පුවත්

ඊයේ(03) දහවල් 12.00වන විට ආනයනය කර රේගුවෙන් නිෂ්කාශනය කර ඇති සමස්ත සහල් ප්‍රමාණය මෙට්‍රික් ටොන් අසූ අටදහස ඉක්මවා ඇතැයි ශ්‍රී ලංකා රේගුව පවසයි.

රේගු මාධ්‍ය ප්‍රකාශක අතිරේක රේගු අධ්‍යක්ෂ ජනරාල් සීවලි අරුක්ගොඩ පැවසුවේ ගෙන්වා ඇති මෙම සහල් තොගය අතරට කැකුලු සහල් ටොන් 34,000ක් සහ තැම්බූ සහල් ටොන් 54,000ක් වන බවයි.

සහල් ආනයනය එළැඹෙන ජනවාරි 10 දින දක්වා දීර්ඝ කිරීමට පසුගියදා කැබිනට් අනුමැතිය ලැබුණි.

මේ අතර, වෙළෙඳ හා වාණිජ අමාත්‍ය වසන්ත සමරසිංහ  ඊයේ අනුරාධපුර ඔයා මඩුව ප්‍රදේශයේ ඉදිකර ඇති රජයේ වී ගබඩා පිළිබඳ සොයා බැලීකදී මාධ්‍ය වෙත අදහස් දක්වමින් පැවසුවේ මෙම මස 10 වැනි දිනෙන් පසු සහල් ආනයනය කිරීමේ නිදහස් සීමාව ඉවත් කරන බවයි.

හියුමන් මෙටානියුමෝනියා නොහොත් HMPV වෛරසය බිය වියයුතු කරුණක් නොවන බව ශ්‍රී ජයවර්ධනපුර විශ්වවිද්‍යාලයේ ආසාත්මිකතා, ප්‍රතිශක්තිවේද සහ සෛල ජෛව විද්‍යා අංශයේ අධ්‍යක්ෂ, මහාචාර්ය චන්දිම ජීවන්දර  පවසයි.

සිය ‘X’ ගිණුමේ සටහනක් තබමින් ඔහු පවසන්නේ, චීනයේ නව ශ්වසන ආසාදන රැල්ල ශීත ඍතුවේ දී බහුලව දක්නට ලැබෙන්නක් බවයි. මෙම වෛරසයෙන් ශ්වසන අපහසුතාවල වැඩිවීමක් ඇති කළත්, එය නව වෛරසයක් හෝ වසංගත තර්ජනයක් නොවන බව හෙතෙම පවසයි.

කොවිඩ් වසංගතයෙන් පසු මිනිසුන් ශීත කාලයේදී රෝගකාරකවලට ගොදුරුවීමේ වැඩි හැකියාවක් තිබෙන බවද ඔහු වැඩිදුරටත් පෙන්වා දෙයි.

කෙසේ නමුත් මෙම HMPV වෛරස තත්ත්වය සාමාන්‍යයෙන් සතියක් ඇතුළත පහව යන බව හෙතෙම පවසයි. එහෙත් කුඩා දරුවන්, වැඩිහිටියන් මෙන්ම විශේෂයෙන් වෙනත් රෝගී තත්ත්වයන්ගෙන් පෙළෙන පුද්ගලයන් ප්‍රවේශම් වීම වඩා වැදගත් බව ඔහු සිය ‘X’ ගිණුමේ වැඩිදුරටත් දක්වා ඇත.

දේශීය ආදයම් දෙපාර්තමේන්තු ඉතිහාසයේ මෙතෙක් රැස් කරන ලද ඉහළම බදු ආදායම පසුගිය 2024 වසරේදී රැස් කිරීමට සමත්ව තිබේ.

දේශීය අදායම් දෙපාර්තමේන්තුව විසින් නිකුත් කළ නිවේදනයේ දැක්වෙනුයේ එය රුපියල් මිලියන 1,958,088ක් බවය.

මෙය 2023 වසරට සාපේක්ෂව රුපියල් මිලියන 392,229ක වැඩි වීමක් වන අතර එහි වර්ධන වේගය සියයට 25.1ක් බවද එම නිවේදනයේ සඳහන් ව තිබේ.

දෙස් විදෙස් සංචාරකයින්ට සීගිරිය ප්‍රදේශයේදී මුහුණ දෙන ගැටලු විසඳීම සඳහා අවශ්‍ය පියවර ගැනීම වෙනුවෙන් වන සාකච්ඡාවක් අද (03) විදේශ රැකියා සහ සංචාරක අමාත්‍යංශයේදී පැවැත්විණි.

