පුවත්

මෙවර පළාත් පාලන මැතිවරණය සදහා මෙරට පුරවැසියන් 1000කට අපේක්ෂකයන් 04 දෙනෙකු බැගින් නියෝජනය වන බව මැතිවරණ කොමිසම හරහා වාර්තා වෙයි .

ඒ අනුව මැතිවරණ කොමිසමේ සභාපති නිමල් පුංචිහේවා පවසන්නේ මෙවර පළාත් පාලන මැතිවරණයට අපේක්ෂකයින් 80720 දෙනකු තරග කරන බවයි .

දේශපාලන පක්ෂ 58ක් සහ ස්වාධීන කණ්ඩායම් 329කින් එම පිරිස තරග කරන බව ද ඔහු පවසයි .

මෙවර ඇල්පිටිය ප්‍රාදේශීය සභාව සහ කල්මුනේ නගර සභාව හැර අනෙකුත් පළාත් පාලන ආයතන 339 සඳහා එම මැතිවරණය පැවැත්වීමට නියමිතව ඇත.

ඒ අනුව බැලීමේදී රටේ සමස්ත ජනගහනයට සාපේක්ෂව සැසදීමේදි මෙවර මෙරට පුද්ගලයින් 1000කට අපේක්ෂකයින් 04 දෙනෙකු නියෝජනය වෙයි.

තමන් මීළඟ ජනාධිපතිවරණයට ඉදිරිපත් වන බව ශ්‍රී ලංකා නිදහස් පක්ෂයේ සභාපති, හිටපු ජනාධිපති මෛත්‍රීපාල සිරිසේන පැවසීය.

හිටපු ජනාධිපතිවරයා මේ බව පැවසු‍වේ නිදහස් පක්ෂ මූලස්ථානයේ අද (31) පැවති මාධ්‍ය හමුවකට එක්වෙමිනි.

ඒ සඳහා ශ්‍රී ලංකා නිදහස් පක්ෂයෙන් ඉදිරිපත් වී ජයගත හැකි බව තමන් විශ්වාස කරන බව ද මෛත්‍රීපාල සිරිසේන කීවේය

තමන්ට එරෙහිව කුමන කුමන්ත්‍රණ කළත් බියනොවන බවත්, තමා කිසිදේකින් පස්සට යන මිනිසෙක් නොවන බවත් ඔහු පැවසීය.

එමෙන්ම පාස්කු ප්‍රහාරය සම්බන්ධයෙන් සමස්ත කතෝලික ජනතාවගෙන් සමාව අයැද සිටින බව හිටපු ජනාධිපති මෛත්‍රීපාල සිරිසේන පැවසීය.

තම පාලන කාලයේ රටේ එවැනි සිද්ධියක් වීම පිළිබඳව මෙන්ම මෙම ප්‍රහාරයෙන් මියගිය සහ ආබාධිත තත්වයට පත්ව එකතැන්ව සිටින ජනතාව වෙනුවෙනුත් තමා සමාව ඉල්ලා සිටින බව කී හිටපු ජනාධිපතිවරයා තමන්ට නියම වූ දඩ මුදල කෙසේ හෝ ගෙවීමට කටයුතු කරමින් සිටින බවද සඳහන් කළේය.

“ප්‍රධාන ආර්ථික ප්‍රතිසංස්කරණ - ලෝක බැංකුවේ පූර්ව ක්‍රියාමාර්ග” පිළිබඳ පසුවිපරම් සාකච්ඡාවක් ජාතික ආරක්ෂාව පිළිබඳ ජනාධිපති ජ්‍යෙෂ්ඨ උපදේශක සහ ජනාධිපති කාර්ය මණ්ඩල ප්‍රධානි සාගල රත්නායකගේ ප්‍රධානත්වයෙන් අද (31) පස්වරුවේ ජනාධිපති කාර්යාලයේ දී පැවැත්විණි.

ලෝක බැංකු ආධාර වැඩසටහන සම්බන්ධයෙන් මෙහිදී දීර්ඝ ලෙස සාකච්ඡා කෙරුණු අතර මූල්‍ය අධීක්ෂණය සහ ණය කළමනාකරණය වැඩිදියුණු කිරීම, බදු පරිපාලන ප්‍රතිපත්තිය වැඩි දියුණු කිරීම, ස්වෛරී මූල්‍ය අංශයේ ක්‍රමානුකූල අවදානම අඩු කිරීම, සමාජ ආරක්ෂණ ආයතන බෙදාහැරීම් පද්ධතිය සහ ඉලක්ක ගත කිරීම ශක්තිමත් කිරීම, ප්‍රතිපත්ති අවිනිශ්චිතතාව අඩු කිරීම සහ ආර්ථිකයේ තරගකාරීත්වය වැඩි කිරීම යන කරුණු සහ ඒවා ක්‍රියාත්මක කිරීම සඳහා ගත යුතු පූර්ව ක්‍රියාමාර්ග පිළිබඳ මූලික වශයෙන් විමසා බැලිණි.

මෙම පූර්ව ක්‍රියාමාර්ග කඩිනමින් ක්‍රියාත්මක කිරීමේ අවශ්‍යතාව මෙහිදී සාගල රත්නායක  විසින් පෙන්වා දෙනු ලැබීය.

මුදල් අමාත්‍යාංශයේ ලේකම් මහින්ද සිරිවර්ධන, මහ බැංකු අධිපති ආචාර්ය නන්දලාල් වීරසිංහ, ආර්ථික කටයුතු පිළිබඳ ජනාධිපති ජ්‍යෙෂ්ඨ උපදේශක ආචාර්ය ආර්. එච්. එස්. සමරතුංග, ලෝක බැංකුවේ ජ්‍යෙෂ්ඨ ආර්ථික විද්‍යාඥ රිචඩ් වෝකර් (Richard Walker) ඇතුළු නියෝජිතයන් පිරිසක් මෙම සාකච්ඡාවට එක්ව සිටී අතර ලෝක බැංකු නියෝජිතයන් පිරිසක් සූම් තාක්ෂණය ඔස්සේ ද ඊට එක් වූහ.

ණය පදනම මත භාණ්ඩ හා සේවා ලබා ගැනීමෙන් වළකින ලෙස ජනාධිපති රනිල් වික්‍රමසිංහ රජයේ නිලධාරීන්ට දැනුම් දී තිබේ.

