පුවත්

ජාතික විගණාධිපති දෙපාර්තමේන්තුව හා ජන හා සංඛ්‍යාලේඛන දෙපාර්තමේන්තුව පිහිටා තිබෙන බත්තරමුල්ල පොල්දූව හන්දියේ ගොඩනැගිල්ලේ භූගතව සවිකර තිබෙන අකුණු සන්නායක වයර් සහ තඹ කම්බි කපා සොරකම් කළ සැකකරුවන් දෙදෙනෙකු අත්අඩංගුවට ගත් බව බස්නාහිර පළාත් දකුණු දිසාව අපරාධ කොට්ඨාසය පවසයි.

අත්අඩංගුවට ගනුලැබූ සැකකරුවන් කඩුවෙල මහේස්ත්‍රාත් අධිකරණය වෙත ඉදිරිපත් කිරීමට නියමිත බවත් පොලිසිය සඳහන් කරයි.

වැඩිදුරටත් වාර්තා වන ආකාරයට මෙම සැකකරුවන් තඹ කම්බි කපා ඇත්තේ ජල ටැංකියකට ආරක්ෂාවට යොදා තිබෙන වයර් වලින් බව ද පොලීසිය සඳහන් කරයි.

සැකකරුවන් සමග සොරාගත් රුපියල් ලක්ෂ 21 ක් පමණ වටිනා අකුණු සන්නායක වයර් සහ තඹ කම්බි රාජගිරිය පරණ අබලි ද්‍රව්‍ය මිලදී ගන්නා ස්ථානයට විකුණා තිබියදී පොලිසිය මඟින් සොයාගෙන ඇත.

ජාතික විගණකාධිපති දෙපාර්තමේන්තුවේ පරිපාලන නිලධාරී වරයෙකු කරන ලද පැමිණිල්ලක් අනුව සැකකරුවන් අත්අඩංගුවට ගෙන ඇත.

රුපියල් ලක්ෂ විසි එකක් පමණ වටිනා එම ජායාරූපය සැකකරුවන් විකුණා ඇත්තේ රුපියල් ලක්ෂ අටක 8 ක පමණ මුදලකට බව පොලිස් නිලධාරියකු පැවැසීය.

අත්අඩංගුවට ගත් සැකකරුවන් වයස අවුරුදු 23 සහ 24 පසුවන රාජගිරිය පදිංචි තදින් මත්ද්‍රව්‍ය වලට ඇබ්බැහි වූවන්ය.

අයිස් මත්ද්‍රව්‍ය පාවිච්චිය සම්බන්ධයෙන් දහඅට දහස් නවසිය පනස් පහකට පසුගිය වසරේදී නඩු පවරා ඇති අතර ඉන් වැරදිකරුවන්වූ සංඛ්‍යාවදාහත් දහස් නවසිය පනස් පහක් බව පොලිස් මූලස්ථානයේ 2022 වාර්ෂික වාර්තාවේ සඳහන් වෙයි.

එසේම අයිස් මත්ද්‍රව්‍ය පාවිච්චිය සම්බන්ධ සිද්ධි විසි දහස් එකසිය පහක් පසුගිය වසරේදී වාර්තාවී ඇති අතර එය
වාර්තාගත ඉහළ යෑමක් බව පොලිස් මූලස්ථාන ආරංචි මාර්ග පවසයි .

තවද පසුගිය වසරේ දී අත්අඩංගුවට ගැනුණු අයිස් මත් ද්‍රව්‍ය ප්‍රමාණය කිලෝ 253 කට ආසන්නය.

එම ආරංචි මාර්ග සඳහන් කරන ආකාරයට අයිස් මත්ද්‍රව්‍යවලට ඇබ්බැහිවූ වැඩිදෙනා අඩු වයස්වල පසුවේ.

මේ අතර බාබුල් මත්ද්‍රව්‍ය පාවිච්චි කිරීම සම්බන්ධයෙන්වූ සිද්ධි 97ක් පසුගිය වසරේදී වාර්තාවී ඇතැයි පොලිස් මූලස්ථානය පවසයි.

මේ අනූ හත් දෙනාටම නඩු පවරා ඇති අතර ඉන් අනූ එක් දෙනෙක් වැරදිකරුවන්ව ඇත.

පසුගිය දින කිහිපය තුළ රුපියල අවප්‍රමාණය වීම තාවකාලිකව ඇතිවූ තත්ත්වයක් බව මුදල් රාජ්‍ය අමාත්‍ය රංජිත් සියඹලාපිටිය පවසයි.

ඉල්ලුම හා සැපයුම මත එහි වටිනාකම තීරණය වීමට ඉඩ ලබා දුන් බව අමාත්‍යවරයා සඳහන් කළේ ය.

ඔහු මේ බව සඳහන් කළේ, මාධ්‍ය වෙත අදහස් දක්වමිනි.

“අපි ඩොලරයට හා රුපියලට ඉල්ලුම සැපයුම මත වටිනාකම තීරණය වෙන්න ඉඩ දීලා තියෙනවා. අපි දකිනවා ශ්‍රී ලංකා සංවර්ධන බැඳුම්කර ඩොලර් මිලියන 750ක් විතර තිබුණා. දේශීය ණය ප්‍රතිව්‍යගතකරනයේදී සංවර්ධන බැඳුම්කරවල වටිනාකම ශ්‍රී ලංකා රුපියල්වලින් ගෙවන්න කටයුතු කරන්න කියන එකට තමයි එකඟ වුණේ. ඩොලර් තැන්පතුවලින් තමයි ඔවුන් මේක මිලදී ගත්තේ. එතකොට තැන්පතුකරුවන්ට අවශ්‍ය කාලයේදී බේරීම සඳහා මේ ප්‍රමාණය ඩොලර් රැස් කර ගන්න බැංකුවලට යම් අවශ්‍යතාවයක් පැන නගිනවා. ඒ නිසා බැංකු මෙතෙක් තමන්ට ලැබුණු ඩොලර් වෙළෙඳපොළට මුදාහැරීම යම් ප්‍රමාණයකට සීමා කරන්න පුළුවන් මේක රැස් කර ගැනීම සඳහා. ඒ වගේ ම වෙළෙඳපොළෙන් යම් ප්‍රමාණයක් ගන්න පුළුවන්. මෙන්න මේ කාරණා එක්ක රුපියල අවප්‍රමාණය වීම හා ඩොලරයේ අගය වැඩිවීම සිදුවුණේ පසුගිය දින කිහිපය තුළ. මේ තත්ත්වය ඉල්ලුම සැපයුම මත ඇති වුණ තාවකාලික තත්ත්වයක්.”

මේ අතර, ආර්ථික අර්බුදය හේතුවෙන් නවතා දැමුණු සංවර්ධන ව්‍යාපෘති 63ක් මේ වසර අවසානයට පෙර අවසන් කිරීමට රජය පියවර ගෙන තිබේ.

මුදල් රාජ්‍ය අමාත්‍යවරයා සඳහන් කළේ, වසර 2030 වනවිට තවත් මහා පරිමාණ සංවර්ධන ව්‍යාපෘති 261ක් නිම කිරීමට ද සැලසුම් කර ඇති බව ය.

කරාතේ දෝ ක්‍රීඩාව සඳහා ජාතික සංගමය වන ශ්‍රී ලංකා කරාතේ දෝ සම්මේලනයේ ලියාපදිංචිය වහාම ක්‍රියාත්මක වන පරිදි අත්හිටුවමින් අතිවිශේෂ ගැසට් නිවේදනයක් නිකුත් කර තිබේ.

ක්‍රීඩා අමාත්‍ය රොෂාන් රණසිංහ විසින් නිකුත් කළ ගැසට් නිවේදනයට අනුව එම සංගමයේ කටයුතු තාවකාලිකව තවදුරටත් සිදුකරගෙන යාම සඳහා 09 දෙනෙකුගෙන් සමන්විත කමිටුවක් පත්කර ඇති බව එම ගැසට් නිවේදනයේ දැක්වේ.

ශ්‍රී ලංකා කරාතේ දෝ සම්මේලනයේ නිලවරණය පැවැත්වීම සඳහා එහි විශේෂ මහා සභා රැස්වීමක් කැඳවා නිලවරණ කමිටුවක් පත් කිරීම, නිලවරණය කැඳවීම හා පැවැත්වීම ක්‍රීඩා සංවර්ධන දෙපාර්තමේන්තුවේ අධ්‍යක්ෂ ජනරාල්වරයා යටතේ සිදුකිරීමට බලය පවරන බවද ක්‍රීඩා අමාත්‍යවරයා නිකුත් කළ ගැසට් නිවේදනයේ සඳහන් වේ.

ප්‍රංශ ජනාධිපති එමැනුවෙල් මැක්ක්‍රෝන් මහතා සංචාරයක් සඳහා ශ්‍රී ලංකාවට පැමිණ තිබේ.

ඒ, සිය පැපුවා නිව්ගිනි සංචාරය අවසන් කරමින් ය.

ඊයේ රාත්‍රී 11.35 ට පමණ ප්‍රංශ රජයට අයත් ගුවන් යානා 3කින් ජනාධිපතිවරයා ඇතුළු දූත මණ්ඩල පිරිස කටුනායක බණ්ඩාරනායක ගුවන් තොටුපොළට පැමිණ තිබේ.

මෙම පිරිස පිළිගැනීමට සහ ඔවුන් සමග සාකච්ඡා කිරීමට ජනාධිපති රනිල් වික්‍රමසිංහ  ඇතුළු මැති ඇමතිවරුන් විශාල පිරිසක් කටුනායක ගුවන් තොටුපොළ වෙත පැමිණ ඇති බව සඳහන් ය.