මේ සඳහා සංචාරක ප්‍රවර්ධන කාර්යංශය, වන සංරක්ෂණ දෙපාර්තමේන්තුව, නාගරික සංවර්ධන අධිකාරිය, දඹුල්ල ප්‍රාදේශීය ලේකම් කාර්යාලය, මධ්‍යම සංස්කෘතික අරමුදල, පුරාවිද්‍යා දෙපාර්තමේන්තුව ඇතුළු ආයතන කිහිපයක නිලධාරීන් සහභාගී වී තිබුණි.

මෙම සාකච්ඡාවේදී ප්‍රවේශ පත්‍ර කවුළුවල දිගු පෝලිම්, ප්‍රථමාධාර ස්ථාන නොමැතිකම, ප්‍රමාණවත් ජල පහසුකම් නොමැති වීම සහ බඹර ප්‍රහාරයක දී ආරක්ෂාවීම ආදී කරුණු 15ක් සාකච්ඡා වී තිබේ.

මෙහිදී අදහස් දක්වමින් සංචාරක නියෝජ්‍ය අමාත්‍ය ආචාර්ය රුවන් රණසිංහ මහතා පැවසුවේ දෙසැම්බර් මස අන්තිම සතිය වන විට දිනකට 11,000කට අධික සංචාරකයින් ප්‍රමාණයක් දිවයිනට පැමිණ ඇති බවත් එළැඹෙන වසරේ සංචාරකයින් ලක්ෂ 30ක් මෙරටට ගෙන්වීමට අපේක්ෂා කරන බවත් ය.

මේ හේතුවෙන් ජාතික අවශ්‍යතාවක් සේ සලකා සංචාරක කර්මාන්තය සාර්ථක කර ගැනීමට සියලු දෙනා එක් විය යුතු බවත් අමාත්‍යවරයා මෙහිදී වැඩිදුරටත් අදහස් දක්වමින් පැවසීය.

ජාතික නිදහස් පෙරමුණේ නායක හිටපු අමාත්‍ය විමල් වීරවංශ  CID කැදවා ඇත.

ඒ අද(03) දිනයේ එහි පෙනී සිටින ලෙස කළ දැනුම්දීමක් මතය.

2022 වසරේ මාර්තු 03 වැනි දින දරුපවාහිනී වැඩසටහනකදී සිදු කළ ප්‍රකාශයක් සම්බන්ධයෙන් සිදුවන විමර්ශනයකට අදාළව ප‍්‍රකාශයක් ගැනීමට ඔහු කැඳවා ඇත.

හිටපු ඇමති බැසිල් රාජපක්ෂ ම සම්බන්ධව මුදල් විශුද්ධීකරණය වැළැක්වීමේ පනත යටතේ සිදු කරන විමර්ශනයකට අදාළව මෙලෙස ප්‍රකාශ සටහන් කර ගෙන ඇතැයි වාර්තා වේ.

උසස් පෙළ අධ්‍යාපනය ලබන දරුවන් පාසලෙන් ඈත් වීම පිළිබඳ සොයා බැලිය යුතු බවත්, කුමන හේතුවක් මත හෝ දරුවන්ට අධ්‍යාපන අවස්ථා මගහැරීම නතර විය යුතු බවත් අග්‍රාමාත්‍ය ආචාර්ය හරිනි අමරසූරිය පැවසුවා ය.

මහරගම ජාතික අධ්‍යාපන ආයතනයේ නිරීක්ෂණ චාරිකාවකට එක්වෙමින් අග්‍රාමාත්‍ය ආචාර්ය හරිනි අමරසූරිය මේ බව සඳහන් කළේ ය.

එහි දී වැඩිදුරටත් අදහස් දැක් වූ අග්‍රාමාත්‍ය ආචාර්ය හරිනි අමරසූරිය,

වර්තමානයේ පාසල්වල උසස් පෙළ පන්තිකාමරවල දරුවන්‍ රැඳී සිටින්නේ ඉතා අඩුවෙන් විශේෂයෙන් පිරිමි දරුවන් අධ්‍යාපන ක්‍රමයෙන් බොහෝදුරට ඈත්වෙමින් සිටිනවා. කුමන සමාජ, ආර්ථික හේතුවක් පදනම් කරගෙන හෝ දරුවන්ට අධ්‍යාපනය මගහැරීමට ඉඩ නොදිය යුතුයි. පූර්ව ළමා විය සංවර්ධනයේ සිට දහතුන් වසරක පාසල් අධ්‍යාපනය වගේම උසස් අධ්‍යාපනය සඳහා ඉඩ ප්‍රස්ථා සෑම දරුවකුටම විවිරව තිබිය යුතුයි. පුද්ගල හා සමාජ පරිවර්තනයක් සිදු කිරීම අධ්‍යාපනයේ මුඛ්‍ය අරමුණක් කර ගැනීම ඉතා වැදගත්.