ජනාධිපතිවරයා අමාත්‍ය මණ්ඩලයට දන්වා ඇත්තේ රාජ්‍ය ආදායම, වියදම් ඇස්තමේන්තුවට වඩා පහළ මට්ටමක පවතින බැවින් රජයේ විදයම් කපා හැරීමට කටයුතු කරන ලෙස ය.

රජයේ ආදායම්, සියලු වියදම් පියවා ගැනීමට ප්‍රමාණවත් නොවන බවත් එමගින් සිදුකළ හැක්කේ වැටුප් සහ විශ්‍රාම දීමනා, ශුභසාධක, ඖෂධ සහ ණය සේවාකරණය පමණක් බවත් ජනාධිපතිවරයා පෙන්වා දී තිබේ.

එමෙන් ම රාජ්‍ය ආයතන සඳහා ණය පදනම මත භාණ්ඩ හා සේවා ලබා ගතහොත් ඒවායෙහි වියදම් සඳහා පෞද්ගලිකව වගකීමට සිදුවනු ඇති බවත් ජනාධිපති රනිල් වික්‍රමසිංහ රජයේ සියලු නිලධාරීන්ට දැනුම් දී තිබේ.

තස්ත්‍රවාදය වැළැක්වීමේ පනත යටතේ අත්අඩංගුවට ගෙන සිටි අන්තර් විශ්වවිද්‍යාල ශිෂ්‍ය බල මණ්ඩලයේ කැඳවුම්කරු වසන්ත මුදලිගේ එම නඩුවෙන් නිදහස් කිරීමට කොළඹ මහේස්ත්‍රාත් අධිකරණය අද (ජන. 31) නියෝග කළේ ය.

කොළඹ ප්‍රධාන මහේස්ත්‍රාත් ප්‍රසන්න අල්විස් එම නියෝගය ලබා දුන්නේ ය.

වසන්ත මුදලිගේ, ත්‍රස්තවාදය වැළැක්වීමේ පනත යටතේ ගැනෙන වැරදි සිදුකළේ, යැයි චෝදනා කරමින් හදිසි නීතිය යටතේ අත්අඩංගුවට ගෙන දින 89 ක් රඳවා තබා ගැනීමෙන් අනතුරුව පසුගිය නොවැම්බර් 21 වැනිදා සිට මේ දක්වා රක්ෂිත බන්ධනාගාරගතකර සිටියේ ය.

අදාල නියෝගය ලබාදෙමින් මහේස්ත්‍රාත්වරයා ප්‍රකාශ කළේ, ත්‍රස්තවාදය වැළැක්වීමේ පනත යටතේ ගැනෙන කිසිදු වරදක් සැකකරු සිදු කර නොමැති බව අනාවරණය වන බැවින් ඔහු නිදහස් කරන බව ය.

ත්‍රස්තවාදය වැළැක්වීමේ පනත අවභාවිත කරමින් කොළඹ ත්‍රස්ත විමර්ශන කොට්ඨාසය සැකකරුට එරෙහිව චෝදනා ගොනු කර ඇති බවට අනාවරණය වන බව ද එම නියෝගය ලබා දෙමින් මහේස්ත්‍රාත්වරයා පැවසීය.

අද මෙම නඩුවෙන් ඔහු නිදහස් කෙරුණ ද තවත් නඩු කිහිපයකට අදාළව ඔහු තවදුරටත් රක්ෂිත බන්ධනාගාරගතව සිටී.

ත්‍රස්තවාදය වැළැක්වීමේ පනත යටතේ අත්අඩංගුවට ගෙන රක්ෂිත බන්ධනාගාරගත කර සිටි වසන්ත මුදලිගේ දින 150කට අධික කාලයක් සිරගතව පසු විය.

මෙවර ජාතික නිදහස් දිනය නිමිත්තෙන් 'ශ්‍රී ලංකාභිමාන්‍ය' සම්මානය හිටපු කතානායක දේශබන්දු කරු ජයසූරියට පිරීනැමීමට කැබිනට් ඇනුමැතිය හිමිව ඇත.

'ශ්‍රී ලංකාභිමාන්‍ය සම්මානය' මෙරටදී පිරිනෑමෙන ඉහලම සම්මානය වේ.

කරු ජයසූරිය විසින් සිදුකරන ලද සේවය ඇගයීම පිණිස ඔහු වෙත මෙම සම්මානය පිරිනැමීමට ජනාධිපති රනිල් වික්‍රමසිංහ ඉදිරිපත් කළ යොජනාවට අමාත්‍ය මණ්ඩලයේ අනුමැතිය ලබා දී තිබේ.

2023 පෙබරවාරි 03 වැනිදා ජනාධිපති මන්දිරයේ දී එම සම්මානය පිරිනැමීමට කටයුතු යොදා ඇත.

ශ්‍රී ලංකා ප්‍රජාතන්ත්‍රික සමාජවාදී ජනරජය තුළ ජාතිය වෙනුවෙන් අතිවිශාල විශිෂ්ට සේවාවක් ඉටු කළ ශ්‍රී ලාංකික පුරවැසියන්ට හා ශ්‍රී ලාංකික නොවන පුද්ගලයින්ට සිය ජීවිත කාලය තුළ එක් වරක් පමණක් හිමි වන ජාතික සම්මානයක් පිරිනැමීම 1986 වර්ෂයේ සිටම සිදුකර ඇත.

නිදහස් ජනතා සන්ධානය මෙවර පළාත් පාලන මැතිවරණයට අදාළ ප්‍රචාරණ කටයුතු ආරම්භ කිරීම නිමිත්තෙන් කොළඹ දී පැවැත් වූ රැස්වීමට එහි සාමාජික පක්ෂයක නායකයකු වන තමන්ට ආරාධනා නොකිරීම කනගාටුදායක තත්ත්වයක් බව ලංකා සමසමාජ පක්ෂයේ නායක මහාචාර්ය තිස්ස විතාරණ පැවසීය.

මහනුවර, පොල්ගොල්ල ප්‍රදේශයේ දී මාධ්‍ය හමුවක් පවත්වමින් ඒ මහතා මේ බව ප්‍රකාශ කළේය.

