිලෝ ග්‍රෑම් 25ක් ලබාදීමට නියමිත බවත් අමාත්‍යවරයා සඳහන් කළේය.

කෘෂිකර්ම සහ වැවිලි කර්මාන්ත අමාත්‍ය මහින්ද අමරවීර මේ බව සඳහන් කර සිටියේ ‘ස්ථාවර රටකට සැවොම එක මඟකට’ මැයෙන් අද (24) ජනාධිපති මාධ්‍ය කේන්ද්‍රයේ පැවති ප්‍රවෘත්ති සාකච්ඡාවට එක් වෙමිනි.

2023 වසරේ ලැබුණු වාර්තාගත වී අස්වැන්න සමඟ සහල් මෙට්‍රික් ටොන් මිලියන 3කට ආසන්න ප්‍රමාණයක් නිෂ්පාදනය කිරීමට හැකි වූ බවත් ඒ හමුවේ රට තුළ සහල් අතිරික්තයක් පවත්වා ගැනීමට හැකිවී තිබෙන බවත් මෙරට වී නිෂ්පාදනය මෙට්‍රික් ටොන් මිලියන 4.5ක් බවත් අමාත්‍යවරයා සඳහන් කළේය.

මෙහිදී වැඩිදුරටත් අදහස් දැක්වූ කෘෂිකර්ම සහ වැවිලි කර්මාන්ත අමාත්‍යවරයා මෙසේ ද පැවසීය,

2021 වසරේ මහ කන්නයේ ඇති වූ පොහොර අර්බුදය හේතුවෙන් වී නිෂ්පාදනය අඩාල වුණා. එම නිසා 2022 වර්ෂයේදී මෙරට ජනතාවට පරිභෝජනයට අවශ්‍ය තරම් සහල් නිෂ්පාදනය වුණේ නැහැ. ඒ සමඟ සහල් කිලෝවක මිල රුපියල් 500 ඉක්මවනු ඇතැයි ඇතැමුන් මාධ්‍ය හමුවලදී ප්‍රකාශ කළා. නමුත් ජනාධිපති රනිල් වික්‍රමසිංහ මහතා ප්‍රමුඛ ආණ්ඩුව රට ගොඩ නැගීමේ වගකීම බාර ගැනීමත් සමඟ දේශීය වී නිෂ්පාදනය ඉහළ නැංවීමට ගත හැකි සෑම පියවරක්ම ගනු ලැබුවා. 2022 යල කන්නය වෙනුවෙන් අවශ්‍ය යූරියා පොහොර ගොවීන්ට ලබා දුන්නා. ඒ වගේම මහ කන්නයේදී වී වගාව සඳහා පොහොර මිලදී ගැනීමට හෙක්ටයාරයක් සඳහා රුපියල් 20,000ක මුල්‍ය සහනාධාරයක් ලබා දුන්නා. එහි ප්‍රතිඵලයක් වශයෙන් 2023 වර්ෂයේදී සහල් ඇටයක් හෝ ආනයනය කිරීමට ආණ්ඩුවට සිදු වුණේ නැහැ.

2023 වසරේ මෙරට වී නිෂ්පාදනය මෙට්‍රික් ටොන් මිලියන 4.5යි. අප රටේ වාර්ෂික සහල් අවශ්‍යතාවය මෙට්‍රික් ටොන් මිලියන 2.4යි. 2023 වසරේ අපට ලැබුණු වී අස්වැන්නෙන් සහල් මෙට්‍රික් ටොන් මිලියන 03කට ආසන්න ප්‍රමාණයක් නිෂ්පාදනය කළා. ඒ අනුව පසුගිය වසරේ සහල් අතිරික්තයක් අප රටේ ඇති වුණා. ගොවි ජනතාව විශ්වාස කර අප ලබා දුන් උපදෙස් අනුව වැඩ කළා. මේ වන විටත් මෙරට සහල් අතිරික්තයක් තිබෙන්නේ ඒ නිසයි.

ඒ වගේම පසුගිය කාලයේ බඩඉරිඟු හිඟයක් පැවති නිසා සත්ව ආහාර නිෂ්පාදනයටත් සහල් මෙට්‍රික් ටොන් ලක්ෂයක් පමණ අප ලබා දුන්නා. ගවයින්ට සහ කුකළන්ට සත්ව ආහාර වශයෙන් සහල් ලබා දීම නිසා බඩඉරිඟු ආනයනයට වැයවන විශාල මුදලක් රට තුළ ඉතිරි කර ගැනීමට හැකියාව ලැබුණා.