ජනතාව ඉල්ලා සිටින සමාජ පරිවර්තනය සිදු කිරීම වෙනුවෙන් පරිවර්තනීය අධ්‍යාපන වෙනස සිදු කිරීම හරහා මෙරට දරුවන්ට නව ලෝකයට විවෘත වීමට අවස්ථා විවර කර දීමට අපේ රජය ක්‍රියා කරනවා. සමාජයට වගකියන පුරවැසියකු බිහි කරගැනීම සඳහා අධ්‍යාපනය වෙනුවෙන් වෙන් කරන සෑම ප්‍රතිපාදනයක් ම අපි සලකන්නේ රටේ ඉදිරි ආයෝජනයක් ලෙසයි. දිගුකාලීන ප්‍රතිලාභ හිමි මෙම සංකීර්ණ ක්‍රියාවලිය වෙනුවෙන් ජාතික අධ්‍යාපන ආයතනයට සුවිශේෂ කාර්යභාරයක් පැවරෙන බවද අග්‍රාමාත්‍ය ආචාර්ය හරිනි අමරසූරිය පැවසුවා ය.

ජාතික අධ්‍යාපන ආයතනයේ අධ්‍යක්ෂ ජෙනරාල් මහාචාර්ය මංජුලා විතානපතිරණ, නියෝජ්‍ය අධ්‍යක්ෂ ජෙනරාල්වරුන්, අධ්‍යක්ෂවරුන් ඇතුළු නිලධාරීන් මෙම අවස්ථාවට සහභාගී වූහ.

පෞද්ගලික හා අර්ධ රාජ්‍ය අංශයේ සේවකයන්ගේ සේවාවන් වඩාත් කඩිනමින් ඉටු කිරීම සදහා කම්කරු අමාත්‍යාංශය විසින් නව වට්ස්ඇප් (WhatsApp) අංකයක් හඳුන්වා දීමට පියවර ගෙන තිබේ.

ඒ, කම්කරු අමාත්‍යාංශය හා කම්කරු දෙපාර්තමේන්තුව වෙතින් සහන, මැදිහත්වීම් ඉල්ලා මහ ජනතාව විසින් ඉදිරිපත් කරන ලිපි සම්බන්ධයෙන් කඩිනම් ප්‍රතිචාර දැක්වීම සඳහාය.

ඒ අනුව කම්කරු ගැටලු 070 722 7877 යන අංකය ඔස්සේ යොමු කළ හැකිය.

කාර්මික සාමය පවත්වාගෙන යාම, එය තවදුරටත් ශක්තිමත් කිරීම සහ මෙරට පෞද්ගලික හා අර්ධ රාජ්‍ය අංශයේ සේවකයන්ගේ සේවා ගැටලුවලට කඩිනම් සහන සැලසීම කම්කරු දෙපාර්තමේන්තුවේ ප්‍රධාන අරමුණ වේ.

ඉන් මහජනතාවගේ කාලය සහ වියදම් අවම කිරීම හා කඩිනම් ප්‍රතිචාර දැක්වීම වර්ධනය කිරීම සහ නිලධාරීන්ගේ කාලය කළමනාකරණය කළ හැකිය.

හිටපු පාර්ලිමේන්තු මන්ත්‍රිවරයෙකු, දේශපාලන විචාරයෙකු මෙන්ම විද්වතෙකු වන ජේ. ආර්. පී. සූරියප්පෙරුම  අද (02) පෙරවරුවේ අභාවප්‍රාප්ත වී තිබේ.

1928 ජූනි 08 වැනිදා උපත ලැබූ ඒ මහතා මිය යනවිට 96 වියේ පසුවිය.

කාලයක පටන් අසනීප තත්වයෙන් පසුවූ ඔහු රෝහල්ගතව ප්‍රතිකාර ලබමින් සිටියදී මියගිය බවය වාර්තා වේ.

සූරියප්පෙරුම මහතා ශ්‍රී ලංකා නිදහස් පක්ෂයේ දැදිගම සංවිධායක ලෙසද කලක් කටයුතු කළ අතර 2010-15 කාලයේ පාර්ලිමේන්තුවේ ජාතික ලැයිස්තු මන්ත්‍රී ධූරයක්ද දැරීය.