උත්තර ලංකා සභාගය නියෝජනය කරන පක්ෂ 07ක් තිබෙන බවත් ලංකා සමසමාජ පක්ෂය එහි සාමාජික පක්ෂයක් බවත් කී හෙතෙම සියලු පක්ෂ එකතු වී මැතිවරණයට මුහුණදීම සඳහා ගොඩනැගූ නිදහස් සන්ධානයේ මැතිවරණ ප්‍රචාරක සමාරම්භක රැස්වීමට තමන්ට ආරාධනා නොකිරීම ගැටලුකාරී තත්ත්වයක් බවද සඳහන් කළේය.

නිදහස් ජනතා සන්ධානය යටතේ පළාත් පාලන ආයතන වලට නාම යෝජනා ලබාදීමේදී සිය පක්ෂය මගින් ද අපේක්ෂක ලැයිස්තු සඳහා නම් ඉදිරිපත් කළත් අවසන් ලැයිස්තු පිරික්සීමේ දී එම නම් බොහොමයක් හැලී ගොස් තිබුණු බවද හෙතෙම පැවසුවේය.

මහනුවර දිස්ත්‍රික්කයේ පළාත් පාලන ආයතන 17ක් සඳහා ලංකා සමසමාජ පක්ෂය මගින් අපේක්ෂකයන් නම් ඉදිරිපත් කළත් ඒ කිසිවකුට නිදහස් ජනතා සන්ධානය තුළ ඉඩක් නොලැබුණු බවත් මේ නිසා පළාත් පාලන ආයතන කිහිපයකට සමසමාජ පක්ෂය යටතේ නාම යෝජනා ලබාදීමට සිදුවූ බවත් ඒ මහතා ප්‍රකාශ කළේය.

වාමාංශික බලය වැඩිපුර පවතින මාතර දිස්ත්‍රික්කය සඳහා සමසමාජ පක්ෂය ඉල්ලා සිටියේ එක් අපේක්ෂක ධුරයක් පමණක් වුවත් එයද නොලැබුණු බව විතාරණ මහතා කීවේය.

ලංකා සමසමාජ පක්ෂයට විරුද්ධව නොයෙකුත් බලවේග ක්‍රියාත්මක වෙමින් තිබෙන බවත් ඒ කිසිවක් හමුවේ තමන් නොසැලෙන බවත් මහාචාර්වරයා වැඩිදුරටත් පැවසුවේය.

තම පක්ෂයට සිදුවන කෙනෙහෙලිකම් සම්බන්ධව තරහක් නොමැති බවත් මෙම සන්ධානය කඩා ඉහිරවීම පිණිස කුමන්ත්‍රණයක් ක්‍රියාත්මක වෙන්නේද යන්න සොයා බැලිය යුතු බවත් ඔහු කීවේය. වෙනත් පාර්ශ්වයකින් මුදල් ලබාගෙන සන්ධානය කඩාකප්පල් කිරීම සඳහා පිරිසක් ඒ තුළට රිංගා ඇති බවට තමා සැකකරන බවද මුදල් මත සිදුවූ එවන් කඩාකප්පල්කාරී ක්‍රියා සම්බන්ධයෙන් පාර්ලිමේන්තුවේ විශාල වශයෙන් නිදසුන් ඇති බවද ඒ මහතා ප්‍රකාශ කළේය.

එදා යහපාලන ආණ්ඩුව සමයේ අගමැතිව සිටි රනිල් වික්‍රමසිංහ එම්.සී.සී. ගිවිසුම හා සෝපා ගිවිසුම ක්‍රියාත්මක කිරීමට සූදානම්ව සිටියද මැතිවරණ පරාජය හේතුවෙන් එම උත්සාහය වැළකී ගිය නමුත්, අද වන විට රනිල් වික්‍රමසිංහ, බැසිල් රාජපක්ෂ හා ඇමරිකානු තානාපතිවරිය එක්ව මෙම ගිවිසුම් ක්‍රියාත්මක කිරීම සඳහා අවශ්‍ය වාතාවරණය රහසේ සකස් කරන බවට තමන්ට තොරතුරු ලැබී ඇති බවත් කෙසේ හෝ මෙම උත්සාහය ව්‍යර්ථ කළ යුතු බවත් ඒ මහතා වැඩිදුරටත් කීවේය.

ආණ්ඩුව විසින් තනතුරෙන් අස් කරන්න හදනවය කියන සුප්‍රකට කොමිෂන් සභාවක සභාපතිවරයෙක් රකින්න සංඝයා වහන්සේලා පවුරක් වගේ ඉන්න යනවය කියලා ආරංචියි...

මේ දවස්වල ආණ්ඩුවත් තමන්ගෙ විෂයභාර ඇමැතිවරයත් සමඟ ප්‍රසිද්ධියෙ සටන් කරන මේ සභාපතිවරයා, ඉදිරි කාලෙ ලංකාවෙ ලොකුම තනතුරකටත් සටනක් දෙන්නලු සූදානම

ඉතින් උන්නැහේට දේශපාලන පැත්තෙන් නොගියත් සෝලි වැටෙද්දී ඊයෙ පෙරේදා එයා කොළඹ 7 සුප්‍රකට ආරාමෙක වෙසෙන සටන්කාමී හිමිනමක් හමුවෙලා මේ අවනඩුව කිව්වලු...

''හාමුදුරුවනේ මම සටන් කරන්නෙ ජනතාව වෙනුවෙන්. ජනතාවට සහන දෙන්න. විභාගෙට යන දරුවො වෙනුවෙන්. ඒ නිසයි මට මේ විදියට නොයෙක් දේවල් කරන්න යන්නෙ...'' කියමින් මේ සභාපතිවරයා කියූ කතාව අහගෙන හිටපු නායක හාමුදුරුවො මෙහෙම කිව්වලු.

''ඔබතුමා ජනතාව වෙනුවෙන් වැඩකරන නිසා අපි ඔබතුමා ආරක්ෂා කරනවා . ඒකට මම විතරක් නොවෙයි තවත් නායක හාමුදුරුවරුන්ගෙ සහයෝගයත් ලැබෙනවා ... බලමු එයාල ඔබතුමා හිතුවක්කාර විදියට අස්කරයිද කියලා. එදාට තමයි අපි සටන පටන් ගන්නෙ...''