අපගේ ඉලක්කය වගා කන්න 05ක් තුළ වී අස්වැන්න දෙගුණයක් බවට පත් කිරීමයි. ඒ අනුව වී වගාව සඳහා නව කෘෂි තාක්ෂණය හඳුන්වා දී හෙක්ටයාරයකට ලැබෙන අස්වනු ප්‍රමාණය මෙට්‍රික් ටොන් 09ක් දක්වා ඉහළ නැංවීම අපේ ඉලක්කයයි. ඒ සඳහා අප තාක්ෂණික පැකේජයක් ද හඳුන්වා දීමට නියමිත බව පැවසිය යුතුයි.

ඒ වගේම ඉදිරි වගා කන්න 05ක් තුළ වී අස්වැන්න දෙගුණ කිරීමේ වැඩසටහන අප අනුරාධපුර, අම්පාර, පොළොන්නරුව, හම්බන්තොට, මොනරාගල සහ මහනුවර යන කෘෂිකාර්මික බල ප්‍රදේශ ආශ්‍රිතව ක්‍රියාත්මක කරනවා.

එමෙන්ම මෙවර යල කන්නය අවසන් වූ වහාම තුන්වන කන්නය හෙවත් අතරමැදි කන්නය වගා කිරීම ආරම්භ කරන ලෙස කෘෂිකර්ම දෙපාර්තමේන්තුවට උපදෙස් ලබා දුන්නා. ඒ අනුව ඉපනැල්ලේ මුං ඇට වගා කිරීමේ වැඩපිළිවෙල අපි 2024 යල කන්නයේ අස්වනු නෙළා අවසන් කළ වහාම ආරම්භ කරනවා. 2024 වසරේ යල කන්නයේ මේ වනවිට හෙක්ටයාර් 4464ක මුං වගා කර තිබෙනවා. ඉන් අපේක්ෂිත නිෂ්පාදනය මෙට්‍රික් ටොන් 6500ක්.

තුන්වන කන්නය හෙවත් අතරමැදි කන්නයේදී හෙක්ටයාර් 8943ක අපි මුං ඇට වගා කරනවා. එමඟින් මුං ඇට මෙට්‍රික් ටොන් 6707ක අස්වැන්නක් අපේක්ෂිතයි. මේ අනුව මෙවර යල කන්නයේ හෙක්ටයාර 13,407ක මුං ඇට වගා කිරීමට නියමිතයි. ඉන් අපේක්ෂිත අස්වැන්න මෙට්‍රික් ටොන් 13,207ක්. වාර්ෂික මුං ඇට අවශ්‍යතාවයෙන් 75%ක් යල කන්නයේදී ලබා ගැනීම අරමුණයි.

මෙරට වාර්ෂික මුං ඇට අවශ්‍යතාවය මෙට්‍රික් ටොන් 20,000යි. යල සහ මහ කන්නය දෙකම මුං ඇට වගා කිරීම තුළින් මෙට්‍රික් ටොන් 18,828ක අස්වැන්නක් අපි අපේක්ෂා කරනවා. ඒ වගේම අතරමැදි කන්නය සඳහා හෙක්ටයාර 01කට බීජ මුං ඇට කිලෝග්‍රෑම් 25ක් බැගින් අපි නොමිලයේ ලබා දෙනවා. ඒ අනුව එක් ගොවියෙකුට හෙක්ටයාර 01කට මුං වගාව සඳහා රුපියල් 25,000ක් වටිනා මුං බීජ ලබා දීමට නියමිතයි. ඒ වගේම මුං ඇට ආනයනය සීමා කිරීම සඳහා ආනයන බද්දක් පැනවීමටත් අපේක්ෂා කරනවා. එය දේශීය මුං ඇට ගොවියා ආරක්ෂා කිරීමක් ද වනවා.

තවද රජයට අයත් පොහොර සමාගම් දෙක අප විසින් එක් සමාගමක් බවට පත් කළා. ඒ අනුව එහි ප්‍රතිලාභ ගොවි ජනතාවට ලබා දීමට හැකි වී තිබෙනවා. මේ අනුව රජයේ පොහොර සමාගම (State Fertilizer Company) විසින් පොහොර වර්ග 05ක මිල ගණන් රුපියල් 1500 සිට 2000 දක්වා ප්‍රමාණයකින් අඩු කිරීමට පියවර ගෙන තිබෙනවා. මෙම සහනය කුරුඳු සහ පොල් වගාව සඳහා ලබා දීමට සමගාමීව තේ සඳහාත් ලබා දෙන පොහොරවල මිල අඩු කිරීමට ද තීරණය කර තිබෙනවා.