හිටපු විශ්වවිද්‍යාල ආචාර්‍යවරයෙකු ද වූ සූරියප්පෙරුම ස්වාධීන රූපවාහිනියේ දොරමඩලාව වැඩසටහන ඔස්සේ ‘හසන්ත සමග’ සිදු කළ සංවාද කාලයක් ජනප්‍රිය විය.

ප්‍රකට දේශපාලන විචාරකයකු, දේශපාලනඥයකු, අර්ථ ශාස්ත්‍රඥයකු සහ හිටපු විශ්වවිද්‍යාල ආචාර්යවරයකු වන ජේ.ආර්.පී. සූරියප්පෙරුම දිගු කලක් පුවත්පත්, ගුවන්වි­දුලි හා රූප­වා­හිනී මාධ්‍ය­යන්හි දේශ­පා­ලන, ආර්ථික හා ශාස්ත්‍රීය සංවා­ද­ව­ලට සහ­භාගී වෙමින් ශ්‍රී ලාංකේය සමා­ජය දැනු­මෙන් පෝෂ­ණය කිරී­මට මහත් වෙහෙ­සක් දැරු­වේය.

නව වසරේ මුළු රටම අලුත් පරිවර්ථනයකට ලක්කිරීමේ අභියෝගය රජය සතු වන බව ජනාධිපති අනුර කුමාර දිසානායක පවසයි.

ඔහු මේ බව පැවසුවේ, Clean Sri Lanka ජාතික වැඩසටහනේ සමාරම්භක අවස්ථාවට එක්වෙමිනි.

එම අභියෝගය ඉටු කිරීම වෙනුවෙන් මුළු දේශපාලන අධිකාරියම පෙනී සිටින බව ද ජනාධිපතිවරයා පැවසුවේය.

Clean Sri Lanka ව්‍යාපෘතියේ සමාරම්භක උත්සවය ජනාධිපති කාර්යාලයේදි අද(01) පෙරවරුවේ ආරම්භ කෙරුණේ, ජනාධිපතිවරයා ජාතික ධජය එසවීමත් සමගයි

මෙම අවස්ථාවට අග්‍රමාත්‍ය අචාර්ය හරිනි අමරසූරිය, මැති ඇමතිවරුන්, රාජ්‍ය නිලධාරීන් ඇතුළු පිරිසක් සහභාගි විය.

Clean Sri Lanka වෙබ් අඩවිය එළිදැක්වීම ද මෙහි දී සිදු කෙරුණි.

පහුගිය මාස කීපය තුළ රාජ්‍ය සේවකයින් ලබා දුන්න සහයෝගයට ස්තූතිවන්ත වන බවත්, නව වසරේ පෙරටත් වඩා මහන්සියෙන් උද්යෝගයෙන් යුතුව ජනතාවට රාජ්‍ය සේවයෙන් ඉටු විය යුතු සේවය ඉෂ්ට කරන්න සියලු දෙනාම කැප විය යුතු බවත් අග්‍රාමාත්‍ය ආචාර්ය හරිනි අමරසූරිය පැවසුවා ය.

ජනාධිපති අනුර දිසානායකගේ ප්‍රධානත්වයෙන් අද ඇරඹී clean Sri lanka වැඩසටහනට සමගාමීව අග්‍රාමාත්‍ය කාර්යාලයේ වැඩ කටයුතු ආරම්භ කරමින් අග්‍රාමාත්‍ය ආචාර්ය හරිනි අමරසූරිය මේ බව සඳහන් කළේ ය.

මෙම අවස්ථාවට අග්‍රාමාත්‍ය කාර්යාලයේ අතිරේක ලේකම් වරුන්, සහකාර ලේකම්වරුන් ඇතුළු අග්‍රාමාත්‍ය කාර්යාලයේ සියලු නිලධාරීන් එක් විය.

උදා වූ 2025 වසර ලක් වාසි සියළු දෙනාගේ සිතුම් පැතුම්, ප්‍රාර්ථනා ඉටුවන, සියළු ලෝක වාසීන්ට යස ඉසුරෙන් පිරුණු, නිරෝගීමත් සුබම සුබ නව වසරක් වේවායි newstube.lk පාඨක ඔබ සැමට ප්‍රාර්ථනා කරන්නෙමු !!!!!!!.

දුම්රිය  වෙන් කළ ආසන ප්‍රවේශපත්‍ර සහ මුදල් ආපසු ගෙවීම් සම්බන්ධව දුම්රිය දෙපාර්තමේන්තුව විශේෂ නිවේදනයක් නිකුත් කර ඇත.