නායක හාමුදුරුවන්ගෙ මේ ප්‍රතිඥාව ලබාගත්ත සභාපතිවරයා උන්වහන්සේට නමස්කාර කරල පිටත්වෙලා ගියාලු. ඊට පස්සෙද දන්නේ නෑ මීඩියා ඉස්සරහට ගිහින් ආයෙත් ඇමතිට නොසෑහෙන්න ඇමතුවේ. මොනවා වුනත් ඉතින් පාර්ලිමේන්තුව නැවත කැඳවන පළමු දවසෙම ඔය සභාපතිව එලවන්න නියමිත බවයි විෂය භාර ඇමතිතුමා නම් කියන්නේ.

-දේශපාලන වාර්තාකරු

ජාතික ජනබලවේගය හැරුනම අනිත් සේරම පක්ෂවලට පළාත් පාලන ඡන්දෙ මහ වනයක් වෙලාලු තියෙන්නේ. ප්‍රශ්න පිට ප්‍රශ්න. සේරටම වඩා ඇතුලේ ප්‍රශ්න. නාමයෝජනා හදන්න ගිහිලත් ප්‍රශ්න. නාමයෝජනා බාර දුන්නට පස්සෙත් ප්‍රශ්න. ශ්‍රී ලංකා නිදහස් පක්ෂයේ ලේකම් දයාසිරි ගේ අත්සන හොරට ගහපු සීන් එක මතකනේ .

සමගි ජනබලවේගයේ නාමයෝජනා හදද්දී ඇති වෙච්ච ගැටලු කිහිපයක තොරතුරුත් ඔන්න කරළියට ඇවිත්.. සමගි ජනබලවේගයේ සභාපති ෆීල්ඩ් මාර්ෂල් සරත් ෆොන්සේකා නිසා , කැලණිය ප්‍රාදේශීය සභාවේ නාමයෝජනා සම්බන්ධව ගැටලුවක් මතුවෙලා කියලත් ආරංචියි.

ඒ ආරංචිවල හැටියට, කැලණියේ හිටපු විපක්ෂනායකවරයාට නාමයෝජනා ලබාදීම සරත් ෆොන්සේකා ප්‍රතික්ෂේප කරලා. ඔවුන් දෙදෙනා අතර පවතින දේශපාලන ගැටුමක් හේතුවෙන් මේ විදිහට නාමයෝජනා කපා හරින්න ෆොන්සේකා කටයුතු කරල කියලයි කියන්නේ..

කැලණියේ හිටපු විපක්ෂ නායකවරයට නාමයෝජනා දෙන්න කියලා, විපක්ෂ නායකතුමා කියලත් තිබුන ලු..ඒ විතරක් නෙමෙයි, මේ අවුල විසඳන්න සජබ ඉහළ තනතුරු දරන්නන් කිහිප දෙනෙක් උත්සාහ කරලත් තියනවා.

තමන්ට අවශ්‍ය දේ කරන්නට නොලැබුණහොත් පක්ෂයෙන් ඉවත් වෙනවා කියලා ෆොන්සේකා ඒ වෙලාවේ ෆීල්ඩ් මාර්ෂල් පාට් අරන් පොඩි පහේ තගක් දැම්ම ලු.. සරත් ෆොන්සේකා මේ දිනවල සමගි ජන ජනබලවේගයේ ඇතැම් දේශපාලන ක්‍රියාමාර්ග අනුමත නොකරන පාටක් තමයි පේන්න තියෙන්නේ.

ඔය අතරේ බේරුවල නගර සභාවේ නගරාධිපතිව සිටි මසාහිම් මොහොමඩ්ට සජබෙන් නාමයෝජනා නොලැබීම ගැනත් තොරතුරු ලීක් වෙලා. එක්සත් ජාතික පාක්ෂිකයකු වන ඔහු පසුගියවර පොහොට්ටුවට සම්බන්ධ ස්වාධීන කණ්ඩායමකින් තරග කර ජයග්‍රහණය කෙරුවා. මෙවර සජබ නගරාධිපති අපේක්ෂකයා විදියට එන්න තමයි ප්ලෑන් ගහල තියෙන්නේ .. ඒත් ඉතින්, නාමයෝජනා ලැයිස්තුවෙන් අවසන් මොහොතේ ඔහුගේ නම කපා දාලා ..

''අවසාන දිනයේ උදේ 8.30 තමා මෙයාලා ඇවිත් භාරදුන්නේ මගේ නම නැතුව. ඒක තමා මේ අය කරපු වැඩේ. නායකතුමා මගෙත් එක්ක ඉඳලා ෆොටෝ එකක් ගත්තා. එදා පොරොන්දු වුණා අපි ඔක්කෝම එකතුවෙලා සජබය දිනවමු කියලා. මේ පොරොන්දුව එයාලා කඩ කළා. මගේ විශ්වාසයට ද්‍රෝහිකමක් කළා.''

බේරුවල නගර සභාවේ නගරාධිපතිව සිටි මසාහිම් මොහොමඩ් කියා කියා යනවා කියන්නේ එහෙම..

චන්දෙට ඔය විදියට පක්ෂ ඇතුලෙම කට්ටිය මරා ගන්නකොට, පක්ෂ නායකයෙක් වෙච්ච හිටපු ඇමති කුමාර වෙල්ගම කියන්නේ අපුරු කතාවක්..

''අපිව රවට්ටලා ඇප තැන්පත්වලින් කෝටි ගණක් හොයා ගත්තා…'' වෙල්ගම කියනවා.

''මැතිවරණය තිබ්බොත් ආණ්ඩුව පරදිනවා.. ඒ නිසා ආණ්ඩුව ඡන්දය පවත්වන්නේ යැයි ප්‍රදර්ශනය කලත්, ඡන්දයක් තියන්නේ නෑ .. මෙන්න කැට '' කියලත් වෙල්ගම කියනවා..

ඡන්දය පවත්වන බව පෙන්වමින් ආණ්ඩුව කෝටි ගණනක් ඇප මුදල් ලබා ගෙන සිය වියදමට මුදල් සොයා ගත්තා කියලයි වෙල්ගම කියන්නේ..