ගුවන් තොටුපොළ වාර්තාකරුවන් සඳහන් කළේ, ප්‍රංශ ජනාධිපතිවරයා ඇතුළු පිරිස පැය 03 කට ආසන්න කාලයක් ගුවන් තොටුපොළ පරිශ්‍රයේ රැදී සිට පසුව අලුයම 01.44 ට නවැත ප්‍රංශයේ පැරිස් නුවර බලා පිටත්ව ගිය බවයි.

ජපාන විදේශ අමාත්‍ය හයාෂි යොෂිමාසා කටුනායක බණ්ඩාරනායක ජාත්‍යන්තර ගුවන්තොටුපොලින් ඊයේ රාත්‍රියේ දිවයිනට පැමිණියේය.

විදේශ අමාත්‍යවරයා ගුවන්තොටුපොලේදී පිළිගැනීමේ අවස්ථාවට රාජ්‍ය අමාත්‍ය තාරක බාලසූරිය ඇතුළු පිරිසක් එක්ව සිටියේය.

ඉන් අනතුරුව සුහද සාකච්ඡාවක්ද පැවැත්වුණි.

ජපාන විදේශ අමාත්‍යවරයා අද පෙරවරුවේ ජනාධිපති රනිල් වික්‍රමසිංහ  හමුවිය.

එමෙන්ම තවත් රාජ්‍ය තාන්ත්‍රික කටයුතු කිහිපයකට ඔහු එක්විමට ද නියමිතය. ජපානය සමඟ නැවත ආයෝජන ප්‍රවර්ධනය කිරීමට මෙමගින් අවස්ථාව උදාවෙනු ඇතැයි ජනාධිපති කාර්යාලය පවසයි .

සීමා නිර්ණ කමිටු වාර්තාවට අදාල නිර්දේශ ක්‍රියාත්මක කිරීම තාවකාලිකව අත්හිටුවා ඇති බව පළාත් සභා හා පළාත් පාලන රාජ්‍ය අමාත්‍ය ජානක වක්කුඹුර පවසයි .

ඒ සම්බන්ධයෙන් වැඩිදුරටත් අදහස් දක්වමින් අමාත්‍යවරයා පවසන්නේ එම වාර්තාවෙන් කරුණු ඉදිරිපත් කර ඇති ක්‍රමවේදය සංහිඳියා ක්‍රියාදාමයට දැඩි බලපෑමක් එල්ල වන බවයි.

එමගින් පළාත් පාලන ආයතන තවදුරටත් ගැටලුකාරි තත්ත්වයට පත්වනු ඇති බවත් අමාත්‍යවරයා පවසයි .

මෙම සීමා නීර්ණ කමිටු වාර්තාව සකසනු ලද්දේ මැතිවරණ කොමිසමේ හිටපු සභාපති මහින්ද දේශප්‍රිය ගේ ප්‍රමුඛත්වයෙන් බවත් වාර්තා වෙයි .

ජාතික සංහිඳියාව ඇති කිරීම වෙනුවෙන් දරන ප්‍රයත්නයේ එක් පියවරක් ලෙස ආණ්ඩුක්‍රම ව්‍යවස්ථාවේ 13වන සංශෝධනය පොලිස් බලතල රහිතව බලාත්මක කිරීමට ජනාධිපති රනිල් වික්‍රමසිංහ  ඉදිරිපත් කර ඇති යෝජනාව ජනප්‍රිය නොවුණත්, රටේ අනාගතය වෙනුවෙන් ගත් සුබවාදී තීරණයක් බව උසස් අධ්‍යාපන රාජ්‍ය අමාත්‍ය සුරේන් රාඝවන්  පැවසීය.

එසේම අරගලයේ නිරත වූ තරුණ පිරිස් අපේක්ෂා කළ නව දේශපාලන ගමනක ආරම්භය ලබාදීමට විශාල අවදානමක් හමුවේ වුවත් මෙම තීරණය ගෙන තිබෙන බව ද ඒ මහතා සඳහන් කළේය.

උසස් අධ්‍යාපන රාජ්‍ය අමාත්‍ය සුරේන් රාඝවන්  මෙම අදහස් පළ කර සිටියේ 'ස්ථාවර රටකට සැවොම එක මඟකට' මැයෙන් අද (28) ජනාධිපති මාධ්‍ය කේන්ද්‍රයේ පැවති ප්‍රවෘත්ති සාකච්ඡාවට එක්වෙමිනි.

එහිදී රාජ්‍ය අමාත්‍යවරයා වැඩිදුරටත් මෙසේද පැවසීය.

ආණ්ඩුක්‍රම ව්‍යවස්ථාවේ 13වන සංශෝධනය පිළිබඳ නැවත වරක් ජාතික වශයෙන් කතිකාවතක් ආරම්භ වී තිබෙනවා. හිටපු ජනාධිපතිවරුන් හත් දෙනාම අත නොගැසූ කාර්යයකට වත්මන් ජනාධිපතිතුමා හදිසියේම යොමු වුණේ ඇයි කියා ඇතැමුන් ප්‍රශ්න කරනවා. එය සාවද්‍යයි. ඉතිහාසයේ සිටි සියලුම ජනාධිපතිවරුන් මේ ප්‍රශ්නය පිළිබඳ සාකච්ඡා කළා. දැන් අප පිවිස සිටින්නේ ප්‍රශ්චාත් අරගල සමයකටයි.

මම අරගලයේ සටන්කරුවෙක් නෙමෙයි. නමුත් අරගලයෙන් පැනනැඟුණු ස්වරය ඉතා පැහැදිලියි. තවදුරටත් පුරවැසියා හා රාජ්‍යය අතර සම්මුතිය අලුත් නොකර මේ රට පාලනය කළ නොහැකියි. ඒ බව මේ රටේ ජනතාව මෙන්ම මේ රට භාර ගන්න සිටින තරුණ ප්‍රජාව විසින් ඉතා පැහැදිලිව ප්‍රකාශ කර තිබෙනවා. රාජ්‍යය අලුත් කිරීමට නම්, එහි සියලුම පුරවැසි අභිලාෂ, දේශපාලන අභිලාෂ සහ සමාජ අවශ්‍යතා ඉටු කිරීම රාජ්‍යයක වගකීම වෙනවා.

ජනාධිපති රනිල් වික්‍රමසිංහ  මෙම අවස්ථාවේදී සිදු කරන්නේ ජනප්‍රිය වැඩක් නොවෙයි. මැතිවරණයක් ආසන්නව තිබෙන බව කවුරුත් දන්නවා. මැතිවරණයක් ආසන්න වන විට සාමාන්‍යයෙන් සිදුකරන්නේ ජනප්‍රිය තීන්දු තීරණ ගැනීමයි. එහෙමනම් එතුමා මේ අවස්ථාවේ සිදුකළ යුතුව තිබෙන්නේ පාන්, පරිප්පු, ගෑස්, විදුලිය නොමිලේ ලබාදීමයි. නැතිනම් එවැන්නක් ලබාදෙන බවට පොරොන්දු ලබාදීමයි. එසේත් නොමැති නම් ජාතිවාදය හෝ ආගම්වාදය ඇවිස්සීම සඳහා සෘජුව හෝ වක්‍රව ව්‍යාපාර ආරම්භ කරවීමයි.

මගේ මේ කෙටි දේශපාලන කාලය තුළ ජනාධිපති රනිල් වික්‍රමසිංහ  විශාල අවදානමක් අරගෙන මෙවැනි කතිකාවතකට මුලපිරීම සම්බන්ධයෙන් පුදුම වෙනවා. මා දකින විදිහට ප්‍රජාතන්ත්‍රවාදය පිළිබඳව තිබෙන ගැඹුරු විශ්වාසයක් ජනාධිපතිතුමා තුළ තිබෙනවා. ජනප්‍රිය නොවුණත්, හරි දේ කළ යුතුයි. මේ ප්‍රශ්නය ඊළඟ පරම්පරාවට භාර නොදී අපි විසඳාගත යුතුයි කියන බලාපොරොත්තුව ඇතුවයි එතුමා මේ කර්තව්‍යය ආරම්භ කළේ.

පක්ෂ නායකයන් සහ පාර්ලිමේන්තුවේ පක්ෂ විපක්ෂ මැති ඇමැතිවරුන් සමඟ පැවති සාකච්ඡාවකදී ජනාධිපතිවරයා විමසා සිටියා ඔබට 13වන ආණ්ඩුක්‍රම ව්‍යවස්ථා සංශෝධනය අවශ්‍යද කියා. එය දශක කිහිපයක් තිස්සේ ව්‍යවස්ථාවේ කොටසක් බවට පත්ව තිබෙන බවත් එහිදී පෙන්වා දුන්නා. උතුරු පළාත් සභාවට පමණක් වසරකට රුපියල් බිලියන 300ක පමණ ප්‍රතිපාදන වෙන් කරනවා. එපමණ මුදලක් වියදම් කරමින් පළාත් සභාව නඩත්තු කිරීම අර්ථවත්ව සිදුවෙනවාද කියන ප්‍රශ්නය අප ඉදිරියේ තිබෙනවා.

ඒ වගේම දේශපාලනිකව එය පිළිගන්නේ නැති නම් පාර්ලිමේන්තුව මැදිහත්ව එය අහෝසි කළයුතු බවත් ජනාධිපතිතුමා පැහැදිලිවම ප්‍රකාශ කළා. දෙමළ දේශපාලන ප්‍රභූ පැළැන්තිය අතර ද අසමගියක් තිබෙනවා. ඔවුන් විවිධ මත දරණවා. ඇතැමුන් ෆෙඩරල්වාදයෙන් තොරව කිසිදු විසඳුමක් පිළිනොගෙන සාකච්ඡාවෙන් බැහැරව සිටිනවා. ඇතැමුන් විසඳුමක් ඉල්ලා සිටි විට ඒ වෙනුවෙන් කටයුතු නොකර සිටිනවා. ඉතින් ඔවුන්ගේ සද්භාවය ඒ ජාතියට ගැටලුවක්ව තිබෙනවා.