එහි සඳහන්ව ඇත්තේ දුම්රිය ආසන වෙන් කිරීමේදී මගියාගේ ජාතික හැඳුනුම්පත් අංකය හෝ විදෙස් ගමන් බලපත්‍ර අංකය ඇතුළත් කිරීම අනිවාර්ය කර ඇති බවයි.

එමෙන්ම දුම්රිය ස්ථානයට ඇතුළත් වීමේදි හා දුම්රිය තුළ ප්‍රවේශපත්‍රය පරික්ෂා කිරීමේදී ප්‍රවේශපත්‍රයේ සඳහන් පරිදි ජාතික හැඳුනුම්පත් අංකය හෝ විදෙස් ගමන් බලපත්‍ර අංකය පරික්ෂා කර තහවුරු කර ගැනීමට කටයුතු සූදානම් කර ඇති බවත් එහි සඳහන් වේ.

එමෙන්ම එළැඹෙන ජනවාරි 01 වැනිදා සිට වෙන්කළ ආසන ප්‍රවේශපත්‍රවල මුදල් ආපසු ඉල්ලුම් කිරීමේදි ප්‍රවේශපත්‍ර හිමිකරුගේ අනන්‍යතාව තහවුරු කර ගැනීම සඳහා අනිවාර්යයෙන් මගියාගේ ජාතික හැඳුනුම්පතේ හෝ විදෙස් ගමන් බලපත්‍රයේ පිටපතක් දුම්රිය ස්ථානය වෙත ඉදිරිපත් කළ යුතු බවත් එම නිවේදනයේ සඳහන් කර ඇත.

05 වසර ශිෂ්‍යත්ව විභාගය සම්බන්ධයෙන් ශ්‍රේෂ්ඨාධිකරණය ලබාදුන් තීන්දුව අනුව වඩාත් සුදුසුම විකල්පය අධ්‍යයනය කිරීමට යම් කාලයක් අවශ්‍ය බව විභාග කොමසාරිස් ජනරාල් අමිත් ජයසුන්දර  පවසයි.

අද (31) පැවැති විශේෂ ප්‍රවෘත්ති සාකච්ඡාවකදී ඔහු මේ බව පැවසීය.

"අද ශ්‍රේෂ්ඨාධිකරණ තීන්දුව මගේ අතට ලැබුණා. පිටු 68ක තීන්දුවක්. වඩාත් සුදුසුම තීරණය ගෙන ක්‍රියාත්මක වෙන්න කියලා අධිකරණය නියෝග කළා. මේක දීර්ඝ ලෙස අධ්‍යයනය කරමින් සිටිනවා. විකල්ප 3 අතරින් වඩාත් සුදුසුම විකල්පය මොකක්ද කියලා මට එකපාරටම කියන්න පුළුවන්කමක් නැහැ. ඒ පිළිබඳව අධ්‍යයනය කරන්න ඕනේ."

"සාමාන්‍යයෙන් ශිෂ්‍යත්ව විභාගයේ ප්‍රතිඵල ලබාදෙන්න දින 40ක වගේ කාලයක් ගත වෙනවා. ප්‍රමුඛත්වය දෙන්න කටයුතු කරනවා."

පසුගිය සැප්තැම්බර් 15 වනදා පැවැත්වුණු 05 වසර ශිෂ්‍යත්ව විභාගයේ පළමු ප්‍රශ්න පත්‍රයේ කලින් පිටවූ ප්‍රශ්න තුන සඳහා නිදහස් ලකුණු ලබාදීමට ගෙන තිබෙන තීරණය තුළින් මූලික මිනිස් අයිතිවාසිකම් උල්ලංඝනය වන බව ශ්‍රේෂ්ඨාධිකරණය අද තීන්දු කළේය.

ඒ අනුව මෙම ගැටලුව නිරාකරණය කිරීම සඳහා විශේෂඥයින් විසින් ඉදිරිපත් කර තිබෙන නිර්දේශ තුන අතුරින් සුදුසු නිර්දේශයක් තෝරා ගෙන වහාම එය ක්‍රියාත්මක කිරීමට පියවර ගන්නා ලෙස විනිසුරු මඩුල්ල විසින් විභාග කොමසාරිස් ජනරාල්වරයාට නියෝග කර තිබුණි.

රාජ්‍ය සේවක කප්පාදුවක් සිදුකිරීමට රජයට කිසිදු බලාපොරොත්තුවක් නැති බව සෞඛ්‍යා ජනමාධ්‍ය අමාත්‍ය කැබිනට් ප්‍රකාශක නලින්ද ජයතිස්ස  අද කැබිනට් තීරණ දැනුම්දීමේ මාධ්‍ය හමුවට එක් වෙමින් ප්‍රකාශ කළේය.