-දේශපාලන වාර්තාකරු

සිංහල සංස්කෘතික ආයතනය පවත්වාගෙන යාම සහ එහි ඉදිරි කටයුතු වෙනුවෙන් සුදුසු අමාත්‍ය මණ්ඩල සංදේශයක් සකස් කර ඉදිරිපත් කරන ලෙස ජනාධිපති රනිල් වික්‍රමසිංහ  බුද්ධශාසන, ආගමික සහ සංස්කෘතික කටයුතු අමාත්‍ය විදුර වික්‍රමනායක  වෙත උපදෙස් දුන්නේය.

මෙරට සංස්කෘතික අනන්‍යතාව සුරකින සිංහල සංස්කෘතික ආයතනයේ කටයුතු විධිමත්ව පවත්වාගෙන යාම වෙනුවෙන් සංස්කෘතික අමාත්‍යාංශය හා සිංහල සංස්කෘතික ආයතනය එක්ව ඒකාබද්ධ කමිටුවක් පත් කරගන්නා ලෙස ද ජනාධිපතිවරයා විසින් උපදෙස් දෙනු ලැබීය.

ජනාධිපති රනිල් වික්‍රමසිංහ  මෙම උපදෙස් දෙනු ලැබුවේ සිංහල සංස්කෘතික ආයතනයේ භූමිය සම්බන්ධව අද (30) පෙරවරුවේ ජනාධිපති කාර්යාලයේ පැවති සකච්ඡාවේදී ය.

සිංහල සංස්කෘතික ආයතනය පවත්වා ගෙන යාම සම්බන්ධයෙන් පවතින ගැටලු පිළිබඳ මෙහිදී දීර්ඝ ලෙස සාකච්ඡා කෙරිණි.

සිංහල සංස්කෘතික ආයතනය පවතින භූමියේ වාණිජමය වටිනාකම ඉතා ඉහළ බැවින් ආයතනයේ ගොඩනැඟිලි පහසුකම් සංවර්ධනය කර ආයතනයට ගැළපෙන ක්‍රියාකාරකම් මගින් ආදායම් ඉපැයීම කෙරෙහි වැඩි අවධානයක් යොමු කරන ලෙසත්, ඒ සඳහා යම් මූල්‍ය ප්‍රතිපාදනයක් අවශ්‍ය නම් එය සංස්කෘතික අමාත්‍යාංශය හරහා ලබාදීමට අවශ්‍ය කටයුතු කළ හැකි බවත් ජනාධිපති රනිල් වික්‍රමසිංහ සඳහන් කළේය.

දැනට සිංහල සංස්කෘතික ආයතනයේ සාමාජිකයෝ 300ක් පමණ සිටින අතර, තවදුරටත් එම සාමාජිකත්වය පුළුල් කර උගත් තරුණ පරපුරට අවස්ථාව සළසා දීම තුළින් නව අදහස් ලබාගත හැකි බව ද ජනාධිපතිවරයා පෙන්වා දුන්නේය.

රට තුළ වර්තමානයේ පවතින ආර්ථික අර්බුදයෙන් ගොඩ ඒම සඳහා තිබෙන එකම විකල්පය ලෙස පෙනී යන්නේ ජාත්‍යන්තර මූල්‍ය අරමුදලේ සහාය ලබාගැනීම බව මුදල් රාජ්‍ය අමාත්‍ය රංජිත් සියඹලාපිටිය පවසයි.

රාජ්‍ය අමාත්‍යවරයා මේ බව සඳහන් කර සිටියේ රජයේ ප්‍රවෘත්ති දෙපාර්තමේන්තුවේ අද(30) පැවති ප්‍රවෘත්ති සාකච්ඡාවකට සහභාගී වෙමින්ය.

රටේ ජනතාවගෙන් අයකරනු ලබන උපයන විට බද්ධ පාර්ලිමේන්තුවේ සිටින මන්ත්‍රීවරු දෙසිය විසිපස් දෙනාගෙන්ම අය කරන බව රාජ්‍ය මුදල් ඇමතිවරයා කියා සිටියේය.

තවදුරටත් අදහස් පල කළ ඇමතිවරයා මෙසේද පැවසීය. රටේ පවතින මූල්‍ය තත්ත්වය සැලකිල්ලට ගෙන ආදායම් බදු වැඩිකර ගැනීමට සිදුවෙලා තියෙනවා. එය කිරීමට සෘජු බදු වැඩිකරගත යුතුයි. ඒ සඳහා තමයි උපයන විට බදු වැඩිකරන්න වෙන්නෙ. රටේ ආදායමට වඩා වියදම වැඩිවෙලා තියෙනවා. ඊට විකල්පයක් ලෙස තමයි මේ තීන්දුව අපට අකමැත්තෙන් වුවත් ගන්න සිදුවෙලා තියෙන්නෙ. රටේ ප්‍රජාවට මේ වගේ වෙලාවක ලොකු පීඩනයක් දරාගන්න සිද්ධවෙලා තියෙනවා. ඒ පිළිබඳව අපි දැනුවත්වයි ඉන්නෙ.

රටේ ජනතාව අකමැති දේවල් කරලා ජනතාවගේ අප්‍රසාදයට ලක්වෙන්න කිසිම පාලකයෙක් කැමති වෙන්නෙ නැහැ. නමුත් රටේ ආර්ථිකය ශක්තිමත් කිරිමට නම් වෙනත් විකල්පයක් මේ වෙලාවේ අපට නැහැ. කෙසේ හෝ රාජ්‍ය ආදායම ගොඩනැගීම කළ යුතුයි.

රට ආර්ථික වශයෙන් පත්වී ඇති ව්‍යාසනකාරී තත්ත්වයෙන් ගොඩගැනීම සඳහා අවශ්‍ය පියවර ගනිමින් සිටින අතර දිනපතා අපි නිරීක්ෂණය කරනවා ජනතාවට සහනයක් දෙන්නෙ කොහොමද කියන කාරණය.