පසුගිය කාලයක් පුරාවට ගොවි ජනතාව පැවති ගැටළු දේශපාලන සටන් පාඨ බවට පත් කර ගත්තා. ඔවුන්ව විවිධ උද්ඝෝෂණවලට හා විරෝධතාවලට පෙළඹුවා. නමුත් දේශීය කෘෂිකර්මාන්තය නඟාසිටුවීම වෙනුවෙන් වත්මන් ආණ්ඩුව ආරම්භ කර තිබෙන සැලසුම් සහගත කෘෂි නවීකරණ වැඩ පිළිවෙල හමුවේ ගොවි ජනතාව තවදුරටත් දේශපාලන අතකොලු බවට පත්කර ගැනීමට නොහැකියි.

කුමන අභියෝග පැවතිය ද මෙරට බෞද්ධ අධ්‍යාපනය දියුණු කරමින් ඉදිරියට ගෙන යාමේ වගකීම අත් නොහරින බව ජනාධිපති රනිල් වික්‍රමසිංහ පැවසීය.

ජනාධිපතිවරයා මේ බව සඳහන් කර සිටියේ පිරිවෙන් හා සීල මාතා අධ්‍යාපන ආයතනවල ඉගෙනුම ලබන ශිෂ්‍ය භික්ෂුන් වහන්සේලා හා සීල මාතාවන් මෙන්ම ගිහි සිසුන් සඳහා ජනාධිපති අරමුදලින් ශිෂ්‍යත්ව ප්‍රදානය කිරීමේ වැඩසටහන යටතේ ගිහි පැවිදි සිසුන් 3000කට ශිෂ්‍යත්ව ප්‍රදානය වෙනුවෙන් අද (24) අරලියගහ මන්දිරයේ දී පැවති උත්සවය අමතමිනි.

ජනාධිපති රනිල් වික්‍රමසිංහ ගේ උපදෙස් පරිදි ජනාධිපති අරමුදල යටතේ ක්‍රියාත්මක තවත් ශිෂ්‍යත්ව වැඩසටහනක් ලෙස දිවයිනම ආවරණ වන පරිදි මෙම ශිෂ්‍යත්ව වැඩසටහන ක්‍රියාවට නංවා තිබේ.

පිරිවෙන්(සාමාන්‍ය පෙළ) දක්වා ඉගෙනුම ලබන ශිෂ්‍ය භික්ෂුන් වහන්සේලා, සීල මාතාවන් හා අ.පො.ස (සාමාන්‍ය පෙළ)දක්වා ඉගෙනුම ලබන ගිහි ශිෂ්‍ය ශිෂ්‍යාවන් වෙනුවෙන් මසකට රුපියල් 3000/-බැඟින් මාස 12 ක කාලයක් සඳහා ශිෂ්‍යත්ව පිරිනැමීම මේ යටතේ සිදු කෙරෙන අතර හිඟ ශිෂ්‍යත්ව වාරික මුදල්ද සමඟ අද දිනයේම මෙම සිසුන්ගේ ගිණුම්වලට රුපියල් 9000/-ක් සෘජුවම බැර කිරීමට කටයුතු කෙරුණු අතර ඉදිරියේදී රුපියල් 3000/-බැගින් මාසිකව ගෙවීම් සිදු කෙරේ.

එසේම පිරිවෙන් (සාමාන්‍ය පෙළ)/අපොස(සාමාන්‍ය පෙළ) විභාගයට පෙනී සිට විභාගය සමත්ව පිරිවෙන් ප්‍රාචීන විභාගය සඳහා හෝ අපොස (උසස්පෙළ)විභාගය සඳහා පෙනී සිටින ශිෂ්‍ය භික්ෂුන් වහන්සේලා, සීල මාතාවන් හා ගිහි ශිෂ්‍ය ශිෂ්‍යාවන් වෙනුවෙන් විභාගයට පෙනී සිටින මාසය තෙක් මසකට රුපියල් 6000/- බැගින් මාස 24 ක කාලයක් සඳහා ශිෂ්‍යත්ව පිරිනැමීමට ද නියමිත අතර හිඟ ශිෂ්‍යත්ව වාරික මුදල්ද සමඟ ශිෂ්‍යත්ව ප්‍රදානොත්සවය පැවති අද දිනම මෙම එක් එක් ශිෂ්‍යත්වලාභියාගේ ගිණුමට රුපියල් 18000/-ක මුදලක් එකවර බැර කිරීමට කටයුතු කෙරිණි.

මෙම ශිෂ්‍යත්ව ප්‍රදානෝත්සවයට කැඳවා නැති අනෙකුත් ගිහි පැවිදි ශිෂ්‍යත්වලාභීන් වෙනුවෙන් ඉදිරි දිනවලදී සෘජුවම ඔවුන්ගේ බැංකු ගිණුම්වලට වාරික මුදල් ගෙවීමට කටයුතු කරනු ලැබේ.