රාජ්‍ය සේවයේ සිටින පිරිස ඵලදායි ලෙස හා කාර්යක්ෂමව සේවයේ යෙදවීම රජයේ අපේක්ෂාව බව අමාත්‍යවරයා වැඩිදුරටත් සඳහන් කළේය.

“රැකියා කප්පාදුවකට යන්න බලාපොරොත්තුවක් නෑ. මොන විදියට බඳවා ගැනීම් කළත් ඒ අය රජයේ සේවයට ඇතුළත් වෙලා තියෙනවා. ඒ මත තමන්ගේ ජීවිතය සැලසුම් කරගෙන තියෙනවා. සමහරු බැංකු ණය අරන් ඇති.නමුත් රජයෙන් ඔවුන් වෙනුවෙන් විශාල මුදලක් වියදම් කරනවා. මහජනතාවට උපරිම සේවයක් ලබාදීමට රාජ්‍ය සේවය කළමනාකරණය කරනවා. රාජ්‍ය සේවය බර වැඩියි කියන්නේ රාජ්‍ය සේවකයන් ඉවත් කරනවා කියන එක නෙමෙයි” යනුවෙන්ද අමාත්‍යවරයා මෙහිදී සඳහන් කෙරිණි.

නව යුද හමුදාපති මේජර් ජෙනරාල් ලසන්ත රොද්‍රිගු අද (31) උදෑසන සිය ධුරයේ වැඩභාරගෙන තිබෙයි.

ඒ අකුරේගොඩ පිහිටි යුද හමුදා මුලස්ථානයේ දීය.

ඔහු ශ්‍රී ලංකා යුද හමුදාවේ 25 වන යුද හමුදාපතිවරයා ලෙස මෙලෙස අද සිය ධූරයේ වැඩභාර ගත්තේය.

නව යුද හමුදාපති මේජර් ජෙනරාල් ලසන්ත රොද්‍රිගු  ශ්‍රී ලංකා යුද හමුදාවේ නියෝජ්‍ය මාණ්ඩලික ප්‍රධානිවරයා ලෙස ද කටයුතු කර තිබුණි.

ශ්‍රී ලංකා යුද හමුදාවේ වැඩිම කාලයක් සක්‍රීය සේවයේ යෙදුන හමුදා නිලධාරියා ලෙස හිටපු යුද හමුදාපති, 08වැනි ආරක්ෂක මාණ්ඩලික ප්‍රධානී ජෙනරාල් ශවේන්ද්‍ර සිල්වා  2025 ජනවාරි 01 වැනිදා සිට ශ්‍රී ලංකා යුද හමුදාවට සමු දෙයි.

1984 මාර්තු 5 වන දින යුද හමුදාවේ නිත්‍ය බඳවා ගැනීම් 19 යටතේ හමුදා පුහුණුවට එක්ව, සිය පුහුණුවීම් වලින් අනතුරුව 1985 වසරේ නොවැම්බර් මස 16 වැනිදා ගජබා රෙජිමේන්තුවට අනුයුක්තව හමුදා සේවයට එක්වූ ශවේන්ද්‍ර සිල්වා යුද හමුදාවෙන් විශ්‍රාම යන්නේ වසර 41ක සේවා කාලයක් අවසන් කරමිනි.

යුද ගැටුම් පැවති අවසන් සමයේදී 58 වැනි සේනාංකයේ සේනාධිපතිවරයා ලෙස කටයුතු කළේ ශවේන්ද්‍ර සිල්වාය. සිව් වැනි ඊලාම් යුද්ධයේදී වැඩිම දුරක් ගමන් කළ සේනාංකය වූයේ 58 වැනි සේනාංකයයි.

තම දිවි නොතකා සගයන්ගේ දිවි බේරා ගැනීම වෙනුවෙන් පිරි නැමෙන වීර විකුම වීභුෂණ, රණ වික්‍රම,
රණසූර පදක්කම් තුනම මුලින් දිනා ගත් නිලධාරියා ඔහුය. එකල ඔහු කනිටු ලුතිනන් වරයකි. මේ වන විට ඔහුට පදක්කම් 20ක් හිමිව තිබේ.