රටේ සමස්ථ ආර්ථිකය සෘණ 11 තිබියදී තමයි අප නව ආර්ථික ප්‍රතිසංස්කරණ ක්‍රියාවලිය ආරම්භ කරල තියෙන්නෙ. රටේ ජනතාවගේ පරිභෝජනය වගේම ආදායමත් අඩුවෙලා. සාමාන්‍ය ජනතාව මේ වෙලාවේ අහන ප්‍රශන්ය තමයි අපිට අභිමානයෙන් ජීවත් විය හැකි වාතාවරණයක් රට තුළ නිර්මාණය වන්නේ කවදාද කියන ප්‍රශ්නය. මේ වන විට පවතින මෙරට ආර්ථිකය අනුව මෙම වසරේදී අප බලාපොරොත්තු වන්නේ ආර්ථිකය මේ සිටින තැන සිට සෘණ 3.5ත් සෘණ 4ත් අතර පරාසයක පවතීවි කියලා.

ඒ අනුව ජනාධිපතිවරයා ප්‍රකාශ කළ පරිදි 2024 ආර්ථික වශයෙන් ශක්තිමත් වර්ෂයක් වනු ඇතැයි අපේක්ෂා කරන බවත්, රාජ්‍ය සේවකයින්ට යම් බලාපොරොත්තුවක් තබාගත හැකි වර්ෂයක් වනු ඇති බවත් මුදල් රාජ්‍ය අමාත්‍ය රජිත් සියඹලාපිටිය මහතා සඳහන් කළේය.

රජයේ ආදායම සහ වියදම් පරතරය වැඩි වූ විට මුදල් අච්චුගැසීම මෙතෙක් අනුගමනය කළ ක්‍රියාමාර්ගය වන අතර නව රජය යටතේ එම කටයුත්ත නතර කර ඇති බවද හෙතෙම සඳහන් කළේය. එමෙන්ම මෙතෙක් පැවති බදු ඉහළ දැමීම මිස නව බදු පනවා නොමැති බවද ඇමතිවරයා සඳහන් කළේය.

මෙම ආර්ථික අර්බුදය හේතුවෙන් අපහසුතාවයට පත් පවුල් ලක්ෂ 39ක පිරිස තමන්ට ජීවත්වීම සඳහා රජයෙන් උදවු ඉල්ලන තත්ත්වයකට පත්ව තිබෙන බවද ඇමතිවරයා පෙන්වා දුන්නේය.
මෙම තත්ත්වයෙන් ගොඩ ඒම සඳහා තිබෙන එකම විකල්පය ලෙස පෙනී යන්නේ ජාත්‍යන්තර මූල්‍ය අරමුදලේ සහාය ලබාගැනීම බවද සියඹලාපිටිය මහතා වැඩිදුරටත් සඳහන් කළේය. එසේ කිරීමට නම් ණය ප්‍රතිව්‍යුහගත කිරීම අත්‍යවශ්‍ය බවත් ණය පොළී අඩුකර ගැනීම, ණය කපා හැරීම ආදී විකල්ප ක්‍රියාමාර්ග සඳහා ණය හිමි රටවල් සමග සාකච්ඡා කරමින් සිටින බවද ඔහු පෙන්වා දුන්නේය.

විදේශ රාජ්‍යයන් සමග එවැනි එකගතාවයන්ට පැමිණීමේදී එම රටවල රජයන් සහ එම රටවල බදු ගෙවන ජනතාවට අපට සහන ලබාදීම සඳහා කැපවීම් කිරීමට සිදුව තියෙන බව සඳහන් කළ ඇමතිවරයා ඒ පදනමින් අපරටවැසියන්ට ද කැපකිරීම් කිරීමට සිදුව තිබෙන බව පෙන්වා දුන්නේය.

පළාත් පාලන මැතිවරණය මාර්තු 09 වැනිදා පැවැත්වීමට අදාළ ලේඛන සියලුම තේරීම්භාර නිලධාරීන්ගෙන් ලැබුණු බව මැතිවරණ කොමිසම පවසයි.

ඒ අනුව මැතිවරණ කොමිසමේ සභාපතිවරයා පවසන්නේ අදාළ ලේඛන ගැසට් කිරීම සඳහා රජයේ මුද්‍රණ දෙපාර්තමේන්තුවට යැවූ බවය.

කෙසේවුවත් රජයේ ප්‍රවෘත්ති දෙපාර්තමේන්තුව ඊයේ(29) ප්‍රකාශ කර තිබුණේ මැතිවරණ කොමිෂන් සභාවේ සභාපතිවරයාගේ සහ අනෙකුත් සාමාජිකයින්ගේ අත්සනින් යුතුව පළාත් පාලන මැතිවරණ ක්‍රියාවලිය ආරම්භ කිරීමේ ගැසට් නිවේදනය තවමත් රජයේ මුද්‍රණාලය වෙත යවා නොමැති බවය.

දෙමළ ජාතික සන්ධානය හා උතුරු නැගෙනහිර පළාත්වල සිවිල් සංවිධාන 75 වන ජාතික නිදහස් උළෙල දිනය කලූ කොඩි දිනයක් වශයෙන් සැමරීමටත් තීරණය කර ඇතැයි දෙමළ ජාතික සන්ධානයේ පාර්ලිමේන්තු මන්ත්‍රී එම්. ඒ සුමන්තිරන් පවසයි.

දෙමළ ජනතාවට ඔවුන්ගේ නිදහස තවමත් නිසි ආකාරයෙන් නොලැබීම හේතුවෙන් එම තීරණය ගෙන ඇති බව දෙමළ ජාතික සන්ධානයේ පාර්ලිමේන්තු මන්ත්‍රී එම්.ඒ සුමන්තිරන් පැවසිය.

මේ සම්බන්ධයෙන් මාධ්‍ය වෙත තවදුරටත් අදහස් දැක්වු සුමන්තිරන් මෙසේ පැවසිය.

"නිදහස ලැබුණ විගසම ප්‍රජාතන්ත්‍රවාදය කියන මුවාවෙන් බහුතරවාදයක් වෙලා ඒක පරිවර්තනය වුණා. ඒ නිසා මේ රටේ ජීවත්වන අනිත් ජන කොටස්වලට නිදහසක් ලැබුණේ නෑ. සිංහල බෞද්ධ ජනතාව තමන්ට නිදහස ලැබුණා කියලා, හිතාගෙන හිටියා. ඒ වුණත් ඒ අයටත් දැනෙනවා තමන්ටත් නිදහස ලැබුණේ නෑ කියලා. ඒ නිසා තමයි මේ 75 වන නිදහස් දිනය කියලා පෙබරවාරි 4 වෙනිදා ජනාධිපතිතුමා ඒක සමරන වෙලාවේදී මේ රටේ ජීවත්වන කාටත් ඒ නිදහස ලැබුණේ නෑ කියලා අපි ප්‍රකාශ කරන්න කැමතියි. ඒ නිසාම අපි මේක සමරන වෙලාවේ මේක කළු දිනයක් කියලා ප්‍රකාශ කරලා, රටට හරියාකාරව නිදහස ලැබෙන්නට අපි ව්‍යාපාරයක් පටන් ගන්නවා."