එසේ නම් මේ සම්බන්ධව සංවාදිත ප්‍රජාතන්ත්‍රවාදයකට යොමුවිය යුතුයි. මේ වන විටත් යෝජනා කර ඇති ආකාරයට 13 වන ආණ්ඩුක්‍රම ව්‍යවස්ථා සංශෝධනය බලාත්මක කළ යුතුයි. එය තවදුරටත් කල්දැමිය යුතු නැහැ. මහින්ද රාජපක්ෂ මහතා සමඟ සාකච්ඡා කළ අන්දමට 13+ අවශ්‍ය බව යෝජනා කරන පක්ෂ ද සිටිනවා. පළාත් සභා ඡන්දය කල්දමා මේ මොහොත වන විට වසර හතකට ආසන්න කාලයක් ගතව තිබෙනවා. එසේ නම් ඒ මැතිවරණය පැවැත්විය යුත්තේ මේ ගැටලුව නිරාකරණය කරගෙනයි.

13 වන ව්‍යවස්ථා සංශෝධනයේ පවතින සියලු බලතල ලබා දෙනවාද කියන ප්‍රශ්නය මතුකර තිබෙනවා. පොලිස් බලතල ලබාදිය යුතුද යන්න ගැන සංවාදයක් තිබෙනවා. 13වන ආණ්ඩුක්‍රම ව්‍යවස්ථා සංශෝධනයේ පොලිස් බලතල සඳහන්ව තිබුණත් එකිනෙකා අතර ඇති සැක සංකා හේතුවෙන් එය ක්‍රියාත්මක කර නැහැ. ඒ නිසා රාජ්‍යය සහ පුරවැසියා අතර තිබෙන අලුත් සම්මුතියේ කතිකාවතක් අද දෙමළ ජනතාවට ද අවශ්‍යව තිබෙනවා.‍

හිටපු ආණ්ඩුකාරවරයෙක් ලෙස මම දන්නවා දෙමළ කතා කරන ජනතාවගේ 95%කගේ ප්‍රශ්නය තමයි දෛනික ජීවත් වීමේ අරගලය. පානීය ජලය, සෞඛ්‍යය, පාසල්, ප්‍රවාහනය , ආරක්ෂාව, ආර්ථිකය ගැන ප්‍රශ්න ඔවුන්ට තිබෙනවා. එය විසඳිය යුතුයි. ඒ වගේම දෙමළ නායකයන් අතරද ප්‍රශ්න තිබෙනවා. නමුත් ඔවුන් අතර තිබෙන එම විරසකය අප දේශපාලන වාසි ලබා ගැනීමට භාවිතා නොකළ යුතුයි. මෙහිදී වැදගත් වන්නේ දෙමළ ජනයාගේ හදවත් දිනා ගැනීමට කටයුතු කිරීමයි.ති සාකච්ඡාවකදී ජනාධිපතිවරයා විමසා සිටියා ඔබට 13වන ආණ්ඩුක්‍රම ව්‍යවස්ථා සංශෝධනය අවශ්‍යද කියා. එය දශක කිහිපයක් තිස්සේ ව්‍යවස්ථාවේ කොටසක් බවට පත්ව තිබෙන බවත් එහිදී පෙන්වා දුන්නා. උතුරු පළාත් සභාවට පමණක් වසරකට රුපියල් බිලියන 300ක පමණ ප්‍රතිපාදන වෙන් කරනවා. එපමණ මුදලක් වියදම් කරමින් පළාත් සභාව නඩත්තු කිරීම අර්ථවත්ව සිදුවෙනවාද කියන ප්‍රශ්නය අප ඉදිරියේ තිබෙනවා.

ඒ වගේම දේශපාලනිකව එය පිළිගන්නේ නැති නම් පාර්ලිමේන්තුව මැදිහත්ව එය අහෝසි කළයුතු බවත් ජනාධිපතිතුමා පැහැදිලිවම ප්‍රකාශ කළා. දෙමළ දේශපාලන ප්‍රභූ පැළැන්තිය අතර ද අසමගියක් තිබෙනවා. ඔවුන් විවිධ මත දරණවා. ඇතැමුන් ෆෙඩරල්වාදයෙන් තොරව කිසිදු විසඳුමක් පිළිනොගෙන සාකච්ඡාවෙන් බැහැරව සිටිනවා. ඇතැමුන් විසඳුමක් ඉල්ලා සිටි විට ඒ වෙනුවෙන් කටයුතු නොකර සිටිනවා. ඉතින් ඔවුන්ගේ සද්භාවය ඒ ජාතියට ගැටලුවක්ව තිබෙනවා.

එසේ නම් මේ සම්බන්ධව සංවාදිත ප්‍රජාතන්ත්‍රවාදයකට යොමුවිය යුතුයි. මේ වන විටත් යෝජනා කර ඇති ආකාරයට 13 වන ආණ්ඩුක්‍රම ව්‍යවස්ථා සංශෝධනය බලාත්මක කළ යුතුයි. එය තවදුරටත් කල්දැමිය යුතු නැහැ. මහින්ද රාජපක්ෂ මහතා සමඟ සාකච්ඡා කළ අන්දමට 13+ අවශ්‍ය බව යෝජනා කරන පක්ෂ ද සිටිනවා. පළාත් සභා ඡන්දය කල්දමා මේ මොහොත වන විට වසර හතකට ආසන්න කාලයක් ගතව තිබෙනවා. එසේ නම් ඒ මැතිවරණය පැවැත්විය යුත්තේ මේ ගැටලුව නිරාකරණය කරගෙනයි.

13 වන ව්‍යවස්ථා සංශෝධනයේ පවතින සියලු බලතල ලබා දෙනවාද කියන ප්‍රශ්නය මතුකර තිබෙනවා. පොලිස් බලතල ලබාදිය යුතුද යන්න ගැන සංවාදයක් තිබෙනවා. 13වන ආණ්ඩුක්‍රම ව්‍යවස්ථා සංශෝධනයේ පොලිස් බලතල සඳහන්ව තිබුණත් එකිනෙකා අතර ඇති සැක සංකා හේතුවෙන් එය ක්‍රියාත්මක කර නැහැ. ඒ නිසා රාජ්‍යය සහ පුරවැසියා අතර තිබෙන අලුත් සම්මුතියේ කතිකාවතක් අද දෙමළ ජනතාවට ද අවශ්‍යව තිබෙනවා.‍

හිටපු ආණ්ඩුකාරවරයෙක් ලෙස මම දන්නවා දෙමළ කතා කරන ජනතාවගේ 95%කගේ ප්‍රශ්නය තමයි දෛනික ජීවත් වීමේ අරගලය. පානීය ජලය, සෞඛ්‍යය, පාසල්, ප්‍රවාහනය , ආරක්ෂාව, ආර්ථිකය ගැන ප්‍රශ්න ඔවුන්ට තිබෙනවා. එය විසඳිය යුතුයි. ඒ වගේම දෙමළ නායකයන් අතරද ප්‍රශ්න තිබෙනවා. නමුත් ඔවුන් අතර තිබෙන එම විරසකය අප දේශපාලන වාසි ලබා ගැනීමට භාවිතා නොකළ යුතුයි. මෙහිදී වැදගත් වන්නේ දෙමළ ජනයාගේ හදවත් දිනා ගැනීමට කටයුතු කිරීමයි.

එක්සත් ජාතික පක්ෂය ප්‍රතිසංවිධානය කිරීමේ වැඩපිළිවෙළ යටතේ දියත්කර ඇති උතුරු කොළඹ ආසන බලමණ්ඩලය පිහිටුවීම හෙට (29) යෙදී ඇත.

ඒ අනුව උතුරු කොළඹ ආසන බලමණ්ඩල රැස්වීම 2023 ජුලි මස 29 වැනි සෙනසුරාදා සවස 3.30ට මෝදර බොනයිස්ටා ක්‍රීඩාංගනයේදී පැවැත්වේ. පැවැත්වේ.

හිටපු මුදල් අමාත්‍ය රවී කරුණානායක ගේ ප්‍රධානත්වයෙන් පැවැත්වීමට නියමිත මෙම රැස්වීම එක්සත් ජාතික පක්ෂය යළි බලවත් කරන , ඉතිහාසයේ දරුණුතම ආර්ථික අර්බුදය හමුවේ වැටුණු රට යළි ගොඩනගන ජනාධිපති රනිල් වික්‍රමසිංහ ගේ වැඩපිළිවෙළ සක්‍රීය කරන ඓතිහාසික පියවරක් තැබීමේ කටයුත්ත ශක්තිමත් කරන ගමනක ඇරඹුමක් කිරීම වෙනුවෙන් පියවර තැබෙනු ඇති බවද දේශපාලන ආරංචි මාර්ග සඳහන් කරයි.

දකුණු කොරියාවේ පැවැත්වෙන 25වන ලෝක බාලදක්ෂ ජම්බෝරිය සඳහා සහභාගී වන ශ්‍රී ලංකා කණ්ඩායමට නිල වශයෙන් ජාතික ධජය පිළිගැන්වීම ශ්‍රී ලංකාවේ ප්‍රධාන බාලදක්ෂ ජනාධිපති රනිල් වික්‍රමසිංහ  අතින් අද (28) පෙරවරුවේ ජනාධිපති කාර්යාලයේ දී සිදු විය.

එමෙන්ම 2024 වර්ෂයේ පැවැත්වීමට නියමිත 10වන ජාතික බාලදක්ෂ ජම්බෝරියේ නිල ලාංඡනය එළිදැක්වීම ද මෙහිදී සිදු කෙරිණි.