එයාර් බොබයිල් බ්‍රිගේඩියට අණ දීමෙන් පසු කොමාන්ඩෝ බළසේනාවට අණ දුන් එකම බළසේනාධිපති ශවේන්ද්‍ර සිල්වා මහතාය. යුද හමුදා ඉතිහාසයේ ලාබාලතම තරු දෙකේ ජෙනරාල්වරයා වූයේ ශවේන්ද්‍ර සිල්වාය. යුද හමුදා ඉතිහාසයේ වැඩිම කාලයක් මේජර් ජනරාල් නිලය දැරූ නිලධාරියා වන්නේද ශවේන්ද්‍ර සිල්වාය.

සේනාධිනායක එනම් ජනාධිපතිවරු හතර දෙනෙක් යටතේ සිටි යුද හමුදාවේ සේවය කළ එකම ජ්‍යෙෂ්ඨ හමුදා නිලධාරියා ලෙසින් ද ජෙනරාල් ශවේන්ද්‍ර සිල්වාව සැලකේ. එසේම ජනාධිපතිවරු සහ අගමැතිවරු සිව් දෙනෙක් යටතේ සේවය කිරීමට ඔහුට හැකිවිය.

යුද්ධය අවසන්වීමෙන් පසුව 2010 වසරේදී එක්සත් ජාතීන්ගේ සංවිධානයේ නිත්‍ය නියෝජිත සහ තානාපතිධූරයට පත් කළ අතර ඔහු වසර 4ක් එම ධුරයේ කටයුතු කළේ සක්‍රීය හමුදා සේවයේ යෙදී සිටියදී තානාපතිවරයෙක් ලෙස කටයුතු කිරීමේ අවස්ථාව ද හිමිකරගනිමිනි.

කොවිඩ් මර්දන කමිටුවේ ප්‍රධානියා ලෙස ද ශවේන්ද්‍ර සිල්වා කටයුතු කළේය.

ජනතාව මෙවර දේශපාලන සුනාමියක් ගෙනා බව ත් ඔවුන්ගේ ඊළඟ සුනාමිය පැමිණෙන්නේ රාජ්‍ය සේවයේ ඉහළ නිලධාරීන්ට එරෙහිව බව ත් කෘෂිකර්ම, පශු සම්පත් හා වාරිමාර්ග අමාත්‍ය කේ.ඩී. ලාල්කාන්ත අනතුරු අඟවයි.

බංකොලොත් රට ගොඩනැඟීමට ජනතාව සිය ඡන්දය භාවිත කළා සේ ම රාජ්‍ය සේවයේ ඉහළ නිලධාරීන් ද ඊට අවශ්‍ය සහාය ලබා නොදුනහොත් එම ජනතාව ම ඔවුන්ට එරෙහිව නැඟී සිටිනු ඇතැයි ලාල්කාන්ත කීය.

අමාත්‍යවරයා අවධාරණය කළේ, වගකිවයුතු රජයේ ඉහළ නිලධාරීන්ට තම රාජකාරිය මෙන් ම ඔවුන්ගේ වගකීම හා වගවීම පිළිබඳ පැහැදිලි අවබෝධයක් තිබිය යුතු බවයි.

දූෂණයෙන්, වංචාවෙන්, නාස්තියෙන් තොර ජනතාවාදී ආණ්ඩුවක් ගොඩනැගීම පමණක් රටේ දියුණුවට හා අදූෂිත රාජ්‍යයක් ගොඩනැගීමට ප්‍රමාණවත් නොවන අතර ඊට රාජ්‍ය සේවයේ ද කැපකිරීම, අවංකභාවය හා ඉහළ දායකත්වයක් අවශ්‍ය බව හෙතෙම ප්‍රකාශ කළේය.

මීට පෙර සමාජගතව තිබුණේ රටේ ඉහළ පුටුවේ සිට දේශපාලනයට සම්බන්ධ මහජන නියෝජිතයන් රාජ්‍ය දේපළ, සම්පත් මෙන්ම මහජන ධනය කොල්ල කෑ දූෂිතයන් බව වුවත් එකී වංචා දූෂණ හා අක්‍රමිකතාවලට රාජ්‍ය සේවයේ ඉහළ නිලධාරීන් ද සැලකිය යුතු පිරිසක් හවුල් බව සමාජයට ඒත්තු ගැන්වුණේ සුළු ප්‍රමාණයක් බවද ලාල්කාන්ත පෙන්වා දුන්නේය.

බොහෝ රාජ්‍ය ආයතනවල කාර්යයන් පසුගිය කාලවකවානුව පුරා ම ඉතා විශාල ලෙස අකර්මණ්‍ය වී ඇති සේම ඒවා නඩත්තු කිරීමට ද විශාල මුදලක් වැය වී ඇති බව අමාත්‍ය ලාල් කාන්ත පැවසිය.