දෙමල ජාතික සන්ධානය එසේ නිදහස් දිනය වර්ජනය කරද්දී දකුණේ විපක්ෂ කණ්ඩායම් කිහිපයක් ද පෙබරවාරි 4 දිනය 'කළු දිනයක්' ලෙස ප්‍රකාශයට පත්කර තිබේ.

අද (30) සහ හෙට (31) විදුලි කප්පාදුව සිදුනොකිරීමට ලංකා විදුලිබල මණ්ඩලය තීරණය කර ඇත.

වාර්තා වන ආකාරයට ලංකා විදුලිබල මණ්ඩලය මේ තීරණය ගෙන ඇත්තේ ජල පෝෂක ප්‍රදේශවලට අධික වර්ෂාපතනයක් ලැබීමත් සමඟ ජල විදුලි බලාගාරවල විදුලි උත්පාදනය ඉහළ දැමීමට හැකියාව ලැබීම නිසාය.

මේ අතර ඉදිරි දින කිහිපය සඳහා ජල විදුලිය උත්පාදනය කිරීමට ප්‍රමාණවත් තරම් ජලය, ජලාශවලින් නිකුත් කිරීමට මහජන උපයෝගීතා කොමිසම විසින් සිදුකළ ඉල්ලීමකට ජල කළමනාකරණ ලේකම් කාර්යාලයේ එකඟත්වය පළකර ඇති බවත් වාර්තා වෙයි.

ස්වාධීන කොමිසම් සභාවකින් දෙන ලද තීරණයක් නිලධාරීන් විසින් ක්‍රියාත්මක නොකිරීම සම්බන්ධයෙන් හෙට (30) දිනයේ සිට නීතිමය ක්‍රියාමාර්ග ගන්නා බව මහජන උපයෝගීතා කොමිසමේ සභාපති, ජනක රත්නායක පවසයි.

අද (29) සවස විශේෂ මාධ්‍ය හමුවක් පවත්වමින් ඔහු සඳහන් කර සිටියේ ස්වාධීන කොමිසම් සභාවක කාර්යභාරය වන්නේ ස්වාධීනව කටයුතු කිරීම මිස දේශපාලන අධිකාරියේ තීරණ ක්‍රියාවට නැංවීමට නොවන බවය.

මේ අතර කංචන විජේසේකර අමාත්‍යවරයා විසින් අද පැවති මාධ්‍ය හමුවක දී තමා ගෝඨාභය රාජපක්ගෙන් පෞද්ගලික සභාපතිධූරයක් ඉල්ලූ බවට පැවසීම නොදන්නා කතාවක් බව ද ජනක රත්නායක පැවසීය.

එම මාධ්‍ය හමුවේ දී ඔහු වැඩිදුරටත් මෙසේද පැවසීය .

"මේ වගේ ස්වාධීන කොමිසම් සභාවලින් දෙන තීරණ නිලධාරීන් විසින් ක්‍රියාත්මක නොකිරීම, කොමිසම් සභාවල ස්වාධීනත්වයට නිගරු කිරීමක් ඒ අනුව හෙට දිනයේ සිට මේ සඳහා අවශ්‍ය නීතිමය පියවර අපි ගන්නවා.

මේක කළමනාකරණය නොකර තමන්ට ඕන කැබිනට් තීරණය බලෙන් අපි ලවා කරවා ගන්න අසාධාරණ විදියට විදුලිබිල සංශෝධනය කරලා, මහජනතාවගේ මුදල් ලබාගැනීමට තමා මේ කටයුත්ත කරන්නේ මේ ඇමතිවරයා. සිසුන්ට අවශ්‍ය විදුලිය ලබාදීමට ඇමතිවරයාට කිසිදු අවශ්‍යතාවයක් නෑ. ඒ නිසා තමා එක එක ප්‍රශ්න ගේන්නේ.

ඇමතිගේ භාෂාවෙන්ම කිව්වොත් අපිව බිත්තියට තල්ලු කරලා ගන්න හදනවා. ඒක නම් හරියන්නේ නෑ.

මම එක දේශපාලන පක්ෂයකවත් සම්බන්ධ නෑ. එතුමා වගේ මම අලියාගේ වලිගයේ එල්ලිලා යන කෙනෙක් නෙමෙයි. ඒ නිසා කිසිම දේශපාලන බැඳීමක් නැතුව කොමිසමේ රාජකාරි ස්වාධීනව කරගන්න තමයි මට අවශ්‍ය වෙන්නේ. ඒ සඳහා කොමිසමේ අනෙකුත් සාමාජිකයින්ගෙන් සහයෝගය ලැබෙනවා. මොකද එතැන ඉන්නේ උගත් බුද්ධිමත් අය. එයාලව රවට්ටන්න බෑ. දේශපාලන ප්‍රෙෂර් එකට පොඩ්ඩක් එහෙ මෙය වෙයි. පස්සේ තේරුම් ගන්නවා.

ඇමතිවරයා විදුලිබල මණ්ඩලය කතා කරන්නේ කිසිම දත්තයක් නැතුව. අපි කතා කරන්නේ දත්ත පදනම්ව. විද්‍යාත්මක විදියට මේක කළ යුතුයි කියලා. මෙතැන තියෙන්නේ දේශපාලන අධිකාරියේ අත්තෝනමතික ක්‍රියාවලිය පාවිච්චි කරලා ළමයින්ගේ අයිතිවාසිකම් උල්ලංඝනය කරලා, ඒක මහජන උපයෝගීතා කොමිසමට දාලා තමා ගන්න යන්න. මේක ගන්න යන්නේ ඒකක 30 - 60ක් පාවිච්චි කරන ආර්ථික ප්‍රශ්නවල මිරිකිලා ඉන්න ජනතාවගෙන් තමා බිලියන 100ක් ගන්න යන්නේ. මේක අසාධාරණ ක්‍රියාවලියක්. අපි සාධාරණ ක්‍රමයට ගණනය කරලා ඇවිල්ලා තියෙන යෝජනාව ඉදිරියේ දී අපි කටයුතු කරනවා. ඉල්ලන ඉල්ලන විදියට අපි CEB එකට මේක දෙන්නේ නෑ.