25 වන ලෝක බාලදක්ෂ ජම්බෝරිය 2023 අගෝස්තු මස 01වන දා සිට 12වන දා දක්වා දකුණු කොරියාවේ Saemangeum හි දී ලොව පුරා බාලදක්ෂ බාලදක්ෂිකාවන් 50,000කගේ සහභාගිත්වයෙන් උත්කර්ෂවත්ව පැවැත්වීමට නියමිත අතර ශ්‍රී ලංකාව නියෝජනය කරමින් බාලදක්ෂ බාලදක්ෂිකාවන් හා නායක නායිකාවන් 177 දෙනෙකු පමණ ඊට එක්වීමට නියමිතය.

ශ්‍රී ලංකා බාලදක්ෂ කණ්ඩායමට මෙහිදී සිය සුබපැතුම් එක් කළ ජනාධිපතිවරයා සඳහන් කළේ 2048 වන විට ශ්‍රී ලංකාවද දකුණු කොරියාව වැනි දියුණු රටක් බවට පත් කිරීම රජයේ අරමුණ බවත් මෙම සංචාරයේ දී ලබන අත්දැකීම් රටේ අනාගතය වෙනුවෙන් ද දායක කර ගැනීමට සියලුදෙනා ක්‍රියා කළයුතු බවත්ය.

ආත්ම විශ්වාසයෙන් යුතු සහ අභියෝගවලට මුහුණදිය හැකි ශක්තිමත් අනාගත පරපුරක් ගොඩනැඟීමට බාලදක්ෂ ව්‍යාපාරයෙන් ලැබෙන දායකත්වය අගය කළ ජනාධිපතිවරයා එම පුහුණුව රටේ අනාගතය වෙනුවෙන් ඵලදායීව යොදාගන්නා ලෙස ද බාලදක්ෂ බාලදක්ෂිකාවන්ගෙන් ඉල්ලා සිටියේය.

ප්‍රධාන බාලදක්ෂ කොමසාරිස් නීතිඥ ජනප්‍රිත් ප්‍රනාන්දු  මෙහිදී අදහස් දක්වමින් කියා සිටියේ ශ්‍රී ලංකාවේ බාලදක්ෂ ව්‍යාපාරය පුළුල් කිරීමට ජනාධිපති රනිල් වික්‍රමසිංහ මහතා ලබාදුන් උපදෙස් අනුව මෙරට බාලදක්ෂ ව්‍යාපාරයේ සාමාජික සංඛ්‍යාව ලක්ෂයක ඉලක්කය පසුගියදා සම්පූර්ණ කළ බවයි.

මෙහිදී ශ්‍රී ලංකා බාලදක්ෂ කණ්ඩායමේ නායක, ජාත්‍යන්තර කොමසාරිස්, විශේෂඥ වෛද්‍ය රජීව් පීරිස් වෙත ජාතික ධජය පිරිනැමුණු අතර ශ්‍රී ලංකා බාලදක්ෂ සංගමයේ සභාපති ශ්‍රීනාත් ගුණරත්න, විධායක කමිටු සභාපති රත්නසිරි පෙරේරා යන මහත්වරු ඇතුළු සංගමයේ කොමසාරිස්වරු හා නිලධාරීන් රැසක් ඊට එක්ව සිටියහ.

ජාතික ආරක්ෂාව පිළිබඳ ජනාධිපති ජ්‍යෙෂ්ඨ උපදේශක හා ජනාධිපති කාර්ය මණ්ඩල ප්‍රධානි සාගල රත්නායක  ද මෙම අවස්ථාවට සහභාගී විය.

මත්ද්‍රව්‍ය උවදුර වහා පාලනය කොට මුලිනුපුටා දැමීම සදහා මූලික පියවර ලෙස ඒ සම්බන්ධයෙන් රටේ වත්මන් තත්වය නිසිලෙස අවබෝධ කර ගැනීම වැදගත් බැවින් අදාළ සියලු පාර්ශව ගෙන්වා සාකච්ඡා කිරීමට “රට තුළ සීඝ්‍ර ලෙස පැතිරෙමින් පවතින මත්ද්‍රව්‍ය උවදුර වහා පාලනය කොට මුලිනුපුටා දැමීම සඳහා ක්‍රියාත්මක කළ යුතු ක්‍රමවේද පිළිබඳව කරුණු සොයා බලා ඒ පිළිබඳව නිරීක්ෂණ හා නිර්දේශ පාර්ලිමේන්තුවට ඉදිරිපත් කිරීම සඳහා වන පාර්ලිමේන්තු විශේෂ කාරක සභාවේදී” තීරණය වී ඇත.

එම කාරක සභාවේ පලවෙනි රැස්වීම කාරක සභාවේ සභාපති අමාත්‍ය ටිරාන් අලස්ගේ ප්‍රධානත්වයෙන් ඊයේ (27) පාර්ලිමේන්තුවේ රැස්වූ අවස්ථාවේ දී මෙම තීරණය ගෙන ඇත.

ඒ අනුව, ශ්‍රී ලංකා පොලිසිය, අන්තරායකර ඖෂධ පාලක ජාතික මණ්ඩලය සහ දුම්කොළ සහ මධ්‍යසාර පිලිබඳ ජාතික අධිකාරිය යන ආයතන කාරකා සභාව ඉදිරියේ කැඳවා මේ සම්බන්ධයෙන් පුළුල් සාකච්ඡාවක් පවත්වා පවතින තත්වය හඳුනා ගැනීමට අවශ්‍ය බව කාරක සභාවේ සභාපති අමාත්‍ය ටිරාන් අලස්  පැවසීය.

ඒ අනුව අදාළ ආයතන ලබන අගෝස්තු 10 වැනි දින කාරක සභාව හමුවට කැඳවීමට මෙහිදී තීරණය කරන ලදී.

මෙයට අමතරව, මත්ද්‍රව්‍ය උවදුර වහා පාලනය කොට මුලිනුපුටා දැමීම සඳහා වන උපායමාර්ගික සැලැස්මක් සහ ඒ සම්බන්ධයෙන් ක්‍රියාකරන ආයතන අතර සම්බන්ධීකරණයක් ඇතිකිරීමේ අවශ්‍යතාවය ද මෙහිදී අවධාරණය කරන ලදී.

මෙම කාරක සහාවට පාර්ලිමේන්තු මන්ත්‍රීවරුන් වන ජයන්ත සමරවීර, (වෛද්‍ය) උපුල් ගලප්පති සහ උපුල් මහේන්ද්‍ර රාජපක්ෂ යන  සහභාගී වූහ.

රජයේ වෛද්‍ය නිලධාරීන්ගේ සංගමයේ 2023/2024 වසර සඳහා තේරී පත් වූ නව නිලධාරී මණ්ඩලය අද (27) පස්වරුවේ ජනාධිපති කාර්‍යාලයේදී ජනාධිපති රනිල් වික්‍රමසිංහ  හමු විය.

වෙළෙඳපොළ වටිනාකම සහ කාර්ය සාධනය පදනම් කරගත් නව වැටුප් ව්‍යුහයක් හඳුන්වාදීම, බුද්ධි ගලනය වැළැක්වීම සඳහා සීමාවාසික පුහුණුව ලබන වෛද්‍යවරුන්ගේ වැටුප් සංශෝධනය මෙන්ම වෛද්‍යවරුන්ට හිමි දීමනා සංශෝධනය පිළිබඳව මෙහිදී ඔවුන් ජනාධිපතිවරයා වෙත අදහස් ඉදිරිපත් කළ අතර ඒ පිළිබඳ වූ යෝජනාවලියක් ද ජනාධිපතිවරයා වෙත පිළිගැන්විණ.

මෙරට සෞඛ්‍ය ක්ෂේත්‍රය තුළ සිදු කළ යුතු කඩිනම් ප්‍රතිසංස්කරණ පිළිබඳව මෙහිදී පැහැදිළි කළ ජනාධිපති රනිල් වික්‍රමසිංහ  ඒ සම්බන්ධයෙන් ද යෝජනා ඉදිරිපත් කරන ලෙස රජයේ වෛද්‍ය නිලධාරීන්ගේ සංගමයෙන් ඉල්ලා සිටියේය.

කෙටි කාලීන හා මධ්‍යකාලීන සැලසුම් ඔස්සේ මෙම නව ප්‍රතිසංස්කරණ ක්‍රියාත්මක කිරීමේ අවශ්‍යතාවයත්, එම සැලසුම් සකස් කිරීමේ දී ස්කැන්ඩිනේවියානු සහ යුරෝපීය රටවල දියුණු සෞඛ්‍ය පද්ධතින් අධ්‍යයනය කිරීමේ වැදගත්කමත් ජනාධිපතිවරයා පෙන්වා දුන්නේය.

රජයේ වෛද්‍ය නිලධාරීන්ගේ සංගමයේ සභාපති විශේෂඥ වෛද්‍ය දර්ශන සිරිසේන, ලේකම් වෛද්‍ය හරිත අලුත්ගේ, උප සභාපතිවරුන් වන වෛද්‍ය චන්දික එපිටකඩුව, වෛද්‍ය හේමන්ත රාජපක්ෂ, වෛද්‍ය බෝධික සමරසේකර, වෛද්‍ය එස්. මතිවානන් යන මහත්වරු ප්‍රමුඛ නව නිලධාරී මණ්ඩලය මෙම අවස්ථාවට එක්ව සිටියහ.