මෙම ශිෂ්‍යත්ව ප්‍රදානයට අදාල සියලුම ශිෂ්‍යත්වලාභීන් තෝරාගෙන ඇත්තේ එක් එක් පිරිවෙනේ පරිවේණාධිපති හිමියන් /ආයාතනාධිපති හිමියන්ගේ පූර්ණ දායකත්වයෙන් වන අතර සියලු කටයුතු අධීක්ෂණය කර ඇත්තේ අධ්‍යාපන අමාත්‍යාංශය යටතේ ක්‍රියාත්මක වන පිරිවෙන් අධ්‍යාපන අංශ මගිනි.

මෙම ශිෂ්‍යත්ව වැඩසටහන සඳහා ජනාධිපති අරමුදලෙන් වසරකට වෙන් කෙරෙන මුදල රුපියල් මිලියන 300කට ආසන්නය.

මෙහිදී අදහස් දැක්වූ ජනාධිපති රනිල් වික්‍රමසිංහ වැඩිදුරටත් මෙසේද පැවසීය,

ජනාධිපති අරමුදලින් ශිෂ්‍යත්ව ප්‍රදානය කිරීමේ වැඩසටහනේ අලුත් අදියරක් අද අපි ආරම්භ කරනවා. ඒ අනුව පැවැදි සිසුන්ටත් මෙම ශිෂ්‍යත්ව ලබා දීමට පියවර ගෙන තිබෙනවා. අප මේ වන විට ශිෂ්‍යත්වලාභීන් සියුලදෙනාගේ හිඟ මුදල් තමන්ගේ බැංකු ගිණුම් වෙත යොමු කර තිබෙනවා.

මෙම ශිෂ්‍යත්ව වැඩසටහනට පසුබිමක් තිබෙනවා. පසුගිය වසර 04 දී මේ රටේ ජනතාව විඳි දුක මම අමුතුවෙන් කිවයුතු නැහැ. ආර්ථිකය බංකොලොත්වීම හේතුවෙන් ජනතාව පීඩාවට ලක් වුණා. දැන් රටේ ආර්ථිකය ස්ථාවරවීමත් සමඟ ජනතාවට සහන ලබාදිය යුතු වෙනවා. ඒ වෙනුවෙන් අස්වැසුම, උරුමය වැනි විවිධ වැඩසටහන් අප ක්‍රියාත්මක කර තිබෙනවා.

ඒ වගේම අඩු ආදායම්ලාභී පවුල්වල දක්ෂ ශිෂ්‍ය ශිෂ්‍යාවන්ට තම අධ්‍යාපන කටයුතු ඉදිරියට ගෙන යාමට සහාය ලබාදීම වෙනුවෙන් අප ජනාධිපති අරමුදල හරහා ශිෂ්‍යත්ව වැඩසටහන් කිහිපයක් හඳුන්වා දුන්නා. රටේ පවතින ආර්ථික තත්ත්වය හමුවේ ග්‍රාමීය ප්‍රදේශවල විහාරස්ථානයන්හි වැඩ වෙසෙන ස්වාමින් වහන්සේලා ද දුෂ්කරතාවලට මුහුණ දී සිටිනවා. කුමන හේතුවක් නිසාවත් භික්ෂු අධ්‍යාපනය කඩා වැටීමට ඉඩ දෙන්න බැහැ. ඒ නිසා ස්වාමින් වහන්සේලා සහ සීල මාතාවන් වෙනුවෙන් ද අප මෙම ශිෂ්‍යත්ව වැඩසටහන ක්‍රියාත්මක කර තිබෙනවා. බුද්ධ ශාසනය පිළිබඳ අවධානය යොමු කරන විට නව භික්ෂු පරපුර ගොඩනැගීමට අවශ්‍ය පසුබිම අප විසින් රට තුළ සකස් කළ යුතුයි. ඒ වෙනුවෙන් ආණ්ඩුවෙන් සිදු කළ හැකි වැදගත් කටයුත්තක් ලෙස මෙම ශිෂ්‍යත්ව ප්‍රදානය හැදින්විය හැකියි.

රටේ බෞද්ධ අධ්‍යාපනය ඉදිරියට ගෙන යා යුතුයි. ඒ වගේම එය දියුණු කළ යුතුයි. පිරිවෙන් ක්‍රමය ආරම්භ කරන විට ඒ වෙනුවෙන් ආධාර උපකාර කිරීමට මට එදා අවස්ථාව ලැබුණා. රටේ ප්‍රශ්න තිබුණත් කිසිවිටෙකත් එම යුතුකම අප අත් හරින්නේ නැති බව කිවයුතුයි.