ස්වාධීන කොමිසම් තියෙන්නේ, හරියට මේක කළමනාකරණය කරලා නියාමනය කරන්න. ඒ අවස්ථාව මේ අය ලබාදෙන්නේ නෑ. හැම එකටම දේශපාලන මැදිහත්වීම් කරනවා.

ප්‍රශ්නය - කංචන විජේසේකර ඇමතිවරයා කළ චෝදනාවක් තමාපෞද්ගලික බැංකුව සභාපතිධූරයක් සඳහා ඔබතුමා ඉල්ලීමක් කරා කියලා ගෝඨාභය මහත්තයාගෙන්. ඒක ප්‍රතික්ෂේප වුණා ද?

"එතැන හිටිය සභාපතිවරයා එතැන වෘත්තීය සමිති එකතු කරගෙන මට ඒක ලබානොදුන්න නිසා තමයි එතුමා මට මේක දුන්නේ. මට කොමිසම දෙද්දි එක කොන්දේසියක් දැම්මා. ඒ කොන්දේසිය තමා මහජන උපයෝගීතා කොමිසමට අත තියන්න බෑ කියලා. ඒක වෙනස් කරන්න බෑ කියන කොන්දේසිය මට ලිඛිතව තියෙනවා. ඒ සාක්ෂි මං ළඟ තියෙනවා. ඒ වට්ස්ඇප්වල සාකච්ඡා ඔක්කෝම මගේ ළඟ තියෙනවා ලිඛිතව. ඒ නිසා කවුරුත් කියන ඒවා භාරගන්න එපා. මේවා විහිළු කතා. ඒ නිසා එතුමා කතා කරනවා නොදන්න බැංකුවක් ගැන. නොදන්න දේවල් විදුලිබලය වගේ, බැංකු ගැන දන්නෙත් නෑ, මුල්‍ය ගැන දන්නෙත් නෑ, හර බැර ගැන දන්නෙත් නෑ. මෙලෝ දෙයක් දන්නේ නැති ඇමතිවරයෙක් දා ගත්තහම සිස්ටම් එක සම්පූර්ණයෙන්ම කනවා නේ."

පළාත් පාලන මැතිවරණයට තරග කරන ස්වාධීන කණ්ඩායම් රැසක් සන්ධානගතව පොදු මැතිවරණ ප්‍රචාරක ව්‍යාපාරයක් දියත් කිරීමට සැලසුම් කර ඇතැයි දේශය පුවත්පත වාර්තා කර ඇත .

ස්වාධීන අපේක්ෂක කණ්ඩායම් නියෝජිතයින් කිහිපදෙනෙකු උපුටා දක්වමින් එම පුවත වැඩිදුරටත් සඳහන් කර ඇත්තේ මෙවර ස්වාධීන කණ්ඩායම් ඉතා විශාල ගණනක් ඡන්ද සටනට ඉදිරිපත්ව ඇති බවය.

ඔවුන්ගෙන් බහුතරය මෙයට පෙර ප්‍රධාන දේශපාලන දහරාවේ පක්ෂවලට සම්බන්ධව සිටි අය බවත් එම නිසා ස්වාධීන අපේක්ෂක කණ්ඩායම්වල සම්මේලනයක් කැඳවා මේ අය තමන්ගේ ඉදිරි මැතිවරණ ප්‍රචාරක ව්‍යාපාරය ගැන තීරණයක් ගැනීමට අපේක්ෂා කරන බව පැවසූ බවත් එහි සඳහන් ය.

කෙසේ වුවත් දේශපාලන ආරංචි මාර්ග පවසන්නේ යෝජිත පළාත් පාලන මැතිවරණයට අදාළව ස්වාධීන කණ්ඩායම් ඉදිරිපත් කර ඇති බහුතරය පොදුජන පෙරමුණ විසින් ඉදිරිපත් කර ඇති බවය.

එළැඹෙන ‍75 වන නිදහස් දින සැමරු උළෙල නිමිත්තෙන් සතියක කාල සීමාවක් රජයේ ආයතන පවත්වාගෙන යන සියලුම ගොඩනැගිලිවල ජාතික කොඩිය එසවීමට රජය තීරණය කර තිබේ.

ඒ අනුව, පෙබරවාරි මස 4වන දිනට යෙදෙන 75 වන නිදහස් දින උළෙල විශේෂ අවස්ථාවක් ලෙස සළකා පෙබරවාරි මස 01 වෙනිදා දින සිට 07 වනදා දක්වා ජාතික කොඩිය එසවීමට නියමිතය.

රාජ්‍ය පරිපාලන හා ස්වදේශ කටයුතු අමාත්‍යංශය විසින් ඊට අදාළ චක්‍රලේඛයක් ද නිකුත් කර තිබේ.

ඒ සඳහා අවශ්‍ය කටයුතු සිදුකරන ලෙස අදාළ චක්‍රලේඛය මගින් ආයතන ප්‍රධානීන් වෙත දැනුම් දී තිබේ.

ප්‍රවීණ නාට්‍යවේදී කේ.බී. හේරත් අභාවප්‍රාප්ත වී තිබේ.

වාර්තා වන ආකාරයට අද (29) දහවල් ඇතිවු හදිසි රෝගී තත්වයක් හේතුවෙන් ඔහු අභවප්‍රාප්ත වී ඇත.

වේදිකා නාට්‍ය රචනය, නිෂ්පාදනය හා රංග වින්‍යාසය යන ක්ෂේත්‍රවල දැවැන්තයෙකු වන කේ.බී. හේරත් මියයන විට 81 වන වියෙහි පසුවුණි.

දේහය පිළිබඳ අවසන් කටයුතු පසුව දැනුම්දෙන බව පවුලේ ඥාතීන් සඳහන් කරයි.