ආණ්ඩුක්‍රම ව්‍යවස්ථාවේ 13 වන සංශෝධනය පිළිබඳව ද්‍රවිඩ පක්ෂ මන්ත්‍රීවරුන් සමඟ පමණක් සාකච්ඡා කිරීම ප්‍රමාණවත් නොවන බවත් එය සමස්ත රටටම බලපාන කාරණයක් බැවින් සියලු පාර්ශ්ව සමඟ සාකච්ඡා කර තීන්දුවක් ගැනීම තම ස්ථාවරය බවත් ජනාධිපති රනිල් වික්‍රමසිංහ  පැවසීය.

ජනාධිපති රනිල් වික්‍රමසිංහ  මේ බව සඳහන් කර සිටියේ ඊයේ (26) පස්වරුවේ ජනාධිපති කාර්යාලයේ පැවති සර්ව පාක්ෂික සමුළුව අමතමිනි.

ජාතික සංහිඳියා වැඩසටහන සහ උතුර- නැගෙනහිර සංවර්ධන සැලැස්ම පිළිබඳ පාර්ලිමේන්තුව නියෝජනය කරන පක්ෂ නායකයින් දැනුවත් කිරීම සඳහා මෙම සර්ව පාක්ෂික සමුළුව කැඳවා තිබිණි.

පවතින ගැටලු විසඳීම සඳහා නව නීති සම්මත කිරීමේ බලය තමාට පමණක් නොව මීට පෙර සිටි විධායක ජනාධිපතිවරුන් හත් දෙනාට ද නොතිබූ බව මෙහිදී සිහිපත් කළ ජනාධිපතිවරයා පවතින ගැටලු විසඳා ගැනීම වෙනුවෙන් නව නීති සම්මත කිරීමේ බලය තිබෙන්නේ පාර්ලිමේන්තුව සතුව බවත්, තමා සිදු කරන්නේ රට වෙනුවෙන් අදාළ යෝජනා ගෙන ඒම පමණක් බවත් කියා සිටියේය.

එසේම පාර්ලිමේන්තුවේ එක් ඡන්දයක් පමණක් ඇති තමාට එම කාර්ය තනිව සිදු කළ නොහැකි බවත්, මෙම කටයුතු ඉදිරියට ගෙන යාමට පාර්ලිමේන්තුව නියෝජනය කරන සියලුදෙනා සාමූහිකව කැපවී ක්‍රියා කළ යුතු බවත් ජනාධිපති රනිල් වික්‍රමසිංහ මහතා අවධාරණය කර සිටියේය.

මෙහිදී වැඩිදුරටත් අදහස් දැක්වූ ජනාධිපති රනිල් වික්‍රමසිංහ මෙසේද පැවසීය.

මීට පෙර මම පක්ෂ නායකයන්ගේ රැස්වීමක් කැඳවා ප්‍රධාන කරුණු දෙකක් පිළිබඳව සාකච්ඡා කළා. ප්‍රධාන වශයෙන් 13 වන සංශෝධනයේ අප ක්‍රියාත්මක කරන කරුණු පිළිබඳව එහිදී සාකච්ඡා කෙරුණා. ආණඩුක්‍රම ව්‍යවස්ථාවේ 13 වන සංශෝධනය සම්මත කළේ 1987 වසරේදීයි. නමුත් අද වන විටත් ඊට සම්බන්ධ කරුණු ගණනාවක් විසඳි නැහැ.

මම මේ පිළිබඳ උතුර හා නැගෙනහිර මන්ත්‍රීවරු සමඟ සාකච්ඡා කරන විට ආණ්ඩුව 13 වන සංශෝධනය ක්‍රියාත්මක කරන්නේ කෙසේද යන ගැටලුව ඔවුන් ඉදිරිපත් කළා. ඒ නිසා පළමුව උතුරට බලපාන ප්‍රශ්න ගණනාවක් සාකච්ඡා කර ඒ පිළිබඳ දැනට ආණ්ඩුවේ ස්ථාවරය දැනුම් දී තිබෙනවා.

එහිදී ගත් පියවර කිහිපයක් පිළිබඳ සඳහන් කරනවා නම් දූෂණයට විරුද්ධ පනත් කෙටුම්පත දැන් පාර්ලිමේන්තුවේ සම්මත වී තිබෙනවා. ඒ වගේම ත්‍රස්තවාදයට එරෙහි නීතිය පිළිබඳ කෙටුම්පත තව ටික දිනකින් අධිකරණ අමාත්‍යවරයා විසින් පාර්ලිමේන්තුවට ඉදිරිපත් කිරීමට නියමිතව තිබෙනවා. ඒ වගේම සත්‍ය සෙවීමේ කොමිසමේ කටයුතු පිළිබඳව ද සාකච්ඡා කරමින් සිටිනවා.විදේශ කටයුතු අමාත්‍යවරයා පාර්ලිමේන්තුව තුළ හා පාර්ලිමේන්තුවෙන් පිටත සංවිධාන ගණනාවක් සමඟ මේ පිළිබඳව සාකච්ඡා කරමින් සිටිනවා. වන්දි ගෙවීම ඇතුළු කරුණු ගණනාවක් මෙහි ඇතුළත්. මේ සියල්ල පිළිබඳ උතුරේ ද්‍රවිඩ මන්ත්‍රීවරු සමඟ ද මේ වන විට අප සාකච්ඡා කර තිබෙනවා.ඒ වගේමඋතුරේ සංවර්ධනය සඳහා ඊළග වසර 10 තුළ ක්‍රියාත්මක කිරීමට නියමිත සැලැස්ම පිළිබඳව ද මේ වන විට අප සාකච්ඡා කර තිබෙනවා.

බලය බෙදීම පිළිබඳ කරුණු කිහිපයක් සාකච්ඡා කිරීමට අද මෙම සාකච්ඡාව කැඳවා තිබෙනවා. 13 වන සංශෝධනය පිළිබඳ අප මේ වන විට ද්‍රවිඩ පක්ෂ මන්ත්‍රිවරු සමඟ සාකච්ඡා කර තිබෙනවා. නමුත් මෙය සමස්ත රටටම බලපාන කාරණයක් බැවින් සියලු පාර්ශ්ව සමඟ සාකච්ඡා කර තීන්දුවක් ගැනීම මගේ ස්ථාවරයයි.

මේ රටේ පළාත් සභා 09ක් තිබෙනවා. මේ පළාත් සභා 09න් 07කම බහුතරයක් ජීවත්වන්නේ සිංහල ජනතාවයි. අනෙක් පළාත් 02 සිංහල ජනතාව සුළුතරයක් සිටින අතර උතුරේ නම් ද්‍රවිඩ ජනතාව බහුතරයක් ජීවත්වනවා. අප වැඩිපුරම පළාත් සභා ක්‍රියාත්මක කර තිබෙන්නේ දකුණේ. එහිදී අඩු පාඩු ගණනාවක් පිළිබඳ අපට අත්දැකීම් රැසක් තිබෙනවා. අප පළාත් සභා ක්‍රමය ඉදිරියට ගෙන යනවා නම් එම අඩු පාඩු සකසා ගත යුතුයි.

1987 වසරේ ගෙන එන ලද පළාත් සභා පනතේ ද අඩු පාඩු බොහොමයක් තිබෙනවා. පරිපාලන සහ මුදල් පාලනය පිළිබඳ රෙගුලාසි කිසිවක් එහි නැහැ. ඒ වගේම පළාත් ඇමතිවරුන්ගේ බලතල පිළිබඳ එහි පැහැදිලිව සඳහන් වන්නේ නැහැ.

2017 වසරේ උතුරු හා නැගෙනහිර හැර අනෙක් පළාත් 07 ප්‍රධාන අමාත්‍යවරුන් පළාත් සභාවලට වැඩි බලතල ලබා දෙන ලෙසට වාර්තාවක් ඉදිරිපත් කළා. ඒ සමඟම එම පළාත් 07 විපක්ෂනායකවරු ඒ සඳහා අනුමැතිය ලබා දුන්නා. මෙම වාර්තාව අනුව තමයි වැඩකටයුතු ක්‍රියාත්මක කර තිබෙන්නේ. ඊට අමතරව මේවා ක්‍රියාත්මක කිරීමට අදාළව නීති රජයක් ලෙස අප යෝජනා කර තිබෙනවා.

විශේෂයෙන් ප්‍රාදේශීය ලේකම් පත් කිරීම, ඔවුන් ඉවත් කිරීම පිළිබඳ පළාත් සභාවේ අනුමැතිය ලබා ගැනීමේ ක්‍රමවේදයක් පිළිබඳවද මෙහි අවධානය යොමු කර තිබෙනවා.

ඒ වගේම අධ්‍යාපනය සම්බන්ධව පළාත් සභාවට අයත් බලතල සම්පුර්ණයෙන් පළාත් සභාවලට ලබාදීම. හා සෑම පළාතටම පළාත් අධ්‍යාපන මණ්ඩලයක් පත් කිරීම, වෘත්තීය හා කාර්මික පුහුණු ආයතන පිළිබඳ බලතල පළාත් සභාවලට ලබා දිම, ආණ්ඩුක්‍රම ව්‍යවස්ථාවේ 13 වන සංශෝධනය යටතේ පළාත් සභාවලට විශ්වවිද්‍යාල ආරම්භ කිරීමේ හැකියාව හා ඒ පිළිබඳ නීති සම්මත කිරීම, කෘෂිකර්මයට අදාළ බිම් මට්ටමේ සේවා සියලු පළාත් සභා මගින් ක්‍රියාත්මක කිරීම යන කරුණු පිළිබඳ අවශ්‍ය රෙගුලාසි සම්මත කර ගැනීමට හැකියාව තිබෙනවා.