රට ගොඩනැඟීම, ආයතන ශක්තිමත් කිරීම ඇතුළු කාර්යයන් සඳහා දේශපාලන අධිකාරියේ නායකත්වය ලබාදීමට මහජන නියෝජිතයන් ලෙස ඊට අවශ්‍ය වන යටිතල පහසුකම් සම්පාදනය කරදීමටත් ඊට අවශ්‍ය වන මූල්‍ය ප්‍රතිපාදන වෙන්කර දීමටත් හැකි නමුත් එය ක්‍රියාත්මක කළ යුත්තේ කවුරු විසින්ද යන්න නිලධාරීන් අවබෝධ කරගත යුතු බවද අමාත්‍යවරයා පැවසීය.

ජනාධිපති අනුර කුමාර දිසානායකද පසුගිය දා රාජ්‍ය සේවයේ ඉහළ නිලධාරීන් සම්බන්ධ වූ සමුළුවකදී පැවැසුවේ රාජ්‍ය සේවය ප්‍රතිසංස්කරණය විය යුතු බවයි.

ජනාධිපති අනුර කුමාර දිසානායක  සහ ආගමන හා විගමන දෙපාර්තමේන්තුව, ශ්‍රී ලංකා රේගුව සහ ගුවන් තොටුපළ හා ගුවන් සේවා සමාගම යන ආයතන ප්‍රධානීන් අතර සාකච්ඡාවක් ජනාධිපති කාර්යාලයේදී අද (28) පැවැත්විණි.

මෙහිදී මත්ද්‍රව්‍ය ඇතුළු නීතිවිරෝධි ද්‍රව්‍ය රට තුළට පැමිණීම වැළැක්වීම, ගුවන් තොටුපළ හා රේගු පරිශ්‍රයේ දූෂණ, වංචා සහ අක්‍රමිකතා වැළැක්වීම, නීතිවිරෝධී ලෙස පුද්ගලයන් රටින් පිටවීම වැළැක්වීම පිළිබඳව දීර්ඝ ලෙස සාකච්ඡාවට ලක් කෙරිණි.

ඒ අනුව ආගමන හා විගමන දෙපාර්තමේන්තුව, ශ්‍රී ලංකා රේගුව සහ ගුවන් තොටුපළ හා ගුවන් සේවා සමාගම යන ආයතන තුනෙහි ඒකාබද්ධ කැමරා පද්ධතියක් සහ ඒකාබද්ධ නිරීක්ෂණ මැදිරියක් ස්ථාපිත කරන ලෙස ජනාධිපති අනුර කුමාර දිසානායක මහතා මෙහිදී උපදෙස් දුන්නේය.

එසේම දැනට පවතින ස්කෑන් යන්ත්‍ර වෙනුවට වැඩිදියුණු කරන ලද නවීන ස්කෑන් යන්ත්‍ර යොදා ගනිමින් මෙම ආයතනයන්හි සිදුවන ජාවාරම් වළක්වා ගැනීමට ප්‍රායෝගික නව ක්‍රියාවලියක් ආරම්භ කරන ලෙස ද ජනාධිපතිවරයා සඳහන් කළේය.

රටේ ජනතාව තුළ රේගුව පිළිබඳ පවතින දුර්මත දුරු කළ යුතු බවත්, ඒ වෙනුවෙන් දැඩි විනය හා නීතිමය ක්‍රියාමාර්ග ගැනීමට කඩිනමින් පියවර ගන්නා ලෙස ද ජනාධිපති අනුර කුමාර දිසානායක  මෙහිදී අවධාරණය කළේය.

විදේශ කටයුතු, විදේශ රැකියා සහ සංචාරක අමාත්‍ය විජිත හේරත්, මහජන ආරක්ෂක හා පාර්ලිමේන්තු කටයුතු අමාත්‍ය ආනන්ද විජේපාල, ජනාධිපති ලේකම් ආචාර්ය නන්දික සනත් කුමානායක, රේගු අධ්‍යක්‍ෂ ජනරාල් සරත් නෝනිස්, ආගමන විගමන පාලක ජනරාල් (වැඩබලන) බී.එම්.ඩී. නිලූෂා බාලසූරිය,මුදල් අමාත්‍යාංශයේ අධ්‍යක්ෂ ජනරාල් (ජාතික අයවැය) ජූඩ් නිලුක්ෂාන්, ගුවන් තොටුපළ හා ගුවන් සේවා සමාගමේ සභාපති එයාර් චීෆ් මාර්ෂල් හර්ෂ අබේවික්‍රම ඇතුළු නිලධාරීන් පිරිසක් මෙම අවස්ථාවට සහභාගි වූහ.