ඒ වගේම සෑම පළාතකටම සංචාරක මණ්ඩලයක් පත් කිරීම පිළිබඳ මෙහි ඇතුළත්වනවා. සංචාරක කර්මාන්තය දියුණු කිරීමට බොහෝ රටවල වැඩකටයුතු සිදු කරන්නේ පළාත් සභා මට්ටමේ සහ දිස්ත්‍රික් මට්ටමේ සංචාරක මණ්ඩලවලින් බව කිව යුතුයි.

ඒ වගේම ලක්ෂ 10කට වඩා ප්‍රාග්ධනයක් තිබෙන ව්‍යාපාර තමයි දැනට මහා ආණ්ඩුවේ නීතිවලට යටත්ව පවතින්නේ. එය අවම වශයෙන් මිලියන 250ක්වත් කිරීමට හෝ ඊට වඩා අවශ්‍යනම් එම සංශෝධන සිදු කිරීමට පාර්ලිමේන්තුවේ සාකච්ඡා කිරීමෙන් හැකියාව තිබෙනවා.

ඒ වගේම සෑම දිස්ත්‍රික්කයකම දිස්ත්‍රික් සංවර්ධන මණ්ඩල යළි නිතියෙන් ඇති කිරීම පිළිබඳ මෙහි සාකච්ඡා කර තිබෙනවා. පළාත් සභාවලට අයත් විෂයයන් ගණනාවක් තවමත් පාලනය වන්නේ මධ්‍යම ආණ්ඩුව යටතේ. ඒ පිළිබඳ සාකච්ඡා කර අවශ්‍ය පියවර ගැනීමට අප බලාපොරොත්තු වෙනවා.

මෙයට අමතරව පොලිස් බලතල ක්‍රියාත්මක කිරීම පිළිබඳව අප සාකච්ඡා කළ යුතුයි. එහිදී මතුවන ප්‍රධාන ගැටලුවක් වන්නේ පොලිස් ආඥා පනත අනුව බලතල කිසිවක් ක්‍රියාත්මක කිරීමට නොහැකි වීමයි. එහිදී අප පළමුව සිදු කළයුතු වන්නේ නව පොලිස් පනතක් ඉදිරිපත් කිරීමයි.

එසේම පොලිස් බලතල ක්‍රියාත්මක කරන්නේ කෙසේද කියා අප වෙනම සාකච්ඡා කළ යුතුයි. ඒ අනුව පොලිස් බලතල හැර පළාත් සභා වෙත අනෙක් සියලු බලතල ලබාදීම පිළිබද සාකච්ඡා කර අදහස් ලබාගැනීමෙන් පසු, අවශ්‍ය නීති හා ව්‍යවස්ථා සංශෝධනය පාර්ලිමේන්තුවට ඉදිරිපත් කිරීමට අප බලාපොරොත්තු වෙනවා. මේ සඳහා සියලුදෙනාගේ සහාය අපට අවශ්‍යයි.
අප පළාත් සභා ක්‍රමය ඉදිරියට ගෙන යනවා නම් එය නිසි ලෙස ක්‍රියාත්මක විය යුතුයි. පසුගිය වසර 10 -15 දෙස බැලූ විට පළාත් මට්ටමින් නිසි සංවර්ධනයක් සිදුව නැහැ. දිස්ත්‍රික් සංවර්ධන සභා තිබෙන සමයේ මීට වඩා වැඩ කොටසක් ඉටු වුණා. ආණ්ඩුවේ වගකීම වන්නේ ප්‍රතිපත්ති සකස් කර රට සීග්‍ර සංවර්ධනයක් කරා ගෙන යාමයි. අනෙක් වැඩකටයුතු පළාත්වලට භාරදිය යුතුයි.

එසේම පළාත් සභා මන්ත්‍රීවරුන්ට එම ධූරය තබාගෙන පාර්ලිමේන්තු මන්ත්‍රීවරයෙකු ලෙස පත්වීමේ අවස්ථාව සහ පාර්ලිමේන්තු මන්ත්‍රීවරුන්ට එම මන්ත්‍රී ධූරය තබාගෙන පළාත් සභා මන්ත්‍රීවරයෙකු ලෙස පත්වීමට හැකියාව ලැබෙන ආකාරයට කටයුතු සකස් කරන ලෙස යෝජනාවක් ඉදිරිපත්ව තිබෙනවා. ඒ පිළිබඳව ද පාර්ලිමේන්තුවේ සාකච්ඡා කර තීන්දුවක් ගැනීමට අප බලාපොරොත්තු වෙනවා.

අප කෙසේ හෝ මෙම ගැටලු විසදා ගත යුතුයි. මෙම ක්‍රමය සමඟ අපට තවදුරටත් ඉදිරියට යාමට හැකියාවක් නැහැ. එසේ නම් ලෝකයේ අනෙකුත් රටවල් මෙන් පළාත් සභාවලට බලය බෙදා දෙමු. දැන් පළාත් සභා 07ක කටයුතු කරගෙන යනවා. බලය ලැබුණා නම් තවත් වැඩ කළ හැකියි. ඒ නිසා මේ පිළිබඳ ඔබගේ අදහස් ලබාදෙන ලෙස මම යෝජනා කරනවා.

විශේෂයෙන් මේ පිළිබඳ වැඩිදුරටත් සාකච්ඡා කිරීමට ඇමතිවරු තුන් දෙනෙක් පත් කර තිබෙනවා. සුසිල් ප්‍රේමජයන්ත, ප්‍රසන්න රණතුංග, විජයදාස රාජපක්ෂ යන මහත්වරු ඒ පිළිබඳ සාකච්ඡා සිදු කරන අතර අගමැතිතුමත් එම කටයුතු සඳහා සහභාගි වෙනවා.

සති දෙක තුනකින් එම අදහස් අප වෙත ලැබෙනවා නම් ඉන් පසුව අවශ්‍ය නිති කෙටුපත් සකස් කර පාර්ලිමේන්තුවට ඉදිරිපත් කිරීමට හැකියාව තිබෙනවා. ඊට අමතරව රාජ්‍ය ආරක්ෂක අමාත්‍යවරයාත් මෙම කමිටුවට සම්බන්ධ කර ගැනීමට මම බලාපොරොත්තු වෙනවා. පොලිස් බලතල ලබාදීම වෙනම සංශෝධනයක් ලෙස ඉදිරිපත් කළ හැකියි. ඒ සමඟම පොලිසිය පිළිබඳ අප නව නීතියක් ගෙන එනවා. ඒ හා සමගාමීව තමයි මෙම කටයුතු ක්‍රියාත්මක කිරීමට සිදු වන්නේ.
මෙම වගකීම් අප ඉටු කළ යුතුයි. ඒ සඳහා අප නීතිය ක්‍රියාත්මක කළ යුතුයි. එහිදී ඔබ සියලුදෙනාගේ අදහස් ලබාගැනීම සඳහා අද මෙම සාකච්ඡාව කැඳවනු ලැබුවේ. මෙම සාකච්ඡාවෙන් පසුව අදාළ කමිටුව සමඟ ද සාකච්ඡා කර සති තුන හතරකින් තීරණයකට පැමිණ අප මෙම කටයුතු ඉදිරියට ක්‍රියාත්මක කරමු.

 මේ පිළිබඳ මගේ ස්ථාවරය මම ඔබට දැනුම් දුන්නා. ඒ වගේම එය කැබිනට් මණ්ඩලයටත් දැනුම් දී තිබෙනවා. මෙම කටයුත්ත මට තනිව කළ නොහැකියි. මට පාර්ලිමේන්තුවේ තිබන්නේ එක ඡන්දයයි. මෙය සම්මත කර ගැනීම සඳහා පාර්ලිමේන්තුවේ සියලුදෙනාගේ සහාය අවශ්‍ය වෙනවා. ඒ නිසා තමයි මම ඔබ සියලුදෙනාගේ සහයෝගය ඉල්ලා සිටින්නේ.

ඒ වගේම මෙම කටයුතු සඳහා අවශ්‍ය නීති ගෙන ඒමට මට ජනවරමක් නැහැ. මට පමණක් නොවෙයි මීට පෙර සිටි ජනාධිපතිවරු 07 දෙනාට ද එම ජනවරම ලැබී තිබුණේ නැහැ. නීති සම්මත කිරීමේ ජන වරම තිබෙන්නේ පාර්ලිමේන්තුවට. මට හැකියාව තිබෙන්නේ ඒවා ඉදිරිපත් කිරීමට පමණයි. අප මෙම යෝජනා ඉදිරිපත් කර අදහස් ලබා ගැනීමෙන් පසු නීති ඉදිරිපත් කරනවා.

මම ජනාධිපති ධුරයේ වගකීම භාරගත්තේ මේ රටේ තිබෙන ප්‍රශ්නවලට ඉතා කෙටි කාලයකින් විසඳුම් ලබාදීමටයි. ආණ්ඩුක්‍රම ව්‍යවස්ථාවේ 13 වන සංශෝධනය නිසියාකාරව ක්‍රියාත්මක කරනවාද, නැතිනම් එය සම්පුර්ණයෙන් අහෝසි කරනවාද කියා අප කඩිනමින් තීරණයකට පැමිණිය යුතුයි.

හිටපු ජනාධිපති මෛත්‍රිපාල සිරිසේන,

බලය බෙදාහැරීමේ අරමුණ විය යුත්තේ දේශපාලන පක්ෂ ශක්තිමත් කිරීම නොව රටේ ඉදිරි ගමන ශක්තිමත් කිරීමයි. අද අපේ රට පත්ව තිබෙන තත්ත්වයෙන් ගොඩගැනීම සඳහා සාමූහික යම් ප්‍රයත්නයක් දැරිය යුතුයි. නැති නම් අනාගත පරපුර අප සියලුදෙනාට සාප කරාවි.

ව්‍යවස්ථාපිත බලය සැමවිටම භාවිතා කළ යුත්තේ දේශපාලන අරමුණු වෙනුවෙන් නොව රට සංවර්ධනය කිරීම සඳහායි. ඒ සඳහා ශ්‍රී ලංකා නිදහස් පක්ෂය ලෙස දිය හැකි සහයෝගයක් ලබාදීමට අප බලාපොරොත්තු වෙනවා.

ශ්‍රී ලංකා පොදුජන පෙරමුණේ මහලේකම් පාර්ලිමේන්තු මන්ත්‍රී සාගර කාරියවසම් මහතා

කිසිම ජනාධිපතිවරයෙක් මෙම 13 වන ව්‍යවස්ථා සංශෝධනය සම්පූර්ණයෙන් ක්‍රියාත්මක කළේ නැහැ. ඔවුන් මෙය ක්‍රියාත්මක නොකළේ ඇයි කියා අප පළමුවෙන්ම සොයා බැලිය යුතුයි. මෙය ක්‍රියාත්මක නොකිරීමට රටේ යම් කිසි ප්‍රශ්නයක් තිබිය යුතුයි.

මේ පිළිබඳ බුද්ධි අංශ තොරතුරුත් ලබාගෙන අවශ්‍ය පියවර ගන්න කියා අප යෝජනා කරනවා. මෙවැනි දෙයක් හදිසියේ එක්වර සිදු කරවාට වඩා විවිධ ජන කොටස්වල අදහස් ලබාගෙන එය සිදු කිරීම සුදුසු බවද මම සඳහන් කරන්න කැමතියි.

 විපක්ෂ නායක සජිත් ප්‍රේමදාස 

රටක සංහිඳයාව ශක්තිමත් කිරීම සඳහා එම රටේ ජීවත්වන සියලු පුරවැසියන් එක්සිත්ව සිටිය යුතුයි. එසේ නොමැති නම් ජාතික ආරක්ෂාවට පළමුවෙන්ම තර්ජනයක් එල්ල වෙනවා.

මට අද මෙම අවස්ථාවට ආරාධනා කිරීම පිළිබඳ ජනාධිපතිවරයාට ස්තූතිවන්ත වන අතර මෙම වැඩපිළිවෙළ සද්භාවයෙන් යුතුව ඉදිරියට ගෙන යාම ඉතා වැදගත් බව කිව යුතුයි. ඒ වගේම මෙය දේශපාලන උප්පරවැට්ටියක් නොවිය යුතුයි.

 ජනාධිපතිවරයා ව්‍යවස්ථානුකූලව මෙම ධූරයට පත්ව සිටිනවා. පාර්ලිමේන්තුවේ බහුතර බලයකින් තමයි එතුමා ජනාධිපති ධුරයට පත් වුණේ. ඒ නිසා රජයේ වැඩපිළිවෙළ අප දැනගත යුතුයි.රජයක් තුළ පරස්පර විරෝධතා තිබෙන්න බැහැ. රට ඉදිරියට ගෙන යාමේ වැඩපිළිවෙළේදී අප එක මතයක සිටිය යුතුයි. ඒ වගේම මෙම වැඩපිළිවෙළ විනිවිදභාවයකින් යුතුව ඉදිරියට ගෙන යා යුතුයි.

පාර්ලිමේන්තු මන්ත්‍රී ඩලස් අලහප්පෙරුම 

මෙතන සිටින විපක්ෂයේ බහුතරයක් දේශපාලන පක්ෂ ඔබතුමාගේ ආරාධනය පිළිගෙන මෙහි පැමිණියේ යම්කිසි සැකයක් තුළයි. මෙම වැඩපිළිවෙළ සිදුකරන්නේ සද්භාවයෙන් ද යන සැකය අපට තිබෙනවා. බලය බෙදා හැරීම සඳහා වන ආණ්ඩුක්‍රම ව්‍යවස්ථාවේ 13 වන සංශෝධනයට අපගේ මුද්‍රාව ලබාගැනීමට දෝ කියන සාධාරණ සැකය අපට තිබෙනවා. අපට තිබෙන මෙම සැකය නැති කරන්න හැකියාව තිබෙන්නෙත් ඔබතුමාටමයි.

පාර්ලිමේන්තු මන්ත්‍රී වීරසුමන වීරසිංහ

අද ඉදිරිපත් කළ යෝජනාවලට අදාළ ඔබතුමාගේ ප්‍රවේශය ඉතා හොඳයි. ඊට විරුද්ධ වීමට කිසිවෙකුට හැකියාවක් නැහැ. නමුත් අපට පැහැදිළි කර ගැනීමට අවශ්‍ය වන්නේ මෙය වත්මන් ජනාධිපති රනිල් වික්‍රමසිංහ මහතාගේ යෝජනාවලියක්ද, නැත්නම් වත්මන් ආණ්ඩුවේ යෝජනාවලියක් ද යන්නයි. මොකද පොදු ජන පෙරමුණේ ලේකම්තුමාගේ කතාවෙන් පසුව අපේ හිතේ තිබූ සැකය ටිකක් වැඩි වුණා.

ඒ නිසා ඔබතුමා පළමුව මෙය ආණ්ඩුවේ යෝජනාවක් බවට පත් කරගන්න. ආණ්ඩුවේ වැඩපිළිවෙළක් බවට පත්කරන්න. එම කෙටුම්පත අපට ඉදිරිපත් කරන්න. අප එය මුල් කරගෙන පුළුල් සාකච්ඡාවකට එකඟයි. ඒ පිළිබඳ කිසිදු ගැටලුවක් නැහැ.

විශේෂයෙන්ම අපේ අගමැතිතුමා සහ කතානායකවරයා දෙපසින් තබාගෙන ආණ්ඩුක්‍රම ව්‍යවස්ථාවේ 13 වන සංශෝධනය ශක්තිමත් කිරීම පිළිබඳ සාකච්ඡා කිරීම පිළිබඳ අපට සතුටුයි. මොකද මම 13 වන ව්‍යවස්ථා සංශෝධනයට පක්ෂ වූ දේශපාලන පක්ෂයක සාමාජිකයෙක්. ඒ වෙනුවෙන් මැරුම් කෑ දේශපාලන පක්ෂයක සාමාජිකයෙක්. අදටත් බලය බෙදීම පිළිබද අපේ ස්ථාවරය අඹමල් රේණුවකින්වත් වෙනස් වී නැහැ. මේ පළාත් සභා පිළිබඳ තිබෙන නරක චිත්‍රය වෙනස් කළයුතුයි. එම නිසා ඔබතුමා ඉදිරිපත් කළ යෝජනාවලියේ “ඕ” හි අවසන් කරුණ ලෙස සඳහන් වෙනවා උතුරු සංවර්ධන සැලැස්ම පිළිබද. ඒ පිළිබද අවධානය යොමු කළ හැකිනම් එය ඉතා වැදගත් කාරණයක්. එම ජනතාව ඉල්ලා සිටින්නේ පොලිස් බලතල, ඉඩම් බලතල නොවෙයි, ඔවුන් ඉල්ලා සිටින්නේ කුඹුරට වතුර ටික, ජිවත්වීමට ක්‍රමවේදයක් සහ දරුවන්ට අධ්‍යාපන අවස්ථාවන් ඇතුළු මේ සංවර්ධන සැලැස්මයි.

පාර්ලිමේන්තු මන්ත්‍රී විමල් වීරවංශ 

ආණ්ඩුකම ව්‍යස්ථාවේ 13 වන සංශෝධනය ගෙන එන අවස්ථාවේදී හිටපු අගවිනිසුරු රාජා වනසුන්දර මහතා දුන් තීන්දුවේ සඳහන් වෙනවා “13 වන ව්‍යවස්ථා සංශෝධනය යනු ජාතියේ හිසට ඉහළින් එල්ලා ඇති භයානක කඩු තුනකි. එය ගැට ගසා ඇත්තේ ඊට එරෙහිව පවතින ව්‍යවස්ථාව නමැති ඉතා දුර්වල රැහැන් පටවලිනි. මෙම රැහැන් පට කැපුනොත් තමයි අපට ඇත්ත පින්තූරය පේන්න පටන් ගන්නේ” යනුවෙනි. අප මේ රැහැන් පට කපන්නේ නැතිව තමයි අවුරුදු ගණනක් පැමිණ තිබෙන්නේ. දැන් ඔබතුමා මේ යෝජනා කරන්නේ එම රැහැන් පට කපා දැමීම පිළිබඳව. එය ඉතා බරපතළ කාරණයක්.
ඒ වගේම රටේ ඒකීයභාවයට හානියක් නොවන පරිදි සංහිදියාව සහ සහජීවනය ඇති කිරීමට අප සතු යෝජනා කිහිපයකුත් තිබෙනවා. එය මම ලිඛිතව ඔබතුමාට භාරදෙනවා.

 පාර්ලිමේන්තු මන්ත්‍රී මහාචාර්ය ජී.එල්. පීරිස් 

ජනාධිපතිතුමා ප්‍රකාශ කළ පරිදි බලය බෙදීමේ අරමුණ පළාත් සභා මට්ටමින් නියෝජිතයන් වෙත බලය පැවරීමයි. කෙසේ වෙතත්, මේ වන විට, රටේ පළාත් සභා නවයෙන් එකකවත් තේරී පත් වූ නියෝජිතයන් නැහැ. ඒ නිසා බලය බෙදීම පිළිබඳව කෙරෙන සාකච්ඡා අර්ථ විරහිත බව කිව යුතුයි. එබැවින් මෙහිදී ප්‍රධාන කරුණ විය යුත්තේ පළාත් සභාවල නිසි ලෙස මහජන නියෝජනයක් සිදුවන අයුරින් පළාත් සභා මැතිවරණ පැවැත්වීමයි.

පාර්ලිමේන්තු මන්ත්‍රී එම්. ඒ. සුමන්තිරන්

අගමැතිතුමාගේ ප්‍රධානත්වයෙන් යුත් තේරීම් කාරක සභාවක් ඇති කිරීම සම්බන්ධයෙන් මා මීට පෙර පැවති සාකච්ඡාවේ දී කරුණු පෙන්වා දුන්නා. ඒ අනුව කලින් පැවති සමානුපාතික ඡන්ද ක්‍රමය යටතේ පළාත් සභා මැතිවරණ පැවැත්වීම නිර්දේශ කළා. නිසි සීමා නිර්ණය සමඟ මිශ්‍ර ක්‍රමයකට අවසානයේ යොමු වීමට සුදුසු නීති සම්පාදනය කිරීමට කමිටුව වෙත තවදුරටත් යෝජනා කළා.

අර්ථාන්විත බලය බෙදාහැරීමක් සඳහා ආණ්ඩුක්‍රම ව්‍යවස්ථාවේ 13 වන සංශෝධනය සම්පූර්ණයෙන් ක්‍රියාත්මක කිරීමට කැපවී සිටි මහින්ද රාජපක්ෂ ජනාධිපතිවරයාගේ පාලන සමයේදී කළ ඒකාබද්ධ ප්‍රකාශ පිළිබඳවද මම අවධානය යොමු කිරීමට කැමතියි. කෙසේ වෙතත් එම පක්ෂයේම මහලේකම්වරයා ව්‍යකුලත්වයක් ඇති කරමින් බලය බෙදීම පිළිබඳ වෙනත් ස්ථාවරත්වයක් ප්‍රකාශ කිරීම කණගාටුවට කරුණක් බව කිව යුතුයි.

පාර්ලිමේන්තු මන්ත්‍රී සී.වී. විග්නේෂ්වරන් 

ආණ්ඩුක්‍රම ව්‍යවස්ථාවේ 13 වන සංශෝධනයේ අන්තර්ගතව තිබූ බලතල බොහෝමයක් මේ වන විට අපට අහිමි වී තිබෙනවා. පළාත් සභාවෙන් ඉවත් කර ඇති එම බලතල යළි ලබා දෙන ලෙස ඉල්ලා අප ජනාධිපතිතුමාට ලිපියක් ඉදිරිපත් කළේ මේ නිසයි.

අපගේ ඉලක්කය වන්නේ මැතිවරණවලට පෙර 13 වන ව්‍යවස්ථා සංශෝධනය දැන් තිබෙන තත්ත්වයට වඩා ශක්තිමත් කර ගැනීමයි. එබැවින් 13 වන ව්‍යවස්ථා සංශෝධනය ශක්තිමත් කිරීම පිලිබඳ අවධානය යොමු කිරීම සැබෑ ලෙසම පළාත් සභා ශක්තිමත් වීමක් වෙනවා.

 පූජ්‍ය අතුරලියේ රතන හිමි, දෙමළ ජාතික සන්ධානයේ නායක පාර්ලිමේන්තු මන්ත්‍රී ආර්. සම්බන්ධන්, පාර්ලිමේන්තු මන්ත්‍රීවරුන් වන ගෙවිදු කුමාරතුංග, වාසුදේව නානායක්කාර, උදය ගම්මන්පිල, සරත් වීරසේකර, අනුර ප්‍රියදර්ශන යාපා, ලක්ෂ්මන් කිරිඇල්ල ඇතුළු මන්ත්‍රීවරු මෙහිදී අදහස් දැක්වූහ.

අග්‍රාමාත්‍ය දිනේෂ් ගුණවර්ධන, කතානායක මහින්ද යාපා අබේවර්ධන යන මහත්වරු සහ විවිධ පක්ෂ නියෝජනය කරන පක්ෂ නායකයන් සහ නියෝජිතයන් මෙම අවස්ථාවට එක්ව සිටියහ.

කැලණිය විශ්වවිද්‍යාලයේ උපකුලපති ධුරයට ජ්‍යෙෂ්ඨ මහාචාර්ය නිලන්ති රේණුකා ද සිල්වා  නැවත පත් කර ඇතැයි ජනාධිපති මාධ්‍ය අංශය සඳහන් කරයි.

ඒ , අගෝස්තු 24 වැනි දින සිට ක්‍රියාත්මක වන පරිදි වසර 03ක් සඳහායි.

ප්‍රංශ ජනාධිපති එමානුවෙල් මැක්‍රෝන් මෙම සති අන්තයේ ශ්‍රී ලංකාවේ සංචාරයක නිරත වීමට නියමිත බව ප්‍රංශ මාධ්‍ය වාර්තා කරයි.

පැපුවා නිව් ගිනියාවේ සිට පැමිණෙන අතර තුර ඔහු සිකුරාදා (ජූලි 28) රාත්‍රියේ මෙරටට පැමිණීමට නියමිත බව එම වාර්තා සදහන් කරයි.

ඒ අනුව, ඔහු සෙනසුරාදා (ජූලි 29) උදෑසන දක්වා මෙරට රැඳී සිටිනු ඇතැයි එම වාර්තා සඳහන් කර ඇත.

එම කෙටි සංචාරයකදී ප්‍රංශ ජනාධිපතිවරයා, ජනාධිපති රනිල් වික්‍රමසිංහ හමුවීමට නියමිත බව ද වාර්තා වේ.

ප්‍රංශ ජනාධිපතිවරයෙකු මෙරට සංචාරය කරනු ලබන්නේ ඉතිහාසයේ පළමු වරට ය.

මෙම සංචාරය පිළිබඳව ප්‍රංශ ජනාධිපතිවරයා පෙර දැනුම් දීමක් සිදු කර නොමැති බව අදාළ මාධ්‍ය වාර්තාවල දැක්වේ.

ගල්කිස්සේ සිට කන්කසන්තුරේ දක්වා සති අන්ත සංචාරක දුම්රියක් ලබන අගෝස්තු මස 04 වෙනිදා සිට ආරම්භ කරන බව ප්‍රවාහන අමාත්‍ය බන්දුල ගුණවර්ධන අද (25) පැවසීය.

එම දුම්රිය සිකුරාදා රාත්‍රී 10.30 ට ගල්කිස්ස දුම්රිය ස්ථානයෙන් පිටත් වී සෙනසුරාදා අලූයම 6.00 ට කන්කසන්තුරේට ළඟා වන බවත් ඉරිදා රාත්‍රී 10:30 ට කන්කසන්තුරෙන් පිටත්ව එම දුම්රිය සඳුදා අලුයම 6.00 ට කොළඹ කොටුව දුම්රිය ස්ථානයට ළඟාවීමට නියමිත බවත් අමාත්‍යවරයා කීය.

නල්ලූර් උත්සවය ඉලක්ක කර ගනිමින් මෙම දුම්රිය අගෝස්තු මස 18 වැනිදා සිට දිනපතා ධාවනය කිරීමට කටයුතු කරන බව අමාත්‍යවරයා සඳහන් කළේය.

මෙම අධි සුඛෝපභෝගී දුම්රියේ ආපනශාලා ඇතුළු සියලුම පහසුකම් ඇති බවත් එම දුම්රියේ ප්‍රවේශපත් කලින් වෙන්කරවා ගත යුතු බවත් අමාත්‍යවරයා වැඩිදුරටත් සඳහන් කළේය.

ධාවනයෙන් ඉවත් කර තිබූ ශ්‍රී ලංකා ගමනාගමන මණ්ඩලයට අයත් බස් රථ 175ක් අලුත්වැඩියා කර නැවත මගී ප්‍රවාහන පද්ධතියට එක් කිරිමට ශ්‍රී ලංකා ගමනාගමන මණ්ඩලය කටයුතු කර ඇත.

ඒ පිළිබඳව ජනාධිපති රනිල් වික්‍රමසිංහ වෙත නිල වශයෙන් දැනුම් දීම ඊයේ (ජූලි 24) පස්වරුවේ ජනාධිපති කාර්යාලයේදී සිදු විය.

වසර තුනකට අධික කාලයක් ධාවනයෙන් ඉවත් කර තිබූ බස් රථ 852 කින් බස් රථ 400ක් නැවත අලුත්වැඩියා කිරීමේ ව්‍යාපෘතියක් ආරම්භ කර ඇතැයි ජනාධිපති මාධ්‍ය අංශය පවසයි.

මෙම බස් රථ 175 න් 15ක් පාසල් ළමුන් ප්‍රවාහනය සඳහා “සිසු සැරිය” වැඩසටහනට ලබා දීමට නියමිත අතර අනෙක් බස් රථ මගී ප්‍රවාහන අවශ්‍යතා සඳහා යොදා ගැනීමට ඩිපෝ වෙත භාරදීමට නියමිත ය.

බිත්තර සඳහා පනවා ඇති පාලන මිල අද(25) මධ්‍යම රාත්‍රියේ සිට ඉවත් කරන බව පාරිභෝගික කටයුතු පිළිබද අධිකාරිය පවසයි.

සුදු බිත්තරයක් සඳහා රුපියල් 44 ක් සහ දුබුරු බිත්තරයක් සඳහා රුපියල් 46ක පාලන මිලක් නියම කර තිබුණි.

පාලන මිල ඉවත් කිරීමට කැබිනට් මණ්ඩල අනුමැතිය ද ලැබී තිබේ.

මේ අතර, ආනයනික බිත්තර සිල්ලර වෙළෙඳපොළට මුදා හැරීමට ද මේ වනවිට අවසර ලබා දී ඇති අතර ඒ තුළින් වෙළෙඳපොළ තුළ තරගකාරී මිලක් තීරණය වීමට ඉඩ හරින බව පාරිභෝගික කටයුතු පිළිබඳ අධිකාරිය සඳහන් කළේ ය.